ශ්රී ලංකා සහ බංග්ලාදේශ ක්රිකට් කණ්ඩායම් දෙක අතර කලකට ඉහතදී තිබුණේ දැඩි මිත්රත්වයකි. දෙරටේ ප්රේක්ෂකයෝ අතරද එලෙසය. බොහෝ ශ්රී ලාංකික ප්රේක්ෂකයෝ තම මව් රටෙන් පසු බංග්ලාදේශ ක්රිකට් කණ්ඩායමට සහාය පළ කළහ. සමහරු බංගලි ක්රීඩකයන්ගේ දක්ෂතා ඉතා ඉහළින් වර්ණනා කළහ. එකල එම ජාතික කණ්ඩායමේ ප්රධාන පුහුණුකරු වූයේ චන්දික හතුරුසිංහය. ඔහු වසර කිහිපයක් ඇතුළත බංගලි ක්රිකට් කණ්ඩායම සිටි තැනින් පියවර කිහිපයක් ඉදිරියට ගෙනාවේය.
චන්දික හතුරුසිංහ එරට ක්රිකට් පුහුණුකරු තනතුරෙන් ඉවත් වී මෙරට ජාතික ක්රිකට් කණ්ඩායමේ ප්රධාන පුහුණුකරු ලෙස වැඩ භාර ගැනීමත් සමඟ සියල්ල කණපිට හැරුණි. බංගලි ක්රීඩකයෝ සහ ප්රේක්ෂකයෝ බහුතරයක් අප සමඟ නිස්කාරණයේ අමනාප වූහ. ඔවුන්ගේ ප්රධාතනම හතුරා බවට පත්වූයේ චන්දික හතුරුසිංහයි. එහෙත් හතුරුසිංහ එම ක්රිකට් කණ්ඩායමට කිසි දිනක හතුරුකමක් කර නොමැත. සිදු කළේ සේවයක් පමණි.
සිතින් හතුරුවී සිටි බංගලි ක්රීඩකයෝ එළිපිටම තම හතුරුකම් පෙන්නන්නට පටන් ගත්තේ පසුගිය ජනවාරි මාසයේ සිටය. මෙරට ජාතික ක්රිකට් කණ්ඩායම ජනවාරි මාසයේදී බංග්ලාදේශය බලා පිටත්වූයේ ටෙස්ට් සහ තුන්කොන් එක්දින තරගාවලියක් සඳහා සහභාගි වීම සඳහාය. එහිදී බංග්ලාදේශ ක්රිකට් කණ්ඩායමේ නායකයා වියරුවෙන් මෙන් මාධ්යවලට පවසා තිබුණේ ශ්රී ලංකා ක්රිකට් කණ්ඩායමට අමතක නොවන පාඩමක් උගන්වන බවය.
තත්ත්වය එලෙස තිබියදී දෙරට අතර පැවති ටෙස්ට් තරගයකදී පන්දුවට පහර දෙමින් සිටි ලක්ශාන් සදකැන් එල්ල කළ පහරක් ඔහු ආසන්නයේම පන්දු රකිමින් සිටි ක්රීඩකයාගේ පාදයේ වැදුණි. අත්වැරදීමකින් සිදුවූ එම සිදුවීමට ලක්ශාන් සදකැන් තම මහත්මා ගතිය පෙන්වමින් ඔහුට සමාවන්න යෑයි පවසා පිටට තට්ටුවක්ද දමා තව මොනවාදෝ පැවසීමට සැරසුණේය. ඒ සමඟම කඩුලු රකිමින් සිටි මුෂ්පිකර් රහීම් පැමිණ ලක්ශාන් සදකැන් පසෙකට තල්ලු කරමින් ඔහුට මොනවාදෝ පැවසුවේ ලෝකයටම තමන්ගේ ගුණමකුකම පෙන්වමින්ය.
එදින සිටි විස්තර විචාරකයෝ පවා එම සිදුවීම දැඩි ලෙස විවේචනය කළහ. ඒ අතර තවත් අවස්ථා ගණනකදීම සමහර බංගලි ක්රීඩකයෝ මෙරට ක්රීඩකයන්ට විවිධ කෙණෙහිලිකම් කළහ. එහෙත් මෙරට ක්රීඩකයෝ තඹ සතේකටවත් ඒවා මායිම් නොකර සිනාමුසු මුහුණින් යුතුව ක්රීඩා කළහ.
ටෙස්ට් තරගාවලිය අවසන් වී පටන්ගත් එක්දින තරගයකදී අපූරු සිදුවීමක් සිදුවිය. පන්දුවට පහර දෙමින් සිටියේ ධනුෂ්ක ගුණතිලකයි. පිටිය සිසාරා හතරේ සීමාවෙන් එපිටට පහරවල් කිහිපයක් එල්ල කළ ඔහු බංගලි ක්රීඩකයන්හට දැඩි පීඩනයක් එල්ල කරමින් සිටියේය. ඒ සමඟම නොසිතූ අවස්ථාවක උඩ පන්දුවක් දී ඔහු දැවී ගියේය. බංගලි ක්රීඩකයෝ සහ ප්රේක්ෂකයෝ ඉතා ඉහළින් එම අවස්ථාව සැමරූහ. ඒ අතර නස්මුල් ඉස්ලාම් අත්දෙක ඉහළට ඔසවා අමුතුම ආකාරයේ නයි නැටුමක් ඉදිරිපත් කළේ සමාජ අවධානයද ඒ දෙස යොමුකර ගනිමින්ය.
එම තරගයෙන් ශ්රී ලංකා කණ්ඩායම ජයග්රහණය කිරීමත් සමඟ ධනුෂ්ක ගුණතිලකද නස්මුල් ඉස්ලාම්ට නොදෙවැනි නයි නැටුමක් ඉදිරිපත් කළේය. එලෙස පටන් ගත් නයි නැටුම බංගලි ක්රීඩකයෝ අවස්ථා කිහිපයකදීම අපට පෙන්නූහ. සමහරු පවසන්නේ එලෙස ඔවුන් නයි නැටුම පෙන්වන්නේ චන්දික හතුරුසිංහ මුල් කරගෙන බවයි. ඒ සමඟම බංගලි ක්රීඩකයෝ එන්න එන්නම ශ්රී ලාංකික ක්රීඩකයන්ට එදිරිවාදිකම් දැක්වූහ. ඔවුහු අප සමඟ තරග කළේ පුදුම වෛරයකිනි.
මෙරට පැවැති නිදහස් කුසලාන තරගාවලියේ දී ඔවුහු ඒ බව තවත් ඔප්පු කර පෙන්වූහ. එහිදී දෙරට අතර පැවැති පළමු තරගයේ දී බංගලි ක්රීඩකයෝ ජයග්රහණය කළහ. එහෙත් ඔවුන් ඒ ජයග්රහණය සැමරුවේ මහත්මා ගතියකින් තොරව ඉතාමත් වියරු ආකාරයෙන්ය. මුෂ්පිකර් රහීම් යළිත් නයි නැටුමක් පෙන්වමින් පිටිය මැද හැසිරුණේ සිහිය විකල් වූ පුද්ගලයකු මෙන්ය.
පසුගිය 16 වැනිදා නිදහස් කුසලාන තරගාවලියේ ශ්රී ලංකාව සහ බංග්ලාදේශය අතර තරගයක් පැවතිණි. අවසන් මහ තරගයට සුදුසුකම් ලබන්නේ එම තරගයෙන් ජය ගන්නා කණ්ඩායමයි. එම නිසා කණ්ඩායම් දෙකටම එය වැදගත් තරගයක් විය. මෙම තරගාවලිය සඳහා සහභාගි නොවූ බංගලි කණ්ඩායමේ තුන් ඉරියව් ක්රීඩක ෂකිබ් අල් හසන්ද මෙම තරගය සඳහා විශේෂයෙන්ම කැඳවා තිබිණි.
ෂකිබ් අල් හසන් දක්ෂ ක්රීඩකයකු වුවත් විනය අතින් ඉතා පහත් තත්ත්වයේ සිටින අයෙකි. වරක් ඔහු තරගයක පරාජය ඉවසා ගැනීමට නොහැකිව තමන් හැඳ සිටි කලිසම කැමරාව ඉදිරිපිට ගලවා තම අවයව ලෝකයටම පෙන්වූ ගෝත්රික ගණයේ අයෙකි. එමෙන්ම රූප රාජිනියක් දූෂණය කළ වේග පන්දු යවන්නෙක්ද එම කණ්ඩායමේ සිටී.
එවැනි ගෝත්රික ගණයේ ක්රීඩකයන්ගෙන්ද සමන්විත බලඇණියක් සමඟ ඔවුහු එම තරගයට සහභාගි වූහ. එහෙත් තරගයේ අවසන් පන්දු ඕවරයේ දී යළිත් ෂකිබ් අල් හසන් සහ තවත් ක්රීඩකයන් කිහිප දෙනෙක් තම රට ගැනවත් නොසිතා ගෝත්රිකයන් මෙන් හැසිරුණහ.
විනිසුරු තීරණයට අවනත නොවෙමින් ෂකීබ් අල් හසන් ඇතුළු කිහිප දෙනෙක් ක්රිකට් ක්රීඩාවට උචිත නොවන අයුරින් හැසිරුණහ. ඔවුන්ගේ එම නොහොබිනා හැසිරීම් නිසා තරගය මඳ වේලාවකට නතර කිරීමටද සිදුවිය. අවසානයේ ඉහළ නිලධාරීහු කිහිප දෙනෙක්ගේ මැදිහත්වීමෙන් පසු තරගය යළි ආරම්භ කළහ. එහිදී බංග්ලාදේශ ක්රීඩකයෝ තරගය ජයග්රහණය කළහ.
ගෝත්රිකයන්ටත් අන්ත වූ සමහර බංගලිදේශ ක්රීඩකයන් එම ජයග්රහණය සැමරුවේ ඔවුන්ගේ විවේකාගාරයේ තිබූ වීදුරු ආදිය කුඩු කරමින්ය. එතැනත් මුල්තැන ගෙන කටයුතු කර තිබුණේ ෂකීබ් අල් හසන්ය. විවේකාගාරයේ සියලුම වීදුරු කුඩු පට්ටම් කරමින් ක්රිකට් ක්රීඩාවේ පමණක් නොව තම මව් රටේ නමද ඔවුහු කෙළෙසා ගත්හ.
එම සිදු වීමෙන් පසු බොහෝ ක්රිකට් විචාරකයන් පැවසුවේ ශකීබ් අල් හසන් ඇතුළු විනය විරෝධී ලෙස හැසිරුණ සියලු ක්රීඩකයන්ට දැඩි දඬුවම් අයි.සී.සී. ය විසින් ලබාදිය යුතු බවයි.
මේ අතර එම සිද්ධිය ගැන ශ්රී ලංකා ක්රිකට් පිලේ හිටපු ප්රවීණ ක්රීඩකයෙක් මෙන්ම නායකයෙක්ව සිටි තිලකරත්න දිල්ශාන් පවසා සිටින්නේ ද මහත්වරුන්ගේ ක්රීඩාවට බංගලාදේශයේ හැසිරීම යෝග්ය නොවන බවයි
එදා ග්රවුන්ඩ් එකේ හිටියාද?
නෑ.
එතකොට මේ සිද්ධිය දැක්කේ?
මං ටී.වී. එකෙන් තමයි මේ සිද්ධිය දැක්කේ.
මේ සිද්ධිය ප්රවීණ ක්රිකට් ක්රීඩකයෙක් විදිහට ඔබ දකින්නේ කොහොමද?
ක්රිකට් හඳුන්වන්නේ මහත්වරුන්ගේ ක්රීඩාව කියලා. ඉතින් එදා වෙච්ච සිද්ධිය ක්රිකට් වලට එතරම් හොඳ නෑ කියලයි මට හිතෙන්නේ.
ඒ ප්රශ්නය ඇතිවෙන්න යම් දෝෂයක් සිදුවුණාද?
කණ්ඩායම් දෙකම ඒ වෙලාවේ හිටියේ ජයග්රහණය කිරීමේ අපේක්ෂාවෙන්. මං දැක්ක විදිහට නම් එතැනදි මිස්ටේක් එකක් වුණා.
බංග්ලාදේශ ක්රීඩකයින්ගේ හැසිරීම?
තරගයකදී ඔය වගේ දේවල් වෙන්න පුළුවන්. තරගයෙන් පස්සේ ඒ දේවල් තියාගන්න හොඳ නෑ. එතනින් පස්සේ වැඩේ ඉවරයි. ඒත් බංග්ලාදේශ ක්රීඩකයින් ඩ්රේසිං රූම් එකට හානි කරලා තිබුණ ඒවානම් අනුමත කරන්න බැහැ.
බංග්ලාදේශ ක්රීඩකයින්ට ලැබුණු දඬුවම ප්රමාණවත් කියලා හිතනවද?
තරග තීරක තමයි ඒ සඳහා මොකක්ද කරන්නේ කියලා තීරණය කරන්නේ. නමුත් මගේ පෞද්ගලික මතය නම් මීට වඩා දඬුවම වැඩි වෙන්න තිබුණා කියන එකයි.
ඔබ මේ වගේ අවස්ථාවක හිටියනම්?
මම හිටියනම් මටත් කේන්ති යයි. ඒත් එවලෙට විතරයි. අපිටත් එහෙම දේවල් වෙලා තියෙනවා. මැච් එකෙන් පස්සේ අපි ආයිත් කතා කරලා ඒක අමතක කරනවා. මොකද අපි ආයෙත් කවදා හරි ඔවුන් එක්ක ක්රීඩා කරන්න ඕනේ. තරහ දිගටම අරන් යන්න හොඳ නෑ.
ශ්රී ලංකා ක්රීඩකයින් හැසිරුණු ආකාරය?
අපේ ප්ලේයර්ස්ලා හොඳට හිටියා. විරුද්ධ ක්රීඩකයින් හැසිරුණ ආකාරයට තමයි අපේ ප්ලේයර්ස්ලා දෙන්නෙක් වගේ හැසිරුණේ.
මේ ඇතිවෙච්ච ප්රශ්නයෙන් ඔබ හිතන විදිහට මොකක්ද ගතයුතු දේ?
මේක පාඩමක් කරගෙන ඉදිරියට යන්න ඕනේ.
