Supiri Gossip

Author: Editor

  • කොවිඩ් මාරයා ‘දකුණු ආසියානු රටවල’ මවුවරුන් සහ ළමුන් 239,000ක් බිලිගනී

    කොවිඩ් මාරයා ‘දකුණු ආසියානු රටවල’ මවුවරුන් සහ ළමුන් 239,000ක් බිලිගනී

    කොවිඩ්-19 වසංගතයත් සමඟ සෞඛ්‍ය සේවා අඩාලවීම හේතුවෙන් දකුණු ආසියානු රටවල ළමා සහ මාතෘ මරණ 239,000ක් පමණ සිදුව ඇතැයි ඇස්තමේන්තු කෙරෙන බව එක්සත් ජාතීන්ගේ වාර්තාවක් කියයි.

    එම වාර්තාව මගින් අවධානය යොමුකරනු ලැබ තිබෙන්නේ ඇෆ්ඝනිස්තානය, නේපාලය, ඉන්දියාව, පාකිස්ථානය සහ ශ්‍රී ලංකාව යන දකුණු ආසියානු රටවල් සමූහයයි. එම රටවල ජීවත්වෙන ජනගහනය කෝටි 180ක් පමණ වෙයි.

    එක්සත් ජාතීන්ගේ එම වාර්තාව අනුව දකුණු ආසියාතික රටවල එකී ව්‍යසනයට දරුණු මට්ටමින් ගොදුරුව ඇත්තේ කාන්තාවන්, ළමුන් සහ වැඩිහිටියන්ය.

    මේවනවිට දකුණු ආසියාවෙන් කොවිඩ්-19 ආසාදිතයන් මිලියන දහතුනක් වාර්තා වී ඇති අතර මරණ සංඛ්‍යාව 186,000ක් පමණ වේ.

    ඉහත කී දකුණු ආසියානු රටවල් ද ඇතුළුව කොරෝනා වසංගත තර්ජනය එල්ල වූ බොහෝ රටවල් ඊට මුහුණදෙන ලද්දේ දැඩි අගුලු දැමීමේ (‘ලොක්ඩවුන්’) පිළිවෙතක් අනුගමනය කරමිනි. එහෙත් ඒ අතරවාරයේ රෝහල්, ඖෂධ වෙළෙඳසල් සහ සිල්ලර අලෙවිසල් විවෘතව පවත්වාගනු ලැබුණි. සෙසු සියලු අංශ සහමුලින්ම මෙන් වසාදමනු ලැබීමේ පිළිවෙතක් අනුගමනය කරනු ලැබුණි.

    ‘කොවිඩ් -19 වසංගතයේ සෘජු සහ සෘජු නොවන බලපෑම් සහ දකුණු ආසියාවේ ප්‍රතිචාරය’ යනුවෙන් නම්කරනු ලැබ ඇති එක්සත් ජාතීන්ගේ වාර්තාව මගින් එම රටවල ආණ්ඩු විසින් සෞඛ්‍ය සේවා සම්බන්ධයෙන් අනුගමනය කරනු ලබන මූලෝපායී ක්‍රියාමාර්ගයන්, සමාජ සේවාවන් සහ පාසල් අධ්‍යාපනයත් ඇතුළුව ආර්ථික ක්ෂේත්‍රය ගැනත් විපරම් කිරීමක් සිදුකරයි.

    මුලින් සඳහන් කරන ලද දකුණු ආසියානු රටවල් පහේ වයස අවුරුදු පහට අඩු අතිරේක ළමා මරණ 228,000ක් සිදුව ඇති බවත් එම එක්සත් ජාතීන්ගේ වාර්තාව පවසයි. එම මරණවලට හේතුව ලෙස දැක්වෙන්නේ පෝෂණ ප්‍රතිලාභ සහ ප්‍රතිශක්තිකරණය වැනි ඉතාම වැදගත් සමාජ සේවා නතරවීමය .

    වාර්තාව පෙන්වාදෙන පරිදි නේපාලයේ සහ බංග්ලාදේශයේ මන්දපෝෂණය සඳහා ප්‍රතිකාර කරනු ලබන ළමුන්ගේ සංඛ්‍යාව 80%කින් පහත වැටුණි. ඒ අතරම ඉන්දියාවේ සහ පාකිස්තානයේ ළමුන් ප්‍රතිශක්තිකරණය පිළිවෙලින් 35% සහ 65% මට්ටමින් පහත වැටී ඇත.

    එක්සත් ජාතීන් සඳහන් කරන පරිදි 2020 වසර ඇතුළත දකුණු ආසියාවේ වැඩිම ළමා මරණ අනුපාතය වාර්තාවන්නේ ඉන්දියාවෙනි. ඉන්දියාවේ ළමා මරණ සංඛ්‍යාව 15.4%ක අනුපාතයකින් ඉහළ ගියේය. ඊළඟට සිටින බංග්ලාදේශයේ ළමා මරණ සංඛ්‍යාව ඉහළ ගොස් තිබෙන්නේ 13%ක අනුපාතයකිනි. මේ අතර මාතෘ මරණ වැඩිම සංඛ්‍යාව වාර්තාවන්නේ ශ්‍රී ලංකාවෙනි.එම මාතෘ මරණ අනුපාතය 21.5%කින් ඉහළ ගිය අතර පාකිස්තානයේ මාතෘ මරණ අනුපාතය 21.3%කින් වැඩිවී තිබිණි.

    මෙහි තවත් ප්‍රවනතාවක් ද දක්නට ලැබෙයි. එනම් අපේක්ෂා නොකළ ගැබ්ගැනීම් ලක්ෂ තිස්පහක් (මිලියන3.5) පමණ සිදුව ඇතැයි ඇස්තමේන්තු කරනු ලැබීමය. එම කාන්තාවන්ගෙන් හාරලක්ෂයක් (400,000) පමණ යොවුන්වියේ පසුවෙන තරුණියෝ වූහ. එම අනපේක්ෂිත ගැබ්ගැනීම්වලට හේතුව ලෙස දැක්වෙන්නේ දුප්පත්කම හෝ උපත්පාලන පහසුකම් නොවීමය.

    වසංගතයේ පූර්ණ බලපෑම සහ ලොක්ඩවුන් කරනු ලැබීම නිසා පසුව බලපැවැත්වෙන ප්‍රතිවිපාක එම රටවල මහජන සෞඛ්‍ය සහ අධ්‍යාපන වැඩසටහන් කෙරෙහි බලපෑම මේවනවිට පැහැදිලි වෙන්නට පටන්ගෙන ඇත.

    ඉදිරි මාස කීපය තුළ තොරතුරු ගලාඑන්නට පටන් ගැනීමත් සමඟ රටපුරාම මන්දපෝෂණ තත්ත්වයේ නරකම සංඛ්‍යා දත්ත අනාවරණය වෙනු ඇතැයි ඉන්දියානු විශේෂඥයන් විසින් දැනටමත් බිය පළකරනු ලැබ ඇත.

    ඉන්දියාව වැනි දකුණු ආසියාවේ ඇතැම් රටවල් තවමත් පසුවන්නේ වෛරසය පැතිරයාම පාලනය කරගැනීමේ අරගලයක නිරතවෙමිනි. ඉන්දියාවේ ජාතික මට්ටමේ අගුලු දැමීම පසුගිය ජූනි මාසයේ අවසන් කෙරුණි. එහෙත් වෛරසය පැතිරීම පාලනය කරගැනීම සඳහා ප්‍රාන්ත කීපයක සහ ඇතැම් දිස්ත්‍රික්කයන්හි අගුලු දැමීම් වරින්වර සිදුකෙරෙයි.

    සෞඛ්‍ය සේවාවන් අඩාලවීම කලාපයේ රටවල වෙනත් ව්‍යාධීන්ගෙන් පීඩා විඳින ජනතාවටත් බලපෑවේය. එක්සත් ජාතීන්ගේ වාර්තාව සඳහන් කරන පරිදි, සෞඛ්‍ය සේවා අඩාලවීම් හේතුවෙන් ක්ෂයරෝගය, මැලේරියාව, උනසන්නිපාතය සහ එච්අයිවී/ඒඩ්ස් සඳහා ප්‍රතිකාර ලබමින් සිටි රෝගීන් 5,943ක් මරණයට පත්වූ බව හඳුනාගනු ලැබුණි.

  • ‘හත්වැනි තැන රැක ගන්න’ කොදෙව්වන්ට එරෙහිව ශ්‍රී ලංකාව හෙට තරග බිමට

    ‘හත්වැනි තැන රැක ගන්න’ කොදෙව්වන්ට එරෙහිව ශ්‍රී ලංකාව හෙට තරග බිමට

    සංචාරක ශ්‍රී ලංකා ක්‍රිකට් කණ්ඩායම සහ බටහිර ඉන්දීය කොදෙව් පිල අතර පැවැත්වෙන තරග 2 කින් සමන්විත ටෙස්ට් තරගාවලියේ පළමු තරගය හෙට (21 වැනිදා) ශ්‍රී ලංකා වේලාවෙන් ප.ව. 7.30 ට ඇන්ටිගුවාහි ශ්‍රීමත් විවියන් රිචර්ඩ්ස් ක්‍රීඩාංගණයේදී ආරම්භ වේ.

    ටෙස්ට් ලෝක ශූරතාවලියට අයත් තරගාවලියක් ලෙසින් පැවැත්වෙන මෙම තරගාවලිය ආරම්භක පිතිකරුවන් යුගලක් නායකත්වය දැරීම විශේෂත්වයකි. ශ්‍රී ලංකා කණ්ඩායම දිමුත් කරුණාරත්න විසින් මෙහෙයවද්දී කොදෙව් පිල ක්‍රෙක් බ්‍රැත්වයිට් විසින් මෙහෙයවනු ලබන අතර ඔවුන් දෙදෙනාම ආරම්භක පිතිකරුවන් ලෙසින් කටයුතු කරති.

    හෙට ආරම්භ වන තරගයේදී ශ්‍රී ලංකා කණ්ඩායමේ ප්‍රධාන වගකීම පිතිකරුවන් වෙත පැවැරී තිබේ. මෙම තරගාවලියට පෙර එංගලන්තයට සහ දකුණු අප්‍රිකානු කණ්ඩායම් වලට එරෙහිව පැවැති තරගාවලි දෙකේදීම පරාජයට පත්වීමට මූලිකම හේතුව බවට පත්වූයේ පිතිකරුවන්ගේ අසාර්ථකභාවය බැවින් මෙම තරගාවලියේදී ඔවුන් දක්ෂතා අතරට පැමිණීම තරගාවලිය කෙරෙහි වැඩි බලාපොරොත්තු තබා ගැනීමට වඩා වැදගත් වනු ඇත.

    හෙට තරගයට පෙර සූදානමක් ලෙසින් බටහිර ඉන්දීය කොදෙව් ක්‍රිකට් සභාපතිගේ පිලට එරෙහිව පැවැති පළමු සහ එකම පුහුණු තරගයේදී ඕෂධ ප්‍රනාන්දු සහ දිනේෂ් චන්දිමාල් හැර ශ්‍රී ලංකා පිතිකරුවන් පළමු ඉනිමේදී ලකුණු 40 සීමාව ඉක්මවාලීමට අපොහොසත් වූහ. කෙසේ වෙතත් දෙවැනි ඉනිමේදී කිසිවකු නොදැවී ලකුණු 56 ක් රැස් කර ගැනීමට ආරම්භක පිතිකරුවන් වූ දිමුත් කරුණාරත්න සහ ළහිරු තිරිමාන්න සමත්වීම ශ්‍රී ලංකාව දෙසින් සුබ දායක ලකුණකි.

    දෙරට අතර ඉතිහාසය ගෙන බැලීමේදී අවසන් ටෙස්ට් තරග 5 න් 3 ක ජය ගැනීමට ශ්‍රී ලංකා පිල සමත්ව සිටිද්දී කොදෙව්වන් ජයගැනීමට සමත්ව සිටින්නේ එක් තරගයක් පමණි. දෙරට අතර ටෙස්ට් තරග ඉතිහාසය පිළිබඳව අවධානය යොමු කිරීමේදී ශ්‍රී ලංකාව වැඩි ගෞරව අත්කරගෙන සිටින්නේ පවත්වා ඇති ටෙස්ට් තරග 20 න් 9 ක් ජයගනිමිනි. අවස්ථා 4 කදී පමණක් සත්කාරක කොදෙව් පිල ජය ගෙන සිටින අතර අනෙක් තරග 9 ම ජය පැරදුමෙන් තොරව අවසන්ව තිබේ.

    හෙට තරගය පිළිබඳව අදහස් දක්වා සිටි ශ්‍රී ලංකා නායක දිමුත් කරුණාරත්න, පළමු ටෙස්ට් තරගයේදී නවක ක්‍රීඩක පැතුම් නිස්සංකට අවස්ථාව හිමිවීමට වැඩි ඉඩ කඩක් පවතින බවයි. ඒ අනුව දිමුත් කරුණාරත්න සහ ළහිරු තිරිමාන්න ඉනිම අරඹද්දී,  පැතුම් නිස්සංක අංක 3 පිතිකරුණ ස්ථානයෙන්ද, දිනේෂ් චන්දිමාල් අංක 4 පිතිකරුවා ලෙසත් සහ ඕෂධ ප්‍රනාන්දු අංක 5 පිතිකරුවා ලෙසිත් තරග කිරීමට නියමිතය.

    ධනංජය ද සිල්වා නැවතත් කණ්ඩායමට පැමිණ සිටින බැවින් ඔහු අංක 6 ස්ථානයෙන්ද කඩුලු රකින්නා ලෙසින් නිරෝෂන් දික්වැල්ල අංක 7 ස්ථානයෙන් පන්දුවට පහර දීමට පැමිණෙනු ඇත. කෙසේ වෙත්ත හෙට තරගයට ක්‍රීඩා කිරීමේ අවස්ථාව පැතුම් නිස්සංකට හිමි වුවහොත් එකම තරගාවලියකදී විස්සයි-20, එක්දින සහ ටෙස්ට් යන තෙඅංශයේම වරම් ලද පළමු ශ්‍රී ලාංකික ක්‍රීඩකයා වීමේ විරළ වාර්තාවටද හිමිකම් කීමේ අවස්ථාව උදාවනු ඇත.

    බටහිර ඉන්දීය කොදෙව් කණ්ඩායම වෙනුවෙන් නායක කේ‍්‍රග් බ‍්‍රැත්වේට්, ජෙරටින් බ්ලැක්වුඞ් සහ බැරන් බ‍්‍රාවෝ පිතිකරුවන් ලෙස ද තුන් ඉරියව් කී‍්‍රඩකයන් ලෙස බුනර්, ජොන් කැම්බල්, ජේසන් හෝල්ඩර්, කයිල් මේසර්ස්, රඛීම් කෝර්න්වෙල් කණ්ඩායමට දායකත්වය ලබා දෙති.. පන්දු යවන්නන් ලෙස ෂැනොන් ගැබි‍්‍රයල්, අල්ශාරි ජෝෂප්, කෙමාර් රෝච් සහ ජොමෙල් වෙරිකන් එකතුව සිටිති.

    අන්තර්ජාතික ක්‍රිකට් කවුන්සිල ශ්‍රේණිගත කිරීමට අනුව ප්‍රසාද ලකුණු 83 ක් ලබා සිටින ශ්‍රී ලංකා පිල 7 වැනි ස්ථානයේ සිට හෙට තරගයට අවතීර්ණ වද්දී කොදෙව් පිල ඊට ණු 2 ක් අඩු‍වෙන් තරගයට අවතීර්ණ වේ. යම් ලෙසකින් මේ තරගාවලිය 1-0 ක් ලෙසින් කොදෙව් පිල ජය ගැනීමට සමත් වුවත් ශ්‍රී ලංකාව 8 වැනි ස්ථානය වෙත තල්ලු කර දමා කොදෙව් පිල 7 වැනි තැනට පැමිණෙනු ඇත. එමෙන්ම තරගාවලිය 2-0 ක් ලෙස පරාජයට පත් වුවහොත් ශ්‍රී ලංකාවේ ප්‍රසාද ලකුණු සංඛ්‍යාව 80 ටත් වඩා පහළ වැටෙනු ඇත. ශ්‍රී ලංකාව තරගාවලිය 2-0 ක් ලෙස ජය ගතහොත් ප්‍රසාද ලකුණු සංඛ්‍යාව 87 ක් දක්වා ඉහළ යනු ඇත. එසේ වුවහොත් 6 වැනි ස්ථානයේ රැඳී සිටින දකුණු අප්‍රිකානු පිල සහ ශ්‍රී ලංකාව අතර පවතින්නේ ලකුණු 2 ක පරතරයකි. ඒ අනුව මෙම තරගාවලියේ ප්‍රතිඵලය අනුව ශ්‍රේණිගත කොදෙව් පිලේ ඉදිරියට පැමිණීමත් ශ්‍රී ලංකා පිල රැඳී සිටින තැන රැකගැනීමත් තීරණය වනු ඇත.   

    ශ්‍රී ලංකා කණ්ඩායම – දිමුත් කරුණාරත්න (නායක), ළහිරු තිරිමාන්න, පැතුම් නිස්සංක, දිනේෂ් චන්දිමාල්, ඕෂධ ප්‍රනාන්දු, ධනංජය ද සිල්වා, නිරෝෂන් දික්වැල්ල, ලසිත් ඇඹුල්දෙණිය, දුෂ්මන්ත චමීර, සුරංග ලක්මාල්, විශ්ව ප‍්‍රනාන්දු, අසිත ප්‍රනාන්දු, රොෂේන් සිල්වා, රමේෂ් මෙන්ඩිස්, දසුන් ශානක.


     කොදෙව් කණ්ඩායම – ක්‍රෙයිග් බ‍්‍රැත්වෙයිට්(නායක), ජර්මියන් බ්ලැක්වුඞ්, රුක්මා බොන්නේර්, ඩැරන් බ‍්‍රාවෝ, ජෝන් කැම්බෙල්, රකීම් කොන්වෙල්, ජොසුවාද සිල්වා, ෂැනොන් ගේබි‍්‍රල්, ජේසන් හෝල්ඩර්, අල්සාරි ජෝසප්, කයිල් මිරස්, කෙමර් රොච්, ජොමෙල් වොරිකන්.

  • යුද සමයේ රටට එරෙහි වූ මාධ්‍ය කණ්ඩායමක් නැවත නැගිටලා – ‘ගම සමඟ පිළිසඳරේ’ දී ජනපති කියයි

    යුද සමයේ රටට එරෙහි වූ මාධ්‍ය කණ්ඩායමක් නැවත නැගිටලා – ‘ගම සමඟ පිළිසඳරේ’ දී ජනපති කියයි

    • මාධ්‍ය නිදහස යනු මාධ්‍ය ආයතන හිමිකරුවන්ගේ  නිදහස නොවෙයි .
    • මාස 60ක ධූර කාලයේ වගකීම් නොපිරිහෙළා ඉටු කරනවා …
    • ඊළග ජනාධිපතිවරයා ගැන කිසිවෙකු කලබල විය යුතු නැහැ ….
    • නීති පනවා ඇත්තේ ජනතා යහපතට ….
    • දිළිඳුතම ජනයාට තවත් රැකියා ලක්ෂයක් ….
    • ජනතා ඉල්ලීම අනුව වලපනේ හා පූඩලුඔය පූර්ණ සංවර්ධනයට ..

    මාධ්‍ය නිදහස යනු මාධ්‍ය ආයතන හිමිකරුවන්ගේ නිදහස නොවන බවත්, ඇතැම් මාධ්‍ය ආයතන හිමියනට රට පාලනය කිරීමට අවශ්‍යව ඇතත් එසේ කළ නොහැකි බවත් ජනාධිපති ගෝඨාභය රාජපක්ෂ මහතා කියා සිටී.

    තමා ජනාධිපතිවරයා ලෙස ජනමාධ්‍යයට කිසිදු බලපෑමක් කර නැති බව සඳහන් කරන ජනාධිපතිවරයා  විවිධ කණ්ඩායම්වල සහ පුද්ගලයන්ගේ අවශ්‍යතාව මත වැරදි මාධ්‍ය භාවිතයක නිරත වෙමින් රටත්, ජනතාවත් නැවත අගාධයට ඇද දැමීමට උත්සහ කළහොත් එවැනි පිරිස්වලට එරෙහිව නීතිය ක්‍රියාත්මක කිරීමට පැකිලෙන්නේ නැති බව ද පවසයි.

    යුද සමයේ රටට එරෙහිව කටයුතු කළ මාධ්‍ය කණ්ඩායමක් මාධ්‍ය ආයතනවලට රිංගාගෙන දේශියත්වයට සහ ජාතික වැඩපිළිවෙළට පහර ගසමින් සිටින බව ද ජනාධිපතිවරයා පෙන්වා දෙයි.

    අද (20) පෙරවරුවේ නුවරඑළිය දිස්ත්‍රික්කයේ වලපනේ ප්‍රාදේශීය ලේකම් කොට්ඨාසයට අයත්, යෝඹුවැල්තැන්න ප්‍රදේශයේ පැවති “ගම සමග පිළිසඳර” 15 වැනි වැඩසටහනට සහභාගීවෙමින් ජනාධිපතිවරයා මේ අදහස් පළ කළේය.

    මේ රටේ බහුතර ජනතාව එක්ව තමා ජනාධිපති ධූරයට පත් කරගත්තේ රට ගොඩනැගීමටයි. මාස 60ක් වූ ධූර කාලයෙන් ගතව ඇත්තේ මාස 16ක් පමණි. තව සැලකිය යුතු කාලයක් ඉදිරියට තිබේ. ඊළග ජනාධිපතිවරයා පිළිබඳ ඇතැම්හු කලබල වී සිටිති. කිසිවෙකු ඒ ගැන කලබල නොවිය යුතු අතර එය තීරණය කරන්නේ ජනතාවයි. ඉදිරි ධූර කාලය ජාතික ආර්ථිකය මෙන්ම ග්‍රාමීය ජනතාව නගාසිටුවීමට සුවිශාල වැඩකොටසක් ඉටු කරමින් ජනතා අපේක්ෂා මල්ඵල ගන්වන බව ජනාධිපතිවරයා පැවසීය.

    නිලධාරීන්ගේ වගකීම ජනතාව ජීවත්කරවීමයි. කිසිවිටෙක ඔවුන්ට කරදර නොකළ යුතුයි. ජන ජීවිතය අඩාල කෙරෙන කිසිදු අකටයුත්තක් තමා රාජ්‍ය නිලධාරීන්ගේ අපේක්ෂා නොකරන බව ද ජනාධිපතිවරයා සඳහන් කළේය.

    “මා කිසිවිටෙකත් පරිසරය විනාශ කර නැහැ. නාගරික සංවර්ධන අමාත්‍යාංශයේ ලේකම්වරයා ලෙස සිටින අවදියේ පටන් පරිසර සංරක්ෂණය වෙනුවෙන් ගෙනගියේ කිසිවෙකු නොකළ වැඩකොටසක්. නිදහස් චතුරශ්‍රයේ පවා එදා කුණු ගොඩවල් පිරී තිබුණා. ඒ තත්ත්වය නැති කොට කොළඹ නගරය හරිත උයනක් බවට පත් කලා. පරිසරය වෙනුවෙන් කිසිවක් නොකළ අය මට ඇගිල්ල දිගු කිරීම කණගාටුවට කරුණක්” ජනාධිපතිවරයා කීය.

    පසුගිය රජයේ සිටි ජ්‍යෙෂ්ඨ අමාත්‍යවරයෙක්  හන්තානේ අක්කර 30ක ඉඩමක් තම දියණියට තෑගි දී ඇත. පරිසරය ආරක්ෂා කළානම් අද ඔවුන්ට මාධ්‍ය ඉදිරියට පැමිණ හඩා වැටීමට සිදු නොවන බවද ජනාධිපතිවරයා කීය.

    2015-2019 කාලය තුළ කුරුණෑගල දිස්ත්‍රික්කයේ කැලෑ අක්කර 77, පුත්තලම අක්කර  258, මොණරාගල අක්කර 100ක්, අනුරාධපුරයේ අක්කර 224ක් ඇතුළුව මයිලෑව, මාතලේ, ලග්ගල, රිදීගම, වැලිකන්න ඇතුළු දිස්ත්‍රික්ක ගණනාවක වන විනාශය සිදු කර තිබේ. එවැනි පිරිස් අද රජයට ඇගිල්ල දිගු කිරීම හාස්‍යයට කරුණක් යයි ද ජනාධිපතිවරයා පැවසීය.

    දිළිදුකම තුරන් කර ග්‍රාමීය ජනතාව ආර්ථික වශයෙන් නගා සිටූවීම රජයේ  ප්‍රමුඛ ප්‍රතිපත්තියකි. 75%ක් වන ග්‍රාමීය ජනතාවගෙන් 35% සෘජුවම කෘෂිකර්මාන්තයේ නියැලෙති. කෘෂිකර්මාන්තයේ උන්නතිය වෙනුවෙන් අවශ්‍ය සියලු වැඩපිළිවෙළ ක්‍රියාවට නංවමින් ග්‍රාමීය ජනතාව දිළිදුබවින් මුදා ගැනීමේ වගකීම ඉටුකරන බවද ජනපතිවරයා පැවසීය.

    සමාජයේ පහළම ආදායම් ස්ථරයට අයත් පවුල්වලින් තෝරාගත් ලක්ෂයකට රැකියා දීමේ වැඩසටහන ආරම්භ කෙරිණ. ඉන් රුකියා 35,000ක් දී දැනටමත් ප්‍රදානය කර තිබේ. රැකියා ලක්ෂයේ ප්‍රථම වැඩසටහන අවසන් වූ පසු තවත් ලක්ෂයකට රැකියා දෙන බව ජනාධිපතිවරයා සඳහන් කළේය.

    ඒ සඳහා සුදුස්සන් තෝරා ගැනීමේ දී නිවැරැදීම පුද්ගලයන් හඳුනා ගැනීම ග්‍රාමීය රාජ්‍ය නිලධාරින්ගේ මෙන්ම මහජන නියෝජිතයන්ගේ වගකීම බව ද ජනාධිපතිවරයා පැවසීය. පුහුණු ශ්‍රමිකයන් නැතිවීම රටේ සංවර්ධන ව්‍යාපෘතිවල ප්‍රමාදයට ඉවහල් වී තිබෙන බව ද ජනාධිපතිතුමා පෙන්වා දුන්නේය.

    2020 සැප්තැම්බර් 25 වන දින බදුල්ල දිස්ත්‍රීක්කයෙන් “ගම සමග පිළිසඳර” වැඩසටහන ආරම්භ විය. මාතලේ, රත්නපුරය, අනුරාධපුරය, අම්පාර, පොළොන්නරුව, කළුතර, මොණරාගල, කෑගල්ල, මහනුවර, පුත්තලම, ත්‍රීකුණාමලය, කුරුණෑගල සහ ගාල්ල දිස්ත්‍රික්ක ආවරණය වන පරිදි පසුගිය වැඩසටහන් සංවිධාන කෙරිණ. මෙතෙක් නිසි අවධානයට ලක් නොවූ නගරයෙන් බැහැර දුෂ්කර ගම්මානවල ජනතාව හමුවී, ඔවුන්ගේ ගැටළු විමසා ඒ මොහොතේම නිලධාරීන්ගේ අවධානයට යොමු කොට විසඳුම් දීම ජනාධිපතිවරයාගේ අරමුණයි.

    විසඳීමට කල්ගතවන ගැටළු පසුව ආමන්ත්‍රණය කරනු පිණිස සටහන් කර ගනු ලැබේ. ගමේ ජනතාව අතරට පැමිණ ඔවුන්ගේ ප්‍රශ්න විමසා ඔවුන්ගේම යෝජනා තුළින් පිළියම් සෙවීම “ගම සමග පිළිසඳර” වැඩසටහනේ අපේක්ෂාවයි.

    යොඹුවැල්තැන්න ග්‍රාම නිලධාරී වසම වලපනේ නගරයේ සිට කි.මි 13ක් දුරින් පිහිටා තිබේ. එය වලපනේ ප්‍රාදේශීය ලේකම් කොට්ඨාසයට අයත් ග්‍රාම නිලධාරී වසම් අතරින් වඩාත්ම දුෂ්කර ගම්මානය වේ. ඌව වෙල්ලස්ස සටනට දායකත්වය දුන් ජනතාවක් ජීවත් වූ පෞරාණික ප්‍රදේශයක් වන යොඹුවැල්තැන්න කැප්පෙටිපොළ නිළමේතුමා යළි සිංහල හමුදාව සමග එක්වූ ප්‍රදේශය බව ජනප්‍රවාදයේ සඳහන් ය. ඖෂධීය ශාඛයක් වන යෝඹුවැල් බහුල නිසා ගමෙහි නම නිර්මාණය වූ බව කියවේ. පවුල් 139ක් වෙසෙන යෝඹුවැල්තැන්න ග්‍රාමයේ දැන් ජනගහණය 397කි. වී සහ එළවළු වගාව ජනතාවගේ ප්‍රධාන ජීවනෝපාය වේ.

    “ගම සමග පිළිසඳර” වැඩසටහනට සහභාගීවීමට නිල්දණ්ඩාහින්න මහජන ක්‍රීඩාංගණයේ සිට යෝඹුවැල්තැන්නට යන මග දෙපස රැස්ව සිටී ජනයා විසින් ජනාධිපතිවරයා මහත් හරසින් පිළිගනු ලැබීය.

    ජනතාවගේ ගැටළු පිළිබඳව එහිදී ජනාධිපතිවරයා කරුණු විමසූ අතර කලගන්වත්ත නවෝද්‍යා පාසලේ දරුවන් සමග ඡායාරූපයකට ද පෙනී සිටියේය.

    දේශීයව සොසේජස් නිෂ්පාදනය කිරීමක් ජනාධිපතිතුමාට හදුන්වා දුන් ප්‍රදේශවාසියෙකු තමා එම අදහස ලබාගත්තේ වියත්මග සමුළුවකදී බව පවසමින් එහිදී ගත් ඡායාරූපයක්  ජනාධිපතිතුමාට පෙන්වීය. 

    දීර්ඝ කාලයක් තිස්සේ වන සතුන්ගෙන් තම බෝගවලට සිදුවන හානියට පිළියමක්  දෙන ලෙස ද මග දෙපස රැස්ව සිටී ජනතාව ජනාධිපතිතුමාගෙන් ඉල්ලා සිටියහ.

    SLT මොබිටෙල් ආයතනය විද්‍යාපදීප ද්විතීයික පාසලට හා සිදුහත් මහා විද්‍යාලයට පරිත්‍යාග කළ අන්තර්ජාල සබඳතා සහිත ලැප්ටොප් පරිගණක හා ඩයලොග් ආයතනය තැන්නබෝධි ප්‍රාථමික විද්‍යාලයට පිරිනැමූ රූපවාහිනි යන්ත්‍රය හා සබඳතාව විදුහල්පතිවරුන්ට භාරදීම ජනාධිපතිවරයා අතින් සිදු කෙරිණ.

     “ගම සමග පිළිසඳර” වැඩසටහන පැවැත්වෙන සෑම ප්‍රදේශයකම පාසල්වල පුස්තකාල පහසුකම් ප්‍රවර්ධනය රාජපක්ෂ මැතිතුමාගේ තවත් අරමුණකි. “නැණ බල සහිත ළමා පරපුරක්” තේමා කර ගනිමින්  ඒ සඳහා වූ පොත් කට්ටල ජනාධිපතිතුමා අතින් පාසල් වෙත පිරිනැමිණ. එක් පාසලකට ලැබෙන විවිධ විෂයයනට අයත් පොත් සංඛ්‍යාව 500කි.

    හිමිකමක් නැතිව මෙතෙක් රජයේ ඉඩම් භුක්ති විඳිමින් සිටී පවුල් වෙත දීමනා පත්‍ර ප්‍රදානය පසුගියදා ආරම්භ කෙරිණ. අද ජනාධිපතිතුමා වලපනේ ප්‍රාදේශීය ලේකම් කොට්ඨාසයට අයත් පවුල් 05ක් වෙත සංකේතාත්මකව දීමනා පත්‍ර ප්‍රදානය කළේය.

    ප්‍රදේශයේ ජනතාව මුහුණ දෙන ප්‍රධානම ගැටළුව මාර්ග, අතුරුමාර්ගවල ඇති දුෂ්කරතාවයි. ඒ පිළිබඳ දීර්ඝ වශයෙන් සාකච්ඡා කෙරිණ. ගල්වත්ත – යොඹුවැල්තැන්න මාර්ගය, තේරිපැහැ – මොලන්දෑව, ගලහ – දෙල්තොට සිට රිකිල්ලගස්කඩ මාර්ගය, යටිවැල්ල – මතුරට මාර්ගය, තෙරිපැහැ, නිල්දණ්ඩාහින්න ප්‍රධාන සහ අතුරු මාර්ග රැසක සංවර්ධන වැඩ කඩිනම් කරන ලෙස ජනාධිපතිතුමා උපදෙස් දුන්නේය.

    ප්‍රදේශයේ ප්‍රධාන හා අතුරු මාර්ගවල පාලම් 15ක් ඉදිකිරීමට ද තීරණය විය. යෝඹුවැල්තැන්න, ලවැල්ලගොල්ල, මකුණගහපිටිය, හපුගහපිටිය, කලගන්වත්ත ඇතුළු ප්‍රදේශයේ සියලුම ප්‍රජා ජල ව්‍යාපෘති ජනතා අවශ්‍යතාවය අනුව සම්පූර්ණ කීරිමට ද තීරණය විය.

    වලපනේ ජල පිරිපහදුව වැඩිදියුණු කිරීමට තීරණය කෙරිණ. දඩකැලේ, වැලිතුඩුව, පරගහලන්ද, කිරිවඩුන්න, මූකලන්, උඩකන්ද, ඇතුළු ප්‍රදේශයේ තවත් වැව් රැසක ප්‍රතිසංස්කරණ කඩිනම් කරන්නැයිද දැනුම් දුන්නේය.

    ප්‍රදේශයේ විදුහල්වල ගුරු හිඟය සම්පූර්ණ කළයුතුය. කලගන්වත්ත නවෝද්‍යා ද්විතියක පාසල, අරුණෝදය හින්දු විදුහල, රන්කෙළඹූව මහා විදුහල, උඩමාදුර ශ්‍රී විද්‍යා ප්‍රදීප ද්විතික විද්‍යාලය ඇතුළු ප්‍රදේශයේ පාසල් රැසක යටිතල පහසුකම් සංවර්ධනයට ද තීරණය කෙරිණ.

    මඩුල්ල ද්විතික පාසල ජාතික පාසලක් බවට උසස් කිරීමට තීරණය විය.

    ග්‍රාමීය ක්‍රීඩාපිටි සංවර්ධන වැඩසටහන යටතේ ප්‍රාදේශීය ලේකම් කොට්ඨාසයකට එකක් බැගින් ක්‍රී පිටි සංවර්ධනයට ද උපදෙස් දෙනු ලැබිණ.

    විහාරස්ථානවල පවත්වාගෙන යන  දහම්පාසල් 12ක යටිතල පහසුකම් සංවර්ධනයට ද මූල්‍ය ප්‍රතිපාදන වෙන් කෙරිණ. මධ්‍යම පළාතේ පිරිවෙන්වල භෞතික අවශ්‍යතා සම්පූර්ණ කර දෙන ලෙස භික්ෂූන් වහන්සේ කළ ඉල්ලීමට ජනාධිපතිතුමා එකඟතාව පළ කළේය.

    ග්‍රාම නිලධාරී වසම් 13ක පවතින ඉඩම් ගැටළු “ගම සමග පිළිසඳර” වැඩසටනේදී හඳුනා ගැනිණ. එම සියලු ගැටළු නිරාකරණය කොට ඔප්පු ප්‍රදානයට වහාම පියවර ගන්නයි ජනාධිපතිතුමා උපදෙස් දුන්නේය.

    වන අලි ගැටළුට විසඳුම් ලෙස ප්‍රදේශයේ ඉදිකර ඇති සියලු අලි වැට ප්‍රතිසංස්කරණ කිරීමට ද තීරණය කෙරිණ.

    දිස්ත්‍රිකික්යේ ඇති ෆයිනස්, ටර්පන්ටයින් පරිසරයට හානියක් බව ජනතාව පෙන්වා දෙනු ලැබිණ. එම වගා ඉවත් කොට දේශීය වන වගා ප්‍රචලිත කරන ලෙස ජනාධිපතිතුමා පරිසර බලධාරීන්ට උපදෙස් දුන්නේය.

    ( ඡායාරූප : ජිවන්  චන්දිමාල්, ශාමික වක්වැල්ල, උපුල් නිලංග – ජනාධිපති මාධ්ය අංශය )

  • මාස 6කට පෙර පාරට වැටුණු කළුගල ජීවිත 15ක් බිලිගනී – වගකීම කාගේද ?

    මාස 6කට පෙර පාරට වැටුණු කළුගල ජීවිත 15ක් බිලිගනී – වගකීම කාගේද ?

    ලුණුගල සිට කොළඹ බලා ධාවනය වූ පුද්ගලික බස්රථයක් අද (20) දින අළුයම කාලයේදී මොනරාගල – බදුල්ල මාර්ගයේ 13 කණුව ප්‍රදේශයේ දී ප්‍රපාතයකට පෙරළීමෙන් පුද්ගලයින් 15 දෙනකු මියගොස් තවත් 32ක් තුවාල ලබ ඇතැයි පස්සර පොලිසිය සදහන් කළා. මිය ගිය අය අතර කාන්තාවන් 6 දෙනකු ද සිටිනවා.

    අනතුර සිදුවන අවස්ථාවේ බස් රථයේ මගීන් 50 දෙනකු පමණ ගමන් කරමින් සිටි බවයි පස්සර පොලිසිය කියන්නේ.

    මෑත අතීතයේදී මෙරටින් වාර්තා වූ බිහිසුණුම මාර්ග අනතුර මෙය වෙනවා.

    මෙම අනතුර සම්බන්ධයෙන් අදහස් දක්වන ප්‍රදේශවාසීන් කියන්නේ ලුණුගල- බදුල්ල මාර්ගයේ බස් රථ අනතුරට හේතුව මීට මාස 6කට පෙර එම මාර්ගයට  කඩා වැටුණු කළු ගලක් බවත් එම නිසා මාර්ගය එක් මංතීරුවක් වැසි ගිය බවයි. මෙම කළු ගල ඉවත් කරන ලෙස අදාළ ආයතනවලට දැනුම් දුන්නත් වගකිවයුතු ආයතන සිය වගකීම ඉටු නොකිරීම මෙම අනතුරට මූලික අනතුර බව ද ප්‍රදේශවාසීන් කියනවා.

    ‘මේ කලුගල ඉවත්කර මාර්ගය යළි සකස්කර දෙන මෙන් අපි පසුගිය කාලය පුරාම බලධාරීන්ගෙන් ඉල්ලා සිටියා. ඒත් ඔවුන් ඒ ගැන කිසිම සැලකිල්ලක් යොමු කළේ නැහැ. මොනරාගල – බදුල්ල පාර කියන්නේ මේ රටේ ප්‍රධාන මාර්ගයක්. දිනපතා වාහන දහස් ගණනයක් ගමන් කරන කදුකර මාර්ගයක්. ඒත් බලධාරීන් මේ කිසිවක් ගැන තැකීමක් කළේ නැහැ. මේ අනතුරේ වගකීම ඔවුන් භාරගත යුතුයි‘ ප්‍ර දේශවාසීන් කිහිප දෙනකුම මේ වාර්තාකරු සමග කීවා.

    එක් මංතිරුවක් වසාගෙන තිබු එම කළු ගල පසුකර ඉදිරියට ආ ලොරි රථයකට ඉඩ දීමට යාමේ දි මෙම අනතර සිදුවන අයුරු ඒ අසල තිබූ ආරක්ෂක කැමරාකව සටහන් වී තිබෙනවා. ඉදිරියෙන් පැමිණෙන ලොරි රථයට ඉඩදීමට යාමේදි එකවර බසට  අඩි 350ක් පමණ ප්‍රපාතයට පෙරළි ගොස් ඇති බවයි පස්සර පොලිසිය කියන්නේ.

    අනතුරින් බස් රථය සුන්බුන් ගොඩක් බවට පත්ව ඇති අතර එම සුන්බුන් ගොඩට යටවී සිටි තුවාලකරුවන්  ඉන් ඉවත් කර ගැනීමට බූම් රථයක සහය ගැනීමට පොලිසියට සිදු වූ අතර ඒ සදහා පැය තුනක් පමණ ගත වුණා.

    තුවාලකරුවන් ගොඩ ගනිද්දි එකවරම විශාල ගලක් පෙරළීම නිසා එක් අයකුට තුවා ලබා තිබෙනවා.

  • නෙළුම්පොකුණ අභියස දැවැන්ත සිතුවම ඉවත් කිරීම: සමාජමාධ්‍ය ගිනිගනී

    නෙළුම්පොකුණ අභියස දැවැන්ත සිතුවම ඉවත් කිරීම: සමාජමාධ්‍ය ගිනිගනී

    දේශගුණ විපර්යාසන්ට එරෙහිව පියවර ගැනීමේ දිනයට සමගාමීව කොළඹදී පැවැත්වීමට නියමිත තිබු මහජනතාව දැනුවත් කිරීමේ වැඩපිළිවෙලක් සඳහා පරිසර සංවිධාන කිහිපයක් විසින් නෙළුම් පොකුණ රගහල ඉදිරිපිට නිර්මාණය කළ උසින් අඩි 20 ක් හා දිගින් අඩි 70ක් වන විශාල සිතුවම අද (මාර්තු 19) දෙවරක් ඉවත් කිරීමට බලධාරීන් පියවර ගැනීම සමග සමාජමාධ්‍ය තුළ බලවත් කැළඹීමක් ඇතිවී තිබෙනවා.

    සිතුවම

    නෙළුම්පොකුණ ඉදිරිපිට තාවකාලික අට්ටාලයක් මත ප්‍රදර්ශනය කළ මෙම විශාල සිතුවම අද (19) උදෑසන කොළඹ නගර සභා සේවකයින් පිරිසක් විසින් මුල් වරට ඉවත් කිරීමට පියවර ගත්තා. නගර සභා සේවකයින්ගේ මෙම පියවරට විරෝධය පා සංවිධායකයින් කියා සිටියේ එය නගර සභා අවසරය මත ඉදි කර ඇති බවයි. ඒ අනුව යළිත් නගර සභා සේවකයින් විසින් ම එය සවි කිරීමට පියවර ගත්තා.

    නගරසභාව දැනුවත් කළ ලිපිය
    ,නගරසභාව දැනුවත් කළ ලිපිය

    නමුත් එයින් පැය ගණනකට පසු පොලිසියේ පරිසර ඒකකය විසින් එම විශාල සිතුවම නැවතත් ඉවත් කිරීමට පියවර ගත් බවට සංවිධායකයෝ චෝදනා කරනවා.

    “අපි මේ සඳහා කොළඹ නගර සභාවෙන් අවසර අරගෙනයි තිබුණේ. අපි මේ පිළිබඳව පොලීසියත් දැනුවත් කර තිබුණේ. පොලිසියෙන් අපිට කිව්වේ PHI ගෙන් අවසර ගන්න කියලා හවස තියෙන දැනුවත් කිරීමේ වැඩසටහනට. නගරසභාවට අපි මේ සිතුවම ගැන දැනුවත් කරලයි තිබුණේ. එත් අපි මේ සිතුවම ඊයේ රෑ දැම්මට පස්සේ අද උදේ ඇවිත් ඒක ගලවන්න කිව්වා,” ප්‍රදර්ශනය සංවිධානය කළ කණ්ඩායමේ අනන්‍යතාව හෙළි කිරීමට අකමැති ක්‍රියාකාරිනියක් මාධ්‍ය වෙත ප්‍රකාශ කළා.

    “ඒක ඔවුන් ගලවා රැගෙන යන්න යනකොට අපි ඒ සිතුවම උඩ ඉඳගෙන ඒක ගෙනියන්න දුන්නේ නෑ. අපි ළඟ තව චිත්‍ර හා කලා නිර්මාණ තියෙනවා ප්‍රදර්ශනයට ඒත් ඒ අය අපිට ඒ කිසිදෙයක් පාර්ක් එක ඇතුළට ගෙනියන්න දෙන්නේ නෑ. මේ ළමයින්ගේ ශ්‍රමය මේ ළමයි සතියක් පුරා ඇඳපු චිත්‍ර මෙතන තියෙන්නේ.”

    සිතුවම රැකගැනීමට එය උඩ වාඩිවී
    සිතුවම රැකගැනීමට එය උඩ වාඩිවී සිටින ක්‍රියාකාරිනියන් දෙදෙනෙක‍

    මේ අතර මෙම සිදුවීම සමාජ මධ්‍යයේ දැඩි ලෙස විවේචනයට ලක්ව තිබෙනවා. එක් සමාජ ක්‍රියාකාරිනියක තම මුහුණු පොතේ සටහනක් තබමින් පවසා තිබුණේ “විහාර මහාදේවී උද්‍යානයේ පරිසර සංහාරය සම්බන්ධයෙන් ළමා එකමුතු කිහිපයක් අඳින ලද මියුරල් චිත්‍රය ඉවත් කිරීමට ජනාධිපති කාර්‍යාලයෙන් යැයි කියා ගන්නා පිරිසක් නියෝග කොට ඇත. පරිසර සංහාරයට එරෙහිව දරුවන් මර්දනය හෙළා දකිමු!” යනුවෙනි.

    පංචාලි පනාපිටිය මුහුණුපොතේ තැබූ සටහන

    මේ සිදුවීම සම්බන්ධයෙන් අදහස් දක්වන පිරිස් පවසන්නේ මීට වසරකට පමණ පෙර රටවටා බිත්ති මත සිතුවම් නිර්මාණයට අනුබල දුන් ආණ්ඩුවක් අද මෙවැනි පියවරක් ගැනීම ගැන තමන් විමතියට පත් නොවන බවයි.

    ‘මේක තමයි ලංකාවේ දේශපාලනයේ නියම ස්වභාවය. තමන්ගේ න්‍යාය පත්‍රයට සිදුවන ඕනෑ දෙයක් දේශප්‍රේමි වන විට තමන්ට විරුද්ධ මත මර්ධනය කිරීමට ඔවුන් දෙවරක් හිතන්නේ නැහැ. මේ වන විට පරිසරය ගැන කතා කිරීම ආණ්ඩුවට දරා ගන්න බැහැ‘ යැයි තරුණ සමාජ ක්‍රියාකාරිකයෙකු වන කඩවත රොෂාන් රණවීර කියා සිටියා.

  • AstraZeneca එන්නත ගැන අර්බුදය: අලුත්ම තත්ත්වය කුමක් ද ?

    AstraZeneca එන්නත ගැන අර්බුදය: අලුත්ම තත්ත්වය කුමක් ද ?

    කොවිඩ්-19 මැඩලීමට භාවිත කරනු ලබන ඇස්ට්‍රා සෙනෙකා (AstraZeneca) එන්නත දීමෙන් අනතුරුව රුධිරය කැටි ගැසීමක් සිදුනොවන බව එක්සත් රාජධානියේ සහ යුරෝපා හවුලේ නියාමකයන් විසින් ප්‍රකාශයට පත්කරනු ලැබ ඇත. එම නිගමනයට පැමිණ තිබෙන්නේ ”ප්‍රවේශම්කාරී යළි අධීක්ෂණයකින්” අනතුරුවය.

    රටවල් කීපයක් විසින් ඇස්ට්‍රා සෙනෙකා (AstraZeneca) එන්නත දීම නතරකර ඇති නමුත් එය නොතකා එන්නත කෙරෙහි විශ්වාසය තබමින් එය ලබාගනිමින් එහි ප්‍රතිලාභ ලබාගත යුතුව ඇති බව බ්‍රිතාන්‍ය ඖෂධ සහ සෞඛ්‍ය සංරක්ෂණ ආයතනය(MHRA) සහ යුරෝපා ඖෂධ අධිකාරිය(EMA) පවසති.

    එහෙත් එන්නත ලබාගැනීමෙන් අනතුරුව දවස් හතරකට වැඩි කාලයක් නොකඩවා හිසරදයෙන් පෙළෙන්නේ නම් එවැනි පුද්ගලයන් පූර්වාරක්ෂක පියවරක් වශයෙන් වෛද්‍ය උපදෙස් ලබාගත යුතු බවත් එම ආයතන මහජනතාවට දැනුම්දෙති.

    එපමණක් නොව, එන්නත ලබාගැනීමෙන් පසු සිරුරේ සමෙහි යම්කිසි තැල්මක් වැනි වෙනසක් පෙනෙන්නේ නම් ඔවුන් ද වෛද්‍ය උපදෙස් ලබාගත යුතුව ඇතැයි එම උපදෙස් මගින් කියැවෙයි.

    එවැනි උපදෙස් දීමක් සිදුකරනු ලැබ තිබෙන්නේ එන්නත ලබාගැනීමෙන් පසු, ඉතා දුර්ලභව සිදුවන මොළයේ රුධිර කැටිගැසීම් සම්බන්ධයෙන් වාර්තාවීමෙන් පසුවය. එහෙත් එවැනි වාර්තා ලැබී ඇත්තේ අතිශයින් ස්වල්ප සංඛ්‍යාවකි.

    යුරෝපා රටවල් කීපයක් එන්නත භාවිතය නතරකරන ලද්දේ එවැනි වාර්තා කීපයක් ලැබීමෙන් පසුවය.

    එක්සත් රාජධානියේ එක්කෝටි දශ ලක්ෂයක් (මිලියන 11) පමණ ජනතාවට එම එන්නත ලබාදී ඇති අතර මොළයේ නහරවල රුධිරය කැටිගැසීම් (CSVT) වාර්තාවී තිබෙන්නේ පහක් පමණි. වයස අවරුදු 19-59 අතර පස්දෙනකු එවැනි තත්ත්වයකට පත්ව තිබුණි. එය මරණීය තත්ත්වයකට බලපා තිබුණේ එක් අයෙකුට පමණි.

    එහෙත් යුරෝපා ඖෂධ අධිකාරියට (EMA) එවැනි සිද්ධීන් 13ක් වාර්තා වී ඇත.

    මොළයේ නහරවල රුධිරය කැටිගැසීම් (CSVT) ස්වභාවිකව සිදුවිය හැකි අතර එම තත්ත්වය සහ එන්නත භාවිතය අතර සම්බන්ධයක් ඇතැයි තහවුරු වී නැත. එම රෝගීන්, රුධිරය කැටි ගැසීම කෙරෙහි හේතුවන රුධිර පට්ටිකා සංඛ්‍යාව පහළ මට්ටමක පැවති අය වූහ.

    එන්නත නිසා නොව, කොවිඩ්-19 වෛරසය ආසදනයවීම රුධිරය කැටිගැසීම අතින් ඊට වඩා ප්‍රබල හේතුවක් විය හැකිය.

    එන්නත

    ලැබෙන තොරතුරු සහ පවතින තත්ත්වය සම්බන්ධයෙන් නියාමකයන් දැඩි අධීක්‍ෂණයෙන් පසුවෙන අතර මහජනතාව තම වාරය පැමිණිවිට එන්නත ලබාගත යුතුව ඇතැයි එක්සත් රාජධානියේ ඖෂධ සහ සෞඛ්‍ය සංරක්ෂණ ආයතනයේ (MHRA) ප්‍රධාන විධායක වෛද්‍ය ජූන් රයිනි (Dr June Raine) ප්‍රකාශ කළාය.

    ”මහජනතාවට අප විසින් සිදුකරනු ලබන ඉතා දැඩි අධීක්ෂණය සම්බන්ධයෙන් පූර්ණ විශ්වාසය තබන්න පුළුවන්” වෛද්‍යවරිය පවසන්නීය.

    එන්නත ලබාගැනීමෙන් අත්වෙන වාසි ඉතා පැහැදිලි යයි මානවීය ඖෂධ කොමිෂන් සභාවේ සභාපති මහාචාර්ය ශ්‍රීමත් මුනිර් පිර්මොහොමඩ්(Prof Sir Munir Pirmohamed) පෙන්වා දෙයි.

    ”අතුරු ආබාධ ගැන ලැබෙන වාර්තා අතිශයින් දුර්ලභයි. මෙම එන්නත ලබාගැනීම නිසා අත්වෙන ප්‍රතිලාභ පැත්තෙන් බැලුවොත් කොරෝනා වසංගතයට ගොදුරුවීම නිසා රෝහල්ගත කෙරෙන සහ එමගින් සිදුවෙන මරණ සංඛ්‍යාව 80%කින් පහත වැටී ඇති බව අලුත්ම සංඛ්‍යාලේඛන මගින් පෙන්වා දෙනවා. සිදුවිය හැකි අනතුරු ඉතාම දුලබයි” මහාචාර්ය පිර්මොහොමඩ් පවසයි.

    පවතින තත්ත්වය සැලකිල්ලට ගනිමින් දුර්ලභ රුධිර කැටිගැසීම් අදාළ තොරතුරු ඇතුළත් කරමින් එන්නතේ නව නිෂ්පාදන යාවත්කාලීන කෙරෙනු ඇත.

    ”ඇතිවිය හැකි දුර්ලභ තත්ත්වයන් පිළිබඳව අවධානය ආකර්ෂණය කරගනිමින් සෞඛ්‍ය අංශයේ වෘත්තිකයන් මෙන්ම එන්නත ලබාගත් පුද්ගලයන්ට තොරතුරු සැපයීම, මුහුණදීමට සිදුවිය හැකි අතුරු ආබාධ අවමකර ගැනීමට උදව්වක්” වනු ඇතැයි යුරෝපා ඖෂධ අධිකාරියේ විධායක අධ්‍යක්‍ෂ එමර් කූක් (Emer Cooke) පැවසීය.

    යුරෝපා ඖෂධ අධිකාරියේ (EMA) නිගමනය, එන්නත ලබාගත් කෝටි දෙකක් (මිලියන 20) පමණ ජනයාගේ තොරතුරු මත පදනම් වෙයි.

    දැනට එළැඹ ඇති නිගමන මෙසේය;

    • එන්නත ලබාගැනීම නිසා අත්වෙන ප්‍රතිලාභ සමඟ බලනවිට එමගින් ඇතිවිය හැකි අතුරු ආබාධවලට සාපේක්ෂව තවමත් මහා පරිමාණයෙන් පැතිරයමින් පවතින කොවිඩ්-19 වෛරසය නිසා රුධිරය කැටිගැසීමට සහ ඇතැම්විට මරණයට පවා හේතුවෙන අනතුර වඩාත් බරපතල වෙයි.
    • එන්නත ලබාගත් පුද්ගලයන්ගේ රුධිරය කැටිගැසීමේ සමස්ත අනතුරෙහි වැඩිවීමත් සමඟ එම එන්නතෙහි සම්බන්ධයක් නොමැත.
    • එන්නතේ සුවිශේෂී කාණ්ඩ සම්බන්ධයෙන් හෝ විශේෂ නිෂ්පාදන ආයතනයක් සම්බන්ධයෙන් ප්‍රශ්න ඇති බවට සාක්ෂි නැත.
    • මොළයේ සහ රුධිර නාලිකාවන්හි අතිශයින් දුර්ලභ ලේ කැටි ගැසීම් සමඟ ඇතැම්විට එන්නතෙහි සම්බන්ධයක් තිබීමට ඉඩකඩ ඇත.

    එන්නත ලබාගැනීමෙන් අනතුරුව පහත දැක්වෙන ලක්ෂණ අතරින් කිසිවක් වේනම්, පූර්ව ආරක්ෂණ පියවරක් වශයෙන් වහාම වෛද්‍ය පරීක්ෂණයකට භාජනය වියයුතු බවට උපදෙස් දීමක් ද සිදුකරනු ලැබ ඇත.

    • හුස්ම ගැනීමේ අපහසුතා.
    • පපුවේ හෝ උදරයේ වේදනා.
    • අතක හෝ පාදයක ඉදිමීමක් හෝ සීතලවීමක්.
    • එන්නත ගැනීමෙන් පසු දරුණු අතට හැරෙමින් පවතින හිසරදයක් හෝ පෙනීමේ අපැහැදිලිතාවක් වේනම්.
    • නොකඩවා රුධිරය වහනයවීමක්.
    • සමේ ස්ථාන කීපයක තැලීම් වැනි ලකුණු හෝ දම් හෝ රතු පැහැති ලප හෝ සම අභ්‍යන්තරයෙහි රුධිර බිබිලි පෙනෙන්නේනම්.

    ඒවා ඉතාම කලාතුරකින් සිදුවෙන එසේම ඕනෑම එන්නතක් ලබාගැනීමෙන් පසු ඇතිවිය හැකි දුර්ලභ අතුරු ආබාධ වෙති.

    එන්නත
    BBC SANDESAYA
  • නිරෝගී – සුන්දර කෙස් කළඹක සුපිරි රහස්

    නිරෝගී – සුන්දර කෙස් කළඹක සුපිරි රහස්

    හිසකෙස් කියන්නෙ ඔබේ පෞරුෂය ගොඩනගන ප්‍රධාන අංගයක්. ඉතිං මේ හිසකෙස් ගැලවී යාම වර්තමානය වන විට ගැහැණු පිරිමි භේදයකින් තොරව මුහුණ දෙන්න වෙන ප්‍රශ්නයක්. එය මානසිකව ඹබට බොහෝ බලපෑම් කරනවා.

    නිරෝගී පුද්ගලයෙකුගේ දිනකට කෙස්ගස් 80 ත් 100 ත් අතර ගැලවී යාම සාමන්‍ය කරුණක් .මේ නිසා හිසකෙස් කීපයක් දිනකට ගැලවී යනවිට ඔබ කලබල විය යුතු නැහැ. නියමිත ප්‍රමාණයටත් වඩා ඔබේ හිසකෙස් ගැලවී යන බව ඔබට දැනෙනවා නම් රූපලාවන්‍ය උපදෙස් ලබ ගැනීම වැදගත්.

    ඒ වගේම ඔබේ හිසකෙස් මසකට වැවෙන්නේ සෙන්ටිමීරයක් හෝ දෙකක් අතර ප්‍රමාණයක් බව විශේෂඥයන් දක්වනවා.ඒ නිසා ඔබේ හිසකෙස් වර්ධන වේගය අඩු බව සිතා කනස්සලු වීම කළ යුතු නැහැ.

    කෙසේ නමුත් මේ විදියට අකලට හිසකෙස් ගැලවී යාමට හේතු රාශියක් බලපානවා. ඒ සදහා බලපාන හේතු වගේම නිවසේදීම ඔබට කල හැකි ප්‍රතිකාර කීපයකුත් අද අපි ඔබට ගෙන එනවා.

    අපි පළමුවෙන්ම බලමු හිසකෙස් ගැලවී යාමට හේතු

    • පෝෂණ ඌණතා / විටමින් සහ ඛණිජ ලවණ වල හිගකම
    • ශරීරයේ පවතින ඇතැම් රෝගාබාධ තත්වයන්
    • අයහපත් ආහාර පුරුදු
    • මානසික අවපීඩනය
    • ඇතැම් ජානමය හේතු
    • දැනටමත් ඔබ භාවිතා කරන ඇතැම් ඹෟෂධ නිසා
    • හිසකෙස් අලංකරණයේදී භාවිතා කරන විවිධ රසායන ද්‍රව්‍ය
    • හිසකෙස් සත්කාර නිසි පරිදි නොකිරීම
    • හිසකෙස් අධික හිරු රශ්මියට නිරාවරණය වීම
    • දවසේ වැඩි වෙලාවක් වායු සමිකරණ වලට හිසකෙස් නිරාවරණය
    • නිතර නිතර හෙයා ස්ප්‍රේ භාවිතය
    • හිසකෙස් අලංකරණයට භාවිතා කරන ප්‍රමිතියකින් තොර නිෂ්පාදන නිසා
    • ප්‍රමිතියකින් තොර ෂැම්පු සහ හිසකෙස් සේදුම්කාරක නිසා

    මෙවැනි වැරදි නිසා දැනටමත් පලුදු වූ ඔබේ හිසකෙස් සදහා ගෙදරදීම කර ගත හැකි සත්කාර කීපයක් පහතින් දැකිවෙනවා. ඔබේ කැමැත්ත පරිදි ඒ සත්කාර ඔබටත් නිවසේදීම අත්හදා බැලිය හැකියි.

    • සතියකට වරක් ඔලිව් තෙල් හෝ සුදු පොල්තෙල් වලට විටමින් E කරලක් එක් කොට උණුසුම් ජල බදුනක් මත තබා රත්කර එය හිස්කබල හා හිසකෙස් මත ආලේප කර හොදින් සම්බාහනය කර උණුසුම් තුවායකින් ඔබේ හිසකෙස් ඔතා තබන්න. විනාඩි 20 කින් 30 කින් පමණ ඇල් ජලයෙන් සෝදා ඉවත් කරන්න
    • බී ලූණු ගෙඩියක්  සිහින්ව කපා බ්ලෙන්ඩ් කර රෙදි කඩකින් පෙරා යුෂ වෙන් කර ගන්න. එම යුෂවලට ඔලිව් ඔයිල් එකතු කරන්න.හිස්කබල මත ආලේප කර හොදින් සම්බාහනය කරන්න. විනාඩි 20 කින් සෝදා ඉවත්කරන්න
    • පිරිසිදු සුදු පොල්තෙල් කෝප්ප එකකට කරපිංචා ඉති හත අටක කොල සෝදා වේලා ගෙන පොල්තෙල් සමග රත්කර හිස්කබලේ සහ හිසකෙස්මත ආලේප කර සම්බාහනය කරන්න.පැයකට පසු ඇල් ජලයෙන් සෝදා හරින්න

    මීට අමතරව විශේෂයෙන්ම සැලකිය යුතු කරුණු කිපයක් පිළිබද ඔබේ අවධානය යොමු කල යුතු යි.

    • හිසකෙස් සදහා භාවිතා කරන නිෂ්පාදන ඉතා ගුණාත්මක හා ප්‍රතිඵලදායී ඒවා විය යුතු යි.හිසකෙස් අලංකරණ නිෂ්පපාදන වගේම හිසකෙස් පිරිසිදු කරන නිෂ්පාදන වුවත් ලොව පිළිගත් වෙළදනාම යටතේ එන උදාහරණ වශයෙන් LOREAL , WELLA , TRESEMME වශයෙන් රාශියක් තිබුණද ඒවා ඔබේ හිසකෙස් සදහා සුදුසුද යන්න නිවැරදිව අවබෝධ කරගෙන භාවිතා කිරීම වැදගත්. ඒ පිළිබද ඔබේ රූපලාවන්‍ය ශල්පියාගෙන් හෝ ශිල්පිනියගෙන් උපදෙස් ලබා ගැනීම වැදගත්.
    • ඔබේ කෙස් වර්ගයට ගැලපෙන ෂැම්පු කන්ඩිෂනර් තෝරා ගන්න.උදාහරණ වශයෙන් ඔබට තියෙන්නේ ස්ට්‍රේටින් කොණ්ඩයක් නම් ඒ සදහාම විශේෂිත ෂැම්පු සහ කන්ඩිෂනර් ඔබ විසින් තෝරාගත යුතුයි.
    • කිසිම විටක අනුකරණ වලට (fake නිෂ්පාදන) රැවටෙන්න එපා. ඔබට අවශ්‍ය ප්‍රතිඵල එවැනි නිෂ්පාදන වලින් ලබා ගන්න නොහැකියි.
    • නිතර හිසකෙස් සේදීම අවශ්‍ය වුනත් ඒ සදහා සෝදන හැම වාරයකම ෂැම්පු භාවිතා කිරීම කරන්න එපා. එමගින් ඔබේ හිස්කෙස් වගේම හිස්කබලත් වියලි ස්වභාවයක් ගන්නවා.හිස පිරිසිදු කරන හැමවිටම හිස්කබලේ අගල් 2ක් පමණ පහල සිට කන්ඩිෂනර් ගල්වන්න පුලුවන්.
    • මසකට වරක්වත් රූපලාවන්‍යාගාරයකට ගොස් තෙල් සත්කාරයක් හෝ hair treatment, protein treatment හිසකෙස් සදහාම ලොව පිළිගත් වෙළද නාමයන්ගෙන් නිෂ්පාදිත නිෂ්පාදන වලින් ඹබට ගැලපෙන සත්කාරයක් නිවසට වඩා හොදින් ඵලදායීව කරගනීමේ හැකියාව ලැබෙනවා. සම්බාහනය කිරීම සහ steam කිරීම මගින් වඩාත් හොද ප්‍රතිඵල ලබා ගත හැකියි. 

    සටහන – මධුභාෂිණී උරේෂා

    රූපලාවණ්‍ය උපදෙස් –  ප්‍රවීණ රූපලාවණ්‍යශිල්පිනී අනූදා දහනායක – Salon AKROO – Malabe

  • පරාර්ථකාමීත්වය තුළින් සමාජයට බලපෑම් කළ කීර්තිමත් පුද්ගලයන් 10 දෙනෙක්

    පරාර්ථකාමීත්වය තුළින් සමාජයට බලපෑම් කළ කීර්තිමත් පුද්ගලයන් 10 දෙනෙක්

    ජනප්‍රිය පුද්ගලයින් තමන් කරන දේ කරන්නේ ඔවුන්ගේ සාර්ථකත්වය සමඟ ලැබෙන කීර්තිය හා වාසනාව සඳහා යැයි අපි සිතමු. නමුත් යථාර්ථය නම්, බොහෝ ප්‍රසිද්ධ පුද්ගලයින් හඳුනාගෙන ඇත්තේ මන්දිර සහ සුඛෝපභෝගී මෝටර් රථ සඳහා මුදල් වියදම් කරනවාට වඩා ජීවිතයට වැඩි යමක් ඇති බවයි. 

    ඔවුන්ගෙන් බොහෝ දෙනෙක් තම ධනය හා බලපෑම ලෝකය වඩා හොඳ තැනක් බවට පත් කිරීම සඳහා භාවිතා කරති. සමහරුන්ට, ඔවුන් පැමිණියේ කොහෙන්දැයි ඔවුන්ට කිසිදා අමතක වී නැත, එබැවින් ඔවුන් තම ප්‍රජාවන්ට තම සහාය ආපසු ලබා දීමෙන් බොහෝ සතුටක් ලබයි. අනෙක් අයට, පිළිකා පර්යේෂණ වැනි දේ සදහා ඔවුන් පෞද්ගලිකව බලපෑම් කරති., ආධාර කරති. 

    එය මනසේ තබා ගනිමින්, පරිත්‍යාගශීලීන්ට ප්‍රමුඛස්ථානයක් ලබා දුන් කැපී පෙනෙන පුද්ගලයන් 10 දෙනෙක් මෙන්න. 

    1. ලෙබ්‍රොන් ජේම්ස් Lebron James

    ඩොලර් මිලියන 500 ක ඇස්තමේන්තුගත ශුද්ධ වත්කමක් ඇති ලෙබ්‍රොන් ජේම්ස් මේ වන විටත් ධනවත්ම පැසිපන්දු ක්‍රීඩකයෙකි.  ඔහුගේ බැංකු ගිණුමේ ටොන් ගණනක් මුදල් ඇති අතර, අන් අයට උදව් කිරීමේදී ඔහු අතිශයින් ත්‍යාගශීලී ය. ලෙබ්‍රොන් ජේම්ස් ෆැමිලි ෆවුන්ඩේෂන් Lebron James Family Foundation හරහා ජේම්ස් පාසල් වැඩසටහන් සඳහා ඩොලර් මිලියන 40 කට අධික මුදලක් රැස් කර ගෙන තිබේ. වරප්‍රසාද නොලත් අයට විශ්ව විද්‍යාල ශිෂ්‍යත්ව ලබා දීම සඳහා තවත් ඩොලර් මිලියන 40 ක් පරිත්‍යාග කිරීමට ඔහු පොරොන්දු වී තිබේ. ළමා ආරක්ෂක අරමුදල The Children’s Defense Fund සහ ඇමරිකාවේ පිරිමි හා බාලිකා සමාජය Boys and Girls Club of America යනු ජේම්ස් මිලියන ගණනක් පරිත්‍යාග කළ පුණ්‍යායතන දෙකකි. 

    ලෙබ්‍රන් ජේම්ස් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    2. කීනු රීව්ස්   Keanu Reeves 

    කීනුගේ වෘත්තිය දීප්තිමත් තීරණ (ද මැට්‍රික්ස්, ස්පීඩ්, ජෝන් වික්) සහ තවත් ප්‍රශ්නකාරී ඇමතුම් (ජොනී මෙනෙමොනික්) සමඟ මිශ්‍ර වී ඇති අතර, ඔහුගේ සමානතාවය හේතුවෙන් ඔහු කැපවූ අනුගාමිකයෙකු බවට පත්ව ඇති බවට සැකයක් නැත. ඔහු හමුවන්නේ සාමාන්‍ය, භූගත මිනිහෙක් මිස නරක් වූ මිනිසෙක් ලෙස නොවේ. 

    ඔහු ළමා රෝහල්වලට උපකාර වන පෞද්ගලික පිළිකා පර්යේෂණ පදනමක් නිර්මාණය කර තිබේ. ඊට අමතරව, ද මැට්‍රික්ස්  The Matrix හි බොක්ස් ඔෆිස් ලාභයෙන් තමාට ලැබෙන ප්‍රතිශතය පිළිබඳව සාකච්ඡා කරන විට, ඔහු ඉල්ලා සිටියේ එම චිත්‍රපට එතරම් සාර්ථක කර ඇත්තේ විශේෂ ප්‍රයෝග සහ ඇඳුම් නිර්මාණ කණ්ඩායම් බව තමාට හැඟෙන හෙයින් ඔවුන් හට එම මුදල් ලබා දෙන ලෙසයි. 

    කීනු රීව්ස් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    3. ඩොලි පාර්ටන් Dolly Parton

    තම දෙමව්පියන් සහ සහෝදර සහෝදරියන් 11 දෙනා සමඟ එක් කාමරයක (ටෙනසි ​​කැබින් එකක) හැදී වැඩුණු ජනප්‍රිය ගායකාවක වන ඩොලි පාර්ටන්ගේ ජීවිත කතාව අව්‍යාජ ය. ලාභ නොලබන ඩොලිවුඩ් පදනමේ ‘පරිකල්පන පුස්තකාලය‘ Imagination Library නමින් හැඳින්වෙන ව්‍යාපෘතිය හරහා ඇය ලොව පුරා දරුවන්ට පොත් යවයි. ඇයගේ පදනම මගින් ශිෂ්‍ය ශිෂ්‍යාවන් සහ වෙනත් ආකාරයේ මූල්‍ය ආධාර වඩාත් අවශ්‍ය සිසුන්ට ලබා දේ.

    ඩොලි පාර්ටන් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    4. එමා වොට්සන් Emma Watson

    එක්සත් ජාතීන්ගේ කාන්තා සුහද තානාපතිවරියක ලෙස වොට්සන් විවිධ කාන්තා හා ගැහැණු ළමයින් සවිබල ගැන්වීමේ වැඩසටහන් ප්‍රවර්ධනය කර තිබේ. ගැහැණු ළමයින්ගේ අධ්‍යාපනය කෙරෙහි අවධානය යොමු කරන පුණ්‍යායතන සමඟ ඇය සාධාරණ වෙළඳ හා කාබනික ඇඳුම් සංගම් fair trade and organic clothing unions සඳහා ද දායක වේ. මානුෂීය කටයුතුවලට පෞද්ගලිකව සහාය වීම සඳහා ඇය තුන්වන ලෝකයේ රටවල් කිහිපයකට ගොස් ඇත.

    එමා වොට්සන් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    5. රිකී ගර්වේස් Ricky Gervais

    විනෝදාස්වාද ක්‍ෂේත්‍රයේ සත්ව අයිතිවාසිකම් ප්‍රවර්ධනය කරන්නන් අතරින් ස්වල්ප දෙනෙක් බ්‍රිතාන්‍ය විකට නළුවා / නළුවා තරම් කැපවී සිටිති. ඔහුගේ උත්සාහය වෙනුවෙන් ඔහුට සත්ව උපදේශන සම්මාන කිහිපයක් පිරිනමා ඇත.

    රිකී ගර්වාස් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    6. ලෙනාඩෝ ඩිකැප්‍රියෝ Leonardo DiCaprio

    හොඳම නළුවා වෙනුවෙන් එක් ඇකඩමි සම්මානය දිනාගත් අතර තවත් පස් දෙනෙකු සඳහා නම් කරන ලද ටයිටනික් සුපිරි තරුව, ඩිකැප්‍රියෝ, අපට සිටින දක්ෂතම නළුවන්ගෙන් කෙනෙකි.  ඔහු දේශගුණික විපර්යාසයන්ට එරෙහිව සටන් කිරීමට ද දැඩි කැමැත්තක් දක්වයි. 2010 ගණන්වලදී ඔහු ලෙනාඩෝ ඩිකැප්‍රියෝ පදනම Leonardo DiCaprio Foundation පිහිටුවා ගත් අතර එය පෘථිවියට උපකාර වන හේතු ප්‍රවර්ධනය කරයි. ඔහු වනජීවී සංරක්ෂණ වැඩසටහන් කිහිපයක් සඳහා අරමුදල් සපයන අතර පුද්ගලයන්ට සහ සංවිධානවලට පර්යේෂණ ප්‍රදාන ද ලබා දේ.

    ලෙනාඩෝ ඩිකැප්‍රියෝ | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    7. ඇෂ්ටන් කුචර් shton Kutcher

    ඔහු මිනිස් ජාවාරමට එරෙහිව සටන් කිරීම සඳහා තම කාර්යභාරය ඉටු කිරීමට කැපවී සිටී. දශකයකට ආසන්න කාලයකට පෙර ඔහු සහ ඔහුගේ හිටපු බිරිඳ ඩෙමී මුවර් විසින් ලාබ නොලබන සංවිධානයක් වන Thorn ආරම්භ කරන ලදී. මිනිස් ජාවාරම හැරුණු විට, ළමා කාමුක දර්ශන නැවැත්වීම සඳහා ගූගල්, මයික්‍රොසොෆ්ට් සහ ෆේස්බුක් ඇතුළු ලොව ප්‍රමුඛ පෙළේ තාක්ෂණික දැවැන්තයින් සමඟ හවුල් වී ඇත. 

    ඇෂ්ටන් කුචර් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    8. ඇන්ජලිනා ජොලි Angelina Jolie

    තම ලංසු තැබීම සඳහා වෙනත් පුද්ගලයින් බඳවා ගැනීමට ජොලිට නිසැකවම ප්‍රමාණවත් මුදල් ඇත, නමුත් වෙනසක් ඇති කරන ව්‍යාපෘති සඳහා පෞද්ගලිකව සම්බන්ධ වීමෙන් ආදර්ශයක් තැබීමේ වගකීමක් ඇයට දැනේ. ඇය එක්සත් ජාතීන්ගේ සරණාගතයින් පිළිබඳ මහ කොමසාරිස්වරයාගේ තානාපතිනියකි. දශක දෙකකට පෙර කාම්බෝජයේ ස්ථානයක රූගත කිරීම් අතරතුර ඇය ඊට සම්බන්ධ වීමට ප්‍රථම වරට ආභාෂය ලැබීය. අද, මැඩොක්ස් ජොලි-පිට් පදනම Maddox Jolie-Pitt Foundation (ඇය එවකට සැමියා වූ බ්‍රැඩ් පිට් සමඟ ආරම්භ කළ) දිළිඳුකමට එරෙහිව සටන් කිරීමට සහ කාම්බෝජයේ වන ජීවීන් ආරක්ෂා කිරීමට කැපවී සිටී. එය නම් කර ඇත්තේ ඔවුන්ගේ දරුකමට හදාගත් පුතාගේ උපතෙනි. 

    ඇන්ජලිනා ජොලි | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    9. ජෝර්ජ් ලූකස්  George Lucas

    ස්ටාර් වෝර්ස් හි නිර්මාතෘගේ වටිනාකම ඩොලර් බිලියන 7.6 ක් වන අතර ඔහු කේ -12 අධ්‍යාපනය සඳහා ඔහුගේ මුදල් විශාල ප්‍රමාණයක් භාවිතා කරයි. ජෝර්ජ් ලූකස් අධ්‍යාපන පදනම සිසුන්ට ඔවුන්ගේ කුසලතා වර්ධනය කර ගැනීමට සහ ඔවුන්ගේ රුචිකත්වයන් සහ නිර්මාණශීලිත්වය අවුලුවාලීමට උපකාරී වන අතර එමඟින් ඔවුන් වැඩිහිටියන් වූ පසු ඔවුන් සමාජයේ ඵලදායී සාමාජිකයන් වනු ඇත. 

    ජෝර්ජ් ලූකස් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්

    10. ජෝර්ජ් මයිකල් George Michael

    අභාවප්‍රාප්ත පොප් ගායකයා ලොස් ඇන්ජලීස් හි ලාභ නොලබන ලාභ නොලබන ප්‍රොජෙක්ට් ඒන්ජල් ෆුඩ් Project Angel Food ඇතුළු පුණ්‍ය කටයුතුවලට දැඩි ලෙස සම්බන්ධ වී ඇති අතර, සාප්පු යෑමට හෝ ආහාර පිසීමට තරම් අසනීපව සිටින අයට නොමිලේ සෞඛ්‍ය සම්පන්න ආහාර වේලක් ලබා දෙයි. ඔහු වසර ගණනාවක් තිස්සේ කරන ලද පරිත්‍යාගයන්ගෙන් ඉතා ත්‍යාගශීලී වුවද, ඔහු ඒ සියල්ල කළේ රේඩාර් යටතේ ය. ඇත්ත වශයෙන්ම, ඔහුගේ පරිත්‍යාගශීලී උත්සාහයන් බොහොමයක් හෙළි වූයේ ඔහුගේ මරණයෙන් පසුව පමණි. 

    ජෝර්ජ් මයිකල් | ඔවුන්ගේ පරිත්‍යාගශීලිත්වය තුළින් සමාජයට බලපෑම් කළ කීර්තිමත් පුද්ගලයින් 10 දෙනෙක් | සෙස්ට්‍රඩාර්
  • බංග්ලාදේශ ටෙස්ට් කණ්ඩායම අප්‍රේල් 12 ශ්‍රී ලංකාවට

    බංග්ලාදේශ ටෙස්ට් කණ්ඩායම අප්‍රේල් 12 ශ්‍රී ලංකාවට

    ලෝක ටෙස්ට් ශූරතාවලිය යටතේ පැවැත්වීමට නියමිත තරග 2 කින් සමන්විත ටෙස්ට් තරගාවලියට සහභාගිවීම සඳහා බංග්ලාදේශ ක්‍රිකට් කණ්ඩායම ලබන අප්‍රේල් මස 12 වැනිදා ශ්‍රී ලංකාවට පැමිණෙනු ඇත.

    මෙම තරගාවලිය මීට පෙර ඉකුත් 2020 වසරේ ඔක්තෝම්බර් සහ නොවැම්බර් යන මාස වලදී පැවැත්වීමට කටයුතු යොදා තිබූ නමුත්, කොවිඩ් – 19 වසංගත තත්ත්වය හේතුවෙන් එය කල් දැමීමට සිදුවිය.

    තරගාවලිය යටතේ පැවැත්වීමට නියමිත තරග 2 ම මහනුවර පල්ලකැලේ ක්‍රීඩාංගණයේදී පැවැත්වෙන අතර ඊට පෙර බංග්ලාදේශ කණ්ඩායම, ඔවුන් නොවුන් අතර වූ දෙදින පුහුණු තරගයකට අප්‍රේල් මස 17 සහ 18 යන දෙදින කටුනායක මේරියන්ස් ක්‍රිකට් ක්‍රීඩාංගණයේදී තරග වදිනු ඇත.

    දෙරට අතර පළමු ටෙස්ට් තරගය අප්‍රේල් මස 21 වැනිදා සිට 25 වැනිදා දක්වා පැවැත්වෙන අතර දෙවැනි ටෙස්ට් තරගය අප්‍රේල් 29 වැනිදා සිට මැයි 03 වැනිදා දක්වා පැවැත්වෙනු ඇත.

    FULL MATCH SCHEDULE

              DATE           MATCH           VENUE
    17th and 18th April 2021Intra-Squad Warm Up Game    CMCG – Katunayake
    21st to 25th April 202101st Test MatchPallekele International Cricket Stadium, Kandy  
    29th to 03rd May 202102nd Test MatchPallekele International Cricket Stadium, Kandy  
  • ‘ජිනීවා මානව හිමිකම් සමුළුවට’ ඉදිරිපත් කර ඇති චෝදනා දේශපාලනිකයි

    ‘ජිනීවා මානව හිමිකම් සමුළුවට’ ඉදිරිපත් කර ඇති චෝදනා දේශපාලනිකයි

    එක්සත් රාජධානිය, කැනඩාව, ජර්මනිය ඇතුළු රටවල් කිහිපයක් එක්ව ශ්‍රී ලංකාවේ මානව හිමිකම් කඩවීම පිළිබඳව ඉදිරිපත් කරන චෝදනා සත්‍ය වසන් කර දේශපාලන අරමුණක් සඳහා ගෙන ඇති ක්‍රියාමාර්ගයක් බව විදේශ අමාත්‍ය දිනේෂ් ගුණවර්ධන මහතා සඳහන් කරයි.

    ශ්‍රී ලංකාවට එරෙහිව රටවල් කීපයක් ඉදිරිපත් කර ඇති චෝදනා සම්බන්ධයෙන් එක්සත් ජාතීන්ගේ මානව හිමිකම් කවුන්සිලයේ 46 වන සැසිවාරය පැවැත්වෙන ජිනීවා හි දී 2021 මාර්තු 22 වැනි දින ඡන්ද විමසීමට නියමිතය. මේ සම්බන්ධයෙන් අද විදේශ අමාත්‍යාංශයේ දී මාධ්‍යවේදීන් නැඟූ ප්‍රශ්නයකට පිළිතුරු දෙමින් අමාත්‍යවරයා පෙන්වා දුන්නේ අපේ රටේ අභ්‍යන්තර කරුණු සම්බන්ධයෙන් චෝදනා කිරීම හෝ ඒ කරුණු සඳහා ඡන්ද විමසීම ජාත්‍යන්තරය පිළිගත් මානව හිමිකම් කවුන්සිලයක වගකීම නොවන බවයි.

    පසුගිය කාලය පුරාවට අප රටට මානව හිමිකම් චෝදනා යැයි කියමින් නොයෙක් චෝදනා ඉදිරිපත් කළා. මේ පිළිබඳව අප අවධානයෙන් යුතුව කටයුතු කර තිබෙනවා. අපේ ආණ්ඩුව පත් වූ පසු මානව හිමිකම් චෝදනා සම්බන්ධයෙන් විමර්ශනය කරන්න ජනාධිපති කොමිසමක් පත් කර තිබෙනවා.

    අතුරුදහන් වූවන් පිළිබඳ තොරතුරු කාර්යාංශය ක්‍රියාත්මක කරන්න අය-වැයෙන් මුදල් වෙන් කර දී තිබෙනවා. එවැනි සාධනීය පියවර රැසක් අනුගමනය කරමින් වත්මන් රජය කටයුතු කරද්දී ජිනීවා මානව හිමිකම් සමුළුවේ දී ඒ ගැන නොසළකා හැර නැවත නැවත අපට විවිධකාරයෙන් චෝදනා කිරීම සාධාරණ නොවන බව ද අමාත්‍යවරයා පවසා සිටියේය.

    “අපිට විරුද්ධව ඉදිරිපත් කරන අසත්‍ය චෝදනා පරාජය කරන්න අපි උත්සහා ගන්නවා. ඒ සඳහා අපට මිත්‍ර රටවල් රැසක් අප සමඟ අත්වැල් බැඳගෙන ඉන්නවා. මෙවර ඉන්දියාවත් අපේ සහයට ඉදිරිපත් වෙයි කියලා අපි විශ්වාස කරනවා”යැයි ද ගුණවර්ධන මහතා සඳහන් කළේ ය

  • ජන අරගල දේශපාලනයේ නව ආකාර

    ජන අරගල දේශපාලනයේ නව ආකාර

    ලෝක දේශගුණ විපර්යාසන්ට එරෙහිව පියවර ගැනීමේ දිනයට සමගාමීව කොළඹදී පැවැත්වීමට නියමිත තිබු මහජනතාව දැනුවත් කිරීමේ වැඩපිළිවෙලක් සඳහා පරිසර සංවිධාන කිහිපයක් විසින් කොළඹ නෙලුම් පොකුණ රඟහල ඉදිරිපිට නිර්මාණය කළ දැවැත්ත සිතුවමක් අද (මාර්තු 19) දෙවරක් ඉවත් කර තිබිණි. එම සිතුවම රැකගැනීමට එය උඩ වාඩිවී සිටින කලාකාරියන් දෙදෙනෙක් ඉහළ ඡායාරූපයේ දැක්වේ.

    අප භාග්‍යා අබේරත්න නමැති තරුණියක් ගැන මෙතෙක් කලක් දැන සිටියේ නැත. වත්මන් මොහොතේ අපගේ සමාජ විඥානය කෙරෙහි ඉතාම බරපතල බලපෑමක් කිරීමට ඇයට හැකි වනු ඇතැයි ඇය පවා දැන නොසිටින්නට ඇත. ඇය කළේ බැලූ බැල්මට කාටත් තේරෙන සරල ක්‍රියාවකි. එනම්, මෙතෙක් කලක් බොහෝ දෙනෙකු නිහඬතාව තුළ ගිල්වා තිබූ කිසියම් සමාජ ගැටළුවක් විවෘතව ප්‍රකාශයට පත් කිරීමය. භාග්‍යා පැවසුවේ ඇය අවංකව විශ්වාස කළ දෙයයි. ඇයගේ පණිවිඩය මක්සිම් ගෝර්කිගේ වචනයෙන් කිව හොත්, සත්‍යය තරම් සරලය; හිරු එළිය සේ පැහැදිලිය. කාටත් ඒත්තු යන සුළුය.

    වත්මන් පාලන තන්ත්‍රය ඇය ඉදිරියේ බියට පත් වීම පුදුමයට කාරණයක් නොවේ. ඔවුන් සැබවින්ම ඇයගේ පෙනී සිටීමට පවා බිය විය යුතුය. මන්ද යත්, ඇය තම ක්‍රියාව මගින් සංස්ථාපිත සමාජ තහංචි බිඳ හෙළුවාය; නැතහොත් ඒවා බිඳ දැමිය හැකි බව ඔප්පු කර පෙන්වන්නට සමත් වූවාය. සංවර්ධනයේ නාමයෙන් සිදු කෙරෙන මහා පරිසර විනාශය ප්‍රශ්න කරන්නට තමන් වැන්නියකට හැකිය යන්න ඇය තම ක්‍රියාව මගින්ම සනාථ කළාය; තමන්ටමත් එය සනාථ කර ගත්තාය. ආර්ථිකමය සහ දේශපාලනමය ලෙස අව-වරප්‍රසාදලාභී තරුණ ප්‍රජාව විසින් ප්‍රාග්ධනය සහ රාජ්‍යය අභියෝගයට ලක් වීම වියහැකියාවක් බව පෙන්වා දුන්නාය. 

    භාග්‍යාගේ ක්‍රියාව සොෆොක්ලීස්ගේ ඇන්ටිගනී චරිතය සිහියට නංවයි. ඇන්ටිගනී කළේ සරල දෙයකි. එනම්, මිය ගිය තම සහෝදරයා වූ පොලීනීසස්ව මිහිදන් කිරීමේ චාරිත්‍රය ක්‍රියාවට නැගීමයි. නමුත්, පොලීනීසස් රාජ්‍යයට ද්‍රෝහී වූවෙකු ලෙසින් ක්‍රියොන් රජු විසින් නම් කරන ලද බැවින් ඔහුගේ සිරුර මිහිදන් කිරීම හෝ ඔහු වෙනුවෙන් වැළපීම රාජ්‍යයේ අධිකාරයට එරෙහි වීමක් සේ සැලකිණ. ඇන්ටිගනී රාජ්‍යයේ අධිකාරයට එරෙහි ක්‍රියාවක රහසින් නිරත වූවා පමණක් නොවේ. ඊටත් වඩා රාජ්‍යය බිය පත් කළ කාරණය වූයේ ඇය තමා එවැන්නක් කළ බව ප්‍රසිද්ධියේ පිළි ගැනීමය. ඇයගේ එම ප්‍රකාශය මගින් සිදු වූයේ රාජ්‍යයේ අධිකාරත්වය ප්‍රශ්න කිරීම සම්බන්ධයෙන් තිබූ සංකේතීය තහංචිය බිඳ වැටීමයි. බොහෝ විට අප මෙතෙක් නොදැන සිටි නව දේශපාලන කතෘකයෙකු නොහොත් ඒජන්සියක් (agency) නිර්මාණය වන්නේ මෙවන් ක්‍රියාවන්හි ප්‍රතිපලයක් ලෙසිනි. 

    සිංහරාජ වන විනාශය ජනමාධ්‍ය ඔස්සේ රටට කීමේ වරදට රාජ්‍ය උදහසට ලක්ව සිටින භාග්‍යා අබේරත්න තව තවත් දිරිමත් කිරීම සඳහා ආශිර්වාද කිරීමට හා මව්බිමේ අනාගතය වෙනුවෙන් නිර්භීතව ඉදිරිපත්වීම පිළිබඳව මහා සංඝරත්නයේ ප්‍රශංසාත්මක අගයකිරීම පිළිගන්වනු පිණිස ජාතික භික්‍ෂු පෙරමුණේ ස්වාමීන් වහන්සේලා ඊයේ (18) ඇයගේ නිවසට වැඩමකිරීම කළහ.
    ජාතික භික්‍ෂු පෙරමුණේ ප්‍රධන ලේකම් වකමුල්ලේ උදිත හිමි, පරගොඩ රාජමහා විහාරාධිපති දේවාලේ හිඳ අජිත හිමි ඇතුළු භික්ෂූන්වහන්සේලා විශාල පිරිසක් භාග්‍යා අබේරත්න ගේ නිවසට ගොස් ඇයව දිරිමත් කර ආශිර්වාද කළහ. Picture by lankatruth.com

    තරුණ දේශපාලනය පිළිබඳ දුර්මත 

    පැරණි දේශපාලන ආකෘතීන් සහ ක්‍රමවේද අහෝසි වී යමින් පවතින තත්ත්වයන් තුළ බොහෝ විට අනපේක්ෂිත ලෙස නව දේශපාලන කතෘකයින් මතුව ඒ. විශේෂයෙන්ම අපගේ වත්මන් යුගය ඒ සඳහා බොහෝ සාක්ෂි සපයයි. මියන්මාරයේ මිලිටරි පාලන තන්ත්‍රයට එරෙහිව මතුව ආ සටන්කාමී තරුණ ප්‍රජාව ආසන්නතම නිදසුන්වලින් එකකි. මේ වනවිට ප්‍රජාතාන්ත්‍රික අරගලයේ නිරත මියන්මාර ජනයා එරට පිහිටුවා තිබෙන චීන සමාගම් තම ඉලක්කයක් ලෙස තෝරාගෙන තිබේ. එයට එක් හේතුවක් වන්නේ ජන පීඩක මිලිටරි පාලනයට චීනයේ සහයෝගය ලැබේය යන විශ්වාසයයි.

    චීනය වහාම මිලිටරි ආණ්ඩුවෙන් ඉල්ලා සිටියේ තම සමාගම්වලට පහර දුන් උද්ඝෝෂකයින්ට උපරිම දඬුවම් ලබා දෙන ලෙසයි. මිලිටරිය එම ඉල්ලීම ඉටු කළේ පසුගිය ඉරිදා උද්ඝෝෂකයින් 38 දෙනෙකු වෙඩි තබා ඝාතනය කිරීමෙනි. ලේ වැකි එවන් තවත් ඉරු දිනයන් මියන්මාරයට උදා වීමට ඉඩ තිබේ. නමුත්, මිලිටරිය අපේක්ෂා නොකළ තරමින් ප්‍රබලව නැගෙන ජනතා විරෝධය සහ විශේෂයෙන්ම තරුණ නැගිටීම තවමත් මර්දනය කරන්නට හැකි වී නොමැත. “උඹලා මෙවර හැප්පෙන්නේ වැරදි පරම්පරාවක් සමගයි” යන සටන් පාඨය මියන්මාරයේ සැබෑවක් බවට පරිවර්තනය වෙමින් තිබේ. 

    තරුණ තරුණියන් ප්‍රජාතාන්ත්‍රික අයිතීන් වෙනුවෙන් නැගී සිටීමේ සමකාලීන නිදසුන් තවත් තිබේ. හින්දූත්වවාදයේ අධිකාරීත්වයට එරෙහි ඉන්දීය සිසු-ජන (සහ ගොවිජන) අරගලය, ජෝජ් ෆ්ලොයිඩ් ඝාතනයට සහ එක්සත් ජනපදයේ වර්ගවාදයට එරෙහි දීර්ඝකාලීන විරෝධතාව, චීන ආණ්ඩුවේ අධිකාරීවාදී පාලනයට එරෙහි හොං කොං විරෝධතාව, ලොව පුරා මිලියන ගණනින් යොවුන් පාසැල් සිසු සිසුවියන් සහභාගී වූ දේශගුණික විපර්යාසයට සහ පාරිසරික විනාශයට එරෙහි ව්‍යාපාරය, ලාංකීය ශිෂ්‍ය ව්‍යාපාරය යනාදිය ඒ අතුරින් කැපී පෙනුණු නිදසුන් කිහිපයකි. 

    මේ කිසිදු අරගලයක් හුදෙක් තරුණ තරුණියන්ට පමණක් සුවිශේෂී වූ ගැටළු මුල් කොටගත් ඒවා නොවේ. එබැවින්, ඒවා තරුණ ව්‍යාපාර ලෙසින් නම් කිරීම එතරම් සාධාරණ වන්නේ නැත. නමුත්, එම අරගලයන්හි තරුණ සහභාගීත්වය අප විශේෂයෙන් අගය කළ යුතුව තිබෙන්නේ වත්මන් තාරුණ්‍යයේ දේශපාලන සවිඥානකත්වය නැතහොත් දේශපාලන සාක්ෂරතාව පිළිබඳව අප රටේ ප්‍රචලිතව පවතින ගතානුගතික ආකල්ප එමගින් ප්‍රශ්න කෙරෙන නිසාය.

    ලාංකීය සමකාලීන තරුණ ප්‍රජාවේ දේශපාලන සවිඥානකත්වය සම්බන්ධයෙන් මීට සති කිහිපයකට ඉහතදී දරිද්‍රතා විශ්ලේෂණ කේන්ද්‍රය (CEPA) නමැති ආයතනය මගින් මාර්ගගත සම්මන්ත්‍රණයක් පවා පවත්වන ලදී. එහිදී සාකච්ජාවට ලක් වූ තේමාවන් මගින් පැහැදිලි වන්නේ මෙරට තරුණ ප්‍රජාවේ දේශපාලන සවිඥානකත්වය පිළිබඳව CEPA වැනි ආයතනවලට ඇත්තේ නිශේධනීය ආකල්පයක් බවය. ඊට වෙනස්ව, මගේ අදහස වන්නේ මෙරට වත්මන් තරුණ ප්‍රජාව දේශපාලනිකව තියුණු සවිඥානකත්වයකින් යුක්ත බවත් ගැටළුව ඇත්තේ ඔවුන්ව ආමන්ත්‍රණය කරන්නේ කෙසේදැයි නොදන්නා බුද්ධිමය ශ්‍රේණීන් තුළ බවත්ය.                                    

     තරුණ ප්‍රජාව දේශපාලන ක්ෂේත්‍රයට කඩා වැදීම

    ග්‍රාම්ස්චි පෙන්වා දුන් පරිදි දේශපාලන අර්බුදයක් නිර්මාණය වන්නේ පවත්නා දේශපාලන පක්ෂවල නායකත්වය සාම්ප්‍රදායිකව පිළිගත් සමාජ කණ්ඩායම් තවදුරටත් එසේ නොකරන තත්ත්වයක් තුළය. නමුත්, ඔහු එයට තවත් කාරණයක් එක් කළේය. එනම්, එතෙක් දේශපාලනීකරණය වී නොසිටි සමාජ කණ්ඩායම් දේශපාලන ක්ෂේත්‍රයට කඩා වැදීම මගින්ද අර්බුදයක් නිර්මාණය විය හැකි බවය. ග්‍රාම්ස්චි විශේෂයෙන්ම කතා කළේ ගොවි ජනයා දේශපාලනීකරණය වීම සම්බන්ධයෙනි. (ඒ අරුතින් වත්මන් ඉන්දියාවේ සිදුවෙමින් පවතින්නේ සම්භාව්‍ය ග්‍රාම්ස්චියානු සංසිද්ධියකි.) 

    මෑතකාලීනව ලොව පුරා අන්ත-දක්ෂිණාංශික ජාතික-ජනතාවාදී ව්‍යාපාර පැන නැගුණේ විශේෂයෙන්ම නව-ලිබරල් ආර්ථික ප්‍රතිපත්ති මගින් වඩ වඩාත් ආන්තිකකරණයට ලක් වූ සමාජ කොටස් දේශපාලනික ක්ෂේත්‍රයට කඩා වැදීමේ මාදිලියක් ලෙසය. එක්සත් ජනපදයේ ට්‍රම්ප් ප්‍රපංචය ඒ සඳහා කදිම නිදසුනකි. ශ්‍රී ලංකාවේ එතෙක් දේශපාලන ක්ෂේත්‍රයෙන් දුරස්ව සිටි බුද්ධිමය සහ කලාත්මක සමාජයේ යම් යම් කොටස් දේශපාලනීකරණය වීමක් අපට 2015 ජනවාරි ආණ්ඩු පෙරළිය තුළ නිරීක්ෂණය කළ හැකි විය.

    නමුත්, එම බුද්ධිමය සහ කලාත්මක කණ්ඩායම් නව-ලිබරල් යහපාලන ව්‍යාපෘතිය සමග අනන්‍ය වීම හේතුවෙන් ඔවුනගේ සුජාතභාවය බරපතල ලෙස අහෝසි වී ගියේය. ඔවුනට තවදුරටත් මහජන මතයට එතරම් බලපෑමක් කළ නොහැකි බව පසුගිය ජනාධිපතිවරණයේදී සහ මහා මැතිවරණයේදී මනාව සනාථ විය. ගෝඨාභය ව්‍යාපෘතිය තුළ නව බුද්ධිමය සහ සදාචාරමය නායකත්වයක් ලෙස මතු වූ තාක්ෂණ-කළමනාකරණ පන්ති ස්ථරයද දේශපාලන ක්ෂේත්‍රයට ප්‍රවේශ වූයේ මෑතකදීය. නමුත්, ඉහත ලාංකීය නිදසුන් දෙකම පුළුල් බහුජන ශ්‍රේණීන් දේශපාලනීකරණය වීමේ අවස්ථාවන් ලෙස සැලකිය නොහැකිය. ඊට වෙනස්ව, මේ දිනවල ඉන්දියාවේ සහ මියන්මාරයේ සිදුවෙමින් තිබෙන්නේ බහුජන මට්ටමේ පුළුල් දේශපාලනීකරණයකි.

    නමුත්, ශ්‍රී ලංකාවේද පුළුල් බහුජන දේශපාලනීකරණයක් සිදු විය නොහැකිද? විශේෂයෙන්ම අව-වරප්‍රසාදලාභී තරුණ ප්‍රජාවන් කෙරෙන් නව දේශපාලන පැන නැගීමක් අපේක්ෂා කළ නොහැකිද? මගේ අදහස නම් එවැන්නක් වීමට හොඳටම ඉඩ තිබෙන බවයි. වසංගතය මගින් පවත්නා ක්‍රමයෙහි දෘෂ්ටිවාදී ආවරණ වේගයෙන් සිඳ බිඳ දමමින් තිබෙන වාතාවරණයක් තුළ තරුණ ප්‍රජාව අතර පැතිර යමින් තිබෙන අපේක්ෂා භංගත්වය කොතරම් විය හැකිද? දැන් මාර්ගගත අධ්‍යාපනයේ යෙදෙන, උසස් පෙළ විභාගය ලියන, විශ්ව විද්‍යාලවල පළමු වසරට ඇතුළු වන, වෙනත් උසස් අධ්‍යාපන ආයතනවලට ඇතුල් වන හෝ එවන් අවස්ථාවන් නොලද තරුණ තරුණියන්ගේ මානසිකත්වය ගැන මදක් සිතන්න.

    ඉදිරියේ එන ආර්ථික බංකොලොත්භාවය ඉදිරියේ ඔවුනට තම අනාගත අපේක්ෂාවන් ගැන තැබිය හැකි විශ්වාසය කුමක්ද? අර්බුදය හුදෙක් දේශීය වූවක් නොව ගෝලීය එකක්ද වූ විට? ඒ අතර පැරිස් සම්මුතියේ අපේක්ෂාවන් කරාවත් ළඟා විය නොහැකි තරමට ගෝලීය පාරිසරික විනාශය උත්සන්න වෙමින් පවතින බවද ඔවුන් දනී; සරලව, ධන බලය සහ දේශපාලන බලය හිමි වැඩිහිටියන් තමන්ට අයිති ලෝකය තම දෑස් ඉදිරිපිටම විනාශ කරමින් සිටින ආකාරය දකින තරුණ ප්‍රජාවක් එයට ප්‍රතිචාර නොදක්වා සිටිනු ඇත්ද?  මගේ හැඟීම නම් අපට මතුපිටින් නොපෙනෙන ගැඹුරු දිය රළක් වත්මන් දේශපාලන සාගර පත්ලෙහි කැළඹෙමින් තිබිය හැකි බවයි.                        

    ජන අරගල දේශපාලනයේ නව ආකාර

    නමුත්, තරුණ ප්‍රජාවේ දේශපාලනික ක්‍රියාකාරීත්වය කිසිසේත් තනිව සිදු විය හැක්කක් නොවේ. ඒ වෙනුවට අපට සිතිය හැක්කේ ඓන්ද්‍රීය මහජන අරගල රැල්ලක් සමග සමාන්තරව පැන නගින නව තරුණ ක්‍රියාකාරීත්වයකි. සැබවින්ම, දැන් එවන් අරගලවල සමාරම්භක මතු වීම් කිහිපයක්ම අපට නිරීක්ෂණය කළ හැකිය. වල්සපුගල ගොවි උද්ඝෝෂණය, හිඟුරක්ගොඩ ක්‍ෂුද්‍ර මූල්‍ය සූරාකෑමට එරෙහි සත්‍යග්‍රහය, මානව අයිතීන් අහිමි කිරීම්වලට එරෙහිව උතුරේ වැඩෙන විරෝධතා රැල්ල, විශ්ව විද්‍යාල නැවත විවෘත කරන ලෙස ඉල්ලා කෙරෙන ශිෂ්‍ය විරෝධතා සහ රටේ නොයෙක් පෙදෙස්වලින් මතු වෙමින් තිබෙන පරිසර විනාශයට එරෙහි උද්ඝෝෂණ ඒ සඳහා නිදසුන් කිහිපයකි. 

    මෙම ව්‍යාපාර මගින් නිර්මාණය කෙරෙන අනාගත දේශපාලන අවකාශය තම ග්‍රහණයට ගැනීමට විවිධ ජනවාර්ගික-ජාතිකවාදී නායකත්වයන්ද තරඟ වැදී සිටින බව සැබෑය. ඉදිරි දේශපාලනයේදී තරුණ ප්‍රජාවේ වැදගත්කම ගැන කිසියම් අවබෝධයක් චම්පික රණවක වැනි දක්ෂිණාංශික ජනතාවාදීන් හට තිබෙන බව ඔවුනගේ කතා ශ්‍රවණය කරන විට වටහාගත හැකිය. නමුත්, වාම නායකත්වයන්ද අරගලයේ ඉදිරියෙන් සිටී. පෙරටුගාමී සමාජවාදී පක්ෂය ඒ අතුරින් කැපී පෙනේ.

    නමුත්, ජාතිකවාදීන් හා සැසඳූ කල වමට ඇති එක් අවාසියක් නම් ජනතා ව්‍යාපාර විප්ලවවාදී පක්ෂයක නායකත්වය යටතට ගත යුතුය යන පැරණි ප්‍රවාදය තවමත් වමේ නායකත්වයන් විශ්වාස කිරීමයි. වත්මන් යුගයේ මතු වන බහු-විධ සමාජ ව්‍යාපාරවල ස්වරූපය අනුව ගත් කල මේ ප්‍රවේශය දැන් එතරම් වලංගු වන්නේ නැත. අර්නෙස්ටෝ ලැක්ලාවූ සහ ශන්තාල් මූෆ් යෝජනා කරන්නේ මේ විවිධාකාර සමාජ ව්‍යාපාර එකිනෙක යා කිරීමේ “සාම්‍යතා දාමයක්” (chain of equivalence) ගොඩ නැගීමේ උපායමාර්ගයකි. 

    කෙසේ වුවද, එවන් සාම්‍යතා දාම ගොඩ නැගීමට ප්‍රයත්න දරන තවත් නායකත්වයන් සිටී. නිදසුනක් ලෙස, දැන් විමල් වීරවංශ බටහිර අධිරාජ්‍ය විරෝධයේ සටන් පාඨ සහිතව ජාතිකවාදයේ ධජය යටතේ අරගලකාරී සමාජ පැන නැගීම් සංවිධානය කර ගන්නට ප්‍රයත්න දරමින් සිටී. ඔහු ගොඩ නගන්නට ප්‍රයත්න දරන සාම්‍යතා දාමය තුළ සුළුතර ජනවාර්ගික සහ ආගමික ප්‍රජාවන්ගේ විරෝධතා නියෝජනය වන්නේ නැත.

    අනෙක් අතින්, මෙරට සුළුතර දේශපාලන නායකත්වයන් තවදුරටත් රට අභ්‍යන්තරයේ තමන්ට පිළිසරණක් ඇතැයි විශ්වාස නොකරන බැවින් අඩු තරමින් ඉන්දීය-එක්සත් ජනපද-යුරෝපා අක්ෂය තමන්ට මිත්‍රශීලී යැයි කල්පනා කරති; එබැවින් ඔව්හු ප්‍රසිද්ධියේම ජිනීවා දෙසට හැරෙති. වීරවංශ පෙරමුණ බටහිර අධිරාජ්‍යවාදයට පහර ගසමින් චීනය දෙසට හැරේ; තවදුරටත්, මානව අයිතීන් පිළිබඳ බටහිර කතිකාව විවේචනය කරමින් ලී කුවාන් යූ සහ මහතීර් මොහමඩ් වැන්නන් කතා කළ ආකාරයේ “ආසියාතික වටිනාකම්” ඉහළට ඔසවයි. අප රටේ සමකාලීන දේශපාලන පෙළ ගැසීම් මහා බලවතුන්ගේ භූ-දේශපාලනික උපායමාර්ග සමග සංකලනය වෙමින් පවතින්නේ එසේය.    

    මේ තතු යටතේ වාමාංශික නායකත්වයන් හමුවේ තිබෙන විශාලම අනතුරක් වන්නේ චීනය දෙසට හැරීමේ වීරවංශ උගුළට හසු වීමේ අවදානමයි. ජවිපෙ ඇතැම් නායකයින් දැනටමත් චීන ධනවාදය වඩා ප්‍රගතිශීලී යැයි කල්පනා කරන බව ඔවුන්ගේ ඇතැම් ප්‍රකාශවලින් පෙනේ. නමුත්, වම චීනය දෙසට හැරීමේ වීරවංශවාදී මග තෝරා ගන්නේ නම් ඉදිරියේදී ඔවුනට තම ජනතාවාදී සාම්‍යතා දාමය ගොඩ නගන්නට සිදු වනු ඇත්තේ මෙරට සුළුතර ජනවාර්ගික සහ ආගමික ප්‍රජාවන් එයින් බැහැර කරලමිනි. එවිට ජවිපෙද සිටිනු ඇත්තේ වීරවංශ-හෙජමොනියක් තුළය. ඊට වෙනස්ව, උතුරේ සහ සෙසු පෙදෙස්වල ප්‍රජාතාන්ත්‍රික බහුජන පැන නැගීම්ද සුසම්බන්ධ කර ගත් වාම ජනතාවාදී සාම්‍යතා දාමයක් ගොඩ නැගීම මේ මොහොතේ ලාංකීය දක්ෂිණාංශික හෙජමොනිය අභියෝගයට ලක් කිරීම සඳහා ඉතාම අවශ්‍ය වේ. (ග්‍රාම්ස්චි ඉතාලියේ දකුණේ ප්‍රශ්නය සම්බන්ධයෙන් ඉදිරිපත් කළ ප්‍රවේශය ලංකාවේ උතුරේ ප්‍රශ්නය සමග ගැලපූ කල්හි). 

    “ශ්‍රී ලංකාව ගෝලීය බලවතුන්ගේ සංග්‍රාම භූමියක් බවට පරිවර්තනය වීමට ඉඩ නොදෙමු” යන දේශප්‍රේමී සටන් පාඨයද සහිත පුළුල් වාම ප්‍රජාතාන්ත්‍රික ව්‍යාපාරයක් අද අවශ්‍ය වී තිබේ. එවැන්නක් සාර්ථක වනු ඇත්තේ දකුණේ සේම උතුරේද තරුණ ප්‍රජාව ආකර්ෂණය කර ගන්නට එය සමත් වන තාක් දුරටය. නැතහොත්, දේශප්‍රේමයේ නාමයෙන් ජනවාර්ගික ප්‍රජාවන් පසමිතුරු කඳවුරුවලට බෙදී ගිය අසූව දශකයේ උගුළෙහි ලාංකීය වම නැවත සිර විය හැකිය. මෙරට තරුණ දේශපාලනයේ තවත් රැල්ලකට පෙර වමේ නායකත්වයන් මේ උභතෝකෝටිකය ගැන බරපතලව කල්පනා කළ යුතුව තිබේ. මන්ද යත්, අප කුමක් කීවද, අනාගත ලෝකය නිර්මාණය කෙරෙනු ඇත්තේ තරුණ ප්‍රජාව විසිනි. 

    පාසැල් වියේදී මගේ සටහන් පොතක එක්තරා සෝවියට් කතුවරයෙකුගේ (ඩොස්ටොයෙව්ස්කි විය යුතුය) ප්‍රකාශයක් මා ලියා තිබූ බව මට මතකය.                              

     “තරුණයිනි, ලෝකය ඔබේත් මගේත්ය; එහෙත්, අවසාන අරුතින් ගත් කල එය ඔබේය”    

    සුමිත් චාමින්ද 

  • සංගක්කාර කෝටු මස් කරන ‘දඹුල්ලේ සුද්ධවන්තයෝ’

    සංගක්කාර කෝටු මස් කරන ‘දඹුල්ලේ සුද්ධවන්තයෝ’

    සංගක්කාර සිද්ධිය ගැන ඔබ සිතන්නේ කුමක්ද? මෙහිදී කොහොඹා කන්කාරියේ ඌරා මස් කිරිමක් නිරූපනය  කරන කොටසක් සිහිපත් වේ. උක්ත ඉඩම් සිද්ධිය මේ වනවිට අවලංගු කර එකී කාර්ය සඳහා දායකත්වය ලබාදුන්  ග්‍රාම  නිලධාරි වරයාගේ වැඩ තහනම් කර ඇත.  ඌරා මස් කිරිම සිදුවෙමින් පවතී.

    කුමාර සංගක්කාර ලෝක ප්‍රකට ක්‍රිකට් ක්‍රීඩකයෙකි. ඔහු ක්‍රිකට් ක්‍ෂේත්‍රයේ ජාත්‍යන්තර මට්ටමේ වගකීම් දරමින් සම්භාවනාවට පාත්‍රවූ බොහෝ ක්‍රීඩකයන්ට අභිබවා තවමත් දිලිසෙන දෙපයින් ගමන් කරමින් සිටින්නෙකි. සංගක්කාර අපට වටින්නේ එහෙමය.දැන් සංගක්කාර යනු පට්ට දූෂිතයෙකි. වරද සංගක්කාර ඉඩම් පළහිලව්වකට මැදිවීම නොවේ. අප රට වෙනුවෙන් ක්‍රිකට් ක්‍රිඩා කිරිමය. සමහරු එයා ඉවරයි කියන්නේ දැඩි තෘප්තියකිනි.

    විශේෂයෙන් අපේ මාධ්‍ය මෙහෙවර අති විශිෂ්ඨය. දැන් සංගක්කාර පිටස්තර ලෝකයටද හොරෙකි. හෝ වංචනිකයෙකි. ඔහු පසුපස රටේ නීතිය හඹා එමින් සිටියි. රඹකැන්ඔය ප්‍රදේශයේ විවාදිත වන විනාසය කළ පිරිසක් කාටත් නොකියා එකී භූමියෙන් ඉවත්ව ගොස් ඇත. ඒ ගියේ කවුද කියා මාධ්‍ය  රටට කියන්නේ නැත. මංගලඔය ඉවුරු විනාස කරමින් වැලි කනිමින් සිටිනු වාර්තා විය. එවැනි වන විනාසයන් වැලි පස් ගැනීම් දිනපතා දස අතින් වාර්තා වේ. එහෙත්  ඒවා මාධ්‍ය වාර්තාවලින් එපිටට ගමන් කරන්නේ නැත. සිරස ලක්‍ෂපති තරගයට සිංහරාජ අඩවියෙන් පැමිණි  භාග්‍යා අබේරත්න  පසුපසද රටේ නීතිය හඹා එමින් පවතී. ඒ ඇයි? සංගක්කාර විශිෂ්ඨ ක්‍රිකට් ක්‍රීඩකයෙකු වීමත්, භාග්‍යා ඇත්ත කතා කිරිමත්  නිසාය.

    මාධ්‍ය රටට හානිකර මෙවැනි සිද්ධි තරාතිරම නොබලා, රටට හෙළි කළ කිරිමේදි ගවේශණාත්මකව ක්‍රියා කළ යුතුවේ.  සමහර මාධ්‍ය සංගක්කාර සිද්ධියේදී මතු කර ගත්තේ ඔහුට නීතිය පිළිබඳ දැනුමය.  සංගක්කාර සිද්ධිය  පසුපස සිටි ඉඩම් තැරැව්කරුවන් හෙළිදරව් වෙද්දී, සංගා කෙටි කලක් නීති විද්‍යාලයේ සිටි බව සොයා ගත්හ.  සංගා ක්‍රිකට් ලෝකයේ ඉහළට එසවුණ එක් අවස්ථාවක ඔහු නීති ශිෂ්‍යයෙකු බව  මාධ්‍ය වාර්තා කළේය. ඊට පසු දින සමහරුන් කතා කළේ ඔහු රටට ගෙනා ගෞරවය නොවේ. නීති විද්‍යාලයට ඇතුල්ව අතරමග දමා යාම නිසා  රටේ තවත් කෙනෙකුගේ අවස්ථාව අහිමිවිම ගැනය. අප මේවා දැකිය යුත්තේ උපේක්‍ෂාවෙනි. එහෙත් උනන්දුවේ ප්‍රමාණය උපේක්‍ෂාවෙන් යටපත් කළ නැත. අධිකරණයේදී කෙනෙකුගේ කැරැට්ටුව විමසා බලන්නේ වැරදිකරු වුණොත් පමණකි. නීති විද්‍යාලයට ඇතුල්වීමේ කතාව නිසා, සංගක්කාර රටේ නීතියට අවනත විය යුතුය. මේවා මරු කතාය.

    දේශපාලන පළිගැනීම් කොමිෂන් වාර්තාව ඉල්ලා ශ්‍රී ලංකා නීතිඥ සංගමයේ සභාපති පදවිය දැරූ කීර්තිමත් නීතිඥවරුන් අත්සන් කළ ලිපියට ජනාධිපති නීතිඥ ඩබ්ලිව්.දයාරත්න අත්සන් නොකළ බව ප්‍රකාශ විය. ඒ ඔහු කීර්තිමත් නීතිඥයෙකු නිසා විය හැකිය.  ඔහු අත්සන් නොකළේ ඇයි? හේතුව ලේක් හවුස් සභාපති ධුරය දැරිමද? කිසිවෙකු ප්‍රශ්න කරන්නේ නැත. ඒ අතර, තවමත් ශ්‍රී ලංකා නීතිඥ සංගමයේ සභාපති ධුරය දරමින් සිටි ජනාධිපති නීතිඥ කාලිංග ඉන්දතිස්සද මේ ලිපියට අත්සන් තබා නැත.  සංගක්කාර සිද්ධිය  පසුපස සිටි ඉඩම් තැරැව්කරුවන් හෙළිදරව් වෙද්දී, නීතිය සහ  සංගක්කාර එක කොටුවක කොටු කිරිම, ඌරා මස් කිරිමක් නොවන්නේද? මේවා චූන්පාන් වෙළඳ සංගීත රිද්මයන්ය.

    සංගක්කාර තරග පාවා දුන්නා නම්, ක්‍රිකට් පාලක මණ්ඩලය නොමග යවා යම් ධනයක් ලබා ගත්තා නම්, ඊට ඔහු වගකිව යුතුවේ. එය වෙනම තත්වයකි. උඩුවේ ධම්මාලෝකගේ අලි හොරකම දේශපාලන චෝදනාවකි. ඩේසි ආච්චිගේ මැණික් මල්ල, රාජපක්‍ෂලාගේ වීරකැටිය සොහොන, අමාත්‍යාංශ ලේකම්ව සිටි කෝටිපති ව්‍යාපාරිකයෙකු සතු කර්මාන්ත ශාලාවක් නිසා, රතුපස්වල ගමේ ළිං ජලයට විෂ මිශ්‍ර වීමේ සිද්ධිය. මල්වානේ හිමිකාරයෙකු නැති නිවෙස, සිරිලිය ගිණුමේ ශිරන්ති රාජපක්‍ෂගේ හැඳුනුම් පත් අංකය, වීරවංශ ජෝඩුව රාජ්‍ය ලේඛන හරහා වයස අඩුකර ගැනීම මේ සියල්ල සමග ගත් කළ සංගක්කාරගේ බිරියගේ නම පටැලවුණ ඉඩම් සිද්ධිය හරහා මතුවන නෛතික වගකීම් ඉහළ යන්නේ ඔවුන් දේශපාලනඥයන් නිසාය. බෞද්ධ භික්‍ෂුවකගෙන් අපේක්‍ෂා නොකරන, රාජපක්‍ෂ වැනි දේශමාමක දේශපාලනඥයන්ගෙන් අපේක්‍ෂා නොකරන නීතිගරුක බවක් විනයක් පාරද්‍රෘශ්‍යභාවයක් තම දක්‍ෂකම් පෙන්වා රටට කීර්තියක් අත්කර දුන් කුමාර් සංගක්කාරගෙන් අපේක්‍ෂා  කිරීම සංගාට හොඳය.  

    මේ කරන්නේ කුමා සංගක්කාර සුද්ධ කිරිම නොවේ. පවත්නා සමාජ විකෘතිය සාකච්ඡා කිරිමටය. දඹුලු පාපිස්ස යට පවත්නා, දූෂිත තත්වය තුළ සංගාගේ සිද්ධිය විය හැකි බව සාකච්ඡා කිරිමටය. දඹුල්ල හරහා බස් රියකින් ගමන් කරන්නෙකුට ඔහු නොදැන හොර බඩු ළඟ තමා ගත්තෙකු විය හැකිය. වර්තමානයේ දඹුල්ල ප්‍රසිද්ධ ලෙන් විහාරය නිසා නොවේ. විශේෂිත ආර්ථීක මධ්‍යස්තානය නිසාය. එකී ආර්ථික මධ්‍යස්ථාන ඉපයීම් වලින් දෛනිකව කප්පම් ගන්නා දේශපාලනඥයන් නිසාය.

    මේ රටේ ජනතාවගේ ගෞරවයට පත් දේශපාලනඥයෙකුගේ සමහර දරු මුණුපුරන්ට මේ කතා බොරු යයි කිව හැකිද? කණ්ඩලම ප්‍රසිද්ධ හෝටලය ආරම්භ කළ අවදියේ තමන් බලයට පත්වූ වහා එකී ගොඩනැගිල්ල මහ රෝහලක් කරන බවට දුන් පොරොන්දු වුණේ  රිචඩ් පතිරණය. ඒ හෝටලය රෝහලක් නොවී තවමත් හෝටලයක් ලෙස පවතින්නේ රිචඩ් පතිරණ සෞඛ්‍ය ඇමති නොවූ නිසා ය. මේවා විහිථතහ`ථ නොවේ. බරපතල ලෙස රට රවටමින්  කරන තක්කඩිකම්ය.  

    සංගක්කාර රවටා ඇත්තේ රජය මිස,  ඒ ඉඩමේ මුල් හිමිකාරිය නොවේ. ඇය එය විකුණා හෝ පවරා ඇත්තේ අසරණකමටය. යම් නීති විරෝධි සැක කටයුතු ක්‍රියාවක් නිසා, නිමල් ලංසා පදිංචිව සිටි නිවෙස  රජයේ ආරක්‍ෂක අංශ මහ රෑ වැටලූහ. ඒ අවස්ථාවේ ඔහු බේරුණේ රටේ ජනාධිපති එහි පැමිණි නිසාය. අද සංගාගෙන් සදාචාරය අපේක්‍ෂා කරන රටේ මිනිස්සු නිමල් ලංසා තබා ඇත්තේ කොතැනද? ඔහු බේරා ගත් මහින්ද රාජපක්‍ෂට දක්වන ගෞරවය කෙබඳුද? ස්ථීර විවාහ දීමනා ගෙවමින්, දික්කසාදවූ සංගාගේ මට්ටමේ ක්‍රිකට් ක්‍රීඩකයන් වෙති.

    එහෙත් මහින්දානන්ද අලුත්ගමගේ එරෙහි දික්කසාද නඩුව නැවත අලුත් වෙමින් ප්‍රශ්න කරයි. ඊට හේතුව ඔහු වටා ආරෝපනයවී ඇති දේශපාලන හෝ සමාජ වගකීමද? හෝ ඔහු උඩරැටියෙකු  වීම නිසාද? ප්‍රශ්නයක් මේ ආකාරයෙන් ලඝු කළ යුතු හෝ අවුල් කළ යුතු නැත. එහෙත්  ප්‍රශ්නයක් හඳුනා ගැනීමට අහුමු`ථ අතගා බැලීමත් ක්‍රමයකි.  හරියට සංගාගේ ලෝ කොලේජ් කතාව වාගේය.

    අප නැවත දඹුල්ල නම් දූෂණයට තෝතැනිවූ සංගා ගස් බැන්ද දඹුල්ල වෙත යොමු විය යුතුවේ. රජය සතු ඉඩම් බහුල  දඹුල්ල ප්‍රාදේශීය ලේකම් කොට්ඨාශයේ ඉඩම් සංගක්කාර ක්‍රමයට අවභාවිතාවීම ගැන වෙනම කොමිසමක් පත් කළ හැකි නම්  තැරැව්කරුවන් සමග එකට කනබොන මුදල් උපයන නිලධාරින් සිය ගණනින් සොයාගත හැකිවේ. මේ සිය`ථ ඉඩම් දූෂණ සිදුවී ඇත්තේ සීගිරි ගල පෙනෙන ඉසව්වේ ඇති ඉඩම් සම්බන්ධව වීමත් වැදගත්ය.  රජයේ සමහර ප්‍රාදේශීය බලධාරින් මේ ආකාරයට තමන්ම ඉඩම් හිමිකර ගෙන විවිධ ආයෝජන කරමින් ධනය උපයන අයුරු දඹුල්ලට රහසක් නොවේ. මෙතන සිදුවී ඇත්තේ තවත් විවිධ හේතු මත සංගක්කාර මස් කිරිමක් පමණකි.

    සිද්ධිය සැලවූ සැනින් ප්‍රකට මාධ්‍යවේදියෙකු තොරතුරු දැනගැනීමේ පනත යටතේ, සිය`ථ ලෙඛන ලබාගෙන ප්‍රසිද්ධ කළේය. ඉඩම හිමි මුල් කාන්තාවගේ හඬ පටයද රටට ඇහෙන්නට සැලැස්විය.එය යහපත්ය. මෙවැනි දූෂණයන්  පිටස්තර සමාජයට තනිව සිදු කළ නොහැකිය. මේ දූෂණ වංචා පෙළ ගස්වන්නේ  තැරැව්කරුවන්ය. රජයේ බලධාරින්ය.ග්‍රාම නිලධාරි වහා වැඩ තහනමට ලක් කළේ ඒ වරද කළ එකම නිලධාරියා ඔහු නිසා නම් අප ආඩම්බර විය යුතුවේ. එහෙත් අමිහිරි ඇත්ත එය නොවේ.  සංගක්කාර ජෝඩුව සීගිරි ගල පෙනෙන ඉඩම් සොයා ගොස් මේ ඉඩම අත්පත් කර ගැනීමට මේ වංචාව සැලසුම් කළේද? සෙවිය යුත්තේ මෙයයි. මේ සියල්ල ඉහළ සිට පහළට සිටින බලධාරින් දැනුවත්ව සිදුවන ක්‍රියාවන්ය. මුදල් වාසියට මෙන්ම වෙනත් උවමනාවන් සඳහා දඹුල්ල ප්‍රදේශය කරවන බලධාරින් මෙවැනි දේ කරන්නේ අද ඊයේ නොවේ. මාධ්‍ය සගයන්ට මෙවැනි සිද්ධි හෙළි කරමින් දූෂණයට වැට බැඳීය හැකිය. කළ යුත්තේ අවදියෙන් සිටිම පමණකි. දැන් දොර විවෘතව ඇත.  
    එක් ඔත්තුවක් මෙසේය. දඹුල්ල ප්‍රාදේශීය ලේකම් එච්.පී.පී.ඒ. හේවාපතිරණ මහත්මිය අංක 5/3/12/1-31  සහ 2015.12.30 දින  ලිපිය නිකුත් කර අඩ සිය වසකට ආසන්න කාලයක් පැවති බෞද්ධ සිද්ධස්ථානයක් අනවසර ඉදි කිරිමක් ලෙස කඩා ඉවත් කිරිමට උසාවි නියෝග ලබා ගත්තේය. හන්දි ගානේ බෝගස් වටකොට පන්සල් ගොඩනැගෙන රටේ දඹුල්ල වෑවලවැව ගම්මානයෙ කලක් භික්‍ෂුන් වාසය කොට යම් කලක් අක්‍රියව පැවති ආරාමයකට නැවත භික්‍ෂුන් වැඩම කිරිම අනවසර වන්නේ කෙසේද? ජ්‍යේෂ්ඨ රාජ්‍ය නිලධාරිනි එච්.පී.පී.ඒ. හේවාපතිරණ අදටත් ඊට උත්තර බැඳීය යුතුවේ. එය ඔප්පු වුණොත් ඇය  ඊට දඬුවම් ලැබිය යුතුවේ. සංගක්කාර මෙන් සමාජ අපවාදය ලැබිය යුතුවේ. සමාජය වෙනුවෙන් කාංචන ආරියදාස සගයා මේ තොරතුරු සොයා හෙළි කරනු ඇත.  

    උක්ත වෑවලවැව ශ්‍රී සම්බෝධි විහාරය සහ වෑවලවැව මහසෙන් අවමංග්‍යාධාර සමිතිය එකී පන්සල් භූමියෙහි අදටත් ස්ථානගතව ඇත. භික්‍ෂුන් වහන්සේලා නේවාසිකව වැඩ නොසිටි එක් අවස්ථාවක එකී භූමියෙහි හිමිකම සමිතියට ලබා දීමට දඹුල්ල ප්‍රාදේශීය ලේකම්  ජිනාදරී සිරිවර්ධන මහත්මිය අංක 77/4/4/4/44 සහ 2002.12.17. දින දරන ලිපියෙන්  මධ්‍යම පළාත් ඉඩම් කොමසාරිස් වෙත සිය අනුමැතිය දක්වා තිබිණ.  ඒ  වෑවලවැව මහසෙන් අවමංග්‍යාධාර සමිතිය අඛණ්ඩව ක්‍රියාත්මකව පැවති නිසාය.  මාධ්‍යවේදින්ට අවශ්‍ය නම් උක්ත දඹුල්ල. වෑවලවැව, මහසෙන් අවමංග්‍යාධාර සමිතිය රාජ්‍ය නොවන සංවිධාන පිළිබඳ නියෝජ්‍ය රෙජිස්ට්‍රාර්/ සහකාර රෙජිස්ට්‍රාර් වරයා ලෙස  2001.01.05 දින අංක 23 යටතේ ලිය පදිංචි කර  ඇති බවද විමසා බැලිය හැකිය.

    දඹුල්ල ප්‍රාදේශීය ලේකම් එච්.පී.පී.ඒ. හේවාපතිරණ අංක 5/3/12/1-31  සහ 2015.12.30 දින  ලිපිය නිකුත් කළේ ඒ තොරතුරු තම කාර්යාලයේ පවත්නා බව නොදැන නොවේ. සත්‍ය හේතුව වෑවලවැව අසල පිහිටි තවත් පන්සලක භික්‍ෂුන් සතු ශක්තියයි. දූෂණයක් සිදුවි නැද්ද?  මේ සියල්ල දඹුල්ල ප්‍රාදේශීය ලේකම් සහ මධ්‍යම පළාත් ඉඩම් කොමසාරිස් පළවන සහ දෙවන වගඋත්තරකරුවන් කරමින් මහනුවර මහාධීකරණයෙහි 2015-03- 12  දින පවරන ලද අංක උරසඑ    11   රැ2015  දරන නඩුවේ  2016-04-28-  දින ප්‍රකාශිත තීන්දුවෙහි දැක්වේ.

    බලධාරින් සංගක්කාර සිද්ධියේදී ග්‍රාම නිලධාරිගේ බෙල්ලෙන් අල්ලා ගත්තේ දඹුල්ල ප්‍රාදේශීය ලේකම්ද? මාතලේ දිස්ත්‍රික් ලේකම්ද? මධ්‍යම පළාත් ආණ්ඩුකාරයාද? මේ කියන්නේ වෑවලවැව පන්සල අනවසර අල්ලා ගැනීමක් කළ සිද්ධිය පරිපාලන නිලධාරින් මුල්ව සිදු කළ නිසා, කිසිදු  පියවරක් නොගන්නා බවද? දඹුල්ල ප්‍රාදේශීය ලේකම් එච්.පී.පී.ඒ. හේවාපතිරණ බලය අයුතු ලෙස යොදමින්  නිල බලය යොදා රජය පිළිගත් මෙම ස්වේච්ඡා  සමිතියේ සාමාජිකත්වය දරන 600කට නො අඩු රටේ පුරවැසි ගම් වාසින්ගේ රැස්විමේ අයිතිය ආගම ඇදහිමේ අයිතියට බාධා පමුණුවමින් බලපෑම් නොකළේද? එහෙත් මේ සිද්ධියට අත තැබුවොත් ඒ මාධ්‍ය කාරයන්ට දඹුල්ල වදක භූමියක් විය හැකිය.  

    අද සංගක්කාරට එළව එළවා පහර දෙන කණ්ඩායම් කරන්නේ ඌරා මස් කිරිමකි. මේ සක්‍රිය වෙන්නේ රජයේ අසාර්ථකත්වය වසා ගැනිමට එක දිගට පෙළ ගස්වන මාධ්‍ය සංදර්ශනයේ කොටසකි. සමහර විට, වාස් ගුණවර්ධන ජෝඩුවට මෙන්,  වෑවලවැව අපරාධය කල් උකුත්වීම හේතුවෙන් එච්.පී.පී.ඒ. හේවාපතිරණ මුදා හැරෙනු ඇත. එහෙත් දඹුල්ල යනු සංගක්කාරලා පමණක් නොව, දඹුල්ලට පත්ව එන නිලධාරින්ද සාතන්ලා කරවන තරම් කුප්‍රකට දේශයක්ව ඇත. හේතු බොහෝය. සංචාරක ආකර්ශනය ඊට එක් හේතුවකි. ඉනාමලුව කෝරලේ ඉඩම් සංවර්ධනය කිරිමෙන් සිංහරාජය, රඹකැන්ඔය ආදි තහනම් කලාපවල මෙමන් පරිසර හානි සිදුනොවේ.

    නීතිඥ චන්ද්‍රසිරි සෙනෙවිරත්න විසිනි.

  • අපරාධ රැල්ල මැඩලීමේ ‘දැවැන්ත මෙහෙයුම්’ ඉදිරියේදී – මහජන ආරක්ෂක ඇමති

    අපරාධ රැල්ල මැඩලීමේ ‘දැවැන්ත මෙහෙයුම්’ ඉදිරියේදී – මහජන ආරක්ෂක ඇමති

    රටේ පවතින අපරාධ රැල්ල මැඩලීම සඳහා ශ්‍රී ලංකා පොලිසියේ මූලිකත්වයෙන් විශේෂ කාර්ය බලකාය සහ යුද හමුදාව සමඟ පෙර දැනුම් දීමකින් තොරව රට පුරා ක්‍රියාත්මක කරන බව මහජන ආරක්ෂක අමාත්‍යංශයේ පැවති රැස්වීමකදී මහජන ආරක්ෂක අමාත්‍ය රියර් අද්මිරාල් ආචාර්ය සරත් වීරසේකර මහතා පැවසීය  

    විවිධ ගණයේ අපරාධකරුවන් විවිධ ස්ථානවල සැඟවී සිටින නිසා පෙර දැනුම් දැනුම් දීමකින් තොරව ශ්‍රී ලංකා පොලීසිය, විශේෂ කාර්ය බලකාය සහ යුද හමුදාව සමග පෙර දැනුම් දැනුම්දීමකින් තොරව විශේෂ මෙහෙයුම් ක්‍රියාත්මක කරන බවත් එහිදී අපරාධකරුවන්ට පලා යාමට ඉඩ නීතියේ රැහැනට හසු කර ගැනීමට අපේක්ෂා කරන බවත් විවිධ වූ ජාවාරම්කරුවන් සහ වරෙන්තුකරුවන් ග්‍රහණයට ගැනීමට සූදානමින් සිටින බවත් අමාත්‍යවරයා පැවසීය. 

    මෙම මෙහෙයුම් අඛණ්ඩව දින ගණනාවක් පුරා දිවා රාත්‍රියේ පැවැත්වෙන බවත් එය සාර්ථක කර ගැනීමට ජනතාවගේ සහාය ද ඉතා අගය කරන බවත්, ජනතාව දන්නා තොරතුරු අදාළ නිලධාරීන් වෙත නිලධාරීන් වෙත ලබාදීමට කටයුතු කරන ලෙසත් සරත් වීරසේකර මහතා මෙහිදී වැඩිදුරටත් පවසා සිටියේය 

  • නියාමනය පමණක් මදි පරිසරයත් සංවර්ධනය කළයුතුයි – ජනපති

    නියාමනය පමණක් මදි පරිසරයත් සංවර්ධනය කළයුතුයි – ජනපති

    ජීවන වියදම පාලනයට ඇති ප්‍රධානම මග නිෂ්පාදනය සහ ආදායම් වැඩි කිරීම. ආනයනය කරන භාණ්ඩ මිල තීරණය වන්නේ ලෝක වෙළෙඳපොළ බලවේග අනුව. ඒවායේ මිල පාලනය කළ හැක්කේ බදු අඩු කිරීමෙන්. රට තුළ වගා කළහැකි භෝග ද්‍රව්‍ය 17ක් හඳුනාගෙන ඒවා ආනයනය සීමා කළා. දැන් මේ භෝග රට තුළ වගා කිරීම පටන් අරන්. ඉන් ලැබෙන ආදායම යන්නේ අපේ ගොවීනට : අපේ ගමට” ජනාධිපති ගෝඨාභය රාජපක්ෂ මහතා කියා සිටී.

    කලින් රුපියල් 32ක් වූ  වී කිලෝවකට ගෙවන මිල රුපියල් 50ට වැඩි කිරීමෙන් පසු නිෂ්පාදනය සේම ගොවීන්ගේ ආදායම ද ඉහළ ගිය බව ද ජනපතිවරයා සඳහන් කරයි. වී මිල වැඩි කිරීමේ වාසිය එක් ප්‍රදේශයකට නොව මුලතිව්, කිලිනොච්චි, යාපනය දිස්ත්‍රික්කවල ජනතාවට ද හිමි වී ඇති බවත් මානව හිමිකම් ගැන කථා කරන පිරිස් මේ නිසා ජනතාවට ලැබී ඇති ප්‍රතිලාභ ගැන කිසිවක් නොකියන බවත් ජනාධිපතිවරයා පෙන්වා දෙයි.

    ජනාධිපති රාජපක්ෂ මහතා මේ අදහස් පළ කළේ අද (18) සවස ජනාධිපති කාර්යාලීය සභා ශාලාවේ පැවති ශ්‍රී ලංකා පොදුජන පෙරමුණේ කාන්තා නියෝජිතවරියන් හා ක්‍රියාකාරිනියන්ගේ හමුව අමතමිනි. ශ්‍රී ලංකා පොදුජන පෙරමුණ නියෝජනය කරමින් සෑම දිස්ත්‍රික්කයකින්ම කාන්තා ක්‍රියාකාරිණිහූ සහ ප්‍රාදේශීය සභා මන්ත්‍රීනීහූ හමුවට එක්ව සිටියහ.

    තමාගෙත්, තම රජයේත් ජයග්‍රහණය උදෙසා ශ්‍රි ලංකා පොදුජන පෙරමුණේ කාන්තා සංවිධානයෙන් ලැබුණු දායකත්වය අගයමින් අදහස් දැක්වීම ආරම්භ කළ ජනාධිපතිවරයා රජයේ ප්‍රගතිය මැන බැලීමේදී, රජය අනුගමනය කරන ප්‍රතිපත්ති සහ ඒවායේ ප්‍රතිලාභ සලකා බලන්නැයි ඉල්ලීමක් කළේය.

    “කෘෂිකර්මය පදනම් කරගත් ආර්ථික සංවර්ධනයේ ප්‍රතිලාභ සියලු ජනතාව අතර බෙදී යනවා. එමගින් නිෂ්පාදකයාට සේම පාරිභෝගිකයාටත් සාධාරණය ඉටුකරන්න පිළිවන්. අපි බලයට පැමිණීමෙන් පසු විශාල වැඩකොටසක් කළා. උපයන විට ගෙවීමේ බද්ද අහෝසි කිරීමෙන් රජයේ සේවකයන්ගේ ආදායම ඉහළ ගියා. මේ ප්‍රගතිය නොදකින පිරිස් දුර්මත සමාජගත කරමින් රට යළිත් විනාශයට ඇද දැමීමට උත්සාහ කරමින් සිටිනවා” ජනාධිපතිවරයා සඳහන් කළේය.

    ජනතාවගේ ප්‍රශ්න හඳුනා ගත්විට රජයට නිහඬව සිටීමට නොහැකිය. දේශීය කිරි කර්මාන්තය දියුණු කිරීම සඳහා ගවයනට ආහාර පිණිස තෘණ බිම් ඇතිකළ යුතුය. පාරම්පරික ඉඩම් ගොවීනට අහිමි වී ඇත්නම් ඊට විසඳුමක් දීම පරිසර විනාශයක් නොවේ. රජය කිසිවිටෙකත් වනාන්තර කපා දමන්නට අනුබල දී නැත. 2030 වන විට බලශක්ති අවශ්‍යතාවෙන් 70%ක් පුනර්ජනනීය මූලාශ්‍ර මගින් සපුරා ගැනීමට සැලසුම් කර තිබේ. පරිසර සංරක්ෂණයට එය විශාල පිටිවහලක් වනු නිසැකය. කටු පොල් වගාව නතර කිරීමෙන් දිස්ත්‍රික්ක ගණනාවක සිදු වෙමින් තිබූ පරිසර හානියට තිත තැබිණි. පරිසරය නියාමනය කරනවා සේම සංවර්ධනය කිරීම ද අවශ්‍ය බව රාජපක්ෂ මහතා අවධාරණය කළේය.

    රජය බලයට පැමිණීමෙන් පසු ජනතාවගේ යහපත පිණිස විශාල කාර්යභාරයක් ඉටුකර ඇති බව පෙන්වා දුන් ජනපතිවරයා රටට සතුරු බලවේග මේ සත්‍යය යටපත් කිරීමට බොරු ගොතා ප්‍රචාරය කරන බව කීය. මහින්ද රාජපක්ෂ ජනාධිපතිතුමා තිස් අවුරුදු යුද්ධය අවසන් කොට පෙර නොවූ විරු ආර්ථික සංවර්ධනයක් ඇති කළේය. එහෙත් විරුද්ධවාදීන් ගෙන ගිය අසත්‍ය ප්‍රචාරයෙන් මුලා වූ ජනයා 2015 දී එතුමා පරාජය කළහ. ඉන්පසු සිදුවූයේ දැවැන්ත විනාශයකි. ජාතික ආරක්ෂාව බිඳ වැටිණ. ආර්ථිකය ද කඩා වැටිණ. රටේ ස්වාධීනත්වය පාවා දෙනු ලැබීය. දැන් නැවත වරක් අපි රට එදා තිබුණු තත්ත්වයට පත් කිරීමට වැඩකරමින් සිටින්නෙමු යයි ජනාධිපතිවරයා සඳහන් කළේය.

    තමාගේ අවංක උත්සාහය රට ගොඩනැගීමෙන් ජනතාවට සමෘද්ධිය අත්කරදීම බව කී ජනාධිපති රාජපක්ෂ මහතා ඒ අරමුණ දිනාගැනීම සඳහා එක්ව වැඩකරමුයයි පොදුජන පෙරමුණු කාන්තා නියෝජිතවරියනට පැවසීය.

    අද හමුවට සහභාගී වූ කාන්තා නියෝජිතවරියෝ පොදුවේ සමාජයටත්, තමන් අයත් දිස්ත්‍රික්කවලටත් අදාළ ප්‍රශ්න ගණනාවක් ජනාධිපතිතුමා හමුවේ විස්තර කළහ. ස්වයං රැකියා මාර්ග උදා කිරීම, බැංකු ණය ලබා ගැනීමේ අපහසුව, ක්ෂුද්‍ර ණය ගැටළුව, ගම්බද නිවාස ප්‍රශ්නය, ජීවන වියදම, මත්ද්‍රව්‍ය උවදුර, දරුවන්ගේ අධ්‍යාපන ප්‍රශ්න ඒ අතර විය. මත්ද්‍රව්‍ය පාලනය සඳහා දැන් විධිමත් වැඩපිළිවෙළක් ක්‍රියාත්මක කර ඇති බවත් උවදුර මුලිමනින් තුරන් කිරීමට යම් කලක් ගතවනු ඇති බවත් ජනාධිපතිවරයා කීය.

    මේ වසර තුළ ස්ත්‍රීන් උදෙසා ස්වයං රැකියා දෙලක්ෂයක් උත්පාදනය කිරීමට නිශ්චිත පියවර ගෙන ඇතැයි ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතා පැවසීය. “රජය කරවල සහ උම්බලකඩ ආනයනය සීමා කළා. කාන්තාවනට රැකියාවක් ලෙස දැන් මේ ද්‍රව්‍ය  සැකසීමේ නිරතවන්න පිළිවන්. කෘෂිකාර්මික ක්ෂේත්‍රය තුළ ස්වයං රැකියා උත්පාදනයට පුළුල් ඉඩකඩක් තිබෙනවා” බැසිල් රාජපක්ෂ මහතා පැවසීය.

    ශ්‍රී ලංකා පොදුජන කාන්තා පෙරමුණේ නායිකා අමාත්‍ය පවිත්‍රා වන්නිආරච්චි, රාජ්‍ය ඇමතිනි සීතා අරඹේපොළ, පාර්ලිමේන්තු මන්ත්‍රීවරියන් වන ගීතා කුමාරසිංහ, කෝකිලා ගුණවර්ධන, මංජුලා දිසානායක, රාජිකා වික්‍රමසිංහ, මුදිතා ප්‍රශාන්ති, ඩයනා ගමගේ යන මහත්මීහූ මේ අවස්ථාවට එක්ව සිටියහ.

  • සංශෝධිත නිරෝධායන මාර්ගෝපදේශ මාලාව: ඇතැමුන්ට නිවෙස් නිරෝධායනයට ද ඉඩ

    සංශෝධිත නිරෝධායන මාර්ගෝපදේශ මාලාව: ඇතැමුන්ට නිවෙස් නිරෝධායනයට ද ඉඩ

    විදෙස් රටවල සිට ශ්‍රී ලංකාවට පැමිණෙන ශ්‍රී ලාංකිකයින්, ද්විත්ව පුරවැසියන් සහ විදේශිකයින් සඳහා වන සංශෝධිත නිරෝධායන මාර්ගෝපදේශ මාලාව අද (18) සෞඛ්‍ය අධ්‍යක්ෂ ජනරාල්වරයා විසින් නිකුත් කළා.

    නව සංශෝධන අනුව ඇතැමුන්ට නිවෙස් නිරෝධායනයට ද ඉඩ කඩ සැලසීම විශේෂත්වයක්.

    එම මාර්ගෝපදේශයන් ට අනුව මෙරටට පැමිණෙන සියලුම මගීන් හෝ සංචාරකයින් විදේශ අමාත්‍යාංශයෙන් හෝ වෙනත් අදාළ බලධාරීන්ගෙන් හෝ ශ්‍රී ලංකා සංචාරක මණ්ඩලය හරහා රට තුළට ඇතුළු වීමට අනුමැතිය ලබා ගත යුතු අතර සියලුම සංචාරකයින් විසින් පුරවන ලද සෞඛ්‍ය ප්‍රකාශන ආකෘති පත්‍රය ගුවන් තොටුපලේ පැමිණෙන පර්යන්තයේ සෞඛ්‍ය කවුන්ටරවල සිටින ගුවන් තොටුපල සෞඛ්‍ය නිලධාරීන්ගේ කාර්ය මණ්ඩලයට ඉදිරිපත් කළ යුතුයි.

    ශ්‍රී ලාංකික පුරවැසියන් / ද්විත්ව පුරවැසියන් සහ විදේශීය ජාතිකයන් සඳහා නිරෝධායන පියවර.

    COVID-19 එන්නත නිර්දේශිත පරිදි සම්පූර්ණ කරන ලද මගීන් සහ එන්නත අවසන් කිරීමෙන් සති දෙකකට පසුව පැමිණෙන මගීන් ;

    • පැමිණීමේදී එන්නත ලබාගත් බවට සඳහන් සහතිකයේ මුල් පිටපත (වෙනත් භාෂාවකින් නම් සහතික කළ ඉංග්‍රීසි පරිවර්තනය) ගුවන් තොටුපල සෞඛ්‍ය නිලධාරීන් වෙත ඉදිරිපත් කළ යුතුය.
    • ඔවුන්ව රජයේ බලධාරීන් විසින් නිරෝධායන හෝටලයකට / මධ්‍යස්ථානයකට ප්‍රවාහනය කළ යුතුය.පැමිණ පැය 24 ක් ඇතුළත (පළමු දින) කෝවිඩ් -19 පීසීආර් පරීක්ෂණයක් සෞඛ්‍ය අමාත්‍යාංශයේ අනුමත පෞද්ගලික අංශයේ රසායනාගාර / රාජ්‍ය අංශයේ රසායනාගාරයෙන් කළ යුතුය.
    • PCR වාර්තාව ලබා ගත් පසු, PCR නියැදි එකතු කිරීමේ දිනය සහ PCR පරීක්ෂණයේ ප්‍රතිඵල සඳහන් කරමින් හෝටලයේ / මධ්‍යස්ථානයේ නිරෝධායන අධිකාරිය විසින් මුදාහරින ලේඛනයක් නිකුත් කිරීමෙන් නිරෝධායන හෝටලයෙන් / මධ්‍යස්ථානයෙන් නිදහස් කළ හැකිය.
    • ඔවුන්ගේ නිවසට පැමිණි වහාම. ඔවුන් ප්‍රදේශයේ සෞඛ්‍ය වෛද්‍ය නිලධාරිවරයාට (MOH) දුරකථනයෙන් හෝ විද්‍යුත් තැපෑලෙන් දැනුම් දී නිරෝධායන අධිකාරිය විසින් නිකුත් කරන ලද මුදාහරින ලද ලේඛනය ඉදිරිපත් කළ යුතුය.
    • ප්‍රදේශයේ MOH වෙත දැනුම් දීමෙන් පසුව මගීන් එන්නත සම්පූර්ණ කර ඇති අතර පැමිණීමේ පළමු දිනයේදී කළ සෘණාත්මක PCR වාර්තාවක් ඇති බැවින්, ඔවුන් තවදුරටත් නිරෝධායනය කිරීම අවශ්‍ය නොවේ.
    • සියලුම සංචාරකයින් ශ්‍රී ලංකාවට පැමිණීමෙන් පසු හත්වන දින නැවතත් සෞඛ්‍ය අමාත්‍යාංශයේ අනුමත පෞද්ගලික අංශයේ රසායනාගාර / රාජ්‍ය අංශයේ රසායනාගාරයෙකින් පී.සී.ආර් පරීක්ෂණයක් කරගත යුතුය.
    • මේ අතර තුර උණ හෝ ශ්වසන රෝග ලක්ෂණ පෙන්නුම් කරන්නේ නම්, ප්‍රදේශයේ MOH වෙත වහාම දැනුම් දිය යුතු අතර කොරෝනා නිරෝධායන හෝ ප්‍රතිකාර සදහා යොමුවිය යුතුය.

    COVID-19 එන්නත ලබා නොදුන් / නිර්දේශිත එන්නත් මාත්‍රාව සම්පූර්ණ නොකළ / එන්නත් කර සති දෙකකට අඩු කාලයක් තුළ ශ්‍රී ලංකාවට පැමිණෙන්නන්.

    • හෝටල් නිරෝධායනයට භාජනය වන මගීන් (තනි පුද්ගලයන් හෝ පවුලේ වල සාමාජිකයන් සාමුහිකව බෙදාගෙන ඇති විට) COVID-19 PCR පරීක්ෂණ ශ්‍රී ලංකාවට පැමිණ පළමු හා හත්වන දිනවල දී සිදු කළ යුතුය.
    • ප්‍රතිඵල ලබා ගත් පසු සහ පරීක්ෂණ දෙකම සෘණාත්මක නම්, හත්වන දිනය අවසන් වූ පසු හෝටලයෙන් නිදහස් කරනු ලැබේ. ඔවුන්ට තම පෞද්ගලික ප්‍රවාහනයකින් නිවෙස් කරා යාමට හැකි අතර වාහනවල රියදුරන් සුදුසු පුද්ගලික ආරක්ෂක උපකරණ පැළඳිම හා සංචාරකයින් ප්‍රවාහනය කිරීමේදී COVID-19 වැළැක්වීමේ පියවර අනුගමනය කළ යුතුය.
    • ඔවුන්ගේ නිවසට පැමිණි වහාම. ඔවුන් වහාම ප්‍රාදේශීය සෞඛ්‍ය නිලධාරියාට (MOH) දුරකථනයෙන් හෝ විද්‍යුත් තැපෑලෙන් දැනුම් දිය යුතු අතර එහිදී හෝටලයේ හෝ නිරෝධායන ආයතනය විසින් නිකුත් කරන ලද මුදාහැරීමේ ලේඛනය ද ඉදිරිපත් කළ යුතුය.
    • ඉතිරි නිරෝධායන කාල සීමාව (ඉතිරි දින 7) අනිවාර්යයෙන්ම නිවාස නිරෝධායනය කළ යුතුය.
    • නිරෝධායන කාල සීමාව තුළ COVID-19 හි උණ හෝ ශ්වසන රෝග ලක්ෂණ පෙන්නුම් කරන්නේ නම්, ප්‍රදේශයේ MOH ට වහාම දැනුම් දිය යුතුය.
    • පළමු දින හෝ හත්වෙනි දිනදී කරන ලද PCR පරීක්ෂණ ප්‍රතිඵල ධනාත්මක නම්, එම ප්‍රදේශයේ MOH වෙත දැනුම් දී සෞඛ්‍ය අමාත්‍යාංශයේ ප්‍රතිකාර ක්‍රම අනුගමනය කළ යුතුය.

    හවුලේ පොදු පහසුකම් සහිත මධ්‍යස්ථාන නිරෝධායනයකට භාජනය වන මගීන්

    • COVID-19 PCR පරීක්ෂාව පළමු හා හත්වෙනි දින සිදු කළ යුතුය.
    • ප්‍රතිඵල ලැබූ විට සහ පරීක්ෂණ දෙකම සෘණාත්මක නම්, දහවන දිනය අවසන් වූ පසු නිරෝධායන මධ්‍යස්ථානයෙන් පිටත්ව යා හැකිය.
    • ඔවුන් ගෙදර යාමට පුද්ගලික ප්‍රවාහන පහසුකම් තමා විසින්ම සපයා ගත යුතුය.
    • වාහනයේ රියදුරන් සුදුසු පුද්ගලික ආරක්ෂක උපකරණ පැළඳිය යුතු අතර සංචාරකයින් ප්‍රවාහනය කිරීමේදී කොරෝනා වෛරෙසය වැළැක්වීමේ පියවර අනුගමනය කළ යුතුය.
    • ඔවුන්ගේ නිවසට පැමිණි වහාම. ඔවුන් වහාම ප්‍රාදේශීය සෞඛ්‍ය නිලධාරියාට (MOH) දුරකථනයෙන් හෝ විද්‍යුත් තැපෑලෙන් දැනුම් දිය යුතු අතර හෝටලයේ නිරෝධායන ආයතනය විසින් නිකුත් කරන ලද මුදාහැරීමේ ලේඛනයක් ඉදිරිපත් කළ යුතුය.
    • ඉතිරි නිරෝධායන කාල සීමාව (දින 14 න් ඉතිරි දින හතර) අනිවාර්යයෙන්ම නිවාස නිරෝධායනය කළ යුතුය.
    • නිරෝධායන කාල සීමාව තුළ COVID-19 හි උණ හෝ ශ්වසන රෝග ලක්ෂණ පෙන්නුම් කරන්නේ නම්, ප්‍රදේශයේ MOH ට වහාම දැනුම් දිය යුතුය.
    • පළමු දින හෝ හත්වෙනි දින PCR පරීක්ෂණ ප්‍රතිඵල ධනාත්මක නම්, එම ප්‍රදේශය MOH වෙත දැනුම් දී සෞඛ්‍ය අමාත්‍යාංශයේ ප්‍රතිකාර ක්‍රම අනුගමනය කළ යුතුය.
    • මේ අතර ශ්‍රී ලංකාවේ සංචාරය සදහා විදේශයන්ගෙන් පැමිණෙන සංචාරකයින් සඳහා ද නිරෝධායන රෙගුලාසි ලිහිල් කර ඇති අතර ඔවුන් ට අදාළ ක්‍රියාමාර්ගවලට අනුව ශ්‍රී ලංකා සංචාරක මණ්ඩලයේ වෙබ් අඩවිය හරහා ලියාපදිංචි වී අනුමැතිය ලබා ගත යුතු අතර ශ්‍රී ලංකා රජය විසින් සංචාරකයින් සඳහා පනවා ඇති මාර්ගෝපදේශ පිළිපැදිය යුතුය.
  • ඇස් සහ ඇස් කණ්නාඩි ගැන විශේෂඥයෙකුගෙන් සුපිරි හෙළිදරව්වක්

    ඇස් සහ ඇස් කණ්නාඩි ගැන විශේෂඥයෙකුගෙන් සුපිරි හෙළිදරව්වක්

    මිනිස් සිරුරේ අවයව අතරින් ප්‍රධාන සහ සුවිශේෂී අවයවක් තමයි ‘ඇස’ කියන්නෙ. පංච ඉන්ද්‍රියන්ගෙන් වැඩි අවධානයක් යොමු කල හැකි ඇස මගින් අපට පෙනීම ලබා දෙනවා. මේ පෙනීම නිසාම අනෙකුත් ඉන්ද්‍රියන්ගෙන් ඉටුවෙන කාර්යයන් අපට පහසු වෙන බව ඔබ දැනටමත් දන්නවා.

    මොහොතකට හිතන්න ඔබට ඒ තරම් වටින ඇස ලෙඩ උනොත්? ඔබට තව කෙනෙකුගේ උදවු උපකාර නැතිව කිසිම දෙයක් කරගන්න නොහැකි වෙනවා. ඒ නිසාමයි ඔබේ ඇස් මේ තරම් ඔබට වටින්නේ. පළපුරුදු දෘෂ්ඨිවේදියෙකු විසින් කරන මේ දැනුවත් කිරීම ඔබ දැනටමත් ඇස් කණ්ණාඩි භාවිතා කරනවා නම් හෝ ඉදිරියේදී භාවිතා කරන්න බලාපොරොත්තු වෙනවානම්  වැදගත් වේවි.

    වර්තමානයේදී බහුලව දක්නට ලැබෙන අක්ෂි රෝග මොනවාද?

    බහුලවම අද වෙනකොට දකින්න තියෙන්නෙ වයසත් සමග ඇතිවෙන පෙනීමේ දුර්වලතා. වයස අවුරුදු 40 ට වැඩි අයට ළග පෙනීම අඩු වීමත්, වයස අවුරුදු 40 ට අඩු අයට දුර පෙනීම අඩු වීමත් සුලභවම දකින්න පුලුවන්. වයස අවුරුදු 40 ට වැඩි පුද්ගලයෙක්ට මේ පෙනීමේ දුර්වලතා ඇති වීම සාමාන්‍ය උනත් 40 ට අඩු පිරිස මේ තත්වයට පත් වෙන්නේ බොහෝ දුරට වැරදි ජීවන රටාව නිසයි.මීට අමතරව දියවැඩියා රෝගීන්ටත්, අක්ෂි පීඩනය ඇති අයටත් ග්ලූකොමා වැනි රෝගී තත්වයන් නිරන්තරයෙන් හමුවෙනවා.

    ඇස් කණ්ණාඩියක් භාවිතා කල යුත්තේ කුමන අවස්ථාවේදී ද?

    ඔබට වයස 40 ට වැඩි නම් සාමාන්‍යෙයන් පෙනීමේ දුර්වලතා ඇති වෙන්න පටන් ගන්නවා. ඒ අවස්ථාවේදී සුදුසුකමු ලත් වෛද්‍යවරයෙකු වෙත ගොස් ඇස් පරීක්ෂා කරගත යුතුයි. 40 ට අඩු කෙනෙක් නම් දුර පෙනීම අඩු බව හෝ ලග පෙනීමේ අඩුවක් දැනෙනවානම් කල් නොයවාම වෛද්‍යවරයෙකු වෙත යොමු විය යුතු යි.

    ඇස් දුර්වලවීමට බලපාන හේතු?

    වැඩිහිටි පිරිසෙන් බොහෝ දෙනෙක්ට දියවැඩියාව, අධි රුධිර පීඩනය නිසා ඇස් දුර්වල වෙනවා. ඒ වගේ අද වන විට මිනිසාගේ කාර්යබහුල ජීවන රටාවත් තවත් හේතුවක්. පර්ගණකයේ හෝ දුරකතනය වැනි ඩිජිටල් තිර දෙස බොහෝ වෙලා බලා සිටීම, විවිධ පෝෂණ ඌණතා, මානසික ආතතිය වගේම උපතින්ම ඇස් දුර්වලව පිහිටීමත්  පෙන්වා දෙන්න පුලුවන්.

    2015-New-Fashion-Men-Titanium-Eyeglasses-Frames-Men-Brand-Business-Titanium-Eyeglasses-Half-frame-With-Glasses | Optique of Denver

    ඇස් කණ්ණාඩියක් පාවිච්චි කල යුත්තේ ඇයි?

    ඔබට අක්ෂි දුර්වලතාවයක් තිබෙන බව හදුනාගත් වහාම ද්‍යෛවරයෙකු වෙත යොමු වීම අත්‍යවශ්‍යයි. ඇතැම් විට එහ්දී ඔබට අදාළ ඖෂධ නියම කරනවා වගේම ඇස් කණ්ණාඩියක් භාවිතා කරන්නත් නිර්දේශ කරනවා. ඒ අවස්තාවේදී ඔබ කල් නොයවාම එකී උපැස් යුවල සුදුසුකමු ලත් දෘෂ්ඨිවේදියෙකුගෙන් සාදා ගත යුතු යි. අක්ෂි ආබාධ සුව කිරීමට ඖෂධ පමණක් ප්‍රමාණවත් වෙන්නේ නැහැ.ඇස් කණ්ණාඩි භාවිතයෙන් වැඩිහිටි ඔබගේ අක්ෂි දුර්වලතා සුව කල නොහැකි වුනත් 100% ක්ම ඔබට පැහැදිලි දැකීමක් ලබා දෙන්න පුලුවන්.නමුත් උපැස් යුවලකින් 80% ක් දරුවන්ගේ අක්ෂි රෝග සුව කල හැකි යි.

    නිවැරදිව ඇස් කණ්ණාඩියක් තෝරාගන්නේ කොහොම ද?

    පළමුවෙන්ම ඔබ සුදුසුකම්ලත් වෛද්‍යවරයෙකුගේන් ඇස් පරීක්ෂා කර ගැනීම කල යුතු යි. ඔහුගේ නිර්දේශය සමග දෘෂ්ඨිවේදියෙකු වෙත යා යුතු යි. එහිදී එම ආයතනය ඔවුන්ගේ සේවා පලපුරුද්ද සමග බැදී සිටිනවා ඔබට අවශ්‍ය වගේම සුදුසුම උපැස් යුවල ලබා දෙන්න

    ඇස් කණ්ණාඩියක් භාවිතා කල යුත්තේ කොහොමද?

    පළමුවෙන්ම ඇස් කණ්ණාඩි පිරිසිදුව තබා ගැනීම වැදගත්.නිතරම සෝදා තැබීම කල යුතුයි.ඔබට වෛද්‍යවරයා නිර්දේශ කරන කාලය තුළ අනිවාර්යෙන්ම පැළදසිටීම කරන්න.එහෙම නැතිනම් බලාපොරොත්තු වන ප්‍රතිපල ඔබට ලබා ගන්න බැහැ. කණ්ණාඩියේ කල් පැවැත්ම ගැන අවධානය යොමු කරන විට අත් දෙකෙන්ම කණ්ණාඩිය පැළදීම සහ ගැලවීම කල යුතු යි.එසේ නොකරන විට කණ්ණාඩි රාමුව ඇද වීම සිදු වෙනවා.එය ඔබේ පෙනීමට බලපානවා.

    විශේෂම කාරණය ඔබ උපැස් යුවල නොපලදින අවස්ථාවේ එය කණ්ණාඩි ඇසුරුමේම රදවන්න.එසේ නොමැති විට කාච සීරීමට ලක් වෙනවා.එවැනි කාච වලින් ඔබේ පෙනීම නිසි ආකාරයෙන් ලබා දෙන්නේ නැහැ. ඒ වගේම ඔබ වැඩිහිටියෙක් නම් වසරක් පාසාත් ළමුන්ගේ මාස හයකට වරක්වත් නැවත නැවත ඇස් පරීක්ෂා කරවා ගන්නත් අමතක කරන්න එපා.

    අක්ෂිදුර්වල වෙන්න කලින් ඇස් ආරක්ෂා කරගන්නේ කොහොමද?

    ඔව්, ඇස් දුර්වල වෙන්න කලින් ඇස් ආරක්ෂා කරගැනීම තමයි වැදගත්. ඔබ නිතර ජංගම දුරකතන පරිගණක වැනි ඩිජිටල් තිර ඉදිරියේ වැඩියෙන් වැඩ කරනවා නම් දෘෂ්ඨිවේදියෙක් හමුවී UTMC ආවරණයක් සහිත ඇස් කණ්ණාඩියක් මිලදී ගන්න. දැඩි හිරු රශ්මියට නිරාවරණය වනවා නම් ඊට අදාල කාච (cooling lens) සහිත උපැස් යුවලක් තොරා ගන්න. මීට අමතරව ආහාර රටාවේ වෙනස්කම් වගේම මානසික ආතතිය අවම කරගන්නවා නම් ඔබේ දෑස් දුර්වල වීම අවම කරගන්න පුළුවන්.

    සංවාද සටහන –  මධුභාෂිණී උරේෂා