Blog

මුතුරාජවෙල අභයභූමිය තුළ ගොඩකිරීම වැලිහෑරීම සහ කුණු දැමීමට එරෙහිව ශ්‍රේෂ්ඨාධිකරණය විසින් තහනම් නියෝගයක් ලබාදී තිබියදී ප්‍රබල දේශපාලනඥයන්ගේ හා රාජ්‍ය ආයතන රැසක ප්‍රධානීන්ගේ අනුදැනුම මත නීතිවිරෝධී ලෙස එය සිදුවෙමින් පවතී.

රටේ ප්‍රධාන ව්‍යාපාරිකයකුගේ මෙහෙයවීමෙන් මෙම තෙත් බිම මහා පරිමාණයෙන් ගොඩකරමින් සිටින බව කියති. මේ වනවිටත් අක්කර සීය ඉක්මවා තෙත් බිම ගොඩකර ඇත්තේ ගොවිජන සේවා පනත සහ ලෝක රැම්සා සම්මුතියේ නීති උල්ලංඝනය කරමින් බව මුතුරාජවෙල අභයභූමිය සුරුකීමේ සංවිධානය පෙන්වා දෙයි.

ශ්‍රී ලංකාවේ තෙත් බිම් උරුමයක් වන මුතුරාජවෙල විනාශ කිරීමේ අවදානමට කොළඹ නගර සභාව, නාගරික කොමසාරිස්, නාගරික සංවර්ධන අධිකාරිය, මධ්‍යම පරිසර අධිකාරිය, වත්තල ප්‍රාදේශීය සභාව, කෘෂිකර්ම දෙපාර්තමේන්තුවේ අධ්‍යක්ෂ ජනරාල්, වනජීවි සංරක්ෂණ දෙපාර්තමේන්තුවේ අධ්‍යක්ෂ ජෙනරාල්, වාරිමාර්ග දෙපාර්තමේන්තුවේ අධ්‍යක්ෂ ජෙනරාල්, සහකාර ප්‍රාදේශීය ලේකම් වත්තල, පතල් හා කැණීම් කාර්යාංශය හා රජයේ නීතිපති දෙපාර්තමේන්තුව වැනි ආයතනවල සහ එහි ප්‍රධානීන්ගේ අදූරදර්ශී ක්‍රියාකාරකම් වගකිව යුතු බවට මුතුරාජවෙල අභයභූමිය සුරැකීමේ සංවිධානය චෝදනා කරයි.

එම සංවිධානය වැඩිදුරටත් අනාවරණය කරන්නේ 1996 අංක 947/13 දරන රජයේ ගැසට් පත්‍රය මගින් හෙක්ටයාර් 1284.95 ක් සහිත තෙත් බිම අභ්‍යභූමියක් ලෙස ප්‍රකාශයට පත්කර තිබියදී මෙම ගොඩකිරීමේ ජාවාරම සිදුකරගෙන යන බවය.

මෙම අනවසර ඉඩම් ගොඩකිරීමේ ජාවාරම පසු පස ප්‍රධාන පෙළේ ප්‍රසිද්ධ සිංහල ව්‍යාපාරිකයකු මෙන්ම මුතුරාජවෙල ප්‍රදේශයේ ධනවත් මුස්ලිම් ව්‍යාපාරිකයකු ද සිටින බව ප්‍රසිද්ධය. ඔවුන් තෙත් බිම කෙරෙහි කෑදර කමෙන් එම භූමියට කූඨ ලේඛන සකසමින් ඉඩම් අත්පත් කරගැනීමේ නිරතව සිටින්නේ මීට වසර දෙකක් පමණ ඉහත සිට බවද සඳහන්ය.

මෙහිදී ඔවුන් පළමු පියවර වශයෙන් නවීන තාක්ෂණය මගින් ගුවන් ඡායාරෑප ලබාගෙන එමගින් හඳුනාගත් ප්‍රදේශවල හිමිකරුවන් සතු ඉඩම් කොටස් නොවටිනා මිලකට මිලදී ගෙන තිබෙන බවද පැහැදිලිය. මේ අතර මුතුරාජවෙල අභයභූමියට අයත් බොහෝ වගුරැබිම් ගොඩකර තිබෙන අතර කටුනායක අධිවේගී මාර්ගය අසල වම් මායිමේ පිහිටි පැරණි ඕලන්ද ඇළ රොන්මඩ ඉවත් කරන බව පෙන්වමින් අසීමිතව හාරා වැලිගොඩට ගෙන ඊට නුදුරැ බිම පුරවන බව පෙනෙන්නට තිබේ.

අභයභූමිය සුරුකීමේ සංවිධානය චෝදනා කරන්නේ ඕලන්ද ඇළ හෑරීම හේතුවෙන් කටුනායක අධිවේගී මාර්ගය ගිලා බැසීමේ අවදානමක් ද පවතින බවය.

ඇළ හෑරීම හේතුවෙන් අධිවේගී මාර්ගය සඳහා පිරවූ පස් බුරුල් වී ඇළට සේදීයාමක් සිදුවන බවත් ඇළ වම් ඉවුර මීටර් ගණනක් පුරවමින් පළල් පිවිසුම් මාර්ගයක් ගොඩනගමින් ඇති බවත් එම සංවිධානය පෙන්වා දෙයි. ප්‍රදේශයේ ජනතාව සතුව පැවැති වගුරු ඉඩම් කට්ටි ක්‍රමයෙන් මිලට ගෙන ඇති ව්‍යාපාරිකයා මේ වනවිටත් අක්කර 600ක පමණ භූමියක් සතුකරගෙන ඇතැයි වාර්තා වේ.

මේ ආකාරයට ඉඩම් ගොඩකිරීමට අපේක්ෂාවෙන් සිටියදී මීතොටමුල්ල කුණු කන්ද නාය ගොස් මහා ව්‍යසානයක් සිදුවූයේ 2017 අප්‍රේල් මාසයේදීය.

ඒ අවස්ථාවේදී කොළඹ එකතු වන කුණු බැහැරකිරීමට ස්ථානයක් නොවීය. බොරදියේ මාළු බාන්න සිතූ ව්‍යාපාරිකයා බොහෝම සද්භාවයෙන් පෙනී සිට රජයට කසළ බැහැර කිරීම සඳහා සිය ඉඩම ලබාදෙන්නට පියවර ගත්තේය.

ඒ නීත්‍යානුකූල ඉඩමක් නොව මුතුරාජවෙල අනවසරයෙන් තද කරගෙන සිටි භූමියයි. එමගින් ඔවුන් අපේක්ෂා කළේ කසළ පුරවා රජය සහ පෞද්ගලික අංශය සතු කුඹුරු ඉඩම් ගොඩකරවා ගැනීමට බව මුතුරාජවෙල සුරැකීම් සංවිධානය පවසයි.

මෙහිදී එම සංවිධානය අතුළු ගම්වාසීන් විරුද්ධ වෙද්දී ඔවුන්ගේ බලපෑම් මර්දනය කිරීම සඳහා ආරක්ෂක අංශ යොදවා තිබූ බවත් එහි ප්‍රධානීන්ට ද සිදුවෙන ව්‍යසනය වැටහී තිබූ බවත් කියයි.

ඊට එරෙහිව පියවර ගත් මුතුරාජවෙල පරිසරය සුරුකීමේ සංවිධානය නියෝජනය කරන පූජ්‍ය පක්ෂය, විද්වතුන්, සමිති සමාගම්වල ප්‍රදේශවාසීන් 35 දෙනකුගෙන් සමන්විත පිරිසක් පෙර කී රාජ්‍ය ආයතන 11ක් වගඋත්තරකරැවන් ලෙස දක්වමින් ශ්‍රේෂ්ඨධිකරණ නඩුවක් ගොනු කර තිබේ. මෙහි නඩුවාරයක් ලබන 12 දින විභාගයට ගැනීමට නියමිතව ඇතැයිද අභයභූමිය සුරැකීමේ සංවිධානය කියයි.

කෙසේ වෙතත් උසාවි නියෝගය මෙන්ම ගොවිජන සේවා පනත, ලෝක රැම්සා වාර්තාවේ නීති ඇතුළු අභයභූමියට අදාළ සෑම නීතියක්ම උල්ලංඝනය කරමින් ජාවාරම පසුපස සිටින ප්‍රබල ව්‍යාපාරිකයා තමාට සහාය දෙන රාජ්‍ය නිලධාරීන් අතකොලු කොටගෙන වගුරු බිම ගොඩකරමින් සිටී. මේ අතර වාර්තා වන්නේ මුතුරාජවෙල අභයභූමියේ ඉඩම් ගොඩකිරීම සඳහා ගොවිජන සේවා දෙපාර්තමේන්තුවට රජයේ ගාස්තුව වශයෙන් රුපියල් තුන්කෝටි විස්පන් ලක්ෂ පනස් එක් දහසක් ගෙවා ඇති බවය. එය පර්චස් 65102ක් ගොඩකිරීම සඳහා වන අතර පර්චසයකට මිල නියමව ඇත්තේ රුපියල් 500 බැගින් බවද වාර්තා වේ. මෙවැනි අකටයුතුකම් සඳහා රාජ්‍ය සේවයේ අවංක නිලධාරීන් හිස නොනමන නිසා ඔවුන්ට හා මුතුරාජවෙල අභයභූමිය සුරැකීමේ සංවිධානයෙන් පරිසරවේදීන්ට මරණ තර්ජන පවා එල්ලවී ඇතැයි කියති.

මේ වනවිට කටුනායක අධිවේගී මාර්ගය ආසන්නයේ ඇති ඕලන්ද ඇළ බැකෝ යන්ත්‍ර මාර්ගයෙන් ගැඹුරට හාරා වැලි ඉවත් කරන්නේ වාරිමාර්ග දෙපාර්තමේන්තුව මගින් රොන් මඩ ඉවත් කරනා බව දක්වමිනි. මේ ආකාරයට එම ස්ථානවල අඩි 30 – 40 තරම් පළළ පිවිසුම් මාර්ග සකසා ඇති බවත් විශාල ඉඩම් ප්‍රමාණයක් පුරා කම්බි වැටවල් ගස් වෙන්කර ඇති බවත් මුතුරාජවෙල සුරුකීමේ සංවිධානය චෝදනා කරයි.

වඳ පෙති කථාව කරළියට එන්නේ කලක සිටය. තැන් තැන්වලින් ඇති හෝටල් වලින් වඳ පෙති දමන බව විටින් විට අවස්‌ථා ගණනාවකම තොරතුරු ආනාවරණය විය. දියතලාව ප්‍රදේශයේදී මාස කිහිපයකට පෙර මෙවැනි කථාවක්‌ ඇති වුණි.

සියඹලාකොටුව ප්‍රදේශයේ ආපන ශාලාවකද මාස 03 කට ඉහතදී මෙවැනි කතාවක්‌ මතු විනි. ඔලුවිල් විශ්වවිද්‍යාලයේ සිසුවකු මීට මාස කිහිපයකට පෙර මා හට පැවසුවේ අයියේ ලැබෙන කෑම ගැනනම් කියලා වැඩක්‌ නැහැ. අපට සමහර දවස්‌වල එළවළු වල පෙති තිබිලත් හමුවුණා යනුවෙනි. නමුත් අයියේ මේක පත්තරේ දාන්න එපා. මොකද අපිට ලොකුම ගැටලුව තියෙන්නේ පාරිපාලනයත් එක්‌ක. මේවා දැම්මොත් අපිට තවත් ගැටලුවක්‌ වෙයි යනුවෙන් ඔලුවිල් විශ්වවිද්‍යාලෙයේ සිසුවෙක්‌ පැවසුවේය.

මේ ආකාරයෙන් තවත් බෙහෝ තැන් වලින් ඇසුන වඳ පෙති කතාව මෙකක්‌ද යනුවෙන් හැමෝටම ගැටලුවක්‌ව පැවතිණී.

මේ කතා කුමක්‌ වුවත් වද පෙත්තක කතාවක්‌ නිසා පසුගියදා අම්පාර නගරය ගිනියම් වූවේය.

අම්පාර නගරයේ පන්සල් හංදියට නුදුරින් ඇති කාසීම් හෝටලයට බොහෝ දෙනෙක්‌ ගොඩවදින්නේ කටට රසට හොඳ කොත්තුවක්‌ කෑමටය. එසේ නැතිනම් ෆ්‍රයිඩ් රයිස්‌ එකක්‌ කෑමටය. පසුගියදා තරුණයන් තුන්දෙනෙක්‌ අම්පාර කාසීම් හෝටලයට ගොඩවූයේ වෙනදා මෙන් රසට කොත්තුවක්‌ කෑමටය. කොත්තු කතාව මෙච්චර දුරක්‌ යෑයි කියා එම තරුණයින් ද සිතන්නට නැතිව ඇත. හෝටලයට ගිය පසු මද වේලාවක්‌ යද්දී ඔවුනට දුම් දා සුවඳ හමන කොත්තුවක්‌ ලැබෙන්නට විය. ඒ සමග ලබා දුන් මස්‌ හොද්ද නිසා හෝටල් හිමියන් කිසිදා අපේක්‌ෂා නොකළ සිදුවීමක්‌ ඇතිවන්නට වූහ. එහි තිබුණ භාගෙට දියවුණ යමක්‌ මෙම තරුණයන්ගේ නෙත ගැටුණි. මොනවද භාගෙට දිය වෙලා තියෙන්නේ. මුන් අපට වඳ පෙති දාලාවත් දෙනවාද කියා ඔවුන්ට සිතුණි.

සැනෙකින් මුදල් අයකැමිගෙන් මේ පිළිබඳ විමසා සිටින්නට වූහ. ඇත්ත කියපල්ලා උඹලා කෑමවලට වඳ පෙති දානවා නේද? යනුවෙන් විමසා සිටියදී නිරුත්තරුවූ ඔහු නෑ නෑ යනුවෙන් පවසා සිටින්නට වූවේය. නැවතත් තරුණයන් ඇත්ත කියනවා මේ වඳ පෙති නේද උඹලා මේවා කෑමවලට දානවා නේද? යනුවෙන් දැඩිව පවසා සිටි කල ඔව් යනුවෙන් ඔහු පවසා සිටියේය.

මොහොතක්‌ ගත වුණි. මෙම සිදුවීම දැනගත් සැනින් එම ස්‌ථානයට සියකට ආසන්න තරුණයන් පිරිසක්‌ එකතුවී වඳ පෙති දමා අහාර දුන්නා යෑයි කියු වෙළෙඳසලට පහරදී කඩා බිඳ දමන්නට වූහ. ඒ ආසන්නයේ තිබූ වෙළෙඳසලේ තිබූ ගෝනි ගෙන මහා පාරට දමා ගිණී තබන්නට වූහ. ඉන් නොනැවතී එම ස්‌ථානයට මදක්‌ දුරින් තිබුණු ආගමික මධ්‍යස්‌ථානයට සහ තවත් වෙළෙඳසල් දෙකකට සහ පහර දෙන්නට මෙම පිරිස පිටත්වන්නට විය. අම්පාර නගරයේ මළ ගෙවල් කිහිපයක්‌ තිබෙන අතර ඒවාට සහභාගි වෙමින් තිබුණු ඇතැම් පිරිස්‌ සහ එහෙන් මෙහෙන් දැනගත් විශාල පිරිසක්‌ මෙම ස්‌ථානයට පැමිණෙන්නට වූහ. මෙම ආගමික ස්‌ථානය ආසන්නයේ වෙළෙඳසලට පහර දෙන්නට උත්සාහ කරන විට පොලිසීය එය පාලනය කරන්නට දැඩි උත්සාහයක්‌ ගන්නා ලදී. නමුත් කෙසේ හෝ කලහකාරී පිරිස මෙම වෙළෙඳසලට පහර දුන් අතර ගිනි තබන්නට පොලිසියෙන් ඉඩ නොදෙන ලදී.

ඒ අවස්‌ථාවේදී සැනකින් පිරිස ආගමික මධ්‍යස්‌ථානය තිබුණු භූමියට පැන යන්නට වූහ. සිද්ධිය එසේ වන විට කලහකාරීන් පාලනය කරන්නට පොලිසිට නොහැකි වන ලදී. එහි තිබුණු වෑන් රියක්‌ පෙරළා ගිනි තැබූ අතර ලොරි රථ තුනකට සහ යතුරුපැදි කිහිපයටද පහර දෙන්නට වූහ. එම ආගමික මධ්‍යස්‌ථානයේ තාප්පයටද පහරදී පෙරළා දමන්නට වූහ. එම අවස්‌ථාවේ සිද්ධිය පාලනය කිරීම සඳහා පොලිස්‌ විශේෂ කාර්ය බළකාය ගෙන්වා කලහකාරී පිරිස පාලනය කරන්නට පොලීසිය විසින් කටයුතු යොදන්නට වූහ. මෙම සිදුවීම නිසා එම අවස්‌ථාවේ ආගමික සිද්ධස්‌ථානයේ සිටි තිදෙනකු තුවාල ලබා අම්පාර රෝහලට ඇතුළත් කරන්නට විය.

මෙම සිදුවීම සිදුවු ස්‌ථානයට ඒ මොහෙතේ පැමිණි අම්පාර මහා දිසාපති තුසිත පී. වනිගසිංහ මහතා සහ අම්පාර ජ්‍යෙෂ්ඨ නියෝජ්‍ය පොලිස්‌පතිවරයා ඇතුළු පොලිස්‌ නිළධාරීන් සහ 24 වැනි සේනාංකයේ සේනාංකාධිපති මහින්ද මුදලිගේ මහතා ඇතුළු ආරක්‌ෂක අංශ නිළධාරීන් සමග අලුයම 4.00 වන තෙක්‌ මෙම ස්‌ථානයේ සිට මෙම ගැටුම දුර දිග යැම වැලැක්‌වීම සඳහා ගතයුතු පියවර යොදා මාර්ගවලට විශේෂ ආරක්‌ෂක වැඩපිළිවෙළක්‌ සකස්‌ කරන්නට වුහ. කෙසේ නමුත් මේ සම්බන්ධයෙන් දැඩි විරෝධතාවයක්‌ මතු නොවුනි. ඒ නිසා වෙරළබඩ තීරය ඇතුළු ප්‍රාදේශවල තත්ත්වය සාමන්‍ය ලෙස පැවතුනි. මනා ආරක්‌ෂක පියවරක්‌ තිබීමද එයට එක්‌ හේතුවක්‌ වන්නට ඇත.

27 වැනිදා උදෑසන මෙම සිදුවීමට විරෝධය පාමින් අම්පාර අක්‌කරපත්තුව මාර්ගයේ කොළතාවලි හංදියේ ටයර් සහ කොන්ක්‍රීට්‌ කණු දමා මාර්ගය හරස්‌ කර තිබුණ අතර විශේෂ කාර්ය බළකායේ නිළධාරීන් විසින් ඒවා ඉවත් කරන ලදී. කෙසේ නමුත් අම්පාර දිස්‌ත්‍රික්‌කය පුරා දැඩි විරෝධයක්‌ ඇතිවෙන බවට විවිධ කටකතා දිගින් දිගටම ප්‍රචාරය වෙමින් එහේ ගහනවා මෙහේ ගහනවා යනුවෙන් විවිධ අදහස්‌ වේගයෙන් පැතිරෙන්නට විය. නමුත් යුද හමුදාව පොලිසිය විශේෂ කාර්ය බළකාය ඇතුළු ආරක්‌ෂක නිළධාරීන් ඉතා හොඳින් සිද්ධිය පාලනය කරමින් මෙම සිදුවීම පිළිබඳව එම ආහාර මිලදී ගත් තරුණයකු අම්පාර පොලිසියටද පැමිණීලි කර තිබෙන අතර එම ආහාර සාම්පලය අධිකරණ නියෝගයක්‌ ගෙන වැඩිදුර පරීක්‌ෂාව සඳහා රජයේ රස පරීක්‌ෂකවරයා වෙත යොමු කරන බව අම්පාර ජ්‍යෙෂ්ඨ පොලිස්‌ නිළධාරියකු පැවසුවේය.

මෙම ගැටලුව විසඳීම සඳහා 27 වැනිදා දහවල් අම්පාර දිසාපතිවරයාගේ ප්‍රධානත්වයෙන් ආරක්‌ෂක අංශ සහ අදාළ පාර්ශවයේ දේශපාලන නායකයන් සාකච්ඡාකර මෙම ගැටලුව සාමකාමිව විසඳීමට කටයුතු කිරීමට සාකච්ඡා කරන ලදී. දිගාමඩුල්ල පාර්ලිමේන්තු මන්ත්‍රී විමලවීර දිසානායක, ශ්‍රියානි විඡේවික්‍රම, ඇතුළු පක්‌ෂ විපක්‌ෂ දේශපාලන නායකයන් ද මෙම අවස්‌ථාවට එක්‌ව සිටියහ. මේ වන විට අම්පාරේ ප්‍රදේශයේ තත්ත්වය සාමකාමී අයුරින් පවතින අතර ප්‍රදේශයේ පොලිස්‌ විශේෂ කාර්ය බළකාය, යුද හමුදාව සහ පොලිසිය යොදවා දැඩි ආරක්‌ෂක වැඩපිළිවෙළක්‌ යොදා ඇත. ඒ නිසා බොහෝ ප්‍රදේශවලට සහ ආගමික මධ්‍යස්‌ථානවලට දැඩි රැකවල් යොදවා ගැටුම් ඇතිවීම පාලනය කරන්නට වූහ.

මේ සම්න්ධයෙන් රිෂාද් බදියුදීන් ඇමැතිවරයා විසින් ජනපතිට සහ අගමැතිවරයාට නිසි පරීක්‌ෂණයක්‌ කර අදාළ වැරදිකරුවන් සම්බන්ධයෙන් නීතිය ක්‍රියාත්මක කරන ලෙස ද ඉල්ලා සිටින්නට විය. ඒ අනුව මෙම කලහාකාරී සිදුවීමට සම්බන්ධ අය සොයා පොලිසිය විසින් පරීක්‌ෂණ ආරම්භ කරන්නට වූහ.

ඒ අනුව මෙම සිදුවීම සම්බන්ධයෙන් සැකපිට 05 දෙනකු පොලිසිය මගින් අත්අඩංගුවට ගෙන තිබේ. ඔවුන් 02 වැනිදා සවස අම්පාර මහෙස්‌ත්‍රාත්වරයා වෙත ඉදිරිපත් කර ඇති අතර 02 වැනිදා වනතෙක්‌ රක්‌ෂික බන්ධනාගාර ගතකොට නැවතත් 02 වැනිදා අධිකරණයට ඉදිරිපත් කරන ලෙස මහෙස්‌ත්‍රාත්වරයා නියෝග කරන ලදී.

ඒ සමගම මෙම ගැටලුව විසඳා ගැනීම සඳහා අම්පාරේ භීක්‌ෂූන් වහන්සේලා සහ පක්‌ෂ විපක්‌ෂ දේශපාලන නායකයන් උන්නදුවෙන් කටයුතු කරන්නට වුහ. මෙම ගැටලුව සම්බන්ධයෙන් සාකාච්ජා කිරීම සඳහා පොළොන්නැරුව ජනාධිපති මැඳුරු වෙත වාහන හය හතකන් විශාල පිරිසක්‌ යන ලදී. ඒ අතර ගිරිතලේ ගුණානන්ද නාහිමි, කිරිඳිවල සෝමරතන නාහිමි, සේනාපතියේ ආන්නද, සුහදගම සිලරතන යන හිමිවරුන් ඇතුළු භික්‌ෂූන් වහන්සේලා 15 කට ආසන්න ප්‍රමාණයක්‌ සහ දේශපාලන අධිකාරියේ විශාල පිරිසක්‌ පිටත්ව ගියත් ජනාධිපති මෛත්‍රිපාල සිරිසේන මහතා මුණගැසීමට අවස්‌ථාව නොලැබ නැවතත් හිස්‌ අතින් ආපසු හැරී එන්නට සිදුවූහ.

මේ අත්අඩංගුවට පත්වූයේ ඇත්තටම මෙයට සම්බන්ධ පිරිසද යනුවෙන් ගැටලුවක්‌ මේ වන විට පැන නැඟී තිබුණී. කෙසේ නමුත් එම පිරිස ඇප ලබා ගැනීම සඳහා බොහෝ දෙනෙක්‌ ප්‍රබල උත්සාහයක්‌ ගනිමින් සිටින ලදී. මෙය සටහන් තබන 02 වැනිදා දහවල් වන විටත් එම පිරිස නැවතත් අධිකරණයට ඉදිරිපත් කර නොතිබුණි. මේ වන විටත් මෙයට සම්බන්ධ තවත් පිරිසක්‌ අත්අඩංගුවට ගැනීමට පොලිසිය මගින් පරීක්‌ෂණ පවත්වමින් සිටිති.

කෙසේ නමුත් මුස්‌ලිම් පුජකවරයෙක්‌ගෙන් මේ ගැන විමසූ විට මෙසේ පවසුවේය.

මෙවැනි තත්ත්වයක්‌ ඇතිවීම ගැන අපි කනගාටු වෙනවා. කුඩා පිරිසක්‌ තමයි මේ ආකාරයෙන් මේ දේට සම්බන්ධ වුණේ. ඔය හෝටලයේ හිමිකරුට සිංහල වැඩිය බැහැ. ඒ වෙලේ බයට තමයි එහෙම කියලා තියේනනේ. මේ කාරනේ ඇත්ත කියලා ඔප්පු වුණොත් ඔහුට දඬුවම් කරන්න. අපි සිංහල ජනතාවත් එක්‌ක සුහදතාවෙන් තමයි කටයුතු කරන්නේ. යනුවෙන් ඔහු පවසා සිටියේය.

මේ වන විට මෙම ගැටුම නිමා නොවුණත් උණුසුම පහව ගොස්‌ ඇත. යළිත් මෙවන් කතන්දර ඇතිවන්නට ඉඩ ඇත. ඒ නිසා ජාතියක්‌ වඳ කරන වඳ පෙති කථාව සහජීවන කඩතුරාව යටින් සොයාගත යුතුය. එය එසේ නොවුණහොත් මේ වඳ පෙති කතාව සැබෑ නම් මේ ගැන ජාතියට දැනෙන්නේ තවත් වසර පනහක්‌ පමණ ගිය පසුය. ඒ අපි මහජාතිය නොවුණ විටය.

“පර්පෙචුවල් ට්‍රේෂරීස්” සමාගමේ අධිපති අර්ජුන් ඇලෝසියස් මහතා බන්ධනාගාර ගතවීමට මාස දෙකකට පමණ ඉහතදී “රිවිර” පුවත් පත සඳහා රුපියල් කෝටි පහක පමණ මුදලක් ආයෝජනය කර ඇතැයි හෙළි වී තිබේ.

මේ බව හෙළි වී ඇත්තේ “රිවිර” පුවත් පත ප්‍රකාශයට පත් කරනු ලබන “රිවිර මීඩියා කොපර්රේෂන්” ආයතනය ප්‍රතිව්‍යුහගතකරණයට අදාළ විශේෂ ලියකියවිලිවලින් සහ “පර්පෙචුවල් ට්‍රේෂරීස්” සමාගමේ ප්‍රධාන විධායක නිලධාරී සනත් බණ්ඩාර මහතා “රිවිර මීඩියා කොපර්රේෂන්” ආයතනයේ මුල්‍ය අධ්‍යක්ෂකවරයා ලෙසත් ගණකාධිකාරී චතුරංග පල්ලෙවෙල මහතා එම ආයතනයේ මුල්‍ය උපදේශකවරයා ලෙසත් වහාම ක්‍රියාත්මක වන පරිදි අනුයුක්ත කිරීමට අර්ජුන් ඇලෝසිය මහතා ක්‍රියා කර ඇතැයි කියන සිද්ධියෙනි.

“පර්පෙචුවල් ට්‍රේෂරීස්” සමාගමේ අධිපති අර්ජුන් ඇලෝසියස් මහතා “රිවිර මීඩියා කොපර්රේෂන්” ආයතනය වෙත මෙසේ මුදල් ආයෝජනය කර තිබෙන්නේ ඒකාබද්ධ විපක්ෂයේ පාර්ලිමේන්තු මන්ත්‍රී නාමල් රාජපක්ෂ මහතාගේ ඉල්ලීමකට අනුව බව එම සමාගමේ අභ්‍යන්තර ආරංචි මාර්ග පවසයි.

එමෙන්ම ආන්දෝලනාත්මක මහා බැංකු බැඳුම්කර ගනු දෙනුවෙන් උපාය ගත් අයථා මුදල් අර්ජුන් ඇලෝසියස් මහතා බෙදා දුන්නේ කවුරුන්ට ද යන්න පිළිබඳ ඇතුළු ඔහුගේ සියලු රහස් ගනු දෙනු පිළිබඳ තොරතුරු දන්නේ “පර්පෙචුවල් ට්‍රේෂරීස්” සමාගමේ ප්‍රධාන විධායක නිලධාරී සනත් බණ්ඩාර මහතා බව ද එම ආරංචි මාර්ග තහවුරු කර සිටියි.

“ජනයුගය” පුවත් පත වැසී ගොස් තිබෙන්නේ එම පුවත් පතට ආයෝජනය කිරීමට තිබූ මුදල් අර්ජුන් ඇලෝසියස් මහතා මෙසේ “රිවිර මීඩියා කොපර්රේෂන්” ආයතනය සඳහා ආයෝජනය කිරීම හේතුවෙන් බව එම පුවත් පතේ කර්තෘ මණ්ඩලය ඇතුළු සේවක සේවිකාවෝ පෙන්වා දෙති.

සියලු සේවක වැටුප් සහ දීමනා වෙනුවෙන් ද පුවත් පත නොකඩවා පවත්වා ගෙන යාම සඳහා ද රුපියල් කෝටි දෙකක් ලබා දීමට අර්ජුන් ඇලෝසියස් මහතා මුලින් පොරොන්දු වුණත් එම පොරොන්දුව ඉටු නොවූ බව ද එම සේවක සේවිකාවෝ පවසති.

අනතුරුව “ජනයුගය” පුවත් පතේ මුද්‍රණය අත්හිටවූ අවස්ථාවේදී කර්තෘ මණ්ඩලයේ ඇතුළු සියලු සේවක සේවිකාවන්ගේ ජනවාරි වැටුප සහ අතිකාල ඇතුළු සියලු දීමනා සමග සාධාරණ වන්දි මුදලක් ද ගෙවීමට අර්ජුන් ඇලෝසියස් මහතාගේ පියා වන ජෙෆ්රි ඇලෝසියස් මහතා පොරොන්දු වුණත් එම පොරොන්දුව ද මේ වන තුරුත් ඉටු කර නොමැති බවට එම පිරිස චෝදනා කරති.

උද්ගත වී තිබෙන තත්ත්වය සම්බන්ධයෙන් කොළඹදී සිකුරාදා (02) රැස්වී දීර්ඝ වශයෙන් කරුණු සාකච්ඡා කර ඇති “ජනයුගය”කර්තෘ මණ්ඩල සාමාජිකයින් ඇතුළු සමස්ථ සේවක සේවිකාවන් මේ අසාධාරණයට එරෙහිව සිය අයිතීන් වෙනුවෙන් අඛණ්ඩ උපවාසයක් ආරම්භ කිරීමට තීරණය කර තිබේ.

මේ අඛණ්ඩ උපවාසය කොළඹ ඇල්ෆ්‍රඩ් පෙදෙසේ පිහිටි අර්ජුන් ඇලෝසියස් මහතාගේ කාර්යාලය ඉදිරිපිට හෝ ඔහුගේ පියා වන ජෙෆ්රි ඇලෝසියස් මහතාගේ නිවස ඉදිරිපිට පැවැත්වීමට “ජනයුගය”කර්තෘ මණ්ඩලය තීරණය කර තිබේ.

උපුටා ගැනීම ලංකා ලීක්ස් වෙබ් අඩවියෙන්..