Blog

කුසල් පෙරේරා

ඊයේ සවස් වනවිට කෝවිඞ්-19 වයිරසයෙන් ආසාදිත වූ සංඛ්‍යාව 368 ක් වූ අතර, පැය 24 ක් ඇතුළත අද පස්වරුව වනවිට එම සංඛ්‍යාව 414 දක්වා ඉහළ ගියේය. එයට හේතු වූයේ වැලිසර නාවික හමුදා කඳවුරද ආසාදනයට නතු වීමය. 

වැලිසර නාවික හමුදා කඳවුරෙහි සෙබළුන් ඇතුලු 4,000 ක පිරිසක් අනිවාර්ය නිරෝධායනයට අද පස්වරුවේ යොමු කර ඇත. 4,000 ක් යනු අපගේ වැනි මිලියන 15 ක පමණ වැඩිහිටි ජනගහනයක් ඉන්නා රටකට ඔරොත්තු දිය හැකි සංඛ්‍යාවක් නොවේ. ආසාදනයට ගොදුරු වන්නට ඉඩ ඇතැයි සිතිය හැකි ඔවුන්ගේ පවුලේ සමීපතමයින්ද ගත් විට සමස්ථ සංඛ්‍යාව දළ වශයෙන් මිලියන 1.5 ට වැඩිය.

මේ ආසාදනයට ඉඩ හැදී ඇත්තේ නාවික හමුදාවේ සෙබළුන්ගේම වරදින් නොවන බව කිව යුතුය. එය කෝවිඞ්-19 වැනි ගෝලීය වසංගතයක් පාලනය කිරීමට යොදා නොගත යුතු එවැනි කාර්යක් සඳහා කිසිදු ආකාරයක දැනුමක් අවබෝධයක් නොමැති හමුදා කාණ්ඩ යොදා ගැනීමෙන් සමාජයටම ගෙවන්නට සිදුවන බරපතල වන්දියකි. මේ ගෝලීය වසංගතය අප යොදා ගත යුතුව තිබුණේ මා මාසයකට පමණ ඉහතින් මාර්තු 28 වන දින “ඬේලි මිර” පුවත් පතට ලියූ ලිපියෙන් හා පසුව “රාවය” මගින් ඉදිරිපත් කළ කාර්යක්ෂම හා පුහුණු ප්‍රාදේශීය ප්‍රජා සෞඛ්‍ය සේවා ජාල අනාගතයටද වැඩදායක වනසේ තහවුරුකර ගැනීමටය.

එවැනි වැඩපිළිවෙලක් ආණ්ඩුවට පමණක් නොව, විපක්ෂයේ ලොක්කන්ටත් නොවින. දැනටත් ඔවුන්ට කිසිදු වැදගත් යෝජනාවන් නොමැත. ඔවුන් දැන් හතර අත දුවන්නේ කෙසේ හෝ පැරණි පාර්ලිමේන්තුවේ දොර ඇර ගන්නට ය. එය කිසිදු ප්‍රයෝජනයක් නොමැති හා අවදානම් සහගත පියවරක් යැයි මෙවර “රාවය” පුවත් පතට “පරණ 225 න් කොරෝනාවට උත්තර සෙවීම අවදානම්” යැයි මා ලියූ ලිපියෙන් හේතු දක්වා ඇත. මේ එම ලිපියෙන් උපුටා ගත් කොටස් කිහිපයකි. මෙයින් මා ඔබ හමුවේ තබන්නේ මේ මොහොතේ අප මුහුණ දී සිටින කෝවිඞ්-19 වසංගතය හා ආර්ථිකය බිඳ වැටීමේ ප්‍රධාන අර්බූද දෙක විසඳා ගැනීම වෙනුවෙන් සමාජ සම්මුතියක් සමගින් පිහිටුවා ගත හැකි ජාතික පාලන ව්‍යුහයක් පිළිබඳ මගේ යෝජනාව ය.

මෙය මෙහි සාරාංශගත කෙරෙන්නේ අප මතුකර ගත යුතු අත්‍යාවශ්‍ය සංවාදයක් වෙනුවෙනි. 

කොරෝනා වසංගතයට මුහුණ දීම සඳහා යැයි පැරණි පාර්ලිමේන්තුව නැවත කැඳවීමට තර්ක කරනවුන් ළඟ පාර්ලිමේන්තු සංවාදයකට තැබිය හැකි විසඳුම් ඇත්තේ නැත. එවැන්නක් ගැන කිසිදු අදහසක්ද ඔවුන්ට නැත. එවගේම මේ කැඳවීම සතු බරපතල අවදානමක්ද ඇත. කොරෝනා වසංගතය පැතිර යන ආකාරයට මේ අවුරුද්ද ඇතුළත මැතිවරණයක් පැවැත්වීමට හැකිවේද යන්නට කිසිවකුට සහතික දිය නොහැක. ජුනි 20 වන දිනට නියම කෙරුණු මැතිවරණය යළි කල් දැමීමට සිදුවිය හැකි යැයි මැතිවරණ කොමිසමේ සභාපති අනතුරු අඟවා ඇත්තේද එනිසාය. එවැනි අවදානමක් හමුවේ පරණ පාර්ලිමේන්තුව කැඳවූ පසු එය අගෝස්තු මාසයෙන් පසුවටද රැගෙන යාමේ ඉඩ ඇත. එය සාධාරණය කරන්නටද මේ පිරිස් නැවත කොරෝනා වසංගතයම ඉදිරිපත් කරනු ඇත.

එවැනි පසුබිමක පැරණි පාර්ලිමේන්තුව නැවත කැඳවීමේ තවත් අවදානමක් ඇත. මේ කුණු වුන දේශපාලන සංස්කෘතියෙහි ඉදිරි මැතිවරණයකින් බලාපොරොත්තු වූ තුනෙන් දෙකේ බලය කෙසේ වෙතත් දැනට තමන්ට අවශ්‍ය අයුරු මුදල් අනුමත කර ගැනීම වැනි කාරණා වෙනුවෙන් බහුතර බලය හදා ගැනීමේ වාණිජ ගනුදෙනු පාර්ලිමේන්තු සංකීර්ණයෙහි සිදු නොවනු ඇතැයි කසිවකුට සහතික විය නොහැක. එතැනින් පසු ඇතැම් විට තුනෙන් දෙකේ බලයද එහිම මිලට ගත හැකි වනු ඇත.

එනිසා අප කතා කළ යුත්තේ විසුරුවා හැරි පාර්ලිමේන්තුව නැවත කැඳවීමේ ව්‍යවස්ථා ප්‍රතිපාදන ගැන නොවේ. එය මේ සමාජයට මේ මොහොතේ අදාල නැත. අදාල වන්නේ කොරෝනා වසංගතය අපට ඔරොත්තු දෙන මට්ටමින් පාලනය කර ගැනීමට විසඳුම් ගෙන එන්නේ කෙසේද යන්නය. පවතින නීති පුස්තක සතු වගන්ති එයට අවශ්‍ය නොවේ. අවශ්‍ය වන්නේ සමාජ සම්මුතියක් පමණි.

ඒ පිළිබඳ ඉතාම වලංගු අත්දැකීම ජනාධිපති නීතිඥ සුමන්තිරන්ම අපට ඊයේ පෙරේදා ලබා දුන්නේය. ඇඳිරි නීතිය උල්ලංඝණය කළේ යැයි පොලීසිය විසින් රන්ජන් රාමනායක අත්අඩංගුවට ගැනීමට එරෙහිව ගංගොඩවිල උසාවියේ සුමන්තිරන්ගේ කරුණු දැක්වීම වූයේ ඇඳිරි නීතිය පැනවීම නිත්‍යානුකූලව කෙරුණක් නොවන නිසා උල්ලංඝණය කිරීමට නිත්‍යානුකූල ඇඳිරි නීතියක් නොමැති වූ බවය. මාධ්‍යයට ඔහු කියන්නට උත්සාහ කෙරුවේ අධිකරණය ඔහුගේ කරුණු දැක්වීම් පිළිගත් හෙයින් රන්ජන් රාමනායකට ඇප ලැබුණු බවය. මෙය ප්‍රෝඩාකාරී කරුණු දැක්වීමකි. ඇඳරි නීතිය එළෙසින් නීති විරෝධී යැයි අධිකරණය පිළිගත්තේ නම්, රන්ජන් රාමනායක නිදහස් නොකර ඔහුට ඇප ලබා දුනනේ මන්දැයි සුමන්තිරන් කියන්නේ නැත. සැබෑව නම්, ඇඳිරි නීතිය පැනවීමේ ක්‍රියාවලියෙහි දෝස අධිකරණය පිළිගනු ලැබූවත් ක්‍රියාත්මක වන ඇඳිරි නීතිය මේ මොහොතේ නීති විරෝධි යැයි තීන්දු නොකළ බවය. ඇඳිරි නීතිය නීති විරෝධි යැයි අධිකරණය තීන්දු කෙරුවේ නම්, මේ රට බරපතල අර්බූදයකට හසු වන්නේය. ඇඳිරි නීතිය ක්‍රියාත්මක කිරීම සඳහා පොලීසියට අයිතියක් නොලැබෙන්නේය. ඒ අනුව මෙතෙක් අත්අඩංගුවට ගෙන ඇති 35,000 ට වැඩි පිරිස වහා නිදහස් කළ යුතු වන්නේය. කඩ සාප්පු, කාර්යාල විවෘත කිරීමට සිදු වන්නේය. කොරෝනා වසංගතය මැඩලීම සහමුලින් අත හරින්නට සිදුවන්නේය.           

සමාජ වගකීමක් ඇතිව අධිකරණ තීන්දුව දෙනු ලැබූයේ මේ මොහොතේ සමාජයේ ආරක්ෂාව සඳහා ඇඳිරි නීතිය ක්‍රියාත්මකව පවත්වා ගැනීමේ සමාජ අවශ්‍යතාව මතය. එය ගෙන ආවේ කෙසේද යන්න ඊට අදාල නොවුනි. ඇඳිරි නීතිය පැනවූ ආකාරය නීතියට පටහැනි වූවත් “පවතින තත්ත්වය තුල කරුණාකර ඇඳිරි නීතිය පිළිපදින්න” යැයි සුමන්තිරන්ටද මාධ්‍ය අමතා කියන්නට සිදු වූයේ එබැවිනි. ඉන් උගෙන ගත යුතු පාඩම වන්නේ පවතින තත්ත්වයට අනුව සමාජයේ ආරක්ෂාව හා යහ පැවැත්ම වෙනුවෙන් නීති ක්‍රියාත්මක කරනවා මිස, විශෙෂයෙන් අර්බූද හමුවේ නීති පුස්තක වල වගන්ති ලෙස ඒවාට අර්ථකතන සැපයීමේ වැදගත්කමක් නොමැති බව ය.

ඒ සිද්ධාන්තයට අනුව, දැන් අවශ්‍ය වන්නේ සමාජ සම්මුතියක් සමගවන තාවකාලික ජාතික පාලක මණ්ඩලයක් පිහිටුවා ගැනීම මිස අතහැරි පාර්ලිමේන්තුව නැවත කැඳවීම නොවේ. ඒ වෙනුවෙන් මගේ යෝජනාව වන්නේ විසුරුවා හැරි පාර්ලිමේන්තුවේ අඩු බලයක් තිබූ දේශපාලන නියෝජනයට අයත් තාවකාලික ආණ්ඩුවක් පවත්වා ගැනීම වෙනුවට, ඒ පාර්ලිමේන්තුවේ නියෝජනය වූ සියලු දේශපාලන පක්ෂ නියෝජනය වන්නාවූ සැබෑ ජාතික පාලක මණ්ඩලයක් ස්ථාපිත කිරීමය. එම ජාතික පාලක මණ්ඩලයේ සභික සංඛ්‍යාව, ඒ පක්ෂ සතු වූ මන්ත්‍රී සංඛ්‍යාවට අනුපාතව තීන්දු කළ හැකිය. මුළු සංඛ්‍යාව විශාල නොවන්නට 07 දෙනෙකුට එක සභිකයෙකු ලෙස ජාතික පාලක මණ්ඩලය පත්කර ගත හැකිය. එසේ වුවහොත් එක්සත් ජනතා නිදහස් සන්ධානයේ මන්ත්‍රීවරුන් 95 දෙනා වෙනුවෙන් 14 ක්ද, එ.ජා.පය දේශපාලන වශයෙන් බෙදී ඇති බව පිළිගනිමින් ඔවුන්ගේ මන්ත්‍රීවරුන් 107 දෙනා වෙනුවෙන් සජිත් පිළට 10 ක් හා රනිල් පිළට 05 ක්ද, ද්‍රවිඩ ජාතික සන්ධානයේ මන්ත්‍රීවරුන් 16 දෙනා වෙනුවෙන් 03 ක්ද, ජ.වි.පෙ 06 දෙනා වෙනුවෙන් 01 ක් අයෙකුද, ඊ.පී.ඩී.පි තනි මන්ත්‍රීද ඇතුළුව සභිකයින් 34 කු ගෙන් ජාතික පාලක මණ්ඩලය ස්ථාපිත කළ හැකිය. එය සාමාන්‍ය ඇමති මණ්ඩලයක ප්‍රමාණය වැනි ය. එහි එක්සත් ජනතා නිදහස් සන්ධානයේ සාමාජික පක්ෂ නියෝජනය ඔවුන්ගේ 10 දෙනා අතර බෙදා ගැනීම ඔවුන්ගේ එකඟත්වය අනුව සිදුවිය යුත්තකි. එවගේම සජිත් පිළෙහි හා රනිල් පිළෙහිද නියෝජනය ඔවුන් විසින් තීන්දු කළ යුතුය. ස්ථාවර කොන්දේසිය වනුයේ එළෙසින් නම් කරන නියෝජිතයින් පාලක මණ්ඩලයේ ස්ථිර සභිකයින් විය යුතු බවය. 

මෙම ජාතික පාලක මණ්ඩලයේ ලේකම් කාර්යාලය ලෙස කැබිනට් ඇමති මණ්ඩල කාර්යාලය ක්‍රියා කළ යුතු අතර, අමාත්‍ය මණ්ඩලයේ ලේකම් එහි ලේකම් විය යුතුය. ඔහු විසින් පළමුවම ජාතික පාලක මණ්ඩල සභික ලැයිස්තුව වහා ප්‍රසිද්ධියට පත් කළ යුතුය. එය සති පතා රැස්විය යුතු අතර, රැස්වීම් වාර්තාව හා තීන්දු සවිස්තරව ප්‍රසිද්ධ කිරීමේ පූර්ණ වගකීම එහි ලේකම් ලෙස ඔහුට පැවරෙන්නකි.

ජාතික පාලක මණ්ඩලයේ වගකීම වනුයේ දෙවන රැස්වීම වනවිට කෝවිඞ්-19 වසංගතය පාලනය කිරීමේ හා සමාජ ක්‍රියාකාරිත්වය නැවත ක්‍රමානුකූලව තහවුරු කළ හැකි ඔවුන්ගේ වැඩපිළිවෙල සමාජය හමුවේ තැබීමය. එය ක්‍රියාත්මක කිරීමෙහිදී අවශ්‍ය මූල්‍ය ප්‍රතිපාදන පිළිබඳ අය වැයක්ද ඒ සමග ඉදිරිපත් කිරීමය. මේ වනවිට ලැබී ඇති විදේශ ආධාර යොදා ගන්නේ කෙසේද යන්නත් සති 04 ක් ඇතුළත රටට කිව යුතුය. කෙටියෙන් කියන්නේ නම්, ඔවුන් ගන්නා සියලු තීන්දු සහ මුදල් වැය කිරීම් ඒ සැණින් ප්‍රසිද්ධියට පත් කළ යුතුය.

විසුරුවා හැරි පාර්ලිමේන්තුව නැවත කැඳවීමට දැඩි අකමැත්තක් ප්‍රකාශ කරන ජනාධිපතිට ජාතික සම්මුතියක් සමගින් කෝවිඞ්-19 වසංගත කාලය පාලනය කර ගැනීමට අවශ්‍ය නම්, එළෙසින්ම ඒ වෙනුවෙන් එඩිතර තීන්දුවක් ගැනීමට සූදානම් නම්, මේ යෝජනාව ඔහුට බාරගත හැකිය.

රාවය – 2020 අප්‍රේල් 24 වන දින

Covid-19 ආසාදිතයින් 49 දෙනකු අද (24) දින හදුනා ගැනීමත් සමග ශ්‍රී ලංකාවේ තහවුරු කරන ලද කොවිඩ්-19 ආසාදිතයින් සංඛ්‍යාව 417 දක්වා වර්ධනය වූ බව සෞඛ්‍ය ප්‍රවර්ධන කාර්යංශය ප.ව 22:04ට සිදුකළ යාවත්කාලීන කිරීම්වල සදහන් වේ.

එහි සදහන් වන ආකාරයට ප්‍රතිකාර ලබන රෝගීන් සංඛ්‍යාව 300 දෙනකු වන අතර දැනට රෝහල්වල විමර්ශන යටතේ සිටින පුද්ගලයින් සංඛ්‍යාව 183 දෙනෙක් වේ. සුවය ලබා පිටව ගිය සංඛ්‍යාව 109ක් වන අතර මරණ සංඛ්‍යාව 07කි.

මේ අතර රජයේ ප්‍රවෘත්ති අධ්‍යක්ෂ ජනරාල්වරයා විසින් අද (24) දින ප.ව 19.15ට නිකුත් කළ මාධ්‍ය නිවේදනයක සදහන් වන්නේ අද දින හදුනාගත් කොවිඩ්-19 ආසාදිතයින් අතරින් 11 දෙනකු කොළඹ 12 බණ්ඩාරනායක මාවතේ නිරෝධායනයට ලක් කළ පුද්ගලයින් අතරින් ද 30 දෙනකු වැලිසර නාවික හමුදා කදවුරේ නාවිකයින් අතරින් ද 05 දෙනකු වැලිසිර නාවික හමුදා කදවුරේ නිවාඩු ගොස් සිටි නාවිකයින් අතරින් ද වාර්තා වූ බවයි. එම නාවික නිලධාරීන් පදිංචි ප්‍රදේශ වන්නේ රත්නපුර හිදිල්ල කන්ද, පොල්ගහවෙල උඩපොළ, කරුණෑගල කීනියාපොළ, ගිරාදුරුකෝට්ටේ පහළ රත්කිද, දඹුල්ල අතබෝධිවැවයි. තවත් ආසාදිතයෙකු මරදානේ පදිංචිකාරියක වන අතර ඇය රෝහල්ගතව ප්‍රතිකාර ලබන බව ද එම මාධ්‍ය නිවේදනයේ වැඩි දුරටත් සදහන් වේ.

කොරෝනා හඳුනා ගැනීමේ RT-PCR පරීක්ෂණය සිදු කිරීමේදී ඒ සඳහා  සෞඛ්‍ය අමාත්‍යාංශය සතුව ඇති හැකියාවන් පූර්ණ වශයෙන් භාවිතා නොකර සිටීම සඳහා විවිධ උපක්‍රම යොදවන බව නිරීක්ෂණය වී අතැයි රජයේ වෛද්‍ය රසායානාගාර විද්‍යාඥ සංගමය ජනපති ගෝඨාභය රාජපක්ෂ මහතා වෙත යොමු කළ විශේෂ ලිපියක සදහන් වේ.

ජනපති ලේකම්, සෞඛ්‍ය අමාත්‍යවරිය ඇතුළු ආදාළ නිලධාරීන් වෙත යොමු කළ එම නිවේදනය මාධ්‍ය වෙත ද නිකුත් කර ඇත.

කොවිඩ්-19 වසංගතය හමුවේ මෙරට ජනතාව විසින් දැනගත යුතු විශේෂ හෙළි කිරීම් කිහිපයක් සහිත එම මාධ්‍ය නිවේදනය සම්පූර්ණයෙන්ම පහත පළ වේ.

ගෝඨාභය රාජපක්ෂ මැතිතුමා අතිගරු ජනාධිපතිතුමා ජනාධිපති ලේකම් කාර්යාලය කොළඹ 01

රාජ්‍ය අංශයේ කොරෝනා හඳුනාගැනීමේ RT-PCR පරීක්ෂණ ධාරිතාවය අවභාවිතා කිරීම.

කොරෝනා හඳුනා ගැනීමේ RT-PCR පරීක්ෂණය සිදු කිරීමේදී ඒ සඳහා  සෞඛ්‍ය අමාත්‍යාංශය සතුව ඇති හැකියාවන් පූර්ණ වශයෙන් භාවිතා නොකර සිටීම සඳහා විවිධ උපක්‍රම යොදවන බව නිරීක්ෂණය වේ. ඒ අනූව,

1.       කොරෝනා වසංගතයෙහි මුල් අදියරෙහිදී ආශ්‍රිතයන්ගේ RT-PCR පරීක්ෂණ සිදු නොකිරීම.

2.       වෛරසවේදී රසායනාගාර දිවයින පුරා ස්ථාපිතව තිබියදී වෛද්‍ය පර්යේෂණ ආයතනය පමණක් ඒ සඳහා භාවිතා කිරීමට උත්සහ දැරීම.

3.       ජාතික බෝවන රෝග විද්‍යාතනයෙහි කොරෝනා හඳුනා ගැනීමේ පරීක්ෂණ කටයුතු සිදු කිරීම අධෛර්යමත් කිරීම.

4.       සෞඛ්‍ය අමාත්‍යාංශය සතුව RT-PCR පරීක්ෂණය සිදු කිරීමේ යන්ත්‍ර වල හිඟයක් පවතින බව ඇඟවීමට උත්සහ දැරීම.

5.       වෙනම රසායනාගාරයක් ස්ථාපිතව තිබියදී පවා ශ්‍රී ලංකා ජාතික රෝහලෙහි RT-PCR පරීක්ෂණ සිදු නොකිරීම .

6.       ජාතික රෝහලට අමතරව පහසුකම් සහිතව කොළඹ අවට ඇති අනෙකුත් සෞඛ්‍ය අමාත්‍යාංශ රසායනාගාර කොරෝනා හඳුනාගැනීමේ පරීක්ෂණ සිදු කිරීම සඳහා යොමු නොකිරීම වැනි කරුණු කෙරෙහි විමර්ෂණාත්මකව කරුණු සොයා බැලීමේදී ඉහත තත්ත්වය තහවුරු කර ගත හැකිය.

ඊට අමතර වශයෙන් දිගින් දිගටම අප විසින් සිදු කරන ලද ඉල්ලීම් ගණනාවකින් අනතුරුව සෞඛ්‍ය අමාත්‍යාංශය යටතේ කොරෝනා හඳුනා ගැනීමේ RT-PCR පරීක්ෂණය ඉතා කාර්යක්ෂමව සිදු කළ හැකි රසායනාගාර 8ක් දිවයින පුරා ක්‍රියාත්මකව වන අතර, පසුගිය සති දෙකක කාලය තුල එම රසායනාගාරයන්හි සිදු කරන ලද පරීක්ෂණ ප්‍රමාණය පිළිබඳ දත්ත සැළකිල්ලට ගැනීමේදී

1.       එකී රසායනාගාර කිසිවක් මෙතෙක් තම උපරිම ධාරිතාවට අදාලව RT-PCR පරීක්ෂණ සිදු කර නොමැති වීම

2.       ආශ්‍රිතයන්ගේ පරීක්ෂණ සිදුකිරීමට තීරණය කර තිබියදීත් සමහරක් රසායනාගාර වෙත කිසිඳු නිදර්ශකයක් නොලැබුනු දිනයන්ද පැවතීම

3.       දෛනිකව සමස්ථ රසායනාගාර සියල්ලේම සිදු කරන ලද පරීක්ෂණ වල උපරිමය 765ක්, අවමය 217ක් හා සාමාන්‍ය 440ක් ලෙස පැවතීම බරපතල ගැටළුවකි.

තවද, කිසියම් හෝ කරුණක් මත වර්තමානයේ ලැබෙන නිදර්ශක ප්‍රමාණය මත,

1.       වෛද්‍ය පර්යේෂණ ආයතනයේ PCR යන්ත්‍ර 7ක් පමණ පවතින නමුත් සාමාන්‍ය වශයෙන් භාවිතයට ගැනීමට අවශ්‍ය වන්නේ වන්නේ එක් යන්ත්‍රයක් හෝ දෙකක් පමණක් වීම

2.       ශ්‍රී ලංකා ජාතික රෝහල තුල මෙම පරීක්ෂණ කටයුතු ආරම්භ කිරීම සඳහා ඉල්ලීම් ගණනාවක් සිදු කර ඇති නමුත් ඊට අවස්ථාව ලබා දී නොදීම

3.       කොළඹ ජාතික රුධිර මධ්‍යස්ථානය තුල නවීනතම වර්ගයේ RT-PCR යන්ත්‍ර දෙකක් හා ජාතික ලිංගාශ්‍රිත රෝග හා ඒඩ්ස් මර්ධන ව්‍යාපාරය තුල පවතින RT-PCR යන්ත්‍රයක් මේ වන තුරුත් කොරෝනා හඳුනා ගැනීමේ පරීක්ෂණ සඳහා භාවිතා නොකිරීම.

4.       මහරගම අපේක්ෂා රෝහලෙහි මේ වන විට සිදු කර ඇති සම්පූර්ණ කොරෝනා හඳුනා ගැනීමේ ප්‍රමාණය 40ක් වැනි ඉතා අවම ප්‍රමාණයක පැවතීම සැක උපදවන සුළුය.

තවද, කොළඹ දිස්ත්‍රික්කය තුල කොරෝනා හඳුනාගැනීම සඳහා පහසුකම් සැපයිය හැකි සෞඛ්‍ය අමාත්‍යාංශයට අයත් රසායනාගාර 5 ක් (වෛද්‍ය පර්යේෂණ ආයතනය, මහරගම අපේක්ෂා රෝහල, ශ්‍රී ලංකා ජාතික රෝහල, ජාතික රුධිර මධ්‍යස්ථානය, ජාතික ලිංගාශ්‍රිත රෝග හා ඒඩ්ස් මර්ධන ව්‍යාපාරය) තිබියදී, ඊටත් අමතර වශයෙන් උසස් අධ්‍යාපන අමාත්‍යාංශයට අදාලව කොළඹ හා ශ්‍රී ජයවර්ධන විශ්වවිද්‍යාල වල පර්යේෂණ රසායනාගාර දෙකක් මෙම පරීක්ෂණ කටයුතු සිදු කරමින් පැවතියදී, උක්ත සෞඛ්‍ය අමාත්‍යාංශ රසායනාගාර සියල්ල සඳහා දැනට ලැබෙන නිදර්ශක ප්‍රමාණය ඉතා අවම මට්ටමක පැවතියදී කොරෝනා රේග හඳුනා ගැනීමේ පරීක්ෂණ කටයුතු සිදු කිරීම සඳහා පොද්ගලික රසායනාගාර 4ක් වෙත නිදර්ශක යොමු කිරීමට උත්සහ දැරීම බරපතල තත්ත්වයකි.

උක්ත කරුණු සියල්ලම විමර්ෂණය කිරීමේදී කොරෝනා හඳුනා ගැනීමේ වෛද්‍ය පරීක්ෂණ සිදු කිරීම කිසියම් අදිසි හස්තයන්ගේ උවමනාවන්ට නතු වෙමින් තිබෙන බව තහවුරු වන අතරම ප්‍රමාණවත් පරීදි නිදර්ශක නොමැති වීම හේතුවෙන් රජයේ රසායනාගාර වල පරීක්ෂණ සිදු කිරීමේ ධාරිතාව අපතේ හරිමින් තිබියදී හා ශ්‍රී ලංකාව ලෝකයේ අවම පරීක්ෂණ ප්‍රමාණයක් සිදු කරන ලද රටවල් අතරට ශ්‍රේණිගත වීමත් එම තත්ත්වය වලක්වා ගැනීම සඳහා සිදු කරනු ලබන සියළු යෝජනාවන් සහ ඉල්ලීම් සෑම අවස්ථාවකදීම කිසියම් අපගමනයකට ලක් වීමත් අතර බරපතල අක්‍රමිකතාවයක පෙර නිමිති නිරීක්ෂණය වේ.

මේ පිළිබඳව ඔබගේ දැඩි අවධානය යොමු කරන ලෙස කාරුණිකව ඉල්ලා සිටින අතර පෞද්ගලික අංශය වෙත නිදර්ශක යොමු කිරීමට පෙර අවම වශයෙන් වෛද්‍ය පර්යේෂණ ආයතනයේ උපරිම ධාරිතාවය සම්පූර්ණ කිරීම සඳහාත් ශ්‍රී ලංකා ජාතික රෝහල ඇතුළු කොළඹ අවට උක්ත ආයතනයන්හි එම පරීක්ෂණ කටයුතු ආරම්භ කිරීම සඳහා කටයුතු කරන ලෙසත්,‍් රසායනාගාර පිරීක්ෂණ සිදු කිරීම වේගවත් කිරීම පිළිබඳව සෞඛ්‍ය අමාත්‍යාංශය විසින් පත් කරන ලද කමිටුවේ නිර්දේශ ක්‍රියාත්මක කිරීමට කටයුතු කරන ලෙසත් ඉතා ඕනෑකමින් ඉල්ලා සිටිමි

ස්තුතිය

මෙයට, විශ්වාසී     රවී කුමුදේශ් – සභාපති රජයේ වෛද්‍ය රසායානාගාර විද්‍යාඥ සංගමය                                                                                                                                                                                        

පිටපත්: ජනාධිපති ලේකම්තුමාගරු සෞඛ්‍ය හා දේශීය වෛද්‍ය අමාත්‍යතුමියලේකම්, සෞඛ්‍ය හා දේශීය වෛද්‍ය අමාත්‍යාංශයසෞඛ්‍ය සේවා අධ්‍යක්ෂ ජනරාල්තුමානියෝජ්‍ය අධ්‍යක්ෂ ජනරාල් (විමර්ශන)

COVID-19 අර්බුදයේ ප්‍රතිඵලයක් ලෙස ඇතිවන වෙළඳපොළ තත්ත්වයන්ට මුහුණදීම සඳහා ශ්‍රී ලංකාවේ අපනයන නැවත ස්ථානගත කිරීමට එතෙර පිහිටි ශ්‍රී ලංකා දූත මණ්ඩල අපේක්ෂා කරන බව විදේශ සබඳතා අමාත්‍යාංශය නිකුත් කළ මාධ්‍ය නිවේදනය සදහන් වෙයි.

එම මාධ්‍ය නිවේදනය සම්පූර්ණයෙන් මෙසේය.

එතෙර සිටින ශ්‍රී ලාංකිකයින් මුහුණ දෙන ගැටලු රාශියක් අවම කිරීම සඳහා වූ වෑයමක විදේශ අමාත්‍යාංශය නිරතව සිටිය ද, COVID-19 අර්බුදයේ ප්‍රතිඵලයක් ලෙස ඉස්මතුවී තිබෙන වෙළඳපොළ තත්ත්වයන් පිළිබඳ සන්දර්භය හමුවේ, ශ්‍රී ලංකාවේ අපනයන නැවත ස්ථානගත කිරීම සඳහා ද ඊට සමාන්තරව උත්සාහ දරනු ලබන බව විදේශ ලේකම් රවිනාථ ආර්යසිංහ මහතා ප්‍රකාශ කළේය. මෙය සාර්ථක වුවහොත්, පශ්චාත් COVID-19 ලෝකය තුළ ශ්‍රී ලංකාව ගෝලීය සැපයුම් දාමයේ එක් පියවරක් ඉදිරියෙන් සිටිනු ඇතැයි ද ඔහු පැවසීය.

මෙම සතිය මුල දී ශ්‍රී ලංකාවේ ජාතික රූපවාහිණී සේවයේ ‘එතෙර මෙතෙර’ වැඩසටහනේ පෙනී සිටිමින් විදේශ ලේකම්වරයා මෙම අදහස් ඉදිරිපත් කළේය. මෙම බලපෑමට ලක් වූ කාලසීමාවේ දී ශ්‍රී ලංකාවේ අපනයන ප්‍රවර්ධනය කිරීම සඳහා එතෙර පිහිටි ශ්‍රී ලංකා දූත මණ්ඩල සහ කොන්සියුලර් ජනරාල් කාර්යාල 67 ක ජාලය දරන ප්‍රයත්න පිළිබඳව අදහස් දක්වමින් ඔහු පැවසුවේ, මෙම අමාත්‍යාංශයේ ආර්ථික කටයුතු අංශය විසින් මෙහෙයවනු ලබන සාම්ප්‍රදායික ‘ආර්ථික රාජ්‍යතාන්ත්‍රික වැඩසටහන’ මෙම වෙනස් වී ඇති තත්වයන්ට මුහුණ දීම සඳහා වෙනස් කොට ඇති බවයි.

මෙම ගෝලීය වසංගත කාලසීමාව තුළ දී රටේ ආර්ථිකය පවත්වාගෙන යාම සහ එයින් පසුව ඇතිවන ආර්ථික පසුබෑම අවම කිරීම සඳහා වූ රජයේ ආර්ථික සැලැස්මට සහාය වීම පිණිස විදේශ සබඳතා අමාත්‍යාංශය, අපනයන සංවර්ධන මණ්ඩලය (EDB) සහ එතෙර පිහිටි ශ්‍රී ලංකා දූත මණ්ඩල සමඟ එක්ව ශ්‍රී ලංකා නිෂ්පාදන නව වෙළඳපලවල් වෙත ප්‍රවේශ කරවීම පිළිබඳව අඛණ්ඩව ගවේෂණය කරමින් සිටින බව මෙහි දී සඳහන් විය. 

COVID-19 ගෝලීය වසංගතයේ පසුබිම තුළ, වෙනස් වෙමින් පවතින ලෝක වෙළඳපොළ තත්ත්වයන් පිළිබඳව මෙන්ම, ඔවුන්ගේ අක්තගන්වා සිටින රටවල පවත්නා ක්‍රියා පටිපාටි, අවශ්‍යතා සහ සීමාවන් පිළිබඳව විදේශ දූත මණ්ඩල විසින් සිදුකරන සතිපතා යාවත්කාලීන කිරීම් මගින් දැනුවත් වෙමින්, තේ, කුළුබඩු, පුද්ගලික ආරක්ෂක උපකරණ (PPE), රබර් අත්වැසුම්, මුහුණු ආවරණ, නැවත භාවිතා කළ හැකි මුහුණු ආවරණ, ශල්‍ය මුහුණු ආවරණ, ශල්‍ය  හිස්වැසුම්, ශල්‍ය ඇඳුම්, සනීපාරක්ෂක අත්පිසින කඩදාසි, සැකසූ ආහාර, පලතුරු සහ එළවළු සහ මුහුදු ආහාර සම්බන්ධයෙන් රටවල් දහයක ආනයනකරුවන් සමඟ ශ්‍රී ලංකා අපනයනකරුවන් සම්බන්ධ කිරීමට මෙම වැඩපිළිවෙල මඟින් මෙතෙක් පහසුකම් සලසා තිබේ.

මේ වන විට වෙළඳපොළ යාවත්කාලීන කිරීම් 56 ක් ශ්‍රී ලංකා දූත මණ්ඩල විසින් ගොනු කර ඇති බවත්, එම තොරතුරු වෙත අපනයන සංවර්ධන මණ්ඩලයේ වෙබ් අඩවිය වන  https://www.edb.gov.lk/marketalerts හරහා පිවිසිය හැකි බවත්, ආර්ථික කටයුතු පිළිබඳ අතිරේක ලේකම් පී. එම්. අම්සා මහතා මෙහි දී සඳහන් කළේය.

මේ දක්වා ලැබී ඇති වෙළඳපල යාවත්කාලීන කිරීම්වල සාරාංශයෙන් හෙළි වූයේ, පසුගිය දෙසතිය තුළ ක්‍රියාත්මක වූ කාල සීමාව තුළ තුර්කියට මෙට්‍රික් ටොන් 336 ක්, ඊජිප්තුවට මෙට්‍රික් ටොන් 100 ක් සහ ලිබියාවට මෙට්‍රික් ටොන් 25 ක් ද ඇතුළුව ශ්‍රී ලංකා තේ සඳහා රටවල් 21 කින්, මුහුණු ආවරණ සඳහා රටවල් 25 කින්, ආරක්ෂිත ඇඳුම් සඳහා රටවල් 15 කින්, පුද්ගලික ආරක්ෂක උපකරණ (PPE) සඳහා රටවල් 13 කින් සහ රබර් අත්වැසුම් සඳහා රටවල් 15 කින් ඉල්ලුම් ලැබී ඇති බවයි. ආහාර ද්‍රව්‍ය සහ එළවළු සඳහා ද රටවල් 13 කින් ඉල්ලීම් ලැබී තිබේ.

මැදපෙරදිග හා තුර්කියේ විවිධ ස්ථානවලට තේ තොග මෙන්ම තවත් නිෂ්පාදන කිහිපයක් යැවීම සම්බන්ධයෙන් අපනයන ලේඛන සත්‍යාපනය කිරීමේ ක්‍රියාවලිය කඩිනම් කිරීම සඳහා මෙම අමාත්‍යාංශය ශ්‍රී ලංකා තේ මණ්ඩලය සමඟ කටයුතු කරයි. අපනයනකරුවන් මුහුණ දෙන දුෂ්කරතා හඳුනා ගනිමින්, ශ්‍රී ලංකා අපනයනකරුවන්ගේ අදාළ ලියකියවිලි නිෂ්කාශනය කිරීම පහසු කිරීම සඳහා, සැලකිය යුතු අපනයන ස්ථානවල රේගු සහ වෙනත් අදාළ ආයතන සමඟ එම ඉල්ලීම් පිළිබඳව මෙම අමාත්‍යාංශය විසින් විධිමත් ලෙස කටයුතු කරනු ලැබේ. අපනයන ලියකියවිලි සත්‍යාපනය කිරීම සඳහා සුදුසු පියවර ගනිමින්, කොළඹ පිහිටි රාජ්‍යතාන්ත්‍රික දූත මණ්ඩල කිහිපයක් ද මෙම ප්‍රයත්නයට සහයෝගය ලබා දී ඇත.

මීට අමතරව, වර්තමාන COVID-19 ගෝලීය වසංගතය සහ රටේ බොහෝ ප්‍රදේශවල පවතින ඇඳිරි නීතිය තිබියදීත්, ශ්‍රී ලංකාවේ රැඳී සිටීමට තීරණය කොට ඇති විදේශීය සංචාරකයින් 12,000 කට වැඩි පිරිසකට අවශ්‍ය පහසුකම් සලසමින් මෙම අමාත්‍යාංශය ශ්‍රී ලංකාවේ සංචාරක ව්‍යාපාරයට ද සහාය වෙමින් සිටියි. ආපසු සිය රටවල් බලා යාම සඳහා වාණිජ හා වරලත් ගුවන් ගමන් අඛණ්ඩව පැවතිය ද, මෙහි රැඳී සිටින බටහිර රටවල සංචාරකයින් 4000 කට අධික සංඛ්‍යාවක් මෙයට ඇතුළත් වේ. මෙම අර්බුදකාරී තත්ත්වය හමුවේ ශ්‍රී ලංකාවේ සිටින සංචාරකයින් සඳහා වන වීසා බලපත්‍ර 2020 මැයි 12 වැනි දින දක්වා ස්වයංක්‍රීයව දීර්ඝ කරන ලදී.

Covid-19 පරීක්ෂණ පහසුකම් පුළුල් කිරීමේ වර්තමානය තත්ත්වය පිළිබද තම ස්ථාවරය පැහැදිලි කරමින් රජයේ වෛද්‍ය නිලධාරීන්ගේ සංගමය විසින් ද (24) සිය ස්ථාවරය පැහැදිලි කරමින් මාධ්‍ය නිවේදනයක් නිකුත් කර තිබෙනවා. එහි ප්‍රථමයෙන්ම ඔවුන් සදහන් කරන්නේ කොවිඩ්-19 යනු අවිනිශ්චිතභාවය හා බැදුණු රෝගයක් බව තම සංවිධානය විසින් පෙන්වා දුන් බවයි.

එහිදී රජයේ වෛද්‍ය නිලධාරීන්ගේ සංගමය අවධාරණය කරන්නේ බහුතරයක් වූ රෝගීන් හදුනාගෙන ඔවුන් සමාජයෙන් ඉවත් කිරීමට ඇති එකම ක්‍රමවේදය පරීක්ෂණ පහසුකම් වැඩි දියුණු කිරීම බවයි. ඒ සදහා වන පරීක්ෂණ වැඩපිළිවෙළ වහාම රටට හෙළි කරන ලෙස රජයේ වෛද්‍ය නිලධාරීන්ගේ සංගමය සෞඛ්‍ය බලධාරීන්ගෙන් ඉල්ලා සිටිනවා.

මෙරට කොවිඩ් -19 වසංගතයේ වත්මන් තත්ත්වය පිළිබදව සමාජයේ දැඩි අවධානය යොමු යොමු විය යුතු එම මාධ්‍ය නිවේදනය සම්පූර්ණයෙන් පහත දැක්වෙනවා.

අද දින (24) නිකුත් වූ ඉරිදා මව්බිම සහ එහි සන්ඩේ සිලෝන් ඉංග්‍රීසි පුවත්පතේ ‘ව්‍යවස්ථාදායක සභාවේදී මහින්දගෙන් කරුට මල්ටි බැරල් ප්‍රහාරයක්” යන සිරස්තලය යටතේ 2020.04.26 වන ඉරිදා දිනට නිකුත් වන  ජාතික පුවත්පතක සහ එම පුවත්පතෙහිම ඉංග්‍රීසි මුද්‍රණයෙහි  karuj comes under fire යන සිරස්තලය යටතේ පළ වූ ප්‍රවෘත්තිය සම්පූර්ණයෙන්ම සාවද්‍ය පුවතක් බව කරු ජයසූරිය මහතාගේ මාධ්‍ය සම්බන්ධීකරණ අංශය නිවේදනයක් නිකුත් කරමින් කියයි.

එම මාධ්‍ය නිවේදනය සම්පූර්ණයෙන් පහත දැක්වේ.

ව්‍යවස්ථාදායක සභාවේදී මහින්දගෙන් කරුට මල්ටි බැරල් ප්‍රහාරයක්” යන සිරස්තලය යටතේ 2020.04.26 වන ඉරිදා දිනට නිකුත් වන  ජාතික පුවත්පතක සහ එම පුවත්පතෙහිම ඉංග්‍රීසි මුද්‍රණයෙහි  karuj comes under fire යන සිරස්තලය යටතේද දක්වා ඇති තොරතුරු පිළිබඳව කරුණු පැහැදිලි කීරිමයි.

උක්ත සිරස්තල දෙක තුළින් සහ ඒවායේ අන්තර්ගතයෙන් හුවාදැක්වීමට උත්සාහ කර ඇත්තේ 2020 අප්‍රේල් 23 වන දින පැවැත්වු ආණ්ඩුක්‍රම ව්‍යවස්ථා සභා  රැස්වීමේදී කිසියම් මතභේදාත්මක තත්වයක් උද්ගත වු බවයි. නමුත් එම රැස්වීමේදී ආණ්ඩුක්‍රම ව්‍යවස්ථා සභාවේ කිසිදු සාමාජිකයෙක් විසින් එහි වෙනත් සාමාජිකයෙකු වෙත චෝදනා කිරිමක් හෝ කිසියම් දෝෂ දර්ශනයට ලක් කිරිමක් සිදු නොවු බවත්, රටේ පවතින තත්වය පිළිබඳව හැඟීමකින් සහ ආණ්ඩුක්‍රම ව්‍යවස්ථා සභාවේ උත්තරීතර බව පිළිබද අවබෝධයකින් යුතුව ඉතා වගකීමෙන් සාකච්ඡාවේ යෙදුණු බවත්, අවධාරණය කරමු.

උක්ත පුවතෙහි සඳහන් වන ආකාරයට හිටපු රාජ්‍ය ආමාත්‍ය මහින්ද සමරසිංහ මහතා විසින් හිටපු කථානායකවරයා වෙත තියුණු වාග් ප්‍රහාරයක් (මල්ටි බැරල් ප්‍රහාරයක් ලෙස හඳුන්වා දී ඇත.) එල්ල කළ බවට ඇති සඳහනද මුළුමනින්ම සාවද්‍යය.

ආණ්ඩුක්‍රම ව්‍යවස්ථා සභාව කැඳවීමේ ලිපියෙහි “ආණ්ඩුක්‍රම ව්‍යවස්ථා සභාවේ සභාපති හා හිටපු කථානායක” යන යෙදුම වෙනුවට “ආණ්ඩුක්‍රම ව්‍යවස්ථා සභාවේ සභාපති හා කථානායක” යනුවෙන් මුද්‍රණය වී තිබිම අතපසුවීමක් බව සියලුදෙනා විසින්ම පොදුවේ පිළිගත් අතර මේ මොහොතේ කාර්යාලයන්හි දෛනික ක්‍රියාවලිය සුපුරුදු නිලධාරීන් අතින් සිදු නොවන වාතාවරණය තුළ ආරාධනා ලිපිය සකස් කිරිමේදී එය නිලධාරියෙකු අතින් සිදු වු අතපසුවීමක් බවද සලකන ලදී.

ආණ්ඩුක්‍රම ව්‍යවස්ථා සභාවේ සාකච්ඡාවට ගැණුනු අතිශයින් වැදගත් කාලීන මාතෘකා ගණනාවක් තිබියදී  මෙවන් කරුණක් උලුප්පා දක්වමින් ඒ වටා ගොතන ලද අසත්‍ය පුවතක් නිර්මාණය කර ප්‍රධාන සිරස්තලය යටතේ පළ කිරිම පිළිබඳව අප අතිශයින් කණගාටු වන්නෙමු.

කෙසේ වෙතත් පාර්ලිමේන්තුව විසුරුවා පැය 72ක් ගතවීමටත් පෙරාතුව සිය කාර්යාල, නිල නිවාස, නිල  වාහන ඇතුළු සියලු දේ නැවත  භාර දී සාමාන්‍ය පුරවැසියෙකු ලෙස තම නිවස බලා පිටත්ව ගිය හිටපු කථානායක කරු ජයසුරිය මහතාට තවදුරටත් “කථානායක” යන පදවි නාමය භාවිතා කිරිමේ කිසිදු අවශ්‍යතාවයක් නොමැති බවද පෙන්වා දෙමු.

ස්තුතියි – කරු ජයසුරිය මහතාගේ මාධ්‍ය සම්බන්ධීකරණ අංශය – වෙනුවෙන් චමින්ද ගමගේ

(මෙහි ඉරිදා මව්බිම හා සන්ඩේ සිලෝන් යන නම සදහන් කරන ලද්දේ සංස්කාරකවරයා විසිනි. මාධ්‍ය නිවේදනයේ අදාළ පුවත්පත්වල නම සදහන් නොවීය. නමුත් අප පාඨකයින් ඇත්ත තත්ත්වය දැනගත යුතුය)

ඇදිරි නීතිය නිසා නියමිත එන්නත් ලබා ගැනීමට නොහැකිව සිටින ගම්පහ දිස්ත්‍රික්කයේ කුඩා දරුවන්ට අවශ්‍ය එන්නත් ලබා දීම සදහා ක්‍රමවත් වැඩ පිළවෙලක් සකසන්නැයි කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා ගම්පහ සෞඛ්‍ය බළධාරීන්ට උපදෙස් දෙයි. මේ සදහා  ගම්පහ දිස්ත්‍රික්කයේ පළාත් පාලන ආයතන වල සහාය ලබා ගන්නා ලෙසද ඇමතිවරයා මෙහිදී අදාල අංශ වෙත උපදෙස් ලබා  දුන්නේය.

අද (24) ගම්පහ දිස්ත්‍රික් ලේකම් කාර්යාලයේ දී පැවති ගම්පහ දිස්ත්‍රික්කයේ කෝවිඩ් 19 නිවාරණය සදහා අත්‍යශ්‍ය සේවා සැපයීමේ කමිටුවේදී මෙම තීරණයට එළඹිණ.

සෞඛ්‍ය අංශ මෙහිදී පෙන්වා දුන්නේ මේ සම්බන්ධයෙන් ඉහළ සෞඛ්‍ය බළධාරීන්ගෙන් මේ සදහා අවශ්‍ය උපදෙස් ලබා ගතයුතු බවය. අදාල උපදෙස් ලබා ගෙන අවශ්‍ය ක්‍රමවේදය ඉදිරිපත් කරන්නැයි ඇමතිවරයා මෙහිදී ගම්පහ ප්‍රාදේශිය සෞඛ්‍ය සේවා අධ්‍යක්ෂකවරියට උපදෙස් දුන්නේය. මීට අමතරව ගම්පහ දිස්ත්‍රික්කයේ ඩෙංගු මර්ධන වැඩ සටහනක් කඩිනමින් ආරම්භ කරන ලෙසද ඇමතිවරිය සෞඛ්‍ය අංශ වෙත උපදෙස් දුන්නේය. මේ වන විට ආරම්භවී ඇති වැසි සහිත කාලගුණයත් සමග ඩෙංගු රෝගය පැතිර යාමේ අවධානමක් ඇති බැවින් ඒ පිළිබදව කඩිනම් අවධානය යොමු කල යුතුව ඇතැයිද ඇමතිවරයා මෙහිදී කීවේය.

මේ අතර ගම්පහ දිස්ත්‍රික්කයේ රු 5000 දීමනාව ලබා දීමේ ප්‍රගතිය පිළිබදවද මෙහිදී දීර්ඝ ලෙස සාකච්ඡා කෙරිණ. උද්ගතව ඇති ව්‍යවසනාකාරී තත්ත්වය නිසා ආර්ථික වශයෙන් රුපියල් 5000 දීමනාව පවුල් 4,30,447 කට ලබා දී ඇති බවද මෙහිදී හෙලි විය. තවත් අභියාචනා 95,709 කට ගෙවීම ඉදිරි දිනවලදී සිදු කීරමට නියමිතය.

CORONA වසංගත තත්වය නිසා දුෂ්කරතාවයට පත්වී තිබෙන උසස් පෙළ හා 5 වසර දරුවන්ගේ ගැටලූ පිළිබඳව ජනතා විමුක්ති පෙරමුණේ හිටපු පාර්ලිමේන්තු මන්ත්‍රී නලින්ද ජයතිස්ස මහතා විසින් අග්‍රමාත්‍ය මහින්ද රාජපක්ෂ මහතාට ලිපියක් යොමු කර තිබේ. එම ලිපිය පහත දැක්වේ.

වෛද්‍ය නලින්ද ජයතිස්ස
හිටපු පාර්ලිමේන්තු මන්ත්‍රී,
464/20, පන්නිපිටිය පාර,
පැලවත්ත,
බත්තරමුල්ල

ගරු අග්‍රාමාත්‍ය මහින්ද රාජපක්ෂ මහතා,
අරලියගහ මන්දිරය,
කොළඹ.

ගරු අගමැතිතුමනි,

CORONA වසංගත තත්වය නිසා දුෂ්කරතාවයට පත්වී තිබෙන
උසස් පෙළ හා 5 වසර දරුවන්ගේ ගැටලූ පිළිබඳවයි

දැනට  අප රට තුළ ඇති වී තිබෙන CORONA වසංගත තත්වය නිසා මාර්තු මස එකොළොස් වන දා සිට පාසල් වසා දැමීමත්, මාර්තු මස විසි වනදා  සිට රට තුළ ක්‍රියාත්මක වන ඇඳිරි නීති තත්ත්වය නිසාත් මෙම වසරේ අගෝස්තු මස දී පැවැත්වීමට නියමිත උසස් පෙළ විභාගයට සහ පහ වසර ශිෂ්‍යත්ව විභාගයට මුහුණ දමට සිසුදරුවන් විශාල ගැටලූවකට මුහුණ දී තිබේ.

විශේෂයෙන්ම මේ වනවිට පාසල් වසා දමා දින හතලිස් පහකට  අධික කාලයක් ගත වී තිබෙන නිසාත්, පාසල් ආරම්භ කිරීමට දැනට රජය යෝජනා කර තිබෙන මැයි එකොළොස් වැනිදා වුවද, දැනට අලූතෙන් හඳුනා ගැනෙන CORONA රෝගීන් ප්‍රමාණය නිසා ප්‍රායෝගික නොවන බව දැනෙන නිසාද ,මෙම අගෝස්තුවේ මෙම විභාග වලට මුහුණ දීමට සිටින සිසු දරුවන්ට අවශ්‍ය අධ්‍යාපන කටයුතු සිදුකර ගැනීමට නොහැකිව  ඇති බව ඔබතුමාට පැහැදිලිව වැටහෙනවා ඇත.

දැනට අධ්‍යාපන බලධාරීන් විසින් උසස් පෙළ විෂය මට්ටමින් යම් යම් සහන ලබාදිය හැකි බවට ප්‍රකාශකර ඇතත් එම සහන නිශ්චිතව සඳහන් නොකිරීමත්, මේ වන විටත් ක්‍රියාත්මක නොකර තිබීමත්, ඒ ඒ පිළිබඳ ප්‍රශ්නයට සෘජුවම මුහුණ දී සිටින සිසු දරුවන්ගෙන් සහ ගුරුවරුන්ගෙන් පුළුල් කරුණු විමසීමක් සිදු නොකර තිබීමත් නිසා එම සහන වල ප්‍රායෝගික භාවය දැනට වලංගු වන්නේ නැත.

මෙවර උසස් පෙළ විභාගයට පෙනී සිටින සිසු දරුවන් මුහුණ දී ඇති ගැටලු සැලකුවහොත්,

1. CORONA වසංගතය නිසා පාසල් වසා තැබීම නිසා උසස් පෙළ විෂය නිර්දේශ අවසන් කර ගැනීමට නොහැකි වීමේ ගැටලූව
2. බොහෝ සිසු දරුවන් උසස් පෙළ සඳහා උසස් උපකාරක පන්ති යාමට පෙළඹී සිටින බැවින් උපකාරක පන්ති පැවැත්වීමට ඇති නොහැකියාව
3. මෙවර උසස් පෙළ පළමු වරට හා දෙවන වරට මුහුණ දී සිටින සිටින සිසු දරුවන් සියලූ දෙනාටම ගිය වසරේ අප්‍රේල් මස ඇතිවූ පාස්කු ප්‍රහාරයත්, මේ වසරේ   CORONA වසංගතයත්   නිසා වසර දෙක තුළදී ම විභාගයට ආසන්නම මාස වලදී විශාල ගැටලූවලට මුහුණ දීමට සිදුවූ අය වීමත්,
4. බස්නාහිර පළාත තුළ නේවාසිකව උසස් පෙළ සඳහා ඉගෙන ගන්නා දරුවන් ජදරදබ් තත්ත්වයට නිවෙස්වලට  යාමේදී අවශ්‍ය සියලූම පොත්පත් රැගෙන නොයාම නිසා මුහුණ ද තිබෙන ගැටලූ.
5. විෂයමාලාව මාරු කරගෙන එක් වසරක් තුළ  නව විෂය මාලාව සම්පූර්ණ කරගැනීමට උත්සාහ දරන සිසු සිසුවියන්ට සිදුවන විශේෂ දුෂ්කරතාවය.
6. උසස් පෙළ විභාගයට තව ඇත්තේ මාස තුනක් වැනි කාලයක් නිසා මෙම මාස තුනක කාලයේ දී අත්හැරුණු විෂය මාලාවන් කෙතරම් වේගවත් වැඩපිළිවෙළක් හරහා වුවද සම්පූර්ණ කරගැනීමට ඇති දුෂ්කරතාවය.
7. අන්තර්ජාලය හරහා අධ්‍යාපන කටයුතු ලබා දීම ප්‍රායෝගිකව බහුතර පිරිසකට සිදු නොවීම.
ආදී ගැටලූ රාශියක් සඳහන් කළ හැක.
එමෙන්ම 5 වසර ශිෂ්‍යත්ව විභාගයට මුහුණදීමට සිටින දරුවන්ටද දැනට පවතින අවිනිශ්චිතතාවය මත පීඩාකාරී තත්ත්වයක් ඇතිවී තිබේ.

එම නිසා
1. මෙම සිසුදරුවන් මුහුණදී ඇති ගැටළු පිළිබඳ මහජන අදහස් ( Online Public Hearing ) අන්තර්ජාලය මාර්ගයෙන් අධ්‍යාපන අමාත්‍යාංශයට ලබා ගැනීම. (කෙටි කලක් තුළදී).
2. ඉහත මහජන අදහස්ද සැළකිල්ලට ගෙන අගෝස්තුමසදී පැවැත්වීමට ඇති උසස් පෙළ හා පහවසර විභාග පිළිබඳව තීරණය කිරීමට ප්‍රවීණ අධ්‍යාපනඥයන් ගෙන්, පාසල් සහ විශ්වවිද්‍යාල ගුරුවරුන්, සෞඛ්‍ය විශේෂඥයන් ඇතුළු ප්‍රවීණයන්ගෙන්  සමන්විත  කමිටුවක් පත්කරීම.
3. මෙම තත්වයට ම මුහුණ දී සිටින අනෙකුත් රටවල් යොදාගෙන ඇති වඩා සාර්ථක  සහ අප රටට ප්‍රායෝගික වන ක්රියාමාර්ග පිළිබඳ සොයා බැලීම.
4. මෙම කමිටුව මගින් ගන්නා තීරණ අවම වශයෙන් මැයි මස තෙවන සතිය ට පෙර වත් ක්‍රියාත්මක කිරීම.

ස්තුතියි,
මෙයට,

වෛද්‍ය නලින්ද ජයතිස්ස
හිටපු පාර්ලිමේන්තු මන්ත්‍රී

COVID-19 වයිරස තත්වය යොදාගනිමින් සිදුවන සයිබර් ප්‍රහාර ඉහල යාමක් මේ දිනවල පෙන්නුම් කරනු ලබන අතර සයිබර් ආරක්ෂණ ආයතයක් විසින් හතලිස් දහසකට අධික COVID-19 සයිබර් තර්ජන හදුනාගැනීමට සමත්වී තිබෙනවා.

සයිබර් ප්‍රහාර සිදුකිරීමට නිර්මාණය කර තිබෙන මෙම වෙබ් අඩවි වලට පිවිසෙන පුද්ගලයන්ගේ පෞද්ගලික දත්ත, මුරපද සොරාගැනීමට සහ අනිෂ්ට මෘදුකාංග ස්ථාපනය කිරීමට සයිබර් ප්‍රහාරකයන් විසින් කටයුතු කරනු ලබයි. 

ශ්‍රී ලංකාවෙහිද මෙවැනිම ආකාරයේ සයිබර් තර්ජන වල ඉහල යාමක් දැකගත හැකි අතර සමාජයේ දැඩි ඉල්ලුමක් පවතින මුහුණු ආවරණ, Sanitizer වැනි භාණ්ඩ නොමිලේ ලබාදෙනවා යැයි පවසා පෞද්ගලික දත්ත රැස් කිරීමේ වෙබ් අඩවි කිහිපයක් සම්බන්ධයෙන් පැමිණිලි කිහිපයක් අප ශ්‍රී ලංකා තොරතුරු තාක්ෂණ සංගමයට ලැබී ඇත.

තවද “free COVID-19 testing” නම් ඊමේල් පණිවිඩයක් මුවාවෙන් Trickbot වැනි අනිෂ්ට මෘදුකාංග පරිශීලකයාගේ පරිගනයකයට ස්ථාපිත කිරීමේ ක්‍රියාවලියක්ද මේ දිනවල ක්‍රියාත්මක වන අතර මෙවැනි ආකාරයේ පණිවිඩයක් ඔබට ලැබුනුහොත් එය විවෘත කිරීමට යාමෙන් වලකින ලෙස අප ශ්‍රී ලංකා තොරතුරු තාක්ෂණ සංගමය ලෙස ශ්‍රී ලාංකික ජනතාවට දැනුම් දෙමු. 

COVID-19 වෛරසය ආසාදිතයින් සංඛ්‍යාත්මක ලෙස වැඩිවිමත් සමග ඔවුන්ගේ PCR පරීක්ෂණ කටයුතු පුළුල් කිරීමට සෞඛ්‍ය අමාත්‍යාංශය තීරණය කර ඇත.

ඒ අනුව මෙම PCR පරීක්ෂණ කටයුතු පුළුල් කිරීමට පෞද්ගලික රෝහල්වල තිබෙන පහසුකම් ලබා ගැනීමට සෞඛ්‍ය අමාත්‍යාංශය තීරණය කර ඇත. මේ වනවිට දිනකට, රෝහල්වල ප්‍රතිකාර ලබන ආසාදිතයින්, නිරෝධායන මධ්‍යස්ථාන වල සිටින පුද්ගලයින් සහ පරීක්ෂණ වලට භාජනය කළ යුතු සමාජයේ පුද්ගලයින් 800 කගේ පමණ සම්පල රජයේ සෞඛ්‍ය අංශ විසින් පරීක්ෂාවට ලක්කරනු ලබන අතර, මෙම පරීක්ෂණ සංඛ්‍යාව වැඩි කළ යුතු බව සෞඛ්‍ය බලධාරීන්ගේ මතය වී ඇත. ඒ තුලින් ආසාදිතයින් වැඩි සංඛ්‍යාවක් හදුනා ගත හැකි බව ද සෞඛ්‍ය බලධාරීන් අවධාරණය කරයි.

PCR පරීක්ෂණ සිදු කිරීමට පෞද්ගලික රෝහල්වල සහාය ලබාගැනීම සදහා විශේෂ සාකච්ඡාවක් රාජගිරියේ පිහිටි COVID-19 පැතිරීම වැළෑක්වීමේ ජාතික ක්‍රියාන්විත මධ්‍යස්ථානයේ දී අද (23) පෙරවරුවේ සෞඛ්‍ය හා දේශීය දේශීය වෛද්‍ය අමාත්‍ය පවිත්‍රා වන්නිආරච්චි මහත්මියගේ ප්‍රධානත්වයෙන් පැවැත්විනි.

මෙම අවස්ථාවට පෞද්ගලික රෝහල් වන ආසිරි, නවලෝක, ඩර්ඩන්ස්, ලංකා යන රෝහල් නියෝජනය කරමින් නියෝජිතයින් පිරිසක් සහභාගී වුහ. මෙහිදී ඔවුන් විසින් පැවැසුවේ දිනකට එක් රෝහලකින් සාම්පල් 100 ක් පරීක්ෂා කොට වාර්තා ලබාදීමට හැකි බවයි. ඒ අනුව දිනකට 1000 වැඩි PCR පරීක්ෂණ සංඛ්‍යාවක් සිදු කළ හැකි වන අතර, එම රෝහල් සමග පුළුල්ව සාකච්ඡා කොට කොවිඩ් 19 වෛරස පරීක්ෂණ කටයුතු සදහා සහාය ලබාගැනීමට සෞඛ්‍ය අමත්‍යාංශය කටයුතු කරනු ඇත.

මෙම අවස්ථාවට යුධ හමුදාපති ශවේන්ද්‍ර සිල්වා මහතා, සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා ඇතුලු සෞඛ්‍ය බලධාරින් හා පෞද්ගලික රෝහල් නියෝජනය කරමින් සෞඛ්‍ය බලධාරින් එක්ව සිටියහ.

ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් ඊයේ (22) රැස් වූ කැබිනට් මණ්ඩලය විසින් ගත් කැබිනට් තීරණ දැනුම් දීමේ ප්‍රවෘත්ති සාකච්ඡාව අද (23) සම කැබිනට් ප්‍රකාශක අමාත්‍ය බන්දුල ගුණවර්ධන මහතාගේ ප්‍රධානත්වයෙන් රජයේ ප්‍රවෘත්ති දෙපාර්තමේන්තුවේදී පැවැත් වුණා. එහිදී අමාත්‍යවරයා විසින් දැනුම් දුන් කැබිනට් තීරණවල සාරාංශයක පහත පළ වෙනවා.

PMD NEWSEdit

වැලිසර නාවික හමුදා කඳවුරේ සේවයේ නියුතුව සිටි තවත් නාවික හමුදා සෙබළුන් 29 දෙනකුට කොවිඩ්-19 ආසාදනය වී ඇතැයි සෞඛ්‍ය අමාත්‍යාංශය පවසයි. මෙම පුවත යුද්ධ හමුදාපතිවරයා විසින් ද තහවුරු කළ බවයි ජාතික මාධ්‍ය විසින් වාර්තා කළේ.‍

මෙසේ එකවර නාවික සෙබළුන් 29 දෙනකුට කොවිඩ්-19 ආසාදනය වී ඇත්තේ වැලිසර නාවික හමුදා කඳවුරේ සේවය කරමින් සිට නිවාඩු ලබා, පසුගිය 17 වැනිදා පොලොන්නරුවේ සුභූති පුර පිහිටි තම නිවසට ගිය නාවික සෙබළාගෙන් බවයි වාර්තා වන්නේ. මෙම තත්ත්වය මත වැලිසර නාවික හමුදා කඳවුර සම්පූර්ණයෙන්ම හුදෙකළා කර ඇති බවයි නාවික හමුදාව පවසන්නේ.

මේ සම්බන්ධයෙන් අදහස් දක්වන විශ්වාස කටයුතු මූලාශ්‍ර සදහන් කරන්නේ ජාඇළ සුදුවැල්ලේ කොවිච්-19 ආසාදිතයින් වැටලීමට ගිය කණ්ඩායමට මෙම නාවික හමුදා සෙබළුන් අයත්වන බවයි.

මේ අතර සෞඛ්‍ය ප්‍රවර්ධන කාර්යංශයේ වෙබ් අඩවියේ ප.ව 21.04ට සිදුකළ යාවත් කාලීන කිරීම් අනුව අද (23) දිනයේ ප.ව 21.04 වන විට කොවිඩ්-19 ආසාදිතයින් 38 දෙනකු වාර්තා වීම සමග මුළු ආසාදිතයින් සංඛ්‍යාව 368 දක්වා වර්ධනය වී තිබෙනවා.

සෞඛ්‍ය අධ්‍යක්‍ෂ ජෙනරාල් විසින් පොලීස්පති වරයා වෙත පවරා ඇති බලතල මත ඇදිරි නීතිය නොමැති අවස්ථාවන් වලදී  නිරෝධායන රීතිවලට අනුව සෞඛ්‍ය උපදෙස් කඩකරනු ලබන අයවළුන්ට එරෙහිව පොලිස් නිලධාරීන් විසින් නිතීමය කටයුතු සිදු කරන බව නියෝජ්‍ය පොලිස්පති නීතිඥ අජිත් රෝහණ මහතා පවසනවා.

ඔහු මේ බව ප්‍රකාශ කළේ අද (23) කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ පැවැත්වූ මාධ්‍ය හමුවේදීයි. මේ සදහා ආරක්‍ෂක මාණ්ඩලික ප්‍රධානී, යුද්ධ හමුදාධිපති සහ කොවිඩ්-19 පැතිරීම වැළැක්විමේ ජාතික ක්‍රියාන්විත මධ්‍යස්ථානයේ ප්‍රධානී ලුතිනන් ජෙනරාල් ශවේන්ද්‍ර සිල්වා මහතා ද සහභාගී වුණා.

මේවන විට විවිධ ප්‍රදේශයන්හී ඇදිරි නීතිය ඉවත්වී ඇති අතර, සමහර ප්‍රදේශයන්ශී තවදුරටත් ඇදිරි නීතීය ක්‍රියාත්මක වනු ඇත. එසේම, මේ කාලවකවානුව තුළ ජනතාවගෙන් ඉටුවිය යුතු යුතුකම සහ වගකීම නියම ආකාරයෙන් සිදු කිරිමට කටයුතු කළ යුතුය.

ඒ වගේම පොදු ප්‍රවාහන සේවය සපයනු ලබන ලංකා ගමනා ගමන මණ්ඩලය හා අනෙකුත් පුද්ගලික ප්‍රවාහනය පහසුකම් සපයන්නන්‍ගෙන් ඉල්ලා සිටිනුයේ 50% නොවැඩි මගීන් ප්‍රමාණයක් ප්‍රවාහනය කරන ලෙසත් ලබාදී ඇති සෞඛ්‍ය උපදෙස් මත පමණක් ක්‍රියා කර සමාජ දුරථභාවය තබාගන්නා ලෙස දන්වා සිටිනු ලැබේ.

ඒවගේම විශේෂයෙන්ම කාර්යාලවල රාජකාරීන් සිදු කිරිමේදී නියම කරනු ලැබූ සේවක සංඛ්‍යාව මගින් පමණක් සහ ලබාදී ඇති සෞඛ්‍ය උපදෙස් මත රාජකාරීන් කරගෙන යන ලෙස ආයතන ප්‍රධානින් වගබලා ගත යුතුය.

දහවල් කාලය තුළ ඇදිරි නීතිය ඉවත් කරන ලද ප්‍රදේශවල සහ ඇදිරි නීතීය ක්‍රියාත්මක වන ප්‍රදේශවල අත්‍යවශ්‍ය සේවා සහ සුවිශේෂි කරුණක් හැර දිස්ත්‍රික් මායිම් හරහා ගමන් කිරිම තහනම් වන අතර, ඒ සඳහා පොලිස් මාර්ග බාදක 944 ක් පමණ හා දිස්ත්‍රික් මායිම් සඳහා මාර්ග බාදක 262 ක් යොදවා ඇත.

එසේම සෞඛ්‍ය අධ්‍යක්‍ෂ ජෙනරාල් විසින් පොලීස්පති වරයා වෙත පවරා ඇති බලතල මත ඇදිරි නීතිය නොමැති අවස්ථාවන් වලදී  නිරෝධායන රීතිවලට අනුව සෞඛ්‍ය උපදෙස් කඩකරනු ලබන අයවළුන්ට එරෙහිව පොලිස් නිලධාරීන් විසින් නිතීමය කටයුතු සිදු කරනු ලබයි.

ඇදිරි නීතිය ආරම්භ කළ දිනයේ සිට මේ දක්වා පුද්ගලයින් 36115 ක් ද, වාහන 10000 ක් ද, අත්අඩංගුවට ගෙන ඇති අතර ඉදිරියේදී ඔවුන්ට එරෙහිව නීතිමය කටයුතු සිදු කරනු ලබයි.

ඊයේ (22) දින සිට ශ්‍රී ලංකා යුද්ධ හමුදා ක්‍ෂණික විහිදුම් යතුරුපැදි කණ්ඩය මගින් ඔවුන්ගේ යතුරුපැදි 20 ක් පමණ යොදාගනිමින් කොළඹ නගරය අවට අත්‍යාවශ්‍ය සේවාවන් සඳහා පැමිණෙන පුද්ගලයන්ගේ ශරීර උෂ්ණත්වය හදිසි පරික්‍ෂාවකට ලක් කරන අතර, එහිදි ඔවුන් යම් නිරීක්‍ෂණයකට ලක්වුහොත් ඉදිරිපියවරයන් සඳහා  සෞඛ්‍ය අංශ වෙත යොමු කරනු ලබන බව ආරක්‍ෂක මාණ්ඩලික ප්‍රධානී, යුද්ධ හමුදාධිපති සහ කොවිඩ්-19 පැතිරීම වැළැක්විමේ ජාතික ක්‍රියාන්විත මධ්‍යස්ථානයේ ප්‍රධානී ලුතිනන් ජෙනරාල් ශවේන්ද්‍ර සිල්වා මහතා ප්‍රකාශ කළා.

ඔහු මේ බව ප්‍රකාශ කළේ අද (23) කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ පැවැත්වූ මාධ්‍ය හමුවේදීයි. මේ සදහා නියෝජ්‍ය පොලිස්පති නිතිඥ අජිත් රෝහණ මහතා ද සහභාගී වුණා.

ලුතිනන් ජෙනරාල් ශවේන්ද්‍ර සිල්වා මහතා මෙසේද ප්‍රකාශ කළා.

අද (23) දින ඉන්දියාවේ සිට UL-1146 දරණ මගී ගුවන් යානයෙන් අධ්‍යාපනය හැදැරීමට ගොස් සිටි සිසුන් 101 දෙනෙකු මෙරටට පැමිණි අතර, ඔවුන් සියළු දෙනා යුද්ධ හමුදාව වෙතින් පාලනය කරනු ලබන පූනානී නිරෝධායන මධ්‍යස්ථානය වෙත නිරෝධායන ක්‍රියාවලිය සඳහා යොමුකරන ලදී.

එසේම, ඉදිරි දිනයන්වලදී ශ්‍රී ලංකා රාජය විසින් මෙවැනි පුද්ගල කණ්ඩායම් විදෙස් රටවල සිට මෙරටට රැගෙන ඒමට නියමිතව ඇති අතර, එහිදි ප්‍රථමයෙන් දකුණු ආසියානු (SAARC) කාළාපයට ප්‍රමුඛත්වයක් ලබාදෙනු ඇත.

යුද්ධ හමුදාව විසින් පවත්වාගෙන යනු ලබන පූනානී නිරෝධායන මධ්‍යස්ථානයෙන් නිරෝධායන ක්‍රියාවලිය සඳහා යොමුකළ පුද්ගලයින් 16 දෙනෙකු නිරෝධායන ක්‍රියාවලියෙන් අනතුරුව, PCR පරික්‍ෂණය සිදුකර අද (23) දින තම නිවෙස් වෙත පිටත් කරන ලදී. ඒ අනුව ත්‍රිවිධ හමුදාව මගින් පාලනය කරනු ලබන නිරෝධායන මධ්‍යස්ථාන 26 ක් තුළ 2744 දෙනෙකු මේ වන විට නිරෝධායනය වෙමින් සිටියි.

අද (23) දිනය වන විට ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන තුළින් 4366 දෙනෙකු නිරෝධායන ක්‍රියාවලිය අවසන්වී තම නිවෙස් වෙත පිටව ගොස් ඇත. ඊයේ දිනයේදී PCR පරික්‍ෂණවලින් පසු කොවිඩ් 19 ආසාදිතයන් වශයෙන් 20 දෙනෙකු හදුනාගනු ලැබුවා. ඉන් 13 දෙනෙකු බේරුවල ප්‍රදේශයෙන් සොයාගන්නා ලදී.

එසේම තවත් 5 දෙනෙකු කෙසෙල්වත්ත ප්‍රදේශයෙන් හදුනාගන්නා ලදී. ඔළුවිල් නිරෝධායන මධ්‍යස්ථානය වෙත සුදු වැල්ලෙන් රැගෙන ගිය තවත් එක් පුද්ගලයෙකුට වෛරසය ආසාදනය වී බව තවුරු වූ  අතර, අවසන් වශයෙන් වැලිසර නාවික හමුදා කඳවුරට අයත් නිවාඩු මත සිටි නාවික හමුදා සෙබලකුට කොවිඩ් 19 අසාධනය වී අතැයි තහවුරු වීය.

වැලිසර නාවික හමුදා කඳවුරට අයත් නිවාඩු මත සිටි නාවික හමුදා සෙබලකුට කොවිඩ් 19 අසාධනය වී අතැයි තහවුරු වීමෙන් පසු ඔහු සමීපව ඇසුරු කළ ඥාතීන් සහ හිත මිතුරන් අයත් පොලොන්නරුව ප්‍රදේශයේ ලංකාපුර ප්‍රදේශිය ලේකම් කොට්ඨාශයේ ග්‍රාමසේවා වසම් 12 ක් මේ වන විට හුදකළා කර නිරෝධායන ක්‍රියාවලියට යොමුකර ඇත.

එසේම, දැනට එම සෙබලා සේවය කළ නාවික හමුදා කඳවුර නිරෝධායන ක්‍රියාවලියට යොමුකර ඇති අතර, අද (23) දින එම කොවිඩ් 19 ආසාදිත බවට තහවුරු වූ සෙබලා සමීපව ඇසුරු කළ සෙබළුන් PCR පරීක්‍ෂණයට භාජනය කර ඇත.

ඊයේ (22) දින සිට ශ්‍රී ලංකා යුද්ධ හමුදා ක්‍ෂණික විහිදුම් යතුරුපැදි කණ්ඩය මගින් ඔවුන්ගේ යතුරුපැදි 20 ක් පමණ යොදාගනිමින් කොළඹ නගරය අවට අත්‍යාවශ්‍ය සේවාවන් සඳහා පැමිණෙන පුද්ගලයන්ගේ ශරීර උෂ්ණත්වය හදිසි පරික්‍ෂාවකට ලක් කරන අතර, එහිදි ඔවුන් යම් නිරීක්‍ෂණයකට ලක්වුහොත් ඉදිරිපියවරයන් සඳහා  සෞඛ්‍ය අංශ වෙත යොමු කරනු ලබයි.