Category: සුපිරි News

පවතින වර්ෂාව සහිත කාලගුණය පහව යාමෙන් අනතුරුව සිදුවිය හැකි ඩෙංගු ව්‍යාප්තිය මර්දනයට වහාම සූදානම් වන්නැයි ජනාධිපති ගෝඨාභය රාජපක්ෂ මහතා සහ අග්‍රාමාත්‍ය මහින්ද රාජපක්ෂ මහතා ආණ්ඩුකාරවරුන්ට සහ පළාත් පාලන ප්‍රධානීන් ඇතුළු සෞඛ්‍ය බලධාරීන්ට උපදෙස් දෙති.

සෑම වසරකම ඩෙංගු රෝගීන් වැඩිම සංඛ්‍යාව බස්නාහිර පළාතෙන් වාර්තා වෙයි. වෙනත් ප්‍රදේශවලවල සිට මේ පළාතට දෛනිකව විශාල පිරිසක් පැමිණෙති.  මොවුන් වාහකයන් ලෙස පිටව යාම වැළැක්විය හැක්කේ බස්නාහිර පළාතට ප්‍රමුඛත්වය දී ඩෙංගු මර්දනය කිරීමෙන් බව ජනාධිපතිතුමා පෙන්වා දෙයි. ඒ සඳහා පළාතේ සියලු පලාත් පාලන ආයතන සෞඛ්‍ය අංශ සහ පරිසර පොලීසිය සක්‍රීයව ක්‍රියාත්මක විය යුතු බව ජනාධිපතිතුමා අවධාරණය කරයි.

ඉදිරි සැලසුම් සැකසීම පිණිස ඩෙංගු මර්දන ජනාධිපති කාර්ය සාධක බලකාය සමග අද (01) දහවල් ජනාධිපති කාර්යාලයේ පැවති විශේෂ සාකච්ඡාවේදී ජනාධිපතිතුමා මේ අදහස් පළ කළේය. 

පසුගිය වසරවලට සාපේක්ෂව මේ වසරේ පළමු කාර්තුව තුළ ඩෙංගු රෝගීන් සංඛ්‍යාව අඩුවී ඇති බව සෞඛ්‍ය අංශ පෙන්වා දුන්නේය. නොවැම්බර් සිට ක්‍රමවත්ව කසළ බැහැර කිරීම සහ කොවිඩ් මර්දනයට සමගාමීව පැවති ඇඳිරි නීති කාලසීමාවේ ජනතාව තම ගෙවතු පවිත්‍රව තබා ගැනීම ඊට හේතුවී තිබේ.  පළාත් අතර සංචරනය සීමා වීම ද තවත් සාධකයකි.

පාසල්, රෝහල්, රාජ්‍ය ආයතන, ආගමික ස්ථාන සහ ඉදිකිරීමේ වැඩබිම් කෙරෙහි වැඩි අවධානයක් යොමුකර පවිත්‍රතා කටයුතු කිරීමේ වැදගත්කම අවධාරණය කෙරිණ. සෞඛ්‍ය අංශ හා පළාත් පාලන ආයතන එක්ව ස්ථාන අධීක්ෂණය පරිසර පොලිස් ඒකකවලට පැවරේ. ඩෙංගු ව්‍යාප්තිය වැඩිවන ආකාරයෙන් ක්‍රියාකරන පිරිස්වලට එරෙහිව දැඩිව නීතිය ක්‍රියාත්මක කිරීමට ද උපදෙස් දෙනු ලැබිණ.

ඩෙංගු රෝගියෙකු රජයේ හෝ පෞද්ගලික රෝහලකට වාර්තාවූ වහාම ඒ පිළිබඳව ප්‍රාදේශීය  වෛද්‍ය නිලධාරීන් සහ මහජන සෞඛ්‍ය පරීක්ෂකවරුන් දැනුවත් විය යුතුය. අනතුරුව අදාළ ස්ථාන නොපමාව දූමායනය කොට  පවිත්‍ර කළයුතුය. ඩෙංගු මර්දනය පිළිබඳව මාධ්‍ය ඔස්සේ ජනතාව දැනුවත් කිරීම කෙරෙහි ද අවධානය යොමු කෙරිණ.

සතියකට වරක් ආණ්ඩුකාරවරුන් සහ පළාත් පාලන ආයතන ප්‍රධානීන් රැස්වී සෞඛ්‍ය කමිටු සැලසුම් පසුවිපරමට ලක් කරන ලෙසත්, සාර්ථකව ඩෙංගු මර්දනය කළ රටවල අත්දැකීම් ආදර්ශයට ගන්නා ලෙසත් ජනාධිපතිතුමා සහ අගමැතිතුමා නිලධාරීන්ට උපදෙස් දුන්හ.

ආණ්ඩුකාරවරු, පළාත් පාලන ආයතන  ප්‍රධානීහූ, ජනාධිපති ලේකම් පී.බී. ජයසුන්දර මහතා, අමාත්‍යාංශ ලේකම්වරු සහ ආරක්ෂක මාණ්ඩලික ප්‍රධානී ඇතුළු ත්‍රිවිධ හමුදාපතිවරු, වැඩබලන පොලිස්පති, සිවිල් ආරක්ෂක අධ්‍යක්ෂ ජනරාල් සහ සෞඛ්‍ය සේවා අධ්‍යක්ෂ ජනරාල් ඇතුළු නිලධාරීහූ සාකච්ඡාවට එක්ව සිටියහ

මී උණ රෝගය ව්‍යාප්තවීමේ වැඩි අවධානමක් පවතින බැවින් වසංගත රෝග විද්‍යා අංශයේ ප්‍රධාන වසංගත රෝග විද්‍යාඥ වෛද්‍ය සුදත් සමරවීර මහතා විසින් මහජනතාව මී උණ රෝගය පිළිබදව දැනුවත් කිරීමේ අරමුණින් “අවධානමට පෙර අවධානය” යනුවෙන් මාධ්‍ය නිවේදනයක් අද (01) නිකුත් කළා. එම මාධ්‍ය නිවේදනය සම්පූර්ණයෙන් මෙසේයි.

අවධානමට පෙර අවධානය!

යල කන්නයේ වී වගා කටයුතු ආරම්භ වී තිබීමත් රට පුරා පුරන් කුඹුරු අස්වැද්දීමට ඇති නැඹුරුවත් නිසා මී උණ රෝගය ව්‍යාප්තවීමේ ඉහළ අවධානමක් පවතී. එමෙන්ම මේ දිනවල පවතින වැසි සහිත කාලගුණික තත්ත්වය රෝගය තවදුරටත් ව්‍යාප්තවිමට හේතු වන බැවින් ජනතාව මී උණ රෝගය කෙරෙහි අවධානයෙන් සිටිම ඉතා වැදගත් වේ.

මී උණ රෝගය බැක්ටීරියාවක් මගින් සෑදෙන රෝගයකි. මීයන්, ඌරු මීයන්, මීගවයන්, ගවයන් වැනි සතුන්ට මෙම බැක්ටීරියා ආසාදනය ඇති විය හැකි අතර, එම සතුන්ගේ වකුගඩු ආශ්‍රිතව ජීවත් වන එම බැක්ටීරියාව මූත්‍රා සමග පරිසරයට නිදහස් වෙයි. කුඹුරු, දියකඩිති, දිය අගල් සහ ඔිවිටි වැනි ජලය රැදෙන ස්ථානවල මෙම බැක්ටීරියාව සජීවීව බහුල වශයෙන් රැදී තිබේ. ජලයේ රැදී සිටින බැක්ටීරියාව ශරීරයේ කැපුම්, සිරීම් තුවාල සහ ඇස්, කට වැනි සියුම් ශ්ලේෂ්මල පටල ඇති ස්ථානවල ගැටීමෙන් පුද්ගලයින්ගේ ශරීර තුලට ඇතුළු වෙයි.

මෙහි ප්‍රධාන රෝග ලක්ෂණ වනුයේ හදිසියේ ඇතිවන තද උණ හා මස්පිඩුවල විශේෂයෙන්ම බත්කෙණ්ඩ හා කොන්දේ තදබල වේදනාවයි. මෙයට අමතරව ඇස් රතුපැහැ වීම, වමනය, හිසරදය, මූත්‍රා තද පැහැයක් ගැනීම හා මුත්‍රා පිටවිම අඩුවීම වැනි රෝග ලක්ෂණ ද විය හැක.

කුඹුරු වගාවන් හා ඒ ආශ්‍රිත වෙනත් වගාවන් සිදු කරන ගොවීන් මෙම රෝගය ගැන දැනුවත් වන ලෙසත්, මීයන් බෝවීම පාලනය කිරිමට යොදාගන්නා පාරම්පරික හා නවීන ක්‍රම මගින් කුඹුරු ආශ්‍රිත මී ගහනය පාලනය කර ගැනිමට කටයුතු කරන ලෙසත්, රෝගකාරක බැක්ටීරියාවරැදී තිබීමට ඉඩ ඇති ජලය එක් රැස්වන ස්ථාන අවම කිරිමටත්, බැක්ටීරියාව ශරීර ගත විය හැකි සීරීම්, කැපුම් තුවාල, වතුරට ඔරොත්තු දෙන සැරහුවමකින් ආවරණය කිරීමටත් වගබලා ගැනීම මගින් රෝගය ඇතිවීම වළක්වා ගත හැක.

එමෙන්ම මී උණ බහුලව පවතින ප්‍රදේශවල කුඹුරු ගොවිතැන්වල නිරත අවධානම් කාණ්ඩ සදහා ලබාදෙන ඖෂධය ලගම පිහිටි සෞඛ්‍ය වෛද්‍ය නිලධාරී කාර්යාලයෙන් ලබාගැනීමෙන් මෙම රෝගය ඇතිවීම වළක්වා ගත හැක. මෙම ඖෂධය ලබාගත යුත්තේ සතියකට එක්වරක් පමණි.

මෙම රෝගය වැළදුන විට රෝගයේ මුල් අවධියේ දී ප්‍රතිජීවක ඖෂධ මගින් ඉතා සාර්ථකව සුව කළ හැක. එබැවින් ඉහත ලක්ෂණ ඇත්නම් වහාම වෛද්‍ය ප්‍රතිකාර සදහා රජයේ රෝහලකට හෝ සුදුසුකම් ලත් වෛද්‍යවරයෙකු වෙත යොමුවීමටත්, ඔබ ඉහත ස්ථාන ආශ්‍රිතව ක්‍රියාකාරකම්වල යෙදුන බව වෛද්‍යවරයාට දැන්වීමටත් වගබලා ගත යුතුය. නිසි වෛද්‍ය ප්‍රතිකාර ලබාගැනීම ප්‍රමාදවීමෙන් ශරීරයේ අභ්‍යන්තර ඉන්ද්‍රියයන්ට බලපෑම් ඇති වී අසාධ්‍ය තත්ත්වයට හෝ මරණයට පත්විය හැක.

ඔබ පුරන් කුඹුරක ක්‍රියාකාරකම්වල යෙදෙන්නේ නම් මෙම රෝගය වැළදීමට වැඩි අවදානමක් ඇති බව සිහි තබා ගන්න. මේ සදහා ඔබට අවශ්‍ය සෞඛ්‍ය උපදෙස් ලබාගැනීමට ප්‍රදේශයේ සෞඛ්‍ය වෛද්‍ය නිලධාරී හෝ මහජන සෞඛ්‍ය පරික්ෂක මහතා හමුවන්න.

මෙරටට කිරි ගවයන් ආනයනය කිරීමට ආණ්ඩුව ගෙන ඇති තීරණය ගැන සමාජයේ දැඩි අවධානයක් යොමුව තිබෙනවා. මේ අතර ජනතා විමුක්ති පෙරමුණ විසින් අද (01) දින පැලවත්ත ප්‍රධාන කාර්යාලයේ සංවිධානය කර තිබූ මාධ්‍ය හමුවේද මේ සම්බන්ධයෙන් සාකච්ඡාවට ලක් වුණා. පහත පළ වන්නේ එම සාකච්ඡාවේදී දැක් වූ අදහස්වල කිිසිදු වාරණයකට ලක් නොවූ සම්පූර්ණ වාර්තාවයි.

කිරි ගවයන් ගෙන්වූයේ තාක්ෂණික අනුදැනුම මත නොව දේශපාලන අධිකාරියේ වුවමනාව මතයි

වෛද්‍ය කේ.ඩී. නිමල් චන්ද්‍රසිරි මහතා, හිටපු අධ්‍යක්ෂ ජනරාල් – සත්ව නිෂ්පාදන හා සෞඛ්‍ය දෙපාර්තමේන්තුව

1935 පමණ කාලයේ සිට මේ රටට කිරි හරකුන් ආනයනය කිරීම සිදුව තිබෙනවා. රටේ කිරි අවශ්‍යතාවයෙන් මෙරට තුළ නිෂ්පාදනය කෙරෙන්නේ 35%ක් පමණක් වන නිසා දේශීය කිරි නිෂ්පාදනය ඉහළ නැංවීම ඉලක්ක කරගත් සතුන් ආනයනය කිරීම ගැටලුවක් වන්නේ නැහැ. නමුත් ගැටලුව වන්නේ ඒවා විද්‍යාත්මක පදනමකින් සිදු නොවී දේශාපාලන හා දූෂිත වුවමනාකම් වෙනුවෙන් සිදුවීමයි. 

කිරි හරකුන් ආනයනය කිරීමේ ආසන්නතම ව්‍යාපෘතිය ඇරඹෙන්නේ 2012 වසරේදීයි. එම වසරේදී සතුන් 508ක් ආනයනය කළා. 2013 වසරේදී 1502ක්ද 2015දී 2495ක්ද 2017දී 5024ක්ද වශයෙන් සතුන් ආනයනය කරනු ලැබුවා. මේ ආනයනයේ අරමුණ විදිහට ප්‍රකාශයට පත් කළේ දේශීය කිරි නිෂ්පාදනය වැඩි කිරීම හා ගොවි ජනතාවට උසස් තත්වයේ පැටවුන් ලබාගැනීමයි. 

නමුත් 2012 මේ සතුන් ආනයනය කෙරෙන්නේ විධිමත් තාක්ෂණික හා විද්‍යාත්මක ඇගයීමකින් තොරව ගන්නා ලද දේශපාලන තීන්දුවක් අනුවයි. මේ කිරි දෙනුන් ලංකාවට පැමිණීමෙන් පසු දරුණු ඉරණමකට මුහුණ දුන්නා. මේ සතුන් ආනයනය කරන විට ගැබ්ගෙන සිටියා. පැටවුන් ලැබීමට ආසන්නව සිටියා. ඇත්තටම පැටවුල් ලැබීමට මෙතරම් ආසන්න සතුන් ප්‍රවාහනය කිරීම පවා නොකළ යුතුව තිබුණා.

2015 ජූලි ගෙන්වන ලද සතුන් මාස දෙකක සිට පැටව් දාන්න පටන් ගත්තා. දෙසැම්බර් 31 වන විට පැටවුන් 107ක් මිය ගියා. මාස 1 1/2ට වැඩි කාලයක් ජීවත් වූ පැටවුන් සිටියේ එකයි. 2018 වසරේ ඉපදුණු පැටවුන් 1654කින් 43.7%ක් මිය ගියා. මෙසේ ආනයනය කරන ලද කිරි දෙනුන්ට ලෙඩරෝග රැසක්ද තිබුණා. 187දෙනෙකුට බුරුලු ප්‍රදාහය වැළඳී තිබුණා. කුර ලෙඩ ආදී රෝගී තත්වයන් තිබුණා. කිරි හා පැටව් ලබාගැනීම අරමුණු කළත් ඒ අරමුණු ඉටු වුණේ නැහැ. 

2017 ගෙන්වන ලද සතුන් ලබා දුන්නේ ඊට අදාළ පහසුකම් ඇති ගොවිපළවලට නෙමෙයි. මේ සතුන්ට තණකොළ විශාල ප්‍රමාණයක් අවශ්‍යයි. සතුන් 50ක් සිටින ගොවිපළකට අක්කර 09ක පමණ තෘණ භූමියක් අවශ්‍යයි. වසර පුරා තෘණ ලබාගත නොහැකිනම් තෘණ සංරක්ෂණය කිරීමේ සයිලේජ් හැදීමේ පහසුකම් අවශ්‍යයි.

සතුන් 50ක් සිටින ගොවිපළකට නම් ජලය ලීටර් මිලියන 1.1ක් නොකඩවා සැපයිය යුතුව තිබෙනවා. මොකද කිරිවල වැඩිපුර අන්තර්ගත වන්නේ ජලයයි. සාන්ද්‍ර ආහාර සැපයිය යුතුයි. ගොම හා මූත්‍රා කිලෝ 2500ක් දිනකට බැහැර කිරීමේ පහසුකම් තිබිය යුතුයි. මෙම අවශ්‍යතා සම්පූර්ණ කිරීමට කිරි ගවයින් ලබාගත් බොහො දෙනෙකුට හැකියාව තිබුණේ නැහැ.

මෙම තත්වයත් සතුන් විශාල පිරිසක් මියයාමට හේතු වුණා. කිරි දෙනුන් ලබා ගත් අයගේ අපේක්ෂාව වුණේ දිනකට කිරි ලීටර් 25ක් ලබාගැනීමයි. නමුත් මේ යටතේ දෙනුන් ලබා ගත් සෑම ගොවිපළක්ම පාහේ අසාර්ථක වී තිබෙනවා. වත්මන් ආණ්ඩුවත් පසුගිය ආණ්ඩුව ගෙන්වූ සමාගමෙන්ම එම වර්ගයේ දෙනුන්ම නැවත වරක් ආනයනය කිරීමට යාම විමතිය දනවනවා.

කිරිගවයන් ආනයනය කළ යුත්තේ පිළිගත් විද්‍යාත්මක ක්‍රමවේදයකට අනුවයි

බීවීඩී වෛරස් රෝගය සලකන්නේ ‘කිරි කර්මාන්තයේ නිහඬ මාරයා’ ලෙසයි. මෙම රෝගය කිරි දෙනුන් ආනයනය සමග ලංකාවට පැමිණි බවට වාර්තා වනවා. මීට කලින් ලංකාවෙන් එම රෝගය වාර්තා වෙලා තිබුණේ නැහැ. පැඩියෝලා හෙපටිකා වැනි මිනිසුන්ටද වැළඳෙන රෝගී තත්වයන්ද පැමිණ තිබෙනවා. නිසි විද්‍යානුකූල පදනමකින් තොරව සතුන් ආනයනය කිරීම නිසා මෙම තත්වය ඇති වුණා. 

එසේම කිරි දෙනුන් ආනයනය කර ගොවීන්ට ලබාදුන්නත් මේ සතුන් හැදීම සම්බන්ධ ප්‍රමාණවත් දැනුවත්භාවයක් ගොවීන්ට ලබාදීමට ආණ්ඩුව කටයුතු කළේ නැහැ. එසේම ප්‍රාදේශීය පශු වෛද්‍ය නිලධාරීන් පවා මේ පිළිබඳව හොඳම අවබෝධයක නොසිටි නිසා ගොවීන්ට ඔවුන් මගින්ද උපදෙස් ලබා ගත හැකි වූයේ නැහැ. සතුන් විශාල වශයෙන් මියයාමට මේ තත්වයද හේතු වුණා. 

ඕස්ටේ්‍රලියාවේ මෙම කිරි දෙනුන් ඩොලර් 500 සිට 3000 දක්වා මිල ගණන්වලට ඉන්නවා. අපි ආනයනය කළේ හොඳම ගුණාත්මක සතුන්දැයි සැක හිතෙනවා. මේ තරම් ප්‍රමාණයක් සතුන් මියයාමට හා නිරෝගී පැටවුන් බිහිකර ගැනීමට නොහැකි වූයේ ඒ නිසාද කියන එක ප්‍රශ්නයක්. එසේ තිබියදී නැවතත් එම සමාගමෙන් මෙවැනි බාල වර්ගයේ සතුන් ගෙන්වීමට සියලු දෙනා විරුද්ධයි. සත්තු ආනයනයට අපි විරුද්ධ නැහැ. ආනයනය කරන්න ඕනෑ. එය සිදු කළ යුත්තේ පිළිගත් විද්‍යාත්මක ක්‍රමවේදයකට අනුවයි. 

අප සතුන් ආනයනය කළ යුත්තේ රටේ අභිජනන ප්‍රතිපත්තියට අනුකූලවයි. විද්‍යානුකූල පදනමකින් යුතුවයි. රටේ විවිධ දේශගුණ කලාපවලට ගැලපෙන පරිදි සතුන් අභිජනනය කළ යුතුව තිබෙනවා. වියට්නාමය වැනි තැනක මෙය සාර්ථකව සිදු කරනවා. සෞම්‍ය කලාපයේ සතුන් සමග ඝර්ම කලාපයේ සතුන් දෙමුහුන් කර සතුන් නිෂ්පාදනය කළ යුතුයි.

ආනයනය කරන සතුන් රජයේ මැදිහත්වීම ඇති මධ්‍යස්ථානයක තුළ තබාගනිමින් ඔවුන්ගෙන් බෝකරන පිරිසක් ගොවීන් වෙත බෙදාදීමට පියවර ගත යුතුව තිබෙනවා. නමුත් අඩුපාඩු තිබියෙදීම බෙලාඞ් රූරල් ඩිවලොප්මන්ට් සමාගම පසුගිය රාජපක්ෂ ආණ්ඩුව, එජාප ආණ්ඩුව හා වත්මන් ආණ්ඩුව සමග ගනුදෙනු කරමින් සිටිනවා. මේ සමාගම විසින් ලබාදුන් සතුන් ගුණාත්මක බවින් අඩු බැවින් මේ ආනයන ගනුදෙනු අතිශය සැකසහිතයි.

පසුගිය ආණ්ඩුව සහ වත්මන් ආණ්ඩුව කිරි ගවයන් ගෙන්වන්න එකම සමාගම තොරාගැනීමේ රහස මොකක්ද?

අපි දන්නවා, පසුගිය බැසිල් රාජපක්ෂ අමාත්‍යවරයාගේ කාලයේ ආරම්භ කළ පසුගිය ආණ්ඩුවත් සිදුකළ තවමත් පවත්වාගෙන එන කිරි දෙනුන් ආනයනය කිරීමේ ව්‍යාපෘතිය මුළුමනින්ම අසාර්ථකයි. එසේ තිබියෙදීත් වත්මන් ආණ්ඩුව එය ඉදිරියට ගෙනයාමට උත්සාහ කරමින් සිටිනවා.

මෙම කිරි දෙනුන් ආනයනය කිරීමේදී නිරෝධායනයකට ලක් කළේ නැහැ. මේ සතුන් ආනයනයට අදාළ විගණන වාර්තා මගින්ද ආනයනයට අදාළ ප්‍රශ්න සහගත කරුණු පෙන්වාදී තිබුණා. මේ දෙනුන්ට අදාළ එන්නත් වාර්තා කැඳවීමටද නිර්දේශ කර තිබුණා. මේ සතුන්ට අදාළව ලබා ගත් සම්පල් එංගලන්තයේ පර්යේෂණාගාරවලදීද රෝග සහිත බව වාර්තා කර තිබුණා. ආණ්ඩුව ඒ කිසිවක් සැලකිල්ලට ලක් කළේ නැහැ.

ආණ්ඩුව ඍජුව රුපියල් ලක්ෂ 79,000ක් මේ ආනයන මගින් රටට අහිමි කළා. 2018 මැයි මාසයේදී එජාප ආණ්ඩුව ඩො.මි. 1.03ක්, ඒ කියන්නේ රු. කෝටි 131කට වැඩි මුදලක් ඔස්ටේ්‍රලියාවේ බෙලාඞ් සමාගමට ගෙව්වා. විදේශ සම්පත් දෙපාර්තමේන්තුව මෙම මුදල් ගෙවන ලද්දේ අයවැයෙන් මුදල් වෙන්නොකර තිබියෙදීයි. මේ මුදල්වලට අනුව කිසිදු සතෙක් ලංකාවට ආනයනය කෙරුණේ නැහැ. එවකට හැරිසන් අමාත්‍යවරයා යටතේ විශාල වංචාවක් සිදුවී තිබෙනවා. අපි මේ පිළිබඳව ජාතික විගණන පනත යටතේ පරීක්ෂණයක් ඉල්ලා තිබෙනවා. නමුත් තවමත් ප්‍රතිචාරයක් නැහැ. 

දැන් වත්මන් ආණ්ඩුවත් මේ ව්‍යාපෘතිය කරගසා ගෙන යන බව පේනවා. මේ ඕස්ටේ්‍රලියානු බෙලාඞ් සමාගම අපට බාල බඩු දී තිබෙනවා. ආනයනය කිරීමෙන් රටටත් මිලදී ගැනීමෙන් ගොවීන්ටත් විශාල පාඩු සිදුවී තිබෙනවා. දැනගන්නට ඇති අන්දමට මේ කිරි දෙනක් ඕස්ටේ්‍රලියානු ඩොලර් 1000ක පමණයි. ඒ කියන්නේ රුපියල්වලින් 1,21,000ක් පමණ මුදලක්.

නමුත් ආණ්ඩුව මේ කිරි දෙනුන් ලක්ෂ 5,20,000ක පමණ අගයක් ලබාදී සමාගමට ගෙවා තිබෙනවා. ගොවියන්ට එක් කිරි ගවයෙක් රුපියල් ලක්ෂ දෙකට දීලා රුපියල් ලක්ෂ 03ක සහනාධාරයක් ආණ්ඩුවෙන් ගෙවන බව කිව්වා. මෙමගින්ද විශාල වංචාවක් සිදුවී ඇති බව පේනවා. මේ අමතර මුදල් මැති ඇමතිවරුන්ට කීය ගානේ ලැබුණද කියලා හොයන්න ඕනෑ. මේ රස මේ විදියට වංචා සිදුවෙලා තිබෙන බව දැන දැනත් ගෝටාභය රාජපක්ෂ මහත්තයගේ ආණ්ඩුවත් නැවත වරක් එම සමාගමෙන්ම, එම නිලධාරීන්ම සම්බන්ධ කරගෙන කිරි ගවයින් 2500ක් ගෙන්වන්න කටයුතු කරමින් ඉන්නවා. මේක බරපතල කාරණයක්.

මේ කිරි ගවයින් මිලදී ගත්ත ගොවියන්ට විශාල පාඩුවක් සිදුවෙලා තිබෙනවා. ඔවුන්ට කිසිදු වන්දි මුදලක් නැහැ. මේ ගවයින් රක්ෂණය කරලා නැහැ. ඒ නිසා ගොවියන්ට කිසිදු වන්දි මුදලක් ලැබී නැහැ. ඔවුන් විශාල අර්බුදයකට මුහුණ දීලා. 

අපේ රටට ගැලපෙන නිෂ්පාදන ප්‍රතිපත්තියකට යා යුතුයි. කිරි නිෂ්පාදනය අදාළ තීන්දු ගැනීමේදී සහය ලබාගැනීමට අපේ රටේ විද්‍යාඥයින්, පශු වෛද්‍යවරුන් සිටිනවා. නමුත් ඕස්ටේ්‍රලියාව අපේ රටේ කිරි වෙළඳපොළ නැති කර ගැනීමට කැමති නැහැ. ඒ නිසා ඔවුන් අපේ රටේ කිරි කර්මාන්තය විනාශ කිරීමට සූදානම් වනවාදැයි සැක උපදිනවා. අපේ රට කිරිවලින් ස්වයංපෝෂණය කිරීම ඔවුන්ගේ අපේක්ෂාව නෙමෙයි. දැන දැනම ආණ්ඩු තුනක් මගින් මෙම අසාර්ථක ව්‍යාපෘතිය ඉදිරියට ගෙනයාම තුළ විශාල වංචාවක් සිදුවන බව පේනවා. මෙම තත්වය අපි දැඩිව හෙළා දකිනවා.

කොවිඩ්-19 වෛරසය ආසාදනය වූ පුද්ගලයෙකු අද (01) පෙරවරුවේ දී මිය ගිය බව ෙසෟඛ්‍ය සේවා අධ්‍යක්ෂ ජනරල්වරයා විසින් තහවුරු කළ බව රජයේ ප‍්‍රවෘත්ති දෙපාර්තමේන්තුව විසින් අද පෙ.ව 08.20ට නිකුත් කළ මාධ්‍ය නිවේදනයක සදහන්වේ.

මෙසේ මිය ගොස් ඇත්තේ කුවේට් රාජ්‍යයේ සිට පැමිණ හෝමාගම රෝහලේ දැඩි සත්කාර ඒකකයේ ප‍්‍රතිකාර ලබමින් සිටි 45 වියැති පුද්ගලයෙකු බවත් එහි වැඩි දුරටත් සදහන් වේ.

මෙම මරණයත් සමග ලංකාවේ කොවිඩ්-19 ආසාදනය වීමෙන් මියගිය පුද්ගලයින් ගණන 11 දක්වා ඉහළ ගියේය.

පසුගිය සතියේ රජය විසින් ප්‍රකාශයට පත් කළ රුපියල් 55ක පාලන මිල හමුවේ බඩඉරිඟු ලබාගත නොහැකි වීම නිසා ජාඇල පිහිටි සෞඛ්‍ය අමාත්‍යංශයට අනුබද්ධ අර්ධ රාජ්‍ය ආයතනයක් වන ති‍්‍රපෝෂ සමාගම වසා දමා ඇත.

එම සමාගමේ ප්‍රකාශකයෙකු සදහන් කළේ කම්හල වසා දමා සති දෙකක පමණ කාලයක් ගතව ඇති බවත් 300ක් පමණ වන සේවකයින් මේ නිසා රැකියාව අහිමිවීමේ අවදානමක සිටින බවත්ය.

ත්‍රිපෝෂ සමාගම වසා දැමීමට හේතු පැහැදිලි කළ සමාගමේ උසස් නිලධාරියෙකු මෙසේ සදහන් කළේය.

‘ත‍්‍රිපෝෂ සමාගම සෞඛ්‍ය අමාත්‍යංශයට අනුබද්ධ අර්ධ රාජ්‍ය ආයතනයක් වන සමාගමක්. ත‍්‍රිපෝෂ ගැබිණි මවුවරුන්ට හා ළදරුවන්ට නොමිලේ දෙන ආහාරයක් වන අතර සුපෝෂ අතිරේක ආහාරයක් ලෙස වෙළද පොළේ ඉහළ අලෙවියක් තිබූ භාණ්ඩයක්. අපි මාසයකට සාමාන්‍යෙයන් රුපියල් මිලියන 75ක පමණ සුපෝෂ අලෙවි කළා.

ප්‍රශ්නය පැන නැගුණේ මැයි මස මුල් සතියේ බඩඉරිඟු සදහා රුපියල් 55ක පාලන මිලක් නියම කරන්නට රජය පියවර ගැනීම සමගයි. එහෙත් ඒ වනවිට ත‍්‍රිපෝෂ ආයතනය ටෙන්ඩර් කැදවා බඩඉරිගු මිලදී ගනිමින් සිටියේ කිලෝවක් රුපියල් 58ක් වැනි මිලකටයි. පාලන මිල නියම කිරීමත් සමග එම මිලට ගැළපෙන පරිදි යළි ටෙන්ඩර් කැදවීමට අප සිදු වුණා.

ඒත් මේ වනවිට දෙවතාවක් ටෙන්ඩර් කැදවූ නමුත් තවමත් කිසිවෙකු රුපියල් 55 ට ආසන්න මිලකට ටෙන්ඩර් පත‍්‍රිකා ඉදිරිපත් කළේ නැහැ. අර්බුදය නිර්මාණය වුණේ මේ අනුවයි. පසුගිය සති දෙකක පමණ කාලයක සිට අපට නිෂ්පාදන සදහා බඩ ඉරිගු නැහැ.

ඒ නිසා නිෂ්පාදන ක්‍රියාවලිය සම්පූර්ණයෙන් නතර වෙලා තිබෙනවා. මේ තත්ත්වය දිගටම පැවතුණහොත් ඉදිරියේ දී ගැබිණි මවුවරුන්ට හා ළදරුවන්ට නොමිලේ ත‍්‍රීපෝෂ ලබාදීම නතර කිරීමට සිදු වෙිව්. ඒ වගේම සුපෝෂ හිගයක් නිර්මාණය වීමත් සිදුවිය හැකියි. මේ ගැන කඩිනම් අවධානය යොමු කරන්න කියලා අපි බලධාරීන්ගෙන් ඉල්ලා සිටිනවා.

ශ්‍රී ලාංකිකයින් 522 ක් විදේශයන් හී සිට වෛරසය ආසාදිතව මෙරටට පැමිණ තිබෙන බව සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මිය සෞඛ්‍ය අමාත්‍යාංශයේ දී අද දින (31) පස්වරුවේ පැවැති සාකච්ඡාවකදී හෙළි කළාය.

වැඩිදුරටත් අදහස් දැක් වූ සෞඛ්‍ය අමාත්‍යවරිය මෙසේ ද පැවසුවාය.

“අද මැයි මස 31 වනිදා. COVID-19 ආසාදිත රෝගීන් ප්‍රජාව තුලින් වාර්තා නොවීම පිළිබද රටක් විදිහට ඔබ අපට සතුටු විය හැකි කරුණක්. මේ අයුරින් මෙම වසංගතයෙන් රට බේරා ගැනීමට අතිගරු ජනාධිපතිතුමා අගමැතිතුමා ලබාදුන් දායකත්වය, සෞඛ්‍ය අංශ, ත්‍රිවිධ හමුදාව, පොලීසිය සිදු කළ අප්‍රතිහත කැපකිරීම මේ අවස්ථාවේ සදහන් කළ යුතුයි.  ජ්‍රජාව වශයෙන් ඔබ විසින් සෞඛ්‍ය අංශ ලබාදෙන උපදෙස් පිළිපැදීම ද මේ තත්ත්වය උදාවීමට හේතු සාධක වුනා. රට තුල කිසිදු ගමකින් නගරයකින් කිසිදු වෛරසය ආසාදිතයෙකු වාර්තා නොවන තත්ත්වයට අපට මේ රට ගෙන ඒමට හැකිව තිබෙනවා. මාධ්‍ය අංශ විසින් සිදු කළ සුවිසල් මෙහෙය ද මේ අවස්ථාවේ අපි විශේෂ ඇගයීමකට ලක් කරනවා.”

“අපට අද තිබෙන ප්‍රශ්ණය තමයි රෝගීන් විදිහට ශ්‍රී ලාංකිකයින් ලංකාවට පැමිණෙනවා. පැමිණෙන්නේ රෝගය හදාගෙන. මේ වන විට 522 ක් විදේශ රටවල දී රොගීන් වී ලංකාවට පැමිණ තිබෙනවා. කුවේට් රාජ්‍යයේ සිට පැමිණි 466 දෙනාගෙන් 330 ක්ම රෝගීන් ලෙසයි ලංකාවට පැමිණ තිබෙන්නේ. කටාර් රාජ්‍යයේ සිට පැමිණි 270 දෙනාගෙන් 150 ක් රෝගීන් විදිහට පැමිණි බවට මේ වන විට වාර්තා වී තිබෙනවා. කුවේට් රාජ්‍යයේ සිට පැමිණි 466 දෙනාම මේ වනවිට පළමු වටයේ PCR පරික්ෂණ වලට ලක් කර තිබෙනවා. ඔවුන් නැවත දින 10 කට පසු PCR පරික්ෂණ වලට ලක් කරනවා. ඒ අයගේ ශරීරය තුල රෝගය වර්ධනය වී නොමැති නම් ඒ පිරිසෙන් යම් පිරිසක් පසුව රෝගීන් විදිහට වාර්තා වීමට ඉඩ තිබෙනවා. ඒ වගේම කටාර් රාජ්‍යයේ සිටි පැමිණි 270 දෙනාගෙම PCR පරික්ෂණ සිදු කොට තිබෙනවා. 150 ක් මේ වන විට වාර්තා වුවත් අද දිනය ඇතුලත සියළු දෙනාගේම PCR පරික්ෂණ වාර්තා ලැබීමට නියමිතයි.”

“මේ වන වට අප රටේ රෝගීන් 801 ක් සම්පූර්ණ සුවය ලබා රෝහල් වලින් පිටව ගොස් තිබෙනවා. කුමන ආකාරයකින් හෝ ප්‍රජාව තුලට මෙම රෝගය පැතිරීම වැළැක්වීමට ගත හැකි සියළු ක්‍රියාමාර්ග ගන්නවා. ලංකා ඉතිහාසයේ වැඩිම මුදලක් අඩුම කාල සීමාවක් තුල ලබාදුන් කාලය ලෙස පසුගිය කාලපරිච්ඡේදය හැදින්විය හැකියි.”  

“COVID-19 නිසා පීඩාවට පත් වැඩිහිටි, ආබාධිත හා වකුගඩු දීමනා 794,421 කටත්, සමෘද්ධි සංවර්ධන දෙපාර්තමේන්තුව හරහා පවුල් 5,071,892 (පනස් ලක්ෂ හැත්තෑඑක්දහස් අටසිය අනූදෙකකටත්) වශයෙන් මේ සියල්ලේම එකතුව අප්‍රේල් මස රජය විසින් ලබාදුන් මුදල රුපියල් මිලියන 29,000 පමණ වෙනවා. මේ වනවිටත් මේ මුදල් බෙදා දෙමින් පවතිනවා.”

“ඇගලුම් කර්මාන්තවල සේවකයින්ට වැටුප් ලැබුනා ද නැද්ද යන්න නොසලකා ඇගලුම් ක්ෂේත්‍රෙයේ නියලී සියලු දෙනාටම රුපියල් 5000 දීමනාව ලබාදුන්නා. මෙතෙක් ඉතිහාසයේ එක පවුලකට එක ආධාරයක් පමණයි ලබාදුන්නේ. නමුත් රුපියල් 5000 සහනාධාරය ලබාදීමේ දී එක පවුලක අනු පවුල් ගණනාවක් සීටි නම් ඒ අයටත් රුපියල් 5000 ලබාදීමට රජය කටයුතු කළා.”

ශ්‍රී ලංකා මහජන උපයෝගිතා කොමිෂන් සභාවවෙතින් සේවා ලබාගැනීමේ දී හැකි සෑම අවස්ථාවකදීම ඔන්ලයින් ක්‍රමයට සම්බන්ධවන ලෙස පාරිභෝගික ජනතාවට හා අනෙකුත් සේවාලාභින්ගේ කොමිෂන් සභාව ඉල්ලා සිටී. විශේෂයෙන්ම විදුලි පාරිභෝගිකයින්ට කොමිෂන් සභාවේ කාර්යාලයට පැමිණිමකින් තොරව සිය පැමිණිලි විසදාගැනීම සදහා ඔන්ලයින් පහසුකම් සපයා ඇත. විදුලි පාරිභෝගිකයින්ගේ නොවිසදුනු පැමිණිලි පහත සදහන් ක්‍රම ඔස්සේ කොමිෂන් සභාව වෙත ඉදිරිපත්කල හැකි වේ.

• පැමිණිලි සතියේ දිනවල පෙව 8.30 සිට සවස සවස 4.30 දක්වා 0112 392 607 හෝ 0112392608 යන දුරකතන අංකවලට අමතා ඉදිරිපත්කල හැකි වේ.
• ·         0770126253 යන අංකයට වොට්ස්ඇප්, වයිබර් සහ ඉමෝ ඔස්සේ
• www.pucsl.gov.lk ඔස්සේ
• consumers@pucsl.gov.lk
• www.facebook.com/pucsl ෆේස් බුක් ඔස්සේ

විදුලිබල කර්මාන්තය හා ලිහිසි තෙල් වෙළදපොල නියාමනයට අදාල සේවා සදහා අදාල පාර්ශ්වකරුවන්ට දුරකතන අංක 0770126250 අමතා සේවා ඉල්ලීම ඉදිරිපත් කල හැකි වේ.

• සියළුම තොරතුරු ඉල්ලීම් info@pucsl.gov.lk ඊමේල් ලිපිනයට හෝ www.facebook.com/pucsl ෆේස් බුක් ඔස්සේ ඉදිරිපත් කලහැකි වේ. තොරතුරු ඉල්ලීම් හා අනෙකුත් සියළුම සේවා සම්බන්ධයෙන් වැඩිදුර විස්තර සදහා 0764271030 අමතන්න

ශ්‍රී ලංකා මහජන උපයෝගිතා කොමිෂන් සභාවේ සේවාව ලබාගැනීම සදහා අදාල නිලධාරීන් හමුවීම අත්‍යවශ්‍ය අවස්ථාවලදී ඒ සදහා කලින් දිනය හා වේලාව වෙන්කරවා ගැනීමටද පහසුකම් සලසා ඇත. ඒ සඳහා දුරකතන අංක 0112392607 හෝ 0112392608  මගින් අප ඇමතීමෙන් වේලාවක් වෙන්කරගත හැකිය. නැතහොත් info@pucsl.gov.lk  හෝ  www.facebook.com/pucsl ෆේස් බුක් ඔස්සේ නිලධාරීන් හමුවීම සදහා දින හා වේලාවන් වෙන් කර ගත හැකි වේ.  ඔබගේ ඉල්ලීමට අදාලව කටයුතු කරණ අංශය කඩිනමින් නැවත ඔබ අමතා හමුවීමක් සඳහා වේලාවක් ලබා දෙනු ඇත. නැතහොත් ඔන්ලයින් මගින් විමසා ඔබේ ගැටළුව නිරාකරණය කිරීමට සහාය වනු ඇත. 

වැඩිදුර තොරතුරු  සඳහා ආයතනික සන්නිවේදන අංශයේ අධ්‍යක්ෂ ජයනාත් හේරත් 0772943193 මහතා අමතන්න.

සටහන – ගජබා නාගහවත්ත

ජනාධිපති ගෝඨාභය රාජපක්ෂ මහතා පහුගිය අගහරුවාදා සංචාරක ඇමති ප්‍රසන්න රණතුංග ඇතුළු අමාත්‍යාංශ නිළධාරීන් කැදවා තිබුණේ සංචාරක කර්මාන්තය යළි නගා සිටුවීම ගැන සාකච්ඡා කිරීමටය.

ඇමති ප්‍රසන්න මේ රැස්වීමට ගියේ පෙර සුදානමක් ඇතිවය. ඔහු ඊට කළින් සතියේ සංචාරක කර්මාන්තයට සම්බන්ධ සියලු පාර්ශව මුණ ගැසී තිබුණි. ඔවුන් විසින් ප්‍රසන්නට ලබා දුන් ඉල්ලීම් ඇතුළත් ලිපි ගොනුවක් ද ප්‍රසන්න මේ සාකච්ඡාවට රැගෙන ගියේ ය.

‘ මේ කොරෝනා වසංගතය නිසා ලොකුම හානි වෙච්ච ක්ෂේත්‍රයක් තමයි සංචාරක කර්මාන්තය. සංචාරක කර්මාන්තය නගා සිටුවන්න මම මගේ ප්‍රතිපත්ති ප්‍රකාශයෙනුත් වැඩි අවධානයක් යොමු කළා. අපි මේ වෙලාවේ අලුතින් පටන් ගන්න ඕනේ. ඒ සදහා සංචාරක ක්ෂේත්‍රයේ අයව දිරිමත් කරන්න ආණ්ඩුව ලෑස්තියි‘ ගෝඨාභය කීවේය.

‘පාස්කු ප්‍රහාරයත් එක්ක බිද වැටුණ සංචාරක ව්‍යාපාරය ඔබතුමා ජනාධිපතිවරයා විදිහට පත්වීමත් එක්ක යන්තම් ඔළුව උස්සගෙන එනකොට තමයි මේ කොවිඩ් ප්‍රශ්නය ආවේ‘. ප්‍රසන්න කීවේය.

‘අපි දැන් රට විවෘත කරගෙන යන්නේ. කොරෝනා වසංගතය පාලනය කරගන්න පුළුවන් වුණත් හරි පරෙස්සමින් තමයි මේක කරන්න වෙන්නේ.‘ ගෝඨාභය කීවේය.

‘ඒක ඇත්ත සර්…. දැන් සමාජයෙන් පොසිටිව් අය හම්බ වෙන්නේ නෑ. අපිට දැන් රෝගීන් හම්බවෙන්නේ අපි වෙන්ව හදුනාගත් කණ්ඩායමකින්. මේ විදිහට සති දෙක තුනක් පරිස්සම් වුණොත් අගෝස්තු 01 වෙනිදා විතර වෙනකොට අපිට එයාර්පෝට් එක අරින්නත් පුළුවන්‘. වෛද්‍ය අනිල් ජාසිංහ කීවේය.

‘සර්.. අපි ඔබතුමාලා කියලා පැය 24 ක් ඇතුළත එයාර්පෝට් එක අරින්න ලෑස්තියි. සෞඛ්‍ය අංශ කියන විදිහේ මාර්ගෝපදේශ සියල්ල අනුගමනය කරමින් ම ‘ .ප්‍රසන්න දැඩි විශ්වාසයකින් කිවේය.

‘ඒක හොදයි ප්‍රසන්න. අපි හරිම වෙලාවට හරිම දේ කරමු‘. ජනපති ගෝඨාභය කීවේය.

‘සංචාරක ව්‍යාපාරයේ නිරත වෙලා ඉන්න හැමෝම එක්ක ම අපි පහුගිය සතියේ කථා කළා සර්. ඒ අය හැමෝම ඉල්ලන්නේ සහනයක් තමයි‘. ප්‍රසන්න කීවේය.

‘අපි හැමෝගැනම බලන්න ඕනේ. මිනිස්සු අමාරුවේ වැටුණාම ඒ ගැන නොබලන ආණ්ඩුවක් මොකටද? ඒක අපේ වගකීම‘. ගෝඨාභය කීවේය.

ඒ අනුව සංචාරක ක්ෂේත්‍රයේ නිරත සියලුම දෙනාට සහන සැලසීම සදහා වන කැබිනට් පත්‍රිකාවක් කඩිනමින් ඇමති මණ්ඩලයට ඉදිරිපත් කිරීමට ජනාධිපතිවරයා ඇමති ප්‍රසන්නට උපදෙස් දුන්නේය.

අගමැති මහින්ද දේශපාලනයට පිවිස වසර 50ක් සම්පූර්ණ වුයේ පහුගිය බදාදාය. අගහරුවාදා උදෑසන ප්‍රසන්න මහින්දගේ විජේරාම නිවසට ගොස් ඒ වෙනුවෙන් සුභ පැතුවේය.

‘සර්, මගේ තාත්තා තමයි මගේ දේශපාලන ගුරුවරයා. හැබැයි මගේ දේශපාලනයේ පරමාදර්ශී නායකයා ඔබතුමා…. ඔබතුමා නොඉන්න අපේ රට අද බෙදිලා වෙන්වෙලා ඉවරයි‘. ප්‍රසන්න මහින්දට සුභ පතමින් කීවේය.

‘ප්‍රසන්න මගේ ලගින් හිටියේ මම පැරදුණු වෙලාවේ. මට ඒක අමතක වෙන්නේ නෑ‘.. මහින්ද ඊට ප්‍රතිචාර දක්වමින් කීවේය.

නල්ලතන්නිය පොලිස් වසමට අයත් ලක්ෂපාන වලමලෙයි වත්තේ මන්දකට හසු වි මුදාගත් කළු කොටියා අද (29) උදැසන උඩවලව ඇත් අතුරු සෙවනේදි මිය ගිය බව නල්ලතන්නිය වනජිවි කාර්යයාලයේ නිලධාරින් ප්‍රකාශ කළා. 

එම වතු යායේ එළවළු වගා භුමියක දඩයම්කරුවන් විසින් අටවා තිබු මන්දකට කළු කොටියා හසු වි සිටි අතර උඩවලව ඇත් අතුරු සෙවනේ පශු වෛද්‍යවරුන් විසින් මන්දට හසු වි සිටි කොටියා නිර්වින්දනය කර මුදා ගැනීමට පියවර ගත්තා. වැඩිදුර ප්‍රතිකාර සදහා උඩවලව ඇත් අතුරු සෙවන පශු වෛද්‍ය රෝහල වෙත රැගෙන ගොස් ප්‍රතිකාර ලබමින් සිටියදි අද උදැසන කලු කොටියා මිය ගොස් තිබෙනවා.

හෙට, මැයි 30 සෙනසුරාදා නුවරඑළිය දිස්ත්‍රික්කය තුළ දවස පුරා ඇඳිරි නීතිය ක්‍රියාත්මක කරන බවත්  ඊයේ 28, බ්‍රහස්පතින්දා නිවේදනය කළ පරිදි මැයි 31, ඉරිදා දිවයිනේ සියලු දිස්ත්‍රික්කවල දවස පුරා ඇඳිරි නීතිය බල පැවැත්වෙන බවත් ජනාධිපති මාධ්‍ය අංශය අද ප.ව 7.45ට නිකුත් කළ නිවේදනක සදහන් වෙනවා.

එහි වැඩි දුරටත් සදහන් වන්නේ ජූනි 01 සඳුදා සිට ඇඳිරි නීතිය ක්‍රියාත්මක වන ආකාරය පිළිබඳව ඊයේ නිවේදනයේ සඳහන් නියමයන් නොවෙනස්ව පවතින බවයි.

අද (28) දින ප.ව 19.05 වන විට ශ්‍රී ලංකාවෙන් කොවිඩ්-19 ආසාදිතයින් 34 දෙනකු වාර්තා වූ බවත් ඒ අනුව ලංකාවේ සමස්ත කොවිඩ්-19 ආසාදිතයින් සංඛ්‍යාව 1503ක් දක්වා ඉහළ ගොස් ඇති බවත් සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ සදහන් වේ.

එහි දැක්වෙන්නේ මේ වන විට රෝහල්වල රෝගීන් 748 දෙනකු ප්‍රතිකාර ලබන බවත් 68 දෙනකු විමර්ශනය යටතේ පසුවන බවත්ය.

මේ වන විට සුවය ලබා ඇති රෝගීන් සංඛ්‍යාව 745ක් බවයි එහි වැඩි දුරටත් සදහන් වන්නේ.

කැනඩා හා ජැමෙයිකා අග්‍රාමාත්‍යවරුන් සහ එක්සත් ජාතීන්ගේ මහ ලේකම්වරයා විසින් සංවිධාන කරන ලද “කොවිඩ් – 19 සහ ඉන් ඔබ්බට යුගයේ සංවර්ධනය සදහා මූල්‍යකරණය පිළිබඳ ඉහළපෙළේ වීඩියෝ සම්මන්ත්‍රණය” අමතා ජනාධිපති ලේකම් කාර්යාලයේ සිට, 2020 මැයි 28 වනදා ජනාධිපති ගෝඨාභය රාජපක්ෂ මහතා කළ සම්පූර්ණ කතාව

මේ හමුව කැඳවීම පිළිබඳව කැනඩාවේ සහ ජැමෙයිකාවේ අගමැතිවරුන්ට සහ එක්සත් ජාතීන්ගේ මහ ලේකම්වරයාට මම මගේ ස්තූතිය පිරිනමමි.

ගෝලීය වෙළෙඳාම, සංචාරක ව්‍යාපාරය, ආයෝජන හා සේවා නියුක්තිය අඩපණ වී ඇත. වසංගතය හදිසියේම, වරක් තිරසාර වූ ව්‍යාපාර හා ආර්ථිකයන් විනාශ කරමින් අස්ථාවර තත්ත්වයට පත් කර ඇත.

සැබෑ ආර්ථිකය තවදුරටත් ආදායම් හා රැකිය උත්පාදනය නොකරන හෙයින් රාජ්‍ය මූල්‍ය හිඟය ක්‍රමනුකූලව පහත හෙළමින් සිටි රටවල් පසුබෑමට ලක්ව ඇත. පහත වැටෙන ප්‍රවණතාවක පැවති ණය පරිමාව ඊට අනුරූපව ප්‍රත්‍යවර්තනයකට ලක්ව ඇත.

අක්‍රීය වත්කම් ඉහළ ගොස් ද්‍රවශීලතා අර්බුදයකට මුහුණදීමට සිදු වීමෙන් බැංකු ක්ෂේත්‍රයට පහර එල්ල වී තිබේ. සමස්ත ඉතුරුම් – ආයෝජන සමීකරණය බිඳ වැටී ඇති අතර සංවර්ධනය සදහා මූල්‍ය සම්පාදනය මුල්‍යකරණය ගෝලීය ආර්ථිකයට අදාල මාතෘකාවක් වන්නේ මේ හේතුවෙනි.

ශ්‍රී ලංකාව තුල ශ්‍රම ආදායම, අපනයන ආශ්‍රිත ආදායම, සංචාරක ව්‍යාපාරය සහ සම්බන්ධිත සේවා ආශ්‍රිත ප්‍රධාන සම්ප්‍රේෂණ මාර්ග අපගේ සැබෑ ආර්ථිකයට බලපෑම් එල්ල කර ඇත. සේවා නියුක්තිය හා ජීවනෝපාය අහිමිවීම විශාලය.

අපට මුහුණ දීමට සිදුව ඇති දුෂ්කරතා කුමක් වුවද පළමුව ජනතාව යන අපේ ප්‍රතිපත්ති අත්හළ නොහැක්කේ අප වඩාත් අගය කරන එකම වත්කම මානව සංවර්ධනය නිසාය.

මෙය රජයේ හා ව්‍යාපාරික ආයතනවල  පාලනය ඉක්මවා ගිය අර්බුදයක් වන හෙයින් බහුපාර්ශවීය හා ද්විපාර්ශ්වීය නිල ණය ප්‍රදානය කරන ආයතන වෙතින් කොන්දේසි විරහිත අය වැය සහයෝගය සහ රාජ්‍ය ණය සඳහා ණය කල් දැමීමේ වන්දි ආකාරයෙන් අන්තර්ජාතික සහයෝගය ලැබි යුතු වන්නේ පෞද්ගලික ණය සහ ලාභාංශ වෙළෙඳ පොළෙහි විශ්වාසය ඉන් තහවුරු වන බැවිනි.

සංවර්ධනය වෙමින් පවතින රටවලට බහු පාර්ශවීය සහ ද්විපාර්ශවීය රාජ්‍ය ණය ප්‍රදානය කරන්නන්ට බිඳවැටුණු ආර්ථිකය නැවත ගොඩ නැංවීම සඳහා සංවර්ධනය වෙමින් පවතින රටවලට එවන් අවකාශයක් නිර්මාණය කිරීමේ විශේෂ වගකීමක් ඇති අතර ණය දීමේ සාමාන්‍ය කොන්දේසි මත තරයේ රැඳී නොසිටිය යුතු වන්නේ බොහෝ රටවල් සිය ණය බැඳීම් නොකඩවා ඉටු කර ඇති හෙයින් හා රාජ්‍ය ණය ප්‍රදානය කරන්නන් විසින් සැලකිය යුතු සහනයක් මගින් නව අවකාශ සැලසීමට කාලය පැමිණඇති හෙයිනි.

අපේ ප්‍රමුඛතා වන කෘෂි හා ආහාර සුරක්ෂිතතාව, පරිසර සංරක්ෂණය, පුනර්ජනනීය බලශක්ති මූලාශ්‍ර, ඩිජිටල් ආර්ථිකය හා ඩිජිටල් ආණ්ඩුකරණය. ග්‍රාමීය ආර්ථිකය හා දිළිදුකම අඩු කිරීම, ගම්මාන සඳහා වැඩි දියුණු කළ සබඳතා තුලින් ජනතාවට හා ව්‍යාපාරික ප්‍රජාවට වෙළඳපොළ ප්‍රවේශය සහ අපගේ පරිසර ආරක්ෂණ උපායමාර්ග හා අනුකූලව නගර නිර්මාණය පුරා මාස 02කට ආසන්න කාලයක් ආර්ථිකය වසා දැමීම හේතුවෙන් පසුබෑමට ලක්ව ඇත.

කොවිඩ් – 19 වසංගත අවදානමට ප්‍රජාව ගොදුරු නොවන බව සහතික කරනු සඳහා වන සෞඛ්‍ය නිරෝධායන ප්‍රමිතීන්ට අනුගතවෙමින් මේ සතියේ සිට සීමාවන් ලිහිල් කිරීමට අපි පියවර ගෙන ඇත්තෙමු. කෙසේ වෙතත්, ආර්ථිකයට සැබෑ ලෙස ඇති වූ අලාභය මාස දෙකක කාලයක් වනවා සේම රට සාමාන්‍ය තත්වයට පත්වීමට අපේක්ෂිත කාල සීමාව දීර්ග වනු ඇති බැවින්, එවැනි පහසුකම් සලසන සියලු බාහිර අධාර “සංවර්ධන කේන්ද්‍රීය” විය යුතුය.

සෑම ප්‍රධාන ද්විපාර්ශ්වික හා බහුපාර්ශ්වික ණය සපයන්නන් විසින් ලබාදෙන නිල ණය සහ මධ්‍යකාලීන හදිසි අයවැය ආධාර ණය පෞද්ගලික ණය වගකීම් සපුරාලීමට අවශ්‍ය සාර්ව ආර්ථික අවකාශය විවෘත කරනවා සේම එය වෙළෙඳ හා ගෙවීම් ක්‍රම ලිහිල් කර පෞද්ගලික අංශයේ ණය හිමියන්ට වර්ධනය නැවත සකසා ආයෝජනයට අවශ්‍ය විශ්වාසය ගොඩනැගීමට අවකාශය සලසයි.

සංවර්ධන මූල්‍යකරණයේ අවශ්‍යතාව මම මහජන චීන සමූහාණ්ඩුවේ ජනාධිපති අතිගරු ෂි ජින් පිං මැතිතුමා, ඉන්දියානු අග්‍රාමාත්‍ය නරේන්ද්‍ර මෝදි මැතිතුමා සහ එක්සත් ජනපදයේ  ජාතික ආරක්ෂක උපදේශක රොබට් ඕ බ්‍රයන් මහතා සමග කළ සාකච්ඡාවලදී අවධාරණය කළෙමි.

කෙසේ වෙතත්, කණගාටුවට කරුණ නම් මධ්‍ය ආදායම් ආර්ථිකයක් සහිත රටවල්, සංවර්ධනය වෙමින් තිබෙන  රටවල් ලෙස පවතින වර්ගීකරනය ඇතුළත උපග්‍රහණය වීම හේතුවෙන් එම රටවල අවශ්‍යතාව මුළුමනින්ම සපුරාගැනීමට ඇති අවකාශය සීමා වී තිබීමයි.

ලොව ප්‍රධාන පෙළේ ආධාර කණ්ඩායම්වල හා නායකයන්ගේ වගකීම තම තමන් අතර කොන්දේසි පනවා නොගෙන මහා පරිමාණයේ ද්විපාර්ශ්වික, බහුපාර්ශ්වික නියෝජිත ආයතනවල කඩිනම් ක්‍රියාමාර්ග වේගවත් කොට සංවර්ධනය වෙමින් පවතින හා මධ්‍ය ආදායම් ආර්ථිකයන්හි සංවර්ධන හවුල්කරුවන් ලෙස ඉදිරියට යාමයි.

අධ්‍යාපනය, සෞඛ්‍යය , කාන්තාවන් හා ළමයින් නව අපනයන කර්මාන්ත, ආහාර සුරක්ෂිතතාව හා වඩා යහපත් හා ස්ථාවර ලොවක් වෙනුවෙන් පරිසර සුරැකීම ඇතුළු මානව සංවර්ධන අංශ කෙරෙහි අවධානය යොමු කිරීමට රටවල් දිරි ගන්වන අතර හදිසි ආධාර පහසුකම් තුලින් සංවර්ධනය වෙමින් පවතින හා මධ්‍ය ආදායම් රටවලට සහය වන්නේ කෙසේදැයි මේ කතිකාවත තුළින් එකඟත්වයක් මතු විය යුතුය.

ගරු මැතිඳුනි,

“ආරෝග්‍ය පරමා ලාභා හෙවත් යහපත් සෞඛ්‍යය පරම ධනය වේ” යන බුදු වදන සිහිපත් කරමින් මම මගේ අදහස් දැක්වීම අවසන් කරමි.

ස්තූතියි,

රජයේ වෛද්‍ය නිලධාරීන්ගේ සංගමය විසින් ඊයේ (27) දින Covid-19 වෛරසයේ වත්මන් තත්ත්වය සම්බන්ධයෙන් සිය නිරීක්ෂණ ඇතුළත් නවතම තත්ත්ව වාර්තාව ඉදිරිපත් කළේය.

කොවිඩ්-19 ගෝලීය වසංගතය ශ්‍රී ලංකාව තුළ ව්‍යාප්තිය පාලනය කිරීම, රෝගීන් කළමනාකරණය කිරීම, නව සාමාන්‍ය තත්ත්වය හා දෙවන රැල්ලක් ඇතිවීම වළක්වා ගැනීම සම්බන්ධයෙන් වන එම වාර්තාවේ සදහන් වන්නේ මේ වන විට ලංකාව තුළ වැලිසර නාවික හමුදා කදවුර ආශ්‍රිත පොකුර හා විදෙස්ගත ශ්‍රී ලාංකිකයින් නැවත ශ්‍රී ලංකාවට පැමිණි පසු ඇතිවන පොකුර වශයෙන් ‘කොවිඩ්-19 පොකුරු දෙකක් ඇති බවයි.

රජයේ වෛද්‍ය නිලධාරීන්ගේ සංගමය විසින් මාධ්‍ය වෙත යොමු කළ එම සම්පූර්ණ වාර්තාව පහත පළ වෙනවා.

දිවයිනේ සියලු කර්මාන්තශාලාවල නිෂ්පාදන කටයුතු පුළුල් කිරීමට රජය සිය අවධානය යොමු කර ඇතැයි කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි. ඔහු පෙන්වා දෙන්නේ සෞඛ්‍ය මාර්ගෝපදේශ අනුව ඒ සදහා පියවර ගන්නා බවයි.

ආයෝජන මණ්ඩලයට අයත් නිදහස් වෙළද කලාප අධ්‍යක්ෂකවරුන් සහ ඇමති ප්‍රසන්න රණතුංග මහතා අතර ඊයේ (27) පැවති සාකච්ඡාවක දී ඇමතිවරයා මේ බව සදහන් කළේය. කොවිඩ් 19 හෙවත් කොරෝනා වසංගතය පාලනය කිරීමත් සමග රට යථා තත්ත්වයට පත් කිරීමේ රජයේ වැඩ පිළිවෙල යටතේ රට තුළ පිහිටි කර්මාන්තශාලාවල ක්‍රියාකාරිත්වය සම්බන්ධයෙන් සාකච්ඡා කිරීම සදහා මෙම රැස්වීම කැදවා තිබිණ. කාර්මික අපනයන හා ආයෝජන ප්‍රවර්ධන අමාත්‍යාංශයේ දි රැස්වීම පැවැත්විණ.

දිවයින පුරා පිහිටි නිදහස් වෙළද කලාප තුළ කර්මාන්තශාලා 92% ක් මේ වන විට සිය නිෂ්පාදන කටයුතු ආරම්භ කර තිබෙන බව ආයෝජන මණ්ඩලයේ අධ්‍යක්ෂක ජෙනරාල් සංජය මොහොට්ටාල මහතා මෙහි දී කියා සිටියේ ය. නිදහස් වෙළද කලාප 14 ක කර්මාන්තශාලා 286 ක් පිහිටුවා තිබේ.  සේවක සංඛ්‍යාව 142,000 කි.

පහුගිය අගහරුවාදා (26) වන විට කර්මාන්තශාලා 262 ක් නිෂ්පාදන කටයුතු ආරම්භ කර තිබු බවත් සෞඛ්‍ය මාර්ගෝපදේශ අනුව අවම සේවක සේවිකාවනක් සංඛ්‍යාවක් සේවයේ යෙදවීමේ පදනම යටතේ  සේවක සේවිකාවන් 91,416 ක් ඒවායේ සේවය කරන බවත් ආයෝජන මණ්ඩල අධ්‍යක්ෂකවරුන් මෙහි දී කියා සිටියහ. එම කර්මානතශාලාවල සෞඛ්‍ය මාර්ගෝපදේශ නිසි ලෙස ක්‍රියාත්මක වන්නේ දැ‘යි නිරන්තරයෙන් පරීක්ෂා කරන බව ද ඔවුහු කියා සිටියහ.

නිදහස් වෙළද කලාප වල පිහිටුවා ඇති කර්මාන්තශාලා හිමියන්ගේ ප්‍රධාන ඉල්ලීමක් බවට පත්ව ඇත්තේ සිය සම්පූර්ණ නිෂ්පාදන ධාරිතාව ක්‍රියාත්මක කිරීම බව ද වෙළද කලාප අධ්‍යක්ෂකවරු පෙන්වා දුන්හ. දිස්ත්‍රික් අතර ගමනාගමනයට තවදුරටත් පවතින බාධා ඉවත් කර දෙන ලෙස ද කර්මාන්ත හිමියෝ ඉල්ලා සිටින බව ඔවුහු කියා සිටියහ.

ඇමති ප්‍රසන්න රණුතංග මහතා මෙහිදී කියා සිටියේ කර්මාන්තශාලාවල නිෂ්පාදන ධාරිතාව ඉහළ නැංවීමට සේවක සංඛ්‍යාව වැඩි කිරීමට සිදුවන බවයි. ඒ සම්බන්ධයෙන් සෞඛ්‍ය අංශවල මාර්ගෝපදේශ ලබා ගත යුතු බව පැවසූ ඇමතිවරයා ඒ පිළිබද ව සෞඛ්‍ය බළධාරීන්ගේ අවධානය යොමු කරවන බව ද කීවේය.

අවදානම් කලාපය ලෙස හදුනාගෙන තිබු කොළඹ හා ගම්පහ අතර අන්තර් ගමනාගමන බාධා ලබන සතියේ පමණ වන විට ඉවත් කිරීම කෙරෙහි ද රජයේ අවධානය යොමුව ඇතැයි ඔහු සදහන් කළේය. කර්මාන්තශාලා නිෂ්පාදන ධාරිතාව පුළුල් කිරීමේ දී ඒ ආශ්‍රිතව පවතින බෝඩිං කාමර හා නිවාස පවත්වාගෙන යාමේ දී සෞඛ්‍ය උපදෙස් අනුගමනය කිරීමේ අවශ්‍යතාවය ද පෙන්වා දුන් ඇමතිවරයා කර්මාන්තශාලා ආශ්‍රිත බෝඩිං කාමර හා නිවාස සදහා වෙන ම සෞඛ්‍ය මාර්ගෝපදේශ ලබා ගැනීමේ අවශ්‍යතාවය ද පෙන්වා දුන්නේය.

කොවිඩ් 19 හෙවත් කොරෝනා වසංගතය හේතුයෙන් නර්මාන්තකරුවන් මුහුණ පා සිටින ඇණවුම් අවලංගු වීම වැනි කරුණු කෙරෙහි ද රජය සිය අවධානය යොමු කර ඇති බවත් ඉදිරියේ දී ඔවුන්ට සහන සැලසීම සදහා රජය අවශ්‍ය පියවර ගන්නා බවත් කී ඇමති ප්‍රසන්න රණතුංග මහතා කිසිදු කර්මාන්තශාලවක් වසා දැමිමටත්, කිසිදු සේවකයෙකුගේ රැකියාව අහිමිවීමටත් ඉඩ නොතැබීම රජයේ ස්ථාවරය බව ද අවධාරණය කළේය. කම්කරු අමාත්‍යාංශයේ මෙවැනි ගැටළු විසදීම සදහා වෙන ම ඒකකයක් පිහිටුවා තිබේ. එම ඒකකයට මෙවැනි ගැටළු ඇත්නම් යොමුකරන ලෙසද ඇමතිවරයා අධ්‍යක්ෂකවරුන්ට උපදෙස් දුන්නේය.

කාර්මික අපනයන, ආයෝජන ප්‍රවර්ධන අමාත්‍යාංශයේ ලේකම් මාපා පතිරණ, ආයෝජන මණ්ඩලයේ සභාපති සුසන්ත රත්නායක, අධ්‍යක්ෂක ජෙනරාල් සංජය මොහොට්ටාල යන මහත්වරුන් ද මෙම සාකච්ඡාවට එක් ව සිටියහ.

වර්ෂාව පැමිණීමත් සමඟ ඩෙංගු රෝගය වැඩිවීමේ අවදානමක් ඇති බැවින් COVID – 19 සමඟ අනෙකුත් රෝග පාලනය ද නිසියාකාරව කළමනාකරණය කරගත යුතු බව සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මිය පවසයි.

ඒ අනුව COVID – 19 මර්දනය සදහා සියළු දෙනා එක්ව කටයුතු කළා සේම ඩෙංගු රෝගය මැඩලීම සදහා ද සියළු අංශ එක්ව කටයුතු කළ යුතු බව අමාත්‍යතුමීය පවසයි. දැනට සිදු කරනු ලබන ඩෙංගු මදුරු මර්දන වැඩපිළිවෙල සහ ඉදිරියේ දී ක්‍රියාත්මක කළ යුතු වැඩපිළිවෙල පිළිබදව විශේෂ සාකච්ජාවක් සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මියගේ ප්‍රධානත්වයෙන් සහ ජාතික ඩෙංගු මර්දන එකකයේ නිලධාරීන්ගේ සහභාගීත්වයෙන් අද (28) සෞඛ්‍ය අමාත්‍යාංශයේ දී පැවැත්විනි.

 2019 වසරේදී ඩෙංගු රෝගීන් 105,049 ක් හමුවූ වී ඇති අතර, මරණ 150 ක් සිදු වී ඇත. 2020 මේ වසරේ මේ දක්වා  ඩෙංගු රෝගීන්  19,474 හමුවී ඇති අතර මරණ 22 ක් සිදු වී ඇති බව බව මෙහිදී අනාවරණය විය.

ඒ අනූව COVID – 19 වෛරසය මැඩලීම සදහා කටයුතු කළ සේම ඩෙංගු මදුරු මර්දනය සදහා ද සැවොම එක්ව කටයුතු කළ යුතු බවත් “COVID – 19 රෝගයෙන් ජනතාව ආරක්ෂා කර ගැනීමට දියත් කළ වැඩපිළිවෙල වගේම ඩෙංගු රෝගයෙන් ජනතාව ආරක්ෂා කිරීමට කටයුතු කිරීම අප සියලු දෙනාගේ වගකීමක් බවද, අතිගරු ජනාධිපතිතුමාගේ උපදෙස් පරිදි මේ වන විට සෞඛ්‍ය අමාත්‍යාංශය ඩෙංගු රෝගය මර්දනයට කාර්යසාධක බලකායක් පිහිටුවීමටද කටයුතු කර තිබෙන බවත් අමාත්‍යතුමීය මෙහිදී පවසන ලදී.

COVID – 19 රෝගය මැඩලීමට පළාත් පාලන ආයතන විසින් විශාල කාර්යභාරයක් ඉටු කල බවත්. ඩෙංගු මර්දන වැඩපිළිවෙලේදී ද එම කාර්යභාරය නිසි අයුරින් ඉටුකරන ලෙසට අමාත්‍යතුමීය පලාත් පාලන ආයතන නියෝජිතයන්ගෙන් ඉල්ලීමක්  කලේය.

මේ වන විට ඩෙංගු රෝගය පාලනය සදහා සෞඛ්‍ය අමාත්‍යංශය විසින් ක්‍රියාකාරී සැලැස්මක් සකස් කොට ඇති අතර ඒ අනුව කඩිනම් වැඩ කටයුතු මාලාවක් දියත් කර ඇති බවත් ඩෙංගු රෝගීන් හට ප්‍රතිකාර කිරීම සදහා ඩෙංගු ප්‍රතිකාර විශේෂ රෝහල් වල පහසුකම් වැඩි කරන ලෙසටත් නව ඩෙංගු ප්‍රතිකාර විශේෂ රෝහල් සකස් කරන ලෙසටත් අමාත්‍යතුමීය නිළධාරීන්ට උපදෙස් දෙන ලදී.

මෙම අවස්ථාවට සෞඛ්‍ය ලේකම් මේජර් ජනරාල් සංජීව මුණසිංහ,සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ, නියෝජ්‍ය සෞඛ්‍ය සේවා අධක්ෂ ජනරාල් වෛද්‍ය පබා පලිහවඩනයන මහත්ම මහත්මීන් විශේෂඥ වෛද්‍යවරුන් ඇතුලුනිළධාරීන් පිරිසක් සහභාගි විය.

මහින්දානන්ද අලුත්ගමගේ ඇමතිවරයා විසින් කුවේට් සිට පැමිණි ශ්‍රී ලාංකිකයින් පිළිබඳව කරන ලද අපහාසාත්මක සහ වගකීම් විරහිත ප්‍රකාශය පිළිබඳව එතෙර අපි සංවිධානයේ සභාපති සුනිල් හඳන්නෙත්ති මහතා විදේශ කටයුතු අමාත්‍ය දිනේෂ් ගුණවර්ධන මහතාට ලිපියක් යොමු කර තිබෙනවා. එම සම්පූර්ණ ලිපිය සහ එතෙර අපි සංවිධානයේ කුවේට් ශාඛාව වෙනුවෙන් එහි සභාපති ජූඩ් ලිවේරා මහතා විසින් විදේශ ඇමැතිවරයාට යොමු කළ සම්පූර්ණ ලිපි පහත පළ වෙනවා.

විදේශ කටයුතු අමාත්‍ය,
දිනේෂ් ගුණවර්ධන මහතා,
විදේශ කටයුතු අමාත්‍යාංශය – කොළඹ.

හිතවත් ඇමතිතුමනි,

මැයි මස 19 වන දින කුවේට් සිට පැමිණි ලාංකිකයන් පිළිබඳව හිටපු රජ්‍ය ඇමතිවරයෙකු විසින් සිදුකළ සාවද්‍ය ප්‍රකාශය හා මැදපෙරදිග ලාංකිකයන් සම්බන්ධවයි

කුවේට් රාජ්‍යයේ සිට ශ්‍රී ලාංකාවට මැයි 19වන දින පැමිණි ලාංකිකයන් කුවේට් රාජ්‍ය විසින් තෝරාගත් කොරෝනා රෝගය වැළඳුණු පිරිසක් බවත්, ඔවුන්ගේ පැමිණීම ශ්‍රී ලංකාවට බෝම්බ ප්‍රහාරයක් එල්ල කිරීමට සමාන යැයිද හිටපු රාජ්‍ය ආමාත්‍ය මහින්දානන්ද අලුත්ගමගේ මහතා විසින් මැයි 25වන දින කරන ලද ප්‍රකාශය පිළිබඳ අපගේ බලවත් කණගාටුව සහ අප්‍රසාදය ප්‍රකාශ කරමු. එහිදී ඔහු විසින් ඉදිරිපත් කළ කරුණු ගණනාවක් පදනම් විරහිත ව්‍යාජ චෝදනා පමණක් බව සඳහන් කිරීමට කැමැත්තෙමු.

විශේෂයෙන්ම එවන ලද පිරිස කුවේට් රාජ්‍යය තෝරාගත් පිරිසක් බවට වන චෝදනාවත්, මෙම පිරිස වෛද්‍ය පරික්ෂණවලින් තොරව ශ්‍රී ලංකාවට එවන ලදැයි යන චෝදනාවත් සාවද්‍යය. මෙම හාරසිය හැටහයදෙනා වෛද්‍ය පරීක්ෂණවලට ලක්කළ බවත් ඉන් හතරදෙනෙකු පමණක් වෛද්‍ය වාර්තා සලකා බලා රෝහල්ගත කළ බවත් ඉන් එක් අයෙකුට පමණක් කොරෝනා වැළදී ඇති බවත් කුවේට්හි ශ්‍රී ලංකා තානාපතිවරයා Arab Times පුවත්පතට ප්‍රකාශ කර තිබේ.

කුවේටය ඇතුලු මැදපෙරදිග රටවල සිටින ශ්‍රී ලාංකිකයන් අතිවිශාල ප්‍රමාණයක් තම මව්රට වන ශ්‍රි ලාංකාවට තමන් ගෙන්වා ගන්නා ලෙස ඉල්ලුම් කර සිටින්නේ මීට මාස දෙකකට පමණ පෙර සිට බව ඔබතුමා හොඳින් දන්නා කරුණකි. නමුත් විදේශගත ශ්‍රි ලාංකිකයන් තම මව්රටට ගෙන්වා ගැනීමට ආණ්ඩුව දිගින් දිගටම දැක්වූ මැළිකම නිසා අද මෙම තත්වය උග්‍රවී ඇති බවත්, එම නිසා අසරණ බවට පත්වී සිටින ශ්‍රි ලාංකිකයන්ටත්, ඔවුන් අප රටට ගෙන්වාගැනීමට සියලු පහසුකම් ලබාදුන් විදේශ රාජ්‍යයන්ටත් අවලාද නැගීම කිසිසේත් පිළිගත නොහැකිය.

මේ වනවිට මෙම සිද්ධිය පදනම් කරගෙන විවිධ රටවල අසරණභාවට පත්වී සිටින ශ්‍රී ලාංකිකයන් ගෙන්වාගැනීමද ආණ්ඩුව විසින් නතර කිරීමට උත්සාහ කරමින් තිබේ. එම නිසා එතෙර අපි සංවිධානයේ කුවේට් ශාඛාව විසින් නිකුත් කරන ලද සම්පූර්ණ පැහැදිළි කිරීමක් මේ සමග ඔබට යොමු කරමු. තම රටේ පුරවැසියන්ගේ ආරක්ෂාව සහතික කිරීමට ඕනෑම ආණ්ඩුවක් ඕනෑම තත්වයකදී බැඳී සිටින බවත්, එම වගකීම අත්හරිමින් අසරණභාවයට පත්වී ඇති එම පුරවැසියන්ට හා ඔවුන් ශ්‍රී ලංකාවට රැගෙන ඒම සඳහා විවිධ සහාය ලබාදෙන රාජ්‍යයන්ට ආණ්ඩුවේ නියෝජිතයන් විසින් කරන්නාවූ චෝදනා පිළිබඳ අපගේ බලවත් අප්‍රසාදය මෙයින් පළකරමු. මන්ද යත් ශ්‍රී ලංකාවට පැමිණීමට සිටින පිරිසට වඩා ලක්ෂ සංඛ්‍යාත පිරිසක් මෙම රටවල්වල දැනුදු රැකියා කරමින් ජීවත්වන බවත් ඒ ඒ රටේ තත්වය අනුව එම ආණ්ඩු විසින් ශ්‍රී ලාංකිකයන්ට කොරෝනා තත්වය යටතේ විවිධ සහන සහ උපකාර ලබාදෙන බවත් තේරුම් ගැනීම වැදගත්ය. එම නිසා විදේශගතව සිටින ශ්‍රී ලාංකික පුරවැසියන් අදාල නිවැරදි නිරෝධායන ක්‍රමවේද යටතේ ගෙන්වා ගැනීමට අවශ්‍ය කටයුතු කඩිනමින් සූදානම් කරන ලෙසත් එතෙර අපි සංවිධානය ලෙස අප ඔබෙන් ඉල්ලා සිටිමු.

එතෙර අපි සංවිධානයේ කුවේට් ශාඛාව විසින් එවන ලද ලිපිය මේ සමග අමුණා ඇත.

ස්තූතියි,

සුනිල් හඳුන්නෙත්ති,
හිටපු පාර්ලිමේන්තු මන්ත්‍රී,
සභාපති,
එතෙර අපි සංවිධානය.
2020-05-28

ගරු විදේශ කටයුතු ඇමතිතුමනි,

පසුගිය මැයි 25වන දින විකාශයවූ දෙරණ නාලිකාවේ වැඩසටහනකදී හිටපු රාජ්‍ය අමාත්‍යවරයෙකු වන මහින්දානන්ද අලුත්ගමගේ මහතා විසින් කුවේට් සිට පැමිණි ලාංකිකයන් පිළිබඳව කළ අසත්‍ය ප්‍රකාශය පිළිබඳ මේ වන විටත් ඔබතුමා දැනුවත් යැයි අප සිතමු.

එහිදී කුවේටයේ සිට පැමිණි සියලුදෙනා කොරෝනා ආසාධිත බෝම්බ ලෙසත් කුවේට් රජයෙන් කොරෝනා රෝගීන් තෝරාගෙන ලංකාවට එවූ බවත් එම අමාත්‍යවරයා විසින් ප්‍රකාශ කරන ලදී. මෙම ප්‍රකාශය බරපතල හා සාවද්‍ය ප්‍රකාශයක් බවත් එමගින් ඇතිවිය හැකි අයහපත් ප්‍රතිපල දැනුවත් කිරීම සඳහාත් මෙම ලිපිය ඔබ වෙත ඉදිරිපත් කරමු.

01. කුවේට් රජය විසින් අප්‍රේල් 1වන දින සිට අප්‍රේල් 30වන දින දක්වා ලාබදුන් පොදු සමා කාලයේදී ඉදිරිපත්වන අයට නොමිලේ ගුවන් ටිකට්පත් හා පිටව යන තෙක් අවශ්‍ය නේවාසික පහසුකම්ද ලබාදෙන බව ප්‍රකාශ කරන ලදී. එයට අනුව වලංගු වීසා බලපත්‍ර නොමැති, එහෙත් ගමන් බලපත්‍ර හිමි ලාංකිකයන් අප්‍රේල් 21වන දින සිට 25වන දින දක්වා කුවේට් රජයේ ෆර්වානියා නගරයේ පාසල් දෙකකදී භාරවූ අතර වීසා නොමැති ගමන් බලපත්‍ර නොමැති ලාංකිකයන්ට මෙම අවස්ථාව අහිමිවූයේ තානාපති කාර්යාලය මගින් එම පිරිසට තාවකාලික ගමන් බලපත්‍ර සකසාදීමට මැදිහත් නොවූ නිසාය. ඒ පිලිබඳ අප තානාපති කාර්යාලයෙන් විමසූවිට ඔවුන් සඳහන් කළේ ලංකා රජයෙන් වීසා නොමැති, ගමන්බලපත්‍ර නොමැති අයට තාවකාලික බලපත්‍ර සකස් කිරීමට අවසරය ලබාදී නොමැති බවය. එමනිසා ලංකාවට පැමිණි ලාංකිකයින් කුවේට් රජයෙන් තෝරාගෙන එවා ඇතැයි හිටපු ඇමතිවරයා කළ ප්‍රකාශය මුලුමනින්ම අසත්‍ය වේ.

02. එම පිරිස ලංකාව බලා පැමිණි දිනයේ (මැයි 19 වන දින) උදෑසන 5 සිට කුවේට් ගුවන් තොටුපලේදී පිටත්වීමට පැමිණි සියලුම දෙනා අදාල වෛද්‍ය පරික්ෂණවලට ලක්කළ බවත් රෝගී තත්ව පිළිබඳ සැක මතු වූ කිහිපදෙනෙකුට (සිව්දෙනෙක් පමණ) ගුවන්යානයට ඇතුල්වීමට ඉඩ නොදුන් බවත් ඔවුන් රෝහල් වෙත යොමු කළ බවත් දන්වා සිටිමි. එම සථානයේ රැඳීසිටි ශ්‍රී ලංකා තානාපති තුමාගෙන් ඒ පිළිබඳ වැඩිදුරටත් කරුණු තහවුරු කරගත හැක. එම නිසා හිටපු රාජ්‍ය අමාත්‍යවරයෙකු වන මහින්දානන්ද අලුත්ගමගේ මහතා විසින් සිදු කළ සාවද්‍ය ප්‍රකාශය සමස්ත මැදරෙදිග ලාංකිකයන්ට කරන ලද අපහාසයක් මෙන්ම ශ්‍රි ලාංකිකයන්ට එම අවස්ථාව ලාබාදුන් කුවේට් රජයටත් කළ අපහාසයක් ලෙස අප දකිමු.

03. මේ මොහොතේ බරපතල අර්බූද රැසකට මුහුණ දෙමින් සිටින කුවේටයේ රැඳී සිටින 16,000ක් ඉක්මවු වීසා නොමැති පිරිසට නොමිලේ ගුවන් ටිකට්පත් හා අවශ්‍ය පහසුකම්සහිතව ලබාදුන් පොදු සමා කාලය පිළිබඳව කල්වේලා ඇතිව ලාංකා රජයට දැනුම්දී තිබූ අතර, එම පිරිස ලංකාවට ගෙන්වා ගැනීම සඳහා විධිමත් වැඩපිළිවෙලක් සකස් නොකිරීම හේතුවෙන් එම පිරිසට බරපතල අර්බූද රැසකට මුහුණදීමට සිදුවිය. ලාංකිකයන්ට අදාලව පොදු සමාකාලය අරම්භක දිනය වූ අප්‍රේල් 21වන දින ඔවුන් බාරගන්නා ස්ථාන වෙතට බොහෝදෙනා පැමිණියේ තමන් නේවාසිකව සිටි ස්ථානවලින් ඉවත්වී අනෙකුත් සියලුම කටයුතු අවසන් කර තම මව්රට බලා පිටත්වීමේ අපේක්ෂාවෙන්ය. එහෙත් එදින ගමන් බලපත්‍ර හිමි අය පමණක් බාරගත් අතර ගමන් බලපත්‍ර නොමැති පිරිස බාර නොගෙන ප්‍රතික්ෂේප කිරීම නිසා අවසානයේ එම පිරිසයට යනඑන මං නොමැතිව තවත් අසරණභාවයට විය. මේ වන විටත් එම පිරිස නොයෙකුත් ස්ථානවල ලංකාවට පැමිණීමට බලාපොරොත්තුවෙන් සිටින අතර මේ ගෙවී ගිය මාසයකට වැඩි කාල සීමාව තුළ ඔවුන්ද මෙම කොරෝනා වෛරසයට අසාධානය වීමේ අවධානම වැඩිවී ඇත. අප්‍රේල් 21 වනවිට කුවේටයේ කොරෝනා ආසාධිත ප්‍රමාණය 1995ක් වූ අතර එම අවස්ථාවේදී ලාංකාවේ රජයට විසඳීමට තිබූ මෙම ගැටලුව, ආරම්භයේ සිටම මැදපෙරදිග ලාංකිකයන් ගෙන්වා නොගැනීමේ ආණ්ඩුවේ ස්ථාවරය නිසා කොරෝනා ආසාධිතයින් 16784ක් වාර්තාවූ මැයි 19 වන දින තෙක් පමා කිරීමේ වගකීමද ගත යුත්තේ ශ්‍රී ලංකා රජයයි.

04. කුවේට් රාජ්‍ය විසින් පොදු සමාකාලයේදී භාරවෙන ඒ ඒ රටවල පුරවැසියන්ගේ වෛද්‍ය පරීක්ෂණ කටයුතුවලට අවශ්‍ය වෛද්‍ය කණ්ඩායම් කුfවිටයට ගෙන්වාගෙන ඒ ඒ රටේ වෛද්‍යවරු මගින්ම එම පරීක්ෂණ කටයුතු සිදු කිරීමට කටයුතු කරන ලෙස ශ්‍රී ලංකාව ඇතුළු රටවල විදේශ අමාත්‍යාංශවලට කුවේට් රජයෙන් දැනුම් දී තිබූ බව අපට දැනගන්නට ලැබී ඇත. එයට අනුව ගුවන්යානයකින් ඉන්දියාවේ සිට වෛද්‍යවරු ඇතුළු සෞඛ්‍ය කාර්යමණ්ඩල සහ අවශ්‍ය වෛද්‍ය උපකරණ රැගෙන පැමිණ එම කටයුතුවලට මැදිහත්වූ අයුරු දැකගන්නට හැකි විය. තවද අනෙකුත් රටවලින් තමන්ගේ පුරවැසියන් බාරගැනීමට අවශ්‍ය කටයුතු සකස් කළ අතර මේ වන විට විධිමත්ව එම කටයුතු සිදුවේ. දැනට කොරෝනා අවධානම වැඩි රටක් වන ඉන්දියාව පවා තමන්ගේ පුරවැසියන් ගෙන්වා ගැනීමට වෛද්‍ය කන්ඩායම් පවා කුවේටයට එවමින් කටයුතු කරද්දී ශ්‍රී ලංකාවේ ආණ්ඩුව විසින් එවැනි කිසිදු සහයෝගයක් ලබානොදී මෙවැනි චෝදනාවක් එල්ල කිරීම බරපතල වරදක් වේ. මුල සිටම කුවේට් රජය සමග අවශ්‍ය කටයුතු සඳහා සහයෝගයෙන් සැලසුම් සකස් කළේනම් මේ වනවිට බොරු චෝදනා නගමින් තමන් නිවැරදි වීමට උත්සාහ කිරීමට අවශ්‍ය නොවන බවද දන්වමු.

05. යුරෝපා රටවල් වල සිටි ලාංකිකයන් හා ඔබගේ රජයේ හිතවතුන් ගෙන්වා ගැනීමට විශාල ලෙස මැදිහත්වූ ආණ්ඩුව සමහර ඇමතිවරුන්ගේ දරුවන් එන තෙක් ගුවන් තොටුපල පවා වසා නොදැමූ අයුරු අප දැක්කෙමු. එහෙත් අතිශය පීඩාවට පත් මැදපෙරදිග ශ්‍රමිකයන් ගෙන්වා ගැනීම වෙනුවෙන් රජය මැදිහත් නොවීමේ ආණ්ඩුවේ ප්‍රතිපත්තිය නිසා මේ වන විට බරපලත අර්බුද රැසක් මතුවී ඇති අතර එහි සමස්ථ වගකීම රජයට පැවරේ.

මෙවැනි තත්වයන් යටතේ කුවේට් රජය විසින් විශේෂයෙන් තෝරා නොගත් සහ අවසාන දිනයේ පවා පරීක්ෂණවලට ලක්කළ කුවේට් රජය මගින් නොමිලේ සැපයූ ගුවන්යානා මගින් ලංකාවට පැමිණි, ලාංකාවේ ගුවන් තොටුපලේදී පවා නැවත පරීක්ෂාවට ලක්කළ, එම කිසිදු පරීක්ෂණයකදී රෝගීන් බවට හඳුනා නොගත් නිරෝධායන ම්‍යස්ථනවල සිටින ලාංකිකයන්ට කරන මෙම චෝදනා තරයේ ප්‍රතික්ෂේප කරන අතර, මෙම කරුණ මත පදනම්ව මැදපෙරදිග සිටින සියලු ශ්‍රමිකයන් ගෙන්වා ගැනීම නවතා දැමීමට කටයුතු කරමින් තිබීම කණගාටුවට කරුණකි. වහාම මෙම අසත්‍ය කරුණ මත පදනම්ව කුවේට් රජයටත්, කුවේටයේ සිටින ලාංකිකයන්ට හා පැමිණි ලාංකිකයන්ට කරන චෝදනා නවතා දමන ලෙසත්, ඉතාමත් ඉක්මනින් මැදිහත්ව මේ අවස්ථාව වන විට බරපතල අර්බූද රැසකට මුහුණ දෙන මැදපෙරදිග සිටින ලාංකිකයන් විධිමත් නිරෝධායන ක්‍රියාවලියකට යටත්ව ගෙන්වා ගැනීමට අවශ්‍ය කටයුතු සකස් කරන ලෙසත් එතෙක් ඒ ඒ රටවල රැඳී සිටින ශ්‍රී ලාංකිකයන්ගේ සුභසාදනය සඳහා අවශ්‍ය සම්පත් සහ ප්‍රතිපාදන තානාතපති කාර්යාලයට ලබාදෙන ලෙසත් ඉල්ලා සිටිමු. ශ්‍රී ලාංකිකයන්ගේ සුභසාදනය සඳහා තානාපති කාර්යාල විසින් ගනු ලබන ක්‍රියාමාර්ගවලට අප සංවිධානයේ සහාය ලබාදීමට ඕනෑම අවස්ථාවක ඉදිරිපත් වන බවද වැඩිදුරටත් සඳහන් කරමු.

ස්තූතියි,
ජූඞ් ලිවේරා,
සභාපති,
එතෙර අපි සංවිධානයේ කුවේට් ශාඛාව වෙනුවෙන්
2020-05-28 වන දින කුවේට් සිට.