කැබිනට් තීරණ දැනුම් දීමේ මාධ්ය හමුව අද (10) රජයේ ප්රවෘත්ති දෙපාර්තමේන්තුවේදී පැවැත් වුණා. ඒ සදහා සම කැබිනට් ප්රකාශකවරුන් වන අමාත්ය කෙහෙළිය රඹුක්වැල්ල සහ උදය ගම්මන්පිල සහභාගී වුණා. මේ එහිදී මාධ්ය වෙත දැනුම් දුන් කැබිනට් තීන්දු සියල්ලයි.
රාත්රී කාලයේ භාවිතයට නොගන්නා ඩේටාවලට ගෙවීම සම්බන්ධයෙන් ප්රායෝගික විසදුමක් ලබා ගැනීමට TRC අවධානය
රාත්රී කාලයේ භාවිතයට නොගන්නා ඩේටා වලට ගෙවීම සම්බන්ධයෙන් විදුලි සංදේශ නියාමන කොමිෂන් සභාව වෙත දිගින් දිගටම ලැබෙන පැමිණිලි හේතුවෙන් ඒ සම්බන්ධව විදුලි සංදේශ නියාමන කොමිෂන් සභාවේ අවධානය යොමුව ඇති බවත්, ඒ වෙනුවෙන් ප්රයෝගික විසඳුමක් සෙවීමටත් කටයුතු කරන බවත් සම කැබිනට් ප්රකාශක අමාත්ය උදය ගම්මන්පිල මහතා පවසයි.
අමාත්යවරයා මේ බව කියා සිටියේ අද (10) දින රජයේ ප්රවෘත්ති දෙපාර්තෙම්න්තුවේ පැවති කැබිනට් තීරණ දැනුම්දීමේ මාධ්ය හමුවේදීය. මෙම මාධ්ය හමුව සදහා ඇමති කෙහෙළිය රඹුක්වැල්ල මහතා ද සහභාගී විය.
රාත්රී කාලයේ භාවිතයට නොගන්නා ඩේටා වලට අදාළ සේවා ආයතන වෙත ජනතාව වැඩිපුර මුදලක් ගෙවීම සම්බන්ධයෙන් විධිමත් විසදුමක් තිබේ ද යන්න පිළිබඳව මාධ්යවේදියෙකු නැඟූ ප්රශ්නයකට පිළිතුරු ලබා දෙමින් අමාත්යවරයා මේ බව සදහන් කළේය.
දහවල් කාලයේ අන්තර්ජාලයේ පවතින තදබදය අවම කර ගැනීම සදහා පාරිභෝගිකයා පෙළඹ වීමට මෙලෙස රාත්රී කාලයේ සහ දහවල් කාලයේ ලබා දෙන ඩේටා ප්රමාණයේ
වෙනසක් කර ඇති බව ද අමාත්යවරයා කියා සිටියේය.
තෙල් ගවේෂණය යළි අරඹන්න රජය තීරණය කරයි
ශ්රී ලංකාවට අයත් කලාපය තුළ තෙල් සහ ගෑස් ගවේෂණය කිරීම යළි ආරම්භ කිරීම සඳහා රජය විසින් ප්රතිපත්තිමය තීරණයක් ගත් බව ද උදය ගම්මන්පිල මහතා මෙහිදී සදහන් කළේය. මේ සම්බන්ධයෙන් වැඩි දුරටත් කරුණු පැහැදිලි කළ අමාත්යවරයා,
“වසර ගණනාවක් පුරාවට අත්හැර දමා තිබුණු තෙල් සහ ගෑස් ගවේෂණය යළි ආරම්භ කරන්න ආණ්ඩුව ප්රතිපත්තිමය තීන්දුවක් ගෙන තිබෙනවා. ඒ අනුව ආයෝජකයින් ආකර්ෂණය ගැනීමට අත්යාවශ්ය කාරණයක් වූ ස්වභාවික වායු පිළිබඳ ප්රතිපත්තියක් සම්පාදනය කර තිබෙනවා. මේ සතියේ අමාත්ය මණ්ඩලයේ දී ඛනිජ තෙල් සම්පත් සංවර්ධන ලේකම් කාර්යාලයේ අධ්යක්ෂ ජනරාල්වරයා වශයෙන් සුරත් ඕවිටිගම මහතාත්, උපදේශකවරයෙක් වශයෙන් මෙම ක්ෂේත්රයේ දීර්ඝ කාලීනව ඇත්දැකීම් තිබෙන, ලෝකය පුරා පිළිගැනීමට ලක්ව ඇති චරිතයක් වන සාලිය වික්රමසූරිය මහතාත් පත්කරන්න අමාත්ය මණ්ඩලය තීරණය කළා“, යනුවෙන් සම කැබිනට් ප්රකාශක, අමාත්ය උදය ගම්මන්පිල මහතා වැඩිදුරටත් කියා සිටියේය.
ගව ඝාතනය සම්පූර්ණයෙන් තහනම් කිරීම ගැන තීන්දුව මාසකින් කල් යයි
මෙහිදී පසුගිය දා ගව ඝාතනය සම්පූර්ණයෙන් තහනම් කිරීමට අග්රාමාත්ය මහින්ද රාජපක්ෂ මහතා ඉදිරිපත් කළ යෝජනාවට ආණ්ඩු පක්ෂ මන්ත්රී කණ්ඩායමේ අනුමැතිය හිමිවීම සමග එහි වත්මන් තත්ත්වය ගැන ඇමැති කෙහෙළිය රඹුක්වැල්ල මහතාගෙන් මාධ්යකරුවෙකු ප්රශ්න කළේය.
එම ප්රශ්නයට පිළිතුරු දෙමින් අමාත්යරයා කියා සිටියේ, ‘ඒ සම්බන්ධයෙන් සාකච්ඡාවක් ඇතිවෙලා තිබෙනවා. නමුත් ඒක ගැන තීන්දුවක් ගැනීම ඒක මාසයකට කල් දාලා තියෙනවා. ඒ සම්බන්ධව නොයෙකුත් අනෙකුත් අදහස් ලබා ගන්න තමයි මේ මාසයක කල් දැමීම කළේ. තීන්දුවක් ගන්න කලින් අපි සෑම අංශයකින්ම අවශ්ය අදහස් ලබාගන්න ඕනෑ. ඊට පසුවයි අවසන් තීන්දුවකට එන්න පුළුවන් වෙන්නේ.
මහ කන්නයේ හිගයකින් තොරව පොහොර සැපයීමට වැඩපිළිවෙළක්
එළැඹෙන 2020/21 මහ කන්නයේ හිගයකින් තොරව ගොවීන්ට පොහොර සැපයීම සදහා රජය කඩිනම් වැඩපිළිවෙළක් සැලසුම් කර ඇති අතර ඒ සදහා අග්රාමාත්ය මහින්ද රාජපක්ෂ සහ කෘෂිකර්ම ඇමැති මහින්දානන්ද අලුත්ගමගේ මහත්වරුන් ඒකාබද්ධව ඉදිරිපත් කළ යොජනාවට කැබිනට් මණ්ඩල අනුමැතිය හිමි ඇත.
ඒ අනුව 2020/21 මහ කන්නය සදහා වී ගොවීන්ට අවශ්ය පොහොර මෙට්රික් ටොන් 230,000ක් රජයේ පොහොර සමාගම් හරහා කඩිනමින් ආනයනය කෙරෙන අතර ,වී ගොවීන් හට නොමිලේ පොහොර ලබාදීමේ වැඩසටහන තවදුරටත් ඒ අයුරින්ම ක්රියාත්මක කෙරෙනු ඇත.
වී හැර අනෙකුත් වගාවන් සදහා අවශ්ය පොහොර කිලෝග්රෑම් 50ක පොහොර මිටියක් රුපියල් 1500 ක සහනාධාර මිලකට ඕනෑම ගොවියෙකුට විවෘත වෙළදපොළෙන් ලබාගැනීමට අවස්ථාව ලබාදීමද මෙම සැලසුම්වලට අයත්ය.
වී වගාව හැර අනෙකුත් වගාවන් සදහා 2020/21 මහ කන්නය වෙනුවෙන් පොහොර මෙට්රික් ටොන් 332,000ක ප්රමාණයක් අවශ්ය වනඅතර , ඒ සදහා පොහොර සමාගම් සතුව පවතින්නේ මෙට්රික් ටොන් 40,000ක පොහොර ප්රමාණයක් පමණක්බැවින් වගාව සඳහා තවදුරටත් අවශ්ය මෙට්රික් ටොන් 300,000 ක පමණ පොහොර ප්රමාණයක් ආනයනය කිරීමට පොහොර සමාගම් වෙත (එකගතාවය පළකර ඇති)අවසර ලබාදීමද මේ අනුව සිදු වනු ඇත.
සුදුසුකම් ලබන වෙනත් සමාගම් සදහාද මෙට්රික් ටොන් 5000ක උපරිමයකට යටත්ව 2020/21 මහ කන්නය සදහා පොහොර ආනයනය කිරීම පිණිස අවසර ලබාදීමටද පියවර ගෙන තිබේ.. පසුගිය වකවානුව තුළ පොහොර සහනාධාර ප්රතිපත්තිය වරින්වර වෙනස් කිරීමත්, පොහොර ආනයනය කරනු ලබන සමාගම් වෙත නිසි පරිදි මුදල් නොගෙවීමත්, ගුණාත්මකභාවයෙන් හා ප්රමිතියෙන් තොර වූ පොහොර වෙළෙඳපොළට පැමිණීමත් හේතුවෙන් ගොවීන්ට විවිධ දුෂ්කරතාවලට මුහුණ පෑමට සිදුවී ඇත.
එබැවින් එම තත්ත්වය මගහරිමින් 2020/21 මහකන්නයේ සිට ගොවීන් වෙත පොහොර ලබාදීමේ ක්රමවේදය නිසි පරිදි ක්රියාත්මක කිරීම සදහා මෙම පියවර ගැනීමත් , පරිසර හිතකාමී පොහොර වී ගොවීන් අතර ප්රචලිත කිරීම සදහා වැඩසටහන් ක්රියාත්මක කිරීමත්අරමුණු කර ගනිමින් මෙම කටයුතු සැලසුම් කෙරෙනු ඇත.
රාජ්ය හා අර්ධ රාජ්ය ප්රචාරක පිරිවැයෙන් 25%ක් රාජ්ය මාධ්යවලට
රාජ්ය මාධ්ය ආයතනයන් රාජ්ය අයවැයට බරක් නොවන ලෙස පවත්වාගෙන යාමට හැකි වනු පිණිස සියලුම රාජ්ය සහ අර්ධ රාජ්ය ආයතනවල දැන්වීම් හා ප්රචාරක අයවැයෙන් 25%ක වටිනාකමකින් යුත් ප්රචාරණ වැඩසටහන් ශ්රී ලංකා රූපවාහිනී සංස්ථාව, ශ්රී ලංකා ගුවන් විදුලි සංස්ථාව, ශ්රී ලංකා ස්වාධීව රූපවාහිනී මාධ්ය ජාලය සහ සීමාසහිත එක්සත් ප්රවෘත්ති පත්ර සමාගම යන රාජ්ය මාධ්ය ආයතන මඟින් අනිවාර්යයෙන් ප්රචාරය කිරීම පිණිස ජනමාධ්ය අමාත්ය කෙහෙළිය රඹුක්වැල්ල මහතා ඉදිරිපත් කරන ලද යෝජනාව අමාත්ය මණ්ඩලය විසින් අනුමත කරන ලදී.
ලිට්රෝ ගෑස් සමාගමේ ඩොලර් මිලියන 3.76ක හිස් සිලින්ඩර් කොන්ත්රාත්තු තායිලන්ත සමාගම් 2කට
අමාත්ය මණ්ඩලය විසින් පත් කරන ලද ස්ථාවර ප්රසම්පාදන කමිටුවේ නිර්දේශ පරිදි ලිට්රෝ ගෑස් ලංකා සමාගම වෙත ද්රව පෙට්රෝලියම් (LPG) වායු හිස් ලෝහ සිලින්ඩර සැපයීමේ කොන්ත්රාත්තුව තායිලන්තයේ Metal Mate Co. Ltd සහ Sahamitr Pressure Containers Public Co, Ltd වෙත ප්රදානය කිරීම පිණිස මුදල් අමාත්යවරයා වශයෙන් අග්රාමාත්ය මහින්ද රාජපක්ෂ මහතා ඉදිරිපත් කළ යෝජනාව අමාත්ය මණ්ඩලය විසින් අනුමත කර තිබෙනවා.
මෙහිදී කිලෝග්රෑම් 2.3, 12.5 හා 37.5 යන කාණ්ඩයන් යටතේ පිළිවෙලින් සිලින්ඩර 22,000ක්, 105,056ක් සහ 1,260 ක ප්රමාණයක් සැපයීම සඳහා වන කොන්ත්රාත්තුව ඇමරිකානු ඩොලර් මිලියන 2.18 ක මුදලකට Metal Mate Co. Ltd වෙත සහ කිලෝග්රෑම් 05 කාණ්ඩය යටතේ සිලින්ඩර 117,040ක ප්රමාණයක් සැපයීම සඳහා වන කොන්ත්රාත්තුව ඇමරිකානු ඩොලර් මිලියන 1.58 ක මුදලකට Sahamitr Pressure Containers Public Co, Ltd වෙත ලබා දීමට තීරණය වුණා.
සැකසුම – තුෂාර වල්ගම
