Blog

අද (15) දිනය තුළ කොවිඩ්-19 ආසාදිතයින් 05 දෙනකු හමු වූ බවත් ඒ අනුව ශ්‍රී ලංකාවෙන් වාර්තා වන කොවිඩ්-19 ආසාදිතයින් සංඛ්‍යාව 238 දක්වා වර්ධනය වූ බවත් සෞඛ්‍ය ප්‍රවර්ධන කාර්යංශය සදහන් කරයි.

සෞඛ්‍ය ප්‍රවර්ධන කාර්යංශය විසින් අද දින ප.ව 22.04ට යාවත්කාලීන කළ වාර්තාව වැඩි දුරටත් සදහන් කරන්නේ ප්‍රතිකාර ලබන රෝගීන් සංඛ්‍යාව168 දෙනකු බවත් දැනට රෝහල්වල විමර්ශන යටතේ සිටින පුද්ගලයින් 144 දෙනකු බවත්ය. සුවය ලබා පිටව ගිය සංඛ්‍යාව 63 දෙනකු වන අතර මරණ සංඛ්‍යාව තව දුරටත් 07ක ස්ථාවර මට්ටමේ පවතී.

ශ්‍රී ලංකාව ඇතුළු ආසියානු රටවල් කිහිපයක ප්‍රධාන අපනයන ආර්ථිකයක් වන ඇඟලුම් කර්මාන්තය කොරෝනාවෛරසයත් (Covid 19) සමඟ බලවත් අර්බුදයකට මුහුණ දී ඇති බව ඒකාබද්ධ ඇඟලුම් සංගම් සමුළුවේ මහා ලේකම් ටියුලි කුරේ පවසයි.

බීබීසී සිංහල සේවය විසින් කරන ලද විමසීමක දී අදහස් දැක්වූ මහලේකම්වරයා, ඇඟලුම් සඳහා ඇති ඉල්ලුම සහ සැපයුම යන දෙපාර්ශවයෙන්ම මතුවෙමින් පවතින ප්‍රශ්නවලට මුහුණදීමට එම ක්ෂේත්‍රයේ නිරතවෙන්නන්ට සිදුව ඇතැයි සඳහන් කළේය.

“දැනට පවතින වාතාවරණය තුළ ප්‍රශ්නය මාසතුනක පමණ කාලයකට බලපානවා. බලාපොරොත්තු වූ ආදායම රුපියල් බිලියන1.5ක්. එය නැතිවෙනවා. ඊටත් වඩා ප්‍රශ්නවලට ප්‍රශ්නය බරපතල වීමේ ඉඩකඩක් තියෙනවා” යනුවෙන් ඒකාබද්ධ ඇඟලුම් සංගම් සමුළුවේ මහ ලේකම්වරයා පෙර අනතුරු ඇඟවීමක් කරයි.

”දැනට පෙනෙන හැටියට රට තුළ බලපැවැත්වීමට අවශ්‍ය ඇඳිරි නීතිය හේතුවෙන් වැඩ පටන්ගන්න බැරි තත්ත්වයක් පවතින්නේ. ලෝක තත්ත්වය අනුව ඇණවුම් අවලංගු කරන්න සිද්ධ වෙනවා”

එසේම ලෝකයේ පවතින ආර්ථික වාතාවරණය අනුව දැනට ලැබී ඇති ඇණවුම් අවලංගු කිරීමට සිදුවිය හැකි බවත් ඔහු පවසයි.

ඇඟලුම් නිෂ්පාදනය, මෝස්‌තරකරණය සහ අපනයනය ශ්‍රී ලංකාවේ අපනයන ආර්ථිකයේ ප්‍රධානතම අංගයක් වේ.

පසුගිය කාලය තුළ විදේශගත ශ්‍රමිකයන්ගෙන් ලබන ආදායමට අතිරේකව ශ්‍රී ලංකාව විදේශ විනිමය උපයනු ලබන ප්‍රමුඛතම ආර්ථිකය වුණේ ඇඟලුම් කර්මාන්ත ය. එමගින් නව දේශීය ව්‍යාපාරික ප්‍රජාවක් මෙන්ම ලක්ෂ සංඛ්‍යාත රැකියා නිර්මාණය කිරීමක් ද සිදුවිය.

එම තීරණාත්මක අපනයන ආර්ථිකය රටට අහිමිවීමත් සමඟ මතුව ඇති ඊළඟ අභියෝගය වන්නේ එම ක්‍ෂේත්‍රයේ රැකියාවන්හි නිරතවෙමින් සිටි, විශේෂයෙන්ම ග්‍රාමීය පළාත්වලින් කර්මාන්තයට හවුල් වූ ඇඟලුම් සේවිකාවන් සහ වෙනත් ශ්‍රමිකයන් මුහුණ දී ඇති ඔවුන්ගේ වෘත්තීය සුරක්ෂිතභාවයට අදාළ ගැටලුවය.

ශ්‍රී ලංකාව තුළ දහසකට ආසන්න ඇඟලුම් කම්හල් නිෂ්පාදන කාර්යයේ නිරතවෙමින් ඇති බව ඇස්තමේන්තු කරනු ලැබ ඇත.

ඊට අතිරේකව ශ්‍රී ලාංකික ඇඟලුම් ව්‍යාපාරිකයෝ මාලදිවයින, සිංගප්පූරුව සහ බංග්ලාදේශය වැනි රටවලද ව්‍යාපාරික කටයුතුවල නිරත වෙති.

ඇඟලුම් ව්‍යාපාරික ලෝකයම අනතුරක

ශ්‍රී ලංකාව පමණක් නොව රටවල් කිහිපයක ජනගහනයෙන් සැලකිය යුතු අනුපාතයක් සම්බන්ධ නිෂ්පාදන ක්‍ෂේත්‍රයක් වන ඉන්දියාව සහ බංග්ලාදේශය වැනි රටවලටත් කොරෝනා වෛරස් උවදුරත් සමඟ එල්ල වී පවතින්නේ නරක කාලයකි.

”අපේ ඇඟලුම් සේවක – සේවිකාවන් කොරෝනා වෛරසයෙන් බේරුනත් , ඔවුන් බඩගින්නෙන් මරණයට පත්විය හැකි අනතුරක් පවතිනවා”

ඉන්දියාවේ ‘Ambattur Fashion’ ඇඟලුම් ව්‍යාපාරයේ හිමිකරු වන විජේ මහ්තානි එම අනතුර ඇඟවීම කරන්නේ කර්මාන්තය කඩා වැටී පවතින තත්ත්වය සංකේතවත් කරමිනි.

එම ඇඟලුම් ව්‍යාපාරයේ රැකියා කරන ශ්‍රමිකයන් 18,000 කි.ඉන්දියාව ,බංග්ලාදේශය සහ ජෝර්දානය යන රටවල් තුනේ ඔවුන්ගේ ඇඟලුම් නිමැවුම්හල් ක්‍රියාත්මක වේ.

එම කම්හල්වලින් වැඩි සංඛ්‍යාවක් දැනටමත් වසා දමනු ලැබ ඇති අතර,මේ මොහොතේ බංග්ලාදේශයේ ඩකා අගනුවර පිහිටි කම්හල පමණක් අර්ධ මට්ටමින් ක්‍රියාත්මක වේ.

ව්‍යාපාරික ප්‍රජාව පවසන පරිදි සේවක වැටුප් ගෙවීම අසීරු අඩියකට පත්ව තිබෙන්නේ ඔවුන්ගේ රටවල පවතින කොරෝනා වෛරසය නිසාම නොවේ. ප්‍රධාන ගැටලුවවී තිබෙන්නේ එක්සත් රාජධානිය සහ එක්සත් ජනපදය වැනි ප්‍රධාන ගැනුම්කරුවන් විසින් සාධාරණ නොවන කොන්දේසි පනවනු ලැබීමය. එම කොන්දේසි මූල්‍ය ගනුදෙනුවලට අදාළ වේ.

කොරෝනාවෛරසයට සම්බන්ධ ප්‍රධාන කරුණු දෙකක් ඇඟලුම් ක්‍ෂේත්‍රයට තදින් බලපෑම් එල්ල කරයි.

එම ප්‍රශ්න ආරම්භ වුණේ පසුගිය පෙබරවාරි මාසයේ දී චීනයෙන් මිළදී ගනු ලබන රෙදි තොග නොලැබීමත් සමඟය. චීනය රෙදිපිළි ආපනයනය කරන ප්‍රධාන රටයි. 2018 දී සිදුකරන ලද විගණනය අනුව, එය මුදලින් ඇමෙරිකානු ඩොලර් බිලියන 118 තරමේ වෙළෙඳ ගනුදෙනුවකි.

වැඩි ශ්‍රමිකයන් කාන්තාවන්

පෙබරවාරියෙන් අනතුරුව මෑත සතිවල චීනයේ රෙදිපිළි නිපදවන සමාගම් යළි විවෘත කරන ලද නමුත් වෙනත් පැත්තකින් ප්‍රශ්නය මතු විය. චීනයේ නිෂ්පාදනය ආරම්භ වීමත් සමඟ ඇඟලුම් අංශයෙහි නිෂ්පාදකයන් අතර අලුත් බලාපොරොත්තුවක් දල්වන ලද නමුත් කොරෝනාවෛරසයට ගොදුරු වූ ලෝකය පුරා රටවල් ‘ලොක්ඩවුන්’ වීමත් සමන් අතරමැදි ව්‍යාපාරිකයන්ට යළිත් ඔවුන්ගේ කම්හල්වල දොරටු වසා දැමීමට සිදුවිය.

චීනය ‘ලෝක කර්මාන්ත ශාලාව” ලෙස පිළිගැනීමට ලක්වෙනවා විය හැකිය. එහෙත් රෙදිපිළි කර්මාන්තය අතින් ගත්විට බංග්ලාදේශය-ඉන්දුනීසියාව-කාම්බෝජය- වියට්නාමය සහ මැලේසියාව යන වේගයෙන් වර්ධනය වෙමින් පවතින රටවල් විසින් භූමිකාවක් ඉටු කරනු ලබයි.

එහි අදහස ඇඟලුම් නිමැවුම් කර්මාන්තය අතින්, සංවර්ධනය වෙමින් පවතින ආර්ථිකයක් සහිත බොහෝ ආසියානු රටවල් විශාල සැපයුම් මගින් එම කර්මාන්තයේ ප්‍රධාන කාර්යභාරයක් ඉටු කරනු ලබන බවය.

බංග්ලාදේශය සහ වියට්නාමය ලෝකයේ රෙදිපිළි අපනයනය කරන ප්‍රධාන රටවල් හතර අතරට එක්ව සිටින බව ලෝක වෙළෙඳ සංවිධානයේ (WTO) සංඛ්‍යාලේඛන මගින් පෙන්වා දෙයි. වෙළෙඳපොළ සහභාගිත්වය අතින් බංග්ලාදේශය 6.7% ක නිෂ්පාදනයක් එක්කරනු ලබයි. ඊළඟ ස්ථානය හිමිවන්නේ 5.7% ක අපනයන ලෝක වෙළෙඳපොළට එක්කරනු ලබන වියට්නාමයට ය.

බංග්ලාදේශයේ ඇඟලුම් අංශයේ වෘත්තිකයන්ගේ සංඛ්‍යාව ලක්ෂ හතළිහකට වැඩි වේ. පසුගිය වසරේ ඔවුන්ගේ අපනයන ආර්ථිකයෙහි 90%කට අධික සැපයුම් ධාරිතාවක් වාර්තා කරන ලද්දේ ඇඟලුම් නිෂ්පාදන අංශයෙනි.

ඩෙලවෙයා සරසවියේ මෝස්‌තර සහ ඇඟලුම් පිළිබඳ අධ්‍යනාංශයේ, ෂෙන් ලු (Sheng Lu )පවසන පරිදි, කාම්බෝජයේ සහ ශ්‍රී ලංකාවේ ආර්ථිකයේත් 60%ට අධික අපනයන භාණ්ඩ වන්නේ ඇඟලුම් නිෂ්පාදනයන්ය.

මෙම කර්මාන්තයේ නිරතවූවන්ගෙන් විශේෂ වැදගත් කාර්යභාරයක් ඉටුකරනු ලබන්නේ කාන්තාවන් විසිනි.

සහකාර මහාචාර්ය ෂෙන් ලු පවසන ආකාරයට – කොරෝනා වෛරසය කාම්බෝජය, වියට්නාමය, බංග්ලාදේශය සහ ඉන්දියාව යන රටවල ඇඟලුම් අංශයේ රැකියා 4% පටන් 9% තෙක් වන අනුපාතයකින් කප්පාදු කිරීමට හේතු වී ඇත.

ශ්‍රී ලංකාවේ ද බොහෝ ඇඟලුම් කම්හල් වසා දමන ලද අතර, කොරෝනා වෛරසය පාලනය කිරීමේ පියවරක් වශයෙන් රටේ බොහෝ පළාත්වල ඇඳිරි නීතිය ප්‍රකාශයට පත්කරනු ලැබීමත් සමඟ ශ්‍රමික කාන්තාවන් ඔවුන්ගේ ගම්බිම් කරා පිටත්කර හරිනු ලැබිණි.

මෙම දුෂ්කර මොහොතේ සිය රටේ ආර්ථිකයේ තීරණාත්මක අංශය වන ඇඟලුම් කර්මාන්තය ආරක්ෂා කර ගැනීමට බංග්ලාදේශ් ආණ්ඩුව ඉදිරිපත්ව සිටී.

බංග්ලාදේශ් ආණ්ඩුවේ අනුග්‍රාහක දිරිගැන්වීමේ පැකේජයට සහන වැටුපක්, ශ්‍රමිකයන්ගේ කෙටිකාලීන ණය දිගුකාලීන ණය බවට පරිවර්තනය කරනු ලැබීම සහ සාධාරණ පොලියක් අය කරනු ලැබීම යන කරුණු ඇතුළත් වේ.

‘ස්පැරෝ ඇපරල් බංග්ලාදේශ්’ ඇඟලුම් ව්‍යාපාරයේ කළමනාකාර අධ්‍යක්ෂ ෂෝන් ඉස්ලාම් අදහස් දක්වමින් ”මුහුණ දී ඇති කුණාටුවට එය ප්‍රමාණවත් නොවන නමුත් එමගින් එක්තරා සහනයක් ලැබෙන” බව සඳහන් කළේය.

ශ්‍රමිකයන්ට සහන වැටුප් සැලැස්මක් යෝජනා කරන කාම්බෝජ ආණ්ඩුව, ඇඟලුම් කර්මාන්තකරුවන්ට බදු විරාමයක් (tax holidays) ප්‍රකාශයට පත්කරනු ලැබ ඇත.

සූරාගත් ශ්‍රමයට දැන් ගෙවන්න

කොරෝනා වෛරසයේ ප්‍රතිවිපාකයක් වශයෙන් ශ්‍රම හිඟය,අමුද්‍රව්‍ය සඳහා ඇති මිල ඉහළයාම සහ නිෂ්පාදන ධාරිතාව ප්‍රමාණවත් නොවීම වැනි ගැටලු රාශියකට ඉදිරිකාලයෙහි මුහුණ දෙන්නට සිදුවනු ඇතැයි සහකාර මහාචාර්ය ලූ පුරෝකථනය කරයි.

එල්ල වෙමින් පැවති දැඩි විවේචන සහ බලපෑම හමුවේ, ‘H&M’ සහ ‘Zara’ මෝස්‌තර ව්‍යාපාරයට අයත් ‘Inditex’ සමාගම ඔවුන් විසින් ඇණවුම් කරනු ලැබ තිබූ නිෂ්පාදන වෙනුවෙන් ඇඟලුම් කම්හල්වලට කලින් ගිවිසගත් ගෙවීම කිරීමට එකඟව සිටිති.

”කිසිදු සමාජමය සුරක්ෂිතභාවයක් සහතික කරනු ලැබීමකින් තොරව,වෙළෙඳ සමාගම් අවුරුදු ගණනාවක් දුප්පත් රටවල ශ්‍රමිකයන්ගෙන් අඩු මිලට වැඩ ගනිමින් විශාල ලාභ ලැබුවා. එම මෝස්‌තර ව්‍යාපාරය මගින් විශාල වෙළෙඳ අධිරාජ්‍ය ගොඩ නැගුණා” කම්කරු අයිතිය වෙනුවෙන් පෙනී සිටින ‘Labour Behind the Label’ සංවිධානයේ ඩොමිනික් මුලර් පෙන්වා දෙයි.

”අවුරුදු ගණනාවක් සිදුකරන ලද ශ්‍රම සූරාකෑම වෙනුවෙන් එම කම්කරුවන්ගේ පැවැත්ම සඳහා දැන් ආපසු ගෙවීමක් සිදුකළ යුතුයි”

කම්හල් හිමියකු වන අමිත් මහ්තානි එම ප්‍රකාශය සමඟ එකඟ වේ.

එසේ නොකළොත් කර්මාන්තය සහමුලින්ම බිඳ වැටෙනු ඇතැයි ඔහු අනතුරු ඇඟවීමක් ද කළේය.

Text by BBC Sandesaya

කොරෝනාවෛරස් වසංගතය ගෝලීය වශයෙන් ව්‍යාප්තවෙමින් පවතින අතරවාරයේ වෙනත් කිසිදු රාජ්‍යයක සිදු නොවූ අයුරින්, දකුණු කොරියාවේ මහ මැතිවරණයක් පැවැත් වේ. ඡන්දදායකයා ඡන්ද මධ්‍යස්ථානයට පැමිණිය යුත්තේ මුඛ ආවරණ පැළඳගෙනය. මීටරයක දුරක් එකිනෙකා අතර පවත්වා ගත යුතුය.

ඡන්දය භාවිතා කිරීමට ප්‍රථම ඔවුන්ගේ ශරීර උෂ්ණත්වය මැන බැලෙනු ඇත. විෂබීජහරණය කෙරෙන දියරය භාවිතා කොට දෑත් පිරිසිදු කර ප්ලාස්ටික් අත්වැසුම් පැළඳිය යුතුය.

ඡන්ද පත්‍රිකාව ඡන්දදායකයා අතට පත් වන්නේ ඉන් අනතුරුවය. තම මනාපය පරිදි ඡන්දය භාවිතා කිරීම සඳහා ඡන්ද කුටියට යාමට ඉන් පසුව ඔවුනට අවසර ලැබේ.

ඒ, මහ මැතිවරණයට අදාලව දකුණු කොරියාව ගෙන ඇති සෞඛ්‍ය ආරක්ෂක පිළිවෙත්වලින් කිහිපයක් පමණි.

දකුණු කොරියාවේ ජාතික මන්ත්‍රණ සභාව නියෝජනය කෙරෙන ආසන 300 ක් සඳහා මෙම මැතිවරණය පැවැත්වේ. ලියාපදිංචි වී ඇති දේශපාලන පක්ෂ ප්‍රමාණය 35 කි.

නමුත් රටේ පාලනය සඳහා තරඟය පවතින්නේ වත්මන් පාලනය ගෙනයන මින්ජෝ (ප්‍රජාතන්ත්‍රවාදී) පක්ෂය සහ ප්‍රධාන විපක්ෂය වන එක්සත් අනාගත (කොන්සර්වේටිව්) පක්ෂය අතරය.

මෙම මහ මැතිවරණ සමය තුළ අන් සියලු දේ පරයා සාකච්ඡාවට භාජනය වුයේ වත්මන් රජය විසින් කොරෝනාවෛරස වසංගතය පාලනය කරනු ලබමින් සිටින ආකාරය පිළිබඳවය.

රටේ ආර්ථිකය පිළිබඳව තිබූ බිය සහ ජනාධිපතිවරයාගේ සමීප ආධාරකරුවන්ට එරෙහිව එල්ල වී තිබු දුෂණ චෝදනා එමගින් වැසී ගොස් තිබේ.

2022 දී පැවැත්වීමට නියමිත ජනාධිපතිවරණය පිළිබඳව සහ පාලක පක්ෂයේ ජනප්‍රියත්වය පිළිබඳව සිදු කෙරෙන යම් තක්සේරුවක් ලෙස මෙම මහ මැතිවරණය සැලකේ.

මෙවැනි අවස්ථාවක මැතිවරණයක් පැවැත්වීම අවුල් ජාලයක් බවට පත්විය හැකි යැයි ඇතැම් විවේචකයන් බිය පළ කර තිබුණි.

නමුත් ඡන්ද මධ්‍යස්ථාන ඉදිරිපිට ජනතාව තමන්ට සලකුණු කර ඇති ස්ථානවල ඉතා සංසුන්ව ඉවසීමෙන් පෙළ ගැසී සිටිනු දක්නට හැකි විය.

“මම හිතුවේ ඡන්දය කල් දැමිය යුතුව තිබුනා කියල, මිනිස්සු ඡන්දේ දාන්න එන එකක් නැහැ කියල. ඒ වුනාට මමත් ආව. තවත් ගොඩක් දෙනෙක් ඇවිල්ල. ප්‍රශ්නයක් නැහැ.” ඡන්දය භාවිතා කිරීමට පැමිණ සිටි තරුණියක් පැවසුවාය.

ආසාදනයක් පිළිබඳව පවතින බිය විසින් ජනතාවට බලපෑමක් සිදු කරනු ලැබ නැති බවක් පෙනෙන්නට තිබේ.

මිලියන 11කට අධික පිරිසක් කල් තියා සිය ඡන්දය භාවිතා කර තිබේ. එය ලියාපදිංචි මුළු ඡන්ද සංඛ්‍යාවෙන් 26%ක ප්‍රතිශතයකි.

ඇතැමුන් තැපැල් මගින් සිය ඡන්දය භාවිතා කර තිබුණි. නමුත් වැඩි පිරිසක් ඒ සඳහා පසුගිය සිකුරාදා සහ සෙනසුරාදා විවෘත කර තිබුණු ඡන්ද මධ්‍යස්ථාන වෙත ගොස් තිබුණි.

මෙවර කල්තියා භාවිතා කර තිබු ඡන්ද ප්‍රමාණය වාර්තාගත ඡන්ද ප්‍රතිශතයකි. එමෙන්ම වයස අවුරුදු 18ක් වූ පිරිසට ඡන්ද බලය ලැබුණු ප්‍රථම අවස්ථාවද මෙයයි.

එම වයසේ පසුවන ඡන්දදායකයන් කිහිප දෙනෙකුම සෝල් නුවර ඡන්ද මධ්‍යස්ථානයක් ඉදිරිපිට සිටිනු දක්නට ලැබුණි. සිය පළමු ඡන්දය භාවිතා කිරීමට ඔවුහු දැඩි උනන්දුවකින් පසුවුහ. ඒ සඳහා කොරෝනාවෛරස් වසංගතය ඔවුනට බාධාවක් වී නොතිබිණි.

“මේක අපේ ඡන්ද අයිතිය” ඡන්ද පෝලිමේ සිටි අයෙක් පැවසීය.

“ඡන්දය දැමීම අප කළ යුතු ම දෙයක්.” සිය පළමු ඡන්දය භාවිතා කිරීම සඳහා පෝලිමේ සිටි යෞවනියක් පැවසුවාය. තමන් පැළඳ සිටින ප්ලාස්ටික් අත්වැස්ම එතරම් සුවපහසු නොවුවත් ඉන් තමන්ට ආරක්‍ෂිත බවක් දැනෙන්නේ යැයි ඇය ප්‍රකාශ කළාය.

දකුණු කොරියාව ඉතිහාසයේ කවර දා හෝ මැතිවරණයක් කල් දමා නොමැත. 1952 දී කොරියානු යුද්ධය පවතිද්දී පවා ජනාධිපතිවරණය පැවැත්විණි.

බලධාරීන්ට පැවතියේ වෛරස් ආසාදනයක් ඇතිවීමේ අවදානම වලක්වා ගන්නේ කෙසේද යන අභියෝගය පමණි.

ශරීර උෂ්ණත්වය සෙල්සියස් අංශක 37.5 කට වඩා ඉහළ අගයක පවතින අයෙකු වීනම් ඔහු අන් අයගෙන් වෙන්කොට විශේෂිත ඡන්ද කුටියකට රැගෙන යාමට බලධාරීහු තීරණය කළහ.

නව කොරෝනාවෛරසය ආසාදනය වී ප්‍රතිකාර ලබමින් සිටින රෝගීන්ට තම ඡන්දය තැපැල් මගින් ප්‍රකාශ කිරීමට අවස්ථාව ලබා දී තිබේ.

එමෙන්ම සාමාන්‍ය රෝග ලක්ෂණ පෙන්නුම් කර ඇති ඡන්දදායකයන් සඳහා නිවාස බහුල පෙදෙස්වල විශේෂ ඡන්ද මධ්‍යස්ථාන ස්ථාපනය කර තිබුණි.

මුහුණු ආවරණයක් පැළඳ, රෝහල් වස්ත්‍රයකින් සැරසී සිටි එක්තරා කාන්තාවක් සිය ඡන්ද පත්‍රිකාව නිලධාරීන්ට භාර දී යන ආකාරය දක්නට ලැබුණි. එම නිලධාරීන් සිටියේ සම්පූර්ණයෙන් සිරුර ආවරණය වන සේ ආරක්‍ෂිත ඇඟලුම් ලාගෙනය.

මෙවැනි මධ්‍යස්ථාන පිහිටුවා ඇත්තේ වෛරසය පැතිරයාම වලක්වා ගැනීම සඳහාය.

“මුලින් මම හිතුවේ මෙවර මට ඡන්දේ දාන්න බැරිවෙයි කියල. මටත් ඒ සඳහා අවස්වථාක් තියෙනවා කියල පස්සේ දැන ගත්ත. ඒ අවස්වථාව සලසා දීම ගැන මම ස්තුතිවන්ත වෙනවා.” ඉහත කී කාන්තාව රොයිටර් පුවත් සේවයට පැවසුවාය.

ඡන්ද මධ්‍යස්ථාන තැනීමට සහ මැතිවරණය මනාව පවත්වාගෙන යාම සඳහා එරට හමුදා භටයන් 550,000 ක් යොදාගෙන තිබේ.

හමුදාව යොදවා ඡන්ද මධ්‍යස්ථාන 14,000 ක් විෂබීජහරණයට ලක් කර ඇත.

මෙම කාර්යයන් සපුරා ගැනීම සඳහා වැඩි කාලයක් ගත වුවද, කෙටි කාලයක් පමා කොට හෝ ප්‍රජාතන්ත්‍රවාදය වෙනුවෙන් මහ මැතිවරණය පැවැත්වීම පිළිබඳව ජනතාව සතුටු වන බවක් පෙනෙන්නට තිබේ.

පෙබරවාරි සහ මාර්තු මාසය තුළ මහාපරිමාණයෙන් පුද්ගල පරීක්ෂාවන් දියත් කරමින් කොරෝනාවෛරසය පැතිරීම පාලනය කර ගැනීමට දකුණු කොරියානු සෞඛ්‍ය බලධාරීන්ට හැකි විය.

කොරෝනාවෛරස් ආසාදිතයන් දකුණු කොරියාවෙන් වාර්තා වූ ඉහළම අගය පෙන්නුම් කළේ පෙබරවාරි මාසයේ දීය. එය දිනකට 900ක් පමණ විය.

මේ වනවිට දිනකට වාර්තා වන නව රෝගීන්ගේ ගණන 50කට වඩා අඩු අගයක පවතී. 7,000කට වැඩි පිරිසක් මේ වන විට සුවය ලබා ඇත.

එමගින් ජනාධිපතිවරයාගේ පක්ෂයට නව ජවයක් ලැබුණි. ඔහුගේ විරුද්ධවාදීහු රටේ සෞඛ්‍ය සේවකයන්ට ගෞරවය පුද කරති.

මෙවැනි අවස්ථාවක මැතිවරණයක් පැවැත්වීමෙන් දෙවැනි වතාවට කොරෝනාවෛරසය පැතිරීම ආරම්භ විය හැකි බවට ද බියක් පවතී.

නමුත් වසංගත තත්ත්වයක් හමුවේ කළ හැක්කේ කුමක්දැයි ඔප්පු කිරීමට දකුණු කොරියාව දැනට අධිෂ්ඨානශීලීව සිටී.

මෙම සම්පූර්ණ ලිපියම බී.බී.සි සන්දේශය වෙතින් උපුටා ගන්නා ලදි – ප්‍රධාන සංස්කාරක

“COVID – 19 සෞඛ්‍ය හා සමාජ ආරක්ෂණ අරමුදල” මෙහෙයවීම සඳහා වන කළමනාකරණ කමිටුව අද (15) පෙරවරුවේ ජනාධිපති කාර්යාලයේ දී රැස් විය. මහ බැංකුවේ අධිපති මහාචාර්ය ඩබ්. ලක්ෂ්මන් මහතා අරමුදලේ සභාපතිත්වය දරයි.

ජනාධිපති කාර්යාලයේ ප්‍රධාන මූල්‍ය නිලධාරි රවින්ද්‍ර ජේ. විමලවීර මහතා අරමුදලේ ලේකම් ධූරය හොබවන අතර අමාත්‍යාංශ ලේකම්වරු, ආයතන ප්‍රධානීන් ඇතුළු 16 දෙනෙකුගෙන් කමිටුව සමන්විතය. (අදාළ නාම ලේඛනය අමුණා ඇත)

අරමුදලට විවිධ පාර්ශ්වයන්ගෙන් ආධාර මුදල් ලැබෙමින් පවතී. එය පිහිටුවීමෙන් ජනාධිපතිතුමා අපේක්ෂා කළ අරමුණු ඉටුකර ගැනීම සදහා ගතයුතු ඉදිරි ක්‍රියාමාර්ග සම්බන්ධයෙන් කමිටුවේ සාකච්ඡාවට ලක් කෙරිණ.

කොරෝනා මර්දනය සදහා අවශ්‍ය ඖෂධ, වෛද්‍ය පර්යේෂණ උපකරණ හා ධාරිතා වර්ධනය ඇතුළු සෞඛ්‍ය ආරක්ෂණ පහසුකම් සඳහා මූල්‍ය අවශ්‍යතා සැලසීම, සෞඛ්‍ය ක්ෂේත්‍රයේ සහ අත්‍යාවශ්‍යය මහජන සේවා සපයන්නන්ගේ සෞඛ්‍ය ආරක්ෂාව සහ සුරක්ෂිතභාවය මෙන්ම ළමයින්, කාන්තාවන් අඩු ආදායම්ලාභීන් වැඩිහිටියන් ආබාධිතයන් හා අවදානමට ලක් විය හැකි පුද්ගලයන් වෙනුවෙන් මූලික අවශ්‍යතා සැපයීම අරමුදලේ අරමුණු අතර වේ.  WHO, UNICEF, UNDP,WB,ADB සහ ශ්‍රී ලංකාවේ ප්‍රධාන සංවර්ධන හවුල්කාර ප්‍රජාව හා නියෝජිත ආයතන සමග අරමුදල් රැස් කිරීම සම්බන්ධීකරණය ද අරමුදලෙන් අපේක්ෂා කෙරේ.

ආයතනිකව හා පෞද්ගලිකව ලැබෙන  පරිත්‍යාග සහ ඝෘජු තැන්පතු සමඟ  COVID 19 සෞඛ්‍ය හා සමාජ ආරක්ෂණ අරමුදලේ ශේෂය අද වන විට රුපියල් මිලියන 655කට ආසන්න වී තිබේ. රක්නා ආරක්ෂක ලංකා ආයතනය පරිත්‍යාග කළ රුපියල් මිලියන 03 ක් සහ “අපි වෙනුවෙන් අපි” අරමුදලෙහි දකුණු කොරියානු ශාඛාව පිරිනැමු රුපියල් ලක්ෂ 04ක මුදල ආරක්ෂක ලේකම් විශ්‍රාමික මේජර් ජනරාල් කමල් ගුණරත්න මහතා විසින් ජනාධිපති ගෝඨාභය රාජපක්ෂ මැතිතුමා වෙත භාරදෙනු ලැබිණ.

NDB බැංකුව රුපියල් මිලියන 07ක්, ලංකා හෝස්පිටල් කෝපරේෂන් හය මිලියන 6.7ක්, කොමර්ෂල් බැංකුව රුපියල් මිලියන 10ක්, කලම්බු ඩොක්යාඩ් පීඑල්සී ආයතනය සහ ඩී.ජේ.ඒ. සමරසිංහ මහතා රුපියල් මිලියන 05 බැගින් ද, නාගරික සංවර්ධන අධිකාරිය මිලියන් 2.5ක්,  ශ්‍රී ලංකා වරලත් පිරිස් කළමනාකරණ ආයතනය, ශ්‍රී ලංකා උසස් තාක්ෂණ අධ්‍යාපන ආයතනය සහ සමන් ඉන්ඩස්ට්‍රිස් ඇන්ඩ් සප්ලයරස් පෞද්ගලික සමාගම රුපියල් මිලියනය බැගින් ද,  ශ්‍රී ලංකා වෘත්තීය පුහුණු අධිකාරිය මිලියන 02 ක් ද අරමුදලට ප්‍රදානය කර තිබේ.

BASF ලංකා පෞද්ගලික සමාගම ලක්ෂ 05ක්, නුගේගොඩ ඩබ්. මංජුල බොතේජු මහතා රුපියල් ලක්ෂයකින් සහ රන්ජන් ද සිල්වා මහතා රුපියල් ලක්ෂ 02 ක් සහ ශ්‍රී ලංකා පොලිස් යුද ආබාධිත රණවිරු සංගමය රුපියල් 60,000ක් ද අරමුදලට පරිත්‍යාග කර ඇත.

ලංකා බැංකුවේ ආයතන ශාඛාවේ  අංක 85737373 දරණ  විශේෂ ගිණුමට  පරිත්‍යාග බැර කෙරේ. දෙස් විදෙස් පරිත්‍යාගශිලීහූ ගිණුමට දායක වී සිටිති. නීත්‍යානුකූල ගිණුම් මගින් අරමුදලට කෙරෙන පරිත්‍යාග මුදල් බදු සහ විදේශ විනිමය රෙගුලාසිවලින් නිදහස් කර ඇත. චෙක්පත් හෝ ටෙලි ග්‍රාෆ් සම්ප්‍රේෂණ මගින් මුදල් තැන්පත් කිරීමට පිළිවන. දුරකථන අංක 011 – 2354479 / 011 – 2354354 ඔස්සේ අධ්‍යක්ෂ ජනරාල් (පරිපාලන) කේ.බී. එගොඩවෙලේ මහතා අමතා වැඩි විස්තර දැන ගැනීමට  හැක.

දේශීය ආර්ථිකය ආරක්ෂා වන අයුරින් දෛනික ආර්ථික ක්‍රියාකාරකම් කඩිනමින් ඇරඹීමේ හැකියාව සොයා බැලීමේ අරමුණින් පළාත් මට්ටමෙන් තොරතුරු සොයා බැලීමේ විශේෂ හමුවක් ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් අද (15) දහවල් ජනාධිපති කාර්යාලයේ දී පැවැත්විණි.

දිවයිනේ සියලු පළාත් වෛද්‍ය අධ්‍යක්ෂවරු ඇතුළු සෞඛ්‍ය ක්ෂේත්‍රයේ බලධාරීහු සිය පළාත්වල වත්මන් තත්ත්වය පිළිබඳව මෙහිදී ජනාධිපතිතුමා දැනුවත් කළහ.

පවතින වාතාවරණය සැලකිල්ලට ගනිමින් කර්මාන්ත ආයතන, කෘෂිකර්ම සහ ව්‍යාපාර කටයුතු පෙර පරිදි පවත්වාගෙන යාමට අවශ්‍ය නිර්දේශ  සෞඛ්‍ය අධ්‍යක්ෂ ජනරාල්වරයා මගින් කඩිනමින් ඉදිරිපත් කරන ලෙස  ජනාධිපතිතුමා පළාත් සෞඛ්‍ය අධ්‍යක්ෂවරුන්ට දැනුම් දුන්නේය.

පළාත් මට්ටමින් ලැබෙන සෞඛ්‍ය නිර්දේශ සැලකිල්ලට ගෙන වත්මන් සීමාවන් ලිහිල් කිරීම තීරණය කරනු ලැබේ.

දෛනිකව වේතන ලාභීන්ගේ ජීවනෝපාය කෙරෙහි විශේෂ අවධානය යොමු කිරීම ද ප්‍රධාන අරමුණකි.

ඒ ඒ පළාත්වල කොරෝනා වෛරසය ආසාධිතයන්, ඔවුන් ළගින් ඇසුරු කර ඇති පිරිස් සහ දැනට ක්‍රියාත්මක නිරෝධායන ක්‍රියාවලිය දීර්ඝ වශයෙන් විමර්ශනය කෙරිණ. දෛනිකව සිදු කෙරෙන රෝගීන් හඳුනාගැනීමේ පරීක්ෂණ සම්බන්ධයෙන් ද සාකච්ඡාවට ලක් විය.

නිරෝධායන මධ්‍යස්ථානවල වත්මන් තත්ත්වය සහ කළ යුතු වෙනස්කම් ද ජනාධිපතිතුමාගේ විමසුමට ලක් විය.

ලොව සෙසු රටවල් හා සැසඳීමේ දී කොරෝනා වෛරසය මර්දනයට රජය ගත් ක්‍රියාමාර්ග ඉතා ඵලදායී බව පළාත් සෞඛ්‍ය බලධාරිහූ සඳහන් කළහ.

සෞඛ්‍ය ක්ෂේත්‍රයේ උන්නතිය උදෙසා ගත යුතු ක්‍රියාමාර්ග සහ පවතින තත්ත්වය සමාලෝචනයට ද මෙය අවස්ථාවක් කරගත බව ජනාධිපතිතුමා සදහන් කළේය.

ඇමතිණි පවිත්‍රා වන්නිආරච්චි, ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග, ආරක්ෂක ලේකම් විශ්‍රාමික මේජර් ජනරාල් කමල් ගුණරත්න, සෞඛ්‍ය ලේකම් භද්‍රානී ජයවර්ධන, ආරක්ෂක මාණ්ඩලික ප්‍රධානී සහ යුද හමුදාපති ලුතිනන් ජනරල් ශවේන්ද්‍ර සිල්වා, නාවික හමුදාපති අද්මිරාල් පියල් ද සිල්වා, ගුවන් හමුදාපති එයාර් මාර්ෂල් සුමංගල ඩයස්, වැඩබලන පොලිස්පති සී.ඩී. වික්‍රමරත්න, සෞඛ්‍ය අධ්‍යක්ෂ ජනරාල් වෛද්‍ය අනිල් ජාසිංහ යන මහත්ම මහත්මීහු ඇතුළු පිරිසක් සාකච්ඡාවට එක්ව සිටියහ.

කොවිඩ් 19 වෛයිරසය ලොව පුරා පැතිරයාමත් සමග විදේශ රැකියාවල නිරත වී සිටින විගමණික ශ්‍රමිකයින් සම්බන්ධව වහාම මැදිහත්වි කටයුතු කිරිමට  විදේශ සේවා නියුක්ති කාර්යාංශය පියවර ගෙන තිබේ.

ඒ අනුව  විදේශ දූත මණ්ඩල  16 ක කම්කරු සුභසාධන අංශ හා ඍජුව සම්බන්ධ වී අවශ්‍ය ක්‍රියාමාර්ග ගැනීමට කාර්යාංශයේ සභාපති කමල් රත්වත්තේ මහතා විසින් අදාල නිලධාරින්ට උපදෙස් ලබා දී තිබේ. ඒ අනුව විදේශ දූත මණ්ඩල  16 ක කම්කරු  සුභසාධන අංශ වෙත දැනටමත් කාර්යාංශයේ කම්කරු සුබසාධන අරමුදල මගින් (Workers Welfare Fund) වෙන්කොට ඇති ප්‍රතිපාදන භාවිතාකර වසංගතයෙන් පීඩාවට පත් විගමණික ශ්‍රමිකයින්ට අවශ්‍ය පහසුකම් කඩිනමින් ලබා දී තිබේ.

එම විදේශ දූත මණ්ඩල  16 ක පිහිටි කම්කරු  සුභසාධන අංශ අතර අබුඩාබි, බහරේන්, සයිප්‍රස්, ඩුබායි, ඊශ්‍රායෙල්, ජෝර්ඩාන්, කුවේට්, ලෙබනන් අයත්වේ. එසේම මැලේසියා, ඕමාන්, මාලදිවයින, කටාර්, රියාද්, දකුණු කොරියාව හා සිංගප්පූරුවද ඊට අයත්වේ.

මෙයට අමතරව කම්කරු සුබසාධන අරමුදල තවත් ශක්තිමත් කිරිම සදහා, විදේශ සබදතා,නිපුණතා සංවර්ධන,රැකීරක්ෂා හා කම්කරු අමාත්‍ය දිනේෂ් ගුණවර්ධන මහතා විසින්  ගත් තීරණයකට අනුව කාර්යාංශයේ සභාපති කමල් රත්වත්තේ මහතා හා  කාර්යාංශයේ අධ්‍යක්ෂ මණ්ඩලයට උපදෙස් ලබාදී ඇත්තේ  තවත් රුපියල් මිලියන අටක (මිලියන 8) ප්‍රතිපාදන අදාල විදේශ දූත මණ්ඩල 16 ක කම්කරු සුභසාධන අංශ වෙත වහාම ලබාදෙන ලෙසය. එමගින් මෙම වසංගත තත්ත්වය මත විගමණික ශ්‍රමිකයින්ගේ දැනට පවතින නීතිමය තත්ත්වය නොසලකා සහන ලබාදීමට කටයුතු කරන ලදී.

විදේශ සේවා නියුක්ති කාර්යාංශයේ පැය 24/7 පුරා ක්‍රියාත්මක 1989 ක්ෂණික දුරකථන අංකය ඔස්සේ විගමණික ශ්‍රමිකයින් සම්බන්ධව තොරතුරු ලබාගැනිමට පහසුකම් සලසා ඇති අතර එමගින් ලබාගත් තොරතුරු අදාල ශ්‍රමිකයින් සිටින රටවල තානාපති කාර්යාලවල කම්කරු සුභසාධන අංශ වෙත යොමු කොට විසදුම් ලබාදෙමින් තිබේ. වසංගතයෙන් පීඩාවට පත් විගමණික ශ්‍රමිකයින්ට අවශ්‍ය වියලි ආහාර ලබාදීම සඳහා කම්කරු අංශ නිලධාරින්, විදේශ දූත මණ්ඩල නිලධාරින්,විවිධ සංවිධාන හා පරිත්‍යාගශීලීන් එක්ව කටයුතු කිරිම මේ වනවිටත් ආරම්භ කර තිබේ.

වසංගත තත්ත්වයෙන් පීඩාවට පත්වී සිටින විගමණික ශ්‍රමිකයින්ට සහන සැලසිම සදහා පහත ක්‍රියාමාර්ග ද ගෙන තිබේ.

කොවිඩ් 19 වෛයිරසයෙන් විගමණික ශ්‍රමිකයින් ආරක්ෂා කිරිම සඳහා මුඛ ආවරණ, අත් සේදුම්කාරක ඇතුළු පිරිසිදු කිරිමේ ද්‍රව්‍ය ලබාදීමට විදේශ දූත මණ්ඩල  16 ක කම්කරු අංශ මගින් කටයුතු කර තිබේ.

ශ්‍රි ලංකාවේ විශේෂඥ වෛද්‍යවරයකු සමග පැවැත්වු සම්මුඛ සාකච්ඡා මාලාවක් විදේශ සේවා නියුක්ති කාර්යාංශයේ මුහුණුපොත ( Face book ) හරහා ප්‍රචාරය කිරිම මගින් විගමණික ශ්‍රමිකයිට වෛයිරසයෙන් ආරක්ෂා විමට ගත හැකි උපදෙස් ලබාදී ඇත.

විදේශ දූත මණ්ඩලවල පිහිටි කම්කරු අංශයන්හි ක්ෂණික  ඇමතුම් අංක හදුන්වාදීම මගින් විගමණික ශ්‍රමිකයින්ට වෛයිරසයෙන් ආරක්ෂා විමට අවශ්‍ය උපදෙස් ලබාදෙන ලදී.

සියලුම කම්කරු අංශ නිලධාරින් හා විදේශ සේවා නියුක්ති කාර්යාංශයේ උසස් නිලධාරින් සම්බන්ධවන පැය 24 පුරා ක්‍රියාත්මක වට්ස්ඇප් සමුහ කණ්ඩායමක් (whatsApp Group ) ආරම්භකර එමගින් තොරතුරු ලබාගැනීම, පැමිණිලි ලබාගැනිම හා සන්නිවේදනය කිරිම සාර්ථකව සිදුකිරිම නිසා ශ්‍රමිකයින්ගේ ගැටළු රැසකට ක්ෂණිකව විසඳුම් ලබාදී ඇත.

ෂීසෙල් හී අතරමංවී සිටි විගමණික ශ්‍රමිකයකු සඳහා අඛණ්ඩව අවශ්‍ය මූල්‍ය පහසුකම් තානාපති කාර්යාලය හරහා දීමට කටයුතු කරන ලදී.

ජපන් නෞකාවකින් ඉන්දියාවේ චෙන්නායි හරහා පැමිණි ශ්‍රමිකයකුට ගුවන් ටිකට්පත ලබාදී ඇත.

විගමණික ශ්‍රමිකයින්ට ලබාදිම සදහා මුඛ ආවරණ 5000 ක් කොරියානු තානාපති කාර්යාලයට ලබාදි ඇත

දැනට ප්‍රතිලාභ ලබන සහ පොරොත්තු ලේඛණවල සිටි වැඩිහිටි, වකුගඩු රෝගී සහ ආබාධ සහිත පුද්ගලයින් සදහා රුපියල් 5,000 දීමනාව රජය විසින් ගෙවා අවසන් කර ඇත.

එයට අමතරව මෙතෙක් එකී දීමනාවන් නොලද හෝ පොරොත්තු ලේඛණවල නොසිටි එහෙත් ග්‍රාමීය කමිටු මගින් අනුමත කරන ලද වැඩිහිටි, ආබාධ සහිත සහ වකුගඩු රෝගී පුද්ගලයින් සදහා ද මෙම රුපියල් 5,000 දීමනාව ගෙවීමට රජය කටයුතු කරමින් සිටියි.

දැනට දීමනාව ලබමින් සිටින සහ පොරොත්තු ලේඛණවලට ඇතුළත්ව සිටි  වැඩිහිටියන් 574,387 කට අමතරව තවත් ග්‍රාමීය කමිටු විසින් අනුමත කරන ලද 61,615 දෙනෙකුට රුපියල් 5,000 හි වැඩිහිටි දීමනාව රජය විසින් ගෙවීමට කටයුතු කෙරේ.

එලෙසම දැනට දීමනාව ලබන සහ පොරොත්තු ලේඛණවල සිටි ආබාධිත පුද්ගලයින් 109,494 කට අමතරව තවත් 14,195 දෙනෙකුට රුපියල්, 5,000 ක දීමනාව රජය විසින් ගෙවීමට තීරණය කර ඇත.

තවදුරටත් දැනට දීමනා ලබමින් සිටි සහ පොරොත්තු ලේඛණවල සිටි වකුගඩු රෝගීන් 38,747 ට අමතරව තවත් 5,884 දෙනෙකුට රජය විසින් රුපියල් 5,000 හි වකුගඩු දීමනාව ගෙවීමට ද තීරණය කර ඇත.

මෙලෙස අමතරව ගෙවන සියලු දීමනා අද දිනයේ දී (2020.04.15)  ග්‍රාම නිලධාරීන් මගින් අදාල  ප්‍රතිලාභීන්ගේ නිවසටම ගොස් ගෙවීම් සිදු කිරිමට සියළු කටයුතු සංවිධානය කර ඇති බව අත්‍යාවශ්‍ය සේවාවන් පවත්වාගෙන යාමේ ජනාධිපති කාර්යසාධන බලකාය විසින් නිවේදනය කරයි.

මේ පිලිබදව කරුණු සොයා බැලීමේ විශේෂ සාකච්චාවක් අද දින කාන්තා  ළමා කටයුතු හා සමාජ ආරක්ෂණ අමාත්‍යශයේදී පැවැත්විණි.

මෙම අවස්ථාවට කාන්තා හා ළමා කටයුතු සහ සමාජ ආරක්ෂණ අමාත්‍යාංශයේ ලේකම් ඒ.එස්.එම්.එස්.මහානාම,සමෘද්ධි සංවර්ධන දෙපාර්තමේන්තුවේ අධ්‍යක්ෂ ජනරාල් බන්දුල තිලකසිරි , අමාත්‍යතුමීයගේ පෞද්ගලික ලේකම්කංචන ජයරත්න යන මහත්ම මහත්මීන් ඇතුලු නිලධාරීන් පිරිසක් සහභාගි වූහ.

වෛරස ව්‍යාප්තිය සලකන විට ඉහළ අවදානමක් සහිත කලාප ලෙස හඳුනාගෙන ඇති කොළඹ, ගම්පහ, කළුතර, පුත්තලම, මහනුවර සහ යාපනය දිස්ත්‍රික්කවල දැන් ක්‍රියාත්මක ඇඳිරි නීතිය නැවත දන්වනතුරු දිගටම බලාත්මකව පවතී.

සෙසු සියළු දිස්ත්‍රික්කවල පනවා ඇති ඇඳිරි නීතිය හෙට, අප්‍රේල් 16 බ්‍රහස්පතින්දා  උදේ 6.00 ට ඉවත් කර සවස 4.00ට යළි පනවනු ඇත. එම දිස්ත්‍රික්කවලට සවස 4.00 ට යළි පැනවෙන ඇඳිරී නීතිය අප්‍රේල් 20 වන සඳුදා පෙ.ව 6.00 තෙක් බලපැවැත්වේ.

20 වනදා උදේ 6.00න් පසු ඇඳිරි නීතිය ක්‍රියාත්මකවීම පිළිබඳව පසුව දැනුම් දෙනු ලැබේ.

කොරෝනා වෛරසය ව්‍යාප්තිය නතර කරනු පිණිස ඇඳිරි නීතිය පැනවීම ඇතුළු  ක්‍රියාමාර්ග ගෙන ඇත්තේ හුදෙක් ජනතාවගේ යහපත වෙනුවෙනි. එබැවින් ඇඳිරි නීතිය පැනවීම නිසා ඇතිවන දුෂ්කරතා අවබෝධයෙන් සහ වගකීමෙන් යුතුව ඉවසා සිටින්නැයි රජය ජනතාවගෙන් ඉල්ලා සිටී.

භාණ්ඩ මිලදී ගැනීම් ඉතාමත් අත්‍යාවශ්‍ය ද්‍රව්‍යයන්ට පමණක් සීමා කරන ලෙසත්, අනවශ්‍ය ගමන් බිමන් වලින් වළකින ලෙසත් අවධාරණය කෙරේ.

ඇඳිරි නීතිය බලපැවැත්වෙන කාලය තුළ ජනතාවට අත්‍යාවශ්‍ය ආහාර ද්‍රව්‍ය සහ වෙනත් භාණ්ඩ නිවසේ සිටම මිලදී ගත හැකි වන පරිදි අඛණ්ඩව සැපයීමට රජය සියලු විධිවිධාන සලසා ඇත.

කවර දිස්ත්‍රික්කයක වුවද ගොවිතැන් වැඩ කරන සහ කුඩා තේවතු හා අපනයන භෝග නිෂ්පාදන ක්‍රියාවලියේ සහ ධීවර කර්මාන්තයේ නිරත ජනතාවට එකී වැඩ කිරීමට අවසර හිමි වේ.

අත්‍යාවශ්‍ය සේවා හැර වෙනත් කාර්යයන් සඳහා දිස්ත්‍රික්ක අතර ගමනාගමනය සම්පූර්ණයෙන්ම තහනම් කර තිබේ.

අත්‍යාවශ්‍ය සේවා කර්යක්ෂමව පවත්වාගෙන යනු පිණිස යොදා ඇති ක්‍රමවේද අවභාවිත කරන අයට එරෙහිව නීතිය තදින්ම ක්‍රියාත්මක කරනු ලැබේ.

කවර හෝ දිස්ත්‍රික්කයක හුදකලා ප්‍රදේශ ලෙස නම් කර ඇති ගම්මාන හුදකලා ප්‍රදේශ ලෙස තවදුරටත් සලකනු ලැබේ.  කවරකුට හෝ මේ ගම්මානවලට ඇතුළුවීම හෝ ඉන් පිටවීම හෝ නැවත දැනුම් දෙන තුරු සම්පූර්ණයෙන් තහනම් වේ.

Deep Knowledge Group නම් පර්යේෂණ ආයතනය විසින් පසුගිය අප්‍රේල් මස 12 වැනි දින නිකුත් කළ ‘කොවිඩ්-19 ගෝලීය අවධානම් දර්ශකය‘ අනුව කොවිඩ් 19 වෛරසයේ අවධානමට ලක්ව ඇති ලොව ප්‍රධාන රටවල් 20 අතර 16 වැනි ස්ථානයට ශ්‍රී ලංකාව පත්ව තිබෙනවා.

එහි පළමු ස්ථානය ඉතාලියත්, දෙවන ස්ථානය ඇමෙරිකා එක්සත් ජනපදයත්, තෙවන ස්ථානය මහා බ්‍රිතාන්‍යයත් නියෝජනය කරන අතර ඉන්දියාව 15 වැනි ස්ථානයේද ශ්‍රී ලංකාව 16 වැනි ස්ථානයේද, ඉන්දුනීසියාව 17 වැනි ස්ථානයේ ද සිටිනවා.

පරීක්ෂණ කටයුතු ප්‍රමාණවත් පරිදි පුළුල්ව සිදු නොකිරීම නිසා රට තුළ සිටින සැබෑ රෝගීන් පිළිබද තත්ත්වය තවමත් රට ඉදිරියේ අපැහැදිලියි

කොවිඩ් -19 වෛරසය ශ‍්‍රී ලංකාව තුළ ව්‍යාප්ත වීම පාලනය කර ගැනීම අරමුණු කර ගනිමින් රජයේ වෛද්‍ය නිලධාරීන්ගේ සංගමය විසින් අද (15) දින සිය සංගමයේ නවතම තත්ත්වය වාර්තාව ඉදිරිපත් කළා.

කොවිඩ්-19 ගෝලීය වසංගතය ශ‍්‍රී ලංකාව ව්‍යාප්ත වීම පාලනය කිරීම අරමුණු කර ගනිමින් රට තුළ පරීක්ෂණ පහසුකම් වැඩි දියුණු කිරීම – යන ශීර්ෂය යටතේ නිකුත් කර ඇති එම වාර්තාව සම්පූර්ණයෙන් පහත පළ වෙනවා.

ලොව වටා කෙටියෙන්

• 1930 ගණන්වල මහා අවපාතයෙන් පසු දැඩි පසුබෑමක් පුරෝකථනය කරමින් ගෝලීය ආර්ථිකය මේ වසරේදී සියයට 3 කින් හැකිලෙනු ඇතැයි අපේක්ෂා කරන බව ජාමූඅ පවසයි
• රට තුළ වාර්තාගත දෛනික රෝගීන් සංඛ්‍යාවක් වාර්තා වීමත් සමඟ රුසියාවේ කොරෝනා වයිරස් රෝගීන් සංඛ්‍යාව 20,000 ඉක්මවා ගොස් තිබේ.
• ජෝන්ස් හොප්කින්ස් විශ්ව විද්‍යාලය විසින් සම්පාදනය කරන ලද දත්තවලට අනුව ලොව පුරා මිලියන 1.93 ක ජනතාවක් නව කිරීටක වෛරසය ඇති බවට තහවුරු වී තිබේ. 120,000 කට වැඩි පිරිසක් මියගොස් ඇති අතර 450,000 කට ආසන්න සංඛ්‍යාවක් සුවය ලබා ඇත.
• ලෝක සෞඛ්‍ය සංවිධානය පුපුරා යාම වැළැක්වීම සඳහා සිය නවතම උපායමාර්ගික උපදෙස් නිකුත් කිරීමට නියමිත අතර, එමඟින් චලනය සඳහා වන සීමාවන් ඉවත් කිරීම සඳහා නිර්ණායක හයක් ඇතුළත් වේ.
• ස්වීඩනය පවසන්නේ රට තුළ කොරොන වයිරස් මරණ සංඛ්‍යාව 1000 ඉක්මවා ඇති බවයි.

Covid-19 ආසාදිත පුද්ගලයින් සංඛ්‍යාව අද දින (14) ගෝලීය වශයෙන් 19,42,360 දෙනකු බවත් මියගිය පුද්ගලයින් සංඛ්‍යාව 121,726 දෙනකු බවත් ජොන්ස් හොප්කින් විශ්වවිද්‍යාලයේ කොරෝනා වෛරස් සම්පත් මධ්‍යස්ථානයේ Johns Hopkins – CORONAVIRUS RESOURCE CENTER වාර්තාවල සදහන් වෙනවා.

එම වාර්තාව අනුව ආසාදිතයින් 10,000ක සීමාව ඉක්මවා ගිය රටවල් පහත දැක්වෙනවා.

582,634 US, 172,541 Spain, 159,516 Italy, 137,877 France, 130,383 Germany, 89,571 United Kingdom, 83,306 China, 74,877 Iran, 61,049 Turkey, 31,119 Belgium, 27,580 Netherlands, 25,807 Switzerland, 25,680 Canada, 23,830 Brazil, 21,102 Russia, 17,448 Portugal, 14,159 Austria, 11,868 Israel, 11,445 Sweden, 10,647 Ireland, 10,564 Korea, South,10,541 India

වැඩිම මරණ සංඛ්‍යාව වන 23,649ක් එක්සත් ජනපදයෙන් වාර්තා වන අතර

“මහා අවපාතයෙන් පසු දරුණුතම අවපාතය” විය හැකි බව ජාත්‍යන්තර මූල්‍ය අරමුද පවසයි

“දශකයකට පෙර මූල්‍ය අර්බුදය තුළ පැවති තත්ත්වය ඉක්මවා ගිය ගෝලීය අවපාතයෙන් පසු මේ වසරේ ගෝලීය ආර්ථිකය එහි දරුණුතම පසුබෑම අත්විඳීමට බොහෝ දුරට ඉඩ තිබේ” යැයි ජාත්‍යන්තර මූල්‍ය අරමුදලේ ප්‍රධාන ආර්ථික විද්‍යාඥ ගීතා ගෝපිනාත් පසුගිය දා පැවසුවාය.

ගීතා ගෝපිනාත් පවසන්නේ  මහා අවපාතයෙන් පසු මේ වසරේ ගෝලීය ආර්ථිකය එහි දරුණුතම අවපාතය අත්විඳීමට බොහෝ දුරට ඉඩ ඇති බවයි – රොයිටර්

ස්පාඤ්ඤයේ මරණ සංඛ්‍යාව 18,000 ඉක්මවයි

කොරෝනා වෛරසය ආසාදනය වීමෙන් පසුගිය පැය 24 තුළ ස්පාඤ්ඤයේ පුද්ගලයින් 567 දෙනකු මිය ගොස් ඇති අතර ඒ සමග මියගිය සමස්ත පිරිස 18,056 දක්වා වර්ධනය විය. නව ආසාදන සංඛ්‍යාව සියයට 1.8 කින් ඉහළ ගොස් රෝගීන් 172,541 ක් වී ඇති බව සෞඛ්‍ය අමාත්‍යංශය පවසයි.

රුසියාව ආසාදිතයින් 20,000 ඉක්මවා යයි

රුසියාවේ කොරෝනා වෛරසය ආසාදිත පුද්ගලයින් සංඛ්‍යාව21,102ක් වන අතර මරණ සංඛ්‍යාව 170 දක්වා ඉහළ ගොස් ඇත. පසුගිය පැය 24 තුළ තවත් 2,774 දෙනෙකු COVID-19 සඳහා ධනාත්මක පරීක්‍ෂණයක් සිදු කර ඇත.

වැඩිහිටි මරණ අඩුවෙන් වාර්තා කළ බවට එක්සත් රාජධානියේ චෝදනා

බ්‍රිතාන්‍යයේ විශාලතම සාත්තු නිවාස ප්‍රධානියෙකු පවසන්නේ වයෝවෘද්ධ පුද්ගලයින් අතර වාර්තා වූ කොරෝනා වෛරස් මරණ සංඛ්‍යාව නිල වශයෙන් වාර්තා වී ඇති ප්‍රමාණයට වඩා බෙහෙවින් වැඩි බවයි.

එක්සත් රාජධානියේ සත්කාරක නිවාස 8/1ක COVID-19 පැතිර ඇති බව රජය පවසයි. එහෙත් Home operator HC-One, සභාපති ඩේවිඩ් බෙහාන් David Behan පැවසුවේ තම සමාගම විසින් පාලනය කරන වැඩිහිටි නිවාස 232න් සියයට 66කට වඩා කොරෝනා අවදානමට ලක්ව ඇති බවයි. COVID-19 තහවුරු කිරීම හෝ සැක කිරීම හේතුවෙන් නිවැසියන් 311 දෙනෙකු මියගොස් ඇති බව ඔහු පවසයි.

එක්සත් අරාබි එමීර් රාජ්‍යයේ නිරෝධායන පහසුකම් ප්‍රමාණවත් නොවන බව කේරළ මහඇමති පවසයි

කොරෝනා වසංගතය මධ්‍යයේ එක්සත් අරාබි එමීර් රාජ්‍යයේ (එක්සත් අරාබි එමීර් රාජ්‍යයේ) ඉන්දීය කම්කරුවන් නැවත සිය රට ගෙන්වා ගන්නා ලෙස ඉන්දීය කේරළ ප්‍රාන්තයේ මහ ඇමති අගමැති නරේන්ද්‍ර මෝදිගෙන් ඉල්ලා තිබේ.

එක්සත් ජාතීන්ගේ වාර්තාවට අනුව එක්සත් අරාබි එමීර් රාජ්‍යයේ “ප්‍රමාණවත් හුදකලා හා නිරෝධායන පහසුකම්” පිළිබඳව පැමිණිලි රාශියක් ලැබෙමින් පවතින බව පිනරෙයි විජයන් අප්‍රේල් 9 වනදා යවන ලද ලිපියක සඳහන් වේ.

එක්සත් අරාබි එමීර් රාජ්‍යයේ ඉන්දීය කම්කරුවන් මිලියන තුනකට අධික සංඛ්‍යාවක් සිටිති

ඉවසීම හොඳ ගුණාංගයක්: ඕස්ට්‍රේලියාව, නවසීලන්තය අගුලු දැමීම් සමඟ බැඳී සිටී

කොරෝනා වෛරස් රෝගීන්ගේ තියුණු මන්දගාමිත්වය නොතකා පනවන ලද නීති හා නියෝග තව දුරටත් බලාත්මක කරන බව ඕස්ට්‍රේලියානු අගමැති ස්කොට් මොරිසන් පවසයි.

“ඉවසීම මෙහි අපගේ ගුණවත්කම විය යුතුයි,” මොරිසන් පැවසීය.

ඕස්ට්‍රේලියාව පසුගිය ඉරිදා සහ සඳුදා දිනවල නව ආසාදිතයින් 63 ක් තහවුරු කර ඇති එය පසුගිය දිනවලට සාපේක්ෂව අඩු අගයකි.

නවසීලන්තයේ ආසාදිතයින් ද පහත වැටෙමින් පවතින අතර අඟහරුවාදා නව ආසාදිතයින් 08 දෙනකු පමණක් වාර්තා වී ඇත. එය සති තුනකට වඩා අඩු කාලයකි.

“අපගේ ඉලක්කය වේලාසනින් ගොස් දැඩි ලෙස යා යුතුය. එවිට අපට විශ්වාසයෙන් යුතුව සීමාවන් ලිහිල් කළ හැකි තත්වයකට අප පිවිසෙනු ඇත” යනුවෙන් නවසීලන්ත අග්‍රාමාත්‍ය ජසින්ද ආඩර්න් තවදුරටත් කියා සිටියේ අවම වශයෙන් තවත් සතියක්වත් කිසිදු ක්‍රියාමාර්ගයක් නොගන්නා බවයි.

රටවල් දෙකම විදේශිකයන්ට තම දේශසීමා වසා දමා ආපසු පැමිණෙන පදිංචිකරුවන්ට දින 14ක නිරෝධායන පැනවීය.

අල් ජසීරා වාර්තා ඇසුරිණි – සැකසුම – තුෂාධවි

Covid -19 වෛරසය ව්‍යාප්ත වීම හේතුවෙන් රටපුරා ඇතිවී තිබෙන වසංගත තත්වය හමුවේ රජය විසින් ගෙවතු වගා මිලියනයක් බිහි කිරීමේ ”සෞභාග්‍යා” ගෙවතු වගා ව්‍යාපාතිය ආරම්භ කොට තිබේ.

ශ‍්‍රී ලංකා ගුවන් හමුදා සේවා වනිතා ඒකකය, කෘෂිකර්ම දෙපාර්තුමේන්තුව සමග එක්ව ශ‍්‍රී ලංකා ගුවන් හමුදා ‘‘හරිත දනව්ව – නාගරික සහ ගෙවතු වගා” ව්‍යාපෘතිය 2020 අපේ‍්‍රල් මස 10 වන දින ආරම්භ කරනලදී.

ශ්‍රී ලංකාවේ ස්වයංපෝෂිත ගෘහ ආර්ථිකයක් ඇති කිරීම සහ ”සෞභාග්‍යා” ජාතික අස්වනු වැඩසටහනේ නව සංකල්පයට අපේ රටේ තරුණ පරම්පරාව සම්බන්ධ කර ගැනීම මෙම ව්‍යාපෘතියේ පරමාර්ථයයි.

මෙම වැඩසටහන ආරම්භ කරමින් ගුවන් හමුදා සේවා වනිතා ඒකකයේ සභාපතිනී මයුරි ප‍්‍රභාවී ඩයස් මහත්මිය විසින් ගුවන් හමුදා සාමාජිකයන්ගේ ගොවතු වගාවන් සංවර්ධනය කරලීම උදෙසා කොළඹ ගුවන් හමුදා කඳවුරු අණදෙන නිලධාරී එයාර් වයිස් මාර්ෂල් සීබී ලැබ්රෝයි මහතාහට බීජ පැකට් 500 ක් ලබාදීම සිදුකළාය. මේ ආකාරයට සෑම ගුවන් හමුදා කඳවුරකටම බීජ පැකට් බෙදා දීම සිදුකරනු ලබයි.

එසේම ගුවන් හමුදාධිපති එයාර් මාර්ෂල් සුමංගල ඩයස් මහතා සහ ගුවන් හමුදා සේවා වනිතා ඒකකයේ සභාපතිනී මයුරි ප‍්‍රභාවී ඩයස් මහත්මිය විසින් මෙම ව්‍යාපෘතිය ආරම්භ කරමින් ගුවන් හමුදාධිපති නිළ නිවසේ ගෙවතු වගාවේ මෙම බීජ රෝපණය කරන ලදී.