තරුණයන් ඇතුළු 11 දෙනෙකු පැහැරගෙන ගොස් අතුරුදන් කිරීම සම්බන්ධයෙන් පවරා ඇති නඩුවේ 10 වන සැකකාර ලුතිනන් කමාන්ඩර් ප්රසාද් චන්දන හෙට්ටිආරච්චි නමැත්තාට අපරාධ පරීක්ෂණ දෙපාර්තමේන්තුව මගහැර යාමට ත්රිවිධ හමුදා ආරක්ෂක මාණ්ඩලික ප්රධානී අද්මිරාල් රවීන්ද්ර විජේගුණරත්න මහතා ආධාර අනුබල දී හෝ යම් සහනයක් දක්වා ඇති බවට ප්රමාණවත් සාක්ෂි ඉදිරිපත් වන්නේ නම් වහාම එම නිලධාරියා අත්අඩංගුවට ගෙන අධිකරණයට ඉදිරිපත් කිරීමට පියවර ගන්නා ලෙස කොටුව මහේස්ත්රාත් ලංකා ජයරත්න මෙනෙවිය ඊයේ (29) අපරාධ පරීක්ෂණ දෙපාර්තමේන්තුවට නියෝග කළාය.
ලුතිනන් කමාන්ඩර් ප්රසාද් චන්දන හෙට්ටිආරච්චි මහතා ලබන 12 වැනිදා දක්වා තවදුරටත් රක්ෂිත බන්ධනාගාර ගත කිරීමටද මහේස්ත්රාත්වරිය එහිදී වැඩිදුරටත් නියෝග කළාය.
එකවට නාවික හමුදාපතිවරයා ලෙස කටයුතු කළ අද්මිරාල් රවින්ද්ර විජේගුණරත්න මහතා මෙම නඩුවේ 10 වන සැකකාර ලුතිනන් ප්රසාද් හෙට්ටිආරච්චි නමැත්තා අපරාධ පරීක්ෂණ දෙපාර්තමේන්තුවේ අත්අඩංගුවට පත්වීමෙන් මගහැර සිටීමට උපදෙස් ලබාදී ඇති බවට පැහැදිලිව සාක්ෂි ඉදිරිපත් වී ඇති බව පෙන්වා දෙමින් පොලිස් පරීක්ෂක නිශාන්ත සිල්වා මහතා කරුණු දැක්වීය.
ප්රසාද් හෙට්ටිආරච්චි නමැති සැකකරුට රටින් පලායාමට නාවික හමුදාවට අයත් යැයි කියන ගිණුමකින් මුදල් ලබාදී ඇති බවට හා ඒ සඳහා අද්මිරාල් රවීන්ද්ර විජේගුණරත්න මහතාගේ මැදිහත්වීමක් ඇති බවට පෙර නඩු දිනයේදී කළ කරුණු දැක්වීමට අදාළ විමර්ශනවල ප්රගතිය පිළිබඳව මහේස්ත්රාත්වරිය විමර්ශන නිලධාරීන්ගෙන් විමසා සිටියාය.
එහිදී විමර්ශන භාරව සිටින අපරාධ පරීක්ෂණ දෙපාර්තමේන්තුවේ සමූහ මංකොල්ලකෑම් විමර්ශන ඒකකයේ ස්ථානාධිපති පොලිස් පරීක්ෂක නිශාන්ත සිල්වා මහතා පෙන්වා දුන්නේ අද්මිරාල් රවීන්ද්ර විජේගුණරත්න නාවික හමුදාපතිවරයා ලෙස කටයුතු කළ සමයේදී සැකකාර ලුතිනන් කමාන්ඩර්වරයාට අපරාධ පරීක්ෂණ දෙපාර්තමේන්තුවට කොටු නොවී සිටින ලෙසට අවවාද කළ බවටද සාක්ෂි ඉදිරිපත් වී ඇති බවයි.
සැකකරු භාරයේ තිබියදී අත්අඩංගුවට ගත් ජාතික හැඳුනුම්පත් දෙක කන්තලේ අග්බෝපුර ප්රදේශයේ පදිංචි සිවිල් ආරක්ෂක සෙබළකුට හා තල්දූව ප්රදේශයේ පදිංචි පුද්ගලයකුට අයත් බව මතෛක් සිදුකළ විමර්ශන අනුව අනාවරණය වී ඇතැයි ද පොලිස් පරීක්ෂක නිශාන්ත සිල්වා මහතා අධිකරණයට පෙන්වා දුන්නේය.
සිවිල් ආරක්ෂක සෙබළා 2004 වසරේදී විශේෂ රාජකාරියකට කොළඹ පැමිණි අවස්ථාවකදී ජාතික හැඳුනුම්පත නැතිවී ඇති බව ඔහුගෙන් ලබාගත් ප්රකාශ අනුව පැහැදිලි වන්නේ යැයිද එහිදී පෙන්වා දුන් පොලිස් පරීක්ෂකවරයා තල්දුව ප්රදේශයේ පදිංචිකරු ඔහුට අයත් ජාතික හැඳුනුම්පත මේ දක්වා භාවිත කරන බව අනාවරණය වී ඇතැයිද පෙන්වා දුන්නේය.
සැකකරුට අයත් යැයි කියන මුදල් විවිධ බැංකු ආයතන කිහිපයක තැන්පත් කර ඇති බව තොරතුරු අනාවරණය වී ඇති බව පෙන්වා දෙමින් විමර්ශන නිලධාරීන් කළ කරුණු සලකා බැලූ මහේස්ත්රාත්වරිය සැකකරුට අයත් බැංකු ගිණුම් සම්බන්ධයෙන් විස්තර අපරාධ පරීක්ෂණ දෙපාර්තමේන්තුවට ලබාදෙන ලෙසට රාජ්ය හා පෞද්ගලික බැංකු ආයතන 22කට නියෝග කළාය. එම අපරාධ සම්බන්ධයෙන් සිදුකරන විමර්ශන සඳහා අවශ්ය ප්රකාශ සැකකරුගෙන් ලබාගැනීමට අපරාධ පරීක්ෂණ දෙපාර්තමේන්තුවට අවශ්ය පහසුකම් සලසන ලෙසටද මහේස්ත්රාත්වරිය එහිදී බන්ධනාගාර අධිකාරිවරයාට නියෝග කළාය.
විමර්ශනවලදී හෙළිවන තොරතුරු අනුව සැකකරුගෙන් බන්ධනාගාරය තුළදී ප්රකාශ ලබාගැනීමට විමර්ශන නිලධාරීන්ට මහේස්ත්රාත්වරිය පෙර නඩු දිනයේදීද අවසර ලබාදී තිබුණි. හෙළිවන තොරතුරු අනුව සැකකරුගෙන් ප්රකාශ සටහන් කිරීමට පියවර ගත් නමුත් මතක නෑ. දන්නේ නෑ යන අදහස් පමණක් සැකකරු ප්රකාශ කිරීම නිසා විමර්ශන ප්රමාද වන බවද පොලිස් පරීක්ෂකවරයා එහිදී අධිකරණයට පෙන්වා දුන්නේය.
එහිදී එම සැකකරු වෙනුවෙන් පෙනී සිටි නීතිඥ කල්ප පෙරේරා මහතා කරුණු දක්වමින් පසුගිය 15 වැනිදා එම සැකකරු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන අධිකරණයට ඉදිරිපත් කළ අවස්ථාවේදී නීතිඥ අජිත් ප්රසන්න මහතා එම සැකකරු වෙනුවෙන් පෙනී සිට කරුණු දක්වා ඇත්තේ සැකකරුගේ උපදෙස් ලබාගැනීමකින් තොරව බව පෙන්වා දුන්නේය. එම නීතිඥවරයාට සැකකරු වෙනුවෙන් පෙනී සිටීමට සිය සේවාදායකයා උපදෙස් ලබාදී නොමැති බවද සැකකරුගේ නීතිඥවරයා එහිදී අධිකරණයට පෙන්වා දුන්නේය.
එම නීතිඥවරයා එදින එලෙස කටයුතු කර ඇතිනම් එය ඉතා බරපතළ කරුණක් බව පෙන්වා දුන් මහේස්ත්රාත්වරිය එම කරුණු නැවත විත්ති කූඩුවේ සිටින සැකකරුගෙන් විමසා බලන ලෙස නීතිඥ කල්ප පෙරේරා මහතාට දැනුම් දුන්නේය. අධිකරණයේ අවසරය ඇතිව සැකකරුගෙන් ඒ සම්බන්ධයෙන් විමසා සිටි අවස්ථාවේදී සැකකාර ලුතිනන් කමාන්ඩර් ප්රසාද් හෙට්ටිආරච්චි මහතා ‘මම වෙනුවෙන් පෙනී සිටින්න කියලා මම ඒ නීතිඥ මහත්තයාට කීවේ නෑ. මම වෙනුනේ පෙනී සිටින්නද කියලා එයා මගෙන් ඇසුවෙත් නෑ. යනුවෙන් ප්රකාශ කළේය.
