Category: සුපිරි Sports

දකුණු අප්‍රිකාවට එරෙහිව වොන්ඩරස්හි පැවැති දෙවැනි ටෙස්ට් තරගයේදී ඇඟිල්ලේ ආබාධයකට ලක් වුණු ශ්‍රී ලංකා නායක දිමුත් කරුණාරත්න තවමත් සුව අතට පත් නොවීම හේතුවෙන් සංචාරක එංගලන්ත පිලට එරෙහිව අද (14 දා) ඇරැඹි පළමු ටෙස්ට් තරගය මෙහෙයවීමේ වගකීම මැද පෙළ පිතිකරු දිනේෂ් චන්දිමාල්ට පැවැරී තිබේ.

දකුණු අප්‍රිකාවට එරෙහිව පැවැති දෙවැනි ටෙස්ට් තරගයේදී පන්දුව වැදීම මද මහපටැඟිල්ලේ ඉහළ කොටසේ අස්ථියක බිඳුණු අතර එය තවමත් යථා තත්ත්වයට පත් නොවීම අද තරගයට ක්‍රීඩා කිරීමේ අවස්ථාව කරුණාරත්න අහිමිවීමට හේතු වී තිබේ.

කණ්ඩායම මෙහෙයවීමේ වගකීම හිමි චන්දිමාල් නායකත්වය හිමිවීමෙන් පසු ලැබුණු පළමු වගකීම වූ කාසියේ වාසිය දිනා ගනිමින් ප්‍රථමයෙන් පන්දුවට පහර දීමට තීරණය කළේය. සාම්ප්‍රදායික ගාල්ල තණතීරුවේදී පළමු දින 2 තුළ පිතිකරුවන්ට ලබා දෙනු ලබන දායකත්වය ප්‍රධාන කොට ප්‍රථමයෙන් පන්දුවට පහර දීමට තීරණය කළ නමුත්, ගෙවී ගිව දවස් කීපයේදී වර්ෂාවෙන් බාධා ඇතිවීම නිසා, උදෑසන කාලයේදී වේග පන්දු යවන්නන්ට සුළු දායකත්වයක් ලබාදෙනු ඇතැයි අපේක්ෂා කළ හැක.

එංගලන්ත කඳවුරෙන් වාර්තා වුණු විශේෂ කරුණ වන්නේ එංගලන්තය වෙනුවෙන් ටෙස්ට් වරම් දිනූ 697 වැනි ක්‍රීඩකයා ලෙසින් ඩෑන් ලෝරන්ස් ටෙස්ට් වරම් දිනා ගැනීමයි. ටෙස්ට් වරම් හිමිවීමේදී සාම්ප්‍රදායිකව ලබා දෙනු ලබන කැප් තොප්පිය, ඔහු කළින් ක්‍රීඩා කළ එසෙක්ස් කණ්ඩායමේ නායක ජේම්ස් ෆෝස්ටර් විසින් පිරිනමන ලදී. ෆෝස්ටර් වත්මන් එංගලන්ත කණ්ඩායමේ කඩුලු රැකීමේ උපදේශකයකු ලෙසින් කටයුතු කරනු ඇත.

ශ්‍රී ලංකා කණ්ඩායම බලාපොරොත්තු වූ පරිදි ප්‍රධාන දඟ පන්දු යවන්නන් තිදෙනෙකු සමඟ අවතීර්ණ වද්දී එංගලන්ත පිල ඔවුන් සතු ප්‍රධානම දඟ පන්දු යවන්නන් දෙදෙනා වන ජැක් ලීච් සහ ඩොම් බෙස් කැඳවමින් අවතීර්ණ වී තිබේ. අද තරගයේදී ජේම්ස් ඇන්ඩර්සන්ට ස්ථානය අහිමිවීම කැපී පෙනෙන අතර වමතින් පන්දු යවන සෑම් කරන්, මාක් වුඩ් සහ ස්ටුවර්ට් බ්‍රෝඩ් වේග පන්දු යවන්නන් ලෙස කණ්ඩායමට එක්ව සිටියි.

එංගලන්තය වෙනුවෙන් ටෙස්ට් ක්‍රිකට් ක්‍රීඩා කළ,  මෑතකදී අභාවප්‍රාප්ත වුණු ක්‍රීඩකයින් වන ජෝන් එඩ්රිච්, රොබින් ජැක්මන් සහ ඩොම් ස්මිත් ට සිහි කිරීමක් වශයෙන් එංගලන්ත කණ්ඩායම මෙම තරගයේදී කළු පැටි පැළඳ ක්‍රීඩා කරති.

ශ්‍රී ලංකා පිල – 1. ළහිරු තිරිමාන්න, 2. කුසල් පෙරේරා, 3. කුසල් මෙන්ඩිස්, 4. දිනේෂ් චන්දිමාල් (නායක), 5. ඇන්ජලෝ මැතිව්ස්, 6.නිරෝෂන් දික්වැල්ල, 7. දසුන් ශානක, 8. වනිඳු හසරංග, 9. ඩිල්රුවන් පෙරේරා, 10. ලසිත් ඇඹුල්දෙණිය, 11. අසිත ප්‍රනාන්දු

එංගලන්ත පිල – 1. ඩොම් සිබ්ලි, 2. සැක් ක්‍රෝලි, 3. ජොනී බෙයාස්ටූ, 4. ජෝ රූට් (නායක), 5. ඩෑන් ලෝරන්ස්, 6. ජොස් බට්ලර්, 7. සෑම් කරන්, 8. ඩොම් බෙස්, 9. ජැක් ලීච්, 10. මාක් වුඩ්, 11. ස්ටුවර්ට් බ්‍රෝඩ්.

text by Sri lanka criket

දකුණු අප්‍රිකාවට එරෙහි පැවැති ටෙස්ට් තරගාවලිය නිමාවීමත් සමඟ හරියටම දින 7 ක කාලයකින් පසු ශ්‍රී ලංකා කණ්ඩායම හමුවේ තවත් අභියෝගාත්මක තරගාවලියකි. ඒ එංගලන්තයට එරෙහිව පැවැත්වෙන තරග 2 කින් සමන්විත ටෙස්ට් තරගාවලියයි.

ලෝක ටෙස්ට් ශූරතාවලිය යටතේ පැවැත්වෙන මෙම තරගාවලියේ ආරම්භයට පෙර ශ්‍රී ලංකාවට ඇත්තේ එතරම් සුභදායී මතකයක් නොවේය. දකුණු අප්‍රිකාවට එරෙහිව පැවැති තරගාවලිය පරාජයට පත්වීම, ප්‍රධාන ක්‍රීඩකයින් 7 දෙනෙකුම ආබාධයන් වලට ලක්ව සිටීම හේතුවෙන් ශ්‍රී ලංකා කණ්ඩායම මෙම තරගාවලියට අවතීර්ණ වනුයේ තරමක් දෙගිඩියාවකින් යැයි කිවහොත් නිවැරදිය.

එහෙත් තරගාවලිය පිළිබඳව අදහස් දක්වා සිටින ශ්‍රී ලංකා කණ්ඩායමේ කඩුලු රකින්නා වන මැද පෙළ පිතිකරු නිරෝෂන් දික්වැල්ල පවසන්නේ දකුණු අප්‍රිකානු තරගාවලියේදී සිදුවුණු අතපසුවීම් නිවැරදි කරගනිමින් සාර්ථකව ආරම්භයක් ලබා ගතහොත් තරගාවලිය ජයග්‍රහණය කිරීමේ වැඩි හැකියාවක් තම කණ්ඩායම සතුව පවතින බවයි.

“ඇත්තටම දකුණු අප්‍රිකාවේදීත් අපිට ඒ සැලසුම් ඒ විදියටම තිබුණා. නමුත් අපේ ක්‍රීඩකයින්ට ඔවුන්ගේ තත්ත්වයන් සහ අවස්ථාවන් වලට ගැලපෙන ආකාරයට ක්‍රීඩා කරගන්න බැරි වුණා. විශේෂයෙන්ම ටෙස්ට් තරගයක් ජයග්‍රහණය කරන්න නම් මුලින්ම විනාඩි 10 ක්, විනාඩි 20 ක්, ඊට පස්සේ ඒක පැයක්, ෂෙසන් දක්වා කියන ගමන අපි මුලින්ම ජයග්‍රහණය කරන්න ඕන. එහෙම තමයි ටෙස්ට් තරගයක් ජයග්‍රහණය කරා යන්න ඕන. අපිට ඒ දේ දකුණු අප්‍රිකාවේදි කරගන්න බැරි වුණා. නමුත් එහෙදි වුණු අඩු පාඩු මොනවද කියන එක ගැන අපි හඳුනාගෙන තියෙන්නේ. අන්න ඒ වගේ අපිට මේ තරගාවලියේ ආරම්භයේ ඉඳන්ම ක්‍රීඩා කිරීමට හැකි වුණොත් කණ්ඩායමක් විදියට ලොකු දෙයක් කරන්න පුලුවන් වෙයි කියලා මම විශ්වාස කරනවා”යි දික්වැල්ල සඳහන් කරයි.

දකුණු අප්‍රිකාවට එරෙහිව පැවැති ටෙස්ට් තරග 2 ම දින 3 ක් ඇතුළත හමාරවීම කැපී පෙනුණු අතර එහිදී ශ්‍රී ලංකා පිල ක්‍රීඩා කරන ලද ඉනිම 4 න් අවස්ථා පන්දුවාර 60 කට වඩා වැඩියෙන් ක්‍රීඩා කර ඇත්තේ එක් ඉනිමකදී පමණි. පළමු තරගයේ පළමු ඉනිමේදී පන්දුවාර 96 කට ක්‍රීඩා කරමින් රැස් කරන ලද ලකුණු 396 ක ඉනිමෙන් පසු අනෙක් ඉනිම 3 දීම ශ්‍රී ලංකා පිල ක්‍රීඩා කර ඇත්තේ පන්දුවාර 143.3 කට (ඕවර 46.1, දෙවැනි ටෙස්ට් තරගය – පළමු ඉනිම ඕවර 40.3 සහ දෙවැනි ඉනිම ඕවර 56.5) පමණි. එය දකුණු අප්‍රිකානු පිල පළමු ඉනිමේදී ක්‍රීඩා කරන ලද පන්දුවාර සංඛ්‍යාව (142.1) හා සසැඳූ විට පන්දු 8 ක් පමණක් ශ්‍රී ලංකා පිල වැඩියෙන් ක්‍රීඩා කර තිබේ.

පළමු ටෙස්ට් තරගයට සහභාගිවීම සඳහා හම්බන්තොට සිට ගාල්ලට පැමිණ සිටින එංගලන්ත කණ්ඩායම අද (11 දා) දිනයේදී ගාල්ලේ සිය පළමු පුහුණු සැසියට සහභාගිවිය. එහිදී සතියක ස්වයං නීරෝධායනයට ලක්ව සිටි ක්‍රිස් වෝක්ස් ද අද දිනයේදී සිය පුහුණුවීම් වල නිරත වූවේය. දකුණු අප්‍රිකාවේ සිට ඉකුත් 08 වැනිදා සවස් යාමයේදී ගාල්ලට පැමිණි ශ්‍රී ලංකා කණ්ඩායමට ඊයේ (10 දා) දිනයේදී පුහුණු සැසියක් පැවැත්වීමට නියමිතව තිබුණු නමුත්, දිනය පුරාව ඇද හැළුණු වර්ෂාව හේතුවෙන් ක්‍රීඩාංගණයට යෑමේ අවස්ථාව අහිමිවිය. කෙසේ වෙතත් ශ්‍රී ලංකා පිල අද (11 දා) දිනයේදී ගාල්ල ජාත්‍යන්තර ක්‍රීඩාංගණයේදී සිය පුහුණුවීම් කටයුතු සඳහා සහභාගිවූවේය.

ප්‍රභලම ක්‍රීඩකයින් වන බෙන් ස්ටෝක්ස් සහ ජොෆ්රා ආචර් විවේක ගැන්වීම සහ රොරී බර්න්ස් පීතෘ නිවාඩු ගෙන සිටීම මත මෙම තරගාවලියට සහභාගිවනු ලබන්නේ එංගලන්ත කණ්ඩායමේ උපරිම දක්ෂතාවයෙන් යුතු කණ්ඩායම නොවේ. ඒ අතරට ඉකුත් 2018 තරගාවලියේදී එංගලන්ත පිල 3-0 ක් ලෙස තරගාවලි ජයග්‍රහණය කරා රැගෙන ගිය ප්‍රධානම චරිතය වන අදෙලි රශීඩ් සහ කොවිඩ් 19 වෛරසය ආසාධනය වී සිටින මොයින් අලීගේ සහභාගිත්වයද එංගලන්ත පිලට අහිමිව තිබේ.

දැවැන්ත නම් සහිත ක්‍රීඩකයින් කීප දෙනෙකුගේම සේවය එංගලන්ත පිලට අහිමිවී තිබෙන පසුබිමක 2018 තරග වාරයේදී තම කණ්ඩායමට එරෙහිව ලද 0-3 ක තරගාවලි ජයග්‍රහණයේ වාඩුව ලබා ගැනීමේ හොඳම අවස්ථාවක් මෙම තරගාවලිය තුළ පවතින බව දික්වැල්ල වැඩිදුරටත් අවධාරණය කර සිටියේය.

“තරගාවලිය අතින් ගත්තොත් කණ්ඩායම් දෙකටම ඉතා අමාරු තරගාවලියක්. ඒත් 2018 පැවැති තරගාවලිය හා සංසන්දනය කරන විට, මේ තරගාවලිය ජය ගන්න අපිට හොඳ අවස්ථාවක් තියෙනවා. විශේෂයෙන් (ජොෆ්රා) ආචර් සහ (බෙන්) ස්ටෝක්ස් වගේම තවත් ක්‍රීඩකයින් කීප දෙනෙකු රහිතව එංගලන්ත පිල ක්‍රීඩා කිරීම, තරගාවලිය ජය ගැනීමට අපිට වඩා හොඳ අවස්ථාවක් පවතිනවා කියලා මම විශ්වාස කරනවා. ඒ වුණත් අපි ඔවුන්ව කොයිම විදියකින් අවතක්සේරුවෙන් සලකන්නේ නෑ. උපරිම දක්ෂතාවයෙන් යුතුව ක්‍රීඩා කරන්න බලාපොරොත්තු වෙනවා”යි දික්වැල්ල පැවැසීය.

ශ්‍රී ලංකා ක්‍රිකට් නිල වෙබ්අඩවිය ඇසුරිණි

ශ්‍රී ලංකා ක්‍රිකට් ආයතන පුහුණු අංශයේ ශාරීරික යෝග්‍යතා කාර්යය සාධන කළමනාකරු වශයෙන් දකුණු අප්‍රිකානු ජාතික ග්‍රාන්ට් ලූඩන්ව පත් කිරීමට ශ්‍රී ලංකා ක්‍රිකට් පාලනාධිකාරිය පියවර ගෙන තිබේ. ඒ අනුව ලූඩන්ගේ සේවය අද (ජනවාරි 11) සිට බලපැවැත්වෙනු ඇත.

ශක්තීන් සහ තත්ත්වාරෝපණය කිරීම පිළිබඳ විශේෂඥයකු වන ලූඩන් ජාතික තලයේ පසුවන ක්‍රීඩකයින්ගේ ශක්තීන් වර්ධනය කිරීම කෙරෙහි අවධානය යොමු කරන අතරම ශ්‍රී ලංකා ක්‍රිකට් ආයතනය යටතේ පවතින සමස්ථ කණ්ඩායම් සියල්ලෙහි ශාරීරික යෝග්‍යතා කාර්යය සාධනය භාරව කටයුතු කරනු ඇත.

ශ්‍රී ලංකා ක්‍රිකට් ආයතනය සමඟ කොන්ත්‍රාත්තුවකට එළැඹීමට ප්‍රථම 2014 වසරේ සිට 2019 වසර දක්වා වූ කාල සීමාවේදී ලූඩන් පාකිස්තානු ක්‍රිකට් කණ්ඩායමේ ශක්තීන් සහ තත්ත්වාරෝපණය කිරීම පිළිබඳව මෙන්ම පන්දු රැකීමේ පුහුණුකරු ලෙසද කටයුතු කර තිබේ. පාකිස්තානු ක්‍රිකට් කණ්ඩායම 2017 වසරේදී චැම්පියන්ස් කුසලාන දිනා ගන්නා අවස්ථාවේදී කණ්ඩායමේ පන්දු රැකීමේ අංශය දියුණු කර ගැනීම සඳහා ලූඩන් වැඩි දායකත්වයක් දක්වනු ලැබීය. ඊට අමතරව ඔහු 2008 සහ 2013 කාල සීමාවේදී බංග්ලාදේශ ක්‍රිකට් ආයතනයේ ශක්තීන් සහ තත්ත්වාරෝපණය කිරීම පිළිබඳව පුහුණුකරු ලෙසින් කටයුතු කරමින් අත්දැකීම් සම්භාරයක් ලබා ඇති අයෙකි.

ජාත්‍යන්තර අත්දැකීම් වලට අමතරව ලූඩන් දකුණු අප්‍රිකානු පළමු පෙළ ක්‍රිකට් තරගාවලිය නියෝජනය කරනු ලබන නෂුවා ටයිටෑන්ස් සහ බී.පී.එල්. ක්‍රිකට් තරගාවලිය නියෝජනය කරනු ලබන ඩකා ග්ලැඩියේටර් කණ්ඩායමේද ශක්තීන් සහ තත්ත්වාරෝපණය කිරීම පිළිබඳ පුහුණුකරු ලෙස කටයුතු කර තිබේ.

ක්‍රීඩා හා ව්‍යායාම තාක්ෂණය පිළිබඳව උපාධිධාරියකු වන ලූඩන් දකුණු අප්‍රිකානු ක්‍රිකට් ආයතනය විසින් පවත්වන ලද තෙවැනි මට්ටමේ ක්‍රිකට් පුහුණු සහතිකයද ලබා තිබේ. ශ්‍රී ලංකා ක්‍රිකට් ඉහළ කාර්යය සාධන මධ්‍යස්ථානය වෙත ලූඩන්ගේ සේවය ලබා ගැනීම පිළිබඳව අදහස් දක්වා සිටින ශ්‍රී ලංකා ක්‍රිකට් ආයතන ප්‍රධාන විධායක නිලධාරී ඈෂ්ලී ද සිල්වා මහතා, “අපේ ක්‍රිකට් පද්ධතියට අපි ලූඩන්ව සාදරයෙන් පිළිගන්නවා. ඔහුගේ පැමිණීම හරහා ජාතික කණ්ඩායමේ මෙන්ම නැගී එන ක්‍රීඩකයින්ගේ ශක්තීන් සහ තත්ත්වාරෝපණය කිරීම සම්බන්ධව වැඩි යමක් එක් කළ හැකි බව අපි විශ්වාස කරමු” යැයි සඳහන් කර සිටියේය.

මෑත කාලීන ශ්‍රී ලංකා කණ්ඩායමේ දඟ පන්දු යවන්නන් අතර ප්‍රධාන බලාපොරොත්තුවක් බවට පත්ව සිටින අකිල ධනංජයගේ නව පන්දු යැවීමේ ඉරියව්ව නීත්‍යානුකූල බවට පරීක්ෂණවලින් තහවුරු වීම මත ඔහුට එරෙහිව පනවා තිබූ ජාත්‍යන්තර තරග තහනම වහාම ක්‍රියාත්මක වන පරිදි ඉවත් කිරීමට අන්තර්ජාතික ක්‍රිකට් සභාව අද (08 දා) පියවර ගත්තේය

ශ්‍රී ලංකාව සහ නවසීලන්තය අතර 2019 වසරේ අගෝස්තු මසදී ගාල්ලේ පැවැති පළමු ටෙස්ට් තරගය අතරතුරදී අකිලගේ පන්දු යැවීම නීත්‍යානුකූල නොවන බවට එම තරගයේදී පිටියේ විනිසුරුවන් ලෙසින් කටයුතු කරන ලද මයිකල් ගෆ් සහ රිචර්ඩ් ඉලිංවර්ත් පැමිණිලි කරන ලදුව සිය නිර්දෝෂී භාවය සනාථ කිරීමට නොහැකි වීම මත එම සැප්තැම්බර් මස සිට වසරක කාලයක් අකිල ජාත්‍යන්තර තරග තහනමක් පැනවිණ.

කොවිඩ් 19 වෛරස් තත්ත්වය හේතුවෙන් සංචරණ සීමා පැනවී ඇති බැවින් අකිලගේ නිර්දෝෂී භාවය නිරීක්ෂණය විශේෂ කමිටුවක් වෙත භාර දීමට අන්තර්ජාතික ක්‍රිකට් සභාව පියවර ගනු ලැබීය. නව පන්දු යැවීමේ ඉරියව් ඇතුළත් වීඩියෝ දර්ශණ එම කමිටුවේ අවධානයට යොමු කරන ලද අතර අකිලගේ පන්දු යවන අතේ වැළමිට, පන්දු යැවීමේ නීතියට අනුව ලබා දී තිබෙන අංශක 15 ඇතුළත පවතින බවට එම කමිටුව නිඟමනය කර තිබේ.

ජාත්‍යන්තර තරග තහනමක් අකිලට එරෙහිව පැවැතුණිද දේශීය තරගවලට තරග කිරීමේ අවස්ථාව අකිලට විරෝධයක් නොතිබූ හෙයින් අන්තර් සමාජ පළමු පෙළ ක්‍රිකට් තරගාවලිය මෙන්ම අති සාර්ථකව අවසන් වුණු එල්.පී.එල්. තරගාවලියට ක්‍රීඩා කිරීමේ අවස්ථාව අකිලට උදාවිය.

ශ්‍රී ලංකාව තරග වදිනු ලබන ජාත්‍යන්තර තරග සඳහා මින් ඉදිරියට සහභාගි නොවනු ලබන බවත් එබැවින් ඉදිරි තේරීම් වලදී තමාව නොසලකා හරින ලෙසත් තුන් ඉරියව් ක්‍රීඩක ෂෙහාන් ජයසූරිය ශ්‍රී ලංකා ක්‍රිකට් ආයතනය වෙත දන්වා තිබේ.

ලිපියක් මාර්ගයෙන් මේ පිළිබඳව දැනුම් දී සිටින ජයසූරිය, සිය පවුල සමඟ ඇමරිකාවේ පදිංචියට යෑමට තීරණය කිරීම එම තත්ත්වයට හේතුව බව වැඩිදුරටත් දැනුම් දී සිටියි.

මොරටුව වේල්ස් කුමර විදුහලින් ක්‍රිකට් ක්‍රීඩාවට පිවිසි ෂෙහාන්ගේ විවාහ උත්සවය ඉකුත් 2020 වසරේදී ඇමරිකාවේදී පැවැති අතර අනතුරුව ඔහු පළමු වතාවට ශ්‍රී ලංකාවට පැමිණියේ ඉකුත්දා අති සාර්ථකව අවසන් වුණු ලංකා ප්‍රිමියර් ලීග් තරගාවලියට සහභාගිවීමටය.

අනුශූරයින් බවට පත් ගෝල් ග්ලැඩියේටර් පිල වෙනුවෙන් ක්‍රීඩා කළ ෂෙහාන් ඇමරිකාවට ගිය පසු එරට ජාතික කණ්ඩායම නියෝජනය කිරීමට බලාපොරොත්තු වන බවත් ඒ සඳහා තමන්ට මේ වන විටත් ආරාධනාවක් ලැබී තිබෙන බවත් මීට එම තරගාවලිය අතරතුරදී ශ්‍රී ලංකා ක්‍රිකට් නිල වෙබ් අඩෙවිය සමඟ එක්වෙමින් සඳහන් කර සිටියේය.

ශ්‍රී ලංකාව වෙනුවෙන් ප්‍රථමයෙන් ව2015 වසරේදී විස්සයි-20 තරග වරම් දිනා ගත් ෂෙහාන් අවස්ථා 18 කදී ශ්‍රී ලංකාව නියෝජනය කොට ප්‍රහාරාත්මක වේගය 108.55 ක් රඳවා ගනිමින් ලකුණු 241 ක් රැස් කර ගැනීමට සමත්ව සිටියි. අනතුරුව එක්දින තරග වරම් දිනූ වමත් පිතිකරුවා එක්දින තරග 12 කදී ශ්‍රී ලංකාව නියෝජනය කර තිබේ. ඔහුගේ වැඩිම ලකුණු ලෙස පාකිස්තානයට එරෙහිව කරච්චිහිදී රැස් කරන ලද ලකුණු 96 සටහන් වේ. දකුණතින් පිට දඟ පන්දු යවන ෂෙහාන් අංශ 2 යටතේ කඩුලු 6 ක් බිඳ හෙළීමට සමත්ව සිටියි. මේ පිළිබඳව කළ දැනුම් දීමේදී ශ්‍රී ලංකා ක්‍රිකට් ආයතනය ඇතුළු සියළුම පාර්ශ්වයන්ට තමා ස්තූතිය පළ කිරීමටද ෂෙහාන් අමතක කර නොමැත.

තරග තීරකවරයකු ලෙසින් ජාත්‍යන්තරයේ ඉහළ පිළිගැනීමකට ලක්ව සිටින ශ්‍රී ලාංකිකයකු වන රංජන් මඩුගල්ලේ මහතාට ප්‍රථම වතාවට ශ්‍රී ලංකා කණ්ඩායම සහභාගිවන ටෙස්ට් තරගයකදී තරග තීරකවරයකු ලෙස කටයුතු කිරීමේ අවස්ථාව උදාවී තිබේ.

එංගලන්ත ක්‍රිකට් කණ්ඩායමට එරෙහිව ලබන 14 වැනිදා ගාල්ලේදී ආරම්භ වන තරග 2 කින් සමන්විත ටෙස්ට් ක්‍රිකට් තරගාවලියේ තරග තීරකවරයා ලෙසින් මඩුගල්ලේ මහතාව පත් කිරීමට අන්තර්ජාතික ක්‍රිකට් කවුන්සිලය පියවර ගැනීමත් සමඟ මෙම විරළ අවස්ථාව ඒ මහතාට හිමිව තිබේ.

ටෙස්ට් තරගාවලියක් සඳහා තරග තීරකවරයකු නම් කිරීමේදී අනුගමනය කරනු ලබන සාමාන්‍ය සම්ප්‍රදාය වන්නේ තරග වදිනු ලබන රටවල් දෙකට අයත් නොවන රටක තීරකවරයෙකු පත් කිරීම වේ. එහෙත් ලොව පුරා පවතින කොවිඩි 19 වසංගත තත්ත්වය හේතුවෙන් ඒ ඒ රටවල තීරකවරුන් සහ විනිසුරුවරුන්ගේ සේවය ලබා ගැනීමට අන්තර්ජාතික ක්‍රිකට් සභාව තීරණය කර ඇති බැවින් මෙම විරළ අවස්ථාවට හිමිකම් කීමේ වාසනාව මඩුගල්ලේ මහතාට හිමිව තිබේ.

අන්තර්ජාතික ක්‍රිකට් සභාවේ තරග තීරක මඬුල්ලේ ප්‍රධානියා ලෙසින් කටයුතු කරනු ලබන මඩුගල්ලේ මහතා ටෙස්ට් තරග ඉතිහාසයේ වැඩිම තරග සංඛ්‍යාවකදී තරග තීරකවරයා ලෙසින් කටයුතු කර ඇත්තේය. 1993 වසරේදී පාකිස්තානය සහ සිම්බාබ්වේ අතර පැවැති ටෙස්ට් තරගයෙන් සිය තරග තීරක දිවිය අරඹා ඇති මඩුගල්ලේ මහතා මේ වන විට ටෙස්ට් තරග 193 කදී තරග තීරකවරයකු ලෙස කටයුතු කර තිබේ.

ටෙස්ට් තරග 150 ක් වෙනුවෙන් තරග තීරකවරයෙකු ලෙස කටයුතු කරන ලද ලොව පළමු තරග තීරකයා ලෙසින් ඉකුත්දා වාර්තාවක් පිහිටුවීමට සමත් වූ මඩුගල්ලේ මහතා ලෝක කුසලාන ක්‍රිකට් තරගාවලි 7 කදී සහ 1999, 2003 සහ 2019 යන වසර වල පැවැති තරගාවලියන්හි අවසන් මහ තරග වල තරග තීරකවරයා ලෙසින්ද කටයුතු කර තිබේ. ශ්‍රී ලංකාව වෙනුවෙන් ටෙස්ට් තරග 21 කට ක්‍රීඩා කර ඇති මඩුගල්ලේ මහතා අවස්ථා දෙකකදී ශ්‍රී ලංකා පිලේ නායකයා ලෙසින්ද කටයුතු කර තිබෙන බේ. එක්දින තරග 63 ක් වෙනුවෙන් දායකත්වය දී ඇති මඩුගල්ලේ මහතා ඉන් අවස්ථා 13 කදී නායකයා ලෙසින් කටයුතු කිරීමට වරම් ලබා තිබේ.

2012 සහ 2018 වර්ෂවලදී අන්තර්ජාතික ක්‍රිකට් සභාව විසින් පවත්වන ලද වාර්ෂික සම්මාන ප්‍රදානෝත්සවයේදී ලොව හොඳම ක්‍රිකට් විනිසුරුවරයාට පිදෙන ඩේවිඩ් ෂෙපර්ඩ් කුසලාන දිනා ගැනීමට සමත්ව සිටින කුමර් ධර්මසේන මහතාද මෙම තරගාවලියේ ප්‍රධාන විනිසුරුවන් දෙදෙනාගෙන් එක් අයෙකු ලෙසින් කටයුතු කරනු ඇත. දෙරට අතර පළමු තරගය ධර්මසේන මහතාගේ 66 වැනි ටෙස්ට් තරගය වනු ඇත. ධර්මසේන මහතාට අමතරව රුචිර පල්ලියගුරු මහතා පිටියේ කටයුතු කරන අනෙක් විනිසුරුවරයා වන්නේය.

මේ අතර මඩුගල්ලේ මහතාට අමතරව ග්‍රේම් ලැබ්‍රෝයි මහතා අතිරේක තරග තීරකවරයකු ලෙසින් පත්කර තිබෙන අතර රූපවාහිනී විනිසුරු ලෙසින් ලින්ඩන් හැනිබල්ද සිව්වැනි විනිසුරු ලෙසින් රවීන්ද්‍ර විමලසිරි සහ අතිරේක විනිසුරුවරයකු ලෙසින් ප්‍රගීත් රඹුක්වැල්ල යන මහත්වරුන් පත් කිරීමට අන්තර්ජාතික ක්‍රිකට් සභාව පියවර ගෙන තිබේ.

තරග තීරක – රංජන් මඩුගල්ල, පිටියේ විනිසුරුවන් – කුමාර් ධර්මසේන, රුචිර පල්ලියගුරුගේ, රූපවාහිනී විනිසුරු – ලින්ඩන් හැනිබල්, සිව්වැනි විනිසුරු – රවීන්ද්‍ර විමලසිරි, අතිරේක තරග තීරක – ග්‍රේම් ලැබ්‍රෝයි, අතිරේක විනිසුරු – ප්‍රගීත් රඹුක්වැල්ල

Text by sri lanka cricket

ජොහැන්නස්බර්ග්හි වොන්ඩරස් පිටියේ පැවැති දෙවැනි ටෙස්ට් තරගයේදී ලකුණු 35 ක් ඇතුළත ශ්‍රී ලංකා දෙවැනි ඉනිමේ අවසන් පිතිකරුවන් 6 දෙනාම දවා ගැනීමට දකුණු අප්‍රිකානු පිලේ පන්දු යවන්නන් සමත්වීම මත තෙවැනි දිනය අවසන් වීමට මත්තෙන් ශ්‍රී ලංකාව පරදවා කඩුලු 10 ක ජයක් වාර්තා කිරීමට සත්කාරක දකුණු අප්‍රිකානු ක්‍රීඩකයෝ ඊයේ (05 දා) සමත්වූහ.

පන්දු යැවීමෙන් කැපී පෙනුණු ලුංගි න්ගිඩි, ලුතෝ සිපම්ලා සහ ඇන්රිච් නෝර්චේ තෙවැනි දිනය ආරම්භයේදී ශ්‍රී ලංකා පිතිකරුවන්ට ලකුණු 67 ක් පමණක් ලබා දීමට වග බලා ගත්හ. එහිදී කැපී පෙනුණු න්ගිඩි කඩුලු 4 ක්, සිපම්ලා කඩුලු 3 ක් සහ නෝර්චේ කඩුලු 2 බැගින් බිඳ හෙළමින් ශ්‍රී ලංකා දෙවැනි ඉනිම ලකුණු 211 කට සීමා කළහ. ඒ අනුව ජයග්‍රහණය සඳහා ලකුණු 67 ක ඉලක්කයක් හඹා ගිය දකුණු අප්‍රිකානු පිල 14 වැනි පන්දුවාරයේදී ජයග්‍රාහී ලකුණු සම්පූර්ණ කර ගන්නා අවස්ථාවේදී කඩුලු 10 ම ඔවුන් අත ඉතිරිව පැවැතිණ. පූර්ණ දින 2 ක් ඉතිරිව තිබියදීම මෙම තරගයේ ජය වාර්තා කර ගැනීමට දකුණු අප්‍රිකානු කණ්ඩායම සමත්වීමත් සමඟ තරගාවලියද 2-0 ක් ලෙස සත්කාරකයින් ජය ගනු ලැබීය.

තෙවැනි දිනයේ යවන ලද තෙවැනි පන්දුවාරයේදී පිට පිට එල්ල කරන ලද හතරේ පහර 2 ත් සමග දකුණු අප්‍රිකානු දේශයේදී පළමු වරට ශතකයක් වාර්තා කිරීමට නායක දිමුත් කරුණාරත්න සමත්විය. එය වොන්ඩරස් ක්‍රීඩාංගණයේදී ශ්‍රී ලංකා පිතිකරුවකු වාර්තා කරන ලද පළමු ශතකය ලෙසින්ද සටහන් විය. මුහුණ දුන් 123 වැනි පන්දුවේදී සිය ටෙස්ට් තරග දිවියේ 10 වැනි ශතකය සම්පූර්ණ කළ වමත් හැඩකාරයා 2017 වසරෙන් පසු පළමු වතාවට ශ්‍රී ලංකාවෙන් පිටතදී ශතකයක් වාර්තා කරගත්තේය. දිමුත් වාර්තා කරන ලද මෙම ශතකය වසර 13 කට පසු ආසියානු රටක් නියෝජනය කරනු ලැබූ ‘ආරම්භක’ පිතිකරුවකු විසින් වාර්තා කරන ලද පළමු ශතකය ලෙසින්ද සටහන් විය. මීට පෙර ආසියාව නියෝජනය කරමින් දකුණු අප්‍රිකාවේදී ශතකයක් වාර්තා කිරීමට සමත්ව ඇත්තේ 2007 වසරේදී ඉන්දීය පිල නියෝජනය කරමින් දකුණු අප්‍රිකාවට පැමිණි වසීම් ජෆර් වේ.

දිමුත්ගේ ශතකය වාර්තාවීම හැරුණු විට තෙවැනි දිනය තුළ සිදුවූ සියල්ල ශ්‍රී ලංකා පිලේ අවාසනාවට හිටියේය. සියල්ල වෙනස් වූයේ ඇන්රිච් නෝර්චේ විසින් දිමුත්ගේ කඩුල්ල දවා ගැනීමට සමත්වීමත් සමඟය. ලකුණු 150 කට කඩුලු 4 ක් දැවී ගොස් තිබියදී දිනය ඇරැඹි කරුණාරත්න සහ නිරෝෂන් දික්වැල්ල තවත් ලකුණු 26 ක් ලකුණු පුවරුවට එක් කරන අතර වාරයේ පන්දු යැවූ ඇන්රිච් නෝර්චේ විසින් පිට ඉන්නේ පතිත කොට දිමුත්ගේ පපුව ප්‍රදේශයට දෝලනය වන සේ පන්දු කීපයක්ම යොමු කළේය. පළමු පන්දු 2 ට අසීරුවෙන් ආරක්ෂිත පිළිවෙතක් අනුගමනය කළ දිමුත් නෝර්චේ විසින් එවන ලද තෙවැනි පන්දුවට පාදය ඔසවා පුල් පහරක් එල්ල කිරීමට උත්සාහ ගත්තද එය වැරදී යෑම මත වටිනා කඩුල්ල ශ්‍රී ලංකාවට අහිමිවිය.

මුහුණ දුන් 128 පන්දුවේදී දිමුත්ගේ ඉනිම නිමා වන විට ඔහු තම ඉනිමට හතරේ පහර 19 ක් ඇතුළත් කර ගනිමින් ලකුණු 103 ක් ලබා සිටියේය. දිමුත්ගේ දැවී යෑමත් සමඟ ශ්‍රී ලංකා ඉනිමට ලකුණු 35 ක් එකතු වන විට ශ්‍රී ලංකා දෙවැනි ඉනිමද හමාර වීම මෙතරම් ඉක්මනින් තරගය පරාජයට හේතු බවට පත්විය.

පෙර දිනයේ සිට දිමුත්ට අනගි සහායක් ලබා දුන් නිරෝෂන් දික්වැල්ලද ඊළඟ පන්දුවාරයේදී දවා ගැනීමට න්ගිඩි සමත්වීම මත ශ්‍රී ලංකා ඉනිමේ එකා පිට එකා දැවී යෑම ආරම්භ විය. දික්වැල්ල පන්දු 68 කට මුහුණ දෙමින් ලකුණු 36 ක් ලබා සිටියදී න්ගිඩිගේ සිව්වැනි ගොදුර ලෙසින් පිටියෙන් ඉවත් විය. දකුණු අප්‍රිකානු පන්දු යවන්නන්ගේ ග්‍රහණයට ශ්‍රී ලංකා පිතිකරුවන් අසුවද්දී ධෛර්යවන්තව පන්දුවට පහර දුන් වනිඳු හසරංග පසු පෙළින් ලකුණු 16 ක් ශ්‍රී ලංකා පිලට දායාද කිරීමට සමත්වූවේය.

ලකුණු 67 ක ජයග්‍රාහී ඉලක්කයක් හඹා ගිය දකුණු අප්‍රිකානු ආරම්භක පිතිකරුවන් යුගලය වූ ඒඩියන් මාක්‍රම් පන්දු 53 කදී ලකුණුඅ 36 ක්ද ඩීන් එල්ගාර් පන්දු 27 කදී ලකුණු 31 ක්ද ලබා දකුණු අප්‍රිකානු ජයග්‍රහණය 14 වැනි පන්දුවාරයේ දෙවැනි පන්දුවේදී සනාථ කළහ.

පළමු ඉනිමේදී ලද ලකුණු 127 ඉනිමත් සමඟ සමස්ථ තරගාවලියේ ඉනිම 3 කදී ලකුණු 253 ක් ලැබූ දකුණු අප්‍රිකානු පිලේ ආරම්භක පිතිකරු ඩීන් එල්ගාර් තරගයේ වීරයා සහ තරගාවලියේ වීරයා යන සම්මාන ද්විත්වයෙන් පිදුම් ලැබීය. එල්ගාර්ගේ ඉනිමක ලකුණු ලබා ගැනීමේ සාමාන්‍ය 126.50 ක් ලෙස සටහන් වේ. ශ්‍රී ලංකා කණ්ඩායමේ මීළඟ තරග සංචාරය වන්නේ ලෝක ටෙස්ට් ශූරතාවලිය යටතේ එංගලන්ත පිලට එරෙහිව පැවැත්වෙන තරග 2 කින් සමන්විත ටෙස්ට් තරගාවලිය වන අතර එහි පළමු වැන්න ලබන 14 වැනිදා ද දෙවැන්න 22 වැනිදාද ගාල්ල අන්තර්ජාතික ක්‍රීඩාංගණයේදී පැවැත්වෙනු ඇත.

තරග 2 කින් සමන්විත ටෙස්ට් තරගාවලිය දකුණු අප්‍රිකානු පිල හමුවේ පරාජයට පත් වුවද ලබන 14 වැනිදා එංගලන්තයට එරෙහිව ආරම්භ වන ටෙස්ට් තරගාවලියේදී ශ්‍රී ලංකා කණ්ඩායම සතුව ‘සුළු වාසියක්’ තිබිය හැකි බව එංගලන්ත කණ්ඩායම සතු පරිණතම වේග පන්දු යවන්නා වන ජේම්ස් ඇන්ඩර්සන් සඳහන් කර සිටියි.

ශ්‍රී ලංකාවට පැමිණීමෙන් පසුව එංගලන්ත කණ්ඩායම සිය පළමු පුහුණු සැසිය සඳහා හම්බන්තොට මහින්ද රාජපක්ෂ ක්‍රීඩාංගණයේදී අද (06 දා) සහභාගිවූ අතර අන්තර්ජාල තාක්ෂණය භාවිතයෙන් ඊට පෙර පැවැති මාධ්‍ය හමුවකදී ඇන්ඩර්සන් ඉහත අදහස් දක්වා සිටියේය.

එංගලන්ත කණ්ඩායම ඉකුත් අගෝස්තු මාසයේ සිට රතු පන්දුව භාවිතයෙන් කෙරෙන එකම තරගයකට හෝ ක්‍රීඩා නොකළ නමුත්, ශ්‍රී ලංකා කණ්ඩායම ප්‍රබල දකුණු අප්‍රිකානු පිලට එරෙහිව ටෙස්ට් තරග 2 කට ක්‍රීඩා කර තිබීම එකී සිළු වාසියට හේතුවී තිබෙන බව ඇන්ඩර්සන් පෙන්වා දෙයි. ඒ පිළිබඳව ඔහු වැඩිදුරටත් සඳහන් කර සිටින්නේ ශ්‍රී ලංකාවට එරෙහිව පැවැත්වෙන තරගාවලියේදී සිය කණ්ඩායමේ සූදානම එතරම්ම සුදුසු නොවන බවයි.

“මේ තියෙන තත්ත්වය අපිට එතරම්ම සුදුසු නෑ. අපිට මේ තරගාවලිය සඳහා දීර්ඝ කාලීන සූදානමක් නොමැති නිසා පළමු තරගයට පිවිසෙන්නේ වැඩි පුහුණුවක් නොමැතිවය. එය තරමක් අසාමාන්‍ය තත්ත්වයක්” යැයි ඇන්ඩර්සන් සඳහන් කර සිටියි.

“අපි නීරෝධායන කාල සීමාව අවසන් කරලා ක්‍රීඩාංගණයට යනවා කියන්නේ එහි උපරිම ප්‍රයෝජනය ලබාගත යුතුයි. නමුත් එය එතරම්ම ප්‍රමාණවත් නෑ. අපි කොහොමත් දන්නවා ශ්‍රී ලංකාව ටෙස්ට් තරග 2 කට ක්‍රීඩා කරලා තියෙන නිසා එහිදී ඔවුන්ට සුළු වාසියක්තියෙන බව. ඒ නිසා මේ තරගාවලියේදී අපි අපේ උපරිම ශක්තියෙන් ක්‍රීඩා කළ යුතුයි” යැයි දකුණතින් මඳ වේග පන්දු යවන ඇන්ඩර්සන් වැඩිදුරටත් අදහස් දක්වයි.

ඇන්ඩර්සන් එසේ සඳහන් කර සිටියද දකුණු අප්‍රිකානු තරග සංචාරය හැරුණු විට ශ්‍රී ලංකාව අවසන් වරට ටෙස්ට් තරගවල සහභාගීත්වය පිළිබඳව අවධානය යොමු කිරීමේදී සැබැවින්ම වාසියක් ශ්‍රී ලංකා පිල සතුද යන්න විවාදයට තුඩුදිය යුතුය. ශ්‍රී ලංකා කණ්ඩායම ගෙවී ගිය 2020 වසරේදී ටෙස්ට් තරග 3 කටද 2021 වසරේ එක් ටෙස්ට් තරගයකටද ක්‍රීඩා කර තිබේ. 2019 අගෝස්තු මස පැවැති නවසීලන්ත කණ්ඩායමේ ශ්‍රී ලංකා තරග සංචාරයෙන් පසු එකම ටෙස්ට් තරගයක් හෝ ශ්‍රී ලංකා පිල සිය මව්බිමේදී තරග වැදී නොමැත.

“ඇත්තටම ගත්තොත් මේ තරගාවලිය වේග පන්දු යවන්නන්ට ටිකක් දුෂ්කර තරගාවලියක්. එය වෙනස්ම අභියෝගයක්. නමුත් පසුපස දෝලනය, නව පන්දුවේ දෝලනය භාවිතයෙන් ඔභට කඩුලු ලබා ගැනීමේ හැකියාව පවතිනවා” යි ශ්‍රී ලංකාවේදී තරග වැදීම පිළිබඳව අදහස් දක්වන ඇන්ඩර්සන්, “ගාල්ල තණතීරුව ගත්තහම වේග පන්දු යවන්නන්ට හිතම තරම්ම නරක නැහැ. මොකද මම මෙහි සාර්ථකව පන්දු යවලා තියෙන නිසා. මම වගේම අනිත් පන්දු යවන්නන් ගාල්ලේදී සාර්ථක වෙලා තියෙනවා” යි සඳහන් කර සිටියි.

ඉරිදා (3 වැනිදා) දිවයිනට පැමිණීමෙන් අනතුරුව හම්බන්තොට ගුවන්තොටුපළේදී සිදුකරන ලද පී.සී.ආර්. පරීක්ෂණවල ප්‍රතිඵලවලට අනුව එංගලන්ත ක්‍රිකට් කණ්ඩායමේ තුන් ඉරියව් ක්‍රීඩක මුයින් අලී Moeen ali කොවිඩ්-19 වයිරසය ආසාදනය වී ඇතැයි තහවුරු වු බව වාර්තා ෙව්.

නිරෝධායනය පිළිබඳ ශ්‍රී ලංකා රජයේ නීති රෙගුලාසි වලට අනුව මේ වන විට අලී දින 10ක ස්වයං නිරෝධායන කාලයකට යොමුකර ඇත. පසුගිය දිනවලදී අලී ඉතා සමීපව ඇසුරු කළ ක්‍රිස් වෝක්ස්ටද දින 7 ක නිරෝධායන කාල සීමාවක් නියම කර ඇති අතර ඔහු වැඩිදුර පරීක්ෂණ සඳහා යොමුකර ඇත.

මෙම සිදුවීම හේතුවෙන් එංගලන්ත කණ්ඩායමේ සියලුම සාමාජිකයන් සහ නිලධාරීන් හෙට (5 වැනිදා) දෙවැනි වරටත් පී.සී.ආර්. පරීක්ෂණවලට භාජනය කිරීමට නියමිතය.

ටෙස්ට් තරග 2 කට සහභාගි වීම සඳහා දිවයිනට පැමිණි එංගලන්ත කණ්ඩායම අනිද්දා (6 වැනිදා) සිය පළමු පුහුණු සැසිය ආරම්භ කිරීමට සූදානමින් සිටියේය

දකුණු අප්‍රිකාවේ ජොහැන්නස්බර්ග්හි වොන්ඩරස් ක්‍රීඩාංගණයේ (03 දා) ආරම්භවු ශ්‍රී ලංකාව සහ දකුණු අප්‍රිකාව අතර දෙවන ටෙස්ට් තරගයේ ශ්‍රී ලංකාව ප්‍රථම ඉනිමේදී ලබාගත් ලකුණු 157ට පිළිතුරු ලෙස පළමු දිනට ක්‍රීඩාව නතර කර දමනා විට දකුණු අප්‍රිකානු පිතිකරුවෝ කඩුල්ලක් දැවී ලකුණු 148 ක් ලබා සිටියේය.

දකුණු අප්‍රිකානු පිල වෙනුවෙන් ආරම්භක පිතිකරු ඩීන් එල්ගාර් පන්දු 119 කදී හතරේ පහර 16 ක් සමඟින් ලකුණු 92 ක්ද වැන්ඩර් ඩුසේන් පන්දු 82 කදී ලකුණු 40 ක්ද ලබා දෙවැනි කඩුල්ල වෙනුවෙන් ලකුණු 114 ක නොබිඳුණු සම්බන්ධතාවක් පවත්වමින් කඩුල්ලේ රැඳී සිටිති. දකුණු අප්‍රිකානු පළමු ඉනිමේ දැවී ගිය එකම පිතිකරුවා වූ ඒඩ්‍රියම් මාක්‍රම්ගේ කඩුල්ල තම මංගල තරගයට ක්‍රීඩා කරමින් සිටින වේග පන්දු යවන අසිත ප්‍රනාන්දු දවා ගත්තේය.

පළමු ටෙස්ට් තරගයට ක්‍රීඩා කරන ලද ක්‍රීඩකයින්ගෙන් සිව් දෙනෙකු රහිතව අද තරගයට පැමිණි ශ්‍රී ලංකා පිල කාසියේ වාසිය දිනා ප්‍රථමයෙන් පන්දුවට පහර දීමට තීරණය කළේය. එහිදී දිනේෂ් චන්දිමාල් සහ ධනංජය ද සිල්වා වෙනුවට ළහිරු තිරිමාන්න සහ මිනෝද් භානුකව කැඳවමින්ද වේගපන්දු යවන කසුන් රාජිත සහ ළහිරු කුමාර වෙනුවට දුෂ්මන්ත චමීර සහ අසිත ප්‍රනාන්දු කණ්ඩායමට කැඳවමින් ශ්‍රී ලංකා පිල තරගයට අවතීර්ණ විය. මෙහිදී මිනෝද් භානුක සහ අසිත ප්‍රනාන්දු දෙදෙනාම ශ්‍රී ලංකාව වෙනුවෙන් අද තරගයේදී ටෙස්ට් වරම් දිනා ගන්නා ලද්දේ එම ඉතිහාසයේ 152 වැනි සහ 153 වැනි ක්‍රීඩකයින් ලෙසිනි.

වේග පන්දු යවන ඇන්රිච් නෝයේ සහ වියාන් මල්ඩර්ගේ පන්දු යැවීම හමුවේ ශ්‍රී ලංකා පළමු ඉනිම තේ පානයට පැය භාගයකට පමණ කළින් ලකුණු 157 කට හමාර වූයේ 41 වැනි පන්දුවාරය සම්පූර්ණවීමටද මත්තෙනි.

දිවා ආහාරයට පන්දුවාර හතරකට පමණ පෙර කඩුල්ලක් අහිමිව ලකුණු 70ක් ලබා කිසියම් ස්ථාවරත්වයකට පැමිණ සිටි ශ්‍රී ලංකා කණ්ඩායමේ, ආරම්භක පිතිකරු කුසල් පෙරේරා දැවී යෑමත් සමඟ දිවා ආහාරය සඳහා තරගය නිමා කරන විට ලකුණු 84 කට කඩුලු 5 ක් අහිමිකර ගත්තේය.

නායක දිමුත් කරුණාරත්න ලකුණු 2 ක් ලබා ඉනිමේ පළමි පිතිකරුවා ලෙසින් දැවී යද්දී කුසල් ජනිත්ට එක්වූ  ළහිරු තිරිමාන්න දෙවන කඩුල්ලට ලකුණු 52 ක් එක් කළහ. එය ඉනිමේ සාර්ථකම සම්බන්ධතාවය බවට පත්විය. ඒ වෙනුවෙන් වේගවත් ඉනිමක් දියත් කළ කුසල් පෙරේරා පන්දු 67 කදී හතරේ පහර 11 ක් සමඟ ලකුණු 60 ක් ලබා ගෙන සිටියදී වියාන් මල්ඩර්ගේ ගොදුරක් ලෙසින් උඩ පන්දුවක් දී දැවී ගියේය. කෙසේ වෙතත් ළහිරු තිරිමාන්නටද අද දිනයේ රැස් කරගත හැකි වූයේ ලකුණු 17 ක් පමණි.

කුසල් පෙරේරා දැවී ගිය පන්දුවාරයේදීම අනෙක් කුසල් වූ මෙන්ඩිස් ද දැවී යෑම ශ්‍රී ලංකා පිලට දරාගත නොහැකි පාඩුවක් විය. ඒ අනුව 2021 වසර ආරම්භයේදී ලකුණු නොලබා දැවී ගිය පළමු පිතිකරුවා බවටද මෙන්ඩිස් පත්විය. කුසල් පෙරේරාට අමතරව පිතිකරුවන් අතරින් සාර්ථකම මුහුණ දුන් එකම පිතිකරුවා වූයේ වනිඳු හසරංගය.

ඉනිමේ මැද පෙළ නියෝජනය කරමින් ටෙස්ට් වරම් දිනාගත් මිනෝද් භානුක ලකුණු 05 කට දැවී ගිය අතර නිරෝෂන් දික්වැල්ල (07) සහ දසුන් ශානක ද (04) දැවී යෑම ශ්‍රී ලංකා පළමු ඉනිම මෙතරම් අඩු සංඛ්‍යාවකට සීමා වීමට ප්‍රධාන හේතු බවට පත්විය.

දිවා ආහාරයෙන් පසු මුළු ලකුණු සංඛ්‍යාව 100 ට ළඟා වද්දී කඩුලු හතක් දැවී අසීරු තත්ත්වයක පසුවද්දී වනිඳු හසරංගගේ සහ දුෂ්මන්ත චමීරගේ ලකුණු 49ක සබඳතා ලංකා කණ්ඩායමට මඳ අස්වැසිල්ලක් විය. ප්‍රථම ටෙස්ට් තරගයේ ඉනිම දෙකේදීම පිතිකරුවකු ලෙසද දස්කම් දැක්වු වනිඳු හසරංග මෙදිනද දක්ෂ අයුරින් පන්දුවට පහරදෙමින් ලකුණු 29ක් ලබාගත්තේ පන්දු 27කට මුහුණදී හතරේ පහරක්ද එල්ල කරමිනි.

දකුණු අප්‍රිකා කණ්ඩායමේ සාර්ථකම පන්දු  යවන්නා වු ඇන්රිච් නෝයේ ලකුණු 56කට කඩුලු හයක් දවාලු අතර මෙය ඔහුගේ ඉනිමක හොඳම පන්දු යැවීම වේ. මීට අමතරව වියාන් මල්ඩර් ලකුණු 25කට කඩුලු තුනක් දවාලීමට සමත්විය.

Text by sri lanka cricket

ශ්‍රී ලංකාව සමග ටෙස්ට් ක්‍රිකට් තරගාවලියකට සහභාගී වීම සදහා අද (03) දින මත්තල ජාත්‍යන්තර ගුවන්තොටුපොළට පැමිණි එංගලන්ත ක්‍රිකට් කණ්ඩායම ඇතුළු පුද්ගලයින් 44 දෙනෙකු රැපිඩ් ඇන්ටිජන් පරීක්ෂණට ලක්කළ බව ශ්‍රී ලංකා ක්‍රිකට් ආයතනය පවසනවා.

මේ පිළිබද වැඩි දුරටත් කරුණු හෙළිකරමින් ශ්‍රී ලංකා ක්‍රිකට් ආයතනය සදහන් කළේ එම සියලු දෙනාගේ පරීක්ෂණ වාර්තා ඍණාත්මක බවයි.

එංගලන්ත කණ්ඩායම ශ්‍රී ලංකා ක්‍රිකට් කණ්ඩායම සමග ටෙස්ට් තරග දෙකකට සහභාගී වීමට නියමිත අතර දෙරට අතර පළමු තරගය ජනවාරි 14 වැනිදා සහ දෙවන ටෙස්ට් ක්‍රිකට් තරගය ජනවාරි 22 වැනිදා ගාල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වීමට නියමිතයි.

මේ වන විට ශ්‍රී ලංකා ටෙස්ට් ක්‍රිකට් කණ්ඩායම දකුණු අප්‍රිකාවේ තරගාවලියකට සහභාගී වෙමින් සිටිනවා.

2021 වසරේ උදාවත් සමඟ ශ්‍රී ලංකාව මෙන්ම දකුණු අප්‍රිකාව සහභාගිවන පළමු ටෙස්ට් තරගය අද (03 දා) ජොහැන්නස්බර්ග් නුවර වොන්ඩරස් ක්‍රීඩා පිටියේදී ආරම්භ වේ.

තරගාවලිය ආරම්භ කරමින් පැවැති පළමු ටෙස්ට් තරගය ඉනිමකින් ජය ගැනීමට සමත්වීමත් සමඟ තරගාවලියේ 1-0 ක් ලෙස පෙරමුණ ගෙන සිටින සත්කාරක පිල ශ්‍රී ලංකාවට එරෙහිව පූර්ණ තරගාවලි ජයග්‍රහණයක් අපේක්ෂාවෙන් තරගයට අවතීර්ණ වද්දී සංචාරක ශ්‍රී ලංකා පිල හෙට තරගය ජය ගනිමින් ජය පැරදුමෙන් තොරව තරගාවලිය අවසන් කිරීමේ අපේක්ෂාවෙන් තරග බිමට පිවිසෙනු ඇත.

පළමු තරගය ඉනිමකින් ජය ගැනීම, දේශීය තත්ත්වයන් යටතේ ක්‍රීඩා කිරීම, පිතිකරුවන් ලකුණු අතරට පැමිණීම, කණ්ඩායම සතු ප්‍රබලම වේග පන්දු යවන්නා වන කාගිසෝ රබඩා  සංචිතයට පිවිසීම මෙන්ම වේග පන්දු යවන්නන් සියල්ලම රිද්මයට පැමිණීමට සමත්වීම ආදී තරගයක ජයග්‍රහණය සඳහා සෘජුවම බලපාන සාධක සියල්ලම දකුණු අප්‍රිකානු කණ්ඩායමේ වාසියට හේතු වී තිබේ. කෙසේ වෙතත් අවසන් වරට පැවැති තරගාවලිය 2-0 ක් ලෙස ජය ගැනීමට ශ්‍රී ලංකා පිල සමත්වීම මත ඕනෑම අවස්ථාවක තරගයක් ජය ගැනීමට ඇති හැකියාව ශ්‍රී ලංකා පිල සතුවීම කිසි විටෙකත් අමතක කළ නොහැක්කකි.

එබැවින් ශ්‍රී ලංකා කණ්ඩායම සිය උපරිම ශක්තියෙන් හෙට තරග වැදීම ඒකායන අපේක්ෂාව වී තිබුණත් ශ්‍රී ලංකාව හමුවේ ලද 2-0 ක තරගාවලි පරාජයේ වාඩුව ලබා ගැනීමේ උත්සාහයද දකුණු අප්‍රිකානුවන්ගේ සිත් තුළ තිබෙන බව ශ්‍රී ලංකා ක්‍රීඩකයින්ගේ අවධානයට ලක්විය යුත්තකි.

හෙට තරගයේදී ශ්‍රී ලංකා පිල මුහුණ දී සිටින දැවැන්තම ගැටළුව බවට පත්ව තිබෙන්නේ ක්‍රීඩකයින් රැසක් ආබාධිත තත්ත්වයට පත්ව සිටීමයි. එම තත්ත්වය මත හෙට තරගයේදී කණ්ඩායම තුළ වෙනස් කම් ගණනාවක් සිදුවීම අනිවාර්යය බැවින් හෙට ඇරඹෙන තරගය ජය ගැනීමට ආදේශ වන ක්‍රීඩකයින් දැඩි සටනක් දිය යුතු වේ.

පළමු ටෙස්ට් තරගයට ක්‍රීඩා කළ ධනංජය ද සිල්වාට සමස් තරගාවලියම අහිමිව තිබෙන අතර, කසුන් රජිත, ළහිරු කුමාර සහ දිනේෂ් චන්දිමාල් ආබාධිත ලැයිස්තුවට එක්ව සිටිති. දෙවැනි ටෙස්ට් තරගය ඉලක්ක කර ගනිමින් සිදුකරන ලද පුහුණුවීම් අතරතුරදී තුන් ඉරියව් ක්‍රීඩක වනිඳු හසරංග සහ සුරංග ලක්මාල් හෙට තරගයට සහභාගිත්වය තවමත් වැට උඩය. එමෙන්ම එල්.පී.එල්. තරගාවලිය අතරතුරදී වළලු කර ආබාධයකට ගොදුරු වුණු ඕෂද ප්‍රනාන්දුගේ සහභාගිවීමේ අවස්ථාවද සුභදායී නොවේ.

මෙම තත්ත්වය මත දකුණු අප්‍රිකානු සංචාරය සඳහා සහභාගිවුණු ක්‍රීඩකයින් 21 දෙනාගෙන් සංචිතය 14 දෙනෙකු පමණක් හෙට තරගය සඳහා වන තේරීම් වලට සුදුසුකම් ලබා සිටිති. එම තත්ත්වය මත හෙට තරගයේදී බොහෝ විට මිනෝද් භානුක සහ අසිත ප්‍රනාන්දු ටෙස්ට් වරම් ලබනු ඇත. එහිදී සංචිතයේ පසුවන ළහිරු තිරිමාන්න, ලසිත් ඇඹුල්දෙණිය මෙන්ම දුෂ්මන්ත චමීරද හෙට තරගය සඳහා වන අවසන් 11 දෙනා අතරට එක්වනු ඇත.

“කණ්ඩායමේ ක්‍රීඩකයින් කීප දෙනෙක්ම ආබාධ වලට ලක් වෙලා තියෙනවා. විශේෂයෙන් ධනංජ ද සිල්වා,  ලහිරු කුමාර, කසුන් රජිත සහ දිනේෂ් චන්දිමාල්. ඔවුන්ට හෙට තරගයට ක්‍රීඩා කරන්න කොහොමත් හැකියාවක් නෑ, අපි බලනවා සුරංග ලක්මාල්ව ක්‍රීඩා කරවන්න. නමුත් ඔහුට තිබ්බ යෝග්‍යතා පරීක්ෂණයෙන් ඔහු අසමත් වුණා. නමුත් අපි අදත් උත්සාහ කරනවා එයාව හෙට තරගයට ක්‍රීඩා කරවන්න පුලුවන්ද කියන එක. ඔහු වගේම වනිඳු හසරංගටත් අද පරීක්ෂණයක් තියෙනවා. සෙල්ලම් කරන්න පුලුවන් නම් අනිවාර්යයෙන්ම ඒ දෙන්නා ක්‍රීඩා කරනවා. එතැනදී වනිඳු ක්‍රීඩා නොකළොත් ලසිත් ඇඹුල්දෙණියට හෙට තරගයට ක්‍රීඩා කරන්න අවස්ථාව තියෙනවා” යි තරගය පිළිබඳව අදහස් දැක්වූ ශ්‍රී ලංකා නායක දිමුත් කරුණාරත්න සඳහන් කළේය.

“තරගය ගැන කතා කළොත් ඇත්තටම අපිට හෙට තරගයේදී අපේ උපරිම ශක්තිය නෑ. ක්‍රීඩකයින් ආබාධ වලට ලක් වෙලා තියෙන නිසා මට හෙට තරගයේදී හොඳම ක්‍රීඩකයින් 11 දෙනා නෑ. නමුත් මම හිතනවා නවකයෝ හෙට තරගයේදී හොඳ දෙයක් කරයි කියලා. අපිට හොඳ අවස්ථාවක් ඔවුන්ගේ දක්ෂතා බලන්න වගේම ඔවුන්ටත් හොඳ අවස්ථාවක් ඔවුන්ගේ දක්ෂතා පෙන්වන්න” යැයි දිමුත් වැඩිදුරටත් අදහස් දැක්වීය.

ශ්‍රී ලංකාවට ටෙස්ට් වරම් හිමි වී වසර  12ක් ගතවන තුරුම ශ්‍රී ලංකාව, දකුණු අප්‍රිකාව සමඟ ‍ටෙස්ට් තරඟයකට සහභාගී නොවුයේ ඇයි ද යන්න මෙරට ක්‍රීඩා ලෝලීන්ගෙන් වැඩි කොටසක් නොදන්නා බව සුප්‍රකට කරුණකි. ශ්‍රී ලංකාව පමණක් නොව  අපට කලින් ටෙස්ට් තත්වය ලබා සිටි  රටවල් ද 1965-1993 පමණ තෙක්  වසර  තිහක පමණ කාලයක් දකුණු අප්‍රිකාව සමඟ ටෙස්ට් තරඟයකට  සහභාගී නොවීය. ක්‍රිකට්  පමණක් නොව ඔලිම්පික්‚ ලෝක කුසලාන ක්‍රීඩා හා ලෝක ශූරතා රගර් ඇතුලු ජාත්‍යන්තර  ක්‍රීඩා කිසිවෙකටත් මේ කාලය තුල දකුණු අප්‍රිකාවේ සහභාගිත්වයක් නොවීය.

ජාත්‍යන්තර ක්‍රිකට් ක්‍රීඩාවේ පුරෝගාමීන් වන එංගලන්තය සහ ඕස්ට්‍රේලියාව සමඟ දකුණු අප්‍රිකාව ද අතීතයේ දී ක්‍රිකට් සබඳතා පැවැත් වු සමාරම්භක සාමාජිකයෝ වෙති. එංගලන්ත – දකුණු අප්‍රිකා  ක්‍රිකට් 1888-1889 වසරේත් ඕස්ට්‍රේලියා – දකුණු අප්‍රිකා ක්‍රිකට් 1902 – 1903 වසරේත් ආරම්භ විය. එංගලන්තය 1965 දීත් ඕස්ට්‍රේලියාව 1969 දීත් දකුණු අප්‍රිකාව සමඟ ක්‍රීඩා සබඳතා නැවැත්වීමෙන් පසු එය නැවත ආරම්භ වූයේ වසර තිහක පමණ කාලයකට ආසන්න වීමෙනි. 

එක්සත් ජාතීන්ගේ සංවිධානය ඇතුළු ජාත්‍යන්තර සංවිධාන කිහිපයක්ම මැදිහත්ව දකුණු අප්‍රිකාවට සෑම අංශයකින්ම සම්බාධක පැනවීමට ප්‍රධාන හේතුව වූයේ කලක සිට දකුණු අප්‍රිකාව පිළිපැද්දා වූ කළු සුදු වර්ණ භේද ප්‍රතිපත්තීන්ට විරෝධය පළ කිරීමක් ලෙසිනි. රටේ සියළු පරිපාලන හා වෙනත් කටයුතු සඳහා ද ක්‍රීඩා කණ්ඩායම් තේරීමේ දී ද තනිකරම සුදු ජාතිකයින් ඇතුළත් කර ගැනීම ඊට ප්‍රධානම හේතු විය. බොහෝ දෙනා ඊට තරයේ විරෝධය පළ කළ අතර එරට හිටපු ජනාධිපතිවරයෙකු වන නෙල්සන් මැන්ඩෙලා හට සිර බත් කෑමට ද සිදු විය.

දකුණු අප්‍රිකාව ඔවුන්ගේම මතය සනාථ කිරීමට ක්‍රීඩා කණ්ඩායම් එරටට ගෙන්වීමේ දී බටහිර ඉන්දීය කොදෙව් දූපත් හා ශ්‍රී ලංකාව ඇතුළු රටවල් කිහිපයක් එම දිනවල ගෙන්වා ක්‍රීඩා කළ ද ඔවුනට එල්ල වූ චෝදනා නිම නොවීය. නැවත වතාවක් කළු ජාතිකයන්ට ද සුදුසු ස්ථාන ලබා දීමෙන් පසු මෙය සමතයකට පත්ව යථා පරිදි කටයුතු ආරම්භ වූයේ එක්දහස් නවසිය අනූව දශකයේ ආරම්භයේ සිටය. ජාත්‍යන්තර ක්‍රිකට් පිටියට ඔවුන් නැවත පිවිසියේ 1992 ඕස්ට්‍රේලියාවේ පැවති ලෝක කුසලාන ක්‍රිකට් තරගාවලියේ සිටය.

1992 කෙප්ලර් වෙසල්ස් දකුණු අප්‍රිකා කණ්ඩායමට නායකත්වය දුන් අතර 1995 එංගලන්තය සමඟත් 1993 ශ්‍රි ලංකාව සමඟත් 1994 ඕස්ට්‍රේලියාව සමඟත් තරගාවලියන්ට සහභාගී වීමට එතෙර සංචාරයන්ට එක්විය. වෙසල්ස්ගෙන් පසු දකුණු අප්‍රිකා ක්‍රිකට් නායකත්වයට පත් වූයේ හැන්සි ක්‍රොන්යේය. 

රටේ පාලකයන් දැරු මතයන්ට ක්‍රිඩක ක්‍රිඩිකාවනට ද තම ජීවිතයේ හොඳම කාලයන්ගෙන් වන්දි ගෙවීමට සිදු වුවත් කාලයාගේ ඇවෑමෙන් දැන් වත්මන් පරපුරට භේද නොමැතිව මිතුරුදම් තරවී යථාතත්වයට පත්ව තිබිම ලෝවැසි කාගේත් සතුටට කරුණකි.

බන්දුල මොල්ලිගොඩ – ශ්‍රී ලංකා ක්‍රිකට් නිල වෙබ්අඩවිය ඇසුරිණි

තෙවැනි දිනයේදී සත්කාරක පිල දක්වන කැපී පෙනෙන දක්ෂතාවය හේතුවෙන් අපේක්ෂිත පරිදි සෙන්චූරියන්හි පැවැති බොක්සිං දින ටෙස්ට් තරගයෙන් සම්පූර්ණ දිනයක් ඉතිරිව තිබියදීම ශ්‍රී ලංකාවට එරෙහිව ඉනිමක සහ ලකුණු 45 ක ජයක් වාර්තා කිරීමට දකුණු අප්‍රිකානු කණ්ඩායම අද (29 දා) සමත්විය. ඒ අනුව තරග 2 කින් සමන්විත දෙරට අතර ටෙස්ට් තරගාවලිය 1-0 ක් ලෙස සත්කාරකයෝ පෙරමුණ ගත්හ.

දකුණු අප්‍රිකානුවන්ට සිව්වැනි ඉනිමේදී පන්දුවට පහර දීමේ අවස්ථාව ලබා දීමට නම් ලකුණු 160 ක් ලබා ගැනීමේ අභියෝගය ශ්‍රී ලංකා පිතිකරුවන්ගේ කර මත පැටවී තිබූ නමුත් දිවා විවේකයෙන් මිනිත්තු කීපයකට පසු ශ්‍රී ලංකා දෙවැනි ඉනිම ලකුණු 180 කට දකුණු අප්‍රිකානු පන්දු යවන්නෝ සීමා කළහ.

දකුණු අප්‍රිකාවට පැමිණ තරග කිරීමේදී මෙතෙක් ඉනිමක වාර්තා කළ ඉහළම ලකුණු සංඛ්‍යාව පළමු ඉනිමේ වාර්තා කරමින් තරගයට සාර්ථක අවතීර්ණ වීමට ශ්‍රී ලංකා කණ්ඩායමට හැකියාව ලැබුණත්, තරගය අතරතුර ක්‍රීඩකයන් වැඩි සංඛ්‍යාවක් ආබාධ වලට ලක්වීම නිසා සියලු වාසි දකුණු අප්‍රිකානු පිල වෙත පහසුවෙන් දෝලනය වන්නට විය. එම ඉනිමේදී කැපී පෙනෙන ඉනිමක් ක්‍රීඩා කළ ධනංජය ද සිල්වා සිව්වැනි ඉනිමේදී එකම පන්දුවකට හෝ පහර දීමට නොපැමිණීමද මෙතරම් ඉක්මනින් තරගය අවසන් වීමට හේතු කාරණාවක් වීය.

ශ්‍රී ලංකාව වෙනුවෙන් කුසල් පෙරේරා සහ වනිඳු හසරංග අර්ධ ශතක ලබා ගැනීමට සමත් වූ නමුත් ඉන් ඔබ්බට බරපතල සටනක් දැක බලා ගැනීමේ අවස්ථාවක් නොමැති විය. කෙසේ වෙතත් කුසල් පෙරේරා සමග දිනය ඇරැඹි දිනේෂ් චන්දිමාල් පිළිබඳව බොහෝ දෙනා තුළ වැඩි බලාපොරොත්තුවක් රැඳවී තිබූ නමුත්, වියාන් මෝල්ඩර් විසින් චන්දිමාල්ව දවා ගැනීමට සමත්වීමත් සමඟ එම බලාපොරොත්තුවද ගහගෙන ගියේය. කිසියම් වේදනාවක් දරාගෙන පස්දුවට පහර දුන් චන්දිමාල් කෙළින්ම පන්දුව කඩුල්ලේ වැදී දැවී යන විට ලකුණු 25 ක් ලබා සිටියේය.

චන්දිමාල් සමඟ අනෙක් කෙළවරෙන් පන්දුවට පහර දුන් කුසල් පෙරේරා ආක්‍රමණශීලී පිතිහරඹයක නිරත වෙමින් කොහෙන් හෝ වාසියක් ලැබෙන අන්දමින් පන්දුවට පහර දෙමින් ලකුණු 64 ක් ලබා ගත්තේය. එය මෙම ඉනිමේදී ශ්‍රී ලංකා පිතිකරුවකු ලද ඉහළම ලකුණු සංඛ්‍යාව විය.

මංගල තරගයට සහභාගි වුණු වනිඳු හසරංග දෙවැනි ඉනිමේදී මංගල අර්ධ ශතකයට හිමිකම් කීවේය. හතරේ පහර 12 ක් සහ එක් හයේ පහරකින් අලංකාර වුණු වනිඳුගේ ඉනිම සඳහා ඔහු පන්දු 53 කට පමණක් මුහුණ දුන්නේය. පළමු ඉනිමේදී අර්ධ ශතකයක් ලබා ඉනිම හමාර වන තෙක්ම කඩුල්ල ආරක්ෂා කරගත් දසුන් ශානකද පිටිය මැද වූ රංගණයට අවතීර්ණ වුවත් ලුතෝ සිපම්ලාගේ පන්දුවක් දසුන්ගේ පිටත දාරයේ වැදී කඩුලු රැකි ඩි කොක්ගේ අත්වැසුම් තුළ ආරක්ෂිතව රැඳීම මත ඔහුගේ ඉනිම ලකුණු 06 කට සීමා විය. ඊට පෙර නිරෝෂන් දික්වැල්ලට සිදුවූයේද දසුන්ට අත් වූ ඉරණමම වූ අතර වෙනසකට සිපම්ලා වෙනුවට පන්දු යවන ලද්දේ මල්ඩර් වීම පමණි.

තරගයේ වීරයා සම්මානයෙන් දකුණු අප්‍රිකානු පිල වෙනුවෙන් ලකුණු 199 ක් රැස් කළ ෆෆ් ඩු ප්ලෙසිස් සම්මාන දිනා ගත්තේය. දෙරට අතර පැවැත්වෙන දෙවැනි ටෙස්ට් තරගය ලබන ජනවාරි 03 වැනිදා ජොහැනස්බර්ග්හි වොන්ඩර්ස් ක්‍රීඩාංගණයේදී ආරම්භවීමට නියමිතය.

ශ්‍රී ලංකාව පළමු ඉනිම පන්දුවාර 96 කදී ලකුණු 389 යි –  (දසුන් ශානක 66*, දිනේෂ් චන්දිමාල් 85, දිමුත් කරුණාරත්න 22, කුසල් පෙරේරා 16, කුසල් මෙන්ඩිස් 12, ධනංජය ද සිල්වා (පිටියෙන් ඉවත් විය) 79, නිරෝෂන් දික්වැල්ල 49, වනිදු හසරංග 18, ලුතෝ සිපම්ලා 76/4, වියාන් මල්ඩර් 69/3) සහ දෙවැනි ඉනිම පන්දුවාර 46.1 කදී සියලු දෙනා දැවී ලකුණු 180 යි – (දිමුත් කරුණාරත්න 06, කුසල් පෙරේරා 64, කුසල් මෙන්ඩිස් 00, දිනේෂ් චන්දිමාල් 25, නිරෝෂන් දික්වැල්ල 10, දසුන් ශානක 06, වනිඳු හසරංග 59, විශ්ව ප්‍රනාන්දු 00, කසුන් රජිත 00, ළහිරු කුමාර 00, ලුතෝ සිපම්ලා 24/2, ලුංගි න්ගිඩි 38/2, එන්රිච් නෝර්ට්ජ් 39/2, වියෑන් මල්ඩර් 39/2)

දකුණු අප්‍රිකාව පළමු ඉනිම පන්දුවාර 142.1 කදී ලකුණු 621 යි – (ඩීන් එල්ගාර් 95, ඒයිඩන් මාක්‍රම් 68, වැන්ඩර් ඩුසේන් 15, ඩු ප්ලෙසිස් 199, කුවින්ටන් ඩි කොක් 18, 71, වියාන් මල්ඩර් 36, කේෂව් මහරාජ් 73, ඇන්රිච් නෝර්ට්ජ් 00, ලුතෝ සිපම්ලා 00, ලුංග් න්ගිඩි 02*, විශ්ව ප්‍රනාන්දු 129/3, දසුන් ශානක 98/2, වනිඳු හසරංග 171/4, ළහිරු කුමාර 103/1)

දකුණු අප්‍රිකාවේ සෙන්චුරියන්හි පැවැත්වෙන පළමු ටෙස්ට් තරගයේ දෙවන දිනය වූ අද (27 දා) තරගය නිමා කරන විට සිය පළමු ඉනිම ක්‍රීඩා කරමින් සිටින සත්කාරක දකුණු අප්‍රිකානු කණ්ඩායම කඩුලු 4 ක්දැවී ලකුණු 317 ක් ලබා සිටියේය. ශ්‍රී ලංකා පිල පළමු ඉනිමේදී රැස් කරන ලද ලකුණු 396 ට පිළිතුරු ඉනිම ක්‍රීඩා කරමින් සිටින සත්කාරක පිල මේ වන විට තවත් ලකුණු 79 ක් පිටුපසින් සිටින්නේ කඩුලු 6 ක් අත ඉතිරිව තබාගෙනය.

තෙවන දින (28) උදයවරුවේ දකුණු අප්‍රිකාවේ ඉතිරිව සිටින පිතිකරුවන් දවා ගැනීමට ශ්‍රී ලංකා කණ්ඩායම සමත්වුවහොත් මෙය තියුණු තරගයක් බවට පත්කර ගැනීමට අවස්ථාව සැළසේ.

ශ්‍රී ලංකා කණ්ඩායමේ ප්‍රබල පන්දු යවන්නන් දෙදෙනෙකු වන ධනංජය ද සිල්වා සහ කසුන් රාජිත ආබාධිත තත්ත්වයකින් පසුවද්දී ඉතිරි පන්දු යවන්නන් කිහිපදෙනා දකුණු අප්‍රිකා ඉනිම අඩු සංඛ්‍යාවකට සීමා කරගැනීමට දැඩි ප්‍රයත්නයක නියැලුණහ.

ලකුණු 396ක ශ්‍රී ලංකා පළමු ඉනිමේ සීමාව පසුකිරීමේ ප්‍රයත්නයෙන් දකුණු අප්‍රිකාව පන්දුවට පහර දෙද්දී වරක් ඔවුන් කඩුල්ලක් දැවී ලකුණු 200 සීමාවට පැමිණියත් ලකුණු 220 වන විට කඩුලු 4ක්ම දවාලමින් ලංකා කණ්ඩායම තරගයට අවතීර්ණ විණි. ආරම්භක පිතිකරුවන් දෙදෙනා ඩීන් එල්ගා (95) සහ ඒඩ්න් මාක්‍රම් (68) ප්‍රථම විකට්ටුවට ලකුණු 141ක් රැස්කිරීමෙන් පසු වැන්ඩර් ඩසන් (15) සහ ඩීන් එල්ගා ලකුණු සංඛ්‍යා 200 දක්වා ඉහළට රැගෙන ආහ. මේ අවස්ථාවේ ළහිරු කුමාර විසින් වැන්ඩර් ඩු‍සෙන්ද දසුන් ශානක විසින් පෙරළා උඩපන්දුවක් රැකගැනීමෙන් ඩීන් එල්ගාද වනිඳු හසරංග විසින් නායක කුයින්ටන් ඩි කොක්ද (18) දවාමින් දකුණු අප්‍රිකානු පිල පීඩනයට ඇදදැමූහ. මංගල ටෙස්ට් තරගයට ක්‍රීඩා කරමින් සිටින වනිඳු නායක ඩි කොක් දවා ගැනීම ඔහුගේ ටෙස්ට් තරග දිවියේ මංගල කඩුල්ල ලෙසින් සටහන් වනු ඇත.

පස්වැනි කඩුල්ල වෙනුවෙන් ෆෆ්ඩු ප්ලෙසිස් (නොදැවී 55) සහ ටෙම්බා බවුමා (නොදැවී 41) ලකුණු 97ක සබදතාවක් තබා ලකුණු සංඛ්‍යාව කඩුලු 4කට 317ක් බවට පත්කර ගත්හ.

පළමු ඉනිම වෙනුවෙන් ශ්‍රී ලංකාව කඩුලු 9කට ලකුණු 396ක් රැස්කරමින් ප්‍රමාණවත් ලකුණු සංඛ්‍යාවක් රැස්කළත් ලංකා කණ්ඩායමට මුහුණ පෑමට සිදුවු ගැටළුවක් වූයේ කණ්ඩායමේ ප්‍රබලම පන්දු යවන්නන් දෙදෙනෙකු වන ධනංජය ද සිල්වා සහ කසුන් රාජිතට ආබාධ මත තරගයෙන් ඉවත්වීමට සිදුවීමය.

ශ්‍රී ලංකා ඉනිමේ ලකුණු සංඛ්‍යාව ඉහළ දැමීමේ අරමුණින් කඩුල්ලේ රැදී පිතිකරුවකුගේ සේවය හොදින් ඉටුකළ වේගපන්දු යවන කසුන් රාජිත දකුණු අප්‍රිකා ඉනිමේදී පන්දු යවන අවස්ථාවේ සිය තුන්වන පන්දු වාරය යවද්දී ආබාධයට ළක්වීමෙන් කසුන් රාජිතටද ආපසු ක්‍රීඩාගාරයට යාමට සිදුවූ අතර ඔහුටද මේ තරගයේ ඉදිරි දින කිහිපය අහිමිවනු ඇතැයි දකුණු අප්‍රිකානු ආරංචි මාර්ග සදහන් කරයි.

ශ්‍රි ලංකාව කඩුලු හයකට ලකුණු 340ක් ලබා ප්‍රබල තත්ත්වයක සිට දෙවන දින (27) පන්දුවට පහර දීමට නැවත පිටියට පිවිසි අවස්ථාවේ දසුන් ශානක සහ කසුන් රාජිත හයවන කඩුල්ලේ සබඳතාව තව දුරටත් රඳවාගනිමින් මුළු ලකුණු සංඛ්‍යාව 387ක් දක්වා ඉහළ නංවා ගැනීමට සමත් වුයේ විශේෂයෙන්ම දසුන් චානකගේ ප්‍රහාරාත්මක පිතිහරඹයෙනි. කසුන් රාජිත මෙහිදි තම ශ්‍රේෂ්ඨ පිතිකරුට හිතුමනාපයෙන් වේග පහර එල්ල කිරීමට නිතරම අවස්ථාව සලසමින් දෙවන දින උදය වරුවේ දී මිනිත්තු 40ක කාලයක් කඩුල්ල ආරක්ෂා කර ගැනීමට වග බලාගත්තේ අගපෙළ පිතිකරුවෙකු ලෙස තම කාර්යය මනාව ඉටුකරමිනි.

කසුන් රාජිත හත්වන කඩුල්ල ලෙසට මුළු ලකුණු 387ක් දැවී යාමෙන් පසුව ලංකා  කණ්ඩායමේ ඉතිරි පිතිකරුවන් දෙදෙනාද මුළු ලකුණු 396 වන විට  දැවී ගියේ දසුන් ශානක පමණක් හුදකලා කරමිනි.

දෙවන දින උදෑසන ලංකා කණ්ඩායම තවත් පන්දු වාර 11කට මුහුණ දී කඩුලු තුනක් දැවී රැස්කළ ලකුණු  සංඛ්‍යාව 56කි. මෙයින් ලකුණු 41ක්ම දසුන් චානක නොදැවී ලබා ගත්තේ හතරේ පහරක් සහ හයේ පහර හතරක්ද එල්ල කරමිනි. ලංකා පළමු ඉනිමේදි දසුන් නොදැවී ලකුණු 66ක් ලබා සිටියේ පන්දු 87කට මුහුණ දී හතරේ තුනක් සහ හයේ පහක් ද එක් කරමිනි. මෙය ටෙස්ට් ඉනිමක දසුන්ගේ වැඩිම ලකුණු සංඛ්‍යාවයි. කසුන් රාජිත පන්දු 49කට මුහුණ දෙමින් තම කඩුල්ල ආරක්ෂා කර ගනිමින් ලබාගත් ලකුණු 12 ට හතරේ පහර 2ක්ද ඇතුළත් විය.

ශ්‍රී ලංකා පළමු ඉනිම කඩුලු 9කට ලකුණු 396ක් ලෙස දිවා ආහාරයට පෙර නිමා වුයේ පන්දුවාර 96ක් පන්දුවකට මුහුණ දෙමි. ලංකා කණ්ඩායමට ලකුණු 400ක් ඉක්මවා පහසුවෙන්ම යාමට තිබු අවස්ථාව මගහැරිගියේ ප්‍රබල පිතිකරු ධනංජය ද සිල්වාට පන්දුව පහර දීමට පිටියට පිවිසිමට අවස්ථාව නොලැබීමෙනි.

දකුණු අප්‍රිකාව වෙනුවෙන් ප්‍රබල පන්දු යැවීමක නියැලුණු ලුතෝ සිපම්ලා පන්දු වාර 16ක් යවා ලකුණු 74කට කඩුලු 4ක්ද වියාන් මල්ඩර් පන්දුවාර 20ක් යවා ලකුණු 69කට කඩුලු තුනක්ද දවාලූහ.කෙසේ වෙතත් ප්‍රතිවාදී කණ්ඩායමෙන් අතිරේක ලකුණු 37 ක් හිමිව තිබුණි.

ලකුණු සාරාංශය – ශ්‍රී ලංකාව පළමු ඉනිම පන්දුවාර 96 කදී ලකුණු 389 යි –  (දසුන් ශානක 66*, දිනේෂ් චන්දිමාල් 85, දිමුත් කරුණාරත්න 22, කුසල් පෙරේරා 16, කුසල් මෙන්ඩිස් 12, ධනංජය ද සිල්වා (පිටියෙන් ඉවත් විය) 79, නිරෝෂන් දික්වැල්ල 49, වනිදු හසරංග 18, ලුතෝ සිපම්ලා 76/4, වියාන් මල්ඩර් 69/3)

දකුණු අප්‍රිකාව පළමු ඉනිම පන්දුවාර 72 කදී කඩුලු 4ට ලකුණු 317 යි – (ඩීන් එල්ගාර් 95, ඒයිඩන් පාර්ක්‍රම් 68, වැන්ඩර් ඩුසේන් 15, ඩු ප්ලෙසිස් 55, කුවින්ටන් ඩි කොක් 18, ටෙමේබා බවුමා නොදැවී 191 කි)

ශ්‍රී ලංකා ක්‍රිකට් නිල වෙබඅඩවිය ඇසුරිණි

සෙන්චූරියන් යන නම ඇසූ සැණින් එය ශ්‍රී ලාංකික ක්‍රීඩා ලෝලීන්ගේ හදවතට  කිට්ටු වන්නේ දකුණු අප්‍රිකාවේ ඇති ටෙස්ට් ක්‍රිකට් ක්‍රීඩා කරන ක්‍රීඩාංගණයක් නිසාම නොවේ. 2011 ලෝක කුසලාන ක්‍රිකට් තරගාවලිය සඳහා පල්ලකැලේ ඉදිකෙරුණු ජාත්‍යන්තර ක්‍රීඩාංගණය බොහෝ සෙයින් සෙන්චූරි යන්හි ඉදිකර ඇති සුපර් ස්පෝර්ට්ස් පාක් ක්‍රීඩාංගණයේ සැලසුමට සමානව ඉදි කර තිබීම, සෙන්චූරියන් යන නම බොහෝ දෙනාගේ හදවත් වල රැඳී තිබීමට හේතු වී තිබේ.

ලෝක ටෙස්ට් ක්‍රිකට් ශූරතාවලිය යටතේ පැවැත්වෙන මෙම ටෙස්ට් තරගය  අදට යෙදී තිබෙන බොක්සිං දිනය හෙවත් දෙසැම්බර් 26 වැනි දින ශ්‍රී ලංකා වේලාවන් ප.ව. 1.30 ට ආරම්භ වනු ඇත. මාස 10 ක් තිස්සේ ක්‍රීඩකයින්ට මෙන්ම ක්‍රීඩා ලෝලීන්ද ගත කර දමන ලද අඳුරුතම කාල පරිඡේදයට හිරු එළියක් කැඳවමින් පැවැත්වෙන මෙම තරගය පිළිබඳව බොහෝ දෙනා අවධානය යොමු කර සිටින්නේ කොවිඩ් වසංගතයේ බලපෑමෙන් පසු පැවැත්වෙන පළමු තරගය පමණක් නිසාම නොවේ. 2019 වසරේදී මෙහි පැමිණි අවස්ථාවේදී දකුණු අප්‍රිකානු පිලට එරෙහිව පැවැති තරගාවලිය 2-0 ක් ලෙස ඉතිහාසගත ජයග්‍රහණයක් අත්කර ගැනීමට ශ්‍රී ලංකා කණ්ඩායම සමත්වීම මත මෙවර තරගාවලිය පිළිබඳව ක්‍රීඩා ලෝලීන් තුළ වැඩි උනන්දුවක් ඇතිවීමට හේතු වී තිබේ. ‘සෙන්චූරියන්’ ක්‍රීඩාංගණය කරළියට පැමිණෙන්නේ එබැවිනි.

ඇත්තටම සෙන්චූරියන් පිටියේ වාසිය කාටද…?

සෙන්චූරියන්හි සුපර් ස්පෝර්ට්ස් පාක්හි මෙතෙක් පවත්වා ඇත් ටෙස්ට් ජවනිකා 25 දී වැඩිම අවස්ථා ගණනකදී වීරයින් බවට පත්ව සිටින්නේ සත්කාරක දකුණු අප්‍රිකානු කණ්ඩායමයි. 1995 වසර තරම් ඈතට විහිදී යන මෙහි ටෙස්ට් තරග ඉතිහාසයේ ඔවුන් ක්‍රීඩා කර ඇති තරග වලින් පරාජයට පත්ව ඇත්තේ අවස්ථා ද්විත්වයකදී පමණි. එම තරග 25 අතරට ශ්‍රී ලංකා කණ්ඩායමද අවස්ථා 4 කදී ප්‍රතිවාදීන් වී තිබෙන නමුත් එම අවස්ථා සියල්ලෙන්ම ශ්‍රී ලංකාව පරාජය කිරීමට දකුණු අප්‍රිකානු පිල සමත්ව ඇත්තේ තරග 2 කදී ඉනිමක ජයග්‍රහණ ලබා ගනිමිනි.

මෙම ක්‍රීඩාංගණ ඉතිහාසය ගෙන බැලීමේදී පිතිකරුවන් සිව් දෙනෙක් පමණක් ශතක වාර්තා කිරීමට සමත්ව සිටින අතර ඉන් තිදෙනෙක් දකුණු අප්‍රිකානුවෝ වෙති. ශ්‍රී ලංකාව වෙනුවෙන් සෙන්චූරියන්හි ශතකයක් ලද එකම හිමිකරුවා වන්නේ හිටපු ටෙස්ට් නායක හෂාන් තිලකරත්නය. 2002 වසරේ පැවැති තරගයේදී හෂාන් තිලකරත්න නොදැවී ලකුණු 104 ක් ලබා ගැනීමට සමත්ව සිටියි. පැය පහමාරකට අධික කාලයක් කඩුල්ලේ රැඳී සිටි වමත් පිතිකරුවා මෙතෙක් ශ්‍රී ලංකා පිතිකරුවකු සෙන්චූරියාහි ලබා ඇති ඉහළම ලකුණු සංඛ්‍යාව ලබා ගැනීම සඳහා පන්දු 231 කට මුහුණ දුන්නේය.

“ඒ තරගයට යනකොට බැට්ස්මන් කෙනෙක් හැටියට තණතීරුවෙන් අපිට මොනවද ලැබෙන්නේ කියන එක ගැන මට දළ අදහසක් තිබුණා. එක තැනකදි කියවුණා අපිට එහෙදි ‘ඩ්‍රයිව්’ කරනව නම් ඒ අවස්ථාව ලැබෙන්නේ හෝටලයේ ඉඳලා ග්‍රවුන්ඩ් එකට යන ‘ඩ්‍රයිව්’ එක විතරයි කියලා. ඒ කියන්නේ එහෙ සෙල්ලම් කරනවා නම් අපිට ඩ්‍රයිව් පහර එල්ල කරන්න හම්බ වෙන්නේ නැති තරම්. බැක් ෆුට් එක, එහෙමත් නැත්නම් පසුපස පාදයේ පහරවල්  තමයි අපිට වැඩි හරියක් ක්‍රීඩා කරන්න වෙන්නේ. එයාලාගේ පන්දු යවන්නන් බලන්නෙත් අපිව කොහොම හරි පස්සට තල්ලු කරලා තල්ලු කරලා ඉස්සරහට දාන බෝලෙන් දවා ගන්න. අපි එතැනදි තමයි පරෙස්සම් වෙන්න ඕන. සෙන්චූරියන්වලදී ලබා ගත්ත ශතකය මට ගන්න පුලුවන් වුණේ ඒ ගැන සැලකිල්ලක් දක්වපු නිසයි” යැයි එම ක්‍රීඩාංගණයේ එකම ශතක ලාභියා වන හෂාන් තිලකරත්න මහතා තම මතකය අවධි කළේය.

ෂෝන් පොලොක්ගේ නායකත්වයෙන් යුතුව තරග වැදි දකුණු අප්‍රිකානු කණ්ඩායම වෙනුවෙන් පොලොක්ට අමතරව, මකායා එන්ටිනි, ස්ටීව් එල්වර්ති, ජැක්ස් කලිස් සහ ඇන්ඩෘ හෝල් වේග පන්දු යවන්නන් ලෙසින් ක්‍රීඩා කළහ. මෙම තරගයෙන් ශ්‍රී ලංකා පිලට කඩුලු 3 ක පරාජයක් හිමි වුවද තිලකරත්න මහතාගේ ඉනිම ප්‍රධාන කොට සෙන්චූරියන් පිටියේ දකුණු අප්‍රිකානු පිල හමුවේ ලද අවම පරතරයක් සහිත පරාජය ලෙසින් සනිටුහන් විය.

“මම ලොකුවට කට් සහ පුල් පහර ගහන කෙනෙක් නොවෙයි. ඒත් මගේ ශක්තිය වගේම දුර්වල තැන් ගැනත් මා තුළ අවබෝධයක් තිබ්බා. එයාලා මාව බැක් ෆුට් එකට තල්ලු කරන්න තල්ලු කරන්න මම කළේ අවශ්‍ය බෝලෙට ගහලා අනිත් හැම බෝලයක්ම අත ඇරපු එක. මට පහර එල්ල කළ හැකි කළාපයට පන්දු යවන්නෝ පන්දුව දාන කල්ම මම කළේ ඒක. එහෙම කළාම එයාලා කරන්නේ බෝලෙ ටික ටික ඉස්සරහට දාලා මාව පහරකට පොළඹවගන්න උත්සාහ කරපු එක. ඒක ඒගොල්ලොන්ට පුරුදු නැති දෙයක්. මොකද එයාලා එකම ලෙන්ත් එකක (පන්දුව පතිත කරන ස්ථානය) තමයි හැමදාම, උදේ හවස බෝල් කරන්නේ. මම බෝලෙ අත අරින්න අතරින්න එයාලා පන්දුව පතිත කරන තැන ඉස්සරහට කළා. එතැනදි මම තව දෙයක් කළා. සැලස්මක් හදා ගත්තා කාටද ගහන්න ඕන කාටද ගහන්නේ නැත්තේ කියන එක ගැන. මොකද ඒ තරගයෙදි වේග පන්දු යවන්නම් 5 දෙනෙක්ම ක්‍රීඩා කරපු නිසා. එදා දවසේ මම දාපු ප්ලෑන් එක හරියටම වැඩ කළා”යි තිලකරත්න මහතා වැඩිදුරටත් අදහස් දක්වා සිටියේය.

ශ්‍රී ලංකාව වෙනුවෙන් ටෙස්ට් තරග 83 කට ක්‍රීඩා කර ඇති හෂාන් තිලකරත්න මහතා ඉනිම 131 කදී ලකුණු 4545 ක් ලබා සිටින්නේ ඉනිමක ලකුණු ලබා ගැනීමේ සාමාන්‍ය 42.87 ක් රඳවා ගනිමිනි. ශතක 11 ක් සහ අර්ධ ශතක 20 ක්ද රැස් කර ඇති වමත් පිතිකරුවා බටහිර ඉන්දීය කොදෙව් පිලට එරෙහිව 2001 වසරේදී කොළඹ එස්. එස්. සී. පිටියේ පැවැති තරගයේදී නොදැවී රැස් කරන ලද ලකුණු 204 ක ඉනිම සිය ටෙස්ට් ක්‍රිකට් දිවියේ ඉහළම ලකුණු සංඛ්‍යාව ලෙසින් වාර්තා අතරට එක් කරගෙන තිබේ.

අද තරගයේදී සෙන්චූරියන් ක්‍රීඩාංගණය දකුණු අප්‍රිකානු පිලට වැඩි පක්ෂපාතීත්වයක් දැක්වීම නිරායාසයෙන්ම සිදුවන්නක් බැවින්, එය අභිබවා යමින් තරගයේ වැඩි වාසි තමන් සංතකයට ගැනීමට දිමුත් ඇතුළු පිරිවර අධිෂ්ඨාන කරගත යුතුය. නොදැවී ලකුණු 153 ක් ලබා ගනිමින් ඩර්බන්හි වීරයා වුණු කුසල් පෙරේරා ද මෙම තරගයේදී ක්‍රීඩා කිරීම ශ්‍රී ලංකා පිලේ මානසික මට්ටම ඉහළ තලයක පවත්වාගෙන යෑමට අතිරේක වාසියක් ලෙසින් සැලකිය හැකි නමුත්,  ශ්‍රී ලංකා පිල මතකයේ තබා ගත යුතු ප්‍රධානම කරුණ වන්නේ ඔවුන් මෙවර තරග වදින්නේ ඩර්බන් හෝ පෝර්ට් එලිසබෙත්හි නොව අතිශයින්ම වේග පන්දු යවන්නන්ට දායකත්වයක් ලබා දෙන සෙන්චූරියන්හිදී බවය.

දෙපිළම මෙම තරගයට අවතීර්ණ වන්නේ කොවිඩ් වසංගතය මත ක්‍රීඩාවෙන් මාස 10 ක කාලයක් හුදෙකලා වීමෙන් පසුවය. අද දිනයේ දිමුත් ඇතුළු පිරිවර මුණ ගැසෙන්නේ කුවින්ටන් ඩි කොක්ගේ නායකත්වයෙන් යුතු දකුණු අප්‍රිකානු පිලයි. දකුණු අප්‍රිකානු නායකයා තරග 200 කට අධික ජාත්‍යන්තර තරග අත්දැකීම් ඇති ක්‍රීඩකයකු වුවත්, ඔහු නායකත්වයට ආධුනිකයෙකි. ක්වින්ටන් කෙතරම් ආධුනිකයෙක් දැයි කිවහොත් ඔහු සුදු පන්දුවේ තරග වලදී නායකත්වය හදාරා ඇතත් පළමු පෙළ තරගයකදී හෝ නායකයකු ලෙස කටයුතු කිරීමට වරම් නොලැබූවෙකි. එබැවින් ශ්‍රී ලංකාවට එරෙහිව සටනක් දීමට ඩි කොක් මාර්ගයක් සොයා ගත යුතු වන්නේ ඔවුන් සතු ප්‍රධානතම වේග පන්දු යවන්නා වන කගිසෝ රබඩා නොමැතිවය.

“අපේ අය ඔලුවේ තියා ගන්න ඕන ප්‍රධානම දේ තමයි මේ විකට් එකේ ඩ්‍රයිව් පහරවල් එක පාරට ගහන්න බෑ කියන එක. ඒ වගේම තමන් සතු ශක්තිය සහ දුර්වල තාවය ගැන අවබෝධය තමන් තුළ තියෙන්න ඕන. අපි බැලුවොත් ආසියානු විකට් වල ක්‍රීඩා කරන පිතිකරුවන්ට දකුණු අප්‍රිකාවේදී පන්දු යවන්නේ කොහොමද කියන එක ගැන හැමෝ තුළම අවබෝධයක් තියෙනවා. ඒ අවබෝධය තියාගෙන තමන්ගේ දක්ෂතාවය හරි විදියට අඳුරගෙන ක්‍රීඩා කළොත් අපිට වැඩි සාර්ථකත්වයකට ළඟා වෙන්න පුලුවන්. එක එක්කෙනාගේ දක්ෂතා වෙනස්. මං කළින් කිව්වා වගේ ඩ්‍රයිව් කරනවා කියන්නේ හොටෙල් එකේ ඉඳලා ග්‍රවුන්ඩ් එකට එන ඩ්‍රයිව් එක විතරයි එයාලා අපිට දෙන්නේ. ඒ කතාවේ ලොකු අර්ථයක් ගැබ් වෙලා තියෙනවා. ඒ ගැන හිතලා අපි ඉවසීමෙන් සහ අවබෝධයෙන් ක්‍රීඩා කළ යුතුයි”

වත්මන් ශ්‍රී ලංකා වයස අවුරුදු 19 න් පහළ කණ්ඩායමේ පුහුණුකරු ලෙසින් කටයුතු කළ තිලකරත්න මහතා දකුණු අප්‍රිකානු තණතීරුවල පන්දුවට පහර දීමේදී ඉවසිලිවන්ත භාවය ඉතාමත් වැදගත් සාධකයක් වන බවද සඳහන් කර සිටියේය.

“එතැනදි පසුපස පාදයේ ක්‍රීඩා කිරීම වගේම ලෙග් සයිඩ් එකෙන් (පා ඉන්න ප්‍රදේශයෙන්) පහර එල්ල කරලා ලකුණු ලබා ගන්න උනන්දු වෙන්න ඕන. අපිට ලෙග් එකට ගහන්න පුලුවන් නම් ඒ පැත්තේ ඉන්නේ පන්දු රකින්නන් තුන් දෙනයි. ඒ පැත්තට ගහන්න අමාරු නිසා තමයි අපි ඕෆ් සයිඩ් එක පැත්තට ගහන්නේ. මේ විකට් වල ඕෆ් සයිඩ් එකට ගහනවා කියන්නේ අපේ මරණ සහිතකය අපිම ලියා ගන්නවා වගේ වැඩක්. කුසල් (පෙරේරා) ගහපු විදිය මතකද…? ඒ වගේ ගොඩක් ලෙග් එකට ඇටෑක් කළොත් හරි. නමුත් එතැනදි මතකයේ තියාගන්න ඕන ඒ තණතීරු සහ මේ තරගාවලියේදී හම්බවෙලා තියෙන තණතීරු වෙනස් කියන එක. කළින් වතාවේ ක්‍රීඩා කළ ඩර්බන් සහ පෝර්ට් එලිසබෙත් විකට් වලට වැඩිය සෙන්චූරියන් සහ වොන්ඩරස් විකට්ස් වෙනස්. ඒවයේ දෝලනය වගේම ලොකු ඉපිලීමක් තියෙනවා. ඒක නිසා තමන්ගේ ස්ථානයට පන්දුව දාන කම්ම පන්දුව අත ඇරලා ඉවසගෙන පන්දුවට පහර දෙන්න උත්සාහ කරන්න ඕන. එහෙම වුණොත් එයාලා පන්දුව වට්ටන තැන වෙනස් කරනවා. මොකද එයාලා බෝලෙ අතාරිනවාට කැමැති නෑ. ඒ වගේ එක එක්කෙනා තම තමන්ට ගැලපෙන විදියට පොඩි පොඩි සැලසුම් දාගත්තොත් මේ ගේම් එක අපිට වාසි වෙන විදියට කැරකැවෙයි” යැයි සෙන්චූරියන් තණතීරුවේදී පන්දුවට පහර දීමේදී තමන් සතු අත්දැකීම් හෂාන් තිලකරත්න මහතා බෙදා ගත්තේය.

ශ්‍රී ලංකා ක්‍රිකට් නිල වෙබඅඩවිය ඇසුරිණි