Supiri Gossip

Blog

  • කොදෙව්වන්ට එරෙහි T20 ශ්‍රී ලංකා සංචිතයේ වෙනස් කම් 3ක්

    කොදෙව්වන්ට එරෙහි T20 ශ්‍රී ලංකා සංචිතයේ වෙනස් කම් 3ක්

    සංචාරක බටහිර ඉන්දීය කොදෙව් කණ්ඩායම සමඟ ලබන මාර්තු මසදී පැවැත්වීමට නියමිත තරග 2 කින් සමන්විත විස්සයි-20 ක්‍රිකට් තරගාවලිය සඳහා නම් කරන ලද ශ්‍රී ලංකා කණ්ඩායමට තුන් ඉරියව් ක්‍රීඩකයින් දෙපළක් වන තිසර පෙරේරා සහ ෂෙහාන් ජයසූරියව කැඳවීමට තීරණය කර තිබේ.

    දැන් පැවැත්වෙන එක්දින තරගාවලියේදී පිතිකරුවකු මෙන්ම පන්දු යවන්නකු ලෙසින් කැපී පෙනීම නිසා තිසර පෙරේරාත්, අවසන් වුණු දේශීය අන්තර් සමාජ විස්සයි-20 සහ එක්දින තරගාවලියේදී පිතිකරුවකු ලෙස කැපී පෙනෙන දක්ෂතා දැක්වීමට ෂෙයාන් ජයසූරිය සමත්වීම විස්සයි-20 කණ්ඩායමට එක්වීමට මංපෙත් විවර වී තිබේ. 

    කෙසේ වෙතත් අවසන් වරට ඉන්දියාවට එරෙහිව පැවැති විස්සයි-20 තරගාවලියට එක්ව සිටි වේග පන්දු යවන කසුන් රජිත වෙනුවට නුවන් ප්‍රදීප් කැඳවීමට පියවර ගෙන තිබේ. ලසිත් මාලිංගගේ නායකත්වයෙන් යුතු බටහිර ඉන්දීය කොදෙව් කණ්ඩායමට එරෙහිව 15 දෙනෙකුගෙන් සමන්විත සංචිතයක් නම් කර තිබෙන අතර ඒ අතර ඉන්දීය තරගාවලියට එක්ව සිටි ධනුෂ්ක ගුණතිලක සහ භානුක රාජපක්ෂට කණ්ඩායමට පැමිණීමේ අවස්ථාව අහිමිව තිබේ. 

    ශ්‍රී ලංකා විස්සයි-20 කණ්ඩායම – ලසිත් මාලිංග (නායක), අවිෂ්ක ප්‍රනාන්දු, කුසල් පෙරේරා, ෂෙහාන් ජයසූරිය, නිරෝෂන් දික්වැල්ල, කුසල් මෙන්ඩිස්, ඇන්ජලෝ මැතිව්ස්, ධනංජය ද සිල්වා, තිසර පෙරේරා, දසුන් ශානක, වනිඳු හසරංග, ලක්ෂාන් සඳකැන්, ඉසුරු උදාන, නුවන් ප්‍රදීප්, ළහිරු කුමාර.

    ඇතුළට – තිසර පෙරේරා, නුවන් ප්‍රදීප්, ෂෙහාන් ජයසූරිය

    ඉවතට – ධනුෂ්ක ගුණතිලක, භානුක රාජපක්ෂ, කසුන් රජිත, ඕෂධ ප්‍රනාන්දු

    text by sl cricket

  • දුවලා දිනපු ජයග්‍රහණය ගැන අවිෂ්ක කියපු රහස

    ශ්‍රී ලංකාව යනු මෑත කාලීනව ජාත්‍යන්තර පිටියේ අවම දක්ෂතා දක්වන ලද කණ්ඩායම් අතර ඉදිරියෙන්ම සිටි කණ්ඩායමක් බව නොරහසකි. එහෙත් පුහුණු කරු තනතුරුවල සිදුකරන ලද 100% ක වෙනස්කම හරහා පෙර තත්ත්වයෙන් ගොඩ ඒමේ ප්‍රවණතාවක් මේ වන විට ශ්‍රී ලංකා ක්‍රීඩකයින් පෙන්නුම් කර තිබේ. ඒ බටහිර ඉන්දීය කොදෙව් කණ්ඩායමට එරෙහිව පැවැත්වෙන එක්දින තරගාවලියේ තරගයක් ඉතිරිව තිබියදීම තරගාවලිය ජය ගැනීමත් සමඟය. පළමු තරගය කඩුල්ලකින් ජය ගත් ශ්‍රී ලංකා පිල හම්බන්තොට දී පැවැති දෙවැනි තරගය ජය ගනු ලැබුවේ ලකුණු 161 ක දැවැන්ත ලකුණු පරතරයකිනි.

    එවැනි දැවැන්ත තරග ජයක් ශ්‍රී ලංකාව වාර්තා කරන ලද්දේ මෙරට ඇති දැවැන්තම ක්‍රීඩාංගණය වන මහින්ද රාජපක්ෂ ක්‍රීඩාංගණයේදීය. එම ක්‍රීඩාංගණයේ හයේ පහරක් කෙසේ වෙතත් හතරේ පහරක් එල්ල කිරීම යනු දැඩි අසීරු කටයුත්තකි. එවන් තත්ත්වයක් යටතේ ශ්‍රී ලංකා කණ්ඩායම කඩුලු 8 කට ලකුණු 345 ක් රැස් කරමින් කොදෙව් කණ්ඩායම ශ්‍රී ලංකාව හමුවේ ලද දැවැන්තම තරග පරාජයකට ඇද දැමීම (ලකුණු අනුව) පහසුවෙන් බැහැර කළ නොහැකිය.

    වාර්තා කීපයක්ම අලුත් කරවන්නක් බවට පත්වූ මෙම තරගයේදී ශ්‍රී ලංකාව ලද ලකුණු 345 ට හතරේ පහර 33 කින් පිතිකරුවන් ලකුණු රැස් කරද්දී අතිරේක ලකුණුද 15 ක් හිමිවිය. ඒ අනුව ශ්‍රී ලංකාව ලද සමස්ථ ලකුණු සංඛ්‍යාවෙන් එකී ලකුණු අඩු කළ විට ලකුණු 198 ක්ම කඩුලු අතර දිව යමින් ලබාගත් ලකුණු වීම විශේෂත්වයක් වේ.

    මේ පිළිබඳව අදහස් දක්වා සිටින එම තරගයේ වීරයා වූ අවිෂ්ක ප්‍රනාන්දු ක්‍රීඩාංගණයේ විශාලත්වය තේරුම් ගෙන ඊට සරිලන අයුරින් ක්‍රීඩා කිරීමට මැදදි ගත් තීරණය නිසා මෙම තරගයේදී දැවැන්ත ලකුණු සංඛ්‍යාවක් රැස් කර ගැනීමට අවස්ථාව හිමිවූ බවයි.

    “ඔව්. ඇත්තම කියනවා නම් ලංකාවේ ගත්තොත් තියෙන ලොකුම ග්‍රවුන්ඩ් වලින් මේක ගොඩක් ලොකු එකක්. විශේෂයෙන්ම මේ වගේ යාර 80 හෝ85 ක්ලියර් කරන්න පුලුවන් තරම් ශක්තිමත් භාවයක් කණ්ඩායම තුළ නැහැ. ඉතිං ඒක නිසා අපි නිතරම බැලුවේ අපිට ගන්න පුලුවන් හතරේ පහර ලබාගෙන මැද පන්දුවාර වලදී ටිකක් දුවල වැඩියෙන් ලකුණු ලබා ගන්න. ඒ අනුව අපි හිතුව දේම මේ තරගයේදී අපිට කරන්න පුලුවන් වුණා”යි අවිෂ්ක පවසයි.

    මේ වන විට ලෝකයේ ලකුණු ලබාගන්නා පිතිකරුවන් අතර ඉදිරියෙන්ම පසුවන වත්මන් ඉන්දීය නායක විරාත් කෝලිද ලකුණු ලබා ගැනීම වෙනුවෙන් භාවිතා කරනු ලබන ප්‍රධාන උපාය මාර්ගයක් වන්නේ කඩුලු අතර වේගයෙන් දිව යමින් ලකුණු රැස් කිරීමය.මෙය මේ වන විට ලකුණු ලබා ගැනීම වෙනුවෙන් සාර්ථක ක්‍රමයක් ලෙස බොහෝ රටවල් හඳුන්වාගෙන තිබෙන අතර එය ක්‍රියාවට ද නංවා තිබේ.

    “අපි දෙන්න පන්දුවට පහර දෙන්න එකතු වුණේ කඩුලු 2 ක් ඉක්මනින් දැවී ගිය නිසයි. මටයි කුසල් මෙන්ඩිස්ටයි ඕනෑ වුණේ කොහොම හරි ලකුණු ලබාගන්න. මොකද යට කට්ටියට ඕවර්ස් ටික ඉතුරු කරලා දුන්නොත් විකට් අතේ තියාගෙන ගහන්න පුලුවන්. අන්න ඒක තමයි මායි කුසලුයි දුවලා ලකුණු ගන්න. එන 4 ද කියලා බැලුවේ නැහැ. හයේ පහර ගහන්න බැලුවේ නෑ. නමුත් දුවලා කරලා හිටපු නිසා තමයි අවිට ලකුණු 345 සීමාවට යන්න පුලුවන් වුණේ”යි මෙන්ඩිස් පවසයි.

    පන්දු 123 කට මුහුණ දුන් අවිෂ්ක හතරේ පහර 10 ක් සමගින් ලකුණු 127 ක් රැස් කරන ලද්දේ අනෙක් ශතක ලාභියා වූ කුසල් මෙන්ඩිස් සමඟ තෙවැනි කඩුල්ල වෙනුවෙන් වාර්තා ගත ලකුණු 239 ක ලකුණු සංඛ්‍යාවක් පවත්වමින් ශ්‍රී ලංකා පිල ජයග්‍රහණය කරා රැගෙන ගියහ. එහිදී කුසල් මෙන්ඩිස් පන්දු 119 කදී ලකුණු 119 ක් රැස් කළේය.

    මෙකී තත්ත්වයට පැමිණීම සඳහා ශ්‍රී ලංකා ක්‍රිකට් ආයතනය විසින් හොඳ පුහුණුකරුවන් රැසකගේ සේවය තම කණ්ඩායම වෙත ලබා දීම කණ්ඩායම තුළ දක්ෂතා වල වර්ධනයට පැහැදිළි හේතුවක් වී තිබෙන බවද ප්‍රනාන්දු මේ අවස්ථාවේ අවධාරණය කර සිටියේය.

    “අපි හරියට බැලුවොත් අපිට පුහුණුවීම් ටික හරියට කරන්න පුලුවන් වුණා නම් තරගයෙදිත් ඒ දේවල් හරියට කරන්න පුලුවන් වෙනවා. අපිට හොඳ සහාය ඔවුන්ගෙන් ලැබෙනවා. ඒ වගේම අත්දැකීම් තියෙන ක්‍රීඩකයනුත් අපිට ඉන්නවා. ඒ සියල්ලගෙම ඇඩ්වයිස් අරගෙන පොඩි ක්‍රීඩකයින් හැටියිට අපිට ලොකු අත්දැකීමක් ලබාගන්න හැකි වෙමලා තියෙනවා” යි ප්‍රනාන්දු වැඩි දුරටතු පැවැසීය.

    ගෙවී ගිය ලෝක කුසලාන ක්‍රිකට් තරගාවලියෙන් පසු ශ්‍රී ලංකා කණ්ඩායමේ පුහුණුතරු තනතුරුවල වෙනසක් සිදු කිරීම කෙරෙහි ශ්‍රී ලංකා ක්‍රිකට් පාලනාධිකාරිය අවධානය යොමු කර සිටි අතර එහිදී මීකි ආතර් ප්‍රමුඛ පුහුණු කාර්යය මණ්ඩලය ඉකුත් වසරේ පාකිස්තානයේ පැවැති ටෙස්ට් තරග සංචාරයේදී ශ්‍රී ලංකා පිල සමඟ කටයුතු කිරීම ආරම්භ කළහ. වත්මන් පුහුණු කාර්යය මණ්ඩලය කෙරෙහි පළමු තරගය අවසානයේ පැවැති මාධ්‍ය හමුවට සහභාගිවුණු වනිඳු හසරංගද ඉහළ වර්ණනාවක් සිදු කළේය.

    කුසල් සහ අවිෂ්ක එක්ව ගොඩ නංවන ලද්දේ ලකුණු 09 ක් ඇතුළත කඩුලු 2 ක්දැවී ගොස් තිබූ ශ්‍රී ලංකා කණ්ඩායම වේ. “ඔව් ඇත්තටම ඒ වෙලාවේ මට මගේ සාමාන්‍ය පිතිහරඹයට එන්න බැරි වුණා. මම කුසල් අයියත් එක්ක කතා කරලා පුලුවන් තරම් බැලුවේ නිතරම පන්දුවාරයකට ලකුණු තුන හතර ගහලා ඕවර 10 ක් 15 ක් කඩුල්ල ආරක්ෂා කරගන්න”යි අවිෂ්ක අදහස් දක්වා සිටියේය.

    දෙරට අතර පැවැත්වෙන මීළඟ එක්දින තරගය ලබන මාර්තු මස 01 වැනිදා මහනුවර පල්ලකැලේ ජාත්‍යන්තර ක්‍රීඩාංගණයේදී දිවා/රාත්‍රී තරගයක් ලෙසින් පැවැත්වේ.

  • ශ්‍රී ලංකා – එංගලන්ත තරගයට කොරෝනාවෛරසයෙන් බලපෑම් ?

    ශ්‍රී ලංකා – එංගලන්ත තරගයට කොරෝනාවෛරසයෙන් බලපෑම් ?

    කොරෝනාවෛරසය සම්බන්ධයෙන් “පූර්ව ආරක්ෂක පියවර” අනුගමනය කිරීමට නියමිත නමුත්, මාර්තු මස පැවැත්වීමට නියමිත ශ්‍රී ලංකා, එංගලන්ත ටෙස්ට් ක්‍රිකට් තරගාවලිය සඳහා එංගලන්ත කණ්ඩායම ශ්‍රී ලංකාවට පැමිණීම අවලංගු කර නැති බව එංගලන්ත සහ වේල්සයේ ක්‍රිකට් පාලක මණ්ඩලය පවසයි.

    කෙසේනමුත්, පවතින තත්වය පිළිබඳ “නිරන්තරයෙන් අධීක්ෂණය කරන” බව ද පාලක මණ්ඩලය නිකුත් කළ නිවේදනයක දැක්වේ.

    දෙසැම්බර් මස දකුණු අප්‍රිකානු සංචාරය ආරම්භයේදී කොරෝනාවෛරසය හේතුවෙන් එංගලන්ත කණ්ඩායමට දැඩි බාධකවලට මුහුණ දීමට සිදු විය.

    “මෙම අවස්ථාවෙහිදී, අපගේ වෛද්‍ය විශේෂඥයන්ගේ සහ විදෙස් කාර්යාංශයේ උපදෙස් අනුව, කොරෝනාවෛරසය හේතුවෙන් ශ්‍රී ලංකා සංචාරයට අවදානමක් තිබෙන බවට කිසිදු ඇඟවීමක් නොමැති,” බව එංගලන්ත ක්‍රිකට් පාලක මණ්ඩල ප්‍රකාශකයෙක් පැවසීය.

    “අපගේ දැනුමට අනුව, ශ්‍රී ලංකාවේ වාර්තා වී ඇත්තේ එක් කොරෝනාවෛරස ආසාදිතයෙක් පමණයි. එය එක්සත් රාජධානියට වඩා අඩු සංඛ්‍යාවක් වන අතර, තවදුරටත් වෛරසය පැතිරීම සඳහා ඉහළ අවදානම් සහිත රටක් ලෙස ශ්‍රී ලංකාව සැලකෙන්නේ නැහැ. නමුත්, මේ තත්වය නිරන්තරයෙන් අධීක්ෂණය කරමින්, එංගලන්ත සහ වේල්ස ක්‍රිකට් පාලක මණ්ඩලය ශ්‍රී ලංකාවේ සෞඛ්‍ය අංශ සමග නිරන්තරයෙන් සම්බන්ධ වෙනවා.”

    “ශ්‍රී ලංකාවට යන ක්‍රීඩකයින් සහ නිලධාරීන් සඳහා පූර්ව ආරක්ෂක පියවර අනුගමනය කරනවා. ප්‍රතිශක්තිය හැකි උපරිම මට්ටමක පවත්වා ගැනීම ඕනෑම රෝගයක් වළක්වා ගැනීම සඳහා උපකාර වෙනවා,” ප්‍රකාශකයා තවදුරටත් පැවසීය.

  • හෝමාගම මුලික රෝහල මධ්‍යම රජයට

    හෝමාගම මුලික රෝහල මධ්‍යම රජයට

    සෞඛ්‍ය හා දේශීය වෛද්‍ය සේවා, කාන්තා හා ළමා කටයුතු සහ සමාජ ආරක්ෂණ අමාත්‍ය පවිත්‍රා වන්නිආරච්ච් මහත්මිය ඊයේ (26) දින හෝමාගම මූලික රෝහලේ  හදිසි නිරීක්ෂණ චාරිකාවට එක්විය. එහිදී රෝහලේ පාලනාධිකාරිය ඇතුලු නිලධාරි මණ්ඩලය සමග රෝහ‌ලේ වත්මන් තත්ත්වය සහ ඉදිරි සංවර්ධන වැඩසටහන් පිළිබද සාකච්ඡා පවත්වන ලද අතර එම සාකච්ඡාවේ දී සෞඛ්‍ය අමාත්‍යතුමිය හෝමාගම මුලික රෝහල මධ්‍යම රජයට පවරා ගැනීම සදහා කටයුතු කරන බව පැවැසීය.

    649178 ක පමණ ජනගහනයකින් යුත් ශ්‍රී ලංකාවේ අධ්‍යාපන හා ආර්ථික කේන්ද්‍රස්ථානයක් ලෙස හෝමාගම ප්‍රදේශය හදුන්වනු ලබයි. හෝමාගම ප්‍රදේශයේ පිහිටා ඇති හෝමාගම මුලික රෝහල 1946 වසරේ දිස්ත්‍රික් රෝහලක් ලෙස ද 1997 වසරේ මුලික රෝහලක් ලෙසට  ද පත් වන අතර රෝහල ඇදන් 474 කින් යුක්ත වේ. මූලික ප‍්‍රතිකාර ඒකකයක්, ප්‍රසව හා නාරිවේද, ළදරු ඒකක, අක්ෂි ඒකක, රසායනාගාර, ජීව විද්‍යා අංශයක්, මනෝචිකිත්සක එ්කක, සායනවලට එන රෝගී සඳහා වෙනම ප‍්‍රතිකාර ඒකක සංකීර්ණයකින් ද යුක්ත වේ. දිනකට සාමාන්‍ය සායනික පහසුකම් ලබාගැනිම සදහා 1000 ක් පමණ මෙම රෝහලට පැමිණේ. මෙම රෝහලෙන් ඉහත සේවාවන්ට අදාල සායන පහසුකම් වලින් ද, චර්ම, දන්ත, ලිංගාශ්‍රිත, හෘද, පවුල් සැළසුම්, විකලාංග, බෝනොවන රෝග, පෝෂණ සහ පවුල් සෞඛ්‍ය සායන පහසුකම් ද ලබාදෙනු ලබයි. තව ද විකලාංග සැත්කම්, ළමා සැත්කම්, මුඛ සැත්කම් අලුතින් එකතු කරන ලද සැත්කම් අතර වේ.

    දැඩි සත්කාර ඒ්කකයේ පහසුකම් ලබාගැනීම සදහා වෙනත් රෝහල්වලින් රෝගීන් මාරු කරන අවස්ථාවල සහ ආපදා සහ හදිසි අනතුරු තත්ත්වයක දී මෙම රෝහලෙන් විශාල සේවාවක් ලබාදිය හැකි බව රෝහල් පාලනාධිකාරිය පෙන්වා දෙයි. මහා මාර්ග පද්ධතිය පුළුල් කිරීම හේතුවන් කොළඹ කටුනායක, කොළඹ මහනුවර, දක්ෂිණ අධිවේගී මාර්ග ඇතුලුව ශ්‍රී ලංකාවේ ප්‍රධාන ප්‍රවාහන මධ්‍යස්ථානය වන්නේ ද හෝමාගම වන බැවින් එහි පිහිටා ඇති හෝමාගම මුලික රෝහල තවත් සංවර්ධනය කර ප්‍රතිකාර සේවාවන් ඉහළ නැංවිය යුතු බව ද රෝහල් පාලනාධිකාරිය ඇතුලු රෝහල් කාර්ය මණ්ඩලවල ප්‍රධාන ඉල්ලීමක් වූ අතර, වෛද්‍යවරු 10 ක්, හෙදියන් 43ක්, සෞඛ්‍ය කාර්ය සහායකයින් 25 ක්, වෛද්‍ය රසායනාගාර කාර්මිකයින් 06 ක් රෝහලේ සේවාවන් ඉහළ නැංවීමට අත්‍යාව්‍ය වන බව ද පෙන්වා දෙන ලදි. භෞතික සම්පත් සංවර්ධනයේ දී නව හදිසි ප්‍රතිකාර ඒකකය හා ශල්‍යාගාරය ඇතුළත් නව සංකීර්ණයේ උපකරණ සදහා ආසන්න වශයෙන්  රුපියල් මිලියන 240 ක් පමණ අවශ්‍යවන බවත්, දැනට පවත්වාගෙන යනු ලබන සේවාවන් සදහා (රසායනාගාර, එක්ස් කිරණ, වාට්ටු, විශේෂ ඒකක) සදහා අත්‍යාවශ්‍ය උපකරණත් අවශ්‍ය බව පෙන්වා දෙන ලදි. මේ සියලු කරුණු පිළිබද අවධානය යොමු කළ සෞඛ්‍ය අමාත්‍යතුමිය හෝමාගම මුලික රෝහලේ ඉදිරි සංවර්ධන කටයුතු අවශ්‍යතාව අනුව සොයාබලමින් අදාල සෞඛ්‍ය සේවාවන් පුළුල් කිරීමට හෝමාගම මුලික රෝහල මධ්‍යම රජයට පවරා ගැනීම සදහා අවශ්‍ය පියවර ගන්නා බවත්, ඒ සදහා ඉදිරි සතිය තුල අමාත්‍ය මණ්ඩල පත්‍රිකාවක් ඉදිරිපත් කිරීමට කටයුතු කරන බව ද පැවැසීය.

  • සංචාරක ව්‍යාපාරයේ ප‍්‍රවර්ධනයට අයවැයෙන් ප‍්‍රතිපාදන වෙන් කරනවා – ඇමැති ප‍්‍රසන්න

    සංචාරක ව්‍යාපාරයේ ප‍්‍රවර්ධනයට අයවැයෙන් ප‍්‍රතිපාදන වෙන් කරනවා – ඇමැති ප‍්‍රසන්න

    සංචාරක කලාප ආශ්‍රිත යටිතල පහසුකම් සංවර්ධනය සදහා රජයේ විශේෂ අවධානය යොමුව ඇතැයි කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා අමාත්‍ය ප්‍රසන්න රණතුංග මහතා පවසයි. ඔහු අවධාරණය කරන්නේ ඉදිරි අයවැයෙන් මේ සදහා අවශ්‍ය ප්‍රතිපාදන වෙන් කරන බවයි.

    බේරුවල කළුවාමෝදර වෙරළ ආශ්‍රිත සංචාරක කලාප පවතින අඩුපාඩු සොයා බැලීම සදහා ඊයේ (26) කළ නිරීක්ෂණ චාරිකාවකින් අනතුරුව ඇමතිවරයා මෙම අදහස් පල කලේය. පාර්ලිමේන්තු මන්ත්‍රී ප්‍රියල් නිශාන්ත මහතාගේ ඉල්ලීමට අනුව ඇමතිවරයා මෙම නිරීක්ෂණ චාරිකාවට එක් විය.

    බේරුවල සංචාරක කලාපයට ආශ්‍රිතව බොහෝ සංචාරක හෝටල් වැසී ගොස් ඇති බවත් එම කලාප වල යටිතල පහසුකම් නැංවීමට පසුගිය රජයෙන් කිසිදු පියවරක් ගෙන නොමැති බවත් මෙහිදි එම ප්‍රදේශවාසීන් චෝදනා කලහ. සංචාරක කර්මාන්තය කඩා වැටීමෙන් මෙම ප්‍රදේශවල 30,000 කට පමණ තම ජීවනෝපායන්ද අහිමිවී ගොස් ඇතැයි මෙහිදි අනාවරණය විය.

    ඇමති ප්‍රසන්න රණතුංග මහතා මෙහිදි පෙන්වා දුන්නේ සංචාරක කලාප ආශ්‍රිතව මාර්ග, රෝහල්, වැසිකිලි කැසිකිලි ඇතුළු යටිතල පහසුකම් සංවර්ධනයට දැනටමත් අවධානය යොමුව ඇති බවයි. ප්‍රධාන දුම්රිය ස්ථාන සංචාරක ගමනාන්තය හා ප්‍රධාන සංචාරක මාර්ග වල හදුනාගත් ස්ථාන වල සියළු පහසුකම් වලින් සමන්විත පහසුකම් මධ්‍යස්ථාන (Comfort Centers) ඇති කිරීමටද අපෙක්ෂා කෙරේ. දැනටමත් අමාත්‍යංශය මේ සදහා සුදුසු ස්ථාන හදුනාගෙන ඇත. මෙම පහසුකම් මධ්‍යස්ථානවල සනීපාරක්ශක පහසුකම් අවන්හල්, මුදල් හුවමාරු මධ්‍යස්ථාන වැනි සංචාරකයින්ට අවශ්‍ය සියළුම පහසුකම් සැලසෙන අතර ඒවා ජාත්‍යන්තර ප්‍රමිතියෙන් යුතුව ඉදිකිරීමට නියමිත බව ඇමතිවරයා කිවේය.

    දැනට වැසී ගොස් ඇති සංචාරක හෝටල් හිමියන්ට ඒවා නැවත ආරම්භ කිරිම සදහා සහයෝගය ලබා දීම කෙරෙහිද රජයේ අවධානය යොමුව ඇතැයි. ඇමතිවරයා මෙහිදි කියා සිටියේය. සහන පදනම යටතේ ඔවුන් වෙනුවෙන් ණය යොජනා ක්‍රමයක් හදුන්වා දීම කෙරෙහි කැබිනට් මණ්ඩලය සමග සාකච්ඡා කිරීමට අපේක්ෂා කරන බවද ඔහු කියා සිටියේය.

    සංචාරක ව්‍යාපාරය නැංවීම සදහා පසුගිය රජයට කිසිදු සැලැස්මක් හෝ දැක්මක් නොතිබූ බවත් 2009 වර්ෂයේ යුද්ධය අවසන් වීමෙන් පසු දියුණුවෙමින් පැවති සංචාරක ව්‍යාපාරය යහපාලන රජය බලයට පත්වීමත් සමග සම්පුර්ණයන්ම කඩා වැටුණු බවත් ඇමතිවරයා කිවේය. වත්මන් රජයේ නව දැක්මකින් සංචාරක ව්‍යාපාරය නැංවීමට අවශ්‍ය පියවර ගනිමින් සිටින බවද ඇමතිවරයා මෙහිදි වැඩි දුරටත් කියා සිටියේය.    

  • ‘ක්ෂණිකව ජන ගැටලු විසදන්න’ ජනපති ගෝඨා ගමට යයි

    ‘ක්ෂණිකව ජන ගැටලු විසදන්න’ ජනපති ගෝඨා ගමට යයි

    ඒ ඒ දිස්ත්‍රික්කවල ජන ගැටලුවලට කඩිනම් විසදුම් දීමේ අරමුණින් සංවිධාන කෙරෙන දිස්ත්‍රික් සම්බන්ධීකරණ කමිටු රැස්වීම් මාලාවේ පළමුවැන්න ගාල්ල දිස්ත්‍රික්කයේ උඩුගම හෝමාදොළ රාජගිරි ලෙන් විහාරස්ථානයේ දී ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් අද (27) පෙරවරුවේ පැවැත්විණ.

    සංඛ්‍යා ලේඛන අනුව ගාල්ල දිස්ත්‍රික්කයේ දුප්පත්ම ග්‍රාමයක් වන උඩුගම, හෝමාදොළ, කොතලාවලපුර ග්‍රාමය ජනාධිපතිතුමා විසින් තොරා ගනු ලැබීය. මෙලෙස පැවැත්වෙන දිස්ත්‍රික් කමිටු රැස්වීම් සඳහා වැය වන මුදල් සීමා කර ඉන් ලැබෙන ප්‍රතිලාභ ග්‍රාමීය ජනතාවට ලබාදීම ජනාධිපතිතුමාගේ අරමුණයි.

    සාකච්ඡාව ආරම්භයේ දී දිස්ත්‍රික්කයේ නගර, ග්‍රාමීය ආර්ථික සංවර්ධන සහ ආපදා කළමනාකරණ සැලසුම් ජනාධිපතිතුමා වෙත ඉදිරිපත් කෙරිණ. දිස්ත්‍රික්කයේ ජනතාව මුහුණ දෙන දේශපාලන, සමාජ, ආර්ථික ගැටළු ක්ෂේත්‍ර රැසක් ඔස්සේ සාකච්ඡාවට ලක් විය. දුගී බව තුරන් කිරීම, සැමට නිරෝගීමත් දිවියක් මෙන්ම මනා අධ්‍යාපන පසුබිමක් සැකසීම, කෘෂි හා ධීවර ක්ෂේත්‍රයන්හි කඩිනම් සංවර්ධනය පිළිබඳ විශේෂ අවධානය යොමු විය.

    ජනාධිපතිතුමා රැස්වීමට සහභාගීවීමට යන මග දෙපස රැස්ව සිටී ජනතාව හමුවී ඔවුන්ගේ ප්‍රශ්න මොනවාදැයි විමසීය.  කටුපොල් වගාවෙන් පරිසරයට වන හානිය පිළිබදව ඕව්හු පැමිණි කළහ. සාකච්ඡාවේ පළමු ගැටලුව ලෙස මේ පිළිබඳ අවධානය යොමු විය. ප්‍රදේශයේ පැණ නැගී ඇති ජල හිඟයට කටුපොල් වගාව බෙහෙවින් බලපා ඇත. ඒ පිළිබඳ විධිමත් පාරිසරික අධ්‍යයනයක් වහාම සිදුකරන ලෙස ජනාධිපතිතුමා උපදෙස් දුන්නේය. මෙමගින් ඉහළ ආදායමක් ලැබේ. එහෙත් පරිසරයට හානියක් සිදුවන්නේ නම් ලාභයෙන් ඵලක් නොවන බව පෙන්වා දුන් ජනාධිපතිතුමා වහාම කටුපොල් වගාව නතර කිරීමට පියවර ගන්නා ලෙස නිලධාරීන්ට උපදෙස් දුන්නේය.

    පොල්තෙල් පරිභෝජනයට ජනතාව දිරි ගැන්විය යුතුය. එහි ප්‍රතිඵලයක් ලෙස පොල් වගාව ද සංවර්ධනය වනු ඇත. රබර් ආශ්‍රිත කර්මාන්ත ශාලා රැසක් ආරම්භ කර තිබේ. එහෙත් එම නිෂ්පාදනවලට අවශ්‍ය රබර් ප්‍රමාණවත් අයුරින් නොලැබෙන බව පෙන්වා දුන් ජනාධිපතිතුමා රබර් වගාව කෘෂිකර්මාන්තයක් ලෙස නගා සිටුවීමට පියවර ගන්නා ලෙස ද දැනුම් දුන්නේය. එය දිරි ගැන්වීම පිණිස රබර් ආනයනය  වහාම නතර කිරීම පිළිබඳව ද ජනාධිපතිතුමාගේ අවධානය යොමු විය.

    ගාල්ල දිස්ත්‍රික්කයේ ග්‍රාමීය පාසල්වල පවතින ඉංග්‍රීසි ගුරු හිගය පිළිබඳව ප්‍රදේශයේ දේශපාලනඥයෝ ජනාධිපතිතුමාගේ අවධානය යොමු කළහ.  කඩිනමින් එම පුරප්පාඩු පිරවීමටත්, ගණිත විද්‍යා විෂයන් ඉගැන්වීමට අවශ්‍ය ගුරුවරු මෙන්ම ක්‍රමවේදයන්  විධිමත් කිරීමටත් ජනාධිපතිතුමා උපදෙස් දුන්නේය.  මහින්දෝදය තාක්ෂණ විද්‍යාගාර බිහි කිරීමේ අරමුණ ක්‍රියාවට නංවමින් නව තාක්ෂණය මගින් කාලීනව ඉංග්‍රීසි, ගණිත විද්‍යා විෂයන් ඉගැන්වීමට  පසුබිම  සකසන්නැයි එතුමා පැවසීය.

    නෙළුව, නාගොඩ, උඩුගම ඇතුළු ප්‍රදේශ රැසක පැන නැගී ඇති පානීය ජල ගැටළුව පිළිබඳව ද දීර්ඝ වශයෙන් සාකච්ඡාවට ලක් විය. දිස්ත්‍රික්කයේ පවතින අඩු පාඩු සහ ගැටලු ප්‍රමුඛතා පදනමෙන්  විසඳීමට පියවර ගන්නැයි ජනාධිපතිතුමා උපදෙස් දුන්නේය.

    දියත් කර ඇති ප්‍රජා සහ සෙසු ජල ව්‍යාපෘති නිම කිරීමට අවශ්‍ය මුල්‍ය ප්‍රතිපාදන ලබාදී පානීය ජල ගැටලුවට විසඳුම් ලබාදෙන්නැයි ද ජනාධිපතිතුමා දැනුම් දුන්නේය. කොන්ත්‍රාත්කරුවන් නිසි අයුරින් වැඩ නිමකර නොමැතිනම් ඔවුන් වහාම ඉවත් කරන්නැයි කීය.

    ඝන අපද්‍රව්‍ය කළමනාකරණ ගැටළුව ද සාකච්ඡාවට ලක් වූ ප්‍රමුඛ කරුණකි. ප්‍රාදේශිය මට්ටමින් ජනතාව දැනුවත් කර නිශ්කාෂන ව්‍යාපෘතිවලට සහාය වන ලෙස ජනාධිපතිතුමා පළාත් පාලන ආයතනවලට දැනුම් දුන්නේය.

    ග්‍රාමීය වෛද්‍ය මධ්‍යස්ථාන යතාවත් කිරීම කෙරෙහි ද අවධානය යොමු විය. වෛද්‍යවරු, හෙදියන් ප්‍රමාණවත් අයුරින් ඒවාට යොමුකර ජනතාවට අවශ්‍ය පහසුකම් සලසන්නැයි සෞඛ්‍ය බලධාරීන්ට උපදෙස් දුන් ජනාධිපතිතුමා එමගින් කොළඹ සහ ප්‍රධාන නගර ආශ්‍රිත රෝහල්වල තදබදය විශාල වශයෙන් අඩු කරගත හැකි බව ද පෙන්වා දුන්නේය.

    ගාල්ල දිස්ත්‍රික්කයේ ග්‍රාමීය මාර්ග හා පාලම් ඉදිකිරීම, ගංවතුර පාලනය, නාගරික සංවර්ධනයේ දී බලපා ඇති ගැටලුවලට විසදුම් ලබාදීම කෙරෙහි ද අවධානය යොමු විය.

    මෙරට සංචාරක ක්ෂේත්‍රයේ සුවිශේෂී ස්ථානයක් ගාල්ල දිස්ත්‍රික්කයට හිමි වේ. හික්කඩුව, වෙරළ තීරයේ සංචාරකයන්ගේ ආරක්ෂාව සහ ප්‍රදේශයේ වැදගත්කම පිළිබඳ ඔවුන් දැනුවත් කිරීමට පියවර ගන්නා ලෙස  ජනාධිපතිතුමා උපදෙස් දුන්නේය. උණවටුන ආශ්‍රිතව සංචාරක පොලීසියක් වහාම ඉදිකිරීමට ද තීරණය කෙරිණ. ධීවර කර්මාන්තය නගා සිටුවීමට දිස්ත්‍රික්කයේ ඇති ධීවර වරාය ආශ්‍රිත ගැටලු හඳුනාගෙන ඒ ඒ අමාත්‍යාංශ වෙත වගකීම් පැවරීමට ද පියවර ගනු ලැබිණ.

    හඳුනාගත් ජන ගැටලු කඩිනමින් විසඳීමට පියවර ගන්නැයි ඒ ඒ අමාත්‍යාංශ නිලධාරින්ට ජනාධිපතිතුමා දැනුම් දුන්නේය.

    අද දිස්ත්‍රික් සංවර්ධන කමිටු රැස්වීමේ දී මතු කෙරුණු ඇතැම් ගැටළුවලට ඒ මොහොතේම විසඳුම් ලැබිණ. උඩුගම රෝහලට ජල බවුසරයක් සැපයීම, විදුහල්පතිවරු නැති පාසල්වලට විදුහල්පතිවරු පත් කිරීම, සුළු පරිමාණ ජල සම්පාදන ව්‍යාපෘති සඳහා හිඟ මුදල් සම්පාදනය ඒ අතර විය.

    ගාල්ල දිස්ත්‍රික් නායක අමාත්‍ය රමේෂ් පතිරණ මහතාගේ මූලිකත්වයෙන්  පැවති දිස්ත්‍රික් සම්බන්ධීකරණ රැස්වීමට කැබිනට් සහ රාජ්‍ය අමාත්‍යවරු, ජනාධිපති ලේකම් ආචාර්ය පී.බී. ජයසුන්දර, අග්‍රාමාත්‍ය ලේකම් ගාමිණි සෙනරත් යන මහත්වරු ඇතුළු අමාත්‍යාංශ ලේකම්වරු සහ නිලධාරිහූ එක්ව සිටියහ.

    දීප ව්‍යාප්තව පැවැත්වෙන් දිස්ත්‍රික් කමිටු රැස්වීම් මාලාවට සමගාමීව පරිසර දූෂණය අවම කිරීමේ අරමුණින් පැල සිටුවීමේ වැඩසටහනක් ද ජනාධිපතිතුමාගේ සංකල්පයක් මත ක්‍රියාවට නංවා තිබේ. ගාල්ල දිස්‍ත්‍රික්කයේ පැල 300ක් සිටුවීමේ වැඩසටහනේ සමාරම්භය සනිටුහන් කරමින් ජනාධිපතිතුමා විහාරස්ථාන භූමියේ පැළයක් රෝපණය කළේය.

    රැස්වීමට පැමිණි ජනාධිපතිතුමා විහාරාධිපති ස්වාමින් වහන්සේ බැහැ දැක ආශිර්වාද ලබා ගත්තේය.

  • සම්පත් ATM අනාරක්ෂිත බවට චෝදනා

    සම්පත් ATM අනාරක්ෂිත බවට චෝදනා

    දිවයින පුරා පවතින සම්පත් බැංකුවේ ATM යන්ත්‍ර වලින් මුදල් සහ පාරිභෝගික දත්ත සොරකම් කිරීමට ඉඩ දිය හැකි ආරක්ෂක දෝෂයක් පැනනැගී ඇත. අප ශ්‍රී ලංකා තොරතුරු තාක්ෂණ සංගමය වශයෙන් එම මුල්‍ය ආයතනයේ ප්‍රධාන තාක්ෂණික නිලධාරීයා දැනුවත් කිරීමට කිහිප වරක් උත්සාහ කරත් ඔවුන් මේ සම්බන්ධයෙන් දක්වන නොසැලකිලිමත් භාවය හේතුවෙන් එම අවස්තාව ව්‍යර්ථ විය.

    ඔවුන්ගේ ATM යන්ත්‍රවල පවතින ආරක්‍ෂිත ගැටළු සම්බන්ධයෙන් සමාජ මාධ්‍යන්හි පවා කතිකාවතක් ඇතිවී ඇති මොහොතක ඒ සම්බන්ධයෙන් එම මුල්‍ය ආයතනයේ අවධානය යොමු නොකිරීම ඉතාමත් කනගාටුදායක කරුණකි. මෙම මුල්‍ය සමාගමේ ATM යන්ත්‍ර සමග ගනුදෙනු කරන පාරිභෝගිකයන් විසින් එම ATM යන්ත්‍ර වලට ඇතුලත් කරන ඕනෑම ක්‍රෙඩිට් හෝ ඩෙබිට් කාඩ්පතක දත්ත සොරාගෙන එම පාරිභෝගිකයන්ගේ මුදල් සොරාගැනීමේ හැකියාවක් පවතී.

    තවද මෙම ආරක්‍ෂිත දෝෂය යොදාගනිමින් ඕනෑම පුද්ගලයෙකුට මෙම ATM යන්ත්‍රයන්ට අනිෂ්ට විධාන  නොහොත් malicious commands එක්කළ හැකිය. මෙම ATM යන්ත්‍ර තවමත් ක්‍රියාත්මක වන්නේ යල්පැනගිය Windows 7 මෙහෙයුම් පද්ධතිය මත වන අතර එයද ආරක්‍ෂිත දෝෂයක් ලෙස අප ශ්‍රී ලංකා තොරතුරු තාක්ෂණ සංගමයට හදුන්වාදිය හැකිය. මෙවැනි ආරක්‍ෂිත ගැටළු සම්බන්ධයෙන් මෙම මුල්‍ය ආයතන කිසිදු සොයාබැලීමක් සිදුනොකරන බැවින් මෙම මුල්‍ය ආයතනයේ ATM යන්ත්‍ර භාවිතයේදී සැලකිලිමත් වන්න කියා අප ශ්‍රී ලංකා තොරතුරු තාක්ෂණ සංගමය වශයෙන් ජනතාවට දැනුම් දෙමු.

  • සජිත් නිසා පාරට වැටුණු නිවාස අධිකාරියේ 2000කට ආණ්ඩුවෙන් සහන

    සජිත් නිසා පාරට වැටුණු නිවාස අධිකාරියේ 2000කට ආණ්ඩුවෙන් සහන

    ජනාධිපතිගේ සහ අගමැතිගේ උපදෙස් මත නිවාස පහසුකම් රාජ්‍ය අමාත්‍ය ඉන්දික අනුරුද්ධ මහතා ලබා දුන් සාධනීය විසඳුමක් මත ජනාධිපති ලේකම් කාර්යාලය අසළ උද්ඝෝෂණයක නිරතව සිටින ජාතික නිවාස සංවර්ධන අධිකාරියේ රැකියා අහිමි වූ පිරිස එම උද්ඝෝෂණය නතර කිරීමට එකඟතාවකට පැමිණියහ.

    කොන්ත්‍රාත් කාලය අවසන් වීම මත ජාතික නිවාස සංවර්ධන අධිකාරියේ රැකියා අහිමි වූ පිරිසක් සහ නිවාස පහසුකම් රාජ්‍ය අමාත්‍ය ඉන්දික අනුරුද්ධ මහතා අතර සාකච්ඡාවක් (26 දින) අමාත්‍යාංශ ශ්‍රවණාගාරයේදී පැවැත්වුණි.

    මෙම සාකච්ඡාව සඳහා උද්ඝෝෂණයේ නිරත වන පිරිස අතරින් 22 දෙදෙනෙකු සහභාගී වූ අතර ඔවුන් අමාත්‍යවරයාගෙන් සිදු කරන ලද ඉල්ලීම මත කෙටිකලක් තුළදී මෙම අවස්ථාව ඔවුන් සඳහා ලබා දෙන ලදි.

    මෙම සාකච්ඡාවට සහභාගී වූ පිරිස සඳහන් කර සිටියේ මේ වන විට තමන් ඇතුළු 2000 කට ආසන්න පිරිසක් ජාතික නිවාස සංවර්ධන අධිකාරිය විසින් සේවයෙන් ඉවත් කර ඇති බවත්, තමන් සියලු දෙනා නැවත සේවයේ පිහිටුවන ලෙසත්ය.  

    රාජ්‍ය සේවය තුළ දින 180 කට වැඩි කාලයක් කටයුතු කර ඇති අය ස්ථිර කරන ලෙස රාජ්‍ය පරිපාලන අමාත්‍යාංශයෙන් චක්‍රලේකයක් නිකුත් වී ඇති බවත්, තමන් සියලු දෙනා දින 180 කට වැඩි කාලයක් සේවය කර ඇති බැවින් එය පදනම් කර ගනිමින් තම පිරිස සඳහා නැවත රැකියා ලබා දෙන ලෙසත් ඔවුන් මෙහිදි ඉල්ලා සිටියහ.

    ජාතික නිවාස සංවර්ධන අධිකාරියෙන් ඉවත් කළ පිරිස 2000 කට ආසන්න වුවද මේ වනවිට ස්ව කැමැත්තෙන් රැකියාව හැරගිය පිරිස හැරුණු විට දැනට ඉතිරිව ඇත්තේ 1000 කට අඩු පිරිසක් බවද ඔවුන් පවසන ලදි.

    දින 180 කට වැඩි කාලයක් ජාතික නිවාස සංවර්ධන අධිකාරියේ කටයුතු කර ඇති තමන් සියලු දෙනා පසුගිය ආණ්ඩුව විසින් ස්ථිර කිරීමට කටයුතු කරමින් සිටින අතර පැවැති ජනාධිපතිවරණය හේතුවෙන් මැතිවරණ කොමිසමේ නියෝග මත එම කටයුතු නතර කළ බවද ඔවුන් මෙහිදී පෙන්වා දෙන ලදි.

    මෙහිදී අමාත්‍යවරයා ඔවුන්ට පෙන්වා දුන්නේ ජාතික නිවාස සංවර්ධන අධිකාරියේ සේවය කළ මෙම පිරිස වත්මන් ආණ්ඩුව විසින් සේවයෙන් පහ නොකළ බවත්, කොන්ත්‍රාත් කාල සීමාව අවසන් වීම හේතුවෙන් ඔවුන්ට ඉවත් වීමට සිදු වූ බවත්ය. පසුගිය ආණ්ඩු සමයේදී මෙම සේවකයින් ස්ථිර කරනවා යැයි පවසා ඔවුන්ට ලබා දීමට සුදානම් වී ඇත්තේ නිසි පත්වීම් ලිපියක් නොව එහි ආකෘතියක් බවද අමාත්‍යවරයා සඳහන් කළේය.

    අමාත්‍යවරයා ප්‍රකාශ කර සිටියේ රාජ්‍ය පරිපාලන අමාත්‍යාංශය විසින් නිකුත් කළ දින 180 ට අදාල චක්‍රලේඛය පිළිබඳව සමාලෝචනය කර ජනාධිපතිතුමාගේ සහ අගමැතිතුමාගේ උපදෙස් මත සුදුසුකම් සපුරා ඇති අයට රැකියා ලබා දීමට හැකි බවයි. මේ වන විට රැකියාව අහිමි වී ඇති ජාතික නිවාස සංවර්ධන අධිකාරියේ සියලු දෙනා සඳහා එම අධිකාරියේ හෝ වෙනත් ආයතනයක රැකියාව ලබා දීමට ඉදිරි කාලය තුළ කටයුතු කරන බවද අමාත්‍යවරයා මෙහිදී ඔවුන්ට පැවසීය.

    අමාත්‍යවරයා විසින් සිදු කළ යෝජනාවට කැමැතිද නැතහොත් වෙනත් ඉල්ලීම් තිබේද කියා මෙහිදී අමාත්‍යවරයා ඔවුන්ගෙන් විමසා සිටියහ.

    එහිදී ඔවුන් පැවැසුයේ මේ වනවිට මෙම පිරිසට රැකියාව අහිමිවීම නිසා සිංහල අලුත් අවුරැද්ද සැමරීමට නොහැකි වී ඇති අතර මේ හේතුවෙන් තම දරු පවුල්ද අනාත වී ඇති බවයි. එම නිසා ඔවුන් අමාත්‍යවරයාගෙන් ඉල්ලා සිටියේ මැතිවරණය අවසන් වන තුරු නොසිට ඊට පෙර එනම් සිංහල අලුත් අවුරුද්දට ප්‍රථමයෙන් කොන්ත්‍රාත් පදනමින් හෝ තමන් ඇතුළු පිරිස නැවත සේවයට බදවා ගන්නා ලෙසයි. එවිට පසුගිය ආණ්ඩුව සමයේදී ලබා දුන් නිවාස ණය වලට අදාල ණය වාරික යම් කිසි ඉලක්කයක් මත අයකර ගැනීම සඳහා තමන් ඇතුළු පිරිසට හැකි බවයි. එහිදී නිවාස වාරික අයකර ගැනීමෙන් තමන්ට හිමිවන කොමිස් මුදලින් ආයතනයට බරක් නොවී අලුත් අවුරුදු සැමරීමට හැකියාව උදාවන බවයි. එම නිසා මේ පිළිබඳව ඔබතුමන් මානුෂිය ලෙස සිතා බලා තමන් ඇතුළු පිරිස සඳහා නැවත රැකියා ලබා දීමට කටයුතු කරන ලෙස ඔවුන් අමාත්‍යවරයාගෙන් ඉල්ලා සිටියහ.

    සාකච්ඡාවට සහභාගී වූ පිරිස මෙහිදී පවසා සිටියේ හිටපු නිවාස අමාත්‍ය සජිත් ප්‍රේමදාස මහතා විසින් තමන් ඇතුළු පිරිසට කොන්ත්‍රාත් පදනම මත රැකියා ලබා දුන් බවත්, ඒවා නිසි පරිදි ලබා නොදීම හේතුවෙන් මේ වනවිට තමන් ඇතුළු පිරිසට සේවය අහිමි වීම නිසා පීඩාවට පත්ව ඇත්තේ තමන් බවත්ය.

    හිටපු නිවාස අමාත්‍යවරයා තමන් ඇතුළු පිරිසගේ සේවය ස්ථිර නොකිරීම නිසා තමන් අනාථ වී ඇති බවත්, මීළඟ පාර්ලිමේන්තු මැතිවරණයේදී තමන් සියලු දෙනා හිටපු නිවාස ඇමැතිවරයාට ඡන්දය ලබා නොදෙන බවත්, එතුමට හම්බන්තොට දිස්ත්‍රික්කයෙන් මැතිවරණයට ඉදිරිපත් වීමට නොහැකි බවත් මොවුන් පැවසීය. හිටපු නිවාස ඇමැතිවරයා මෙම ගැටලුව සම්බන්ධයෙන් තම පිරිස සමඟ මේ වනතුරු කතා නොකළ බවද මොවුන් මෙහිදී පැවැසීය.

    පසුව අමාත්‍යවරයා සඳහන් කළේ ජාතික නිවාස සංවර්ධන අධිකාරියේ රැකියාව අහිමි වූ පිරිස අතරින් නැවත රැකියාව සිදු කිරීමට කැමැති අය පිළිබඳව විස්තර කඩිනමින් දිස්ත්‍රික් මට්ටමින් ලබා දෙන ලෙසත්, එවිට මෙම පිරිසට රැකියා ලබා දීම සම්බන්ධව ඉදිරි කටයුතු සිදු කිරීමට හැකි බවත්ය.

    තමන් සඳහා සාකච්ඡාවක් ලබා දීම සම්බන්ධයෙන් සහ තම ගැටළුවට සාධනීය විසඳුමක් ලබා දීම සම්බන්ධයෙන් නිවාස රාජ්‍ය අමාත්‍යතුමාට, අගමැතිතුමාට, ජනාධිපතිතුමාට සහ රජයට තම පිරිස ස්තූතිය පුද කර සිටන බවද මොවුන් මෙහිදී පැවැසීය.

    මෙම සාකච්ඡාව සඳහා අමාත්‍යතුමාගේ පෞද්ගලික ලේකම්තුමා, මාධ්‍ය ලේකම්තුමා, ජාතික නිවාස සංවර්ධන අධිකාරියේ සමාන්‍යාධිකාරීතුමා ද සහභාගී වූහ.

  • COVID-19 භීතියට මුවාවී ‘සයිබර් ප‍්‍රහාරයක අවධානමක්’

    COVID-19 භීතියට මුවාවී ‘සයිබර් ප‍්‍රහාරයක අවධානමක්’

    ලෝක සෞඛ්‍ය සංවිධානය විසින් නම් කරන ලද COVID-19 වයිරසයේ ස්වභාවය නිසා ඒ වයිරසය පිළිබද සෑම තොරතුරක්ම අන්තර්ජාල භාවිතා කරන්නන්ගේ වේගවත් අවධානය දිනා ගැනීමට නැඹුරුවී තිබේ.

    එහි ප්‍රතිපලයක් ලෙස සයිබර් ප්‍රහාර දියත් කිරීම සහ රහස්‍ය දත්ත සොරකම් කිරීම සහ කප්පම් මුදල් උපයා ගැනීමේ චේතනාවෙන් සයිබර් ප්‍රහාර දියත් කිරීම සහ අනිෂ්ට මෘදුකාංග බෙදා හැරීම සඳහා සයිබර් අපරාධකරුවන් මෙම හදිසි අවස්ථාව තුල ජනතාව තුල ඇතිවී ඇති බිය සහ අවිනිශ්චිතතාව යොදාගනිමින් සිටී.

    Covid-19 වයිරසය සම්බන්ධයෙන් නවතම තතු ඊමේල් මගින් දැනුවත් කිරීමේ මුවාවෙන් ඊමේල් පණිවිඩ හරහා බලයලත් මහජන සෞඛ්‍ය ආයතනයක් සේ පෙනී සිටිමින් අනිෂ්ට කේත ඇතුළත් Microsoft Word or PDF ගොනුවක් ආකාරයෙන් Emotet වැනි ට්‍රෝජන් අනිෂ්ට මෘදුකාංග පරිශීලකයාගේ පරිගනයකයට ජංගම දුරකතනයට ස්ථාපිත කිරීමේ ක්‍රියාවලියක් පිලිබදව ලොවපුරා වාර්තා වේ. මෙවැනි ඊමේල් පණිවිඩ සැලකියයුතු ප්‍රමාණයක් ශ්‍රී ලාංකික අන්තර්ජාල පරිශීලකයන්ට ලැබී ඇති බව අප ශ්‍රී ලංකා තොරතුරු තාක්ෂණ සංගමය විශ්වාස කරන අතර Covid-19 සම්බන්ධ ඊමේල් පණිවිඩයක් ඔබට ලබුනුහොත් එම පණිවිඩය විවෘත කිරීමට යාමෙන් වලකින ලෙස අප ශ්‍රී ලංකා තොරතුරු තාක්ෂණ සංගමය ලෙස ශ්‍රී ලාංකික ජනතාවට දැනුම් දෙමු. 

  • අවිශ්ක – මෙන්ඩිස් වාර්තාගත සම්බන්ධතාවෙන් ශ‍්‍රී ලංකාවට දැවැන්ත ජයක්

    අවිශ්ක – මෙන්ඩිස් වාර්තාගත සම්බන්ධතාවෙන් ශ‍්‍රී ලංකාවට දැවැන්ත ජයක්

    සංචාරක බටහිර ඉන්දිය කොදෙව් කණ්ඩායම සමග අද (26) මහින්ද රාජපක්ෂ ක‍්‍රීඩාංගණයේ පැවැති දෙවැනි එක්දින තරගයෙන් ශ‍්‍රී ලංකා කණ්ඩායම ලකුණු 161ක දැවැන්ත ජයග‍්‍රහණයක් වාර්තා කළා. ඒ සමග එක්දින තරගාවලිය 2-0ක් ලෙස ජයග‍්‍රහණය කිරීමට ශ‍්‍රී ලංකා කණ්ඩායම සමත් වුණා.

    කාසියේ වාසිය දිනා ගත් බටහිර ඉන්දිය කොදෙව් නායකයා පන්දුවට පහරදීමට ශ‍්‍රී ලංකාවට ආරාධනා කළා. ඒ අනුව පිටියට පිවිසි ශ‍්‍රී ලංකා කණ්ඩායම නියමිත පන්දුවාර 50 තුළදී කඩුළු 08කට ලකුණු 345ක් වාර්තා කළා.

    ලකුණු 346ක දැවැන්ත ඉලක්කයක් හඹාගිය කොදෙව් කණ්ඩායම පන්දුවාර 39.1කදී සියලු දෙනාම දැවී ගිය අතර ඔවුන්ට රැුස්කර ගත හැකි වුණේ ලකුණු 184ක් පමණයි.

    ශ‍්‍රී ලංකා ඉනිම

    ආරම්භක පිතිකරුවන් ලෙස පිටියට පිවිසි නායක දිමුත් කරුණාරත්න සහ අවිශ්ක ප‍්‍රනාන්දුට පළමු කඩුල්ල වෙනුවෙන් පවත්වා ගත හැකි වුණේ ලකුණු 09ක කෙටි සම්බන්ධතාවක් පමණයි. මුළු ලකුණු සංඛ්‍යාව 09දී එක් ලකුණක් ලබා සිටි දිමුත් කරුණාරත්න දැවී ගියා.

    ශ‍්‍රී ලංකා කණ්ඩායමේ දෙවැනි කඩුල්ල ද මුළු ලකුණු සංඛ්‍යාව 09දීම දැවී ගිය අතර ඊට ගොදුරු වුණේ කුසල් පෙරේරායි. ඔහු ලකුණු නොලබාම දැවීගියා.

    සිවුවන පිතිකරු ලෙස පිටියට පිවිසි කුසල් මෙන්ඩිස් සහ අවිශ්ක ප‍්‍රනාන්දු 03 වැනි කඩුල්ල වෙනුවෙන් වාර්තාගත ලකුණු 239ක සම්බන්ධතාවක් ගොඩනගා ගැනීමට සමත් වීම සමග ශ‍්‍රී ලංකා කණ්ඩායමේ බලාපොරොත්තු ඉහළ නැංවුණා.

    තෙවැනි කඩුල්ල ලෙස ලකුණු 119ක් ලබාසිටි කුසල් මෙන්ඩිස් දැවී ගිය අතර ඒ වන විට මුළු ලකුණු සංඛ්‍යාව 248ක්ව තිබුණා.

    ශ‍්‍රී ලංකා කණ්ඩායමේ සිවුවන කඩුල්ල මුළු ලකුණු සංඛ්‍යාව 271 දී බිද වැටුණු අතර ඊට ගොදුරු වුණේ ලකුණු 127ක් ලබා සිටි අවිශ්ක ප‍්‍රනාන්දුයි. ඔහු තම ලකුණු 127ට 4 පහර 10ක් එල්ල කර තිබුණා.

    යළිත් ශ‍්‍රී ලංකා කණ්ඩායමේ බලාපොරොත්තු බිද දමමින් 5 වැනි කඩුල්ල මුළු ලකුණු සංඛ්‍යාව 274දී බිද වැටුණු අතර එහිදී ඇන්ජිලෝ මැතිව්ස් එක් ලකුණකට දැවී ගියා.

    ශ‍්‍රී ලංකා කණ්ඩායමේ 06 වැනි කඩුල්ල 303දීත් 7 වැනි කඩුල්ල 316දීත් බිද වැටුණු අතර 08 වැනි කඩුල්ල මුළු ලකුණු සංඛ්‍යාව 345දී බිද වැටුණා.

    ශ‍්‍රී ලංකා කණ්ඩායමට එරෙහිව පන්දුවෙන් දස්කම් පෑ Sheldon Cottrell කඩුළු 04ක් සහ Alzarri Joseph 03ක් දවා ගත්තා.

    බටහිරි ඉන්දිය කොදෙව්

    ශ‍්‍රී ලංකාව ලබා දුන් ලකුණු 346ක ඉලක්කය හඹා ගිය බටහිර ඉන්දිය කොදෙව් කණ්ඩායමේ සාර්ථක වුණේ ආරම්භක පිතිකරු Shai Hope පමණයි. ඔහු පන්දු 65කදී ලකුණු 51ක් ලබා ගත්තා.

    බටහිර ඉන්දිය කොදෙව් කණ්ඩායමට එරෙහිව අගනා පන්දු යැවීමක නිරත වූ වසිදු හසරංග ලකුණු 30කට කඩුළු 03ක් ද, ලක්ෂාන් සදකැන් ලකුණු 57ට කඩුළු 03ක් ද ලබා ගත් අතර නුවන් ප‍්‍රදීප් කඩුළු 02ක් සහ ඇන්ජිලෝ මැතිව්ස් එක් කඩුල්ලක් ලබා ගත්තා.

  • රන්ජන් වෙනුවෙන් හිරුණිකා

    රන්ජන් වෙනුවෙන් හිරුණිකා

    සජිත් ප්‍රේමදාස මහතාගේ නායකත්වයෙන් බිහිවන සමගි ජනබලවේගය සඳහා නාමයෝජනා නොදී සිටීමට තරම් පාර්ලිමේන්තු මන්ත්‍රී රන්ජන් රාමනායක මහතා වරදක් කර නැතැයි හිරුණිකා ප්‍රේමචන්ද්‍ර මහත්මිය අද (26) විපක්ෂනායක කාර්යාලයේ පැවති මාධ්‍ය හමුවකට එක්වෙමින් පැවසුවාය.

    එහිදී වැඩි දුරටත් අදහස් දක්වමින් හිරුණිකා මහත්මිය සදහන් කළේ රන්ජන් රාමනායක මහතාට ඇප හිමිවීමත් සමඟ ඉදිරියේදී ඒ මහතාගේ තවත් හඬපට පිටතට එනු ඇති බවයි.

  • අනුරාධපුරේ සුපිරි රස්සා බෙදිල්ලක්

    අනුරාධපුරේ සුපිරි රස්සා බෙදිල්ලක්

    රජයේ රැකියා මුළු ලංකාවට ලබාදිය හැකකේ ලක්ෂයක් පමණක් වුවත් සමහර පුද්ගලයන් මේවන විට අනුරාධපුරය තුළ පමණක් රැකියා ඉල්ලුම් පත්‍ර ලක්ෂ දෙකක් පමණ බෙදා දී තිබෙන බව තරුණ කටයුතු රාජ්‍ය අමාත්‍ය දුමින්ද දිසානායක මහතා අද (26) මිහින්තලේදී හෙළි කළා.

    මෙහිදී වැඩිදුරටත් අදහස් දැක්වූ දුමින්ද දිසානායක මහතා මෙසේද පැවසුවා.

    ‘‘දෙන්න ඉඩමක් නෑ, ඉඩම් බෙදනවා කියලා ලැයිස්තු හදනවා.තව කට්ටිය සමිති වලට පුටු බෙදනවා, තව අය කියනවා ඊළග ආණ්ඩුවේ අහවල් ඇමති මම කියලා, තව අය කියනවා මම තමා අහවලාගේ නියෝජිතයා කියලා.

    මේ සේරම කරන්නත් අපි අනුරාධපුර‍ දිස්ත්‍රික්කයේ  හත් දෙනෙක් පාර්ලිමේන්තු යවන්න අවශ්‍ය ඡන්ද ටික හදලා ඉන්න ඕන නේද? ඒ ටික හැදුනම නේද කවුද යවන්න ඕන කියලා හිතන්න ඕන.

    මිනිස්සු රවට්ටන අය පාර්ලිමේන්තු ගියාට ර‍ට හැදෙන්නේ නෑ. ඉස්සරලම රට හදන්න හොඳ කණ්ඩායමක් පාර්ලිමේන්තු යවන්න පදනමක් අපි හදා ගන්න ඕන. ඊට පස්සේ ගෝඨාභය මහත්තයාගේ මතවාදයේ හිට ගන්න පිරිසක් පාර්ලිමේන්තු යවන්න පුළුවන්.ඊට පස්සේ අපි ජීවත් වෙන කාලයේ මේ රටේ වෙනසක් දකින්න පුළුවන්.

    ගෝඨාභය මහත්තයා ජනාධිපති වුණා කියලා එතුමා මැජික් කාරයෙක් නෙමෙයි. මේ රට වෙනස් කරන්න.ඒ සඳහා අපි එතුමාට උදව් කරන්න අවශ්‍යයි.එතුමා බලාපොරොත්තු වෙන වෙනස්කම් ටික කරන්න ශක්තිමත් පාර්ලිමේන්තුවක් අපි හදලා දෙන්න ඕන.

    මේ රටේ වෙනස් කළ යුතු බොහෝ දේ තියෙනවා.එකතු කළ යුතු බොහෝ දේවල් තියෙනවා. අයින් කරන්න ඕන දේවල් බොහෝමයක් තියෙනවා.

    සමහර නීති පාර්ලිමේන්තුවේ සම්මත වෙන්න ඕන.නායකයාට ඕනකම තිබුණට විතරක් මේවා කරන්න බෑ.සමහර නීති තියෙන්නේ සුද්දාගේ කාලේ ඒවා.අපේ පාරවල් කාපට් වෙලා, ගුවන් පාලම් හැදිලා තියෙනවා, එඅධිවේගී මාර්ග හැදිලා තියෙනවා. හැබැයි තාමත් අපේ පාරක වේග සීමාව පැයට කිලෝ මීටර 80 යි,

    ගම් පාරවල් වලත් 80 ට වඩා යනවා.තාම රටේ නීතිය තියෙන්නේ 80 යි.මේවා වෙනස් කරන්න පාර්ලිමේන්තුවේ 2/3 ක බලයක් තියෙන්න ඕන.

    පහුගිය කාලවල මැතිවරණයක් අපි දිනුවම පැරදුන අයව ගණන් ගත්තේවත් නෑ, පැරදුන කෙනා කොන් වෙනවා.දැන් එහෙම කරන්න බෑ.දෙකට බෙදිලා හිටිය පක්ෂවල නායකයෝ දැන් එකතු වෙලා සන්ධාන හදලා තියෙනවා.

    ඉතිහා‍සයේ ඉඳන් අපේ පුරුද්ද තිබුණේ අපි ආණ්ඩුවක් හදා ගත්තම උදව් නොකරපු එකෙකුට ලං වෙන්න දෙන්නේ නෑ.ඇයි තහඩු ටික, කොන්ත්‍රාත් ටික, රැකියා ටික, අපිටම ගන්න.

    අපි රටක් විදිහට විනාශය කරා යනවා මිසක් සංවර්ධනයකට යන්නේ නෑ.මේ දේශපාලන බෙදීම මැතිවරණ කාලයට පමණක් සීමා කරලා රට හදන කණ්ඩායම විදිහට හැමෝම එකට අත්වැල් බැඳ ගත්තොත් හැමෝම මේ කඳවු‍රේ සාමාජිකයෝ කර ගත්තොත් අපිට ලේසියෙන්ම පාර්ලිමේන්තුවේ බලය ලබා ගන්න පුළුවන්‘

  • දකුණෙන් කැපූ දෙකම ඌවට දීලා

    දකුණෙන් කැපූ දෙකම ඌවට දීලා

    මෙවර මහ මැතිවරණයේදී දිස්ත්‍රික්ක 4ක පාර්ලිමේන්තු මන්ත්‍රී ආසන සංඛ්‍යාව සංශෝධනය වන බව මැතිවරණ කොමිෂන් සභාවේ සභාපති මහින්ද දේශප්‍රිය මහතා අද (26) පැවැති මාධ්‍ය හමුවකදී හෙළි කළා.

    මැතිවරණ කොමිෂමේ සභාපතිවරයා සදහන් කළේ ගාල්ල සහ මාතර දිස්ත්‍රික්කවලින් මන්ත්‍රී අසුන බැගින් අඩුවන බවත් බදුල්ල සහ මොණරාගල යන දිස්ත්‍රික්කවලට එක් මන්ත්‍රී අසුන බැගින් වැඩිවන බවයි.

    ඒ අනුවල ගාල්ල දිස්ත්‍රික්කයට හිමි මන්ත්‍රී ධුර සංඛ්‍යාව 10 සිට 9 දක්වාද මාතර දිස්ත්‍රික්කයට හිමි මන්ත්‍රී ධුර සංඛ්‍යාව 8 සිට 7 දක්වා ද අඩු වී ඇතැයි ද බදුල්ල දිස්ත්‍රික්කයට හිමි මන්ත්‍රී ආසන සංඛ්‍යාව 8 සිට 9 දක්වාද මොණරාගල දිස්ත්‍රික්කයට හිමි ආසන සංඛ්‍යාව 5 සිට 6 දක්වාද ඉහළ යන බවයි මහින්ද දේශප‍්‍රිය මහතා සදහන් කළේ.

  • හෙට ප්‍රදේශ කිහිපයක උෂ්ණත්වය ඉහළට – අවවාදාත්මක නිවේදනයක්

    හෙට ප්‍රදේශ කිහිපයක උෂ්ණත්වය ඉහළට – අවවාදාත්මක නිවේදනයක්

    දිවයිනේ ඇතැම් ප‍්‍රදේශයන්හි උෂ්ණත්වය හෙට (27) දිනයේදී ඉහළ යා හැකි බවට කාලගුණ විද්‍යා දෙපාර්තමේන්තුව විසින් අවවාදාත්මක නිවේදනයක් ද නිකුත් කර තිබේ.

    විශේෂයෙන්ම වයඹ හා බස්නාහිර පළාත්වලත්, මන්නාරම, ගාල්ල සහ මාතර දිස්ත‍්‍රික්කයන්හි ඇතැම් ප‍්‍රදේශවලත් අවධානය යොමු කළ යුතු මට්ටමක් දක්වා උෂ්ණත්වය ඉහළ යා හැකි බවයි එම නිවේදනයේ වැඩි දුරටත් සදහන් වන්නේ.

    අධික උණුසුම පවතින අවස්ථාවලදී විවිධ ක‍්‍රියාකාරකම්වල නිරත වීමෙන් විජලනය වී මස්පිඬු පෙරලීම, අධික මහන්සිය වැනි තත්ත්වයන් ඇතිවිය හැකි බවත් වැඩිහිටි සහ රෝගී පුද්ගලයින් මේ සම්බන්ධයෙන් සැළකිලිමත් විය යුතු බවත් එම නිවේදනයේ සඳහන් වේ.

    ඉහත ප‍්‍රදේශවල ජනතාව ප‍්‍රමාණවත් ලෙස ජලය පානය කිරීම, හැකි පමණ සෙවණ ඇති ස්ථානවල විවේක ගැනීම, අධික වෙහෙසකාරී කටයුතු සීමා කිරීම, සුදු හෝ ලා පැහැ ඇඳුම් භාවිතය ආදිය අනුගමනය කළ යුතු බවත්, විශේෂයෙන් කුඩා ළමුන් තනිව වාහන තුළ තබායාමෙන් වැළකිය යුතු බවත් එම නිවේදනයේ සදහන් වේ.

  • පාර්ලිමේන්තුව විසුරුවා හරින දිනය ගැන මැකොගෙන් ඉගි

    පාර්ලිමේන්තුව විසුරුවා හරින දිනය ගැන මැකොගෙන් ඉගි

    තවත් සතියක් ඇතුළත පාර්ලිමේන්තුව විසුරුවා හැරෙනු ඇතැයි අපේක්ෂා කරන බව මැතිවරණ කොමිෂන් සභාවේ සභාපති මහින්ද දේශප‍්‍රිය මහතා සඳහන් කරයි. විසුරුවා හරින දිනයේ සිට දින 52කුත් දින හැටහයකුත් (66) අතර කාලය තුළ මැතිවරණය පැවැත්විය හැකි බවත්, මේ අනුව අප්‍රේල් 22 සිට මැයි 04 වන දින හෝ එදිනට පෙර දිනයක මැතිවරණය පැවැත්වීමට සිදුවන බවද දේශප්‍රිය මහතා සඳහන් කළේය.

    පාර්ලිමේන්තු මැතිවරණය පැවැත්වීමේ දිනය ව්‍යවස්ථාවේ පවරා තිබෙන්නේ ජනාධිපතිවරයාට බවත්, එහෙත් වෙනත් ඡන්ද විමසීම්වලදී මැතිවණ කොමිෂමට දිනය තීරණය කළ හැකි බවත් අද (26) පැවැති මාධ්‍ය සාකච්ඡාවකදී මහින්ද දේශප‍්‍රිය මහතා පැවසුවේය.

  • මහන්සි නොවී ‘කෙට්ටු වෙන්න’

    මහන්සි නොවී ‘කෙට්ටු වෙන්න’

    බර අඩු කර ගන්න තමයි අද කොයි කාගෙත් හීනය වෙලා තියෙන්නෙ. ඕනෙම කෙනෙක් හිටියාට වඩා ටිකක් හෝ මහත් උනත් ඒ ගැන හරියට හිතනවා.

    ඇත්ත වශයෙන්ම ඇග ටිකක් මහත් වෙනවා කියන්නෙ රෝග රැසකට මුල පුරනවා වගේ අදහසක් තමයි බහුතරයක් කියන්නෙ. ඒකෙ ඇත්තක් නැතුවමත් නොවේ. ඒ කොහොම වුනත් ඇග ටිකක් මහන්සි කරවලා ව්‍යායාම කරලා, එදිනෙදා ඔබේ ආහාර රටාව පාලනය කරලා සෞඛ්‍ය සම්පන්න හුරුපුරුදු වලට යොමු වෙනවා නම් මහත් වෙන එක ගැටවවක් නෙවෙයි.

    ඒ කොහොම වුනත් මෙන්න මේ කරුණු ගැන සැළකිළිමත් වෙලා බලන්න.ඔබ දැනටමත් ටිකක් මහත් වෙලා නම් වෙහෙසකර ව්‍යායාම් වල නොයෙදීම මේ විදියට සැහැල්ලු සිරුරකට හිමිකම් කියන්න අනිවාර්යෙන්ම පුළුවන්.

    • ඇත්තටම බඩගිනිද තිබහද යන්න නිවැරදිව අවබෝධ කරගන්න

    සමහර වෙලාවල් වලට අපට තිබහක් දැනෙන්නෙත් බඩගින්නක් විදියට.අන්න ඒ නිසා මේ දෙක හරියට අවබෝධ කරගන්න එක වැදගත් වෙනවා.ඒ නිසා ඔබ පළමුවෙන්ම කල යුතු වන්නේ බඩගින්නක් දැනුනු සැනින් සීතල වතුර වීදුරුවක් පානය කිරීමයි.ඊට පසුවත් ඔබට බඩගිනි නම් ආහාරයක් ගන්න

    • පොඩි පොඩි කෑම වේල් වලට යන්න

    බර අඩු කරගන්නවා කියන්නෙ ඔබේ කෑම වේල එහෙම්පිටින්ම කපා දානවා කියන එක නම් නෙවෙයි. ඔබේ ශරීරයේ පැවැත්මට වගේම මනා ක්‍රියාකාරීත්වයටත් ආහාර වැදගත් බව මතකතබා ගන්න.හිතු මනාපෙට ඔබේ ආහාර වේල් කපා හැරීම තුළින් සිදුවන්නේ ඔබ රෝගියෙකු වීම පමණයි. මේ නිසා සීනි පිටි තෙල් අවම ආහාර වේල් පොඩි ප්‍රමාණ වලින් වේල් කීපයකට ගන්න.

    • උදේ ආහාර වේල මගහරින්නම එපා

    දවස පුරාම ක්‍රියාශීලීව ඉන්න නම් ඔබ උදේ ආහාර වේල අනිවාර්ය කැගත යුතුයි.දවසේ පැය ගණනාවක් නින්දේ ගත කළ ඔබ දවසේ ඉතිරි පැය කීපය තුළ අවහ්‍ය ශක්තිය ලබා ගන්න නම් උදෑසන ආහාරය හොදින්ම ගන්න ඕනි. අනෙකුත් වේල් වලදී මෙන් ඔබට බඩගින්නක් දැනෙන තුරු බලා නොසිට උදෑසන ආහාරය ගන්න

    • ගුණ කෑම වලට මුල්තැන දෙන්න

    නිතරම ඔබේ ආහාර වේල තුළ නියමිත පෝෂණයන් තියෙනවාද යන්න සැළකිලිමත් වෙන්න. මේදය අධික, සීනි අධික කොටින්ම පිටි බහුල ආහාරගන්න එපා.ඒ වෙනුවට තන්තු බහුල ආහාර එකතු කර ගන්න. උදාහරණයක් විධියට ධාන්‍ය වර්ග, පළතුරු, එළවළු ගුණ නොනැසෙන ලෙස සකස් කරගෙන ආහාරයට ගන්න.

    • උණුවතුර බොන්න

    අපි ආහාර ගත්තට පස්සෙ ආහාරවල තියෙන මේද කොටස් වගේම ආහාර ජීරණ පද්ධතිය ආශ්‍රීතව තැම්පත් වෙලා තියෙන් මේද කොටස් දියකර දැමීමේ හැකියාව උණු වතුර වලට තියෙනවා.මේ නිසා ඔබේ සාමාන්‍ය වතුර වීදුරුව උණුසුම් වතුර වීදුරුවකට මාරු කර ගන්න.

    Text Copied by The Woman magazine of England – Text by Uresha