‘Tatoo man’s’ පොච්චාරණය: පාර්ලිමේන්තුව ඇවිලෙයි

‘Tatoo man’s’ පොච්චාරණය: පාර්ලිමේන්තුව ඇවිලෙයි
Spread the love

අතුරුගිරියේ ‘ක්ලබ් වසන්ත’ ඝාතනය සම්බන්ධයෙන් අත්අඩංගුවට ගෙන සිටින ‘ටැටූ ෂොප්‘ හිමියාගේ පාපොච්චාරණයට අදාළ වීඩියෝ පටය ඊයේ (10) විකාශය කිරීම සම්බන්ධයෙන් මන්ත්‍රීවරු අද (11) පාර්ලිමේන්තුවේදී ප්‍රශ්න කළහ.

එහිදී ප්‍රශ්නය මතු කළ පාර්ලිමේන්තු මන්ත්‍රී අනුර කුමාර දිසානායක මහතා මුලින් කියා සිටියේ එම වීඩියෝ පටය මාධ්‍ය සංදර්ශනයක් බවයි.

“පොලිසිය සැකකරුගෙන් මීට පෙර ප්‍රශ්න කර පසුව මාධ්‍ය සංදර්ශනයක් ද පවත්වා ඇති බව පැහැදිලියි. සැකකරුගෙන් ප්‍රශ්න කළ නියෝජ්‍ය පොලිස්පතිවරයා යම් යම් කරුණු අමතක කර සිරවූ සෑම අවස්ථාවකම ඔහුට යම් යම් කරුණු මතක් කර දෙන අයුරු අපි පැහැදිලිව දැක්කා. මේ වගේ තත්ත්වයක් පිළිගන්න බැහැ“ අනුර කුමාර දිසානායක කීවේය.

විපක්‍ෂයේ ප්‍රධාන සංවිධායක ලක්‍ෂ්මන් කිරිඇල්ල පැවසුවේ මෙම වීඩියෝ පටය විකාශය කිරීම පිටුපස ඇති අරමුණ ඝාතනයට වගකිවයුත්තන් නිදහස් කිරීම විය හැකි බවයි.

මෙම සිදුවීම සම්බන්ධයෙන් දයාසිරි ජයසේකර මන්ත්‍රීවරයා දැඩි අප්‍රසාදය පළ කළ අතර මේ හරහා සමාජයට නිකුත් වන පණිවුඩය බිහිසුණු බව පැවසුවේය.

එම වීඩියෝ පටය ප්‍රසිද්ධියේ විකාශය කිරීම විමර්ශනවලට මෙන්ම අධිකරණ කටයුතුවලට ද බලපානු ඇතැයි සභානායක සුසිල් ප්‍රේමජයන්ත ද ප්‍රකාශ කළේය.

Post Comment