එහෙමනම් ඔය විමර්ෂණ කණ්ඩායම දැන් පනතේ 13 වන වගන්තිය යටතේ හිටපු ඇමතිතුමාට එරෙහිව නඩු පැවරිය යුතුයි. එහෙම නැතිනම් මේ විමර්ෂණය දේශපාලන උවමනාවකට කරපු දඩයමක් බවට හොඳටම පැහැදිලි වෙනවා. මීට අවුරුද්දකට කලින් එතුමාත් පාර්ලිමේන්තු මංත්රීවරයෙක් වෙලා හිටපු කාලේ හදපු නීතියක් නිසා එතුමා මේක ගැන නොදන්නවා කියන්නත් බෑනේ!
වසර 2011 දී ඉන්දියාවේ පැවැති ලෝක කුසලාන ක්රිකට් තරගාවලියේ ශූරතාව මුදලට පවා දුන් බවට හිටපු ක්රීඩා අමාත්ය මහින්දානන්ද අලුත්ගමගේ කළ චෝදනාව පදනම් විරහිත බව ක්රීඩා වැරදි පිළිබඳව පොලිස් විශේෂ විමර්ශන ඒකකයේ ප්රධානී ජ්යෙෂ්ඨ පොලිස් ආධිකාරී ජගත් ෆොන්සේකා මහතා අද (03) මාධ්ය හමුවේ ප්රකාශ කළා.
මහින්දානන්ද ඉදිරිපත් කළ කරුණු 14 සනාථ කරන්න හැකියාවක් නෑ
“මෙම සිද්ධිය පිළිබඳව තව දුරටත් විමර්ශනය නොකර මේ පැමිණිල්ල අපිට යොමු කළ ක්රීඩා ආමාත්යංශයේ ලෙක්ම්තුමාට වාර්තාවක් යවනවා. අපේ ඒකකයේ නිලධාරීන්ගේ සාකච්ඡාවක් අද පෙරවරුවේ පැවැත්වුණා. එයට අපේ ස්ථානාධිපතිවරයා, නියෝජ්ය අධ්යක්ෂවරයා ඇතුළු සියලු දෙනාම සහභාගි වුණා. එහිදී අපි තීරණය කළා විමර්ශනය අවසන් කරන්න. සියලුම ක්රීඩකයන් ගෙන්වලා කටඋත්තර ගැනීම ආදෝලනාත්මක තත්ත්වයක් නිර්මාණය කිරීමක් බවට මේ වන විට පත්වෙලා තියෙනවා. ඒ නිසා මේක ලොකු ප්රශ්නයක් වෙන්න පුළුවන්.
අපේ ඒකකය මේ දක්වා ලබාගත් කටඋත්තර තුනෙන් අපිට තේරුම් ගියා මහින්දානන්ද අලුත්ගමගේ මහතා ඉදිරිපත් කළ කරුණු 14 සනාථ කරන්න හැකියාවක් නෑ කියලා. ඒ වගේම අයි.සී.සී. එකට ලිපියොමු කළා කිව්වත් අයි.සී.සී. ප්රතිචාර දක්වලත් නෑ. අයි.සී.සී. පරීක්ෂණයක් කරලත් නෑ. අපි කටඋත්තර ගත්ත තිදෙනාම සාධාරණ හේතු කියලා තියෙනවා. විශේෂයෙන්ම කණ්ඩායම් මාරු කළේ ඇයි කියලා. අනික මේක 2011 වසරේ සිද්ධියක්” යැයි ජ්යෙෂ්ඨ පොලිස් ආධිකාරී ජගත් ෆොන්සේකා මහතා වැඩි දුරටත් පැවසුවා.
මේ සම්බන්ධයෙන් ජ්යෙෂ්ඨ පොලිස් අධිකාරී ජාලිය සේනාරත්න මහතා කළ ප්රකාශයක සදහන් වුණේ අදාළ චෝදනා සනාථ කළ හැකි සාක්ෂි හෝ කිසිදු ලේඛනයක් එම මූලික විමර්ශනවලින් අනාවරණය නොවූ බවයි.
“ඒ නිසා තවදුරටත් විමර්ශන ගෙනියන්න තරම් ප්රමාණවත් තොරතුරු නැහැ,” ජ්යෙෂ්ඨ පොලිස් අධිකාරී ජාලිය සේනාරත්න මහතා කියා සිටියා.
2011 වසරේ සිදුවීමක් සම්බන්ධයෙන් විමර්ශන පැවැත්වීම සඳහා 2019 දී සම්මත කරගත් නීතියක් යොදාගත නොහැකි බවට නීති තර්කයක් මතු වූ අතර, විමර්ශනය අත්හැර දැමීමට එය තවත් හේතුවක් වූ බවද ජ්යෙෂ්ඨ පොලිස් අධිකාරී ජාලිය සේනාරත්න පැවසුවා.
විමර්ශනයක් පැවැත්වීමට තරම් ප්රමාණවත් සාක්ෂි නෑ – ජාත්යන්තර ක්රිකට් කවුන්සිලය
ශ්රී ලංකා ක්රිකට් කණ්ඩායම විසින් 2011 ක්රිකට් ලෝක කුසලානයේ අවසාන මහා තරගය පාවා දුන් බවට එල්ලවන චෝදනා සම්බන්ධයෙන් විමර්ශනයක් පැවැත්වීමට තරම් ප්රමාණවත් සාක්ෂි තමන් වෙත ඉදිරිපත් වී නොමැති බව ජාත්යන්තර ක්රිකට් කවුන්සිලය (ICC) පවසයි.
අදාළ චෝදනාව සම්බන්ධයෙන් අයිසීසී යේ දූෂණ විමර්ශන ඒකකය මූලික සලකා බැලීමක් කළ බව එම ඒකකයේ කළමනාකරු ඇලෙක්ස් මාෂල් නිවේදනයක් නිකුත්කරමින් කියා සිටී.
ශ්රී ලංකා ක්රීඩා අමාත්යවරයා විසින් අදාළ චෝදනාව සම්බන්ධයෙන් ඒ අවස්ථාවේ අයිසීසී වෙත කිසිදු ලිපියක් යැවූ බවට කිසිදු වාර්තාවක් නොමැති බව පවසන ඇලෙක්ස් මාර්ෂල්, අමාත්යවරයාගෙන් එවැනි ලිපියක් ලද බවට මතකයක් නැතැයි අයිසීසී ජ්යෙෂ්ඨ නිලධාරීන් ද තහවුරු කරන බව සඳහන් කරයි.
එබැවින් 2011 ලෝක කුසලානයේ සම්බන්ධයෙන් සැක පහළ කිරීමට තමන්ට කිසිදු හේතුවක් නොමැති බව ජාත්යන්තර ක්රිකට් කවුන්සිලයේ ස්ථාවරය වී තිබේ.
ගොරකා දඩමස් කරන මාධ්ය හා දේශපාලන භාවිතය
මහින්දා නන්ද අලුත්ගමගේ හිටපු අමාත්යවරයා පදනම් විරහිත කතා කිරීමට ප්රසිද්ධියක් උසුළුන බව දේශපාලනය ගැන උනන්දුවක් දක්වන බොහෝ දෙනෙක් කරන පොදු චෝදනාවක්. ඔවුන් කියන්නේ ‘වාචාල දේශපාලනඥයින්ගේ පදනම් විරහිත කතා නිසා සමාජය කැළඹීමට පත්වීම වත්මන් දේශපාලන සංස්කෘතිය තුළ සුලභ තත්ත්වයක් බවයි.
‘ඔහු මීට සති කිහිපයකට පෙර විදෙස්ගත ශ්රමිකයින් සම්බන්ධයෙන් ද සාවද්ය කතාවක් කළා. ඔහු එදා විදෙස් ශ්රමිකයින් හැදින්වූයේ ‘මිනිස් බෝම්බ‘ කියලයි. ඒ වගේම කරුණා අම්මාන්, රන්ජන් රාමනායක වගේ දේශපාලනඥයින් ප්රකට වීමට හෝ කුප්රකට වීමට මෙවැනි පදනම් විරහිත කතා කියමින් සමාජය තුළ ක්ෂණික කම්පනයක් ඇති කරනවා‘ ප්රවීන දේශපාලන විචාරක භාතිය බරුකන්ද මහතා අප කළ විමසීමකදී කියා සිටියා.
‘මේකට මාධ්ය ප්රචාරය ඍජුව සම්බන්ධ වෙනවා. එහිදී මාධ්ය ක්රියාත්මක වෙන්නේ තම දේශපාලන න්යාය පත්ර අනුවයි. උදාහරණයක් ලෙස හරීන් ප්රනාන්දු කාදිනල්තුමා ගැන කළ කතාවට රාජ්ය මාධ්ය සහ රජයට ගැති මාධ්ය දැවැන්ත ප්රචාරයක් දෙනවා. මංගල සමරවීරට වචනයක් පිටකරන්න බැහැ. භික්ෂූන් එළියට බහිනවා. ඒත් කරුණා අම්මාන් කළ අති බිහිසුණු කතාවට මේ කිසිම පාර්ශ්වයක් එක කෙළ බිදක් හෙළුවේ නැහැ. මේක තමයි ලංකාවේ දේශපාලන භාවිතයේ ස්වභාවය. ප්රශ්නේ තියෙන්නේ මෙවැනි හිස් දේශපාලන චරිත පක්ෂ නායකයින් විසින් දැඩිව ආරක්ෂා කිරීමයි‘භාතිය බරුකන්ද මහතා වැඩි දුරටත් ප්රකාශ කළා.
මෙහිදී ඔහු සදහන් කළේ ‘ගොරකා දඩමස් කරන මාධ්ය හා දේශපාලන සංස්කෘතිය තුළ මහින්දා නන්ද වැනි අවස්ථාවාදී දේශපාලන චරිත උඩ පිනුම් ගසන බවයි.
දැඩි ආන්දෝලනයක්
ක්රීඩා වැරදි පිළිබඳව පොලිස් විශේෂ විමර්ශන ඒකකයේ ප්රධානී ජ්යෙෂ්ඨ පොලිස් ආධිකාරී ජගත් ෆොන්සේකා මහතා ප්රකාශ කළ ආකාරයට 2011 ලෝක කුසලානය පවාදීම ගැන මහින්දා නන්ද කළ සාවද්ය ප්රකාශය දේශීය හා ජාත්යන්තර වශයෙන් දැඩි ආන්දෝලනක් ඇතිකර තිබෙනවා. ඒ අතර පොදුජනතාව, ක්රිකට් ක්රීඩකයින් සේම දේශපාලනඥයින් ද සිටිනවා.
ට්විටර් පණිවුඩයක් නිකුත් කරමින් හිටපු අමාත්ය මනෝ ගනේෂන් ක්රීඩකයින්ගෙන් ප්රශ්න කරනු ලැබීම හඳුන්වා දෙන්නේ හෝමාගම “ලංකාවේ විශාලතම ක්රිකට් ක්රීඩාංගණය” ඉදි කිරීමේ සැලසුමට ක්රීඩකයින් විරුද්ධ වූ බැවින් ඔවුන් “විනාශ කිරීමේ” උත්සහයක් ලෙසයි.
ශ්රී ලංකාවේ ක්රීඩකයින් බේරා ගැනීම පිණිස එක්වන මෙන් හිටපු ක්රීඩා අමාත්ය හරීන් ප්රනාන්දු හිටපු පාර්ලිමේන්තු මන්ත්රී නාමල් රාජපක්ෂගෙන් ඉල්ලීමක් කළා.
නාමල් රාජපක්ෂ හිටපු මන්ත්රීවරයා ට්විටර් පණිවිඩයක් නිකුත් කරමින් පවසා සිටියේ තමන් එදා මෙන්ම අදත් පොලිසිය ක්රීඩකයින්ගෙන් ප්රශ්න කිරිමට විරුද්ධ බවත් ‘යහපාලන’ රජය සමයේ ඇන්ජලෝ මැතිව්ස් ගෙන් පොලිසිය ප්රශ්න කළ අවස්ථාවෙදීත් තමන් එයට විරෝධය පළ කළ බවයි.
අදාළ සිදුවීම සම්බන්ධයෙන් සිට ට්වීටර් ගිනුමේ සටහනක් තබමින් විපක්ෂනායක සජිත් ප්රේමදාස පවසන්නේ, ‘ජනතා බලය’ හමුවේ දණ ගැසීමට ආණ්ඩුවට සිදු වී ඇති බවයි.
මහේල සහ අරවින්ද ගේ ප්රතිචාරය
ට්විටර් ජාලය ඔස්සේ හිටපු ඇමතිවරයාගේ චෝදනාව ගැන ප්රතිචාර දක්වමින් එවකට කණ්ඩායමේ උප නායකයා වූ මහේල ජයවර්ධන, මැතිවරණය ළඟ දැයි උපහාසයෙන් ප්රශ්න කළා..
‘සංදර්ශනය’ ඇරඹී ඇති හැඩක් පෙනෙන බවත් පවසන ඔහු, තරග පාවා දුන් පුද්ගලයන්ගේ නම් සහ සාක්ෂි කවරේ දැයි ප්රශ්න කළා.
පොදුජන එක්සත් පෙරමුණේ මහ මැතිවරණ අපේක්ෂකයෙකු ද වන හිටපු ක්රීඩා අමාත්යවරයා කළ චෝදනාව සම්බන්ධ විවාදය තවත් ඉදිරියට යමින් එවකට ශ්රී ලංකා තේරීම් කමිටුවේ සභාපතිවරයා වූ අරවින්ද ද සිල්වා ද එයට ප්රතිචාර දක්වා තිබුණි.
හිටපු ඇමතිවරයා නගන චෝදනාව ගැන ප්රතිචාර දක්වමින් එවකට තේරීම් කමිටු සභාපතිවරයා වූ අරවින්ද සිල්වා පැවසුවේ පාවාදීමක් සිදු වී ඇත්නම් වසර 09 ක් තිස්සේ ඔහු එය සඟවාගෙන සිටීමම ගැටලුවක් බවයි.
ඇමතිවරයාගේ ප්රකාශය ඉතා බරපතල බැවින් ජාත්යන්තර ක්රිකට් කවුන්සිලය මෙන්ම ඉන්දියානු ක්රිකට් ආයතනයද ඒ පිළිබඳව වහාම පරීක්ෂණ පැවැත්විය යුතු බවත් අරවින්ද ද සිල්වා අවධාරණය කර තිබුණා.
ලෝක කුසලාන අවසාන මහා තරඟය පාවාදීම සම්බන්ධ චෝදනාව පිළිබඳ පොලිසිය විසින් විමර්ශන පවත්වනු ලැබුවේ හරීන් ප්රනාන්දු ක්රීඩා අමාත්යධුරය දරන සමයේ සම්මත කරන ලද ක්රීඩාවේ දූෂණ වැළැක්වීමේ නීතිය පදනම් කරගෙනයි.
මහින්දානන්දට එරෙහිව නීතිය ක්රියාත්මක කරන්න
මේ අතර දකුණු පළාත් හිටපු ආණ්ඩුකාර රජිත් කීර්ති තෙන්නකෝන් මහතා සිය ෆේස්බුක් ගිනුමේ සටහනක් තබමින් මහින්දානන්ද ට එරෙහිව නීතිය ක්රියාත්මක වේද ? යන්න මතුකරනවා. ඊට අදාළ නෛතික පසුබිමත් ඔහු එම සටහනේ දක්වා ඇති අතර එය පහත දැක්වෙනවා.
තරඟ පාවාදීම් පිළිබඳ ක්රීඩකයින්ට විරුද්ධව සාක්ෂි හමුවුනේ නැත්තම්, බොරු චෝදනා එල්ල කළ පුද්ගලයින්ට 2019 අංක 24 දරණ ක්රීිඩාවලට සම්බන්ධ වැරදි වැළැක්වීමේ පනතේ අංක 13 වගන්තිය, අංක 14 (ඊ) යටතේ නඩු පැවරිය යුතුයි. බොරු චෝදනාවට වරදකරු වන්නේ රු. ලක්ෂ දෙකක දඩයක්, වසර දෙකකට තුනක් නො ඉක්මවන සිරගත කිරීමක් දඩුවම් ලෙස ලැබිය හැකියි.
මේ තියෙන්නේ 2019 අංක 24 දරන ක්රීඩාවලට සම්බන්ධ වැරදි වැලැක්වීමේ පනතේ 13 වන වගන්තිය.
“මේ පනතේ 16 වන වගන්තිය යටතේ හෙළිදරව් කරනු ලබන යම් තොරතුරක ඇතුලත් යම් චොදනාවක අන්තර්ගතය සාවද්ය බව දැන දැනම හෝ, ඒ චෝදනාව සත්ය නොවන බව විශ්වාස කිරීමට හේතු තිබිය දී ඒ තොරතුර මගින් යම් සාවද්ය චෝදනාවක් කරන යම් තැනැත්තකු මේ පනත යටතේ වරදක් සිදු කරන අතරල මහෙස්ත්රාත්වරයකු විසින් වරදකරු කරනු ලැබීමේ දී රුපියල් ලක්ෂ එකකට වැඩි නොවන දඩයකට හෝ අවුරුදු තුනක් නො ඉක්මවන කාලයක් සඳහා බන්ධනාගාරගත කිරීමකට හෝ ඒ දඩය සහ බනධනාගාරගත කිරීම යන දඬුවම් දෙකට ම හෝ යටත් විය යුතුය.”
16 වන වගන්තියේ දක්වා ඇත්තේ තරඟ පාවාදීම් අනීතික ඔට්ටු ඇල්ලීම් ආදිය පිළිඹඳව කරනු ලැබෙන පැමිණිලි ගැන. ඉතිං මහින්දානන්ද හිටපු ඇමතිතුමා කලේ එවැනි පැමිණිල්ලක්. දැන් විමර්ශණ කණ්ඩායම කියනවා ඒ පැමිණිල්ල ඔප්පුකරන්න සාධක නෑ කියලා.
එහෙමනම් ඔය විමර්ෂණ කණ්ඩායම දැන් පනතේ 13 වන වගන්තිය යටතේ හිටපු ඇමතිතුමාට එරෙහිව නඩු පැවරිය යුතුයි. එහෙම නැතිනම් මේ විමර්ෂණය දේශපාලන උවමනාවකට කරපු දඩයමක් බවට හොඳටම පැහැදිලි වෙනවා. මීට අවුරුද්දකට කලින් එතුමාත් පාර්ලිමේන්තු මංත්රීවරයෙක් වෙලා හිටපු කාලේ හදපු නීතියක් නිසා එතුමා මේක ගැන නොදන්නවා කියන්නත් බෑනේ!
ජාත්යන්තර ක්රිකට් කවුන්සිලයේ සභාපති පුටුව රටට අහිමි කිරීම
2011 ලෝක කුසලානය පවාදීමක් ගැන මහින්දා නන්ද අලුත්ගමගේ මහතා සහ හිටපු ඇමති තිලංග සුමතිපාල මහතා කළ ප්රකාශ ගැන අවධානය යොමු කරන බොහෝ පාර්ශ්ව ඍජුව චෝදනා කරන්නේ මෙම සිදුවීම පිටුපස දැවැන්ත කුමන්ත්රණයක් තිබූ බවයි.
කුමාර සංග්ක්කාර මහතා ජාත්යන්තර ක්රිකට් කවුන්සිලයේ සභාපති ධූරයට තරග කිරීමට සූදානමින් සිටියදී මහින්දා නන්ද – තිලංග මැදිත්වීම මත ඍජුව කුමන්ත්රණයක් සිදුව ඇති බවට ඔවුන් චෝදනා කරනවා.
සැකසුම – තීක්ෂණ වෙළෙන්එගොඩ
