Category: සුපිරි Sports

මෙතෙක් සිහිනයක්ව පැවැති පන්දුවාර විස්සයි-20 ලීග් ක්‍රිකට් තරගාවලියක අඩුව ශ්‍රී ලාංකේය ක්‍රිකට් ක්‍රීඩාවට දායාද කරමින් “My11Circle ලංකා ප්‍රිමියර් ලීග්” පන්දුවාර විස්සයි-20 ලීග් ක්‍රිකට් තරගාවලිය ආරම්භ වීමට තවත් ඇත්තේ පැය 24 කටත් වඩා අඩු කාලයකි. ඇන්ජලෝ මැතිව්ස්ගේ නායකත්වයෙන් යුතු කලම්බු කිංග්ස් සහ කුසල් පෙරේරාගේ නායකත්වයෙන් යුතු කැන්ඩි ටස්කර්ස් අතර නොවැම්බර් මස 26 වැනිදා ප.ව. 7.30 ට ආරම්භවීමට නියමිත තරගයෙන් මෙම අභිනව ලීග් ක්‍රිකට් තරගාවලියේ සමාරම්භය සනිටුහන් වනු ඇත.

වසර ගණනාවක් තිස්සේ පැවැත්වීමට සැලසුම් කළද එහෙත් දිගින් දිගටම කල් දැමීමට සිදුවුණු ලොව අංක 1 ලීග් ක්‍රිකට් තරගාවලි අතරට එක් වන “My11Circle ලංකා ප්‍රිමියර් ලීග්” පන්දුවාර විස්සයි-20 ලීග් ක්‍රිකට් තරගාවලිය මුළු ලෝකයම ව්‍යසනයකට පත්ව තිබෙන අවස්ථාවක යථාර්ථයක් බවට පත්වීම ද සැබැවින්ම සිහිනයක් සැබෑවීමකි. තරගාවලියක් සංවිධානය කිරීමේදී පැන නැගෙන සාමාන්‍ය ගැටලුවලට පරිබාහිරව වූ ගැටළු හෙවත් කොරෝනා වසංගත තත්ත්වය මුළු ලෝකයටම බලපෑමක් ඇති කර තිබෙන අවස්ථාවක ඒ සියල්ලෙන්ම සුරක්ෂිත වූ තරගාවලියක් පැවැත්වීම මෙරට ක්‍රිකට් ඉතිහාසයේ නව පිටුවක් පෙරළන්නකි.

කලම්බු කිංග්ස්

Let’s Rule හෙවත් රජවීමට යමු යන තේමා පාඨය කර ගනිමින් හෙට තරගයට පිවිසෙන කලම්බු කිංග්ස් කණ්ඩායමට ලොව ප්‍රබලම ලීග් තරගාවලි නියෝජනය කරන ලද සුපිරි තරු රැසක් ක්‍රීඩා කරති. එහිදී නායක ඇන්ජලෝ මැතිව්ස්, ඇන්ඩ්‍රෙ රසල්, ඉසුරු උදාන සහ මන්ප්‍රීන් ගෝනි කැපී පෙනෙති.

මොවුන් අතරින් ඇන්ඩ්‍රෙ රසල් සහ ඉසුරු උදාන පසුගියදා නිමාවට පත් වුණු ඉන්දීය ප්‍රිමියර් ලීග් ක්‍රිකට් තරගාවලියේදී පිළිවෙළින් කල්කටා නයිට් රයිඩර්ස් පිල සහ බැංගලෝර් රෝයල් චැලේන්ජර්ස් පිල නියෝජනය කරමින් මෑතකදී විස්සයි-20 තරග රටාවේ වැඩිම තෙම්පරාදුවට පත්ව සිටින ක්‍රීඩකයෝ වෙති.

ශ්‍රී ලංකාව විස්සයි-20 ලෝක කුසලාන දිනා ගන්නා ලද 2014 තරගාවලියේ සහ 2009, 2011 සහ 2012 යන වසර වල අනුශූරතාවට පත් ශ්‍රී ලංකා කණ්ඩායමේ සාමාජිකයකුව සිටි ඇන්ජලෝ මැතිව්ස් ඇතුළු කලම්බු කිංග්ස් කණ්ඩායමට මුහුණ දීමට සිදුව ඇති එකම ගැටළුව වන්නේ පළමු තරගයට පෙර කණ්ඩායමක් ලෙස හරි හමන් පුහුණු සැසිවලට සහභාගිවීමේ අවස්ථාව අහිමිවීමයි. කොරෝනා වෛරස් තත්ත්වයේ බලපෑමත් සමඟ කණ්ඩායමට ආදේශ වුණු ක්‍රීඩකයින්ට නීරෝධායන කාලසීමාවට යටත්ව කාලය ගතකිරීමට සිදුවීම නිසා පළමු තරගයට පෙර කණ්ඩායමක් ලෙස පුහුණුවීම් කිරීමට අවස්ථාව හිමි වූයේ පළමු තරගයට පෙර දින රාත්‍රියේ පැවැති පුහුණු සැසියේදී පමණක් වීමයි.

ඇන්ජලෝ මැතිව්ස්

“හොඳම සූදානමක් කියලා කියන්න බැහැ. මොකද අපි කණ්ඩායමක් විදියට එක දවසයි ප්‍රැක්ටිස් කළේ. නමුත්  ඒක නිදහසට කරුණක් නොවෙයි. එකට ප්‍රැක්ටිස් නොකරට මෙතන ඉන්න සියළු දෙනාම ඇති තරම් ක්‍රිකට් ගහපු අය. ළාබාළ ක්‍රීඩකයොත් ඉන්නවා. නමුත් බහුතරය ක්‍රිකට් ගහලා තියෙනවා. ඒ නිසා මේ දේට හැඩ ගැහෙන්න අමාරුවෙයි කියලා හිතන්නේ නෑ. ඇත්තටම විදෙස් රටවලින් ආපු අයත් අමාරු තත්ත්වයකදී වුණත් ධනාත්මක විදියට තමයි තරගාවලිය දිහා බලන්නේ. මොකද අපි ආස කරන දේ අපිට ආයිත් ලැබිලා තියෙන හින්දා. ඉතිං අපිට මොන ගැටළුව ආවත් අපි ඒ දෙවල් නිරාකරණය කරගෙන තරග ක්‍රීඩා කිරීමට ලැබීමම ලොකු දෙයක්” යි පුහුණුවීම් අවසානයේදී සඳහන් කර සිටියේය.

අයි.පී.එල්. තරගාවලිය අතරතුර ඇතිවූ කලවයේ ආබාධයක් හේතුවෙන පළමු තරගයේදී ඇන්ඩ්‍රෙ රසල්ට පන්දු යැවීම අවධානම් තත්ත්වයක පැවැතියත් ඉදිරි තරගවලදී පන්දු යවන්නකු ලෙසින්ද කටයුතු කිරීමට හේ බලාපොරොත්තුවෙන් පසුවේ. කෙසේ වෙතත් ඇන්ජලෝ මැතිව්ස් ද පන්දු යවන්නකු ලෙස මෙම තරගයේදී කටයුතු කිරීම කලම්බු කිංග්ස් කණ්ඩායමට සුභදායී පණිවිඩයකි.

“මගේ පන්දු යැවීම ස්ථීරයි. නමුත් රසල්ගේ ආබාධය තවමත් තියෙනවා. නමුත් ඔහු පන්දු යවන්නන් උත්සාහ කරනවා. ඒ අනුව ඔහු කියයි ඔහුගේ තත්ත්වය කොහොමද කියලා”යි පන්දු යැවීමේ වූ අවධානම පිළිබඳව අදහස් දක්වා සිටියේය.

හිටපු දකුණු අප්‍රිකානු පිතිකරුවකු වන හර්ෂල් ගිබ්ස් ප්‍රධාන පුහුණුකරුවා ලෙසින් කටයුතු කරන කලම්බු කිංග්ස් කණ්ඩායමේ සහාය පුහුණුකරු ලෙසින් රංගන හේරත් කටයුතු කරන නමුත් නීරෝධායන කාල සීමාවට යටත්ව සිටින හෙයින් ඔහුට තවමත් පුහුණුවීම් සඳහා සහභාගිවීමේ අවස්ථාව අහිමිව තිබේ.

කලම්බු කිංග්ස් සංචිතය

දේශීය – ඇන්ජලෝ මැතිව්ස් (නායක), ඉසුරු උදාන, දිනේෂ් චන්දිමාල්, අමිල අපෝන්සු, අශාන් ප්‍රියන්ජන්, දුෂ්මන්ත චමීර, ධම්මික ප්‍රසාද්, ජෙෆ්රි වැන්ඩර්සි, තික්ෂිල ද සිල්වා, තරිඳු කෞෂාල්, ළහිරු උදාර. අතිරේක – හිමේෂ් රාමනායක, කළන පෙරේරා, තරිඳු රත්නායක, නවෝද් පරණවිතාන

විදේශීය – ඇන්ඩ්‍රෙ රසල් (බ.ඉ.කොදෙව්), මන්ප්‍රීට් ගෝනි (ඉන්දියාව), කායිස් අහමඩ් (ඇෆ්ගනිස්තානය), ඩැනියල් බෙල් (එංගලන්තය), කරීම් ඛාන් (ඇෆ්ගනිස්තානය, ලෝරි එවන්ස් (එංගලන්තය)

කැන්ඩි ටස්කර්ස්

ශ්‍රී ලංකාවේ ප්‍රහාරාත්මක පිතිකරුවකු ලෙසින් නම් දරා සිටින කුසල් පෙරේරා නායකත්වය දරනු ලබන කැන්ඩි ටස්කර්ස් කණ්ඩායමට දක්ෂතාවලින් පරිපූර්ණ ක්‍රීඩකයින් රැසක් ඇතුළත්ව සිටින අතර ඒ අතරින් කුසල් මෙන්ඩිස්, බ්‍රෙන්ඩන් ටේලර්, ඩේල් ස්ටේන් සහ ඩිල්රුවන් පෙරේරා කැපී පෙනෙති.

ජාතික යොවුන් කණ්ඩායමේ ප්‍රධාන පුහුණුකරු ලෙසින් කටයුතු කරන හෂාන් තිලකරත්න මහතා මෙම කණ්ඩායමේ ප්‍රධාන පුහුණුකරු තනතුරේ කටයුතු කරන බැවින්, යොවුන් ක්‍රීඩකයින් වැඩි පිරිසක් පිළිබඳව ඔවුහු බලාපොරොත්තු තබා තිබීම කැපී පෙනෙයි. යොවුන් කණ්ඩායමේ කළමනාකරු ලෙසින් කටයුතු කරන ෆර්වීස් මහරූෆ් ද එම කණ්ඩායමේ කලමනාකරුවා ලෙසින් කටයුතු කිරීම ඒ පිළිබඳව වූ විශ්වාසය වැඩි කිරීමට තවත් හේතුවකි. ඔවුන්ට අමතරව ලීග් ක්‍රිකට් අතර පෙරමුණේ පසුවන සික්කුගේ ප්‍රසන්න සහ අසේල ගුණරත්න හැරුණු විට තරුණ ක්‍රීඩකයක් වන කමිඳු මෙන්ඩිස්ද ප්‍රධාන දායකත්වයක් ලබා දීමට සූදානමින් සිටින ක්‍රීඩකයෝ වෙති.

කැන්ඩි ටස්කර්ස් පිලටද ඇති ප්‍රධානම අඩුපාඩුව බවට පත්ව සිටින්නේ කණ්ඩායමට තේරී පත්ව සිටි විදෙස් ක්‍රීඩකයින් අතරින් සොහෙල් ටන්වීර් කොරෝනා වෛරසය වැළඳීමත් ඒ සඳහා ආදේශ කරන ලද ක්‍රීඩකයින් කීප දෙනෙක්ම තවමත් කණ්ඩායමට එකතුව නොතිබීමය. ඒ අතර බ්‍රෙන්ඩන් ටේලර් සහ ඩේල් ස්ටේන් දෙදෙනා පසුවෙති.  කෙසේ වෙතත් හිටපු ඉන්දීය තුන් ඉරියව් ක්‍රීඩකයකු වන ඉර්ෆාන් පතන් සහ මුනාෆ් පටෙල් කැන්ඩි ටස්කර්ස් බලගැන්වීමට ඉදිරිපත්ව සිටින ප්‍රධාන විදෙස් ක්‍රීඩකයෝ වෙති.

කුසල් ජනිත්

“තරගයට පෙර අපි පුහුණු සැසි 2 කට සහභාගගිවුණා. මාස 8 කටත් වඩා කාලයක් බලාගෙන හිටියා පිටියට එන්න. ඉතිං හොඳ අවස්ථාවක් ලැබිලා තියෙනවා සෑම ක්‍රීඩකයකුටම ඔවුන්ගේ දක්ෂතා පෙන්වන්න. ඒ දක්ෂතා පෙන්වන්න ලැබිලා තියෙන්නේ ලොකු ලීග් තරගාවලියක්. නමුත් නිකන් හිටපු කාල සීමාවේදී ක්‍රීඩකයින්ගේ රිදමය ගිලිහී යෑම හැම ක්‍රීඩකයකුටම ප්‍රශ්නයක් වෙලා ඇති. පුහුණුවීම් කළාට තරග වලට ක්‍රීඩා කරනවා වගේ වෙන්නේ නෑ. මොකද තරග ක්‍රීඩා කරන්න කරන්න තමයි නැති රිද්මයක් ඇඟට ඇවිල්ලා හරි රිද්මයට එන්නේ. අපේ ගොඩක් අය පුහුණුවීම් සහ ශාරීරික ව්‍යායාම් කළා. නමුත් තරගවලට ක්‍රීඩා කළ නැති නිසා කාටවත් කියන්න බෑ දක්ෂතා වල රිද්මයක් ගොඩ නැඟිලා තියෙනවද කියලා. මොකද තරගයක් ක්‍රීඩා කරලම තමයි ඒ ගැන තක්සේරුවක් ගන්න පුලුවන් වෙන්නේ. කොහොම වුණත් අපි තරගාවලියේදී හොඳ දක්ෂතාවයක් ලබා දෙන්න උත්සාහ කරනවා” යි කලම්බු කිංග්ස් එරෙහි තරගය පිළිබඳව අදහස් දක්වා සිටියේය.

නව පන්දුවට පහර දීමට දැඩි රුචිකත්වයක් දරනු ලබන කුසල් පෙරේරා මෙම තරගයේදී ආරම්භක පිතිකරුවකු ලෙස කටයුතු කිරීම අලුතින් හැඳන්විය යුතු දෙයක් නොවන්නේය. කෙසේ වෙතත් වඩාත් වැදගත් වන්නේ තණතීරුවේ හැසිරීමට අනුගත වීම බව කණ්ඩායමට එක්ව සිටින නවකයින් සිහි තබා ගත යුතුවේ. එහිදී පීඩනයකින් තොවර ක්‍රීඩා කළහොත් ඔවුන් තුළ සැඟවී තිබෙන දක්ෂතාවයන් එළියට පෙන්වීමේ හැකියාව ඔවුන්ට උදාවනවා පමණක් නොව එය මෙම තරගාවලිය පැවැත්වීමේදී බලාපොරොත්තු වන ප්‍රධානම ප්‍රතිලාභය වන නවක ක්‍රීඩකයින්ගේ දක්ෂතාවයන් හඳුනා ගැනීමටද ශ්‍රී ලංකා ක්‍රිකට් ආයතනයට මාවතක් විවර වන්නේය.  

කැන්ඩි ටස්කර්ස් සංචිතය

දේශීය – කුසල් පෙරේරා (නායක), කුසල් මෙන්ඩිස්, සික්කුගේ ප්‍රසන්න, අසේල ගුණරත්න, කමිඳු මෙන්ඩිස්, ඩිල්රුවන් පෙරේරා, නුවන් ප්‍රදීප්, ප්‍රියමාල් පෙරේරා, කවිෂ්ක අංජුල, ලසිත් ඇඹුල්දෙණිය, විශ්ව ප්‍රනාන්දු, ඉෂාන් ජයරත්න. අතිරේක – කෙවින් කොත්තිගොඩ, ළහිරු සමරකෝන්, නිශාන් මදුෂ්ක, චාමිකර එදිරිසිංහ, 

විදෙස් – බ්‍රෙන්ඩන් ටේලර් (සිම්බාබ්වේ), ඩේල් ස්ටේන් (දකුණු අප්‍රිකාව), ඉර්ෆාන් පතන් (ඉන්දියාව), මුනාෆ් පටෙල් (ඉන්දියාව), නවීන් උල්හක් (ඇෆ්ගනිස්තානය), රහමනුල්ලා ගුර්බාස් (ඇෆ්ගනිස්තානය), සොහෙල් ටන්වීර් (පාකිස්තානය)

විනිසුරුවන්

පිටියේ විනිසුරුවන් – රවීන්ද්‍ර විමලසිරි, ලින්ඩල් හැනිබල්.

රූපවාහිනී විනිසුරු – රුචිර පල්ලියගුරුගේ

සිව්වැනි විනිසුරු – ප්‍රගීත් රඹුක්වැල්ල

තරග තීරක – ග්‍රෑම් ලැබ්‍රෝයි

ශ්‍රී ලංකා ක්‍රිකට් නිල වෙබ් අඩවිය ඇසුරිණි

ලෝකයේ එතෙක් මෙතෙක් බිහි වූ සුපිරිම පාපන්දු තරුවක් වන ආර්ජන්ටිනා හිටපු පාපන්දු ක්‍රීඩක දියාගෝ මැරඩෝනා අද (25) දින මියගියා. මියයන විට 60 වැනි වියේ පසු වූ පාපන්දු තරුවගේ මරණයට හේතුව වශයෙන් සදහන් වන්නේ හෘදයාබාධයක්.

1970 දශකයේ අග භාගයේ දී ජාත්‍යාන්තර පාපන්දු පිටියට පිවිසි මැරඩෝනා ලෝක පාපන්දු ශූරතා තරඟාවලියන්හි දී විශිෂ්ඨ දක්ෂතා දක්වා ඇති අතර 1986 වසරේ දී ආර්ජන්ටිනාවට ලෝක පාපන්දු ශූරතාවය දිනා දීමට ඔහු මුල්විය.

ජාත්‍යන්තර ක්‍රිකට් කවුන්සිලය විසින් සංවිධානය කරන “ICC Awards of the Decade” සඳහා ශ්‍රී ලංකා ක්‍රිකට් කණ්ඩායම නියෝජනය කළ ක්‍රීඩකයින් සිවුදෙනකු යෝජනාවී ඇතැයි වාර්තා වෙනවා.

ඒ අනුව මහේල ජයවර්ධන, කුමාර් සංගක්කාර, ලසිත් මාලිංග සහ රංගන හේරත් ගේ නම් විවිධ අංශ යටතේ යෝජනාවී තිබෙන බවයි එම වාර්තාවල සදහන් වන්නේ.

දශකයක් තුළ ක්‍රීඩකයින් සහ ක්‍රීඩිකාවන් දක්වා ඇති දක්ෂතා අනුව ඡන්ද විමසීමකින් විවිධ අංශ ඔස්සේ “ICC Awards of the Decade” හි ජයග්‍රාහකයින් තෝරා ගැනීමට නියමිත අතර ඒ ඒ අංශවල හොඳම ක්‍රීඩකයා හෝ ක්‍රීඩිකාව තෝරාගැනීම සඳහා 10%ක් ක්‍රිකට් ලෝලීන්ගේ ඡන්දය ද ඉතිරි 90% විශේෂඥ කමිටු සාමාජිකයින් විසින් ලබාදෙන ඡන්දය ද භාවිත කිරීමට නියමිත අතර “ICC Spirit of Cricket Award of the Decade” ජයග්‍රාහකයා තෝරාගැනීම සඳහා 100%ක්ම භාවිත කරනුයේ ක්‍රිකට් ලෝලීන්ගේ ඡන්දයයි.

2011 සිට තෝරා ගැනුණු ක්‍රීඩක ක්‍රීඩිකාවන් අතුරින් එහි ජයග්‍රාහකයා තෝරා ගැනීමට නියමිතව තිබෙනවා

එළැඹෙන 26 වැනිදා ආරම්භ වන “My11Circle ලංකා ප්‍රිමියර් ලීග්” විස්සයි-20 ලීග් ක්‍රිකට් තරගාවලියේ ගුණාත්මක භාවය රැක ගැනීම සඳහා ගත යුතු ඕනෑම ක්‍රියාමාර්ගයක් ගැනීමට ශ්‍රී ලංකා ක්‍රිකට් ආයතනය පසුබට නොවන අතර එකී ගුණාත්මකභාවය බිඳ වැටෙන කුමන කටයුත්තකදී තරගාවලිය අතරතුරදී වාර්තාවුවහොත් ඒ සම්බන්ධව දැඩි තීරණය ගැනීමේ ප්‍රතිපත්තියක් අනුගමනය කරනු ඇත.

LPL තරගාවලියේ දූෂණ විරෝධී ක්‍රියා පාලනය පිළිබඳව කටයුතු කිරීම සඳහා දැනටමත් අන්තර්ජාතික ක්‍රිකට් සභාව යටතේ පවතින දූෂණ විරෝධී අංශ නිලධාරීන් දෙදෙනකු ශ්‍රී ලංකාවට පැමිණ සිටින අතර ඔවුහු ශ්‍රී ලංකා ක්‍රිකට් ආයතන දූෂණ විරෝධී අංශයේ නිලධාරීන් සමඟ එක්ව කටයුතු කරති. ක්‍රීඩකයින් සහ කණ්ඩායම් භාර නිලධාරීන් නවාතැන් ගෙන සිටින හම්බන්තොට ෂැන්ග්‍රිලා හෝටලයේම නවාතැන් ගෙන සිටින එම නිලධාරීහු හෝටල් පරිශ්‍රය, තරග ක්‍රියාත්මක ක්‍රීඩාංගණයේදී මෙන්ම LPL හා සම්බන්ධව පැවැත්වෙන සියළුම නිල උත්සව අවස්ථාවන්හිදී ඒ පිළිබඳව සුපරික්ෂාකාරීව කටයුතු කරනු ඇත. 

ඒ අනුව තරගාවලිය අතරතුර යම්කිසි දූෂිත ප්‍රවේශයන් වාර්තා වුවහොත් ඒ පිළිබඳව දූෂණ දූෂණ විරෝධී අංශ නිලධාරීන්ට පැමිණිලි කිරීමට තරගාවලිය නියෝජනය කරනු ලබන ක්‍රීඩකයින් සහ කණ්ඩායම් නිලධාරීහු බැඳී සිටිති. එසේ සිදුකරන පැමිණිලි සම්බන්ධව දැඩි රහස්‍ය භාවයකින් කටයුතු කිරීමට දූෂණ විරෝධී අංශය කටයුතු යොදනු ඇත.

තරගාවලිය අතරතුර සැක සහිත හෝ දූෂිත ක්‍රියායාවක් පිළිබඳව වාර්තා වුවහොත් ඒ පිළිබඳව තොරතුරු ලබා දීම වෙනුවෙන් ශ්‍රී ලංකා ක්‍රිකට් ආයතනය සහ දූෂණ විරෝධී අංශය විසිහතර පැය පුරාම ඇමැතුම් ලබා ගැනීමට හැකිවන පරිදි දුරකථන අංකයක් පවත්වාගෙන යනු ලබන අතර තරගාවලිය සමාරම්භයට පෙර සියළුම ක්‍රීඩකයින්ට සහ නිලධාරීන්ට දූෂණ විරෝධී කටයුතු සම්බන්ධව වැඩි දුර දැනුවත් කිරීමේ වැඩසටහනක්ද පැවැත්වෙනු ඇත.

කෙසේ වෙතත් දූෂණ විරෝධී කටයුතු සම්බන්ධ අනුගමනය කළ යුතු කරුණු, ක්‍රීඩකයින් සහ නිලධාරීන් වෙසෙන ස්ථානවලදී එලෙසින්ම ක්‍රියාත්මක කිරීමට දූෂණ විරෝධී අංශ නිලධාරීහු පියවර ගෙන තිබේ. 

දූණ විරෝධී ක්‍රියාවන් සම්බන්ධව කණ්ඩායම්වලට හිමිකරුවන් සහ නිලධාරීන්ව පූර්ව දැනුවත් කිරීමක් ශ්‍රී ලංකා ක්‍රිකට් ආයතන ප්‍රධාන විධායක නිලධාරී ඈෂ්ලී ද සිල්වා මහතාගේ ප්‍රධානත්වයෙන් ඉකුත්දා ශ්‍රී ලංකා ක්‍රිකට් මූලස්ථානයේදී පැවැති අතර තරගාවලිය ඉතා ඉහළ ගුණාත්මකභාවයකින් යුතුව පවත්වාගෙන යෑමේ වැදගත්කම පිළිබඳව එහිදී අවධාරණය කර සිටි අතරම ඒ සඳහා වූ සහායද ඔවුන්ගෙන් ඉල්ලා සිටියේය.

එහිදී අදහස් දක්වා ඈෂ්ලී ද සිල්වා මහතා, ” දූෂණ විරෝධී ලේඛනයට අදාළ කරුණු පිළිපදිමින් පිරිසිදු සහ සාධාරණ තරගාවලියක් පැවැත්වීමට කටයුතු කරන බවට සහතික වන මෙන් අපි ක්‍රීඩකයින්ගෙන් සහ නිලධාරීන්ගෙන් ඉල්ලා සිටියෙමු”යි සඳහන් කර සිටියේය. 

ශ්‍රී ලංකා ක්‍රිකට් ආයතනය සහ දූෂණ විරෝධී අංශ හැරුණු විට දූෂිත ක්‍රියාවලින් තොරව තරගාවලිය ඉදිරියට පවත්වාගෙන යෑම සහතික කර ගැනීම සඳහා අවශ්‍ය විටෙක ශ්‍රී ලංකා රජයේ ආරක්ෂක අංශවල සහාය ලබා ගැනීමටද ශ්‍රී ලංකා ක්‍රිකට් ආයතනය බලාපොරොත්තුවෙන් පසුවේ.

එපමණක් නොව, මෙම තරගාවලිය හා බැඳි සිටින්නන්, 2019 වසරේ අංක 24 දරණ ක්‍රීඩා පනතට අදාළව මෑතකදී බලාත්මක කරන ලද “අපරාධ වැළැක්වීමේ පනතෙහි” විධිවිධානවලට අනුකූලව කටයුතු කළ යුතු වේ.  එහිදී ක්‍රීඩාවේ ඕනෑම ආකාරයක දූෂිත අවස්ථාවක් හෙවත්, තරග පාවාදීමක්, නීති විරෝධී ලෙස හැසිරවීම සහ ඔට්ටු තැබීම ශ්‍රී ලංකා අපරාධ නීතිය යටතේ සාපරාධී වරදක් ලෙස සලකනු ලැබේ. 

තරගාවලිය දූෂණ විරෝධී කටයුතු සම්බන්ධව දූෂණ විරෝධී අංශ දුරකථන අංක

ශ්‍රී ලංකාව – +94769053800

ඩුබායි – +97565458909 (Voice and Whatsapp)

විද්‍යුත් තැපැල් (Email) – anti-corruption@srilankacricket.lk 

ක්‍රීඩකයෙකුට ජාත්‍යන්තර ක්‍රිකට් තරග සඳහා සහභාගී විය හැකි අවම වයස් සීමාව අවුරුදු 15ක් ලෙස, ජාත්‍යන්තර ක්‍රිකට් කවුන්සිලය විසින් ප්‍රකාශයට පත් කර තිබේ. පිරිමි, කාන්තා යන පාර්ශව දෙකටම එය පොදු වශයෙන් බලපැවැත්වෙන බව ජාත්‍යන්තර ක්‍රිකට් කවුන්සිලය නිවේදනයක් නිකුත් කරමින් සඳහන් කරයි.

ශ්‍රී ලංකා ජාතික කණ්ඩායමේ හිටපු ක්‍රිකට් ක්‍රීඩකයෙක් මෙන්ම පුහුණුකරුවෙක් ද වූ නුවන් සොයිසා, ජාත්‍යන්තර ක්‍රිකට් කවුන්සිලයේ දූෂණ මර්ධන චෝදනා තුනකට වරදකරු වී ඇති බව වාර්තාවේ.‍

2018 වසරේ නොවැම්බර් මාසයේ දී ජාත්‍යන්තර ක්‍රිකට් කවුන්සිලයේ දූෂණ මර්ධන ඒකකය විසින් නුවන් සොයිසාට එරෙහිව චෝදනා ගොනු කළේය. තරග පාවාදීමක් සම්බන්ධයෙන් තොරතුරු දැනුවත්ව ඒ පිළිබඳ බලධාරීන් දැනුවත් නොකිරීම ඇතුළු චෝදනා කිහිපයක් නුවන් සොයිසාට එල්ල විය.

අනතුරුව ස්වාධීන විමර්ශන මණ්ඩලයක් විසින් සිදු කළ පරීක්‍ෂණයකින් පසුව ඔහු වරදකරු බවට තීන්දු කර ඇත.  

නුවන් සොයිසා වරදකරු වීමට අදාළ වගන්ති පහත පරිදි වේ. 2.1.1 වන වගන්තිය – තරඟයක ප්‍රතිපලය, ප්‍රගතිය, හැසිරීම හෝ වෙනත් අංශ (ය) නුසුදුසු ලෙස නිවැරදි කිරීමට හෝ සැලසුම් කිරීමට හෝ වෙනත් ආකාරයකින් බලපෑම් කිරීමට එකඟතාවයකට හෝ උත්සාහයකට පක්ෂ වීම.2.1.4 වගන්තිය – 2.1 වන වගන්තිය උල්ලංගණය කිරීම සඳහා ඕනෑම සහභාගිවන්නෙකුට සෘජුව හෝ වක්‍රව ඉල්ලීම, පොළඹවීම, පොළඹවා ගැනීම, උපදෙස් දීම, ඒත්තු ගැන්වීම, දිරිගැන්වීම හෝ හිතාමතාම පහසුකම් සැපයීම.2.4.4 වන වගන්තිය – කේතය යටතේ දූෂිත හැසිරීම් වල යෙදීමට ලැබුණු ඕනෑම ප්‍රවේශයක් හෝ ආරාධනා පිළිබඳ සම්පූර්ණ තොරතුරු ACU වෙත අනාවරණය කිරීමට අපොහොසත් වීම. 

නුවස් සොයිසාට තවදුරටත් තරග තහනම ක්‍රියාත්මක අතර පනවන දඩුවම් සම්බන්ධයෙන් ඉදිරියේ දී කඩිනමින් ජාත්‍යන්තර ක්‍රිකට් කවුන්සිලය  විසින් ප්‍රකාශයට පත් කිරීමට නියමිත බව වාර්තා වේ.

එදා මෙදා තුර ශ්‍රී ලාංකේය ක්‍රිකට් ඉතිහාසයේ බිහිවූ චරිත ගණනාවකි. ඒ අතරින් බන්දුල වර්ණපුරට හිමිවන්නේ සුවිශේෂී ස්ථානයකි. ටෙස්ට් වරම් හිමිවීමෙන් පසු ශ්‍රී ලංකා කණ්ඩායම මෙහෙයවන ලද පළමු නායකයා ලෙසින් කටයුතු කිරීම පමණක් නොව එක්දින තරගවලදී පළමු ජයග්‍රහණය අත්කර දුන් කණ්ඩායමේ නායකයා ලෙසින්ද බන්දුල වර්ණපුර මහතා ඉතිහාසගතවීමට වාසනාවන්ත වී තිබේ.

ශ්‍රී ලංකාවට ටෙස්ට් වරම් උදා කර දුන් 1982 වසරේ පෙබරවාරි 17 වැනිදා සිට 21 වැනිදා දක්වා එංගලන්තයට එරෙහිව පී. සරා ඕවල් පිටියේ පැවැති පළමු ටෙස්ට් තරගයට නායකත්වය ලබා දුන් වර්ණපුර මහතා මේ වන විටත් විශ්‍රාම සුවයෙන් පසු වුවද ක්‍රිකට් ක්‍රීඩාවේ ප්‍රගමනයට ඔහුගේ සේවය අවශ්‍ය සෑම අවස්ථාවකදීම ඒ සඳහා නොපැකිළිවම ඉදිරිපත් වන්නේය. ක්‍රීඩාවෙන් සමුගැන්මෙන් පසු ජාතික කණ්ඩායමේ පුහුණුකරුවකු ලෙසද කටයුතු කරන ඒ මහතා, පසු කළෙක මෙරට ක්‍රිකට් පරිපාලනයේ පමණක් නොව ආසියානු ක්‍රිකට් කවුන්සිලයේද පරිපාලකයෙකු ලෙසින් සේවය කිරීම ඊට උදාහරණ සපයන්නේය.

ඒ අනුව ශ්‍රී ලංකා ක්‍රිකට් මාධ්‍ය අංශය බන්දුල වර්ණපුර මහතා සොයා ගියේ ටෙස්ට් වරම් හිමිවීමෙන් වසර 40 කට ආසන්න කාලයක් ගතවී තිබෙන මේ මොහොතේදී මෙරට ක්‍රිකට් ක්‍රීඩාව දියුණුවීමට අත්‍යවශ්‍යම අංගයක් බවට පත්ව තිබෙන ‘ලංකා ප්‍රිමියර් ලීග් විස්සයි-20 ලීග් ක්‍රිකට් තරගාවලිය’ පිළිබඳව මෙරට පළමු ටෙස්ට් ක්‍රිකට් නායකයා ලෙසින් තමන් දරන මතය පිළිබඳව තොරතුරු දැන ගැනීමටය.

“ඇත්තටම මේ තරගාවලිය සංවිධානය කිරීම ක්‍රීඩකයින්ට විතරක් නොවෙයි. මේ දිනවල සෞඛ්‍ය ගැටළු සහ වෙනත් ප්‍රශ්නවලට මුහුණ දී සිටින ක්‍රීඩාවට ආදරය දක්වනු ලබන අපේ ජනතාවටත් විශාල වශයෙන් කායික මෙන්ම මානසික සුවයක් අත්කර ගැනීමට මේ තරගාවලිය තුළින් හැකි වෙනවා. ඒ අනුව මේ වගේ තරගාවලියක් පැවැත්වීම සම්බන්ධව ක්‍රිකට් ආයතයනයට ප්‍රශංසාව හිමිවිය යුතුයි” යැයි සඳහන් කර සිටියේය.

“ක්‍රීඩකයින් වුණත් දිගටම ක්‍රීඩාවේ යෙදිලා හිටියේ නැත්නම් ඔවුන්ගේ දක්ෂතා අඩු වෙනවා. ඒ නිසා ඔවුන් අඩුම ගාණේ ව්‍යායාම්වල හෝ නිරත විය යුතුයි. මේ වගේ වෛරසයක් රට තුළ ආසාධනය වීම නිසා ක්‍රීඩකයින්ට තරගවලට සහභාගිවීමේ අවස්ථාව අහිමි වෙලා තියෙනවා. ඒ වගේ අවස්ථාවක් ඇත්තටම මෙවැනි තරගාවලියක් පැවැත්වීම තුළින් ඔවුන්ගේ ක්‍රීඩා දක්ෂතා ගැන සැලකිය යුතු මට්ටමේ තක්සේරුවක් ලබා ගැනීමේ හැකියාව පවතිනවා” යි වර්ණපුර මහතා පවසයි.

දකුණතින් පන්දුවට පහර දෙන වර්ණපුර මහතා, ශ්‍රී ලංකාව වෙනුවෙන් මුල්ම ටෙස්ට් ලකුණු ලබාගත් පිතිකරුවා වීමට සමත්වීම පමණක් නොව ආරම්භක පන්දු යවන්නකු ලෙසින්ද කටයුතු කිරීමට වාසනාවන්ත වූවේය. මංගල තරගයට ක්‍රීඩා කරන ලද ක්‍රීඩකයින් 11 දෙනා අතර මංගල පන්දුවාරය අසන්ත ද මෙල් මහතා ක්‍රියාත්මක කරද්දී අනෙක් අන්තයෙන් ආරම්භක පන්දු යවන්නා ලෙසින් ද කටයුතු කරන ලද්දේ වර්ණපුර මහතා වීම විශේෂත්වයකි.

“මේ වගේ තරගාවලියක් පැවැත්වීමේදී දේශීය තරගවලදී සිය දක්ෂතා හිර කරගෙන ඉන්න ක්‍රීඩකයින්ට තම දක්ෂතාවයන් පෙන්වීමට පමණක් නොවෙයි ජාත්‍යන්තර කරා යෑමට හොඳ අවස්ථාවක් සැලසෙනවා. ඒ වගේම අපි දන්නවා අපේ ක්‍රිකට් ගහන හැම ක්‍රීඩකයෙක්ටම ජාත්‍යන්තර තරග හෝ විදේශයන්හි පැවැත්වෙන තරග වලට ක්‍රීඩා කිරීමේ අවස්ථාවන් ලැබෙන්නේ හරි අඩුවෙන් කියලා. අන්න ඒ වගේ ක්‍රීඩකයින්ට එතෙරින් එන දක්ෂ ක්‍රීඩකයින් සමඟ ක්‍රීඩා කිරීමේදී ඔවුන් තරගයකට හැඩ ගැහෙන විදිය, ක්‍රීඩා කිරීමේදී භාවිතා කරනු ලබන විවිධ උපක්‍රම වගේ දේවල් පිළිබඳව වැඩි අවබෝධයක් ලබා ගැනීමේ හැකියාව පවතිනවා”.

“ඒ වගේම ක්‍රීඩකයින්ට ක්‍රීඩා කටයුතු මෙන්ම ජීවත් වෙන්න සල්ලි උවමනා කරනවා. මොකද ඔවුන් වෙන රැකියාවක් කරන්නේ නැති නිසා. අපේ කාලෙ නම් අපි ක්‍රීඩා කළේ රැකියාවක් කරන ගමන්. නමුත් අද තත්ත්වය වෙනස්. අද ක්‍රීඩකයින් කරන්නේ ක්‍රීඩාවම විතරයි. එක්කෝ ලංකාවේ. නැත්නම් පිට රටක. ඉතිං මේ වගේ තරගාවලියක් සංවිධානය කිරීමේදී ක්‍රීඩකයින්ගේ මූල්‍ය ගැටළුවලටත් මේ වගේ තරගාවලියක් පැවැත්වීමේදී විසඳුමක් ලැබෙනව” යැයි වර්ණපුර මහතා පවසයි.

ශ්‍රී ලංකාව වෙනුවෙන් ටෙස්ට් ටෙස්ට් තරග 4 කට සහ එක්දින තරග 12 කට ක්‍රීඩා කර ඇති වර්ණපුර මහතාගේ මංගල ඉනිම ලකුණු 02 කට සීමා වුවත් දෙවැනි ඉනිමේදී ලකුණු 38 ක් වාර්තා කිරීමට සමත්වූවේය. එය ඔහුගේ ටෙස්ට් තරග දිවියේ වාර්තා කරන ලද ඉහළම ලකුණු සංඛ්‍යාව බවට පත්ව තිබේ. 1975 සහ 1979 යන වසරවල එංගලන්තයේ පැවැති පළමු ලෝක කුසලාන 2 සඳහා සහභාගිවුණු කණ්ඩායමේ සාමාජිකයකු ලෙසින් කටයුතු කළ වර්ණපුර මහතා කොදෙව් පිලට එරෙහිව ශ්‍රී ලංකාව ක්‍රීඩා කරන ලද මංගල තරගයේදී හතරේ පහර 2 ක් සමඟින් ලකුණු 08 ක් ලබා ගන්නේය. ඒ මහතා විසින් එල්ල කරන ලද පළමු හතරේ පහර මෙරට එක්දින ක්‍රිකට් කරළියේ පිතිකරුවකු එල්ල කරන ලද පළමු හතරේ පහර ලෙසින් ඉතිහාස ගත වී තිබේ.

“මූල්‍යමය අතින් බැලුවහම වාසි වෙයිද පාඩු වෙයිද කියලා කියන්න අමාරුයි. ඒක තරගාවලිය ගහලම බලන්න ඕන. මේ තරගාවලියේදී ප්‍රවේශ පත්‍ර වලින් ආදායමයක් එන්නෙත් නෑ. කොහොම වුණත් තරගාවලියක් සාර්ථක කර ගන්න අනුග්‍රාහක ආයතන ඉදිරියට එන්න ඕන..

“ඒ වගේමයි ප්‍රේක්ෂකයින්. අපි දැක්කා අයි. පී. එල්. තරගාවලිය නරඹන්න අපේ ක්‍රීඩා ලෝලීන් දැඩි උනන්දුවක් දැක්වුවා. ඉතිං අපේ රටේ ඒ වගේ තරගාවලියක් පැවැත්වෙද්දී අයි. පී. එල්. නැරුඹුවාටත් වඩා උනන්දුවක් දක්වාවි කියලා මම විශ්වාස කරනවා” යැයි වර්ණපුර මහතා LPL තරගාවලිය සම්බන්ධව අවසන් වශයෙන් අදහස් දක්වා සිටියේය.

ශ්‍රී ලංකා ක්‍රිකට් ආයතනයේ නිල වෙබ් අඩවිය ඇසුරිණි

මෙරට ක්‍රිකට් ක්‍රීඩාවට කාලයක් තිස්සේ අඩුපාඩුවක්ව පැවැති ගුණාත්මක බවින් යුත් ජාත්‍යන්තර මට්ටමේ විස්සයි-20 ලීග් ක්‍රිකට් තරගාවලියක අඩුව පුරවමින්, ‘ලංකා ප්‍රිමියර් ලීග් ක්‍රිකට් තරගාවලිය හෙවත් LPL ක්‍රිකට් තරගාවලිය පැවැත්වීමට ශ්‍රී ලංකා ක්‍රිකට් ආයතනය මුල පිරීම ඉතා කාලෝචිත ක්‍රියාවක් බව පවසන ජාතික කණ්ඩායමේ ප්‍රධාන පුහුණුකරු මිකී ආතර් මෙකී තරගාවලිය හරහා දක්ෂතාවලින් හෙබි තරුණ ක්‍රීඩකයින් හඳුනා ගැනීමට මෙන්ම ඔවුන්ගේ දක්ෂතා වේගවත්ව දියුණුකර ගැනීමට කදිම වේදිකාවක් නිර්මාණය කර දෙන බව සඳහන් කර සිටියි.

දේශීය ක්‍රීඩකයින් 50 දෙනෙකු සහ විදෙස් ක්‍රීඩකයින් 30 දෙනෙකුගේ සහභාගිත්වයෙන් එළැඹෙන නොවැම්බර් 26 වැනිදා හම්බන්තොටදී ආරම්භ වන අභිනව එල්. පී. එල්. ක්‍රිකට් තරගාවලිය පිළිබඳව අදහස් දක්වමින් දකුණු අප්‍රිකානු ජාතික පුහුණුකරුවා ඉහත අදහස් පළ කර සිටියේය.

දෙසැම්බර් 16 වැනිදා දක්වා වූ පුරා දින 20 ක් මුලුල්ලේ පැවැත්වෙන මෙම තරගාවලියේදී ක්‍රීඩකයින්ගේ දක්ෂතා සංවර්ධනය වීම කාරණා කීපයක් හරහා සිදුවන බවත්, ඒ අතරින් වැදගත්ම කරුණ බවට පත්වන්නේ පීඩන තත්ත්වයන් යටතේ ක්‍රීඩකයින් කොයි අයුරින් ක්‍රීඩා කළ යුතු ද යන්න ඉගැන්වීම බව සඳහන් කර සිටියි.

“වැදගත්ම දේ තමයි පීඩනය යටතේ ක්‍රීඩා කළ යුතු ආකාරය ක්‍රීඩකයින්ට ඉගැන්වීම.  එල්. පී. එල්. තරගාවලිය හරහා එවැනි අත්දැකීම් රාශියක් ක්‍රීඩකයින්ට ලබා ගැනීමේ හැකියාව උදාවනවා” යැයි ආතර් තම විශ්වාසය පළ කර සිටියි.

පීඩනයේදී හැසිරිය යුතු ආකාරය, විදේශීය ක්‍රීඩකයින් මෙන්ම පුහුණුකරුවන් සමඟ අන්‍යෝන්‍ය ලෙස කටයුතු කිරීම සහ වෘත්තීය පරිසරයක් වටා සිටීමට නවක ක්‍රීඩකයින්ට අවස්ථාව හිමිවීම හරහා එම නවක ක්‍රීඩකයින්ගේ දක්ෂතා වර්ධනය වන අයුරි තමන් ලෝකය පුරා පැවැත්වෙන ලීග් තරගාවලි වලදී තමන් දැක තිබෙන බවද ප්‍රධාන පුහුණුකරු මෙහිදී සඳහන් කර සිටියේය.

“ඇත්තටම විදේශීය ක්‍රීඩකයින් මෙන්ම ජාතික කණ්ඩායම නියෝජනය කරනු ලබන ප්‍රධාන ක්‍රීඩකයින් සමඟ එකතුව ක්‍රීඩා කිරීමට නවක ක්‍රීඩකයින්ට අවස්ථාව ලැබීම හරහා තරගයකදී  ජ්‍යෙෂ්ඨයින්ගේ සූදානම ගැන නිරීක්ෂණය කිරීම, තරගයකට පෙර සූදානම් වීම වගේම දිනය සැලසුම් කරන්නේ කොහොමද කියන දේවල් ගැනත් ඉගෙන ගන්න හොඳ අවස්ථාවක්” යැයිද ආතර් පවසයි.

කණ්ඩායම් 5 කගේ සහභාගිත්වයෙන් පැවැත්වෙන LPLතරගාවලිය ලබන දෙසැම්බර් මස 16 වැනිදා පැවැත්වීමට නියමිත අවසන් මහ තරගය ඇතුළුව සමස්ථ තරගාවලිය තරග 23 කින් සමන්විතවනු ඇත.

කෙසේ වෙතත් මේ ආකාරයේ ෆ්‍රැන්චයිස් ක්‍රිකට් තරගාවලිවලදී සෑම විටම දක්ෂතා සහිත නවක ක්‍රීඩකයින් කිහිප දෙනෙකුගේ දක්ෂතා දැක බලා ගැනීමේ අවස්ථාව උදාවන අතර ඒ සදහා මෙම තරගාවලිය කදිම අවස්ථාවක් නිර්මාණය කර දී තිබෙන බව මිකී ආතර් සිය විශ්වාසය පළ කර සිටියි.

“මම නිතරම තරුණ වගේම නැවුම් දක්ෂතා තියෙන ක්‍රීඩකයින් සොයමින් ඉන්නවා. ඒ අනුව ඔවුන් අපි සොයන නිර්ණායකයන්ට ගැලපෙන පරිදි දක්ෂතා දැක්වීමට හැකියාවක් තියෙනවා නම් සහ ජාත්‍යන්තර මට්ටමේ ජයග්‍රහණ කරා කණ්ඩායම රැගෙන යා හැකි තරමේ දක්ෂතා තියෙනවා නම් ඔවුන් දෙස මම උනන්දුවෙන් බලන්න සූදානම්. කෙසේ නමුත් ජාත්‍යන්තර ක්‍රිකට් තරග සහ ෆ්‍රැන්චයිස් ක්‍රිකට් තරග අතර යම් කිසි පරතරයක් තියෙන බව අප තේරුම් ගත යුතුයි” යැයි ආතර් වැඩිදුරටත් සඳහන් කර සිටියි.

බටහිර ඉන්දීය කොදෙව් කණ්ඩායමට එරෙහිව මෙම පෙබරවාරි මසදී පැවැති එක්දින සහ විස්සයි-20 තරගාවලියෙන් පසු ශ්‍රී ලංකා කණ්ඩායමට මේ වන තෙක් කිසිදු ජාත්‍යන්තර මට්ටමේ තරගාවලියකට ක්‍රීඩා කිරීමේ අවස්ථාව අහිමිවිය. සංචාර කීපයක් ඉලක්ක කර ගනිමින් ගෙවී ගිය මාස කීපයේදී ශ්‍රී ලංකා කණ්ඩායම සිය පුහුණුවීම් කටයුතු වල නිරත වූ නමුත් කොරෝනා වෛරස් තත්ත්වය හේතුවෙන් ඒ සෑම තරගාවලියක්ම කල් දැමිණ.

ශ්‍රී ලංකා ක්‍රිකට් ආයතන මාධ්‍ය අංශය සමඟ සිදුකරන ලද සාකච්ඡාවේදී අවසන් වශයෙන් ඒ පිළිබඳවද අදහස් දක්වා සිටි ප්‍රධාන පුහුණුකරු “මේ තරගාවලියේ මම වඩාත්ම සිත්ගන්නා අංගය තමයි අපේ ක්‍රීඩකයින්ට තරගකාරීත්වයකින් යුතු ක්‍රිකට් ක්‍රීඩාවට යළි අවතීර්ණ වීමට අවස්ථාව උදාවීම. දීර්ඝ කාලයක් ක්‍රීඩා කිරීමට නොහැකි වීම ඇත්තටම කලකිරීම් ඇති කරවන්නක්. කොයිම ආකාරයක දැල් පුහුණුවීමකින් හෝ පුහුණුවීම් තුළින් දැඩි තරගකාරීත්වයකින් යුතු ක්‍රීඩාවක් ප්‍රති නිර්මාණය කළ නොහැකියි” යැයිද සඳහන් කර සිටියේය.

මෙම ලිපිය ශ්‍රී ලංකා ක්‍රිකට් ආයතනයේ නිල වෙබ් අඩවියෙන් උපුටා දන්නා ලද්දකි – ප්‍රධාන සංස්කාරක

දෙස් විදෙස් ක්‍රීඩකයින්ගෙන් සමන්විතව පළමු වරට පවත්වනු ලබන ‘ලංකා ප්‍රිමියර් ලීග් 2020’ ක්‍රිකට් තරගාවලිය ලබන නොවැම්බර් මස 26 වැනි දින ප.ව. 3.30 ට පැවැත්වීමට නියමිත සමාරම්භක උත්සවයින් පසු ඇන්ජලෝ මැතිව්ස් නායකත්වය දරනු ලබන කලම්බෝ කිංග්ස් සහ කුසල් පෙරේරාගේ නායකත්වයෙන් යුතු කැන්ඩි ටස්කර්ස් කණ්ඩායම් අතර තරගයෙන් ආරම්භ වේ. හම්බන්තොට මහින්ද රාජපක්ෂ ක්‍රීඩාංගණයේ පැවැත්වෙන මෙම තරගය. ප.ව. 7.30 ට ආරම්භවනු ඇත.

නොවැම්බර් 27, දෙසැම්බර් 04 සහ දෙසැම්බර් 11 යන දිනයන්හිදී පමණක් එක් තරගය බැගින් පැවැත්වෙන අතර සෙසු සෑම දිනයකදීම ප.ව. 3.30 ට පළමු තරගයත් ප.ව. 7.30 ට දෙවැනි තරගයත් පැවැත්වෙනු ඇත. නොවැම්බර් 27 වැනිදා සහ දෙසැම්බර් 04 වැනි දිනයන්හිදී පැවැත්වෙන තරග 2 පමණක් රාත්‍රී 8.00 ට ආරම්භ වීමට නියමිතව තිබේ.  

නොවැම්බර් 26 වැනිදා සිට දෙසැම්බර් 16 වැනිදා දක්වා වූ පුරා දින 21 ක කාලයක් පැවැත්වෙන ලංකා ප්‍රිමියර් ලීග් තරගාවලිය සෞඛ්‍ය නීති රීතීන් යටතේ පැවැත්වෙන අතර එහිදී කොවිඩ් -19 වසංගතයෙන් ආරක්ෂා වීම සඳහා සියළුම කණ්ඩායම් ‘ජෛව ආරක්ෂිත බුබුලකට’ (Bio-secure bubble) යොමු කෙරෙනු ඇත. 

ලීග් ක්‍රමයට පැවැත්වෙන පළමු වටය යටතේ සෑම එක් කණ්ඩායමක්  තවත් කණ්ඩායමක් තරග 2 කට බැගින් සමස්ථ තරග 8 කට සහභාගිවනු ලබන අතර එහිදී ප්‍රසාද ලකුණු සටහනේ ඉදිරියෙන් පසුවන කණ්ඩායම් 4 දෙසැම්බර් මස 13 සහ 14 යන දිනයන්හි පැවැත්වීමට නියමිත අවසන් පූර්ව තරග සඳහා සුදුසුකම් ලබනු ඇත. තරගාවලියේ අවසන් මහ තරගය දෙසැම්බර් මස 16 වැනිදා පැවැත්වෙනු ඇත. 

කණ්ඩායම් 5 කගේ සහභාගිත්වයෙන් පැවැත්වෙන මෙම තරගාවලියේදී කලම්බෝ කිංග්ස් පිල ඇන්ජලෝ මැතිව්ස් විසින්ද, කැන්ඩි ටස්කර්ස් පිල කුසල් පෙරේරා විසින්ද, දඹුල්ල ලයන්ස් පිල දසුන් ශානක විසින්ද, ගෝල් ග්ලැඩියේටර් ලසිත් මාලිංග විසින්ද ජැෆ්නා ස්ටැලියන්ස් තිසර පෙරේරා විසින්ද මෙහෙයවනු ලබති. 

ශ්‍රී ලංකා ක්‍රිකට් ආයතනය විසින් පවත්වනු ලබන ලංකා ප්‍රිමියර් ලීග් හෙවත් එල්. පී. එල්. පන්දුවාර විස්සයි – 20 ක්‍රිකට් තරගාවලිය සෞඛ්‍ය උපදෙස් පරිදි මෙම නොවැම්බර් මස 27 වැනිදා සිට දෙසැම්බර් මස 17 වැනිදා දක්වා හම්බන්තොට මහින්ද රාජපක්ෂ ක්‍රීඩාංගණයේදී පැවැත්වෙනු ඇත.

කොවිඩ් 19 වසංගතයේ බලපෑම් හේතුවෙන් තරගාවලිය පැවැත්වීම සම්බන්ධව ශ්‍රී ලංකා ක්‍රිකට් ආයතනය නියෝජිතයින් සහ සෞඛ්‍ය අමාත්‍යාංශ නිලධාරීන් අතර සකච්ඡා වට කීපයක්ම පැවැත්විණි. ඒ අනුව සෞඛ්‍ය අමාත්‍යාංශ විසින් නියම කරනු ලබන සෞඛ්‍ය මාර්ගෝපදේශයන්ට යටත්ව තරගාවලිය පැවැත්වීම සඳහා රජය විසින් අනුමැතිය ලබා දී තිබේ.

 “තරගාවලිය පැවැත්වීම සඳහා රජයේ අනුග්‍රහය ලැබීම නිසා අපිට තරගාවලිය ඉදිරිය ගැන ලොකු විශ්වාසයක් ඇති වෙලා තියෙනවා. ඒ වගේම තරගාවලිය හම්බන්තොට පමණක් පැවැත්වීම නිසා තරගාවලිය වෙනුවෙන් නිර්මාණය කරනු ලබන ආරක්ෂිත ජෛව බුබුළ (Bio-Secure Bubble) පවත්වාගෙන යෑමත් පහසු කරවන්නක්” යැයි තරගාවලිය සම්බන්ධව ලංකා ප්‍රිමියර් ලීග් තරගාවලියේ අධ්‍යක්ෂකවරයා ලෙසින් කටයුතු කරන ශ්‍රී ලංකා ක්‍රිකට් ආයතන උප සභාපති රවීන් වික්‍රමරත්න මහතා සඳහන් කර සිටියේය.

මේ අතර තරගාවලියේ සංවිධාන කටයුතු සිදුකරනු ලබන අයි. පී. ජී. ආයතනයේ ප්‍රධාන විධායක නිලධාරී අනිල් මොහාන් මහතාද අදහස් දක්වමින්, “අසීරු කාල වකවානුවක වුණත් ශ්‍රී ලංකා රජය සහ ශ්‍රී ලංකා ක්‍රිකට් ආයතනය ගත යුතු හොඳම තීරණයට එළැඹීම ගැන මම ස්තූතිවන්ත වනවා. එය පහසු කටයුත්තක් නොවේ. කොහොම වුණත් මේ ගත්ත හොඳ තීරණය ශ්‍රී ලංකා ක්‍රිකට් යහපැවැත්මට උපකාරී වෙනවා වගේම ශ්‍රී ලාංකිකයින්ගේ මතකයේ රැඳේවි කියලා මම විශ්වාස කරනවා”යි සඳහන් කර සිටියේය.

තරගාවලිය පැවැත්වීම සඳහා අනුමැතිය ලබා දීම සම්බන්ධව අතිගරු ජනාධිපති ඝෝඨාභය රාජපක්ෂ මහතාටත්, මේ කටයුත්ත සාර්ථක කර ගැනීම වෙනුවෙන් කටයුතු කළ සෞඛ්‍ය ඇමැතිනී පවිත්‍රා වන්නිආරච්චි මැතිණියට මෙන්ම ක්‍රීඩා අමාත්‍ය නාමල් රාජපක්ෂ මහතාටද ශ්‍රී ලංකා ක්‍රිකට් ආයතනය විශේෂ ස්තූතිය පුද කර සිටියි.

එමෙන්ම කොවිඩ් 19 මැඬලීමේ කාර්ය සාධක බලකායේ ප්‍රධානී ලුතිනන් ජනරාල් ශවේන්ද්‍ර ද සිල්වා, සෞඛ්‍ය අමාත්‍යාංශයේ ලේකම් වෛද්‍ය සංජීව මුණසිංහ සහ සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්වරු ලබා දුන් සහයෝගය පිළිබඳවද ශ්‍රී ලංකා ක්‍රිකට් ආයතනය සිය ස්තූතිය පළ කර සිටියි.

නවතම සැලැස්මට අනුව තරගාවලියේ සංශෝධිත නව කාල සටහන නුදුරේදීම ප්‍රකාශයට පත් කිරීමට ශ්‍රී ලංකා ක්‍රිකට් ආයතනය කටයුතු යොදනු ඇත.

ලබන 2021 වසරේ ජුනි මසදී පැවැත්වීමට නියමිතව තිබෙන ලෝක ටෙස්ට් ශූරතාවලියේ අවසන් මහ තරගය එලෙසම පැවැත්වීම කෙරෙහි අන්තර්ජාතික ක්‍රිකට් කවුන්සිලයේ අවධානය යොමුව තිබේ. එහෙත් අන්තර්ජාතික ක්‍රිකට් කවුන්සිලය මුහුණ දී සිටින බරපතලම ගැටළුව බවට පත්ව ඇත්තේ කෙරෝනා වසංගතයේ බලපෑමත් සමඟ පැවැත්වීමට නොහැකි වුණු තරගාවලි සම්බන්ධව ගත හැකි විකල්පයන් කුමක්ද යන්නය.

කෙසේ වෙතත් අවලංගු වුණු තරගාවලිවලට අදාළව ඒ ඒ කණ්ඩායම් සඳහා සම ලකුණු ප්‍රදානය කිරීමට මේ වන විට යෝජනා වී ඇතත් ඒ පිළිබඳව වූ අවසන් තීරණය ඉදිරි නොවැම්බර් මසදී පැවැත්වීමට නියමිත අන්තර්ජාතික ක්‍රිකට් කවුන්සිල ක්‍රිකට් මණ්ඩල රැස්වීමේදී ගැනීමට නියමිතය. මෙහිදී ඉකුත් මාර්තු මස වන විට කණ්ඩායම් ලබා සිටි ප්‍රසාද ලකුණු සංඛ්‍යාවන් මත පදනම්ව ක්‍රමවේදයක් නිර්මාණය කරමින් ලකුණු ලබා දීම මෙන්ම ඉදිරියේදී පැවැත්වීමට නියමිත තරගාවලි අවසන් වූ පසු අවසන් මහ තරගයට සුදුසුකම් ලබන්නේ කවුරුන්ද යන්න තීරණය කිරීමය.

ලෝක ටෙස්ට් ශූරතාවලියේ ඉදිරිය පියවරයන් සම්බන්ධව අන්තර්ජාතික ක්‍රිකට් කවුන්සිලය සිටින්නේ කුමන මතයකද යන්න පිළිබඳව සියළුම රටවල් දැනුවත් කිරීම අයි.සී.සී. යේ අරමුණ වන අතර එය ලෝක ටෙස්ට් ශූරතාවලිය යටතේ මීළඟට ආරම්භ වීමට නියමිතව ඇති නවසීලන්තය සහ බටහිර ඉන්දීය කොදෙව් කණ්ඩායම් අතර ටෙස්ට් තරගාවලියට පෙර එම දැනුවත් කිරීම සිදු කිරීමට බලාපොරොත්තුවෙන් පසුවේ.

කොරෝනා වෛරසය හේතුවෙන් අවලංගු කර දැමුණු තරගාවලි පැවැත්වීම කෙරෙහි බහුතරයක් රටවල් උත්සාහ ගනිමින් සිටින නමුත්, ජාත්‍යන්තර තරගාවලියන්හි කාල සටහන් දෙස බැලීමේදී අවසන් මහ තරගයට පෙර එම තරගාවලි පැවැත්වීම ප්‍රායෝගිකව අසීරු කටයුත්තකි. එමෙන්ම ඇතැම් කණ්ඩායම් එකිනෙකට වෙනස් තරග සංඛ්‍යාවක් ක්‍රීඩා කිරීමද ව්‍යාකූලත්වයක් නිර්මාණය කරවන්නකි.

මේ සියල්ල පිළිබඳව අවධානය යොමු කිරීමේදී ඉහතින් කී පරිදි අවලංගු වුණු තරගාවලි සියල්ලටම නිසි නීති මාලාවකට යටත්ව සෑම තරගයක්ම ජය පැරදුමෙන් තොරව අවසන් වුණු තරගාවලි ලෙස සලකමින් එක් එක් කණ්ඩායමට ප්‍රසාද ලකුණු පිරිනැමීම කෙරෙහි වැඩි අවධානයක් යොමුව තිබේ.

තරගාවලියේ මූලික සැලසුම අනුව ටෙස්ට් තරගාවලියක් සඳහා ලකුණු 120 ක් පිරිනැමෙන අතර ජය පැරදුමෙන් තොර තරගාවලියක් වුවහොත් කණ්ඩායමකට ප්‍රසාද ලකුණු 40 ක් හිමිවනු ඇත. මෙය තරගාවලියේ පැවැත්වීමට නියමිත තරග සංඛ්‍යාව වෙනස් වුවද ලැබෙන ප්‍රසාද ලකුණු සංඛ්‍යාව නොවෙනස්ව පවතී.  

ලෝක ටෙස්ට් ශූරතාවලිය යටතේ ශ්‍රී ලංකාව නවසීලන්තය සහ පාකිස්තානයට එරෙහිව ටෙස්ට් තරගාවලි 2 කට සහභාගිවී සිටින අතර ප්‍රසාද ලකුණු 80 ක් හිමිකරගෙන සිටියි. අදාළ ශූරතාවලිය යටතේ ශ්‍රී ලංකාවට තවත් ටෙස්ට් තරගාවලි 4 කට සහභාගිවීමට නියමිතව තිබේ. මෙම වසර මුලදී එංගලන්තය සමඟ තරග 2 කින් සමන්විතද, දකුණු අප්‍රිකාව සමඟ තරග 2 කින් සමන්විතවද සහ බංග්ලාදේශය සමඟ තරග 3 කින් සමන්විත තරගාවලියකට ක්‍රීඩා කිරීමට නියමිතව තිබුණද කොරෝනා වෛරස් තත්ත්වය හේතුවෙන් එම තරගාවලි 3ම කල් දැමීමට ශ්‍රී ලංකා ක්‍රිකට් ආයතනයට සිදුවිය.

කෙසේ වෙතත් ප්‍රසාද ලකුණු 80 ක් හිමිකරගෙන සිටින ශ්‍රී ලංකාව ප්‍රසාද ලකුණු සටහනේ 6 වැනි ස්ථානයේ රැඳී සිටින අතර ඉන්දියාව ප්‍රසාද ලකුණු 360 ක් ලබා එහි පෙරමුණේ පසුවන්නේය.

2020 ඔක්තෝම්බර් මස තෙක් යාවත්කාලීන වී තිබෙන ලෝක ටෙස්ට් ශූරතාවලියේ ප්‍රසාද ලකුණු සටහන මෙසේය.

Text by – sri lanka cricket

දෙස් විදෙස් ක්‍රීඩකයින්ගෙන් සමන්විතව පළමු වරට පවත්වනු ලබන ‘ලංකා ප්‍රිමියර් ලීග් 2020’ ක්‍රිකට් තරගාවලිය ලබන නොවැම්බර් මස 21 වැනි දින ප.ව. 3 ට පැවැත්වීමට නියමිත සමාරම්භක උත්සවයින් පසු ඇන්ජලෝ මැතිව්ස් නායකත්වය දරනු ලබන කලම්බෝ කිංග්ස් සහ ලසිත් මාලිංග නායකත්වය දරනු ලබන ගෝල් ග්ලැඩියේටර් කණ්ඩායම් අතර තරගයෙන් ආරම්භ වේ. හම්බන්තොට මහින්ද රාජපක්ෂ ක්‍රීඩාංගණයේ පැවැත්වෙන මෙම තරගය. ප.ව. 7.30 ට ආරම්භවනු ඇත.

නොවැම්බර් 21 වැනිදා සිට දෙසැම්බර් 13 වැනිදා දක්වා වූ පුරා දින 23 ක කාලයක් පැවැත්වෙන ලංකා ප්‍රිමියර් ලීග් තරගාවලිය අදියර 2 ක් යටතේ පැවැත්වේ. එහි පළමු අදියර තරග 11 ක් ආවරණය වන පරිදි හම්බන්තොට මහින්ද රාජපක්ෂ ක්‍රීඩාංගණයේදීද අවසන් පූර්ව තරග 2 සහ අවසන් මහ තරගය ඇතුළත් දෙවැනි අදියරය පල්ලකැලේ ජාත්‍යන්තර ක්‍රීඩාංගණයේදීද පැවැත්වෙනු ඇත.

කොවිඩ් -19 වසංගතයෙන් ආරක්ෂා වීම සඳහා සියළුම කණ්ඩායම් ‘ජෛව ආරක්ෂිත බුබුලකට’ (Bio-secure bubble) යොමු කෙරෙන අතර එය හම්බන්තොට පැවැත්වෙන තරගවලින් පසු මහනුවර ගමන් කරනු ඇත. ඒ සඳහා දින හතරක විවේකයක් කණ්ඩායම් වලට හිමිව තිබේ.

ලීග් ක්‍රමයට පැවැත්වෙන පළමු වටය යටතේ සෑම එක් කණ්ඩායමක්  තවත් කණ්ඩායමක් තරග 2 කට බැගින් සමස්ථ තරග 8 කට සහභාගිවනු ලබන අතර එහිදී ප්‍රසාද ලකුණු සටහනේ ඉදිරියෙන් පසුවන කණ්ඩායම් 4 දෙසැම්බර් මස 10 සහ 11 වැනි දිනයන්හි පැවැත්වීමට නියමිත අවසන් පූර්ව තරග සඳහා සුදුසුකම් ලබනු ඇත. අවසන් මහ තරගය දෙසැම්බර් 13 වැනිදා පැවැත්වෙන අතර එම තරගයට අතිරේක දිනයක්ද නම් කිරීමට තරග සංවිධායකයින් පියවර ගෙන තිබීම විශේෂත්වයක් වේ.

කණ්ඩායම් 5 කගේ සහභාගිත්වයෙන් පැවැත්වෙන මෙම තරගාවලියේදී කලම්බෝ කිංග්ස් පිල ඇන්ජලෝ මැතිව්ස් විසින්ද, කැන්ඩි ටස්කර්ස් පිල කුසල් පෙරේරා විසින්ද, දඹුල්ල හෝක්ස් පිල දසුන් ශානක විසින්ද, ගෝල් ග්ලැඩියේටර් ලසිත් මාලිංග විසින්ද ජැෆ්නා ස්ටැලියන්ස් තිසර පෙරේරා විසින්ද මෙහෙයවනු ලබති.

Text copied by – sri lanka cricket

ලබන නොවැම්බර් මසදී පැවැත්වීමට නියමිත ලංකා ප්‍රිමියර් ලීග් තරගාවලිය පිළිබඳව බොහෝ දෙනා වැඩි අවධානයක් යොමු කර තිබේ. කණ්ඩායම් 5 කගේ සහභාගිත්වයෙන් පැවැත්වෙන මෙම තරගාවලියේදී එක් සංචිතයකට ක්‍රීඩකයින් 20 දෙනෙකු ඇතුළත් කර ගැනීමට ඒ ඒ කණ්ඩායම් හිමිකාරීත්වයට අවස්ථාව උදා වුණු අතර නම් කරන ලද සංචිතයෙන් සිව් දෙනෙකු අතිරේක ක්‍රීඩකයින් ලෙසින් එක් කර ගැනීමට කණ්ඩායම් හිමිකාරීත්වයට අවස්ථාව සලසා දී තිබිණ.

එහිදී ප්‍රධාන වශයෙන් කණ්ඩායමකට ඇතුළත් ක්‍රීඩකයින් 16 දෙනා, දේශීය ක්‍රීඩකයින් 10 දෙනෙකුගෙන් සහ විදේශීය ක්‍රීඩකයින් 6 දෙනෙකුගෙන් සමන්විත විය යුතුය. විදේශීය ක්‍රීඩකයින් සිව් දෙනෙකුට පමණක් එකවර තරගයකට ක්‍රීඩා කිරීමේ අවස්ථාව හිමි වන මෙම තරගාවලියේදී ක්‍රීඩකයින් තෝරා ගැනීම විශේෂිත වූ පටිපාටියකට අනුව සිදු කෙරිණ.

එහිදී මූලික වශයෙන් සෑම කණ්ඩායමකටම දේශීය සන්නාමික (Icon Player) හෙවත්රී දේශීය සුවිශේෂී ක්‍රීඩකයකු බැගින් නම් කොට කණ්ඩායම් වල නායකත්වයට පත් කිරීමට ශ්‍රී ලංකා ක්‍රිකට් ආයතනය පියවර ගනු ලැබීය. එම පත් කිරීම හැරුණු කොට අනෙක් ක්‍රීඩකයින් 19 දෙනාම තෝරා ගැනීමේ පූර්ණ අයිතිය ඒ ඒ කණ්ඩායම්වල හිමිකාරීත්වය සතු විය. කෙසේ වෙතත් එම ක්‍රීඩකයින් සංඛ්‍යාව බෙදී යා යුතු ආකාරය පිළිබඳව වූ පාටිපාටියට අනුව මෙම ක්‍රීඩකයින් තෝරා ගැනීම සිදුවිය.

ඒ අනුව සුවිශේෂී ක්‍රීඩකයා හැරුණු විට සමස්ථ සංචිතය තෝරා ගැනීම ප්‍රධාන කොටස් 7 කට බෙදා තිබූ අතර ඒ අතර ප්‍රධානම දෙස්/විදෙස් හෙවත් Marquee Overseas/Local ක්‍රීඩකයෙක්, ප්‍රධානම විදෙස් හෙවත් Marquee Overseas ක්‍රීඩකයෙක්, විදේශ ඉහළ (Gold Overseas) ක්‍රීඩකයින් 2 ක්, දේශීය ඉහළ (Gold Local) ක්‍රීඩකයින් 4 ක්, විදේශ ක්ලැසික් (Classic Overseas) ක්‍රීඩකයින් 2 ක්, දේශීය ක්ලැසික් (Classic Local) ක්‍රීඩකයින් 3 ක්, නැගී එන දේශීය (Emerging Local) ක්‍රීඩකයින් 2 ක් සහ අතිරේක දේශීය (Supplementary Local) ක්‍රීඩකයින් 4 ක් වශයෙන් සමන්විත වේ.

මෙහිදී ශ්‍රී ලංකා ක්‍රිකට් ආයතනය විසින් ජාතික සහ දේශීය තරගාවලියන්හිදී දක්ෂතා දක්වන ලද ක්‍රීඩකයින් 258 දෙනෙකු කාණ්ඩ 4 ක් යටතේ ‘ලංකා ප්‍රිමියර් ලීග්’ ක්‍රීඩක තෝරා ගැනීම සඳහා ඉදිරිපත් කර තිබුණි. එහිදී විදේශ ඉහළ (Gold Local) යටතේ ක්‍රීඩකයින් 21 ක්, දේශීය ක්ලැසික් (Classic Local) යටතේ ක්‍රීඩකයින් 36 ක්, නැගී එන දේශීය (Emerging Local) යටතේ ක්‍රීඩකයින් 109 ක් සහ අතිරේක දේශීය(Supplementary Local)  යටතේ ක්‍රීඩකයින් 92 දෙදෙනකු ඉදිරිපත් කොට තිබුණි.

ජාත්‍යන්තර විස්සයි-20 තරග පිටියේ වැඩිම අවධානයක් දිනාගැනීමට සමත්ව සිටින කොදෙව් ක්‍රීඩක ක්‍රිස් ගේල් ඇතුළු විස්සයි-20 තරග පිටියේ කැපී පෙනෙන ක්‍රීඩකයින් කීප දෙනෙකුම ‘ලංකා ප්‍රිමියර් ලීග්’ ක්‍රිකට් තරගාවලිය යටතේ අද (19 දා) පැවැති ක්‍රීඩක තෝරා ගැනීමේදී කණ්ඩායම් විසින් තෝරාගත්හ.

අන්තර්ජාල තාක්ෂණය උපයෝගී කරගනිමින් පැවැති අදාළ ක්‍රීඩක තෝරා ගැනීමේදී කුසල් ජනිත් විසින් නායකත්වය ලබා දෙනු ලබන කැන්ඩි ටස්කර්ස් කණ්ඩායම විසින් ක්‍රිස් ගේල්ගේ සහාය ලබා ගනිද්දී එවැනිම ජනප්‍රියතාවයකින් යුත් ක්‍රීඩකයෙක් වන ඇන්ඩ්‍රෙ රසල්ව ඇන්ජලෝ මැතිව්ස් විසින් නායකත්වය ලබා දෙනු ලබන කලම්බෝ කිංග්ස් කණ්ඩායම විසින් තෝරා ගනු ලැබීය. එම කණ්ඩායමට දකුණු අප්‍රිකානු පිලේ නායකයා ලෙසින් කටයුතු කළ ෆෆ් ඩු ප්ලෙසිද ක්‍රීඩා කිරීම විශේෂත්වයකි. මොවුන්ට අමතරව, කාලෝස් බ්‍රැත්වයිට්, ඩේවිඩ් මාලන්, ඩේවිඩ් මිලර් සහ ෂහිඩ් අෆ්රිඩි කණ්ඩායම්වලට තේරී පත් වුණු සෙසු කැපී පෙනෙන ක්‍රීඩකයෝ වෙති.

අද දිනයේදී තරගාවලිය නියෝජනය කරනු ලබන කණ්ඩායම්වල නම්ද ප්‍රසිද්ධ කිරීම විශේෂත්වයක් වන අතර එහිදී දසුන් ශානක විසින් දඹුල්ල හෝක්ස් පිලද, ලසිත් මාලිංග විසින් ගෝල් ග්ලැඩියේටර් පිලද, තිසර පෙරේරා විසින් ජැෆ්නා ස්ටැලියන්ස් පිලද මෙහෙයවනු ලබති.

කළම්බෝ කිංග්ස් – නායක ඇන්ජලෝ මැතිව්ස් දේශීයද ඇන්ඩ්‍රෙ රසල් සහ ෆෆ් ඩුප්ලෙසිස්  විදේශීය සංඛේතාත්මක ක්‍රීඩකයින් බවට පත්ව සිටින කලම්බෝ කිංග්ස් කණ්ඩායමේ ඉන්දීය ක්‍රීඩකයින් දෙපළක් වන වේග පන්දු යවන මන්ප්‍රීට් ගෝනි සහ කඩුලු රකින මන්වින්දර් බිස්ලා ද ඇතුළත්ව සිටිති. එක්සත් අරාබි එමීර් රාජ්‍යයේ පැවැත්වෙන අයි. පී. එල්. තරගාවලිය සඳහා ශ්‍රී ලංකාව නියෝජනය කරමින් සහභාගිවන එකම ක්‍රීඩකයා වන ඉසුරු උදාන කලම්බෝ කිංග්ස්ට තවත් ශක්තියකි. 1996 වසරේදී ශ්‍රී ලංකාව ලෝක කුසලානය දිනා ගන්නා විට කණ්ඩායමේ ප්‍රධාන පුහුණුකරු ලෙසින් කටයුතු කරන ලද ඔස්ටේලියානු ජාතික ඩේව් වට්මෝර් මෙම කණ්ඩායමේ පුහුණුකරුවකු ලෙසින් කටයුතු කිරීමට නියමිතය.

කැන්ඩි ටස්කර්ස් – විස්සයි-20 තරග පිටියේ වැඩිම ආකර්ශනයක් සහිත ක්‍රීඩකයින් අතර ඉදිරියෙන්ම සිටින ක්‍රිස් ගේල් හැරුණු විට කණ්ඩායමේ නායක කුසල් ජනිත් ද ගේල් මෙන්ම වේගයෙන් පන්දුවට පහර දීමට හැකි පිතිකරුවකි. ඊට අමතරව පාකිස්තානු වමත් වේග පන්දු යවන වහාබ් රියාස් මෙන්ම ලියම් ප්ලන්කට් ද කැන්ඩි ටස්කර්ස් පිලට වැඩි ජවයක් එක් කරති. හිටපු ටෙස්ට් නායකයකු වන වත්මන් පුහුණුකරු හෂාන් තිලකරත්න මහතා පුහුුුුුුුණුකරුවකු ලෙසින් කටයුතු කරන කැන්ඩි ටස්කර්ස් පිලට කුසල් මෙන්ඩිස්, සික්කුගේ ප්‍රසන්න, ඩිල්රුවන් පෙරේරා මෙන්ම අසේල ගුණරත්නද එක්ව සිටිති.

දඹුල්ල හෝක්ස් – පුහුණුකරු ලෙසින් කටයුතු කරන ජෝන් ලුවිස් විසින් මෙම කණ්ඩායමේ සියළු තේරීම් සිදු කිරීම විශේෂත්වයකි. දසුන් ශානක විසින් නායකත්වය දරනු ලබන දඹුල්ල හෝක්ස් පිලට දකුණු අප්‍රිකානු ක්‍රීඩක ඩේවිඩ් මිලර් ප්‍රධානම ක්‍රීඩකයා බවට පත් වද්දී වේගයෙන් පන්දුවට පහර දිය හැකි කාලෝස් බ්‍රැත්වයිට් ද තේරී පත්වී සිටියි. ශ්‍රී ලංකා පිලේ කඩුලු රකින ක්‍රීඩක නිරෝෂන් දික්වැල්ලද ඇතුළත්ව සිටින දඹුල්ල හෝක්ස් පිලට මෙවර දේශීය තරග පිටියේ වැඩිම ලකුණු ලාභියා වූ ළහිරු උදාරද තේරී පත්වී සිටීම කැපී පෙනෙයි.

ගෝල් ග්ලැඩියේටර්ස් – ලසිත් මාලිංග සහ ෂහිඩ් අෆ්රිඩි ඇතුළත්ව සිටින ගෝල් ග්ලැඩියේටර්ස් පිලට කොලින් ඉන්ගැහැම් හැරුණු විට සෙසු සියලුම විදෙස් ක්‍රීඩකයින් පාකිස්තානු ජාතිකයින් වීම කැපී පෙනෙයි. පාකිස්තානු ජාතිකයකුගේ හිමිකාරීත්වය යටතේ මෙම තරගාවලිය නියෝජනය කරනු ලබන ගෝල් ග්ලැඩියේටර්ස් පිලට වේග පන්දු යවන මොහොමඩ් ආමර්ද එක්ව සිටින අතර ඔහු සහ ලසිත් මාලිංග එක්ව නව පන්දුවෙන් සහ අවසන් පන්දුවාර කීපය ප්‍රතිවාදී පිතිකරුවනට පහසු නොවනු ඇත. හිටපු පාකිස්තානු නායක සෆ්‍රාස් අහමඩ් එම කණ්ඩායමේ කඩුලු රකින්නා වේ. මෙම කණ්ඩායමට ක්‍රීඩකයින් එක් කර ගැනීමේදී අවසන් වරට ශ්‍රී ලංකා කණ්ඩායම පාකිස්තානයේ කරන ලද සංචාරයේදී දක්ෂතා දක්වන ලද ක්‍රීඩකයින් යුගලයක් වුණු ධනුෂ්ක ගුණතිලක සහ භානුක රාජපක්ෂගේ සහාය ලබා ගැනීමද කැපී පෙනෙයි. ඉකුත් වසරේ පැවැති ශ්‍රී ලංකා කණ්ඩායමේ පාකිස්තානු එක්දින තරග සංචාරය යටතේ ධනුෂ්ක ගුණතිලක ශතකයක් ද භානුක රාජපක්ෂ අර්ධ ශතකයක් ඇතුළුව පිතිකරණයෙන් දක්ෂතා දැක්වීමට සමත්වූහ. එම දක්ෂතා මත පදනම්ව පාකිස්තානයට එරෙහිව පැවැති එක්දින තරගාවලිය ජය ගැනීමට ශ්‍රී ලංකා කණ්ඩායමට අවස්ථාව උදාවිය. 

ජැෆ්නා ස්ටැලියන්ස් – තිසර පෙරේරා නායකත්වය ලබා දෙනු ලබන ජැෆ්නා ස්ටැලියන්ස් පිලට සංඛේතාත්මක ක්‍රීඩකයින් ලෙස ඩේවිඩ් මාලන් සහ වනිඳු හසරංග නම් කර තිබේ.හිටපු පාකිස්තානු නායකයකු වන ෂොයෙබ් මලික්, වේග පන්දු යවන උස්මාන් ශින්වාරි මෙන්ම අසීෆ් අලී ජැෆ්නා ස්ටැලියන්ස් නියෝජනය කරනු ලබන ප්‍රධාන විදෙස් ක්‍රීඩකයෝ වෙති. සුරංග ලක්මාල්, අවිෂ්ක ප්‍රනාන්දු, මිනෝද් භානුක සහ වනිඳු හසරංගගේ සහෝදර චතුරංග ද සිල්වාද ජැෆ්නා ස්ටැලියන්ස් පිලේ සෙසු බලාපොරොත්තු තැබිය හැකි ක්‍රීඩකයෝ වෙති. 

කණ්ඩායමේ ප්‍රධාන ක්‍රීඩකයින් 16 දෙනාට අමතරව අතිරේක ක්‍රීඩකයින් 4 දෙනෙකුද තෝරා ගැනීමට කණ්ඩායම් හිමිකාරීත්වයට හිමිවිය. කෙසේ වෙතත් ලබන නොවැම්බර් 01 වැනිදාට පෙර ක්‍රීඩකයින් කීප දෙනෙකු තෝරා ගැනීමේ අවස්ථාවක් කණ්ඩායම් වලට ලබා දීමට තරගාවලි සංවිධාන කමිටුව පියවර ගෙන තිබුණ බැවින් ගෝල්ද ග්ලැඩියේටර් පිල හැර අනෙක් සෑම කණ්ඩායමක්ම ක්‍රීඩකයින් කීප දෙනෙකු තෝරා ගැනීම කල් දැමීමට පියවර ගනු ලැබූහ. 

මෙම ක්‍රීඩකයින් තේරීම ඒ ඒ කණ්ඩායම් වල හිමිකාරීත්වය විසින් නම් කරන ලද පුහුණුකරුවන්, කළමනාකරුවන්ගේ සහ හිමිකරුවන්ගේ සහභාගිත්වයෙන් පැවැති අතර ශ්‍රී ලංකා ක්‍රිකට් ආයතනය වෙනුවෙන් එල්.පී.එල්. තරගාවලි අධ්‍යක්ෂ රවීන් වික්‍රමරත්න, ප්‍රධාන විධායක නිලධාරී ඈෂ්ලීද සිල්වා, පරිපාලන ප්‍රධාන අරුණද සිල්වා සහ තරගාවලි කමිටු ප්‍රධානී බන්දුල බස්නායක යන මහත්වරු සහභාගිවී සිටියහ. 

Text by – sri lanka cricket

ශ්‍රී ලංකා ක්‍රිකට් ආයතනය විසින් මෙහෙයවනු ලබන මෙරට ප්‍රධානතම විස්සයි-20 ක්‍රිකට් තරගාවලිය හෙවත් ‘ලංකා ප්‍රිමියර් ලීග්’ ක්‍රිකට් තරගාවලියට ක්‍රීඩා කිරීමට නියමිත ක්‍රීඩකයින් තෝරා ගැනීම (Player draft) අද (19 වැනිදා) දිනයේ තවත් හෝරා කීපයකින් පැවැත්වෙනු ඇත. අන්තර්ජාල තාක්ෂණය ඔස්සේ පැවැත්වීමට නියමිත මෙම ක්‍රීඩක තෝරා ගැනීම ශ්‍රී ලංකා වේලාවෙන් ප.ව. 4.00 ට ආරම්භ වේ.  

270 දෙනෙකුට ආසන්න විදෙස් ක්‍රීඩකයින්ට අමතරව දේශීය ක්‍රීඩකයින් 165 කු අද දිනයේ දිනයේ පැවැත්වෙන ක්‍රීඩක තෝරා ගැනීම සඳහා ශ්‍රී ලංකා ක්‍රිකට් ආයතනය ඉදිරිපත් කර සිටියි. එම ලැයිස්තුවට අමතරව බහුතරයක් නැගී එන සංචිතය නියෝජනය කරනු ලබන ක්‍රීඩකයින් ඇතුළත් 50 කට ආසන්න සංඛ්‍යාවක් අතිරේක ක්‍රීඩක ලැයිස්තුවකට නම් කිරීමට ශ්‍රී ලංකා ක්‍රිකට් ආයතනය පියවර ගෙන තිබේ.

මෙම ක්‍රීඩකයින් තෝරා ගැනීම ඒ ඒ කණ්ඩායම් අයිතිකරුවන්, පුහුණුකරුවන් හෝ කණ්ඩායම්හි හිමිකාරීත්වය විසින් නම් කරන ලද පිරිසක් විසින් සිදුකරන අතර, කුසපත් ඇදීමකින් අනතුරුව ක්‍රීඩකයින් තෝරා ගැනීමේ අවස්ථාව ඔවුනට හිමිවනු ඇත.

එහිදී තම කණ්ඩායමට අයත් ක්‍රීඩකයකු තෝරා ගැනීම සඳහා එම කණ්ඩායම් හිමිකාරීත්වයන්ට මිනිත්තු 2 ක කාලයක් හිමි වන පරිදි මෙම ක්‍රීඩක තෝරා ගැනීම සකස් කර තිබේ. ශ්‍රී ලංකා ක්‍රිකට් ආයතනය විසින් තරග වදිනු ලබන කණ්ඩායම් 5 සඳහා සංඛේතාත්මක (Icon Player) ක්‍රීඩකයින් 6 දෙනෙකු මේ වන විටත් නම් කර තිබෙන අතර ඔවුනට අමතරව තවත් ක්‍රීඩකයින් 2 දෙදෙනකු සංඛේතාත්මක ක්‍රීඩකයින් ලෙසින් කණ්ඩායමට එක් කර ගැනීමේ අවස්ථාව කණ්ඩායමට හිමිකාරීත්වයට උදාවනු ඇත.  ලසිත් මාලිංග, ඇන්ජලෝ මැතිව්ස්, තිසර පෙරේරා, කුසල් පෙරේරා, දසුන් ශානක සහ නිරෝෂන් දික්වැල්ල නම් කර ඇති සංඛේතාත්මක ක්‍රීඩකයින් වේ.

ලංකා ප්‍රිමියර් ලීග් තරගාවලිය ලබන නොවැම්බර් මස 21 වැනිදා සිට දෙසැම්බර් 13 වැනිදා දක්වා වූ කාල සීමාවේදී පල්ලකැලේ සහ හම්බන්තොට සූරියවැව ජාත්‍යන්තර ක්‍රීඩාංගණවලදී පැවැත්වෙනු ඇත. කොළඹ, මහනුවර, දඹුල්ල, ගාල්ල සහ යාපනය යන නගර මුල් කරගනිමින් කණ්ඩායම් 5 ක් මෙම තරගාවලිය නියෝජනය කරනු ලබන අතර දින 15 ක කාලයක් පුරා විහිදෙන තරගාවලිය අවසන් මහ තරගයද ඇතුළුව සමස්ථ තරග 23 කින් සමන්විත වනු ඇත.