Blog

සිය ඥාතියාගේ මරණය හේතුවක් කර ගනිමින් සිදු කරන ප්‍රචණ්ඩ ක්‍රියා නතර කරන ලෙස, තෙල්දෙණියේදී සිදු වූ පහරදීමෙන් මියගිය ලොරි රථ රියදුරු කුමාරසිංහගේ ඥාතීහු ගැටුමට සම්බන්ධ වී සිටින සියලු පාර්ශ්වවලින් ඉල්ලා සිටිති.

සිය ඥාතියාගේ මළ සිරුර නගරයට රැගෙන යෑමට විවිධ අය ඉල්ලා සිටි නමුත් ගමේ පන්සලේ ස්වාමීන් වහන්සේගේද අනුශාසනා මත තමන් ඊට එකඟ නොවූ බවද සැකකරුවන්ට එරෙහිව අධිකරණය මගින් නිසි ක්‍රියාමාර්ග ගනු ඇතැයි තමන් විශ්වාස කරන බවද ඔවුහු ප්‍රකාශ කරති.

‘අපි ඉල්ලන්නෙ මේ සිද්ධිය හින්දා අපේ මිනිස්සු ඇණකොටා ගන්න එක නතර කරන්න කියලා. මේකෙන් පස්සෙ කීදෙනෙක් නැති වුණාද? ඒ මරණවලට කවුද වගකියන්නෙ?’ මියගිය එච්.ඩී. කුමාරසිංහගේ සොහොයුරු එම්. ජයන්ත පවසයි.

‘දැන් ඔය හොඳටම ඇති ගහමරා ගත්තා. අපි ඉල්ලන්නෙ පුළුවන් නම් මේ ළමයින්ට සාධාරණයක් කරන්න.’ සොහොයුරිය නන්දාවතී මැණිකේ ප්‍රකාශ කරයි.

‘මොනවද දැන් මේ වෙන්නෙ? අපේ පුතා අපිට නැති වුණා. දැන් බලන්න, කී දෙනෙකුගෙ ළමයින්ට තාත්තලා දකින්න නැද්ද? ඒ තාත්තලා හිරේ ගිහින් තියෙන්නෙ මොනවටද? අනුන්ට ගහලා. මේවා නවත්තන්න කියලා ඉල්ලන්න විතරයි අපිට පුළුවන්.’ මියගිය කුමාරසිංහගේ මාමා වන ආර්. පියදාස කියයි.

එච්.ඩී. කුමාරසිංහගේ ගෙදරට පේරකැටිය, පුස්ගෝවට යා යුතුය. ඒ කියන්නේ මහනුවරත් පසු කර, දිගනත් පසු කර, තෙල්දෙනියත් පසු කර තවත් කිලෝමීටර් විස්සක් පමණ ඇතුළට යා යුතුය. ඒ පාරේ පදිංචිකරුවන් හැර අන් කිසිවකු යන්නේ කලාතුරකින් විය හැක. ඇත්තටම ඒ මග දුෂ්කරය. කඳුකරය ලස්සන වුණත්, ඒ යටින් දිවෙන ඇත්ත විශ්වාස කළ නොහැකි තරම් තිත්තය.

එච්.ඩී.කුමාරසිංහ යනු පසුගිය දින කිහිපයේ රට පුරා කතාබහට ලක් වූ කලහකාරී සිදුවීම් වලට මුල් වූ පුද්ගලයා ලෙස ඇතැමෙක් හඳුන්වන්නාය. මාධ්‍ය මගින් හිතෙන-හිතෙන දේ ලියමින්-කියමින් කළ විකාරයද මේ අත්තනෝමතික කලහකාරිත්වය අවුළුවන්නට සෑහෙන දායකත්වයක් ලබා දී තිබිණි.

තෙල්දෙනිය නගරයේ ඉන්ධන පිරවුම්හලේ අයිතිකරුවා සිංහ මුදලාලිය. ඒ වගේම කුමාරසිංහ රියැදුරු රස්සාව කළ ලොරියේ අයිතිකරුවාද ඒ මුදලාලිමය. දවල්ට ගෙදර නැති, මහ රෑට ගෙදර එන කුමාරසිංහ ඔය කියන විදිහට මේ සිද්ධියට වගකිව යුතුද?

කොළඹ සිට පෞද්ගලික සමාගමක කිරිපිටි තොගයක් පටවාගෙන එමින් සිටියදී තෙල්දෙනිය නගරයේදී ඔහුට පහර දී තිබේ. ලොරිය ඉස්සර කිරීමට එකවර ඉඩක් නොදීම ඊට ආසන්නතම හේතුව වී ඇතැයි ප්‍රකාශ වේ. මේ වන විට අදාළ පහරදීමට සම්බන්ධ වූ සියලු සැකකරුවන් අත්අඩංගුවට ගෙන රක්ෂිත බන්ධනාගාරගත කර ඇත.

පුළුවන් නම් මේ ළමයි දෙන්නට සාධාරණයක් කරන්න
එම්.ජයන්ත –
මිය ගිය කුමාරසිංහගේ සහෝදරයෙක්
‘අපේ අයියා කාටවත් කරදරයක් නැති කෙනෙක්. කොටින්ම හරියට ඇහෙන්න කතා කරන්නෙවත් නෑ. එයා කාලයක් රට හිටියෙ. ඔය රස්සාවට යන්න පටන් අරන් දැන් අවුරුදු එකහමාරක් විතර ඇති. උදේ පාන්දර වැඩට යනවා. මහ රෑට ගෙදර එනවා. එයාට යාළුවෙක් ආශ්‍රය කරන්නවත් වෙලාවක් නෑ. ඒක හින්දා මට හොඳටම විශ්වාසයි, මෙතැන වෙන කිසිම පෞද්ගලික ප්‍රශ්න මොකුත් නෑ කියලා.  දැන් අපිට වෙන්න තියෙන දේ වුණා. අයියා අපිට නැති කළා. අපි ඉල්ලන්නෙ මේකට සම්බන්ධ අයට උපරිම දඬුවම් දෙන්න කියලා. පහුගිය දවස් ටිකේ ඒ ගැන අපිට සැකයක් තිබුණා. ඒත් දැන් මේක උසාවිය ඉදිරියේ තියෙන හින්දා සාධාරණයක් වෙයි කියලා විශ්වාසයක් තියෙනවා.

අපි ඉල්ලන්නෙ මේ සිද්ධිය හින්දා අපේ මිනිස්සු ඇණකොටා ගන්න එක නතර කරන්න කියලා. මේකෙන් පස්සෙ කීදෙනෙක් නැති වුණාද. ඒ මරණ වලට කවුද වගකියන්නෙ. අපේ පන්සලේ හාමුදුරුවොත් අපිට කිව්වෙ අයියාගෙ මිනිය කොහෙවත් ගෙනියන්න දෙන්න එපා කියලා. අපි අයියාව පවුලේ සුසාන භූමියෙ මිහිදන් කළා. අයියගෙ මිනිය ගේනකොටත් ප්‍රශ්න ආවා. දිගන ටවුන් එකේ මිනිය තියාගන්න හැදුවා. පොලිස් ජීප් එකක් ආපු හින්දා තමයි මිනිය ගෙදරට ගේන්න පුළුවන් වුණේ. නැත්නම් අයියගෙ මිනිය පාරවල් ගාණෙ කුණු කරයි.

අපිට සල්ලි දෙන්න හැදුවා, අපි ලක්ෂ දෙකක් ගත්තා වගේ බොරු කතා මාධ්‍යවලිනුත් පැතිරෙව්වා. ෆේස්බුක් එකේ බොරු දැම්මා. අයියගෙ මළ ගෙදරට සෙනඟ ආවා තමයි. මේ දුෂ්කර පැත්තට කවදාවත් ආවෙ නැති අය අයියගෙ මළගෙදරට ආවා. ඒ ගොල්ලන්ගෙන් අපි සල්ලි ගත්තෙ නෑ. හැබැයි ඒ ගොල්ලො පස්සෙ අයියගෙ මිනිය අරන් යන්න ඉල්ලුවෙත් නෑ. සමහර මාධ්‍යවල ගියෙ අයියගෙ මිනිය ටවුන් එකට අරන් ගියා කියලා. හිස් පෙට්ටියක් මිනිය වගේ අරන් ගියා කියලත් බොරු කිව්වා. ඇයි මේ විදිහට මිනිස්සු ඇවිස්සුවෙ.

මං ඉල්ලීමක් කරනවා, අයියගෙ ළමයි දෙන්නෙක් ඉන්නවා. එක්කෙනෙකුගෙ වයස දහතුනයි. අනෙක් එක්කෙනාට එකොළහයි. පොඩි පුතාට ආබාධිත තත්ත්වයකුත් තියෙනවා. අම්මාට බෙහෙත් ගන්න මාසෙකට ලොකු ගාණක් යනවා. නංගි රස්සාවක් කරන්නෙත් නෑ. සහෝදර-සහෝදරියො විදිහට අපිට වුණත් උදව් කරන්න පුළුවන් සීමාවක් තියෙනවා. ඇත්ත කතාකරන්න ඕනනෙ.

අයියා රට ගිහින් අවුරුදු හයක් හිටියා. ඒ හම්බකරපු සල්ලි ඔක්කොම වියදම් කළේ ඔය අසනීපවලට තමයි. ඒක නිසා අයියට උදව් කරන්න ඇත්තටම ඕනෙ නම් මේ ළමයින්ට උදව්වක් කරන්න කියලා මං හැමෝගෙන්ම ඉල්ලනවා.’

දැන් ඔය හොඳටම ඇති ගහමරා ගත්තා
– නන්දාවතී මැණිකේ –
මිය ගිය කුමාරසිංහගේ සොහොයුරියක්
‘අපේ අයියා කාටවත් කරදරයක් කළේ නෑ. අයියා මැරුවා කියලා දැනගත්තට පස්සෙ අනෙක් අයටත් කේන්ති යන්න ඇති. ඒත් දැන් ඒ සිද්ධි ඔක්කොම ඉවරයි. අයියගෙ හත් දවසෙ බණ අද රෑට. දැන් ඔය හොඳටම ඇති ගහමරා ගත්තා. අපි ඉල්ලන්නෙ පුළුවන් නම් මේ ළමයින්ට සාධාරණයක් කරන්න. ඒ ගොල්ලන්ට බෙහෙත් ගන්න සෑහෙන ගාණක් යනවා. ගෙදර වියදම් තියෙනවා. ඔය ඔක්කොම කළේ අයියගෙ මාසෙ පඩියෙන්. මේ ගේ තාම හදලා තියෙන්නෙ බාගෙට. පුළුවන් නම් මේ ප්‍රශ්න විසඳලා දෙන්න.   අපේ අයියාගෙ ලොකු චේන් එකක් තිබුණා. ඒක හොරෙන්ම පන්සලට පූජා කරලා. එයා ඒ වගේ කෙනෙක්. හිත හරි හොඳයි. ළමයින්ටත් කිසි අඩුපාඩුවක් කරන්නෙ නෑ. පුළුවන් විදිහට හැමදේම කළා. දැන් කවුද ඒවා කරන්නෙ. මේ ළමයි දිහා බලන්න. ඒ ගොල්ලන්ට අසනීප තියෙනවා. ඒවා හොඳ කරන්න බෑ කියලා දොස්තර මහත්තුරු කියලා තියෙන්නෙ. කවුද මේ ළමයි බලාගන්නෙ. අයියාට මේ අපරාදෙ කරපු අය එක්ක මටත් ලොකු තරහක් තියෙනවා. ඒත් මොනවා කරන්නද.’

තව ළමයින්ට තාත්තලා නැති කරන්න එපා
– ආර්. පියදාස –
මිය ගිය කුමාරසිංහගේ මාමා
‘මොනවද දැන් මේ වෙන්නෙ. අපේ පුතා අපිට නැති වුණා. දැන් බලන්න, කී දෙනෙකුගෙ ළමයින්ට තාත්තලා දකින්න නැද්ද. ඒ තාත්තලා හිරේ ගිහින් තියෙන්නෙ මොනවටද. අනුන්ට ගහලා. මේවා නවත්තන්න කියලා ඉල්ලන්න විතරයි අපිට පුළුවන්. අපි මේ ගම්වල මිනිස්සු. අපි කියන ඒවා කවුද අහන්නෙ. පුතාගෙ මළගෙදරට ආපු සිය ගාණක් සෙනඟ දැක්කා. ඒත් ඊටපස්සෙ ඒ අය නෑ.
මුල් දවස් දෙකේ ගෙදරට පොලිසියෙන් ආරක්ෂාවත් දාලා තිබුණා. දැන් ඒවාත් නෑ. හැමදේම ඔහොම තමයි. අපි ගැන බලන්න ඉන්නෙ කවුද. පොලිසිය ලොකු අයගෙන් කප්පම් ගන්නවා, අපිට කොහෙන්ද කප්පම් දෙන්න හයියක්. මං බලාගෙන ඉද්දිම සමහරු පොලිසියෙ මහත්තුරුන්ටත් හයිපාට් දැම්මා. අපි පොලිසි ගාණෙ ගිහිනුත් නෑ. යන්න ඕනෙකමකුත් නෑ. මං කියන්නෙ මේ සේරම බොරු වැඩ. අපිට අපේ පුතා නැති වුණා තමයි. මේ ළමයි දෙන්නට තාත්තා නැති කළා වගේ තව ළමයින්ට තාත්තලා නැතිකරන්න එපා. ඒක සහගහන අපරාධයක්.’

එක්සත් ජාතික පක්ෂ මන්ත්‍රී කණ්ඩායමේ හමුව අගමැති රනිල් වික්‍රමසිංහ මහතාගේ ප්‍රධානත්වයෙන් පසුගියදා පැවැත්විනි. රටෙහි ඇතිවූ අර්බුධකාරී තත්වය මෙම රැස්වීමේදී විශේෂ මාතෘකාවක් විය.

මෙහිදි අමාත්‍ය පී. හැරිසන් කීවේ  “නුවරට බස්‌වලින් සෙනඟ ඇදලා කලබල කරවලා තියෙන්නේ සිවුරු ඇඳ ගත්ත අය කියලයි කියන්නේ… ඒත් සිවුරු දාගෙන ඉන්න හැමෝම හාමුදුරුවරු ද කියලා පොලීසියයි ජනතාවයි දෙගොල්ලම විමසිලිවත් වෙලා බලන්න ඕන…” ලෙසය.
 
“සමාජ වෙබ් අඩවි නවත්තපු එක ගැන අපි ටිකක්‌ කල්පනා කරන්න ඕන. මේවයින් හුඟක්‌ දෙනෙක්‌ වැඩ ගන්නවා. සීමිත පිරිසක්‌ තමයි මේවා නරක දේවල් වලට යොදා ගන්නේ. ඉතින් මේ සීමිත දෙනාගේ වැඩ නිසා මුළු රටකම ඉන්න ජනතාවට තමන්ගේ අයිතියක්‌ අහිමි වුණා.” නවීන් දිසානායක පුළුල් විග්‍රහයක්‌ කරන්ට පටන් ගත්තේ ය.
 
“ඒවාට දින කීපයක තහනමක්‌ දැම්මේ. ඒ වෙලාවෙ ඉඳල ගැටුම් අවම වුණා. මේවාට අදාළ නව නීති ගේන්න වෙනවා. ෆේස්‌බුක්‌ නිසා සිදුවන හානිය තහනම හරහා වලකාගත හැකි බවට අද ලංකාව ලෝකයටම ආදර්ශයක්‌ දී තිබෙනවා” යෑයි අගමැති කීය.
 
“ජර්මනිය පිලිපීනය වගේ රටවලිනුත් මේවා තහනම් කරල ලැබූ වාසිවලට නිදසුන්. චීනයේ ෆේස්බුක් වට්‌ස්‌ඇප් අරව මේවා මොකුත් නෑ. චීනය අපට දැන් තාක්‌ෂණික හා නීතිමය උපදේශන ලබාදීමටත් සූදානම් බවට පණිවිඩ ලැබෙමින් තිබෙනවා” අගමැතිවරයා ප්‍රකාශ කළේය.
 
 “මේ ගිනි නිසා අගමැති හා ආණ්‌ඩු මාරුවයි විශ්වාසභංගයයි ගැන දැන් ආරංචියකුත් නෑ. ඒකාබද්දෙ කණ්‌ඩායම් රැස්‌වීමකදී වීරවංශ විශ්වාසභංගය ගැන කතා කළාම රැවුල ගිනි ගත්ත වෙලාවෙ සුරුට්‌ටු පත්තු කරල ලැඡ්ජ වෙන්න එපා කියල මහින්ද කෑගහල කියලත් ආරංචියි. පී. හැරිසන් කීවේ එවැන්නකි”
 

මහනුවර ප්‍රදේශයේ පසුගිය දිනවල හටගත් නොසන්සුන්තාවය රටෙහිම අවදානය දිනාගත්තා. මෙම සිදුවීම පිළිබදව පුවත්පතක් සමග සංවාදයකට එක්වෙමින් ජනාධිපති මෛත්‍රීපාල සිරිසේන මහතා අදහස් දක්වා තිබුණා. එම සංවාදය පහතින් ,

ප්‍රශ්නය – ජනාධිපතිතුමනි, මුලින්ම අම්පාරේ නොසන්සුන්තාවයක්‌ ඇතිවුණා. ඊට සතියකට පසු මහනුවර ප්‍රදේශයේ නොසන්සුන්තාවයක්‌ ඇතිවුණා. මේ සිද්ධි දෙක මේ රට යළිත් වර්ගවාදී ගින්නක දහනය කරවීම සඳහා හොඳටම ප්‍රමාණවත්. විශේෂයෙන්ම එක්‌සත් ජාතීන්ගේ මානව හිමිකම් කමිටුව රැස්‌වී තිබෙන අවස්‌ථාවක මෙවැනි සිද්ධි ඇතිවීම හේතුවෙන් ජාතික වශයෙන් පමණක්‌ නොව ජාත්‍යන්තර වශයෙන් ද මේ රට අපකීර්තියට ලක්‌වෙනවා. රාජ්‍ය නායකයා ලෙස ඔබ මේ තත්ත්වය ඇතිවීම දකින්නේ කොහොමද…?
 
පිළිතුර – අම්පාර සිද්ධිය පැහැදිලිවම සැලසුම් කරලා කරපු වැඩක්‌. ඒක අහඹු සිදුවීමක්‌ හෝ හදිසියේ ඇතිවුණු තත්ත්වයක්‌ නෙවෙයි. කලින් සංවිධානය කරපු සිදුවීමක්‌. 
 
මහනුවර තෙල්දෙණිය ප්‍රදේශයේ රියෑදුරෙකුට පහරදීම කලින් සංවිධානය වෙච්ච එකක්‌ නෙවෙයි. මුස්‌ලිම් තරුණයෝ තුන්දෙනෙක්‌ හොඳටම මත්පැන් පානය කරලා, ත්‍රීවීල් එකක යනකොට, තවත් වාහනයක ගැටුණා. මේ තරුණයන් තිදෙනා අනෙක්‌ වාහනයේ රියෑදුරුට ගැහුවා. දවස්‌ කීපයකට පස්‌සේ ගුටි කෑ තරුණයා රෝහලේදී මිය ගියා. එතන වැරැද්ද ඒගොල්ලන්ගේ.
 
මට පේන විදියට අම්පාර සිද්ධියත්, රියෑදුරුගේ මරණයත් යන දෙකම එකට තියලා, අවසනාවන්ත තත්ත්වයක්‌ දක්‌වා එය යම් පිරිසක්‌ විසින් එය සංවිධානය කළා. අම්පාර සිද්ධිය සංවිධානය කරපු පිරිස, මේ ප්‍රශ්නය මහනුවරටත් ගත්තා කියලයි, මම විශ්වාස කරන්නේ. එක පැත්තකින් මේකේ අන්තවාදීන්ගේ ක්‍රියාකලාප තියනවා. තවත් පැත්තකින් ආණ්‌ඩුවට විරුද්ධව දේශපාලන බලවේගවල පසුබිමකුත් තියනවා. එයට හේතු සාක්‌ෂි, සාධක බොහෝ තිබෙනවා. එක උදාහරණයක්‌ ගත්තහම පෙනෙන දෙයක්‌ තමයි තෙල්දෙණියේ මුස්‌ලිම් ජනතාවගේ කඩවලට ගහන කොට, ඒ කඩ පේළියේම මුස්‌ලිම් කඩයක්‌ තියෙනවා ඡන්ද ලකුණක්‌ තියෙන. ඒ ලකුණ තිබෙන මුස්‌ලිම් කඩේට ගහන්නේ නැතිව, ඒ අයිනේ තිබෙන අනිත් ඔක්‌කොම කඩවලට ගහලා තියෙනවා. 
 
කුලියාපිටියේ මුස්‌ලිම් කඩ දෙකකට පහර දුන්නා. එක්‌සත් ජාතික පක්‌ෂයෙන් තරග කරපු අපේක්‌ෂකයෙක්‌, ඔහුගේ වාහනයෙන් ගිහින් එම පහරදීම කර තිබෙන බව පරීක්‌ෂණවලදී හොයා ගෙන තිබෙනවා. සමහර දේවල් පැහැදිලිවම, දේශපාලන පසුබිම්වලින් ආණ්‌ඩුවට විරුද්ධව සිද්ධ කරපුවා බව මේ සාධක වලින් පෙනෙනවා. සමහර අය දේශපාලන පසුබිමක්‌ නැතිව අන්තවාදී විදියට හිතන අය. මේ තත්ත්වය තුළ තමයි මේ ප්‍රශ්නය වර්ධනය වුණේ… 
 
මහනුවර ප්‍රදේශයේ කලබල කරන අයට විශාල වශයෙන් අරක්‌කු, කසිප්පු ඒ ගම්වලටම ගිහිල්ලා දෙන වැඩපිළිවෙළක්‌ තිබිලා තියෙනවා. රජයේ නිලධාරීන්, පොලීසිය, හමුදාව, ස්‌වාමීන් වහන්සේලා ඒ අය කියන්නේ මේ විදිහේ පහරදීම් කරන අයව ගිහින් හම්බ වුණාම, ඒ කවුරුත් එක්‌ක කතා කරන්න පුළුවන් හොද සිහියෙන් හිටියේ නැහැ, කියලයි. 
 
ප්‍රශ්නය – තත්ත්වය සාමාන්‍ය කිරීම සඳහා ආණ්‌ඩුව ගත් ක්‍රියාමාර්ග අතර සමාජ මාධ්‍ය ජාලා තහනමක්‌ ද ක්‍රියාත්මක කළා. එවැනි පියවරක්‌ ගැනීමට හේතුවූ කාරණා පැහැදිලි කළහොත්…
 
පිළිතුර – අන්තවාදී පිරිස්‌ සමාජ වෙබ් අඩවි පාවිච්චි කෙරුවෙ ඉතාමත්ම පහත් විදියට. මේ ගැටුම වර්ධනය වෙන්න මූලික වශයෙන්ම සමාජ වෙබ් අඩවි හේතු වුණා. ඒ නිසා තමයි අපි ඒවා නියාමනය කරන්න පටන් ගත්තේ. ජාතික ආරක්‌ෂාව සම්බන්ධයෙන් තිබෙන නීති රීති යටතේ එවැනි ක්‍රියාමාගර් ගැනීමේ බලය රජයට තිබෙනවා. කැබිනට්‌ මණ්‌ඩලය සාකච්ඡා කරලා, ජාතික ආරක්‌ෂක මණ්‌ඩලය සාකච්ඡා කරලා, සමාජ වෙබ් අඩවි තාවකාලිකව වාරණය කිරීම සඳහා පියවර ගැනීමට රජයට සිදුවුණා. 

පසුගිය දිනවල මහනුවර ප්‍රදේශයේ ඇතිවූ තත්වය පිළිබද සොයා බැලීමට මහින්ද රාජපක්ෂ  මහනුවරට ගොස් තිබුණා.

මෙහිදි මල්වතු හා අස්ගිරි අනුනායක හිමිවරුන් ඇතුල් ප්‍රධාන මුස්ලිම් මවුලවිවරුන් එක්ව ගැටලුව පිළිබද සාකච්ඡා කිරීමට මහින්ද  ක්‍රියා කර තිබුණා.

මෙම සාකච්ඡාවේදී සිදුවීම ඇතිවීම පිළිබදව අදහස් දක්වා සිටි මහින්ද පවසා සිටියේ ‘ ‘අපේ කාලයේ ඕවා ආපුවාම මම පොලිසියට බලය දුන්නා තත්වය පාලනය කරන්න.. වෙඩි තියලා ඒක අපි පාලනය කරා.. රටේ හැම සිදුවීමක්ම අපි පොලිස් බලයෙන් පාලනය කළා.. හානි වෙන්න ඇති. එත් මේ පාර නිතිය හා සාමය ඇමති රනිල් සහ පොලිස්පති දෙන්නම එකයි.. මෙයාලා දෙන්න මේකේ අසාර්ථකයි..” යැයී සදහන් කර සිටියා.

බස් රථ රියැදුරෙකුට පහර දීම නිසා රක්ෂිත බන්ධනාගාර ගත කොට සිටින දකුණු පළාත් සභා එක්සත් ජනතා නිදහස් සන්ධාන මන්ත්‍රි එම් කේ කසුන්ට එරෙහිව විනය ක්‍රියාමාර්ග ගැනීමට කටයුතු කරන බව එක්සත් ජනතා නිදහස් සන්ධාන මහලේකම් මහින්ද අමරවීර සඳහන් කරනවා.

සීදුවේ දි අද (10) පැවති උත්සවයකින් අනතුරුව මාධ්‍යවේදීන් නැගු ප්‍රශ්න වලට පිළිතුරු ලබා දෙමින් අමාත්‍යවරයා මේ බව සඳහන් කරසිටියා.

“එම මන්ත්‍රිවරයා ඇත්තටම  ශ්‍රි ලංකා නිදහස් පක්ෂ අපේ කණ්ඩායම නෙමෙයි නියෝජනය කරන්නේ. අනික් පැත්තේ කණ්ඩායම. මන්ත්‍රිවරයෙක් මොන පක්ෂයේ වුවත් ඒ වගේ ප්‍රචන්ඩකාරි ක්‍රියාවක නිරත වීම අනුමත කරන්නේ නැහැ.”

අනුමත කරන්නේ නැහැ විතරද පක්ෂෙන් ක්‍රියාමාර්ග ගන්නේ නැද්ද? ජනතා නියෝජිතයන් මේ විදියට හැසිරුවාම කොහොමද සාමාන්‍ය ජනතාව හසුරුවා ගන්නේ?

“ඒ පිළිබඳව පක්ෂෙට වාර්තාවක් ඉදිරිපත් වේවි. ඊට පස්සේ පක්ෂේ ඒ පිළිබඳව තීරණයක් ගන්නවා. දැනටමත් ඔහුව අත්තඩංගුවට ගැනීමක් සිද්ධ කරලා තියනවා. නීත්‍යානුකූල කටයුතු සිද්ධ වෙනවා. ඊට අමතරව මේ වගේ කාර්යයන් ගැන පක්ෂේ විසින් විනය ක්‍රියාමාර්ග ගන්නවා.”