Category: සුපිරි News

ජූනි 06 සෙනසුරාදා දක්වා සහ ඉන් පසු රට තුළ ඇඳිරි නීතිය ක්‍රියාත්මක වන අයුරු පැහැදිලි කරමින් අද (28) ජනාධිපති මාධ්‍ය අංශය විසින් නිවේදනයක් නිතුක් කර ඇත. එය සම්පූර්ණයෙන් මෙසේය.

මැයි 31 ඉරිදා, දිවයිනේ සියලු දිස්ත්‍රීක්කවල දවස පුරා ඇඳිරි නීතිය ක්‍රියාත්මක කෙරේ. ජූනි 01 සඳුදා සිට ජූනි 03 බදාදා තෙක් සියලු දිස්ත්‍රීක්කවල ඇඳිරි නීතිය බලපවත්වන්නේ පෙර පරිදි රාත්‍රී 10.00 සිට අළුයම 4.00 දක්වාය. ජූනි 04 බ්‍රහස්පතින්දා සහ ජූනි 05 සිකුරාදා දෙදිනම රට පුරා ඇඳිරි නීතිය ක්‍රියාත්මක වෙයි.

ජූනි 06 සෙනසුරාදා සිට සියලු දිස්ත්‍රීක්කවල නැවත දැනුම් දෙන තුරු ඇඳිරි නීතිය ක්‍රියාත්මක වන්නේ පෙර පරිදි රාත්‍රී 10.00 සිට අළුයම 4.00 දක්වා පමණි.  කොළඹ සහ ගම්පහ දිස්ත්‍රික්ක හැර සෙසු දිස්ත්‍රික්ක අතර ගමනාගමනයට අවසර ඇත.

2021 වසර සඳහා පාසල්වල පළමු ශ්‍රේණියට සිසුන් ඇතුළත් කිරීමේ අයදුම්පත සහ ඊට අදාළ උපදෙස් අධ්‍යාපන අමාත්‍යාංශය නිකුත් කළ බව අධ්‍යාපන අමාත්‍යාංශය සදහන් කරනවා. ඒ අනුව අදාළ  අයදුම්පත් ජුලි 15 වැනිදාට ප්‍ර‍ථම ලියාපදිංචි තැපෑලෙන් ඉදිරිපත් කළ යුතුයි. 

සියලුම සුදුසුකම් සපුරාලිය යුත්තේ 2020 ජුනි 30 දිනට වලංගු වන පරිදි වන අතර සියලු ලිපි ලේඛන එදිනට අදාළ ඉදිරිපත් කළ යුතුයි.

අදාළ අයදුම් පත්‍රය මෙම ලිපියෙන් බාගත කරගත හැකියි.http://www.moe.gov.lk/web/images/News/2020/grade1_admision2020/2020_ad_s.pdf

Covid-19 ව්‍යාප්තිය වළක්වමින් ඉදිරියේදී පොදු මහජන සහ වෘත්තීය ක්‍රියාකාරකම් සිදුකළ යුතු ආකාරය පිළිබද උපදෙස් මාලාවක් සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා විසින් නිකුත් කළා.

පොදු මහජන සහ වෘත්තිය ක්‍රියාකාරම් 46ක් සදහා වෙන වෙනම උපදෙස් මාලාවක් මෙහිදී නිකුත් කර තිබීම විශේෂත්වයක්. 

එම උපදෙස් මාලාව http://www.health.gov.lk වෙබ් අඩවිය මගින් බාගත කරගත හැකියි. 

පොදු මහජන සහ වෘත්තිය ක්‍රියාකාරම් 46 වන්නේ,

කුලී රථ, ත්‍රීරෝද රථ, බයිසිකල් පැදීම, සම්මන්ත්‍රණ වැඩමුළු, උපකාරක පන්ති, ප්‍රසිද්ධ රැස්වීම්, පුද්ගලික සෞඛ්‍ය සායන සහ ආරක්ෂක නිලධාරීන් වෙනුවෙන් උපදෙස් එහි අන්තර්ගත වෙයි. තවද ඡායාරූප ශිල්පීන්, වීඩියෝ කරන ශිල්පීන්, මත්පැන් හා දුම්කොළ අලෙවි කරන ස්ථාන හා ළමා දිවා සුරකුම් මධ්‍යස්ථාන සහ පෙර පාසල්ද ඒ අතර වේ. එමෙන්ම වැඩිහිටි රැකවරණ නිවාස, බන්ධනාගාර, හෝටල් පිළිගැනීමේ ශාලාවල පවත්වන මංගල උත්සව, අවමංගල්‍ය කටයුතු, ආගමික ස්ථාන, පවුලේ අය සහ මිතුරන් බැලීමට යාම අනෙක් ක්ෂේත්‍ර වන අතර පිහිනුම් තටාක සහ වෙරළ භාවිතය, ගෘහස්ථ ක්‍රීඩාංගන, ක්‍රීඩා පුහුණුවීම්, ශරීර සුවතා මධ්‍යස්ථාන, බැංකු, කාර්යාල, ගරාජය, සාප්පු, සුපිරි වෙළදසල්, සිල්ලරබඩු සහ අවන්හල්

සහල් සඳහා පනවා තිබූ උපරිම සිල්ලර මිල අද (27) මධ්‍යම රාත්‍රියේ සිට ඉහළ නැංවීමට රජය පියවර ගෙන තිබෙනවා. ඒ අනුව රුපියල් 90.00ක් ලෙස පැවති නාඩු සහල් කිලෝග්‍රෑමයක උපරිම සිල්ලර මිල රුපියල් 96.00ක් සහ සම්බා කිලෝග්‍රෑමයක උපරිම සිල්ලර මිල රුපියල් 98.00ක් දක්වා ඉහළ දමා ඇති අතරකීරි සම්බා කිලෝග්‍රෑමයක උපරිම සිල්ලර මිල රුපියල් 125.00ක් ලෙස දක්වා ඇත.

මේ මිල ඉහළ දැමීම ගැන අදහස් දක්වන පාරිභෝගිකයින් සදහන් කරන්නේ වී ගොවීන්ට නොමිලේ පොහොර ඇතුළු සියලු සහනාධාර ලබාදී තිබියදීත් මේ ආකාරයෙන් සහල් මිල ඉහළ යාම අදාළ සහනාධාර ජනතාවට බරක් වීමට මග පාදා ඇති බවයි.

‘ආණ්ඩුව සහල් මාෆියාවක් ගැන කතා කරනවා. ඒත් අවසානයේ ඉටු වෙලා තියෙන්නේ මාෆියාවේ අරමුණුයි. අපිට තේරෙන්නේ නැහැ මේ වෙන්නේ මොකක්ද කියලා. රටට ඇති වෙන්න සහල් තියෙනවාලු. සහල් මාෆියාවක් තියෙනවාලු. රටේ බහුතරය ගොවියොලු. එතකොට මේ වගේ වෙන්නේ කොහොමද ?‘ සහල්වලට උපරිම සිල්ලර මිලක් යළි නියම කිරීමට ගැන අදහස් දක්වමින් කඩවත ප්‍රියාල් සුරියප්පෙරුම මහතා අප සමග පැවසීය.

‘මේ රටේ වාර්ෂිකව පොහොර සහනාධාරය ඇතුළු විවිධාකාර ක්‍රමවලින් වී වගාවට දැවැන්ත මුදලක් වැය කරනවා. වැව් හදනවා. මහා ජලාශ හදනවා. ඒත් මේ රටේ මිනිස්සුන්ගේ ප්‍රධාන ආහාර බව කියන බත් ටික කන්න දැරිය හැකි මිලකට හාල් ටික දෙන්න මේ ගොවියන්ට නොහැකි වෙලා තියෙනවා. එතකොට පොහොර සහනාධාරය වාගේ කිසිම දේකින් පළක් නැති බව තමයි අපිට නම් තේරෙන්නේ. උදාහරණයක් විදිහට පසුගිය කාලේ රුපියල් කෝටි 25,000ක් වැය කරලා මොරගහකන්ද – කළුගග හැදුවා. වැව් දහසක් හැදුවා කිව්වා. ඒත් ඒ කිසිම දේකින් රටේ ජනතාවට දැරිය හැකි මිලකට හාල් ටික දෙන්න බැරි වෙලා තිබෙනවා. ඇත්ත කතාව තමයි තිරිගු පිටි ආනයනය නතර කළොත් හාල් කිලෝ එක රුපියල් 500ට යනවා කියන එක‘

මේ සම්බන්ධයෙන් අප කළ විමසීමකට පිළිතුරු දෙමින් ප්‍රවීන ආර්ථික හා දේශපාලන විශ්ලේෂක ආචාර්ට ඉන්ද්‍රජිත් හේවාවිතාරණ මහතා සදහන් කළා.

‘ලංකාව කෘෂිකාර්මික රටක් කියලා කියන කතාව මේ වාගේ වැඩ හරහා දැඩි අභියෝගයකට ලක් වෙනවා. තමන්ගේ ජනතාවගේ ප්‍රධාන ආහාර මේ වාගේ ඉහළ ම මිලකට අලෙවි වන රටවල් ලෝකයේ තියෙන්නේ අල්පයක් පමණයි. අනික් කාරණය තමයි මේ මේ රටේ වගා කරනවා කියන වී වලට මොකද වෙන්නේ. අක්කර දස ලක්ෂයකට අධික කුඹුරු වලින් කපා ගන්න වී වලින් කොපමණ ප්‍රතිශතයක් වෙළෙද පොළට එනවාද ? කොපමණ ප්‍රතිශතයක් අදාළ වී වගාකරුගේ ගෘහ පාරිභෝජනයට පමණක් ගන්නවාද යන්න පිළිබද විධිමත් විමසුමක් සිදුවිය යුතුයි. මොකද අපිට නිරීක්ෂණය වන ආකාරයට තමන්ගේ ගෘහ අවශ්‍යතාවට පමණක් කුඹුරු වගා කරන පුද්ගලයාත් පොහොර සහනාධාරයට හිමිකම් කියනවා‘ ආචාර්ය ඉන්ද්‍රජිත් වැඩි දුරටත් සදහන් කළා.

අද (27) දින පස්වරු 21.05 වන විට කොවිඩ්-19 ආසාදිතයින් 134දෙනකු වාර්තා වී ඇති බවත් ඒ අනුව ලංකාවේ සමස්ත කොවිඩ්-19 ආසාදිතයින් සංඛ්‍යාව 1453ක් දක්වා ඉහළ ගිය ගිය බව සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ දැක්වේ.

එහි දැක්වෙන්වේ මේ වන විට ප්‍රතිකාර ලබන රෝගීන් සංඛ්‍යාව 711ක් වන අතර දැනට රෝහල්වල අධීක්ෂණය යටතේ සිටින පුද්ගලයින් ගණන 75ක් බවයි.

අද දිනය වන විට සුවය ලබා පිටව ගිය පුද්ගලයින් සංඛ්‍යාව 732ක් බවත් මරණ සංඛ්‍යාව 10ක් බවත් එහි වැඩි දුරටත් දැක්වේ.

මේ අතර අද රජයේ ප්‍රවෘත්ති දෙපාර්තමේන්තුව නිකුත් කළ වාර්තාවක සදහන් වුණේ යාපනය නිරෝධාන මධ්‍යස්ථානයේ නිරෝධානයට ලක් වෙමින් සිටි නාවික සෙබළුන් 52 දදෛනකු කොවිඩ්-19 ආසාදිතයින් වශයෙන් හදුනා ගත් බවයි.

කොවිඩ්-19 වසංගතය පාලනය කිරීම සදහා රජයට ලබාදෙන සෞඛ්‍ය උපකරණ හා උපාංග සියලු බදු වලින් නිදහස් බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි.

අමාත්‍යවරයා පෙන්වා දෙන්නේ ඊට අදාළව ගැසට් නිවේදනයක් ද නිකුත් කිරීමට පියවර ගෙන ඇති බවයි.

ඒ අනුව සෞඛ්‍ය අමාත්‍යාංශය, සෞඛ්‍ය දෙපාර්තුමේන්තුව, ත්‍රිවිධ හමුදාව හා පොලීසිය  කොවිඩ් 19 වසංගතය පාලනය කිරීමේ ජාතික මෙහෙයුම් මධ්‍යස්ථාන වෙත ලබා දිමට හෝ ප්‍රදානය කිරීමට ගෙන්වනු ලබන සෞඛ්‍ය උපකරණ හා උපාංග සියලුම බදු වලින් නිදහස් කෙරේ. ඒ අනුව එම උපකරණ හා උපාංග ගෙන්වීමේ දී රේගු බදු හා ගුවන් තොටුපළ සංවර්ධන බද්ද , සෙස් හා වැට් බදු ඇතුළු සියලු බදු වලින් නිදහස් වන බව ඇමති ප්‍රසන්න රණතුංග මහතා සදහන් කරයි.

මෙම බදු සහන මෙම වසරේ දෙසැම්බර් 31 දක්වා හිමි වන බව බවසන ඇමති ප්‍රසන්න රණතුංග මහතා සදහන් කළේ ආයෝජන මණ්ඩලය සමග ගිවිසුමගතව ඇති කර්මාන්තකරුවන්ට ද මෙම සහනය සැලසෙන බවයි. මීට අදාළ කැබිනට් පත්‍රිකාවක් ද කැබිනට් මණ්ඩලයේ දී අනුමත වී තිබේ. අදාළ කැබිනට් පත්‍රිකාව ඇමති මණ්ඩලයට ඉදිරිපත් කළේ අගමැති මහින්ද රාජපක්ෂ මහතායි. එම කැබිනට් පත්‍රිකාවට අනුව සැකසුණු ගැසට් නිවේදනයට තමන් පසුගිය සතියේ අත්සන් තැබු බව ද ඇමතිවරයා කියා සිටී.

කොවිඩ් 19 ව්‍යසන තත්වය හමුවේ ඉදිරියේ දී ඇතිවිය හැකි මෝසම් වර්ෂාව නිසා ඇති විය හැකි ආපදා වලින් ආරක්ෂාවීම සදහා ජනතාව කටයුතු කළ යුතු ආකාරය පිළිබදව මහජනතාව දැනුවත් කිරීමේ මාධ්‍ය හමුවක් අද දින (27) ආපදා කළමනාරකණ මධ්‍යස්ථාන ශ්‍රවනාගාරයේ දී පැවැත්විණි.

පවතින අධික වර්ෂාපතනය හේතුවෙන් ජාතික ගොඩනැගිලි පර්යේෂණ සංවිධානය විසින් හදුනාගනෙ ඇති නායයාම් අධි අවධානම් ප්‍රදේශ වල ජීවත් වන ජනතාව ඇතිවිම හැකි නාය යාම් අවධානම පිළිබදව සැළකිලිමත් විය යුතු බව ජාතික ගොඩනැගිලි පර්යේෂණ සංවිධානයේ අධ්‍යක්ෂ ජෙනරාල් ආචාර්ය ආසිරි කරුණාවර්ධන මහතා පැවසීය

ගාල්ල, මාතර, හම්බන්තොට, කොළඹ, ගම්පහ, කලුතර, රත්නපුර, කෑගල්ල, කුරුණෑගල, මාතලේ, මහනුවර සහ නුවරඑලිය, බදුල්ල සහ මොනරාගල යන දිස්ත්‍රික්ක වල පවුල් 10,000 ක් නාය යාම් අධි අවදානම් කළාප වල ජීවත් වන බව ඒ මහතා පැවසීය.

විශේෂයෙන් නායයාම් බැවුම් කඩාවැටීම්, ගල්පෙරලීම්, පස්කණ්ඩි කඩාවැටීම් සහ පොළව ගිලාබැසීම් අවදානම කළාප වශයෙන් ජාතික ගොඩනැගිලි පර්යේෂණ සංවිධානය විසින් නම්කර ඇති ප්‍රදේශ වල ජනතාව දැඩි විමසිල්ලෙන් කටයුතු කරන ලෙසත් ඉදිකිරීම් හෝ වෙනත් සංවර්ධන කටයුතු සදහා පස් කන්ඩි කපා ඇති පිරිස ඒ පිළිබද අවධානය යොමු කරන ලෙසත් තමා ජීවත් වන නිවස ආශ්‍රිතව ජල බැස යාමට සැලැස්වීම ඉතා වැදගත් පවත් පෙන්වා දෙන ලදී.

එසේම නායයාම් පුර්ව ලක්ෂණ නිරීක්ෂණය වේ නම් එම ස්ථානවලින් හැකි ඉක්මනින් ඉවත්වීමට කටයුතු කරන ලෙසත් ආපදා කළමනාකරණ මධ්‍යස්ථානය හෝ අදාල අංශ ඒ පිළිබදව දැනුම් දෙන ලෙසත් ඒ මහතා තවදුරටත් පැවසීය

කොවිඩ් 19 ව්‍යසන තත්වය හමුවේ ඉදිරියේ දී ඇතිවිය හැකි මෝසම් වර්ෂාව නිසා ඇති විය හැකි ආපදා වලින් ආරක්ෂාවීම සදහා ජනතාව කටයුතු කළ යුතු ආකාරය පිළිබදව මහජනතාව දැනුවත් කිරීමේ මාධ්‍ය හමුවක් අද දින (27) ආපදා කළමනාරකණ මධ්‍යස්ථාන ශ්‍රවනාගාරයේ දී පැවැත්විණි.

කෝවිඩ් ව්‍යසන අවදානම් තත්වය තිබිය දී ආපදාවක දී ආරක්ෂිත ස්ථානය කරා යාම වෙනුවට ඥාති හෝ හිතමිතුරන්ගේ නිවාස වෙත යාමට කටයුතු කරන ලෙසත් ඒ අයට ද ආපදාවට ලක්වීම නිසා ලබා දෙන වියලි සලාක වැනි සහනාධාර ලබා දීමට කටයුතු කරන බවත් ආපදා කළමනාකරණ මධ්‍යස්ථානයේ අධ්‍යක්ෂ ජෙනරාල් මේජර් ජෙනරාල් සුදන්ත රණසිංහ මහතා මෙම මාධ්‍ය හමුවේ දී පැවසීය.

කොවිඩ් කෝවිඩ් ව්‍යසන අවදානම් සැළකිල්ලට ගනිමින් නිරිත දිග මෝසම් වර්ෂාව නිමා ආපදාවට ලක්විය හැති දිස්ත්‍රික්කවල ආරක්ෂිත මධ්‍යස්ථාන හදුනාගෙන ඇති බවත්, සෑම දිස්ත්‍රික්කයකම නිරෝධායන මධ්‍යස්ථානයක් වශයෙන් පවත්වාගෙන යා හැකි ස්ථානයක් ද හදුනාගෙන ඇති බවත් මේ අවස්ථාවේ දී පෙන්වා දෙන ලදී. එසේම ත්‍රිවිධ හමුදාවට සහ පොලීසියට සෙවීම් හා මුදවා ගැනීම් කණ්ඩායම් ස්ථාන ගත කිරීම සදහා අවශ්‍ය උපදෙස් ලබාදී ඇති බවත් සියලු දිස්ත්‍රික්කවල මේ වන විට මෝසම් වර්ෂාව හේතුවෙන් ඇතිවිය හැකි ආපදා අවධානම කළමනාකරණය කර ගැනීම සදහා කටයුත කළ යුතු ආකාරය සම්බන්ධව දිස්ත්‍රික් ලේකම්ගේ ප්‍රධානත්වයෙන් දිස්ත්‍රික් ආපදා කළමනාකරණ සම්බන්ධීකරණ කටිමු රැස්කර අවශ්‍ය සම්බන්ධීකරණය සිදු කර ඇති බවත් පෙන්වා දෙන ලදී.

ආරක්ෂක අමාත්‍යාංශයේ ආපදා කළමනාකරණ අංශයේ අතිරේක ලේකම් ක්‍රිස්ටි ලාල් ප්‍රනාන්දු, කාලගුණවිද්‍යා දෙපාර්තමේන්තුවේ අධ්‍යක්ෂ ජෙනරාල් අතුල කරුණානායක, ජාතික ගොඩනැගිලි පර්යේෂණ සංවිධානයේ අධ්‍යක්ෂ ජෙනරාල් ආචාර්ය ආසිරි කරුණාවර්ධන, ආපදා කළමානරකණ මධ්‍යස්ථානයේ නියෝජ්‍ය අධ්‍යක්ෂ ජෙනරාල් ආර් පී සමරක්කොඩි, සෞඛ්‍ය අමාත්‍යාංශයේ ආපදා කළමනාකරණ ඒකයේ අධ්‍යක්ෂ වෛද්‍ය හේමන්ත හේරත්, වාරිමාර්ග දෙපාර්තමේන්තුවේ අධ්‍යක්ෂ එස් පී සී සුගීෂ්වර, ජාතික ආපදා සහන සේවා මධ්‍යස්ථානයේ අධ්‍යක්ෂ චමින්ද පතිරාජ මහතා ඇතුලු නිළධාරීන් පිරිසක් මේ අවස්ථාවට සහභාගී විය.

2020 මැයි මස 28 දින සඳහා කාලගුණ අනාවැකිය – 2020 මැයි මස 27 දින මධ්‍යහන 12.00 ට කාලගුණ විද්‍යා දෙපාර්තමේන්තුව විසින් කරන ලදි.

ශ්‍රී ලංකාව ආසන්න පහළ වායුගෝලයේ පවතින කැළඹිලි ස්වභාවය හේතුවෙන් දිවයිනේ බොහෝ ප්‍රදේශවල විශේෂයෙන් දිවයිනේ නිරිත දිග කොටසේ දැනට පවතින වැසි තත්ත්වයේ වැඩිවීමක් තවදුරටත් බලාපොරොත්තු වේ.

බස්නාහිර, සබරගමුව, මධ්‍යම, වයඹ සහ දකුණු පළාත්වල විටින් විට වැසි හෝ ගිගුරුම් සහිත වැසි ඇති වේ. බස්නාහිර, සබරගමුව සහ දකුණු පළාත්වල සමහර ස්ථානවලමි.මී.150 ට වැඩි වර්ෂාපතනයන් ද ඇති විය හැක.

නැගෙනහිර සහ ඌව පළාත්වලත්, පොලොන්නරුව සහ මුලතිවු දිස්ත්‍රික්කවලත් තැනින් තැන සවස 2.00 න් පමණ පසු වැසි හෝ ගිගුරුම් සහිත වැසි ඇති වේ.

දිවයින හරහා සුළගේ වේගය විටින් විට පැ.කි.මී. 40 දක්වා වැඩි විය හැක.

ගිගුරුම් සහිත වැසි ඇති වන විට අකුණු මඟින් සහ තාවකාලික තද සුළං මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

ඉදිරි පැය 24ට දිවයින වටා වන මුහුදු ප්‍රදේශ සඳහා  කාලගුණ අනාවැකි

වැසි තත්ත්වය:

ගාල්ල සිට හම්බන්තොට   හරහා මඩකලපුව  දක්වා ගැඹුරු සහ නොගැඹුරු මුහුදු ප්‍රදේශවලවිටින් විට වැසි හෝ ගිගුරුම්සහිතවැසි ඇතිවන අතර සමහර ස්ථානවල තද වැසි ඇතිවිය හැක.පුත්තලම සිට කොළඹ   හරහා ගාල්ල දක්වා මුහුදු ප්‍රදේශවල තැනින් තැන වැසි හෝ ගිගුරුම් සහිත වැසි ඇතිවිය හැක.

සුළඟ:

දිවයින වටා වන මුහුදු ප්‍රදේශවල සුළං නිරිතදෙසින් හමන අතර සුළගේ වේගය පැ.කි.මී. (30-40) පමණ වේ. පුත්තලම සිට මන්නාරම හරහා කන්කසන්තුරේ දක්වාත් සහ ගාල්ලසිට හම්බන්තොට හරහා මඩකලපුව දක්වාත් වෙරළට ඔබ්බෙන් වන ගැඹුරු සහ නොගැඹුරු මුහුදු ප්‍රදේශවල සුළගේ වේගය විටින් විට පැ.කී.මී. (50-55) දක්වා වැඩි වියහැක.

මුහුදේ ස්වභාවය:

ගාල්ල සිට හම්බන්තොට හරහා මඩකලපුව දක්වාත් පුත්තලම සිට මන්නාරම හරහා කන්කසන්තුරේ දක්වාත් වෙරළට ඔබ්බෙන් වන ගැඹුරු සහ නොගැඹුරු මුහුදු ප්‍රදේශ විටින් විට රළු විය හැක. දිවයින වටා වන සෙසු මුහුදු ප්‍රදේශ විටින් විට තරමක් රළු විය හැක.ගිගුරුම් සහිත වැසි ඇති වන විට එම මුහුදු ප්‍රදේශවල (පැ.කි.මී. 70-80 දක්වා) තාවකාලිකව තද සුළං ඇති විය හැකි අතර එවිට එම මුහුදු ප්‍රදේශ තාවකාලිකව ඉතා රළු විය හැක. මන්නාරම සිට කොළඹ, ගාල්ල සහ හම්බන්තොට හරහා පොතුවිල් දක්වා වනමුහුදු ප්‍රදේශ ද විටින් විට රළු විය හැකි අතර මුහුදු රළ මීටර්.2.0 – 2.5ක් පමණ ඉහළ යාමේ හැකියාවක් පවතී. ධීවර සහ නාවුක ප්‍රජාව මේ පිලිබදව අවධානයෙන් කටයුතු කරන ලෙස ඉල්ලා සිටිනු ලැබේ.

ලංකා කම්කරු කොංග්‍රසයයේ නායක, ප්‍රජා බල සවිගැන්වීමේ සහ වතු යටිතල පහසුකම් අමාත්‍ය ආරුමුගන් තොන්ඩමන් මහතා අද (26) දින රාත්‍රියේ අභාවප්‍රාප්ත වුණා. මිය යන විට ඒ මහතා 55 හැවිරිදි වියේ පසුවිය. හෘදයාබාධයක් හේතුවෙන් තලංගම රෝහලට ඇතුලත් කිරීමෙන් පසු ඒ මහතා මිය ගිය බව රෝහල් ප්‍රකාශයෙක් පැවසුවා.

කොවිඩ් 19 වසංගතය ව්‍යාප්තිය හමුවේ අතරමංව සිටින හෝ විවිධ දුෂ්කරතාවනට මුහුණපා සිටින විදේශගත ශ්‍රී ලාංකිකයන් සිය රට ගෙන්වා ගැනීම සඳහා නව ක්‍රමයක් සැකසේ.

හෙට පැවැත්වෙන සාකච්ඡාවකදී නව වැඩපිළිවෙළ තීරණය කරනු ලැබේ. විදේශගත ශ්‍රී ලාංකිකයන් ගෙන්වා ගැනීමේ ජූනි මස ගුවන් ගමන් ඒ අනුව සැලසුම් කෙරේ.

වසංගතයේ ගෝලීය ව්‍යාප්තිය නිසා පීඩාවට පත් එතෙර වෙසෙන ශ්‍රී ලාංකිකයන් සිය රට  ගෙන්වා ගැනීමේ වැඩසටහන ජනාධිපති ගෝඨාභය රාජපක්ෂ මැතිතුමාගේ නියමයෙන් පසුගිය ජනවාරී මාසයේ දී ආරම්භ කෙරිණ.

චීනයේ වුහාන් නගරයේ විසූ සිසුන් ඇතුළු ශ්‍රී ලාංකිකයෝ 33 දෙනෙක් පෙබරවාරි 01 වැනිදා දිවයිනට පැමිණියහ. නිරෝධායනයෙන් පසු ඔව්හු නිවෙස් බලා ගියහ. වන්දනාවේ ගොස් ඉන්දියාවේ නගර කිහිපයක කොටු වී සිටි ශ්‍රී ලාංකිකයෝ 839 දෙනෙක් මාර්තු 19 වැනිදා සිය රට ළඟා වූහ.

ඉකුත් මැයි 25 වැනිදා වන විට රටවල් 20ක සිට මෙසේ ගෙන්වා ගත් පිරිස 5485 දෙනෙකි. ඔවුන්ගෙන් 4826 දෙනෙක්ම විදේශ සබඳතා අමාත්‍යාංශය හා විදේශයන්හි ශ්‍රී ලංකා දූත මණ්ඩල එක්ව හඳුනාගත් අය වූහ. PCR පරීක්ෂණවලින් පසු ඔවුන් අතරින් කොරෝනා ආසාදිතයන් ලෙස නිගමනය වූයේ 05 නෙකු නැතහොත් 0.01% ක් පමණි.

එසේ වුවද පසුගියදා එක්සත් අරාබි එමීර් රාජ්‍යයේ ඩුබායිහි සිට පැමිණි 197 දෙනාගෙන් 22ක් ආසාදිතයන් බව නිගමනය කෙරිණ. කුවේට් සිට පැමිණි 462 දෙනාගෙන් දැනට 150ක් PCR පරීක්ෂණයට ලක් කර ඇති අතර 96 දෙනෙක්ම කොරෝනා රෝගීන් ලෙස හඳුනාගනු ලැබූහ. තවත් 300කට වැඩි පිරිසක් පරීක්ෂණයට භාජන කළයුතුව තිබේ.

කුවේට්හි සිට සිය රට ආ සියලු දෙනාම පාහේ විවිධ හේතු නිසා එරට රැඳවුම් ස්ථානවල හෝ පිටුවහල් කිරීමේ කඳවුරුවල සිටි අය වෙති. ආසාදිතයන් ලෙස හඳුනාගත් අයට ප්‍රතිකාර කිරීමද අවශ්‍යතාවකි. මේ පසුබිම මත එතෙර වෙසෙන ශ්‍රී ලාංකිකයන් යළි ගෙන්වා ගැනීමේ ක්‍රමවේදය සංශෝධනය කිරීමට තීරණය විය. ගෙන්වා නොගතහොත් ඔවුනට අත්වන ඉරණම මානුෂීය දෘෂ්ටියකින් බලා ඔවුන් ගෙන්වා ගැනීම ඉදිරියටත් සිදු කිරීමට රජය තීරණය කර ඇත.

නව ක්‍රමවේදය සකස් කිරීම පිණිස හෙට පැවැත්වෙන සාකච්ඡාවට සෞඛ්‍ය සේවා අධ්‍යක්ෂ ජනරාල්, විශේෂඥ වෛද්‍ය අනිල් ජාසිංහ, ජනාධිපති කාර්යාලයේ විදේශ සබඳතා අතිරේක ලේකම් ජයනාත් කොළඹගේ, විශේෂඥ වෛද්‍ය පබා පළිහවඩන, වෛද්‍ය පර්යේෂණ ආයතනයේ අධ්‍යක්ෂ, වෛද්‍ය ජයරුවන් බණ්ඩාර යන මහත්ම මහත්මීහූ සහභාගී වෙති.

රට යථා තත්වයට පත්වෙමින් තිබීම නිසා අගෝස්තු 01 වැනිදා සිට විදේශ සංචාරකයන්ට ගුවන් තොටුපොළ විවෘත කර තැබීමට කොවිඩ් මර්දන කාර්ය සාධක කමිටුව ජනාධිපතිතුමාට යෝජනා කරයි.

අප්‍රේල් මස 30 වැනිදා සිට අද (26) දක්වා කොවිඩ් ආසාදිතයෙකු සමාජයෙන් හමු නොවීම රට ලැබූ ජයග්‍රහණයක් බව කමිටු සාමාජිකයෝ පෙන්වා දෙති.

බිඳ වැටී ඇති සංචාරක කර්මාන්තය නගා සිටුවීමට ගතයුතු ක්‍රියාමාර්ග සහ සැලසුම් ගැන සාකච්ඡා කිරීමට ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් අද ( 26) දහවල් ජනාධිපති කාර්යාලයේ දී කොවිඩ් මර්දන කාර්ය සාධක බලකාය රැස් විය.

සංචාරකයන් සඳහා රට විවෘත කිරීම අන්තර්ජාතික සහ දේශීය සෞඛ්‍ය උපදෙස් මත සිදු කිරීමේ අවශ්‍යතාව ජනාධිපතිතුමා පෙන්වා දුන්නේය. කල් ඇතිව සැලසුම් කිරීමෙන් සෙසු රටවල් අභිබවා ඉදිරියෙන් සිටීමේ හැකියාව පවතී. ප්‍රමුඛතා හඳුනා ගෙන සංචාරක සහ සෞඛ්‍ය ක්ෂේත්‍රයේ ප්‍රවීණයන්ගේ උපදෙස් විමසමින් ඉදිරි පියවර ගත යුතු බව ද රාජපක්ෂ මැතිතුමා පැවසීය.

පළමු අදියර යටතේ ශ්‍රී ලංකා සංචාරක සංවර්ධන අධිකාරියේ ලියාපදිංචි හෝටල් සහ අවන්හල් අභ්‍යන්තර පරිහරණය සඳහා (In house Dining) විවෘත කිරීමට තීරණය කෙරිණ. එහි ප්‍රගතිය අනුව ලියාපදිංචි නොකළ ආයතන සඳහා ද හමුදාවේ සහාය ඇතිව මහජන සෞඛ්‍ය පරීක්ෂකවරුන්ගේ අධීක්ෂණයෙන් ආපනශාලා විවෘත කිරීමට පියවර ගැනේ. සංචාරකයන් බහුල ප්‍රදේශවලට ප්‍රමුඛත්වය දෙමින් විදේශ භාෂා ප්‍රගුණ කළ විශේෂ පුහුණුවලත් පිරිසකගෙන් සමන්විත සංචාරක පොලීසි පිහිටුවීමට ද ජනාධිපතිතුමා උපදෙස් දුන්නේය.

“සංචාරකයන් ආකර්ශණය කර ගැනීමේ දී ඔවුන්ගේ රුචිකත්වය අධ්‍යයනය කරන්න. ඇතැමෙක් වෙරළබඩ විවේකයට කැමතියි. තවත් අය කැමති පුරාවස්තු හා වනජීවින් නරඹන්න. සමහරෙක් උනන්දු වන්නේ තේ වතු බලන්න. ඒ අනුවයි සංචාරක ප්‍රවර්ධන සැලසුම් සකස් කළ යුත්තේ” ජනාධිපතිතුමා කීය.

සෞඛ්‍ය ඇමතිණි පවිත්‍රා වන්නිආරච්චි, සංචාරක අමාත්‍ය ප්‍රසන්න රණතුංග, ජනාධිපති ලේකම් පී.බී. ජයසුන්දර යන මහත් මහත්මීහූ සහ කොවිඩ් මර්දන කාර්ය සාධන බලකායේ නියෝජිතයෝ සාකච්ඡාවට එක්ව සිටියහ.

ශ්‍රී ලංකාවෙන් මෙතෙක් වාර්තා වූ වැඩිම කොවිඩ් ආසාදිතයින් සංඛ්‍යාව අද (26) දින වාර්තා වී තිබෙනවා. සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ අද ප.ව 22.05ට සිදුකළ යාවත්කාලීන කිරීම් අනුව ඒ වන විට වාර්තා වී ඇති කොවිඩ්-19 ආසාදිතයින් සංඛ්‍යාව 135ක් වෙනවා. ඒ අනුව කොවිඩ්-19 ආසාදිත සමස්ත රෝගීන් සංඛ්‍යාව 1317ක්.

සෞඛ්‍ය ප්‍රවර්ධන කාර්යාංශයේ වාර්තා අනුව මේ වන විට ප්‍රතිකාර ලබන රෝගීන් සංඛ්‍යාව 595ක් වන අතර දැනට රෝහල්වල අධීක්ෂණය යටතේ සිටි පුද්ගපයින් සංඛ්‍යාව 76ක්. සුවය ලැබූ සංඛ්‍යාව 712ක් වන අතර මරණ සංඛ්‍යාව 10ක් බවයි සදහන් වන්නේ.

මේ අතර අද දින සෞඛ්‍ය අමාත්‍යාංශය අවධාරණය කළේ පසුගිය මැයි 01 වැනිදා සිට පොදු සමාජයෙන් කිසිදු කොවිඩ්-19 ආසාදිතයෙකු වාර්තා නොවූ බවයි.

අද (25) දින ප.ව 19.05 වන විට කොවිඩ්-19 නව ආසාදිතයින් 41 දෙනකු වාර්තා වූ බවත් ඒ සමග ලංකාවේ සමස්ත කොවිඩ්-19 ආසාදිතයින් සංඛ්‍යාව 1182 දක්වා ඉහළ ගිය බවත් සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ සදහන් වේ.

එහි දැක්වෙන්නේ මේ වන විට කොවිඩ්-19 ආසාදනය වූ රෝගීන් 477 දෙනකු රෝහල් තුළ ප්‍රතිකාර ලබන බවයි. දැනට රෝහල්වල විමර්ශනය යටතේ සිටි පුද්ගලයින් සංඛ්‍යාව 79 දෙනකු වන අතර 695 දෙනකු සුවය ලබා පිටව ගොස් ඇත.

අද දින වාර්තා වූ 52 හැවිරිදි කාන්තාවගේ මරණයත් සමග ලංකාවේ සමස්ත කොවිඩ්-19 මරණ සංඛ්‍යාව 10 දක්වා ඉහළ ගිය බව එම වාර්තාවල සදහන් වේ.

ඊයේ (24) දින රාත්‍රී 23.20 පැයට පමණ මංකි බ්‍රිජ් (ත්‍රිකුණාමලය) නිරෝධායන මධ්‍යස්ථානයේ නිරෝධායනය වෙමින් සිටි කුවේට් හී සිට පැමිණි වයස අවුරුදු 52 ක් පමණ වන කළුතර පයාගල ප්‍රදේශයේ පදිංචි කාන්තාවක් පපුවේ ඇති වූ ආසාදිත තත්වයක් මත මියගොස් ඇති බව නිරෝධායන මධ්‍යස්ථාන භාර වෛද්‍ය නිලධාරි විසින් සනාථ කර ඇති අතර ත්‍රිකුණාමලය මහ රෝහලේදී පශ්චාත් මරණ පරික්‍ෂණය සිදුකිරීමෙන් අනතුරුව කරන ලද PCR පරික්‍ෂණය තුලින් කොවිඩ් – 19 ආසාදනය වී ඇති බවට තහවුරු වී ඇත.

ලංවිම ඉංජිනේරුවන් ඇතුළු ඉහළ නිලධාරීන් විසින් ගෙවිය යුතු උපයන විට බදු ගෙවීම ඔවුන්ගේ වැටුපෙන් අයකර ගන්නවා වෙනුවට විදුලි පාරිභෝගිකයාගෙන් අයකර ගෙවීම  මෙම රජයත් තීරණය කර ඇතැයි මේ අනුව ලංවිම  ඉහළ නිලධාරීන්ගේ බදු වංචාව අලුත් මුහුණුවරකින් ක්‍රියාත්මක වීමට නියමිත බව ද  පාරිභෝගික අයිතීන් සුරකීමේ ජාතික ව්‍යාපාරයේ සභාපති රංජිත් විතානගේ මහතාගේ අත්සනින් අද  (24) දින මාධ්‍ය නිවේදනයක් නිකුත් කරමින් ජනපතිවරයාට පෙන්වා දෙයි.

එම නිවේදනය සම්පූර්ණයෙන්ම පහත පළ වේ.

ලංවිම ඉංජිනේරුවන් ඇතුළු ඉහළ නිලධාරීන් විසින් ගෙවිය යුතු උපයන විට බදු ගෙවීම ඔවුන්ගේ වැටුපෙන් අයකර ගන්නවා වෙනුවට විදුලි පාරිභෝගිකයාගෙන් අයකර ගෙවීම මෙතෙක් සිදු කර ගෙන ගියේ නීති විරෝධීවය.

වැටුප් පරිමාණ වලට අනුව සියළුම රජයේ හා පුද්ගලික අංශයේ සේවකයින්ගෙ වැටුපෙන් උපයන විට ගෙවන බද්ද අඩු කර දේශීය ආදායම්දෙපාර්තමේන්තුවට අදාල ආයතනය විසින් ගෙවිය යුතුවීම සාමාන්‍ය ක්‍රමවේදයයි. එහෙත් ලංකා විදුලි බලමණ්ඩලය විසින් මේ දක්වා කර ඇත්තේ සිය සේවකයින්ගේ ආදායම් බදු විදුලිපාරිභෝගිකයින්ගෙන් අයකර දේශීය දෙපාර්තමේන්තුවට ගෙවීමයි. මෙය අදාල බදු පනත උල්ලංඝණය කිරීමකි. මේ ආකාරයට බදු පනත උල්ලංඝනය කරමින් ලංවිම ඉංජිනේරුවන්ඇතුළු ඉහල නිලධාරීන් විසින් වංචා කර ඇති බදු ප්‍රමාණය රුපියල් කෝටි 500 ඉක්මවයි.

මෙම බදුවංචාවට ලංකා විදුලි බල මණ්ඩලයේ සභාපති ඇතුළු අධ්‍යක්ෂමණ්ඩලය හා සාමාන්‍යාධිකාරිවරයා ඝෘජුව සහාය දක්වා ඇත. විගණකාධිපතිතුමා විසින් 2015 වසරේ සිට මෙම බදු වංචාව හෙලි කර ඇතත් යහපාලන රජය මෙම බදු වංචාවට සහාය දක්වමින් විගණාකාධිපතිවරයාගේ නිර්දේෂ යට ගසා ඇත. මේ බදුවංචාව යටතේ වසරකට රුපියල් මිලියන 400කට අධික බදු මුදලක් විදුලිපාරිභෝගිකයින් මත පැටවී ඇත.

නව රජය බලයට පත්වීමෙන් පසුව උපයන විට බද්ද වෙනුවට ඝෘජුවම අදාල නිලධාරියා විසින් සිය අදායම් බද්ද ගෙවිය යුතු ක්‍රමයක් හදුන්වා දී ඇත. කෙසේ වෙතත් එම බද්ද ද ලංවිම නිලධාරීන් වෙනුවෙන් ලංවිම විසින් ගෙවීමට යෝජනා කර තීරණය කර ඇති බව වාර්තා වේ. ඒ අනුව පසුගිය කාලයේ උපයන ලංවිම විසින් ගෙවන ලද බද්ද නව රජය යටතේ ද ලංවිම විසින්ම ගෙවීම සදහා පිඹුරුපත් සකසා අවසන් කර ඇත. ලංවිම සභාපතිවරයාගේ දේශපාලන වුවමනා ඉටුකරගැනීම සදහා ලංවිම ඉහල නිලධාරීන්ට ලබාදෙන මේ බදු සහන වරදානය අවසානයේ ගෙවීමට සිදුවන්නේ මෙරට දුප්පත් විදුලි පාරිභෝගිකයාට වේ. රජයට අය විය යුතු බදු මුදල් රජයේ මුදලින් ම ගෙවීමේ තීරණය ගත් ලංකා විදුලි බල මණ්ඩල අධ්‍යක්ෂ මණ්ඩලය තුල මහා භාණ්ඩාගාරයේ නියෝජිතයෙක් ද වේ. බදු පනතට හා නීතියට එරෙහිව නිලධාරීන්ගේ ආදායම් බදුරජයේ මුදලින් ගෙවීමට ගත් තීරණයට මහා භාණ්ඩාගාරයේ නියෝජිතයා කල යුතුව ඇත්තේ විරෝධය පල කිරීමය. එහෙත් මෙම බදු වංචාව පිළිබද තීරණය භාණ්ඩාගාර නියෝජිතයාද එකගතාවය පල කර ඇති බව වාර්තා වේ. රාජ්‍ය මුදල් අවභාවිතා කරන ලංවිම පාලන අධිකාරියා හා එහි ඉහල නිලධාරීන්ට එරෙහිව වහා නීතියක්‍රියාත්මක කල යුතු ය.

මෙම බදු වංචාව නැවත්වීම සදහා රජය තීරණය නොකලහොත් විදුලි බිල්පත් නොගෙවීමේ ව්‍යාපාරයක් දියත් කිරීමට මෙරට ලක්ෂ 65ක් වු විදුලි පාරිභෝගිකයින් පියවර ගත යුතුව ඇත.

ජනාධිපති ලේකම්වරයා රජයේ සේවකයින්ගෙන් ඉල්ලා සිටියේ මාසයක වැටුප කොරෝනා අරමුදල සදහා පරිත්‍යාග කරන ලෙසයි. මෙරට බහුතරයක් රජයේ සේවකයින්ගේ වැටුප රැපියල් 35000.00 පමණය. එහෙත් විදුලිබල මණ්ඩලයේ ඉහළ නිළධාරියෙකුගේ වැටුප රැපියල් ලක්ෂ දෙකකට හෝ තුනකට වඩා  වැඩි ගණනකි. නමුත් විදුලිබල මණ්ඩලයේ ඉහළ නිළධාරීන්ගේ ආදායම් බදු මුදල් ගෙවන්නේ විදුලි පාරිභෝගිකයාගෙන් මුදල් ලබා ගෙන රජයයි. රොබුන් හුඩ් පොහොසතුන්ගෙන් මුදල් ගෙන දුප්පතුන්ට බෙදා දුන් අතර පී.බී ජයසුන්දර කරන්නේ දුප්පතුන්ගෙන අරගෙන පොහොසතුන්ට ලබා දීමය. ජනාධිපතිතුමණි වහා මැදිහත් වන්න.