Supiri Gossip

Blog

  • Covid-19: පීඩාවට පත් ගම්පහ 423,179 කට රු.මිලියන 3974.44 ක අධාර

    Covid-19: පීඩාවට පත් ගම්පහ 423,179 කට රු.මිලියන 3974.44 ක අධාර

    කෝවිඩ් 19 හෙවත්  කොරෝනා වසංගතය හේතුවෙන් පීඩාවට පත්ව සිටින ගම්පහ දිස්ත්‍රික්කයේ පුද්ගලයන් 4,23,179 කට  රුපියල් මිලියන 3974.44 ක අධාර ලබා දී ඇතැයි කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා ඇමති ප්‍රසන්න රණතුංග මහතා පවසයි. ඔහු පෙන්වා දෙන්නේ  මෙම වසංගතය හේතුවෙන් ආර්ථිකමය වශයෙන් පීඩාවට පත්වූ පිරිස් වලට රුපියල් 5000ක ආධාරයක්  ලබා දීමේ වැඩ සටහනට අමතරව මෙම ආධාර ලබා ඇති බවයි.

    අවදානම් කළාපයක් ලෙස හදුනා ගෙන ඇති ගම්පහ දිස්ත්‍රික්කයේ විශ්‍රාමිකයන් 87030කට විශ්‍රාම වැටුප් වශයෙන් රුපියල් මිලියන 2421.37 ගෙවා තිබේ. දිස්ත්‍රික් ලේකම් කාර්යාල දත්ත වලට අනුව වැඩිහිටි, ආබාධිත , ජ්‍යෙෂ්ඨ පුරවැසි  වකුගඩු ආධාර ලෙස පුද්ගලයන් 54329කට රුපියල් මිලියන 271.64 ක මුදලක් ලබා දී ඇත.

    ගැබිනි මව්වරුන් 21831 ක් සදහා පෝෂණ ආධාර ලබා දීමට වැය කල මුදල රුපියල් මිලියන 43.66 කි. මීට අමතරව පවතින තත්ත්වය තුළ ආර්ථික වශයෙන් පීඩාවට පත්ව සිටින පවුල් 265,531 ක් හදුනාගෙන ඇති අතර ඒ සදහා රුපියල් 5000 දීමනාව ලෙස රුපියල් මිලියන 1327.65ක් ගෙවීමට නියමිතය.

    කෝවිඩ් 19 හෙවත් කොරෝනා වසංගතය පැතිර යාම වැලක්වීම හේතුවෙන් රජය ගනු ලැබූ ක්‍රියාමාර්ග හේතුවෙන් සිය ජීවනෝපාය කරගත නොහැකිව සිටින පවුල් වලට මෙම රුපියල් 5000ක ආධාරය ලබා දීමට ඒ සදහා පත් කල ජනාධිපති කාර්යය සාධන බලකාය තීරණය කළේ ජනාධිපතිවරයාගේ හා අගමැතිවරයාගේ ඉල්ලීම අනුවය. 

    මෙම වැඩපිළිවෙල වඩාත් විනිවිදභාවයෙන්  ක්‍රියාත්මක කිරීම සදහා ග්‍රාමීය මට්ටමේ කමිටුවක් නම් කෙරුණු අතර එම කමිටුව හරහා අදාල  පවුල් හදුනා ගැනින. වැඩ සටහන තවදුරටත්  විනිවිදභාවයෙන් ක්‍රියාත්මක කිරීම සදහා නව උපදෙස් මාලාවක් මේ වන විට නිකුත් කර ඇති බවත් මෙම අධාරය ලැබිය යුතු සියලු දෙනාටම ලබා දීම රජයේ අපේක්ෂාව බවත් ඇමති ප්‍රසන්න රණතුංග මහතා පෙන්වා දෙයි.

  • තාරුණ්‍යයේ වගකීම් හා අයිතීන් මොනවාද? – අලුත් මානයක කියවීමක්

    තාරුණ්‍යයේ වගකීම් හා අයිතීන් මොනවාද? – අලුත් මානයක කියවීමක්

    කෙනෙකුගේ ජීවිතයේ වඩාත් ම සුන්දර, ජවයෙන් සපිරි හා අර්ථ වත් කාල පරිච්ඡේදය තාරුණ්‍ය යි. මිනිසා ජීවිතයේ විවිධ අවස්ථාවන් පසු කරයි. ළදරු, ළමා, නව යොවුන්, යෞවන, වැඩිහිටි හා වයෝවෘධ යනුවෙන් මෙම අවධි සාපේක්ෂව වෙන්කර දැක්විය හැකිය.

    නව යොවුන් වියෙන් (එනම් ස්ත්‍රී/පුරුෂ දෙපාර්ශවයේම මල්වර වීමේ වයසේ සිට) ආරම්භ වන තාරුණ්‍ය නොහොත් යෞවනය වැඩිහිටියෙකු බවට පත්වනතෙක් වූ කාල පරාසය තෙක් ලෙස දැක්විය හැක. එය හැඟීම් බර ශක්තියෙන් යුත් ආශාවන් හා අපේක්ෂාවන්ගෙන් පිරිපුන් බලය හා ධාවකත්වයෙන් යුත් කාල පරිච්ඡේදයක් ලෙස ද දැක්විය හැක.

    ඉස්ලාමය තාරුණ්‍ය පිළිබඳව විශේෂ අවධානයක් යොමු කොට ඇත. උම්මතයේ අනාගත නායකත්වය ඔවුන් තුළින් සැකසෙන අතර ධාර්මිෂ්ඨත්වය තුල රැඳී සිටීමට විශේෂ  ප්‍රයත්නයක නියැලෙන පිරිසක් ලෙස ඔවුන් ව ඉස්ලාමය දකියි. ඔවුන්ව විවිධ මාර්ගයන් වෙත ආකර්ෂණය කරන දෑ බොහොමයක් සමාජය තුල ඇති අතර ඒවායින් වැළකී සාරධර්ම සපිරි සදාචාරාත්මක පිළිවෙතක් තුල රැඳී සිටින්නට ඔවුන්ට විශාල චෛතසික අරගලයක නියැලෙන්නට සිදුව ඇත.

    තාරුණ්‍යයේ වැදගත්කම

    තාරුණ්‍යයේ වයසින් අඩුකමත් සමග අත්දැකීම් ඌන තාවක් තිබුන ද මිනිසෙකු ජීවිතයේ අත් විඳින  බොහෝ පරීක්ෂණ හා පෙළඹවීම් ආදියට මුහුණ දෙන කාලයක් ලෙස මෙය නම් කළ හැක. එය එසේ වුවද ජීවිතයේ ධෛර්යවන්ත කම, ශක්ති වන්ත කම, වැනි ගුණාංග ඇතිව කටයුතු කරමින් තම ප්‍රජාව වෙත ධනාත්මක හා ගුණාත්මක වෙනස්කම් ස්ථාපනය කිරීමට  කටයුතු කරන්නා බවට තාරුණ්‍යය පත්වෙයි. වඩාත්ම වැදගත් කාරණය වන්නේ නව යෞවනය වෙත ට පිවිසීමත් සමග ඔහු හෝ ඇය මහා කාරුණික අල්ලාහ් ඉදිරියේ තම ක්‍රියාවන් වෙනුවෙන් වගකීම් දරන්නෙකු බවට පත් වීමයි.

    විභාගයකට ඉදිරිපත් වන ශිෂ්‍යයෙකු පිලිබඳ ව මොහොතක් සිතන්න. ඔහුගේ ප්‍රශ්න පත්තරයත් සමග එයට පිලිතුරුත් ඔහුට සපයා තිබේනම් ඔහු හෝ ඇය විභාගයෙන් අසමත් විය නොහැක. තම ජීවිත විභාගය නොහොත් පරීක්ෂණය මහා කාරුණික දෙවිඳුන් විසින් මෙලෙසින් සකස් කොට දී තිබිය දීත් යමෙක් එම විභාගය අසමත් වන්නේ නම් ඔහු තරම් අවාසනාවන්ත හා බුද්ධි හීන අයෙකු තවත් සිටිය නොහැක. ඔහුගේ ජීවිත පරීක්ෂණයත් එයින් ජය ලබා ගන්නා මාර්ගයත් ඉස්ලාමය විසින් ඉතා අලංකාර අයුරින් සැමට සපයා දී ඇත.

    සැබැවින් ම මහාකාරුණික අල්ලාහ් විසින් මරණින් මතු ජීවිතයේ අසනු ලබන ප්‍රශ්න පත්තරයත් සමග පිළිතුරු ද ලබා දී ඇත. මේවා ඉතා හොඳින් දැන දැනත් ඇතැමුන් අසමත් වීම සිතා බැලිය නොහැකි තරම් අවාසනාවන්ත කමකි. මෙම ප්‍රශ්න හා පිළිතුරු පිලිබඳ ව අවධියෙන් කටයුතු කිරීමට වඩාත්ම සුදුසු කාලය තාරුන්‍යයි. එය ඔහුගේ හෝ ඇයගේ මහා කාරුණික අල්ලාහ් වෙත වූ වගකීමේ ආරම්භක කාලය හේතුවෙන්ම එය වඩාත් වැදගත් වෙයි. අවාසනාවන්තයින්ගේ ලැයිස්තුවේ සාමාජිකයෙකු නොවී ජයග්‍රහණය වෙත යොමු වුවෙකු ලෙස කටයුතු කිරීමේ ආරම්භය තාරුණ්‍යයත් සමග ඇරඹේ.

    තාරුණ්‍යය හා ඉස්ලාම්

    තාරුණ්‍යය ආශාවන්ගෙන් පිරී ඉතිරෙන කාල පරිච්ඡේදයක් යැයි පැවසීම බොහෝ දුරට නිවැරදිය. මෙම ආශාවන් විවිධ අංශ මත ගොඩනැගී තිබිය හැක. මෙම ආශාවන්ගෙන් බොහොමයක් මහාකාරුණික අල්ලාහ්ගේ මග පෙන්වීමට පටහැනි ඒවා විය හැක. තම චෛතසිකය සමග අරගලයක නියැලෙමින් මෙවන් ආශාවන් පාලනය කර ගනිමින් බියබැතියෙන් යුත් සාරධර්ම සපිරි මාවතක තම ජීවිතය සකසා ගන්නට ගන්නා වූ ප්‍රයත්නය උදෙසා මෙම ජීවිතයේදීත් මතු ජීවිතයේදීත් අති විශාල යහ විපාක මහා කාරුණික අල්ලාහ් විසින් ලබා දෙන බවට සහතික වී ඇත.

    මුහම්මද් තුමාණන් (එතුමා කෙරෙහි මහා කාරුණික අල්ලාහ්ගේ ශාන්තිය හා සාමය අත්වේවා) විසින් පැවසු බවට අබු හුරෛරා තුමාණන් (එතුමා කෙරෙහි මහා කාරුණික අල්ලාහ්ගේ තෘප්තිය අත්වේවා) වාර්තා කරන පරිදි, මරණින් මතු විනිශ්චය දිනයේදී මහා කාරුණික අල්ලාහ්ගේ සෙවන හැර අන් සෙවනක් නොමැති අවස්ථාවේ හත්දෙනෙකුට අල්ලාහ්ගේ සෙවන ලබාදෙන බව දක්වා ඇත.

    ඔවුන් නම්: 1. සාධාරණ හා යුක්ති සහගත පාලකයෙක් 2. මහා කාරුණික අල්ලාහ්ගේ මග පෙන්වීම් අනුව නැමදුමෙහි නියැලී වැඩුණු තරුණයෙක් 3. මස්ජිදය වෙත බැන්දියාවකින් කටයුතු කළ අයෙකු 4. මහා කාරුණික අල්ලාහ් වෙනුවෙන් එකට හමුවී වෙන්වුණු  දෙදෙනෙකු 5. උසස් තරාතිරමක අලංකාර ස්ත්‍රියක් විසින් තමන් ව වැරදි (ලිංගික) සබඳතාවක් වෙනුවෙන් ආරාධනා කළ අවස්ථාවේ “මම අල්ලාහ්ට බිය වෙමි”යි පවසා එය ප්‍රතික්ෂේප කළ තරුණයෙක් 6. ඉතා රහසිගත අයුරින් දන් දෙන තැනැත්තා. එය කෙතරම් රහසිගත දන්දීමක් ද යත් තම එක් අතකට නොදැන අනිත් අතින් දන් දීමයි. 7. අප්‍රසිද්ධ ව දෙවිඳුන් සිහිපත් කොට තම දෑසින් කඳුළු වැගිරූ තැනැත්තා.” (සහිහ් මුස්ලිම් 5:2248)   

    තවත් නබි වදනක් අනුව ආදම්ගේ දරුවන්ට ප්‍රශ්න හතරකට පිළිතුරු සපයන තෙක් විනිශ්චය දිනයේදී තම පය ඔසවන්නට නොහැකි වනු ඇතැයි මුහම්මද් තුමාණන් විසින් පවසා ඇත. මින් එක් ප්‍රශ්නයක් නම් තම තාරුණ්‍ය කෙසේ ගත කළේද යන්නයි. මෙයින් පැහැදිලි වන්නේ සෑම මිනිසෙකුම තම තාරුණ්‍ය පිළිබඳ ව කෙතරම් වගකීමකින් හා අවධානයෙන් කටයුතු කළ යුතුද යන්න නොවේද?

    මුස්ලිම් පවුලක් (දෙමව්පියන්) විසින් පහත සඳහන් කරුණු තරුණයින් වෙත ඉටුකළ යුතුව ඇත.

    1. යහපත් ආගමික ඇතිදැඩි කිරීමක් හා නිවැරදි මග පෙන්වීමක්
    2. නුතන ලෝකයේ අභියෝගයන්ට සරිලන පරිදි යහපත් අධ්‍යාපනයක් ලබා දීම
    3. යහපත් මානසික වර්ධනයක් සඳහා සුදුසු වූ ධනාත්මක නිවෙස් පරිසරයක්   
    4. ශක්තිමත් ශාරීරික වර්ධනයක් සඳහා වූ යහපත් සෞඛ්‍යමය ජීවන රටාවක්
    5. ශක්තිමත් ආධ්‍යාත්මික වර්ධනයක් සඳහා වූ කුර්ආන් හා සුන්නා පදනම් වූ දැනුම හා අධ්‍යාපන කටයුතු
    6. මුහම්මද් තුමාණන්ගේ හා සහාබාවරුන්ගේ ජීවන චරිතයෙන් දැකගත හැකි අලංකාර පුර්වාදර්ශී දැනුම ලබාදීම

    තාරුණ්‍ය වෙත පැවරෙන වගකීම්

    1. තම අධ්‍යාපන කටයුතු ඉතාමත් ම යහපත් අයුරින් කරගෙන යෑම. මෙයට පාසල් අධ්‍යාපනයත් ආගමික අධ්‍යාපනයත් අඩංගු වෙයි.
    2. තමා වෙත පැවරෙන සියළු කටයුතු ඉතාමත්ම උසස් අන්ධමින් ඉටු කිරීම හා සෑම ක්‍රියාවක් සම්බන්ධයෙන් ප්‍රමුකයා වීමට හැකි සෑම උත්සාහයක් ම දැරීම .
    3. ඉස්ලාමීය ඉගැන්වීම් අනුව තම ජීවිතය සකස් කර ගැනීම, ඉතා උසස් සාරධර්මයන්ගෙන් හෙබි අයුරින් හා සදාචාර සම්පන්න අයුරු සියළු කටයුතු කිරීම.
    4. තම පවුලට හා සමාජයට උපරිම අයුරින් දායකත්වය ලබා දෙමින් කටයුතු කිරීම. වැඩිහිටියන්ගේ අවශ්‍යතාවන් පිළිබඳ ව සොයා හැකි සියල්ල ඉටුකර දීම. කුඩා දරුවන් සම්බන්ධයෙන් ඉතා ආදරයෙන් හා සෙනෙහසින් කටයුතු කිරීම.
    5. තමන්ගේ යහළු පිරිස තෝරා ගැනීමේදී ඉතා ප්‍රවේසමින් කටයුතු කිරීම. වැරදි අයෙකු ව මිතුරෙකු ලෙස එකතු කර ගත්තා නම් ඔහුගේ වැරදි ක්‍රියාකාරකම් වෙත නැඹුරු වීමට ඇති සම්භාවිතාව ඉතා වැඩි බව අවබෝධ කර ගැනීම.
    6. තම දෙමව්පියන් හා පවුලේ සාමාජිකයින් සම්බන්ධව ඉතා ආදරයෙන් හා වගකීම් සහිත අයුරින් කටයුතු කිරීම.

    “ඔහු(අල්ලාහ්) හැර වෙනත් කිසිවෙක් නුඹලා නොනමදිය යුතු යැයි ද දෙමාපියන් සමග ඉතා යහ අයුරින් කටයුතු කළ යුතු යැයි’ද නුඹගේ පරමාධිපති (නුඹලාට) නියම කොට ඇත. නුඹ(ගේ භාරකාරත්වය යටතේ නුඹ) අබියස ඔවුන් දෙදෙනාගෙන් කෙනෙකු හෝ ඔවුන් දෙදෙනාම මහළු වියට පත්වුයේ නම් එවිට ඔවුන් දෙදෙනාට ‘උෆ්’ (නම් අගෞරවයෙන් හෝ කෝපයෙන් ‘චිහ්’) යන්නෙන් (පවා) නුඹ නොපවසවූ. තවද ඔවුන් දෙදෙනාට නුඹ බැන නොවදිවු. තවද ඔවුන් දෙදෙනාට නුඹ ගෞරවනීය වදන් පවසවූ”. (අල් කුර්ආන් 17:23)   

    “අහෝ! රසුල්වරයා(ගේ පිළිවෙත) සමග මා මගක් ගොඩ නගා ගන්නට තිබුණා නම්, අහෝ මාගේ විනාශය! අහවලාව මිත්‍රයෙකු ලෙස නොගන්නට තිබුනා නොවේ ද? (අල් කුර්ආනයෙන් වූ) උපදෙස් මා වෙත පැමිණි පසු ව පවා සැබැවින් ම මොහු මා එයින් නොමග යවා ඇත යැ’යි (තම පාපතර මිතුරා අඟවා)  පවසමින් තම දෑත් සපා ගන්නා (එම විනිශ්චය) දිනය (සිහිපත් කරවූ). තවද ෂෛතාන් මිනිසාට දැඩි ද්‍රෝහියෙකු වන්නේය” (අල් කුර්ආන් 25:27-29)

    නබි මුහම්මද් (සල්) තුමාණන් මෙසේ පැවසුහ: “කරුණු පහක් හට ගන්නට පෙර කරුණු පහකින් ප්‍රයෝජන ලබා ගන්න. මහලු විය ඇති වන්නට පෙර තරුණ වියෙන් ප්‍රයෝජන ලබා ගන්න. රෝගී වීමට පෙර ශරීර සුවයෙන් ප්‍රයෝජන ලබා ගන්න. දිළිඳු බව ඇති වන්නට පෙර ඔබගේ ධනයෙන් ප්‍රයෝජන ලබා ගන්න. කාර්ය බහුල වන්නට පෙර විවේක කාලයෙන් ප්‍රයෝජන ලබා ගන්න. මරණයට පෙර ජීවිතයෙන් ප්‍රයෝජන ලබා ගන්න”. (සුනාන් තිර්මිදී) 

    ජයග්‍රාහි උම්මතයක් ගොඩ නැගීම වෙනුවෙන් ධාර්මිෂ්ට, සාරධර්මයන්ගෙන් සපිරි සදාචාර සම්පන්න තාරුණ්‍යයක් සඳහා කැපවී කටයුතු කරමු

  • රු.5,000ක් ලබාදීමේ ක්‍රියාවලිය දේශපාලනීකරණය කරලා – බිමල් රත්නායක

    රු.5,000ක් ලබාදීමේ ක්‍රියාවලිය දේශපාලනීකරණය කරලා – බිමල් රත්නායක

    කොරෝනා මර්දනය කිරීම මෙන්ම ඒ සඳහා ගනු ලබන ක්‍රියාමාර්ගවලින් අපහසුතාවයට පත්ව සිටින සාමාන්‍ය ජනතාවගේ ජන ජීවිතය යථාවත් කිරීමත් ආණ්ඩුවේ වගකීමක් බව ජ.වි.පෙ. ජාතික සංවිධායක බිමල් රත්නායක මහතා අවධාරණය කරයි.

    බිමල් රත්නායක මහතා මේ බව අවධාරණය කළේ අද (17) දින බත්තරමුල්ල, පැලවත්ත ප්‍රධාන කාර්යාලයේදී පැවැති මාධ්‍ය හමුවේදීය.

    එහිදී බිමල් රත්නායක මහතා කළ සම්පූර්ණ කතාව පහත පළ වේ.

    අපේ රටේ කොරෝනා වෛරසය මැඩපැවැත්වීමට ඇඳිරි නීතිය පනවා යම් යම් ක්‍රියාමාර්ග අනුගමනය කිරීම මාසයකට ආසන්නවී තිබෙනවා. ලෝකයේ හැම රටක්ම විශාල සීමාකිරීම් තුළින් මේ වෛරසය මැඩපැවැත්වීමට ක්‍රියාකර තිබෙනවා. මෙයට කලින් සීමාකිරීම් අඩුවෙන් කළ රටවල් පවා නැවත සීමාකිරීම් වැඩිකර තිබෙනවා. ජපානය වැනි රටක් සීමාකිරීම් ලිහිල් කළත් නැවත 16වැනිදා සිට හදිසි තත්වයක් ප්‍රකාශයට පත්කරලා.

    අනිවාර්යයෙන්ම සීමාකිරීම් සහ යම් යම් පාලනය කිරීම් අවශ්‍ය බව පිළිගන්නා අතරම ජනතාවට තිබෙන ප්‍රධාන ගැටලුවලට පිළියම් යෙදිය යුතු වෙනවා. කොරෝනා මර්දනය සඳහා ගෙන තිබෙන ක්‍රියාමාර්ග නිසා ගොවි ජනතාව, ධීවර ජනතාව සහ විශේෂයෙන්ම විදෙස්ගත ශ්‍රී ලාංකිකයන් විශාල පීඩාවකට පත්වී සිටිනවා. 

    විදෙස්ගත ශ්‍රී ලාංකිකයන් අතර අති විශාල ප්‍රමාණයක් ඉන්නේ ශ්‍රමිකයන් ලෙස විදේශගත වූවන්ය. මේ අතර ඔවුන් විවිධ සහ වෙනස් නීතිමය තත්වයන්ට මුහුණ දෙනවා. මේ අතර ඇතැම් අය නිශ්චිත කාලයකට විදෙස්ගතවී සිටින අතර තවත් පිරිසක් ලංකාවට යමින් එමින් රැකියා කටයුතු කරනවා.

    තවත් පිරිසක් නිසි රැකියා බලපත්‍රයක් නැතිව ඒ රටවල රැඳී සිටිනවා. යුරෝපා රටවල්වල සහ මැදපෙරදිග රටවල්වල කොරියාව, ජපානය වැනි රටවල්වල මේ ශ්‍රමිකයන් වැඩියි. නීති විරෝධීව රැඳී සිටින විශාල පිරිසකුත් සිටිනවා. තව පිරිසක් අදාල රටවලට ඇතුල්වීමේ නීත්‍යානුකූල බලපත්‍ර හෝ රැකියා කිරීමේ බලපත්‍ර නැති අය. ඒ වගේම බලපත්‍ර කල් ඉකුත් වූ අයත් සිටිනවා. මේ වගේ කණ්ඩායම් රාශියක් විදෙස්ගතවූවන් අතර සිටිනවා.

    විදේශගතව අධ්‍යාපනය ලබන ශිෂ්‍ය ශිෂ්‍යාවන්, විවිධ පුහුණු වැඩසටහන්වලට ගිය රජයේ නිලධාරීන්, සංචාරකයන් වශයෙන් විදේශගත වූවන්, ව්‍යාපාරිකයන් ලෙස විදේශගත වූවන්, ප්‍රතිකාර ගැනීම සඳහා ගිය අය ඉන්නවා. දැනට ලංකා රජයෙන් ඉදිරිපත් කර තිබෙන අන්තර් ජාල ලේඛණයේ ලියා පදිංචිවී සිටින්නේ 60,000ක් වුණත් මේ සංඛ්‍යාව මීට වඩා විශාල අගයක් බව බව අපි දන්නවා. 

    රජය මුලදී ඔවුන් දැනුවත් කළේ අදාල රටවල්වල රැඳී සිටින ලෙසයි. නමුත් මෙම කාලය තුළදී කොරෝනා තත්වය ලෝක වසංගතයක් බවට පත්වීමෙන් යුරෝපය, නැගෙනහිර ආසියාව, බටහිර ආසියාව, මැද පෙරදිග පවා වැඩි වශයෙන් ව්‍යාප්ත වෙමින් තිබෙන්නේ ගතවෙමින් තිබෙනවා.

    මුලදී රජයෙන් ගත් තීන්දුව නිසා ලක්‍ෂ සංඛ්‍යාත ශ්‍රී ලාංකිකයන් මෙරටට පැමිණීමට නොහැකි වී ඒ රටවල රැඳී සිටිනවා. එය ඔවුන්ගේ මූලික මිනිස් අයිතිවාසිකම් පවා උල්ලංඝනය වීමක්. ලෝකයේ බොහෝ රටවල් විදේශගතවී සිටින තම පුරවැසියන් වෙනුවෙන් විශාල මැදිහත්වීමක් සිදුකරනවා. ලංකා ආණ්ඩුවත් රටවල් 16ක රැඳී සිටින ලාංකිකයන්ගේ කටයුතු වෙනුවෙන් රු. ලක්‍ෂ 80ක් වෙන්කර තිබෙන බව මාධ්‍ය වාර්තා කළා. නමුත් මෙවැනි මුදලකින් දිය හැක්කේ කවර සහනාධාරයක්ද යන්න ගැටලුවක්.

    සමහර රටවල්වල රැඳී සිටින ලාංකිකයන්ට නිවාස කුලිය ගෙවීම, ආහාර මිලදී ගැනීම වෙනුවෙන් විශාල මුදලක් දැරීමට සිදුවී තිබෙනවා. මැදපෙරදිග සමහර රටවල ස්වදේශිකයන්ට බොහො දේ නොමිලේ ලබා දුන්නත් විදේශවලින් පැමිණ සිටින ශ්‍රමිකයන්ට ඉහළ මිලකට ආහාර ද්‍රව්‍ය ලබාගන්න සිදුවී තිබෙනවා. 

    මැද පෙරදිග ඇතුළු රටවල් කිහිපයක රජයන් ඒ රටවල්වල වියදමින් ශ්‍රී ලාංකිකයන්ද ඇතුලුව විදේශිකයන් අදාල රටවල්වලට ගුවන් මගින් ගෙන ගොස් බාරදී තිබෙනවා. ලබන 20වැනිදා ඉඳලා 25වැනිදා දක්වා මේ ක්‍රියාමාර්ගය දියත් කිරීමට කුවේට් රජය සූදානමින් සිටිනවා. කුවේට් රජය සූදානම් වුණත් ලංකා ආණ්ඩුව ඊට සූදානම් නැති නිසා ගැටලුවක් මතුවී තිබෙනවා.

    එක්සත් අරාබි එමීර් රාජ්‍යයත් මේ ක්‍රියාමාර්ගය අනුගමනය කරන්න සූදානම්. කුලී රථ රියදුරන්, සංචාරක හෝටල්වල සේවය කරන්නන් වගේ විදෙස්ගතවී විවිධ ස්වයං රැකියා කරන විශාල පිරිසක් සිටිනවා. ඔවුන්ට මාසික වැටුප් ගන්නා අයට වගේ රැකවරණ ලබාදෙන නිශ්චිත ක්‍රමවේදයක් නැහැ. බොහෝ විට මේ අය පවුල් පිටින් ගොස් පදිංචිවී සිටින අයයි. ඔවුන්ට ආදායම් නැතිවීම වගේම ලංකාව තුළ සිටින ඔවුන්ගෙන් යැපෙන්නන්ද දැඩි පීඩාවකට පත්වී සිටිනවා. 

    මේ වනවිට අපි මාධ්‍ය මගින් දකින තවත් විශේෂ දෙයක් තමයි විදේශගත ශිෂ්‍ය ශිෂ්‍යාවන් මුහුණදී සිටින බරපතල ගැටලු. ඉන්දියාව, මැලේසියාව, වගේ රටවල මේ තත්වය විශේෂයෙන් අවධානයට ගත යුතු වෙනවා. ඒ රටවල සෞඛ්‍යාරක්‍ෂිත ගැටලු විශේෂිතයි. ආහාරපාන ඒ විශ්වවිද්‍යාලවලින් ලබානොදීම වැනි ගැටලු තිබෙනවා.

    විශේෂයෙන්ම ඒ රටවල්වල රාජ්‍ය නොවන විශ්වවිද්‍යාලවල තත්වය බරපතලයි. ඉන්දියාවේ විශ්වවිද්‍යාල කිහිපයක උප කුලපතිවරු ලිඛිතවම දැනුම්දී තිබුණා, ඔවුන්ගේ වියදමින් ඉන්දීය ප්‍රධාන ගුවන්තොටුපොළවලට මේ ශිෂ්‍යශිෂ්‍යාවන් රැගෙන ඒමට සූදානම් බව. මොවුන් බාරගැනීමට ලංකා ආණ්ඩුව පැත්තෙන් මාසයකට ආසන්න කාලයක් කිසිදු ක්‍රියාමාර්ගයක් අරගෙන නැහැ.

    විදෙස්ගත ශ්‍රී ලාංකිකයන්ගේ සංවිධාන තානාපති කාර්යාල මගින් රජයට දැනුම්දී තිබෙනවා. සමහර තානාපති කාර්යාල ඒ පිළිබඳව නිසි අවධානය යොමුකර නැතත් බොහෝ තානාපති කාර්යාල තමන්ගේ වගකීම් නිසි පරිදි ඉටුකර ලංකාවේ රජයට මැදිහත්වන ලෙස ඉල්ලීම් කර තිබුණා. කටාර්, කුවේට් වගේ රටවල මේ තත්වය විශාල වශයෙන් තිබෙනවා.

    ආණ්ඩුක්‍රම ව්‍යවස්ථාවෙන් පිළිගත්ත තමන්ගේ රටට පැමිණීමට තිබෙන මූලික අයිතිය ලෝකයේ බොහෝ රටවල්වලින් ක්‍රියාත්මක කරන ආකාරය අපි දකිනවා. එංගලන්තයේ හිරවෙලා සිටි චීන ජාතිකයන් ශ්‍රී ලංකාවේ ගුවන් සමාගම යොදාගෙන තමන්ගේ රටට ගෙන ගියා.

    ලංකාවට අදාලව ගත්තොත් විදේශ රාජ්‍යයන් ඔවුන්ගේ වියදමින්ම ලාංකිකයන් මෙරටට ගෙනත් දෙන්න සූදානමින් සිටියත් ආණ්ඩුව පැත්තෙන් මේ සම්බන්ධයෙන් කිසිදු මැදිහත්වීමක් නොකරන බව අපි දකිනවා

    මුලින්ම විදෙස්ගත ශ්‍රී ලාංකිකයන් ගැන මතයක් ගොඩනැගුවේ ලංකාවට කොරෝනා බෝ කරන්නේ ඔවුන් කියලා. විදෙස්ගත ශ්‍රී ලාංකිකයන් කොන්කරන, හෙළා දකින තත්වයක් රට තුළ නිර්මාණය කළා. නමුත් දැන් ඔවුන්ට ආයාචනා කරන්නේ ඔවුන් සතුව තිබෙන මුදල් ලංකාවට එවන ලෙසයි. නමුත් ඔවුන් නීත්‍යානුකූලව විදේශගතවීමේදී ලබාගෙන තිබෙන රක්‍ෂණ ආවරණය පවා ලබාදීමට ආණ්ඩුව කිසිවක් කර නැහැ. තානාපති කාර්යාලවලට අවශ්‍ය ප්‍රතිපාදන ලබාදී ඔවුන් ගෙන්වා ගැනීමටත්, ගෙන්වා ගන්නා තෙක් රැඳී සිටීමට සුභසාධනය සලසන ලෙසත් අපි ආණ්ඩුවට බලකරනවා. 

    ලංකාවේ ආර්ථිකය ප්‍රධාන වශයෙන්ම රඳාපවතින්නේ රට විරුවෝ කියල හඳුන්වන මෙම පිරිස ලංකාවට එවන මුදල්වලින්. ඔවුන් අමාරුවේ වැටුණාම ආණ්ඩුව, තමන්ගේ ආරක්‍ෂාව තමන්ම සලසා ගන්න කියන මානසිකත්වයෙන් කටයුතු කරනවා. ඔවුන් වෙනුවෙන් වහාම ක්‍රියාමාර්ගයක් ගන්නා ලෙස අපි බල කරනවා.

    සමහර වංචනික පුද්ගලයන් මේ ශ්‍රමිකයන්ගෙන් මුදල් අයකර ගනිමින් අදාල රටේ ආණ්ඩුව ලබාදෙන සහාය හෝ ලබාගැනීමට තිබෙන ඉඩ අහුරන බව හෙළිවී තිබෙනවා. නමුත් ශ්‍රී ලංකා ක්‍රිකට් පාලක මණ්ඩලය ඉන්දියාවේ අයි.පී.එල්. ක්‍රිකට් තරඟ ලංකාව තුළ පැවැත්වීමට ආරාධනා කිරීමට තරම් ආණ්ඩුව දක්වන මැදිහත්වීම විදෙස්ගත ශ්‍රී ලාංකිකයන් වෙනුවෙන් සිදු කරන්නේ නැහැ. ඒ නිසා විදේස්ගත ශ්‍රමිකයන්ගේ රක්‍ෂණ වන්දි ලබාදීමටත්, තානාපති කාර්යාල සක්‍රීය කරවීමටත්, ලංකාවට ගෙන්වා ගැනීමෙන් පසු නිරෝධායන ක්‍රියාවලියකට යටත් කිරීමේ සැලසුම් සකස් කරන ලෙසත් ආණ්ඩුවට බලකරනවා.

    ලෝකයේ සෑම රටක්ම පාහේ වැඩිපුර අවධානය යොමුකර තිබෙන්නේ කොරෝනා වෛරසය මර්දනය කිරීම වගේම එම ක්‍රියාමාර්ග නිසා බිඳවැටී තිබෙන ජනජීවිත යථාවත් කිරීමටයි. ගොවියන්, ධීවරයින්, වැඩකරන ජනතාව, ව්‍යාපාරිකයන්ගේ ගැටලු මෙන්ම දරුදැරියන්ගේ අධ්‍යාපනය නගා සිටුවීමට රටවල් මැදිහත්වෙමින් සිටිනවා.

    අපේ රටේ වෛද්‍යවරුන්, හෙදහෙදියන් ඇතුලු සමස්ත සෞඛ්‍ය කාර්යමණ්ඩල කොරෝනා මර්දනයට අදාල කාර්යභාරය සිදුකරමින් සිටිනවා. නමුත් ප්‍රධාන ගැටලුවවී තිබෙන්නේ ගොවියන් ඇතුළු වෙනත් අසංවිධානාත්මක අංශයේ දෛනික රැකියා කරන්නන්, කුඩා ව්‍යාපාර, සමෘද්ධි සහනාධාර නොලබන අති විශාල පිරිසකගේ ජන ජීවිතය ගොඩනැගීමයි.

    රු.5,000ක මුදලක් ලබාදීමේ ක්‍රියාවලිය

    රු.5,000ක මුදලක් ලබාදීමේ ක්‍රියාවලිය, තෝරාගැනීමේ ක්‍රියාවලිය, අකාර්යක්‍ෂම සහ දේශපාලනීකරණය කර ඇති බව අපි දකිනවා. සමෘද්ධි සංවර්ධන දෙපාර්තමේන්තුව පොදුජන පෙරමුණේ දේශපාලන ශාඛාවක් බවට පත්කරගෙන තිබෙනවා.

    සමෘද්ධි සංවර්ධන දෙපාර්තමේන්තුවෙන් අප්‍රේල් 11වැනිදා දිස්ත්‍රික් සමෘද්ධි අධ්‍යක්‍ෂ ජනරාල්වරුන්ට යැවූ ලිපියක පැහැදිලිව සඳහන්කර තිබෙන්නේ 2019 වර්ෂයට අදාල ඡන්දහිමි නාම ලේඛනය මත ප්‍රතිලාබීන් හඳුනාගන්න කියලයි. ඡන්ද හිමි නාමලේඛන සමෘද්ධි ප්‍රජාමූල බැංකුව වෙත ලබාදෙන ලෙසත් මේ ලිපියේ පැහැදිළිව සඳහන්කර තිබෙනවා.

    සමෘද්ධි සංවර්ධන දෙපාර්තමේන්තුවට ඡන්ද හිමි නාමලේඛණය ගත්තේ කොහෙන්ද කියලා අපි විවෘතව ප්‍රශ්න කරනවා. ග්‍රාම නිලධාරී මහතා සතුව ඡන්දහිමි නාමලේඛනය හැර තමන්ගේ කොට්ඨාශයේ සියලුම දෙනා සම්බන්ධයෙන් තොරතුරු තිබෙන තවත් ලේඛන කිහිපයක්ම තිබෙනවා. මේ නිශ්චිත මොහොතේදී ආධාර ලබාදීමට වඩාත්ම වැදගත් වෙන්නේ 2019 සකස් කළ ඡන්දහිමි නාමලේඛනයට වඩා වෙනත් ආසන්න නාම ලේඛනයි.

    ඡන්දහිමි නාමලේඛනයේ හම්බන්තොට සඳහන් වන කෙනෙක් මේ මොහොතේ කොළඹ රැඳීඉන්න පුළුවන්. මේ වගේ තත්වයන්ට කොටුවී ගම්වලට යන්න බැරිවූ 40,000ක් පමණ කොළඹ සිටිනවා. මේ අය සම්බන්ධයෙන් ක්‍රියාකිරීමට මැතිවරණ කොමිසම සතු දේපළක් හෝ ඡන්දහිමි නාමලේඛන ලබාගත්තේ කොහොමද? මා දන්නා තරමින් මැතිවරණ කොමිසමෙන් ඡන්දහිමි නාමලේඛන ලබාගෙන තිබෙන්නේ පොදුජන පෙරමුණ පමණයි.

    සමෘද්ධි සම්බන්ධයෙන් දිස්ත්‍රික්වලට යවා තිබෙන ඡන්දහිමි නාමලේඛණවල වෝට් මාක් එකක එස්.එල්.පී.පී. යනුවෙන් සඳහන් වෙනවා. ශ්‍රී ලංකා පොදුජන පෙරමුණට ලබාදුන් මේ ලේඛනය සමෘද්ධි සංවර්ධන දෙපාර්තමේන්තුවේ ඉහළ නිලධාරීන් විසින් බෙදාහරිමින් තිබෙනවා. 
    මූලික ප්‍රශ්නය තිබෙන්නේ රජයේ දෙපාර්තමේන්තු පොදුජන පෙරමුණේ ශාඛා සමිති ලෙස පාවිච්චි කිරීම ගැනයි.

    මේ හදිසි තත්වය යටතේ නිල ලේඛණයක් නිසි පරිදි මහජතාවට සහන සැලසීමේ අරමුණින්ම යොදාගැනීම ගැන අපිට කිසි ප්‍රශ්නයක් නැහැ. ශ්‍රී ලංකා නිදහස් ග්‍රාම නිලධාරීන්ගේ සංගමය මෙම ඡන්දහිමි නාමලේඛන සමෘද්ධි දෙපාර්තමේන්තුවට ලබාදීම සම්බන්ධයෙන් ලිඛිතව ප්‍රශ්න කර තිබෙනවා.

    මේ අවස්ථාවේදී ජනතාවට සහන සැපයීම වෙනුවෙන් ජාතික ආපදා කළමනාකරණ මධ්‍යස්ථානයට සෘජු නීත්‍යානුකූල වගකීම් ප්‍රමාණයක් පැවරී තිබෙනවා. අවුරුදු 15ක් තිස්සේ ආපදාවලදී ක්‍රියාකර අත්දැකීම් ලබාගෙන තිබෙන පාර්ලිමේන්තු පනතක් සම්මත කර පිහිටුවාගත් මේ මධ්‍යස්ථානය පවා මේ අවස්ථාවේ වගකීම්වලින් පැත්තකට කර තිබෙනවා. ඒ තුළින් ජනතාවට සහන සැපයීමේ ක්‍රියාවලිය අමු අමුවේ දේශපාලනීකරණය කර තිබෙනවා.

    මේ දේශපාලනීකරණ ක්‍රියාවලියට අමතරව ආණ්ඩුව අලුතින්ම යවා තිබෙන චක්‍රලේඛයෙන් උපදෙස් දී තිබෙන්නේ සහනාධාර ලබාදීමට තෝරා ගත් පවුල්වලින් අඩකට වඩා කපා හරින්නයි. මේ නිසා නිලධාරීන් බරපතල අපහසුතාවයකට පත්වී සිටිනවා. විශේෂයෙන් සමෘද්ධි නිලධාරීන්ට මේ නිසා විශාල වශයෙන් වද දෙමින් තිබෙනවා. ආණ්ඩුව විද්‍යානුකූල සැලසුමකට කටයුතු කරනවා වෙනුවට දේශපාලන අරමුණ වෙනුවෙන් කටයුතු කිරීම නිසා නිලධාරීන් බරපතල ගැටලු ගණනාවකට මේ ගෙවී යන මාසය තුළදී ඇද දමා තිබෙනවා. 

    කොරෝනා තත්වය නිසා පීඩාවට පත් ජනතාවට සහන ලබාදීමේ ක්‍රියාවලිය බරපතල ලෙස බිඳවැටී තිබෙනවා. තමන්ට ගැති රාජ්‍ය හා පෞද්ගලික ජනමාධ්‍යවලින් රටේ ජනතාව මුහුණදී සිටින සැබෑ තත්වය වහන්න බැරි බව අපි ආණ්ඩුවට කියන්න කැමතියි. කොරෝනා වැඩසටහන කියන්නේ ලෙඩට බෙහෙත් දෙන එක පමණක් නෙවෙයි.

    ආණ්ඩුවක් සාර්ථකයි කියන්නේ කොරෝනා මර්දනයට ගෙනයන ක්‍රියාමාර්ග නිසා ජනතාවගේ ජන ජීවිත බිඳවැටීමට නොදී ආරක්‍ෂා කර ගැනීමේ ක්‍රියාමාර්ග අනුගමනය කිරීමෙනුයි. විදේශ වෙබ් අඩවිවල පළ කර තිබෙන බවට හුවා දක්වන ආණ්ඩුවේ සාර්ථකත්වය රටේ සැබෑවට නොපවතින බව අපි මේ වෙලාවේ ජනතාවට මතක් කරන්න ඕනෑ. රටම ඇඳිරි නීතියේ තිබෙන අතර සමහර ගම්මාන සීල් කරලා තිබීම විද්‍යානුකූලව අවශ්‍ය බව අපි දන්නවා.

    මේ ප්‍රදේශවල ජනතාවට විශේෂයෙන්ම ඇතිවූ පීඩාවන් තිබෙනවා. අඩුම තරමේ ඔවුන් සතුව තිබෙන මුදල් ලබාදී ආහාර ඇතුලු අත්‍යාවශ්‍ය ද්‍රව්‍ය ලබාගැනීමේ අවස්ථාවත් අහිමි වෙලා. ඔවුන්ගේ මුදල් වෛරසයේ වාහකයෙක් ලෙස ක්‍රියා කිරීමේ හැකියාව නිසා බාහිර පාර්ශ්වයන් ලබා නොගැනීමෙන් මේ තත්වය ඇතිවී තිබෙනවා. ඒ පිළිබඳව ආණ්ඩුව මැදිහත්වී උත්තර ලබාදිය යුතුයි.

    කොරෝනා වසංගතය තුළ ආණ්ඩුව මැතිවරණයකට සූදානම්වීම ගැන සාකච්ඡා කිරීමට ජාතික ජන බලවේගයේ කොළඹ දිස්ත්‍රික් කණ්ඩායම් නායක අනුර සහෝදරයා මැතිවරණ කොමිසමෙන් අවස්ථාවක් ඉල්ලා තිබෙන බවත් මේ අවස්ථාවේ මතක් කළ යුතුයි. මැතිවරණ ක්‍රියාවලිය නිසි පරිදි ඉටුකිරීමෙන් පාර්ලිමේන්තු ප්‍රජාතන්ත්‍රවාදය ආරක්‍ෂා කරගැනීම අවශ්‍යයි.

    මේ මොහොතේ මැතිවරණය පැවැත්වීමෙන් යම්කිසි පාලිත තත්වයකට පත්කර තිබෙන කොරෝන වසංගතය යළි උත්සන්න වීමේ හැකියාවක් තිබෙනවා. ජපානයේ තත්වය ඊට උදාහරණයක්. තමන්ගේ රටේ තාක්‍ෂණය හැකියාවන් අපිට වඩා ඉහලින් තිබූ රටවල් පවා අලුත් තත්වයන් ගැන විශේෂ අවධානයකින් ක්‍රියාකරන බව පැහැදිලියි. නමුත් කොරියාවේ මැතිවරණය පැවැත්වීම ගැන රාජ්‍ය නාලිකා විශේෂ අවධානයක් යොමුකර ප්‍රචාරයන් ගෙන යන බව අපි දකිනවා. කොරියාවේ සෞඛ්‍ය බලධාරීන් පවා අනතුරු අඟවා තිබෙන්නේ ඡන්දයෙන් පස්සේ සති දෙක ඉතාමත්ම තීරණාත්මක බවයි.

    තවත් පැත්තකින් කොරියාවේ මැතවරණය පැවැත්වීමේදී අත් සෝදන විෂබීජ නාශක වෙනුවෙන් පමණක් ඩොලර් මිලියන 14.3ක් වෙන්කර තිබුණා. ඊට අමතරව සෑම ඡන්ද දායකයෙකුටම අත් ආවරණ දෙකක් ලබාදී තිබුණා. මැතිවරණ කාර්ය මණ්ඩලවලට පූර්ණ සෞඛ්‍යාරක්‍ෂිත කට්ටල ලබාදී තිබුණා. ඒ වෙනුවෙන් ඩොලර් මිලියන 4.5ක් දැරුවා. හැම ඡන්ද මධ්‍යස්ථානයකටම ශරීරයේ උෂ්ණත්වය මනින මාන දී තිබුණා. ඒ වෙනුවෙන් අමතර කාර්ය මණ්ඩලද 26,000ක් සම්බන්ධ කරගෙන තිබුණා. මේ වගේ සෞඛ්‍යාරක්‍ෂාව වෙනුවෙන් විශාල ක්‍රියාමාර්ග ප්‍රමාණයක් අනුගමනය කර තිබියදී ඒ රටේ සෞඛ්‍ය අංශ ඉදිරි සති දෙක ගැන අනතුරු ඇඟෙව්වා.

    හැබැයි කොරියාවේ ආදර්ශය ගැන කියමින් හිත් පිත් නැතිව ඡන්දය ගැන කතා කරනවා නම් ඒවගේ ආණ්ඩුවක් ගැන බරපතල ලෙස ප්‍රශ්න කළ යුතුයි. සමහර ඇමතිවරුන් හෝමාගම වැනි ප්‍රදේශවල සංගීත සංදර්ශන පවා පවත්වමින් ඡන්දයට සූදානම් වෙනවා. මාසයක් තිස්සේ සෞඛ්‍ය කාර්ය මණ්ඩල කරන ලද කැපකිරීම්වල ප්‍රතිඵලයක් විදිහට කොරෝනා මර්දනය පැත්තෙන් ලබාගෙන තිබෙන සාර්ථකත්වය පීඩාවට පත් ජනතාවගේ ජීවිත නගා සිටුවීමට අදාලව කිසි සේත්ම ප්‍රගතියක් ලබා නැහැ.

    ලංකාවට අවශ්‍ය මුඛ ආවරණ මහන්න ඇඟලුම් කර්මාන්ත හිමියන් සමග ජනාධිපති කාර්ය සාධන බලකාය සාකච්ඡා පැවැත්වූයේ 16වැනිදා. මේ වගේ තත්වයක් තුළ මැතිවරණය පැවැත්වීමෙන් කොරෝනා මර්දන කටයුතු විශාල වශයෙන් අඩපන වන බව පැහැදිලියි.

    මාධ්‍යවේදීන් එවා තිබූ ප්‍රශ්නවලට පිළිතුරු ලබාදෙමින් 

    උතුරේ වැන්දඹුවන් මේ මොහොතේදී විශාල ගැටලුවකට මුහුණදී තිබෙනවා

    මේ තත්වය කොරෝනා නැතත් උතුරේ ජනතාවට අතිශය බරපතලව තිබෙන ප්‍රශ්නයක්. වැන්දඹු කාන්තාන්ට පමණක් නෙවෙයි, ආර්ථික වශයෙන් දැඩි පීඩාවකට පත්වී සිටින පවුල් විශාල ප්‍රමාණයක් තිබෙනවා. ඒ නිසා මේ ජනතාව වෙනුවෙන් විශේෂයෙන් සොයා බලා ක්‍රියාමාර්ග ගන්නා ලෙස ආණ්ඩුවට මතක් කරනවා. 

    මුල් අවස්ථාවේ අත්‍යාවශ්‍ය ආහාර ද්‍රව්‍ය නිවෙස්වලට ප්‍රවාහනය යම්තරමක් දුරට සිදුවුනා. නමුත් මේ වනවිට ඒ තත්වය දුර්වල වෙමින් යනවා.

    දිගු කාලීනව එළවලු ඇතුලු ආහාර ද්‍රව්‍ය සම්බන්ධ ව්‍යාපාර කරන අයගේ අවස්ථාව අහිමි කරමින් සීමිත ඇඳිරි නීති බලපත්‍ර ආණ්ඩුවට සම්බන්ධ පුද්ගලයන් වෙත ලබාදීමේ ප්‍රශ්න ගණනාවක් මතුවී තිබෙනවා. මේ ව්‍යාපාරවල යෙදී සිටි අයගේ ජීවනෝපාය අහිමිවීමත් ආණ්ඩුවේ හිතවතුන් මේ වෙලාවේදී ඒ ව්‍යාපාර අත්පත් කර ගැනීමෙන් අධික ලාබ ලබන්න ක්‍රියා කිරීම නිසාත් ජනතාව අතේ තිබෙන මුදල් කොල්ලකෑමකුත් සිදු වෙනවා. රාජ්‍ය යාන්ත්‍රණය මගින් අත්‍යාවශ්‍ය ද්‍රව්‍ය ලබාදීම වගේම ආණ්ඩුවේ ප්‍රාදේශීය දේශපාලන අධිකාරිය මැදිහත්වී ලබාදීමට මුලින් ගෙන ගිය ක්‍රියාමර්ග බරපතල ලෙස අඩපණ වෙමින් තිබෙනවා. මේ නිසාත් ජනතාව විශාල වශයෙන් පීඩාවට පත්වී සිටිනවා. 

    ගොවිජනතාවගේ අස්වනු මිලදී ගැනීමත් විශාල ගැටලුවක් බවට පත්වෙලා


    ගොවීන් සම්බන්ධයෙන් තිබෙන ප්‍රශ්නයට ඉක්මන් විසඳුම් ලබාදිය යුතුයි. මේ මොහොතේ ලැබෙමින් තිබෙන එළවලු සහ පළතුරු අස්වැන්න පාරිභෝගික ජනතාවට ලබා නොදුන්නොත් තව සති දෙකකින් හෝ මාසයකින් ප්‍රයෝජනයට ගන්න බැහැ. ඒ නිසයි අපි කියන්නේ කොරෝනා මර්දනයට සෞඛ්‍ය කාර්ය මණ්ඩලය ගෙනයන කැපකිරීම සහ රජයේ අනෙකුත් නිලධාරීන් කරන කැපකිරීම් හැරුණාම පීඩාවට පත්වී සිටින ජනතාවගේ ගැටලු පිළිබඳ ආණ්ඩුවේ අවධානය අඩුයි කියලා.

  • ජන්වී කපූර්ගේ නවීන සරාගී සාරි විලාසිතා 08ක්

    ජන්වී කපූර්ගේ නවීන සරාගී සාරි විලාසිතා 08ක්

    ජන්වී කපූර් Janhvi Kapoor බොලිවුඩය ආක්‍රමණය කර ගතව ඇත්තේ යාන්තම් දෙවසරක් පමණයි. සාරාගි නිළියක් වන ඇය ඒ කෙටි කාලය තුළ ඇය බොලිවුඩ් සුරිපි තරු අතර තවත් සුපිරි තරුවක් වන බව මනාව ප්‍රකට කර හමාර බවයි විචාරකයෝ කියන්නේ. මේ නිසාම ජන්වී අද බොලිවුඩයේ පමණක් නොව මුළු ඉන්දියාවේම තරුණ නෙත් සිත් පැහැර ගන්නා ජනප්‍රිය විලාසිතා තරුවක් බවට පත්ව තිබෙනවා.

    ජන්වී බොහෝ විට සරාගී සාරි පැළඳ සිටිනු දක්නට ලැබෙනවා. මනාව හැඩැති බ්ලවුස් සමග ඒවා ගළපා ගනිමින් ජන්වී තම සරාගිකත්වය ඉන් මනාව ඔප්නංවා ගන්නවා. මේ නිසාම ඉන්දිය තරුණියන් හා කාන්තාවන් අතර ජන්වී සාරි උමතුවක් නිර්මාණය වී තිබෙනවා.

    ඇත්තම කිව්වොත් ජන්වගේ මේ සරාගී සාරි විලාසිතා ලංකාවේ ඔබටත් මනාව ගැළපෙන බව අපිට හිතෙනවා. බලන්න මේ විලාසිතා ඔබට කොතරම් සුන්දරද කියා…

    ජන්වි කපූර්
    ජන්වි කපූර්
    ජන්වි කපූර්
    ජන්වි කපූර්
    ජන්වි කපූර්
    ජන්වි කපූර්
    ජන්වි කපූර්
    ජන්වි කපූර්

    Filmfare ඇසුරිණි – සැකසුම – තුෂාධවි

  • මාස 03 දින 10යි: රු. කෝටි 2100ක මත්ද්‍රව්‍ය ‘නාවික හමුදාවට කොටු වෙලා’

    මාස 03 දින 10යි: රු. කෝටි 2100ක මත්ද්‍රව්‍ය ‘නාවික හමුදාවට කොටු වෙලා’

    කුඩු අහුවෙන තරමට ලංකාව කොලොම්බියාවක් වෙයිද ?‘ පසුගිය දාක බොහෝ දෙනෙක් කතා වුණා. ඊට හේතුව වුණේ ශ්‍රී ලංකා නාවික හමුදාව තම ගැඹුරු මුහුදු ආවේක්‍ෂණ නෞකාවක් වන ‘සමුදුර නෞකාව‘ යොදවා ශ්‍රී ලංකාවේ සිට මුහුදු සැතපුම් 548 (දල වශයෙන් කි.මී 985 පමණ) දුරකින් වු ගැඹුරු මුහුදේදී අත්අඩංගුවට ගන්නා ලද මත්ද්‍රව්‍ය තොගය, සැකකරුවන් සහ යාත්‍රාව (අප්‍රේල් 15) දික්ඕවිට ධීවර වරාය වෙත රැගෙන ඒමයි.

    DCIM\100MEDIA\DJI_0269.JPG

    මේ සමග තවත් වැදගත් කතාවක් හෙළි වුණා. ඒ ඉතිහාසයේ වාර්තාගත වැඩිම මත්ද්‍රව්‍ය වැටලීමේ මෙහෙයුම් මෙම වර්ෂයේදී සිදු කිරීමට නාවික හමුදාව සමත් වීමයි.

    නාවික හමුදාවේ වාර්තා පවසන ආකාරයට 2020 වසරේ ගතවූ මාස 03 දින 10 ක කාලය තුළ හෙරොයින් කි.ග්‍රෑ 718 කුත් ‘අයිස්‘ කි.ග්‍රෑ 797 කුත් ‘කැටමින්‘ නැමැති නව මත්ද්‍රව්‍ය කි.ග්‍රෑ 581 කුත් ගංජා කි.ග්‍රෑ 2475 කුත් නාවික හමුදාව මගින් අත්අඩංගුවට ගෙන තිබෙනවා. මෙලෙස නාවික හමුදා භාරයට ගත් මත්ද්‍රව්‍ය තොගයේ සමස්ථ වීථි වටිනාකම රුපියල් බිලියන 21ට ආසන්න වෙතැයි ගණන් බලා තිබෙනවා.

    පසුගිය මාර්තු මස 28 වන දින නාවික හමුදාව විසින් ගැඹුරු මුහුදේදී අත්අඩංගුවට ගන්නා ලද මත් ද්‍රව්‍ය ප්‍රවාහනය කළ යාත්‍රාවෙහි සිටි පුද්ගලයින්ගෙන් ප්‍රශ්ණ කිරීමේදී ලද තොරතුරු, ඒ හරහා ලබා ගත් අත්දැකීම් සහ දේශිය හා ජාත්‍යන්තර බුද්ධි තොරතුරු විශ්ලේෂණය කිරීමේදී තවත් මත් ද්‍රව්‍ය රැගත් යාත්‍රාවක් ශ්‍රී ලංකාව දෙසට පැමිණෙන බවත් එයින් යම් මත් ද්‍රව්‍ය ප්‍රමාණයක් ලංකාවට පැමිණීමට නියමිත බවත් අනාවරණය වෙලා තිබෙනවා. ඒ අනුව ක්‍රියාත්මක වූ නාවික හමුදාව 2020 මාර්තු මස 30 වන දින ශ්‍රී ලංකා නාවික හමුදාවේ ගැඹුරු මුහුදු ආවේක්‍ෂණ නෞකාවක් වන ශ්‍රීලංනානෞ සමුදුර නෞකාව දින 14 ක සාගරික මෙහෙයුමකට අදාල මුහුදු ප්‍රදේශය වෙත යොමු කළා.

    ඒ අනුව, ශ්‍රී ලංකා නාවික නෞකා සමුදුර නෞකාව අදාල මුහුදු ප්‍රදේශයේ ආවේක්‍ෂණ කටයුතු වල නිරත වෙමින් සිටියදී මත්ද්‍රව්‍ය සහ අපරාධ පිළිබඳ එක්සත් ජාතීන්ගේ ආයතනය (UNODC) ශ්‍රී ලංකා නාවික හමුදාව වෙත ලබා දුන් චන්ද්‍රිකා තාක්‍ෂණය ඔස්සේ ලබා ගත් ඡායාරූප කිහිපයක් තවදුරටත් විශ්ලේෂණය කිරීමෙන් අනතුරුව සමුදුර නෞකාව සමකය දෙසට යොමු කිරීමට කටයුතු කර තිබෙනවා.

    එහිදී 2020 අප්‍රේල් මස 10 වන දින රාජ්‍ය ධජයක් ප්‍රදර්ශනය කර නොමැති (Flag Stateless) සැක සහිත විදේශීය යාත්‍රාවක් සොයා ගෙන තිබෙනවා. පසුව එම යාත්‍රාව පරීක්‍ෂා කිරීමේදී ඒ තුළ සඟවා තිබූ රුපියල් කෝටි 327කට ආසන්න වටිනාකමකින් යුත් හෙරොයින් කිලෝ 281 ක් සහ අයිස් (Crystal Methamphetamine) නැමති මත්ද්‍රව්‍ය කිලෝ 48 ක තොගයක් සොයා ගැනීමට නාවික හමුදාව සමත් වුණා.

    ජාත්‍යන්තර මුහුදේ මත්ද්‍රව්‍ය රැගෙන එන යාත්‍රාවන් පිළිබඳව ශ්‍රී ලංකා නාවික හමුදාව දේශීය හා ජාත්‍යන්තර බුද්ධි තොරතුරු මෙන්ම චන්ද්‍රිකා තාක්‍ෂණය උපයෝගී කරගෙන නිරතුරුවම සෝදිසි මෙහෙයුම් සිදු කරනු ලබන අතර, මෙම මත්ද්‍රව්‍ය සැපයුම් ජාලයේ විදේශ හා දේශීය කොටස්කරුවන් සම්බන්ධයෙන් විමර්ශණය කිරීම සඳහා පොලිස් මත්ද්‍රව්‍ය නාශක කාර්යාලය හා ඒකාබද්ධව ක්‍රියා කිරීමට ශ්‍රී ලංකා නාවික හමුදාව කටයුතු යොදා තිබෙනවා.

    විශේෂයෙන් දේශීය ධීවර ප්‍රජාව මෙවැනි මත්ද්‍රව්‍ය ජාවාරම් වලට හසු නොවී තම කර්මාන්තය සිදු කළ යුතු බව නාවික හමුදාධිපති විසින් වැඩිදුරටත් අවධාරණය කළා.

    තොරතුරු හා ඡායාරූප – නාවික හමුදා වෙබ් අඩවිය.

  • නීති ලිහිල් කළ හොත් ප්‍රංශය තුළ ‘Covid-19 රැල්ලක්’ ගැන බිය

    නීති ලිහිල් කළ හොත් ප්‍රංශය තුළ ‘Covid-19 රැල්ලක්’ ගැන බිය

    ප්‍රංශය තුළ සිදුවෙමින් පවතින කොරෝනා වෛරසය ව්‍යාප්තවීම සලකා බැලූවිට , එය පාලනය කිරීම වෙනුවෙන් පනවා ඇති, ජනතාව නිවෙස් තුළ රඳවා තැබීම ඇතුළු නීති රීති ඉවත් කළ හොත් හෝ ලිහිල් කළ හොත් හෝ ප්‍රංශය තුළ කොරෝනා ව්‍යප්තියේ නව රැල්ලක් ඇතිවිය හැකි බවට , ප්‍රංශයේ විද්‍යාත්මක කවුන්සිලයේ සභාපති ජෝ ප්‍රංශුවා දෙල්ෆරෙයිසි ( Jean – Francois Delfraissy ) අනතුරු හඟවා තිබෙනවා.

    ඔහු මෙම අනතුරු හැඟවීම සහිත පුරෝකථනය කරනු ලැබුවේ සෙනෙට් සභාවේ දී ඇසූ පැණයකට පිළිතුරු දෙමිනි.

    වැඩි දුරටත් අදහස් දැක් වූ ප්‍රංශ විද්‍යාත්මක කවුන්සිලයේ සභාපතිවරයා පැවසුවේ, එවැනි නීති ලිහිල් කිරීමක් සිදු කළ හොත් දිනකට කොරෝනා ආසාදිතයන් 10, 000 ත් 15, 000 ත් අතර සංඛ්‍යාවක් බිහි විය හැකි බවයි.

    අප්‍රේල් 16 වැනිදායින් අවසන් වූ පැය 24 තුළ ප්‍රංශය තුළ සිදු වී ඇති කොරෝනා වෛරස් ව්‍යාප්තිය සම්බන්ධව ප්‍රංශ සෞඛ්‍ය අමාත‍යංශ විසින් නිකුත් කළ සංඛ්‍යා දත්ත ඊයේ දිනයේත් ඉදිරිපත් කරනු ලැබුවේ ප්‍රංශ සෞඛ්‍ය අධ්‍යක්ෂ ජනරාල් ජෙරොම් සලොමොන් ය.

    ප්‍රංශය තුළ කොරෝනා වෛරස වසංගතය ආරම්භ වීමෙන් පසු පළමු වතාවට , පැය 24 ක් තුළ සිදු වූ රෝහල්ගත කිරීමේ සංඛ්‍යාවේ අඩුවක් ඊයේ (16) දැක ගතහැකි වූ බව සෞඛ්‍ය අධ්‍යක්ෂ ජනරාල් වරයා පැවසීය.

    කෙසේ වෙතත් අප්‍රේල් 16 න් ගෙවී ගිය පැය 24 තුළ ප්‍රංශය තුළ සිදු වී ඇති කොරෝනා වෛරස් ආසාදිත මරණ සංඛ්‍යාව 1, 438 බවට අනාවරණය විය.

    රෝහල් තුළ සිදු වී ඇති මරණ අසංඛ්‍යාව 514 ක් වන අතර, යැපෙන වැඩිහිටියන් සඳහා නවාතැන් පහසුකම් සපයන නිවාසවල සිදු වී ඇති මරණ සංඛ්‍යාව 924 ක් ය.

    දැනට රෝහල්ගතව සිටින රෝගීන් ගණන 31, 779 කි. පැය 24 ක් තුළ රෝහල්ගත කර ඇති රෝගීන් ප්‍රමාණය 4, 560 කි.

    දැඩි සත්කාර ඒකකයේ 6, 457 ක් සිටින අතර පැය 24 ක් තුළ ඊට ඇතුළත් කර ඇති රෝගීන් ගණන 273 ක් ය.

    රෝගය සුව වීමෙන් පසු රෝහල් වලින් පිට්වී ඇති පුද්ගලයන් සංඛ්‍යාව 31, 000 කි. 16 වැනිදායින් ගෙවුණු පැය 24 තුළ පමණක් රෝහල් වලින් පිටවූ සුව වූවන් ගණන 2, 195 කි.

    තම කලාපය තුළ දැඩි සත්කාර ඒකක වල සිටින රෝගීන් සංඛ්‍යාව අඩු වුව ද , තත්ත්වය තවමත් අතිශයින් බරපතල යැයි ඉල් ද ෆ්‍රොන්ස් ( Ils – de – France ) කලාපයේ ප්‍රාදේශීය සෞඛ්‍ය ඒජන්සියේ අධ්‍යක්ෂ ජනරාල් ඔරෙලිඔන් රූසෝ ( Aurelien Rousseau ) ඊයේ (අප්‍රේල් 16 ) BFM රූපවාහිනිය සමඟ පැවැති සාකච්ඡාවක දී පැවසීය.

    ” අපට දැඩි සත්කාර ඒකක වල කොරෝනා ආසාදිත රෝගීන් 2, 500 ක් ඉන්නවා. වෙනත් හේතුන් මත දැඩි සත්කාර ඒකක වල සිටින රෝගීන් ප්‍රමාණය 500 ක්. මේ දෙක එකතු කළ විට 3, 000 යි. නමුත් අපිට දැඩි සත්කාර සඳහා තියෙන්නෙ ඇඳන් 1, 200 යි. මේ අනුව කොහොම තත්ත්වයක් ද පවතින්නෙ කියලා වටහා ගන්න පුලුවන් නේ ද? “

    BFM රූපවාහිනිය සමඟ පැවැති සාකච්ඡාවෙදී රූසෝ තව දුරටත් කියා සිටියේ එලෙසය.

    මේ අතර ප්‍රංශ සෞඛ්‍ය බලධාරීන් විසින් සන්නිවේදනය කර ඇති දත්ත මගින් පැහැදිවම අවධාරණය කර ඇත්තේ , වයස අවුරුදු 75 ට වැඩි පුද්ගලයන් අනෙක් අයට වඩා සැලකිය යුතු ලෙස කොරෝනා වෛරසයට නිරාවරණය වී ඇති බවයි.

    විශ්‍රාමික නිවාස වල සිටි විශාල සංඛ්‍යාවක් මිය යෑමත්, අති විශාල සංඛ්‍යාවකට කොරෝනා වෛරසය ආසාදනය වීමත් සලාකා බලන විට මෙහි ඇති අතිශය කණගාටුදායක තත්ත්වය හොඳින් පැහැදිලියි.

    පුද්ගලයන් ලක්ෂය ඉක්මවා රසායනාගාර මගින් සිදු කොට ඇති කෝවිඩ් – 19 පරීක්ෂණයෙන් 24, 962 කට කොරෝනා වෛරසය ධනාත්මක වී ඇති බවට හෙළි වී ඇති බව පවසන සෞඛ්‍ය අධ්‍යක්ෂ ජනරාල් ජෙරොම් , පරීක්ෂණ හැකියාව ක්‍රමක්‍රමයෙන් තවත් වැඩි කරන බව කියා සිටිනවා.

    ප්‍රංශයේ වඩාත්ම බලපෑමට ලක්වූ දෙපාර්තමේන්තුවල , සේවයේ නියුතු සෞඛ්‍ය සේවකයන්ට අතිරේක දීමනාවක් ගෙවන බවට රජය නිවේදනය කර තිබෙනවා.

    එම දීමනාව රෝහල් පරිපාලන කාර්‍ය මණ්ඩල සඳහා යුරෝ 500 ක් ලෙසත්, රෝගීන්ට නිරාවරණය වෙමින් ඉදිරි පෙල කටයුතු කරන සේවාවන් හී නියැලෙන අය සඳහා යුරෝ 1, 500 ගෙවීමට නියමිත වෙනවා.

    මේ අතර කොරෝනා වෛරසයට එරෙහි ප්‍රතිකාර සොයා ගැනීම සඳහා යුරෝපීය සායනික අත් හදා බැලීම් වල පළමු ප්‍රතිඵලය අප්‍රේල් මස අවසානයේ දී දැක ගත හැකි බවත්, මෙම අත්හදා බැලීම් සඳහා රෝගීන් 3, 200 ක් යොදා ගෙන ඇති බවත්, බෝවන රෝග විශේෂඥ ෆ්ලොරොන්ස් අදෙර් ( Florence Ader ) ප්‍රකාශ කර තිබෙනවා.

    ( සුනිල් ගාමිණී – ප්‍රංශ ජන මාධ්‍ය ඇසුරෙන් )


  • මැද පෙරදිග සිටින ශ්‍රී ලාංකිකයන්ට සහාය ලබාදීම කඩිනම් පියවර

    මැද පෙරදිග සිටින ශ්‍රී ලාංකිකයන්ට සහාය ලබාදීම කඩිනම් පියවර

    මැද පෙරදිග සිටින ශ්‍රී ලාංකිකයන්ට සහාය ලබා දීම සඳහා වන ප්‍රයත්න වේගවත් කිරීම පිණිස විදේශ අමාත්‍යාංශය සහ විදේශ සේවා නියුක්ති කාර්යාංශය එක්ව කටයුතු කරමින් සිටින බව විදේශ සබඳතා අමාත්‍යාංශය අමාත්‍යාංශය විසින් නිකුත් කළ මාධ්‍ය නිවේදනයක සදහන් වේ.

    එම මාධ්‍ය නිවේදනය සම්පූර්ණයෙන් මෙසේය.

    මුල දී ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි වූවන් සඳහා පමණක් සීමා වී පැවති ශ්‍රමික සුභසාධන අරමුදලෙහි සම්පත්, ලියාපදිංචි වීමේ තත්ත්වය පිළිබඳව නොසලකමින් ස්ථාන 16 ක පිහිටි විදේශ ශ්‍රී ලංකා දූත මණ්ඩල තුළ පිහිටුවා ඇති තම ඒකක හරහා සියලුම සංක්‍රමණික ශ්‍රමිකයන්ට ලබාදීමට එම කාර්යාංශය විසින් ගන්නා ලද තීරණයට අනුව, මැද පෙරදිග සිටින සංක්‍රමණික ශ්‍රමිකයන් පිළිබඳ සුභසාධන ක්‍රියාමාර්ග මෙම සතියේ දී අතිරේක වැඩිදියුණුවක් ලබා ඇති බව, මැද පෙරදිග පිහිටි ශ්‍රී ලංකා දූත මණ්ඩල වාර්තා කර තිබේ.

    මෙය දැනටමත් විදේශ අමාත්‍යංශය විසින් වෙන් කර ඇති අරමුදල් සහ ලොව පුරා නගර 67 ක පිහිටි ශ්‍රී ලංකා සංගම් සහ ආගමික ආයතන සමඟ සහයෝගයෙන් යුතුව මෙම දූත මණ්ඩල විසින් සපයනු ලබන සේවාවන්වලට අමතරව වේ.

    වර්තමාන COVID-19 වසංගත තත්ත්වය මධ්‍යයේ, එතෙර සිටින සියලුම ශ්‍රී ලාංකිකයන්ගේ ඉහළ යමින් පවතින අවශ්‍යතා සපුරාලීම සඳහා වියළි සලාක බෙදා හැරීමේ ප්‍රයත්න ඉහළ නැංවීම පිණිස අමතර ප්‍රතිපාදන ලබාදෙන ලෙස විදේශ අමාත්‍යාංශය භාණ්ඩාගාරයෙන් ඉල්ලීමක් කර තිබේ. මෙය COVID-19 ගෝලීය වසංගතය හේතුවෙන් ශ්‍රී ලංකාවේ ගුවන්තොටුපළවල් මෙහි පැමිණීම සඳහා දැනට වසා දමා ඇති හෙයින්, ශ්‍රී ලංකාවට ආපසු පැමිණීමට නොහැකි සංක්‍රමණිකයින් මුහුණ දෙන ක්ෂණික දුෂ්කරතා මඟහරවා ගැනීමට උපකාරී වීම සඳහා වේ.

    අපේ‍්‍රල් 15 වැනි බදාදා දින විදේශ ලේකම් රවිනාථ ආර්යසිංහ මහතාගේ ප්‍රධානත්වයෙන්, මෙම කලාපය අධීක්‍ෂණය කරන ජ්‍යෙෂ්ඨ නිලධාරීන් සහ මැද පෙරදිග පිහිටි ශ්‍රී ලංකා දූත මණ්ඩල හා කොන්සල් කාර්යාලවල තානාපතිවරුන් සමඟ පැවති වීඩියෝ සම්මන්ත්‍රණයක දී මෙම පියවරයන් පිළිබඳව විශේෂ අවධානය යොමු කරන ලදී. වර්තමාන අර්බුදය සම්බන්ධ පොදු කරුණු සහ අනෙකුත් පැතිකඩ පිළිබඳව ද මෙම රැස්වීමේ දී සාකච්ඡා කෙරිණි. මෙම සාකච්ඡාවට බහරේන්, කුවේට්, ජෝර්දානය, ලෙබනනය, ඕමානය, සවුදි අරාබිය, එක්සත් අරාබි එමීර් රාජ්‍යය, කටාර්, ඉරානය සහ ඊශ්‍රායලය යන රටවල දූත මණ්ඩල ප්‍රධානීන් සහ ශ්‍රී ලංකා විදේශ සේවා නියුක්ති කාර්යාංශයේ ඒකකවල ප්‍රධානීන් සහභාගී විය. මීට පෙර, පසුගිය සිකුරාදා (අපේ‍්‍රල් 10) විදේශ සබඳතා, නිපුණතා සංවර්ධන, රැකියා හා කම්කරු සබඳතා අමාත්‍ය දිනේෂ් ගුණවර්ධන මැතිතුමා, විදේශ සබඳතා අමාත්‍යාංශයේ සහ නිපුණතා සංවර්ධන, රැකියා හා කම්කරු සබඳතා අමාත්‍යාංශයේ අදාළ ලේකම්වරුන් හා ජ්‍යෙෂ්ඨ නිලධාරීන් මෙන්ම, ශ්‍රී ලංකා විදේශ සේවා නියුක්ති කාර්යාංශයේ ජ්‍යෙෂ්ඨ නිලධාරීන් ද විදේශ සබඳතා අමාත්‍යාංශයේ දී හමුවූ අතර, විශේෂයෙන් වර්තමාන කොරෝනා වයිරස් ගෝලීය වසංගතයෙන් මතුවන ප්‍රතිවිපාක පිළිබඳ සන්දර්භය තුළ මෙම සංක්‍රමණික සේවකයන් සම්බන්ධ ගැටළු විසඳීම සඳහා වන ප්‍රතිපත්තිමය වෙනස්කම් පිළිබඳව එහි දී සාකච්ඡා කරන ලදී. අනතුරුව පැවති ශ්‍රී ලංකා විදේශ සේවා නියුක්ති කාර්යාංශයේ සාමාජික මණ්ඩලයේ රැස්වීමක දී මෙම යෝජිත වෙනස්කම් විධිමත් පරිදි අනුමත කරන ලදී.

    ඉහළ යමින් පවතින විරැකියාව, කොන්ත්‍රාත්තු අහිමිවීම, වැඩ බලපත්‍ර දීර්ඝ නොකිරීම සහ තාවකාලික නිදහස් රැකියා නතර කිරීම වැනි සිදුවීම්වල ප‍්‍රතිවිපාකයන්ට විසඳුම් සෙවීම සඳහා මෙහි දී විශේෂ අවධානයක් යොමු කරන ලද අතර, මෙම සමහර ශ්‍රමික කොටස්වලට ඔවුන්ගේ මූලික ජීවන තත්වයන් පවත්වා ගැනීමටත්, හැකි විටෙක දී ඔවුන්ගේ නිවෙස්වල සිටින පවුල්වලට සහාය වීමටත්, හදිසි ආධාර අවශ්‍ය වී තිබේ. දැනටමත් පොදු සමාවක් ප්‍රකාශයට පත් කොට, ශ්‍රමිකයන්ට ඉවත්ව යාමට අවසර දී ඇති රටවල් සමඟ රාජ්‍යතාන්ත්‍රික හා දේශපාලනික වශයෙන් නියැලීමේ අවශ්‍යතාවය සැලකිල්ලට ගනිමින්, ලියාපදිංචි නොවූ සේවකයින්ගේ තත්වය නීතිගත කිරීමේ දී හැකි විසඳුම් ලබා ගැනීමට සහ කොන්ත්‍රාත් ගිවිසුම් උල්ලංඝනය කිරීම, රැකියා අහිමිවීම සහ නෛතික තත්ත්වය හේතුවෙන් පැන නැගී ඇති විවිධ ආරවුල් සඳහා සාමකාමී විසඳුම් සෙවීමට, පළාත් පාලන ආයතන හා අදාළ කම්කරු අමාත්‍යාංශ සමඟ සාකච්ඡා ආරම්භ කරන ලෙස මෙම අමාත්‍යාංශය ශ්‍රී ලංකා දූත මණ්ඩලවලට උපදෙස් දුන්නේය.

    COVID-19 වසංගතය ආසාදනය වී ඇතැයි සැකකරනු ලැබීම හෝ එසේ ආසාදනය වීම හේතුවෙන් වෛද්‍ය ආධාර ඉල්ලා සිටින ශ්‍රී ලාංකිකයන්, අදාළ වෛද්‍ය පහසුකම් සපයන දේශීය රෝහල් වෙත යොමු කිරීමට ක්ෂණික පියවර ගනිමින් සිටින බව ද, ඉන්පසු තානාපති කාර්යාල නිලධාරීන් විසින් ඒ පිළිබඳව අඛණ්ඩව අධීක්ෂණය කරනු ලබන බව ද මෙම දූත මණ්ඩල අමාත්‍යාංශයට වාර්තා කළේය.

    සමහර රටවල දී අවශ්‍යතා ඇති ශ්‍රී ලාංකිකයන්ට ආහාර සලාක බෙදා හැරීමේ දී හා වෛද්‍ය උපදෙස් ලබා දීමේ දී සහය වීම සහ මෙම ක්‍ෂේත්‍රයේ විශේෂඥ දැනුමැති ස්වේච්ඡා ප්‍රජා සේවකයන් හරහා ශ්‍රී ලාංකිකයන් වෙත උපදේශනය ලබා දීම මඟින්, සංක්‍රමණ සඳහා වූ ජාත්‍යන්තර සංවිධානය (IOM) සහ රතු ක්‍රෙසන්ට් සමිතිය වැනි බහුපාර්ශ්වික සංවිධානවලින් ලබා දුන් සහයෝගය පිළිබඳව ද මෙම වීඩියෝ සම්මන්ත්‍රණයේ දී සාකච්ඡා කරන ලදී. මෙම සහයෝගය අගය කරමින්, අඛණ්ඩ ආධාරවල අවශ්‍යතාවය පෙන්වා දෙන අතර, සියලුම ශ්‍රී ලංකා දූත මණ්ඩලවලට අමතර සහය ලබා දෙන ලෙස ජිනීවාහි පිහිටි සංක්‍රමණ සඳහා වූ ජාත්‍යන්තර සංවිධානයේ (IOM) සහ ජාත්‍යන්තර රතු කුරුස සම්මේලනයේ (IFRC) මූලස්ථානවලින් ඉල්ලා සිටිමින්, ජිනීවාහි පිහිටි ශ්‍රී ලංකා නිත්‍ය  දූත මණ්ඩලය හා සහ ශ්‍රී ලංකාවේ පිහිටි එම නියෝජිතායතනවල ප්‍රධානීන් හරහා, මෙම අමාත්‍යාංශය විසින් කරුණු ඉදිරිපත් කර ඇත.

    සෑම රටකම සිටින ශ්‍රී ලාංකිකයන් පිළිබඳ තොරතුරු එක්රැස් කිරීම සඳහා මෙම දූත මණ්ඩල විසින් පිහිටුවා ඇති දත්ත පාදක මඟින්, ශ්‍රී ලාංකික ශ්‍රම බලකාය පිළිබඳ/ඒ හා සම්බන්ධ දත්ත සම්පාදනය කිරීම සඳහා පහසුකම් සලසා ඇති අතර, එය දැනට අමාත්‍යාංශය සමඟ බෙදාගෙන ඇත. ඊට අමතරව, විදේශ අමාත්‍යංශය විසින් දියත් කරන ලද සහ එතෙර සිටින ප්‍රජාවන් අතර පුළුල් ලෙස සංසරණය වන ‘ශ්‍රී ලංකාව අමතන්න’ මාර්ගගත ද්වාරය, විශේෂයෙන් මෙවන් අර්බුදකාරී කාලයක දී අමාත්‍යාංශය හා දූත මණ්ඩල සමඟ තොරතුරු හුවමාරු කර ගැනීම හා සම්බන්ධ වීම සඳහා කදිම වේදිකාවක් ලෙස වර්තමානයේ දී පවතියි. අප්‍රේල් 15 වැනි දින වන විට මෙම ද්වාරයෙහි ලියාපදිංචි වී ඇති 59,419 දෙනාගෙන් 21,575 දෙනෙක් මැද පෙරදිග කලාපයේ පදිංචි අයවලුන් වෙති.

    මෙම අදාළ ස්ථානවල සිටින ශ්‍රී ලාංකික ප්‍රජාවන්ගේ දෛනික අවශ්‍යතා හා විමසීම් සඳහා ක්‍රියාත්මක වීම පිණිස, පැය 24 පුරා ක්‍රියාත්මක හදිසි දුරකථන ඇමතුම් අඛණ්ඩව පවත්වාගෙන යන ලෙසත්, තානාපති කාර්යාල කාර්ය මණ්ඩලය අඛණ්ඩව රාජකාරියේ යෙදෙන ලෙසත්, විදේශ අමාත්‍යාංශය සියලු දූත මණ්ඩලවලට උපදෙස් දී තිබේ.

  • ශ්‍රී ලංකා මහ බැංකුව ‘බැංකු අනුපාතිකය’ පහළ දමයි

    ශ්‍රී ලංකා මහ බැංකුව ‘බැංකු අනුපාතිකය’ පහළ දමයි

    අද (16) සිට ක්‍රියාත්මක වන පරිදි ශ්‍රී ලංකා මහ බැංකුව විසින් බැංකු අනුපාතිකයන් අඩු කිරීමට පියවර ගත් බව ශ්‍රී ලංකා මහ බැංකුව විසින් නිකුත් කළ මාධ්‍ය නිවේදනයක සදහන් වේ.

    එම නිවේදනයේ සදහන් වන්නේ ශ්‍රී ලංකා මහ බැංකුවේ මුදල් මණ්ඩලය ඊයේ (15) දිනයේ පැවැති සාකච්ඡාවකදී මෙම තීරණය ගත් බවත් ඒ අනුව බැංකු අනුපාතිකය 15% සිට 10% දක්වා වූ පදනම් අංක 500කින් අඩු කර ඇති බවයි.

    හදිසි අවස්ථාවක දී යොදා ගත හැකි පරිපාලනමය වශයෙන් තීන්දු කරනු ලබන අනුපාතිකයක් වන බැංකු අනුපාතිකය මෙලෙස අඩු කර ඇති බව ද අදාළ නිවේදනයේ සදහන් වේ.

    ශ්‍රී ලංකා මහ බැංකුවේ ප්‍රධාන ප්‍රතිපත්ති පොලී අනුපාතික වන නිත්‍ය තැන්පතු පහසුකම් අනුපාතිකය (SDFR) සහ නිත්‍ය ණය පහසුකම් අනුපාතිකය (SLFR), 2019 මැයි මස 31 වන දින සිට සමස්තයක් ලෙස පදනම් අංක 200 බැගින් පහළ දැමීම සලකා බලමින්, ශ්‍රී ලංකා මහ බැංකුවේ බැංකු අනුපාතිකය පදනම් අංක +300ක ආන්තිකයක් සහිත ව නිත්‍ය ණය පහසුකම් අනුපාතිකය (SLFR) හා අනුකූලව ස්වයංක්‍රීයව ගැළපීම සඳහා ඉඩ හැරීමට තීරණය කර තිබේ.

    බැංකු අනුපාතියකය යනු කුමක්දැයි අප කළ විමසීමකදී ජ්‍යේෂ්ඨ බැංකුකරුවෙකු සදහන් කළේ වාණිජ බැංකුවල තාවකාලික ද්‍රවශීලතා අරමුණු ඉටුකර ගැනීම සදහා මහ බැංකුව අත්තිකාරම් ප්‍රදානය කිරීමේ දී ඒ සඳහා පැනවෙන පොලී අනුපාතිකය ‘බැංකු අනුපාතිකය‘ ලෙසින් හැඳින්වෙන බවයි.

  • පාසල් වෑන්වලට අප්‍රේල් මාසයට කිසිම ගාස්තුවක් අය කිරීම සම්පූර්ණයෙන් තහනම්

    පාසල් වෑන්වලට අප්‍රේල් මාසයට කිසිම ගාස්තුවක් අය කිරීම සම්පූර්ණයෙන් තහනම්

    පාසල් ළමුන් ප‍්‍රවාහනය කරන වෑන් රථ රියදුරන්ට අප්‍රේල් මාසයට අදාළ කිසිඳු ගාස්තුවක් දෙමව්පියන්ගෙන් අයකර ගැනීම තහනම් කිරීමට විදුලිබල හා බලශක්ති හා ප්‍රවාහන සේවා කළමණාකරණ අමාත්‍ය මහින්ද අමරවීර මහතා නියෝග කර තිබෙනවා.

    අප්‍රේල් මාසයට අදාළ ගාස්තු අයකර ගැනීම් තහනම් කර ඒ වෙනුවට පාසල් ළමුන් ප‍්‍රවාහනය කරන වෑන් රථ රියදුරන්ට රජයේ රුපියල් 5,000 දීමනාව ලබාදීමට තීරණය කළ බව අමාත්‍යවරයා සදහන් කළා.

    රජයේ තීරණය නොසළකමින් නීති විරෝධී ලෙස විශේෂයෙන් කොළඹ දිස්ත්‍රික්කයේ ඇතැම් පාසල් වෑන් රථ රියදුරන් දෙමාපියන්ගෙන් මුදල් අයකර ගැනීම් වාර්තා වී ඇති බව සදහන් කළ අමාත්‍යවරයා එවැනි පැමිණිළි ඇත්නම් ප්‍රවාහන අමාත්‍යාංශයට දැනුම් දෙන ලෙසත් දැනුම් දුන්නා.

  • ආර්ථික පුනරුද උපායමාර්ගය මේ සති අන්තයේ එළි දකී

    ආර්ථික පුනරුද උපායමාර්ගය මේ සති අන්තයේ එළි දකී

    කොරෝනා වෛරස වසංගතය නිසා  අඩාලවූ ජන ජීවිතය යථා තත්ත්වයට පත් කොට ආර්ථිකය යළි පණ ගැන්වීම පිණිස සැලසුම් කළ උපායමාර්ගය මේ සති අන්තයේ ප්‍රකාශයට පත් කරන බව ජනාධිපති මාධ්‍ය අංශය අද (16) දින නිකුත් කළ මාධ්‍ය නිවේදනයක සදහන් වේ.

  • UNP – JVP නිවුන් හවුල කොරෝනා මැඩලන්න කිසිම සහායක් දුන්නේ නෑ -ඇමති ප්‍රසන්න

    UNP – JVP නිවුන් හවුල කොරෝනා මැඩලන්න කිසිම සහායක් දුන්නේ නෑ -ඇමති ප්‍රසන්න

    කොරෝනා වසංගතය පාලනය කිරීම සදහා ආණ්ඩුව ගෙන යන වැඩපිළිවෙලට කිසිදු සහයක් නොදැක්වූ එජාප / ජවිපෙ නිවුන් සොහොයුරන්. මහ මැතිවරණය කල්  දමා ගැනීමට මෙතරම් දගලන්නේ ජනාතවට ඇති ආදරය නිසා නොව මැතිවරණයකට මුහුණ දීමට ඇති බිය නිසා යැයි කාර්මික අපනයන ආයෝජන ප්‍රවර්ධන සංචාරක හා ගුවන් සේවා ඇමති ප්‍රසන්න රණතුංග මහතා අවධාරණය කරයි.

    ඔහු පෙන්වා දෙන්නේ ආණ්ඩුවේ මහ මැති වරණය පවත්වන්නේ කෝවිඩ් 19  හෙවත් කොරොනා වසංගතය මුළු මුණින්ම පාලනය කිරීමේන් පසුව බවයි.

    ජනතාවගේ මළමිනී උඩින් දේශපාලනය කිරීමේ පුරුද්ද ඇත්තේ එක්සත් ජාතික පක්ෂයට හා ජනතා විමුක්ති පෙරමුණට බව වැඩිදුරටත් පෙන්වා දෙන ඇමති ප්‍රසන්න රණතුංග මහතා එජාපය හා ජවිපේ උත්සහ දරන්නේ රට ආර්ථික අර්බුධයකට ලක් කිරීමට බව චෝදනා  කළේය.

    අද 16 කටුනායක ගුවන්තොටුපොලේ දී මාධ්‍යවේදීන් හමුවේ ඇමතිවරයා මේ අදහස් පල කලේය. මෙහිදී ලබා දුන් පිළිතුරු මෙසේයි.

    ප්‍රශ්ණය :- විදේශගත ශ්‍රී ලාංකිකයන් ඉල්ලීම් කරලා තියෙනාවා. ශ්‍රී ලංකාවට එන්න. දැන් ඒ වැඩ පිළවෙල සූදානම්ද?

    උත්තරය :- ඔව්. අපි ඒ සදහා ලැස්තියි. නමුත් අපට ඒ සදහා අවශ්‍ය නිර්දේශය

    සෞඛ්‍ය අංශ හා ජනාධිපති කාර්යය සාධක බලකාය මගින් ලබා දිය යුතුයි. ඒ නිර්දේශ අනුව ගුවන්තොටුපොලේ මෙහෙයුම් ආරම්භ කරලා ක්‍රමානූකූලව මේ විදේශගත ශ්‍රී ලාංකිකයන්ව දිවයිනට ගේන්න අපි සූදානමින් ඉන්නවා. දැනටමත් විදේශ කටයුතු අමාත්‍යංශය විදේශ රටවල ඉන්ත අය පිළිබදව වාර්තා තොරතුරු ලබා ගෙන අවශ්‍ය කටයුතු කරගෙන යනවා.

    ප්‍රශ්ණය :- තව කොපමණ දවසක්  යයිද ගුවන්තොටුපොල මෙහෙයුම් අරඹන්න ?

    උත්තරය:- දැනටමත් ආණ්ඩුව මේ පිළිබදව සාකච්ඡා කරමින් යනවා. දැනට

    රටතුළ පැතිර යමින් තිබෙන කෝවිඩ් 19 වසංගතය අපි උපරිමයෙන් පාලනය කරන්න කටයුතු කරලා තියෙනවා. අපි මෙහිදී සම්පූර්ණයෙන්ම කටයුතු කරන්නේ සෞඛ්‍ය අංශ උපදෙස් අනුවයි. ජනාධිපති කාර්යය සාධක බලකාය හරහා අංශ අනුමැතිය ලද වහාම අපි ගුවන්තොටුපොල මෙහෙයුම් ආරම්භ කරන්න ලෑස්තියි.

    ප්‍රශ්ණය :- ශ්‍රී ලංකාවට ගෙන එන විදේශගත ශ්‍රී ලාංකිකයන් නිරෝධානයට ලක්කරනවාද?

    උත්තරය :- අනිවාර්යයයෙන්ම අපි මේ පැමිණෙන පිරිස් ගුවන්තොටුළේම ඇති ස්ථානයක පූර්ණ කොරෝනා පරීක්ෂාවක් කරනවා. පැය 06කට පස්සේ තමයි ප්‍රතිඵලය ලැබෙන්නේ ඊට පස්සේ ඔවුන්ව නිරෝධයනයට ලක් කිරීමට තමයි සාකච්ඡා කරමින් යන්නේ. කොහොම වුනත් මේ සියල්ල සිදුවන්නේ සෞඛ්‍ය අංශ නිර්දේශ අනුවයි.

    ප්‍රශ්ණය :- ජනතා විමුක්ති පෙරමුණ චෝදනා කරනවා ශ්‍රී ලංකන් ගුවන් සමාගම විදේශ වල හිරවෙලා ඉන්න ළමයි ගේනවා වෙනුවට චීනයට ගුවන් මගින් අදිමින් ව්‍යාපාර කරනවා කියලා.

    උත්තරය :- අද යූඑන්පී එකයි ජේ.වී.පී එකයි කටයුතු කරන්නේ නිවුන් සහෝදරයෝ වගේ. ශ්‍රී ලංකන් ගුවන් සමාගම එදා වූහාන්වලට ලමයි ගේන්න ගියේ ලාබ බලාගෙන නෙමෙයි. ජාතික ගුවන් සේවය විදියට රජය විදේශගත ශ්‍රී ලාංකිකයන් ගෙන්න කියන්නේ කොයි වෙලාවෙද ඒකට ඔවුන් ලෑස්තියි. නමුත් ජාත්‍යන්තර ගුවන් නීති රීති අනුව. ලෝක සෞඛ්‍ය සංවිධානයේ නීති රීති අනුගමනය කරමින් ඔවුන් සිය ව්‍යාපාරය පවත්වාගෙන යාම වරදක් නෙමෙයි. ඕවා ජේවීපි එකට කියන්න මුකුත් නැතුව කියන කථා..

    ප්‍රශ්ණය ;-  එජාපය හා ජවිපේ කියන්නේ ආණ්ඩුව මළ මිනී මතින් බලය ගන්න මැතිවරණයනට යන්න හදනවා කියලයි.

    උත්තරය ;- එජාපය හා ජවිපේ තමයි මළ මිනී මතින් දේශපාලනය කලේ. ඒකෙ මේ රටේ ජනතාව දන්නවා. අපි මල මිනි මතින් දේශපාලන කරන්න සූදානම් නැ. මැතිවරණය පැවැත් වීම ගැන මැතිවරණ කොමසාරිස් වරයා  තීන්දු කල යුතුයි. රටේ පවතින තත්ත්වය අනුව. අප හැමවිටම  කටයුතු කරන්නේ සෞඛ්‍ය අංශ උපදෙස් අනුවයි. මගේ අදහස තමයි මේ වසංගතය පාලනය කල වහාම අපි මැතිවරණකට යායුතුයි. මොක ද අපිට දිගටම මුදල් වියදම් කරන්න බලයක් නෑ. ඔය පක්ෂ දෙකටම ඕනා රට ආර්ථික වශයෙන් කඩා වට්ටන්න. අපි කියන්නේ ඉක්මනින් මැතිවරණයකට ගිහින් ශක්තිමත් ආණ්ඩුවක් පිහිටුවාගෙන මේ රට ගොඩ ගන්න ඕනෑ.

    එක්සත් ජාතික පක්ෂයයි ජනතා විමුක්ති පෙරමුණයි මේ වසංගතය මැඩලන්න ආණ්ඩුවට අඹමල් රේණුවක සහායක් දුන්නේ නෑ. ඒ අය ඔය මහ මැතිවරණ කල් දාගන්න දගලනනේ ජනතාවට ඇති ආදරයට නෙමෙයි. මැතිවරණ වලට තියෙන බය නිසා. අපි රට මේ වසංගතයෙන් මුදා ගෙන මැ.තිවරණයටත් මුහුණ දෙන්න ලැස්තියි ඒ විතරක් නෙමේයි. මැතිවරණයට මුහුණ දීලා ගෝඨාභය රාජපක්ෂ මහින්ද රාජපක්ෂ සුසංයෝගයෙන් යුතු ශක්තිමත් ආණ්ඩුවක් පිටටුවලා රට නැවත ගොඩනගන්නටත් ලෑස්තියි.

  • අතමිට සරු කරන – සෞඛ්‍යය සුරකින අපේ ගෙවතු වගාව

    අතමිට සරු කරන – සෞඛ්‍යය සුරකින අපේ ගෙවතු වගාව

    ‘වත්ත’ අපිට හුරුපුරුදු වචනයක් වුණත් ‘ගෙවතු වගාව’ නම් ටිකක් නුහුරු වචනයක්. අපි බොහෝ දෙනෙක් ලස්සනම ලස්සන මල් වවලා, විදේශීය තණකොළ වවලා, ගල් අල්ලලා බොහෝම පිරිසිදුවට, ලස්සනට තියාගත්තේ මිඳුලනේ.

    ඒත් වර්තමානය වන විට ‘ගෙවතු වගාව’ වේගයෙන් ජනප‍්‍රිය වෙමින් තිබෙනවා. ගමේගොඬේ විතරක් නොවෙයි අද නාගරික නිවාස සංකීර්ණවල පවා ගෙවතු වගාව ජයටම සිදුවෙනවා.

    ගෙවතු වගාව ජනප‍්‍රිය වෙන්න හේතු කිිහිපයක් බලපෑවා. ඒ අතර ඉදිරියෙන්ම සිටින්නේ පිරිසිදු, වසවිසවලින් තොර පෝෂ්‍යදායී ආහාර වේලක් ගැන පසුගිය කාලය තුළ විශාල උනන්දුවක් හා අකල්පමය වෙනසක් ඇතිවීමයි.

    මේ තත්ත්වය තුළ එදා පැවැති සාම්ප‍්‍රදායික ගෙවත්ත වෙනුවට වඩාත් ඵලදායී භූමි භාවිතයක් සහිතව ගෙවතු වගාව සිදුවෙනවා.

    ඒත් ගෙවතු වගාවේ වැදගත්කම ගැන දන්නේ අපි කීයෙන් කී දෙනාද ? කරන්නන් වාලේ කරලා පස්සේ අධෛර්යයට පත් වෙලා අනෙක් අයවත් දුර්මුඛ කරනවාට වඩා ගෙවතු වගාවත් නිසි අවබෝධයක් ඇතිව කළොත් පුද්ගලිකව තමන්ටත්, පොදුවේ සමාජයටත් ඇතිවන වටිනාමක වචන වලින් විස්තර කරන්න බැහැ.

    ගෙවතු වගාවේ වැදගත්ම හා ප‍්‍රයෝජන මොනවාද ?

    1. ගෙවතු වගාවෙන් ලැබෙන වැදගත්ම ප‍්‍රයෝජනය තමයි එදිනෙදා පවුලේ ආහාර වේල සඳහා වස විසෙන් තොර පෝෂ්‍යදායී නවුම් එළවළු හ පලතුරු ලබා ගැනීමට හැකිවීම. 2. ගෙවත්තේ හා මුළුතැන් ගෙයින් බැහැර වන කසළ කළමනාකරණය තුළින් ගෙවත්ත පිරිසිදුව තබා ගැනීමට හා ඉතා උසස් තත්ත්වයේ කාබනික පොහොරක් වන ‘කොම්පෝස්ට්’ නිෂ්පාදනය කර ගැනීමට හැකිවීම.

    3. එදිනෙදා ගෙවත්තේ වැඩ කටයුතු කිරීම තුළින්  ලැබෙන ව්‍යායාමයෙන් ශාරීරික හා මානසික සෞඛ්‍ය රැුක ගැනීමට හැකිවීම.

    4. එළවළු හා  පලතුරු මිලදී ගැනීමට යන වියදම අවම කර ගැනීමට හැකිවීම තුළින් හා අතිරිත්ත නිෂ්පාදනය අලෙවි කර ගැනීම තුළින් මුදල් ඉතිරි කරගත හැක්වීම.

    5. විනෝදාංශයක් ලෙසින් ගෙවතු වගාවේ යෙදීම තුළින් තම කාලය ඵලදායී ලෙස යොදා ගැනීමට අවස්ථාව ලැබීම.

    6. ගෙවත්ත ප‍්‍රියමනාප ස්ථානයක් වීම හා තම දරුවන් ද ගෙවතු වගාවට යොමු කර ගැනීමට හැකිවීම තුළින් ඔවුන්ට තමා ජීවත් වන පරිසරය පිළිබඳ වඩාත් හොඳ ප‍්‍රායෝගික අවබෝධයක් ලබා ගැනීමට අවස්ථාව උදාවීම හා අනාගතයේදී කෘෂිකර්මයට ලැදි ජනතාවක් බිහිවීම.

    7. සමස්තයක් ලෙස සෑම අතින්ම නීරෝගීමත් සෞඛ්‍ය සම්පන්න ජනතාවක් රටෙහි බිහිවීම.

    ඉහත සඳහන් කළ ආකාරයට ගෙවතු වගාව තුළින් ඔබට ලැබෙන ප‍්‍රයෝජන රැුසක් තිබෙනවා. ඒත් මෙහිදී අප අවධාරණය කරගත යුත්තේ ගෙවතු වගාව තුළින් ඉහත සඳහන් ධනාත්මක දේ ලැබෙන්නේ එය වසවිස වලින් තොරව සිදුවන්නේ නම් පමණක් බවයි. එසේ නැතිව රසායනික පොහොර, වල්නාශක හා කෘමිනාශක යොදා ගනිමින් කරන ගෙවතු වගාව තුළින් කිසිදු ආකාරයේ සෞඛ්‍ය සම්පන්න ආහාර ලබා ගැනීමක් සිදුවන්නේ නැහැ.

    වසවිස වලින් තොර වගාවක් කරන්නේ කෙසේද ?

    වස විස වලින් තොර සෞඛ්‍යාරක්ෂිත ගෙවත්තක් සඳහා කාබනික පොහොර යොදා ගත යුතුයි. ඒ වගේම එය වඩාත් ඵලදායී හා ලාභදායී වන්නේ ගෙවත්තේ සහ මුළුතැන්ගෙයින් බැහැර වන කසළ වලින් කාබනික පොහොර සකසා ගැනීම කළහොත් පමණයි.

    නිවසේදීම කාබනික පොහොර නිපදවා ගැනීම තුළින් ඔබට වාසි කිහිපයක් ලැබෙනවා.

    1. ගෙවත්ත තුළ එකතු වන කොළරොඩු භාවිතා කිරීම තුළින් ගෙවත්ත පිරිසිදුව තබා ගැනීමට හැකිවීම.

    2. මුළුතැන්ගෙයින් බැහැර කරන කසළ නිසි පරිදි කළමනාකරණය කර ගැනීමට අවස්ථාව උදාවීම.

    3. ගෙවතු වගාව සඳහා කාබනික පොහොර මිලදී ගැනීමට වැයවන මුදල් ඉතිරි වීම.

    4. කසළ බැහැර කිරීම වෙනුවෙන් පළාත් පාලන ආයතනවලට දැරීමට සිදුවන විශාල වියදම හා කාලය මෙවැනි ක‍්‍රම මගින් අඩුවීම. (මෙය ඔබ රටට කරන අමිල සේවයක්)

    5. වස විස වලින් තොර සෞඛ්‍යාරක්ෂිත ආහාර වේලක් ලබා ගැනීමට හැකිවීම.

    ගෙවතු වගාවේදී සරල ලෙස කාබනික පොහොර නිෂ්පාදනය කර ගන්නේ කෙසේද ?

    මෙය ඉතා වැදගත් කාරණයක් වශයෙන් සැලකිය හැකියි. අපි බොහෝ විට පුදුරුව සිටින්නේ වත්තේ ගස්වලින් වැටෙන කොළ රොඩු ගසක් මුලට එකතු කරන්න හෝ වත්තේ කොනක ගොඩ ගසන්න. මේක ඒ තරම් ඵලදායී ක‍්‍රමයක් නොවෙයි. මෙය ඇතැම් විට ගස්වැල් වලට හානි කරන දෙයක් වෙන්නත් පුළුවන්. ඒ නිසා විද්‍යාත්මක ක‍්‍රමයට කාබනික පොහොර නිපදවා ගැනීමටයි අතිෂයින් වැදගත් වන්නේ.

    වගාවේදී කාබනික පොහොර වැදගත් වන්නේ ඇයි ?

    ගෙවතු වගාවේදී පමණක් නොවෙයි  ඕනෑම වගා ක‍්‍රමයකදී කාබනික පොහොර විසින් ඉතා වැදගත් කාර්යයන් රැසක් ඉටු කරනවා.

    1. ශාකවලට අවශ්‍ය මූලික පෝෂක වර්ග ලබාදීම.

    2. හිතකර පාශූ වාතාවරණයක් සකසා දීම.

    3. ශක්තිමත් ශාකයක් වර්ධනය වීම.

    4. පසේ ජලය රඳවා ගැනීමට උපකාරී වීම.

    අමුද්‍රව්‍ය

    කාබනික පොහොර සකස් කර ගැනීම සඳහා පහත සඳහන් අනුපාතවලට කාබනික ද්‍රව්‍ය මිශ‍්‍රණයක් සකසා ගත යුතුයි.

    1. වියළි කොළ සියයට 30 ක්.

    2. අමුකොළ සියයට 30 ක්.

    3. ගොම/ කුකුළු පොහොර/ එළු පොහොර සියයට 30 ක්.

    4. මුහුන් සියයට 10 ක්.

    5. ජලය.

    සාදා ගන්නා ආකාරය

    1. පළමුව වියළි කොළ සහ අමු කොළ වර්ග එකට මිශ‍්‍ර කර මිශ‍්‍රණය ජලයෙන් තෙමන්න. ( සියයට 60 ක් පමණ)

    2. ගොම, කුකුල් පොහොර, එළු පොහොර මිශ‍්‍රව ගෙන එම මුහුන් ගොඩ මතට දමා හොඳින් කලවම් කරන්න.

    3. සෝදා නොයන ස්ථානයක ඉහත මිශ‍්‍රණය අඩි 3 ක් පළල හා දිග අවශ්‍ය ප‍්‍රමාණයට ගෙන ගොඩ ගසන්න. මෙම ගොඩ තැලීම හෝ පෑගීම නොකළ යුතුය. ඒ මතට (මුහුන්) පොහොර හෝ පරණ කොම්පෝස්ට් සමාකාරව විසුරුවා හරින්න.

    4. කොම්පෝස්ට් ගොඬේ දාරය අංශය 45 ක ඇළයට සිටින සේ ගොඩ ගසන්න.

    5. මෙම ගොඩ මතුපිට පස්වලින් අඟල් පමණ වසා ඉන්පසු පිදුරු හෝ පොල්අතු වලින් මතුපිට ආවරණය කරන්න.

    6. දින 15-20 ත් අතර එකවරක් පමණක් එම ගොඩ කොටා මිශ‍්‍රකර නැවත ගොඩගසන්න.

    ඔබ මේ ආකාරයෙන් නිවැරදි ක‍්‍රමයට ක‍්‍රියා කළහොත් දින 25-30 අතර කාලයක් තුළ වඩාත් හොඳ කොම්පෝස්ට් පොහොර සකස් කර ගත හැකියි.

    අපි වැවුවට වැඩක් නැහැලූ ? ඒ ඇයි ?

    පසුගිය දශක කිහිපය පුරා වල්නාශක හා කෘමිනාශකවලට අපි හුරු වෙලා හිටිය නිසා නානාප‍්‍රකාර පළිබෝධකයින් අද අපේ භූමියේ සුලභ වෙලා තිබෙනවා. ඒ නිසා ගෙවතු වගාකරුවන් අතර පවතින ප‍්‍රධාන මැසිවිල්ලක් තමයි ‘අනේ අපි කොච්චර හොඳ වැවුවත්, සාත්තු කළත් මලක්වත් ආවේ නැහැනේ. එක එක ජාතියේ පණුවෝ ඇවිත් ඒවා විනාශ කළානේ ’ වාගේ ගැටලූ.

    ගෙවතු වගාවට හානිකරන පළිබෝධකයින් ( කෘමි හා වල් * පාලනය සඳහා ඔබ කිසිසේත් විස රසායන ද්‍රව්‍ය භාවිත නොකළ යුතුයි. එවැනි දේකට ඔබ යොමු වුනොත් ඔබ ගන්නා උත්සාහයන් ගඟට ඉණි කැපුවා වාගේ වෙනවා. ඒ නිසා ඔබ ගෙවතු වගාව සඳහා ‘කාබනික පළිබෝධ නාශක’ ම භාවිත කිරීමට උනන්දු විය යුතුයි.

    ගෙවතු වගාව සඳහා භාවිත කළ හැකි කාබනික පළිබෝධ නාශක මොනවාද ?

    මේ සඳහා ඔබට ඉතා පහසුවෙන් සපයාගත හැකි ශාකසාර කාබනික පළිබෝධ නාශක රැසක් තිබෙනවා.

    1. කොහොඹ ඇට.
    2. කොහොඹ කොළ සිරය.
    3. ගව මුත‍්‍ර.
    4. සේර.
    5. අනෝදා ඇට.
    6. කොච්චි සාරය.
    7. දුම්කොළ නැටි.
    8. වල් සූරියකාන්ත.
    9. පැපොල කිරි සාරය.අරලිය මල්.
    10. සුදු ළුණු.
    11. තක්කාලි දඬු.
    12. කුරුඳු කොළ.
    13. රතු ළුණු බල්බ සාරය.

    මෙම ශාකසාර කාබනික පළිබෝධ නාශක පහත සඳහන් ආකාරයෙන් සකස් කරගත හැකියි.

    කොහොඹ ඇට

    කොහොඹ ඇට ග‍්‍රෑම් 50 ක් හොඳින් අඹරා ජලය ලීටරයකට මිශ‍්‍රකර අඳුරු ස්ථානයක පැය 12 ක් තබා මිශ‍්‍රණය පෙරාගෙන සබන් හෝ සේදුම් කුඩු හෝ ටීපොල් ස්වල්පයක් මිශ‍්‍රකර බෝගයට යොදන්න.

    මෙමගින් ගෙඩි හා කඳ විඳින පණුවන්, කොළ කන දළඹුවන් / පණුවන් හා කීඩෑවන් පාලනය කළ හැකියි.

    කොහොඹ කොළ සිරය

    කොහොඹ කොළ කිලෝ ග‍්‍රෑම් 1-2 හොඳින් අඹරා ජලය ලීටර 4 ක් මිශ‍්‍රකර මැටි භාජනයක දින 3 ක් තබා පෙරා සබන් හෝ ටීපොල් ස්වල්පයක් මිශ‍්‍රකර බෝගයට යොදන්න.

    මෙමගින් කූඩිත්තන්, කීඩෑවන්, පැළමැක්කන්, ගුල්ලන්, සුදු මැස්සන්, ගොළුබෙල්ලන්, කොරපොතු කෘමීන්, හා කොළ කන පණුවන් පාලනය කළ හැකියි.

    ගව මුත‍්‍ර

    සති දෙකක කාලයක් හිරු එළියට නිරාවරණය වන සේ තබා 6 ගුණයක් තනුක කර යොදන්න. මෙමගින් කෘමි හා දිලීර රෝග පාලනය කළ හැකියි.

    සේර

    කොළ හා මුල් ග‍්‍රෑම් 250 ක් කොටා ජලය ලීටරයක දියකර වගාවට ඉසින්න. මෙමගින් බැක්ටීරියා රෝගය පාලනය කළ හැකියි.

    අනෝදා ඇට

    අනෝදා ඇට පතක් කොටා ජලය ලීටරයක දියකර පෙරා යෙදීම මගින් යුෂ උරා බෙන මකුණන්, පැළ/ පත‍්‍ර කීඩෑවන් පාලනය කළ හැකියි.

    අනෝදා කොළ

    අනෝදා කොළ ග‍්‍රෑම් 250 ක් ජලය ලීටර දෙකක් සමග ලිප තබා රත්කර ජලය ලීටරය දක්වා හිඳවා ගන්න. මෙම ද්‍රවණය වගාවට යෙදීම මගින් කූඩිත්තන් සහ සුදු මැක්කන් පාලනය කළ හැකියි.

    කොච්චි සාරය

    කොච්චි ග‍්‍රෑම් 100 ක් අඹරා ජලය ලීටරයකට කලවම් කර පැය 24 ක් තබා පෙරා අදාළ ද්‍රාවනය මෙන් 5 ගුණයක් ජලය කලවම් කර වගාවට යෙදීම මගින්, කුහුඹුවන්, කූඩිත්තන්, පණුවන් හා ගුල්ලන් පාලනය කළ හැකියි.

    දුම්කොළ නැටි

    දුම්කොළ නැටි අහුරක් ගෙන ජලය ලීටරයකට දමා උතුරුවා නිමෙන්නට හැර පෙරා ඉසීම මගින් ඔබේ වගාවේ පණුවන් ( කීටයන්) මර්ධනය කළ හැකියි.

    වල්සූරියකාන්ත

    වල්සූරියකාන්ත කොළ කිලෝග‍්‍රෑම් 1-2 ක් කොටා ජලය ලීටරයක දියකර ඉසින්න. මෙමගින් දියමන්ති සලඹයා, රතුකපු පණුවා ඇතුළු පණුවන් මර්ධනය කළ හැකියි.

    පැපොල් කිරි සාරය

    ලොකු පැපොල් ගෙඩියක කිරි ජලය ලීටරයක දියකර වගාවට ඉසීම මගින් මයිටාවන්, කූඩිත්තන්, මිරිස් වගාවේ කොළ කොඩවීම පාලනය කළ හැකියි.

    අරලිය මල්

    අරලිය මල් කිලෝවක් ජලය ලීටර් 3 කට මිශ‍්‍රකර දින 04 ක් තබා මිශ‍්‍රණයට සීනි හැදි 3 ක් යොදා පෙරා සබන් හෝ ටීපොල් ස්වල්පයක් මිශ‍්‍රකර වගාවට ඉසින්න. මේ මගින් ඔබේ ගෙවතු වගාවට හානිකර කෘමීන් පාලනය කළ හැකියි.

    සුදු ළුණු

    සුදුළුණු ග‍්‍රෑම් 100 ක් අඹරා භූමිතෙල් තේ හැදි 03 කට කළවම් කර ජලය ලීටරයකට සබන් ග‍්‍රෑම් 10 ක් මිශ‍්‍රකර පැය 24 ක් තබා පෙරා ගන්න. ඉන් පසු එය 4 ගුණයක් තනුක කර වගාවට ඉසින්න. මේ මිශ‍්‍රණය මගින් සියලූම වගාවල කූඩිත්තන්, කොළකන දළඹුවන් වැනි කෘමීන් පාලනය කළ හැකියි.

    තක්කාලි දඬු

    තක්කාලි කඳන්, පත‍්‍ර හෝ ශාකයේ කොටස් සිහින්ව කපා පොඩිකර එකට එකක් ජලය එකතු කර මද ගින්නේන් තම්බා පෙරා වගාවට ඉසින්න. මෙම ද්‍රවණයේ ඇති කෘමි විකර්ෂක ගුණය නිසා කෘමීන් පළවා හැරිය හැකියි.

    කුරුඳු කොළ

    කුරුඳු කොළ ග‍්‍රෑම් 250 කට ජලය ලීටරයක් එක් කර හොඳින් අඹරා පෙරා එම සාරය වගාව ඉසීම මගින් පේර වගාවේ රෝග පාලනය කළ හැකියි.

    රතුළුණු බල්බ සාරය

    මැටි භාජනයකට වතුර ලීටරයක් දමා හොඳින් උණු කරන්න. ඊට රතුළුණු කිලෝවක් දමා පැය 24 ක් තබා රෙදි කඩකින් පෙරා ගන්න. ඉන් පසු එයට ජලය ලීටර 10 ක් මිශ‍්‍රකර වගාවට ඉසින්න. මෙමගින් කුහුඹුවන්, කොරපොතු කෘමීන්, මයිටාවන් සහ පැළ මැක්කන් පාලනය කළ හැකියි.

    මිරිස් කොළ කොඩවීමට නිවැරදි පිළියමක්

    අපේ සෑම ගෙවත්තකම වාගේ මිරිස් පැළ කිහිපයක් දැකිය හැකියි. ඒ වගේම තමයි ගෙවතු වගාවේදී මිරිස් ගැන විශේෂ උනන්දුවක් ද තිබෙනවා. ඒත් ගෙවතු වගාවේදී වැඩියෙන්ම හානියට පත් වෙන්නේ ඔබ මහත් ආසාවෙන් වගා කරන මිරිස් පැළ ටික.

    මිරිස් වගාවට විශාලම හානියක් සිදුවන්නේ ‘කොළ කොඩවීම’ මගිනුයි. මේ තත්ත්වය පාලනයට පහත සඳහන් ක‍්‍රමවේදය ඔබට ඉතා පහසුවෙන් අනුගමනය කළ හැකියි.

    ගෙන්දගම්, අළුහුණු, දැවඅළු, පෙරුම්කායම් සම සමව ගෙන හොඳින් කලවම් කරන්න. ඊට පසු දැල් රෙදි කැබැල්ලක් ගෙන ඉහත සියල්ල ඒ තුළට දමා පොට්ටනියක් සාදා ලී කෝටුවක ගැටගසා හානිය ඇති ගස්වලට ගොස් වෙනත් කෝටුවක් උපයෝගී කර ගනිිමින් පොට්ටනිය සහිත ලීයට තට්ටු කරන්න. මෙය සතියකට වරක් කිරීම මගින් ඔබේ වටිනා මිරිස් වගාවේ කොළ කොඩවීමේ රෝගය පාලනය කරගත හැකියි.

    කාබනික පළිබෝධ නාශක සකස් කිරීමේදී සැලකිය යුතු කරුණු මොනවාද ?

    1. නිරෝගී ශාක කොටස් පමණක් තෝරා ගන්න.
    2. එම අමුද්‍රව්‍ය නිර්දේශිත ප‍්‍රමාණයට පමණක් යොදන්න.
    3. පිරිසිදු ජලය භාවිත කරන්න.
    4. සැකසීම සඳහා වෙන්කර ගත් උපකරණ ඒ සඳහාම භාවිත කරන්න.
    5. කාබනික පළිබෝධ නාශක භාවිතයේදී සැලිකිලිිමත් විය යුතු කරුණු මොනවාද ?
    6. බෝගයට යෙදීමට පෙර මේරූ අස්වැන්න නෙලා ගන්න.
    7. සවස් කාලයේදී යෙදීමෙන් සාර්ථක ප‍්‍රතිඵල ලබාගත හැකියි.
    8. වර්ෂාවට හසුවොන සේ යොදන්න. අවශෝෂණයට පැය 3-4 ක් පමණ ගතවේ.
    9. සාදාගත් මිශ‍්‍රණය එක්වරක් පමණක් භාවිත කරන්න.
    10. කුඩා ළමුන් හා සුරතල් සතුන්ගෙන් ආරක්ෂාකාරීව තබන්න.

    ඉහත සඳහන් විධිමත් ක‍්‍රමවේද මගින් ඔබ විසින් ම සකසා ගන්නා කාබනික පළිබෝධ නාශක මගින් වාසි කිහිපයක් ඔබට ලබාගත හැකියි.

    1. ශාක නිස්සාරකවල කල් පවතින විෂ රසායනික අඩංගු නොවන නිසා දීර්ඝ පසු අස්වනු කාලයක් අවශ්‍ය නොවීම.
    2. පළිබෝධ නාශකවලට ඔරොත්තු දෙන විවිධමාදිලි ඇතිවීම වැළකීම.
    3. පරිසර හිතකාමී වීම.
    4. වගා වියදම අඩුවීම.
    5. යොදන පුද්ගලයාට හානි නොවීම.
    6. ජෛව විවිධත්වයට හානි නොවීම.

    ඉහත සඳහන් පරිදි ඔබේම ගෙවත්ත ඔබම විසින් කළමනාකරණය කරගත හොත් ඔබ වඩාත් නිරෝගී පුරවැසියෙකු වනවා පමණක් නොව අනාගත පරපුර උදෙසා ලෝකය සුරක්ෂිත කළ වගකිව යුතු පුරවැසියෙකු වන බව ද සහතිකයි.

    කෘෂිකර්ම දෙපාර්තමේන්තුවේ ප‍්‍රකාශන ඇසුරිණි – සැකසුම – තුෂාර වල්ගම

  • 2010 – 2020 බොලිවුඩයේ හොඳම ඓතිහාසික චිත්‍රපට – ෆිල්ම් ෆෙයාර් නිර්දේශ

    2010 – 2020 බොලිවුඩයේ හොඳම ඓතිහාසික චිත්‍රපට – ෆිල්ම් ෆෙයාර් නිර්දේශ

    බොලිවුඩ් සිනමාවේ දශකයේ සහ 60 දශකයේ ඓතිහාසික චිත්‍රපට රැල්ලක් හමාගියා. ඊට පසු එය ක්‍රමයෙන් දුර්වල වුවත් මෑත කාලයේ දී නැවත ඓතිහාසික චිතුපට රැල්ලක් වර්ධනය වෙලා තිබෙනවා.

    ඒත් එදා සහ අද අතර සැලකිය යුතු වෙනසක් තිබෙනවා. අද ඓතිහාසික බොලිවුඩ් චිත්‍රපට කියන්නේ අති දැවැන්ත ආයෝජනයක් හා තාක්ෂණික ප්‍රයෝග මත පදනම් වුණ අති දැවැන්ත කර්මාන්තයක්. නළු නිළියන් සිය ගණනක්, ඇදුම් දහස් ගණනක් සහ අති දැවැන්ත පසුතල මත එය පදනම් වෙලා තිබෙනවා. 

    එපමණක් නොවෙයි හැම දෙයක්ම එක හා සමානව පවතින බවට අධ්‍යක්ෂවරයකු සහතික විය යුතුයි. සමහර විට එවැනි චිත්‍රපට අනවශ්‍ය මතභේදයන්ට තුඩු දෙන අතර අන්තවාදීන්ගේ ඍජු තර්ජනය කිරීම්වලට සේම දේශපාලන බලාධිකාරියේ බලපෑම්වලට ද ගොදුරු වෙනවා. එබැවින් සිනමාකරුවන් එවැනි දුෂ්කර කාර්යයන් භාර ගැනීමෙන් වැළකී සිටින අතර නළු – නිළියන් ද ඒ ගැන වරක් දෙවරක් කල්පනා කර බලනවා.

    ඒත් ප්‍රේක්ෂකාගාරය, ජනතාව ඓතිහාසික චිත්‍රපට ඉල්ලා සිටිනවා. වැඩි වැඩියෙන් ඉල්ලා සිටිනවා. ඒ නිසා නිෂ්පාදකයින්, අධ්‍යක්ෂවරුන් කොතරම් අභියෝග හා දුෂ්කරතා මැද වුණත් ඓතිහාසික චිත්‍රපට ජනතාව අතරට ගෙන එනවා.

    මේ තත්ත්වය තුළ බොලිඩුයේ බලවත්ම මාධ්‍යය වන  ෆිල්ම් ෆෙයාර් මේ දශකයේෙ බොලිවුඩයේ හොඳම ඓතිහාසික චිත්‍රපට 06ක් ගැන සිය නිර්දේශ ඉදිරිපත් කර තිබෙනවා. මේ ඒ ගැනයි.

    බජිරාඕ මස්තානි (2015)

    historical තිහාසික, බොලිවුඩ්, ඉහළ

    අධ්‍යක්ෂක: සංජේ ලීලා බන්සාලි
    රංගනය: රන්වීර් සිං, දීපිකා පදුකෝන්, ප්‍රියංකා චොප්රා

    ‘බජිරාඕ මස්තානි‘ යනු බන්සාලිගේ සිහින ව්‍යාපෘතියකි. 90 දශකයේ අග භාගයේ සිට චිත්‍රපටය සෑදීමට ඔහුට අවශ්‍ය වූ නමුත් කිසියම් හේතුවක් නිසා එය ඉටුකර ගත නොහැකි විය. දිගු කලක් තිස්සේ සැලසුම්වලට පමණක් සීමා වූ චිත්‍රපටය අවසානයේ 2015 දී එළිදැක්විණි.

    රශ්වීර් සිං, ජනප්‍රිය පෙෂ්වා බජිරාඕගේ චරිතයට පණ පොවන අතර, දීපිකා පදුකෝන් මස්තානි ලෙස රඟපෑවාය. ප්‍රියංකා චොප්රා කාෂිබායිගේ (පෙෂ්වා බජිරාඕගේ පළමු බිරිද) චරිතයට පණ පොවන ලදී.

    බජිරාඕ යනු නිර්භීත රණශූරයෙකි. ඔහු මරාතිවරුන්ගේ ශක්තිය උතුරට හා දකුණට ව්‍යාප්ත කළේය. එවැනි එක් සටනකදී ඔහුට චත්‍රසාල් රජුගේ මුස්ලිම් දියණිය වන මස්තානි මුණගැසෙන අතර ඇය යුධ පිටියේදී පෙන්වන ධෛර්යය නිසා ඔහු ඇය වෙත ආකර්ෂණය වේ. 

    මස්තානි ඔහුගේ දෙවන බිරිඳ බවට පත්වන අතර ඇය සහ කෂිබායි අතර එදිරිවාදිකම් පුපුරා යයි. පූස්තාවේ උසාවියේදී මස්තානි පිළිගන්නේ නැත. එබැවින් බජිරාඕ ඇය වෙනුවෙන් තවත් මාළිගාවක් ඉදිකර වැඩි කාලයක් එහි ගත කිරීමට පටන් ගනී. 

    බජිරාඕ දකුණේ නසීර් ජුන්ග් සමඟ සටනට යන විට, බජිරාඕගේ මව සහ ඔහුගේ වැඩිමහල් පුතා මස්තානි සහ ඇගේ පුත් ෂම්ෂර් බහදූර් සිරගත කරති. 

    බජිරාඕ නසීර් ජුන්ග්ට එරෙහි සටන ජය ගන්නා නමුත් එහිදී දරුණු ලෙස තුවාල ලබයි. ඔහුට ඇයව නිදහස් කර මරණයට පත්වීමට අවශ්‍ය වෙයි….

    රන්වීර් සහ දීපිකා යන දෙදෙනාම නාමික භූමිකාවන් නිරූපණය කරන නමුත් අගනා රංගනයක නිරත වූයේ කාෂිබායි ගැන අපට අනුකම්පා කළ ප්‍රියංකා ය.

    පද්මාවට් (2018)

    historical තිහාසික, බොලිවුඩ්, ඉහළ

    අධ්‍යක්ෂක: සංජේ ලීලා බන්සාලි
    රංගනය: රන්වීර් සිං, දීපිකා පදුකෝන්, ෂාහිඩ් කපූර්

    රාජ්පුත් පාලක මහාරාවල් රතන් සිං (ෂාහිඩ් කපූර්) සහ ඔහුගේ දෙවන බිරිඳ වන සිංහල දේශයේ කුමාරිකාවන වන පද්මාවට් (දීපිකා පදුකෝන්) අතර ඇති අමරණීය ආදරය ගැන පද්මාවට් පවසයි. 

    කුණාටුවකට හසුව ඔවුන් ගමන් ගත් නැව ලංකාවට ගසා ගෙන යන අතර ඔවුන් එහි සුවය ලබමින් සිටියදී දෙදෙනා ආදරයෙන් බැඳීණි. ඔහු ඇයව විවාහ කර ගෙන ඇයව රාජස්ථානයට ගෙන යයි. 

    ඇයගේ සුන්දරත්වය පිළිබඳ කථාන්තරය ඇලවුඩින් ඛල්ජි (රන්වීර් සිං) ගේ කනට වැටේ. රතන් සිං ඇත්ත වශයෙන්ම මෙය ප්‍රතික්ෂේප කරන්නේ එය රාජ්පුත්ගේ ආඩම්බරයට පටහැනි යැයි සිතමිනි. මෙය ඛල්ජි විසින් චිත්තෝර් ආක්‍රමණය කිරීමට තුඩු දෙයි. අනවශ්‍ය ලේ වැගිරීම් වලක්වා ගැනීම සඳහා රතන් සිං ඛල්ජිට තනි සටනක් කිරීමට අභියෝග කරයි. මුලදී ඔවුන් දෙදෙනාම එකිනෙකාට සමාන බව ඔප්පු කළ නමුත් පසුව රතන් සිංට ඉහළින් සිටින බව පෙනේ. 

    මේ අවස්ථාවේදී කුමන්ත්‍රණයකින් රතන් සිං මරා දමනු ලැබේ. මෙම පුවත ඇසූ පද්මාවතී සියදිවි නසා ගන්නා අතර බලකොටුවේ වෙසෙන අනෙකුත් කාන්තාවන් ද ඇය හා එක් වේ. 

    මෙම චිත්‍රපට ආගමික අන්තවාදීන්ගේ දැඩි විවේචනයට ලක් වූ අතර දීපිකා මරණ තර්ජනයට පවා ලක් වූවාය. එහෙත් ප්‍රේක්ෂකයින් එය ආදාරයෙන් වැළගත්හ. ඒ සමග රන්වීර් සිං, දීපිකා පදුකෝන්, ෂාහිඩ් කපූර් විශිෂ්ඨ රංගනයක් ඉදිරිපත් කළහ.

    කේසරි (2019)

    historical තිහාසික, බොලිවුඩ්, ඉහළ

    අධ්‍යක්ෂක: අනුරග් සිං
    රංගනය: අක්ෂේ කුමාර්, පරිනීති චොප්රා

    කේසාරි යනු 1897 දී සිදු වූ සුප්‍රසිද්ධ සාරගාර්හි සටන ය. ඇෆ්ගනිස්ථානුවන්ගේ මුල් සැලැස්ම වූයේ අසල ඇති ලොක්හාර්ට් සහ ගුලිස්තාන් බලකොටුව අල්ලා ගැනීම ය. 

    සිංහ හදවත් ඇති සික්වරුන් 21 දෙනාගේ පරිත්‍යාගය නිසා එය ව්‍යාර්ථ වේ. 

    හවාල්ඩාර් ඉෂාර් සිං ලෙස රඟපෑ අක්ෂේ කුමාර් මෙම චිත්‍රපටයේ ආත්මය විය. 

    හවාල්ඩාර් ඉෂාර් සිං, ඔහුගේ හැසිරීම් රටාව නිසා ඔහු එම යුගයේ වෘත්තීය සොල්දාදුවෙකු බවට පත්විය. ඔහු සෙසු සෙබළුන්ගේ චිත්ත ධෛර්යය පෙළගස්වන ආකාරය සහ පෙරමුණ ගෙන යන ආකාරය සැබෑ වීරත්වයට උදාහරණයකි. 

    චිත්‍රපටය විහිළුවක් නොවේ. සොල්දාදුවන් තම මව්බිම වෙනුවෙන් දිවි පිදීමට කැමැත්තෙන් සිටින බවත්, බ්‍රිතාන්‍යයන්ට යම්කිසි ද්‍රෝහිකමක් නිසා නොවන බවත් එයින් පෙනී ගියේය. සොල්දාදුවන් ගණන වැඩිවීමත් සමඟ ක්‍රියාදාම දර්ශන වඩාත් බිහිසුණු විය.

    අධ්‍යක්ෂ අනුරග් සිං යුද්ධයේ සැබෑ භීෂණයෙන් අපව ආරක්ෂා නොකරයි. සොල්දාදුවන් 21 දෙනාගේ ධෛර්යයට ආචාර කිරීමට ඔබට උදව් කළ නොහැක.

    මානිකාර්නිකා: ජන්සි රැජින (2019)

    historical තිහාසික, බොලිවුඩ්, ඉහළ

    අධ්‍යක්ෂක: කන්ගනා රනාත්, රාධා ක්‍රිෂ්ණා ජගර්ලමුඩි
    රංගනය: කන්ගනා රනාත් , අතුල් කුල්කර්නි, ජිෂු සෙන්ගුප්තා, සුරේෂ් ඔබෙරෝයි, ඩැනී ඩෙන්සොංපා, අන්කිටා ලොක්හන්දේ

    බ්‍රිතාන්‍යයන්ගේ ශක්තියට එරෙහිව සන්නද්ධ කැරැල්ලක් දියත් කළ අපගේ ප්‍රමුඛතම නිදහස් සටන්කාමියෙකු වූයේ ජන්සි රැජින වන රාණි ලක්ෂ්මිබායි ය. ඇය පෞද්ගලිකව බ්‍රිතාන්‍යයන්ට ජීවිතය නිරයක් බවට පත් කළා පමණක් නොව, ඇගේ අමරණීය ක්‍රියාවන් ද ඇගේ මරණයෙන් පසුව පවා බ්‍රිතාන්‍ය අධිරාජ්‍යයට එරෙහිව කැරලි ගැසීමට මිලියන ගණනක් පොළඹවා ඇත. 

    සුභද්‍ර කුමාරි චෞහාන්ගේ සුප්‍රසිද්ධ කාව්‍යයක් වන ජාන්සි කි රාණි, බ්‍රිතාන්‍යයන්ට එරෙහි ඉන්දියාවේ නිදහස් අරගලයේ උච්චතම අවස්ථාවෙහිදී රචනා කර ඇති අතර, එම කාව්‍යය බොහෝ හදවත් තුළ දේශප්‍රේමයේ දැල්ල දැල්වීය. 

    මනිකර්නිකා යනු සැබවින්ම චලනය වන කතන්දරයක් වන අතර, අධිෂ්ඨානය සහ ධෛර්යය අනුකරණය කිරීමේදී අප සැමට ආශ්වාදයක් ලබා ගත හැකිය.

    පනිපට් (2019)

    historical තිහාසික, බොලිවුඩ්, ඉහළ

    අධ්‍යක්ෂක: අසුතෝෂ් ගෝවරිකර්
    රංගනය: අර්ජුන් කපූර්, සංජේ දත්, ක්‍රිති සනොන්

    සඩාෂිව්රාඕ බාඕ (අර්ජුන් කපූර්) ගේ නායකත්වය යටතේ මරාතිවරුන් විසින් පරාජයට පත් කරන ලද තුන්වන පානිපට් සටන පනිපට් ජීවයට ගෙන එයි. දකුණු දෙසින් උඩ්ගීර්හි නිසාම්ට එරෙහිව සඩාෂිව් සාර්ථක වූ අතර එබැවින් ඔහුට ඇෆ්ගනිස්ථාන නායක අහමඩ් ෂා අබ්දාලි (සංජේ දත්) ට එරෙහිව මරතා හමුදාවේ අණ දෙන ලදි. එය පූනේ සිට පනිපට් දක්වා වූ දිගු ගමනක් වන අතර, සදාෂිව් සැලසුම් කර ඇත්තේ මඟ දිගේ පදිංචි වූ මරතා අධිපතීන්ගේ සේවය ප්‍රයෝජනයට ගැනීමටත්, සලාක සහ මිනිසුන් ඉල්ලා සිටිමින් ඔහුගේ හමුදාව ශක්තිමත් කිරීමටත් ය. 

    ඇෆ්ගනිස්ථාන ආක්‍රමණිකයන්ට එරෙහිව සීක් සහ රාජ්පුට්වරුන්ගේ සහයෝගය ද ඔහු අපේක්ෂා කළේය. නමුත් සැලසුම් කළ පරිදි දේවල් සිදු නොවීය. ඔහුගේ බොහෝ සන්ධාන අසාර්ථක විය. ඔහුගේ හමුදාව සලාක වලින් ඉවතට දිව ගියේය. ඔහුගේ හමුදාව පසුපස ගිය සිවිල් වැසියන් විශාල සංඛ්‍යාවක් ද ඔවුන් වටකරගෙන සිටියහ. මෙයට බැතිමතුන් මෙන්ම සොල්දාදුවන්ගේ භාර්යාවන් සහ දරුවන් ද ඇතුළත් විය. 

    චිත්‍රපටය සමඟ හින්දු මුස්ලිම් සමගිය සඳහා අධ්‍යක්ෂවරයා නඩුවක් ඉදිරිපත් කර තිබේ. බස්තිරාඕගේ මුස්ලිම් පුත් මස්තානි, ෂම්ෂර් යනු සදෂිව්ගේ වඩාත්ම විශ්වාසවන්ත සහායකයා වන අතර ඔහු සමඟ සටන් කරයි. ඉබ්‍රාහිම් ඛාන් ගාර්ඩි ඔහුගේ යුද යන්ත්‍රයේ ද තීරණාත්මක අංගයක් බව පෙන්නුම් කරයි. 

    සියල්ලට ම, එය සවිස්තරාත්මක යුද චිත්‍රපටයක් වන අතර, එය නිර්භීතකම පමණක් නොව, ජයග්‍රහණය සහ පරාජය අතර වෙනස ඇති කරන උපාය මාර්ගය ද අපට පෙන්වයි. 

    ඉතා සූක්ෂම ලෙස සකස් කරන ලද යුද දර්ශන චිත්‍රපටයේ ආඩම්බරයට පත්වේ. තුවක්කු දැල්වීමට පටන් ගන්නා විට ඔබට ශබ්දය දැනිය හැකි අතර භූ කම්පන ඔබ හරහා ගමන් කරයි. හමුදා පිහිටුවීම, විවිධ උපාංග යෙදවීම කතාවට නාට්‍ය එක් කරයි.

    තන්හාජි: අන්සං වොරියර් (2020)

    historical තිහාසික, බොලිවුඩ්, ඉහළ

    අධ්‍යක්ෂක: ඕම් රවුට්
    කාස්ට්: අජේ දේව්ගන්, සයිෆ් අලි ඛාන්, කාජල්, ලූක් කෙනී, ෂරද් කෙල්කාර්

    මන්දාවරුන් විසින් කොන්දන බලකොටුව අල්ලා ගැනීම තන්හාජි විස්තර කරයි. රන්සිබ්ට එය උපාය මාර්ගික වැදගත්කමක් ඇති අතර එතැන් සිට මුළු දකුණු කලාපය ගැනම විමසිල්ලෙන් සිටිය හැකිය. 

    පුරන්දර්ගේ ගිවිසුමෙන් පසුව ශිවාජිට බලකොටුව ඔහුට භාර දීමට සිදු වූ අතර එය නැවත ලබා ගැනීමට මංමුලා සහගත විය. ඔහුගේ විශ්වාසවන්ත සහායක තන්හාජි මාලුසාරේ සහ ඔහුගේ ඩයිහාර්ඩ් සොල්දාදුවන් කණ්ඩායම බලකොටුව අල්ලා ගත නොහැකි ලෙස පෙනෙන බිත්තිවලට නැග බලකොටුව අල්ලා ගත් අතර බලකොටුව භාරව සිටි රාජ්පුත් අණදෙන නිලධාරී උදයභන් පරාජය කළේය. 

    තන්හාජිගේ අරමුණින් ජීවිතය අහිමි වූ අතර සිංහයෙකු මෙන් සටන් කළ නිසා ශිවාජි විසින් ඔහුගේ මතකයේ බලකොටුව සිංහගද් ලෙස නම් කරන ලදී. 

    නිර්මාණාත්මකව සකස් කරන ලද යුධ දර්ශන සහ තන්හාජි සහ උදයභන් අතර අවසන් ගැටුම නිසා එය ප්‍රේක්ෂකයින් අතර අතිෂය ජනප්‍රිය විය. 

    අජේ දේව්ගන් තන්හාජිගේ චරිතයට මනා පණ දුන්නේය, ශිවාජි කෙරෙහි ඇති ඔහුගේ භක්තිය සහ ඔහුගේ මව්බිම කෙරෙහි ඔහු තුළ ඇති නොමැකෙන ආදරය අතිශයින්ම විශ්වාසයෙන් යුතුව. සයිෆ් අලි ඛාන් සහ ෂාර් කෙල්කර්ගේ රංගනයන් ද බොහෝ ප්‍රශංසාවට ලක් විය.

    By FilmFare – සැකසුම – තුෂාධවි

  • Palm oilවලට රු.100ක අලුත් බද්දක්

    Palm oilවලට රු.100ක අලුත් බද්දක්

    රජය විසින් Palm oilආනයනික බද්ද කිලෝවකට රුපියල් 200 සිට රුපියල් 300 දක්වා රුපියල් 100කින් ඉහළ නංවා ඇතැයි Palm oil ආනයනකරුවෝ සදහන් කරති. නව බදු ඉහළ නැංවීම සමග රුපියල් 380ක්ව පැවති Palm oil කිලෝවක තොග මිල රුපියල් 480 දක්වා වැඩිවන බවයි Palm oil ආනයනකරුවෝ සදහන් කරන්නේ.

  • COVID-19 හේතුවෙන් එදිනෙදා ජීවනෝපාය අහිමි පුද්ගලයන්ට සදහා රු. 5000 දීමනාව ගෙවීම 20 දා සිට

    COVID-19 හේතුවෙන් එදිනෙදා ජීවනෝපාය අහිමි පුද්ගලයන්ට සදහා රු. 5000 දීමනාව ගෙවීම 20 දා සිට

    කොරෝනා වෛසරයේ ව්‍යාප්තියත් සමග රට තුල පීඩාවට පත්ව සිටින තවත් පාර්ශව කිහිපයක් සඳහා රුපියල් 5,000 දීමනාව ලබාදීමට රජය තීරණය කිරීමත් සමග එම ප්‍රතිලාභ ලබාදීමට අදාලව වැඩපිළිවෙල දියත් කිරිම පිළිබද විශේෂ සාකච්ඡාවක් අද දින (16) සෞඛ්‍ය හා දේශීය වෛද්‍ය සේවා, කාන්තා හා ළමා  කටයුතු සහ සමාජ ආරක්ෂණ අමාත්‍ය පවිත්‍රා වන්නිආරච්ච් මහත්මියගේ ප්‍රධානත්වයෙන් සමාජ ආරක්ෂණ අමාත්‍යාංශයේ දි පැවැත්විනි.

    මෙම සාකච්ඡාවේ දී කොරෝනා වෛසරයේ ව්‍යාප්තියත් සමග රට තුල පීඩාවට පත්ව සිටින අනෙකුත් ප්‍රතිලාභීන් තේරිීමේ ක්‍රියාවලින් 2020.04.17 සහ 18 දෙදින ආරම්භ කර 2020.04.19 දින හෝ ඊට පෙර ග්‍රාමිය කමිටු නිර්දේශ සහිතව ප්‍රාදේශීය ලේකම් වෙත ඉදිරිපත් කිරීමේ කටයුතු පිළිබදවත්. මෙම ගෙවීම් 2020.04.20 වන දා සිට සෞඛ්‍ය අංශ විසින් ලබාදෙන උපදෙස් හා නිර්දේශ අනුගමනය කරමින් ගෙවීම්  ආරම්භ  කිරීමට අදාලව දිර්ඝ ලෙස සාකච්ඡා කෙරිණි.

    මෙම වැඩපිලිවෙල යටතේ මධ්‍යම රජය හා පළාත් සභාවලින් නිර්දේශ කර එවා ඇති පෙරපාසල් ගුරුවරුන්, පුද්ගලික බස් රථ රියදුරන් සහ කොන්දොස්තර වරුන්, රජයේ සේවයේ නොයෙදෙන ආයුර්වේද වෛද්‍ය සභාවේ ලියාපදිංචි වෛද්‍යවරුන්, හස්ත කර්මාන්තකරුවන්, අත්යන්ත්‍ර පේෂකර්මාන්ත කරුවන්, උසාවි මගින් නඩත්තු දීමනා ලබන කාන්තාවන්, ආදායම් අහිමි කුඩා තේ වතු හිමියන්, ප්‍රාදේශීය මාධ්‍යවේදීන් යන රැකියා කාණ්ඩවල පවුල් ඒකක වලට මෙම දීමනා ගෙවීම සිදුකරනු ඇත.

    මීට අමතරව ඉදිකිරීම් ක්ෂේත්‍රය යටතේ,කාර්මාන්ත ක්ෂේත්‍රයේ, ප්‍රාදේශීය හා ග්‍රාමීය මට්ටමින් සේවා සපයන, ග්‍රාමීයව අලෙවිකරණයේ යෙදෙන, රැකියාවල නියලුන පුද්ගලයින් සදහා රුපියල් 5,000 දීමනාව ලබාදීමට තීරණය කර ඇත.

    මෙම අවස්ථාවට කාන්තා හා ළමා කටයුතු සහ සමාජ ආරක්ෂණ අමාත්‍යාංශයේ ලේකම් ඒ.එස්.එම්.එස්.මහානාම,සමෘද්ධි සංවර්ධන දෙපාර්තමේන්තුවේ අධ්‍යක්ෂ ජනරාල් බන්දුල තිලකසිරි , අමාත්‍යතුමීයගේ පෞද්ගලික ලේකම් කංචන ජයරත්න යන මහත්ම මහත්මීන් ඇතුලු නිලධාරීන් පිරිසක් සහභාගි වූහ.

  • ඉදිරි දින කිහිපය තුළ රාජ්‍ය සහ පෞද්ගලික දෙඅංශයේ සේවා ඇරඹීම කෙරෙහි රජයේ අවධානය

    ඉදිරි දින කිහිපය තුළ රාජ්‍ය සහ පෞද්ගලික දෙඅංශයේ සේවා ඇරඹීම කෙරෙහි රජයේ අවධානය

    ඉදිරි දින කිහිපය තුළ රාජ්‍ය සහ පෞද්ගලික අංශයේ සේවා යළි ආරම්භ කර දෛනික කටයුතු යතාවත් කිරීම කඩිනම් කළයුතු බව ජනාධිපති ගෝඨාභය රාජපක්ෂ මැතිතුමා අවධාරණය කරයි. දේශීය ආර්ථිකය මෙන්ම ජන ජීවිතය ආරක්ෂා වන අයුරින් සියලු කටයුතු ක්‍රියාත්මක විය යුතුයි.

    රජයේ ඉදිරි වැඩකටයුතු සම්බන්ධයෙන්  අමාත්‍යාංශ ලේකම්වරු සමග (15) පස්වරුවේ ජනාධිපති කාර්යාලයේ දී පැවති විශේෂ හමුවේ දී ජනාධිපතිතුමා මේ බව අවධාරණය කළේය.

    රාජකාරී කටයුතු බාධාවකින් තොරව සිදුකරගෙන යා හැකි අන්දමින් ඇඳිරි නිතිය ලිහිල් කිරීම කෙරෙහි සාකච්ඡාවට ලක් කෙරිණ.

    ජනතාව ඒකරාශිවීමට ඉඩ නොතබා නියමිත සෞඛ්‍ය උපදෙස් පිළිපදිමින් සේවා කටයුතු පවත්වාගෙන යාමේ වගකීම අමාත්‍යාංශ ලේකම්වරු සහ ආයතන ප්‍රධානීන් වෙත පැවරේ.

    කෘෂි, ධීවර සහ ව්‍යාපාර ඇතුළු කර්මාන්ත ආයතන යළි ක්‍රියාත්මක කිරීමට අවශ්‍ය පසුබිම සැකසීමේ දී ඊට අවශ්‍ය සහාය අමාත්‍යාංශ වෙතින්  ලබාදීමට ක්‍රියාකරන ලෙස ද ජනාධිපතිතුමා ලේකම්වරුන්ට දැනුම් දුන්නේය. අළුත් ආර්ථික රටාවක් ගොඩනැගීමේ යාන්ත්‍රණය සැකසීමේ වගකීම අමාත්‍යාංශ වෙත පැවරෙන බව ජනාධිපතිතුමා සඳහන් කළේය.

    මාර්ග ලක්ෂයක් ඉදිකිරීමේ වැඩසටහන ඇතුළු නැවතී ඇති සංවර්ධන ව්‍යාපෘති යළි ඇරඹීමට පියවර ගැනේ. සෙසු රටවල් මුහුණදි ඇති තත්ත්වය සැලකිල්ලට ගනිමින් දේශීය කෘෂි ආර්ථිකය කෙරෙහි විශේෂ අවධානය යොමුවිය යුතු බව ද අවධාරණය කෙරිණි.

     අපනයන කෘෂි බෝග කෙරෙහි විශේෂ අවධානය යොමු කරමින් වගාකළ හැකි බිම් ඵලදායී ලෙස ඊට දායක කර ගැනීමට අවශ්‍ය පසුබිම සකස් කරන ලෙස ද ජනාධිපතිතුමා නිලධාරීන්ට උපදෙස් දුන්නේය.  ඒ වෙනුවෙන් රාජ්‍ය යාන්ත්‍රය ගමට ගෙන යාමේ වැදගත්කම ද ජනාධිපතිතුමා පැහැදිළි කළේය.

    අළුත් ව්‍යාපාර කෙරෙහි අවධානය යොමු කළ යුතුය. එමෙන්ම  අත්දැකීම් සහිත ව්‍යාපාරිකයන්ට ද අවස්ථාව සලසා දිය යුතුය. සමස්තයක් ලෙස ප්‍රතිපත්තිමය ආකාරයකින් ආර්ථිකය ගොඩනැඟිම කෙරෙහි සියලුදෙනාගේ අවධානය යොමුවිය යුතු බව ද ජනාධිපතිතුමා පෙන්වා දුන්නේය.

    ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග, අග්‍රාමාත්‍ය ලේකම් ගාමිණි සෙනරත්, කැබිනට් ලේකම් එස්. අමරසේකර යන මහත්වරු සහ අමාත්‍යාංශ ලේකම්වරු සාකච්ඡාවට එක්ව සිටියහ.