Blog

දිගු කාලයක් පුරා ඇදි ඇදී යමින් තිබූ සයිටම් ගැටලුව සම්බන්ධයෙන් රජය විසඳුම් ඉදිරිපත් කර ඇති බවත් ඒ සඳහා සාකච්ඡා කිරීමට අවශ්‍ය නම් අමාත්‍යවරුන් සූදානමින් සිටින බවත් රජයේ ප්‍රවෘත්ති අධ්‍යක්ෂ ජනරාල් නීතිඥ සුදර්ශන ගුණවර්ධන මහතාගේ අත්සනින් යුත් නිවේදනයක් අද (24දා) නිකුත් විය.

එම නිවේදනයේ වැඩිදුරටත් දැක්වෙන්නේ සයිටම් සම්බන්ධයෙන් රජය ඉදිරිපත් කළ යෝජනා ජනවාරි 29 දා ශ්‍රේෂ්ඨාධිකරණයට මෝසමක් මගින් ඉදිරිපත් කිරීමට රජය විසින් නීතිපතිවරයාට පවසා ඇති බවයි.එහෙයින් උද්ඝෝෂණ පැවැත්වීමට පෙර පුළුල් ලෙස සාකච්ඡා පැවැත්වීම වැදගත් බව රජය විශ්වාස කරන බවත් එම නිවේදනයේ දැක්වෙයි.

මෙවර පළාත් පාලන මැතිවරණයේදී මහරගම පානදුර, මහියංගනය,අගලවත්ත, තිරප්පනේ , වැලිගම , යන පළාත් පාලන ආයතනයන් සදහා ශ්‍රී ලංකා පොදු ජන පෙරමුණේ නාම යෝජනා පත්‍ර  ප්‍රතික්ෂේප වීම හේතුවෙන්  ඊට එරෙහිව  අභියාචනාධිකරණය හමුවේ ගොනු කර තිබූ රිට් පෙත්සම් 6 ක් එම පක්ෂය විසින් අද (24) ඉල්ලා අස් කර ගන්නා ලදී.ඒ මෙම කරුණ සම්බන්ධයෙන් පොදුජන පෙරමුණ විසින් ⁣ගොනු කර තිබූ මූලික අයිතිවාසිකම් පෙත්සම් 6 ම  ,  පෙත්සම් විභාගයට නීතිමය පදනමක් නොමැති  බව කියමින් ශ්‍රේෂ්ඨාධිකරණ  විසින් විභාගයට නොගෙනම ඉවත දැමීම හේතුවෙනි. 

අභියාචනාධිකරණය සභාපති විනසුරු  ප්‍රීති පද්මන් සූරසේන විනිසුරු මඩුල්ල හමුවේ  අද  මෙම පෙත්සම කැදවූ අතර එහිදී ජනාධිපති නීතිඥ අලි සබ්රි මහතා විසින් පොදුජන පෙරමුණ වෙනුවෙන් මෙම පෙත්සම් ඉල්ලා අස් කර ගන්නා ලදී.

රටට, ජනතාවට හිතකර ආකාරයට රට පාලනය කරන ජනාධිපති මෛත්‍රීපාල සිරිසේන මහතා විසින් එලැඹෙන පළාත් පාළන මැතිවරණයෙන් පසු කැබිනට් මණ්ඩල සංශෝධනයක් කිරීමට වැඩි ඉඩකඩක් ඇති බව රාජ්‍ය ව්‍යවසාය සංවර්ධන රාජ්‍ය අමාත්‍ය ලක්‍ෂ්මන් යාපා අබේවර්ධන මහතා අද (24දා) පැවැති මාධ්‍ය සාකච්ඡාවකදී ප්‍රකාශ  ක‍ළේය.

පක්ෂ දෙකක් එකතු වී යහපාලන ආණ්ඩුවක් ලෙස ක්‍රියාත්මක වන නිසා අදාළ සංශෝධනවලදී කිසිදු පක්ෂයකට ගැටලුවක් ඇති නොවන ආකාරයට මෙය සිදුවිය හැකි බවද එතුමන් වැඩිදුරටත් ප්‍රකාශ කර සිටියේය.

බැඳුම්කර වාර්තාගේ තමා ගැන සඳහන් තොරතුරු සම්බන්ධයෙන් ප්‍රකාශයක් කිරීමට හිටපු මුදල් ඇමැති රවී කරුණානායක මහතා  කළ ඉල්ලීම ප්‍රතික්ෂේප කරමින් ඒ සම්බන්ධව ප්‍රකාශයක් කිරීමට ඉඩ දිය නොහැකි යයි කතානායක කරු ජයසූරිය මහතා අද (24) පාර්ලිමේන්තුවේදි  පැවැසීය.

 කෙසේ වෙතත් අවශ්‍යමනම් වෙනත් දිනයක් ලබාදිය හැකි  බව කතානායකවරයා වැඩ් දුරටත් පැවසූ අතර රවී කර්ණානායක මහතා පැවසුයේ  තමා එම ප්‍රකාශය මාධ්‍යයට ඉදිරිපත් කරන බවයි.

ගම්පොල ප‍්‍රදේශයේ දේශපාලනඥයකු ගම්පොල රජයේ පශු වෛද්‍ය කාර්යාල ඉඩමේ කොටසක් ප‍්‍රජා ශාලාවක් ඉදිකිරීමට යයි  පවසා අත්පත් කරගැනීමට දරන උත්සාහයට විරුද්ධ වූ එම කාර්යාලයේ ස්ථාන භාර පශු වෛද්‍යවරියට සහ කාර්ය මණ්ඩලයට  එම දේශපාලනඥයා ඇතුළු 20 ක පමණ කණ්ඩායමක් පැමිණ  මරණ තර්ජන කළේ යැයි කියන සිද්ධියකට විරෝධය පළ කරමින් කාර්යාලය වසා දමා පශු වෛද්‍යවරිය ඇතුළු කාර්ය මණ්ඩලය පළාත් කාර්යාලයට අනුයුක්ත වී ඇත.

මෙම කාර්යාලයේ ස්ථාන භාර පශු වෛද්‍ය කමනි දේදුනුපිටිය මහත්මිය පවසන්නේ මෙම ඉඩමේ අයිතිය පළාත් අධ්‍යක්ෂ යටතේ පශු වෛද්‍ය දෙපාර්තමේන්තුවට හිමි බවය.

ඒ අනුව නගර සභාවේ අනුමත සැලැස්ම අනුව දෙපාර්තමේන්තුවේ වියදමින් පැති බැම්මක් ඉදිකිරීමට කටයුතුකරමින් සිටියදී මෙම දේශපාලනඥයා  මරණ තර්ජනය කළ බවත් තමාට පිහියෙන් අනින බව කළ ප‍්‍රකාශය පටිගත වී ඇති බවත් වෛද්‍යවරිය පැවසුවාය.

මේ සම්බන්ධයෙන් අදහස් දැක්වූ රජයේ පශු වෛද්‍ය නිලධාරි සංගමයේ ලේකම් වෛද්‍ය ප‍්‍රදීප් කුමාරවඩු මහතා පැවසුවේ, මෙම දේශපාලනඥයාගේ තර්ජන සම්බන්ධයෙන් වගකිවයුතු අංශ නිසි පියවරක් නොගැනීම නිසා එය මරණ තර්ජන දක්වා දුරදිග ගොස් ඇති බවය.

පශු වෛද්‍ය කාර්යාලයේ සේවය අහිමිවීම නිසා ගම්පොල පශු වෛද්‍ය කොට්ඨාසයේ ගොවීන්ට මේ වෙනුවෙන් වන්දි ගෙවීමට සිදුවී ඇති බවත්, පශු වෛද්‍යවරිය ඇතුළු කාර්ය මණ්ඩලයට තර්ජනය කරන පිරිස අත්අඩංගුවට නොගන්නේ නම් වෘත්තීය ක‍්‍රියාමාර්ගයකට අවතීර්ණ වීමට සංගමයට සිදුවන බවත් ඔහු කීය.

රංජන් රාමනායක නියෝජ්‍ය ඇමති තුමන් විසින්  ශ්‍රී ලංකාවේ අධිකරණය, විනිසුරුවරුන් හා නීතිඥවරුන් බහුතරයක් දූෂිත බවට  කර ඇතැයි කියන ප්‍රකාශය අඩංගු වීඩියෝ පටයේ පිටපත ශ්‍රේෂ්ඨාධිකරණ විනිසුරු මණ්ඩලයේ අධ්‍යයනය සඳහා ඉදිරිපත් කරන ලෙස ශ්‍රේෂ්ඨාධිකරණය ඊයේ (22) ශ්‍රේෂ්ඨාධිකරණයේ රෙජිස්ටාර්වරියට නියෝග කළේය.

එහි පිටපත් ශේ්‍රෂ්ඨාධිකරණ විනිසුරුවරුන්ට අධ්‍යයනය කිරීම සඳහා ඉදිරිපත් කිරීමට අපේක්ෂා කරන බව නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල් ප්‍රියන්ත නාවාන මහතා ඊයේ (22) අධිකරණය හමුවේදී කරුණ දක්වමින් පෙන්වා දුන්නේය. එම වීඩියෝ පටය තම දෙපාර්තමේන්තුව විසින්ද අධ්‍යයනය කිරීමෙන් අනතුරුව එම ප්‍රකාශය මගින් අධිකරණයට යම් අපහාසයක් සිදුවී ඇතිනම් රන්ජන් රාමනායක මහතාට එරෙහිව චෝදනා පත්‍රයක් ගොනු කිරීමට අපේක්ෂා කරන බවත් අතිරේක සොලිස්ටර් ජනරාල්වරයා එහිදී වැඩිදුරටත් විනිසුරු මඩුල්ලට පෙන්වා දුන්නේය.

කෙසේ නමුත් පවතින ක්‍රියාදාමය අනුව එකී වීඩියෝ පටය ශ්‍රේෂ්ඨාධිකරණ විනිසුරු මඩුල්ල නරඹා එකී ප්‍රකාශය මගින් අධිකරණයට යම් අපහාසයක් සිදුවී ඇතිද යන නිගමනයට එළඹීම වඩා සුදුසු බවත් නීතිපති දෙපාර්තමේන්තුවද එය නරඹා ඒ පිළිබඳව මතයකට එළැඹෙන බවත් අතිරේක සොලිස්ටර් ජනරාල් ප්‍රියන්ත නාවාන මහතා අධිකරණයට පෙන්වා දුන්නේය.

එම කරුණු සලකා බැලූ සිසිර ද ආබෘෘ, නලින් පෙරේරා හා විජිත් මලල්ගොඩ යන ත්‍රිපුද්ගල ශේ්‍රෂ්ඨාධිකරණ විනිසුරු මඩුල්ල එම පැමිණිල්ල ලබන මාර්තු 23 වැනිදා යළි කැඳවීමට නියෝග කළේය.

ගමේ දිළිඳුකම පිටුදැකීම, ගම නගරය, රට එකතු කරන ආර්ථික දම්වැලක් සකස් කිරීම, ගමට හා නගරයට පිරිසුදු කාර්යක්‍ෂම පාලනයක් ඇති කිරීම, කැළිකසළ නව ක්‍රමයකට කළමනාකරණය කිරීම, නගරයේ සහගමේ මාර්ග පද්ධති නවීකරණය හා තාරුණ්‍ය මුල්කරගත් පිළිවෙතක් යන මූලික කරුණු පදනම් කරගෙන ශ්‍රී ලංකා නිදහස් පක්‍ෂය විසින් පළාත් පාලන ආයතන මැතිවරණය මූලික කරගනිමින් කරුණු 20කින් යුත් ප්‍රතිපත්ති ප්‍රකාශයක් සකස් කර ඇති අතර සිංහල සහ දමිළ භාෂාවලින් මුද්‍රණය කර තිබෙන මෙම ප්‍රතිපත්ති ප්‍රකාශය ලංකාවේ සෑම පවුලකටම ඉදිරි සතිය තුළදී බෙදා අවසන් කරන ලෙස සංවිධායකවරුන්ට උපදෙස් ලබාදී තිබෙන අතර, අපේක්‍ෂකයන් ප්‍රමුඛ පිරිස් නිවෙස් කරා ගොස් අදාළ ප්‍රතිපත්ති ප්‍රකාශය ලබාදීමට තීරණය කර තිබේ.