Category: සුපිරි Cases

“කකුල් පළල් නොකර, පොතපත බලාගන්නැ”යි දකුණු අප්‍රිකාවේ ප්‍රාදේශීය සෞඛ්‍ය අමාත්‍යවරියක් පාසල් දැරියන්ට පැවසීම සම්බන්ධයෙන් දැඩි විවේචනයට ලක්ව තිබේ.

ෆොෆී රමතූබා මෙම ප්‍රකාශය සිදුකළේ ද්විතීයික පාසලකට ගිය අවස්ථාවක දී, ලිංගික ක්‍රියාවන්ගෙන් වැළකීම හා නව යොවුන් වියේ ගැබ්ගැනීම් අනුපාතය අඩු කිරීමට පාසැල් දරුවන් උනන්දු කරවීමේ ක්‍රියාමාර්ගයක් ලෙස ය.

සමාජ මාධ්‍ය හරහා මෙම ප්‍රකාශය විවේචනය වූ අතර ගැහැණු ළමයින්ට පමණක් එසේ පැවසූයේ මන්දැ යි බොහෝදෙනෙක් විචාළහ.

එහෙත් ඇමැතිනී රමතූබා එම ප්‍රකාශය සාධාරණීකරණයට උත්සහ දරමින්, තමා එය පිරිමි ළමයින් ද ඉලක්කකර පැවසූවක් බව ප්‍රකාශ කළා ය.

ලිම්පෝපෝ පළාතේ සෞඛ්‍ය අමාත්‍යවරිය නව අධ්‍යයන වර්ෂයේ පළමු දිනය සනිටුහන් කිරීම සඳහා 12 වැනි දා සෙක්ගක්ගපෙන්ග් නගරයේ පිහිටි ග්වේනානේ ද්විතීයික පාසලට පැමිණ සිටියා ය.

“මම ගැහැණු ළමයින්ට කියන්නේ, දෙපය විවර නොකර පොතපත විවර කරන්න. යහන්ගත වෙන්න එපා, පොත් බලන්න. ‍බොහොම ස්තූතියි,” ඇය පවසා තිබුණි.

මිල අධික බොරු කොණ්ඩ, සහ ස්මාර්ට් ජංගම දුරකථන වැනි සුඛෝපභෝගී දේ යොදා ගනිමින් වැඩිහිටි පිරිමින් විසින් ගැහැණු ළමයින් ආකර්ෂණයකර ගන්නා බව ද ඇය පැවසුවා ය.

එම කතාවේ වීඩියෝවක් සමාජ මාධ්‍යවල හුවමාරුවීමෙන් පසු මෙම අදහස් විවේචනයට ලක් විය.

“මේක, අපයෝජනය, ලිංගිකත්වය, සහ කැමැත්ත ගැන ළමයි එක්ක කතා කරන්න ගැලපෙන විදියක් නෙවෙයි,” එක් සමාජ මාධ්‍ය පරිශීලකයෙකු ලියා තිබිණි. විපක්ෂ දේශපාලනඥයකු වන සිවිවේ ග්වාරුබේ මෙම ප්‍රකාශය “ඉතා ගැටලුසහගත” එකක් ලෙස හැඳින්වීය.

“මේක මේ දරුවන් එක්ක ලිංගිකත්වය සම්බන්ධයෙන් කැමැත්ත පළකිරීම ගැන අර්ථවත් සංවාදයක් පවත්වන්න අවස්ථාවක් වෙලා තිබුණේ… ඒත් ඔබ කළේ වින්දිතයන්ට දොස් නගන එක. ගැහැණු ළමයින්ට අනවශ්‍ය පීඩනයක් දෙන එක,” ඇය ට්විටර් පණිවුඩයක් නිකුත් කරමින් කියා සිටියා ය.

ඇමැතිනී රමතූබා දකුණු අප්‍රිකානු ප්‍රවෘත්ති වෙබ් අඩවියක් වන TimesLIVE වෙත පැවසුවේ ඇයගේ ප්‍රකාශය එහි සන්දර්භයෙන් පිටතට ගෙන විවේචනය කරන බව යි. එය පිරිමි ළමයින්ට ද අදාල වන සේ සිදුකළ ප්‍රකාශයක් බව ද ඇය සඳහන් කළා ය.

“මං පිරිමි ළමයින්ට කිව්වා ගැහැණු ළමයි එක්ක යහන්ගත වෙන්නේ නැතිව, අධ්‍යාපනයට යොමු වෙන්න කියලා,” ඇය කීවා ය.

ලිම්පොපෝහි ඇයගේ ඡන්දදායකයින් ද “එම පණිවිඩය අගය කළබව” ඇය වැඩිදුරටත් පැවසුවා ය.

“එයාලා මේ දේවල් [දරුවොත් එක්ක] කියන්න බයයි කියලත් කිව්වා. හරි දේ හරි විදියටම පෙන්නලා දුන්නාට මට ස්තුති කළා,” ඇය කියා සිටියා ය.

2020 වසර තුළ දී දකුණු අප්‍රිකාවේ වයස අවුරුදු 17ට අඩු ගැහැණු ළමුන් 33400ක් පමණ දරුවන් ප්‍රසූතකර ඇති බව රජයේ සංඛ්‍යාලේඛන පෙන්වා දෙයි.

Save the Children සංවිධානය පෙන්වා දෙන්නේ, දකුණු අප්‍රිකාවේ නවයොවුන් වියේ ගැබ් ගැනීම් සඳහා දායකවන ප්‍රධාන සාධක වන්නේ පුළුල් ලිංගික අධ්‍යාපනයකටත්, මිළ අඩු සහ සෞඛ්‍ය සේවාත් සඳහා ප්‍රවේශය නොමැතිකම බව යි.

bbc sandesaya

වසර 80,000කට පෙර උල්කාපාත වර්ෂාවකින් මිය ගිය බවට විශ්වාස කළ හැකි රයිනෝසිරස් රංචුවකගේ පොසිල අස්ථි කොටස් මොඩල්සිම ලුණුගල රිලවුළු කඳුවැටිය පාමුල අඩි 80ක් පමණ ගැඹුරු මැණික් පතලකින් මතුව තිබේ.

පුරාවිද්‍යා පශ්චාත් උපාධි ආයතනයේ ජීව විද්‍යාඥ කැළුම් නලින්ද මනමේන්ද්‍ර ආරච්චි මහතා පැවසුවේ, එම පොසිල පරීක්ෂා කළ විද්‍යාඥයන් විසින් ප්ලයිස්ටොසීන යුගයේ ජීවත් වූ රයිනෝසිරස්ගේ හිස් කබල බව තහවුරු කළ බවයි. පළමු පොසිල හමුවී වසර 16කට ආසන්න කාලයක් ගතවී ඇතත් වැඩිදුර පර්යේෂණ සිදුකිරීමට අදාළ බලධාරීන් මෙම සොයාගැනීම් පිළිබඳව උනන්දුවක් නොදැක්වීම කණගාටුවට කරුණක් බවද ඔහු පැවසීය.

“අඩි 80ක් පමණ ගැඹුරු මැණික් පතලකින් පළමු පොසිල මතුකරගෙන තිබුණේ 1996දී. මම එවකට පුරාවිද්‍යා අධ්‍යක්ෂ ජනරාල් ආචාර්ය ශිරාන් දැරණියගල මහතා සමඟ එම ස්ථානයට ගොස් හිස් කබල් දෙකක නටබුන් එකතු කළා. පේරාදෙණිය විශ්වවිද්‍යාලයේ ජීව විද්‍යා පීඨය සහ ආචාර්ය මොහාන් අබේරත්න මෙම පොසිල පරීක්‍ෂා කර වසර 80,000කට පෙර ජීවත් වූ රයිනෝසිරස්ගේ ඒවා බව තහවුරු කළා.”

මීට වසර 80,000 කට පෙර ඝන වැසි වනාන්තර සහිත මෙම ප්‍රදේශයේ ජීවත් වූ ප්‍රාග් ඓතිහාසික සත්වයා උල්කාපාත වර්ෂාවකින් මිය යන්නට ඇතැයි විද්‍යාඥයින්ගේ මතය වී ඇති බව ඔහු වැඩිදුරටත් පැවසීය. එම ස්ථානයේ වැඩිදුර පර්යේෂණ සිදුකිරීමේ අවශ්‍යතාව ඔහු අවධාරණය කළේය

දඹුල්ල ප්‍රාදේශීය ලේකම්   කොට්ඨාසයේ ඉහල ඇරෑවුල ග්‍රාමසේවා වසමේ පදිංචි ජී. ජී. සරෝජා සඳමාලි හේමතිලක නම් වූ තිස් පස් හැවිරිදි දෙදරු මව සිය පියා සමඟ ජීවන සටනක නිරතව සිටින්නීය.

ඇය පිළිබඳව මීට පෙර මාධ්‍ය  හරහා අප රට දැනුවත් කළේ කිසිදු ආර්ථික ශක්තියක්  නොමැතිව තමා දරු දෙදෙනා සමග අසරණව ජීවත් වන බවත් අක්කර දෙකක පමණ හිස් භූමියක් තමන් සතුව පැවතිය ද වගා කර ගැනීමට ජලය තිබුණේ නම් තමන්ට මුළු අක්කර දෙකක භූමිය වගා කර ගැනීමට හැකි බව ඇය කළ ප්‍රකාශය නිසාය.

එම පුවත දුටු  දානපතියකු  රුපියල් ලක්ෂ දෙකකට ආසන්න මුදලක් වියදම් කරමින් ඇයට අඩි සියයකට වැඩි නළ ලිඳක් තනා වගා කිරීමට අවැසි පහසුකම් සපයා දීම සිදු කරන ලදී.

මේ වන විට ඇය  අක්කර දෙකක  මුඩුබිම සම්පූර්ණයෙන් වගා කිරීමේ දැඩි සටනක නිරත වෙමින් අස්වනු නෙළා ගැනීම ද සිදු කර මින් සිටියින්නීය.

එමෙන්ම සරෝජා අනාගතය ගැන සිතා මේ වන විට ස්ථිර බෝග වගාවන් වලට යොමුවී තිබේ. එමෙන්ම කෙටි කාලීන බෝග, පලතුරු ආදී සියල්ල මෙම මුඩුබිමේ සරු කොට ඇති යකඩ කාන්තාවකි.

අද ද ඇය කටුමැටි ගැසූ කුඩා පැළක ජීවත්වන දරුවන්  දෙදෙනකුගේ මවකි. ඇයගේ මීළඟ  ඉලක්කය බවට පත්ව ඇත්තේ  කඩා වැටීමට ආසන්න නිවස වෙනුවට ස්ථිර  කාමර දෙකක් ඉදි කර ගැනීමය.

ඒ සඳහා ඇය   අඩිතාලම දමා තිබේ.  නිවස තනා ගැනීම සඳහා ඇයගේ මහන්සියෙන් ගඩොල් කපා පුළුස්සා වෙන්කොට තිබේ. ලී දඬු ඉරා සකසා ගෙන තිබීම ද විශේෂත්වයකි.

අක්කර දෙකක පමණ වූ විශාල භූමියේ  මෙම යකඩ කාන්තාව අමුමිරිස්, තක්කාලි, එල බටු ,මුරුංගා, කෙසෙල්, තිබ්බටු,  පොල්, අඹ, ගම්මිරිස්, පුවක්්‍ වම්බටු, මෑ කරල්, ආදී වගාවන් සිදුකොට තිබේ. ඇතැම් වගාවන් වල පල දරමින් තිබෙන අතර තවත්  වගාවන් තවමත් කුඩා අවධියේ පසුවන අතර ඇයගේ ඉලක්කය බවට පත්ව ඇත්තේ ස්ථිර අඹ වගාවක් මෙම අක්කර දෙක තුළ වගා කර ගැනීමය. එය තම අනාගතය සඳහා ආයෝජනයක් ඇය කීවාය.

එමෙන්ම ඇයගේ එකම බලාපොරොත්තුව බවට පත්ව ඇත්තේ  කෙසේ හෝ මහ පොළොව සමඟ පොර බදිමින් නිවස ඉදි කර ගැනීමය.

බොහෝ දෙනා අනුන්ගෙන් යැපීම්ට උත්සාහ දරද්දී මහපොළොව සමග පොර බඳන්නට උත්සාහ කරන මෙවැනි කාන්තාවෝ ඉතා විරලය. පිරිමියෙකුට වඩා හයි හත්තියක් ඇති ඇය මුළු මහත් සමාජයටම ආදර්ශමත් කාන්තාවකි.

අක්කර දෙකක විශාල ඉඩමේ ස්ථිර බෝග වල යටි තණකොළ කපා ගැනීම සඳහා තණකොළ කපන යන්ත්‍රයක් මිලදී ගැනීම ඉතා අත්‍යවශ්‍ය කාරණාවක් බව ඇය සඳහන් කළාය.

මෙම දිරිය  කාන්තාවට තවදුරටත් ශක්තියක් වන්නට ඔබටත් හැකි නම් එය ඇයට කරන සුවිශාල වූ උදව්වකි.  ඇයගේ ලිපිනය ජී. ජී. සරෝජා සඳමාලි හේමතිලක, 22 ඩි 1 ඉහළ ඇරෑවුල, දඹුල්ල. ඇයට උපකාර කිරීමට කැමැති නම් කරුණාකර පහත ගිනුම් අංකයට ඒ උපකාර කරන්න. ලංකා බැංකුවේ ගිණුම් අංක 80305633

සටහන සහ ඡායාරූප – කාංචන කුමාර ආරියදාස

COVID-19 එන්නත් මාත්‍රා තුනක් ලබාගත් වයස අවුරුදු 65 ට වැඩි පුද්ගලයින් තුළ රෝහල්ගත වීම සියයට 90 කින් අඩු වන බව මහාචාර්ය නීලිකා මලවිගේ මහත්මිය පැවසුවාය. ඇය පවසන පරිදි වයස අවුරුදු 65 ට වැඩි එන්නත් මාත්‍රා දෙකක් ලබාගත් පුද්ගලයින් අතර Omicron හේතුවෙන් රෝහල් ගතවීම ද 50% කින් පහත වැටී ඇත.  

“වයස අවුරුදු 65 ට වැඩි පුද්ගලයින් රෝහල් ගත කිරීමට සහ වෛරසයට ගොදුරු වීමට වැඩි අවදානමක් තිබෙනවා. එක්සත් ජනපදයේ Omicron ආසාදිතයින් සාමාන්‍යයෙන් අවුරුදු 65 ට වැඩි එන්නත් නොකළ ජනගහනය අතර දක්නට ලැබේ. බූස්ටර මාත්‍රාව ප්‍රධාන කාර්යභාරයක් ඉටු කරන්නේ මෙහිදීයි‘

මීට අමතරව, ඇය පැවසුවේ බොහෝ ICU (දැඩි සත්කාර ඒකකය) ඇතුළත් කිරීම් සහ COVID-19 මරණ බොහෝ විට එන්නත් නොකළ පුද්ගලයින් අතර දක්නට ලැබෙන බවයි.    තවත් ප්‍රමාදයකින් තොරව බූස්ටර මාත්‍රාව ලබා ගන්නා ලෙස ඇය සුදුසුකම් ලත් සියලුම පුද්ගලයින්ගෙන් ඉල්ලා සිටියාය.

මේ අතර, ජාතික බෝවන රෝග පිළිබඳ ආයතනයේ වෛද්‍ය ආනන්ද විජේවික්‍රම ජනතාවගෙන් ඉල්ලා සිටියේ බූස්ටර මාත්‍රාව පිළිබඳ වැරදි වැටහීම් සහ මිථ්‍යාවන්ගෙන් ඈත් වන ලෙසයි.

“වර්තමානයේ මිනිසුන්ගේ ප්‍රමුඛතාවය විය යුත්තේ බූස්ටර මාත්‍රාව සමඟ සහතික කළ හැකි ඔමික්‍රොන් වෙතින් වන ආරක්ෂාවයි,” ඔහු අවධාරණය කළේය.

ජාතික රෝහලේ වෛද්‍ය හර්ෂ සතිස්චන්ද්‍ර මහතා පැවසුවේ ගර්භනී කාන්තාවන්ගෙන් හෝ වෙනත් කිසිදු කණ්ඩායමකින් කිසිදු අහිතකර බලපෑමක් මෙතෙක් වාර්තා වී නොමැති බවයි.   “ගර්භනී හෝ මව්කිරි දෙන කාන්තාවන් සඳහා බූස්ටර මාත්‍රාව නිර්දේශ කර තිබෙනවා,” ඔහු තවදුරටත් පැවසීය.

සෞඛ්‍ය විශේෂඥයින් මෙම අදහස් පළ කළේ රජයේ ප්‍රවෘත්ති දෙපාර්තමේන්තුවේ පැවැති ප්‍රවෘත්ති සාකච්ඡාවකදීය  .

සමස්ත ලංකා පාරම්පරික දේශීය පොල් තෙල් නිෂ්පාදකවරුන්ගේ සංගමය හෙළිදරව් කරයි

• අංශ රැසක බලධාරීන් හා නිලධාරීන් හවුල්
• සත්ත්ව පාලන කර්මාන්තයට දැඩි බලපෑමක්
• ජනපතිගෙන් විශේෂ විමර්ශනයක් ඉල්ලයි

විදේශ රටවලින් ගෙන්වා ඇති  පොල්තෙල් මෙට්‍රික් ටොන් 12,000ක් පමණ මාස කිහිපයක් තිස්සේ කොළඹ වරායේ රඳවා ගෙන ඉතා සූක්ෂම ලෙස රුපියල් මිලියන 1500ෙක බදු වංචාවක් සිදුකිරීමට පෞද්ගලික ආයතනයක් සූදානමින් සිටින බව සමස්ත ලංකා පාරම්පරික දේශීය පොල් තෙල් නිෂ්පාදකවරුන්ගේ සංගමය හෙළිදරව් කරයි.

එහි ජාතික සංවිධායක බුද්ධික ද සිල්වා මහතා ඊයේ (14) දින පස්වරුවේ දඹුල්ල ප්‍රදේශයේ විශේෂ ප්‍රවෘත්ති  සාකච්ඡාවක් පවත්වමින් මෙම හෙළිදරව්ව සිදු කළේය.

පසුගිය  නොවැම්බර් මාසයේ සිට පොල් තෙල් තොගය වරායේ සඟවා තිබෙන බවත් අවස්ථා කිහිපයකදීම රජයේ බදු සහන ලබා ගෙන ඒවා  මුදා ගැනීමේ  සැලසුම් සහගත ක්‍රියා මාර්ගයක් ගනිමින් තිබුණු බවත් මෙරට  පොල්තෙල් නිෂ්පාදනය සඳහා  අමු ද්‍රව්‍ය හිඟය බව මවාපාමින් රාජ්‍ය නිලධාරින් සමග ඉතා සූක්ෂම ලෙස මෙරට බදු වංචා කිරීමේ උත්සාහයක් පවතින බව තම සංගමය වගකීමෙන් යුතුව හෙළිදරව් කරන බව ඔහු සඳහන් කළේය.

මෙම පොල් තෙල් බදු වංචාව  සිදුකරන්නට යන්නේ පසුගිය කාලයේ සීනි මෙරටට ගෙනවිත් බදු වංචාකළ  කණ්ඩායම බව ද බුද්ධික ද සිල්වා මහතා අවධාරණය කළේය.

දැනට රජය පනවා ඇති රුපියල් 125ක බද්ද ඉවත් කොට අත්‍යාවශ්‍යය ආහාර ද්‍රව්‍ය යටතේ වරායේ රඳවාගෙන සිටින පොල්තෙල් තොගය වෙළඳපළට යවා බදු මුදල් වංචා කිරීම් මෙහි අරමුණ බව හෙතෙම පැවසීය.

මෙරට පරිභෝජනයට අවශ්‍ය දේශීය පොල්තෙල් සියයට සියයක් ලබාදීමට පාරම්පරික පොල් තෙල් කර්මාන්තකරුවන්ට හැකියාව තිබෙන බවද එසේ තිබියදී මේ ආකාරයෙන් විදේශ රටවලින් විස කාරක සහිත පොල් තෙල් ගෙන්වීම නිසා රජයත් මහජනතාවත් මැති ඇමති ඇමැතිවරුන් පවා දැඩි  අපහසුතාවයකට පත් වීම සිදුවන බවද හෙතෙම පෙන්වා දුන්නේය.

පසුගිය අප්‍රේල් මාසයේ ද සිංහල අලුත් අවුරුද්ද උදා වෙනවාත් සමඟ රටේ පොල් තෙල්  හිගයක් කෘතිමව මවාපාමින් මෙයාකාරයෙන් විස කාරක සහිත පොල්තෙල් මෙරටට ගෙන්වා ජනතාවට අලෙවි කළ සිද්ධිය තම සංගමය හෙළිදරව් කිරීමෙන් පසුව සිදුකරන ලද පරීක්ෂණ කටයුතු සියල්ල මේ වන විට අතරමග නවතා දමා ඇතැයි හෙතෙම චෝදනා කළේය.

අත්‍යාවශ්‍ය සේවා යටතේ විදේශ රටවලින් ගෙන්වන පොල් තෙල් සඳහා බදු සහන ලබා දුනහොත් දේශීයව නැගී සිට ඇති පොල් තෙල් කර්මාන්තය සම්පූර්ණයෙන්ම කඩා වැටීමේ අවදානමක ට ලක් වන බවද බුද්ධික ද සිල්වා මහතා පෙන්වා දුන්නේය.

පොල් ආශ්‍රිත වගකීම් භාරව සිටින ආයතන සිදු කරනු ලබන්නේ පොල් තෙල් ආනයනයකරුවන්ගේ අවශ්‍යතා ඉටු ඉටු කිරීමක් බව ද පසුගිය කාලයේ උග්‍ර පිළිකා කාරක සහිත විස පොල්තෙල් පරීක්ෂණවලදී හෙළිදරව් වී තිබෙන බවත් ඒවා මාස කිහිපයක් යටපත් කරගෙන සිට  නැවත නත්තල් සමයේ මෙම පොල් තෙල් ජාවාරම ක්‍රියාත්මක වූ බව හෙතෙම පෙන්වා දුන්නේය.

පාරිභෝගික අධිකාරියේ ක්‍රියාකාරීත්වය පිළිබඳව ද දෝෂ පවතින  බව පෙන්වා දුන් ඒ මහතා කියා සිටියේ ආහාරපාන වලට වගකිවයුතු පුද්ගලයෙක්  ආයතනයක් මෙරට ක්‍රියාත්මක නොවන බවය.

එමෙන් ම විදේශීය රටවලින් විස සහිත පොල් තෙල් මෙරටට ගෙන්වා  ඒවා මෙරට නිෂ්පාදනය කළ බවට ලේබල් අලවා වෙළඳ වෙළඳපොළේ අලෙවි කිරීම් ඕනෑ තරම්  සිදුවන බවද එහෙත් ඒවා කිසිදු ස්ථානයකින් පරීක්ෂාවකට ලක් නොවන බවද තමන් වගකීමෙන් යුතුව හෙළිදරව් කරන බව ද ඔහු සඳහන් කළේය.

පසුගිය වසරේ ජනාධිපතිවරයා ඇතුළු මැති  ඇමතිවරුන් සමග සිදුකරන  ලද සාකච්ඡාවකින් දේශීය පොල්තෙල් සන්නාමය ආරක්ෂා කර ගනිමින් කර්මාන්තකරුවන් ආරක්ෂා කිරීම සඳහා අමුද්‍රව්‍ය විදේශ රටවලින් ගෙන්වා මෙරට පොල් තෙල් නිෂ්පාදනය කිරීම සඳහා ජනාධිපතිවරයා  තීන්දුවක් ගත් බවත් එහෙත් එම තීන්දුව ක්‍රියාත්මක කිරීමට රාජ්‍ය සේවකයින් ක්‍රියා නොකරන බවද බුද්ධික සිල්වා මහතා පෙන්වා දුන්නේය.

ජනාධාධිපතිවරයා ඇතුළු වගකිව යුතු නිලධාරීන් බලධාරීන්ට වැරදි තොරතුරු ලබාදීම නිසා මෙම දේශීය කර්මාන්ත සම්පුර්ණයෙන්ම විනාශ කිරීමේ ඉතා කූඨ සැලසුමක් ක්‍රියාත්මක වන්නේ  මුදල් වලට කෑදර බලධාරීන් නිසා  බවට ද ඔහු වැඩි දුරටත් චෝදනා කළේය.

රජයේ   නිලධාරීන්ගේ අකාර්යක්ෂමතාවය නිසා  ජනාධිපතිවරයා ඇතුළු රජයට ඇමති ඇමතිවරුන්ට ජනතා  අප්‍රසාදයක් ඇති වී තිබෙන බව ද බුද්ධික ද සිල්වා මහතා පැවසීය.

පුද්ගලයන්  කීපදෙනෙකුගේ අවශ්‍යතාවයකට රජයේ බදු මුදල් වංචා කිරීමට ඉඩ ලබා නොදෙන්නැයි එය  සිදුකළ  හොත් සහගහන අපරාධයක් බව තමන් ජනාධිපතිවරයාට දැනුම් දෙන බව ද ඒ මහතා සඳහන් කළේය.

එමෙන්ම තවත් හෙළිදරව්වක් කරමින් බුද්ධික ද සිල්වා මහතා කියා සිටියේ කොළඹ වරායට ගෙනවිත් ඇති පොල්තෙල් ලොව වෙනත් රටවලින් ආහාර පිස ඉවත් කළ තෙල් බව ද ඒවා නැවත පිරිපහදු කරමින් දේශීය වෙළඳපොළේ විකිණීම සිදු කරන බවද තමන් වගකීමෙන් යුතුව ප්‍රකාශ කරන බවයි.

මෙම පොල්තෙල් පරීක්ෂා කර බැලීමේ ආයතනයක් නොමැති බවත් ප්‍රමිති ආයතන වල ක්‍රියාකලාපය පිළිබඳව තවදුරටත් සොයා බැලිය යුතු  බවද ඔවුන් පහුගිය කාලයේ ද ‘පොඩ්ඩක් පොඩ්ඩක් වස කෑවට කමක් නැති බව‘ ප්‍රකාශ කළේ යැයි ද ඔහු පැවසීය.

පාරිභෝගික අයිතීන් සුරැකීමේ සංගමය කඩේ යන්නේ කාටද ?

බුද්ධික ද සිල්වා මහතා මෙහිදී පාරිභෝගික අයිතීන් සුරැකීමේ සංගමයට ද චෝදනා කළේය.

‘පාරිභෝගික අයිතීන් සුරැකීමේ සංගමය පසුගියදා මාධ්‍ය නිවේදනයක් නිකුත් කරමින්  කියා සිටියේ  වීදේශ රටවලින් ගෙන්වන පොල්තෙල් වලට බදු සහන ලබා දිය යුතු බවයි. එයින් ගම්‍යවන්නේ ඔවුන්ද ප්‍රමිතිය ආයතනයේ නිලධාරීන් මෙන් ඉතා සූක්ෂම ලෙස වැඩ කරනවා දැයි  සැක මතුවන බවයි‘  සිල්වා මහතා කීවේය.

සමස්ත ලංකා පාරම් පාරම්පරික දේශීය පොල් තෙල් නිෂ්පාදකවරුන්ගේ සංගමයේ සම කැඳවුම්කරු දේශක්ති අලහකෝන් මහතා මාධ්‍ය හමුව අමතමින් කියා සිටියේ මෙරට පොල්තෙල් කර්මාන්තය සම්පූර්ම්පූර්ණයෙන්ම කඩා බිඳ දැමීමේ කුමන්ත්‍රණය පිටුපස තවත් කූඨ සැලසුම් කිහිපයක් තිබෙන බවයි.

‘මේක දේශීය පොල්තෙල් කර්මාන්තය බිඳ දැමීමේ සැලසුමක් පමණක් නොවෙයි.  මෙම බදු සහන ලබා දී විදේශ රටවල පොල්තෙල් මෙරට වෙළඳපොළට නිකුත් කිරීමෙන් මෙරට සත්ත්ව ගොවිපළ පාලනය, ගව පාලනය, කුකුල් පාලනය ආදී රැකියා සියල්ල අහිමි වෙනවා. එසේ සිදුවන්නේ දේශීයව පොල්තෙල් නිෂ්පාදනය කොට අවසන් වන පුන්නක්කු සත්ත්ව ආහාර සඳහා විශාල වශයෙන් ලබාගන්නා නිසයි. මේ නිසා සත්ව ආහාර සඳහා විදේශ රටවල්ට ගලා යන මෙරට මුදල් නැවත රටේ ඉතුරු වෙනවා. බදු සහන ලබා දී දේශීය පොල් තෙල් කර්මාන්තයය විනාශ කළහොත් දේශීය පොල් තෙල් කර්මාන්තය පමණක් නොවෙයි කුකුළු  ගොවිපළ කර්මාන්තය මෙන් ම දේශීය කිරි ගව සම්පතද විනාශ වීමේ අවදානමක පවතින බව අප වගකීමෙන් යුතුව කියනවා‘

ඉහළ ඡායාරූපය –  මාධ්‍ය හමුවට එක්ව සිටි සමස්ත ලංකා පාරම් පාරම්පරික දේශීය පොල් තෙල් නිෂ්පාදකවරුන්ගේ සංගමයේ ජාතික සංවිධායක  බුද්ධිකද්ධික ද සිල්වා මහතා සහ සම කැඳවුම්කරු දේශක්ති අලහකෝන් මහතා

සටහන සහ ඡායාරූප – කාංචන කුමාර ආරියදාස

• වගකීම රේගුව භාර ගත යුතුයි
• වහාම පරීක්ෂණයක් ඕනෑ

පකිස්ථානයෙන් ආනයනය කරන ලද බිට් රූට් තොගයක් දින  කිහිපයක  සිට දඹුල්ල ආර්ථික මධ්‍යස්ථානයේ ඉතා හොර රහසේ අලෙවි කිරීමේ ක්‍රියාවලියක් සිදුවෙමින් පවතින බව වෙළෙන්දෝ පවසති.

නුවරඑළිය ප්‍රදේශයෙන් ගෙන්වා සීත ගබඩාවල තබා අලෙවි කරන බව පවසමින් ඉතා සූක්ෂම ලෙස දඹුල්ල ආර්ථික මධ්‍යස්ථාන වෙළඳසැල් කිහිපය මෙම පාකිස්ථානයෙන් ගෙන්වන ලද බීට්රූට් අලෙවි කළ බව ඔවුහු පවසති.

පාකිස්තතානයෙන් ගෙන්වා ඇති බව කියන බිට් රූට් අලෙවි කිරීම සම්බන්ධයෙන් ආර්ථික මධ්‍යස්ථානයේ වෙළඳසැල් වලට පසුගිය 14 වැනි දින උදේ ගොස් සොයා බැලීමේදී ඇතැම් වෙළෙන්දන් කියා සිටියේ ආර්ථික මධ්‍යස්ථානයේ වෙළඳසැලක්  පවත්වාගෙන යන අයෙකු පාකිස්ථානයෙන් ගෙන්වා  තිබූ බීට්රූට් තම වෙළඳසැල්වල දමා කොමිස් මුදලට අලෙවි කළ බවය.

දේශීය බිට් රූට්  කිලෝවක් රුපියල් 320 ත් 350 ත් අතර ඉහළ මිලකට අලෙවි වීමත් සමඟ  පාකිස්තානයෙන් ගෙන් වා තිබූ බීට්රූට් කිලෝව රුපියල් 220 ත් 280 ත්  අලෙවි වූ බව වෙළෙන්දෝ පවසති.

කෙසේ වෙතත් මෙම පාකිස්තථානයෙන් බීට්රූට් ගෙන්වූ බව කියන වෙළඳසැල  සේවකයන් කියා සිටියේ තම වෙළඳ සැලෙන් අලෙවි නොකළ බවත් වෙනත් කණ්ඩායමක් ආර්ථික මධ්‍යස්ථානයෙන් පිටත එළියේ එම බීට්රූට් අලෙවි කළ බවය.

ආර්ථික මධ්‍යස්ථානයේ බොහෝ වෙළෙන්දන් සඳහන් කළේ එම වෙළඳසැල සඳහා ලැබුණු බීට් රූට් අනෙකුත් වෙළඳ සැල් වලට ලබා දී මෙසේ අලෙවි කළ බවය.

බීට්රූට් තොග පිළිබඳව සොයා බැලීම සඳහා අප ආර්ථික මධ්‍යස්ථානයට ගිය අවස්ථාවේදී එහි බීට්රූට් තොග සියල්ල අලෙවි කොට සහ වෙළඳපොළෙන් ඉවත් කොට ඇති බවද දැනගන්නට ලැබිණි.

ආර්ථික මධ්‍යස්ථාන වෙළෙඳ සංගමයේ නියෝජිතයෙකු කියා සිටියේ වෙළඳපලේ පාකිස්ථානයේ ගෙන් වා තිබූ බීට්රූට් අලෙවි කිරීම සිදු වූ බව පිළිගන්නා බවත් එම වෙළද සැලට ගොස් විමසීමේදී ඒවා නුවර එළියෙන් ගෙන්වා ඇති බව පැවසු බවය. එහෙත් ඒවා නුවරඑළියේ නොවන බව බැලු බැල්මට දැනගැනීමට හැකි නිසා ඔවුන්ට අවවාද කළ බව ද ඔහු කිවේය .

දඹුල්ල  ආර්ථික මධ්‍යස්ථාන වෙළෙඳ සංගමයේ සභාපති ය . බී. ඒකනායක මහතා කියා සිටියේ තමන් මේ පිළිබඳව දැනුවත් වී නැති බවය. එම අවස්ථාවේදීම තවත් වෙළෙන්දන් කිහිප දෙනෙකුගෙන් දුරකථනයෙන් විමසීමේදී ආර්ථික මධ්‍යස්ථානයට බීට් රූට් පාකිස්ථානයෙන් ගෙන්වා අලෙවි කළ ඇති බව අනාවරණය කරගැනීමට ඔහුට හැකි විය.

එමෙන්ම ඔහු කියා සිටියේ මෙම බීට්රූට් තොග අර්තාපල් අස්සේ පාකිස්තානයෙන් ගෙනැවිත් අලෙවි කිරීම් සම්බන්ධයෙන්යෙන් වගකීම් රේගුව භාර ගත යුතු බවය.

නීතිය අනුව එළවළු වර්ග මේ ආකාරයෙන්  ගෙන්වීමට හෝ අලෙවි කිරීමට නොහැකි බවද සභාපතිවරයා සඳහන් කළේය. මෙම බිට් රූට් ගෙන්වූ බව කියන ව්‍යාපාරික ස්ථානයේ ගබඩාව පරික්ෂා කිරීමේ දී එහි බීට්රූට් දැක ගැනීමට නොහැකි වූ අතර ඔවුන් කියා සිටියේ  නුවරඑළිය ප්‍රදේශයෙන්   රැගෙන ආ බවය.

කෙසේ වෙතත් ආර්ර්ථික මධ්‍යස්ථාන වෙළෙඳ සංගමයේ බොහෝ දෙනෙකු කියා සිටියේ වෙළඳපොළේ සතියකට වැඩි කාලයක් තිස්සේ ඉතා සූක්ෂම ලෙස පකිස්ථානයෙන් ගෙන්වූ බීට්රූට් අලෙවිය  සිදු වූ බවය.‍

දඹුල්ල ආර්ථික මධ්‍යස්ථානයට පැමිණි බොහෝ වෙළඳුන් මෙන්ම ගොවි ජනතාවද මේ   සම්බන්ධයෙන් දැඩි කනස්සල්ලෙන් ප්‍රකාශ කළේ පාකිස්ථානයෙන් එළවළු ගෙන්වා මේ ආකාරයෙන් අලෙවි කිරීම් පිළිබඳව සොයා බැලීම්ක් සිදු කළ යුතු බව ය. වහාම මෙම කටයුතු නවතා නොදැමුවහොත් දේශීය ගොවියාට බරපතළ ප්‍රශ්න රැසකට මුහුණ පෑමට සිදුවන බවද ඔවුන් සඳහන් කර සිටියහ.

වෙළදපළේ මෙම පකිස්ථානයෙන් ගෙන්වූ බිට් රූට් ගොඩ ගසා තිබෙන හා ශීත කළ ලොරියකින් වෙළදපළට ගෙනවිත් තිබු පින්තුර ලබාගෙන වෙළෙන්දෝ අප වෙත ඒවා තිබිණි.

සටහන සහ ඡායාරූප – කාංචන කුමාර ආරියදාස

ඉන්දියාවේ සිට මෙරටටට ගෙන්වූ ලොකු ළූණු කිලෝ 5000කට අධික ප්‍රමාණයක් විනාශ කිරීමට සූදානම් කිරීමේ අරුම පුදුම පුවතක් දඹුල්ල ඉබ්බන්කටුව ප්‍රදේශයේ හුදෙකලා ගබඩාවකින් ඊයේ වාර්තා විය.

දඹුල්ල ඉබ්බන්කටුව ප්‍රදේශයේ ජනාවාස වලින් තොර ස්ථානයක පවත්වාගෙන යන මහා පරිමාණ ගබඩා සංකීර්ණයක විදේශ රට වලින් ගෙන්වූ  මිනිස් පරිභෝජනයට නුසුදුසු ලොකු ළුණු  තොගයක් කාන්තාවන්  යොදා හොඳ ළුණු වලට කලවම් කොට වෙඳපොළ යැවීමේ ජාවාරමක් ක්‍රියාත්මක වන බව දඹුල්ල නගරාධිපති ජාලිය ඕපාත මහතා ට ලද  තොරතුරක් මත එය සොයා බැලීම සඳහා නගරාධිපතිවරයා සෞඛ්‍ය අංශ නිලධාරීන් මෙන්ම මන්ත්‍රීවරුන් කිහිප දෙනෙකු ද එම ස්ථානයට පැමිණියහ.

මෙම ගබඩාව සම්පූර්ණයෙන්ම වටකොට ඇතුළත නොපෙනෙන ආකාරයට ආවරණය කොට ප්‍රධාන ගේට්ටු ද වසා දමා තිබිණි. පසුව එහි සේවකයන් කැඳවා ගේට්ටු විවෘත කොට නගරාධිපතිවරයා ඇතුළු කණ්ඩායම මෙම ගබඩාවට ගොස් පරික්ෂා කිරීමේදී කාන්තාවන් කිහිප දෙනෙකු එහි ළුණු තෝරන ආකාරයත් විශාල විදුලි පංකා යොදාගෙන ලොකු ළුණු වියලන ආකාරයක් නිරීක්ෂණය විය.

ඉන්දියාවේ සිට මෙරටට ගෙන්වා  තිබූ ළුණු තොගය දඹුල්ල ආර්ථික මධ්‍යස්ථානයේ ආසන්නයේ පිහිටා ඇති අතරමැදි ‍ වෙළෙන්දෙකුට අයත් බව ප්‍රශ්න කිරීම්වලදී හෙළි වී තිබේ.

ගබඩාව තුළ එක් පසෙක කිලෝ 5000 කට අධික ළුණු  ගෝනි   එහි කට  විවෘත කොට තිබෙණු දැක ඒවා  පරික්ෂා කිරීමේදී එහි පරිභෝජනයට සුදුසු සහ නුසුදුසු ළුණු ඇති බව නිරීක්ෂණය විය.

නගරාධිපතිවරයා එහි සේවකයින් ගෙන්  එම ළුණු ගැන විමසීමේ දී ඔවුන් කියා සිටියේ ඒවා තෝරා අවසන් ඉවත් කිරීමට ගොඩ ගසා තිබෙන බවය. ඉතා පිළිවෙළකට ඇසුරුම් කොට තිබෙන නිසාත් එම ගෝනි ඇතුළත පරික්ෂා කර බැලීමේදී මිනිස් පරිභෝජනයට සුදුසු ළුණු පවතින නිසාත් නැවත නැවත සේවකයාගෙන් විමසීමේදී ඔහු කිවේ එම තොගයම මිනිස් පරිභෝජනයට නුසුදුසු බැවින් ඉවත් කිරීම් සඳහා  සූදානම් කොට ඇති ඒවා බවය.

එම ප්‍රකාශය අදහා ගැනීමට පවා නොහැකි නිසා නගරාධිපති ජාලිය ඕපාත මහතා අවස්ථා කිහිපයක්ම පුනපුනා ඔහුගෙන් තොගය පිළිබඳව විමසීමේ දී නැවත නැවත ගබඩා සේවකයා කියා සිටියේ ඒවා  සියල්ල ඉවත් කිරීම්ට ඇති ළුණු බවය.

පසුව නගරාධිපති ජාලිය ඕපාත මහතා නගර සභාවේ සෞඛ්‍ය අංශ නිලධාරීන්ට උපදෙස් ලබා දී කියා සිටියේ ළුණු තොග නගර සභාවේ වාහන යොදාගෙන කසළ  අංගනයට රැගෙන යෑමට අවශ්‍ය  පියවර ගන්නා ලෙසය.

නැවතත් නගරාධිපති ජාලිය ඕපාත මහතා මේවා පරීක්ෂා කොට බැලීමෙන් අනතුරුව සඳහන් කළේ මෙවැනි සිද්ධියක් තම ධූර කාලයේ හෝ ජීවිතයේ අත්දැකීමක් නොමැති බවය.

මේ දකින විට තමන්ට තනි ඇහැට ඇඩෙන බව පැවසු නගරාධිපතිවරයා මෙම ලොකු ළුණු බැලූ බැල්මට පරිභෝජනයට සුදුසු ඒවා බව පෙනෙන බවත් මෙවැනි ගබඩා තමන් මීට පෙර දැක නැති බවය.

කෙසේ වෙතත් ආහාර අර්බුදයක් රටේ පවතින අවස්ථාවක මේ ආකාරයෙන් විදේශ රටවලින් ගෙන්වා ඇති ආහාර විනාශ කිරීම් අපරාධයක් බව ඔහු පෙන්වා දුන්නේය.

මේ පිළිබඳව විමතිය පළ කරන බවද සඳහන් කරමින් නගරාධිපතිවරයා කියා සිටියේ  ව්‍යාපාරිකයා විසින් ඉවත් කිරීම්ට ඇති ඒවා නිසා නගර සභාවට රැගෙන ගොස්  මහජන  සෞඛ්‍ය නිලධාරීන්ට පෙන්වා වාර්තාවක් ලබාගෙන එහි මිනිස් පරිභෝජනයට සුදුසු ළුණු ඇත්නම් ඒවා අසරණ ජනතාවට බෙදා දීමට අවශ්‍ය පියවර ගන්නා ලෙසය.

සටහන සහ ඡායාරූප – කාංචන කුමාර ආරියදාස

ජානමය වශයෙන් වෙනස් කරන ලද ඌරෙකුගේ හදවතක් බද්ධ කරනු ලැබූ ලොව ප්‍රථම පුද්ගලයා බවට එක්සත් ජනපද ජාතිකයෙකු පත්ව තිබේ. බල්ටිමෝර් නගරයේ දී, පැය හතක අත්හදා බැලීමේ ශල්‍යකර්මයකට බඳුන්වූ 57 හැවිරිදි ඩේවිඩ් බෙනට්, දින තුනක් ගතවූ පසුව ද හොඳ සෞඛ්‍ය මට්ටමක පසුවන බව වෛද්‍යවරු පවසති.

බෙනට්ගේ ජීවිතය රැක ගැනීමේ අවසාන බලාපොරොත්තුව ලෙස මෙම බද්ධ කිරීම සිදුකෙරුණු නමුත්, එහි දිගුකාලීන බලපෑම කෙසේ වනු ඇති ද යන්න තවමත් පැහැදිලි නැත.

“එක්කෝ බද්ධ කරගන්න වෙනවා, නැත්නම් මැරෙන්න වෙනවා,” ශල්‍යකර්මයට දිනකට පෙර බෙනට් පැවසීය.

“මේක හරියන්න හෝ වරදින්න පුළුවන්. ඒත් මේක තමයි මගේ අන්තිම තුරුම්පුව,” ඔහු කියා සිටියේ ය.

මෙම ක්‍රියා පටිපාටිය සිදු කිරීම සඳහා, එක්සත් ජනපද වෛද්‍ය නියාමකවරයා විසින් මේරිලන්ඩ් විශ්ව විද්‍යාල වෛද්‍ය පීඨයේ වෛද්‍යවරුන්ට විශේෂ අවසරයක් ලබා දෙන ලද්දේ, එසේ නොවුවහොත් බෙනට් මියයනු ඇති බැවිනි.

ඔහු මිනිස් හෘදයක් ලැබීම සඳහා නුසුදුස්සෙකු ලෙස සැලකුණු අතර, රෝගියා ඉතා දුර්වල සෞඛ්‍ය තත්ත්වයෙන් පසුවන විට වෛද්‍යවරුන් මෙවන් තීරණ ගනු ලබයි.

බද්ධ කිරීම සිදු කළ වෛද්‍ය කණ්ඩායම වසර ගණනාවක් පුරාවට කළ පර්යේෂණවල අග්‍රඵලය සනිටුහන් කරන මෙම ශල්‍යකර්මය, ලොව පුරා ජීවිත රැසකට නව බලාපොරොත්තු ගෙන දෙන්නකි.

මේරිලන්ඩ් විශ්ව විද්‍යාල වෛද්‍ය පීඨය නිකුත් කළ නිවේදනයක් හරහා ශල්‍ය වෛද්‍ය බාර්ට්ලි ග්‍රිෆිත් කියා සිටියේ මෙම සැත්කම ලෝකයේ, “අවයව හිඟතා අර්බුදය විසඳීමට ඉදිරි පියවරක් වනු ඇති” බව යි. එක්සත් ජනපදය තුළ දිනකට පුද්ගලයින් 17 දෙනෙකු අවයව බද්ධ කිරීම් බලාපොරොත්තුවෙන් සිට මියයන අතර, 100,000කට වැඩි පිරිසක් පොරොත්තු ලේඛනයේ සිටින බව වාර්තා වේ.

විවිධ විශේෂවල ජීවීන් අතර අවයව හෝ පටක බද්ධ කිරීමේ ක්‍රියාවලිය හෙවත් ‘විශේෂාන්තර පටකබද්ධය’ හරහා, දැනට අවයව සඳහා ලොව ඇති ඉල්ලුම සපුරාලීමට මිනිසාට සත්ත්ව අවයව බද්ධ කිරීමේ හැකියාව සම්බන්ධයෙන් දිගු කලක් පර්යේෂණ කටයුතු සිදුවූ අතර, ඌරු හෘත් කපාට මිනිසුන්ට බද්ධ කිරීම දැනටමත් සිදු කෙරේ.

2021 ඔක්තෝම්බර් මාසයේ දී නිව් යෝර්ක්හි ශල්‍ය වෛද්‍යවරුන් කණ්ඩායමක්, ඌරෙකුගේ වකුගඩුවක් මිනිසකුට සාර්ථකව බද්ධ කළ බව ප්‍රකාශ කළහ. එම සැත්කම මෙතෙක් ශල්‍ය වෛද්‍ය ක්ෂේත්‍රයේ කෙරුණු දියුණුම අත්හදා බැලීම විය.

කෙසේ වෙතත්, එම අවස්ථාවේ දී අවයවය ලැබූ තැනැත්තා මොළය මියගොස් සිටි අයෙකු විය.

කෙසේ වෙතත්, බෙනට් බලාපොරොත්තු වන්නේ මෙම බද්ධ කිරීම ඔහුගේ ජීවිතය අඛණ්ඩව පවත්වාගෙන යාමට සහාය වනු ඇති බව යි. ශල්‍යකර්මයට පෙර සති හයක් ඔහු රෝගාතුරව සිටි අතර, මාරාන්තික හෘද රෝගයක් ඇති බව හඳුනාගැනීමෙන් පසු ඔහු ජීවත් වූයේ යන්ත්‍රයක ආධාරයෙනි.

“මම බලාගෙන ඉන්නේ ලෙඩේ හොඳවෙලා, ඇඳෙන් බහින්න යි,” ඔහු පසුගිය සතියේ පැවසීය.

වෛද්‍ය නිරීක්ෂණය යටතේ සිටි බෙනට් ඉකුත් සඳුදා තනිවම හුස්ම ගැනීමට පටන්ගත් බවට වාර්තා විය.

නමුත් ඊළඟට කුමක් සිදුවේ ද යන්න නිශ්චිත නැත. AFP පුවත් සේවය වාර්තා කරන්නේ බෙනට්ගේ ශරීරය විසින් අවයවය ප්‍රතික්ෂේප කිරීමට හේතුවිය හැකි ජාන කිහිපයක් ඉවත් වන පරිදි අදාල ඌරා ජානමය වශයෙන් වෙනස්කම්වලට භාජනයකොට තිබූ බව යි.

ශල්‍ය වෛද්‍ය ග්‍රිෆිත්, තම කණ්ඩායම බෙනට් ඉතා හොඳින් නිරීක්ෂණය කරනු ලබන බව ප්‍රකාශ කළ අතර, අවයවලාභී බෙනට්ගේ පුත්‍රයා වන කණිෂ්ඨ ඩේවිඩ් බෙනට් ඇසෝෂියේටඩ් ප්‍රෙස් පුවත් සේවය වෙත පැවසුවේ පවුලේ සාමාජිකයන් ඉදිරිය පිළිබඳ අවිනිශ්චිතතාවයෙන් පසුවන බව ය.

“සැත්කමේ බරපතලකම වගේම වැදගත්කමත් එයා දන්නවා,” ඔහු වැඩි දුරටත් පැවසුවේ ය.

“අපි මෙහෙම දෙයක් කවදාවත් මනුස්සයෙක් යොදාගෙන කරලා නැහැ. ප්‍රතිකාර දිගටම කරගෙන යනවාට වඩා හොඳ විකල්පයක් අපි ඔහුට දුන්නා කියලා හිතන්නයි මම කැමති,” ශල්‍ය වෛද්‍ය ග්‍රිෆිත් පැවසීය. “ඒත් ඔහු [ජීවත් වෙන්නේ] දවසක් ද සතියක් ද මාසයක් ද අවුරුද්දක් ද කියන්න නම් මම දන්නේ නැහැ.”

bbc sandasa