මෙරට සංචාරක හා ආයෝජන ප්රවර්ධනය වෙනුවෙන් ශ්රී ලංකාව හා ජර්මනිය අතර ඒකාබද්ධ වැඩපිළිවෙලක් ක්රියාවට නැංවේ. කාර්මික අපනයන, ආයෝජන ප්රවර්ධන, සංචාරක හා ගුවන් සේවා අමාත්යංශය හා මෙරට ජර්මානු තානාපති කාර්යාලය එක් ව මෙම වැඩසටහන ක්රියාත්මක කරනු ලබයි.
කාර්මික අපනයන, ආයෝජන ප්රවර්ධන, සංචාරක හා ගුවන් සේවා ඇමති ප්රසන්න රණතුංග මහතා සහ මෙරට ජර්මානු තානාපති ජෝර්න් රොහේඩ් (Jorn Rohde) මහතා අතර පසුගිය දා (10) පැවති සාකච්ඡාවක දී මෙම එකගතාවයට එළඹිණ.
ජර්මනිය මෙරට සංචාරක හා ආයෝජන ක්ෂේත්රයන්ට වැඩි දායකත්වයක් දැක්වීමට කැමැත්තෙන් සිටින බවත් ඒ සදහා එරට සංචාරක නියෝජිත ආයතන හා ආයෝජකයන් සහ මෙරට බළධාරින් අතර ද්විපාර්ශවික සාකච්ඡා ඇරඹීමට සුදානම් බවත් ජර්මානු තානාපතිවරයා මෙහි දී කියා සිටියේ ය. ජර්මානු සංචාරකයන් මෙරට සුන්දර වෙරළ ආශ්රිත සංචාරයට මෙන්ම මෙරට සංස්කෘතික හා පුරාවිද්යා වටිනාකම් සහිත ස්ථාන නැරඹීමට ද වැඩි කැමැත්තක් දක්වයි. එමෙන් ම එරට ආයෝජකයන් ද මෙරට නව කර්මාන්තශාලා ඇරඹීමේ අපේක්ෂාවෙන් සිටින බව ද ජර්මානු තාතාපතිවරයා කීවේය.
ඇමති ප්රසන්න රණතුංග මහතා මෙහි දී පෙන්වා දුන්නේ ශ්රී ලංකාව සංචාරක මධ්යස්ථානයක් ලෙස ලොව පුරා ප්රචලිත කිරීමට අපේක්ෂා කරන බවයි. මේ සදහා ලොව පුරා සංචාරකයන් ආකර්ෂණය කර ගැනීමේ වැඩසටහන් ක්රියාත්මක කිරීමට සැලසුම් කර තිබේ. නවීන ඩිජිටල් තාක්ෂණය හා නව සන්නිවේදන ප්රවණතා හදුන ගනිමින් මෙම වැඩසටහන් ක්රියාත්මක කරන බව ඇමති ප්රසන්න රණතුංග මහතා මෙහි දී අවධාරණය කළේය. මුලින්ම ජර්මනිය, ප්රංශය, රුසියාව, චීනය හා ඉන්දියාව වැනි රටවල් කේන්ද්ර කර ගනිමින් මෙම ප්රවර්ධන වැඩසටහන ක්රියාත්මක කිරීමට අපේක්ෂිතය.
සංචාරකයන් හා ආයෝජකයන් මෙරටට පැමිණීමේ දී ඔවුන් මුහුණ දෙන ගැටළු කීපයක් ද ජර්මානු තානාපතිවරයා මෙහි දී විෂයභාර ඇමති ප්රසන්න රණතුංග මහතාගේ අවධානයට ලක් කළේය. 2025 වසර වන විට මෙරටට පැමිණෙන සංචාරකයන්ගේ සංඛ්යාව මිලියන 07කට ඉහළ නංවා ගැනීමේ රජයේ ඉලක්කය සපුරාලීමට නම් සංචාරක කලාප ආශ්රිතව යටිතල පහසුකම් නංවාලීමට මෙන් ම සංචාරකයන්ගේ ආරක්ෂාව තහවුරු වීම ද සිදු විය යුතු බව පෙන්වා දුන් ඇමති ප්රසන්න රණතුංග මහතා තම රජය දැනටමත් ඒ සම්බන්ධයෙන් අවධානය යොමු කර ඇතැයි කීවේය.
මෙම සාකච්ඡාවට සංචාරක හා ගුවන් සේවා අමාත්යංශයේ ලේකම් මරීනා මොහොමඩ්, කාර්මික අපනයන ආයෝජන ප්රවර්ධන අමාත්යංශයේ ලේකම් මාපා පතිරණ , ආයෝජන මණ්ඩලයේ සභාපති චම්පිකා මලල්ගොඩ, සංචාරක සංවර්ධන අධිකාරියේ සභාපති කිමාලි ප්රනාන්දු යන මහත්ම මහත්මීහු මෙම අවස්ථාවට සහභාගී වූහ.
