Category: සුපිරි Cases

දඹුල්ල ආර්ථික මධ්‍යස්ථානයට දිවයිනේ විවිධ පළාත් වලින් එළවළු තොග විශාල වශයෙන් ලැබී තිබුණ ද පැයෙන් පැය විනාඩියෙන් විනාඩිය  මිල වෙනස් කොට අලෙවි කිරීම් සිදුවන බව ආර්ථර්ථික මධ්‍යස්ථානයට එළවළු මිලදී ගැනීමට පැමිණෙන වෙළෙන්දෝ පවසති.

අතරමැදි වෙළඳ කණ්ඩායම් ඉතා සන්විධාත්මකව හිසඑසවීම නිසා එළවළු මිලෙහි අඩුවීමේ  වාසිය මෙතෙක් පාරිභෝගික ජනතාවට ලබා ගැනීමට නොහැකි තත්ත්වයකට පත්ව ඇතැයි ඔවුහු වැඩිදුරටත් පෙන්වා දෙති.

ඇතැම් කණ්ඩායම් සහ වෙළඳසැල් ගොවීන්ගේ එළවළු ගොවියා සමඟ සාකච්ඡා කොට සාධාරණ මිලකට අලෙවි කිරීම ආර්ථික මධ්‍යස්ථානයේ සිදුවෙද්දී ගොවීන් රැගෙන එන එළවළු අතරමැදි කණ්ඩායම් ලවා ගොවීන්ගෙන් මිලදී ගෙන ආර්ථික මධ්‍යස්ථානයේ වෙනත් වෙළඳස සැල්වල සහ එළියේ  තබාගෙන ඒවා කොටස් කොට නැවත නැවත අවස්ථා කීපයකදීම අලෙවි කිරීම නිසා මේ ආකාරයෙන් මිල ඉහළ යන බව මිලදී ගැනීම් සඳහා එන වෙළෙඳුන් වැඩිදුරටත් පෙන්වා දෙති.

එමෙන්ම  ගොවීන්ගෙන් එළවළු ලබාගෙන අලෙවි කිරීම් සඳහා ආර්ථික මධ්‍යස්ථානට පැමිණෙන අතරමැදි කණ්ඩායම් ද මිලදී ගන්නා අයට එක මිලක් එමෙන්ම ජනමාධ්‍යවේදීන් විමසීමේදී තවත් මිලක් සහ අලෙවි කිරීමේ දී තවත් මිලක් නියම කරති. මෙම හේතුව නිසා එළවළු මිල යම් මට්ටමකින් ස්ථාවරව පවත්වාගෙන යෑම සඳහා ඔවුහු මෙම උපක්‍රමශීලී ක්‍රමවේදය උපයෝගී කරන බව ද ඔවුහු වැඩිදුරටත් පෙන්වා දෙති.

මේ සම්බන්ධයෙන් අප කළ විමසීමේදී එම අතරමැදි කණ්ඩායම් කියා සිටියේ දඹුල්ල ආර්ථික මධ්‍යස්ථානයට ආවේණික අතරමැදි වෙළඳ කණ්ඩායම් නිසා ආර්ථික මධ්‍යස්ථානයේ මිල ඉහළ යෑම සිදුව ගොවියාට සාධාරණයක් සිදුවන බවයි.

කෙසේ වෙතත් තමන් සහ වෙළෙන්දන් අතර උණුසුම් තත්වයත්වයන්ද විටින් විට ඇතිවෙන බව ඔවුහු පවසති. එවැනි උණුසුම් වූ අවස්ථාවක් අද (09) දීන උදෑසන ද අපට දැක ගැනීමට හැකි විය.

එළවළු තොග ලබාගෙන සිල්ලරට අලෙවිකරණ වෙළෙන්දෙකු කියා සිටියේ ආර්ථික මධ්‍යස්ථානය තුළ අතරමැදි වෙළඳ කණ්ඩායම් ක්‍රියාත්මක වීම නිසා මෙම බරපතළ තත්ත්වය උදාවී තිබෙන බවය.

එම කණ්ඩායම “නාඩි “කණ්ඩායම නමින් හදුන්වන බව කියති.

එමෙන්ම කාබනික පොහොර යොදා ගෙන එලවළු වගා කිරීමට හැකි බවත් එක්තරා දේශපාලන පක්ෂයක නියෝජිතයන් ඉතා සූක්ෂම ලෙස ගොවිපළ වලටත් වෙළඳපළටත් රිංගා  ආරවුලක් ඇති කරන බව ද ඔවුන්   පෙන්වා දීම විශේෂත්වයකි.

ඇතැම්   අතරමැදි වෙළඳ කණ්ඩායම්  දේශපාලනඥයන්ගේ අවශ්‍යතා ඉටු කරමින් මිල උස් පහත් කිරීමෙන් ගොවියා කුපිත කිරීම් ආදී  සිදුකරන බවට ද මෙම  ව්‍යාපාරිකයා දැඩිව චෝදනා කරන්නට විය‍.

මෙම අතරමැදි වෙළඳුන් සහ මැහි වෙළඳුන් අතර උණුසුම් තත්ත්වයක් ද ආර්ථික මධ්‍යස්ථානය තුළ දී දැක ගැනීමට හැකිවිය. ආර්ථික මධ්‍යස්ථාන වෙළෙඳ සංගමයේ කාරක සභාවේ සිටින  ව්‍යාපාරිකයන්යෙකු වූ සි. එස්. සිරිවර්ධන මහතාගෙන් අප මෙම ගැටළුව පිළිබඳව විමසීමේදී ඔහු කියා සිටියේ වෙළඳපළ හැසිරීම් ඉල්ලීම් සහ සැපයුම් අනුව සිදුවන බවය. කෙසේ වෙතත් අතරමැදි  කණ්ඩායම් සෑම වෙළදපළකම සිටින බවද ඒ මහතා සඳහන් කළේය.

කෙසේ වෙතත් රජයේ ගිවිසුම් ප්‍රකාරව ආර්ථික මධ්‍යස්ථානය තුළ සිටිය හැක්කේ අතරමැදියන් ගෙන් තොරව ගොවියාට නිසි සාධාරණ මිලක් ලබාදීම සඳහා නොවේ දැයි අප ප්‍රශ්න කිරීමේ දී හෙතෙම සඳහන් කළේ මේ වන විට ආර්ථික  මධ්‍යස්ථානය තුළ එවැන්නක් ක්‍රියාත්මක නොවන බවය.

දඹුල්ල ආර්ථික මධ්‍යස්ථානය තුළ අද දින එළවලළු මිල යම් මට්ටමකින් ඉහළ ගොස් පැවති අතර පෙර දින එළවළු අලෙවි නොවීම නිසා එම පාඩුව මෙදින අල්ලා අලෙවි කිරීමට සිදුවන කරන බව මෙම අතරමැදි වෙළෙන්දෝ පවසති.

ආර්ථික මධ්‍යස්ථානය වෙළඳ සංගමය හෝ ව්‍යාපාරික ප්‍රජාව නියෝජනයක්  කළමණාකරන භාරයේ  කණ්ඩායම් වෙළඳපොළේ නිතර සිටීම අතරමැදි වෙනත් කණ්ඩායමක් දඹුල්ල ආර්ථික මධ්‍යස්ථානයේ වෙළෙඳපොළ හසුරවීමට හේතු වී තිබේ .

සටහන සහ ඡායාරූප – කාංචන කුමාර ආරියදාස – දඹුල්ල

විශේෂඥ වෛද්‍ය ප්‍රසාද් රණවීර අධ්‍යක්ෂ මැලේරියා මර්දන ව්‍යාපාරය

• විදෙස් රටකට ගිහින් ආවොත් මැලේරියා පරීක්ෂණය අනිවාර්යයි
• මැලේරියාව සම්පූර්ණයෙන්ම සුව කළ හැකියි
• මේ වසරේ පළමු මැලේරියා රෝගියාත් යාපනෙන්

විවිධ කාලවලදී විවිධ රෝග පැතිරීම් පිළිබඳව අපට අසන්නට ලැබේ. මේ දිනවල ශ්‍රී ලංකාවේ පැතිරෙන කොවිඩ් වසංගතය සමඟ මැලේරියාව පිළිබඳව ද අසන්නට ලැබේ. වාහකයෙකු මඟින් බෝ වන මැලේරියාව තුරන් කළ රටක් ලෙස ශ්‍රී ලංකාව නම් කළ ද නැවත මෙරටින් මැලේරියා රෝගීන් වාර්තා වෙමින් පවතී. 2007 වසරට පසුව ශ්‍රී ලංකාවෙන් වාර්තා වන මැලේරියා රෝගීන් පිළිබඳව මැලේරියා මර්දන ව්‍යාපාරයේ අධ්‍යක්ෂ විශේෂඥ වෛද්‍ය ප්‍රසාද් රණවීර සමඟ කළ සාකච්ජාවකි මේ.

මැලේරියා රෝගය යනු කුමක් ද? එහි රෝග ලක්ෂණ මොනවා ද?

මැලේරියාව කියලා කියන්නේ පරපෝෂිතයකුගෙන් බෝවෙන රෝගයක්. මේ රෝගය එක් අයකුගෙන් තවත් අයෙකුට සම්ප්‍රේෂණය වන්නේ මදුරුවෙක් හරහායි. මෙහිදී ප්‍රාථමික මදුරුවන් හා ද්විතික මදුරුවන් කියලා කොට්ඨාස දෙකක් ඉන්නවා. ප්‍රාථමික මදුරුවන්ගේ ධාරිතාවය වැඩියි. ශ්‍රී ලංකාවේ මදුරු විශේෂ 75ක් පමණ ඉන්නවා. නමුත් ඔවුන් ප්‍රාථමික මදුරුවන් තරම් දරුණු නෑ.

මේ රෝගයේ ලක්ෂණ විදියට වමනය, හිසරදය, ක්ලාන්තය, කැරකැවිල්ල සහ පණ නැති ගතිය පෙන්නුම් කරනවා. ඒ වගේම ඇඟපතේ තද වේදනාවකුත් දැනෙනවා. තමන්ගේ වැඩක් කරගන්න බැරි තරමට මිනිස්සු දුර්වල වෙනවා.

මැලේරියාව මාරාන්තික ද?

මැලේරියාව මාරාන්තිකයි. 1926 වර්ෂයේ දී මැලේරියාව ශ්‍රී ලංකාවට ඇවිත් 1952 දක්වාම රට පුරා පැතිරිලා තිබුණා. අද කොරෝනාවලින් මිනිස්සු මැරුණාට වඩා වැඩි ප්‍රමාණයක් එදා මැලේරියාව හින්දා මැරුණා. එක අවුරුද්දකට 80,000ක් විතරත් මැරුණා. 1952 වෙනකොට මරණ සංඛ්‍යාව 1000 දක්වා අඩු වුණා. ඒ කියන්නෙත් ලොකු ජයග්‍රහණයක්.

මැලේරියාව බෝවන්නේ කොහොම ද?

මැලේරියා පරපෝෂිතයා මිනිස් සිරුරට ඇතුළු වුණාම රුධිරය හරහා ඉතා ඉක්මනින් අක්මාවට යනවා. මේ පරපෝෂිතයාට අවුරුද්දක් වුණත් අක්මාවේ හැංගිලා ඉන්න පුළුවන්. ඊට පස්සේ කොයි මොහොතක හරි එළියට එනවා අපටත් නොදැනීම. ඊට පස්සෙ ලේවලට මිශ්‍ර වෙනවා. ඒ වෙලාවෙදී මදුරුවෙක් දෂ්ඨ කළොත් ඒ පරපෝෂිතයා මදුරුවාගේ ඇඟටත් යනවා. ඒ මදුරුවාගේ ඛේට ග්‍රන්ථි හරහා වෙනත් අයෙකුටත් සම්ප්‍රේෂණය විය හැකියි.

ශ්‍රී ලංකාව මැලේරියා රෝගය සම්පූර්ණයෙන්ම තුරන් කළ රටක් බවට ලෝක සෞඛ්‍ය සංවිධානය විසින් සහතිකයක් පිරිනමා තිබෙනවා. නමුත්, නැවතත් මැලේරියාව ගැන සමාජයේ කතා බහක් ඇති වෙලා. අපට නැවතත් මැලේරියාව ඒවිද?

මැලේරියාව ඕනෑම අවස්ථාවක ආපහු එන්න පුළුවන්. හේතුව මැලේරියාව බෝ කරන මදුරුවා අපේ රටේ හැම තැනකම වගේ ඉන්නවා. එතකොට මැලේරියාව තුරන් කළ රටක් කියන්නේ අපේ රට ඇතුළේ මැලේරියාව නෑ කියන එකයි. අපේ රටේ මිලියන විසි එකක් වන ජනගහනයේ කිසිම අයෙකුගේ ශරීරයේ මැලේරියා පරපෝෂිතයා නෑ. එය 2012 වෙනකම් නෑ කියලා සහතික වෙලා තියෙනවා. ඊට පස්සේ වසර තුනක් ලෝක සෞඛ්‍ය සංවිධානය මේ ගැන විමසිල්ලෙන් ඉඳලා 2016 තමයි තහවුරු කළේ මැලේරියාව සම්පූර්ණයෙන් තුරන් කළ රටක් කියලා. රට ඇතුලේ සම්ප්‍රේෂණය නැති වුණත් හැදෙන්නෙ නෑ කියලා නෙවෙයි.

ශ්‍රී ලංකාවේ අවසන් වතාවට මැලේරියා මරණයක් වාර්තා වූයේ කවදාද?

ශ්‍රී ලංකාවේ අන්තිම වරට මැලේරියා මරණය වාර්තා වූයේ 2007 දී. 2007 න් පසුව ශ්‍රී ලංකාවේ මැලේරියාව හින්දා මරණ සිදු වෙලා නෑ.

වැඩියෙන්ම මැලේරියා අවදානමට ලක්වන්නේ කවුරුන් ද?

අප්‍රිකාව වගේ මැලේරියාව තියෙන රටක අයගේ ඇ‍ඟේ ප්‍රතිශක්තියක් තියෙනවා. ඒ නිසා ඒ රටවල එය එතරම් ගණන් ගන්නේ නෑ. හරියට කැස්ස, හෙම්බිරිස්සාව වගේ. නමුත් අපේ රටවල මැලේරියාව නැති නිසා අපේ ශරීරය තුළ ප්‍රතිශක්තියක් නෑ. මොකද මේ පරම්පරාවට මැලේරියාව හැදිලා නෑ. ඒ නිසා දරුවකුට මැලේරියාව හැදුණොත් මාරාන්තිකයි. වයසක හා තරුණ වුණත් ඕනෑම අයෙක් මැලේරියාව නිසා මැරෙන්නත් පුළුවන්. ඒ නිසා මෙයට වයස් භේදයක් නෑ. සියලු දෙනාටම අවදානම තියෙනවා.

ලෝකයේ වෙනත් රටවල මේ වන විට මැලේරියා වසංගත තත්ත්වයේ පැතිරීම කෙසේ ද?

මැලේරියාව දකුණු ආසියානු කලාපයෙන් තුරන් කරලයි තියෙන්නේ. අපිට මැලේරියාව තුරන් කළ රටක් කියලා සහතිකය දෙන කොට චීනය වගේ රටවලුත් සහතිකය ඉල්ලුවා. චීනයට ඒ සහතිකය ලැබුණේ පසුගිය සැප්තැම්බර්වලයි. අනෙක් අය විභාගයට පාඩම් කරනකොට අපි විභාගය පාස් වෙලා අවුරුදු දහයක් විතර වෙනවා. වැඩිම මැලේරියා තර්ජනය තියෙන්නේ අප්‍රිකානු රටවලින්. සූඩාන්,කොංගෝ වැනි අප්‍රිකානු රටවල 50%ක්ම මැලේරියාව තියෙනවා.

ශ්‍රී ලංකාවේ මැලේරියා රෝගය සම්බන්ධයෙන් ඇති නවතම තොරතුරු මොනවාද?

පසුගිය 2021 වසරේ මැලේරියා රෝගීන් 26 දෙනෙක් වාර්තා වුණා. ඉන් 25 දෙනෙක්ම අප්‍රිකානු ආශ්‍රිතයන්. මේ වසරේ පළමු රෝගියා වාර්තා වුණේ පසුගිය 02 වැනිදා. හොයාගෙන ගියාම ඒ රෝගිය­ා බටහිර අප්‍රිකානු රටකින් ඇවිත් තියෙන්නේ. දෙසැම්බර් 22 තමයි ඇවිත් තියෙන්නේ. යාපනේ ගුරුනගර්වලින් හමු වුණේ. ඒ නිසා මැලේරියා මර්දන කටයුතු ඒ ප්‍රදේශයේ දැඩි කරලයි තියෙන්නේ. ඒ නිසා මේ වසරේ ප්‍රථම මැලේරියා රෝගියාත් යාපනෙන්.

ශ්‍රී ලංකාවේ මැලේරියා මර්දන ව්‍යාපාරයේ ආරම්භය හා කාර්යභාරය කවරේද?

1911 වර්ෂයේ කුරුණෑගල තමයි ශ්‍රී ලංකාවේ පළමුවරට මැලේරියා මර්දනයට කාර්යාලයක් පිහිටුවා ගත්තේ. 1958 මැලේරියාව සම්බන්ධයෙන් දීපව්‍යාප්ත වැඩසටහනක් ක්‍රියාත්මක වුණා 1963 දී ලෙඩ්ඩු ගණන 11 දක්වා අඩු වුණා. ඊට පස්සේ ලෙඩේ නෑ කියලා සාමාන්‍ය විදිහට මිනිස්සු වැඩ කටයුතු කළා. ඊට පස්සෙ ආයෙමත් රෝගය පැතිරිලා ගියා. රෝගීන් ගණන ලක්ෂ පහක් වුණා. ලක්ෂ පහේ රෝගීන් ගණන ඍණ අගයක් ගන්න අවුරුදු 45ක් ගියා. ඒ නිසා ඩෙංගු වගේ නෙවෙයි, මැලේරියාව ආවොත් නවත්තන්න ලේසි නෑ. අපි මේ දිනවල යාපනය දිස්ත්‍රික්කය තුළ මැලේරියා මර්දන ව්‍යාපාරයක් සිදු කරගෙන යනවා. විශේෂඥ වෛද්‍යවරු දෙදෙනෙක් ඒ සඳහාම යැව්වා. දිස්ත්‍රික්කයේ සියලු වෛද්‍යවරු සමඟ සාකච්ඡා කළා. ඔවුන් දැනුවත් කළා. ඉස්සරහට මැලේරියාව ආවොත් මොකද කරන්නේ කියලා. මැලේරියාවෙන් කිසිම මරණයක් සිදු වෙන්න බෑ කියලා අපේ ව්‍යාපාරයේ නීතියක් තියෙනවා. ඒ නිසා අපි, මැලේරියා රෝගය වැලඳුන ලෙඩෙක් ආවොත් අනිවාර්යයෙන්ම උපරිම දේ සිදු කරනවා. හැබැයි මැරෙන්න දෙන්නේ නෑ.

ඒ වගේම “අවදානමට පෙර සූදානම” අපේ ව්‍යාපාරයේ සටන් පාඨයයි. යම් පුද්ගලයෙක් මැලේරියාව හදාගෙන ආවොත් මදුරුවාව සොයාගන්න කලින් අපි රෝගියාව සොයා ගන්නවා කියන එක අපේ ව්‍යාපාරයේ එක් උපක්‍රමයක්. කිසියම් රෝගියෙක් හිටියොත්, මීටර් 500ක් ඇතුළත සිටින සියලුම මිනිස්සු පරීක්ෂා කරනවා. අපේ මූලස්ථාන කාර්යාල 28ක් ශ්‍රී ලංකාව පුරා තියෙනවා. මෙවර අපි විශේෂ කැලැන්ඩරයක් හැදුවා. මිනිස්සුන්ට මැලේරියාව කියන එක අමතක වෙනවා. ඒ නිසා අපි මේ කැලැන්ඩ‍රයෙන් මිනිස්සුන්ට විතරක් නෙවෙයි වෛද්‍යවරු ඇතුළු කාර්ය මණ්ඩලයටත් මෙය දුටු විගස සිහියට නැඟෙන්න අරමුණු කරගෙන ශ්‍රී ලංකාවේ සියලුම රෝහල්වලට බෙදා හරිනවා. මේ වගේ දේවලින් පවා අප බලාපොරොත්තු වන්නේ මැලේරියා ලෙඩාව අල්ල ගන්නයි. ඒ වගේම වෛද්‍යවරයකු ළඟට ලෙඩෙක් ආවොත්, වෛද්‍යවරයාටත් ඒ ගැන විමසිලිමත් වෙන්න පුළුවන්. නැතිනම් ලෙඩාගේ අනෙක් සියලු පරීක්ෂණ කළත් මැලේරියාව ගැන පරීක්ෂණ කරන්නේ නෑ. පසුගිය අවුරුද්දේ මැලේරියා රෝගීන් හමුවුණේ 25 යි.

සාමාන්‍යයෙන් අපට වසරකට රෝගීන් 50ක් විතර මුණ ගැසෙනවා. රෝගීන් අඩු වුණා කියලා අපේ ව්‍යාපාරය දියත් කරන වැඩපිළිවෙල අඩු කරන්නේ නෑ. පසුගිය දෙසැම්බර් 16 වැනිදා අපට යාපනයෙන් මැලේරියා රෝගියෙක් හමු වුණා. අපි ඔහු දවස් තුනෙන් අල්ල ගත්තා. ඊට පස්සේ ඉක්මන් ප්‍රතිකාර කළා. ඔහු සනීප වුණා. දෙසැම්බර් 23 වැනිදා යාපනය තව කෙනෙක් හමු වුණා. මේ විදියට ලෙඩෙක් හමු වුණාම අපේ උපක්‍රමයක් තියෙනවා, පළමුවෙන්ම කරන දේ තමයි, ගෙදර ඇතුලේ හා වටේ මැලේරියා මදුරුවො ඉන්නවාද කියා සොයා බලා විනාශ කරන එක. මදුරුවාගෙ ඇඟේ රෝග වාහකයා තිබුණාම සුමාන දෙකක් ඇතුළත තවත් අයකුට බෝ වෙන්න පුළුවන්. අපි ළඟ විශේෂ මදුරු දැලක් තියෙනවා. ඒ දැලේ මදුරුවො වැහුවාම උන් මැරෙනවා. ඒක හැමෝටම දෙන්නෙ නෑ. අපි සන්තකයේ පමණයි තියෙන්නෙ. ඉතින් ඒකට රජයට ලොකු වියදමක් දරන්න වෙනවා. නමුත්, අවදානමක් තියෙන හැම ගෙදරකටම අපි එය ලබා දෙනවා.

වෙනත් රටවල සිට එන මඟීන්ගෙන් අපටත් මැලේරියාව බෝවිය හැකිද?

2012න් පසුව දේශීයව එක් රෝගියකු හෝ වාර්තා නොවීමෙන් මැලේරියා පරපෝෂිතයා ශ්‍රී ලංකාවෙන් මුළුමනින්ම තුරන් වී ඇති බව තහවුරු වෙනවා. නමුත්, මැලේරියා රෝගය බෝ කරන මදුරුවා තවමත් ශ්‍රී ලංකාවේ ඉන්නවා. ඒ නිසා පිටරටින් නැවත මේ පරපෝෂිතයා ශ්‍රී ලංකාවට පැමිණිය හොත්, නැවත වසංගත තත්ත්වයක් ඇතිවීමේ ඉඩකඩක් තියෙනවා.

ශ්‍රී ලංකාවෙන් වසරකට මිලියනයක් පමණ ඉන්දියාවේ දඹදිව වන්දනාවට සහභාගි වෙනවා. කොරෝනා කාලපරිච්ඡේදය හැරුණාම 2019 දී එසේ ගිය අයගෙන් 29 දෙනකුටම මැලේරියාව වැලඳුන බවට වාර්තා වුණා. අප්‍රිකානු රටවලට වැඩිපුර ශ්‍රී ලාංකිකයෝ සංචාරය කරන්නේ නෑ. ඉන්දියාව, අප්‍රිකාව තරම්ම නැතත් ඉන්දියාව මැලේරියාව තුරන් කරලා නෑ. චීනය මීට මාස තුනකට පෙර මැලේරියාව තුරන් කළ රටක් විදිහට ලෝක සෞඛ්‍ය සංවිධානයෙන් සහතිකය ලබා ගත්තා.

මැලේරියාව ආවොත් නවත්වන්න ලේසි නෑ. එහෙම වුවොත් ශ්‍රී ලංකාවට විශාල පාඩුවක් සිද්ධ වෙනවා.

මැලේරියාව බලපාන්නේ මිනිස් ශරීරයේ කිනම් කොටසටද? ඉන් සිදුවන හානිය කවරාකරද?

මෙහෙමයි. “මොළයේ මැලේරියාව” කියලා රෝගයකුත් තියෙනවා. ඒකෙන් මොළයට බලපෑම් සිද්ධ වෙනවා. ප්ලීහාව ඉදිමෙන්න පුළුවන්. එයම මරණයට හේතුවක් වෙන්නත් පුළුවන්. ඒ වගේම රුධිර පට්ටිකා අඩු වෙනවා. රුධිර ඝනත්වය අඩුවෙලා ගියොත් ලෙඩා රක්තහීනතාවයට පත්වෙනවා. මිනිස් ශරීරයේ ලේ අඩු වුණාම මිනිස්සු කම්මැළියන් බවට පත් වෙනවා. ඔවුන්ට වැඩ කරන්න ශක්තියක් නෑ. ඇඟ පත වේදනා දෙන්නත් පුළුවන්. ඒ වගේ ප්‍රශ්න පැන නඟිනවා. දරුණුම අවස්ථාවට පත් වුණාම මරණය සිදු වෙන්න පුළුවන්.

මැලේරියාව සුව කිරීමට අසීරු රෝගයක් ද?

නෑ. සම්පූර්ණයෙන්ම සුව කළ හැකියි. හැබැයි, දරුණු අවස්ථාවට යන්න කලින් හඳුනා ගත යුතුයි. මුල් අවස්ථාවේ හඳුනා ගත්තොත් නිසි ප්‍රතිකාර මඟින් සම්පූර්ණයෙන්ම සුව කළ හැකියි.

මැලේරියාව වෙනුවෙන් ඖෂධ හෝ එන්නත්කරණයක් තිබේ ද? එය ශ්‍රී ලංකාවේ භාවිත කර තිබේද?

මැලේරියාවට ඖෂධ තියෙනවා. ඒවා ශ්‍රී ලංකාවේ ඒවා භාවිත කරනවා. මේවා ෆාමසිවලින් ගන්න බැහැ. මැලේරියා මර්දන ව්‍යාපාරය යටතේ පමණයි තියෙන්නේ. ‍ෆාමසිවල තිබු‍ණොත් රෝගීන් ඒවා පාවිච්චි කිරීම හරියට සිදු කරන්නේ නෑ. බාගෙට ප්‍රතිකාර කළොත් නැවත මතුවෙන්න පුළුවන්. එය වසංගතයකට හේතු විය හැකියි. ඒ නිසයි නීතියක් වශයෙන් මැලේරියා ඖෂධ ෆාමසිවල තහනම් කරලා තියෙන්නේ.

මැලේරියා රෝගය වළක්වා ගත හැක්කේ කෙසේ ද?

ප්‍රධාන වශයෙන්ම යම් අයෙක් මැලේරියාව ඇති රටක සංචාරය කරනවා නම්, ඒ සඳහා ඇති ඖෂධ සතියකට කලින් ගත යුතුයි. ඒ වගේම අදාළ රටේ සිටින තුරු සතිපතා ඖෂධය ලබා ගත යුතුයි. ඒ විතරක් නෙමෙයි, ශ්‍රී ලංකාවට ආ පසු ද සති හයක් නොකඩවාම ඖෂධ ලබාගත යුතුයි. එහෙම කළොත් මැලේරියාවට ඇති අවදානම අඩුයි. නමුත්, 100%ක් ම හැදෙන්නේ නෑ කියලා කියන්න බෑ. ඒ නිසා යම් අයෙක් පිටරටකට යනවා නම්, අනිවාර්යයෙන්ම මැලේරියා සඳහා අදාළ ඖෂධ ගත යුතුයි.

කිසියම් අයකුට මැලේරියා රෝග ලක්ෂණ පෙන්නුම් කරන්නේ නම්, කළ යුත්තේ කුමක්ද?

වහාම ළඟම පිහිටි රෝහල වෙත ගොස් වෛද්‍යවරයා හමුවිය යුතුයි. වෛද්‍යවරයෙකුගේ නිර්දේශයකින් තොරව පරීක්ෂණ සිදු කරගන්නත් පුළුවන්. රට ගිහින් ආවාම හා උණ වැලඳී තිබීම පරීක්ෂණයට ප්‍රමාණවත්. ඒ නිසා අපි ඉල්ලා සිටින්නේ තමාට උණ වැලඳී ඇත්නම් හිත හිතා ඉන්න එපා. වෛද්‍යවරයා හමුවන්න. හමු වී තමා රට ගිහින් ආ බවත් පවසා සිටින්න. ඒ වගේම උණ වැලඳී ඇති රෝගියෙකුගෙන් වෛද්‍යවරයෙකු විමසිය යුතුම දෙයක් තමයි රට ගියා ද? කියන කාරණය. රට ගිහින් ආවා නම් අනිවාර්යයෙන්ම මැලේරියා පරීක්ෂණය සිදු කරගත යුතුයි. ඒ වගේම යම් අයෙක් මැලේරියාව ඇති රටකට ගිහින් ආවොත් වසර තුනක් යන තුරු කිසිවකුට ලේ දීමක් සිදු කරන්න බෑ. එය තහනම්. මොකද රුධිරය හරහා මැලේරියාව බෝවිය හැකි වීමයි. එය නීතියක්.

පුද්ගලික රෝහලකින් වුවද මැලේරියා රෝගියෙකු වාර්තා වුව හොත් අප වෙත දැන්විය යුතුයි. 0117626626 දුරකතන අංකය මැලේරියාව සම්බන්ධ ඕනෑම ගැටලුවකට විවෘතයි.

දිනමිණ ඇසුරිනි

නැව් දෙකක් වරායේ නවතාගෙන පෙට්‍රල්, ඩීසල් බාගත නොහැකිව ණයවර ලිපි විවෘත නොකොට තබාගෙන සිටින බව සමගි ජන බලවේගය පාර්ලිමේන්තු මන්ත්‍රී පාඨලී චම්පික රණවක මහතා (5) අනාවරණය කළේය. ඊළඟ දින අට ඇතුළත ණයවර ලිපි විවෘත කිරීමක් සිදු නොකළහොත් පෙට්‍රල් ඩීසල් හිඟයක් පැමිණෙන බැවින්, ආණ්ඩුවට ලැබුණාය කියන ඩොලර් වලින් අදාළ ණයවර ලිපි විවෘත කිරීමට කටයුතු කොට පෙට්‍රල් ඩීසල් හිඟය මග හරවා ගන්නා ලෙස ද හෙතෙම ආණ්ඩුවට දැනුම් දුන්නේය.

අද පැවැති මාධ්‍ය හමුවකදී වැඩිදුරටත් අදහස් දැක්වූ හිටපු අමාත්‍යවරයා සඳහන් කළේ අමාත්‍ය බැසිල් රාජපක්ෂ මහතාගේ සහන මල්ල යටතේ ලබාදෙනවාය කියන ඖෂධ බදු අඩු කිරීම පට්ටපල් බොරුවක් බවය.

“පළමුවෙන්ම කියන්න ඕනේ ඖෂධ වලට බදු අය කරන්නේ නැහැ. ඒ අනුව ඒ කාරණය පට්ටපල් බොරුවක්. දෙවෙනි කාරණය, මේ රාජ්‍ය අංශයේ දැනට ලක්ෂ 15ක් පමණ ඉන්නවා. විශ්‍රාමිකයෝ ආසන්නයෙන් ලක්ෂ 7 ක් පමණ ඉන්නවා. ඒ අනුව මේ ලක්ෂ 22 ක් පමණ වන ජනතාවට වසරකට රුපියල් 60,000කින් පමණ අලුත් මුදල් ප්‍රමාණයක් ලබා දෙන්න රුපියල් බිලියන 130ක් පමණ වැය වෙනවා. ආණ්ඩුවේ ආරංචි මාර්ග කියන්නේ මේ සහන පැකේජයට එහෙම නැත්නම් මේ සහන මල්ල රුපියල් විශාල එකක් බවයි. ඒ අනුව පළමුවෙන්ම බැසිල් රාජපක්ෂ මහතා ඉදිරිපත් කරපු අය වැයේ වැය පාර්ශවය එනම් බිලියන 5200 කට වැඩි වෙච්ච වැය පාර්ශවය බිලියන 5500 ක් පමණ ප්‍රමාණයක් දක්වා ඉහළ යනවා. ඒ වගේම අය වැය පරතරය තව දුරටත් පළල් වීමට නියමිතයි.”

බැසිල් රාජපක්ෂ මහතා ප්‍රකාශ කළේ රාජ්‍ය අංශය රටට බරක් ලෙස ය. හැකි පමණ රාජ්‍ය අංශයෙන් ලබාගන්නවා විනා සහන ලබා දීමේ හැකියාවක් නැති බවය. මේ ආකාරයට රාජ්‍ය අංශයට අපහාස අවමාන කරමින් සිට එක්විටම රජයේ සේවකයන්ට හා විශ්‍රාමිකයන්ට රු. 5,000 දීමනාවක් ලබා දීමටත්, ගුරුවරුන්ට පොරොන්දු ප්‍රකාරව වැටුප් වර්ධක ලබා දීමට ගත් තීරණය සම්බන්ධයෙන් සතුටු විය හැකිය. නමුත්, රටේ වැඩ කරන ජනතාව අසූ ලක්ෂයක් පමණ ශ්‍රී ලංකාව තුළ සිටියි. ඒ අසූ ලක්ෂයෙන් සහන ලබාදීමට තීරණය කර ඇත්තේ පහළොස් ලක්ෂයකට පමණි.

“වැඩියෙන්ම පීඩාවට පත් වෙලා තියෙන්නේ ඒ අසූ ලක්ෂයෙන් රාජ්‍ය නොවන පුද්ගලික අංශයේ සේවය කරන අයත් ඒ වගේම අවිධිමත් ක්ෂේත්‍රවල සුළු හා මධ්‍ය පරිමාණ කර්මාන්ත ක්ෂේත්‍රවල නියැලී ඉන්න අයත් තමයි අද බඩගින්නට, අසහනයට ලක් වෙලා ඉන්නේ. ඒ අයට කිසිඳු සහනයක් මේ මාර්ගයෙන් ලැබිලා නැහැ. ඇත්තටම මේ මේ මුදල් කොහොමද හොයාගන්න යන්නේ? එක්කෝ ආණ්ඩුව බදු වැඩි කරන්න ඕනේ. දැන් රාවයක් පැතිර යනවා. අයවැයෙන් යෝජිත ඒ බදු වැඩි කිරීමට අමතරව වැට් බදු ආදිය වැඩි කරන්න යන බව. ඉතින් ඒ බදු වැඩි කිරීමක් සිද්ධ කළහොත් එහෙම අවසානයේ මේ වැටුප් වර්ධනයට අවශ්‍ය කරන ධනය උත්පාදනය කරන්නේ ඒ ජන කණ්ඩායම හා වැටුප් වර්ධනයකට යටත් නොවිච්ච අවශේෂ ජන කණ්ඩායම කියන සියලු දෙනාගේම බදු වැඩි කිරීමකින්. ඒකෙන් මේ සමාජ පීඩනය තවත් පුළුල් වෙනවා විතරයි.”

මේ සහන ලබාදීම සඳහා වන ඊළඟ විකල්පය වන්නේ බියගම කොම්පැනියට බාර දීම හෙවත් සල්ලි අච්චු ගැසීමයි.

“ඒක තමයි මේ ආණ්ඩුවේ ප්‍රියතම විෂය. ඒකෙන් සිද්ධ වෙන්නෙත් මොකක්ද? උද්ධමනය වැඩිවෙලා ගිහිල්ලා, මේ පොදුවේ මේ වැඩි කරපු මේ බිලියන 229 බර, බඩු මිල වැඩිවීමක් හැටියට, සමාජයට නැවත දැනීම. කොටින්ම කිව්වොත්, රුපියල් 54 මාළු මිරිස් කරල රුපියල් කරලා බැසිල් මහත්තයා මේ පඩි වැඩි කිරීම කළා කියන්න පුළුවන්. සල්ලි අච්චු ගැහීම පිළිබඳ කාරණය සැලකිල්ලට ගත්තොත්. ඉතින් ඒ අනුව පේනවා මේක විසඳුමක් නෙවෙයි කියන එක. ඒ වගේම සමස්ත ණය බර පිළිබඳ ගැටළුවට විසඳුම් නොදී ඒ පිළිබඳව වෙච්ච පුළුල් විධිමත් වැඩසටහනකට නොගිහින් අතනින් මෙතනින් ගන්න මේ විසඳුම් වලින් මේ අර්බුදය තවත් තීව්‍ර වෙනවා. ජාතියේ ආර්ථික වල, එහෙම නැත්නම් මිනී වල තවත් ගැඹුරට කැපීමක් විතරයි මෙයින් සිද්ධ වෙන්නේ කියන එක අපි අවධාරණය කරනවා සමස්තයක් හැටියට.”

එතකොට මොකක් හරි හැමදාම මේ රාජපක්ෂලා, විශේෂයෙන් බැසිල් රාජපක්ෂ මහත්තයා මොකක්හරි වැඩක් කලොත් යටි අරමුණක් තියෙනවා. මොකක්ද මේකේ යටි අරමුණ? අපට පේනවා කරුණු කිහිපයක්. එකක් තමයි දැන් ජාත්‍යන්තර මූල්‍ය අරමුදල ඉදිරියට, නොයෙක් කතා පවත්වලා, විරෝධතා කතා පවත්වලා, සිංහ නාද නගලා, අපි ඇමති මණ්ඩලවල මොහොතක්වත් ඉන්නේ නෑ වගේ වාමාංශික, වාග්ලාප එහෙම ඇහිලා අපිට දැන් නැවත වතාවක් ජාත්‍යන්තර මූල්‍ය අරමුදලත් එක්ක කතා කරන්න යනවා. එතකොට ජාත්‍යන්තර මූල්‍ය අරමුදල ගාවට යනකොටම කරන්න වෙන දෙයක් තමයි, රුපියල පාවෙන්න අරින්න වෙනවා. මේ ඩොලරයට තියෙන රුපියල් 203, ඒ අනුව රුපියල් 240 ත්, 250 ත් අතරට ගානකට පත් වේ. ඒ පත්වූ වහාම මේ බඩු මිල නැවත ඉහළ නගිනවා. මේ බඩු මිල නැවත වැඩි වෙනවා. එතකොට ඒ බඩු මිල නැවත වැඩි වීම නිසා රාජ්‍ය අංශයෙන් එල්ල වන පීඩනය යම් ප්‍රමාණයකට කලින්ම සමනය කිරීම සඳහා ගත්ත ක්‍රියාමාර්ගයක් විය හැකියි මේ පඩි වැඩි කිරීම්.”

එමෙන්ම අනාගතයේ මේ රාජපක්ෂ සාපයේ ණය ගෙවීම සඳහා රාජ්‍ය දේපළ විකුණා දැමීම දැන් සීඝ්‍රයෙන් සිදුවෙමින් පවතී. ඉන්දියාවෙන් ඩොලර් මිලියන 500 ක තෙල් ගැනීම සඳහා වසර 15 කින් ශ්‍රී ලංකාවට අයිති වීමට තිබූ තෙල් ටැංකි වසර 50 කට බදු දීම සඳහා වන දේශද්‍රෝහී ගිවිසුම තව සතියකින් අත්සන් කිරීමට නියමිතය.

“ඒ වගේම රටේ ගෑස් සම්පත NFC සමාගමට විකිණීමේ ප්‍රයත්නය ලිඛිතව අත්සන් කොට හමාරයි. ඊළඟට අදානි සමාගමට කිසිම ප්‍රසම්පාදනයකින් තොරව වසර 50 ක් යනතෙක් මේ රටට ප්‍රයෝජනයට ගත හැකි සුළං බලය හා සූර්ය බලය අමු අමුවේ පැවරීමට, බලශක්ති අමාත්‍යාංශය සූදානම්. එතකොට මේවට නැගෙනවා විරෝධතාවයක්. වරායේ ඉඩම්, චීන සමාගමට පැවරීමට එරෙහිව, ඒ වගේම තෙල් සංස්ථාවේ තෙල් ටැංකි පැවරීමට එරෙහිව, විදුලිබල මණ්ඩලය මේ කරන පාවාදීම් වලට එරෙහිව, වැඩකරන ජනතාව බලමුළු ගැන්වෙනවා. ඒ වගේම සෙලෙන්දිවා සමාගම හරහා, රාජ්‍ය බැංකු, දේශීය ආදායම් දෙපාර්තමේන්තුව වැනි අය සම්බන්ධ, ඒගොල්ලන්ට අයත් වෙච්ච, ඔවුන්ගේ මූලස්ථාන, විදේශිකයන්ට තුට්ටු දෙකට විකිණීමේ වැඩපිළිවෙලට එරෙහිවත්, ජීවන බරත් එක්ක රාජ්‍ය අංශය කැළඹීමක් තියෙනවා. මේ රාජ්‍ය අංශයේ එන කැළඹීම, මහා වැඩවර්ජනයක් කරා, ගමන් කිරීම වැළැක්වීමත්, එක යටි අරමුණක් මෙතන.”

දැන් ආණ්ඩුව පුපුරා යමින් පවතී. ආණ්ඩුව අභ්‍යන්තරයේ මෙතෙක් පැවැති අර්බුදය මහජනයාගේ හූ හඬ මැද්දෙන් දැන් පුපුරා යමින් පවතී. මහජන කෝපය සහ ආණ්ඩුව පුපුරා යමින් පවතී. මේ පුපුරා යාම පාර්ලිමේන්තුවේ හෝ ඉන් පිටත සිදු විය හැකිය. පාර්ලිමේන්තුවෙන් පිටත විය හැකි බරපතලම පුපුරා යාම රාජ්‍ය අංශයේ නැගී සිටීමයි. මේ නැගී සිටීම පාලනයට මේ පියවර ගත්තා විය හැකි බව ද රණවක මහතා පෙන්වා දෙයි.

“බැසිල් මහත්තයා නම් කිසිම සහනයක් ලබා දෙන්නේ නැහැ. යටි අරමුණු නැතුව IMF එකට ගිහිල්ලා රාජ්‍ය අංශයට කරන්න යන, එහි මිනී වළ කපන, ඒ ක්‍රියාදාමයේ දී එන විරෝධය වසා ගැනීම සඳහා කලින්ම ගත්ත උපායමාර්ගයක් හැටියටයි අපි නම් මේක දකින්නේ. ඒ වගේම මේක කෙටියෙන්ම කිව්වොත් මේ සහන ලැබීම ගැන අපි සතුටු වෙනවා රාජ්‍ය අංශයට. නමුත් ආර්ථික මිනී වල තවත් ගැඹුරට කපා ගැනීමක්. අර්බුදය තවත් වේගවත් කර ගැනීමක්, අයවැය පරතරය තවත් උග්‍ර කර ගැනීමක් හැටියටයි අපි මේක දකින්නේ.”

සහන ලබා දෙනවානම් සියළුම ක්ෂේත්‍ර වලට සහන ලබා දිය යුතුය. සහන හැටියට මුදල් නොව මේ මෝඩ කෘෂිකාර්මික ප්‍රතිපත්තිය වෙනස් කොට ජනතාවට ප්‍රමිතියකින් යුතු පොහොර ලබා දිය යුතුය.

මේ මාසයේ ණය ගෙවීමෙන් අනතුරුව විදේශ සංචිත අවසන් වේ. සංචිත වැඩි කිරීම් පිළිබඳව මායා කතා මුදල් අමාත්‍යාංශයේ සහ මහ බැංකු අධිපතිවරයාගේ විහිළුවක් පමණි.

“අද කිව්වානේ බිලියන් 3 කින් වර්ධනය වුණා කියලා. අපි අහනවා පෙට්‍රෝ චයිනා එකේ නැව් දෙකක් වරායේ නවත්තගෙන පෙට්‍රල්, ඩීසල් බාගන්න විදිහක් නැතුව LC අරින් නැතුව ඒ ඒවා LC ඇරියේ නැත්නම් ඊළඟ දින 8 ඇතුළත පෙට්‍රල් ඩීසල් හිඟයක් එනවා. ඒක නිසා ඔය හම්බුනයි කියන ඩොලර් වලින් කරුණාකරලා මේ LC ටික ඇරලා පෙට්‍රල් ඩීසල් හිඟය මග අරින්න.”

දැන් සපුගස්කන්ද තෙල් පිරිපහදුව වසා තිබේ. 23 වෙනිදා බොරතෙල් නැව පැමිණීමට නියමිතය. මෙතෙක් ණයවර ලිපිය විවෘත කොට නැත. දැනටමත් මෙගා වොට් 220 ක් ලංකා විදුලි බල මණ්ඩලට වසා දමා අවසානය. ලබන 15 වෙනිදා සිට රට විදුලිය කප්පාදුවක් කරා ගමන් කරන බව විදුලි බල මණ්ඩල පත්‍රිකාවලින් පැහැදිලි වේ.

“ඒ නිසා මේ පූච්චානන් කතා කයිවාරු කතා නරිවාදන් නවත්තලා කරුණාකරලා මේ තෙල් සංස්ථාවේ ඇවිල්ලා තියෙන නැව් දෙක බාගන්න පිරිපහදුවට තෙල් ටික සපයන්න විදුලිබල මණ්ඩලයට ගල් අඟුරු සපයන්න. අද මම කියනවා මේ විධිමත් ක්‍රියාමාර්ගය නොගත්තොත් මාර්තු මාසය වෙනකොට රට දැවැන්ත විදුලි බල අර්බුදයකට හා ඉන්ධන අර්බුදයකට යනවා. තෙල්, පෝලිම්, විදුලි බල කප්පාදු, ජලය නැතුව මිනිස්සු වේදනා විඳින තත්ත්වයකට පත්වෙනවා. මේ කටයුතු වල ප්‍රායෝගික ඇත්තට මුහුණ දෙන්න කියන එක අපි තෙල් සංස්ථාව සහ මුදල් අමාත්‍යාංශය කරවන ඇත්තන්ටත්, මහ බැංකුව කරවන ඇත්තන්ටත් අපි ප්‍රකාශ කරන්න කැමතියි.”

“ඒ වගේම මේ සුසිල් ප්‍රේම්ජයන්ත මහත්තයාගේ සිදුවීමත් එක්ක ජනාධිපති විවේචනය කරන පිරිස් අත්අඩංගුවට ගන්නවයි කියලා පොලිසියෙන් ආපු ඒ නිවේදනයත් එක්ක අපිට තේරෙනවා මර්දනය කැඳවමින් තියෙනවා. මේක තමයි එක ම විසඳුම තියෙන මර්ධනය කැඳවීම. මේකට එරෙහිව සියලුම දෙනා වමේ වේවා, දකුණේ වේවා, මාක්ස්වාදී වේවා, බෙදුම්වාදී වේවා, ධනවාදී වේවා මේ සියලුම ප්‍රතිපත්ති රාමු පසෙක දාලා, පාර්ලිමේන්තුවෙත් ඉන් පිටතත් ප්‍රජාතන්ත්‍රවාදී නිදහස, මිනිස් නිදහස අගයන අයට එක ධජයක් යටතට අපි එක්වෙමු කියන ආයාචනයත්, අපි මේ අවස්ථාවේ සියලුම විපක්ෂ කණ්ඩායම් වලටත් විශේෂයෙන්ම ආණ්ඩුවේ ඉඳගෙන, ගුටි බැට කකා ඉන්න ඒ රාජපක්ෂ විරෝධී ප්‍රජාතන්තතවාදී බලවේග වලටත් අපි මේ අවස්ථාවේ ආයාචනා කරනවා.”

වසර ගණනාවක් පාකිස්ථානයේ අනුග්‍රහය ලත් ත්‍රස්තවාදය පහව ගිය පසු ජම්මු සහ කාශ්මීරය සාමයේ සහ සංවර්ධනයේ කැන්වසය මත නව ජීවිතයක් ලියයි.

යුනෙස්කෝ නිර්මාණාත්මක නගර ජාලයේ (UCCN) ශිල්ප හා ජන කලා කාණ්ඩයේ සිට ඉන්දියාවේ පිරිසිදු නගර 50 අතර පිරිසිදුම නගරය ලෙස නැගී සිටීම දක්වා – ශ්‍රීනගර් 370 වැනි වගන්තිය අවලංගු කිරීමෙන් පසු නව පරිච්ඡේදයක් ලියයි.

අධ්‍යාපනය වැනි අංශ ඔවුන්ගේ ක්‍රියාකාරකම්වල කැපී පෙනෙන වෙනස්කම් දකිමින් ක්‍රමයෙන් යථා තත්ත්වයට පත්වෙමින් පවතින ජම්මු සහ කාශ්මීරයේ තත්ත්වය ද මෙයින් පිළිබිඹු වේ.

දශක ගණනාවක් තිස්සේ පැවති සටන්කාමීත්වය හේතුවෙන් කාශ්මීරයේ අධ්‍යාපනය වසර ගණනාවක් තිස්සේ දරුණුතම බලපෑමට ලක්ව ඇත. ප්‍රදේශවාසීන් විසින් කැඳවන ලද කඩින් කඩ වැඩ වර්ජන හෝ ‘බන්ද්’ විශේෂයෙන් අධ්‍යාපන ක්ෂේත්‍රයට දැඩි ලෙස බලපෑවේය. ජම්මු සහ කාශ්මීර පොලිසිය විසින් සම්පාදනය කරන ලද දත්ත වලට අනුව, 1990 සිට, සටන්කාමීත්වය හේතුවෙන් කාශ්මීරයට සැලකිය යුතු වැඩ දින අහිමි විය.

අධ්‍යාපන ක්ෂේත්‍රය නැවුම් වාතය ආශ්වාස කිරීම අරඹයි

නව මුලපිරීමක් යටතේ, ගෝත්‍රික ප්‍රජාවන් සඳහා ජම්මු සහ කාශ්මීරය පුරා ‘ස්මාර්ට් පාසල්’ ව්‍යාපෘතිය දියත් කර ඇත. මෙම ව්‍යාපෘතිය යටතේ පාසල් 200ක් අදියර දෙකකින් නවීකරණය කෙරේ. පළමු පාසල් 100 2022 මාර්තු වන විට පරිවර්තනය කරන අතර ඉතිරි පාසල් 2022 දෙසැම්බර් වන විට රුපියල් කෝටි 40 ක වියදමින් පරිවර්තනය කෙරේ. ට්විටර් පණිවුඩයක් නිකුත් කරමින් ලුතිනන් ආණ්ඩුකාර මනෝජ් සිංහා මේ බව දන්වා ඇත.

මෙම පියවරෙන් ප්‍රමෝදයට පත් ශ්‍රීනගර්හි තදාසන්න ප්‍රදේශයේ ගෝත්‍රික ප්‍රදේශයක් වන ෆකීර් ගුජ්රි හි පදිංචි අබ්දුල් අහද් ගානී පැවසුවේ එය “අපගේ දරුවන්ට ධනාත්මක බව සහ යහපත් අනාගතයක් සඳහා බලාපොරොත්තුවක් ඇති කිරීමෙන්” නව වෙනසක් ගෙන එන බවයි.

යූනියන් ප්‍රදේශයේ ගෝත්‍රික ප්‍රජාවගේ දරුවන්ගේ අධ්‍යාපනයට චමත්කාරයක් එක් කරන්නේ ගද්දි, සිප්පි, ඩාර්ඩ් සහ ෂීනා ප්‍රජාවන්ට අයත් ළමුන් 21,000කට ශිෂ්‍යත්ව ලබාදීමට රජය ගත් තීරණයයි. “අරමුදල් නොමැතිකම සහ අනෙකුත් අවිනිශ්චිතතාවයන් නිසා පසුගිය දශක තුන තුළ ඔවුන්ට අධ්‍යාපනය ලබා ගැනීමට නොහැකි විය” යනුවෙන් ජම්මු සහ කාශ්මීර උප ආණ්ඩුකාරවරයා මෑතකදී පැවසීය.

කර්මාන්ත සඳහා පිහිටුවා ඇති ඉඩම් බැංකුව:

එලෙසම යූනියන් ප්‍රදේශයේ සංවර්ධනය ඉහළ නැංවීම සඳහා අභිලාෂකාමී ව්‍යාපෘති කිහිපයක කටයුතු ආරම්භ කර ඇත. කර්මාන්ත හා නිෂ්පාදන ඒකක සඳහා අක්කර 6000ක ඉඩම් බැංකුවක් පිහිටුවා ඇත.

indianewsnetwork

“අඩකට වඩා වැඩි ප්‍රමාණයක් කර්මාන්ත හා වාණිජ දෙපාර්තමේන්තුවට පවරා ඇත – ජම්මු හි අක්කර 2,125 ක් සහ කාශ්මීරයේ අක්කර 1,000 ක්. මෙම පියවර ජම්මු සහ කාශ්මීර හරහා කනල් 20,000 (අක්කර 2,500) ක ඉඩම් බැංකුවක් නිර්මාණය කිරීමට අපේක්ෂා කරන ලද කාර්මික ප්‍රතිපත්තිය-2016 ට අනුකූල වේ,” රජයේ ජ්‍යෙෂ්ඨ නිලධාරියෙක් ඉන්දියා නිවුස් නෙට්වර්ක්ස් වෙත පැවසීය.

පරිපාලනය විසින් යූටී හි විවිධ දිස්ත්‍රික්කවල කාර්මික කලාප 292ක් හඳුනාගෙන ඇති අතර, ඉන් 150ක් ජම්මු කොට්ඨාශයේ දිස්ත්‍රික්ක 10කට සහ 142ක් කාශ්මීරයේ දිස්ත්‍රික්ක 10කට අයත් වේ.

යටිතල පහසුකම් සංවර්ධනය උත්තේජනයක් ලබයි:

කෙසේ වෙතත්, එක් ප්‍රධාන විශේෂත්වයක් වන්නේ ජම්මු-ශ්‍රීනගර් අධිවේගී මාර්ගයේ කාසිගුන්ඩ්-බනිහාල් උමං ව්‍යාපෘතියේ කටයුතු වේගයෙන් ක්‍රියාත්මක කිරීමයි.

ජම්මු සහ ශ්‍රීනගර් අතර ගමනාගමන කාලය පැය 1.5කින් පමණ සහ කිලෝමීටර 16කින් පමණ අඩු කළ 370 වැනි වගන්තිය ඉවත් කිරීමෙන් පසු වේගවත් වූ මෙම කිලෝමීටර 8.5 උමග, අත්හදා බැලීම් සඳහා ගමනාගමනය සඳහා විවෘත කරන ලදී.

මෙම පියවර මගීන්ට දැඩි භූමි ප්‍රදේශවලින් සහ අධිවේගී මාර්ගයේ අනතුරුවලින් සහනයක් ගෙන දී ඇත.

“මම දිල්ලියේ ව්‍යාපාර කරන අතර මම නිතර සංචාරය කරනවා. ජම්මු සහ කාශ්මීරය අතර දුර ආවරණය කිරීමට එතරම් අඩු කාලයක් ගතවන බැවින් මට පුද්ගලිකව මෙම උමග ආශිර්වාදයකි, ”සාලු වෙළෙන්දෙකු වන ආෂික් හුසේන් පැවසීය.

2021 නොවැම්බරයේදී මාර්ග ප්‍රවාහන සහ මහාමාර්ග පිළිබඳ මධ්‍යම අමාත්‍ය නිතින් ගඩ්කාරි ජම්මු සහ කාශ්මීරයේ රුපියල් කෝටි 11,721 ක් වටිනා ජාතික මහාමාර්ග ව්‍යාපෘති 25 කට මුල්ගල තැබීය.

මෙම අවස්ථාවට අදහස් දක්වමින් උප ආණ්ඩුකාරවරයා මනෝජ් සිංහ මහතා මාර්ග ජාලයේ සහ නවීන ප්‍රවාහනයේ වැදගත්කම අවධාරණය කළ අතර, ආර්ථික වර්ධනයට, කලාපයේ සමෘද්ධියට සහ ජීවිතයේ සෑම ක්ෂේත්‍රයකම පරිවර්තනයට මෙය යතුර බව ප්‍රකාශ කළේය.

“රුපියල් කෝටි 11,721 ජාතික මහාමාර්ග ව්‍යාපෘතිවල අත්තිවාරම්, නව ව්‍යාපෘති හතකට අමතරව ජම්මු සහ කාශ්මීරයේ තිරසාර සංවර්ධනයට මග පාදනු ඇත,” උප ආණ්ඩුකාරවරයා වැඩිදුරටත් පැවසීය.

ඒ හා සමානව, බලශක්ති පෙරමුණෙහි, සම්ප්‍රේෂණ පද්ධති ප්‍රතිසංස්කරණය කර නව පද්ධති ගෙන ඒම මගින් ජම්මු සහ ශ්‍රීනගර් නගරවලට පැය 24 පුරාම විදුලිය සැපයීමට පියවර ගනිමින් සිටී.

2021 දී පමණක් රුපියල් කෝටි 118.91 ක් වටිනා විදුලි ව්‍යාපෘති 17 ක් විද්‍යුත් සමාරම්භක කිරීම මගින් ජම්මු සහ කාශ්මීරයේ බලශක්ති යටිතල පහසුකම් තවදුරටත් ශක්තිමත් විය.

ජම්මු හා කාශ්මීරයේ බලශක්ති අතිරික්තයක් බවට පත් කිරීම සඳහා වසර තුන හතරක් තුළ මෙගාවොට් 3500 ක් නිපදවන රුපියල් කෝටි 54,000 ක විදුලි ව්‍යාපෘති අනුමත කර ඇත.

ඒ හැරුණු විට සීමාසහිත කාශ්මීර බලශක්ති සංවර්ධන සංස්ථාව (KPDCL) විසින් විදුලි ඒකක ලක්ෂ 357.79ක් සපයා ඇති අතර එය පසුගිය වසරේ සැපයූ බලශක්තියට වඩා සියයට 17.5කින් වැඩිය. මෙය මෙතෙක් කාශ්මීරයේ සේවය කළ ඉහළම අගය ලෙස සැලකෙන බව නිලධාරියෙක් පැවසීය.

පසුකාලීන ආන්ඩුවල උදාසීනත්වය සමඟ පොරබදමින් සිටින කාශ්මීර නිම්නයේ ප්‍රධාන සංචාරක ස්ථානයක් වන ඩල් ලේක්, එය පිරිසිදු ජල කඳක් බවට පත් කිරීම සඳහා මෙගා වල් නෙලීමේ මෙහෙයුමක් සමඟින් නව ජීවයක් දකිමින් සිටී.

නිශ්චල දේපල ආයෝජනය:

අනෙක් අතට, 370 වැනි වගන්තිය අවලංගු කිරීම වෙනත් ප්‍රාන්තවල පුරවැසියන්ට ජම්මු සහ කාශ්මීරයේ නිශ්චල දේපල මිලදී ගැනීමට දොරටු විවර කළේය. මෙම පියවර ජම්මු සහ කාශ්මීරයේ

දේපල වෙළඳාම් සහ අනෙකුත් යටිතල ව්‍යාපෘති සඳහා ආයෝජනය කිරීමට පුද්ගලික ක්‍රීඩකයින්ට විවෘත කිරීමක් නිර්මාණය කර ඇත.

පරිපාලනය මෑතකදී ජම්මු සහ කාශ්මීරයේ පළමු දේපල වෙළඳාම් සමුළුව සංවිධානය කරන ලද අතර එය රුපියල් කෝටි 18,300 ක් වටිනා අවබෝධතා ගිවිසුම් 39 ක් (අවබෝධතා ගිවිසුමක්) අත්සන් කිරීමත් සමඟ යූටී හි වර්ධනයට සහ සංවර්ධනයට මග පාදනු ඇතැයි විශ්වාස කෙරේ.

දේපළ වෙළඳාම් සමුළුව අතරතුර ජම්මු සහ කාශ්මීර පරිපාලනය විසින් අත්සන් කරන ලද අවබෝධතා ගිවිසුම් අතරට ජම්මු හි බහු-විශේෂ රෝහලක් පිහිටුවනු ලබන ඇපලෝ රෝහලද ඇතුළත් විය.

ඉන්දියන් ඉන්කෝපරේෂන් හි නේවාසික, සිල්ලර, වාණිජ අවකාශය, විනෝදාස්වාද කර්මාන්තය, සංචාරක සහ ආගන්තුක සත්කාර, සැපයුම් සහ ගබඩා සහ මූල්‍ය ආයතනවල ප්‍රධානීන් කිහිප දෙනෙක් ද පළමු වරට ජම්මු සහ කාශ්මීර දේපල-වතු සමුළුවට සහභාගී වූහ.

indianewsnetwork

ලෝක උරුම සීගිරිය වර්තමානයේ වන විට ජනතාවට ළඟාවීමට නොහැකි ඉතා අප්‍රසන්න දේශයක් බවට පත්වෙමින් තිබෙන බව  සීගිරිය ප්‍රදේශ්වාසීහු පවසති.

සීගිරිය නව නගරය තනිකර අපායක් බවට පත්ව දෙස් විදෙස් සංචාරකයන් දැඩි පීඩනයකට පත් කරන තත්ත්වයකට පත්ව තිබෙන බවද ඔවුහු පෙන්වා දෙති.

ලෝක උරුම  බිම්කඩක් බවට නම් කළ  ස්මාරකය ද මේ වන විට විනාශ වෙමින් පවතින බව ඔවුහු පෙන්වා දෙති. සීගිරිය නව නගරයේ අයාලේ යන සුනඛයන් නිසා දෙස් විදෙස් සංචාරකයන්ට දැඩි පීඩනයක් පත්ව ඇති බව ද ඔවුහු පෙන්වා දෙති.

මෙම ස්ථානයට යන ඕනෑම වෙලාවක දෙස් විදෙස් සංචාරකයන් පසුපස හපා කන්නට යන විශාල සුනඛ රැන බරපතළ තර්ජනයක් බවද පෙන්වා දෙන සීගිරිය නව නගරවාසීහූ දේශීය සංචාරකයන් සඳහා අනුමත නව නගරයේ රථ ගාල සම්පූර්ණයෙන්ම මඩ  වගුරක් බවට පත්ව ඇතැයි පෙන්වා දෙති.

මධ්‍යම සංස්කෘතික අරමුදල මගින් තනා දුන් වෙළඳසැල්  සියල්ල මේ වන විට ගරාවැටී දැඩි ප්‍රසන්න තත්ත්වයකට පත්ව ඇති  දේශීය සංචාරකයන් සඳහා ඉදිකර ඇති වැසිකිළි පද්ධතිය දොරවල් කැඩි  අපිරිසිදු භාවයට පත්ව අඩුම තරමේ ජලය රැගෙන යෑමට හෝ භාජනයක් නොමැති තරමට පත්ව තිබේ. එහි  පාලනය කරන පුද්ගලයා නළ ළිඳකින් කැඩී ගිය බාල්දි වලට ජලය ගෙනත් දීම සිදු කරයි.

මුළු ලෝකයක් විස්මිතව නැරඹීම් සඳහා පැමිණෙන සීගිරිය නව නගරය අයිතිකරුවෙකු නොමැති තත්ත්වයට පත්ව ඇතැයි සීගිරිය විහාරාධිපති පුබ්බිලියේ ධම්මානන්ද නාහිමියෝ පවසති.

මධ්‍යම සංස්කෘතික අරමුදල මගින් සෑම දෙයකටම සංචාරකයන් ගෙන් මුදල් අය කර ගැනීම පමණක් සිදුකරන බවත් අනෙකුත් සිදුවිය  යුතු යුතුකම් කිසිවක් ඉටු නොවන බව උන්වහන්සේ පෙන්වා දෙති. මේ වනවිට කාශ්‍යප රජු සිටියේ නම් මෙම පාලකයන්ගේ හිස ගසාදමනු ඇති බව උන් වහන්සේ පවසති.

අග්‍රාමාත්‍යවරයාගෙන් තමා ඉල්ලා සිටින්නේ ලෝක උරුම සීගිරිය විනාශ මුඛයට යන්නට නොදී රැකගන්නා ලෙස බව ද උන්වහන්සේ පවසති.

ප්‍රදේශවාසීන් කියා සිටින්නේ සිගිරිය නව නගරය මධ්‍යම සංස්කෘතික අරමුදලට අයත් නොවන බව ඔවුන් පවසන බවයි. එය දඹුල්ල ප්‍රාදේශීය සභාවට අයත් ඔවුන් කියන බව ද ඔවුහු කියති.

දඹුල්ල ප්‍රාදේශීය සභාව කියන්නේ සීගිරිය නව නගරය තමන්ට අයත් නැති බවයි.

කෙසේ වෙතත් දිනකට විශාල පිරිසක් සීගිරිය නැරඹීම සඳහා මේ දිනවලද පැමිණෙමින් සිටිති. මේ දිනවල දිනකට විදේශීය සංචාරකයන් පන්සියයකට අධික පිරිසක් පැමිණෙද්දී දේශීය  සංචාරකයන් දහස ඉක්මවා  පැමිණෙන්න බව අප කළ සොයා බැලීමකදී අනාවරණය විය.

දේශීය සංචාරකයකුගෙන් සීගිරිය  නැරඹීම්ට සඳහා අය කරන මුදල රුපියල් සියයකි. විදේශීය සංචාරකයෙකුගෙන් අය කරන මුදල ඇමරිකානු ඩොලර්  30කි.

සීගිරිය නව නගරයේ පවතින මෙම බරපතළ ප්‍රශ්නය  පිළිබඳව මධ්‍යම සංස්කෘතික අරමුදල සීගිරිය ව්‍යාපෘති  කළමනාකරු උපුල් ශාන්ත මහතාගෙන් විමසීමේ ඔහුදී කියා සිටියේ  නව නගරයේ පරිපාලන කටයුතු දැනට දඹුල්ල ප්‍රාදේශීය සභාවට පවරා දීම සඳහා අවශ්‍ය කටයුතු සූදානමි කරමින් සිටින බවයි. කෙසේ වෙතත් විදේශීය සංචාරකයන් සියලු දෙනාගේ පහසුකම් අවශ්‍ය පරිදි සපයා ඇති බවද හෙතෙම සඳහන් කළේය.

දඹුල්ල ප්‍රාදේශීය සභාවේ සභාපති කේ. ජී. සෝමතිලක මහතාගෙන් මේ පිළිබඳව විමසීමේදී ඔහු කියා සිටියේ මධ්‍යම සංස්කෘතික අරමුදල මගින් නීත්‍යානුකූලව එම ප්‍රදේශ භාරදී නොමැති බවත් නීත්‍යානුකූල භාරදීම්ක් සිදු කළ විට එය නඩත්තු කිරීමට හැකි බව ද ඔහු සඳහන් කළේය.

එමෙන්ම  වීශාල මුදලක් සීගිරිය පෙන්වා මධ්‍යම සංස්කෘතික අරමුදල අ යකළ ද ප්‍රාදේශීය සභාවට හෝ ප්‍රදේශයේ සංවර්ධනයකට කිසිදු මුදලක් ඔවුන් ලබා නොදෙන බවත් අඩුම තරමේ සීයට රුපියල් තුනක මුදලක් ඉල්ලා වසර ගණනාවක් ගත වුවද මධ්‍යම සංස්කෘතික අරමුදල එම මුදල හෝ ලබා දීමක් සිදු නොකරන බව දඹුල්ල ප්‍රාදේශීය සභාවේ සභාපතිවරයා වැඩිදුරටත් පැවසීය.

සටහන සහ ඡායාරූප – කාංචන කුමාර ආරියදාස

ඩෙල්ටා ප්‍රභේදය අභිබවා යමින් මාසයක් ඇතුළත ශ්‍රී ලංකාවේ ප්‍රමුඛතම කොවිඩ් වෛරස් ප්‍රභේදය බවට Omicron පත්වීමේ හැකියාවක් පවතින බව වෛද්‍ය පර්යේෂණායතනයේ (MRI) විශේෂඥ වෛරස් විද්‍යාඥ වෛද්‍ය නදීකා ජනගේ මහතා පවසයි.

සෞඛ්‍ය ප්‍රවර්ධන කාර්යාංශයේ අද (03) දින පැවති ප්‍රවෘත්ති සාකච්ඡාවකදී වෛද්‍ය නදීක ජනගේ පැවසුවේ ප්‍රජා සහ රෝහල් පද්ධතියෙන් ද Omicron රෝගීන් අඩු සංඛ්‍යාවක් හඳුනාගෙන ඇති බවයි.

“MRI හි හඳුනාගත් Omicron රෝගීන් දස දෙනාගෙන් දෙදෙනෙක් හදුනා ගත්ටත් රෝහල් වලින්” ඔහු ප්‍රකාශ කළේය.

“මේ අනුව, Omicron ආසාදිතයින් සමාජයෙන් සොයාගෙන ඇති බවත් එය දැන් ව්‍යාප්ත වෙමින් පවතින බවත් අපි පිළිගත යුතුයි,” ඔහු අවධාරණය කළේය.

මේ අතර, Omicron පිළිබඳ එක්සත් රාජධානියේ විද්‍යාත්මක දත්ත වලට අනුව, එන්නත් ලබා දී ඇති සමාජයක පවා Omicron ප්‍රභේදය ඩෙල්ටාවට වඩා වේගයෙන් ව්‍යාප්ත වන බව වෛද්‍ය ජනගේ පැවසීය.

“Omicron ගෝලීය වශයෙන් වැඩි ආසාදන හා ඉහළ රෝහල්ගතවීම් ඇති කර ඇති අතර මරණ සංඛ්‍යාව සුළු වශයෙන් ඉහළ යයි,” ඔහු පෙන්වා දුන්නේය.

“Delta හා සසඳන විට Omicron ව්‍යාධිජනක අඩු බව මූලික නිරීක්ෂණ යෝජනා කළද, එය තව දුරටත් තහවුරු කර නැහැ‘‘ වෛද්‍ය නදීක ජනගේ අවධාරණය කළේය.

“කෙසේ වෙතත්, Omicron වඩාත් බෝවන බැවින්, රෝහල්ගත වීමේ සංඛ්‍යාව වැඩි විය හැකි අතර එය සංකූලතා ඇති රෝගීන්ටද බලපානු ඇත,” ඔහු තවදුරටත් පැවසීය.

මේ අතර, වෛද්‍ය ජනගේ පැවසුවේ නිවාඩු කාලය තුළ මිනිසුන්ගේ හැසිරීම් හේතුවෙන් ශ්‍රී ලංකාවේ ධනාත්මක රෝගීන් වැඩි වන බවයි.

කලාපයේ අනෙකුත් රටවල් හා සසඳන විට මෙරට දෘශ්‍යාබාධිත පුද්ගලයින් සංඛ්‍යාව ඉහළ මට්ටමක පවතින බව ලංකා අක්ෂි සත්කාර අක්ෂි වෛද්‍ය සංගමය (CECOA) පවසයි.

අද (03) කොළඹදී මාධ්‍ය හමුවකදී CECOA නිර්මාතෘ සහ අක්ෂි රෝග විශේෂඥ නරේෂ් ප්‍රධාන් කියා සිටියේ තමන් විසින් 2013 සහ 2015 වසරවල සිදුකළ පරීක්ෂණයක් අනුව ‍මෙරට ජනගහනයෙන් 1.1%ක් දෘෂ්‍යාබාධිත බව අනාවරණය වූ බවයි.

“ඉන්දියාවේ 0.47%ක් සහ නේපාලයේ 0.34%ක් අන්ධභාවයක් වාර්තා වෙනවා. නමුත් ශ්‍රී ලංකාවේ එය වැඩියි. අක්ෂි සායනවලට යන බොහෝ දෙනෙකුගේ පෙනීම 80%ක් දක්වා අඩුවෙලා ”ඔහු පැවසීය.

වසංගතය නිසා බොහෝ අය තම කාලය ගත කළේ තම දුරකථනවල සහ පරිගණක ඉදිරිපිටයි. බොහෝ දරුවන්ට ඔන්ලයින් වේදිකා භාවිතා කරමින් අඛණ්ඩව පැය පහකට වැඩි කාලයක් තම අධ්‍යයන කටයුතු කරගෙන යාමට සිදු වූ බව ප්‍රධාන් මහතා පැවසීය.

මෙරට දෘශ්‍යාබාධිත පුද්ගලයින්ගේ සංඛ්‍යාව ඉහළ යාමත් සමඟ මෙය විශාල අවදානමක් බවයි විශේෂඥ වෛද්‍යවරයා වැඩි දුරටත් කියා සිටියේ.

දැනට ලංකාවේ තියෙන්නේ කෘමිනාශක වර්ග ඉතාමත්  බාල ඒවා.  එහෙම හරි මිලදී ගන්න නැහැ. තියෙන එකත් විශාල ගණනකට තමයි අලෙවි කරන්නේ. ඉදිරියේදී මේ පිළිබඳව රජයේ අවධානය යොමු කළොත් වඩාත් ගොවීන්ට හොඳ කාලයක් ඒවි

සියයට හැත්තෑවක් කාබනික පොහොර සහ සියයට තිහක් රසායනික පොහොර යොදාගෙන අක්කර තුන හමාරක භූමියක තක්කාලි වගාවෙන් මෙවර එක කන්නයකින් රුපියල් මිලියන 10ක මුදලක් උපයාගත් ගොවියකු ගලේවෙල පට්ටිවෙල ප්‍රදේශයේයෙන් අපට හමුව විය.

ගලේවෙල පට්ටිවෙල ප්‍රදේශයේ මහා පරිමාණ වගා කරුවෙකු වන එස්. ඒ.  රත්නපාල  මහතා මෙම  සාර්ථක අස්වැන්න  ලබාගෙන තිබේ.

වර්තමානයේ කාබනික පොහොර සහ  රසායනික පොහොර අනෙකුත් පළිබෝධ නාශක ද්‍රව්‍ය පිළිබඳව අත්දැකීම් රැසක් ඇති රත්නපාල මහතා සතුව තක්කාලි වගාවට අමතරව අක්කර හයක පමණ සාර්ථක කහ වගාවක් ද පවතී.

වසර ගණනාවක සිට කාබනික වගාවට හුරු වී සිටින රතනපාල මහතා කියා සිටියේ කෘෂිකර්ම දෙපාර්තමේන්තුව මගින් අනුමාන කරන අස්වැන්නට වඩා වැඩි  අස්වැන්නක් තමන් තක්කාලි වගාවෙන්  ලබන බවය.

එම අස්වැන්න ලබා ගැනීම සඳහා මූලික හේතු පාදක වී ඇත්තේ  කාබනික පොහොර තම භූමියට හුරුකර ගැනීම නිසාවෙන් බව ද එම ගොවි මහතා සඳහන් කර සිටී.

එමෙන්ම තක්කාලි අස්වැන්න නෙළා අවසන්ව තිබියදී නැවත ජලය සැපයීමත් සමග තක්කාලි ගස් වල නව දළු රිකිලි ලා මල් හට ගෙන ඇති අවස්ථාවක නව අස්වැන්නක් නෙළා ගැනීම තවත් සාර්ථක ක්‍රමවේදයක් සොයා ගැනීම්ට හැකි වූ බව ද රතනපාල ගොවි මහතා පෙන්වා දෙයි.

මේ සම්බන්ධයෙන් වැඩි දුරටත් අදහස් දැක්වූ රතනපාල ගොවි මහතා, ‘මම බොහෝ කාලයක සිට මහා පරිමාණයෙන් ගොවිතැන් කරනවා. ඒ වගේම ඒ කාලය පුරාම කාබනික පොහොරත් හරි හරියට භාවිත කළා. එළවළු වගාව සියයට සීයක් කාබනික පොහොර වලින් පමණක් සිදු කිරීමට නොහැකි බව මම අත්දැකීමෙන්ම දන්නවා. ඒ සඳහා කාබනික පොහොර 70%ක් සහ රසායනික පොහොර 30%ක් භාවිතා කළ යුතුයි. එවැනි මිශ්‍රණයකින් සාර්ථක අස්වැන්නක් ලබා ගන්න පුළුවන්‘

මේ වන විට තම වගාවේ බරපතළම හානිය බවට පත්ව ඇත්තේ හඳුනා නොගත් ඉතා සියුම් ප්‍රමාණයේ පණුවෙකු තක්කාලි වගාවේ ලා කොළවලට සහ මල් වලට හානි කරන බව රතනපාල මහතා කියයි.

‘මට දැන් තිබෙන ලොකුම කරදරය තමයි මේ පණුවා නිසා අතිවෙලා තිබෙන ගැටලුව. මේ පණුවන් මර්දනය කිරීම සඳහා කිසිදු වැඩපිළිවෙළක් නැහැ. මේ ගැන කෘෂිකර්ම බලධාරීන්ට වගේම පර්යේෂණ අංශ වලට පවා දැනුම් දුන්නා. ඒත් මේ වන තෙක් මේ පණුවා මර්දනය කළ හැකි ක්‍රමයක් සොයා ගත නොහැකි වුණා‘

වගාව කාබනිකව සරු කර ගත්තද කෘමි හානි හා දිලිර රෝග වලට මෙතෙක් කාබනිකව ක්‍රමවේදයක් හෝ බෙහෙතක් ගොවීන්ට හඳුන්වා නොදීම බරපතළ තත්ත්වයක් බවද රතනපාල මහතා පෙන්වා දුන්නේය.

මෙවර තමා ලබා ගත් සුපිරි තක්කාලි අස්වැනන් සහ ලාභය ගැන අදහස් දැක්වූ රතනපාල ගොවි මහතා, ‘පසුගිය කාලයේ වෙළෙඳපොළ වසා දමා තිබුණු අවස්ථාවේ මට විශාල පාඩුවක් සිදු වුණා. නමුත් මෙවර තක්කාලි මිල ඉහළ යෑමත් සමග අස්වැන්නට නිසි මිලක් ලැබීම නිසා රුපියල් මිලියන 10ක පමණ ආදායමක් අක්කර තුන හමාහමාරක තක්කාලි වගාවෙන් ලබා ගැනීමට හැකි වුණා. ඒ නිසා අනෙකුත් වගාවන් සිදු කිරීමට මට හැකියාව ලැබුණා. කම්කරුවන් සඳහා වැටුප් ගෙවා නැවත වගාව ආරම්භ කිරීමට එය විශාල රුකුලක් වුණා‘

තක්කාලි වගාවට අමතරව තමා කාබනික සියයට හැත්තෑවක් රසායනික පොහොර සියයට තිහක් යොදාගෙන සාර්ථක කහ වගාවක් සිදු කරමින් සිටින අතර තවත් මාස කිහිපයකින් ඉතා සාර්ථක අස්වැන්නක් රටට ලබා දීමට තමාට හැකිවනු ඇති බව රත්නපාල මහතා කියා සිටියේය.

වැඩිදුරටත් තම වගාව පිළිබඳව අදහස් දැක්වූ රතනපාල ගොවි මහතා.

“පසුගිය කාලේ  තක්කාලි වගාවෙන් මම හොඳටම බැට කෑවා. කෝවිඩ් වසංගතය ආපු දවස් වල තක්කාලි ගස් යට කුණු වෙලා ගියා. අපේ කම්කරුවන් ගොඩ දෙනෙකුට රස්සා නැති වුණා. අපිටත්  අමාරු වුණා. හැබැයි කොහොම හරි මේ සැරේ ඒ පාඩුව පියවගන්න පුළුවන් වුණා”

“තක්කාලි වගාවේ විතරක් නෙවෙයි අනෙක් වගාවලත්  කාබනික පොහොර දාපුවහාම  අස්වැන්න  වැඩියි. ඒ වගේම අස්වැන්න නෙළා ගන්න තියෙන කාලයත් වැඩි වෙනවා. රසායනික පොහොර විතරක් දැම්ම නම් තක්කාලි මාස දෙකෙන් වගාව සම්පූර්ණයෙන්ම ඉවර වෙනවා. දැන් මගේ තක්කාලි වගාවේ  අස්වැන්න නෙළා අවසන් වෙලා නැවත මල් හටගෙන ගෙඩි ඵල ගන්නවා. ඒව තමයි දැන් කඩන්නේ. තවත් අක්කර තුන හමාරක් වගා කරලා තියෙනවා. ඒවායේ දැන් තමයි මල් හට හටගන්නේ.”

“කොහොමහරි මේ ශාකවල මූල මණ්ඩලය ශක්තිමත් වුණහම හොඳට  ඵලදරනවා. සියට සීයක්  රසායනික පොහොර වලට යනවට වඩා ඉතා සෙමින් කාබනික වගාවට මම හුරු වුණු නිසා අද විශාල ජයග්‍රහණයක් ලබනවා. මම ගොවි මහත්තුරුන්ගෙන්  ඉල්ලා සිටින්නේ ක්‍රම ක්‍රමයෙන් මේ ක්‍රමයට හුරු වෙන්න කියලා”

“හැබැයි රජය එකපාරටම  රසායනික පොහොර තහනම් කළාම  අපටත් අමාරු වෙනවා. ඒ වගේම තමයි කෘමි හානි වලට,  දිලීර වලට අපට කිසිම සහනයක් නෑ. ගහ කොච්චර හැදුණත් වැඩක් නෑ අවසානයේදී අස්වැන්නට පණුවෝ ගහල කොළ වල දිලීර රෝග  ඇවිල්ලා වගාව විනාශ වෙනවා නම්. ඒ පිළිබඳව කඩිනමින් රජයේ අවධානය යොමු කළ යුතුයි”

” දැනට ලංකාවේ තියෙන්නේ කෘමිනාශක වර්ග ඉතාමත්  බාල ඒවා.  එහෙම හරි මිලදී ගන්න නැහැ. තියෙන එකත් විශාල ගණනකට තමයි අලෙවි කරන්නේ. ඉදිරියේදී මේ පිළිබඳව රජයේ අවධානය යොමු කළොත් වඩාත් ගොවීන්ට හොඳ කාලයක් ඒවි.”

“මම ගොම පොහොර, එළු පොහොර සහ කුකුල් පොහොර ගෙනාවේ මිටියක් රුපියල් 100 ගානේ. දැන් ඒක 250 වුණා 400 වුණා,  500 වුණා. දැන් කිලෝවක් රුපියල් දහයකට තමයි දෙන්නේ. හැබැයි කිලෝ ගණන් ගන්න කොට ඒවායේ විශාල වශයෙන් වැලි එකතු වෙලා තියෙනවා. මේ   වැඩේ නොකළ යුතුයි. වගාවට ලබා දෙන කාබනික පොහොර සහ අනෙකුත් සෑම දෙයක්ම විනිවිදභාවයෙන් යුතුව ක්‍රියා කරන්න ඕන. මොකද මේ රටේ ජනතාවගේ ආහාර නිෂ්පාදනය කරන නිසා මහපොළොවේ තියෙන වැලි පොහොර වගේ දාලා වැඩක් නැහැ. මේක කෘෂිකර්ම බලධාරීන් සහ අපි සියලු දෙනා අවබෝධයෙන් ක්‍රියා කළ යුතු වැඩක්.”

සටහන සහ ඡායාරූප – කාංචන කුමාර ආරියදාස

කාති උසාවි අහෝසි කිරීමට නිර්දේශ කරන්නැයි හිටපු මහාධිකරණ රෙජිස්ටාර්වරයෙකු වූ මොහොමඩ් සුබයිර් මහතා එක රටක් එක නීතියක් සඳහා වූ ජනාධිපති කාර්ය සාධක බලකායෙන් ඉල්ලයි.   

මුස්ලිම් කාන්තාවන්ට දීර්ඝකාලයක සිට සිදුවන බලවත් අසාධාරණය දැක තමා මෙම ඉල්ලීම කරන බව මොහොමඩ් සුබයිර් මහතා පැවසීය.

එක රටක් එක නීතියක් සඳහා වූ ජනාධිපති කාර්ය සාධක බලකාය මහජන අදහස් විමසීම සඳහා ඊයේ (26) මහනුවර දිස්ත්‍රික් ලේකම් කාර්යාලයේ රැස්වූ අවස්ථාවේ සුබයිර් මහතා මෙම ඉල්ලීම කළේ ය.

තමා ස්වෙච්ඡාවෙන්  අදහස්  ලබාදීම සඳහා පැමිණි බව පැවසූ සුබයිර් මහතා අධිකරණ ක්ෂේත්‍රයේ  වසර 40ක තම සේවා කාලය තුළ ලද කණගාටුදායක අත්දැකීම් සිහිපත් කරමින් මෙම ඉල්ලීම සිදු කරන බව වැඩිදුරටත් පැවසීය. විවිධ ස්වෙච්ඡා  සංවිධාන, විවිධ ජන කොටස්, වෘත්තිකයන්ගේ සංවිධාන මෙන්ම සාමාන්‍ය ජනතාව නියෝජනය කරමින් පැමිණි පිරිස්  කමිටුව හමුවේ අදහස් හා යෝජනා ඉදිරිපත් කළ කළහ.

මුස්ලිම් විවාහ හා දික්කසාද නීතිය සහ බහු විවාහ මෙන්ම  ආගම කොටස්වලට බෙදාගෙන සංවිධාන පිහිටුවීම තහනම්  කළ යුතු බවද මොහොමඩ් සුබයිර් මහතා  කාර්ය සාධක බලකාය හමුවේ අවධාරණය කළේය. බොහෝ අවස්ථාවල කාති උසාවිවල නඩු ඇසීම සිදු කරනු ලබන්නේ නීතිඥවරයෙකු නොවන කාති වරයෙකි. නීතියට අදාළ වන ලිය කියවිලි හා එසේ නොවන ලේඛන  නිවැරදිව හඳුනාගැනීමට කාති වරයෙකුට නොහැකි වන අවස්ථා ඇත. එසේ හෙයින් නිසි අවබෝධයකින් හා අපක්ෂපාතීව නිවැරැදි තීන්දුව ලබා දිය නොහැකි අවස්ථා  මෙන්ම එම උසාවිය මගින් ලබාදෙන තීන්දු ක්‍රියාත්මක නොවන අවස්ථාද බහුලව වාර්තා වී ඇත. මෙම උසාවි ක්‍රමය අහෝසි කිරීම මගින් නඩත්තු නඩු වලදී අදාළ  ගැහැනු දරුවාට  මෙන්ම, දෙමාපියන්ටද සාධාරණයක් ලබා  ගැනීමට හැකියාව ඇති බව මොහොමඩ් මහතා සඳහන් කළේය.

මුස්ලිම් විවාහ හා දික්කසාද නිතිය මගින් බලවත් සමාජ හා නීතිමය  අසාධාරණකම් සිදු වන බව  බව පැවසූ  මොහොමඩ්  සුබයිර් මහතා, දැනට කාති ක්‍රමය  යටතේ ගැනෙන නඩත්තු නඩු මහෙස්ත්‍රාත් උසාවිය මගින් ද, දික්කසාද නඩු දිස්ත්‍රික් උසාවිය මගින් ද සාධාරණ හා අපක්ෂපාතී ලෙස   විසඳාගත  හැකි බව පවසුවේය.  බහු විවාහය  සඳහා ඇති අයිතිය ද  අහෝසි කළ යුතු බව පවසන සුබයිර් මහතා, ඒ  සඳහා වන කරුණු කුරාණයේ ඇති වගන්ති ඉදිරිපත් කරමින්  පැහැදිලි කළේය.  ආගම කොටස් වලට බෙදා  නොගන්නා ලෙස  කුරාණයේ සඳහන් කර ඇති බව පවසන සුබයිර් මහතා එවැනි අවස්ථාවලට ඉඩ ලබාදීම මගින් විවිධ අන්තවාදී සංවිධාන  බිහිවීමට ඉඩ ඇති බවද අවධාරණය කළේය.

ශ්‍රී ලංකාව තුළ එක රටක් එක නීතියක් යන සංකල්පය ක්‍රියාත්මක කිරීම වෙනුවෙන් විවිධ පාර්ශවයන් දරන අදහස් හා මතවාද අධ්‍යනය කිරිමෙන් පසු ඒ සඳහා යෝජනා ඉදිරිපත් කිරීම පූජ්‍ය ගලගොඩඅත්තේ ඤාණසාර ස්වාමින් වහන්සේගේ සභාපතිත්වයෙන් යුත් ජනාධිපති කාර්ය සාධක බලකායට පැවරී ඇති  වගකීමයි.

මීට පෙර උතුරු හා නැගෙනහිර පළාත්වල සංචාරය කොට එම පළාත්වල ජීවත් වන ජනතාවගේ හා කොළඹ බණ්ඩාරනායක සම්මන්ත්‍රණ ශාලාව තුළ පිහිටා ඇති කාර්යාලයේ දී දිවයින ම නියෝජනය වන අයුරින් පැමිණි සංවිධාන හා පුද්ගලයින් ගේ අදහස් ලබා ගත්තේය.

මධ්‍යම පළාත් පළාතේ ජනතාවගේ අදහස් ලබා ගැනීම අද (27)  දින නුවරඑළිය දිස්ත්‍රික්කය තුළ සිදුවේ. කමිටුව හමුවේ අදහස් පළ කිරීමට කැමති අයෙකුට පහත් අංකයට ඇමතුමක් ලබා දීමෙන් ඒ සඳහා දිනයක් හා වේලාවක් වෙන්කර ගත හැක. පහත ලිපිනයට තැපැල් හා විද්‍යුත් පණිවිඩ මගින් ද අදහස් පළ කිරීමේ හැකියාව ඇති බව කමිටුවේ ලේකම් ජනාධිපති ජ්‍යෙෂ්ඨ සහකාර ලේකම් ජීවන්ති  සේනානායක මෙනවිය පවසයි.

කමිටුවේ සභාපති පූජ්‍ය ගලගොඩඅත්තේ  ඤාණසාර ස්වාමින් වහන්සේ, කමිටුවේ සාමාජිකයන් වන මහාචාර්ය ශාන්ති නන්දන විජේසිංහ, ජේෂ්ඨ කථිකාචාර්ය සුමේධ වීරවර්ධන, නීතිඥ සංජය මාරඹේ, පානි වෑවල,එරන්ද නවරත්න  සහ උතුරු නැගෙනහිර පළාත් සම්බන්ධීකරණ අනු කමිටුවේ සභාපති වෛද්‍ය ජීවක බණ්ඩාර යන මහත්වරුන් එම අවස්ථාවට සහභාගි වූහ.

දඹුල්ල ප්‍රාදේශීය ලේකම්  කොට්ඨාසයට අයත් වෑවලවැව පලතුරු ගම්මානයේ පලතුරු අස්වැන්න විශාල වශයෙන් අඩු වී ගස් විනාශ වී යන තත්ත්වයට පත්ව ඇතැයි  ගොවීහු පවසති.

විදේශ වෙළෙඳපොළ සඳහා ඉලක්ක කරගෙන  කාලයක් තිස්සේ වෑවල වැව ප්‍රදේශයේ ගොවීහු පේර, අඹ, කටු අනෝදා, ගස්ලබු , දෙළුම් ආදී පලතුරු වගාවන් ආරම්භ කොට තිබිණි.

වසරක  පමණ කාලයක සිට පවතින කෘමිනාශක, දියර පොහොර සහ පලතුරු ගස් වලට අවැසි පොහොර වර්ග නොමැතිවීම හේතුවෙන් තම වගාවන්හි නිෂ්පාදන විවිධ කෘමීන්ගෙන් සහ පිටි මකුණන්ගෙන්  විනාශ  වෙමින් පවතින බවත් වසර ගණනාවක් සිට මෙරටට ඩොලර් උපයා දුන් සියලු පලතුරු අස්වැන්න ගස් යට විනාශ වෙමින් පවතින බව ඔවුහු පෙන්වා දෙති.

රටේ ඩොලර් හිඟයක් පවතින අවස්ථාවක ඩොලර් රටට ගෙනදුන්  පලතුරු මෙසේ ගස් යට විනාශ වීම නිසා දඹුල්ල්ල වෑවල වැව ප්‍රදේශයේ ඩොලර් ගස් යට වැටී ඇති බව පෙන්වා දෙමින් එම ඩොලර් අහුලාගෙන යන්නැයි ගොවීහු මුදල් අමාත්‍යවරයාට, පාරිභෝගික අමාත්‍යවරයාට මෙන්ම කෘෂිකර්ම  අමාත්‍යවරයාට ද පවසති.

දඹුඹුල්ල වෑවල වැව ප්‍රදේශයේ පේර ගොවීන් තම වගාවන් වල අස්වැන්න නෙළන සමය මේ වන විට උදාවී තිබේ. ඔවුන් සඳහන් කර සිටින්නේ පෙරදා ඉතා අලංකාර පෙනුමැති කිලෝ පේර විදේශ රටවලට පැටවීම සඳහා සූදානම් කළ ද මේ වන විට ඒවා දේශීය වෙළඳපොළට ඉතා අඩු මුදලකට මිලදී ගැනීම සඳහා ව්‍යාපාරිකයින් පැමිණෙන බවය. කෙසේ වෙතත් මීට පෙර එක මුරයකට නෙළාගත් කිලෝ 4000ක පමණ අස්වැන්න මෙවර කිලෝ 800ක් දක්වා අඩුවී ඇති බව ද ඔවුහු පෙන්වා දෙති.

මේ ආකාරයෙන් අස්වැන්න නෙළා ගැනීමට නොහැකි වී ඇත්තේ පොහොර සහ කෘමිනාශක දියර පොහොර හිඟය නිසා බව ද ඔවුහු පෙන්වා දෙති.

විදේශීය රටවල් රැසක ඉහළ ඉල්ලුමක් ඇති ටෝම්ජේසි  අඹ වර්ගය මෙම ප්‍රදේශයේ බහුලව වගා කොට තිබේ. කුඩා අවධියේ සිට දැඩි පරිස්සමෙන්  නිෂ්පාදනය කරන මෙම  අඹ ගස්වල විනාශ වී ගස් යට වැටී තිබෙන අයුරු ගොවීහු පෙන්වති. එමෙන්ම කවර වලින් ගෙඩියෙන් ගෙඩිය ආවරණය කොට නිෂ්පාදනය කරන විදේශ විනිමය ගෙනදෙන මෙම අඹ පිටිමකුණා විසින් විනාශ කොට ඇතැයි ඔවුහු පෙන්වා දෙති.

වෑවල වැව ප්‍රදේශයේ විදේශ වෙළ ඳපොළ ඉලක්ක කරගෙන විශාල වශයෙන් කටු අනෝදා වගාව සාර්ථකව සිදු කරමින් සිටි බවත් මේ වන විට එම කටු අනෝදා අස්වැන්න රුපියල් 25කට හෝ අලෙවි කර ගැනීමට නොහැකි තත්ත්වයකට පත්ව ඇතැයි ඔවුහු පෙන්වා දෙති.

කටු අනෝදා ද අලෙවි කිරීමට නොහැකි වී ඇත්තේ එම අස්වැන්න ද පිටිමකුණාගේ සහ කුහුඹුවන්ගේ ප්‍රහාර එල්ල වී ගෙඩි ඉතාමත් අසම්පූර්ණ වීම නිසාවෙන් බව පෙන්වා දෙති.

වෑවල වැව ප්‍රදේශයේ කටු අනෝදා වගා කරන ගොවීන් ද කියා සිටියේ රටේ ඩොලර් හිඟයද විසඳුම දඹුල්ල වෑවලවැව ප්‍රදේශයේ පවතින බවය. මුදල් අමාත්‍ය අමාත්‍යවරයාට වෑවල වැවට පැමිණ තම වගාවන් වල වැටී ඇති ඩොලර් කොළ අහුලාගෙන යන්නැයි කටු අනෝදා ගොවීන් ද පැවසූහ.

දේශීය සහ විදේශීය වෙළෙඳපොළ ඉලක්ක කරගෙන වෑවලවැව ප්‍රදේශයේ බහුලව ගස්ලබු වගාව ද සිදු කරති. මේ වන විට පවතින පොහොර සහ දියර පොහොර වර්ග නොමැතිවීම නිසා ගස් ලබු ඵලදාව ඉතාමත් හීනවෙමින් ගෙඩි කුඩා වී අලෙවි කර ගැනීමට  නොහැකි තත්ත්වයේ පසුවන බව ගස්ලබූ ගොවීන් පෙන්වා දෙති. ඔවුන් ද කියා සිටියේ විදේශ වෙළෙඳපොළ තියා දේශීය වෙළෙඳපොළ හෝ ගස්ලබු වලට  නොමැති නිසා තම අස්වැන්න වගා  බිම තුළම විනාශ කර දැමීමට සිදුව ඇති බව ය.

විදේශ රටවල අවශ්‍යතාවය ඉලක්කගත කරගෙන පසුගිය කාලයේ කෘෂිකර්ම දෙපාර්තමේන්තුවේ ද  දායකත්වය ඇතිව වෑවෑවල වැව පළතුරු ගම්මානයක් බවට පත් කරමින් විවිධ පලතුරු වගාවට ගොවීන් හුරු කරමින් විශාල වශයෙන් විදේශ විනිමය එම ප්‍රදේශ වලට ලැබී තිබිණි. මෙම ක්‍රියාවලිය නිසා සිදුව ඇත්තේ පලතුරු ගොවීන්ට දැඩි ආර්ථික පීඩනයක් බව ඔවුහු පවසති.

පේර වගා කරන ගොවියෙකු වූ  ජේ. එම්. දසනායක මහතා. ” අපි වසර ගණනාවක් ඉදලා පේර වගා කරලා තියෙනවාවා, මම අක්කර හතරකට වැඩිය වගා කරලා  තියෙන්නෙ. ඒ දවස් වල එක  මුරයකට කිලෝ හාර දහසකට වැඩිය ප්‍රමාණයක් අස්වනු ගත්තා. දැන් අපි ලබාගන්නේ කිලෝ හය හත්සීයක්. ඒකත් බොහොම අමාරුවෙන්. ඒවත් විශාල වශයෙන් විනාශ වෙනවා. මේවා ඇපල් වගේ හරිම ලස්සනයි. හැබැයි දැන් වකුටු ගැහිලා. මිනිස්සු සල්ලි දීල මේ පේර අරගන්නෙ නෑ. ඒ වගේම තමයි පේර පිටරට ගෙනියන්න තමයි අපෙන් ගත්තේ. අවසාන්යේදී දැන් රට යවන්න තියා ලංකාවේවත් මිනිස්සු ගන්නෙ නෑ. පහුගිය දවස් වල පෙර වලට හොඳ ඉල්ලුමක් වගේම මිලක් තිබ්බා. දැන් මිල අඩුවෙලා ඉල්ලුමත් අඩුවෙලා.”

“මේක කියන්න කෙනෙක් නෑ. අපි වගාවට  හුරු වුණේ රසායනික පොහොර දියර පොහොර සහ පලතුරු වලට වෙනම පෝර දාලා. කෘෂිකර්ම දෙපාර්තමේන්තුවෙන් තමයි අපිව මේවට හුරු කළේ. දැන් කාබනික පොහොර සහ අනෙකුත් දේවල් යොදන්න කිව්වට අපට මොනවද යොදන්නේ කියලා තාම කිසිම කෙනෙක් ඇවිල්ලා කියලා දීලා නෑ. ඒ නිසා අපි කියන්නේ  රසායනික පොහොර නැත්නම් පිටි මකුණු මේ කුහුබුවන් මර්ධනය කරලා ගෙඩිය ලස්සන වෙන්න මොනවද කරන්න ඕන කියලා කියලා දෙන්න. එහෙම නැතුව අපිට වෙන කරන්න දෙයක් නෑ. සිද්ධ වෙන්නේ පේර ගස් ටික ඔක්කොම කපලා දාලා වෙන මොනව හරි වගා කරන්න.”

ටොම්ජේසි, අඹ සහ පේර වගා කොට ඇති ගොවියෙකු වූ සුනිල් කුලරත්න මහතා –  “වෑවලවැව කියන්නේ එළවළු වගේම පලතුරු වගාකරන කෘෂිකර්ම දෙපාර්තමේන්තුව මගින් හඳුන්වලා දීලා තියෙන කෘෂි ගම්මානයක්. අපේ බොහෝ දෙනෙක් ටොම්ජේසි අඹ වගා කළා. ඒ වගේම පේර, කටු අනෝදා, ගස්ලබු, දෙළුම් ආදී ගොඩක් වගා කරලා තියෙනවා. මගේ අක්කර 10ක් විතර තියෙනවා පලතුරු. අවසානයේදී මේ දවස් වල සිද්ධ වෙලා තියෙන්නේ ඩොලර් ගෙනාපු වගාව සියල්ල වගා බිමේ ම විනාශ වෙනවා දකින්න “

“අපි රජයෙන් රස්සා ඉල්ල ගෙන ගියේ නෑ.  වෙනත් වරප්‍රසාද ඉල්ලුවෙත් නෑ. රටට අවශ්‍ය ඩොලර් ගෙනාවා ගමේ ඉඳ.ලා දැන් මේ ඩොලර් කොළ ඔක්කොම ගස් යට විනාශ වෙනවා‍. බන්දුල ගුණවර්ධන ඇමතිතුමාට, කෘෂි කෘෂිකර්ම ඇමතිතුමාට වගේම මුදල් ඇමතිතුමාටත්, රජයටත් අපි කියනවා වෑවල වැව පලතුරු ගම්මානයේ  ඕනෑ තරම් ඩොලර් වැටිලා තියෙනවා ඒවා අහුලගෙන යන්න කියලා. වෙන කියන්න දෙයක් නෑ. අපිට පොහොර  හදාගන්න විදිහක් නෑ. පොහොර සල්ලි වලට ගන්නවත් නෑ. ඇතැම් තැන්වල පොහොර මිටියක් රුපියල් පහළොස් දහසකටත් වැඩිය ගාණකට විකුනන්නේ. ඒ වගේම කෘමිනාශක ෙහොර රහසේ ගෙනල්ලා විකුනනවා. ඒවා හොයල බලන්නෙ නෑ. මිල අහන්නවත් බෑ. ඒ තරම් මිලයි. මුහුදෙන් පිටරටවල් වලින්  ගෙනල්ලා වැඩි මුදලට විකුණනවා. අද අපේ පළාත් හොර පොහොර කෘමිනාශක ගේන ජාවාරම්කරුවන්ට තෝතැන්නක් වෙලා. අපිට තේරෙන්නෑ රජයට මේවා තේරෙන් නැද්ද කියලා. ඕනෑ තරම් රටේ ආරක්ෂක අංශ ඉන්නවා, බුද්ධි අංශ ඉන්නවා හොයලා බලන්න කොහොමද මේවා එන්නේ කියලා. එහෙම නම් ඒ එන ඒවා වත් අඩුම තරමේ මේ ගොවීන්ට දෙන්න කියන්න.”

ඊ. ඒ. ගුණවර්ධන ගොවි මහතා  – “ගොවීන් කම්මැලියෝ නෙවෙයි. වැඩ කරලා මේ රටට ඩොලර් ගෙන එන පලතුරු ගම්මානෙට මේ වගේ කරන්න එපා. මොකද අපි ලංකාවේ වෙළෙඳපොළ බලාගෙන පලතුරු වගා කරපු මිනිස්සු නෙවෙයි. විදේශ රටවල්වල අවශ්‍යතාවයට ඉතා අලංකාරව, ගුණාත්මකව තමයි අපි වගා කරන්නේ. මොකද ජේසි අඹ සම්පූර්ණයෙන්ම විනාශ වෙලා. පිටිමකුණු ඇවිල්ලා, කුහුඹුවෝ  ඇවිල්ලා ගස් යටම විනාශ වෙනවා. විශාල මුදලක් වියදම් වෙනවා මේවා ගෙඩියෙන් ගෙඩිය රකින්න. ඒ නිසා රජයේ වගකීමක් තමයි ඩොලර් නැති වෙලාවක මේ පලතුරු පිටරට යවලා ඩොලර් ගෙන්න  ගන්න එක. ඒත් ඉතිං කාටද කියන්නේ කියලා ප්‍රශ්නයක් තියෙන්නේ. කිසිම බලධාරියෙක් ඇවිල්ලා හොයලා බලලා හෝ දේශීය නිෂ්පාදන කරන පොහොර දියර පොහොර කෘමි මර්දන කරන්නේ  කොහොමද කියලා අපට කියලා දීලා නැහැ. ඒ නිසා අපි මේවා දන්නේ නෑ.”

පලතුරු වගා ගොවියෙකු වූ උපුල් කුමාර මහතා. ” අපි තරුණ ගොවියෝ හරිම සතුටෙන් තමයි වගාවට බැස්සේ. අපි වෙන රස්සාවක් සොයාගෙන  පිටරටවල්වල යන්නේ නෑ. රටේ  තරුණයෝ  රට යන්න පොරකන වෙලාවක අපේ ගම්වල තරුණයෝ ඉගෙන ගෙන රස්සා  හොයා ගෙන ගියේ නෑ. ගමේ ඉඳලා රටට ඩොලර් ගෙනාවා. අද සිද්ධ වෙලා තියෙන්නේ අපපේ ඩොලර් ගස් යට කුණුවෙලා වෙලා විනාශ වෙනවා. හැබැයි රජයට මේවා පේන්නේ නෑ. සමහර විට ඕනෑ තරම් කෘෂි නිලධාරීන්, රාජ්‍ය නිලධාරීන් ගම්වල ඉන්නවා. ඒ අයවත් ඔය ඇමතිවරුන්ට කියලා දෙන්න ඕන මේ වගේ විශාල මහා පරිමාණයේ වගාවන් වල අස්වැන්න රට යවලා ඩොලර් ගේනවා කියලා.”

“අද කටු අනෝදා කිලෝවක් රුපියල් 25කට වත් විකුණන්න බෑ. සම්පූර්ණයෙන්ම විනාශ වෙලා පිටිමකුණා ගහලා. කටු අනෝදා වලට පුදුමාකාර ඉල්ලුම්ක් තිබුණේ පිටරටවල් වල. දැන් ලංකාවෙවත් විකුණන්නත් බෑ. ඒ වගේම තමයි ගස්ලබුවලට පිටරටවල්වල ඉල්ලුම තිබුණා. දැන් ඒවා ගස්ලබු නෙවෙයි පුවක් ගෙඩි වගේ ගස් යටම කුණුවෙලා විනාශ වෙනවා. මේවා දකිනකොට ඇත්තටම තරුණයන් හැටියටයට හරිම දුක්ක් වේදනාවක් දැනෙන්නේ. මේ විනාස වෙන්නෙ අපේ රටේ සල්ලි. විදේශ රටවල් වලින් එන සල්ලි. හැබැයි ඩොලර් නෑ කියලා අඬ අඬ ඉන්නේ. මේ වෙලාවේ අඩුම තරමේ අපනයනය කරන පලතුරු වගාවන්වලට කෘෂිකර්ම දෙපාර්තමේන්තුවෙන් ඇවිල්ලා රසායනික පොහොර වර්ග, කෘමිනාශක වර්ග ලබා දෙන්න බැරි නම් අඩුම තරමේ දේශීයව මේ තත්ත්වය ගොඩනඟා ගන්න උදව් කරන්න කියලයි ඉල්ලන්නේ.”

සටහන සහ ඡායාරූප – කාංචන කුමාර ආරියදාස

ඔමික්‍රෝන් ප්‍රභේදයෙන් ආරක්ෂා වීම සඳහා කොවිඩ් එන්නතක මාත්‍රා දෙකක් පමණක් ප්‍රමාණවත් නොවන බව එක්සත් රාජධානියේ විද්‍යාඥයින් අනතුරු අඟවා තිබේ.

බ්‍රිතාන්‍යයේ ඔමික්‍රෝන් සහ ඩෙල්ටා වැළඳුණු රෝගීන් සම්බන්ධ මුල් විශ්ලේෂණයන්ගෙන් පෙන්නුම්කර තිබුණේ, නව ප්‍රභේදය වැළැක්වීමට එන්නත් එතරම් ඵලදායී වී නැති බව යි.

නමුත්, බූස්ටර් මාත්‍රාවක් ලබාගත් පුද්ගලයන්ගෙන් 75%කට පමණ කොවිඩ් රෝග ලක්ෂණ ඇතිවී නැත.

මේ අතර, පසුගිය දා සංවර්ධිත රටවල ප්‍රධාන අමාත්‍යවරුන් එක්ව පැවති රැස්වීම මුලසුන දැරූ එක්සත් රාජධානියේ නිවාස සහ ප්‍රජා අමාත්‍ය මයිකල් ගෝව්, එක්සත් රාජධානිය “දැඩි ලෙස සැලකිලිමත් විය යුතු තත්ත්වයකට” මුහුණ දෙමින් සිටින බවට අනතුරු ඇඟවූයේ ය.

එක්සත් රාජධානි රජයේ හදිසි තත්ත්ව පිළිබඳ කමිටුවේ රැස්වීමකින් පසුව අදහස් දක්වමින් ඔහු කියා සිටියේ, මෙතෙක් ගෙන ඇති ක්‍රියාමාර්ග සියල්ල “සමානුපාතික” නමුත් අමාත්‍යවරුන් සියලුම දේ “සම්පූර්ණයෙන්ම” සමාලෝචනයට ලක් කරමින් සිටින බව යි.

“ක්‍රියාත්මක වීම අතිශයින්ම අත්‍යවශ්‍ය යි. නව දත්ත ලැබෙනකොට, ඒ දත්තවලට අනුව අප ගතයුතු ක්‍රියාමාර්ග මොනවාදැ යි අපි සලකා බලනවා,” ඔහු වැඩිදුරටත් පැවසුවේ ය.

එක්සත් රාජධානියෙන් තහවුරු වූ තවත් ඔමික්‍රෝන් රෝගීන් 448ක් හමුවී ඇති අතර, ඒ සමග මේ වන විට වාර්තා වී ඇති සම්පූර්ණ ඔමික්‍රෝන් සිදුවීම් සංඛ්‍යාව 1265 දක්වා ඉහළ ගොස් තිබේ. සිකුරාදා වාර්තා වූ සමස්ත කොවිඩ් රෝගීන් සංඛ්‍යාව 58 194ක් වන අතර, එය ජනවාරි 9න් පසු වාර්තා වූ ඉහළම සංඛ්‍යාව යි.

එංගලන්තයේ රැකවරණ නිවාස සඳහා වන මාර්ගෝපදේශ යාවත්කාලීන කරන බව ද එරට රජය පවසා තිබේ. එක් නිවැසියෙකු හමුවීමට අවසර ඇති අමුත්තන් සංඛ්‍යාව සීමා කිරීම සහ “වර්තමානයේ ඇති වී ඇති කොවිඩ්-19 අවදානම සමතුලිත කිරීම සඳහා” වැඩි වශයෙන් කොවිඩ් පරීක්ෂණ සිදුකිරීම ද මෙයට අයත් වේ.

දැඩි ලෙස විකෘති වූ ඔමික්‍රෝන් ප්‍රභේදය ප්‍රථමයෙන් හමුවූ දා සිට ඇති ප්‍රධාන ගැටලුවක් වූයේ එය එන්නත්වල ඵලදායී බව අඩුකරනු ඇති යන්න යි.

බ්‍රිතාන්‍යයේ සෞඛ්‍ය ආරක්ෂණ ඒජන්සි වාර්තාව මඟින්, නව ප්‍රභේදයට එරෙහිව එන්නත් කෙතරම් ඵලදායී ද යන්න ගණනය කිරීම සඳහා ඔමික්‍රෝන් රෝගීන් 581කගේ සහ ඩෙල්ටා රෝගීන් දහස් ගණනකගේ දත්ත විශ්ලේෂණය කර තිබේ.

විශ්ලේෂණය පදනම් වී ඇත්තේ සීමිත දත්ත මත වුවත්, ඔක්ස්ෆර්ඩ්-ඇස්ට්‍රාසෙනෙකා එන්නතේ ඵලදායීතාවයේ විශාල පහත වැටීමක් සහ ෆයිසර් මාත්‍රා දෙකක් සඳහා සැලකිය යුතු මට්ටමේ ඵලදායීතාව පහත වැටීමක් ඉන් පෙන්නුම්කර ඇත.

බූස්ටර් මාත්‍රාවකින් පසුව කොවිඩ් රෝග ලක්ෂණවලට එරෙහිව පෙන්වූ 75%ක් වූ ආරක්ෂාව, පෙර ප්‍රභේදවලට එරෙහිව පෙන්වූ ආරක්ෂාව තරම් ඉහළ මට්ටමක පැවතියේ ද නැත.

මොඩර්නා හෝ ජැන්සන් එන්නත්වල ඵලදායීතාව විශ්ලේෂණය කිරීමට ප්‍රමාණවත් දත්ත නොතිබුණ ද, ඒවායේ ප්‍රතිඵල ද මෙයට වඩා වෙනස් වෙතැ යි අනුමාන කිරීමට හේතුවක් නොමැත.

කෙසේ වෙතත් එක්සත් රාජධානියේ සෞඛ්‍ය ආරක්ෂක ඒජන්සිය පවසන්නේ, රෝහල් ප්‍රතිකාර අවශ්‍ය වන අන්දමේ දරුණු කොවිඩ් තත්ත්වවලට එරෙහිව එන්නත් තවමත් හොඳ ආරක්ෂාවක් ලබා දීමට ඉඩ ඇති බව යි.

මේ වන විට මිලියන 22ක පමණ ජනතාවකට බූස්ටර මාත්‍රාව ලැබී ඇති නමුත්, සෑම කෙනෙකුම බූස්ටර මාත්‍රාව ලබා ගත්ත ද එන්නත් ඵලදායීතාව අඩුවීම නිසා තවත් මිලියන ගණනක් රෝගයට ගොදුරුවීමට ඉඩ තිබේ.

එන්නත් මාත්‍රා දෙකම ලබාගත් පුද්ගලයින්ගෙන් ලබාගත් ප්‍රතිදේහවල වෛරසයට එරෙහිවීමේ හැකියාව 40 ගුණයකින් අඩුවීමක් පෙන්නුම් කළ අතර, රසායනාගාර අධ්‍යයනයන්ගෙන් සැබෑ ලෝකයේ දත්ත සනාථ වී ඇත.

එනමුත්, කොවිඩ් වැළඳුන ද එන්නත් මඟින් බොහෝදෙනා රෝහල්ගත කිරීමට තරම් අසාධ්‍ය තත්ත්වයකට පත්වීමෙන් වළකනු ඇති බවට තව දුරටත් ශුභවාදී අදහස් පළ වී තිබේ. තත්ත්වයේ බරපතලකම පිළිබඳ දත්ත ලබන සතියේ ප්‍රකාශයට පත් කෙරෙනු ඇත.

ඔමික්‍රෝන් රැල්ල එතරම් බරපතල නොවූවත්, එය ගැටලුකාරී විය හැකි ය. විශාල සහ හදිසි රැල්ලක දී, දැනටමත් අවදානමට ලක්ව සිටින සෑම කෙනෙකුටම එකවර රෝහල් ප්‍රතිකාර අවශ්‍ය වීමේ ඉඩකඩක් තිබේ.

ඔමික්‍රෝන් රෝගීන්ගේ සීඝ්‍ර වැඩිවීම, එන්නත් මඟින් ලබා දී ඇති ආරක්ෂාව මෙම ප්‍රභේදයට එරෙහිව ප්‍රමාණවත් නොවන බව දැනටමත් ඉඟිකර තිබේ.

සෑම දින දෙකතුනකටම වරක් ඔමික්‍රෝන් රෝගීන් සංඛ්‍යාව දෙගුණ වන බව ද මේ වන විට ගණන් බලා ඇත.

එ.රා. සෞඛ්‍ය ආරක්ෂණ ඒජන්සිය ඇස්තමේන්තුගත කරන්නේ දෙසැම්බර් මැද වන විට එරට සියලුම රෝගීන්ගෙන් අඩකට වඩා ඔමික්‍රෝන් ආසාදිතයින් වනු ඇති අතර, ප්‍රභේදයේ පැතිරීම අඛණ්ඩව පැවතුණහොත් මාසය අවසන් වන විට දිනකට වාර්තාවන රෝගීන් සංඛ්‍යාව ලක්ෂය ඉක්මවනු ඇති බව යි.සෞඛ්‍ය ආරක්ෂණ ඒජන්සියේ ප්‍රතිශක්තිකරණට පිළිබඳ ප්‍රධානී වෛද්‍ය මේරි රැම්සේ පවසන්නේ, “මේ මුල් ඇස්තමේන්තුව ඉතා සැලකිල්ලෙන් විමසා බැලිය යුතු යි. එයින් පෙන්නුම් කරන්නේ දෙවන මාත්‍රාව ලබාගැනීමෙන් මාස කිහිපයකට පසුවත්, ඩෙල්ටා ප්‍රභේදයට සාපේක්ෂව ඕමික්‍රෝන් ප්‍රභේදය වැළඳීමේ වැඩි අවදානමක් තිබෙන බව යි.”

“කොවිඩ්-19හි දරුණු සංකූලතාවලට එරෙහිව එන්නත් මඟින් ඉහළ ආරක්ෂාවක් පෙන්වනු ඇතැ යි අපි බලාපොරොත්තු වෙනවා. ඔබ තවමත් ඔබේ පළමු මාත්‍රා දෙක ලබාගෙන නැති නම් කරුණාකර වහාම ඒවා ලබාගන්න.”

මෙම පර්යේෂණය සිදුකෙරෙන්නේ එක්සත් රාජධානිය සිය ඔමික්‍රෝන් රෝගීන්ගේ වැඩිවීම පිළිබඳ දැඩි අවධානයෙන් පසුවන මොහොතක ය. “කොවිඩ් සුනාමියක්” පිළිබඳව අනතුරු අඟවන ස්කොට්ලන්තයේ ප්‍රධාන අමාත්‍ය නිකොලා ස්ටර්ජන්, හුදකලා නීති දැඩිකරමින් නත්තල් සාද සැලසුම් අවලංගු කරන ලෙස ජනතාව දිරිමත්කර තිබේ.

bbc sandesaya

කොවිඩ් වසංගත තත්ත්වය ඇරඹී වසර දෙකකුත් සම්පූර්ණ වන විට, කොවිඩ් රෝගයෙන් පුරුෂයින්ගේ සරුභාවයට ඇතිවිය හැකි බලපෑමක් අනාවරණය වී තිබේ.

කොවිඩ්-19ට එරෙහි එන්නත මඟින් සරුභාවය අඩුවනු ඇතැ යි හෝ නැතිව යනු ඇතැ යි බියෙන් එන්නත ලබා නොගත් පිරිසක් ද සිටියත්, මෑතක දී ප්‍රකාශයට පත්කෙරුණු නවතම අධ්‍යයනයකින් පෙනී යන්නේ කොවිඩ් රෝගය වැළඳුණු පුරුෂයින්ගේ සරුභාවය විශාල වශයෙන් අඩුවනබව යි.

කොවිඩ් ආසාදනය වී සුවවූ බෙල්ජියම් ජාතික පුරුෂයින් 120 දෙනෙකු සහභාගීකර ගෙන සිදුකළ පර්යේෂණයෙන් පෙනීගොස් ඇත්තේ, කොවිඩ් ආසාදනයෙන් මසකට අඩු කාලයකින් පරීක්‍ෂා කළ විට පර්යේෂණයට සහභාගී වූවන්ගෙන් 60%කගේ ශුක්‍රාණුවල මධ්‍යන්‍ය චාලක හැකියාව අඩු වී තිබූබව යි.

කොවිඩ් ආසාදනය වීමෙන් මාස එකේ සිට දෙක දක්වා කාලයක් තුළ පරීක්‍ෂා කළ විට ශුක්‍රාණුවල චාලක හැකියාව අඩු පිරිමින්ගේ ප්‍රතිශතය 37%ක් වූ අතර, මාස දෙකකට පමණ පසු මෙම අගය 28%ක් විය.

මෙම අධ්‍යයනය මඟින් අනාවරණයකර ගත් තවත් කරුණක් නම් කොවිඩ් ආසාදනයෙන් පසු පුරුෂයින්ගේ ශුක්‍ර තරලයේ අඩංගු ශුක්‍රාණු ගණත්වය ද පහළ බසින වග යි.

කොවිඩ් ආසාදනය වී මසක් තුළ පරීක්‍ෂා කළ විට, පර්‍යේෂණයට සහභාගී වූ පිරිමින්ගෙන් 37%කගේ මධ්‍ය ශුක්‍රාණු ප්‍රමාණය ද පහළ බැස ඇතිබව නිරීක්ෂණය කෙරිණි.

රෝගය ආසාදනයෙන් මාස එකේ සිට දෙක දක්වා කාලයක් තුළ පරීක්‍ෂා කළ විට පිරිමින්ගෙන් 29%ක් දෙනාගේ ශුක්‍රාණු ගණත්වය අඩුවී තිබූබව ද, මාස දෙකකට පසුව ද පිරිමින්ගෙන් 6%කගේ ශුක්‍රාණු ගණත්වය අඩුවූබව ද පර්යේෂකයින් විසින් අනාවරණය කෙරිණි.

මෙය ‘ෆර්ටිලිටි ඇන්ඩ් ස්ටේරිලිටි’ නම් සඟරාවේ පළවූ අධ්‍යයනයකි.

උණ රෝගයන් හේතුවෙන් ශරීරයේ ඇතිවන උෂ්ණත්ව වෙනස්වීම් නිසා ඉන්ෆ්ලුවෙන්සා වැනි වෛරස් ආසාදන තත්ත්වයන්ගෙන් පසුව ද මෙසේ ශුක්‍රාණුවල ගුණාත්මකභාවයේ අඩුවීම් නිරීක්ෂණය කළ හැකිවුවත්, කොවිඩ් ආසාදනය සම්බන්ධයෙන් ගත්කල උණ හේතුවෙන් සිරුරේ උෂ්ණත්වය ඉහළ යාමට වඩා ප්‍රතිශක්තිකරණ පද්ධතියේ ඇතැම් ක්‍රියාකාරීත්වයන් නිසා මෙසේ සිදුවනු විය හැකිබවට පර්යේෂකයින් මත පළකරයි.

පර්යේෂකයින් ඇස්තමේන්තුගත කරන්නේ මෙම ගැටලුව මාස තුනක් වැනි කාලයක් තුළ සාමාන්‍ය අතට හැරෙනු ඇතිබව යි.

කෙසේ නමුත්, මෙය තහවුරුකර ගැනීමටත්, පිරිමින්ගෙන් සුළුතරයකට හෝ ස්ථිර හානියක් සිදුව ඇත්ද යන්න නිශ්චය කිරීමටත් වැඩිදුර අධ්‍යයනයන් සිදුවෙමින් පවතියි.

පසුගිය මැයි මාසයේ ද කොවිඩ් සහ පුරුෂයින්ගේ සරුභාවය සම්බන්ධ පර්යේෂණ පත්‍රිකාවක් ‘ඒෂියන් ජර්නල් ඔෆ් ඇන්ඩ්‍රොලොජි’ සඟරාවේ පළවිය.

කොවිඩ් වැළඳී සුවවූ පුරුෂයින් 41 දෙනෙකු යොදාගෙන සිදුකළ එම පරීක්ෂණයෙන් ද හෙළිවූයේ, කොවිඩ්-19 වැළඳී නැති පාලක කණ්ඩායම සමග සසඳන විට කොවිඩ් වැළඳී ඇති පුද්ගලයින්ගේ මුළු ශුක්‍රාණු සංඛ්‍යාව, ශුක්‍රාණු සාන්ද්‍රණය, සහ ක්‍රමානුකූලව චලනය වන ශුක්‍රාණුවල ප්‍රතිශතය සැලකිය යුතු ලෙස අඩුව තිබූබව යි.

මෙම පර්යේෂණය සිදුකර ඇත්තේ කොවිඩ් සුවවී රෝහලෙන් පිටවීමෙන් දින 56ක පමණ කාලයකින් පසු ය.

ඉන් දින 29කට පසු දෙවන වර පරීක්ෂා කළ විට මෙම අගයන් සාපේක්ෂ වශයෙන් ඉහළගොස් තිබූබව ද පර්යේෂකයින් සඳහන් කරයි.

පිරිමින්ගේ සරුභාවය

ලෝක සෞඛ්‍ය සංවිධානය සඳහන් කරන අන්දමට පුරුෂයින්ගේ නිසරුභාවයට බහුලවම බලපානා හේතූන් වන්නේ ශුක්‍රාණු පිටකිරීමේ ගැටලු, ශුක්‍ර තරලයේ ශුක්‍රාණු අඩංගු නොවීම හෝ ඉතා අඩු ප්‍රමාණයකින් අඩංගු වීම, සහ ශුක්‍රාණුවේ අසාමාන්‍ය හැඩය හෝ චලිතය යි.

ජනවාරියේ දී ලැන්සට් වෛද්‍ය සඟරාවේ පළවූ ලිපියකට අනුව, ලොව පුරා නිසරුභාවයෙන් පීඩා විඳින යුවල සංඛ්‍යාවෙන් 50%කම පාහේ නිසරුභාවයට පුරුෂයාගේ නිසරුබව හේතු වී හෝ දායක වී ඇත.

bbc sandesaya

මෙසේ ගෘහ සේවය සඳහා රැගෙන යන කාන්තාවන් මාස කිහිපයක් ගත වන තුරුත් එම ස්ථානවල රඳවාගෙන විවිධ දුක් කම්කටොලු ගැහැට විඳීමට සිදු වී තිබෙන බවත් එහි රැඳී සිටින මෙරට රැකියා උප නියෝජිත කණ්ඩායම් මෙරට සිට  යන ගෘහ සේවිකාවන්ට විවිධ හිරිහැර කරදර සිදු කරමින් ආහාර පවා සීමා කිරීම් වල නිරතව සිටින බව ද ඇය පැවසුවාය.

සංචාරක වීසා වලට ඩුබායි රටේ ගෘහ සේවය සඳහා රැගෙන ගිය කාන්තාවන් දෙසීයකට පමණ අධික පිරිසක් ඩුබායිහි නිවසක කාමර වල සිරවී සිටින බව එම ස්ථානයෙන් මිදී මෙරටට පැමිණි කාන්තාවක විසින් හෙළිදරව් කළාය.

දඹුල්ල සුමංගල පුර ප්‍රදේශයේ පදිංචි ඉෂාරා කල්හාරි මහත්මිය  මාධ්‍යවේදීන් කැඳවා තමන් අත්විඳි මෙම සිද්ධීන් පිළිබඳව හෙළිදරව් කිරීමට ඉදිරිපත් වූවාය.

මෙරට විදේශ සේවා නියුක්ති කාර්යාංශයේ ලියාපදිංචි වී ඇති විදේශ සේවා නියෝජිත ආයතන හරහා ඩුබායි හි  ගෘහ සේවය සඳහා මෙරට කාන්තාවන් මේ දිනවල විශාල වශයෙන් යවන බවත් එම සෑම අයෙකුම  සංචාරක වීසා වලට  ගොස් එරට නියෝජිත ආයතනයක රඳවාගෙන රැකියා වලට යොමු කිරීම් සිදුකරන බවද ඇය සඳහන් කළාය.

මෙසේ ගෘහ සේවය සඳහා රැගෙන යන කාන්තාවන් මාස කිහිපයක් ගත වන තුරුත් එම ස්ථානවල රඳවාගෙන විවිධ දුක් කම්කටොලු ගැහැට විඳීමට සිදු වී තිබෙන බවත් එහි රැඳී සිටින මෙරට රැකියා උප නියෝජිත කණ්ඩායම් මෙරට සිට  යන ගෘහ සේවිකාවන්ට විවිධ හිරිහැර කරදර සිදු කරමින් ආහාර පවා සීමා කිරීම් වල නිරතව සිටින බව ද ඇය පැවසුවාය.

ඩුබායිහි රඳවාගෙන සිටිය දී තමන් සියසින් අත් දුටු දේ පිළිබඳව ඇය මෙසේ විස්තර  කළාය

“මම ජීවත් වෙන්න විදිහක් නැතුව දරුවෝ  දෙන්න හදාගන්න තමයි රට යන්න තීරණය කළේ. පුංචි පැලක ජිවත් වෙන්නේ  මම  කුරුණෑගල ප්‍රදේශයේ විදේශ රැකියා ආයතන එකට ගිහිල්ලා පාස්පෝට් සියල්ල  බාර දීලා තමයි රට යන්න සූදානම් වුණේ. මට මාසයකට සංචාරක වීසා ගහලා දුන්නා ඩුබායි යන්න ඒ අනුව මම ගියා ඩුබායි වල්ට.”

අපි ඒ රටට ගිහිල්ලා ඉන්නකොට ගුවන්තොටුපොළෙන් ම මහතෙක් ඇවිල්ලා අපිව අරන් ගියා. අරන් ගියපු තැනට  ඇතුල් වෙන කොටම අපේ ජංගම දුරකථන ඔක්කොම ඒ අය ගන්නවා. පුංචි කාමරයක දානවා. දාලා කවුරු හරි අපිව ගන්න අවම  හිනාවෙලා ඉන්න කියලා කියනවා. ගෙදරින් එන ඇමතුමක්වත් අපට ගන්නවත් අවස්ථාවක් දෙන්නේ නැහැ. කලාතුරකින් අපිට ඇමතුමක් ගන්න ඕනේ කිව්වාම ස්පිකර් දාලා කතා කරන්න ඕන එයාගේ අඩුපාඩු එතන තියෙන සිද්ධීන් කිසිවක් කියන්න තහනම් කරලා තමයි තියෙන්නෙ “

එතැන විශාල පිරිසක් කාන්තාවො ඉන්නවා රස්සාවකට යන්න බැරුව.

“හැමදාම වගේ ඒ රටේ   බාබලා එතෙන්ට එනවා  ආපුහාම අපි එක් එක්කෙනා එයාලට පෙන්වනවා ගාන කතා කරනවා. අපට කියනවා හිනාවෙලා ඒ අයට මූණ  දෙන්න කියලා. අපි බැරිවෙලාවත් මුහුණ අසතුටෙන් හිටියොත් හොඳටම බනිනවා. විනාඩි කිහිපයයි වැසිකිලියකට යන්න දෙන්නෙ සීමිත කාලයක් පරිප්පුයි බතුයි තමයි කන්න  දෙන්නෙ. බිම තමයි  නිදාගන්න තියෙන්නේ. අපි හරියට හිරකාරයෝ වගේ පුදුමාකාර දුකක් විඳින්නේ එතන ඉන්න හැමෝම ඒ වගේ තමයි .”

“මම හිතන විදියට අපේ රටේ කාන්තාවෝ දෙසිය  පනහකට වැඩිය  කණ්ඩායමක් මේ අය ළඟ රඳවලා  තියෙනවා. මම මේ සිද්ධිය දැක්කට පස්සේ විදේශ රැකියාවට  ගෘහ සේවය එපා වුණා. මාසෙක සංචාරක වීසා නිකුත් කරලා ඒ රටේ  අපිව  බාර ගන්න කවුරු හරි බාබා කෙනෙක් හිටියොත් තමයි අවුරුදු දෙකක ගෘහ සේවය සඳහා නිකුත් කරනවා කියලා කියන්නේ “

“හැබැයි අපට  කියන්නේ නිවසක් තියෙනවා. ඒ නිවසේ කට්ටිය හොඳයි. අහවල් නිවසට තමයි යන්නේ කියලා සියල්ලම දැනුවත් කරනවා. සමහර වෙලාවල් වලට ඒ නිවසේ කට්ටියත් එක්ක කියලා කතා කරන්නත් දෙනවා. හැබැයි එතෙන්ට ගියාට පස්සෙේ සිද්ද වෙන්නේ වෙනම දෙයක්.”

“මම අසනීප උනා කන්න බොන්න නැතුව ගොඩක් අමාරු උනා. දින දහයක් පමණ ගත වෙද්දී මට අඩුම තරමේ නැගිට ගන්නවත් බැරි තත්ත්වයකට පත් වුණා .මම ලංකාවේ රැකියා ආයතනයට කතා කරලා කිව්වා ගොඩක් අමාරුයි කියලා. ඒ වගේම දිගටම බඩගින්නෙ ඉඳලා ලේ වමනෙ යන්න පවා ගත්තා. පස්සේ මාව නැවත ගෙන්න ගත්තා.”

” එතන හිර වෙලා ඉන්න ගොඩක් අය දුක් විඳිනවා ඩුබායි වලට සංචාරක විසා වලින් ගිහිල්ලා මේ වගේ අපේ  කාන්තාවෝ දුක් විඳින නිසා මට කිව්වා බය නැතුව රටට ගිහිල්ලා මේවා හෙළි කරන්න කියලා .මම ඇස් දෙකෙන් දැකපු දේ තමයි රටට හෙළි කරන්න තීරණය කළේ. අපේ රටේ කාන්තාවන්ට සිද්ධවෙන දේ සොයා බලන්න කියලයි ඉල්ලා සිටින්නේ “

“මෙම කාන්තාව ඩුබායි සේවය සඳහා සංචාරක වීසා වලට යැවූ කුරුණෑගල ප්‍රදේශයේ පෞද්ගලික රැකියා ආයතනයේ නියෝජිතයෙකු ගෙන් අප විමසීමේදී ඔහු කියා සිටියේ විදේශසේවා නියුක්ති කාර්යාංශයේ ලියාපදිංචි වී ඩුබායි රැකියා වලට යවන බහුතරයක් කාන්තාවන් සංචාරක වීසා වලට යවන බවය .සංචාරක වීසා යන කාන්තාවන් එම රටේ රැකියාවක් සොයා ගැනීමෙන් අනතුරුව ඔවුන්ට වසර දෙකක වීසා එරටින් ලබාදීමේ ක්‍රමවේදයක් ක්‍රියාත්මක වන බවත් මෙම කාන්තාව අසනීප වීම නිසා නැවත ලංකාවට රැගෙන ආ බවද ඔහු පැවසීය.’”

විදෙස් සේවා නියුක්ති කාරයංශය නියෝජ්‍ය සාමාන්‍ය අධිකාරි මාධ්‍ය ප්‍රකාශක මංගල රන්දෙණිය මහතා ගෙන් අප මේ පිළිබඳව වූ විමසීමේදී කියා සිටියේ ඩුබායි රටට යන අවස්ථාවන් රැසක් සංචාරක වීසා වලට යැවීම සාමාන්‍යයෙන් සිදුවන ක්‍රියාවලියක් බව ය. එම අයට හාම්  පුතෙකු ලැබුණු පසුව  විසා දික්කර දෙන බවත්  නැවත රැකියා නියෝජිත ආයතනය විසින් කාර්යංශයට දැනුම් දිය යුතු බවත් ඒ අනුව සංචාරකක විසා වලට ඩුබායි වලට යැවීම සිදු කරන බව ඔහු සඳහන් කළේය.

සටහන සහ ඡායාරූප – කාංචන කුමාර ආරියදාස

වසරකට අධික කාලයක් සිට කොරෝනා වෛරසයට  බිය වූ තම සැමියා කුඩා දරුවන් දෙදෙනා සහ තමන් නිවසක දමා සිරකරගෙන සිටීම නිසා දැඩි පීඩනයකට පත්ව ඇති බව පවසා 31 හැවිරිදි බිරිඳක් ඊයේ (18) ගලේවෙල මකුලුගස්වැව පොලීසියට පැමිණිල්ලක් ඉදිරිපත් කොට නිවසින් බැහැරවී ගොස් ඇති බව පොලිසිය කියයි.

මෙම පැමිණිල්ල අනුව අද (19) දින මකුලුගස්වැව පොලිසියේ ළමා හා කාන්තා කාර්යාංශයේ ස්ථානාධිපතිනි උප පොලිස් පරීක්ෂකා ආර්. එන්. සි. දිල්හාරා මහත්මිය ඇතුළු කණ්ඩායමක් ගලේවෙල බඹරගස් වැව ප්‍රදේශයේ පිහිටි මෙම දරුවන් රඳවා ඇති නිවසට ගොස් කොරෝනා වලට බියේ සිරවී සිටින දරුවන් දෙදෙනාත් එම පියා ද පොලිසියට රැගෙන විත් ඇත.

මෙම පිරිම දරුවන් දෙදෙනා 07 හා 09 වැනි වියේ පසුවන බව පොලිසිය කියයි.

පසුගිය අගෝස්තු මස 6 වන දින ද මෙම කාන්තාව මකුලුගස්වැව පොලීසියට පැමිණ සැමියා විසින් තමන් සහ දරුවන් දෙදෙනා කුඩා කාමරයක දමා කිසිදු ආකාරයකින් තම පුද්ගලික  අවශ්‍යතාවයකට හෝ වැසිකිළි කැසිකිළි යාමට හෝ එළියට බැසීමට ඉඩ නොදී  කොරෝනා වැළඳේ යැයි බියෙන් කුඩා කාමරයක සිරකරගෙන සිටින බවට පොලිසියට පැමිණිලි කර ඇත.

පසුව පොලිසිය නිවසට ගොස් අදාළ සැමියා දැනුවත් කොට මනසික වෛද්‍යවරයකුට  පෙන්වා ප්‍රතිකාර ලබාදී නැවත නිවසට පිටත් කර ඇත.

එහෙත් මෙම පුද්ගලයා  ප්‍රතිකාර ඉවත දමා නැවතත් සුපුරුදු පරිදි කොරෝනා බෝ වීම  වැළැක්වීම සඳහා දරුවන් පාසලට නොයවා ඔහුද ( ඔහු ලංගම බස් ඩිපෝවේ කොන්දොස්තර වරයෙකු ලෙස සේවය කරයි) සේවයෙන් පවා ඉවත්ව නිවසේ රැඳී සිටින බවත් පොලිස් පරීක්ෂණවලදී හෙළි වී ඇත.

මේ සම්බන්ධයෙන් අදහස් දැක්වූ මෙම පුද්ගලයාගේ පියා පොලිස් නිලධාරීන්ට මෙසේ පවසා ඇත. ‘අපේ පුතා අපි ගෙනැවිත් දෙන ආහාර දැඩි ලෙස පිරිසිදු කොට දරුවන්ට නිවස තුළට තබා කෑමට සකසා දෙනවා. කිසිදු ආකාරයකින් නිවස ආසන්නයේ හෝ නිවෙස ඇතුළත වෙනත් බඩු මුට්ටුවක් හෝ අතපත ගෑම සිදු නොකරන ලෙස දරුවන්ට කියනවා. දරුවන් මෙන්ම ඔහු ද නිරන්තරයෙන් සබන් වතුර සහ විවිධ  විසබීජ නාශක යොදමින් පිරිසිදු වෙනවා‘

ආහර පිසීමට යොදා ගන්නා සහල් උර මෙන්ම සහල් ද උණු වතුර යොදා පිරිසිදු කිරීමෙන් පසුව නිවසට ගන්නා බවද ඔහුගේ දරුවන් හා දෙමාපියෝ පොලිසියට දන්වා ඇත.

මෙම තත්ත්වය ඉවසා ගැනීමටට නොහැකි වූ දරුවන්ගේ මව 18 දින මකුලුගස්වැව පොලිසියට පැමිණ මේ පිළිබඳව පැමිණිල්ලක් ඉදිරිපත් කොට නිවසෙන් පිටව ගොස් ඇතැයි පොලිසිය කියයි.

පොලිසියට රැගෙන විත් සිටියදී ද මෙම පියා  කොරෝනා වෛරසය ශරීර ගත වේයැයි  දැඩි බියකින් පසුවන බවත් තමන්ට මානසික රෝගයක් නොමැති බව පවසමින් ප්‍රතිකාර ගැනීම පවා ප්‍රතික්ෂේප කරමින් සිටින බව පොලීසිය කියයි.

කෙසේ වෙතත් පොලිස් භාරයට ගැනුණනු මෙම දරුවන් දෙදෙනා සහ පියා වෛද්‍යවරයකුට ඉදිරිපත් කිරීමෙන් අනතුරුව අධිකරණයට ඉදිරිපත් කොට ඉදිරි සුදුසු ක්‍රියාමාර්ග ගැනීම සඳහා පියවර ගන්නා බව මකුලුගස්වැව පොලීසිය ප්‍රකාශ කළේය.

නිවසෙන් බැහැරව ගිය  බිරිඳට  නැවත පොලිසියට පැමිණෙන ලෙස දැනුම් දී තිබෙන බව මකුළුගස්වැව පොලිසියේ ළමා හා කාන්තා කාර්යාංශයේ ස්ථානාධිපතිනි උප පොලිස් පරීක්ෂකා  ආර්. එන්. සි. දිල්හාරා මහත්මිය පැවසුවාය.

පොලිසිය අවස්ථා කිහිපයකම මෙම නිවෙසට යන අවස්ථාවන්හිදී කුඩා කාමරයක මෙම දරුවන් රඳවා ගෙන සිටි බවත් එම දරුවන්ට හිරු එළිය නොවැටීම නිසාවෙන් සහ ඇවිදීමට ඉඩ පහසුකම් නොමැති නිසාවෙන් දැඩි මානසිනසික පීඩනයකට මෙන්ම ශරීර සෞඛ්‍යයද  දැඩි ලෙස හානි වී තිබූ බව ළමා හා කාන්තා කාර්යාංශයේ කියයි.

සටහන සහ ඡායාරූප – කාංචන කුමාර ආරියදාස

වන්දි ලබා දීමේ ක්‍රමවේදය තවමත් ක්‍රියාත්මක නැහැ. මහවැලි ජලාශය ඉදිකිරීම් අවසන් වීම නිසා ඉදිරියේදී නව වැඩපිළිවෙළක් යටතේ මෙම ජනතාවට සහන සැලසීමට අවශ්‍ය පියවර ගන්නවා – මහවැලි බලධාරීන්

මොරගහකන්ද – කළුගඟ ජලාශයේ ඉදිකිරීම් සඳහා අවට ගම්මාන අත්පත් කර ගැනීමෙන් පසුව හුදෙකලාභාවයට පත්වූ ලග්ගල රාවණා ගම ප්‍රදේශයේ පදිංචිව සිටී ජනතාව නැවත පදිංචි කරවූ ස්ථානවල පොදු පහසුකම් නොමැති වීම නිසා දැඩි අසීරුතාවයකට පත්ව ඇතැයි පසුගිය දා අප එහි කළ සංචාරයේ දී හෙළිවිය.

ලග්ගල රාවණාගම ප්‍රදේශයේ පදිංචිව සිටි මෙම පිරිස් මහවැලි අධිකාරිය මගින්  ලග්ගල නව නගරයේ පදිංචි  කරවීම සිදු කොට වසරක පමණ කාලයක් ගත වී ඇතත් තවමත් එම ජනතාවට විදුලි බලය, ජලය, වන්දි මුදල් හෝ නිවසක් තනා ගැනීමටට නිසි වැඩපිළිවෙළක් සකස් නොකිරීම නිසා  වීම ඔවුහු  දුෂ්කරතාවයන්ට පත්ව සිටිති.

මෙම ජනතාව මොරගහකන්ද –  කළු ගඟ ජලාශ ව්‍යාපෘති  සඳහා තම  ඉඩකඩම් දේපළ සියල්ල කැප කළ පිරිසකි.

හිටපු ජනාධාධිපති, වත්මන් අග්‍රාමාත්‍ය මහින්ද රාජපක්ෂ මහතා විසින් එවකට මොරගහකන්ද – කළුගඟ ජලාශයේ ඉදිකිරීම් ආරම්භ කිරීමත් සමඟ හිටපු ජනාධිපති මෛත්‍රීපාල සිරිසේන මහතා විසින් කළුගඟ ජලාශයේ ඉදිකිරීම් අවසන් කරන කාලය දක්වාම තම ගම්මාන වලට වී හුදෙකලාව  ජීවත් වූ මෙම ජනතාව වන අලින් සමග දිනපතා දැඩි ජීවන  අරගලයක් කළේය.

අවසානයේදී මොරගහකන්ද කළු ගඟ – ජලාශ ජනතා අයිතියට පත්කිරීමෙන් අනතුරුව හුදෙකලා ගම්මාන බවට පත්ව මෙම ජනතාවට ගම්මාන අත්හැර යන තත්ත්වයට පත්විය.

පසුව මහවැලි අධිකාරිය දැනුවත්  කිරීමෙන් අනතුරුව  තම ඉඩකඩම් ගේදොර සියල්ල අත්හැර දමා මහවැලිය විසින් ලබාදුන් ඉඩම් වලට පැමිණි අතර එදා සිට වසරක පමණ කාලයක්  මූලික පහසුකම් වලින් තොරව දැඩි ආර්ථික දුෂ්කරතා මධ්‍යයේ ජීවත් වීමට ඔවුනට සිදුවිය.

අප මෙම ගම් ගම්මානයට යන අවස්ථාවේදී ද විදුලිය බලය ගම්ට ලබාදීම සඳහා විදුලිබල මණ්ඩලයේ සේවකයන් පැමිණියත් එම ස්ථානය හසලක සහ නාඋල විදුලිබල මණ්ඩල වලට අයත් ස්ථානයක් බව පවසා ඔවුන් පිටව යන්නට වීම විශේෂත්වයකි.

එමෙන්ම මහමහවැලි අධිකාරියේ කණ්ඩායමක්ද එම ගම්මානයේ සිටියදී අපට හමුවිය. අප මෙම ජනතාව විඳින දුක පිළිබඳව ඔවුන්ගෙන් විමසද්දී ‘අපිට මේක අදාළ නැහැයි‘ යැයි කියමින් ඔවුහු පිටව ගියහ.

මෙම  ගම්මානයේ පදිංචිව සිටින ජනතාව කියා සිටියේ දිය නෑම සඳහා මහවැලියෙන් ජල බවුසර් රැගෙනවිත් දෙන බව ය. එහෙත් පානීය ජල සොයා කිලෝමීටර් ගණනාවක් තමන්ට ගමන් කිරීමද සිදුව තිබෙන බව ද දරුවන්ගේ අධ්‍යාපන කටයුතු සියල්ල නැවතී තිබෙන බවද රුපියල් පනස් දහසක මුදලක් වාඩි තනා ගැනීම සඳහා මහවැලි මගින් ලබාදී තිබුණ බවද ඔවුහු පවසති.

එහෙත් ඉතා දීර්ඝ කාලයක් පරම්පරා ගණනාවක් උල්පත් ජලය පානය කොට දිය නා ඉතා උසස් ජීවිත ගත කළ තමන්ට හුදෙකලා මිනිසුන් බවට පත්වීමට සිදු වී ඇතැයි ඔවුහු පවසති.

සමස්ත රටේ සංවර්ධනය වෙනුවෙන් මහවැලි අධිකාරියේ අවසාන වාරි ඉදි ඉදිකිරීම් වන විශාල ජලාශයකට තම ජීවිත කැප කළ එම ජනතාවට සහන සැලසීම පිළිබඳව මහවැලි බලධාරීන්ගේ අවධානය යොමුකර වන්නැයි ඔවුහු අප ගෙන් ඉල්ලා සිටියහ.

මොරගහකන්ද – කළු ගඟ ජලාශ භාර ඉඩම් අංශයේ ප්‍රධානී මහින්ද ජයසිංහ මහතා ගෙන් අප මේ පිළිබඳව විමසීමේ දී ඔහු කියා සිටියේ ලග්ගල මහියංගනය ප්‍රධාන මාර්ගයේ රාවණා ගම ප්‍රදේශය සහ එලවන කන්ඳ කොටසේ පවුල් රැසක් ඉවත් කිරීම සිදු කළ බවය. එම ජනතාවට වන අලි ගැටලු පැවතීම නිසා තම ගම්මාන වලින් ඉවත් වීමට අවැසි බව සඳහන් කිරීමත් සමග මහවැලියෙන් ඉඩම් ලබා දුන් බවද ඔහු පැවසුවේය. කෙසේ වෙතත් වන්දි ලබා දීමේ ක්‍රමවේදය තවමත් ක්‍රියාත්මකව නොමැති බවත් මහවැලි ජලාශය ඉදිකිරීම් අවසන් වීම නිසා ඉදිරියේදී වන වැඩපිළිවෙළක් යටතේ මෙම ජනතාවට සහන සැලසීමට අවශ්‍ය පියවර ගන්නා බවද ඔහු වැඩි දුරටත් සඳහන් කළේය.

සටහන සහ ඡායාරූප – කාංචන කුමාර ආරියදාස

43 සේනාංකයේ නීති ප්‍රතිසංස්කරණය වෙනුවෙන් වූ නීතිඥ එකමුතුව ඊයේ පිහිටුවන ලද අතර, ඊට ප්‍රධාන ආරාධිතයා ලෙස එක්වූ සමගි ජන බලවේගය පාර්ලිමේන්තු මන්ත්‍රී පාඨලී චම්පික රණවක මහතා සඳහන් කළේ ලංකාවේ වෙළෙඳපොළ වාගේම අන්තර්ජාතික වෙළෙඳපොළ ද ශ්‍රී ලංකාවට ණය ලබා දීම ප්‍රතික්ෂේප කොට ඇති බවය. දැන් මේ ගැටළුව උච්ඡතම අවස්ථාවට පැමිණ තිබේ. ආණ්ඩුව දැන් රට රටවල් පසුපස දුවන්නේ, කොළඹ තිබෙන වටිනා ඉඩම් විකුණා දැමීමට උත්සාහ කරන්නේ මේ ගැටළුව නිසා බව රණවක මහතා මෙහිදී පෙන්වා දුන්නේය.

“ඇයි මෙහෙම වුනේ? ඇයි අර 2019 තිබිච්ච තත්වය දැන් ඇති වෙන්නැත්තේ? කරුණු ගණනාවක් නිසා. කෝවිඩ් එක හේතුවක් විතරයි. පළවෙනි සංඥාව නිකුත් වුණා. මේ ජනාධිපතිවරයාගෙන් 2019 දෙසැම්බර් 01 වෙනිදා දැවැන්ත බදු සහනයක් ලබා දුන්නා. ඒ නිසා රාජ්‍ය ආදායමෙන් 40% ක් මෙහෙම කරද්දි නැතිවුණා. නරක සංඥාවක් දේශීය වෙළඳපොළටත්, අන්තර්ජාතික වෙළඳපොළටත් නිකුත් වුණා. ලංකාවට ණය ගෙවා ගැනීමේ හැකියාවක් නැහැයි කියන පණිවිඩය තමයි ඒ නරක සංඥාව. අන්තර්ජාතික මූල්‍ය අරමුදල අප අප රටත් එක්ක වැඩපිළිවෙළක් කරගෙන ගියා 2017 ඉඳන් ඒක 2020 ජූනි මාසෙ වෙනකන් තිබුණා. අවශ්‍ය නම් ඒක දිග්ගස්සගන්න තිබුණා. මොලේ කල්පනා කරා නම් ඒක ඒ වෙලාවේ දික් ගස්සගන්නවා. වහාම වගාඩම්බර ප්‍රකාශ ගණනාවක් කරලා අයි. එම්. එෆ්. එක අපිට ඕන්නෑ විදේශ බලවේග අපිට ඕන් නෑ දෑතේ දෙපයේ ශක්තියෙන්, දේශීය, බලෙන් අපි නැගිටිනවා කියලා ප්‍රකාශ කරලා අයි. එම්. එෆ්. එක එලව ගත්තා. ඒ එලවා ගත්තේ අන්න අර සුදු ලූනු බිකේ ඉදන් නැනෝ යූරියා දක්වා වංචා, දූෂණ, හොරකම් ටික කරගන්නයි ඒ එලව ගත්තේ. වෙන කාරණයකට නෙමෙයි. එතනින් තවත් නරක සංඥාවක් නිකුත් වුනා.

ඊළඟට මේ රටට කවදත් ඉතා අඩු පොලියට අපි කියනවා දීපු වැදගත් ව්‍යාපෘති 323 ක් තුන්සිය විසි තුනක් පයින් ගහලා එලියට දැම්මා. 9000 ක් වෘත්තීයවේදීන් එළියට දැම්මා. 24000 කට රැකියා අහිමි වුණා. ප්‍රධාන ඒවා කිව්වොත් මේ අපේ ආණ්ඩුව බොහොම අමාරුවෙන් අපි සාකච්ඡා කරලා ලබාගත්ත සැහැල්ලු දුම්රිය ව්‍යාපෘතිය. ඩොලර් බිලියන 2.2 ක්. මුළු අවුරුද්දටම ආවේ 500 යි. කියලා. ඒ ව්‍යාපෘතිය තිබුන නම් මේ අවුරුද්දේ ඩොලර් මිලියන 600 ක් රටට නිකම්ම එනවා. ගිය අවුරුද්දෙත් එනවා. මේ අවුරුද්දෙත් එනවා. ඊළඟ අවුරුද්දෙත් එනවා. ඒ ව්‍යාපෘතිය නැවැත්තුවා. ඊළඟට මරදානේ සිට හෝමාගම දක්වා දුම්රිය පද්ධතිය නවීකරණය කිරීමේ ඩොලර් බිලියන 1.7 ක ජයිකා ව්‍යාතිය. පයින් ගැහුවා ඒකට. ගහලා ඒකත් අයින් කරලා දැම්මා. අද පාරේ තියෙන මේ දැවැන්ත මාර්ග තදබදය විසඳගන්න තිබිච්ච ක්‍රියාමාර්ග. ඒ වගේම කඩුවෙල පාර්ලිමේන්තු පාරේ තදබදය විසඳගන්න තිබිච්ච ක්‍රියාදාමයක්.”

කොළඹ නගරයේ බිම් යටි බිම්ගත විදුලි පද්ධතියට දීලා තිබිච්ච ජයිකා ණය ඩොලර් මිලියන 214 ක්. පයින් ගැහුවා. ලෝක බැංකුවේ උපකාරය හදන්න ගිය දැවැන්ත බහුමාදිලි දැවැන්ත ප්‍රවාහන මධ්‍යස්ථාන අද නෑ. වැඩ කෙරෙන්නේ නෑ. ව්‍යාපෘති නතර වෙලා. එකම මහා පරිමාණ ව්‍යාපෘතියක්වත් අද සිදු කෙරෙන්නේ නෑ. මොකක්ද මේකෙන් ලැබිච්ච සංඥාව? ලංකාවට ආසියානු සංවර්ධන බැංකුවත් එපා. ලංකාවට කොරියා සංවර්ධන බැංකුවත් එපා ලංකාවට සල්ලිත් එපා අඩු පොලියට ණය එපා කියන සංඥාව තමයි මේ දුන්නේ

තාක්ෂණ නගරයක් අපි හෝමාගම ඇති කළා. ඒකට කොරියානු ආධාර අපිට ලැබුණා. ඉතාම වැදගත් ව්‍යාපෘතියක් විශ්ව විද්‍යාල අටක් තාක්ෂණ විද්‍යා පීඨ හරහා 80000 ක් පුහුණු කරා. මොකද කළේ? ඒක නැවැත්තුවා. ඒක නැවැත්තුවා විතරක් නෙමෙයි කොරියානු ආධාරය, ආසියානු යටිතල පහසුකම් බැංකුවේ ඩොලර් මිලියන 400 ක ආධාරය නැති වුණා. එතන හදන්න යනවා මොකක්ද හිරගේ. වැලිකඩ හිරගෙදර. රුපියල් බිලියන 31 ක්. කෝටි 3100 ක් වියදම් කරලා. අපි සාමාන්‍යයෙන් කියන්නේ පාසලක් විශ්ව විද් යාලයක් අරිනවා කියන්නේ හිරගෙදරක් වැහෙනවා කියන එක. ලංකා ඉතිහාසයේ පළවෙනි වතාවට තාක්ෂණ පීඨ හතරක් වහලා හිරගෙයක් ඇරියා මේ ගෝඨාභය රාජපක්ෂ. ඔහු දන්නේ එච්චරයි. ඒක තමයි කරපු දේ. ඒ ඒ ඒවා හරහා දුන්නේ ඉතාම නරක පණිවිඩයක්. ඉතාම නරක පණිවිඩයක් අන්තර්ජාතික වෙළඳපොළට ලබා දුන්නා. ඒ සංඥාව. ඉතාම බරපතලයි.

මේ රටේ මේ ණය බර භාවය ගැන 225 ට බනිනවා. අවුරුදු 72 ක් රට පාලනය කරපු අයට බනිනවා. එහෙම කියලා මේක සාමාන්‍යකරණය කරලා තියෙනවා. අද මේ අර්බුදය බණ්ඩාරනායකලා, සේනානායකලා, ජයවර්ධනලා, කුමාරතුංගලා, ප්‍රේමදාසලා හදපු අර්බුදයක් නෙවෙයි. මේ අර්බුදය සම්පූර්ණයෙන්ම රාජපක්ෂවරු හදපු අර්බුදයක්. මේ අපේ ණය ආපසු ගැනීම්, ගෙවීම් ගැන බැලුවොත්, 2021 දි 74.4% ක් ම, මහින්ද රාජපක්ෂගේ ණය. 14% යි සේනානායකගේ ඉදන් චන්ද්‍රිකා කුමාරතුංග මැතිණිය දක්වාම ණය. ඒකෙන් පේන්නේ මේ බර රාජපක්ෂවරුන්ගේ බර.

නිතර ආඩම්බරයෙන් කියන දෙයක් තියෙනවා. ඒක තමයි අපේ කාලේ දැවැන්ත වැඩ කොටසක් සිද්ධ වුණා. අධිවේගී පාරවල් හැදුනා. බලාගාර ඒ වගේම වරායවල් හැදුනා, ගුවන් තොටුපළවල් හැදුනා, සංඥා කුළුණු හැදුනා, ක්‍රීඩාංගණ හැදුනා, සම්මන්ත්‍රණ ශාලා හැදුනා. දැවැන්ත සංවර්ධනයක් සිද්ධ වුණා. 7% ක ආර්ථික වර්ධනයක් ලගා කරගත්තා. යහපාලනය 3ට වැට්ටුවා කියලා. නිතරම ඕක කියනවා. කොහෙන්ද මේ සංවර්ධනය ආවේ? මේ සංවර්ධනය ආවේ අන්න ඒ වාණිජ ණය හරහා. ඒ වාණිජ ණය දරාගන්න බැරුව, ඔය නග්ගපු ව්‍යාජ සංවර්ධනය 2013 දි 3% ට වැටුනා. ඒ වාණිජ ණය කිසිම ආදායමක් ඉපදවෙන්නේ නැති නැව් එන්නේ නැති වරායවල්. ගුවන් යානා එන් නැති ඒ වගේම සංඥා නැති මේ නෙළුම් කුළුණවල්, සම්මන්ත්‍රණ නැති සම්මන්ත්‍රණ ශාලා, ක්‍රීඩා නැති ක්‍රීඩාංගන ආදිය ඉදිකිරීම හරහා අපි කිසිම ආදායමක් ඉපදවන්නේ නැති තැන්වල තමයි ඒවා යෙදෙව්වේ. ඒ වගේම ඒවායින් 1:400, 1:2000 අනුපාතෙන් කරපු, ගසාකෑම් වල ඵලවිපාක තමයි, අද අපට ගෙවන්න වෙලා තියෙන්නේ.

2015-19 මහින්ද රාජපක්ෂ මහත්තයා මෙහෙම ඉන්නකොට මේ ගෝඨාභය රාජපක්ෂ මහත්තයයි, විමල් වීරවංශ මහත්තයයි ඉන්නකොට සභාවේ ඇහුවා මාධ්‍යවේදියෙක්. ඔබතුමාලා ආවම කොහොමද ණය ප් රශ්නේ විසඳන්නේ කියලා ඇහුවා. නේද? අපි ආවම සල්ලි හොයනවා. අපි ආවම සල්ලි ගලාගෙන එනවා. කිසිම ප් රශ්නයක් නෑ අපි ආවා. අපි දන්නවා සල්ලි හොයන හැටි. අපි දන්නවා ණය ගෙවන හැටි. අපි වැඩ කරපු කට්ටියක් කියලා කිව්වා. ඒ වගේ කතා අපේ විපක්ෂෙත් ඇහෙනවා. අපි ආවහම අපි කරනවා. අපි දන්නවා කරන හැටි කියලා. මේ අර්බුදය, එහෙම සරල ආණ්ඩු වෙනසකින් හෝ එවැනි කාරණයකින් කරන්න පුළුවන් දෙයක් නෙමෙයි. මේකට අවශ්‍යයි නිශ්චිත වැඩපිළිවෙලක්. මේකට අවශ්‍යයි නිශ්චිත කණ්ඩායමක්. මේකට අවශ්‍යයි නිශ්චිතව මේ ප්‍රශ්න හඳුනාගෙන සිදුකරන ක්‍රියාදාමයක්. ඒකෙන් වැදගත්ම කොටසක් මේ නීතීඥ ඔබට පැවරෙනවා. ඒක තමයි මේ රට නැවතත් නීතියේ ආධිපත්‍යය තියෙන රටක් බවට මේ රටේ මිනිස්සුන්ටත්, ලෝකයාටත් පෙන්වා දීම ඒ සඳහා වෙන ප්‍රතිසංස්කරණවලියක් ඉදිරිපත් කිරීම.

ඒ මගින් ලෝකයට අපි බලගතු සංඥාවක් දෙන්න ඕනේ නැවතත් මේ රට මානව හිමිකම් රකින නීතියේ ආධිපත්‍යය තියෙන ඒ වගේම අධිකරණයේ ස්වාධීනත්වයේ කාර්යක්ෂමතාවය සහ අපක්ෂපාතීත්වය තිබෙන රටක් යැයි කියන ඒ කොළපාට සංඥාව ගෝඨාභය රතු සංඥාවක් ඇරියේ කොළ සංඥාව අපි ලබා දෙන්න ඕනේ. දක්ෂ පක්ෂ පිරිසට ඉදිරියට එන්න වේදිකාවක් අවශ්‍යයි තමන්ගේ වෘත්තියෙන් නීතිඥ වෘත්තියෙන් එහෙම නැත්නම් නීති උපදේශනයෙන් ගණකාධිකාරිවරු හැටියට, සැලසුම් ශිල්පීන් හැටියට, ඉංජිනේරුවෝ හැටියට, වෛද්‍යවරු හැටියට ගුරුවරු හැටියට රට ගොඩනැගූ පිරිසට ඇයි බැරි මේ රටේ අනාගතය මෙහෙයවන්න අනාගතය ගොඩනගන්න අන්න ඒ සඳහා කාටවත් කඩේ නොයා අපි අපිම අපේ උරමතින් මේ අසීරු මොහොතේ අපේ රා අපේ රට අපේ ජනතාව මුහුණ දීලා තියෙන මේ මොහොතේ ජාති ආගම් කුල භේදයකින් තොරව මෙය ගොඩනගා ගැනීමට හදන ලද වේදිකාව තමයි අපේ 43 සේනාංකය. “

ඉදිරි කෙටි කාලයක් ඇතුළත මේ රට අපි ගලවා ගත්තේ නැත්නම් මේ සාපරාධී කල්ලියෙන් මේ රටේ අපේ දරුවන්ට අනාගතයක් ඉතුරු වෙන්නේ නෑ. ඔබේ හැකියාවෙන් ඔබ ගොඩනැගිලා තියෙන්නේ. ඔබ උපයාගත්ත ශක්තිය තමයි තියෙන්නේ මෙතන. එවැනි උපයාගත්ත දෑ තිබෙන පිරිස් වෙතින් රට ගොඩනැගෙනවා නම් මේ රට ඔදවත්, තෙදවත් රටක් වීම වලක්වන්න බෑ කාටවත්ම.

අන්න ඒ සඳහා අපි සැවොම මේ උත්සාහය දරමු කියන ආදරණීය පණිවිඩය ඔබට ඉදිරිපත් කරමින් ජනවාරි මාසයේදී අපි බලාපොරොත්තු වෙනවා රට ගොඩනගන වැඩපිළිවෙළක් සමග බලගතු කණ්ඩායමක් මේ රටට ඉදිරිපත් කරන්න.”සෑම ක්ෂේත්‍රයකම ඒ මහා ප්‍රවාහයට ඒ මහා නැගිටීමට, ඒ මහා පරිවර්තනයට සාක්ෂිකරුවෙකු හැටියට, සහායකයෙකු හැටියට, ඒ වගේම නායකයෙකු හැටියට සහභාගී වන ලෙස පාඨලී චම්පික රණවක මහතා ඇරයුම් කළේය.

මේ අවස්ථාවට එක් වූ 43 සේනාංක නීතීඥ එකමුතුවේ නීතීඥ ශිරාල් ලක්තිලක මහතා

“අපි මේ වැඩපිළිවෙළ ගොඩනගන්නේ අපි කාටත් හුරුපුරුදු පක්ෂයක නීතිඥ සංවිධානයක් ගොඩනගන්නට නෙවෙයි. අපි මෙතන ඉන්න සියලු දෙනා මගේ හිතවතුන් හිතවතියන් අපි දන්නවා හැම පක්ෂයකටම නීතිඥ කණ්ඩායමක් ඉන්නවා. නමුත් හැම පක්ෂයකටම නීති කණ්ඩායමක් හිටියට ඒ නීතිඥ කණ්ඩායම ක්‍රියාත්මක වෙන්නේ ඡන්දෙ කාලෙකට විතරයි. බොහෝ දුරට. ඒ ඡන්දෙ කාලේ හමාර වුණාට පස්සේ බලයට ආවා එක විදිහක්, බලයට නාවොත් තව විදියක් හැටියට අපේ අත්දැකීම් තියෙනවා. ඒ අත්දැකීම් පෙරදැරි කරගෙන පහුගිය අවුරුදු තිහක විතර කාලයක් මේ නීතිඥ සංගම් ගොඩනගපු, හුඟක් දැවැන්තයෝ මට පේනවා මේ සභාවේ ඉන්නවා. නමුත් 43 සේනාංකය අද ඔබට ආරාධනා කරේ, එවැනි ක්‍රියාවලියකට සහභාගී වෙන්නට නෙවෙයි. අපි ඔබට ආරාධනා කරන්නේ ජාතික නීති ප්‍රතිසංස්කරණය සඳහා වන නීතිඥ එකමුතුවකට ගොනු වෙන්න කියලා.

අපි ජීවත් වෙන්නේ දරුණු අර්බුදයක මුවවිට බව අපි සියලු දෙනාම සාක්ෂරතාවයක් තියෙන සියලු දෙනාම දන්නවා. එවැනි තත්ත්වයක් තුළ හුඟ දෙනෙක් අද කතා කරනවා අර පෙර පරිදි ආණ්ඩුව පෙරළන්න. තවත් ආණ්ඩුවක් ගොඩනගන්න. අපේ දැක්ම අනුව හුදු බල පෙරළියකින් ආණ්ඩු මාරුවකින් මේ ප්‍රශ්නයට මුහුණ දෙන්න බෑ කියලා අපි විශ්වාස කරනවා. අපිට අවශ්‍ය වෙනස පිළිබඳව ඒකමිතියක් ඇති නොකරගෙන අපිට මේ ලෝකය එක්ක අපි සම්බන්ධ වෙන්නේ කොහොමද කියලා හිතන්නේ නැතුව මම හිතන්නේ නෑ අපි මේ ඉන්න සියලු දෙනාම එකට එකතු වෙලා ඊළඟ ආණ්ඩුවේ බලය පිහිටෙව්වත් මමත් මෙතන ඉන්න හුඟ දෙනෙක් සම්බන්ධ වුණු යහපාලන ආණ්ඩුවේ අත්දැකීමම ලබන්නට පුළුවන් පස්සේ දැන් මට හුඟ දෙනෙක් විවේචනය කරනවා වගේ මොකක්ද කරේ කියලා අහන්නත් පුළුවන්. ඒ වගේමයි මේ ආණ්ඩුව ඇවිල්ලා ඇතිවෙච්ච අත්දැකීම් දිහා බැලුවම දියසේන කුමාරයෙක් ගොඩනගන්නට අපි උත්සාහ කරා මම නෙමෙයි අපේ සමාජය නමුත් ඒ තුළින් ඇතිවෙලා තියෙන ප්‍රතිඵලයත් අපි දන්නවා.

ඒ නිසා අපේ හිස් තුළ අපේ මනස තුළ දැවැන්ත දේශපාලනික රික්තයක් අද ජනනය වෙලා තියෙනවා. එසේ ජනනය වෙලා තියෙන තත්ත්වයක් තුළ අපි අලුත් ආරකට දේශපාලනය කළ යුතුයි. අලුත් ආරකට අපි ප්‍රතිපත්තු ගැන කතා කළ යුතුයි. මොකක්ද අපි නීතිඥ ප්‍රජාව විතරක් අරගත්තොතින් අපි ඉස්සරහ තියෙන ඇත්ත තත්වය. අපි දන්නවා ලංකාවේ දූෂණය වෙනවා. ඒ දූෂණය නීතිය, ව්‍යවස්ථාව යම් ප්‍රමාණයකට ආධාර වෙලා තියෙනවා. මේ පහුගිය අවුරුදු හැත්තෑවෙදිම. ඒ වගේම අපි දන්නවා අක්‍රමිකතා සිදුවෙනවා. නාස්තිය සිදුවෙනවා. මං උදාහරණ දෙන්න ඕන්නෑ. ඔබ තාම සවිඥානිකයි මේ පිළිබඳව. නමුත් ඒ හැම එකටම නීතිය පැත්තෙන් ගත්තත් ඒකට ප්‍රශ්නයක් නෑ. අපි නීතියෙන් දායක වෙලා තියෙනවා. ආර්ථිකය ගත්තත් එහෙමයි. සමාජ සංවර්ධනය පිළිබඳව ගත්තොත් විතරයි අපි සමාජ දර්ශක අතින් ආසියාවේ එහෙම නැත්නම් දකුණු ආසියාවේ ඉහළ තැනක ඉන්නේ.

ඒ නිසා අපි දන්නවා අපේ ව්‍යවස්ථාව පිටිපස්සේ තියෙන චින්තනය පසුගාමී කියලා. විසිවෙනි සංශෝධනය දිහා බැලුවත් විසිවෙනි සංශෝධනය සම්බන්ධයෙන් ඇති වෙච්ච නෛතික සංවාදය දිහා බැලුවත් අපේ චින්තනය පසුගාමී. නීති පද්ධතිය දිහා බැලුවත් නීති පද්ධතිය තුළ තියෙන නීති දිහා බැලුවත් ඒවා පිටුපස තියෙන චින්තනය පසුගාමී. යුක්තිය පසතලීම දිහා බැලුවත් ඒ යුක්තිය පසතලීම පිළිබඳව ඊට පිටුපස තියෙන චින්තනය පසුගාමී ඒ වගේම අධිකරණ පරිපාලනය දිහා බැලුවත් ඒ අධිකරණ පරිපාලනය පිටිපස්සේ තියෙන චින්තනය පසුගාමී. එවැනි තත්වයක් තුල මම හිතන්නේ, අපි හිතනවා නීතිඥවරුන්ට අධිකරණයෙන් එළියට ගිහිල්ලා කරන්නට තිබෙන කාර්යභාරයක් තිබෙනවා කියලා. නෛතික ප්‍රතිපත්ති සම්පාදනය පිළිබඳව.

අපේ අරමුණ වෙලා තියෙන්නේ ඔබ අපි ඔක්කොම එකතුවෙලා, සැබෑ ජනරජයක්, ගොඩනගන්නට අපි කටයුතු කළ යුතුයි. සැබෑ ජනරජයක්. ඒ ජනරජය තුළ ප්‍රජාතන්ත්‍රවාදයත්, සමානතාත්මතාවයත් යුක්තියත් කාර්යක්ෂමතාවයක් තිබිය යුතුයි. එක පැත්තක ජනරජයක් හදලා අපිට වැඩක් නෑ. ධනය බෙදන ජනරජයක් හෝ ධනය හම්බ කරන් නැති ජනරජයකුත් අපිට වැඩක් නෑ. ඒ සැබෑ ප්‍රායෝගික සිහිනය දකින්නට අපිත් එක්ක එකතු වෙන්න” යනුවෙන් ලක්තිලක මහතා ඉල්ලීමක් කළේය.