Blog

ශ‍්‍රී ලංකාව තුළ කොවිඩ්-19 ආසාදතයින් සංඛ්‍යාව අද දින ප.ව 23.04 වන විට 663දක්වා වර්ධනය වූ බව සෞඛ්‍ය ප‍්‍රවර්ධන කාර්යාංශය සදහන් කරයි. ඒ අනුව අද දිනය තුළ නව ආසාදිතයින් 14දෙනකු වාර්තා වී ඇත.

මේ අතර අද දිනය වන විට ගෝලීය වශයෙන් වාර්තා වන කොවිඩ්-19 ආසාදිතයින් හා මරණ සංඛ්‍යාව ගැන ජෝන්ස් හොප්කින්ස් විශ්වවිද්‍යාලයේ කොරෝනාවෛරස් සම්පත් මධ්‍යස්ථානයේ නවතම වාර්තා දක්වන්නේ ගෝලීය වශයෙන් කොවිඩ්-19 ආසාදිතයින් 3,231,701ක් වාර්තා වී ඇති අතර මරණ සංඛ්‍යාව 229,447ක් වන බවයි.

තව දුරටත් ලෝකයේ වැඩිම ආසාදිතයින් හා මරණ සංඛ්‍යාව ඇමෙරිකා එක්සත් ජනපදයෙන් වාර්තා වන අතර එහි ආසාදිතයින් සංඛ්‍යාව 1,046,022ක් වන අතර මරණ සංඛ්‍යාව 61,288කි.

ගොවියා, පාරිභෝගිකයා සහ නිෂ්පාදන සැපයුම්කරු අතර යාන්ත්‍රණයට ඩිජිටල් තාක්ෂණය යොදා ගැනීමේ හැකියාව පිළිබඳව ජනාධිපති ගෝඨාභය රාජපක්ෂ මහතාගේ අවධානය යොමු වෙයි.

කෘෂිකර්ම, අභ්‍යන්තර වෙළෙඳ, පාරිභෝගික සුබසාධන, වැවිලි හා  අපනයන අමාත්‍යාංශ ලේකම්වරු සහ හෙක්ටර් කොබ්බෑකඩුව ගොවි කටයුතු පර්යේෂණායතනය ඇතුළු තවත් ආයතන කිහිපයක නිලධාරීන් සමග විමර්ශන සාකච්ඡාවක් අද (30) දහවල් ජනාධිපති කාර්යාලයේ දී පැවැත්විණි.

වෙළෙඳ, අපනයන, පොහොර ඇතුළු සේවා සැපයුම්, තොග සැපයුම්කරුවන්,තොග ගැනුම්කරුවන්, භාණ්ඩ එකතුකරන්නන්, හෝටල් වැනි මහා පරිමාණ ගැණුම්කරුවාගේ සිට දෛනික පාරිභෝගිකයා දක්වා වූ කෘෂි බෝග අලෙවිකරණයට ඩිජිටල් තාක්ෂණය යොදා ගැනීමේ හැකියාව  දීර්ඝ ලෙස සාකච්ඡාවට ලක් කෙරිණ. 

කෘෂි අස්වැන්න සඳහා ඉහළ මිලක් වෙනුවෙන් ගොවියාට තරග කිරීමේ හැකියාව ලබා දීමටද මින් අපේක්ෂා කෙරේ. පහසු සහ සරල තාක්ෂණය භාවිත කරමින් ඕනෑම අයෙකුට ඩිජිටල් හුවමාරුවට සම්බන්ධවීමේ හැකියාව තිබිය යුතු බව ජනාධිපතිවරයා අවධාරණය කළේය. මෙහි අවසන් ප්‍රතිඵලය භව බෝගයෙන් ස්වයංපෝෂිත ශ්‍රී ලංකාවක් බිහි කිරීම බව ජනපතිවරයා පැවසීය. 

ප්‍රාදේශීය ලේකම් කොට්ඨාස, තාක්ෂණය මගින් යා කරමින් ගොවියා සහ ගැනුම්කරුවා පහසුවෙන් සම්බන්ධ කිරීමට ද ඩිජිටල් තාක්ෂණය උපයෝගි කර ගත හැකිය. එමගින් අතරමැදියාගෙන් ලැබෙන මුදලට වඩා වැඩි මිලක් ගොවියාට ලබා ගැනීමට ද හැකිවනු ඇතැයි අපේක්ෂා කෙරේ.

රටේ පාරිභෝගික අවශ්‍යතා සමීක්ෂණයට ද මේ ක්‍රමය දායක කරගත හැකිය. මධ්‍යම ගමනා ගමන මණ්ඩලය, දුම්රිය සහ තැපැල් දෙපාර්තමේන්තුවද ඩිජිටල් තාක්ෂණ මෙහෙයුම් ප්‍රවාහන ක්‍රියාවලියට එක් කරගත යුතු බව ජනාධිපතිතුමා සඳහන් කළේය.

අමාත්‍ය චමල් රාජපක්ෂ, ජනාධිපති ලේකම් පී.බී. ජයසුන්දර යන මහත්වරු ද සාකච්ඡාවට එක් වූහ.

ශ්‍රී ලංකාවට පැමිණීමට අපේක්ෂාවෙන් සිටින විදෙස් ගත ශ්‍රමිකයන් ද කඩිනමින් දිවයිනට ගෙන්වා ගැනීමට රජය කටයුතු කරමින් සිටන බව කාර්මික අපනයන, අයෝජන ප්‍රවර්ධන, සංචාරක හා ගුවන්සේවා ඇමති ප්‍රසන්න රණතුංග මහතා පවසයි. ඔහු පෙන්වා දෙන්නේ දැනටමත් ඔවුන් පිළිබද තොරතුරු රැස් කිරීම විදේශ කටයුතු අමාත්‍යංශය මගින් සිදු කරනු ලබන බවයි.

පසුගිය සතියේ සාක් රටවල සිටින  ශ්‍රී ලාංකික සිසු සිසුවියන් ගෙන්වා ගැනිමට ප්‍රමුඛතාවය ලබා දුන් බවත් සෙසු රට වල සිටින විශ්ව විද්‍යාල සිසු සිසුවියන් ගෙන්වා ගැනීම ඉදිරි දිනවලදී සිදු කෙරෙන බවත් ඇමතිවරයා සදහන් කරයි. එම සිසු සිසුවියන් ගෙන්වන අතරතුරම එම රටවල් වල ශ්‍රී ලංකාවට පැමිනීමට අපේක්ෂාවෙන් සිටින ශ්‍රමිකයන් ගෙන්වා ගැනීම කෙරෙහි රජයේ අවධානය යොමුව තිබේ. ඒ අනුව විදේශ කටයුතු අමාත්‍යංශය ඊට අදාල ඉදිරි පියවර ගනිමින් සිටින බව ඇමතිවරයා සදහන් කරයි.

මේ වන විට විදේශගත ශ්‍රී ලාංකිකය සිසු සිසුවියන් දහසකට අධික පිරිසක් මෙරටට පැමිණ තිබේ. ඔවුන් සියළු දෙනා නිරෝධායන කටයුතු සදහා ආරක්ෂක අංශ විසින් පවත්වාගෙන යනු ලබන නිරෝධායන මධ්‍යස්ථාන වෙත යොමුකර ඇත. මෙලෙස දිවයිනට පැමිණියේ ඉන්දියාව, පාකිස්ථානය, බංගලාදේශය, මාලදිවයින, වැනි රට වල උසස් අධ්‍යාපනය හැදැරීම සදහා ගොස් කෝවිඩ් 19 වසංගතය හේතුවෙන් එම රටවල විශ්ව විද්‍යාල වල සිරව සිටි  සිසු සිසුවියෝයි.

කොවිඩ් 19 වසංගතය හේතුවෙන් ලොව පුරා ගුවන් ගමන් අඩාල වී ඇති අතර ගුවන් තොටුපොල රැසක් වසා දමා තිබේ. මේ නිසා විදේශගත ශ්‍රී ලාංකිකයන් නැවත දිවයිනට ගෙන්වා ගැනීමේදී රාජ්‍ය තාන්ත්‍රික මැදිහත් වීම පවා සිදු කිරීමටද සිදුව තිබෙන බව ඇමති ප්‍රසන්න රණතුංග මහතා පවසයි.

ජනාධිපති ගෝඨාභය රාජපක්ෂ මහතාගේ හා අගමැති මහින්ද රාජපක්ෂ මහතාගේ අදහස වී ඇත්තේ විදේශයන් හි පීඩාවට පත්ව සිටින ශ්‍රී ලාංකිකයන් මෙරටට ගෙන්වා  ගැනීමට හැකි සියලු පියවර ගැනීමයි. මෙලෙස ගෙන්වා ගනු ලබන සියලුම විදේශගත ශ්‍රී ලාංකිකයන් නිරෝධායන මධ්‍යස්ථාන වෙත යොමු කිරීමට ද රජය තීරණය කර තිබේ.

එක් අතෙකින් රට තුළ කෝවිඩ් 19 වසංගතය පැතිර යාම වලක්වන අතරතුරම රටට කෝවිඩ් 19 වසංගතය නැවත ඇතුළු වීම වැලැක්වීමද රජය පියවර ගනිමින් සිටියි. ඒ නිසා මෙම විදේශගත ශ්‍රමිකයන් ගෙන්වා ගැනීම සිදු කල යුතුව ඇත්තේද ක්‍රමානු කූලව බවද ඇමතිවරයා පෙන්වා දෙයි.

මේ දිනවල දෙමව්පියන් විසින් අන්තර්ජාලය හරහා දරුවන් ඉගෙනුම් ඉගැන්වීම් ක්‍රියාවලියට යොමු කිරීමට උනන්දු වීම හේතුවෙන් බොහෝමයක් දරුවන් මෙය අවස්ථාවක් කරගනිමින් අන්තර්ජාලය සහ සමාජ මාධ්‍ය තුළ අනිසි ලෙස හැසිරීමට කටයුතු කරන බවක් ශ්‍රී ලංකා තොරතුරු තාක්ෂණ සංගමයට පෙනීගොස් ඇත.

විශේෂයෙන්ම දෙමව්පියන් තුළ තාක්ෂණය සහ අන්තර්ජාලය පිලිබදව ඇති අනවබෝධය නිසා කුඩා ළමුන් අන්තර්ජාලය තුළ සිදුකරන්නේ මොනවාදැයි කියා නිසි සොයාබැලීමක් සිදු නොකරන නිසා කුඩා ළමුන් ඉතා පහසුවෙන් සයිබර් අපරාධ කරුවන්ගේ ගොදුරක් බවට පත්විය හැකිය.

තවද කුඩා ළමුන් ඔවුන්ගේ නොදැනුවත් භාවය මත අන්තර්ජාලයට සහ සමාජ මාධ්‍ය වෙත එක්කරනු ලබන විවිධ වීඩියෝ පට සහ විවිධ අන්තර්ගතයන් වෙනත් ළමුන් විසින් අනුකරණය කිරීමේ ඉහළ හැකියාවක් තිබෙනා අතර මේ දිනවල එවැනි ආකාරයේ වීඩියෝපට කිහිපයක් සමාජ මාධ්‍ය වෙබ් අඩවි හරහා ඉතා වේගයෙන් සමාජ මාධ්‍ය පරිශීලකයන් අතර සංසරණය වේ.

මෙම තත්ත්වය පිලිබදව අවධානය යොමු කිරීමට කටයුතු කරනා ලෙස අප කාන්තා හා ළමා කාර්යංශයෙන් ඉල්ලා සිටින අතර කුඩා දරුවන් අන්තර්ජාලය භාවිතා කරමින් සිදුකරන්නේ මොනවාදැයි කියා නිරන්තරයෙන් සොයාබැලීමට කටයුතු කරන ලෙස අප ශ්‍රී ලංකා තොරතුරු තාක්ෂණ සංගමය ලෙස දෙමව්පියන්ට දැනුම් දෙමු.

අඩු පාඩු සහ මගහැරීම් සැලකිල්ලට ගනිමින් කොරෝනා වෛරසය රට තුළ මර්දනයට ගෙන ගිය වැඩපිළිවෙළ සාර්ථක කරගත යුතුව ඇතැයි ජනාධිපති ගෝඨාභය රාජපක්ෂ මහතා අවධාරණය කරයි.

රජය වෛරසය මර්දනයට ගත් ක්‍රියාමාර්ග ලොව සියලු රටවල් අභිබවා ඉදිරියෙන් ඇති බව වසංගත රෝග පිළිබඳ ලොව ප්‍රධාන පෙළේ ප්‍රවීණයෙකු වන හොංකොංහි වෙසෙන විශේෂඥ වෛද්‍ය මහාචාර්ය මලික් පීරිස් මහතා පෙන්වා දී ඇතැයි වෛද්‍යවරු පැවසූහ.

ඊට දායක වූ සෞඛ්‍ය හා ආරක්ෂක අංශ ඇතුළු සෙසු සියලු කණ්ඩායම් ඇගයීමට ලක් කළ ජනාධිපතිවරයා එම තත්ත්වය තවදුරටත් ආරක්ෂා කරගනිමින් පවත්වා ගත යුතු බව සඳහන් කළේය. වෛරසය මර්දනයේදී ජනතාව කණ්ඩායම් වශයෙන් ජීවත්වන ප්‍රදේශ සහ විශේෂිත වූ පිරිස් පිළිබඳව පොදු ක්‍රමයෙන් බැහැරව සැලසුම් සකස් කිරීමේ අවශ්‍යතාවද ජනාධිපතිවරයා අවධාරණය කළේය.

නාවික හමුදාවේ 997 දෙනෙකු PCR පරීක්ෂණයට යොමු කර ඇත. ඉන් වෛරසය ආසාධිත බවට තහවුරු වී ඇත්තේ 159 දෙනෙකු පමණි. ඔවුන්ගෙන් 80%ක් කිසිදු රෝග ලක්ෂණයක් පෙන්වා නැත. ඊට හේතුව ප්‍රතිශක්තීකරණ හැකියාව බව වෛද්‍යවරු පෙන්වා දෙති. ජනතාවගේ ද ප්‍රතිශක්තීකරණ වර්ධනයට දේශීය ඖෂධ මඟින් ලබාගත හැකි දායකත්වය පුළුල් වශයෙන් අධ්‍යනය කළ යුතුව ඇතැයි ජනාධිපතිවරයා පැවසීය.

දේශීය වෛද්‍යවරුන්ගේ සහ බටහිර වෛද්‍යවරුන්ගේ මැදිහත් වීමෙන් ඒ  සඳහා මේ වන විටත් පරීක්ෂණ සිදු කෙරෙමින් පවතී. වෛරසය මර්දනයට එන්නතක් සොයාගන්නා තෙක් ඉන් මිදීමට මෙහි ඇති වැදගත්කම ජනාධිපති සහ අගමැති පෙන්වා දුන්හ.

දැනටමත් වෛද්‍යවරු මෙන්ම වෛරසය මර්දනයට දායක වී සිටින ආරක්ෂක අංශ ඖෂධ දූමායනය මෙන්ම කැඳ පානය කෙරෙහි විශේෂ අවධානයක් යොමුකර ඇති බවද සාකච්ඡාවේදී සඳහන් කෙරිණ.

ආයතන පවත්වාගනෙ යාමේදී රජය ලබා දී ඇති නිර්දේශ ක්‍රියාත්මක වන්නේද යන්න පිළිබඳව දැඩි ලෙස අවධානය කළ යුතු බව ජනාධිපතිවරයා අවධාරණය කළේය. නොකළ යුතු දෑ අවබෝධ කරගෙන සාමාන්‍ය ජීවිතය පවත්වාගෙන යා යුතුය. සියලු පාර්ශ්ව ඒ සඳහා වගකීමෙන් ක්‍රියාකිරීමට බැඳී සිටින බවද ජනාධිපතිවරයා පැවසීය.

ඇඳිරි නීති කාලසීමාවේදී ළමයින්ගේ මානසික සුවතාවය ආරක්ෂා වන අයුරින් වැඩිහිටියන් ක්‍රියාකිරීමේ වැදගත්කම අග්‍රාමාත්‍ය මහින්ද රාජපක්ෂ මහතා දීර්ඝ ලෙස පෙන්වා දුන්නේය.

මේ වන විට විසි එක්දහසකගේ (21,000) PCR  පරීක්ෂණ සිදු කර ඇත. ඉන් වෛරසය ආසාධිත බවට තහවුරු කරගෙන ඇත්තේ 3%ක පිරිසකගේය. මෙය රජය ගෙන ගිය නිරෝධායන වැඩපිළිවෙළේ සාර්ථක පැතිකඩක් බව වෛද්‍යවරු පැවසූහ. තවදුරටත් පර්යේෂණ කිරීමට අවශ්‍ය පරීක්ෂණ කට්ටල රට තුල නිෂ්පාදනය කිරීම අරඹා ඇත. එය මෙරට සෞඛ්‍ය කේෂ්ත්‍රය අත්කර ගත් සුවිශේෂි ජයග්‍රහණයකි. එම නිෂ්පාදන ප්‍රවර්ධනයට බලපාන අඩුපාඩු දැනුම් දෙන ලෙස ජනාධිපතිවරයා පැවසීය.

වෙළෙද පොළෙහි අලෙවි කිරීමට ඇති විෂබීජහරණයට යොදාගන්නා රසායනික ද්‍රව්‍යවල ප්‍රමිතිය කෙරෙහි  අවධානය යොමු කරන ලෙස ද වෛද්‍යවරු ඉල්ලා සිටියහ. නිරෝධායන ක්‍රියාවලියට දායක වී සිටින සෞඛ්‍ය සහ ආරක්ෂක අංශවල භාවිතයට ගැනෙන විශේෂිත වූ ඇගළුම් කට්ටලවල ප්‍රමිතිය ද විමර්ශනය කරන්නැයි ජනාධිපතිවරයා දැනුම් දුන්නේය.

සෞඛ්‍ය ඇමතිණි පවිත්‍රා වන්නිආරච්චි, ජනාධිපති ලේකම් පී.බී. ජයසුන්දර, අග්‍රාමාත්‍ය ලේකම් ගාමිණී සෙනරත්, ආරක්ෂක ලේකම් කමල් ගුණරත්න, සෞඛ්‍ය ලේකම් භද්‍රාණී ජයවර්ධන, ආරක්ෂක මාණ්ඩලික ප්‍රධානී සහ ත්‍රිවිධ හමුදාපතිවරු, වැඩබලන පොලිස්පතිතුමා සහ විශේෂඥ වෛද්‍යවරු ඇතුළු කොරෝනා මර්දන කාර්ය සාධන බලකායේ සාමාජිකයෝ සාකච්ඡාවට එක්ව සිටියහ.

රජයේ වෛද්‍ය නිලධාරීන්ගේ සංගමය විසින් සිදුකළ ප්‍රකාශ දෙරණ මාධ්‍ය ජාලය යටතේ ඇති ‘අරුණ පුවත්පත‘ විසින් විකෘති  කර පළ කර ඇති බවට රජයේ වෛද්‍ය නිලධාරීන්ගේ සංගමය චෝදනා කරනවා. ඒ සම්බන්ධව රජයේ වෛද්‍ය නිලධාරීන්ගේ සංගමය විසින්  අරුණ පුවත්පතේ ප්‍රධාන කර්තෘ වන කුල ශ්‍රී  කාරියවසම් වෙත ඊයේ (29) ලිඛිතව දැනුම් දී තිබෙනවා.

මීට දින කිහිපයකට පෙරද රජයේ වෛද්‍ය නිලධාරීන්ගේ සංගමය දෙරණ මාධ්‍ය ජාලයේ දෙරණ රූපවාහිනී නාලිකාවේ මාධ්‍යකරුවෙකු වන චතුර අල්විස් නැමැත්තාට ද මේ ආකාරයෙන්ම චෝදනා කරමින් එහි ප්‍රධාන විධායක නිලධාරියාට ලිඛිත පැමිණිල්ලක් කළා.

ඊයේ රජයේ වෛද්‍ය නිලධාරීන්ගේ සංගමය අරුණ ප්‍රධාන කතුවරයාට යොමු කළ ලිපිය සම්පූර්ණයෙන්ම පහත පළ වෙනවා.

Covid-19 වසංගත තත්වය හමුවේ අඩපණව තිබෙන ශ්‍රී ලාංකිකයන්ගේ ව්‍යාපාර ව්‍යාපාර අන්තර්ජාලය ඔස්සේ යලි පණගැන්වීම සදහා ශ්‍රී ලංකා තොරතුරු තාක්ෂණ සංගමය ලෙස අප විශේෂ වැඩසටහනක් සංවිධානය කොට ඇත.

මේ වැඩසටහන මගින් ව්‍යවසායකයින් හට සිය ව්‍යාපාර කටයුතු අන්තර්ජාලය ඔස්සේ ගෙනයාමට අවශ්‍ය නිසි මගපෙන්වීම සහ උපදෙස් ඇතුළු ඊට අදාළ වෙනත් සේවාවන් සපයනු ඇත. මේ වනවිට කඩාවැටී ඇති ආර්ථිකයත් ව්‍යාපාරත් යලි ගොඩනැංවීම සදහා වගකිවයුතු සංවිධානයක් ලෙස සිය ජාතික කර්තව්‍ය ඉටු කිරීමට ශ්‍රී ලංකා තොරතුරු තාක්ෂණ සංගමය කැපවී සිටිමු. මේ පිලිබදව වැඩිදුර තොරතුරු 0778962228 සහ 0711951779 දුරකථන අංකය හරහා විමසීමට හැකිය.

කොළඹ, ගම්පහ, කළුතර සහ පුත්තලම දිස්ත්‍රික්ක හැර සෙසු දිස්ත්‍රික්කවල     හෙට, අප්‍රේල් 30 බ්‍රහස්පතින්දා රාත්‍රී 8.00ට යළි පනවනු ලබන ඇඳිරිනීතිය       මැයි 04, සඳුදා උදේ 5.00 දක්වා දිගටම ක්‍රියාත්මකව පවතින බව ජනාධිපති මාධ්‍ය අංශය අද (29) පස්වරු 09.30ට නිකුත් කළ මාධ්‍ය නිවේදනයක සදහන් වේ.

අද (29) දින ප.ව 11.04ට වනවිට ශ්‍රී ලංකාවෙන් වාර්තාවන කොවිඩ්-19 ආසාදිතයින් සංඛ්‍යාව 649 දෙනකු බව සෞඛ්‍ය ප්‍රවර්ධන කාර්යාංශය සදහන් කරනවා. ඒ අනුව අද දිනය තුළ නව රෝගීන් 30 දෙනකු වාර්තා වී තිබෙනවා. කොවිඩ්-19 ආසාදනය වීම හේතුවෙන් මේ වන විට ප්‍රතිකාර ලබන රෝගීන් සංඛ්‍යාව 506 ක් බවයි සෞඛ්‍ය ප්‍රවර්ධන කාර්යංශයේ වාර්තාවල සදහන් වන්නේ.

අද දින (29) පස්වරු 08.04ට සෞඛ්‍ය ප්‍රවර්ධන කාර්යංශය කළ යාවත්කාලීන කිරීම් අනුව ලංකාවේ කොවිඩ් 19 ආසාදිතයින් සංඛ්‍යාව 627ක් දක්වා වර්ධනය වී ඇති අතර අද දිනය තුළ නව රෝගීන් 08 දෙනකු වාර්තා වී තිබෙනවා.

සෞඛ්‍ය ප්‍රවර්ධන කාර්යංශය සදහන් කරන ආකාරයට දැනට රෝහල්වල විමර්ශනය යටතේ සිටින පුද්ගලයින් සංඛ්‍යාව 250ක් වන අතර ප්‍රතිකාර ලබන රෝගීන් සංඛ්‍යාව 484ක්. සුවය ලබා පිටව ගිය පුද්ගලිය්න සංඛයාව 136ක් වන අතර මරණ සංඛ්‍යාව වාර්තා වන්නේ 07ක් ලෙසයි.

දැනට කොවිඩ් 19 වසංගත තත්ත්වය හේතුවෙන් ඩෙංගු ව්‍යාප්තිය මර්ධන කටයුතු පිළිබදව අවධානය ගිලිහී ගිය හොත් රටතුළ ඉතාමත් ව්‍යසනකාරී තත්වයක් උද්ගතවීමට ඉඩඇති බව මෙහිදී අනාවරණය විය.

ඉදිරියේදී වර්ෂා සමය ආරම්භවීමත් සමග ඩෙංගු මදුරුවන් බෝවන ස්ථාන වැඩිවීමට හැකියාව ඇති බවත් ඒ අනූව ඉදිරිකාලය තුඑළ ඩෙංගු මදුරු ඝණත්වය වැඩිවීම හේතුවෙන් ඩෙංගු රෝගය ව්‍යාප්තවීම පිළිබද අවධානමක් ඇති බැවින් මේ පිළිබද පෙර සූදානම්විය යුතු බව  බව සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මිය අවධාරණය කළාය.

විශේෂයෙන්ම නාගරීකරණය වූ හා ජනාකීර්ණ ප්‍රදේශයන් වල පසුගිය වසර පුරාවටම ඩෙංගු රෝගීන් ව්‍යාප්තවීමෙී ප්‍රවණතාවක් පෙන්නුම් කර ඇති බවත්, රෝගීන් වැඩි සංඛ්‍යාවක් වසර මැද (මැයි මස සිට ජූලි මස අතර ) හා නිරිත දිග මෝසම් වැසි ආශ්‍රිතව ද,  වසර  අගදී ද ( ඔක්තෝබර් සිට ජනවාරි දක්වා) ඊසාන දිග මෝසම් වැසි සහිත කාලගුණය ආශ්‍රිතවද වාර්තා වී ඇති බව පසුගිය සංඛ්‍යාලේඛන පිරික්සිමේදී අනාවරණය වන බව ද අමාත්‍යවරිය පැවසුවාය.

අමාත්‍යවරිය මෙම කරුණු අවධාරණය කලේ අද දින (29) ඩෙංගු මර්ධනය සදහා ඉදිරියේදී ගතයුතු ක්‍රියාමාර්ග පිලිබදව ජාතික ඩෙංගු මර්ධන ඒකකයේ නිළධාරීන් හා සෞඛ්‍ය අමාත්‍යංශයේ නිළධාරීන් සමග පැවති සාකච්චජාවකදීය.

දැනට කොවිඩ් 19 වසංගත තත්ත්වය හේතුවෙන් ඩෙංගු ව්‍යාප්තිය මර්ධන කටයුතු පිළිබදව අවධානය ගිලිහී ගිය හොත් රටතුළ ඉතාමත් ව්‍යසනකාරී තත්වයක් උද්ගතවීමට ඉඩඇති බව මෙහිදී අනාවරෙණය විය.

පසුගිය සංඛ්‍යා ලේඛණ පරීක්ෂා කිරීමේදී 2019 වර්ෂයේදී ලක්ෂයකට ආසන්න ප්‍රමානයක් ඩෙංගු රෝගයට ගොදුරු වී ඇති බවත් ඒම නිසා මෙය මර්ධනය කිරීම සදහා ක්ෂණික ක්‍රියාකාරී සැලැස්මක් සකස් කරන ලෙසටද , කොරෝනා වසංගතය හේතුවෙන් මේවන විට තාවකාලිකව ඉදිකිරීම් නවතා දමා ඇති සියලු ඉදිකිරීම් ස්ථාන පිළිබදව විශේෂ අවධානයක් යොමුකර මදුරු ව්‍යාප්තිය මර්ධනය සදහා ගත යුතු ක්‍රියාමාර්ග ද කඩිනමින් ගන්නා ලෙසට මෙහිදී  අමාත්‍යතුමීය විසින් නිළධාරීන්ට  උපදෙස් දෙන ලදී.

ඩෙංගු රෝගය ශ්‍රී ලංකාවේ  වාහක රෝගයන්  අතර ප්‍රධාන තැනක් ගනී. පළමු වරට ඩෙංගු රෝගියකු වාර්තා වන්නේ 1962 වසරේදීය. ඩෙංගු වසංගත තත්වයක් පළමුවරට වාර්තා වුයේ 1965-1966 වසරවලදීය. වෛද්‍ය පර්යේෂණ ආයතනය මගින් සිදු කරන ලද පර්යේෂණ වලට අනුව 1970 හා 1980 දශකවල ඩෙංගු වසංගත තත්වයන්ද යම් යම් කාල වකවානු තුල සිදුවී ඇත. මෙම තත්වයන් මත 1996 වසරේදී ඩෙංගු රෝගය අනිවාර්යයෙන්ම දැනුම් දිය යුතු රෝග ලැයිස්තුවට ඇතුලත් කර ඇත. 

මෙම අවස්ථාවට සෞඛ්‍ය අමාත්‍යංශයේ ලේකම් භද්‍රානි ජයවර්ධන, අතිරෙක ලේකම් වෛද්‍ය ලක්ෂ්මි සෝමතුංග,නියෝජ්‍ය අධ්‍යක්ෂ ජනරාල් (මහජන සෞඛ්‍ය)  වෛද්‍ය පබා පලිහවඩන, ජාතික ඩෙංගු මර්ධන ඒ්කකයේ  අධ්‍යක්ෂ වෛද්‍ය අරුණ ජයසේකර, අමාත්‍යතුමියගේ පෞද්ගලික ලේකම් සබරගමු පලාත් සභාවේ සභාපති කංචන ජයරත්න යන මහත්ම මහත්මීන් ඇතුලු පිරිසක් සහභාගි වූහ.

කොවිඩ් -19  පොකුරු ( Clusters ) වර්ධනය වීම හෝ නොවීම පිලිබඳව මෙන්ම සමාජයේ අලුතින් පොකුරු ඇතිවීම හෝ නොවීම පිලිබඳව මේ මොහොතේ අනාවැකි පලකල නොහැකි බව සෞඛ්‍ය සේවා අධ්‍යක්ෂ ජනරාල්වරයා පවසයි.

අද (29) දින විශේෂ නිවේදනයක් නිකුත් කරමින් මේ බව සදහන් කළ සෞඛ්‍ය සේවා අධ්‍යක්ෂ ජනරාල් අනිල් ජාසිංහ මහතා රෝග ව්‍යාප්තිය පාලනයට ගෙනයන වැඩපිලිවෙල සාර්ථක වීමට බලපාන ප්‍රධාන සාධකයක් වන්නේ සෞඛ්‍ය අංශ විසින් නිකුත් කර ඇති සෞඛ්‍ය උපදෙස් නිවැරදිව මහජනතාව විසින්  පිලිපැදීම බව ද සෞඛ්‍ය සේවා අධ්‍යක්ෂ ජනරාල්වරයා අවධාරණය කළේය.

අනිල් ජාසිංහ මහතා විසින් නිකුත් කළ මාධ්‍ය නිවේදනයේ මෙසේද සදහන් වේ.

නාවික හමුදා සෙබලුන් අතර සිටිය හැකි බවට සැක කරන ආසාදිතයින් සොයා ගැනීමේ කටයුතු මේ වන විට  අවසන් භාගයට පැමිණ තිබේ.

නාවික හමුදා සෙබලුන්ගේ ස්පර්ශකයින් ලෙස ආසාදිත වූවන් ප්‍රධාන වශයෙන්ම පවුලේම  සාමාජිකයින් සහ අවට ප්‍රදේශ වාසීන් මෙන්ම ඔවුන් ආගිය ස්ථාන වල සිටි  හිතවතුන් ආදී  පුද්ගලයින් ඉදිරියේදීත්  ආසාදිතයින් බවට පත් වේවිද යන සැකය මේ වන විට මතුවී තිබෙන බැවින් එම ස්පර්ශකයින් පිලිබඳව සෞඛ්‍ය කාර්ය මණ්ඩල මෙන්ම බුද්ධි අංශයද  දැඩි විමසිල්ලෙන් පසුවන බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා පවසයි.

මේ වන විට මතුවී තිබෙන කොවිඩ් -19  පොකුරු ( Clusters ) තව දුරටත් විශාල වශයෙන් වර්ධනය නොවනු ඇතැයි තමන් විශ්වාස කරන බව පවසන විශේෂඥ වෛද්‍ය අනිල් ජාසිංහ මහතා එහෙත් තව දුරටත් එම පොකුරු ආශ්‍රිතව සහ නාවික හමුදා සෙබලුන්ගේ ස්පර්ශකයින් ආශ්‍රිතව ආසාදිතයින් මතුවේදැයි නිති විමසිල්ලෙන් සිටීම මේ මොහොතේ අත්‍යවශ්‍ය කටයුත්තක් වන බවද පෙන්වා දෙයි.

කෙසේ වෙතත් ආසාදිතයින් බවට පත් විය හැකි බවට අවදානමක් තිබෙන හේතු සහිතව හඳුනා ගන්නා සියලු දෙනා නිරෝධායනයට ලක් කර තිබේ.

එහෙත් තව දුරටත් මෙම පොකුරු ( Clusters ) වර්ධනය වීම හෝ නොවීම පිලිබඳව මෙන්ම සමාජයේ අලුතින් පොකුරු ඇතිවීම හෝ නොවීම පිලිබඳව මේ මොහොතේ අනාවැකි පලකල නොහැකි බවද පවසන සෞඛ්‍ය සේවා අධ්‍යක්ෂ ජනරාල් වරයා  රෝග ව්‍යාප්තිය පාලනයට සියලු පියවර ගෙන ඇතැයි ප්‍රකාශ කරයි.

කෙසේ වෙතත්  රෝග ව්‍යාප්තිය පාලනයට ගෙනයන වැඩපිලිවෙල සාර්ථක වීමට බලපාන ප්‍රධාන සාධකයක් වන්නේ සෞඛ්‍ය අංශ විසින් නිකුත් කර ඇති සෞඛ්‍ය උපදෙස් නිවැරදිව මහජනතාව විසින්  පිලිපැදීම බව ද සෞඛ්‍ය සේවා අධ්‍යක්ෂ ජනරාල්වරයා අවධාරණය කළේය.

Covid-19 වසංගත තත්ත්වය ප‍්‍රශස්ථ ලෙස පාලනය කර වෛද්‍යවරුන් ඇතුළු ඉදිරිපෙල වෘත්තිකයන්ගේ සුරක්ෂිතභාවය සහතික කිරීමේ කාර්ය නිසි ලෙස ඉටු කිරීමට ඉදිරියේදී හෝ සෞඛ්‍ය බලධාරින් කටයුතු නොකරන්නේ නම් ඊට එරෙහිව උපරිම ක‍්‍රියාමාර්ග ප‍්‍රකාශයට පත් කිරීමට රජයේ වෛද්‍ය නිලධාරීන්ගේ සංගමය පසුබට නොවුන බව එහි ලේකම්, වෛද්‍ය අලුත්ගේ මහතාගේ අත්සනින් අද (29) නිකුත් කළ මාධ්‍ය නිවේදනය සදහන් වෙනවා.

එම මාධ්‍ය නිවේදනය සම්පූර්ණයෙන් මෙසේයි.

Covid-19 ගෝලීය වසංගතයේ ආරම්භයේ සිට මේ දක්වා රට තුල රෝගය ව්‍යාප්ත වීම පාලනය සදහා වෛද්‍යවරුන් ඇතුලු සමස්ථ සෞඛ්‍ය වෘත්තිකයන් පිරිස මෙන්ම ආරක්ෂක හමුදා සාමාජිකයින් විසින් දැඩි කැපවීමකින් යුතුව ඉටු කල කාර්යභාරය සියලු දෙනාගේ ඇගයීමට ලක්ව ඇත.

ඉදිරිපෙල ක‍්‍රියාකාරින් ලෙස ඔවුන්ගෙන් සිදුවූ මෙහෙය නිසා රට තුල කොරෝනා තත්ත්වය යම් මට්ටමකින් පාලනය කර ගැනීමට හැකි වූ බව නොරහසකි. ඒ අනුව මෙම ඉදිරි පෙල ක‍්‍රියාකාරින් වූ වෛද්‍යවරුන් ඇතුලු සෞඛ්‍ය වෘත්තිකයින් මෙන්ම ආරක්ෂක හමුදා සාමාජිකයින්ගේ සෞඛ්‍ය ආරක්ෂාව සහතික කිරීම මේ මොහොතේ ජාතික වගකීමකි.

ඒ සඳහා සිදුවිය යුතු ප‍්‍රධාන කටයුතු 03 කි.

1.ඉදිරිපෙල ක‍්‍රියාකාරින් සියලු දෙනාට ඔවුන්ට ඇති අවදානමට සරිලන පෞද්ගලික ආරක්ෂක උපකරණ වල අඛණ්ඩ සැපයුමක් සහතික කල යුතුය (උදා. මුඛ ආවරණ, අත් ආවරණ, ඇස් ආවරණ හා PPE කට්ටල)

2. ඔවුන් රෝගින්ට නිරාවරණය වීම සැලකිල්ලට ගෙන, යම් ඉදිරිපෙල වෘත්තිකයෙකුට සැක සහිත තත්ත්වයක් මතු වූයේ නම් හෝ ඔහුට හෝ ඇයට තම රාජකාරිය සැකයකින් තොරව නිදහස් මනසකින් ඉටු කිරීම සඳහා PCR පරික්ෂණයට භාජනය වී තමන්ට රෝගය වැලදී ඇත්ද යන්න පිළිබඳ යම් තක්සේරුවක් ලබා ගැනීමට අවස්ථාව ලබා දිය යුතුය.

3. රෝගීන්ට නිරාවරණය වීමේ අවදානම සැලකිල්ලට ගෙන ඒ අයව නිරෝධායනයට යොමු කිරීම.

පසුගිය කාලය තුල අප සංගමයේ සාමාජිකත්වය විසින් මෙන්ම අනෙකුත් සෞඛ්‍ය වෘත්තිකයන් විසින් අප වෙත ඉදිරිපත් කර ඇති පැමිණිලි සැලකිල්ලට ගැනීමේදී ඉහත ප‍්‍රමුඛ අවශ්‍යතා දෙකෙහිම ගැටලු පවතින බව පෙනීයයි.

මේ වන විටත් කොළඹ මහ නගර සභාවේ මැද කොළඹ කොට්ඨාශයට අයත් වෛද්‍යවරුන් මෙන්ම මහජන සෞඛ්‍ය පරික්ෂක මහතුන් විසින් තමන්ට දිගින් දිගටම සිදු කරන නොසැලකීම් හමුවේ තාවකාලිකව රාජකාරියෙන් ඉවත් වීමට තීරණය කර ඇත.

දිවයින පුරා රෝහල් හා සෞඛ්‍ය වෛද්‍ය නිලධාරි කාර්යාල ගණනාවක මේ වන විට මෙම අසතුටුදායක තත්ත්වය මතුවෙමින් පවතී. මේ හරහා මෙම ඉදිරිපෙල වෘත්තිකයින් දැඩි අනාරක්ෂිත තත්ත්වයකට පත් කර ඇත. එමෙන්ම ඒ අයගේ මානසිකත්වය කඩා වැටීමේ අවදානමක් මේ වන විට මතුව ඇත.

එමෙන්ම නිරෝධායන ක‍්‍රියාවලිය සාර්ථක කර ගැනීම සඳහා ප‍්‍රමුඛ කාර්යභාරයක් ඉටු කල හා ඉටු කරන ආරක්ෂක හමුදා සාමාජිකත්වයේ සෞඛ්‍ය ආරක්ෂාව පිළිබඳවද විශේෂ අවධානයක් යොමු විය යුතුය.

වැලිසර නාවික හමුදා කඳවුර ආශ‍්‍රිත සිද්ධිය ගැඹුරින් අධ්‍යයනය කර ඒ හරහා උගත යුතු පාඩම් ඔස්සේ ඉදිරි සැලසුම් සකස් කල යුතුය.

ආරක්ෂක හමුදා සාමාජිකයින්ගේ සෞඛ්‍ය ආරක්ෂාවට අදාල තාක්ෂණික උපදෙස් ලබා දීමේ ප‍්‍රමුඛ වගකීම වසංගත රෝග විද්‍යා අංශ වලට පැවරී ඇත. ඒ පිළිබඳව සමාලෝචනය කර අවශ්‍ය උපදෙස් ලබා දෙමින් ඒවා අධිීක්ෂණය කිරීමේ වගකීමෙන් සෞඛ්‍ය බලධාරින්ට කිසිසේත්ම බැහැර විය නොහැක.

Covid-19 වසංගත තත්ත්වය ප‍්‍රශස්ථ ලෙස පාලනය කර වෛද්‍යවරුන් ඇතුලු ඉදිරිපෙල වෘත්තිකයන්ගේ සුරක්ෂිතභාවය සහතික කිරීමේ කාර්ය නිසි ලෙස ඉටු කිරීමට ඉදිරියේදී හෝ සෞඛ්‍ය බලධාරින් කටයුතු නොකරන්නේ නම් ඊට එරෙහිව උපරිම ක‍්‍රියාමාර්ග ප‍්‍රකාශයට පත් කිරීමට අප සංගමය පසුබට නොවුනු ඇත.