Category: සුපිරි News

යුද නාවික හා ගුවන් හමුදාවේ මෙන්ම පොලිසියේ සහ සිවිල් ආරක්‍ෂක දෙපාර්තමේන්තුහි සේවය කොට රට වෙනුවෙන් දිවිපිදු දේශප්‍රේමී විරෝදාර රණවිරුවන් අනුස්මරණය කරමින් ජාතියේ උපහාරය පිරීනැමීමේ 11 වන ජාතික රණවිරු අනුස්මරණ දිනය (මැයි 19) බත්තරමුල්ල ජාතික රණවිරු අනුස්මරණ ස්මාරකය අභියසදී සන්නද්ධ හමුදා සේනාධිනායක අතිගරු ජනාධිපති ගෝඨාභය රාජපක්‍ෂ මහතාගේ ප්‍රධානත්වයෙන් පැවැත්වීමට සියලු කටයුතු සුදානම් කර ඇති බව ශ්‍රී ලංකා යුද්ධ හමුදාවේ මාධ්‍ය ඒකකය විසින් නිකුත් කළ මාධ්‍ය නිවේදනයක සදහන් වේ.

එම නිවේදනයේ සදහන් වන ආකාරයට එම අවස්ථාව සඳහා අගමැති මහින්ද රාජපක්ෂ, බස්නාහිර පළාත් ආණ්ඩුකාර, අද්මිරාල් ඔෆ් ද ෆිල්ට් (Admiral of the Fleet), ජනාධිපති ලේකම්, ආරක්‍ෂක ලේකම්, ආරක්‍ෂක මාණ්ඩලික ප්‍රධානී හා යුද්ධ හමුදාධිපතිතුමන්, නාවික හා ගුවන් හමුදාධිපතිවරුන්, පොලිස්පති, රණවිරු සේවා අධිකාරියේ සභාපති සහ රට වෙනුවෙන් දිවිපිදු විරෝදාර රණවිරුවන්ගේ ලඟම ඥාතීන් ඇතුළු විශාල පිරිසක් සහභාගිවීමට නියමිතව ඇත.

සෞඛ්‍ය අංශයන් ලබාදී ඇති උපදෙස් සඳහා මුල්තැනක් ලබාදෙමින් රණවිරු සේවා අධිකාරිය විසින් සංවිධානය කරනු ලබන මෙම 11 වන ජාතික රණවිරු අනුස්මරණ දින සැමරුම් උත්සවය පස්වරු 4.00 ට ආරම්භ වන අතර මෙහි ප්‍රධාන ආරාධිත අමුත්තා ලෙස සන්නද්ධ හමුදා සේනාධිනායක අතිගරු ජනාධිපති ගෝඨාභය රාජපක්‍ෂ මැතිතුමන් සහභාගි වේ. තවද මෙම ජාතික උත්සවය සඳහා ගරු අග්‍රාමාත්‍යතුමන් ඇතුළු සම්භාවනීය ආරාධිතයින් රැසක් ද සහභාගිවීමට නියමිතය.

වර්ෂ 2009 මැයි මසින් අවසන් වූ එල්.ටී.ටී.ඊ ත්‍රස්තවාදයට එරෙහි සටනේදී උත්තරීතර කැපකිරීම් කළ යුද්ධ හමුදාවේ (23,962), නාවික හමුදාවේ (1160), ගුවන් හමුදාවේ (443) සහ පොලිසියේ (2598) සහ සිවිල් ආරක්‍ෂක දෙපාර්තමේන්තුවේ (456) දෙනෙකු මෙම උත්සවයේදී ගෞරවයෙන් සිහිපත් කරනු ලැබේ.

ජාතික ගීය ගායනා කිරීමෙන් අනතුරුව රටදැය වෙනුවෙන් දිවිපිදු විරෝදාර රණවිරුවන් සිහිපත් කරමින් විනාඩි දෙකක නිශ්ශබ්දතාවයෙන් අනතුරුව විරෝදාර රණවිරුවන්ගේ නිර්භිතකම සඳහා වූ රණවිරුවන් සිහිකිරීමේ පාඨය කියවීමෙන් පසුව ආගමික වතාවත් සිදු කිරිමට නියමිතය. මෙහිදී ‘රණබෙර’ වාදනය කරනු ලබන අතර ගුවනින් සිදුකරනු ලබන පුෂ්පෝපහාර මධ්‍යයේ අතිගරු ජනාධිපතිතුමන්, ගරු අග්‍රාමාත්‍යතුමන්, ගරු බස්නාහිර පළාත් ආණ්ඩුකාර, අමාත්‍යාංශ ලේකම්වරුන්, ආරක්‍ෂක මාණ්ඩලික ප්‍රධානී හා යුද්ධ හමුදාධිපති සහ නාවික හා ගුවන් හමුදාධිපතිතවරුන්, පොලිස්පතිතුමන් සහ අනෙකුත් විශේෂ ආරාධිතයින් මෙන්ම දිවිපිදු විරෝදාර රණවිරුවන්ගේ ලඟම ඥාතීන් රණවිරු ස්මාරකය පාමුල මල් කළඹන් තබා රට වෙනුවෙන් දිවිපිදු රණවිරුවන්ට පුෂ්පෝපහාර පුද කිරීමට නියමිතය.

හිරු නැගෙනා මොහොතෙදිත් හිරු බසිනා මොහොතෙදිත් රට වෙනුවෙන් දිවිපිදු රණවිරුවන් වෙනුවෙන් වැයෙන ත්‍රිවිධ හමුදා සහ පොලිස් තුර්යවාදක කණ්ඩායම් බියුගල් නලාකරුවන්ගේ අවර රණවිරු සිහිකිරීමේ බියුගල් නාදය ගුවනට මුසුවීමත් සමඟම උත්සවයේ සමාප්තිය සනිටුහන්වීමට නියමිතය.

ශ්‍රී ලංකාවේ රාජ්‍ය හා රාජ්‍ය නොවන වෙබ් අඩවි කිහිපයකට වෙබ් අඩවි කිහිපයක් ඊයේ (17) දින සයිබර් ප්‍රහාර මාලාවකට ගොදුරු වී ඇත. ඊයේ දින සිදුවී ඇති සයිබර් ප්‍රහාර මාලාව Website defacement නමින් හදුන්වනු ලබන අතර සයිබර් ප්‍රහාරයට වෙබ් අඩවි පහකට ආසන්න සංක්‍යාවක් ගොදුරුවී ඇති බවට මේ වනවිට අප ශ්‍රී ලංකා තොරතුරු තාක්ෂණ සංගමයට තොරතුරු වාර්තා වේ.

මෙම සයිබර් ප්‍රහාරය 2014 වසරේ සිට සිදුවන සයිබර් ප්‍රහාරයක් වන අතර වෙබ් අඩවි පවත්වාගෙන යනු ලබන පාර්ශවයන් විසින් වෙබ් අඩවි වල ආරක්ෂාව කෙරෙහි සැලකිල්ලක් නොදැක්වීම නිසා ඔවුන්ගේ වෙබ් අඩවි සයිබර් ප්‍රහාර වලට ගොදුරු වීමක් සිදුවේ.

පසුගිය වසරේදී මෙලෙසම සයිබර් ප්‍රහාරයට ගොදුරු වූ චීන තානාපති කාර්යාලයේ සහ රජරට විශ්ව විද්‍යාලයයේ වෙබ් අඩවි මේ වසරේදීද සයිබර් ප්‍රහාරයට නතුවී තිබෙන බව අප ශ්‍රී ලංකා තොරතුරු තාක්ෂණ සංගමයට නිරීක්ෂණය කිරීමට හැකිවිය. මේ අතර ප්‍රසිද්ධ මාධ්‍ය ආයතනයකට වෙබ් අඩවියක්ද මෙම සයිබර් ප්‍රහාරයට ගොදුරු වී ඇති බවට අප ශ්‍රී ලංකා තොරතුරු තාක්ෂණ සංගමය වෙතට තොරතුරු වාර්තා වේ.

කොරෝනා වසංගතය හේතුවෙන් විදේශයන්වල සිර වී ශ්‍රී ලංකාවට පැමිණිමට අපේක්ෂාවෙන් සිටින සියලුම ශ්‍රී ලාංකිකයන් දිවයිනට ගෙන්වීමට රජය කටයුතු කරමින් සිටින බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි. ඔහු පෙන්වා දෙන්නේ විදේශ කටයුතු අමාත්‍යංශය හා ජනාධිපති කාර්යාලය මේ සදහා අවශ්‍ය පියවර ගනිමින් සිටින බවයි.

කොවිඩ් 19 වසංගතය හේතුවෙන් ශ්‍රී ලංකාවට පැමිණීමට අපේක්ෂාවෙන් මැද පෙරදිග රටවල සිරවී සිටින ශ්‍රී ලාංකිකයන් නැවත මෙරටට ගෙන්වා ගැනීමේ වැඩ පිළිවෙල සම්බන්ධයෙන් පැහැදිලි කරමින් ඇමතිවරයා මේ බව සදහන් කළේය.

රට තුළ කොවිඩ් 19 වසංගතය පැතිරයාම පාලනය කරන අතරම ලංකාවට පැමිණීමට අපේක්ෂාවෙන් සිටින ශ්‍රී ලාංකිකයන් ක්‍රමානුකූලව දිවයිනට ගෙන්වා ගැනීම රජයේ අපේක්ෂාව බව ද ඇමතිවරයා කීවේය. දිවයිනට රැගෙන එන සියලු විදේශගත ශ්‍රමිකයන් නිරෝධානයකට ලක් කෙරෙණ අතර ඒ සදහා ද දැනට ඇති පහසුකම් වලට සරිලන පරිදි මෙම ශ්‍රී ලාංකිකයන් ගෙන්වීමට සිදුව ඇති බව ද ඔහු පෙන්වා දෙයි.

විදේශගත ශ්‍රී ලාංකිකයන් ගෙන්වීමේ දී විදේශ කටයුතු අමාත්‍යාංශය අදාළ රටවල තානාපති කාර්යාල මහා කොමසාරිස් කාර්යාල හරහා ලියාපදිංචි කිරීමේ ක්‍රමවේදයක් අනුගමනය කරන බවත් ඒ අනුව  ලියාපදිංචි විදේශගත වු ශ්‍රමිකයන් ගෙන්වීම සදහා ශ්‍රී ලංකන් සමාගමේ ගුවන් යානා යොදවන බවත් ඇමතිවරයා පෙන්වා දෙයි. මෙහි දී ප්‍රමුඛතාව ලබා දෙන්නේ  කුඩා දරුවන්, ගර්භණි හා හෘද රෝග වැනි අසනීප තත්ත්වයෙන් පත්වන අයට පමණක් බවත් නැතිනම් ලියාපදිංචි වූ පිළිවෙලට ගෙන්වීම සිදුවන බවත් පැවසු රණතුංග මහතා මේ සම්බන්ධයෙන් බාහිර බලපෑම් සිදුවන බවට ඇතැමුන් නගන චෝදනා ප්‍රතික්ෂේප කරන බව ද කීවේය.

කුවේට් හි සිටින වීසා අවසන් වූ ශ්‍රී ලාංකිකයන් මෙරටට ගෙන්වා ගැනීම සදහා විදේශ කටයුතු ඇමති දිනේෂ් ගුණවර්ධන මහතා එරට විදේශ කටයුතු ඇමතිවරයා සමග සාකච්ඡා කර ඇති බවත් ඒ අනුව මුලින් කුවේට් රජය බාරයේ සිටින වීසා අවසන් වූ පිරිස දිවයිනට ගෙන්වා ගන්නා බවත් ඇමතිවරයා කීවේය. ඉන් පසු තානාපති කාර්යාලයේ ලියාපදිංචි වී සිටින පිරිස් ද දිවයිනට ගෙන්වා ගැනීමට නියමිතය. ඉදිරි කාලය තුළ මැදපෙරදිග රටවල් වලින් මෙන්ම මාලදිවයින, බංගලිදේශය ඇතුළු විවිධ රටවල සිර වී සිටින ශ්‍රී ලාංකිකයන් ගෙන්වා ගැනීමට අවශ්‍ය වැඩ පිළිවෙල දැනටමත් විදේශ කටයුතු අමාත්‍යාංශය හා ජනාධිපති තාර්යාලය සකස් කර ඇතැයි ද ඇමතිවරයා කීවේය.

විදේශගත ශ්‍රී ලාංකිකයන් මේ වන විට එම රටවල මුහුණ පා ඇති අසීරු තත්ත්වය පිළිබදව රජයට අවබෝධයක් ඇතැත් ඔවුන්ව ගෙන්වා ගැනීමේ දී රට තුළ පවතින තත්ත්වය ද සැලකිල්ලට ගෙන කටයුතු කිරීමට සිදුව ඇතැයි ඇමති ප්‍රසන්න රණතුංග මහතා පෙන්වා දෙයි.

විදේශ රටවල් 143 ක සිටින ශ්‍රී ලාංකිකයෝ 38,000 කට අධික පිරිසක් ආපසු සිය රට බලා පැමිණීමට අපේක්ෂාවෙන් සිටින බව විදේශ සබදතා අමාත්‍යාංශය විසින් අද (17) දින නිකුත් කළ මාධ්‍ය නිවේදනයක සදහන් වෙනවා.

එම මාධ්‍ය නිවේදනය සම්පූර්ණයෙන් මෙසේයි.

ප්‍රධාන වශයෙන්ම විදේශ සබඳතා අමාත්‍යාංශයේ ‘ශ්‍රී ලංකාව අමතන්න’ වෙබ් ද්වාරය හරහා රැස්කරගත් තොරතුරුවලට අනුව, විදේශ රටවල් 143 ක සිටින ශ්‍රී ලාංකිකයෝ 38,983 කට අධික සංඛ්‍යාවක් ආපසු සිය රට බලා පැමිණීමට අපේක්ෂා කරති.

සිසු සිසුවියන් 3,078 ක්, කෙටිකාලීන වීසා බලපත්‍රලාභීන් 4,040 ක්, සංක්‍රමණික ශ්‍රමිකයන් 27,854 ක්, ඔවුන්ගෙන් යැපෙන්නන් 3,527 ක් සහ ද්විත්ව පුරවැසියන් 484 ක් සහ වෙනත් අය ද මීට ඇතුළත් වෙයි. මේ අතර, පසුගිය අ‌ප්‍රේල් 21 වැනි දින සිට මේ දක්වා එතෙර රටවල් 15 ක සිටි ශ්‍රී ලාංකිකයන් 3,600 දෙනෙකු මෙරටට ගෙන්වාගෙන ඇති අතර, එම කණ්ඩායම බොහෝ දුරට විදේශවල අධ්‍යාපනය හැදෑරූ සිසු සිසුවියන්, පුහුණුව සඳහා යවන ලද රජයේ නිලධාරීන් හා ඔවුන්ගෙන් යැපෙන්නන්ගෙන් සමන්විත වේ.

එතෙර සිටින අවදානමට ලක්විය හැකි ශ්‍රී ලාංකිකයන් පිළිබඳ දත්ත එක්රැස් කිරීමේ අවශ්‍යතාවය හඳුනාගත් විදේශ සබඳතා අමාත්‍යාංශය, මෙරටට පැමිණෙන ගුවන් ගමන් සඳහා ගුවන් තොටුපොළ වසා දැමීමෙන් සතියක් ඇතුළත දී, තොරතුරු හා සන්නිවේදන තාක්‍ෂණ නියෝජිතායතනයේ (ICTA) ද සහාය ඇතිව 2020 මාර්තු 26 වන දින ‘ශ්‍රී ලංකාව අමතන්න’ වෙබ් ද්වාරය නිර්මාණය කළේය. මෙම ද්වාරය විවෘත කිරීමට සමගාමීව, ආපසු ශ්‍රී ලංකාවට පැමිණීමට අපේක්ෂා කරන අය පිළිබඳ දත්ත එක්රැස් කරන ලෙස විදේශවල පිහිටි ශ්‍රී ලංකා දූත මණ්ඩලවලට ද උපදෙස් දෙන ලදී. අවදානමට ලක්විය හැකි කණ්ඩායම් හඳුනා ගැනීම, ප්‍රමුඛතාවය ලබා දීම සහ නැවත සියරට පැමිණවීම සඳහා පදනම ලෙස මෙම මූලාශ්‍ර දෙක භාවිත කෙරෙයි.

මෙම ‘ශ්‍රී ලංකාව අමතන්න’ වෙබ් ද්වාරය, එතෙර සිටින ශ්‍රී ලාංකිකයන්ගේ ප්‍රයෝජනය සඳහා අතථ්‍ය උපකාරක කවුළුවක් ලෙස ද කටයුතු කරයි. ආර්ථික කටයුතු (බහුපාර්ශ්වීය) සහ විදේශීය ශ්‍රී ලාංකිකයන් පිළිබඳ වැඩබලන අධ්‍යක්ෂ ජනරාල් අන්සුල් ජාන් ප්‍රකාශ කරන පරිදි, මෙම ද්වාරය දියත් කළ අවස්ථාවේ සිට මේ දක්වා එතෙර සිටින ශ්‍රී ලාංකිකයන් 78,033 දෙනෙකු එහි ලියාපදිංචි වී ඇති අතර, ඒ සඳහාම කැපවූ කණ්ඩායමක් විසින්, සතියේ දින 7 හි පැය 24 තුළ ම ඵලදායී ලෙස ක්‍රියාත්මක වෙමින්, ප්‍රධාන වශයෙන් නැවත සියරට පැමිණවීම සහ කොන්සියුලර් ගැටලු පිළිබඳව පමණක් නොව, වෙනත් මෙහෙයුම් සහ ප්‍රතිපත්තිමය කරුණු සම්බන්ධයෙන් ද ලොව වටා විදේශ රටවල සිටින ශ්‍රී ලාංකිකයන් විසින් නඟන ලද ප්‍රශ්න 7,788 කට පිළිතුරු ලබා දී ඇත.

විශේෂයෙන් අදාළ රටවල ශ්‍රී ලාංකික නියෝජනයක් නොමැති අවස්ථාවල දී, ශ්‍රී ලාංකිකයන් ආසන්නතම ශ්‍රී ලංකා රාජ්‍යතාන්ත්‍රික දූතමණ්ඩලය වෙත යොමු කිරීමට පමණක් නොව, ආහාර අවශ්‍යතාවයෙන් පෙළෙන සහ  හදිසි වෛද්‍ය අවස්ථාවන්ට මුහුණ දීමට සිදුවන ශ්‍රී ලාංකිකයන් සමඟ, වියළි සලාක හා ඖෂධ ලබා දීම සහ සමහර අවස්ථාවල නවාතැන් සඳහා පහසුකම් ද සැලසීම පිණිස සම්බන්ධ වීම සඳහා උපකාරී වීමට ද මෙම ද්වාරය සමත් වී තිබේ. සංක්‍රමණිකයන් විසින් ශ්‍රී ලංකාව වෙත මුදල් එවීම  හා ශ්‍රී ලංකාවේ සිට කෙටිකාලීන සංචාරකයින් සහ සිසු සිසුවියන් වෙත මුදල් යැවීම සම්බන්ධ ගැටලු විධිමත් කිරීමට ද එය උපකාරී වී තිබේ. අධ්‍යාපන ආයතනවල ගැටලුවලට මුහුණ දුන් සිසුන්ට සහ රැකියා ගිවිසුම් කල් ඉකුත් වූ අයට නව රැකියා ගිවිසුම් ලබා ගැනීම සඳහා සමහර දූත මණ්ඩල උපකාර කර ඇති අතර, එම නිසා විරැකියාව හේතුවෙන් නැවත මෙරටට පැමිණීමට බලාපොරොත්තුවෙන් පසුවන අය ඒ පිළිබදව නැවත සළකා බලන ලෙස ඉල්ලා සිටිනු ලැබේ.

සෙනසුරාදා (මැයි 16) දින ශ්‍රී ලංකා රූපවාහිනී සංස්ථාව සමඟ පැවති රූපවාහිනී සාකච්ඡාවකට සහභාගී වෙමින් විදේශ ලේකම් රවිනාථ ආර්යසිංහ මහතා පැවසුවේ, ඉදිරි සැලසුම් සකස් කිරීමේ දී සහ මෙම අමාත්‍යාංශය, දූත මණ්ඩල සහ එතෙර සිටින ශ්‍රී ලාංකිකයන් අතර සබඳතා හා ඍජු සන්නිවේදනයන් සියුම් ලෙස සම්බන්ධීකරණය කිරීමේදී විශ්වාසදායක විශ්ලේෂණාත්මක ආයතනික මෙවලමක් බවට මෙම ‘ශ්‍රී ලංකාව අමතන්න’ ද්වාරය පත්ව ඇති බවයි. අනාගතයේ දී එහි උපයෝගීතාව සහ ක්‍රියාකාරිත්වයන් පුළුල් කිරීමට මෙම අමාත්‍යාංශය අපේක්ෂා කරන බව ද ඔහු පැවසීය.

වර්තමාන ගෝලීය වසංගත තත්ත්වය නිසා ඇති වී තිබෙන අභියෝග රාශිය හමුවේ විදේශ දූත මණ්ඩල ප්‍රතිචාර දක්වා ඇති ආකාරය පිළිබඳව නඟන ලද ප්‍රශ්නවලට පිළිතුරු දෙමින්, මෙම අමාත්‍යාංශයට සහ ලොව පුරා පිහිටි දූත මණ්ඩල කාර්ය මණ්ඩලවලට පෙර නොවූ විරූ ආකාරයකින් එකවර විසඳිය යුතු වූ විවිධ කර්තව්‍යයන්හි සංකීර්ණතාව පිළිබඳව විදේශ ලේකම්වරයා මහජනයාට පැහැදිලි කළේය. එහිදී ශ්‍රී ලංකාවේ සිටින රාජ්‍යතාන්ත්‍රිකයින්ගේ සහ සංචාරකයින්ගේ අවශ්‍යතා සපුරාලීම, විදේශ දූත මණ්ඩල සුරක්ෂිත කිරීම, ආපසු පැමිණීමට අපේක්ෂා කරන අයගේ බලවත් ඉල්ලීම් පිළිබඳව කටයුතු කිරීම, සත්කාරක රජයන් සහ ප්‍රජාවන් සමඟ සහයෝගයෙන් යුතුව තම සත්කාරක රටවල රැඳී සිටීමට අපේක්ෂා කරන අය සඳහා එම භූමිවල කොන්දේසි ලිහිල් කරවා දීම, ශ්‍රී ලංකාවේ වෛද්‍ය සහ ආහාර යන අංශ දෙකෙහිම අත්‍යවශ්‍ය සැපයුම් සුරක්ෂිත කිරීම, ශ්‍රී ලංකාවේ අපනයන අදාළ ගමනාන්ත කරා ළඟා වීම සදහා කටයුතු සම්පාදනය, පුද්ගලික ආරක්ෂණ උපකරණ (PPEs) වැනි නව නිෂ්පාදන සඳහා වෙළඳපල සොයා ගැනීම සහතික කිරීම, ශ්‍රී ලංකාව සැලකිලිමත් වන කරුණු සාක්ෂාත් කර ගැනීම සඳහා ලෝක සෞඛ්‍ය සංවිධානය සහ අනෙකුත් බහුපාර්ශ්වික, කලාපීය සහ ද්විපාර්ශ්වික හවුල්කරුවන් සමඟ එක්ව කටයුතු කිරීම ආදී කර්තව්‍යයන් සිදු කරනු ලබන අතර කොවිඩ්-19 අරමුදල සඳහා ද රුපියල් මිලියන 27 ක මුදලක් එකතු කොට පරිත්‍යාග කරන ලද බවද ප්‍රකාශ කළේය.

මෙම සන්දර්භය තුළ, අක්තගන්වන ලද තානාපතිවරුන්/මහ කොමසාරිස්වරුන් නොමැතිව සහ පුරප්පාඩු වූ රාජ්‍යතාන්ත්‍රික තනතුරු සහිතව ශ්‍රී ලංකා දූත මණ්ඩල 67 න් 1/3 කම ක්‍රියාත්මක වන අතර තානාපතිවරු නොමැති කාර්යාලයන්හි ශ්‍රී ලංකා විදේශ සේවයේ (SLFS) නිලධාරීන් වැඩබැලීමේ තත්ත්වයෙන් කටයුතු කිරීම සැලකිල්ලට ගත යුතු කරුණක් බව විදේශ ලේකම් ආර්යසිංහ මහතා පැවසීය. පීඩාවට පත් වූ ප්‍රජාවන් සමඟ කටයුතු කරන අතරතුර දී, බරපතල අවස්ථාවන්ට මුහුණ දීමට සහ අවදානම් තත්වයන් හඳුනා ගැනීම පිණිස සත්කාරක රටෙහි පවතින තත්වයන් විශ්ලේෂණය කිරීමේ දී අප්‍රමාදීව හා සිතාමතා තීරණ ගැනීම ආදී වූ අත්දැකීම් ලබා ගැනීමට දූත මණ්ඩල ප්‍රධානී තනතුරුවල වැඩබලන ශ්‍රී ලංකා විදේශ සේවයේ තරුණ නිලධාරීන් කිහිප දෙනෙකු සඳහා මෙය කදිම අවස්ථාවක් බවට පත්ව ඇති අතර එවැනි අත්දැකීම් ඔවුන්ගේ අනාගත වෘත්තිය සාරවත් කරනු ඇති අතර, ඔවුන්ගේ වෘත්තිමය දියුණුව සඳහා ඔවුන්ට හොඳ ස්ථාවරයක් ලබා දෙනු ඇතැයි ද විදේශ ලේකම්වරයා විශ්වාසය පළ කළේය.

මැතිවරණ කොමිසම පත් කෙරුණේ මැතිවරණ පැවැත්වීමට මිස කල් දැමීමට නොවන බැවින් සෞඛ්‍ය අංශ මාර්ගෝපදේශ අනුව මහා මැතිවරණය පැවැත්වීම කොමිසමේ වගකීමක් බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි.

විපක්ෂය පැරණි පාර්ලිමේන්තුව නැවත කැදවා ගන්නට උත්සාහ කරන්නේ ජනතාවට ඇති ආදරයට නොවන බව පවසන ඇමති ප්‍රසන්න රණතුංග මහතා ජනාධිපතිවරයා හා අගමැතිවරයා ඉවත් කර ගැනීම සදහා පාර්ලිමේන්තු බලය භාවිතා කිරීමට විපක්ෂය සුදානම් වන බවට ද  චෝදනා කළේය.

මිනුවන්ගොඩ නගර සභා මන්ත්‍රී කණ්ඩායම සමග ඉදිරි දේශපාලන තත්ත්වය පිළිබද ව අද (17) පැවති සාකච්ඡාවක දී ඇමතිවරයා මේ බව සදහන් කළේය.

මෙහිදී වැඩි දුරටත් අදහස් දැක්වු ඇමති ප්‍රසන්න රණතුංග මහතා මෙසේ ද කීවේය.

” මැතිවරණ කොමිසම පත් කළේ මේ රටේ මැතිවරණ තියන්න. කොමිසමේ වගකීම තමයි පවතින ඕනෑම තත්ත්වයක් යටතේ සුදුසු පරිදි මැතිවරණ පැවැත්වීමට කටයුතු කිරීම. ඒ නිසා මැතිවරණ කොමිසමට බැහැ කැදවා ඇති මහා මැතිවරණය තවදුරටත් කල් දාන්න. ඔවුන් කළ යුත්තේ මේ වගේ අවස්ථාවක දී සෞඛ්‍ය අංශ එක්ක සාකච්ඡා කිරීමයි. මැතිවරණය පවත්වන සුදුසු ක්‍රමවේදයක් හදලා නියමිත පරිදි මැතිවරණය පැවැත්වීමයි. මොන ප්‍රශ්නය තිබුණත් ජනතාවගේ ප්‍රජාතන්ත්‍රවාදී අයිතිය නැති කරන්න මැතිවරණ කොමිසමට පුළුවන්කමක් නෑ. මොකද ඒ කොමිසම පත් කරලා තියෙන්නේ ජනතාවගේ ඡන්ද අයිතිය රැකලා දෙන්න නිසා.

පසුගිය දින 15 ටම සමාජයේ කොරෝනා රෝගීන් කිසිවෙකු හමු නොවු බව සෞඛ්‍ය අංශ පෙන්වා දී තිබුණා. එතකොට අපි රජයක් විදිහට මේ කොරෝනා වසංගතය පාලනය කරන්න කළ හැකි සියලුම දේ කරලා තියෙනවා. ලෝකයෙන් කොරෝනා වසංගතය සම්පූර්ණයෙන් ම තුරන් වෙන්න කාලයක් යාවි. ඒ වෙනතුරු අපි ඡන්දය පවත්වන්නේ නැතුව ඉන්නද? රට සාමාන්‍යකරණය නොකර ඉන්නද? අපිට සිද්ධ වෙනවා කොරෝනා වසංගතයෙන් ආරක්ෂා වෙන ගමන් අපේ සාමාන්‍ය ජන ජීවිතය ගෙනියන්න සෞඛ්‍ය අංශ මාර්ගෝපදේශ අනුව. ඒ නිසා කොමිසම කළ යුත්තේ සෞඛ්‍ය නිරිදේශ අනුව මැතිවරණය පැවැත්වීම මිස මැතිවරණය කල් දැමීම නොවේ.

රටේ තියෙන තත්ත්වය නිසා මැතිවරණය තියන්න එපා කියලයි විපක්ෂය කියන්නේ. බල්ලගේ වැඩේ බූරුවට කරන්න දෙන්න බෑ. විපක්ෂය කොහොමද මැතිවරණය තියෙන එක ගැන තීන්දු ගන්නේ. පසුගිය යහපාලනයට වුණෙත් බල්ලගේ වැඩේ බූරුවා කරන්න ගිහින් කෙළව ගත්ත එක. කොවිඩ් වසංගතය තියෙන කොට කොරියාවේ ඡන්දය තිබ්බා. නවසීලන්තයේ අගමැති කියලා තියෙනවා නියමිත කාලයේ ඡන්දය තියන්න කියලා. ඉතිං ඇයි අපිට බැරි සෞඛ්‍ය අංශ මාර්ගෝපදේශ අනුව ඡන්දය තියන්න. ඡන්දය කල් දාගන්න එක එජාප, ස.ජ.බ, ජවිපෙ, ටී.එන්.ඒ වුවමනාව.

ඡන්දය කියන්නේ ප්‍රජාතන්ත්‍රවාදී අයිතියක්. එකපැත්තකින් කියනවා ආණ්ඩුව ඒකාධීපති කියලා. තව පැත්තකින් ඡන්දය කල් දාගන්න උසාවි යනවා. මේ අය මේ ඡන්දය කල් දාගන්න හදන්නේ වෙන මොකවත් නිසා නෙමේයි. රටේ ජනතාව ප්‍රතික්ෂේප කරපු පරණ පාර්ලිමේන්තුව නැවත රැස් කරගෙන පරණ සෙල්ලම් ටික දාන්නයි මේ අයට ඕනේ. පරණ පාර්ලිමේන්තුවේ බහුතරේ තියෙන්නේ විපක්ෂයට. එතකොට ඒ විපක්ෂයේ ඉන්න දෙමළ සන්ධානයට ඕනේ බහුතරය තියෙන වෙලේ ව්‍යවස්ථා සංශෝධනය ගේන්න. මුස්ලිම් අන්තවාදීන් පක්ෂ වලට ඕනේ පාස්කු ප්‍රහාරය පිළිබද ව පරීක්ෂණ  නවත්වන්න.

ජවිපෙට ඕනේ එජාපයට බලය අරන් දීලා නඩත්තුවට මුදල් ගන්න. මේ අය නැවත පරණ පාර්ලිමේන්තුව රැස් කරගන්න කියන්නේ අගමැතිතුමාව අයින් කරව ගන්න. පරණ පාර්ලිමේන්තුව රැස්වෙලා  ජනාධිපතිතුමාට විශ්වාසභංගයක් ගෙනාවොත් ජනාධිපතිතුමාට ආයෙත් පාර්ලිමේන්තුව විසුරුවන්න බැරුව යනවා. ඒක තමයි එජප, ජවිපෙ, ටී.එන්.ඒ අශුද්ධ සන්ධානයට ඕන කරලා තියෙන්නේ කොක්කෙන් හරි කෙක්කෙන් හරි ජනාධිපතිතුමාව අගමැතිතුමාව අයින් කරලා මේ ආණ්ඩුව වට්ටන්න. ඒකටයි මේ කුමන්ත්‍රණ ඔක්කොම. රටේ ජනතාව පිළිගන්නවා ඔය කියන පාර්ලිමේන්තුව නැතුවත් කොරෝනා පාලනය හොදින් කෙරුණා තියලා. ඒ නිසා පරණ පාර්ලිමේන්තුව රැස් කිරීමට කිසිදු අවශ්‍යතාවයක් නෑ.”

ජාතික රණවිරු අනුස්මරණ දිනයට සමගාමීව සන්නද්ධ හමුදා සේනාධිනායක, ජනපති ගෝඨාභය රාජපක්ෂ මහතාගේ ප්‍රධානත්වයෙන් බත්තරමුල්ල, ශ්‍රී ජයවර්ධනපුර පිහිටි ජාතික රණවිරු ස්මාරකය අභියසදී අඟහරුවාදා (19) දින පැවැත්වීමට නියමිත ජාතික රණවිරු අනුස්මරණ උත්සවයේදී ශ්‍රී ලංකා යුද්ධ හමුදා ඉතිහාසයේ තවත් එක් සන්ධස්ථානයක් සනිටහන් කරමින් යුද්ධ හමුදාවේ සෙසුනිලයින් 14,617 කගේ නිල උසස් කිරීම සිදුකිරීමට ද සියලු කටයුතු සුදානම් ව ඇත.

රටේ භෞමික අඛණ්ඩතාවය සහ ඒකීයභාවය ආරක්‍ෂා කිරීමේදී මෙන්ම ජන ජීවිතයට තර්ජනයක් එල්ලවන ස්වාභාවික විපත්, ත්‍රස්තවාදී තර්ජන, ගෝලීය වසංගත වැනි ව්‍යසනයන් හිදී යුද්ධ හමුදා සාමාජිකයින් සිදුකරනු ලැබූ පරාර්ථකාමී සහ නොයෙකුත් කැපකිරීම් සඳහා වටිනාකමක් ලබාදෙමින් ආරක්‍ෂක මාණ්ඩලික ප්‍රධානී මෙන්ම යුද්ධ හමුදාධිපති ලුතිනන් ජෙනරාල් ශවේන්ද්‍ර සිල්වා යුද්ධ හමුදාවේ සෙසුනිලයින් දිරීගන්වමින් මෙලෙස උසස්වීම් සිදුකරනු ලබයි.  

ඒ අනුව, යුද්ධ හමුදාධිපති ලුතිනන් ජෙනරාල් ශවේන්ද්‍ර සිල්වා ගේ මූලිකත්වයෙන් යුද්ධ හමුදා විධායක ජෙනරාල් ලබාදුන් උපදෙස් වලට අනුවකූලව යුද්ධ හමුදා පිරිස් පරිපාලන අධ්‍යක්‍ෂ බ්‍රිගේඩියර් සිසිර පිලපිටියගේ මඟපෙන්වීමෙන් යුත් පිරිස් පරිපාලන අධ්‍යක්‍ෂ මණ්ඩලය ජාතික රණවිරු අනුස්මරණ දිනයට සමගාමීව යුද්ධ හමුදා ඉතිහාසයේ එක් දිනයක් තුළ ලබාදුන් වැඩිම උසස්වීම් ප්‍රමාණය 2020 මැයි මස 18 දින සිට බලපැවැත්වෙන පරිදි ශ්‍රී ලංකා යුද්ධ හමුදාවේ සියලුම රෙජිමේන්තුහි සෙසුනිලයන් වෙත ලබාදී ඇත.

පසුගිය වසරේ ඔක්තෝම්බර් මස 10 වන දිනට යෙදුණු 70 වන යුද්ධ හමුදා සංවත්සර දිනය නිමිත්තෙන් නිලධාරීන් 210 ක් ඇතුළු තවත් සෙසුනිලයින් 7210 දෙනෙකුගෙන් යුත් කණ්ඩායමක් වත්මන් යුද්ධ හමුදාධිපතිතුමන්ගේ උපදෙස් ප්‍රකාරව ඔවුන්ගේ ඊළඟ නිලයට උසස් කරනු ලැබූ බැව්ද සිහිපත් කල යුතුය. මෙහිදී, යුද්ධ හමුදාධිපතිතුමන් දේශය පුරාවට සේවය කරන ලබන සියලු යුද්ධ හමුදා සාමාජිකයින් හට තම  ස්තූතිපූර්වක සුබපැතුම් එක් කරනු ලබයි.

කොවිඩ් 19 වසංගතය හේතුවෙන් අත් හිටුවා තිබු කටුනායක ගුවන් තොටුපළේ සංවර්ධන කටයුතු යළි ඇරඹෙයි. මෙම සංවර්ධන ව්‍යාපෘති කඩිනමින් අවසන් කරන ලෙසද අදාල කොන්ත්‍රාත්කරුවන්ට ඇමති ප්‍රසන්න රණතුංග මහතා උපදෙස් දුන්නේය.

කටුනායක ගුවන් තොටුපළ පුළුල් කිරීමේ අරමුණින් පසුගිය කාලයේ ආරම්භ කෙරුණු සංවර්ධන ව්‍යාපෘති රැසක් අඩාළ වී තිබුණි. ජනාධිපති ගෝඨාභය රාජපක්ෂ මහතා හා අගමැති මහින්ද රාජපක්ෂ මහතා බලයට පත් වීමෙන් පසු මෙම ව්‍යාපෘති යළි කඩිනම් කෙරිණ. එහෙත් කොවිඩ් 19 වසංගතය රට පුරා පැතිරයාමේ  අවදානමත් සමග ඇදිරිනීතිය පැනවීම වැනි සීමා හේතුවෙන් පසුගිය මාස 03 ක කාලය තුළ එහි ඉදිරි කීරීම් සිදු වූයේ නැත. ජනාධිපති ගෝඨාභය රාජපක්ෂ මහතා පසුගිය දා උපදෙස් දුන්නේ නතර වු සියලු සංවර්ධන කටයුතු  වහා අරඹන ලෙසයි. ඒ අනුව ඇමති ප්‍රසන්න රණතුංග මහතා කටුනායක ගුවන් තොටුපළේ සංවර්ධන කටයුතු වහා නැවත අරඹන ලෙස ගුවන් තොටුපළ කළමණාකාරිත්වයට උපදෙස් දුන්නේය. එම ව්‍යාපෘති යළි ආරම්භ කෙරුණේ ඒ අනුවයි.

 විෂයභාර ඇමති ප්‍රසන්න රණතුංග මහතා පසුගිය දා (14) ගුවන් තොටුපළේ නැවත ආරම්භ කෙරුණ සංවර්ධන ව්‍යාපෘති නිරීක්ෂණය කළේය. මේ වන විට කටුනායක ගුවන් තොටුපළේ ප්‍රධාන ව්‍යාපෘති 02 ක් ක්‍රියාත්මක වේ. එක් ව්‍යාපෘතියක් වන්නේ නව ගුවන්යානා අංගනයක් ඉදි කිරීමයි. ජපන් යෙන් 1,152,273,761  හා ශ්‍රී ලංකා රුපියල් 4,456,377,248  මේ සදහා වෙන් කර තිබේ. මෙහි ඉදි කිරීම් 2017 දී ඇරඹුන අතර 2019 ඔක්තෝම්බර් මාසයේ දී අවසන් වීමට නියමිත ව තිබිණි. මීට අමතරව කටුනායක ගුවන් තොටුපළේ නව මගී පර්යන්තයක් ඉදි කීරිමට ද කටයුතු යොදා තිබේ. ජපන් යෙන් 41,553,891,286 හා ශ්‍රී ලංකා රුපියල් 35,135,843,333 වෙන් කර තිබේ. මෙහි ඉදිකිරිම් ආරම්භ කිරීම විවිධ හේතූන් මත ප්‍රමාද වී තිබු අතර වත්මන් ආණ්ඩුව බලයට පත්වීමෙන් පසු මේ වන විට එහි ඉදිකිරීම් යළි ආරම්භ කර ඇත.

නිරීක්ෂණ චාරිකාවෙන් පසු ඇමති ප්‍රසන්න රණතුංග මහතා මෙම කොන්ත්‍රාත්කරුවන්ට, උපදේශක ආයතන හා ගුවන් තොටුපළ බළධාරීන් සමග විශේෂ සාකච්ඡාවක් ද පැවැත්වූයේ ය. එහි දී ඇමතිවරයා මෙම ව්‍යාපෘති වල ප්‍රගතිය විමසා බැලු අතර ඇතැම් ව්‍යාපෘති නිම කිරිමේ කාලය ඉකුත් වී තිබු බව මෙහිදි අනාවරණය විය. මෙම කොන්ත්‍රාත්කරුවන්ට අවස්ථා කීපයකදී ම ඊට අමතර කාලය ලබා දී ඇතැත් තවමත් එය අවසන් නොවීම පිළිබද ව දැඩි ලෙස කණස්සල්ල පළ කළ ඇමතිවරයා දැනට ලබා දී ඇති කාලය අවසන් වීමට පෙර ව්‍යාපෘතිය අවසන් කරන ලෙසද ඔවුන්ට උපදෙස් දුන්නේය. “මේ ආණ්ඩුව වැඩ කරන ආණ්ඩුවක්. වැඩ ප්‍රමාද කරන ආණ්ඩුවක් නෙමෙයි. ඒ නිසා නියමිත කාලයට වැඩ අවසන් කරන්න. එහෙම නොවුණොත් මා ඔබට එරෙහිව පියවර ගන්නවා”. ඇමතිවරයා ඔවුන්ට අනතුරු අගවමින් කීවේය.

අදාළ ඉදිකිරීම නිසි ලෙස සිදු කෙරෙන්නේදැ’යි නිරන්තර අධීක්ෂණයකට ලක් කිරීම සදහා ගුවන් තොටුපළ අභ්‍යන්තර කමිටුවක් පත් කරන ලෙසද ඇමතිවරයා ගුවන් තොටුපළ නිළධාරීන්ට උපදෙස් දුන්නේය.

අද (16) දින ප.ව 23.05 වන විට වාර්තා වූ කොවිඩ්-19 ආසාදිතයින් 25 දෙනා සමග ශ්‍රී ලංකාවේ සමස්ත කොවිඩ්-19 ආසාදිතයින් සංඛ්‍යාව 960 දක්වා වර්ධනය වූ බව සෞඛ්‍ය ප්‍රවර්ධන කාර්යාංශයේ නිල වෙබ් අඩවියේ සදහන් වේ.

එහි දැක්වෙන්නේ අද දිනය වන විට රෝහල් තුළ රෝගීන් 431 දෙනකු ප්‍රතිකාර ලබන බවත් 106 දෙනකු විමර්ශනය යටතේ සිටින බවයි.

මේ වන විට සුවය ලබා ඇති කොවිඩි-19 ආසාදිතයින් සංඛ්‍යාව 520ක් වන අතර මරණ සංඛ්‍යාව තව දුරටත් 09 අගයක පවතී.

2020 මැයි 15 වැනි සිකුරාදා එක්සත් රාජධානියේ ‘ද ගාඩියන්’ පුවත්පතේ වෙබ් සංස්කරණයේ ප්‍රකාශයට පත් කරන ලද “Travel quiz: do you know your islands, Man Friday?” යන ප්‍රශ්නාවලිය සම්බන්ධයෙන් විදේශ සබඳතා අමාත්‍යාංශයේ අවධානය යොමු වී තිබෙන බවත් “ඊලාම්” පිළිබඳව සඳහන් ‘ලන්ඩන් ගාඩියන්’ සංචාරක ප්‍රශ්නාවලිය ඉල්ලා අස්කර ගන්නා ලෙස ද ගාර්ඩියන් පුවත්පතින් ඉල්ලා සිටින බවත් විදේශ සබදතා අමාත්‍යාංශය අද (16) නිකුත් කළ මාධ්‍ය නිවේදනයක සදහන් වෙයි.

එම මාධ්‍ය නිවේදනය සම්පූර්ණයෙන්ම මෙසේය,

මාධ්‍ය නිවේදනය

“ඊලාම්” පිළිබඳව සඳහන් ‘ලන්ඩන් ගාඩියන්’ සංචාරක ප්‍රශ්නාවලිය ඉල්ලා අස්කර ගන්නා ලෙස ශ්‍රී ලංකාව තරයේ ඉල්ලා සිටී

2020 මැයි 15 වැනි සිකුරාදා එක්සත් රාජධානියේ ‘ද ගාඩියන්’ පුවත්පතේ වෙබ් සංස්කරණයේ ප්‍රකාශයට පත් කරන ලද “Travel quiz: do you know your islands, Man Friday?” යන ප්‍රශ්නාවලිය සම්බන්ධයෙන් මෙම අමාත්‍යාංශයේ අවධානය යොමු වී තිබේ. එහි සඳහන් දෙවැනි ප්‍රශ්නය වන්නේ, ‘ඊලාම් යන ස්වදේශීය නාමය භාවිතා වනුයේ  කුමන ජනප්‍රිය නිවාඩු දිවයිනෙහි ද?’ යන්නයි.

මෙම ප්‍රශ්නය සඳහා තෝරාගත හැකි පිළිතුරු වලින් එකක් ලෙස ‘ශ්‍රී ලංකාව’ ලැයිස්තුගත කර ඇති අතර, යමෙකු පිළිතුර ලෙස ශ්‍රී ලංකාව තෝරා ගන්නා විට, එය නිවැරදි පිළිතුර ලෙස දැක්වෙන අතර, තවදුරටත් විස්තරයක් ලෙස, ‘දිවයිනේ මෑත කාලීන හමුදා කැරැල්ලේ සම්පූර්ණ නාමය එල්.ටී.ටී.ඊ. – දෙමළ ඊලාම් විමුක්ති කොටි සංවිධානය’ යන්න එහි දිස්වෙයි.

එක්සත් රාජධානියේ ශ්‍රී ලංකා මහ කොමසාරිස්වරිය මෙම තොරතුරුවල සාවද්‍යතාවය පිළිබඳව ගාඩියන් පුවත්පතේ කර්තෘ වෙත ලිපියක් යවමින්, මෙම අන්තර්ගතය ඉවත් කරන ලෙස ඉල්ලා සිටියාය.

විදේශ සබඳතා අමාත්‍යාංශය ‍2020 මැයි 16 වැනි දින 

මේ අතර ද ශ්‍රී ලංකා රජයේ ඉල්ලීම පරිදි ද ගර්ඩියන්හි අදාළ වාර්තාව ඉවත් කර ගෙන ඇති බව එම පුවත්පතේ අන්තර්ජාල සංස්කරණයේ දැක්වේ.

කොවිඩ්-19 වෛරසයට එරෙහිව මෙම වසර අවසාන වන විට එන්නත් එකක් හෝ කිහිපයක් නිපදවීමේ අරමුණින් සංවර්ධනය වෙමින් පවතින එන්නත් මාත්‍රාව මිලියන සිය ගණනක් ගබඩා කිරීමට එක්සත් ජනපද රජය සැලසුම් කර ඇතැයි එක්සත් ජනපද පරිපාලන නිලධාරීන් ඊයේ (15) ප්‍රකාශ කළේය.

“ඔපරේෂන් වෝර්ප් ස්පීඩ් Operation Warp Speed” හි කොටසක් ලෙස මෙම පියවර ගන්නා බවයි ඔහු වැඩි දුරටත් සදහන් කළේ.

“නුදුරු අනාගතයේ දී අපට එන්නතක් නිපදවීමට හැකි වනු ඇතැයි අපි සිතමු,” ජනාධිපති ඩොනල්ඩ් ට්‍රම්ප් ප්‍රවෘත්ති සාකච්ඡාවකදී පැවසීය. 

වසර අවසාන වන විට එන්නතක් සොයා ගත නොහැකි වුවහොත් සිදුවන්නේ කුමක්ද ? “යම් අවස්ථාවක දී එය පහව යනු ඇත … එය පුපුරා යා හැකිය … නමුත් අපි ගින්න නිවා දමමු.” ට්‍රම්ප් අවධාරණයෙන් පැවසීය.

මෙම ව්‍යාපෘතියේ ප්‍රධානියා ලෙස ට්‍රම්ප් හිටපු ඖෂධ විධායක විධායක මොන්සෙෆ් ස්ලූයි සහ තරු හතරේ එක්සත් ජනපද ජෙනරාල් ගුස්ටාව් පර්නා (Moncef Slaoui, former pharmaceuticals executive, and Gustave Perna, a four-star US general) නම් කළේය. 

එන්නතක් නිපදවීමේ උත්සාහයන් ජනවාරියේ සාර්ථක වනු ඇත්දැයි මාධ්‍යෙවේදීන් මෙම ප්‍රවෘත්ති සාකච්ඡාවේදී ට්‍රම්ප්ගෙන් විමසා සිටි අතර එයට පිළිතුරු වශයෙන් ට්‍රම්ප් පවසා සිටියේ, බොහෝ සෞඛ්‍ය විශේෂඥයන් පවසා ඇති පරිදි එන්නතක් සංවර්ධනය කිරීමට මාස 18 ක් ගතවනු ඇති බවයි.

” කොවිඩ් -19 වෛරසයට එරෙහිව එන්නතක් සොයා ගැනීමට පර්යේෂණ සිදු කරන පර්යේෂණ කණ්ඩායම් 100 කට අධික සංඛ්‍යාවක් අප විසින් සොයාගෙන තිබෙනවා” සෞඛ්‍ය හා මානව සේවා ලේකම් ඇලෙක්ස් අසාර් ෆොක්ස් ව්‍යාපාරික ජාලයට පැවසීය.

“අපි දැන් කරමින් සිටින්නේ දේශීය වශයෙන් එන්නතක් නිෂ්පාදනය කිරීම සදහා ඔවුන්ව උනන්දු කරවීමයි. මෙය ඩොලර් මිලියන සිය ගණනක සූදුවක් වගේම දැවැන්ත ව්‍යාපාරයක්. අපගේ ඉලක්කය සාර්ථක වුවහොත් මේ වසර අවසාන වන විට අපට ආරක්ෂිත හා ඵලදායී එන්නත් හෝ ඊට වැඩි ගණණක් නිෂ්පාදනය කිරීමට සහ මාත්‍රා මිලියන ගණනක් ලබා ගැනීමට හැකියාව ලැබෙනු ඇතැයි අපි බලාපොරොත්තු වෙනවා‘ඇලෙක්ස් අසාර් වැඩි දුරටත් පැවසීය.

2020 අවසන් වන විට එන්නත් මාත්‍රාව මිලියන 300 ක් ලබා ගැනීමේ ඉලක්කයක් ධවල මන්දිරය ඇත.

කොවිඩ්මෙ-19 සඳහා කිසිදු එන්නතක් මේ දක්වා අනුමත කර නැත. නමුත් එවැනි එන්නත් ගණනාවක් සංවර්ධනය වෙමින් පවතින නමුත්, ඵලදායී එන්නතක් නිෂ්පාදනය හා බෙදා හැරීම එක්සත් ජනපද වත්මන් ආර්ථික තත්ත්වය තුළ අභියෝගාත්මක වනු ඇතැයි සැලකේ.

ඊට හේතුව වන්නේ පසුගිය මාර්තු මාසයේ සිට පෙර නොවූ විරූ මට්ටමකින් රැකියා අහිමිවීම සහ සිල්ලර මිලදී ගැනීම් පහත වැටීම නිසා එක්සත් ජනපදය මහා අවපාතයට හා දැවැන්ත විරැකියා ගැටලුවකට මුහුණ දී සිටීමයි.

වෛරසය පැතිරීම මන්දගාමී කිරීම අරමුණු කරගත් අගුලු දැමීමේ සීමා කිරීම් නතර කරන ලෙස ඉල්ලා ෆ්‍රින්ජ් සහ අන්ත දක්ෂිනාංශික කණ්ඩායම් එක්සත් ජනපදය පුරා විරෝධතා සංවිධානය කර තිබේ. ඒවාට සහභාගී වන බොහෝ දෙනෙක් ආයුධ සන්නද්ධව සිටින අතර සමහරු ජාතිවාදී ස්ථාවරයන් ප්‍රවර්ධනය කරති.

ට්‍රම්ප් නැවත විවෘත කිරීමට ගත් උත්සාහයන් අගය කොට විරෝධතාකරුවන් “හොඳ මිනිසුන්” ලෙස නම් කර තිබේ. 

කෙසේ වෙතත්, ජාතික ආසාත්මිකතා සහ බෝවන රෝග පිළිබඳ ආයතනය මෙහෙයවන බෝවන රෝග විශේෂඥ වෛද්‍ය ඇන්තනි ෆවුසි අඟහරුවාදා සෙනෙට් සභාවේ සාක්කි දෙමින් කියා සිටියේ පාසල් හා විශ්ව විද්‍යාල නැවත ආරම්භ කරන විට සිදුවිය හැකි දෙවැනි පිපිරීම වන විට එන්නතක් සොයා ගැනීමට හැකි වනු ඇති බව තමා විශ්වාස කරන බවයි.

අල් ජසීරා මාධ්‍ය වාර්තාවක් ඇසුරිණි – සකස් කළේ – තුෂාධවි

නොමිලේ ලැප්ටොප් පරිගණක ලබාදෙන මුවාවෙන් වට්සැප් සමාජ මාධ්‍ය යෙදුම හරහා මේ දිනවල පෞද්ගලික තොරතුරු එක්රැස් කිරීමේ ක්‍රියාවලියක් සම්බන්ධයෙන් අප ශ්‍රී ලංකා තොරතුරු තාක්ෂණ සංගමයට තොරතුරු ලැබී ඇත.

http://order.freelaptops . site/ නම් වෙබ් ලිපිනය හරහා මෙම පෞද්ගලික තොරතුරු රැස් කරගැනීමේ ක්‍රියාවලිය සිදුවන අතර විශේෂයෙන්ම “Goverment Providing Free Laptop For Youth” නමින් මෙය සමාජ මාධ්‍ය යෙදුම් තුල හුවමාරුවීම නිසා බොහෝ පුද්ගලයන් ප්‍රමාණයකගේ පෞද්ගලික දත්ත මෙය මෙහෙයවන කණ්ඩායම සතුවිය හැකිය. මෙලෙස විවිධ දෑ නොමිලේ ලබාදෙන මුවාවෙන් සිදුකරනු ලබන තොරතුරු රැස්කිරීම් ක්‍රියාවලින් සම්බන්ධයෙන් අවධානයෙන් පසුවන ලෙස අප ශ්‍රී ලංකා තොරතුරු තාක්ෂණ සංගමය ලෙස ජනතාවට දැනුම්දෙමු.

ගිනිකොණ දිග බෙංගාල බොක්ක මුහුදු ප්‍රදේශයේ සහ දකුණු අන්දමන් මුහුද ආශ්‍රිතව වායුගෝලයේ අඩුපීඩන තත්ත්වයක් වර්ධනය වී ඇති බවත් ඉදිරි පැය 12 තුළ එය පීඩන අවපාතයක් දක්වා වර්ධනය විය හැකි බවත් දකුණ, බස්නාහිර, සබරගමුව සහ සහ මධ්‍යම පළාත්වල බස්නාහිර, සබරගමුව පළාත්වල ඇතැම් ස්ථාන වලට මි.මී.150ට වැඩි තද වර්ෂාපතනයන් ද ඇති විය හැකි බව කාලගුණවිද්‍යා දෙපාර්තමේන්තුව විසින් නිවේදනය කර ඇති බවත් එම නිවේදනයේ සදහන් කරුනු සළකා බලා ගංගා ද්‍රෝනි කීපයකට ගංවතුර අවදානම් තත්වයක් ඇතිවිය හැකි බවට වාරිමාර්ග දෙපාර්තමේන්තුව විසින් නිවේදනයක් නිකුත් කරමින් පෙන්වා දී ඇති බවත් ආපදා කළමනාකරණ මධ්‍යස්ථානය පවසයි.

එහි නිල වෙබ් අඩවියේ අද (16) නවතම යාවත්කාලීන කිරීම් අනුව ගංවතුර තර්ජන පිළිබද වැඩි දුරටත් මෙසේ ද සදහන් වේ.

ගල්ගමුව, නවගත්තේගම, ආනමඩුව, කරුවලගස්වැව, වනාතවිල්ලුව යන ප්‍රාදේශීය ලේකම් කොට්ඨාශවල මී ඔය ගංගාධාරයට අයත් පහත් බිම් ජලයෙන් යටවිය හැකි බවත්, මහව නිකවැරටිය, වාරියපොළ, කොබෙයිගනේ, රස්නායකපුර, බිංගිරිය, පල්ලම, ආරච්චිකට්ටුව සහ හලාවත යන ප්‍රාදේශීය ලේකම් කොට්ඨාශවල දැදුරු ඔය ගංගාධාරයට අයත් පහත් බිම් ප්‍රදේශ ගංවතුර තත්වයක් ඇතිවිය හැකි බවත් නිවේදනය කර ඇත.

එසේම අත්තනගලු ඔය ගංගා ධාරයේ දිවුලපිටිය, මීරිගම, අත්තනගල්ල, ගම්පහ, ජාඇල, මහර, කටාන, මිනුවන්ගොඩ සහ වත්තල යන ප්‍රාදේශීය ලේකම් කොට්ඨාශවලට අයත් පහත් බිම් ප්‍රදේශ වලට ගංවතුර තත්වයක් ඇතිවිය හැකි බව වාරිමාර්ග දෙපාර්තමේන්තුවේ නිවේදනයේ සදහන් වේ.

ගංවතුර තර්ජනයට ලක්ව ඇති ප්‍රදේශ

කැළණි ගංගා ද්‍රෝණිය සළකා බලනවිට රැවන්වැල්ල, දෙහිඕවිට, සීතාවක, දොම්පේ, කඩුවෙල, බියගම, හෝමාගම, කොලොන්නාව යන ප්‍රාදේශීය ලේකම් කොට්ඨාශවලට අයත් කැළණි ගංගා ද්‍රෝණියේ පිහිටි පහත් බිම ජලයෙන් යටවිය හැකි බවත් පැල්මඩුල්ල, නිවිතිගල, රත්නපුර, කුරුවිට, ඇළපාත, කිරිඇල්ල, අබේගම, ඇහැළියගොඩ, ඉංගිරිය, හොරණ, කළවාන, පාලින්දනුවර, බුලත්සිංහල, දොඩංගොඩ, මිල්ලනිය, කලුතර, මදුරාවෙල යන ප්‍රාදේශීය ලේකම් කොට්ඨාශවල පහත් බිම් ප්‍රදේශ ගංවතුර ඇති විය හැකි බව මෙම නිවේදනයේ සදහාන් කර ඇත.
මීට අමතරව බෙන්තර ගග ආශ්‍රිතව වලල්ලාවිට, බෙන්තර යන ප්‍රාදේශීය ලේකම් කොට්ඨාශවලට අයත් පහත් බිම් ප්‍රදේශ ගංග ආශ්‍රිතව නෙලුව, තවලම, නාගොඩ, ඇල්පිටිය, නියාගම, බද්දේගම, වැලිපිටිය, දිවිතුර, බොපේ, පෝද්දල සහ ගාල්ල යන ප්‍රාදේශීය ලේකම් කොට්ඨාශවල ගංගාධාර පහත් බිමි ප්‍රදේශ සහ නිලවලා ගංගා ද්‍රෝණියට අදාලව කොටපොළ, පිටබැද්දර, අකුරැස්ස, අතුරලිය, මාලිම්බඩ,කඹුරුපිටිය, තිහගොඩ සහ මාතර යන ප්‍රාදේශීය ලේකම් කොට්ඨාශ වලට අයත් පහත් බිම් ප්‍රදේශ සහ කිරම ඔය වලස්මුල්ල,බෙලිඅත්ත, තංගල්ල, උරුබොකු ඔය යන ගංගා ධාරවල ගංවතුර තත්යක් ඇතිවිය හැකි බව මෙම නිවේදනයේ තවදුරටත් සදහන් කර ඇත.
ගංවතුර අවදානම් නිවේදනය කාලගුණවිද්‍යා දෙපාර්තමේන්තුව විසින් නිකුත් කර ඇති තද වැසි පිළිබදව අවවාධාත්මක නිවේදනය අනුව සකස් කර ඇති බවත් එම නිවේදනය තුළ සදහන් කර ඇති යම් ආකාරයකින් එවැනි වර්ෂාව මෙම ගංගා ධාර ප්‍රදේශයට ලැබේ නම් ඇතිවිය හැකි ගංවතුර අවදානමට පෙරසුදානම් වන ලෙස ආපදා කළමනාකරණ මධ්‍යස්ථානය දැනුම් දේ.
විශේෂයෙන්ම පවතින කොවිඩ් වසංගත අවදානම හේතුවෙන් ගංවතුර තත්වයක් ඇති වුවහොත් එම තත්වය පාලනය කරගනිමින් ජීවිත සහ දේපළ ආරක්ෂා කර ගැනීම කටයුතු කරන ලෙස ආපාදා කළමනාකරණ මධ්‍යස්ථානය ජනතාවගෙන් ඉල්ලා සිටී,

විශේෂයෙන්ම සෞඛ්‍ය අමාත්‍යාංශය විසින් ලබාදී ඇති උපදෙස් අනුගමනය කරමින් කටයුතු කිරීමට අවශ්‍ය නිසා ඔබ ජීවත්වන නිවස ගංවතුර අවධානයට ලක්වන තෙක් නොසිට සුරක්ෂිත මධ්‍යස්ථාන කරා යාම ඉතා වැදගත් වේ. එසේම පාසැල් සිසුන්ගේ පොත් පත් ලිපි ද්‍රව්‍ය ගංවරතුරෙන් සුරක්ෂිත කර ගැනීමට කටයුතු කිරීමත් පවතින තත්වය හමුවේ ඇතිවිය හැති අවදානම් තත්වය පිලිබද නිරන්තරයෙන් ජනතාවගේ අවධානය යොමු කරන ලෙසත් ආපදා කළමනාකරණ මධ්‍යස්ථානය ජනතාවගෙන් ඉල්ලා සිටී.

ගාල්ල, මාතර, මාතලේ, රත්නපුර, කලුතර, කෑගල්ල, කොළඹ සහ මහනුවර යන දිස්ත්‍රික්ක සදහා ජාතික ගොඩනැගිලි පර්යේෂණ සංවිධානය විසින් නායයාම් අවදානම් නිවේදන නිකුත් කර ඇතැයි ආපදා කළමනාකරණ මධ්‍යස්ථානය පවසනවා.

ආපදා කළමනාකරණ මධ්‍යස්ථානයේ නිල වෙබ් අඩවියේ අද (16) දින නවතම යාවත්කාලීන කිරීම්වල මේ බව සදහන්.

එහි වැඩි දුරටත් මෙසේද සදහන් වෙනවා.

පසුගිය පැය විසි හතර තුළ වර්ෂාපතනය මිලිමීටර් 100 ඉක්මවා ඇති ගාල්ල දිස්ත්‍රික්කයේ බද්දේගම, රත්නපුර දිස්ත්‍රික්කයේ පැල්මඩුල්ල, රත්නපුර, ඇලපාත, නිවිතිගල, කලවාන සහ කිරිඇල්ල කුරුණැගල දිස්ත්‍රික්කයේ පොල්ගහවෙල ප්‍රාදේශීය ලේකම් කොට්ඨාශවල නායයාම් අවධානම් කලාප වල ජීවත් වන ජනතාව තවදුරටත් වර්ෂාව ලැබේ නම් ආරක්ෂත ස්තාන කරා ඉවත් වීමට සුදානම් වෙන ලෙස නායයාම් අවදානම් නිවේදන නිකුත් කර ඇත.

එසේම පසුගිය පැය විසි හතර තුළ වර්ෂාපතනය මිලිමීටර් 75 ඉක්මවු ප්‍රදේශවල ජනතාව නායයාම්, කණ්ඩි කඩාවැටීම්, ගල් පෙරලීම් වැනි ආපදා සිදුවිය හැකි බැවින් අවධානයෙන් සිටින ලෙස ජාතික ගොඩනැගිලි පර්යේෂණ සංවිධානය විසින් අනතුරු අගවා ඇත.

නායයාම් අවධානම් කලාප

ඒ අනුව ගාල්ල දිස්ත්‍රික්කයේ ගාල්ල, අක්මීමන, ඇල්පිටිය, නියාගම, නාගොඩ, තවලම සහ නෙලුව යන ප්‍රාදේශීය ලේකම් කොට්ඨාශවල නායයාම් අවධානම් කලාප, මාතලේ දිස්ත්‍රික්කයේ තවලම යන ප්‍රාදේශීය ලේකම් කොට්ඨාශයේ නායයාම් අවධානම් කලාප, රත්නපුර දිස්ත්‍රික්කයේ ඇහැලියගොඩ, කුරුවිට,අයගම යන ප්‍රාදේශීය ලේකම් කොට්ඨාශවල නායයාම් අවධානම් කලාප කලුතර දිස්ත්‍රික්කයේ අගලවත්ත, පාලින්දනුවර, බුලත්සිංහල, වලල්ලාවිට, හොරණ, ඉංගිරිය සහ මතුගම යන ප්‍රාදේශීය ලේකම් කොට්ඨාශවල නායයාම් අවධානම් කලාප මාතර දිස්ත්‍රික්කයේ පිටබැද්දර සහ කොටපොල යන ප්‍රාදේශීය ලේකම් කොට්ඨාශවල නායයාම් අවධානම් කලාප කොළඔ දිස්ත්‍රික්කයේ සීතාවකපුර යන ප්‍රාදේශීය ලේකම් කොට්ඨාශයේ නායයාම් අවධානම් කලාප කෑගල්ල දිස්ත්‍රික්කයේ අරනායක යන ප්‍රාදේශීය ලේකම් කොට්ඨාශයේ නායයාම් අවධානම් කලාප සහ මහනුවර දිස්ත්‍රික්කයේ ගගඉහළ කෝරළේ සහ තුම්පනේ යන යන ප්‍රාදේශීය ලේකම් කොට්ඨාශවල නායයාම් අවධානම් කලාප වල ජීවත් වන ජනතාව අවධානයෙන් සිටින ලෙස ජාතික ගොඩනැගිලි පර්යේෂණ සංවිධානය විසින් අනතුරු අගවා ඇත.

විශේෂයෙන්ම නායයාම් අවදානම් ප්‍රදේශවල ජීවත්වන ජනතාව ඒ පිළිබදව සැළකිලිමත් විය යුතුය. පොළවේ ඇතිවන ඉරිතැලීම්, ගැඹුරට හෑරුණු පැලුම් හා පොළවේ ගිලා බැසීම්, ක්‍රමයෙන් ඇලවී යන ගස්, විදුලි කණු, වාටවල්, හා දුරකථන කුලුණු ආදිය, ගොඩනැගිලිවල ගෙබිම හා බිත්ති මත ඇතිවන පිපිිරුම් හා ඒවායේ ක්‍රමික වර්ධනය වීම, එක්වර ජල උල්පත්මතුවීම හෝ පෙරපැවති උල්පත් බොරවීම අවහිරවීම හෝ නැතිවීම වැනි නායයාම් පුර්ව ලක්ෂණ නිරීක්ෂණය වේ නම් එම ස්ථානවලින් හැකි ඉක්මනින් ඉවත්වීමට කටයුතු කරන මෙන් ආපදා කළමනාකරණ මධ්‍යස්ථානය ජනතාවට දැනුම් දේ.

පවතින කොවිඩ් වසංගත අවදානම හේතුවෙන් ගංවතුර තත්වයක් ඇති වුවහොත් එම තත්වය පාලනය කරගනිමින් ජීවිත සහ දේපළ ආරක්ෂා කර ගැනීම කටයුතු කරන ලෙස ආපාදා කළමනාකරණ මධ්‍යස්ථානය ජනතාවගෙන් ඉල්ලා සිටී,

විශේෂයෙන්ම සෞඛ්‍ය අමාත්‍යාංශය විසින් ලබාදී ඇති උපදෙස් අනුගමනය කරමින් කටයුතු කිරීමට අවශ්‍ය නිසා ඔබ ජීවත්වන නිවස ගංවතුර අවධානයට ලක්වන තෙක් නොසිට සුරක්ෂිත මධ්‍යස්ථාන කරා යාම ඉතා වැදගත් වේ. එසේම පාසැල් සිසුන්ගේ පොත් පත් ලිපි ද්‍රව්‍ය ගංවරතුරෙන් සුරක්ෂිත කර ගැනීමට කටයුතු කිරීමත් පවතින තත්වය හමුවේ ඇතිවිය හැති අවදානම් තත්වය පිලිබද නිරන්තරයෙන් ජනතාවගේ අවධානය යොමු කරන ලෙසත් ආපදා කළමනාකරණ මධ්‍යස්ථානය ජනතාවගෙන් ඉල්ලා සිටී.

පවතින කාලගුණ තත්වය හේතුවෙන් ඇතිවිය හැකි ආපදා පිළිබදව දැනගැනීම සදහා ආපදා කළමනාකරණ මධ්‍යස්ථානයේ 117 දුරකථන අංකයෙන් විමසන ලෙස තවදුරටත් ජනතාවට දැනුම් දේ.

කාලගුණ විද්‍යා දෙපාර්තමේන්තුව විසින් අද (16) දින උදෑසන 05.30 ට නිකුත් කරන ලද නවතම කාලගුණ අනාවැකිය.

ගිනිකොණ දිග බෙංගාල බොක්ක මුහුදු ප්‍රදේශය ආශ්‍රිතව පවතින අඩු පීඩන තත්ත්වය එම ප්‍රදේශයේදීම පීඩන අවපාතයක් දක්වා වර්ධනය විය හැකි අතර එය අද දිනයේදීම දකුණු බෙංගාල බොක්ක මුහුදු ප්‍රදේශය තුලදී සුළි කුණාටුවක් දක්වා තවදුරටත් වර්ධනයවෙමින් වයඹ දෙසට ගමන් කිරීමට බොහෝ දුරට ඉඩ ඇත.

එහි බලපෑම හේතුවෙන් දිවයිනේ විශේෂයෙන්ම නිරිතදිග කොටසේ පවතින වැසි තත්ත්වය තව දුරටත් බලාපොරොත්තුවේ. ඇතැම් ස්ථාන වලට මි.මී.150 ට වැඩි තද වර්ෂාපතනයන් ද ඇති විය හැක.

දිවයින හරහා සුළගේ වේගය විටින් විට පැ.කි.මී. (40-50) දක්වා වැඩි විය හැක.

දකුණ, බස්නාහිර, සබරගමුව සහ මධ්‍යම පළාත් වලවැසි හෝ ගිගුරුම් සහිත වැසි ඇති විය හැකි අතර ඇතැම් ස්ථාන වලට 150mm ඉක්මවූ තද වැසිද ඇති විය හැක.

සෙසු පළාත් වල විශේෂයෙන් ඌව සහ නැගෙනහිර පළාත් වල සවස් කාලයේදී හෝ රාත්‍රී කාලයේදීවැසි හෝ ගිගුරුම් සහිත වැසි ඇති වේ.

ගිගුරුම් සහිත වැසි ඇති වන විට අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

මුහුදු ප්‍රදේශ ආශ්‍රිත කාලගුණ අනාවැකිය

ගිනිකොණ දිග බෙංගාල බොක්ක මුහුදු ප්‍රදේශය ආශ්‍රිතව පවතින අඩු පීඩන තත්ත්වය එම ප්‍රදේශයේදීම පීඩන අවපාතයක් දක්වා වර්ධනය විය හැකි අතර එය අද දිනයේදීම දකුණු බෙංගාල බොක්ක මුහුදු ප්‍රදේශය තුලදී සුළි කුණාටුවක් දක්වා තවදුරටත් වර්ධනය වෙමින් වයඹ දෙසට ගමන් කිරීමට බොහෝ දුරට ඉඩ ඇත.ධීවර හා නාවුක කටයුතු වල යෙදෙන්නන් මේ සම්බන්දයෙන් නිකුත් කරන ඉදිරි නිවේදන පිලිබඳ   අවධානයෙන් කටයුතු කරන ලෙස කාරුණිකව ඉල්ලා සිටිනු ලැබේ.

වැසි තත්ත්වය:

දිවයින වටා වන මුහුදු ප්‍රදේශවල විටින් විට වැසි හෝ ගිගුරුම්සහිතවැසි ඇති වේ.පොතුවිල් සිට ත්‍රිකුණාමලය හරහා මුලතිව් දක්වාවනමුහුදු ප්‍රදේශවල ඇතැම් ස්ථානවල තද වැසිද ඇතිවිය හැක.

සුළඟ:

දිවයින වටා වන මුහුදු ප්‍රදේශවල සුළං නිරිත සිට බස්නාහිරදක්වා වන දිශා වලින් හමයි. සුළගේ වේගය පැ.කි.මී. (40-45) පමණ වේ. කොළඹ   සිට ගාල්ලසහ හම්බන්තොට හරහාපොතුවිල් දක්වා වනමුහුදු ප්‍රදේශවල සුළගේ වේගයවිටින් විට පැ.කි.මී. (55-60) දක්වා වැඩි විය හැක.

මුහුදේ ස්වභාවය:

දිවයින වටා වන මුහුදු ප්‍රදේශතරමක් රළුවිය හැකි අතර කොළඹ   සිට ගාල්ලසහ හම්බන්තොට හරහා   පොතුවිල් දක්වා වන මුහුදු ප්‍රදේශ විටින් විටරළු සිට ඉතා රළුවේ.ගිගුරුම් සහිත වැසි ඇති වන විට එම මුහුදු ප්‍රදේශවල (පැ.කි.මී. 70-80 දක්වා) තාවකාලිකව තද සුළං ඇති විය හැකි අතර එවිට එම මුහුදු ප්‍රදේශ තාවකාලිකව   ඉතා රළු විය හැක.ධීවර සහ නාවුක ප්‍රජාව මේ පිලිබදව අවධානයෙන් කටයුතු කරන ලෙස ඉල්ලා සිටිනු ලැබේ.

ශ්‍රී ලංකා මහ බැංකුව දෛනිකව නිකුත් කරන විනිමය අනුපාතිකවලට අනුව අද (15) ඇමෙරිකානු ඩොලරයක ගැනුම් මිල රුපියල් 184.89ක් ලෙස සහ විකුණුම් මිල 189.99ක් ලෙසත් සටහන් වූ අතර එය මාස එකහමාරකට පසු රුපියල ශක්තිමත් වූ අවස්ථාව වශයෙන් සැලකේ.

ඇමෙරිකානු ඩොලරයක විකුණුම් මිල 190 සීමාවෙන් මෙපිටට පැමිණියේ මාර්තු 20 වැනිදායින් පසුව වන අතර කොවිඩ්-19’ ගෝලීය වසංගතය හේතුවෙන් ඇමෙරිකා එක්සත් ජනපද ඩොලරයට සාපේක්ෂව රුපියලේ අගය ඉකුත් අප්‍රේල් 8 වැනිදා 200 සීමාව ද ඉක්මවා ගියේ ය.

ජනවාරි පළමු  වැනිදා සිට මැයි 6 වැනිදා දක්වා කාලයේදී ඇමෙරිකානු ඩොලරයට සාපේක්ෂව ශ්‍රී ලංකා රුපියල  3.9 % කින් අවප්‍රමාණය වී ඇති බවයි ශ්‍රී ලංකා මහ බැංකුවේ වාර්තාවල සදහන් වන්නේ.

කාලගුණ විද්‍යා දෙපාර්තමේන්තුව විසින් 2020 මැයි මස 15 දින මධ්‍යහන 12.00 ට නිකුත් කරන ලදි.

ගිනිකොණ දිග බෙංගාල බොක්ක මුහුදු ප්‍රදේශයේ   සහ දකුණු අන්දමන් මුහුද ආශ්‍රිතව වායුගෝලයේ අඩුපීඩන තත්ත්වයතවදුරටත් පවතී. එම පද්ධතිය වයඹ දෙසට ගමන් කරමින්   තවදුරටත් වර්ධනය වීමේ හැකියාව පවතී. එහි බලපෑම හේතුවෙන් අද දින සිට ඉදිරි දින කිහිපයේදී විශේෂයෙන්ම දිවයිනේ නිරිතදිග කොටසේ වැසි තත්ත්වයේ වැඩිවීමක් බලාපොරොත්තුවේ. ඇතැම් ස්ථාන වලට මි.මී.150 ට වැඩි තද වර්ෂාපතනයන් ද ඇති විය හැක. දිවයින හරහා සුළගේ වේගය විටින් විට පැ.කි.මී. (40-50) දක්වා වැඩි විය හැක.

හෙට දිනයේදී:

දකුණ, බස්නාහිර, සබරගමුව සහ මධ්‍යම පළාත් වලවැසි හෝ ගිගුරුම් සහිත වැසි ඇති වේ. සෙසු පළාත් වල විශේෂයෙන් ඌවසහනැගෙනහිර පළාත් වල සවස් කාලයේදී හෝ රාත්‍රී කාලයේදීවැසි හෝ ගිගුරුම් සහිත වැසි ඇති වේ. ගිගුරුම් සහිත වැසි ඇති වන විට අකුණු මඟින් සහ තාවකාලික තද සුළං මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

ඉදිරි පැය 24ට දිවයින වටා වන මුහුදු ප්‍රදේශ සඳහා කාලගුණ අනාවැකි

ගිනිකොණ දිග බෙංගාල බොක්ක මුහුදු ප්‍රදේශයේ  සහ දකුණු අන්දමන් මුහුද ආශ්‍රිතව වායුගෝලයේ අඩුපීඩන තත්ත්වයතවදුරටත් පවතී. එම පද්ධතිය වයඹ දෙසට ගමන් කරමින්තවදුරටත් වර්ධනය වීමේ හැකියාව ඇත. ධීවර හා නාවුක කටයුතු වල යෙදෙන්නන් මේ සම්බන්දයෙන් නිකුත් කරන ඉදිරි නිවේදන පිලිබඳ අවධානයෙන් කටයුතු කරන ලෙස කාරුණිකව ඉල්ලා සිටිනු ලැබේ.

වැසි තත්ත්වය:

දිවයින වටා වන මුහුදු ප්‍රදේශවල විටින් විට වැසි හෝ ගිගුරුම්සහිතවැසි ඇති වේ.පුත්තලම සිට කොළඹ, ගාල්ල සහ හම්බන්තොට හරහා මඩකලපුව දක්වාවනමුහුදු ප්‍රදේශවල ඇතැම් ස්ථානවල තද වැසිද ඇතිවිය හැක.

සුළඟ:

දිවයින වටා වන මුහුදු ප්‍රදේශවල සුළං නිරිතදෙසින් හමයි. සුළගේ වේගය පැ.කි.මී. (40-45) පමණ වේ. කොළඹ   සිට ගාල්ලසහ හම්බන්තොට හරහාපොතුවිල් දක්වා වනමුහුදු ප්‍රදේශවල සුළගේ වේගයවිටින් විට පැ.කි.මී. (55-60) දක්වා වැඩි විය හැක.

මුහුදේ ස්වභාවය:

දිවයින වටා වන මුහුදු ප්‍රදේශතරමක් රළුවිය හැකි අතර කොළඹ සිට ගාල්ලසහ හම්බන්තොට හරහා   පොතුවිල් දක්වා වන මුහුදු ප්‍රදේශ විටින් විටරළු සිට ඉතා රළුවේ. ගිගුරුම් සහිත වැසි ඇති වන විට එම මුහුදු ප්‍රදේශවල (පැ.කි.මී. 70-80 දක්වා) තාවකාලිකව තද සුළං ඇති විය හැකි අතර එවිට එම මුහුදු ප්‍රදේශ තාවකාලිකව ඉතා රළු විය හැක. ධීවර සහ නාවුක ප්‍රජාව මේ පිලිබදව අවධානයෙන් කටයුතු කරන ලෙස ඉල්ලා සිටිනු ලැබේ.

බටහිර බෑවුමේ ගංවතුර අවධානමක්

දිවයිනේ පළාත් කිහිපයකට ඇද හැළුණු තද වැසි හේතුවෙන් ගංගා 10ක් ආශ‍්‍රිතව ගං වතුර අවදානමක් මතු වී ඇතැයි වාරිමාර්ග දෙපාර්තමේන්තුව පවසයි. කැලණි, කළු, නිල්වලා, ගිං, බෙන්තර යන ගංගා සහ මී, අත්තනගලූ, දැදුරු, කිරම, ඌරු බොකු ආදී ඔයවල්වල ජල මට්ටම ඉහළයමින් පවතින අතර ඒ ආශ‍්‍රිත පහත්බිම්වල ජනතාව නිරන්තර අවදානයෙන් පසුවිය යුතු බව වාරිමාර්ග අධ්‍යක්‍ෂ (ජල විද්‍යා හා ආපදා කළමනාකරණ) ඉංජිනේරු එස්.පී.සී සුගීෂ්වර මහතා පැවසීය.

ප්‍රදේශ රැසක නාය අවදානම්

පවතින තද වැසි හේතුවෙන් ගාල්ල සහ මාතලේ දිස්ත‍්‍රික්කවල නායයෑමේ අවදානමක් මතුව ඇතැයි ජාතික ගොඩනැගිලි පර්යේෂණ සංවිධානය පවසයි.

ගාල්ල දිස්ත‍්‍රික්කයේ බද්දේගම, ගාල්ල, කඩවත් සතර, අක්මීමන, ඇල්පිටිය, නියාගම සහ බෝපේ පෝද්දල යන ප‍්‍රාදේශීය ලේකම් කොට්ඨාසයන්හි සහ මාතලේ දිස්ත‍්‍රික්කයේ උකුවෙල ප‍්‍රාදේශීය ලේකම් කොට්ඨාසයේ මෙම අවදානම මතුව තිබෙන බව එම ආයතනය පවසන්නේ.

ඉහත සදහන් ප‍්‍රාදේශීය ලේකම් කොට්ඨාසයන්හි කදු හා බෑවුම් ආශ‍්‍රිතව ජීවත්වන්නන් මේ සම්බන්ධයෙන් දැඩි අවධානයකින් පසුවිය යුතු බවත්, රතු නිවේදන නිකුත් කර ඇති ස්ථානයන්හි පදිංචි ජනතාව ආරක්‍ෂිත ස්ථාන කරා යා යුතු බවත් ජාතික ගොඩනැගිලි පර්යේෂණ සංවිධානය වැඩි දුරටත් සදහන් කරයි.