සිසුන් 200 ට අඩු පාසල් වල ප්රාථමික අංශ (1 – 5 ශ්රේණි) 2021 ඔක්තෝබර් මස 21 දින ආරම්භ කිරීමට තීරණය කළ බව අධ්යාපන අමාත්ය දිනේෂ් ගුණවර්ධන මහතා ප්රකාශ කළේය. මේ අනුව පළමු අදියර තුළ ආරම්භ කෙරෙන පාසල් සංඛ්යාව 3000 කි.
සෞඛ්ය අමාත්යාංශයේ සෞඛ්ය රෙගුලාසි හා පාසල් සෞඛ්ය මාර්ගෝපදේශ මත මෙම පාසල් ආරම්භ කිරීම සිදුවේ.
ලොකු කුඩා සෑම රටකටම බලපාන වසංගත, දේශගුණ විපර්යාස, ගෝලීය ආහාර තත්වය,තිරසාර සංවර්ධන ඉලක්ක සපුරා ගැනීම සහ පිරිසුදු බලශක්තියට මාරුවීමේ අවශ්යතාව යනාදී කාරණා රැසක් ගැන එක්සත් ජාතීන්ගේ මහ මණ්ඩල සැසිවාරයේදී ප්රධාන වශයෙන් අවධානය යොමුවූ බව විදේශ කටයුතු අමාත්ය මහාචාර්ය ජී එල් පීරිස් මහතා අද (05) පාර්ලිමේන්තුවේදී පැවසීය.
මේ මූලික ගැටලු විසඳීම සඳහා ශ්රී ලංකාව ජාත්යන්තර ප්රජාව සමඟ සමඟ සංවාදයකට සහභාගි විය යුතු බවද හෙතෙම සඳහන් කළේය.
විදේශ අමාත්යවරයා මෙසේ පැවසුවේ එක්සත් ජාතීන්ගේ මහා මණ්ඩල සැසිවාරයේදී කෙරුණු සාකච්ඡා සම්බන්ධයෙන් විශේෂ ප්රකාශයක් කරමිනි.
විදේශ ඇමැති මහාචාර්ය ජී.එල්. පීරිස් මහතා කළ සම්පූර්ණ කතාව පහත පළ වේ.
ශ්රී ලංකාව වෙනුවෙන් ජාත්යන්තර ක්ෂේත්රය තුළ අප දරන ප්රයත්න පිළිබඳව මෙම සභාවට දැනුම් දීම සඳහා මම අද නැගී සිටිමි. අපි රජයක් වශයෙන් වර්තමාන වසංගතයට එරෙහිව සටන් කරමින් එහි ඉතා අයහපත් බලපෑම් හේතුවෙන් සිදුවන ආර්ථික හැකිලීමේ ප්රතිවිපාක සමඟ කටයුතු කරන අතර, පාලනය සහ ජාතික යහපැවැත්ම පිළිබඳ අපගේ ප්රවේශයේ තවත් පැතිකඩක් ඔබතුමාගේ අවසරය ඇතිව ඉදිරිපත් කිරීමට මම කැමැත්තෙමි. ප්රතිපත්තිමය වශයෙන්, අපි අනෙකුත් ජාතික රාජ්යයන් සමඟ පූර්ණ ලෙස, අවංකව හා විවෘතව කටයුතු කිරීම සඳහා වන අපේ අතිගරු ජනාධිපතිවරයාගේ කැපවීම මෙහිදී අවධාරණය කළ යුතුය. අපගේ සෞභාග්යයේ දැක්ම, තනිවම සාක්ෂාත් කර ගත නොහැක. අපි සියලු දෙනාම පොදු අනාගතයක් බෙදාහදා ගන්නා අතර, මතු පරම්පරාව වෙනුවෙන් එම දීප්තිමත් අනාගතය සුරක්ෂිත කර ගැනීම සහ සහතික කිරීම සඳහා අපට කළ හැකි උපරිමය කිරීම අපේ යුතුකමයි.
මේ අනුව ගරු කථානායකතුමනි, අපගේ ජාත්යන්තර හවුල්කරුවන් සහ මිතුරන් සමඟ මෑතක දී සිදුකළ ජාත්යන්තර කටයුතු පිළිබඳව මම මෙම සභාවේ අවධානය යොමු කරමි. අපි ශ්රී ලංකාවේ සිටින රාජ්යතාන්ත්රික නියෝජිතයින් සහ ශ්රී ලංකාව සඳහා අක්ත ගන්වන ලද ද්විපාර්ශ්වික හවුල්කාර රටවල් සමඟ සංවාදයක් පවත්වා ගෙන යන අතර, භූගෝලීය හා අනෙකුත් සීමා මායිම් හරහා ජාත්යන්තර මට්ටමින් කටයුතු කිරීමට ද අපි උත්සාහ දරන්නෙමු. ගරු කථානායකතුමනි, ලැබෙන සෑම අවස්ථාවක දී ම හැකි විශාලම ප්රජාවක් ඇමතීමට අපි උත්සාහ දරන්නෙමු. මෙය අපට එරෙහිව එල්ලවන විවේචනාත්මක අදහස්වලට එරෙහිව කටයුතු කිරීමට හෝ ඒවා වැළැක්වීම සඳහා පමණක් නොව, ගෝලීය වේදිකාවේ දී අපේ හඬ ඇසෙන්නට සැලැස්වීම පිණිස ද වේ. අපි මෙය ද්විපාර්ශ්වික හවුල්කරුවන්, සංවිධාන හා කලාපීය කණ්ඩායම් සමඟ සහ විශේෂයෙන් බහුපාර්ශ්වික සංසදවල දී සිදුකරන්නෙමු. පුද්ගලිකව සහ සාමූහික වශයෙන් අප මුහුණ දෙන අසංඛ්යාත අභියෝගයන්ට මුහුණ දීමේ දී, විවෘතභාවය පිළිබඳ හැඟීමක්, අන් අයගේ සංජානනය සහ සැබෑ ජීවිතයේ අත්දැකීම් අවශෝෂණය කර ගැනීමට සහ එතුළින් ඉගෙනීමට ඇති කැමැත්තක් අප තුළ ද පවතී.
ගරු කථානායකතුමනි, අපි සාපේක්ෂ වශයෙන් කුඩා, දූපත් රාජ්යයක් වෙමු. කෙසේවෙතත්, අපි අභිමානවත් ඉතිහාසයක් සහ සංකීර්ණ පසුබිමක් සහිත ජාතියක් ද වෙමු. ලෝකයෙන් අපට ඉගෙන ගැනීමට බොහෝ දේ ඇති අතරම, ලෝකය සමඟ බෙදාහදා ගැනීමට ද බොහෝ දේ අපට ඇත. අපගේ බහුවිධ විවිධත්වය යනු සමාජ අත්හදා බැලීමක් නොව, එදිනෙදා අප ජීවත් වන දෙයකි. එය වරින් වර ආතතීන් ඇති කරන නමුත්, අපි තවමත් සහෝදරත්වය සහ හොඳ හිත පිළිබඳ හැඟීමෙන් යුක්තව දිගටම දිවි ගෙවන්නෙමු. අතිගරු ජනාධිපතිතුමා, ගරු අග්රාමාත්යතුමා සහ මා විසින් සහභාගී වන ලද, මෑතක දී ඉතාලිය, ජිනීවා සහ නිව්යෝර්ක් හි පැවති ඉහළ පෙළේ සාකච්ඡා තුනේ දී අපි මේ බව අවධාරණය කළෙමු. මෙම සිදුවීම් මඟින්, සියලු රටවල් සඳහා පොදු වැදගත්කමක් සහිත වැදගත් ගෝලීය ගැටලු සම්බන්ධයෙන් ජාත්යන්තර ප්රජාව සමඟ සහයෝගීතාව ප්රකාශ කිරීම සඳහා මෙන්ම, මේ සම්බන්ධයෙන් ශ්රී ලංකාවේ අපගේම අදහස් ඉදිරිපත් කිරීම සඳහා ද ශ්රී ලංකාවට තීරණාත්මක වේදිකා සපයා ඇත. මෙම මෑත කාලීන අන්තර්ක්රියා හේතුවෙන්, ජාත්යන්තර වශයෙන් ඉහළම තලයේ සිටින නායකයින් හා ප්රතිපත්ති සම්පාදකයින් සමඟ අන්තර් ක්රියා සිදුකිරීමට අපට හැකි විය.
වසංගත තත්ත්වය හේතුවෙන් පැවති භෞතික සම්බන්ධතාවයේ දිගුකාලීන පරතරයකින් අනතුරුව, එක්සත් ජාතීන්ගේ මහලේකම්වරයා විසින් “අපේ කාලයේ දී පැවති විශාලතම අර්බුද ප්රවාහය” ලෙස හැඳින්වූ විවිධ අංශයන් පිළිබඳව සාකච්ඡා කිරීම සඳහා මෙම කටයුතු මඟින් වැදගත් අවස්ථාවක් ලබා දුන්නේය.
අතිගරු ජනාධිපති ගෝඨාභය රාජපක්ෂ මැතිතුමා නිව්යෝර්ක් හි පැවති 76 වැනි එක්සත් ජාතීන්ගේ මහා මණ්ඩල සැසිවාරයේ දී සිය ප්රකාශය කරමින්, වසංගතය සහ ඒ හේතුවෙන් ඇති වන ආර්ථික බිඳවැටීම් මෙන්ම දේශගුණික විපර්යාස හේතුවෙන් පවතින අර්බුදවලට එරෙහිව සටන් කිරීම සඳහා ශ්රී ලංකාව ජාත්යන්තර හවුල්කරුවන් සමඟ පූර්ණ ලෙස සම්බන්ධ වී සිටින බව ප්රකාශ කළේය. අපගේ මෙම කටයුතුවල අරමුණ වන්නේ, මෙම ගෝලීය අභියෝගවල අයහපත් ප්රතිඵලවලින් අපේ ජනතාව ආරක්ෂා කර ගැනීමයි.
ඒ හා සමානව ශ්රී ලංකාව සඳහා වැදගත් වන මෑත කාලීන දේශීය ප්රවණතා සහ මානව හිමිකම් හා සංහිඳියාව සම්බන්ධ තීරණාත්මක ජාතික ගැටලු සම්බන්ධයෙන් ශ්රී ලංකාවේ අප මුහුණ දුන් දුෂ්කරතා පිළිබඳව ද්විපාර්ශ්වික හා බහුපාර්ශ්වික මට්ටමින් ජාත්යන්තර ප්රජාව ඇමතීමට සහ කිසියම් සාවද්ය හෝ පක්ෂග්රාහී හැඟීමක් නිවැරදි කිරීම සඳහා මෙම සංචාර මඟින් අපට අවස්ථාව ලබා දුන්නේය.
ජිනීවා මානව හිමිකම් කවුන්සිලය සඳහා මගේ ප්රකාශය අවසන් කරමින්, මම මෙසේ ප්රකාශ කළෙමි: “අපි අපේ අභියෝග පිළිගැනීම සඳහා විවෘතව සිටින අතර, වගකිව යුතු ප්රජාතන්ත්රවාදී රජයක් ලෙස, සමස්ත ගැටලු පරාසය තුළම වගවීම, සංහිඳියාව, මානව හිමිකම්, සාමය සහ තිරසාර සංවර්ධනය සම්බන්ධයෙන් පැහැදිලි ප්රගතියක් ලබා ගැනීම සඳහා අපි කැපවී සිටින්නෙමු.”
මෙම අභියෝගයන්ට මුහුණ දීමේ අවශ්යතාවය අපි පිළිගන්නා බවට වන ස්ථාවරයෙහි අප පිහිටා සිටින අතර, එම ප්රයත්නයේ දී, හිතකර විවේචන සහ යහපත් චේතනාවකින් යුතුව ගෙනඑන ජාත්යන්තර යෝජනා සඳහා විවෘතව ප්රතිචාර දැක්විය යුතුය. එසේ පවසන අතරම ගරු කථානායකතුමනි, අපට අපගේ ස්වාධීනත්වය, ජාතික ස්වෛරීභාවය හෝ ජාතියක් වශයෙන් අපගේ ආත්ම ගෞරවය අනතුරේ හෙළීමට ද අවශ්ය නොවේ.
ප්රධාන රටවල් ගණනාවක විදේශ ඇමතිවරුන් සමඟ පෞද්ගලිකව සාකච්ඡා කිරීමට සහ පොදුරාජ්ය මණ්ඩලය, ඉස්ලාමීය සහයෝගීතා සංවිධානය, ප්රජාතන්ත්රවාදී ප්රජාව සහ ජිනීවා හි මානව හිමිකම් කවුන්සිලය වැනි ශ්රී ලංකාවට ඍජුව අදාළ වන සභාවන් ඇමතීම සඳහා මට අවස්ථාව ලැබුණි. අපගේ පළපුරුද්ද, සංජානනය සහ ස්ථාවරය වාර්තාගතව තැබීම සඳහා අපගේ අඛණ්ඩ හා දැඩි උත්සාහය තුළින් විවෘතභාවය, අවංකභාවය සහ ක්රියා කිරීමට ඇති කැමැත්ත පිළිබඳ මෙම ප්රවේශය පෙන්නුම් කරයි. ප්රජාතන්ත්රවාදය නියෝජනය කරන ආසියාවේ පැරණිතම රටක් ලෙස, දශක නවයක් තිස්සේ අඛණ්ඩව මෙම ක්රමය පිළිපදින ජාතියක ස්ථාවරයේ සිට ප්රජාතන්ත්රවාදී සම්මතයන්, පරමාදර්ශයන් සහ පොදුවේ බෙදාගත් සාරධර්ම කෙරෙහි වූ අපගේ කැපවීම අපි යළි තහවුරු කළෙමු.
ගරු කථානායකතුමනි, සැබෑ හා දැනෙන ප්රතිලාභ අපේ ජනතාවට ලැබෙනු ඇතැයි අපේක්ෂාවෙන් දරනු ලබන මෙම ප්රයත්න අතිශයින් වැදගත් වේ. මෙවර එක්සත් ජාතීන්ගේ මහා මණ්ඩල සැසිවාරයේ දී ප්රධාන අවධානය යොමු වූයේ, ලෝකයේ ලොකු කුඩා සෑම රටකටම බලපාන වසංගතය, දේශගුණික විපර්යාස, ගෝලීය ආහාර තත්ත්වය, තිරසාර සංවර්ධන ඉලක්ක සපුරා ගැනීම සහ පිරිසිදු බලශක්තියට මාරුවීමේ අවශ්යතාවය වැනි කරුණු පිළිබඳවය. ගෝලීය ස්වභාවයේ පවතින මෙම අන්තර් සම්බන්ධිත ගැටලු සියළුම ශ්රී ලාංකිකයින්ගේ දෛනික ජීවිතයට බලපාන බව ඉතා පැහැදිලිය.
මෙම මූලික ගැටලු විසඳීම සඳහා ශ්රී ලංකාව ජාත්යන්තර ප්රජාව සමඟ මෙම සංවාදයට සහභාගී විය යුතුය. තවත් පැහැදිලිව පෙනෙන කරුණක් වන්නේ, අපට විද්යාඥයින්, ආර්ථික විද්යාඥයින්, පෞද්ගලික අංශය, තාක්ෂණයේ නායකයින්, තරුණයින් මෙන්ම ප්රාථමික ආහාර නිෂ්පාදකයින් වැනි දේශීය හා ජාත්යන්තර වශයෙන් ඉතා පුළුල් පරාසයක කොටස් කරුවන් වෙත ළඟා වීමට අවශ්ය වීමයි. මෙය විවිධ මට්ටම්වල සහ විවිධ ක්ෂේත්රවල දේශීය හා ගෝලීය ප්රජාවේ හරස්කඩක් නියෝජනය කරයි. අතිගරු ජනාධිපතිතුමා ප්රකාශ කළ පරිදි, “වසංගතයේ ආර්ථික බලපෑම විශේෂයෙන් සංවර්ධනය වෙමින් පවතින රටවල් කෙරෙහි දැඩි ලෙස බලපා ඇත. මෙය 2030 තිරසාර සංවර්ධන ඉලක්ක සඳහා වූ න්යාය පත්රය ක්රියාත්මක කිරීම සැලකිය යුතු ලෙස අවදානමට ලක් කර තිබේ.”
ඒ අනුව, ගරු කථානායකතුමනි, මෙය සාමූහිකව අප ඉදිරියේ පවතින විශාලතම අභියෝගයයි. ශ්රී ලංකාව තීරණාත්මක ක්ෂේත්ර කිහිපයකම නායකත්වය ගෙන ඇති බවත්, පාරිසරික ක්රියාකාරිත්වය පිළිබඳ සමහර ප්රධාන අංශවල මූලිකත්වය ගෙන සිටින බවත් ප්රකාශ කිරීම හිස් හෝ නිෂ්ඵල ආත්ම වර්ණනාවක් නොවේ. ආන්තික දේශගුණික විපර්යාසයන්ට ගොදුරු විය හැකි රටක් ලෙස, ඉදිරියේ දී එළඹෙන එක්සත් රාජධානියේ COP26 හි අපගේ නියැලීම මඟින් අපගේ පොදු, එකිනෙක රටවල් මත යැපෙන අනාගතය සඳහා වන අපගේ කැපවීම පිළිබඳව අවධාරණය කරනු ඇත.
දේශගුණික විපර්යාස සම්බන්ධයෙන්, අප වෙනුවෙන් මෙන්ම, අපේ යෞවනයන් සහ අනාගත පරම්පරාව වෙනුවෙන් ද අතීතයේ අඩුපාඩු ආපසු හරවා සෞඛ්ය සම්පන්න ග්රහලොවක් අලුත්වැඩියා කොට ගොඩනැගීම සඳහා අපි බැඳී සිටිනවා. මෙම ප්රයත්නයේ දී, අපි සෙසු ලෝකය සමඟ සහයෝගයෙන් අත්වැල් බැඳගෙන සිටින අතර, එක්සත් ජාතීන්ගේ මහා මණ්ඩල රැස්වීමේ දී මෙන්ම බලශක්ති පිළිබඳ ඉහළ පෙළේ සංවාදයේ දී ද අපේ මෙම ස්ථාවරය අපේ ජනාධිපතිවරයා ප්රකාශ කළේය. මේ හේතු නිසා මෙම වසරේ දී ජාත්යන්තර ප්රජාව සහ එක්සත් ජාතීන් සමඟ ශ්රී ලංකාව සම්බන්ධ වීම කාලෝචිත හා අත්යවශ්ය වන බව එතුමා සඳහන් කළේය.
තිරසාර නයිට්රජන් කළමනාකරණය පිළිබඳ කොළඹ ප්රකාශය සහ පොදුරාජ්ය මණ්ඩලීය නීල ප්රඥප්තියේ පෙරමුණගත් රට වශයෙන් අප පිළිගනු ලැබීම තුළින්, ශ්රී ලංකාව මෙම ගෝලීය ප්රයත්න සඳහා දායක වී ඇති බව එතුමා සඳහන් කළේය. 2050 වන විට කාබන් උදාසීන රටක් බවට පත් වීමේ ගෝලීය ප්රයත්නයට සම්බන්ධ වන බවට සහ 2030 වන විට අපේ බලශක්ති සම්පත් වලින් 70% ක් පුනර්ජනනීය ප්රභවයන්ගෙන් ලබා ගැනීම අපි ප්රතිඥා දී ඇත්තෙමු. තිරසාර කෘෂිකර්මාන්තය ප්රවර්ධනය කිරීම, වනාන්තර ආවරණය වැඩි කිරීම සහ ජලය හා ප්ලාස්ටික් දූෂණයට එරෙහිව සටන් කිරීම සඳහා වූ අපේ දේශීය ප්රයත්න, පොදුවේ පිළිගැනීමට ලක්විය.
ඉදිරි වසර කිහිපය තුළ දී මෙම අපේක්ෂාගත ඉලක්ක වෙත ළඟාවීම සඳහා, අපට තාක්ෂණය, මූල්ය සහයෝගිතාව සහ ආධාර වෙත සැලකිය යුතු ප්රවේශයක් තිබිය යුතු බැවින්, ජාත්යන්තර වශයෙන් සහ මහා මණ්ඩලයෙහි අපගේ පෙනී සිටීම අත්යවශ්ය විය. මෙම වසර අවසානයේ දී පැවැත්වෙන COP 26 හිදී අපි මෙම පණිවිඩ නැවත අවධාරණය කරන්නෙමු.
ගරු කථානායකතුමනි, අපට ජය ගැනීමට අවශ්ය අනෙක් විශාල අභියෝගය වන්නේ සමාජ සමගිය හා එකමුතුභාවයයි. අභ්යන්තර ආරවුල්, දොම්නස සහ හිංසනයෙන් තොර සැබවින්ම ඒකාබද්ධ ජාතියක් නොපවතින අවස්ථාවක දී, අප විසින් කළ යුතු වන්නේ පවුරු බැඳීමට වඩා පාලම් තැනීමය. අපි සමාජයේ සෑම අංශයක් කරාම ළඟා වී 2019 සහ 2020 වසරවල දී පැවති මැතිවරණවල දී රජය කෙරෙහි තැබූ විශ්වාසය නැවත ලබා දිය යුතුය. සැප්තැම්බර් මාසයේ දී එක්සත් ජාතීන්ගේ මානව හිමිකම් කවුන්සිලය වෙත කළ ප්රකාශයේ දී, දිග්ගැස්සුනු ගැටුමකින් පසුව අත්යවශ්ය වන සංහිඳියාව ප්රවර්ධනය කිරීම සඳහා වන ජාතික ප්රයත්න පුනර්ජීවනය කිරීම සහ ප්රබෝධමත් කිරීම සඳහා වූ අපගේ මුලපිරීම් පිළිබඳව මම සඳහන් කළෙමි. අතිගරු ජනාධිපතිතුමා නිව්යෝර්ක්හි දී පැවසූ පරිදි: “කල් පවත්නා සාමය සාක්ෂාත් කර ගැනීම සඳහා දේශීය ආයතන හරහා වැඩි වගවීමක්, ප්රතිස්ථාපන යුක්තියක් සහ අර්ථවත් සංහිඳියාවක් ඇති කිරීම අත්යවශ්ය වේ.”
අප 2009 දී අසීරුවෙන් දිනාගත් සාමය පවත්වා ගැනීම සහ ගොඩනැගීම සඳහා වූ මෙම ප්රයත්නයේ දී අපි සහයෝගය දක්වන ජාතික ආයතන කිහිපයක් පිළිබඳව මම සඳහන් කළෙමි. විශේෂයෙන් කථානායකතුමනි, එහි මූලික කර්තව්යය වශයෙන් දුක්ඛිත පවුල් ගණනාවක් සඳහා කටයුතු අවසන් කිරීමේ සහ වන්දි ලබා දීමේ අරමුණ ඇතිව, අනෙකුත් ආයතන සමඟ සහයෝගයෙන් අතුරුදහන් වූවන්ගේ ලැයිස්තුව අවසන් කරමින් පවතින, අතුරුදහන් වූවන් පිළිබඳ කාර්යාලයේ (OMP) වැදගත්කම පිළිබඳව මම අවධාරණය කළෙමි. ඒ හා සමානව, වන්දි ගෙවීමේ කාර්යාලය (OR) විසින් මේ වසරේ දී පමණක් හිමිකම් ඉල්ලීම් 3,775 ක් පිළිබඳව විභාග කොට ඇත. ජාතික සමගිය හා ප්රතිසන්ධානය සඳහා වන කාර්යාලය (ONUR) විසින් එහි කරුණු 8 කින් සමන්විත ක්රියාකාරී සැලැස්ම ක්රියාත්මක කිරීම නැවත ප්රාණවත් කිරීමේ ප්රයත්නයට අපි සහාය දුන්නෙමු. ශ්රී ලංකාවේ මානව හිමිකම් ආරක්ෂා කිරීම සහ ප්රවර්ධනය කිරීම සඳහා වූ වරම ක්රියාත්මක කිරීම සඳහා අපි ශ්රී ලංකා මානව හිමිකම් කොමිෂන් සභාවට අඛණ්ඩව සහයෝගය ලබා දී ඇත්තෙමු. තිරසාර සංවර්ධන ඉලක්ක අංක 16 පිළිබඳ ජාතික මෙහෙයුම් කමිටුව සාමය, යුක්තිය සහ ශක්තිමත් ආයතන වැඩි දියුණු කිරීම සඳහා කටයුතු කරන බව අපි පෙන්වා දුන්නෙමු. මෙම කරුණුවලට අතිරේකව, පසුගිය වසර කිහිපය තුළ සංහිඳියාව සහ වගවීම සඳහා වූ විවිධ ප්රයත්න පිළිබඳව සොයා බැලීමට සහ නිගමනයකට එළඹීම හා නිර්දේශ ලබා දීම සඳහා කොමිසමකට බලය පැවරීමට අතිගරු ජනාධිපතිතුමා කටයුතු කළ අතර, එමඟින් මෙම ක්රියාවලීන් ඉදිරියට ගෙන යාමට අපි අපේක්ෂා කරමු. අපගේ භූමියෙහි අනාගත දූ පුතුන් සඳහා දීප්තිමත්, සෞභාග්යමත් සහ සාමකාමී ශ්රී ලංකාවක් බිහි කිරීම සඳහා අවංක භාවයෙන් සහ බැරෑරුම් අරමුණින් යුතුව අපි මේ සියල්ල සිදු කරන්නෙමු.
අපේ ගරු අග්රාමාත්ය මහින්ද රාජපක්ෂ මැතිතුමා, මෑතක දී ඉතාලියේ බොලොඤ්ඤා හි දී අවසන් වූ ජී 20 අන්තර්-ආගමික සංවාදය අමතමින් සිය දේශනයේ දී, ආගම හා වෙනත් සමාජ සංස්කෘතික වෙනස්කම් මත පදනම් වූ බාධක ඉක්මවා යාමේ වැදගත්කම පිළිබඳව අවධාරණය කළේය. බොලොඤ්ඤා හි පැවති සර්ව ආගමික සංසදය සඳහා ගරු අග්රාමාත්යතුමාගේ මෙම සහභාගී වීම තුළින්, දේශීය සාමය හා සමගිය ඇති කිරීම සඳහා අධ්යාපනයේ සහ තරුණයින්ගේ වැදගත් කාර්යභාරය තවදුරටත් මතුකර පෙන්වීය. මෙම අන්තර්-ආගමික සංසදය, ශ්රී ලංකාව උදාහරණයට ගනිමින්, අපේ කලාපයේ විවිධත්වය පිළිබිඹු කිරීම සහ මෙම විවිධත්වය ජාතියක් වශයෙන් අපගේ ශක්තියේ පදනම වන බව යළි අවධාරණය කිරීම සඳහා සුදුසු අවස්ථාවක් විය. එහි දී, “මෙම වෙනස්කම් අභිබවා යමින්, සියලු විවිධ ජාතීන් ප්රයෝජනයට ගනිමින්, පරිණත ජාතියක් පිළිබඳ හැඟීමක් ගොඩනැගීමේ අභියෝගය සඳහා අපි ප්රතිචාර දක්වා ඇත්තෙමු.” යයි එතුමා සඳහන් කළේය.
කථානායකතුමනි, ඔබ තුමා හරහා ජාතිය සහ ලෝකය වෙත ලබා දෙන අපගේ පණිවුඩය වන්නේ, අපි ඒකීය භාවය – ලාංකික හැඟීම සහ අනන්යතාවය – පිළිබඳ හැඟීමක් ඇති කර ගනිමින් අපේ විවිධත්වය සැමරීම සඳහා උත්සාහ දරන අතර, අපට දේශීය හා ගෝලීය අභියෝග රැසකට මුහුණ දීම සඳහා එය දුර්වලකමකට වඩා ශක්තියේ ප්රභවයක් වනු ඇති බවයි.
ගරු අග්රාමාත්යතුමා බොලොඤ්ඤා හි දී කළ දේශනයේ දී පැවසූ පරිදි:
“සංහිඳියාව යනු අපේ කාලයේ තීරණාත්මක අවශ්යතාවයකි. ගැටුම් සහ උත්සන්න වන ආතතීන් අප අවට බොහෝ සෙයින් දක්නට ලැබේ. සාමය සහ ස්ථාවරත්වය පැමිණෙන්නේ අප සමඟ දැඩි ලෙස එකඟ නොවන අය ඇතුළුව, අපේ රටවල ජීවත් වන සියලු දෙනා සමඟ පැවැත්වෙන සෞඛ්ය සම්පන්න සබඳතාවලිනි. නැවතත්, අපේ ආගම අපට උගන්වන්නේ වෛරය ජය ගත හැක්කේ වෛරයෙන් නොව ප්රේමයෙන් පමණක් බවයි. අතීතයෙන් ලබාගත් දුක් ගැනවිලි ගැන සිතමින් සිටිනවාට වඩා, අපි වර්තමානය, අපේ මතයට වඩා වෙනස් දෘෂ්ටිකෝණයන් සමඟ එකඟතාවයක අවශ්යතාවය සහ අපි අත්යවශ්ය ලෙස පවතින සහෝදරත්වයේ හා අවබෝධයේ සබඳතා ගොඩනඟන්නේ නම් අප සියලු දෙනාට ළඟාවිය හැකි ප්රබෝධජනක නව මායිම කෙරෙහි අවධානය යොමු කළ යුතුය.”
මෙම ප්රයත්න තුළ සිවිල් සමාජයේ කාර්යභාරය පිළිබඳව අවධාරණය කිරීමට මම කැමැත්තෙමි. සිවිල් සමාජයේ නියෝජිතයින් යනු අපි ලබා ගැනීමට අපේක්ෂා කරන විසඳුම්වල අනිවාර්ය අංගයකි. කථානායකතුමනි, ඔවුන් ගැටලුව පිළිබඳ ප්රකාශනයක් නොව අපේ ගැටලු විසඳීම සඳහා අත්යවශ්ය අංගයකි. ශ්රී ලංකාවේ රාජ්ය නොවන සංවිධානවල ක්රියාකාරකම් මැඩපැවැත්වීම සඳහා රජය විසින් ගෙන ඇතැයි සැලකෙන පියවර පිළිබඳව උනන්දුවක් මතු වී තිබේ. මෙය සම්පූර්ණයෙන්ම අසත්යයකි. අපි ප්රජාව සමඟ ක්රියාකාරීව සම්බන්ධ වී සිටින අතර, සංහිඳියාවට සහ තිරසාර සංවර්ධන ඉලක්ක අංක 16 හි ක්රියාවලීන්ට අනුකූලව ඔවුන්ගේ හැකියාවන් සහ නිසැක වශයෙන් පවතින ධාරිතාවන් උපයෝගී කර ගැනීමට උත්සාහ කරන්නෙමු. ජිනීවාහි මානව හිමිකම් කවුන්සිලය අමතමින් මා කළ කතාවේ දී මම මෙය ඉතා පැහැදිලිව ප්රකාශ කළ අතර, අපේ ජනතාවගේ අභිවෘද්ධිය සඳහා අප දරන ප්රයත්නයේ දී ඔවුන් වටිනා සහ අගය කරනු ලබන හවුල්කරුවෙකු ලෙස අපි සලකන බවට මෙම සභාවට සහතික වීමට මට අවශ්යය.
කථානායකතුමනි, මෙම ඒකාබද්ධ අරමුණ සඳහා මූලික අභියෝගයක් වන්නේ අන්තවාදය සහ එයින් උපදින ත්රස්තවාදය යි. අපි ජනතාව නියෝජනය කරන රජයක් වශයෙන්, මානව ආරක්ෂාව එහි පුළුල් අර්ථයෙන් සහතික කිරීම සඳහා ජාත්යන්තර හවුල්කරුවන් සමඟ සමීප සහයෝගයෙන් යුතුව සියලු පියවර ගනිමින් සිටිමු. මෙම සන්දර්භය තුළ සාමූහික ජාතික හා ජාත්යන්තර ආරක්ෂාව පිළිබඳ සලකා බැලිය යුතු කරුණු කිහිපයක් තිබේ. පුද්ගල නිදහස සහ ස්වාධීනත්වය සහතික කිරීම ජාතික ආරක්ෂාව පිළිබඳ සංකල්පයට පටහැනි නොවේ. ඇත්තෙන්ම එය පුද්ගලික අයිතිවාසිකම් භුක්ති විඳීමට හැකි ස්ථාවර හා ආරක්ෂිත ජාත්යන්තර හා දේශීය නියෝගයකි. සම්භාව්ය මිත්යා ප්රබන්ධවල සහ ජනප්රවාදයේ එන බොහෝ හිස් ඇති හයිඩ්රා මෙන්, එක් රටක හෝ කලාපයක එක් ව්යාපාරයක් පරාජය වූ විට අන්තවාදය සහ ත්රස්තවාදය වෙනත් තැනක වර්ධනය වේ. අපි මෙය බොහෝ අවස්ථාවල දී දැක ඇත්තෙමු. අන්තර් සම්බන්ධිත ලෝකයක් තුළ, එවැනි ව්යාපාර සහ අන්තවාදී මතවාදයන් කලින් පැවති විනිවිද යා නොහැකි ජාතික සීමාවන් අර්ථ රහිත කරයි. අපේ ප්රතිචාරය ද කථානායකතුමනි, ඒ හා සමානව ගතික, අනුවර්තී හා ප්රත්යාස්ථ විය යුතුය. නිව්යෝර්ක් හි සහ වෙනත් මිත්රශීලී රටවල අමාත්යවරුන් සමඟ මා සිදුකළ අදහස් හුවමාරුවේ දී, මෙම සාපරාධී ජාලයන්ට අරමුදල් සැපයීම සහ තහනම් කිරීම පිළිබඳ ගැටලු විසඳීම සඳහා සමීප සහයෝගීතාව, බුද්ධි තොරතුරු එකතු කිරීම සහ බෙදා ගැනීම සහ සාමූහික ක්රියාමාර්ග කෙරෙහි අපි තියුණු අවධානයක් යොමු කර ඇත්තෙමු.
එක්සත් ජාතීන්ගේ සංවිධානය අමතමින් අතිගරු ජනාධිපති රාජපක්ෂ මැතිතුමා අවධාරණය කළ පරිදි:
“ත්රස්තවාදය යනු ගෝලීය අභියෝගයක් වන අතර, එය ජය ගැනීමට නම් විශේෂයෙන් බුද්ධි තොරතුරු හුවමාරු කර ගැනීම වැනි කරුණු සම්බන්ධයෙන් ජාත්යන්තර සහයෝගිතාව අවශ්ය වේ. පසුගිය අඩ සියවසේ දී ප්රචණ්ඩත්වය විසින් ශ්රී ලංකාවේ දහස් ගණනකගේ ජීවිත සහ දශක ගණනාවක සමෘද්ධිය පැහැර ගනු ලැබීය.
මෙවැනි ප්රචණ්ඩ ක්රියාවන් නැවත කිසි දිනෙක ශ්රී ලංකාවේ සිදු නොවන බවට සහතික වීම සඳහා මගේ රජය කැපවී සිටී.
එම නිසා එහි පිටුපස පවතින මූලික ගැටලු විසඳීම සඳහා අපි කටයුතු කරන්නෙමු.”
අවසාන වශයෙන් කථානායකතුමනි, ජාත්යන්තර ප්රජාව සමඟ අඛණ්ඩව, ක්රියාශීලීව සම්බන්ධ වීම තුළින් ජාතියට යහපත් ප්රතිඵල ලබා ගැනීම සඳහා දරන ප්රයත්නවල දී අපි විවේක නොගන්නා බවට ශ්රී ලාංකික ජනතාවට සහතික වීමට මම කැමැත්තෙමි. මේ සම්බන්ධයෙන් අප දරන දැඩි ප්රයත්නය පිළිබඳව මෙම ගරු සභාවේ සාමාජිකයින්ට සහ ජාතියට නිතිපතා දැනුම් දීම සඳහා ඉදිරි මාසවල දී මම උත්සාහ දරමි.
එකඟතාවන්ට එළැඹ ද්විපාර්ශ්වීයව ගනු ලබන තීරණ පිළිබඳව දෙරටේ ජනතාව නිවැරදිව දැනුවත් කළ යුතු බව ජනාධිපති ගෝඨාභය රාජපක්ෂ මැතිතුමා ඉන්දීය විදේශ ලේකම් ශ්රී හර්ෂ් වර්ධන් ෂ්රිංග්ලා මහතා සමග පවසයි. වාසි අවාසි පැහැදිලි කර දී ජනතා බහුතර කැමැත්ත ගෙන ක්රියා කිරීමේ අවශ්යතාව බෙහෙවින් වැදගත් බව ජනාධිපතිවරයා අවධාරණය කළේය.
ඉන්දීය විදේශ ලේකම්වරයා සමග අද (05) පෙරවරුවේ ජනාධිපති කාර්යාලයේ පැවති හමුවේ දී ජනාධිපතිවරයා මේ බව සඳහන් කළේය.
ඉන්දියාව සහ ශ්රී ලංකාව අතර 1960, 70 දශකවල පැවති මිත්රත්වය හා සබඳතාව යළි ශක්තිමත් කිරීමේ අවශ්යතාව, කරුණු දීර්ඝව පැහැදිලි කරමින් ජනාධිපතිතුමා පෙන්වා දුන්නේය. ඉන්දීය සාගරය, සාම කලාපයක් බවට පත්කිරීමට අග්රාමාත්ය සිරිමාවෝ බණ්ඩාරනායක මැතිණිය 1971 දී කළ යෝජනාව ඉදිරියට ගෙන යාමට ඉන්දියාවේ සහාය අපේක්ෂා කරන බව ජනාධිපතිතුමා පැවසීය. දෙරට අතර සබඳතා ඉහළ මට්ටමකට ගෙන ඒමට කෙටි හා දීර්ඝකාලීනව ගත යුතු පියවර නිවැරදිව හඳුනාගත යුතු බව දෙපාර්ශ්වයේම අදහස විය.
පවතින ගැටලුවලට කඩිනම් විසඳුම් හඳුනාගනිමින් ධීවර ජනතාවට ලැබිය යුතු ප්රතිලාභ හිමිකර දීමෙන් දීර්ඝ කාලයක සිට දෙරටේ ධීවරයන් මුහුණ පා සිටින පීඩාකාරී තත්ත්වයට විසඳුම් ලබාදිය හැකි බව ජනාධිපතිතුමා පෙන්වා දුන්නේය. දෙරට අතර ඇති වෙළඳ අසමතුලිතාව පිළිබඳව කරුණු පැහැදිලි කරදුන් ජනාධිපතිතුමා කඩිනමින් එයට විසඳුම් දීමේ අවශ්යතාව ගෙනහැර දැක්වීය.
අතුරුදහන් වූවන්, යුද්ධය හේතුවෙන් වැන්දඹුභාවයට පත්වීම ඇතුලු යුද්ධයක අතුරු ප්රතිඵල පිළිබඳව මනා අවබෝධයෙන් පසුවන බව යාපනය බලකොටුව මුදා ගැනීමේ දී ලද තම අත්දැකීම් සිහිපත් කරමින් ජනාධිපතිතුමා සඳහන් කළේය.13 වන ව්යවස්ථාව සංශෝධනයේ දුර්වලතා සේම ශක්තීන් හඳුනාගෙන ක්රියාත්මක වීමේ කඩිනම් අවශ්යතාව ජනාධිපතිතුමා විසින් පෙන්වා දෙනු ලැබිණ. ශ්රී ලංකාවෙන් බැහැරව ගිය දෙමළ ජනතාවට නැවත රටට පැමිණීමට හැකි පසුබිම සැකසීම තම අපේක්ෂාව බවත් ඒ සඳහා රජය ගෙනයන වැඩපිළිවෙළ සාර්ථක කරගැනීමට එක්සත් ජාතීන්ගේ සංවිධානයේ දී තමා දෙමළ ඩයස් පෝරාවට සහ විදෙස්ගත දෙමළ ජනතාවට විවෘතව ආරාධනා කළ බව ද ජනාධිපතිතුමා ශ්රී හර්ෂ් වර්ධන් ෂ්රිංග්ලා මහතා සමග පැවසීය.
උතුර – නැගෙනහිර සංවර්ධනයට තම රජයන් පසුගිය කාලයේ සිට ගත් ක්රියාමාර්ග පැහැදිලි කළ ජනාධිපතිතුමා යුද සමයේ දී ආරක්ෂාව වෙනුවෙන් අත්පත් කරගත් ඉඩම් වලින් 90%කට අධික ප්රමාණයක් මේ වන විට නිදහස් කර ඇති බවත් පැවසීය. අතුරුදහන්වූවන්ගේ පවුල්වලට වන්දි ගෙවීම සිදු කෙරෙමින් පවතින අතර යුද සමයේ ඇති වූ අනෙකුත් ප්රශ්නවලට කඩිනමින් විසඳුම් දීමේ අවශ්යතාව ජනාධිපතිතුමා පැහැදිලි කර දෙනු ලැබීය.
දෙරටේ භුගෝලීය පිහිටීම පිළිබඳ පැහැදිලි අවබෝධයක් ඇති හෙයින් ඉන්දියාවේ ආරක්ෂාවට තර්ජනයක් වන ආකාරයේ කිසිඳු ක්රියාවකට ශ්රී ලංකාව යොදා ගැනීමට ඉඩ නොතබන බව ජනාධිපතිතුමා අවධාරණය කළේය.
චීනය සමග ඇති සබඳතාව ඉතා මැනවින් පැහැදිලි කළ ජනාධිපතිතුමා ඒ පිළිබඳව කිසිඳු සැකයක් තබා නොගන්නා ලෙස ද ඉන්දීය විදේශ ලේකම්වරයා සමග කියා සිටියේය.
ශ්රී ලංකාවේ ආයෝජන අවස්ථා සඳහා පුළුල් පරිසරයක් සැකසී තිබේ. ඒ සඳහා ඉන්දීය ආයෝජකයන්ට ද විවෘතව ආරාධනා කරන බව ජනාධිපතිතුමා සඳහන් කළේය. ත්රිකුණාමලය තෙල් ටැංකි පිළිබඳව පවතින තත්ත්වය දෙරටටම සුබදායී ආකාරයෙන් නිරාකරණය කිරීමේ වගකීම විෂයභාර අමාත්යවරයාට පවරා ඇති බව ජනාධිපතිතුමා පැවසීය.
දෙරට අතර සංචාරක කර්මාන්තය ප්රවර්ධනය කෙරෙහි දීර්ඝ වශයෙන් සාකච්ඡාවට ලක් කෙරිණ.
ශ්රී ලංකාවේ ත්රිවිධ හමුදාවන්ට ඉන්දියාවේ පුහුණු අවස්ථා තවදුරටත් පුළුල් කිරීම කෙරෙහි ද අවධානය යොමු විය.
විදුලිය භාවිතයේ දී කාර්යබහුල අවස්ථාවන් හඳුනාගෙන දෙරට අතර විදුලිබල හුවමාරුව කෙරෙහි ද අවධානය යොමු කෙරිණ.
කොවිඩ් එන්නත්කරණය සම්බන්ධයෙන් ශ්රී ලංකාව ළඟා කරගෙන ඇති සාර්ථකත්වය ඇගයීමට ලක්කළ ඉන්දීය විදේශ ලේකම්වරයා කොවිඩ් පාලනය සම්බන්ධයෙන් ගෙන ඇති ක්රියාමාර්ග පැසසුමට ලක් කළේය. ජනාධිපතිතුමාගේ දීර්ඝ පැහැදිලි කිරීම පිළිබඳ සිය ප්රසාදය පළ කළ විදේශ ලේකම්වරයා දෙරට අතර ඇති අදහස් සමාන බැවින් දෙරට අතර මිතුදම ශක්තිමත්ව ඉදිරියට ගෙන යාමට හැකි බව පැවසීය.
ඉන්දීය අග්රාමාත්යවරයාට රාජ්ය සංචාරයක් සඳහා මෙරටට ආරාධනා කරන බව ද ජනාධිපතිතුමා විදේශ ලේකම්වරයා හමුවේ දැන්වීය.
ඉන්දීය මහ කොමසාරිස් ගෝපාල් භග්ලේ, ජනාධිපති ලේකම් පී.බී. ජයසුන්දර, ජනාධිපති ප්රධාන උපදේශක ලලිත් වීරතුංග, විදේශ ලේකම් අද්මිරාල් මහාචාර්ය ජයනාත් කොළඹගේ යන මහත්වරු මෙම හමුවට එක්ව සිටියහ.
ඉතිහාසයේ කිසිදු කාලපරිච්ඡේදයක ඒකාධිපති හෝ ඒකාධිකාරී රාජ්යයක් නොවූ කලාපයේ පැරණිතම ප්රජාතන්ත්රවාදී රටක් ලෙස ප්රජාතන්ත්රවාදී ක්රමවේදයක් තුළින්ම ප්රශ්නවලට විසඳුම් ලබාදෙන බව ජනාධිපති ගෝඨාභය රාජපක්ෂ මහතා පවසයි.
යුරෝපා සංගමයේ නියෝජිත පිරිස සමග මිරිහානේ පිහිටි සිය පුද්ගලික නිවසේ අද (04) පෙරවරුවේ පැවති සාකච්ඡාවේදී ජනාධිපතිවරයා මේ බව සඳහන් කළේය.
යුරෝපා සංගම් GSP+ ක්රමය යටතේ ශ්රී ලංකාව මේ වන විටත් එකඟ වී ඇති කරුණු සම්බන්ධයෙන් දක්වන අනුකූලතාව, ශ්රී ලංකාව සමග එක්ව වැඩ කිරීම සහ යුරෝපා පාර්ලිමේන්තුව ශ්රී ලංකාව සම්බන්ධයෙන් දරන මතය පිළිබඳව කරුණු අධ්යයනය කිරීම මෙම සංචාරයෙන් දූත කණ්ඩායම අපේක්ෂා කරයි.
ත්රස්තවාදය වැළැක්වීමේ පනත සම්බන්ධයෙන් විශේෂ අවධානය යොමු කළ යුරෝපා සංගම් නියෝජිතයන් කාලය මූලික කරගත් විසඳුමක අවශ්යතාව පෙන්වා දෙනු ලැබීය. සංචාරයේ දී අධ්යයනය කළ කරුණු පදනම් කරගනිමින් යුරෝපා කොමිසමට සහ යුරෝපා පාර්ලිමේන්තුවට විධිමත් වාර්තාවක් ලබාදීමට ඉඩ ප්රස්තාව හිමිවන බව පෙන්වා දුන් දූත පිරිස ශ්රී ලංකාව වෙනුවෙන් තම සහාය ලබාදෙන බව සඳහන් කළහ.
අවශ්ය කමිටු පත්කර ඒවායේ වාර්තා අනුව අධිකරණ අමාත්යවරයාටත්, නීතිපතිතුමාටත් උපදෙස් ලබා දී ඇති අතර ත්රස්තවාදය වැළැක්වීමේ පනතේ ඇති සංශෝධනය කළ යුතු වගන්ති සංශෝධනයට කඩිනම් පියවර ගන්නා බව ජනාධිපතිතුමා පැවසීය. එලෙසම වර්තමාන ලෝකයේ මානව අයිතිවාසිකම් සම්බන්ධයෙන් ඇති එකඟතාවන්ට අනුව කටයුතු කරන බව ද ජනාධිපතිවරයා විසින් සඳහන් කරනු ලැබිණ.
කොවිඩ් වසංගතය හේතුවෙන් ආර්ථිකයට සිදු වූ බලපෑම සහ එමගින් රජය අපේක්ෂිත සම්පූර්ණ සැලසුම් ඉටු කර ගැනීමට එල්ල වූ බාධාවන් ද ජනාධිපතිවරයා පෙන්වා දුන්නේය. එසේ තිබිය දීත් දීර්ඝ කාලීන යුද්ධය නිසා ඇති වූ ගැටලු රැසකට විසඳුම් ලබාදීමටත් උතුරු – නැගෙනහිර පළාත් සංවර්ධනයට සේම ප්රජාතන්ත්රවාදය ස්ථාපිත කිරීමට රජය ගත් ක්රියාමාර්ග ජනාධිපතිවරයා පැහැදිළි කළේය. විශේෂයෙන් අතුරුදහන් වූවන්ගේ පවුල්වලට සහන සැලසීමට සහ අතුරුදහන් වූවන්ට වන්දි ගෙවීමට පියවර ගත් බව පෙන්වා දෙනු ලැබීය.
රටේ අභ්යන්තර ප්රශ්න විසඳා ගැනීමට සහ රට ඉදිරියට ගෙන යාමට දෙමළ දේශපාලන පක්ෂ, දෙමළ ඩයස් පෝරාවේ සිටින පිරිස සහ විදෙස්ගත සියලු පාර්ශ්ව එක්ව කටයුතු කිරීමේ අවශ්යතාව එක්සත් ජාතීන්ගේ සංවිධානය හමුවේ දී ද තමා සඳහන් කළ බව ද ජනාධිපතිවරයා කියා සිටියේය.
සිවිල් සංවිධාන සමග අන්යෝන්ය අවබෝධයෙන් ක්රියාකරන අතර ඒවායේ සහාය රටේ සංහිඳියාවට සහ දියුණුවට ලබාගන්නා බව ජනාධිපතිතුමා සඳහන් කළේය.
පසුගිය දෙවසර තුළ පැවති උද්ඝෝෂණවලට කිසිඳු අවස්ථාවක බැටන් ප්රහාර, ජල ප්රහාර හෝ කඳුළු ගෑස් එල්ල නොකිරීමට උපදෙස් ලබාදුන් බවත් උද්ඝෝෂණ සඳහා ජනාධිපති කාර්යාලය ඉදිරිපිට වෙනම ස්ථානයක් වෙන්කළ බවත් පෙන්වා දෙනු ලැබිණ.
රජය ප්රජාතන්ත්රවාදීව කටයුතු කළ ද ඒවාට අවධානය යොමු නොවන අතර කුඩා සිදුවීමක් පාදක කරගනිමින් විවිධ පාර්ශ්ව සාවද්ය මතවාද ඇතිකිරීම කණගාටුදායක බව ජනාධිපතිතුමා පැවසීය.
රාජ්ය සහ පෞද්ගලික අංශ එක්ව කටයුතු කිරීමටත් පෞද්ගලික අංශය වැඩිදියුණු කර රටේ සංවර්ධනයට දායක කරගැනීමටත් ගුණාත්මක රාජ්ය සේවයක් සඳහා දියුණු රටවල තාක්ෂණ ක්රමෝපායන් අනුගත කිරීමටත් පියවර ගනිමින් සිටින බව ජනාධිපතිතුමා පෙන්වා දුන්නේය.
මෙරට ප්රධානතම ජීවනෝපාය වන කෘෂිකර්මාන්තයේ ප්රවර්ධනය වෙනුවෙන් තාක්ෂණ සහ පුහුණු සහාය ලබාගැනීමෙන් රටේ ආර්ථික දියුණුව ළඟා කරගැනීමට ඇති හැකියාව ජනාධිපතිතුමා විසින් පැහැදිළි කර දෙනු ලැබිණ.
රට ඉදිරියට ගෙන යන රජයේ සැලැස්ම පිළිබඳ කළ දීර්ඝ පැහැදිළි කිරීම පිළිබඳව දූත පිරිස ජනාධිපතිතුමා වෙත සිය ප්රසාදය සහ ස්තූතිය පළ කළහ.
මුහුදට වැටුණු ලේන පැටව්න්ගේ ජීවිත බේරා ගැනීම සඳහා ලේන් අම්මෙකු නැට්ටෙන් මුහුද සිදින්නට ගත් උත්සාහයක් පිළිබඳව උතුම් ජාතක කතාවක අප බොහෝ දෙනා අසා ඇත්තෙමු. එවැනි ලේන කුලේ වීරිය වඩන අම්මා කෙනෙකු පසුගියදා අපට ගලේවෙල බේලියකන්ද රටමිරිස් හේන ගම්මානයෙන් හමුවිය.
සැමියා අතහැර දමා ගිය බිරිදක් තම වයස අවුරුදු පහක් වූ දරුණු තැලසීමියා රෝගයෙන් පෙළෙන දරුවා ගේ ඇට මිදුළු බද්ධ කිරීමේ සැත්කම සඳහා අවශ්ය මුදල සොයා ගැනීම සදහා වතුවලට ගොස් පොල් අතු රැගෙනවිත් ඉරටු සුරමින් කිසිදා සිදු කර ගැනීමට නොහැකි උත්සාහයක නිරත වන්නීය.
මෙම මව සිදුකරන විවිධ දුක් කම්කටොලු සහ උත්සාහයන් පිළිබඳව ප්රදේශවාසීන්ගෙන් ලද තොරතුරක් මත ඇය සොයා අප බේලියකන්ද රටමිරිස් හෙන ප්රදේශයේ ඇය ජීවත් වෙන මවගේ සහ පියාගේ නිවසට ගියෙමු.
අයි ඒ.ජි. රම්යා ප්රියදර්ශනී හතළිස් තුන් හැවිරිදි මෙම මව ආර්.එම්. නෙතුම් නිම්සර ප්රියදර්ශන පස් හැවිරිදි සිය දරුවා ජීවත්කරවීම මෙන්ම නිවසේ රැඳී සිටින මව සහ පියා ජීවත් කරවීම භාරදූර කාර්යයකට මුහුණපා සිටින්නීය.
යුද හමුදා සෙබළෙකු සමඟ විවාහ වී සිටි ඇය හතරවැනි දරුවා මෙලොවට බිහි වීමත් සමග මාස හතක් ගත වෙද්දී දරුවා දරුණු තැලසීමියා රෝගියෙකු බව හඳුනා ගත් බව ඇය පවසන්නීය.
පසුව සැමියා තමන් ව සැක කොට ඔහුගේ ගේ දරුවෙකු නොවන බව පවසා අනෙක් දරු තිදෙනාත් සමග වෙන් වුණු බවත් කියයි. තමන් මෙම සිදු කළ කටයුත්ත උහුලා ගැනීමට නොහැකිව අධිකරණයේ පිහිට පැතූ බව ඇය පවසන්නීය. පසුව සැමියා වූ යුධ හමුදා සෙබලා අධිකරණයේදී තැලසීමියා රෝගය වැළඳුණු මෙම දරුවාගේ පීතෘත්වය බාර ගත් බවද එහෙත් දරුවා සහ තමන් ඉවත් කළ බව ඇය දුක්මුසු කථාව අප සමග කීවාය.
කෙසේ වෙතත් මාස හතේ සිට තම දරුවා ජීවත් කරවීම සඳහා කුලී වැඩ කරන්නට විවිධ දේ කරන්නට තමන්ට සිදු වූ බවත් මේ වන විට තැලසීමියා රෝගයෙන් දරුණු ලෙස පීඩා විඳින දරුවාට ඇටමිදුළු බද්ධයක් සිදු කිරීමට අවැසි බව වෛද්යවරුන් සඳහන් කළේ යැයි ඇය පැවසුවාය.
ඒ සඳහා රුපියල් ලක්ෂ 60කට වැඩි මුදලක් වියදම් වන බව වෛද්යවරුන් සඳහන් කළේ යැයි ඇය පවසන්නීය. දිනකට එක් වේලක් ආහාරය සරිකර ගැනීමට පවා නොහැකිව සිටින මෙම මවට එම මුදල සොයා ගැනීම විශාල සිහිනයකි. කෙසේ වෙතත් ඇය තම වයෝවෘද්ධ දෙමව්පියන්ගේ ද සහය ඇතිව දරුවා ජීවත් කර කරවීමේ සිහිනය හදවතේ රුවාගෙන අවට ප්රදේශ වල පොල් ගස්වලින් වැටෙන අතු රැගෙනවිත් ඒවායේ ඉරටු බේරා ගෙන ඉරටු අලෙවි කරමින් හා කුලී වැඩ කරමින් මුදල් උපයන්නට උත්සාහ දරමින් සිටින්නීය.
එහෙත් මසකට අවස්ථා දෙකක් තම දරුවාට ලේ ලබාදීමේ කටයුත්ත සඳහා කුරුණෑගල රෝහලට ගම්න් කිරීම්ට ඇයට පැවරී ඇති තවත් වගකීම්කි.
එමෙන්ම නාවික හමුදාව මගින් කුරුණෑගල රෝහල හරහා පරිත්යාග කළ දරුවාගේ උදරය ට සවිකොට රාත්රියේ පැය 8ක පමණ කාලයක් සවි කරන යන්ත්රය ද කැඩී ගොස් එය නැවත අලුත් අළුත්වැඩියා කිරීම්ට නාවික හමුදා මූලස්ථානයට යැවූ බව ඇය පැවසුවාය.
මේ වන විට දැඩි ආර්ථික දුෂ්කරතාවයන් වලින් හෙබි ඇය කියා සිටියේ තමන් කුසගින්නේ සිට හෝ මියැදෙන්නට පෙර තම දරුවාගේ ඇටමිදුළු බද්ධය සිදු කළ හොත් දරුවාට ජීවත් විය හැකි බව ය. එසේ නොමැති වුවහොත් තම දරුවාගේ ජීවිතය අවදානමින් බවත් ඇය හැඬූ කඳුළින් අප සමග කීවාය.
තැලසීමියා රෝගය නිසාම සැමියා ප්රතික්ෂේප කළ ආදරණීය දරුවාට සහ බිරිඳට සිදුව ඇත්තේ මහා විශාල කාර්ය භාරයකි මෙම පවුල්ට දරුවාට ජීවිතය ලබාදීමට හැකියාවක් ඇති බෝසත් ජනතාව ගේ අවධානය යොමු කරන්නැයි ඇය ඉල්ලීමක් කළාය.
ඇයගේ ලිපිනය අයි. ඒ.ජි. රම්යා දර්ශනී රටමිරිස් හේන, බේලියකන්ද ,ගලේවෙල,
මහජන බැංකුවේ ගලේවෙල ශාඛාවේ ගිණුම් අංකය 115 2 00 1 2 000 1342 දුරකථන අංකය 071 8514 108
සටහන – කංචන කුමාර ආරියදාස – දඹුල්ල
ලෝක නායකයන්, දේශපාලකයන්, ප්රකෝටිපතියන් ඇතුළු ලොව ප්රබලයන්ගේ බොහෝ දෙනකුගේ අයථා මුදල් රැස් කිරීම්, බදු පැහැර හැරීම්, මුදල් විශුද්ධිකරණ කටයුතු ඇතුළු රහස්ය ධනය සහ රහස් මූල්ය ගනුදෙනු සම්බන්ධයෙන් තොරතුරු ‘පැන්ඩෝරා පේපර්ස්’ හරහා අනාවරණය වීමත් සමඟ මහත් ආන්දෝලනයක් හටගෙන තිබේ.
‘පැන්ඩෝරා පේපර්ස්’ අනාවරණය සිදු කළේ විමර්ශන මාධ්යවේදීන්ගේ ජාත්යන්තර සම්මේලනයයි. ලොව ප්රධන පෙළේ මාධ්ය ආයතන නියෝජනය කරන ගවේෂණාත්මක මාධ්යවේදීන් 650 කට වැඩි පිරිසක් මෙම අනාවරණය සිදු කිරීමට දායක වී ඇත.
ඒ, වසර 7 ක් තිස්සේ ගෝලීය මූල්යායතන 14 කින් එක්රැස් කරගත් මූල්ය ලේඛන පාදක කර ගනිමිනි. ඒ අනුව ඊයේ (3) පැන්ඩෝරා පෙපර්ස් හරහා ප්රසිද්ධියට පත්වුණු වාර්තා සහ ලිපි ගොනු ගණන මිලියන 12 ඉක්මවයි. ලෝක ඉතිහාසයේ මහා පරිමාණයෙන් මූල්ය වංචා අනාවරණයක් සිදුවුණු පළමු අවස්ථාව මෙයයි.
‘පැන්ඩෝරා පේපර්ස්’ (පැන්ඩෝරා පත්රිකා) අතරේ, ශ්රී ලංකාවේ හිටපු අමාත්යවරියක වන නිරූපමා රාජපක්ෂ මහත්මියගේ නම ද සඳහන් වෙයි. නිරූපමා රාජපක්ෂ සහ ඇගේ සැමියා වන තිරුකුමාර් නඩේසන් සමග එක්ව ඇය ව්යාජ සමාගමක් පවත්වාගෙන ගිය බවත් ඒ හරහා ලන්ඩන් සහ සිඩ්නි නගරවල නිවාස මිලට ගැනීම සහ වෙනත් ආයෝජනවල යෙදීම සිදුවූ බවත් පැන්ඩෝරා පත්රිකා අනාවරණය කර ඇත.
‘පැන්ඩෝරා පේපර්ස්’ හරහා මූල්ය අකටයුතුකම්වලට සම්බන්ධ වූ බව අනාවරණය වූ රාජ්ය නායකයන් සහ පුබලයන් අතර ඉදිරියෙන්ම පසුවන්නේ ජෝර්දානයේ දෙවැනි අබ්දුල්ලා රජුය. දෙවැනි අබ්දුල්ලා රජු, බ්රිතාන්ය සහ අමෙරිකා එක්සත් ජනපදයේ පවුම් මිලියන 70ක් දේපළ රහසිගතව රැස් කර තිබේ.
බ්රිතාන්යයේ හිටපු අග්රාමාත්ය ටෝනි බ්ලෙයාර් සහ බිරිඳ චෙරීගේ නම ‘පැන්ඩෝරා පේපර්ස්’ අනාවරණයට ඇතුළත් වෙයි. දෙදෙනා පවුම් මිලියන 6.45 ක මුදලක් ගෙවා දේපල මිලදී ගත් අවස්ථාවේදී ඒ වෙනුවෙන් ගෙවිය යුතු පවුම් තුන් ලක්ෂ 12,000 ක මුද්දර ගාස්තු නොගෙවා ඇති බව ‘පැන්ඩෝරා පේපර්ස්’ අනාවරණය කර ඇත.
රුසියානු ජනාධිපති ව්ලැදිමීර් පුටින්ට අයත් මොනාකෝ රාජ්යයේ රහසිගත දේපළ ඇති බව ‘පැන්ඩෝරා පේපර්ස්’ අනාවරණය කරයි. මහ මැතිවරණයකට මුහුණ දීමට සූදානමින් සිටින චෙක් අග්රාමාත්ය ඇන්රේච් බබීස් පවුම් මිලියන 12 ක මුදලක් ගෙවා දකුණු දිග ප්රංශයෙන් මන්දිර දෙකක් මිලදී ගෙන ඇත.
සිය රටේ දේපල කොල්ලකන බවට චෝදනා ලැබ සිටින අසර්බයිජානයේ ජනාධිපති ඉලාම් අලියෙෆ් ඇතුළු ඔහුගේ පවුලේ සාමාජිකයින් එක්සත් රාජධානියෙන් ලබාගෙන ඇති දේපලවල වටිනාකම ඩොලර් මිලියන 400 කට අධික යැයි ‘පැනමා පේපර්ස්’ අනාවරණය පෙන්වා දෙයි. ජනාධිපති ඉලාම් අලියෙෆ් සිය 11 හැවිරිදි පුතුට ද ලන්ඩනයෙන් ඩොලර් මිලියන 30 ක ගොඩනැගිල්ලක් මිලදී ගෙන ඇතැයි පැවැසෙයි.
ඊට අමතරව, චෙක් අග්රාමාත්ය ඇන්රේච් බබීස්, කෙන්යා ජනාධිපති උහුරු කෙන්යාටා, ඉන්දීය සුපිරි ක්රිකට් ක්රීඩක සචින් තෙන්ඩුල්කාර්, සුපිරි පොප් ගායිකා ෂකීරා, නිරූපිකා ක්ලෝඩියා ෂිෆර් මෙන්ම ප්රකට ඉන්දීය ව්යාපාරික අනිල් අම්බානි ඇතුළු තවත් බොහෝ දෙනකු අයථා මුදල් එක් රැස් කිරීම් සම්බන්ධයෙන් ‘පැන්ඩෝරා පේපර්ස්’ අනාවරණය කර ඇතැයි පැවැසෙයි.
අනාවරණයෙන් පසු ෂකීරා සහ තෙන්ඩුල්කාර්ගේ නීතීඥවරුන් පවසා ඇත්තේ ආයෝජන පිළිබඳ අදාල බලධාරීන් දැනුවත් කර ඇති බවය. ෂකීරාගේ නීතීඥයා පවසා ඇත්තේ ඇයට එම ආයෝජනවලින් කිසිදු බදු සහනයක් නොවන බව ය. ෂකිරා පදිංචි වී සිටින්නේ මහා බ්රිතාන්යයේය. ඇය නියමිත පරිදි බදු ගෙවීම් සිදු කර ඇති බව ඇගේ නියෝජිතවරයා මාධ්ය වෙත දන්වා තිබේ.
පාකිස්තාන අග්රාමාත්ය ඉම්රාන් ඛාන්ගේ කැබිනට් අමාත්යවරුන්, හමුදා ප්රධානීන් සහ ඔවුන්ගේ පවුල්වල සාමාජිකයන් සතු රහසිගත සමාගම් පිළිබඳ විස්තර සහ ඩොලර් මිලියන ගණනක මුදල් රැස් කිරීම් පිළිබඳ විස්තර ද ප්රසිද්ධියට පත් වී ඇත.
අග්රමාත්ය ඉම්රාන් ඛාන්ට එරෙහිව කිසිදු චෝදනාවක් එල්ල වී නොමැති අතර, අග්රාමාත්යවරයා එම චෝදනා සම්බන්ධයෙන් විශේෂ ප්රකාශයක් කළේය. පැන්ඩෝරා පත්රිකාවල නම් සඳහන් සියලු දෙනා සම්බන්ධයෙන් කඩිනමින් පරීක්ෂණ පවත්වන බව අග්රාමාත්යවරයා එම ප්රකාශය හරහා අවධාරණය කර තිබේ. පාකිස්තාන මුදල් අමාත්යවරයා සහ ජල සම්පත් අමාත්යවරයාගේ නම් අයථා මුදල් රැස් කිරීමේ ලැයිස්තුවේ ඉදිරියෙන්ම ඇති බව ද පැවැසෙයි.
(ඩේලිමිරර්)
ලොව පුරා ව්යාප්තව පවතින ප්රමුඛතම සමාජ සුබසාධන ව්යාපාරයක් වන සමූපකාර ව්යාපාරය සිය 99 වැනි සංවත්සරය උත්සවාකාරයෙන් සැමරූ අතර ඊට සමගාමීව සණස සමිති, සණස ලයිෆ් ඉන්ෂුවරන්ස්, සණස ජෙනරල් ඉන්ෂුවරන්ස්, සණස සංවර්ධන බැංකුව ඇතුළු මෙරට සණස සමූහ ව්යාපාරයට අයත් ආයතනද ජාත්යන්තර සමූපකාර දිනය අභිමානවත් ලෙස සැමරීය.
‘‘එක්වී මනාව යළි ගොඩ නැගෙමු’’ යන තේමාව ඔස්සේ මෙවර ජාත්යන්තර සමූපකාර දිනය පැවැත්විණි. රටවල් 112ක් ජාත්යන්තර සමූපකාර සන්ධානයේ සාමාජිකත්වය ලබා ඇත. කාර්මික විප්ලවය සමග ඇති වුණ සාමාජීය සහ ආර්ථික වෙනස්කම් සමග පීඩනයට පත් වුණ ගොවියා සහ කම්කරුවා නගා සිටුවීමේ අරමුණින් සමූපකාර ව්යාපාරය මූලිකව අරඹන ලදි. 1923 දී ප්රථම වරට ජාත්යන්තර සමූපකාර දිනය සැමරීමට තීරණය කරන ලදී.
ඒ අනුව සෑම වසරකම ජූලි මස පළමු වැනි සෙනසුරාදා ජාත්යන්තර සමූපකාර දිනය ලෙස නම් විය. ආචාර්ය පී. ඒ. කිරිවන්දෙණිය මහතාගේ මූලිකත්වයෙන් ඇරැඹුණු සණස ව්යාපාරය සාමාජිකයන් ලක්ෂ 30කට ආසන්න සංඛ්යාවකින් සමන්විත වන අතර සණස ප්රාථමික, දිස්ත්රික්ක, ජාතික සහ ජාත්යන්තර ලෙස මට්ටම් කිහිපයකින් ක්රියාත්මක වේ. එහි ප්රාථමික මට්ටමේ මූලික කාර්යයන් වන්නේ සාමාජිකයන්ගේ සකසුරුවම් බව වර්ධනය කිරීම, ආර්ථික වර්ධනයට මූල්ය සම්පත් සැපයීම, සාමාජිකයන්ට අධ්යාපනය සැපයීම ආදියයි.
සමූපකාර ව්යාපාරය නිර්මාණය වුණේ ලෝකයේ අර්බුද පවතින අවස්ථාවකය. එනිසා ඉතාම අර්බුදකාරී අවස්ථාවල ප්රමුඛ බලපෑමක් කරන්න සමත් ශක්තිමත් ව්යාපාරයක් ලෙස සමූපකාර ව්යාපාරය සෑම විටම ක්රියාත්මක විය. ‘‘වත්මන් කොවිඞ් අර්බුදය ඇති කළ ගැටලූ විසඳා ගෙන ජන ජීවිත ජය ගැනීමට අවශ්ය මඟ පෙන්වීම සිදු කරන්න අප සුදානම්’’ යනුවෙන් මේ පිළිබඳ අදහස් දක්වමින් සණස නිර්මාතෘ ආචාර්ය පී. ඒ. කිරිවන්දෙණිය මහතා පැවසීය.
2022 අයවැය ලේඛනයෙන් සෞඛ්ය අමාත්යාංශයට සහ ජනපතිවරයාට වෙන්කර ඇති ප්රතිපාදන පහළ දමා ආරක්ෂක අමාත්යාංශයේ වැය ශීර්ෂ රුපියල් බිලියන 355 සිට 373 දක්වා ඉහළ දමා ඇතැයි මුදල් අමාත්යාංශයේ ආරංචි මාර්ග සදහන් කළ බව ‘ලංකාදී‘ ඊ පුවත්පත සදහන් කරයි.
2022 දී ද වැඩිම මුදලක් වෙන්කර ඇති අමාත්යාංශය ආරක්ෂක අමාත්යාංශය වන බවත් මහා මාර්ග අමාත්යාංශයේ වැය ශීර්ෂය බිලියන 250.1ක් බවත් එම වාර්තා වේ වැඩි දුරටත් සදහන් වේ.
සෞඛ්ය අමාත්යාංශයේ වැය ශීර්ෂ රුපියල් බිලියන 153.6ක් වන අතර එය 2021ට සාපේක්ෂව බිලියන 6ක අඩුවක් බවයි වාර්තා වන්නේ. අධ්යාපන අමාත්යාංශයේ වැය ශීර්ෂ රුපියල් බිලියන 126.5 සිට 127.6 දක්වා ඉහළ දමා ඇති අතර රාජ්ය සේවා පළාත් සභා හා පළාත් පාලන අමාත්යාංශයේ වැය ශීර්ෂය රුපියල් බිලියන 286.7කි.
2022 වසර සඳහා වන අයවැය විසර්ජන පනත් කෙටුම්පතට අනුව රජයේ මුළු වියදම රුපියල් බිලියන 2505.3ක් වන අතර ඉන් බිලියන 1776ක් වෙන්වන්නේ පුනරාවර්තන වියදම් සඳහාය.
මේ අතර 2022 වසරේ රජයේ වියදම රුපියල් කෝටි 3300කින් අඩුවනු ඇති බව ද එම වාර්තාව වැඩි දුරටත් කියයි.
පළාත් සභා මැති මැතිවරණය පැවැත්වීමට නොහැකි වාතාවරණයක් පවතින බවත් විපක්ෂ නායක සජිත් ප්රේමදාස මහතාට අවශ්ය නම් පළාත් පාලන මැතිවරණය පවත්වා ගන්නා ලෙස රාජ්ය සේවා පළාත් සභා හා පළාත් පාලන අමාත්ය ජනක බණ්ඩාර තෙන්නකෝන් මහතා පැවසීය.
දඹුල්ල බස් නැවතුම්පළ ඉදිරිපිට අභිනවයෙන් ඉදි කරන ලද දෙමහල් වෙළඳ සංකීර්ණය සහ බස් නැවතුම් පිවිසුම් මාර්ගය විවෘත කිරීමේ අවස්ථාවට 03 දින එක්වෙමින් අමාත්යවරයා මේ බව සඳහන් කළේය.
දඹුල්ල මහ නගර සභාව මගින් පෞද්ගලික ව්යාපාරිකයන් ගේ සහයෝගය මත දඹුල්ල බස් නැවතුම්පොළ ඉදිරිපිට අංග සම්පූර්ණ දෙමහල් වෙළෙඳ සංකීර්ණයක් ඉදි කොට තිබිණි. එමෙන්ම දඹුල්ල මහනගර සභාවේ අරමුදල් වලින් සහ මධ්යම පළාත් සභාවේ අරමුදල්වලින් බස් නැවතුම් පොළ භූමිය කාපට් අතුරා පිරවිසුම් මාර්ග සංවර්ධනය කොට තිබිණි.
අමාත්යවරයා මුලින්ම ප්රධාන බස් නැවතුම්පළ පිවිසුම් මාර්ගය නාමල් උයන මාවත නමින් විවෘත කොට දෙවනුව දෙමහල් වෙළඳ සංකීර්ණය විවෘත කිරීම සඳහා එක්වීය.
පසුව මාධ්යවේදීන් අමාත්යවරයාගෙන් වීමසා සිසා සිටියේ රාජ්ය ආයතන වල කොවිඩ් මර්ධන කටයුතු සදහා නිලධාරියෙකු පත් කරන යෝජනාව පිළිබඳවය. ඊට පිළිතුරු ලබා දුන් අමාත්යවරයා කියා සිටියේ ඉදිරියේදී ඒ පිළිබඳව රජයේ අවධානය යොමුකරන බවත් එම යෝජනාව ඉතා හොඳ යෝජනාවක් බව ය.
එමෙන්ම ඉදිරියේදී ඉදිරිපත් වීමට යෝජිත අයවැය පිළිබඳවද අදහස් දැක්වූ අමාත්ය ජනක බණ්ඩාර තෙන්නකෝන් මහතා කියා සිටියේ මෑත යුගයේ ලැබෙන ඉතා හොඳම අයවැය මෙවර ඉදිරිපත් කෙරෙන අයවැය යෝජනාව බවය.
ඉදිරිපත් කරන අය වැය ගැන රහස් හෙළි කිරීමට නොහැකි වුවද ජනතාව පුදුමයට පත් කරවන අය-වැයක් සැකසී ඇති බවද ඒ මහතා සඳහන් කළේය. කිරිපිටි ගෑස් ආදී අත්යවශ්ය භාණ්ඩ හිගය අයවැයෙන් පසුව ඇති නොවන බව ද ඒ මහතා අවධාරණය කළේය.
මෙරට රාජ්ය සේවා අමාත්යවරයා ලෙස රාජ්ය සේවය පිළිබඳව තෘප්තිමත්භාවය ඇත්දැයි යන්න මාධ්යවේදීන් මේ දී අමාත්යවරයාගෙන් විමසන ලදී ඊට පිළිතුරු දුන් අමාත්යවරයා කියා සිටියේ ඒ ඉතිහාසයේ සිටම රාජ්ය සේවය පිළිබඳව ජනතාව කෙරේ එතරම් තෘප්තිමත් භාවයක් නොමැති බවය.
ජනතාව තෘප්තිමත් රාජ්ය සේවයක් පරිවර්තනය කිරීම සඳහා අවශ්ය පියවර ගනිමින් සිටින බවද අමාත්යවරයා පෙන්වා දුන්නේය. රාජ්ය සේවකයන්ට තම පවුල් වලින් ම ජනතාව කෙරේ විශ්වාස දනවන වැඩ කිරීමේ හැකියාව තිබිය යුතු බවද පෙන්වා දුන්නේය.
ජනතාව සියලු දෙනා එක්තු වී මෙම රටේ සංවර්ධන පරිවර්තනයක් සිදු කළ යුතු බවත් ඒ සඳහා සිතුම් පැතුම් ආදී සියල්ල වෙනස් කොට ජනතාවාදී රටක් බිහි කිරීමේ වැඩසටහනක් රජය සැලසුම් කර තිබෙන බවද රාජ්ය සේවා පළාත් සභා හා පළාත් පාලන අමාත්ය ජනක බණ්ඩාර තෙන්නකෝන් මහතා මෙහිදී සඳහන් කළේය.
පළාත් සභා මැතිවරණය ළඟදි පැවැත්වෙනවා ද යන්න මාධ්යවේදීන් අමාත්යවරයාගෙන් ප්රශ්න කිරීමේ දී කියා සිටියේ මැතිවරණයක් ළඟදි පැවැත්වීම සඳහා වාතාවරණයක් නොමැති බවය. පළාත් සභා මැතිවරණය පැවැත්වීම සඳහා විපක්ෂ නායක සජිත් ප්රේමදාස මහතාගේ අවශ්යතාවය තිබෙන බවත් එසේ අවශ්ය නම් ඔහුට පළාත් සභා මැතිවරණය පවත්වා ගෙන යා හැකි බවද ඒ මහතා සඳහන් කළේය
රාජ්ය සේවය සදහා බදවා ගත උපාධිධාරීන් හට රැකියා ස්ථිර කිරීමද ඉදිරියේදී සිදු කරන බවද අමාත්යවරයා පැවසීය.
සටහන සහ ඡායාරූප – කාංචන කුමාර ආරියදාස – දඹුල්ල
කණ්ඩලම වැවේ දූපත් දෙකක හදිසි සොයා බැලීමකදී ඉන් එක් දූපත්ක ඉපැරණි දාගැබක් හෝ විශාල ගොඩ ගොඩනැගිල්ලක නටඹුන් මතුවී තිබෙන අතර අනෙක් දූපතේ කිසියම් සංවිධානාත්මක පිරිසක් පක්ෂීන් මස් පිණිස මරා රැගෙන යෑමේ ජාවාරමක් 02 දින පස්වරුවේ එළිදරව් කර ගැනීමට මහවැලි නිලධාරීහු සමත් වෙති.
මෙම දූපත්වල විවිධ අකටයුතුකම් සිදු වන බවට ලද තොරතුරක් මත පොලිස් ජීවිතාරක්ෂක නිලධාරීන්ගේ සහාය ඇතිව බෝට්ටුවකින් මහවැලි නිලධාරීන් 02 දින පස්වරුවේ කණ්ඩලම වැවේ පිහිටි දූපත් දෙක නිරීක්ෂණයකට පිටත් වූහ. එහිදී පළමු දූපතේ ඉහළ කොටසේ විශාල ගොඩ ගොඩනැගිල්ලක හෝ දාගැබ්ක නට්ඹුන් මතු වී ඇති අයුරු දැක ගැනීමට හැකි වූ බව මහවැලි නිලධාරීහු පවසති.
ඉහළ කොටසේ ගල් තලාවක් මත ඉපැරැණි ගඩොල් පස් සහ වෙනත් ඉදිකිරීම් සිදු කළ බවට තහවුරු වන සලකුණු රැසක් පවතින බවත් එය කුමන කාලයකට අයත් ස්ථානයක් ද යන්න අනාවරණය වී නැති බව මහවැලි නිලධාරීහු පවසති.
මෙම ස්ථානයට ගිය විට එක් පසෙකින් ඓතිහාසික රංගිරි දඹුලු රජමහ විහාරය අනෙක් පසින් ඓතිහාසික සීගිරි පව්ව පිදුරංගල පව්ව එඩේර ගල, ආදී ඓතිහාසික වැදගත්කම්කින් යුත් ස්ථාන දර්ශනය වන අතර ඉතා අලංකාර දසුන් ද වෙයි.
මෙම දූපතේ අක්කර 26ක පමණ ප්රමාණයක් පවතින බවත් විවිධ කණ්ඩායම් උපයෝගී කරගෙන එමෙන්ම ජලය සිදුනු අවස්ථාවන්හිදී මෙම දූපතට පැමිණ එම දූපතේ සුන්දරත්වය විනාශ කරන බව මහවැලි නිලධාරීන් පවසති.
පසුව කන්ඩලම වැව මැද පිහිටා ඇති බොහෝ දෙනෙකු කුරුලු දූපත ලෙසින් හඳුන්වන කුඩා දූුපතට යන අවස්ථාවේදී එහි පක්ෂීන් මරා මස් රැගෙන යෑම සංවිධානාත්මක ක්රියාවලියක දසුන් දැකගැනීමට හමුවූ බව මහවැලි නිළධාරීන් පවසති.
පරීක්ෂණ කණ්ඩායම එම ස්ථානයට ගමන් කරන විටත් සුදු කොකුන් රැසක් මරා ඔවුන්ගේ හිස් සහ කකුල් කපා එම දූපතේ ම දමා මස් රැගෙන ගොස් ඇති අයුරු දැකගැනීමට හැකි විය. එමෙන්ම මස් කිරීමට නොහැකි වූ මියගිය කොකුන් දෙදෙනෙකුගේ සිරුරු ද සොයා ගැනීමට මහවැලි නිලධාරීන්ට හැකි විය.
මෙම දූපත් දෙකට දැඩි ආරක්ෂාවක් ඉදිරියේදී ලබා දෙන බව ද ඔවුහු පවසති. මෙම ස්ථාන අපවිත්ර කිරීම් සහ සතුන් දඩයම් කිරීම සිදු නොකරන්නැයි මහවැලි නිලධාරීහු ජනතාවගෙන් ඉල්ලා සිටිති.
කන්ඩලම ජලාශය සුන්දරත්වය රැදී පවතින්නේ මෙම වැව මැද පිහිටා ඇති දූපත් හේතුවෙනි. ලොව පුරා සංචාරකයන් මෙන්ම මෙරට බොහෝ ජනතාවක් කන්දලමේ සුන්දරත්වය දැක බලා විද ගැනීම සදහා පැමිණෙති. මෙරට බොහෝ ටෙලි නාට්ය හා චිත්රපට රුගත කිරීම් සදහා යොදා ගනිති.
සටහන සහ ඡායාරූප – කාංචන කුමාර ආරියදාස – දඹුල්ල
මෙම සංචාරය මගින් ද්විපාර්ශ්වික සබඳතා ශක්තිමත් කර ගැනීමට සහ කොවිඩ් ආශ්රිත බාධා වලට මුහුණ දීම සඳහා සහයෝගීතාව ඉහළ නැංවීමට අපේක්ෂා කෙරේ.
ඉන්දීය විදේශ ලේකම් හර්ෂ් වර්ධන් ෂ්රිංග්ලා (Harsh Vardhan Shringla) ඔක්තෝබර් මස 2-5 වනදා දක්වා සිදුකරන ශ්රී ලංකාවේ නිල සංචාරය ආරම්භ කළේය. මෙය විදේශීය ලේකම්වරයා ලෙස ඔහුගේ මංගල ශ්රී ලංකා රාජ්ය සංචාරය ය. ඔහුගේ මෙම සංචාරයේදී අන්යෝන්ය රැඳියාව සහ අසල්වැසි රාජ්යයේ පුරවැසියන් කෙරෙහි නවදිල්ලියේ ප්රමුඛතාවය ‘අසල්වැසි පළමු ප්රතිපත්තිය’ මගින් පිළිබිඹු වේ.
මාර්තු මාසයේ පැවති සම්මන්ත්රණයකදී ඉන්දීය විදේශ ලේකම් ෂ්රිංලා ප්රකාශ කොට තිබුනේ ඉන්දියාවේ ඉරණම එහි අසල්වැසි රාජ්ය සමඟ වෙන් කළ නොහැකි ලෙස සම්බන්ධ වී ඇති බවයි. ඔහු තර්ක කර තිබුණේ අසල්වැසි රාජ්යයන් නවදිල්ලියේ ප්රාථමික රාජ්ය තාන්ත්රික ක්රමය ලෙස පවතින අතර එහි විදේශ ප්රතිපත්ති ප්රමුඛතාවයන් අතර එය පළමුවෙන්ම විය යුතු බවයි.
මේ අනුව, ඔහුගේ සිව්දින ශ්රී ලංකා නිල සංචාරය නවදිල්ලියේ ‘අසල්වැසි ප්රදේශය’ යන දෘෂ්ටි කෝණයෙන් බැලිය යුතු බව ඉන්දියා නිවුස් නෙට්වර්ක් වාර්තා කරයි
ඔහුගේ සංචාරය තුළිදි ඉන්දියාව සහ ශ්රී ලංකාව අතර ද්විපාර්ශ්වික සබඳතා වර්ධනය, ද්වීපාර්ශ්වික ව්යාපෘති වල ප්රගතිය සහ කොවිඩ් ආශ්රිත බාධා වලට මුහුණ දීම සඳහා අඛණ්ඩ සෞඛ්ය සහයෝගීතාව යන අංශ කෙරෙහි අවධානය යොමු කිරීමට අපේක්ෂිත බැව් පැවසේ .
පසුගිය කාලය මුළුල්ලේම දෙරට අතර ඉහළ පෙළේ රාජ්ය තාන්ත්රික සබඳතා ශක්තිමත්ව පවත්වාගෙන යන අතර රටවල් දෙකෙහිම අග්රාමාත්යවරුන් දෙපළගේ සහභාගිත්වයෙන් මාර්ගගත ක්රමයට 2020 දී පැවැත්වූ සමුළුව දෙරටේ ද්විපාර්ශික සබඳතා වල මුවහත් භාවයේ ඉහළම සලකුණකි.
ද්විපාර්ශ්වික සමුළුවේදී නායකයින් දෙදෙනාම ව්යාපාර සහයෝගීතාව සහ ඉන්දියාව විසින් මූල්යකරණය කරන ලද ශ්රී ලංකාවේ ව්යාපෘති වල ප්රගතිය පිළිබඳව සාකච්ඡා කර තිබේ.
සාර්ක්, බිම්ස්ටෙක්, අයෝරා(IORA) සහ එක්සත් ජාතීන්ගේ පද්ධතිය ඇතුළුව අන්යෝන්ය මැදිහත් වීමේ කලාපීය හා ජාත්යන්තර ගැටලු කෙරෙහි අවධානය යොමුකොට තිබුණි.
ඉන්දීය විදේශ කටයුතු ඇමති එස් ජයිශංකර් ජනවාරි මාසයේදී ශ්රී ලංකාවේ සංචාරය කොට තිබේ.
කොවිඩ් -19 වසංගතය හේතුවෙන් ඉන්දියාව සහ ශ්රී ලංකාව අතර සහයෝගීත්වය තවදුරටත් ශක්තිමත් වී ඇති බව ජයිශංකර් ප්රකාශ කළේය.
ඉන්දීය විදේශ කටයුතු ඇමති ජයිශංකර් පවසා තිබුණේ ‘අසල්වැසියා පළමුව’ යන්නට අනුකූලව යමින්, ‘වෛද්ය ආධාර’ මඟින් මාරාන්තික වෛරසය මර්දනය කිරීමට ශ්රී ලංකාව දරන උත්සාහයට ඉන්දියාව සහයෝගය දුන් බවයි.
ජයශංකර් දිවයිනට පැමිණීමෙන් පසු මාස කිහිපයක් තුළදී ඉන්දියාව විසින් නව දිල්ලියේ ‘එන්නත් මයිත්රි’ වැඩසටහන යටතේ කොවිෂීල්ඩ් එන්නත් 500,000 ක් ශ්රී ලංකාවට පරිත්යාග කළේය.
අවශ්ය මොහොතේ ශ්රී ලංකාව සමග සිටි අසල්වැසියා ලෙස ඉන්දියාව, කොවිඩ් -19 වසංගතයට එරෙහිව සටන් කිරීම සඳහා වෛද්ය ඔක්සිජන් සැපයුම් ශ්රී ලංකාවට සැපයිය.
කලාපයේ පළමු ප්රතිචාර දැක්වීමේ සම්ප්රදායට අනුකූලව, මැයි මාසයේදී ඉන්දියාව එම්වී එක්ස්ප්රෙස් පර්ල්(MV Xpress Pearl.) හි ඇතිවූ ගින්න පාලනය කිරීම සඳහා ශ්රී ලංකා බලධාරීන් සමඟ එක්ව ඒකාබද්ධ ගිනි නිවීමේ හා සමුද්ර දූෂණ පාලන කටයුතු සිදු කළේය.
සූර්ය බලශක්ති ක්ෂේත්රයේ ව්යාපෘති සඳහා ඉන්දියාව විසින් ඩොලර් මිලියන 100 ක සහන ණය මුදලක් ශ්රී ලංකාව වෙත සපයා තිබුණි. ශ්රී ලංකාවේ සූර්ය බලශක්ති ක්ෂේත්රයේ විවිධ ව්යාපෘති සඳහා මූල්ය පහසුකම් සැපයීමට මෙම ණය සහනය උපකාරී වේ.
අසල්වැසියන් දෙදෙනා අතර පවතින දැඩි සබඳතා පිළිබිඹු කරමින් ඉන්දීය විදේශ කටයුතු ඇමති ජයිශංකර් පසුගිය මාසයේ නිව්යෝර්ක්හිදී ශ්රී ලංකා විදේශ ඇමති ජී.එල් පීරිස් හමුවී දෙරට අතර සමීප සබඳතා පුළුල් ගැනීම පිළිබඳව සාකච්ඡාවක් කළේය.
සිව් දින නිල සංචාරය තුළදී විදේශ ලේකම් ෂ්රිංලා ශ්රී ලංකා විදේශ ලේකම්වරයා සමඟ ද්විපාර්ශ්වික සාකච්ඡා පැවැත්වීමට නියමිත අතර ශ්රී ලංකාවේ 7 වන විධායක ජනාධිපති අතිගරු ගෝඨාභය රාජපක්ෂ මැතිතුමා හමුවීමට නියමිතය.
ඔහුගේ වැඩ සටහනට ගරු අග්රාමාත්ය මහින්ද රාජපක්ෂ මැතිතුමා, විදේශ ඇමති පීරිස් සහ මුදල් ඇමති බැසිල් රාජපක්ෂ යන මහත්වරුන්ගේ හමුවක් ද ඇතුළත් ය.
ඔහු ශ්රී ලංකාවේ රැඳී සිටින කාලය තුළ මහනුවර, ත්රිකුණාමලය සහ යාපනයේ සංචාරය කිරීමට බලාපොරොත්තු වේ යයි ඉන්දියා නිවුස් නෙට්වර්ක් වාර්තා කරයි.
ඉන්දියාවේ ඩොලර් බිලියන 3.5 ක සමස්ත උපකාර තුළින්, ශ්රී ලංකාවේ දැනට කෙරෙන ද්විපාර්ශ්වික ව්යාපෘති වල ප්රගතිය සමාලෝචනය කිරීමට ඔහු අපේක්ෂා කරයි.
යුද්ධයෙන් පීඩාවට පත් වූ ප්රදේශවල ජනතාව වෙනුවෙන් සහ වතුකරයේ වතු කම්කරුවන් ඉන්දියාවේ ඩොලර් මිලියන 270 ක ප්රදානයකින් ඉදිකරන නිවාස 50,000 ක ඉදිකිරීම් පරික්ෂා කිරීමට ඉන්දීය විදේශ ලේකම්වරයා බලාපොරොත්තු වේ. මෙම නිවාස ව්යාපෘතියේ කොටසක් වන ගාල්ල වලහන්දූව වත්ත අයත් වේ.
අග්රාමාත්ය නරේන්ද්ර මෝදි 2017 දී ශ්රී ලංකාවේ ජනතාව වෙනුවෙන් පරිත්යාග කළ යාපනය සංස්කෘතික මධ්යස්ථානයේ ඉදිකිරීම් වල තත්වය සහ මහනුවර හා ත්රිකුණාමලයේ වෙනත් ව්යාපෘති පිළිබඳව ඔහු දිවයිනේ පළාත්වල කරන සංචාරයේදී නිරීක්ෂණය කිරීමට නියමිතය.
සමස්තයක් වශයෙන් ගත් කල, ඉන්දීය විදේශ ලේකම් ෂ්රින්ග්ලාගේ සංචාරය මඟින් ව්යාපෘති අර්ථවත් ලෙස ක්රියාත්මක කිරීම ඇතුළුව ද්විපාර්ශ්වික සබඳතා සවි බල ගැන්වීම සඳහා අඩිතාලම දමනු ඇත. නුදුරු අනාගතයේ දී තවත් ද්විපාර්ශ්වික සමුළුවක් සඳහා ද එය මඟ පාදනු ඇති අතර එමඟින් දේශපාලන සබඳතා නව උච්චතම අවස්ථාවකට ගෙන යනු ඇත.
ඉහළ ඡායාරූපය – ඉන්දීය විදේශ ලේකම් ශ්රී හර්ෂ් වර්ධන් ෂ්රිංග්ලා අද (03) දහවල් ත්රිකුණාමලය තෙල් ටැංකි සංකීර්ණ නිරීක්ෂණය කිරීමට පැමිණ තිබේ.
indianewsnetwork
කොවිඩ් 19 හා සෘජුව සම්බන්ධ රෝගයක් හේතුවෙන් ශ්රී ලංකාවේ දරුවන් ගණනාවක් රෝහල්ගත කර තිබේ. බහුපද්ධති ප්රතිදාහ සහලක්ෂණය (Multisystem inflammatory syndrome – MIS-C ) නමින් හඳුන්වන මෙම රෝගය කුඩා දරුවන් අතර බරපතළ සංකූලතා ඇති කළ හැකි අතර සමහර අයට දැඩි සත්කාර අවශ්ය වේ. මෙම රෝගය ප්රථමයෙන් වාර්තා වූයේ එක්සත් රාජධානියෙන් සහ එක්සත් ජනපදයෙනි.
මෙය ‘කවාසාකි රෝගය’ ලෙස මුලින්ම හැඳින්වීය.
නමුත් මෙය කවසාකි රෝගය නොවන අතර, කොරෝනා වෛරසය වැළඳීමෙන් කලකට පසු හටගන්නා තත්ත්වයක් බව මේ වන විට හඳුනාගෙන තිබේ. විවිධ වයස්වල පසුවන දරුවන් මෙයින් බරපතළ ලෙස රෝගාතුර වී තිබේ.
ශ්රී ලංකාවේ රෝහල්වලින් මේ වන විට රෝගී දරුවන් 100ක් පමණ වාර්තා වන අතර මරණ කීපයක් ද සිදුව තිබෙන බව නව ජන්ම ළදරුවන් පිළිබඳ විශේෂඥ වෛද්ය නලීන් ගමඇතිගේ බීබීසී සිංහල සේවයට පැවසීය. මේ තත්ත්වය සම්බන්ධයෙන් ශ්රී ලංකාව තුළ නිල දත්ත වාර්තා වී නොමැත.
කෙසේවෙතත්, මෙම රෝගය සහිත දරුවන් වාර්තා වීම තවදුරටත් වැඩි වී ඇතැයි වෛද්යවරයා පැවසුවේය.
“සරලව කියනවනම්, මේ රෝගය හැදෙන්නේ කොවිඩ් හැදිලා තියෙන, අළුත උපන් බිළිඳුන්ට, දරුවන්ට සහ නව යොවුන් අයට,” වෛද්ය නලීන් ගමඇතිගේ පැවසීය.
කොරෝනා වෛරසය වැළඳීමෙන් පසු එම වෛරසයට විරුද්ධව ශරීරය තුළ ප්රතිදේහ නිර්මාණය වේ. එම ප්රතිදේහවලට විරුද්ධව ශරීරය තුළින් නැඟෙන අසාමාන්ය ප්රතික්රියාවක ප්රතිඵලයක් සහ එයින් දරුවාගේ ප්රතිශක්තිකරණ පද්ධතිය තුළ ඇතිවන සංකූලතා හේතුවෙන් මෙම රෝග තත්ත්වය හට ගනී.
“මේ අසාමාන්යය ප්රතික්රියාව නිසා මේ රෝග තත්ත්වය හට ගන්නවා. කොවිඩ් හැදිලා සති 2-6ත් අතර ළමයින්ට නැවත තද උණක් හටගන්න පුළුවන්. උණ දින තුනක් පමණ තියෙන්න පුළුවන්. මෙහි දී ශරීරයේ අනෙක් පද්ධතිවලට බලපෑම් එල්ල වෙනවා. ඒ වගේම ලංකාවේ මේ රෝග තත්ත්වය හටගන්නා දරුවන්ගෙන් 80%-90%ත් අතර ප්රමාණයක් තුළ දකින්න හැකි වන්නේ වමනය, පාචනය සහ බඩේ අමාරුවක් වැනි රෝග ලක්ෂණ,” වෛද්යවරයා පැහැදිලි කළේය.
“සමහර දරුවන් පැමිණියා, වෙනත් ලක්ෂණ නැති නමුත් ඇස් පමණක් රතු වී තිබුණු අය. මේ අය හැමෝටම වගේ දැඩි මහන්සියක් නැත්නම් අප්රාණික බවක් තිබෙන බව නිරීක්ෂණය වෙලා තියෙනවා. මෙතන භයානකම තත්ත්වය තමයි සමහර දරුවන්ගේ රුධිර පීඩනය අඩු වීම. එහෙම වෙලා කම්පන තත්ත්වයට පත් වුණ දරුවන් පවා රෝහලට ඇතුළත් කර තිබෙනවා,” වෛද්ය නලීන් ගමඇතිගේ පැවසීය.
බහුපද්ධති ප්රතිදාහ සහලක්ෂණය (MIS-C ) රෝගය මුල් අවස්ථාවේ දී හඳුනාගැනීම තුළින් ඉක්මන් ප්රතිකාර ලබා දිය හැකිය. කෙටි කාලයකට පෙර කොවිඩ් වෛරසය වැළඳුණු දරුවෙක් ඉහත සඳහන් රෝග ලක්ෂණ සමඟ රෝහලට පැමිණි විට විශේෂ පරීක්ෂණ මඟින් මෙම රෝගය දැයි තහවුරු කරගැනීමට වෛද්යවරු කටයුතු කරති.
“MIS-C රෝගය කියලා තහවුරු වුණාම අපි ඒ ළමයින්ව විශේෂ ප්රතිකාර ඒකකයකට නැත්නම් ICU එකට අරගෙන සමීපව නිරීක්ෂණය කරනවා. තද උණ අඩු කරන්න සහ ප්රතිශක්තිකරණ පද්ධතියේ අසාමාන්යය ප්රතික්රියාව පාලනය කරන්න අපි ඖෂධයක් රෝහල්වල භාවිත කරනවා.”
“එය ඉතා මිල අධික බෙහෙතක්. නමුත් එලදායිතාව බොහොම වැඩියි. මීට අමතරව තවත් බෙහෙත් අප ලබා දෙනවා. නමුත් මේ අසනීපය තියෙන හැමෝටම මේ බෙහෙත් වර්ග දෙක අවශ්යය වන්නේ නැහැ. මෙහිදී රෝගීන්ට තියෙන්නේ උග්ර, මධ්යම සහ මෘදු ලක්ෂණ ද කියලා හඳුනා ගන්නවා.”
“උග්ර ලක්ෂණ තිබෙන දරුවන් තමයි බොහෝ විට මිය යන්න ඉඩ තියෙන්නේ. එහෙම නැතුව, සාමාන්යය ලක්ෂණ තියෙන දරුවන්ගේ අපි ලේ පරීක්ෂා කර බලා, ඒවායේ තිබෙන වෙනස්කම් මත ප්රතිකාර කරන්න පටන් ගන්නවා,” වෛද්ය නලීන් ගමඇතිගේ පැවසුවේය.
මෙම රෝගය විනිශ්චය කර ගැනීමේ දී ගැටළු මතුවිය හැකිය.
“බඩේ අමාරුව වගේ රෝග ලක්ෂණයක් මතු වුණාම, සමහර විට ඇපෙන්ඩිසයිට්ස් වගේ රෝගයක් කියලා හිතලා වෙනත් වාට්ටුවකට දමනවා. නැත්නම් ඩෙංගු කියලා හිතනවා. මේ වගේ වෙනත් ලෙඩ ඔස්සේ යනවා. ඒක නිසා දරුවාගේ රෝග ඉතිහාසය දැනගැනීම මෙහි දී ඉතා වැදගත්.”
කොවිඩ් 19 රෝගීන්ගේ දත්තවලට අනුව, පොදුවේ ගත් කල දරුවන්ට වෛරසයේ බලපෑම සාපේක්ෂව අවම මට්ටමක ඇති බව පෙනේ.
මෙයට හේතුව ආසාදනය ශරීරයෙන් බැහැර කිරීමේ හැකියාව හෝ රෝග ලක්ෂණ මතු නොවීම හෝ සෙම්ප්රතිශ්යාවට සමාන සාමාන්ය රෝග ලක්ෂණ පමණක් පෙන්නුම් කිරීමය.
රෝග ලක්ෂණ මතු නොවීමත් සමඟ, සමහර දරුවන්ට කොවිඩ් ආසාදනය වී තිබුණි දැයි දෙමාපියන් නොදන්නා විට, පසුව ඇතිවන MIS-C රෝග ලක්ෂණ හඳුනාගැනීම අපහසු වී තිබේ.
“මේ රෝගයෙන් සම්පූර්ණයෙන් ආරක්ෂා වීමක් සිදු කරන්න බැහැ. එකම දේ දරුවාට කොවිඩ් හැදුනට පස්සේ, ඊළඟ මාස එකාමාර හොඳ සැලකිල්ලෙන් ඉන්න ඕනේ. විශේෂයෙන් තද උණක් එක්ක බඩේ අමාරුවක්, පාචනය, ඇස් රතු වෙලා තියෙනවානම්, දරුවා අපහසුතාවෙන් ඉන්නවනම්, හුස්ම ගන්න අමාරුයි කියනවනම් වහාම ළමා රෝග විශේෂඥ වෛද්යවරයෙක් හමුවීම ඉතා වැදගත්.
“මේ වන විට මේ රෝගය ගැන අපි විශේෂඥ වෛද්යවරු දැනුවත් කරලා තියෙනවා. ඔවුන් මේ රෝගය ගැන දන්නවා. ඒක නිසා දෙමාපියන්ට බිය විය යුතු නැහැ. මේ හා සමාන ලක්ෂණ තියෙන වෙනත් රෝගත් තියෙනවා. නමුත් දක්ෂ වෛද්යවරයෙකුට පුළුවන් MIS-C රෝගය විනිශ්චය කරන්න,” වෛද්ය නලීන් ගමඇතිගේ පැවසීය.
රෝගය වැළඳුණු දරුවෙකුගේ දෙමාපියන් යුවළක් පැවසුවේ ඔවුන්ගේ වයස අවුරුදු හතරක දරුවාට කොවිඩ් අසාදනය වී සුව වී තිබුණ ද, සති කීපයකට පසු නැවතත් තද උණ සහ පාචනය යන රෝග ලක්ෂණ ඇති වූ බවය. ඔවුන් ඉක්මණින් ළමා රෝග විශේෂඥයෙකු හමුවීමත් සමඟ දරුවාට ඇත්තේ MIS-C රෝග තත්ත්වය බව දැන ගැනීමට හැකි වී තිබේ.
“ඉක්මන් ප්රතිකාර ලැබුණු නිසා දැන් මගේ දරුවා හොඳින් ඉන්නවා. හැබැයි අපි තව දුරටත් එයා ගැන බොහොම අවදානයෙන් ඉන්නවා,” ඔවුහු පැවසූහ.
දැනට තිබෙන දත්ත අනුව කොවිඩ් 19 වැළඳුණු දරුවන් 5,000කින් එක් කෙනෙකුගේ පමණ MIS-C රෝග ලක්ෂණ වාර්තා වී තිබේ.
“මෙහිදී මූලිකම කාරණය තමයි තමන්ගේ දරුවාට කොවිඩ් තිබුණාද නැද්ද කියන එක දැන ගැනීම. මේ දවස්වල දරුවන්ට උණක් වැළඳෙනවානම් වහාම පරීක්ෂණයක් කරගන්න. ගොඩක් දෙනෙක් පරීක්ෂා කරගන්නේ නැහැ. එහෙම හරියටම දැනගෙන හිටියාම අපට පුළුවන් MIS-C රෝග ලක්ෂණ තිබේදැයි ඉතිරි මාස එකාමාර දරුවාව සමීපව නිරීක්ෂණය කරන්න,” වෛද්යවරයා තවදුරටත් පැවසීය.
බී.බී.සී සන්දේශය ඇසුරින් උපුටා ගන්නා ලද ලිපියකි
රට විවෘත කිරීමත් සමග සෞඛ්ය මාර්ගෝපදේශ ක්රියාත්මක වන්නේ දැයි ඒ ඒ අංශ දැඩිව විමර්ශනය කළ යුතු බව කොවිඩ් මර්දන විශේෂ කමිටුව පෙන්වා දෙයි.
නිරෝධායන ඇඳිරි නීතිය ඉවත් කිරීමෙන් පසු ජන ඒකරාශි වීම් සිදු වේ. ඒ සමග කොවිඩ් වසංගතය පැතිරී යාමේ අවදානම යළි මතු නොවීමට නිකුත් කර ඇති සෞඛ්ය මාර්ගෝපදේශ කෙරෙහි සැලකිලිමත් වීම අත්යාවශ්ය බව සෞඛ්ය අංශ අවධාරණය කරති.
අද (01) පෙරවරුවේ මුදල් අමාත්ය බැසිල් රාජපක්ෂ මහතාගේ ප්රධානත්වයෙන් විඩීයෝ තාක්ෂණය ඔස්සේ පැවති කොවිඩ් මර්දන විශේෂ කමිටු රැස්වීමේ දී ඔවුහු මේ බව සඳහන් කළහ.
රාජ්ය හා පෞද්ගලික අංශ සේවයට කැඳවීමේ දී හා ප්රවාහන කටයුතු පිළිබඳ අනුගමනය කළ යුතු සෞඛ්යාරක්ෂිත මාර්ගෝපදේශ, අදාළ චක්රලේඛයන්ට අනුව පවත්වාගෙන යා යුතුය. අදාළ චක්රලේඛ මේ වන විටත් අමාත්යාංශ වෙබ් අඩවි මගින් පළ කර තිබේ. තවද මගී අවශ්යතාව මත බස්රථ සහ දුම්රිය ප්රමාණවත් පරිදි ධාවනයට එක්කිරීමට ප්රවාහන අමාත්යාංශය සැලසුම් කර ඇත.
වයස අවුරුදු 30ට වැඩි සමස්ත ජනගහණයෙන් 95%කට ආසන්න ප්රතිශතයකට එන්නත් මාත්රා දෙකම ලබාදී තිබේ. අවුරුදු 20 – 30 අතර වයස් කාණ්ඩයේ සහ සංකූලතා සහිත අවුරුදු 12 – 19 අතර දරුවන් එන්නත්කරණය සාර්ථකව සිදුකෙරෙමින් පවතී. එන්නත් ලබාදීම පිළිබඳ පුළුල් සංගණනයක් කඩිනමින් සිදුකිරීමට කොවිඩ් මර්දන කමිටුව තීරණය කළේය.
සංචාරක සහ ආර්ථික ක්ෂේත්රවල ප්රවර්ධනයට ගත යුතු සෞඛ්යමය ක්රියාමාර්ග පිළිබඳ දීර්ඝ වශයෙන් සාකච්ඡාවට ලක් කෙරිණ. වසංගත තත්ත්වය පාලනය කර, ජන ජීවිතය අඛණ්ඩව පවත්වාගෙන යාමට සෞඛ්ය ක්ෂේත්රයේ විශේෂඥයන්ගේ උපදෙස්, මාධ්ය මගින් ජනතාව වෙත අඛණ්ඩව ලබාදීමට තීරණය විය
කොළඹ පාරිභෝගික මිල දර්ශකයේ (කො.පා.මි.ද., 2013=100) වාර්ෂික ලක්ෂ්යමය වෙනස මගින් මනිනු ලබන මතුපිට උද්ධමනය, 2021 අගෝස්තු මාසයේ පැවති සියයට 6.0හි සිට 2021 සැප්තැම්බර් මාසයේ දී සියයට 5.7 දක්වා පහළ ගියේ ය. 2020 සැප්තැම්බර් මාසයේ පැවති ඉහළ පදනම් අගය මගින් ඇති වූ සංඛ්යානමය බලපෑම මේ සඳහා හේතු විය.
මේ අතර, ආහාර කාණ්ඩයේ වාර්ෂික ලක්ෂ්යමය උද්ධමනය 2021 අගෝස්තු මාසයේ පැවති සියයට 11.5හි සිට 2021 සැප්තැම්බර් මාසයේ දී සියයට 10.0 දක්වා පහළ ගිය අතර, ආහාර නො වන කාණ්ඩයේ වාර්ෂික ලක්ෂ්යමය උද්ධමනය 2021 අගෝස්තු මාසයේ පැවති සියයට 3.5හි සිට 2021 සැප්තැම්බර් මාසයේ දී සියයට 3.8 දක්වා ඉහළ ගියේ ය.
වාර්ෂික සාමාන්ය පදනම මත මනිනු ලබන කොළඹ පාරිභෝගික මිල දර්ශකයේ වෙනස 2021 අගෝස්තු මාසයේ පැවති සියයට 4.3හි සිට 2021 සැප්තැම්බර් මාසයේ දී සියයට 4.5 දක්වා ඉහළ ගියේ ය.
2021 සැප්තැම්බර් මාසයේ දී කොළඹ පාරිභෝගික මිල දර්ශකයේ මාසික වෙනස සියයට 0.47ක් ලෙස වාර්තා වූ අතර, ආහාර සහ ආහාර නො වන කාණ්ඩ දෙකෙහි ම අයිතමවල මිල ගණන්හි සිදු වූ ඉහළ යෑම් මේ සඳහා හේතු විය. තව ද, ආහාර සහ ආහාර නො වන කාණ්ඩවල අයිතමවල මාසික වෙනස්වීම් පිළිවෙළින්, සියයට 0.09ක් සහ සියයට 0.38ක් ලෙස වාර්තා විය. ඒ අනුව, ආහාර කාණ්ඩයේ පරිප්පු, පාන් සහ කුකුල් මස් මිල ගණන් ඉහළ ගිය අතර, සහල් සහ එළවළු මිල ගණන්හි පහළ යෑමක් වාර්තා විය. මේ අතර, ප්රධාන වශයෙන් සෞඛ්ය (පවුලේ වෛද්යවරුන් සහ ආයුර්වේද වෛද්යවරුන් සඳහා වන ගෙවීම්) සහ අධ්යාපන (ජාත්යන්තර පාසල් ගාස්තු: ප්රාථමික සහ ද්විතීයික) යන උප කාණ්ඩවල මිල ගණන් ඉහළ යෑම් හේතුවෙන්, ආහාර නො වන කාණ්ඩයේ අයිතමවල මිල ගණන්හි ඉහළ යෑමක්, සැප්තැම්බර් මාසය තුළ දී වාර්තා විය.
ආර්ථිකයෙහි යටිදැරි උද්ධමනය නිරූපණය කරන වාර්ෂික ලක්ෂ්යමය මූලික උද්ධමනය, 2021 අගෝස්තු මාසයේ පැවති සියයට 4.1හි සිට 2021 සැප්තැම්බර් මාසයේ දී සියයට 5.0 දක්වා ඉහළ ගියේ ය. තව ද, වාර්ෂික සාමාන්ය මූලික උද්ධමනය 2021 අගෝස්තු මාසයේ පැවති සියයට 3.2හි සිට 2021 සැප්තැම්බර් මාසයේ දී සියයට 3.3 දක්වා සුළු වශයෙන් ඉහළ ගියේ ය.
නිරෝධාන ඇදිරි නීතිය ඉවත් කිරීමෙන් පසු රාජ්ය ආයතන බිඳ වැටීමකින් තොරව පවත්වාගෙන යෑම සඳහා ප්රමාණවත් අත්යාවශ්ය සේවක පිරිස් පමණක් කැඳවීමට කටයුතු කරන්නැයි රාජ්ය සේවා පළාත් සභා හා පළාත් පාලන අමාත්යාංශයේ ලේකම් ජේ.ජේ රත්නසිරි මහතා සියලු අමාත්යාංශ ලේකම්වරුන්, රාජ්ය අමාත්යාංශ ලේකම්වරුන්, දෙපාර්තමේන්තු ප්රධානීන් දිස්ත්රික් ලේකම්වරුන් ඇතුළු රාජ්ය අංශයේ ප්රධානීන්ට චක්රලේඛයක් නිකුත් කරමින් දැනුම් දී ඇත.
රාජ සේවා පළාත් සභා හා පළාත් පාලන අමාත්යාංශ ලේකම්වරයා විසින් මෙම චක්රලේඛය නිකුත් කරනු ලැබුවේ අද (1) දිනයේය.
සේවකයන් අවශ්යතා අනුව ආයතනවලට කැඳවීමේ බලය අමාත්යාංශ ලේකම්වරුන්ට දෙපාර්තමේන්තු ප්රධානීන්ට සහ ආයතන ප්රධානීන්ට පවරන බවද එම චක්රලේඛයේ සඳහන්වේ. කෙසේ වෙතත් නිල වාහන හිමි හෝ ප්රවාහන දීමනා ලබා ගන්නා හෝ සංචිත වාහන මගින් ප්රවාහන පහසුකම් ලබා දෙනු ලබන හෝ මාණ්ඩලික නිලධාරින් සඳහා ඉහත විධිවිධාන අදාළ නොවන බවත් එම නිලධාරීන් සාමාන්ය පරිදි රාජකාරිවලට වාර්තා කළ යුතු බවත් එහි සඳහන් වේ.
රාජ්ය ආයතනවල අනෙකුත් නිලධාරීන් මාර්ගගත ක්රමය ඔස්සේ රාජකාරි කටයුතුවලට යොදාගත යුතු අතර ගර්භණී නිලධාරිනියන්, කිරි දෙන මවුවරුන්, විශේෂ රෝගාබාධවලින් පෙළෙන නිලධාරින් සේවයට නොකැඳවිය යුතු වන අතර අවශ්ය අවස්ථාවලදී පමණක් ඔවුන් කැඳවීමට අවස්ථාව පවතී.
