Blog

එළැඹෙන මැතිවරණය වෙනුවෙන් ශ්‍රී ලංකා නිදහස් පක්ෂය ජයග්‍රහණය කිරීම සඳහා කටයුතු නොකර වෙනත් පක්ෂයක් ජයග්‍රහණය කිරීමට කටයුතු කරන ඕනෑම ශ්‍රී .ල.නි.පක්ෂ මැති ඇමැතිවරයකුට එරෙහිව පක්ෂය දැඩි විනය ක්‍රියාමාර්ග ගැනීමට පියවර ගන්නා බව එක්සත් ජනතා නිදහස් සන්ධානයේ මහලේකම් අමාත්‍ය මහින්ද අමරවීර මහතා පැවැසීය.

මහලේකම්වරයා මේ බව පැවැසුවේ මේ වනවිට ශ්‍රී .ල.නි.පක්ෂය නියෝජනය කරන ඒකාබද්ධ විපක්ෂයේ සිටින මන්ත්‍රිවරුන් ශ්‍රී ලංකා පොදුජන පෙරමුණ යටතේ පුළුල් සන්ධානයක් ලෙස එළැඹෙන මැතිවරණයට මුහුණ දීමට තීරණය කර ඇති බවත් කිසිදු විටෙක ශ්‍රී .ල.නි.පක්ෂය සමඟ එකතු නොවන බවටත් අපට දැනගන්නට ලැබුණු පුවත පිළිබඳව මහලේකම්වරයාගෙන් විමසූ අවස්ථාවේදීය.

මහලේකම්වරයා වැඩිදුරටත් කියා සිටියේ ශ්‍රී .ල.නි.පක්ෂය නියෝජනය කරන කවර හෝ අමාත්‍යවරයෙක්, මන්ත්‍රිවරයෙක් වෙනත් පක්ෂයක් ජයග්‍රහණය කරවීමට කටයුතු කරයි නම් ඔවුන්ව පක්ෂයෙන් ඉවත් කිරීමට පක්ෂයේ මධ්‍යම කාරක සභාව ඒකමතිකව තීරණය කර ඇති බවයි.

එවැනි අයකු සිටී නම් පක්ෂයෙන් ඔවුන්ට විරුද්ධව විනය ක්‍රියාමාර්ග ගැනීමට පෙර පක්ෂයෙන් ඉවත් වී තමන් කැමැති පක්ෂයක් ජයග්‍රහණය කරවීමට කටයුතු කරන ලෙස මහලේකම්වරයා එවැනි මැති ඇමැතිවරුන්ගෙන් ඉල්ලා සිටී.

[rns_reactions]

ඔබ දේශපාලනයේ ආව වේගය වැඩියි කියලා හිතෙන්නේ නැද්ද?
වේගය වැඩියි කියලා නෙවේ හිතෙන්නේ. මගේ තිබ්බ හැඟීම්බරකම නිසා වැරැදි දේශපාලන තීන්දු කිහිපයක් ගත්තා.

94 ආණ්ඩුවක් හදලා ඒකේ කැබිනට් ඇමැති කෙනෙක් වෙන ඔබට වගකීම් බර වැඩි වුණේ නැද්ද?
අනූ හතරේ අපි පිහිටුවපු ආණ්ඩුවේ ඉතාම සතුටින් වැඩ කළා. ඇමැතිවරයෙක් විදියට සෑහෙන්න මම සාර්ථකයි. ඒ කාලේ සියයට 28ක් තිබ්බ දුප්පත්කම අද සියයට 6යි. ආසියාවේ කොහේවත් නැති මූල්‍ය ආයතනයක් අපි සමෘද්ධිය හරහා හදනවා. ඔලිම්පික් දින්නා. වර්ල්ඩ් කප් ගත්තා. තුරුණු ශක්ති කළා. කෘෂිකර්මයෙන් අතිරික්ත අස්වැන්නකට ගියා.

මුලින්ම වරද්දා ගත්තේ කොතැනද?
පක්ෂ මහ ලේකම්කමට ඉල්ලපු එක ලොකු වරදක්. එදා ඒක මංගලට දෙන්න චන්ද්‍රිකා මැතිනියට ඕන වුණා. මටත් ඕනකම තිබ්බේ මංගලව ගේන්න. ඒ වෙලාවේ මහින්ද මහත්තයත් තරග කරන්න සූදානමක් තිබ්බා. ඒ වෙලාවේ මංගල පස්සට කරලා මම ඉදිරිපත් වුණා.

ඔබ ඔහොම කීවට එදා ඉදිරිපත් වෙන්නේ මෛත්‍රිනේ?
ඔව්, මම එන නිසා මහින්ද මහත්තයා පස්සට වෙලා මෛත්‍රි මහත්මයාව ඉස්සරහට දැම්මා.
පස්සේ ඔබ පක්ෂය මාරු කරලා එක්සත් ජාතික පක්ෂයට එනවා. ශ්‍රී ලංකා එකේදී මනාප 70,000ක් විතර ගන්න ඔබ එජාපයෙන් මනාප ලක්ෂ දෙකකට කිට්ටුව ගන්නවා. බැලුවම එජාප පාක්ෂිකයෝ ඔබට සෑහෙන්න සලකලා?

ඔව්, එක්සත් ජාතික පාක්ෂිකයෝ එහෙමයි. බලන්න ගිය වතාවේ රාජිත කළුතර පළමු වැනියා. චම්පික කොළඹින් ඉහළින් දිනනවා. ඒ ඒකේ පාක්ෂිකයන්ගේ ලිබරල් මානසිකත්වය.
පාක්ෂිකයෝ ආගන්තුකයන්ට සලකනවා, පක්ෂය එහෙම කරන පාටක් නැති නිසාද ඔබ නැවත මහගෙදර එන්නේ?
පක්ෂය ඇතුළේ ගමනක් යන්න ඉඩකඩ තියෙනවද කියලා ලොකු ප්‍රශ්නයක් තියෙනවා. ඒක ටික කලකට පෙර අපේ පක්ෂෙත් තිබ්බා. ධාතුසේනට පස් ගහලා මරන්න කාශ්‍යප තීරණය කරන්නේ ඒ බලය කියන කාරණය නිසා.

ආණ්ඩුවට දැන් අවුරුදු තුනයි, හැම අතින්ම චෝදනා නේද?

මතක තියාගන්න මේ තමයි ඉතිහාසයේ බිහිවෙච්ච අමාරුවෙන්ම ඉස්සරහට යන ආණ්ඩුව. එකිනෙකට වෙනස් දේශපාලන දර්ශන තියෙන්නේ. 2010න් පස්සේ රාජපක්ෂලා මේ රටේ විකෘතියක් වෙනවා. ඒ විකෘතිය වෙනස් කරන්න මෛත්‍රි ජනාධිපතිතුමා උත්සාහ කරනවා. 77 ඉඳලා පටන් ගන්න රනිල් වික්‍රමසිංහ අගමැතිතුමා උත්සාහ කරනවා. මේ දෙකක්. ලිබරල් සහ මිශ්‍ර ආර්ථික දෙකක් එකට ගැටගැහිලා. හැබැයි සියල්ලට වඩා ජාත්‍යන්තර ජයග්‍රහණ අපි ලැබුවා. මොකද මේ තියෙන්නේ අන්ත දෙකක යන පක්ෂ දෙකක එකතුවක්. ඉතිං ගැටුමක් එක්ක තමයි යන්නේ. හැබැයි ජනාධිපතිතුමා මේ ආණ්ඩුව හදලා මහ විශාල අනතුරකින් අපේ රටත්, අපේ පක්ෂයත් බේරා ගත්තා.
ඔය දෙපැත්තට යන ගමනේදී ආණ්ඩුව එන්න කලින් දුන්න මූලික පොරොන්දුවත් ඉටු කරන්න බැරි වෙනවනේ?

පැහැදිලිවම. අනෙක් අතට එක පාර්ශ්වයක් දුර්වල වෙනවට අනෙක් පාර්ශ්වය කැමැතියිනේ. අපේ පක්ෂය බෙදිලා ඉන්නවට එක්සත් ජාතික පක්ෂය කැමැතියි. ඉතිං එහෙම වුණාම ඔය දුන්න එකක්වත් ඉටුකර ගන්න බැරි වෙනවා.

විධායක ජනාධිපතිධුරය හඳුන්වා දුන්න දවසේ ඉඳලා ශ්‍රී ලනිපය හිටියේ ඒක අහෝසි කරනවා කියලා නේද?
ඔව්.

එහෙනම් ඇයි දැන් ඒක ආරක්ෂා කරන්න කතා කරන්නේ?
වෙලා තියෙන්නේ මේකනේ. ඔව්. අපි එහෙම කීවා. හැබැයි අමතක කරන්න එපා 13 ව්‍යවස්ථාවෙන් පසුව ඇති වෙච්ච තත්ත්වය. ඒ ගැන අපේ පක්ෂයේ මත කිහිපයක් තියෙනවා. ඒ නිසා විධායක ජනාධිපති ධුරය පැවැතීම අවශ්‍යයි. 13න් පස්සේ ඉන්දියාවේ තියෙන බලතලවත් අපේ මධ්‍යම ආණ්ඩුවට නෑ. ඉන්දියාවේ තියෙනවා මධ්‍යම රජයේ බල තලවලට යටත්ව කියලා වගන්තියක්. අපේ එහෙම නෑ. 13ගේන කොට ශේ‍ර්ෂ්ඨාධිකරණය හරියටම දෙකට බෙදුණා. සමහරු කීවා රට ෆෙඩරල් වෙනවා කියලා. අනෙක් අය කීවා විධායක ජනපති ඉන්න නිසා එහෙම වෙන්නේ නෑ කියලා. අන්තිමට ජේ.ආර්. තව කෙනෙක් පත් කරලා 5ට 4 තීන්දුවක් ගත්තා.

එහෙනම් ඇයි පක්ෂ නායකයා වන මෛත්‍රි එය අහෝසි කරන්න පොරොන්දු දුන්නේ?

එතුමා ඒක කළා. එතුමා ඡන්දෙට කලින් පොරොන්දු වුණේ ව්‍යවස්ථාවේ තිබෙන ජනමතවිචාරණයකට යන්න තියෙන කාරණාවලට අත තියන්නේ නෑ කියලයි. එතුමා කීවටත් වඩා කළා. සමහර දේවල් කරන්න එපා කීවේ උසාවිය. ඊට පස්සේ මහ මැතිවරණය ආවා. එක්සත් ජාතික පක්ෂය කීවා නව ආණ්ඩුක්‍රම ව්‍යවස්ථාවක් ගේනවා, විධායක ජනාධිපතිකම අහෝසි කරනවා කියලා. අපි එහෙම දෙයක් කීවේ නෑ. අහෝසි කරනවා කීව එක්සත් ජාතික පක්ෂෙට ලැබුණද ජනවරමක්, නෑ. ලැබුණේ නෑ. අපට ලැබුණෙත් නෑ. එහෙම බැලුවම මේ ආණ්ඩුවේ කාටවත් සම්පූර්ණ ජනවරමක් නෑ නව ආණ්ඩුක්‍රම ව්‍යවස්ථාවක් ගේන්න.

94 එන ඔබතුමන්ලා, ලියනවා පොතක් බලය බෙදීම ගැන. ඒ වෙනකොටත් 13 ක්‍රියාත්මකයි. විධායක ජනපති ධුරය අහෝසි කරන බවත් 94 දී ඔබ කියනවා. එදා ඔය කියන අනතුර දැක්කේ නැද්ද?

අනතුර දැක්කා. අපි ආවේ අලුත් ආණ්ඩුක්‍රම ව්‍යවස්ථාවක් ගේන්න. අපි මීට වඩා ඉදිරියට ගිය එකක් කරන්නයි ගියේ. මම අදත් කියනවා නව ආණ්ඩුක්‍රම ව්‍යවස්ථාවක් ගේන එක. හැබැයි ඒකට ජනවරමක් මේ පාර්ලිමේන්තුවේ නෑ.

94 ආණ්ඩුව දශකයක් විතර ඇදගෙන එන්නේ ‘කවදාවත් නොකෙරුණ’ ‘පැකේජය’ පෙන්නමින්. මේ වෙන්නෙත් ඒකමද?
මේ ආණ්ඩුව හැදුවේ අපි නෙවේනේ. අපි හිටියේ මහින්ද දිනවන වැඩකනේ. ආණ්ඩුව ගේන්න කැප වෙච්ච අය කියනවා ජනවරම ලැබුණේ නව ආණ්ඩුක්‍රම ව්‍යවස්ථාවකට කියල. එතැන ෆෙඩරල් ප්‍රාර්ථනා කරන අයත් ඉන්නවා. හැබැයි හැමෝම මෛත්‍රිපාල සිරිසේන මහතා රටට කීව දේ අමතක කරනවා. එතුමා කීවේ, ජනමත විචාරණයකට යන කිසිවකට අත තියන්නේ නෑ කියලා.

සෝභිත හාමුදුරුවන්ගේ දේහය ඉදිරියේදී ජනාධිපතිවරයා පොරොන්දු වෙනවා විධායකය අහෝසි කරනවා කියලා?
එතුමා ඒක කරලා ඉවරයි. එතුමා යාහැකි උපරිමයටත් එහා ගියා.

ඒ කියන්නේ 94 ඔබතුමන්ලා විධායක ජනපති ධුරය අහෝසි කරනවා කියලා කීවෙත් ඔය ටික අහෝසි කරන එකද?
පැහැදිලිවම ‘ඔව්’ අපි බණ කියනවා වගේ කීවේ අත්තනෝමතික බලය ඉවත් කරනවා කියලයි. අපි ලේවලින් ඒකීය රටක් පතන මිනිස්සු.

ව්‍යවස්ථාව ගෙනාව එජාපය අලුත් ව්‍යවස්ථාවක් ගේමු කියනවා. ඒක නරකයි කීව ඔබේ පක්ෂය දැන් ඒක රකිනවා?
ඕක පුද්ගලබද්ධ කාරණයක්. එයාලගේ ව්‍යවස්ථාවෙ 94න් මෙහාට හැමදාම හිටියේ අපේ පක්ෂයේ නායකයෙක්. ජනාධිපතිවරණයක් එනකොටම එයාලගේ පක්ෂේ අයම වික්‍රමසිංහ මහත්තයාට කියනවනේ ඔබතුමා පස්සට වෙන්න කියලා.

ඒ කියන්නේ ජනාධිපතිකම ගන්න බැරි නිසා විධායක අගමැතිකම ගන්න හදනව..?
ඒක නේද පේන්න තියෙන්නේ.

ඒකාබද්ධ විපක්ෂය නව ආණ්ඩුක්‍රම ව්‍යවස්ථාව විවේචනය කරනවා. ඒ නිසා ශ්‍රී ලනිපයත් වැඩෙන් පස්සට ගියාවත්ද..?
නෑ.නෑ. අපි කොහොමත් නව ව්‍යවස්ථාවක් ගේන්න එකඟයි. හැබැයි ඒකීය රටක්.

පක්ෂ දෙක මත දෙකක, කොහොමද ව්‍යවස්ථා හදන්නේ..?
ඒක තමයි කියන්නේ. මේ අමුඩ ගැහුවට, එකඟතාවක් තියෙන්න එපාය. අපි විතරක් නෙවේ උතුරෙත් බෙදිලනේ. එහේ මහ ඇමැති ප්‍රභාකරන්ගේ කිරි අප්පච්චි වෙලානේ. මිනිහා ප්‍රහාර උගන්වන සයිස්. මේ ගෙවන්නේ ගන්ධබ්බ වෙලාවක්. හැබැයි මේ තියෙන සංවාදය මරු. අපේ පක්ෂ දෙක කලබල වෙන්න ඕන නෑ.

මේ ගමන කොච්චර කල් යයිද..?
නෑ. මේ දීර්ඝකාලීන ගමනක් යන වැඩක් නෙවෙයි. හැබැයි අපි තේරුම් ගන්න ඕන රටේ තියෙන තත්ත්වය. මහින්ද මහත්තයා, අවුරුදු දෙකක් තියෙද්දි ඡන්දෙට ගියේ නිකං නොවේ. ඔහු දන්නවා අපි ගත්ත ණයවල ගෙවීම් පටන් ගන්නේ 2017 ඉඳලා කියලා. ඒ එක්කම 2015 මාර්තු 23 වැනිදා එක්සත් ජාතීන්ගේ මානව හිමිකම් කවුන්සිලය අපට එරෙහි වාර්තාවක් එවනවා. ඒ වාර්තාවේ තිබුණේ අපි ම්ලේච්ඡයෝ කියලා. අපි යුද අපරාධකාරයෝ කියලා. ඒකේ ප්‍රතිඵලයක් විදියට යුරෝපීය ආර්ථික තහංචියකට ගියොත් අපි අමාරුවේ වැටෙනවා.

ශ්‍රී ලනිපයෙන් වෙන් වෙච්ච පාර්ශ්වය මේ වෙලාවේ ප්‍රබලයි නේද..?
මොන පිස්සුද..? එයාලා අන්ත ජාතිවාදී, ආගම්වාදී, කුලවාදී, ගෝත්‍රවාදී පිරිසක්.

හැබැයි එතැන ඉන්නේ ප්‍රබලයෝ තුන්දෙනෙක්..?
කවුද ඔය ප්‍රබලයෝ..?

මහින්ද, බැසිල්, ගෝඨා කියන ප්‍රබල චරිත ඒ පැත්තේ ඉන්නවා?
අයියෝ මොන ප්‍රබලද. රාජපක්ෂලානේ. මේ ලංකාවේ දේශපාලනය දන්න, හොරකමට දූෂණයට, වංචාවට එරෙහි ජනතාව මෙයාලා ගැන දන්නවා. ඒ පවුල දිහා ඒ අය බලන විදිහක් තියෙනවා. හැබැයි චමල්ට එහෙම චෝදනා නෑ.

බැසිල් රාජපක්ෂ මහතා පොදුජන පෙරමුණ ශක්තිමත් කරනවා?
ඒක වෙළෙඳ භූමිකාවක්නේ. පිටකොටුවේ පේව්මන්ට් එකේ ප්ලාස්ටික් බඩු විකුණනවා වගේ වැඩක් ඔහු කරන්නේ.

ඔබතුමා බැසිල් මහත්තයත් එක්ක විරසකේක වගේ?

අනේ නෑ. මට එතුමා එක්ක තරගයක් තිබ්බේ නෑ. එතුමා ඉතින් පක්ෂයේ හිටියේ සර්වබලධාරී දෙවියෝ වගේනේ. අඩුතරමේ සමෘද්ධියට කරපු මේ මහා විනාශ නවත්වන්න කියලවත් කියාගන්න මට බැරි වුණානේ. බැසිල් තමා ගම විකෘති කළේ. සමෘද්ධියට එහි යුතුකම කරන්න බැසිල් ඉඩ දුන්නේ නෑ. එයා සමෘද්ධිය ගැන මෙලෝ දෙයක් දන්නේ නෑ. ක්ෂුද්‍ර මූල්‍ය කියන්නේ මොකක්ද කියලවත් එයා දන්නේ නෑ. කියවලත් නෑ. ඒ නිසා ගම අද ගිනිපොලී මාෆියාවක හිරවෙලා

දැන් සමෘද්ධිය ඔබේ අතේ?
පසුගිය කාලේ මට සමෘද්ධි අමාත්‍යාංශයේ බොහෝ අඩුපාඩු හදාගන්න අවස්ථාව තිබ්බේ නෑ. මට දැන් ඒ අවස්ථාව තියෙනවා.

ඔය මොනවා කීවත් එස්.බී. දැන් හරිම අක්‍රිය වෙලා වගේ නේ?
නෑ නෑ. එහෙම නෑ. දැන් පරිණත වෙලා.

සමහරු කියනවා මෛත්‍රි පක්ෂය දෙකඩ කරනවා කියලා?
අපි එකක් තේරුම් ගන්න ඕන. අපි සිරිසේන ජනාධිපතිතුමා එක්ක හිටියේ නෑනේ. අපි හිටියේ වෙනම. හිටපු ජනාධිපතිතුමාට ඕන වුණා වත්මන් ජනාධිපතිතුමා හමු වෙන්න. අපි එතුමා එක්ක කතානායකතුමාගේ නිවසට ආවා වත්මන් ජනාධිපතිතුමා හමු වෙන්න.

එහෙම හමු වෙලා එළියට ආව ගමන් මහින්ද මහත්තයා කියනවා ” මම පක්ෂය මෛත්‍රි ජනාධිපතිතුමාට බාර දෙනවා ඔයාලා උදවු කරන්න කියලා. එහෙම දීලා ඉවර වුණාමත් අපි වත්මන් ජනාධිපතිතුමාට කියනවා අපි විපක්ෂයේ ඉඳන් ඔබතුමාට උදවු කරන්නම් කියලා. ඒ වෙලාවේ මහින්දානන්ද, ලොහාන්, ඩිලාන්, මහින්ද අමරවීර එහෙමත් හිටියා.
මධ්‍යම කාරක සභාව කැඳවලා අපි ආපහු මෛත්‍රි ජනාධිපතිතුමාව පක්ෂ සභාපති කරද්දීත් ඔය අය එතැන ඉන්නවා. සියලු දෙනාම එකතු වෙලයි සභාපති කළේ. ඇමැතිකම් ගන්නත් එයාලා එකඟ වෙනවා. එහෙම කරගෙන යනකොට දැන් මේ පක්ෂයේ කෑල්ලක් කඩාගෙන, අපේ පක්ෂය දුර්වල කරමින්, ඒ අය ශක්තිමත් කරමින් හිටපු ජනාධිපතිතුමා මොකක්ද මේ කරන්නේ. පක්ෂය කඩලා දුර්වල කරලා තාවකාලිකව කවුරුහරි බලයට ගෙනැල්ලා තමාගේ ඉලක්කයට අලුත් අපේක්ෂකයාගේ කාලය පිරෙනකම් විපක්ෂයේ ඉන්නවා. මේක අපේ පක්ෂය හිතාමතා විනාශ කරන වැඩක්. දැන් කරන්නේ ඒක.

එයාලම ඉල්ලලා තමයි විපක්ෂෙට ගියේ. එහෙම ගිහින් මොනවද මේ කරන්නේ. මහින්ද මහත්තයා මේ යන්නේ තමන්ගේ ඉත්තාව ගේන්න.
කවුද ඉත්තා?
නාමල්

සමහරු කියනවා මේ ආණ්ඩුව පරණ පව් ගෙවනවා කියලා. ගුවන්තොටුපොළ, වරාය, සයිටම් වගේ ඒවා ලොකු අර්බුද වෙනවා නේද?
ඒවා හදපු එක හොඳයි. අපි ඒවා නිසි පරිදි කළමනාකරණය කරලා ආදායම් උත්පාදන මාර්ග බවට පත් කළ යුතුයි. අද ලෝකයේ කියුබාවයි උතුරු කොරියාවයි හැර හැම රටකම පෞද්ගලික සරසවි තියෙනවා. චීනයේ පවා තියෙනවා. සයිටම් එපා කියන මහාචාර්යවරුන්ගේ, ජේවීපී අයගේ දරුවෝ පිටරට පෞද්ගලික සරසවිවල ඉගෙන ගන්නවා.

ඔබට හිතෙන්නේ නැද්ද බොහෝ තැන් මේ ආණ්ඩුව වරද්දාගෙන කියලා?

ඔව්. බොහෝ තැන් වරද්දාගෙන ඉන්නේ. බැඳුම්කරය බලන්න. ඒක හොරකමක්. මංකොල්ලයක්. ඒක රකින්න මේ ආණ්ඩුවේ සමහරු දඟලපු හැටි ඉතාම බරපතළයි. පාරිශුද්ධ යහපාලනයේ තිබ්බ හොරකමට, වංචාවට එරෙහි සංකල්පයට ඒක ලොකු කැළලක්. මේක ඉතිහාසයේ ලොකුම හොරකම. ඒ හොරකමට මේ ආණ්ඩුව සම්බන්ධයි. හොරකම් කළා මදිවට දුවලා ගිහින් ඒ හොරු සුද්ද කරන්නත් දඟලනවා. ඒක තමයි මේ ආණ්ඩුවෙන් වෙච්ච බරපතළම වරද.

ඔය කීවට කෝ දඬුවම්?
ඔව්. මේ චෝදනා බරපතළයි. එළියට නොපෙනුණාට අපි ඒ වෙනුවෙන් සටන් කරනවා. එහෙම කරද්දී පවා යම් යම් දේ වෙනවා. මේවයින් අපි නිදහස් වෙන්න ඕන. අනික සංවර්ධන වැඩ වේගවත් කරන්න ඕන. ආණ්ඩු ඇතුළේ දූෂණ ගොඩක් වෙනවා. එජාපය හදන්නේ සේරම විකුණන්න. අනික අවුරුදු 20ක් විතර විපක්‍ෂයේ හිටපු අයට ක්‍ෂණික වුවමනාවලුත් ඇතිනේ. ඉතින් අපි ඉන්න නිසයි මෙහෙමවත් රැකිලා තියෙන්නේ. එකතු වෙච්ච වෙලාවේ රට ඉදිරියට ගෙනියන්න ඕනෑ.

ඒකාබද්ධ විපක්‍ෂය ‘සාමාජිකත්ව ප්‍රවර්ධන’ පටන් අරන්? රැළි පවා තියනවා?
නෑ. අපිත් අපේ ප්‍රවර්ධන කටයුතු කරනවා.

පක්‍ෂය දෙකඩ වෙලා, කොහොමද ඡන්දයක් දිනන්නේ?
නියමිත වෙලාවේ පාක්‍ෂිකයෝ හරිතැන හිට ගනියි. එදා මහ මැතිවරණය වෙලාවේ හිටිය තැන නෙවේ අද අපි ඉන්නේ. පාක්‍ෂිකයෝ දැන් පක්‍ෂයට එනවා. අදත් මහින්දට පක්‍ෂ දේහයේ හයියක් තියෙනවා. ඒ හයියෙන් එතුමා මේක විනාශ කරනවා.

අන්තිමට එක්සත් ජාතික පක්‍ෂය තනි අශ්වයකුගේ ගේමක් ගහයි?
ඔව්, ඒක වළක්වන්න අපි ඉතසිතින් වැඩ කරනවා. අපි නිතර ඒ වෙනුවෙන් සාකච්ඡා කරනවා.

ඒකාබද්ධය කියන්නේ එජාපයෙන් වෙන්වෙලා ආවොත් එකතු වෙනවා කියලා?
මොන විකාර කතාද ඒ කියන්නේ. ඔය එතැන ඉඳන් කෑ ගහන එකොළොස් දෙනෙක් පියෝ යූ.ඇන්.පී. ආණ්ඩුවක් හදන්න ගියපු අය. කෙහෙළියලා හිටියේ එජාපයේ ‍ෙදාරකඩට ගිහින්. දැන් ඔය කෑ ගැහුවට හිටියේ එහෙම. දැන් ඔය කොන්දේසි දාන්නේ හෙලුවෙන්. සිරිකොත ‍ෙදාරකඩ හිටපු උන් තමයි අද ඔය කුණුහරුප කියන්නේ. අද ඒකාබද්දේ ඉන්නේ පියෝ යූ.ඇන්.පී. ආණ්ඩු හදන්න ගේම් ගහපු උන්.

ඡන්දෙන් මොනවා වෙයිද?

පළමුවැනි පළාත් සභා ඡන්දෙට අපි තරග කළේ නෑ. තරග කළේ ශ්‍රී ලනිපයේ 3/4ක් කඩාගෙන ගියපු මහජන පක්‍ෂය. එයාලා කරටකර සටනක් දුන්නා. ඡන්දෙන් පස්සේ මහජන පක්‍ෂය හෝදගෙන ගිහින් ශ්‍රී ලංකා එකට ආවා. එජාපයේ ලලිත්ලා, ගාමිණිලා රාජාලියා හැදුවා. අන්තිමට කෝ රාජාලියා.

දැන් එස්.බී. මෙතැනින් එහාට කොතැනටද යන්නේ?
විශ්‍රාම යනවා.

පොත් බොහොමයක් ලීවනේ. ඊළඟ පොත මොකක්ද?
කිහිපයක් ලියනවා.

දැන් හරි තැන්පත් වෙලා වගේ?
අම්මෝ, දැන් මට හැටහතක්. දරුවොත් ලොකුයි. මම දැන් වයසට ගිහින්.

[rns_reactions]