Blog

පාර්ලිමේන්තුවට ඉදිරිපත් කරන විසිවැනි ව්‍යවස්‌ථා සංශෝධනය සම්බන්ධව ජනාධිපති, අගමැති, හිටපු ජනාධිපති සහ පාර්ලිමේන්තුවේ සියලු මන්ත්‍රීවරුන් සමග සාකච්ඡා කිරීමට ජනතා විමුක්‌ති පෙරමුණ කටයුතු කරන බව එම පෙරමුණේ පාර්ලිමේන්තු මන්ත්‍රී විජිත හේරත් ඊයේ (17 දා) ප්‍රකාශ කළේය.

විධායක ජනාධිපති ක්‍රමය අහෝසි කිරීමේ යෝජනාවක්‌ විසිවැනි ව්‍යවස්‌ථා සංශෝධනය ලෙස ජනතා විමුක්‌ති පෙරමුණ විසින් මැයි 08 වැනිදායින් අරඹන නව පාර්ලිමේන්තු සැසියේදී සභාවට ඉදිරිපත් කරන බව විජිත හේරත් කීවේය.

මෙම සංශෝධනය හෙට (19 දා) පාර්ලිමේන්තුවට ඉදිරිපත් කිරීමට සියලු කටයුතු සූදානම් කර තිබුණද ජනාධිපතිවරයා විසින් පාර්ලිමේන්තු සැසිය කල් තැබූ නිසා එය මැයි මස දක්‌වා ප්‍රමාද වන බවද විජිත හේරත්කීවේය.

මෙම සංශෝධනය පාර්ලිමේන්තුවට ඉදිරිපත් කළ පසුව ඊට සහාය ලබා ගැනීම සඳහා ජනාධිපති මෛත්‍රිපාල සිරිසේන, අගමැති රනිල් වික්‍රමසිංහ, හිටපු ජනාධිපති මහින්ද රාජපක්‌ෂ, විපක්‍ෂ නායක ආර්. සම්බන්ධන් සහ පාර්ලිමේන්තුවේ සියලු පක්‍ෂ නායකයන් හා මන්ත්‍රීවරුන් සමග ජනතා විමුක්‌ති පෙරමුණ සාකච්ඡා පවත්වන බවද විජිත හේරත්  කීවේය.

කුරුණෑගල දිස්ත්‍රික් පාර්ලිමේන්තු මංත්‍රී මහින්ද රාජපක්ෂ පෙරටු කොට ගෙන විවිද අවස්ථාවන්වල ‘නරුම’ රංගයන් ඉදිරිපත් කරන ‘ඒකාබඩ්ඩ විපස්සය’ තවත් රංගනයට සැරසෙන බව මාධ්‍ය වාර්තා කරමින් සිටියි.

එය නම්, වත්මන් පාර්ලිමේන්තුවේ විපක්ෂනායක ආර්. සම්බන්ධන් මහතාට එරෙහිව විශ්වාසයභංගයක් ගෙන ඒමයි. 

අගමැතිට එරෙහි විශ්වාසභංගය භංග වූ වහාම

රනිල් වික්‍රමසිංහ අගමැතිවරයාට එරෙහි විශ්වාසභංගයක් ගෙන ආ ‘ඒකාබඩ්ඩ විපස්සය’ එයින් පැරදී ගියේ පසුගිය අප්‍රේල් 4වනදාය. අගමැතිවරයා හෝ යහපාලනය පිළිබදව වන තත්ත්වය පිළිබද සතුටුදායක තත්ත්වයක ලියුම්කරු නොපවතිනමුත් ‘‘ඒකාබඩ්ඩ විපස්සය’ මෙවැනි නාටකයන් රග දක්වන්නේ ඇයි යන්න පොදු පුරවැසියාට නොතේරෙන්නේ නැත.

ඉන් එකක් නම් රාජපක්ෂලා ප්‍රමුඛ නඩයට එරෙහි මේ වන විට එල්ලවී ඇති දූෂණ චෝදනාවලින් කිසියම් දුරකට හෝ කල් මැරීමක්, එසේත් නැතිනම් ඒවාට ඇති වලංගුබාවය දුර්වල කිරීමක් ප්‍රමුඛය. ඒත් සමගම විශ්වාසභංගය පැවති අවස්ථාවේ සිරිසේන ජනාධිපතිවරයාගේ පක්ෂයේ හෙවත් ශ්‍රී ලංකා නිදහස් පක්ෂයේ ස්ථාවරය පිළිබද ජනාධිපතිවරයා උපුටා දක්වමින් නියෝජ්‍ය කතානායක පාර්ලිමේන්තු මංත්‍රී තිලංග සුමතිපාල මහතාගේ කටින් පැනපු සත්‍ය සැගවීමට උත්සහ කළ කතාව යළි ඇසීමට යෝජනා කරමි. එසේම විශ්වාසභංගය පිළිබද පැවති විවාදයේදී, පාර්ලිමේන්තු මංත්‍රී එම්. ඒ. සුමන්තිරන් මහතාගේ හරබර කතාවත් යළි ඇසීම වැදගත් යැයි හැගෙන්නේ ජනාධිපතිවරයා, ඒකාබද්ධ විපක්ෂය සහ ජාතික ගැටලුව මෙන්ම සිංහල නොවන ජනයා මුහුණ දෙමින් සිටින ප්‍රශ්ණයේ තවත් මානයක් තේරුම් ගැනීමට එය පාලමක් යෝජනා කරන බැවිනි.

සම්බන්ධන් සහ 2015 ජනවාරි 8

දෙමළ ප්‍රජාතන්ත්‍රවාදී දේශපාලනය තුළ ආර්. සම්බන්ධන් යනු පුළුල් දේශපාලන දැක්මක් ඇති පිළිගත් දේශපාලනඥයකි. එසේම ආර්. සම්බන්ධන් ශ්‍රී ලංකා පාර්ලිමේන්තුවේ විපක්ෂනායක ධූරයට පත්කර ගැනීමට හැකි වීම ලංකාවේ ප්‍රජාතන්ත්‍රවාදයට ඊටත් වඩා වටිනාකමක් එක් කළ සළකුණක් විය.

ඒ මක්නිසාද? ඒ අන් කිසිවක් නිසා නොව, ලංකාවේ කේන්ද්‍රීය ගැටලුවක් වන ‘ජාතික ගැටලුව’ සදහා දේශපාලන විසදුමක් සියලු දෙනා එක්ව සොයාගැනීම සදහා පළමුව බිදී ගිය විශ්වාසය යළි තහවරු කිරීම ප්‍රමුඛ කරුණක් වන නිසාය. එය සරලව කිවහොත් ශ්‍රී ලංකා පාර්ලිමේන්තුව තුළ ප්‍රධාන භුමිකාවකට දෙමළ ජාතිකයෙක් පත්කර ගැනීම එතෙක් පීඩාවට පත්කර සිටි දෙමළ ජනයාට බලාපොරොත්තුවක් ඇති කරන්නක් වීමය.(නමුත් එය තවමත් ප්‍රායෝගික වූවාද නැතිද යන්න වෙනම විමසිය යුතු කරුණකි)

ප්‍රධානම කරුණ පාර්ලිමේන්තුවේ ප්‍රධාන භුමිකාවන්,‘සිංහල බෞද්ධ’ අධිපති ධාරාව පමණක් නියෝජනය කරමින් සිටි වකවානුවන සම්බන්ධන් විපක්ෂනායක කරගැනීමට හැකිවීම ප්‍රජාතන්ත්‍රවාදය පැත්තෙන් සුභදායක ලකුණක් එක් කළේය. එය අනෙක් පැත්තෙන් ‘මේ රට සිංහලයන්ගේ පමණයි’ යන ගෝත්‍රික මතවාදයන් උස්සගන කෑ මොර දෙන කහ සිවුරුකාරයන්ට ප්‍රජාතන්ත්‍රවාදීව දෙනු ලැබූ පිළිතුරකි.

අනෙක් පසින් සිංහල නොවන ජනයාට ප්‍රජාතන්ත්‍රවාදය පිළිබද නව බලාපොරොත්තු ඇති කරන ලද්දකි.

නමුත්, ‘ඒකාබඩ්ඩ විපස්සය’ සහ එහි සිටින ජාතිවාදීන් එදා සිට කුරුමානම් ඇල්ලුවේ මේ ප්‍රජාතන්ත්‍රවාදී පියවර විනාශ කිරීම සදහාය. නමුත් වසර 3කත් යන තුරු විවිද උප්පරවැට්ටි දැමුවාට එය විනාශ කිරීමට පුලුවන් කමක් ලැබුණේ නැති වුවත් 2015 ජනවාරියේ ‘යහපාලනයට’ ඡන්දය දුන් දෙමළ, මුස්ලිම් ඇතුලු ජනතාවගේ මූලික අපේක්ෂාවන් බොහෝමයක් ඉටු කිරීමට යහපාලනය සමත් වූයේ නැත. එයින් දැන් ඕනෑවටත් වඩා සතුටු වන්නේ අන් කිසිවෙක් නොව, රාජපක්ෂලා ප්‍රමුඛ නඩය ය.

නමුත් දැන් එක් විශ්වාසභංගයක් පරාද වුවත් තවත් විශ්වාසභංගයක් ගෙන එමින් එය යළි උරගා බැලීමට මේ නරුම දේශපාපලකයන් උනන්දු වනු පෙනේ. මෙය එක් පැත්තකින් ‘නරුම’ ඒකාබඩ්ඩ විපස්සයේ ඩීල් දේශපාලනයට මෙන්ම කොක්කෙන් හෝ කෙක්කෙන් ආණ්ඩු බලය ලබා ගන්නට කැස කවන රාජපක්ෂලාට අනියමින් මෙන්ම විටක සෘජුවම ආශිර්වාදයකි. නමුත් මේ අශිර්වාදය අනාගත ලංකාවට නම් ඛේදවාකචයක් බව අමුතුවෙන් කිව යුතු නොවේ.

යළිත් හැරවිය නොහැකි ලෙස පසුපසට?

කිසියම් අන්දමකින් ආර්.සම්බන්ධන් විපක්ෂනායකවරයාට එරෙහිව විශ්වාසභංගයක් ගෙන ආවොත් එය මේ වසර 3 තුළ යම් හෝ ප්‍රගතිශීලි දේවල් කුඩා ප්‍රමාණයක් හෝ දිනා සිටියත් වැඩක් වන්නේ නැත.

යුද්ධය සමයේ අතුරුදහන් වූවන් ඉල්ලා උපවාස කරන දෙමාපියන්ට තවමත් යුක්තිය ඉටුවී නැති, මිනිසුන්ගේ ඉඩම්වලින් තවමත් හමුදාව ඉවත්ව නැති, උතුර හමුදකරනයෙන් මුදවාලන්නනට වන උතුරේ මිනිසුන්ගේ ඉල්ලීමට තවමත් යුක්තිය ඉටු වී නැති, උතුරේ සිදුකල ජනමාධ්‍ය මර්දනයට වගකිව යුත්තන් තවමත් නීතිය හමුවට පැමිණවීමට නොහැකි තත්ත්වයක් තුළ දෙමළ ජනයා සිටින්නේ බලාපොරොත්තු සුන්වූ තත්ත්වයක බව අමුතුවෙන් ලියා තැබිය යුතු නැත. වෙඩි හඩ නොඇසුනාට තවමත් ඔවුන් සිටින්නේ පීඩාකාරී තත්ත්වයකින් බව නාගදීපෙ යන උපාසක උපාසිකාවන්ට පෙනෙන්නේ නැති වුවත් යථාර්ථය නම් ඔවුන් සිටින්නේ පීඩාවකිනි.

‘යහපාලන ආණ්ඩුව පත් වුනාම අපි සතුටු උනා. අපිට මොනව හරි හොදක් වෙයි කියලා, ඒත් අද අපිට උනේ අපේ මැරුණ අය සිහිකරන කොට ඔවුන් උසාවි ගිහින් ඒවා කරන්න එපා කියලා අධිකරණ නියෝග ගන්නවා. අපිට දුකයි’ 2017 මැයි මස 18වනදා මුල්ලිවෛක්කාල්වල මරා දැමූ මිනිසුන් සිහිකිරීම වලක්වමින් මුලතිව් පොලීසිය අධිකරණ නියෝගයක් ගත් අවස්ථාවේ එහි සිටි තරුණයෙක් කීවේ එළෙසිනි. තවත් උදාහරන ඕනෑ තර්ම් තිබේ.

දැන් පාර්ලිමේන්තුවේ සිටින ඔවුන්ගේ ප්‍රධාන නියෝජිතයාට එරෙහිව, දකුණේ මංත්‍රීවරු විශ්වාසභංගයක් ඉදිරිපත් කළහොත් ඔවුන් සිතන දෙය කුමක් විය හැකිද? උතුරේ මිනිසාට විශ්වාසයේ දෑත් දිගු කර ගන්නට බැරිව සිටින දකුණේ මිනිසා මෙසේ කරන විට මේ දකුණේ මෙම ‘නරුම තක්කඩියන්ට’ උතුරේ දෙමළාගේ සිතිවිලි වැදගත් වන්නේ නැති බව හුස්ම ගන්නා මිනිසුන් නොදන්නේ නොවේ.

එහෙත් දැන්වත් මේ පොළොව සුවපත් කළ යුතුය. යුද උන්මත්තකයින් සහ ජාතිවාදීන් ගිණිතැබූ මේ පොළොව දැන්වත් සුවපත් කළ යුතුය. මේ පොළොවේ මිනිසුන් සුවපත් කල යුතුය. ඔවුන්ට නිදහසේ ඉන්නට පරිසරය සකස් කළ යුතුය. අවම තරමින් ඔවුන්ට ඔවුන් වෙන්නට ඉඩ දිය යුතුය.

එබැවින් එවැනි නරුම නාටකයන් උපන්ගෙයිම විනාශ කිරීම පුරවැසියන්ගේ මෙන්ම පාර්ලිමේන්තුව තුළ ජාතිවාදයට විරුද්ධ ඉතිරි වී ඇති පාර්ලිමේන්තු මංත්‍රීවරුන්ගේ වගකීමක් වන්නේය.

තවද ජනවාරි 8 වෙනසට උර දුන් සිවිල් සංවිධාන වල ද ප්‍රමුඛ වගකීමක් වන්නේ එවන් තත්ත්වයකට පත්වීම වැලැක්වීමට හැකි සෑම පියවරක්ම ගැනීමය.

ශ්‍රී ලංකා පොදුජන පෙරමුණට වැඩි මන්ත්‍රී ධුර සංඛ්‍යාවක් හිමි වූ මොරවැව ප්‍රාදේශීය සභාවේ බලය එක්සත් ජාතික පක්ෂය හා එක්සත් ජනතා නිදහස් සන්ධානය සමත් විය.

සභාපති ධුරයට ශ්‍රී ලංකා පොදුජන පෙරමුණින් ඩබ්.ආර්. ජගත් කුමාර මහතාත් එක්සත් ජනතා නිදහස් සන්ධානයෙන් පොල්හේන්ගොඩ උපරතන හිමිත්  අතර පැවති ඡන්ද විමසීමේදී  ජන්ද හතක් ලබා ගත් ජගත් කුමාර  මහතා පරදවා ඡන්ද නවයක් ලබාගත් උපරතන හිමියෝ ජයග්‍රහණය කළහ.

උපරතන හිමිගේ ජයග්‍රහණය වෙනුවෙන්  ඉලංගෙයි තමිල්අරසු කච්චි  මන්ත්‍රී ටී.රාජමනි මහතාද  සිය ඡන්දය ලබාදීම විශේෂත්වයකි. උපසභාපති ධුරයට එක්සත් ජාතික පක්ෂයේ  සාලිය  රත්නායක  මහතා හා පොදුජන පෙරමුණින්  සම්පත් සිරිසේන මහතා අතර පැවැති ඡන්දයේදී සාලිය රත්නායක මහතා ජය ගත්තේය.

මෙම ඡන්ද විමසීම  පළාත් පාලන කොමසාරිස් එම්.වයි.සලිම් මහතාගේ ප්‍රධානත්වයෙන්  පැවැත්වුණි. මොරවැව ප්‍රාදේශීය සභාවේ  සභික ධුර සංඛ්‍යාව 16කි.

ඉන් හතක් ශ්‍රී ලංකා පොදුජන පෙරමුණට හිමි අතර එක්සත් ජාතික පක්ෂයට හා එක්සත් ජනතා නිදහස් සන්ධානයට හතර බැගින් සභික ධුර අටක්ද  ඉලංගෙයි තමිල් අරසුකච්චි පක්ෂයට එක් සභික ධුරයක්ද හිමි වී තිබේ.