ශ්රී ලංකා ක්රිකට් කණ්ඩායමේ ප්රධාන පුහුණුකරු මිකී ආතර් සිය ධුරයෙන් ඉවත්වීමට තීරණය කර තිබේ. ඔහු සිය ට්විටර් ගිණුමේ සටහනක් තබමින් සඳහන් කර ඇත්තේ එළඹෙන ශ්රී ලංකා – කොදෙව් ටෙස්ට් තරගාවලියෙන් අනතුරුව එම ධුරයෙන් ඉවත් වන බවයි. නොවැම්බර් 21 සිට දෙසැම්බර් 3 දක්වා පැවැත්වෙන එම තරගාවලිය පැවැත්වේ.
මේ අතර එංගලන්තයේ ඩර්බිශයර් ක්රිකට් සමාජයේ ක්රිකට් ප්රධානී ලෙස මිකී ආතර් පත් කර ඇති බව ක්රීඩා වෙබ් අඩවි කිහිපයක් වාර්තා කර ඇත.
ඉන්දියාව සහ ශ්රී ලංකාව 2026 T20 ලෝක කුසලානයේ සම සත්කාරකත්වය ලබා ගැනීමට සූදානම් වන බව ජාත්යන්තර ක්රිකට් කවුන්සිලය (ICC) නිවේදනය කළේය.
ICC විසින් එහි ඉදිරි තරඟාවලි අටක් සඳහා සත්කාරක රටවල් 12 හි නම් පහත පරිදි ප්රකාශයට පත් කරන ලදී.
2021 ජ්යෙෂ්ඨ මල්ලවපොර ලෝක ශූරතා තරගාවලියට සහභාගීවීමට පසුගියදා දිවයිනෙන් පිටත්ව ගොස් තරග සංචාරය අතරතුර දී නෝර්වේ රාජ්යයේ ඔස්ලෝ නුවරින් අතුරුදහන් වූ මල්ලවපොර සම්මේලනයේ උප සභාපති මෙන්ම කණ්ඩායමේ කළමණාකරු වශයෙන් ද කටයුතු කළ ඩොනල්ඩ් ඉන්ද්රවංශ මහතා සම්බන්ධව පුළුල් විමර්ශන ක්රියාත්මක කරන බව ක්රීඩා සංවර්ධන දෙපාර්තමේන්තුවේ අධ්යක්ෂ ජනරාල් අමල් එදිරිසූරිය මහතා පැවසීය.
ඒ පිළිබඳ ක්රීඩා අධ්යක්ෂ ජනරාල්වරයා මෙසේ අදහස් දැක්වීය.
2019 අංක 24 දරණ ක්රීඩාවලට සම්බන්ධ වැරදි වැළැක්වීමේ පනතේ විධිවිධාන අනුව “ක්රීඩා වැරදි වැළැක්වීමේ විශේෂ විමර්ශන ඒකකය” වෙත වහාම ක්රියාත්මක වන පරිදි පැමිණිල්ලක් ඉදිරිපත් කර තිබෙනවා.
මේ සම්බන්ධව ජාත්යන්තර මල්ලවපොර සම්මේලනයටත්, නෝර්වේ මල්ලවපොර සම්මේලනයටත් දැනුම් දී තිබෙන අතර, අපරාධ පරීක්ෂණ දෙපාර්තමේන්තුවට ද ශ්රී ලංකා මල්ලවපොර සම්මේලනය විසින් පැමිණිලි ඉදිරිපත් කර තිබෙනවා.
තරගාවලියට සහභාගීවීම සඳහා ලබාදුන් මුදල් ද අදාළ කළමනාකරවරයා විසින් රැගෙන ගොස් ඇත්දැයි එහිදී විමර්ශනය කිරීමෙන් අනතුරුව මේ පිළිබඳව නීතිමය ක්රියාමාර්ග ගැනීමට නියමිතයි.
”ඔක්තෝබර් මස 02 සිට 10 වන දින දක්වා නෝර්වේ ඔස්ලෝ නුවර පැවැත්වුණු ජ්යෙෂ්ඨ මල්ලවපොර ලෝක ශූරතා තරගාවලියට සහභාගීවීම සඳහා පමණක් අනුමැතිය ලබාදෙන ලෙස මල්ලවපොර සම්මේලනයෙන් ඉල්ලීමක් ඉදිරිපත් වුණා.
මෙම තරගාවලිය සඳහා ක්රීඩකයන් තෝරා ගැනීමේ දී දක්ෂතා ඇගයීමේ නිසි ක්රමවේදයට අනුව ක්රීඩකයින් තෝරාගැනීමකින් තොරව 2019 වසරේ දක්ෂතා දැක්වූ කණ්ඩායම ම මෙවර තරගාවලිය සඳහා ඔවුන් ඉදිරිපත් කර තිබුණා.
තරගාවලියක් සඳහා දක්ෂතම හා සුදුසුකම් සහිත පුහුණු කණ්ඩායම සඳහා නිර්දේශ ලබාදීම අදාළ සංගමය හෝ සම්මේලනය, ජාතික තේරීම් කමිටුව හා උසස් දක්ෂතා කමිටුව විසින් සිදුකරනු ලබනවා.
මේ වනවිට (2021) ක්රීඩකයන්ගේ දක්ෂතාවයන් වැඩි දියුණු වී ඇති බැව් සලකා ක්රීඩකයන්ගේ දක්ෂතා ඇගයීමකින් තොරව 2019 වසරේ දක්ෂතා දැක්වූ ක්රීඩකයන් ම මෙම තරගාවලිය සඳහා පිටත් කර යැවීම පිළිබඳව ක්රීඩා සංවර්ධන දෙපාර්තමේන්තුව හා උසස් දක්ෂතා කමිටුව එක්ව සාකච්ඡා කිරීමෙන් අනතුරුව ඔවුන්ට ඒ සඳහා අවස්ථාව ලබානොදීමට තීරණය කළා.
පසුව මෙම තරගාවලියට සහභාගීවීමට පමණක් අවස්ථාව ලබාදෙන ලෙස ක්රීඩකයන් හා මල්ලවපොර සම්මේලනය විසින් ලිඛිතව කළ ඉල්ලීම සැලකිල්ලට ගනිමින් තරගාවලියට ඉදිරිපත්වීම සඳහා ක්රීඩකයන්ට අවස්ථාව ලබාදීම වෙනුවෙන් මෙම කණ්ඩායමට තරග සහභාගීත්වය සඳහා පමණක් අවසර ලබාදුන්නා.
තරගාවලියට ඉදිරිපත්වීමට පමණක් ක්රීඩකයන් වෙනුවෙන් ලබාදුන් මෙම අවස්ථාව අනිසි ලෙස භාවිත කර තම පෞද්ගලික අරමුණ ඉටු කරගැනීම වෙනුවෙන් ජාත්යන්තරය ඉදිරියේ රටේ හා ක්රීඩාවේ අභිමානය හෑල්ලුවට ලක්කර තරග සංචාරය අතරතුර දී මල්ලවපොර සම්මේලනයේ උප සභාපති මෙන්ම කණ්ඩායමේ කළමණාකරු වශයෙන් ද කටයුතු කළ ඩොනල්ඩ් ඉන්ද්රවංශ මහතා කණ්ඩායම එරටින් පිටත්වීමට පෙර දින එනම් 07 වනදා ඔස්ලෝ නුවරින් අතුරුදහන් වී තිබුණා.
ඔහු එසේ ඔස්ලෝ නුවරින් අතුරුදහන්ව ඇත්තේ සිය කණ්ඩායමට නැවත ලංකාවට පැමිණීමට හා පී.සී.ආර්. පරීක්ෂණ සඳහා ඔවුන් සතුව තිබූ මුදල් ද රැගෙන බවට කරුණු වාර්තා වුණා.
විදේශගතවීමේදී අදාළ පුද්ගලයන් සමග රුපියල් ලක්ෂ 10ක ඇප බැඳුම්කරයක් වෙනුවෙන් ගිවිසුම්ගත වන බැවින් එම ඇප බැඳුම්කර කොන්දේසි උල්ලංඝනය සම්බන්ධයෙන් නඩු පැවරීම කෙරෙහි ද අප අවධානය යොමු කර තිබෙනවා.
මෙම තරග සංචාරය සම්බන්ධව මල්ලවපොර සම්මේලනයේ අදහස් පමණක් සැලකිල්ලට ගනිමින් මාධ්ය හරහා සාවද්ය තොරතුරු සමාජගතවීම පිළිබඳ කණගාටු වන අතර මල්ලවපොර සම්මේලනයෙන් ද ඒ පිළිබඳව කරුණු විමසීමක් සිදුකිරීමට නියමිතයි.
සෑම පුරවැසියකුම ජවසම්පන්න, සෞඛ්යසම්පන්න, විනයගරුක හා ගෞරවනීය පුද්ගලයන් බවට පත්කරමින් සමෘද්ධිමත් දේශයක් ගොඩනැගීම සඳහා යන ගමනේ දී විනය ප්රමුඛ කාරණයක් වන බැවින් අභිමානවත් ජාතියක් ලෙස ජාත්යන්තරය තුළ රට නියෝජනය කිරීමේදී සියලුදෙනාම විනය සම්බන්ධව ඉතාමත් ම වගකීමෙන් කටයුතු කළ යුතුයි.
මෙවැනි සිදුවීම් අපි තරයේ හෙළා දකින අතර වැරදි පූර්වාදර්ශ අනාගත පරම්පරාවට ලැබීම වැළැක්වීම සඳහා මෙම සිදුවීම සම්බන්ධව විමර්ෂනය කිරීමෙන් අනතුරුව මෙම විනය විරෝධී ක්රියා සම්බන්ධව දැඩිව නීතිය ක්රියාත්මක කරනු ලබනවා” යැයි ක්රීඩා අධ්යක්ෂ ජනරාල්වරයා වැඩිදුරටත් පැවසීය.
සිය නිල ට්විටර් ගිණුම හරහා පණිවිඩයක් නිකුත් කරන මහේල “එයාලා මගෙන් සම්මුඛ සාකච්ඡාවක් ලබාගත්තේ කවදද? කරුණාකර ඕපාදූප ප්රචාරය කරන පහත් මට්ටමට වැටෙන්න එපා.” යනුවෙන් සැමගෙන් ඉල්ලයි.
ඉන්දියානු කණ්ඩායමේ ප්රධාන පුහුණුකරු ධුරය භාර ගන්නා ලෙස ඉන්දිය ක්රිකට් කවුන්සිලය (BCCI) කළ යෝනාව මහේල ජයවර්ධන විසින් ප්රතික්ෂේප කර ඇතැයි Indian Express වාර්තාවක සදහන් වෙයි.
ඉදිරි විස්සයි 20 ලෝක කුසලානයෙන් පසුව තමන් ඉන්දීය කණ්ඩායමේ ප්රධාන පුහුණුකරු ධුරයෙන් ඉවත් වන බව වත්මන් පුහුණුකරු වන රවී ශාස්ත්රී නිවේදනය කර තිබේ.
Indian Express වාර්තාවේම සඳහන් වන්නේ මහේල ජයවර්ධන විසින් එම ඉල්ලීම ප්රතික්ෂේප කර ඇත්තේ ඔහු (මහේල) ශ්රී ලංකා ජාතික කණ්ඩායමේ පුහුණුකරු තනතුර අපේක්ෂාවෙන් සිටින බැවින් බවයි.
අයිපීඑල් තරඟාවලියේ මුම්බායි ඉන්දියන්ස් හි පුහුණුකරු ලෙස ද කටයුතු කරන්නේ ද මහේල ජයවර්ධනයි. ඉන්දීය ක්රිකට් කවුන්සිලයේ නීති වලට අනුව, පැහැදිලිවම සඳහන් වන්නේ පුද්ගලයෙකුට ඉන්දීය කණ්ඩායමේ ප්රධාන පුහුණුකරු ලෙස සිටියදී වෙනත් තනතුරක් දැරීමට නොහැකි බවයි, නමුත් ශ්රී ලංකා පුහුණුකරුවෙකුට මෙවැනි සීමා කිරීමක් නැත.
මේ අතර තමන් ඉන්දිය ජාතික ක්රිකට් පුහුණකරු ධුරය ප්රතික්ෂේප කර ශ්රී ලංකා ජාතික පුහුණුකරු ධුරය බාර ගැනීමට සුදානමින් සිටින බවට ඉන්ඩියන් එක්ස්ප්රස් පුවත්පත විසින් පළකල පුවත මහේල ජයවර්ධන විසින් ප්රතික්ෂේප කර තිබේ. සිය නිල ට්විටර් ගිණුම හරහා පණිවිඩයක් නිකුත් කරන මහේල “එයාලා මගෙන් සම්මුඛ සාකච්ඡාවක් ලබාගත්තේ කවදද? කරුණාකර ඕපාදූප ප්රචාරය කරන පහත් මට්ටමට වැටෙන්න එපා.” යනුවෙන් සැමගෙන් ඉල්ලයි.
ඉන්දියාව වෙනුවෙන් විස්සයි 20 තරග 90 කදී විරාට් කෝලි 52.65ක ලකුණු සාමාන්ය අගයක් ලබා ඇත
නොවැම්බර් මාසයේදී පැවැත්වෙන විස්සයි 20 පිරිමි ලෝක කුසලාන තරගාවලියෙන් පසු ඉන්දීය විස්සයි 20 කණ්ඩායමේ නායකත්වයෙන් ඉවත් වීමට චිරාත් කෝලි තීරණය කර තිබේ.
සිය ට්විටර් ගිනුවේ සටහනක් තබමින් ඔහු පැවසුවේ ටෙස්ට් ක්රිකට් සහ එක්දින ජාත්යන්තර තරඟ සඳහා “පූර්ණ” සූදානම් වීමට තමාට “ඉඩ” ලබා දිය යුතු බවයි.
විස්සයි 20 ලෝක කුසලානය ඔක්තෝබර් 17 සිට නොවැම්බර් 14 දක්වා එක්සත් අරාබි එමීර් රාජ්යයේ සහ ඕමානයේදී පැවැත්වේ.
ඉන්දියාව වෙනුවෙන් විස්සයි 20 තරග 90 කදී ලකුණු 3,159 ක් ලබා ඇති අතර ටෙස්ට් නායකත්වය භාරගෙන වසර තුනකට පසු 2017 දී කෝලි සීමිත පන්දුවාර නායකයෙකු ලෙස පත් කරන ලදී.
එම්එස් දෝනිගේ නායකත්වය යටතේ 2016 විස්සයි 20 ලෝක කුසලාන ක්රිකට් තරගාවලියේ දක්ෂතම ක්රීඩකයා ලෙස නම් කරන ලදී.
“ඉන්දීය විස්සයි විස්ස කණ්ඩායමේ නායකයා ලෙස පසුගිය කාලය තුළ මගේ වෙහෙසකර කාලසටහන ගැන සලකා බැලීමේදී මෙම තීරණය ගැන නිවැරදි යැයි මට හැඟේ” යනුවෙන් කෝලි ට්විටර් පණිවුඩයක් නිකුත් කළේය.
“විස්සයි 20 නායකයා ලෙස සිටි කාලය තුළ මම කණ්ඩායමට සෑම දෙයක්ම ලබා දී ඇති අතර තව දුරටත් විස්සයි විස්ස කණ්ඩායමේ පිතිකරුවෙකු ලෙස දිගටම ක්රීඩා කිරීමට අපේක්ෂා කරමි” යනුවෙන් ඔහු වැඩි දුරටත් සදහන් කළේය.
පසුගියදා පැවති ටෙස්ට් ක්රිකට් තරගාවලියේ එංගලන්තයට එරෙහිව 2-1ක් ලෙස පෙරමුණ ගැනීමට කෝලි නායකත්වය දුන් අතර, තරගාවලියේ විසඳුම තවමත් නිශ්චය කර නොමැත.
ලබන ඉරිදා ඉන්දීය ප්රිමියර් ලීග් ක්රිකට් තරගාවලිය ආරම්භ වන විට ඔහු රෝයල් චැලෙන්ජර්ස් බැංගලෝර්හි නායකත්වය දරයි.
බී.බී.සී ඇසුරිනි
සංචාරක දකුණු අප්රිකානු කණ්ඩායම සමග පැවැති විස්සයි විස්ස තරගාවලිය 3-0ක් ලෙස පරාජයට පත්වීමත් සමග ශ්රී ලංකාව විස්සයි විස්ස ශ්රේණිගත කිරීම් වල 10 වැනි තැන දක්වා පල්ලම් බැස තිබේ.
දකුණු අප්රිකාව හමුවේ ලද පරාජයත් සමග ශ්රී ලංකාවේ ලකණු සංඛ්යාව 229ක් දක්වා පහළ ගොස් ඇති අතර මෙම තරගාවලිය ආරම්භයට පෙර ශ්රී ලංකාව විස්සයි විස්ස ශ්රේණිගත කිරීම්වල 09 වැනි ස්ථානයේ පසු වූ අතර ප්රසාද ලකුණු සංඛ්යාව 235ක් විය.
දකුණු අප්රිකාව විස්සයි විස්ස ශ්රේණිගත කිරීම්වල ප්රසාද ලකුණු 246ක් ලබා ගනිමින් 05 වැනි ස්ථානයේ පසුවන අතර ශ්රී ලංකාවට එරෙහිව තරගාවලිය 3-0ක් ලෙස ජය ගත්ත ද දකුණු අප්රිකාව පසුවන ස්ථානයේ වෙනසක් සිදුව නැත.
විස්සයි විස්ස ශ්රේණිගත කිරීම්වල පළමු ස්ථානයේ එංගලන්තය ද, දෙවැනි ස්ථානයේ ඉන්දියාව ද, දෙවැනි ස්ථානයේ පාකිස්ථානය සහ සිවුවන ස්ථානයේ නවසීලන්තය ද පසුවේ.
බංග්ලාදේශය 06 වැනි ස්ථානයේ ද, ප්රබල ඕස්ට්රේලියානු කණ්ඩායම 07 වැනි ස්ථානයේ ද ඇෆ්ගනිස්ථානය 08 වැනි ස්ථානයේ ද බටහිර ඉන්දිය කොදෙව් කණ්ඩායම 09 වැනි ස්ථානයේ ද පසුවේ.
පැරා ඔලිම්පික් උළෙලකදී ශ්රී ලංකා ක්රීඩකයකු දිනාගත් පළමු රන් පදක්කමට හිමි වාර්තාව තමා සතු කරගනිමින් ටෝකියෝ නුවරදී මේ දිනවල පැවැත්වෙන පැරලිම්පික් උළෙලේ එෆ් 46 කාණ්ඩයේ හෙල්ල විසි කිරීමේ ඉසව්වේදී නව ලෝක වාර්තාවක් පිහිටුවමින් රන් පදක්කම දිනා ගැනීමට ශ්රී ලංකාවේ දිනේෂ් ප්රියන්ත අද (30 වැනිදා) සමත් විය.
ශ්රී ලංකා යුද හමුදාවේ ගජබා රෙජිමේන්තුව නියෝජනය කරන 35 හැවිරිදි දිනේෂ්, 2016 වසරේදී පැවැති රියෝ පැරලිම්පික් උළෙලේදී මීටර් 58.23 ක දුරක් හෙල්ල විසිකරමින් එෆ් 46 කාණ්ඩයේ ලෝකඩ පදක්කමට හිමිකම් කීවේය.
2012 වසරේදී පැරා ක්රීඩා ක්ෂේත්රයට පා තැබූ ඔහු ගජබා ක්රීඩා සමාජය නියෝජනය කරන අතර ප්රදීප් නිශාන්ත ඔහුගේ පුහුණුකරු වශයෙන් කටයුතු කරයි.
එක් අතක් වැලමිටට පහළින් හෝ ඉහළින් අහිමි ක්රීඩකයන් තරග වදින එෆ් 46 කාණ්ඩය යටතේ තරග වැදුණ දිනේෂ්, සිය තෙවැනි උත්සාහයේදී මිටර් 67.79 ක දුරක් හෙල්ල විසිකරමින් නව ලෝක වාර්තාව පිහිටුවේය. ඔහුගේ පළමු උත්සාහය මීටර් 62.58 ක් ලෙසද, දෙවැනි උත්සාහය මීටර් 62.19 ක් ලෙසද සටහන් විය.
එම ඉසව්වේදී දිනේෂ් ප්රියන්ත මීටර 67.79 වාර්තා කළ අතර රිදී සහ ලෝකඩ පදක්කම් දිනා ගත් ඉන්දීය ක්රීඩකයන් දෙදෙනා පිළිවෙලින් මීටර 64.35 ක් සහ 64.01 වශයෙන් වාර්තා කළහ.
ශ්රී ලංකා යුද හමුදාවේ සේවය කරමින් සිටින අතරතුර 2008 වසරේදී දිනේෂ් ප්රියන්තගේ වම් අතට වෙඩි වැදී තිබේ. අතේ මාංශ පේශීවල ශක්තියට හානි වීම නිසා (Impaired muscle power) ඔහු අබාධිත ක්රීඩක කාණ්ඩයට ඇතුළත් වේ.
අනුරාධපුරයෙන් බිහි වූ ක්රීඩකයෙකු වන දිනේෂ්, 2019 වසරේ ජනාධිපති ක්රීඩා සම්මාන උළෙලේදී වඩාත් කැපී පෙනෙන පැරා ක්රීඩකයා වශයෙන් සම්මානයට ලක් විය. 2018 වසරේදී ඉන්දුනීසියාවේ පැවති ආසියානු පැරා ක්රීඩා උළෙලේ සමාරම්භක අවස්ථාවට එක් වෙමින් ශ්රී ලංකා ධජය රැගෙන යනු ලැබුවේ ඔහු විසිනි.
“මගේ සිහිනය සැබෑ වුණ එක ගැන හරිම සතුටුයි. ඒ ගැන කියන්න වචන නෑ.” යනුවෙන් ජයග්රහණයෙන් පසු ශ්රී ලංකා ධජය සිඹි දිනේෂ් පැවසීය.
“මම පාසල් ශිෂ්යයෙකුව සිටියදීත්, පසුව හමුදාවෙදීත් කිසිම ක්රීඩාවක යෙදුනේ නැහැ. තුවාල වුණාට පස්සේ මම අවුරුදු හතරකට වැඩිය රෝහලේ සිටියා. ශ්රී ලංකාවේ යුද්ධය අතරතුර, 2008 දී මගේ අතේ තුන් පොළකට වෙඩි වැදුනා” යනුවෙන් දිනේෂ් සිය ජයග්රණයෙන් පසු කී බව‘ පැරාඔලිම්පික් නිල වෙබ්අඩවියේ වාර්තාවක සදහන් වේ.
‘‘මම පාබල හමුදාවේ සිටි නිසා එකම දවසෙදී මගේ යාළුවෝ බොහෝ දෙනෙක් තුවාල ලැබුවා. ඔවුන් එකිනෙකා සමග කතාබහ කරමින් රෝහලේ සිටියා. මට සුවය ලැබූ පසු විනෝදය සඳහා ක්රීඩාවක යෙදෙන්න අවශ්ය වුණා. මගේ බිරිඳ තමයි මට ඉන්න ලොකුම දිරි ගැන්වීම,” මට දරුවෝ තුන් දෙනෙක් ඉන්නවා. මගේ බිරිඳ ඔවුන් හොඳින් රැක බලා ගන්නවා. ඇය මා දිරි ගන්වනවා. අපේ බාලම දරුවට තාම මාස අටයි. මගේ බිරිඳ ඒ සියලු දේ ඉටු කරනවා. ක්රීඩාවේ යෙදෙන්න ඇය මට නිදහස දී තිබෙනවා. මේ රන් පදක්කම වෙනුවෙන් මම මගේ බිරිඳට ස්තූතිවන්ත වෙනවා.”
මේ අතර පැරාලිම්පික් රන් පදක්කම දිනා ගැනීමත් සමග ජනාධිපතිවරයාගේ සහ ආරක්ෂක ලේකම්වරයාගේ අනුමැතිය ඇතිව යුද හමුදාපතිවරයා විසින් දිනේෂ් ප්රියන්තව සාජන්ට් නිලයේ සිට බලලත් නිලධාරී 01 දක්වා උසස් කරනු ලැබ තිබේ.
පසුගිය එංගලන්ත සංචාරයේදී විනය විරෝධී ලෙස හැසිරුණු ධනුෂ්ක ගුණතිලක, කුසල් මෙන්ඩිස් සහ නිරෝෂන් දික්වැල්ලට තරග තහනමක් හා දඩයක් පැණවීමට ශ්රි ලංකා ක්රිකට් ආයතනය පත් කළ පංච පුද්ගල කමිටුව තීරණය කර ඇත.
මේ තීන්දුව අනුව ධනුෂ්ක ගුණතිලක සහ කුසල් මෙන්ඩිස් හට වසර දෙකක තරග තහනමකුත් නිරෝෂන් දික්වැල්ල හට මාස 18ක ක්රිකට් තහනමකුත් පැනවීමට අමතර තිදෙනාට ඇමරිකන් ඩොලර් 25,000ක දඩයක්ද නියම කිරීමටත් පියවර ගෙන තිබෙනවා.
නිමා වූ එංගලන්ත සංචාරයේ ශ්රි ලංකා ක්රිකට් ක්රීඩකයින් තිදෙනෙක් වන ධනුෂ්ක ගුණතිලක, නිරෝෂන් දික්වැල්ල සහ කුසල් මෙන්ඩිස් එම සංචාරය අතර තුර ජෛව ආරක්ෂිත බුබුලෙන් පිටතට පැමිණෙමින් වීදී සංචාරය කරමින් සිගරැට් පානය කිරීමට සැරසෙන අයුරු පුද්ගලයෙකු ගත් විඩියෝවක් තුළින් සමාජ මාධ්යයේ ශීඝ්රයෙන් සංසරණය වූ අතර එය දේශීය හා ජාත්යන්තර වශයෙන් මහත් ආන්දෝලනයක් ඇති කළා.
ඒ සම්බන්ධයෙන් ක්රියාමාර්ග ගත් ශ්රි ලංකා ක්රිකට් මෙම ක්රීඩකයින් තිදෙනාව වහාම ලංකාවට ගෙන්වාගෙන විනය ක්රියා මාර්ගයක් ගත්තේය.
ICL Brands පෞද්ගලික සමාගමේ ඊවා (Bra) සන්නාමය ශ්රී ලංකා ජාතික ඔලිම්පික් කමිටුව සමඟ සහයෝගීතාවයකට එළඹෙමින් 2020 ටෝකියෝ ඔලිම්පික් තරඟ සඳහා සහභාගී වී සිටින ශ්රී ලංකා කණ්ඩායම සඳහා ‘නිල දිරිගැන්වීමේ සහකරු’ බවට පත් වූ අතර ඒ වෙනුවෙන් පසුගියදා විශේෂ සන්නිවේදන වැඩසටහනක් දියත් කළේය. ශ්රී ලංකා ඔලිම්පික් කණ්ඩායම දිරිගැන්වීම සඳහා ශ්රී ලාංකිකයින් එක්රොක් කිරීම සඳහා ‘නිල ඔල්වසරන් ගීතය’ දියත් කරමින් මෙම වැඩසටහන දියත් කෙරිණි.
‘නිල ඔල්වරසන් ගීතය’ දියත් කිරීමේ අවස්ථාව සඳහා ඔලිම්පික් රිදී පදක්ම් ජයග්රාහිකා සුසන්තිකා ජයසිංහ මහත්මිය, ශ්රී ලංකා ජාතික ඔලිම්පික් කමිටුවේ කාන්තා කමිටුවේ සභාපතිනී නිලූ ජයතිලක මහත්මිය, ඔලිම්පික් කමිටුවේ විධායක කමිටු මණ්ඩල සාමාජික ෆාසිල් හුසේන් මහතා සහ ICL Brands පෞද්ගලික සමාගමේ අලෙවි කළමනාකාරිණී චේතිකා රාජපක්ෂ මහත්මිය සහභාගී විය. ICL Brands හි සමූහ අධ්යක්ෂිකා, ශාන්ති බජිරාදන්, එම සමාගමේ විධායක නිලධාරී රාකේෂ් කොස්ලා, කැපිටල් මහරාජා සමූහයේ ප්රධාන විධායක නිලධාරී, සුනිල් කනෝජියා යන මහත්ම මහත්මීන්ද විශේෂ අමුත්තන් වශයෙන් මේ අවස්ථාවට සහභාගී වූහ. සහ නිල ඔල්වරසන් ගීතය දියත් කිරීම සමාජ මාධ්ය ජාලා හරහා සජීවීව විකාශය කරමින් සන්නිවේදන ව්යාපෘතිය ආරම්භ වූ අතර එය ටෝකියෝ ඔලිම්පික් උළෙල පැවත්වෙන කාලසීමාව පුරාවට ශ්රී ලාංකිකයින් එක්රොක් කරමින් ක්රියාත්මක වනු ඇත.
මෙම අවස්ථාවට සහභාගී වූ සුසන්තිකා ජයසිංහ මහත්මිය ඊවා හි කාර්යභාරය අගය කරමින් මෙසේ පැවසුවාය “ICL Brands වැනි ප්රමුඛ පෙළේ සන්නාම ඔලිම්පික් උළෙලේදී අපේ රට නියෝජනය කරන ක්රීඩක ක්රීඩිකාවන් දිරිගැන්වීමට ඉදිරිපත් වනු දැකීම මට විශාල සතුටක්. ඔලිම්පික් ක්රීඩා උළෙලේදී ශ්රී ලංකාව නියෝජනය කළ, රට වෙනුවෙන් විශාල කැප කිරීමක් කළ ක්රීඩිකාවක් වශයෙන් මෙහි වටිනාකම මා හොඳින් දන්නවා”
මේ අවස්ථාවේදී අදහස් දැක්වූ ICL Brands පෞද්ගලික සමාගමේ අලෙවි කළමනාකාරිණී චේතිකා රාජපක්ෂ මහත්මිය මෙසේ පැවසීය “සන්නාමයක් වශයෙන් ඊවා ක්රියාත්මක වන්නේ ‘විශ්වාසයෙන් පෙරමුණට’ යන තේමාව සමඟයි. එනිසා උත්සාහය, ධෛර්යය සහ විශිෂ්ටත්වය වෙනුවෙන් ඇති කැපවීම වැනි වටිනාකම් ඊවා සන්නාමය නිතරම ප්රවර්ධනය කරන ගුණාංගයන්. අපි හිතන විදියට අද ටෝකියෝ ඔලිම්පික් උළෙල නියෝජනය කරන ශ්රී ලංකා කණ්ඩායමේ සෑම සාමාජිකයෙක්ම, සාමාජිකාවක්ම මේ ගුණාංගවලට හොඳම උදාරහණයි. ඔවුන් තමන්ගේ ලොකුම සිහිනය සැබෑ කරගැනීමට වෙනුවෙන් අතිමහත් කැප කිරීමක් කරමින්, දැවැන්ත චිත්ත ධෛර්යයක් ඇතිව කටයුතු කර තිබෙනවා. ඒ වෙනුවෙන් ඔවුන් හට අපේ ගෞරවය ලැබිය යුතුයි. එනිසා ශ්රී ලංකා ජාතික ඔලිම්පික් කමිටුව සමඟ එක්ව ශ්රී ලංකා ඔලිම්පික් කණ්ඩායම දිරිගන්වන අතරම සන්නාමයක් වශයෙන් අපි විශ්වාස කරන වටිනාකම් රැසක් ප්රවර්ධනය කිරීමට හැකි වීම පිළිබඳව අපි සතුටු වෙනවා”
ශ්රී ලංකා ජාතික ඔලිම්පික් කමිටුවේ විධායක කමිටු මණ්ඩල සාමාජික ෆසීල් හුසේන් මහතා මෙම අවස්ථාවේදී අදහස් දක්වමින් මෙසේ පැවසීය “ශ්රී ලංකා ඔලිම්පික් කණ්ඩායමේ ‘නිල දිරිගැන්වීමේ සහකරු’ වශයෙන් කටයුතු කිරීමට ඉදිරිපත් වීම සම්බන්ධයෙන් මම ඊවා වෙත ස්තූතිවන්ත වෙනවා. ටෝකියෝවට ගොස් සිටින අපේ ක්රීඩක ක්රීඩිකාවන් 9 දෙනා ලෝකය ඉදිරියේ හිසින් දරා සිටින්නේ අපේ රටේ ගෞරවයයි. එනිසා ඔවුන් වෙත අපේ ආදරය, ගෞරවය සහ දිරිගැන්වීම නොඅඩුව ලැබිය යුතුයි. ශ්රී ලාංකිකයින් වශයෙන් එය අපේ යුතුකමක්. එනිසා මා සිය`ඵ සහෝදර ශ්රී ලාංකික ජනතාවගෙන් මේ අවස්ථාවේදී ඉල්ලා සිටින්නේ මේ දිරිගැන්වීමේ වැඩසටහන හා සම්බන්ධ වී, අපේ ඔලිම්පික් කණ්ඩායමට සවියක් වීමට කටයුතු කරන ලෙසයි”
ශ්රී ලංකා ජාතික ඔලිම්පික් කමිටුවේ කාන්තා කමිටුවේ සභාපතිනී නිලූ ජයතිලක මහත්මිය මෙසේ පැවසුවාය “මෙවර ටෝකියෝ හි පැවත්වෙන ඔලිම්පික් උළෙලට සහභාගී වන ශ්රී ලංකා කණ්ඩායම එක් අතකින් සුවිශේෂයි. ඒ කණ්ඩායමේ සාමාජිකයින් 9 දෙනාගෙන් 5 ක්ම ක්රීඩිකාවන් වන නිසා. මෙය සිය`ඵ ශ්රී ලාංකික කාන්තාවන් ආඩම්බර විය යුතු කාරණයක් බව මගේ විශ්වාසයයි. ශ්රී ලංකාවේ ප්රමුඛතම කාන්තා සන්නාමයක් වන ඊවා ඔලිම්පික් කණ්ඩායමේ නිල දිරිගැන්වීමේ සහකරු බවට පත්වීමත් ඒ ආකාරයෙන් සුවිශේෂී සිදුවීමක්. ඊවා විසින් මේ වෙනුවෙන් දරන වෑයම වෙනුවෙන් මා ඔවුන්ට ස්තූතිවන්ත වන අතරම විශේෂයෙන්ම කාන්තාවන් ඇතුඵ සිය`ඵ ශ්රී ලාංකිකයින් හට මේ දිරිගැන්වීමේ වෑයමට දායක වන ලෙස ආරාධනා කරනවා”
නිල ඔල්වරසන් ගීතය ජනප්රිය ගායිකා උමාරා සිංහවංශ විසින් ගායනා කරන අතර එහි පිටපත් දෙකක් හඳුන්වා දී ඇත. ‘ඇය වෙනුවෙන් ඊවා’ තේමාව සහිත ඔල්වරසන් ගීතය ශ්රී ලංකා ඔලිම්පික් කණ්ඩායමේ කාන්තා සාමාජිකාවන් වෙනුවෙන්ම නිර්මාණය වූවකි. ‘ඔබ වෙනුවෙන් අපි’ තේමාව සමඟ එන ගීතය සමස්ත කණ්ඩායම වෙනුවෙන් නිර්මාණය වූ ගීතයයි. මෙම ඔල්වරසන් ගීතය කේන්ද්ර කරගත් ප්රචාරණ ව්යාපෘතිය ටෝකියෝ ඔලිම්පික් උළෙල අවසන් වනතුරු ශ්රී ලංකා කණ්ඩායම දිරිගැන්වීම සඳහා ආදරණීය ශ්රී ලාංකිකයන් එක්රොක් කරමින් ක්රියාත්මක වනු ඇත. ප්රචාරණ මාධ්ය ගණනාවක් ඔස්සේ ව්යාපෘතිය ක්රියාත්මක කෙරෙන අතර සමාජ මාධ්ය තුළ #wecan සහ #defybarriers භාවිතා කරමින් දිරිගන්වන්නන් හට මේ වෑයමට දායක විය හැකිය.
අකිල ධනංජය සහ ප්රවීන් ජයවික්රමගේ පන්දු යැවීමත් අවිෂ්ක ප්රනාන්දුගේ අගනා පිතිහරඹයත් හේතුවෙන් ඉන්දියාවට එරෙහිව කොළඹ ආර්. ප්රේමදාස ක්රීඩාංගණයේ අද (23 දා) පැවැති තෙවැනි එක්දින තරගයෙන් කඩුලු 3 ක ජයක් වාර්තා කිරීමට දසුන් ශානකගේ නායකත්වයෙන් යුතු ශ්රී ලංකා කණ්ඩායම සමත්විය. මෙම තරග ජයග්රහණය ඉන්දියානු පිලකට එරෙහිව ශ්රී ලංකා කණ්ඩායමක් සිය මව්බිමේදී වසර 9 කට පසු ලද පළමු ජයග්රහණය ලෙසින්ද සනිටුහන් විය.
ශ්රී ලංකාව අවසන් වතාවට ඉන්දියාවට එරෙහිව මව්බිමේදී එක්දින තරගයක් ජය ගෙන ඇත්තේ හරියටම මීට වසර 9 කට පෙර එනම් 2012 වසරේ ජූලි 24 වැනිදා හම්බන්තොටදී පැවැති තරගය වේ. මහේල ජයවර්ධනගේ නායකත්වයෙන් යුතුව පැවැති එම තරගයේ තරගයේ වීරයා ලෙසින් තිසර පෙරේරා සම්මාන දිනා ගත්තේය.
කණ්ඩායම සතු නවකයින්ගේ ශක්තිය උරගා බැලීම සඳහා ක්රීඩකයින් පස් දෙනෙකුට එක්දින වරම් හිමිකර දෙමින් අද තරගයට අවතීර්ණ වුණු ශිකර් ධවාන්ගේ නායකත්වයෙන් යුතු ඉන්දීය කණ්ඩායම ලබා දුන් ලකුණු 227 ක ඉලක්කය (ඩක්වර්ත් ලුවිස් න්යාය අනුව) හඹා ගිය ශ්රී ලංකා පිල පන්දු 48 ක් ඉතිරිව තිබියදී සපුරා ගන්නා ලද්දේ කඩුලු 7 ක් පමණක් ප්රතිවාදීන් හමුවේ ලබා දෙමිනි.
හඹා යෑමේදී පෙරමුණ ගත් අවිෂ්ක ප්රනාන්දු පන්දු 98 කදී ලකුණු 76 ක් ලබා ගනිමින් ශ්රී ලංකා ජයග්රහණයේ පෙරමුණ ගෙන කටයුතු කළේය.එම ඉනිම ප්රධාන කොට තරගයේ වීරයා සම්මානයෙන්ද අවිෂ්ක ප්රනාන්දු පිදුම් ලැබීය. අවිෂ්කට අනගි සහායක් ලබා දුන් භානුක රාජපක්ෂ දෙවැනි කඩුල්ල වෙනුවෙන් ලකුණු 109 ක සම්බන්ධතාවයක් ගොඩ නැංවීමට දායකත්වය ලබා දුන්නේය. ප්රවේගකාරී පිතිහරඹයක නිරතවුණු භානුක පන්දු 56 කදී ලකුණු 65 ක් ලබා ජයග්රහණය වෙනුවෙන් කැපී පෙනෙන දායකත්වයක් ලබා දුන්නේය.
එම සම්බන්ධතාවය ප්රධාන කොට ශ්රී ලංකා කණ්ඩායම විටෙක කඩුලු 3 කට ලකුණු 194 ක් වශයෙන් ප්රබල තත්ත්වයක පසු වුවත් හර්දික් පාණ්ඩ්යා විසින් චරිත් අසලංකව ලකුණු 24 කට දවා ගැනීමත් සමඟ ශ්රී ලංකා පිල තරමක් පසුබැස්මක් පෙන්නුම් කළේය. එය තම වාසියට හරවා ගත් මංගල තරගයට ක්රීඩා කළ රාහුල් චහර්, මුහුණ දුන් පළමු පන්දුවෙන්ම දසුන් ශානකවද, ඉනිමේ විශ්වාසනීයම පිතිකරුවා බවට පත් වුණු අවිෂ්ක ප්රනාන්දු සහ චාමික කරුණාරත්නගේ කඩුලු දවා ගනිමින් සත්කාරකයින්ට කිසියමක් පීඩනයක් එල්ල කළේය.
එහෙත් රමේෂ් මෙන්ඩිස්ට එක්වුණු පසු පෙළ පිතිකරු අකිල ධනංජය ශ්රී ලංකා කණ්ඩායමේ ජයග්රහණය සනාථ කළහ. මෙම හඹා යෑමේදී ඉන්දීය කණ්ඩායමේ පන්දු රකිනන් අතින් දිස් වුණු දුර්වල පන්දු රැකීමත් උඩ පන්දු 3 ක් අත හැර දැමීමත් ශ්රී ලංකාවේ වාසියට හිටියේය. එමෙන්ම අතිරේක ලකුණු ලබා දීමේදී ශ්රී ලංකා කණ්ඩායම ඉන්දියාවට වඩා ගවු ගාණක් ඉදිරියෙන් සිටි අතර එය සංසන්දනාත්මක බැලීමේදී ශ්රී ලංකාව ලකුණු 10 ක් ලබා දෙද්දී ඉන්දීය පිල අතින් ලකුණු 30 ක් ලබා දී තිබිණ.
පළමු පන්දුවාර 4 ඇතුළත ලකුණු 35 ක් රැස් කරමින් වේගවත් ආරම්භයක් ලබා ගනිමින්ද ප්රිතිව් ෂෝ සහ සංජු සැම්සන් අතර දෙවැනි කඩුල්ල වෙනුවෙන් ලකුණු 74 ක් ලෙසින් සාර්ථක කඩුලු සම්බන්ධතාවයක් පවත්වමින් පහසුවෙන්ම ලකුණු 300 සීමාව ඉක්මවා යෑමට අවශ්ය මූලික අඩිතාලම ඔවුන් එක් කළහ. එහෙයින් 23 වැනි පන්දුවාරය අවසන් වන විට තරගය වර්ෂාව හේතුවෙන් අවසන් කරන විටත් ඉන්දීය ඉනිම කඩුලු 3 කට ලකුණු 147 ක් ලෙසින් සටහන්ව තිබිණ.
මිනිත්තු 100 කට ආසන්න ප්රමාදවීමකින් පසු පන්දුවාර 47 කට සීමාව ඇරැඹි මෙම ඉනිමේදී ප්රවීන් ජයවික්රම සහ අකිල ධනංජයගේ පන්දු යැවීම කැපී පෙනිණ. ඉන්දීය ඉනිම ලකුණු 225 කදී නිමාවට පත් වන විට වමත් සහ දකුණත් දඟ පන්දු යවන්නන් දෙදෙනා කඩුලු 3 බැගින් දවාගත්හ.
සංජු සැම්සන්ව දවා ගත් ජයවික්රම, ඉන්දීය පිල අසීරුතාවයට ඇද දැමීමේ ප්රධාන දැළ එළීය. ඉන් නොනැවතුණු ඔහු කණ්ඩායම සතු ප්රධානතම පිතිකරුවන් යුගලයක් වන මනීෂ් පාන්ඩේ සහ හර්දික් පාණ්ඩ්යාගේ කඩුලුද දවා ගත්තේය. මනීෂ් පාණ්ඩේගේ කඩුල්ල දැවී යෑමත් සමඟ ඉන්දීය ඉනිමට කණකොකා හැඬීම ඇරැඹිණ. පාන්ඩේ දැවී යෑමට ප්රථම ඉන්දීය ලකුණු පුවරුව ලකුණු 157 ක් ලෙස සටහන්ව තිබූ නමුත් ඉතිරි සියල්ලන්ටම රැස් කරගත හැකි වූයේ ලකුණු 68 ක් පමණි.
ජයවික්රමට නොදැවෙනි පන්දු යැවීමක නිරත වුණු අකිල ධනංජය සූර්යකුමාර් යාදව්ගේ කඩුල්ලද දවා ගනු ලැබුවේ සියලු වාසීන් ශ්රී ලංකාව වෙත හරවා දෙමිනි. අනතුරුව ක්රිෂ්නප්පා ගෞතම් සහ නිතීෂ් රානාවද දවා ගත් අකිල පන්දු වාර 10 දී ලකුණු 44 කට කඩුලු 3 ක් දවා ගනිමින් ඉනිමේ සාර්ථකම පන්දු යවන්නා බවට පත්වූවේය. මංගල තරගයේදී පන්දුවාර 10 ම සම්පූර්ණ කළ වමත් දඟ පන්දු යවන්නා ජයවික්රම ලකුණු 59 කට කඩුලු 3 ක් ලෙසින් සිය මංගල පන්දු යැවීම සටහන් කරගත්තේය.
ඊට පෙර ජයවික්රමගේ පන්දුවක් හමුවේ යාදව් කඩුල්ල මුවා කර වරදට හසුව දැවී ගිය පිතිකරුවකු බවට ප්රධාන විනිසුරු සංඥා කළ අතර එය තෙවැනි විනිසුරු වෙත යොමු කිරීමේදී ඒ සඳහා වැඩි කාලයක් ගතවිය. තමා දැවී ගිය පිතිකරුවකු ලෙස සිතා යාදව් ක්රීඩාගාරය වෙත යමින් සිටි අතර තෙවැනි විනිසුරු එය දැවී නොයෑමක් ලෙස සටහන් කිරීම නිසා නැවතත් පන්දුවට පහර දීමේ වාසනාව ඔහුට උදාවිය.
ශ්රී ලංකා පන්දු යවන්නන් ඉන්දීය පිතිකරුවන් කෙතරම් හොඳින් පාලනය කළේද කිවහොත් යවන ලද පන්දු වලින් 140 ක්ම නිලකුණු පන්දු ලෙසින් යවනු ලැබීය. 78 වතාවක් එක් ලකුණ බැගින්ද, 12 වතාවක් ලකුණු දෙක බැගින්ද එක් වතාවක් ලකුණු 3 බැගින්ද රැස් කරගත් ඉන්දීය ඉනිම, හයේ පහරකින් සහ හතරේ පහර 26 ක් පමණක් ඇතුළත්ව තිබිණ.
අද තරගයේදී වූ සුවිශේෂී සිදුවීම වූයේ ඉන්දීය එකම පිතිකරුවකුට හෝ ලකුණු 50 සීමාව ඉක්මවා ලබා ගැනීමට ශ්රී ලංකා පන්දු යවන්නන් ඉඩ කඩ ලබා නොදීමය. ඉන්දියාව වෙනුවෙන් ප්රිතිව් ෂෝ (49), සංජු සැම්සන් (46) සහ සූර්යකුමාර් යාදව් (40) පමණක් ලකුණු 40 සීමාව ඉක්මවා ලබා ගනිද්දී සෙසු පිතිකරුවන් ලකුණු අතරට පැමිණීමට දැඩි වෙහෙසක් ගත්හ.
තරගාවලියේ වීරයා සම්මානයන ඉන්දීය කණ්ඩායමේ සූර්යකුමාර් යාදව් විසින් දිනා ගනු ලැබීය. දෙරට අතර පැවැත්වෙන විස්සයි-20 තරගාවලියේ පළමු තරගය මෙම ඉරිදා (25 වැනිදා) ප.ව. 8.00 ට කොළඹ ආර්. ප්රේමදාස ක්රීඩාංගණය පැවැත්වෙනු ඇත.
ඉන්දීය එක්දින ක්රිකට් ඉතිහාසයේ අංක 8 ස්ථානයෙන්පන්දුවට පහර දුන් පිතිකරුවන් අතර දෙවැනි වැඩිම ලකුණු ලාභියා බවට පත්වෙමින් දීපාක් චහාර් නොදැවී රැස් කරන ලකුණු 69 ක ඉනිම හේතුවෙන් මුලු මනින්ම ශ්රී ලංකාව සතුව තිබූ දෙවැනි තරගයේ ජයග්රහණය උදුරා ගැනීමට ඉන්දීය කණ්ඩායම අද (20 දා) රාත්රියේදී සමත්විය.
කොළඹ ආර්. ප්රේමදාස ක්රීඩාංගණයේ පැවැති මෙම තරගයේදී ධෛර්යවන්තව පිත්ත හැසිරවූ චහාර් කඩුලු 3 ක ජයක් කරා ඉන්දීය පිල රැගෙන ගියා පමණක් නොව තවත් තරගයක් ඉතිරිව තිබියදී තරගාවලියේ ජයග්රහණයද තම කණ්ඩායමට ලබා දුන්නේය.
ඉන්දීය පිලේ ඉදිරි පෙළ පිතිකරුවන් සියල්ල නරඹන්නන් බවට පත්ව සිටිද්දී ඉන්දීය ඉනිමේ වගකීම භාරගත් දකුණතින් පිත්ත හසුරුවන තුන් ඉරියව් ක්රීඩකයා භූවනේෂ්වර් කුමාර් සමඟ 8 වැනි කඩුල්ල වෙනුවෙන් පන්දු 89 කදී ලකුණු 83 ක නොබිඳුණු සම්බන්ධතාවයක් පවත්වමින් ඉන්දීය පිල ජය ටැඹ කරා රැගෙන ගියහ.
ඉනිමේ අවසන් පන්දුවාරය තෙක් ඇදී ගිය මෙම තරගයේ ශ්රී ලංකාවේ පවත්වා ඇති එක්දින තරග අතර තෙවැනි ඉහළතම ලකුණු හඹා යෑම වශයෙන් සටහන්වීමද කැපී පෙනිණ. වනිඳු හසරංග සහ දසුන් ශානකගේ දක්ෂ පන්දු යැවීම හමුවේ ඉන්දීය පළමු කඩුලු 5 ම ලකුණු 116 කදී බිඳ දැමීමට ශ්රී ලංකා පිල සමත්විය. දීපාක් චහර් පන්දුවට පහර දීමට පැමිණෙන විටත් තරගයේ සියළුම වාසීන් ශ්රී ලංකා පිලට දෙසට හැරී තිබූ නමුත් එතැන් පටන් පන්දු යවන්නන් කැඳවීමේ සිට ඔවුන් පිළිබඳව තැබූ විශ්වාසය රකිමින් පන්දු යැවීමට ඔවුන් අසමත්වීම මත ඈතට ගොස් තිබූ ජයග්රහණයට ඉන්දීය පිල කෙමෙන් කෙමෙන් ළඟා කර දීමට චහර් සමත්විය. එහිදී ලක්ෂාන් සඳකැන්ගෙන්ද වැඩි දායකත්යක් නොලැබුණා නොවේ.
තරගයේ පාලනය අතට ගැනීමට ශ්රී ලංකාවට අත්යවශ්යම වූ සූර්යකුමාර් යාදව්ගේ කඩුල්ල දවා ගැනීමට ලක්ෂාන් සඳකැන් සමත් වුවද අනතුරුව යවන ලද පන්දුවාරවලදී රිද්මය ගිලිහී යෑමේ වාසිය ඉන්දීය පිල සතු විය. සඳකැන්ව දැඩි ප්රහාරයකට ලක් කළ දීපාක් චහර් පන්දු පරතරයට වඩා ලකුණු පරතරය වැඩිව තිබූ පරතය අවම කරගත්තේය. කෙසේ වෙතත් සඳකැන් ක්රියාත්මක කරන ලද පන්දුවාර 10 දී ලකුණු 71 ක් උදුරා ගැනීමට ප්රතිවාදී පිතිකරුවෝ සමත්ව සිටියහ.
අද වාර්තා කරගන්නා ලද අර්ධ ශතකයට පෙර පළමු පෙළ එක්දින තරගවලදී එක් අර්ධ ශතකයට පමණක් හිමිකම් කියා තිබූ දීපාක් චහර් සිය ලකුණු 69 සදහා පන්දු 82 කට මුහුණ දුන්නේය. හයේ පහරක් සහ හතරේ පහර 7 කින් සිය ඉනිම වර්ණවත් කරගනිද්දී උපනායක භූවනේෂ්වර්ගේ දායකත්වය ලකුණු 19 කිනි.
පළමු තරගයේ වූ අතපසුවීම් නිවැරදි කර ගනිමින් අවතීර්ණ වුණු ශ්රී ලංකා කණ්ඩායමේ අවිෂ්ක ප්රනාන්දු සහ චරිත් අසලංක අර්ධ ශතක රැස් කිරීමට සමත්වීම නිසා නියමිත පන්දුවාර 50 අවසනදී කඩුලු 9 කට ලකුණු 275 ක් රැස් කිරීමට ශ්රී ලංකා පිතිකරුවෝ සමත්වූහ.
එහිදී කැපී පෙනුණු චරිත් අසලංක ඉනිමේ වැඩිම ලකුණු ලාභියා බවට පත්වූයේ සිය මංගල අර්ධ ශතකයටද හිමිකම් කියමිනි. පන්දු 68 කදී හතරේ පහර 6 ක් සමඟින් අසලංක ලකුණු 65 ක් ලබා ගත්තේය. එහිදී වඩාත්ම වැදගත් වූයේ ඉනිමේ අවසන් පන්දුවාර 3 එළඹෙන තෙක්ම අසලංක කඩුල්ලේ රැඳී සිටීමය. ඔහුට අමතරව අවිෂ්ක ප්රනාන්දු පන්දු 71 කදී හයේ පහරක් සහ හතරේ පහර 4 ක් සමඟින් ලකුණු 50 ක් ලබාගත්තේ එක්දින තරග දිවියේ සිව්වැනි අර්ධ ශතකයට හිමිකම් කියමිනි.
පෙර තරගයේ පරිදිම පසු පෙළින් පැමිණි චාමික කරුණාරත්න ඉනිමේ අවසන් පන්දුවාරය යැවූ භුවනේෂ්වර් කුමාර්ට එරෙහිව අවසන් පන්දු දෙක තුළදී පිට පිටම හතරේ පහර දෙකක් එල්ල කරමින් ලකුණු 44 ක් ලබා කඩුල්ලේ රැඳී සිටියේය. අවසන් පන්දුවට මනරම් වූ හෙලිකොප්ටර් පහරක් එල්ල කරමින් එල්ල කරන ලද හතරේ පහරත් ඇතුළුව හතරේ පහර 5 කින් චාමික තම ඉනිම වර්ණවත් කරගත්තේ යන්තම් පන්දු 33 කට මුහුණ දීමෙනි. අංක 8 පිතිකරණ ස්ථානයෙන් පන්දුවට පහර දීමට පැමිණි චාමික පළමු තරගයේදීද පන්දු 35 කට මුහුණ දෙමින් නොදැවී ලකුණු 43 ක් ලබා ශ්රී ලංකා පසු පෙළ ශක්තිමත් කළේය.
පන්දු යවන තුන් ඉරියව් ක්රීඩකයකු ලෙසින් චාමික කණ්ඩායමට එක් වුවත් ඔහුගේ පළමු එක්දින තරග 5 ඇතුළත ඔහු ලකුණු 138 ක් රැස් කරගැනීමට සමත්ව සිටින්නේය. මේ සෑම අවස්ථාවකදීම ඔහු අංක 8 පිතිකරණ ස්ථානයෙන් පන්දුවට පහර දීමට පැමිණ රැස් කරන ලද ලකුණු වේ. ඒ අනුව සිය ජාත්යන්තර තරග දිවිය ආරම්භයේ අංක 8 පිතිකරණ ස්ථානයෙන් හෝ ඊට පහළින් පැමිණ පළමු තරග 5 දී වැඩිම ලකුණු රැස් කිරීමට සමත් පිතිකරුවන් අතර චාමිකට හිමිවන්නේ තෙවැනි ස්ථානය වේ. බටහිර ඉන්දීය කොදෙව් ක්රීඩකයින් දෙපළක් වන ඇන්ඩ්රෙ රසල් (147) සහ ඩිනේෂ් රාම්ඩීන් (143) චාමිකට ඉදිරියෙන් පසුවෙන පිතිකරුවෝ වෙති. සමස්ථයක් ගත් විට පළමු පන්දුවාර 40 වන තුරු ශ්රී ලංකා පිතිකරුවන් කඩුලු ආරක්ෂා කර ගනිමින් පන්දුවට පහර දීමට සමත් වීම නිසා තෙවැනි පවර් ප්ලේ අවස්ථාවට හිමි අවසන් පන්දුවාර 10 තුළදී කඩුලු දැවී ගියද ලකුණු 80 ක් රැස් කර ගැනීමට පිතිකරුවෝ සමත්වූහ.
ශ්රී ලංකා ක්රිකට් ඇසුරිණි
ලකුණු 263 ක ඉලක්කයක් හඹා යෑමේදී ඉන්දීය නායක ශිකර් ධවාන් ඇතුළු නවක ජවයකින් යුතු ඉන්දීය පිතිකරුවන්ව මෙල්ල කිරීමට ශ්රී ලංකා පන්දු යවන්නන්ට නොහැකිවීම මත තරග 3 කින් සමන්විත එක්දින ක්රිකට් තරගාවලියේ අද (18 දා) පැවැති පළමු එක්දින තරගයෙන් කඩුලු 7 ක පහසු ජයක් වාර්තා කිරීමට ඉන්දීය ක්රීඩකයෝ සමත්වූහ. ඒ අනුව තරගාවලිය 1-0 ක් ලෙස ඉන්දියාව පෙරමුණ ගැනීමටද සමත්විය.
ජයග්රහණය සඳහා පන්දුවාරයකට රඳවාගත යුතු ලකුණු 5.24 ක වේගය වෙනුවට 7.17 ක වේගයක් රඳවා ගැනීමට ඉන්දීය පිතිකරුවන් සමත්වීම නිසා ශ්රී ලංකාවට එරෙහිව වූ ජයග්රහණය ඉන්දීය පිල සනිටුහන් කරගන්නා විට පන්දු 80 ක් ලකුණු පුවරුවේ ඉතිරිව තිබිණ.
වැඩිම ලකුණු ලාභියා වුණු නායක ධවාන් කෙටි ලකුණක් ලබා ගනිමින් කණ්ඩායමේ ජයග්රහණය තහවුරු කරන විට ඔහුගේ නම ඉදිරියෙන් පන්දු 95 කදී ලකුණු 86 ක් සටහන්ව තිබිණ. සෙසු පිතිකරුවන් වේගවත්ව ලකුණු සොයා යමින් පන්දුවට පහර දෙද්දී කලබල නොවුණු ධවාන් තරගය නිමා කරන විට හයේ පහරක් සහ හතරේ පහර 6 කින් ඉනිම සරසාගෙන සිටියේය.
ධවාන් සමඟ ඉනිම ඇරැඹි ප්රිතිව් ෂා ප්රවේගවත් ආරම්භයක් ලබා ගනිමින් පන්දු 24 කදී ලකුණු 43 ක් ලබාගත්තේය. ධනංජය ද සිල්වාගේ ගොදුරක් වෙමින් ප්රිතිව් දැවී යන විට ශ්රී ලංකාවට සැලකිය යුතු හානියක් සිදුකර තිබුණු අතර එබැවින් ඔහුට තරගයේ වීරයා සම්මානයද හිමිවිය. ප්රිතිව්ගේ ඉනිම හේතුවෙන් පවර් ප්ලේ අවස්ථාවට හිමි පන්දුවාර 10 ඇතුළත ලකුණු 91 ක් තරම් ලකුණු සංඛ්යාවක් වාර්තා කර ගැනීමට ඉන්දීය කණ්ඩායමට අවස්ථාව උදාවිය. පන්දු රැකීමේදී උඩ පන්දු කීපයක් ගිලිහී යෑමත් ඉලක්කගත පන්දු යැවීමක නිරත වීමට නොහැකිවීමත් මෙතරම් දැවැන්ත පරාජයක් ලැබීමට හේතුවූ කරුණු විය.
ධවාන්ට අමතරව ඉෂාන් කිශාන් පන්දු 42 කදී හයේ පහර 2 ක් සහ හතරේ පහර 8 ක් සමඟින් ලකුණු 59 ක් රැස් කළේය. ලක්ෂාන් සඳකැන්ගේ පන්දුවක් හමුවේ ඉෂාන් කිෂාන් දැවී යෑමත් සමඟ ඉනිමේ ගොඩ නැංවුණු ඉහළම ලකුණු සම්බන්ධතාවය වූ දෙවැනි කඩුල්ලේ සම්බන්ධතාවයද ලකුණු 85 දී හමාර විය. ධනංජයගේ දෙවැනි ගොදුර බවට මනීෂා පාන්ඩේ ලකුණු 26 ක් ලබා සිටියදී දැවී යෑමෙන් පසු පිටියට පිවිසි සූර්යකුමාර් යාදව් ඉන්දීය ජයග්රහණය වාර්තා වන විට පන්දු 20 කට මුහුණ දී ලකුණු 31 ක් ලබා සිටියේය.
නිරන්තරයෙන්ම දැවැන්ත පහර එල්ල කිරීමේ හැකියාව අහිමි වුවත් ආරම්භක පිතිකරුවන්ගේ සිට පසු පෙළ දක්වා වූ පිතිකරුවන්ගේ ධෛර්යවන්ත පිතිහරඹය හේතුවෙන් ලකුණු 263 ක අභියෝගයක් ඉන්දීය පිල හමුවේ ශ්රී ලංකාව ලබා දුන්නේය.
ලකුණු 250 සීමාව ඉක්මවා ලීම වෙනුවෙන් පසු පෙළින් පැමිණි චාමික කරුණාරත්න සහ දුෂ්මන්ත චමීර එක්ව අවසන් පන්දුවාර 3 දී එක් කරන ලද ලකුණු 40 ශ්රී ලංකා පිලේ විශ්වාසය තවත් වැඩි කිරීමට මහත් දායකත්වයක් ලබා දුන්නේය. මේ අතරින් කැපී පෙනුණු චාමික කරුණාරත්න අවසන් පන්දුවාරය ක්රියාත්මක කළ වේග පන්දු යවන භුවනේෂ්වර කුමාර්ට එරෙහිව පිට පිට හයේ පහර දෙකක් එල්ල කරමින් ශ්රී ලංකා කණ්ඩායම වෙනුවෙන් ලකුණු 40 සීමාවට පැමිණි එකම පිතිකරුවා බවට පත්විය. හයේ පහර 2 ක් සහ හතරේ පහරක් සිය ඉනිමට ඇතුළත් කර චාමික පන්දු 35 කදී ලකුණු 43 ක් ලබා ගත්තේ ඉනිමද බිඳ නොදැවී තබා ගනිමිනි.
ජ්යෙෂ්ඨයින් රහිතව තරග වැදි ශ්රී ලංකා කණ්ඩායමෙන් අර්ධ ශතකයක් හෝ වාර්තා නොවුණත් සෑම දෙනාම හැකි පමණින් කණ්ඩායමට දායකත්වය ලබා දුන්හ. එබැවින් අද රැස් කරන ලද ලකුණු සංඛ්යාව අර්ධ ශතකයක් හෝ වාර්තා නොවී කණ්ඩායමක් රැස් කරන ලද දෙවැනි ඉහළතම ලකුණු සංඛ්යාවේ වාර්තාව බවටද පත්වීම කැපී පෙනුණි.
භුවනේෂ්වර් කුමාර්, යුස්වේන්ද්ර චෙහල් සහ කුල්දීප් යාදව් යන නම් දැරූ ප්රධාන පන්දු යවන්නන් සහිතවූ පන්දු යවන්නන්ගෙන් ශ්රී ලංකා ඉනිම විටින් විට අවහිර කරනු ලැබුවද ලකුණු ලබා ගැනීමට හැකී සෑම අවස්ථාවකදීම ඒ සඳහා යෑමට පිතිකරුවන් පෙළැඹීම නිසා සටනක් ලබා දී රැක ගත හැකි ලකුණු සංඛ්යාවක් ලබා ගැනීමට සමත්විය. පන්දුවට පහරදීමට පැමිණි පිතිකරුවන් අතරින් පිතිකරුවන් හය දෙනෙකු ලකුණු 20 සීමාව පසු කළ අතර තිදෙනකු පමණක් ලකුණු 10 සීමාවේ රැදී සිටියහ.
පන්දු යවන්නන් අතර වැඩිපුරම ප්රහාරයකට ලක්වූයේ පළමු කඩුල්ල දවා ගත් යුස්වේන්ද්ර චෙහල්ය. ආරම්භක කඩුල්ල වෙනුවෙන් ලකුණු 49 ක සම්බන්ධතාවයක් පැවැත්වූ අවිෂ්ක ප්රනාන්දුව දවාගත් චෙහල් ශ්රී ලංකා ඉනිම නිමා වන විට පන්දුවාර 10 ම අවසන් කරමින් ලකුණු 52 ක් ලබා දී කඩුලු 2 ක් දවාගෙන සිටියේය. ඔහුට අමතරව දීපාක් චහර් සහ කුල්දීප් යාදව් ද කඩුලු 2 බැගින් බිඳ හෙළූ සාමාජිකයින් බවට පත්වූහ.
අද දිනයේදී මංගල ඉනිම ක්රීඩා කළ භානුක රාජපක්ෂ චෙහල්ගේ පන්දුවකට හයේ පහරක් එල්ල කරමින් වඩා විශ්වාසයකින් ලකුණු රැස් කිරීම ආරම්භ කළද පිට ඉන්නට වඩාත් ඈතින් ගිය පන්දුව මිඩ් විකට් කළාපය වෙත යැවීමට කරන ලද උත්සාහය වැරදී යෑම නිසා අවාසනාවන්ත ලෙස ලකුණු 24 කදී පිටියෙන් ඉවත් විය. ඒ වන විටත් ඔහු මුහුණ දී සිටි පන්දු 22 න් දෙවතාවක් හතරේ සීමාවට ඉහළින්ද දෙවතාවක් හතරේ සීමාවද පන්දුව පසුකර යැවීමට සලස්වා තිබුණි.
එම ලකුණු ලබා ගැනීම අතරතුරදී කඩුල්ල මුවා කිරීමේ වරදකට හසුවූයේ යැයි කුල්දිප් යාදවු විසින් කරන ලද ඉල්ලීමද තෙවැනි විනිසුරු තීරණය දක්වා දිග් ගැස්සුනද පිටියේ විනිසුරුවරයාගේ තීරණය භානුකට වාසිවන අයුරින් ලබා දී තිබීම නිසා තවදුරටත් පිටියේ රැදී සිටීමට ඔහුට අවස්ථාව උදාවිය. එහෙත් අනවශ්ය කලබලය භානුකට කඩුල්ල අහිමි කළේය.
එම දැවී යෑමෙන් පසු මිනෝද් භානුකද දැවී ගිය බැවින් ලකුණු 85 කට එක් කඩුල්ලක්ව සටහන් වුණු ශ්රී ලංකා ඉනිම එක වරම ලකුණු 89 කට කඩුලු 3 ක් ලෙසින් සටහන් විය. එංගලන්ත සංචාරයේදී මෙන් නොව සටන අත් නොහළ මැද පෙළ පිතිකරුවන් නිරන්තරයෙන්ම ශක්තිමත් සම්බන්ධතා පැවැත්වීමට දරන ලද උත්සාය මෙම තරගයේදී වැඩ කළ බැවින් එකා පිට එකා දැවී යෑම වෙනුවට වැඩි ලකුණු සංඛ්යාවක් පුවරුවේ රැඳවීමට හැකියාව උදාවිය.
ධනංජය ද සිල්වා ඉක්මනින් දැවී ගියද චරිත් අසලංකට එක්වූ නායක දසුන් ශානක පස්වැනි කඩුල්ල වෙනුවෙන් ලකුණු 49 ක් එක් කරන ලද්දේ පිළිවෙළින් ලකුණු 38 සහ 39 වශයෙන් රැස් කරගනිමිනි.
දෙරට අතර පැවැත්වෙන දෙවැනි තරගය ලබන 20 වැනිදා කොළඹ ආර්. ප්රේමදාස ක්රීඩාංගණයේදී ප.ව. 3.00 ට ආරම්භ වනු ඇත.
උරහිසේ ඇතිවී තිබෙන ආබාධිත තත්ත්වය තවදුරටත් සුව අතට පත්නොවීම හේතුවෙන් ප්රහාරාත්මක ආරම්භක පිතිකරු කුසල් ජනිත් පෙරේරාට ඉන්දියාවට එරෙහිව තවත් දින දෙකකින් ආරම්භ වන එක්දින සහ විස්සයි-20 තරගාවලිය නියෝජනය කිරීමේ අවස්ථාව අහිමිව තිබේ.
එංගලන්ත තරග සංචාරය අතරතුරදී හටගත් එම උරහිසේ ආබාධය හේතුවෙන් තෙවැනි තරගයට කුසල් ක්රීඩා කරන ලද්දේද වේදනා නාෂක ලබා ගැනීමෙන් අනතුරුවය. කෙසේ වෙතත් එම ආබාධිත තත්ත්වය හේතුවෙන් ඔහු ඊයේ වන තෙක් පැවැති පුහුණු සැසිවලදී ක්රීඩාංගණයට හෝ පැමිණීමෙන් වැළකී සිටියේය.
මේ අතර ඊයේ (15 වැනිදා) සිදුකරන පුහුණුවීම් අතරතුරදී වේග පන්දු යවන බිනුර ප්රනාන්දුද වළලුකර ආශ්රිතව ආබාධයකට ගොදුරුවිය. පරීක්ෂණ වලට අනුව ඔහුගේ වළලුකර ආශ්රිතව අස්ථි බිඳීමකට ලක්ව තිබෙන බව හඳුනාගෙන තිබේ. ඒ අනුව ඔහුටද ලබන 18 වැනිදා සිට ආරම්භ වන ඉන්දීය කණ්ඩායමේ ශ්රී ලංකා තරග සංචාරයට ක්රීඩා කිරීමේ අවස්ථාව අහිමිවනු ඇත.PREVIOUS POST
ජපානයේ ටෝකියෝ නුවර පැවැත්වෙන 2020 ඔලිම්පික් තරගාවලියට සුදුසුකම් ලැබූ ශ්රී ලංකා ක්රීඩික ක්රීඩිකාවන් හා පුහුණුකරුවන් වෙනුවෙන් ඉතිහාසයේ වැඩිම අයෝජනය සිදුකරමින් තරුණ හා ක්රීඩා අමාත්යංශය රුපියල් මිලියන 46.2ක පිරිවැයක් දරන බව ක්රීඩා අධ්යක්ෂ ජනරාල් අමල් එදිරිසූරිය මහතා පවසයි.
තරුණ හා ක්රීඩා අමාත්ය නාමල් රාජපක්ෂ මහතාගේ උපදෙස් පරිදි ජාතික ක්රීඩා සභාව හා උසස් දක්ෂතා කමිටුවෙන් නිර්දේශිත මුදල් චෙක්පත ලබාදෙමින් ක්රීඩා අධ්යක්ෂ ජනරාල් අමල් එදිරිසූරිය මහතා ක්රීඩා සංවර්ධන දෙපාර්තමේන්තුවේ දී ඊයේ (15) මේ බව සඳහන් කළේය.
ඔලිම්පික් ක්රිඩා උළෙල නියෝජනය කරන ශ්රී ලාංකේය ක්රීඩක ක්රීඩිකාවන්ට වෙනුවෙන් දරණ පිරිවැය සහ ලබාදෙන පහසුකම් විස්තර කළ අමල් එදිරිසුරිය මහතා ලංකා ඉතිහාසයේ වැඩිම වටිනාකම ඔවුන් වෙත හිමිකරදීමට තරුණ හා ක්රීඩා අමාත්ය නාමල් රාජපක්ෂ මහතා මූලිකත්ව ගත් බව පෙන්වා දුන්නේය.
ඒ අනුව, 2020 ටෝකියෝ ඔලිම්පික් ක්රීඩා උළෙල සඳහා සහභාගී වන ක්රීඩක ක්රීඩිකාවන් සහ ඔවුන්ගේ පුහුණුකරුවන් සඳහා ලබාදෙන දීමනාවන් සහ පහසුකම් පහත සඳහන් පරිදි වේ.
මීට අමතරව 2020 ටෝකියෝ ඔලිම්පික් උළෙලේ සංවිධායකයන් නිර්දේශ කර ඇති සියලුම සෞඛ්ය මාර්ගෝපදේශවලට යටත්ව සිනමන් ලයිෆ් ශ්රී ලංකා (Cinnamon Life Sri Lanka) සමාගමේ අනුග්රහය ඇතිව ශ්රී ලංකාව වෙනුවෙන් ඔලිම්පික් උළෙල සඳහා සහභාගී වන කණ්ඩායම සඳහා ජපානයේ ටෝකියෝ නුවර ‘‘ෆ‘‘ තරු පහේ හෝටලයේ සම්පූර්ණ මහලක සියලු පහසුකම් ද සමගින් නවාතැන් ලබාදීමට ද කටයුතු සූදානම් කර ඇත.
අන්තර්ජාතික ක්රිකට් සභාවේ ඉහළම පිළිගැනීමකට ලක්ව සිටින ශ්රී ලාංකිකයකු වන රංජන් මඩුගල්ලේ මහතා නැවතත් මෙම මස 18 වැනිදා ඉන්දියාවට එරෙහිව කොළඹ ආර්. ප්රේමදාස ක්රීඩාංගණයේ ආරම්භ වන එක්දින සහ විස්සයි-20 තරගාවලියේ තරග තීරකවරයා ලෙසින් කටයුතු කරනු ඇත.
ඔහුට අමතරව ලොව අංක 1 විනිසුරුවරයා ලෙසින් ජාත්යන්තර පිළිගැනීමකට ලක්ව සිටින අන්තර්ජාතික ක්රිකට් සභාවේ ප්රභූ විනිසුරු මඩුල්ලේ සාමාජිකයකු ලෙසින් කටයුතු කරන කුමාර් ධර්මසේන මහතා ද මෙම තරගාවලියේදී විනිසුරුවරයකු ලෙසින් කටයුතු කරනු ලබයි. ජාත්යන්තර විනිසුරුවරයකු ලෙසින් කටයුතු කරනු ලබන රුචිර පල්ලියගුරුගේ මහතාට අමතරව රවීන්ද්ර විමලසිරි, ලින්ඩන් හැනිබල් සහ ප්රගීත් රඹුක්වැල්ල යන මහත්වරුද මෙම තරගාවලියේ විනිසුරුවන් ලෙස කටයුතු කරති.
සංචාරක ඉන්දීය කණ්ඩායම සමග ලබන 13 වැනිදා ආරම්භ වන තරගාවලියෙන් ශ්රී ලංකා ක්රිකට් පිලේ ප්රධාන පුහුණුකරු මිකී ආතර් මහතා ඇතුඵ කාර්ය මණ්ඩලය ඉවත් කළ බව ශ්රී ලංකා ක්රිකට් ආයතනයේ ලේකම් මොහාන් ද සිල්වා මහතා පැවසුවා.
පිතිකරු පුහුණුකරු ග්රාන්ට් ෆ්ලවර් සහ දත්ත විශ්ලේෂක ශිරන්ත නිරෝෂන් යන මහත්වරු ‘කොවිඩ්’ ආසාදිතයන් ලෙස හදුනාගැනීමත් සමඟ මෙම තීරණය ගත් බවත් එම තරගාවලිය සඳහා තාවකාලික ප්රධාන පුහුණකුරුවකු ඇතුඵ කාර්ය මණ්ඩලයක් ඉදිරියේදී පත්කරන බවත් මොහාන් සිල්වා මහතා වැඩි දුරටත් පැවසුවා.