මහජනතාව වැඩි වශයෙන් ඒකරාශී වන පොදු රැස්වීම්, උද්ඝෝෂණ වැනි ක්රියාකාරකම් හේතුවෙන් කොවිඩ් පැතිරයෑමේ අවදානමක් ඇති බැවින් නැවත දැනුම්දෙන තුරු එවැනි උද්ඝෝෂණ හා මහජන ඒකරාශීවීම් සිදුනොකළ යුතු බව සෞඛ්ය සේවා අධ්යක්ෂ ජනරාල්වරයා දැනුම් දී ඇතැයි පොලිස් මූලස්ථානය අද (05) දින නිකුත් කළ නිවේදනයක සදහන් වේ.
පොලිස්පතිවරයා වෙත ලිපියක් යොමුකරමින් සෞඛ්ය සේවා අධ්යක්ෂ ජනරාල්වරයා විසින් මෙම ඉල්ලීම කර ඇතැයි ද එම නිරෝධායන නියෝගවලට අදාළව මින් ඉදිරියට පොලීසිය ක්රියාකරනු ඇති බව ද එම නිවේදනයේ වැඩි දුරටත් සදහන් වේ.
අවම වශයෙන් පාසල් ආරම්භ වන තුරුවත් ළමුන් අසභ්ය වෙබ් අඩවිවලට පිවිසීම අවහිර කළ හැකි වැඩපිළිවෙළක් සකස් කරන ලෙස කොළඹ අතිරේක මහෛ්ස්ත්රාත් ලෝචනී අබේවික්රම මහත්මිය අපරාධ පරීක්ෂණ දෙපාර්තමේන්තුවට හා පොලිස් කාන්තා හා ළමා කාර්යාංශයේ නිලධාරීන්ගෙන් ඉල්ලා සිටියාය.
වර්තමානයේ පාසල් වසාදමා ඇති පසුබිමක අධ්යාපන කටයුතු අන්තර්ජාලය හරහා සිදුවන හෙයින් දරුවන්ට පහසුවෙන්ම අසභ්ය වෙබ් අඩවි කරා පිවිසීමට හැකියාව තිබෙන බව ද අබේවික්රම මහත්මිය සඳහන් කළාය.
මහේස්ත්රාත්වරියගේ ඉල්ලීමට ප්රතිචාර දක්වමින් අපරාධ පරීක්ෂණ දෙපාර්තමේන්තුව හා ළමා කාර්යාංශයේ නිලධාරීන් අධිකරණය හමුවේ සඳහන් කළේ මේ පිළිබඳව විදුලි සංදේශ නියාමන කොමිසම සමග සාකච්ඡා කර සුදුසු වැඩපිළිවෙලක් සැකසීමට පියවර ගන්නා බවයි.
15 වියැති බාලවයස්කාර දැරියක් ලිංගික කටයුතු සඳහා අන්තර්ජාලය ඔස්සේ අලෙවි කිරීමේ සිද්ධියට අදාළව අත්අඩංගුවට ගත් සැකකරුවන් අද (05) කොළඹ මහේස්ත්රාත් අධිකරණය වෙත ඉදිරිපත් කර අවස්ථාවේදී මහෙස්ත්රාත්වරිය ඒ බව පෙන්වා දුන්නාය.
ජංගම දුරකථන හෝ පරිගණක ළමුන් අතට පත්වීම වැළැක්විය නොහැකි බවද පෙන්වා දුන් මහේස්ත්රාත්වරිය වැඩිදුරටත් පෙන්වා දුන්නේ දෙමව්පියන් රාජකාරී සඳහා නිවසින් බැහැරව සිටින අවස්ථාවේ දරුවන් අධ්යාපන කටයුතු සඳහා මෙම උපකරණ පරිහරණය කරන බවත් මෙවැනි අවස්ථාවක දරුවන්ට පහසුවෙන්ම අසභ්ය වෙබ් අඩවි කරා පිවිසීමට හැකියාව තිබෙන බවයි.
බාලවයස්කාර දැරියක් ගණිකා වෘත්තියේ යෙදවීම සඳහා දැන්වීම් පළ කළේ යැයි සැකපිට අත්අඩංගුවට ගන්නා ලද වෙබ් අඩවියක හිමිකරුට හා මූල්ය කළමනාකරුට ඇප ලබාදීම ප්රතික්ෂේප කළ මහේස්ත්රාත්වරිය සැකකරුවන්ට එල්ලවී තිබෙන චෝදනාවේ බරපතළ භාවය සහ ඔවුන් ඇප මත මුදා හරිනු ලැබූවොත් මතුවිය හැකි මහජන කැළඹීම සැලකිල්ලට ගෙන ඔවුන්ගේ ඇප ඉල්ලීම ප්රතික්ෂේප කරන බව ද කීවාය. ඒ අනුව සැකකරුවන් විමර්ශන කටයුතු අවසන් වනතුරු රක්ෂිත බන්ධනාගාරගත කරන ලෙසත් නියෝග කළාය.
එමෙන්ම බාල වයස්කාර දැරියක් පිළිබඳව අන්තර්ජාලය ඔස්සේ දැන්වීම් පළ කර ගණිකා වෘත්තිය සඳහා යෙදවූ බව කියන සිද්ධියට අදාළව රක්ෂිත බන්ධනාගාර ගතකර ඇති එම දැරියගේ මව ඇප මත මුදාහරින ලෙස ඇයගේ නීතිඥවරු විසින් කරන ලද ඉල්ලීම ද මහේස්ත්රාත්වරිය ප්රතික්ෂේප කළාය.
‘ෆයිසර් එන්නත ලබා ගත් දකුණු ආසියාවේ පළමු රට ශ්රී ලංකාව‘ යනුවෙන් අද (05) දින ගෝඨාභය රාජපක්ෂ මහතාගේ නිල ට්විටර් ගිනුමේ පණිවුඩයක සදහන් වූ පුවත ‘සාවද්ය‘ බව ඩේලි මිරර් පුවත් පත වාර්තා කරයි.
එම වාර්තාවේ මෙසේ සදහන් වේ. ‘ජනාධිපති ගෝඨාභය රාජපක්ෂගේ නිල ට්විටර් ගිණුමේ ට්විටර් පණිවුඩයක සඳහන් වන පරිදි දකුණු ආසියාවේ ෆයිසර් එන්නත ලබාගත් පළමු රට ශ්රී ලංකාව නොවේ. යුනිසෙෆ් සංවිධානයට අනුව මාලදිවයිනේ මහජනතාවට ලබා දුන් COVAX පහසුකම හරහා මාර්තු 25 වන දින මාලදිවයිනට ෆයිසර් එන්නත මාත්රා 5,850 ක් ලැබුණි. මෙමඟින් දකුණු ආසියාවේ ෆයිසර් ලබාගත් පළමු රට මාලදිවයින බවට පත්වේ. මැයි 31 වන දින දකුණු ආසියාවේ ෆයිසර් එන්නත ලබාගත් දෙවන රට බවට බංග්ලාදේශය පත්විය. ෆයිසර් ලබාගත් දකුණු ආසියාවේ තුන්වන රට ශ්රී ලංකාවයි. ජනාධිපතිවරයාගේ නිල ට්විටර් ගිණුමට නිකුත් කළ ට්වීට් එක මඳ වේලාවකට පෙර මකා දමා ඇත. (ජමිලා හුසේන්)
කොවිඩ්-19 ව්යාප්තිය පාලනය කිරීමේ පියවරක් ලෙස පළාත් අතර පනවා තිබූ අන්තර් පළාත් සංචරණ සීමා 05 වැනි දින සිට තවත් සති දෙකක කාලයකට, එනම් ජූලි 19 වැනි දින දක්වා දීර්ඝ කිරීමට තීරණය කළ බව කොවිඩ් 19 පැතිරීම වැළැක්වීමේ ජාතික ක්රියාන්විත මධ්යස්ථානයේ ප්රධානී යුද හමුදාපති ජෙනරාල් ශවේන්ද්ර සිල්වා මහතා පවසයි.
දිවයින පුරා ක්රියාත්මක කෙරෙන සෞඛ්ය නීති සමාලෝචනයට ලක් කරමින් නව සෞඛ්ය මාර්ගෝපදේශ සංග්රහයක් සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන මහතා විසින් ඊයේ(4) නිකුත් කරන ලද අතර සෞඛ්ය සේවා අධ්යක්ෂ ජනරාල්වරයා විසින් නිකුත් කරන ලද නවතම සෞඛ්ය මාර්ගෝපදේශ සංග්රහය සම්පූර්ණයෙන් පහත පළ වේ.
විදේශ සංචිත පහළ බැසීමට කෙටි කාලීන පියවරක් ලෙස චීනය, ඉන්දියාව සහ බංග්ලාදේශයෙන් ඇමෙරිකානු ඩොලර් මිලියන 2150ක් ලබා ගැනීමට රජය සැලසුම් කර ඇතැයි මහ බැංකු මූලාශ්ර උපුටා දක්වමින් මාධ්ය වාර්තා කරයි.
ඒ අනුව ඉන්දියාවෙන් ඇමෙරිකානු ඩොලර් මිලියන 400ක්, බංගලාදේශයෙන් ඩොලර් මිලියන 250ක් සහ චීනයෙන් ඩොලර් මිලියන 1500ක් ලබා ගැනීමට නියමිතය.
ඉන්දියාවෙන් හා බංගලාදේශයෙන් ලබා ගැනෙන ඩොලර් මිලියන 650ක ණය ‘මුදල මුදල් හුවමාරු පහසුකම් යටතේ ලබා ගැනීමට නියමිතය.
ඉන්දිය ණය මුදල මාස නවයකින් ගෙවීමේ පදනම යටතේ අදියර දෙකකින් ද, බංගලාදේශයෙන් ලබා ගන්නා ණය මුදල අදියර තුනකින් ද ලබාගැනීමට නියමිත අතර චීනයෙන් ලබා ගන්නා ණය ‘දිගු කාලීන‘ ණය පදනමින් ලබා ගැනීමට නියමිත බවයි වාර්තා වන්නේ.
මේ සම්බන්ධයෙන් අප කළ විමසීමට පිළිතුරු දෙමින් ආර්ථික හා දේශපාලන විශ්ලේෂක ආචාර්ය ඉන්ද්රජිත් හේවාවිතාරණ මහතා සදහන් කළේ ශ්රී ලංකා මහ බැංකුව සතු විදේශ විනිමය සංචිතය ප්රමාණවත් වන්නේ මාස තුනක ආනයන සදහා පමණක් බව පසුගිය දා රජය විසින් ප්රකාශ කළ බවයි.
‘‘ මහ බැංකුව සතුව තිබෙන්නේ ඇමරිකානු ඩොලර් බිලියන 4.2ක් පමණයි. මේ මාසයේදීත් ඩොලර් මිලියන 1000ක කල් පිරුණු විදේශ ණය මුදලක් ගෙවීමට නියමිතව තිබෙනවා. මේ තත්ත්වය තුළ රට බරපතළ විදේශ විනිමය අර්බුදයකට යාම වළක්වා ගන්න බැහැ. ඊට කෙටි කාලීන පියවරක් ලෙස පසුගිය දා මෙරට සේවය කරන විදේශිකයින්ට තම ආදායම් මවුරටට යැවීමට සීමා පැනවීමට මහ බැංකුව පියවර ගත්තා. ඒත් එය කිසිසේත් ප්රමාණවත් නැහැ. විදේශ විනිමය සංචිත වලට සැලකිය යුතු තරමේ විදේශ විනිමය ගලා ඒමක් ඉතිරි කාලය තුළ අපේක්ෂා කළ නොහැකි බව පැහැදිලියි. මේ සමග විදේශ විනිමය ණය ආපසු ගෙවීමට ඇති බැවින් ඉදිරි කාලය තුළ විදේශ විනිමය සංචිතය තවදුරටත් පහත වැටෙනු ඇති බව පැහැදිලියි. ඊට මුහුණ දීමට රජයට පහසු වෙන එකක් නැති බවයි මගේ විශ්වාසය වන්නේ‘‘ යැයි ආචාර්ය ඉන්ද්රජිත් හේවාවිතාරණ සදහන් කළේය.
කොළඹ, ගාල්ල, මාතර සහ ත්රිකුණාමලය යන දිස්ත්රික්කවලින් ඩෙල්ටා ප්රභේදය ආසාදනය වූ තවත් පුද්ගලයන් 14 දෙනෙකු සොයාගෙන ඇතැයි සෞඛ්ය අංශ වාර්තාවල සදහන් වේ.
මෙම ආසාදිතයන් 14 දෙනා හමුවී ඇත්තේ දිවයින පුරා කොරෝනා රෝගීන්ගෙන් අහඹු ලෙස ලබා ගත් ජෛව පටල සාම්පල එකසිය 142ක් පරික්ෂා කිරීමේදීය. ශ්රී ජයවර්ධනපුර විශ්ව විද්යාලයේ වෛද්ය පීඨයේ ආසාත්මිකතා ප්රතිශක්ති වේද හා සෛල ජෛව විද්යා අධ්යයන අංශයේ ප්රධානී ආචාර්ය චන්දිම ජීවන්දර මහතා ඇතුළු පර්යේෂක කණ්ඩායමක් විසින් මේ පිළිබඳව පරීක්ෂණ පවත්වන ලදී .
කොළඹ දිස්ත්රික්කයේ කොළඹ නගර සභා ප්රදේශය, කොළොන්නාව සහ අංගොඩ යන ප්රදේශවලින් ආසාදිතයන් මෙලෙස හමුවී ඇති බවයි වාර්තා වන්නේ.
වඩාත්ම සම්ප්රේෂණය කළ හැකි කොරෝනා වෛරස් ප්රභේදය වන ‘ඩෙල්ටා ප්රභේදය‘ (Delta variant) එන්නත් ලබා ගෙන නැති හෝ එක් එන්නත් මාත්රාවක් පමණක් ලබා ඇති පුද්ගලයින්ට විශාල තර්ජනයක් බව ශ්රී ජයවර්ධනපුර විශ්ව විද්යාලයේ අසාත්මිකතා, ප්රතිශක්තිකරණ හා සෛල ජීව විද්යා ඒකකයේ අධ්යක්ෂ වෛද්ය චන්දිම ජීවන්දර මහතා පැවසීය.
ට්වීටර් පණිවුඩයක් නිකුත් කරමින් ජීවන්දර මහතා අවධාරණය කළේ ‘‘සැලකිය යුතු ප්රතිශතයක් සම්පූර්ණයෙන්ම එන්නත ලබා ගන්නා තෙක් පූර්ණ සෞඛ්ය ආරක්ෂිත පිළිවෙත් අනුගමනය කිරීම අතිෂයින් වැදගත්‘‘ බවයි.
“ශ්රී ලංකාව තවමත් කැලෑවෙන් පිටත නැත. මේ අනුව, සෞඛ්ය මාර්ගෝපදේශ හා පිළිවෙත් දැඩි ලෙස අනුගමනය කිරීම වැදගත් ය. තර්ජනය තවම අවසන් නැත, ”ඔහු පැවසීය.
සේවා අවශ්යතා මත වහාම ක්රියාත්මක වන පරිදි පොලිස් මාධ්ය ප්රකාශක අජිත් රෝහණ ඇතුළු ජ්යෙෂ්ඨ නියෝජ්ය පොලිස්පතිවරුන් හත් දෙනෙකු සහ නියෝජ්ය පොලිස්පතිවරයකු මාරු කර යවා තිබේ.
කොවිඩ් වසංගත තත්ත්වය හේතුවෙන් තාවකාලිකව අත්හිටුවා තිබූ පුද්ගලයන් ලියාපදිංචි කිරීමේ දෙපාර්තුමෙන්තුවේ මහජන සේවාවන් නැවතත් අංක හා දින වෙන් කර ගත් සීමිත පිරිසක් සඳහා පමණක් ජූලි 05 වැනිදා සිට විවෘත කිරීමට පුද්ගලයන් ලියාපදිංචි කිරීමේ දෙපාර්තුමේන්තුව තීරණය කළ බව එම දෙපාර්තමේන්තුව විසින් අද (02) දින නිකුත් කළ නිවේදනයක සදහන් වේ.
මේ වන විට පුද්ගලයින් ලියාපදිංචි කිරීමේ දෙපාර්තමේන්තුව වෙත ඉල්ලුම්පත් යොමුකරන ලද ඉල්ලුම්කරුවන්ට ජාතික හැඳුනුම්පත් රටෙහි පවත්නා කොරෝනා වසංගත තත්ත්වය හමුවේ වුවද කඩිනමින් සකස් කර ලියාපදිංචි තැපෑලෙන් යොමු කළ බව ද එම දෙපාර්තමේන්තුව සඳහන් කරයි.
ඒ අනුව මෙතෙක් හැඳුනුම්පත නොලැබුණු ඉල්ලුම්කරුවන්ට දිනයක් හා අංකයක් වෙන්කර දෙපාර්තමේන්තුව වෙත පැමිණ තම ජාතික හැඳුනුම්පත ලබාගැනීමට අවස්ථාව සලසා තිබේ. ජාතික හැඳුනුම්පත් නිකුත් කිරීමේ එක්දින සේවාව තවදුරටත් ක්රියාත්මක නොවේ.
හැඳුනුම්පත් ලබාගැනීමට අපේක්ෂා කරන පුද්ගලයින් ඔවුන්ට අදාළ කොට්ඨාසයේ ග්රාම නිලධාරීන් මඟින් නිසි ලෙස සම්පූර්ණ කරන ලද අයදුම්පත් අදාළ ප්රාදේශීය ලේකම් කාර්යාලයේ හැඳුනුම්පත් අංශය වෙත භාර දී ඉහත ක්රමයවේදයම අනුගමන කරමින් හැඳුනුම්පත ලබාගැනීමට හැකිය.
එසේ හැඳුනුම්පත් ලබාගැනීමට බලාපොරොත්තු වන අය බත්තරමුල්ල ප්රධාන කාර්යාලයට හෝ දකුණු පළාත් කාර්යාලයට පැමිණීමට අපේක්ෂා කරන ඉල්ලුම්කරුවන් දෙපාර්තමේන්තුව වෙත පැමිණීමට පෙර සතියේ වැඩකරන දිනයන්හි දී ප්රාදේශීය ලේකම් කාර්යාලයේ හැඳුනුම්පත් අංශයට යොමු වී හෝ පහත සඳහන් දුරකථන අංක මඟින් දිනයක් හා අංකයක් වෙන්කරවා ගැනීම අනිවාර්ය වේ.
වයස අවුරුදු 30ට වැඩි බස්නාහිර පළාතේ සියලු දෙනාට ජූලි 31ට පෙර එන්නත ලබාදී අවසන් කරන්නැයි ජනාධිපති ගෝඨාභය රාජපක්ෂ මහතා සෞඛ්ය අංශ වෙත දැනුම් දෙයි. මේ වන විට කොළඹ දිස්ත්රික්කයේ මෙම වයස් කාණ්ඩයේ 60%කටත්, ගම්පහ 47%කට සහ කළුතර 34%කට පළමු මාත්රාව ලබා දී තිබේ.
ඇණවුම් සම්පූර්ණ කර ඇති එන්නත් ලැබීමත් සමඟ විධිමත් සැලැස්මක් යටතේ, සැප්තැම්බර් මසට පෙර දිවයිනේ සියලු ප්රදේශවල ඉහළ ප්රතිශතයකට එන්නත ලබාදීමේ අවශ්යතාව ද ජනාධිපතිවරයා අවධාරණය කළේය.
එන්නත්කරණය සහ ඉදිරි මෙහෙයුම් සම්බන්ධයෙන් කොවිඩ් මර්ධන විශේෂ කමිටුව සමඟ අද (02) පෙරවරුවේ ජනාධිපති කාර්යාලයේ පැවති හමුවේදී ජනාධිපති විසින් මෙම උපදෙස් දෙනු ලැබිණ.
දෙවන මාත්රාව සඳහා අවශ්ය “ඇස්ට්රාසෙනිකා” එන්නත් ප්රමාණය ඉක්මණින් ලැබෙනු ඇතැයි ජනාධිපතිතුමා විශ්වාසය පළ කළේය. ඒ අනුව ඇස්ට්රාසෙනිකා එන්නත ලබාගෙන ඇති සියලු දෙනාට එහි දෙවන මාත්රාව විධිමත් ආකාරයෙන් ලබාදීමට සැලසුම් කරන්නැයි ද ජනාධිපතිවරයා සෞඛ්ය නිලධාරීන්ට උපදෙස් දුන්නේය.
ඇස්ට්රාසෙනිකා එන්නත ලබාගත් අයෙකුට සති 45ක් යනතෙක් එහි දෙවන මාත්රාව ලබාගැනීමේ හැකියාව ලෝක සෞඛ්ය සංවිධානය නිර්දේශ කර ඇතැයි, කොවිඩ් මර්ධන විශේෂ කමිටුවේ සාමාජික විශේෂඥ වෛද්ය, ප්රසන්න ගුණසේන මහතා විසින් පෙන්වා දෙනු ලැබිණ.
පසුගිය සඳුදා සිට රෝහල් තුළදී එන්නත්කරණය ඇරැඹීමත් සමඟ ඉතා කෙටි කාලයකදී විශාල පිරිසකට කොවිඩ් එන්නත ලබාදීමට හැකිවී තිබේ. දිවයින පුරා එම ක්රමවේදය අඛණ්ඩව ක්රියාත්මක කිරීමට ද පියවර ගෙන ඇත.
ඩෙල්ටා ප්රභේදය රටේ බොහෝ ප්රදේශවලට ව්යාප්ත වී ඇති බවට මහජන සෞඛ්ය පරීක්ෂකවරුන්ගේ සංගමය කළ ප්රකාශයට ප්රතිචාර දක්වමින් සෞඛ්ය සේවා නියෝජ්ය අධ්යක්ෂ ජනරාල් වෛද්ය හේමන්ත හේරත් මහතා පැවසුවේ ඩෙල්ටා ප්රභේදය රට තුළ ව්යාප්ත වී ඇති නමුත් මහජන සෞඛ්ය පරීක්ෂකවරුන්ගේ සංගමය විසින් ප්රකාශ කරන පරිදි ඩෙල්ටා ප්රභේදය රටේ බොහෝ ප්රදේශවලට ව්යාප්ත වී ඇති බවට දැනට කිසිදු සාක්ෂියක් නොමැති බවයි.
“මාරාන්තික ප්රභේදය ප්රජාව අතර ව්යාප්ත වී ඇත්දැයි සොයා බැලීම සඳහා සෞඛ්ය අමාත්යාංශය සෑම දිස්ත්රික්කයක්ම ආවරණය වන පරිදි PCR පරීක්ෂණ පවත්වයි. අපි මේ තත්වය සැහැල්ලුවට ගන්නේ නැහැ. ජයවර්ධනපුර විශ්ව විද්යාලය මේ පිළිබඳව ජානමය අනුපිළිවෙලක් සිදු කරමින් සිටින අතර ප්රතිඵල ළඟදීම නිකුත් වනු ඇත”
මේ අතර, මේ වන විට රට තුළ COVID-19 රෝගීන්ගේ පහත වැටීමේ ප්රවණතාවක් පවතින බව වෛද්ය හේරත් මහතා පැවසීය.
“ක්රියාකාරී අවස්ථා වලදී මෙම පහත වැටීමේ ප්රවණතාව පවත්වා ගැනීමට සෞඛ්ය අමාත්යාංශයට හැකි බව අපගේ අදහසයි. කෙසේ වෙතත්, එය රඳා පවතින්නේ මිනිසුන් හැසිරෙන ආකාරය සහ නැගී එන COVID පොකුරු ඇතිවීමේ හැකියාව මත’ බවයි සෞඛ්ය සේවා නියෝජ්ය අධ්යක්ෂ ජනරාල් වෛද්ය හේමන්ත හේරත් මහතා පැවසුවේ.
රාජ්ය සේවා එක්සත් හෙද සංගමය ඉදිරිපත් කළ ඉල්ලීම් හතෙන් පහකට එසැණ විසඳුම් ලබාදීමට ජනාධිපති ගෝඨාභය රාජපක්ෂ මහතා පියවර ගනී. ඉතිරි ඉල්ලීම් දෙකට අදාළ විසඳුම් මීළඟ අය වැයෙන් ලබාදීමට ද ජනාධිපතිවරයා එකඟතාව පළ කළේය.
රාජ්ය සේවා එක්සත් හෙද සංගමය සමඟ අද (02) පස්වරුවේ ජනාධිපති කාර්යාලයේ පැවති විශේෂ සාකච්ඡාවේදී ජනාධිපතිවරයා මෙම තීරණවලට එළැඹිණ.
01. හෙද සරසවිය ආරම්භ කිරීම.
02. යහපාලන රජය සමයේ 2017.12.07 හා 32/2017 මගින් අත්හිටුවා ඇති මාණ්ඩලික තත්ත්වය නැවත ලබාදීම.
03. අත්හිටුවා ඇති iii ශ්රේණියෙන් ii ශ්රේණියට උසස් වීම වසර පහක් ලෙස හා ii ශ්රේණියෙන් i ශ්රේණියට වසර හතෙන් උසස් කිරීම.
04. රුපියල් විසිදහසක වාර්ෂික නිල ඇඳුම් දීමනාව ලබාදීම.
05. දැනට පැය 36ක්ව පවතින රාජකාරී කාලය සතියකට දින පහක (පැය 30ක) කාලයක් ලෙස සැලකීම විශේෂ කමිටුවක අධ්යයනයට යොමු කිරීම.
යන කරුණු 5 වහාම ක්රියාත්මක කිරීමට ජනාධිපතිවරයා තීරණය කළේය.
රුපියල් දස දහසේ දීමනාව සහ 2014.12.24 දින මුදල් අමාත්යාංශය චක්රලේඛයක් මඟින් සඳහන් කර ඇති මූලික වැටුපෙන් 1/100 අමතර සේවා දීමනාව ලබන අය වැයෙන් ලබාදීමටත් ජනාධිපති විසින් එකඟතාව පළ කෙරිණ.
ඒ අනුව රාජ්ය සේවා එක්සත් හෙද සංගමය ඉදිරිපත් කළ යෝජනා සියල්ලට ජනාධිපතිගේ විසඳුම් ලැබිණ.
රජය සෞඛ්ය අංශය කෙරෙහි දැඩි විශ්වාසයෙන් පසුවන අතර හෙද සේවාවට ඉහළ පිළිගැනීමක් ලබාදෙන බවත් හෙද වෘත්තිකයන්ට නිසි තැන ලබා දෙන බව ද ජනාධිපතිවරයා අවධාරණය කළේය.
රාජ්ය සේවා එක්සත් හෙද සංගමයේ සභාපති පූජ්ය මුරුත්තෙට්ටුවේ ආනන්ද හිමි, සෞඛ්ය අමාත්ය පවිත්රා වන්නිආරච්චි, ජනාධිපති ප්රධාන උපදේශක ලලිත් වීරතුංග, සෞඛ්ය ලේකම් (විශ්රාමික) මේජර් ජෙනරාල් විශේෂඥ වෛද්ය සංජීව මුණසිංහ, සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන යන මහත්ම මහත්මීහු සහ රාජ්ය සේවා එක්සත් හෙද සංගමයේ නියෝජිතයෝ මේ අවස්ථාවට එක්ව සිටියහ.
කොවිඩ් 19ට එරෙහිව එන්නත ලබා ගැනීමේදී පළමු මාත්රාව එක් වර්ගයකිනුත් සහ දෙවන මාත්රාව තවත් වර්ගයකිනුත් ලබා ගැනීම සුදුසුද? ශ්රී ලංකාවේ පමණක් නොව, එන්නත් හිඟ වී ඇති බොහෝ රටවල ජනතාව මේ දිනවල ඉහත කී ප්රශ්නයට අවධානය යොමු කර ඇත.
මේ පිළිබඳව එක්සත් රාජධානියේ සිදු කරන ලද අලුත්ම පර්යේෂණයක ප්රතිඵල දැන් නිකුත් වී තිබේ. මෙම පර්යේෂණය සඳහා යොදාගෙන ඇත්තේ AstraZeneca එන්නත සහ Pfizer එන්නතයි. එන්නත් මාත්රා දෙක එකිනෙකට වෙනස් වර්ග දෙකින් ලබා දීමෙන් කොවිඩ් 19ට එරෙහිව වඩා හොඳ ආරක්ෂාවක් සපයන බව එම පර්යේෂණයෙන් ඔප්පු වී තිබේ. Com-Cov නමැති මෙම පර්යේෂණය සිදු කර ඇත්තේ මෙසේය.
පර්යේෂණය සඳහා කාණ්ඩ තුනකට අයත් පිරිස සහභාගී කරගෙන ඇත. එක් කණ්ඩායමකට මාත්රා දෙකම ලබා දුන්නේ Pfizer එන්නතය. දෙවන කණ්ඩායමට මාත්රා දෙකම ලබා දී ඇත්තේ AstraZeneca එන්නතයි. තුන්වැනි කණ්ඩායමට අයත් පිරිසට පළමු මාත්රාව මින් එක් වර්ගයකින් සහ දෙවන මාත්රාව අනෙක් වර්ගයෙන් ලබා දී තිබේ. මේ සියලු දෙනාගේම කොවිඩ් ප්රතිශක්තිය හොඳින් වර්ධනය වී තිබේ.
මෙම පර්යේෂණ ප්රතිඵල මගින් ඇඟවෙන තවත් කරුණක් වන්නේ මාත්රා දෙකම එකම වර්ගයකින් ලබාගත් උදවියට පවා පසුකාලීනව කොවිඩ් ප්රතිශක්තිය තවදුරටත් වර්ධනය කර ගැනීමට අවශ්ය නම් (booster) මෙම වර්ග දෙකෙන් කුමන වර්ගයක් හෝ භාවිත කළ හැකි වීමය.
මෙම පර්යේෂණයේ ප්රතිඵලය පිළිබඳව අදහස් දක්වමින් එක්සත් රාජධානියේ ප්රධාන වෛද්ය නිලධාරී, මහාචාර්ය ජොනතන් වැන්-ටැම් කියා සිටියේ එන්නත් ලබා ගැනීමට අපහසු වී තිබෙන රටවල්වලට මෙය සුභ ආරංචියක් වනු ඇති බවය.
ඇතැම් රටවල් දැනටමත් එන්නත් වර්ග දෙකක් භාවිත කරමින් පළමු සහ දෙවන මාත්රාව ලබා දීම සිදු කරමින් පවතී. ස්පාඤ්ඤයේ සහ ජර්මනියේ, පළමු මාත්රාව ලෙස ඇස්ට්රාසෙනෙකා එන්නත ලබාගත් තරුණ ප්රජාවට දෙවන මාත්රාව වශයෙන් Pfizer හෝ Moderna එන්නත ලබා දෙනු ලැබේ.
එම රටවල් දෙක මෙම පියවර ගත්තේ මෙම පර්යේෂණ වාර්තාව නිකුත් වීමට පෙරය. ඊට හේතු වූයේ AstraZeneca එන්නත මගින් සිරුරේ ලේ කැටි ගැසීමේ තත්ත්වයක් ඇති වීමට අවදානමක් පවතින බව වාර්තා වීමය. නමුත් එය ඉතා කලාතුරකින් ඇතිවිය හැක්කක් බව විශේෂඥයෝ පෙන්වා දුන්හ.
කොවිඩ් 19ට එරෙහිව සටන් කර එම වෛරසය මරා දැමීම සඳහා ශරීරය පුහුණු කිරීමටත් සිරුරට පූර්ණ කොවිඩ් ආරක්ෂාවක් ලබා දීමටත් එන්නත් මාත්රා දෙකක් ලබා දීම ඉතා වැදගත්ය. ඉහත කී Com-Cov අධ්යයනය සඳහා වයස අවුරුදු 50 සහ ඊට වැඩි 850 දෙනෙකු සහභාගී විය. ඔවුන් මේ සඳහා ස්වේච්ඡාවෙන් ඉදිරිපත් වී තිබේ. මොවුනට දෙවන මාත්රාව ලබා දී ඇත්තේ පළමු මාත්රාව ලබා දී සති හතරකට පසුවය.
එන්නත් මාත්රා දෙකම AstraZeneca ලබා දුන් පිරිසට වඩා දෙවන මාත්රාව සඳහා Pfizer ලබා දුන් පිරිසගේ සිරුරු තුළ වැඩි ප්රතිදේහ ප්රමාණයක් ප්රේරණය කර ඇති බව මෙම අධ්යයනයෙන් සනාථ වී තිබේ.
කෙසේ වෙතත් මාත්රා දෙකම සඳහා AstraZeneca භාවිත කිරීම මෙම අධ්යයනය නිසා පීඩාවට පත් නොවන බව එම අධ්යයනයේ ප්රධාන පර්යේෂක, ඔක්ස්ෆර්ඩ් විශ්වවිද්යාලයේ මහාචාර්ය මැතිව් ස්නේප් පැවසීය.
“සති 08ත් 12ත් අතර කාල පරතරයක් සහිතව මාත්රා දෙකම එකම වර්ගයෙන් ලබා දුන්නත්, ආසාදිතයන් රෝහල්ගත වීම සහ කොවිඩ් රෝගයෙන් අසාධ්යවීම මෙම එන්නත් දෙවර්ගයම නිසා අඩුවෙලා තියෙනවා. එමෙන්ම ඩෙල්ටා ප්රභේදයට එරෙහිවත් මෙම එන්නත් දෙකම වැඩ කරනවා.” ඔහු ප්රකාශ කළේය.
එන්නත් මාත්රා දෙක වර්ග දෙකකින් ලබා දෙන්නේනම් සති හතරක කාල පරතරයක් සහිතව ලබා දුන්න ද එය ඵලදායී වන බව ඉහත කී නව අධ්යයනයෙන් සනාථ වී ඇතැයි මහාචාර්යවරයා පැවසීය.
“නමුත් වැඩි කාල පරතරයක් සහිතව එන්නත් මාත්රා දෙක ලබා දුන් විට වඩා හොඳ ප්රතිශක්තියක් ලැබෙන බව පෙනී ගොස් තිබෙනවා.” ඔහු තවදුරටත් පැවසීය.
මේ අතරතුර තවත් අධ්යයනයක ප්රතිඵල සඳුදා (ජුනි 28) නිකුත් විය. ඉන් පෙනී යන්නේ දෙවන මාත්රාව ලබා දී මාස හයකට වඩා වැඩි කාලයකට පසුව තුන්වැනි AstraZeneca මාත්රාවක් ලබා දීමෙන් ප්රතිශක්තිය තව දුරටත් වර්ධනය වන බවය.
නමුත් තුන්වැනි මාත්රාවක් අවශ්ය වේදැයි තීරණය කිරීම සඳහා තවම ඉක්මන් වැඩි බව විශේෂඥයෝ පවසති. කොවිඩ් 19ට එරෙහි ප්රතිශක්තිය කාලයත් සමඟ කෙතරම් ප්රමාණයකින් හීන වන්නේදැයි තවමත් පැහැදිලි නැත.
බී.බී.සී වාර්තාවක සම්පූර්ණ උපුටා ගැනීමකි – ප්රධාන සංස්කාරක
‘හොඳම ප්රතිපත්ති පිළිබඳ ඔස්කාර් සම්මානය’ලෙස හැඳින්වෙන 2021 අනාගත ප්රතිපත්ති සදහා වූ සම්මානය (Policies from Sri Lanka receive Future Policy Award 2021 on protection from hazardous chemicals) මෙවර ශ්රී ලංකාවට හිමිව තිබේ. ශ්රී ලංකාවේ 1980 අංක 33 දරන පළිබෝධනාශක පාලනය කිරීමේ පනත සහ 1997 සියදිවි නසාගැනීම් වැළැක්වීමේ ජාතික ප්රතිපත්ති හා ක්රියාකාරී සැලැස්ම, මෙම සම්මානය දිනා ගැනීමට හේතු වී තිබේ.
මිනිස් සෞඛ්යයට හා පරිසරයට රසායනික ද්රව්යවලට නිරාවරණය වීමෙන් ඇතිවන අහිතකර බලපෑම් අවම කරන වඩාත් ඵලදායී ප්රතිපත්ති මෙම සම්මාන ප්රදානයේදී සැලකිල්ලට ගෙන තිබේ. ලොව මෙතෙක් අත්කර ගෙන ඇති සියදිවි නසාගැනීම් අනුපාතයෙහි විශාලතම අඩුවීමට ශ්රී ලංකාවේ ඉහත සඳහන් ප්රතිපත්ති දෙක හේතු වී තිබේ.එමඟින් වසර 20 ක් තුළ එක් ජීවිතයක් සඳහා සෘජු රජයේ වියදම ඇමරිකානු ඩොලර් 50 ටත් අඩු මුදලකට ජීවිත 93,000 ක් පමණ බේරාගෙන ඇත.
ලෝක අනාගත කවුන්සිලය විසින් ප්රදානය කරනු ලබන මෙම ත්යාගය, මෙම වසරේ දී එක්සත් ජාතීන්ගේ පරිසර වැඩසටහන (UNEP), ජාත්යන්තර රසායනික කළමනාකරණය සඳහා උපායමාර්ගික ප්රවේශය (SAICM), ජාත්යන්තර කම්කරු සංවිධානය (ILO), ආර්ථික සහයෝගීතාව සහ සංවර්ධනය සඳහා වූ සංවිධානය (OECD), එක්සත් ජාතීන්ගේ පුහුණු හා පර්යේෂණ ආයතනය (UNITAR) සහ එක්සත් ජාතීන්ගේ සංවර්ධන වැඩසටහන (UNDP) සමඟ හවුල්කාරිත්වයෙන් යුතුව, මයිකල් ඔටෝ පදනමේ සහ ජුවා පදනමේ ද සහාය ඇතිව සංවිධානය කරනු ලැබේ.
“වර්තමාන හා අනාගත පරම්පරාවන් වෙනුවෙන්, පාර්ශවකරුවන් විසින් අන්තරායකර රසායනික ද්රව්යවලින් ආරක්ෂා වීම ප්රමුඛතාවයක් බවට පත් කිරීම අතිශයින්ම වැදගත්ය. ශ්රී ලංකාව සහ අනෙකුත් ජයග්රාහී ප්රතිපත්ති ඉදිරි මාවත පෙන්වන අතර, එය ලොව පුරා ප්රතිපත්ති සම්පාදකයින් ප්රබෝධමත් කරවයි.” යැයි ලෝක අනාගත කවුන්සිලයේ (WFC) අධ්යක්ෂ ඇලෙක්සැන්ඩ්රා වැන්ඩෙල් මහත්මිය පවසයි.
මෙම සම්මානය සඳහා ශ්රී ලාංකික ප්රතිපත්ති නම් කිරීම සහ ශ්රී ලංකාවට ජාත්යන්තර පිළිගැනීමක් ලබා ගැනීමට ඔහු දැරූ සියලු ප්රයත්න පිළිබඳව මහ කොමසාරිස් කාර්යාලය ස්කොට්ලන්තයේ ශ්රී ලංකා නිර්වේතනික කොන්සල් මහාචාර්ය මයිකල් එඩ්ල්ස්ටන් මහතාට ප්රශංසා කරයි.
2021 අනාගත ප්රතිපත්ති සම්මාන උළෙලේ ජයග්රාහී ප්රතිපත්ති 2021 ජූලි 6 වැනි දින පැවැත්වෙන ඉහළ මට්ටමේ අතථ්ය සම්මාන ප්රදාන උළෙලක දී සමරනු ලැබේ. මෙම සම්මාන ප්රදාන උළෙලට සහභාගී වීමට සහ 2021 අනාගත ප්රතිපත්ති සම්මානය සඳහා වන ජයග්රාහී ප්රතිපත්ති පිළිබඳ වැඩිදුර තොරතුරු දැන ගැනීම පිණිස, www.worldfuturecouncil.org/chemicals වෙත පිවිසෙන්න.
කාබනික පොහොර භාවිතයට ගත් පියවර කිසිවිටෙකත් පසුපසට නොගන්නා ලෙස දිවයින පුරා ලක්ෂ 11ක්වූ ගොවීන් වෙනුවෙන් දිස්ත්රික් ගොවි නියෝජිතයෝ, ජනාධිපති ගෝඨාභය රාජපක්ෂ මහතාගෙන් ඉල්ලා සිටිති.
පැරණි වගා ක්රමවලට නැවත යොමුවී වස විසෙන් තොර ආහාර වේලක් ජනතාවට ලබාදීම තමන්ගේ ද පරම යුතුකම සහ වගකීම බව ගොවි නියෝජිතයන් විසින් පෙන්වා දෙනු ලැබිණ. එම නිසා නිරෝගිමත් අනාගත පරපුරක් වෙනුවෙන් ජනාධිපතිතුමා තැබූ පියවරට ගොවි ජනතාවගේ ප්රණාමය හිමි වන බව ඔවුහු කියා සිටිති. යුද්ධය අවසන් කළාක් මෙන් සමස්ත රටවැසියා වෙනුවෙන් සියලු ගොවීන් එක් කණ්ඩායමක් යටතේ කාබනික පොහොර අභියෝගය ජය ගැනීම සඳහා ජනාධිපතිවරයාට සහාය වන බව ගොවි නියෝජිතයෝ සහතික වූහ.
අද (01) පෙරවරුවේ ජනාධිපති කාර්යාලයේ පැවති ශ්රී ලංකා ජාතික ගොවි සංවිධාන බල මණ්ඩල දිස්ත්රික් ගොවි නියෝජිත හමුවේදී ඔවුන් මේ බව පැවසූහ. ගොවීන් ලක්ෂ 11ක්, ගොවි සංවිධාන 17000ක් සහ ගොවිජන සේවා මධ්යස්ථාන 563කින් මෙම බල මණ්ඩලය සකස් වී තිබේ.කාබනික පොහොර භාවිතයට යොමු වීමෙන් පසු රජය ක්රියාත්මක කිරීමට අපේක්ෂිත වැඩපිළිවෙළ පිළිබඳ ජනාධිපතිවරයා විසින් ගොවි නියෝජිතයන් දැනුවත් කරනු ලැබිණ.
මෙය හදිසියේ ගත් තීරණයක් නොව; තමා ජනාධිපති අපේක්ෂකයා ලෙස “සෞභාග්යයේ දැක්ම” ප්රතිපත්ති ප්රකාශයෙන් දුන් පොරොන්දුවක් ක්රියාත්මක කිරීම බව රාජපක්ෂ මහතා පෙන්වා දුන්නේය. මීට පෙර අවස්ථා ගණනාවකදී පැවති ආණ්ඩු, කාබනික පොහොර වගාවට යොමුවීමට උත්සාහ කර තිබේ. එහෙත් ඒවා අසාර්ථක වීමට වූ හේතු මැනවින් අධ්යයනය කර නව වැඩපිළිවෙළ ක්රියාත්මක කරන බව ජනාධිපතිවරයා පැවසීය.
ඇතැම් පිරිස් මෙය ආපස්සට යන ගමනක් ලෙස පෙන්වා දීමට උත්සාහ දරති. එහෙත් සමස්ත ලෝකයේම නව ප්රවණතාවයක් ලෙස ගැනෙන, කාබනික පොහොර භාවිතයට යොමුව, කෘෂි ආර්ථිකයේ නව මාවතකට රට ගෙනයන බව ජනාධිපතිවරයා අවධාරණය කළේය. වැඩපිළිවෙළට එරෙහිව කතා කරන බොහෝ දෙනෙක් වැඩි මිලක් ගෙවා කාබනික පොහොර යෙදු එළවළු, පළතුරු භාවිතා කරති. එහෙත් රසායනික පොහොර භාවිතයෙන් පීඩා විඳින ගොවීන් පිළිබඳව ඔවුන්ගේ අවධානය යොමු නොවේ.
පසුගිය වසර පහ තුළ වගා කටයුතු බොහෝ දුරට අඩපණ කෙරිණ. වත්මන් ආණ්ඩුවේ ප්රතිපත්තිය කෘෂිකර්මාන්තය නඟාසිටුවීමයි. වී කිලෝවකට රුපියල් 30ක්ව පැවති මිල රුපියල් 50ක් දක්වා වැඩි කිරීම ගොවි ජනතාව දිරිමත් කිරීමට ගත් පියවරකි. පසුව ගොවීන්ට තම වී අස්වනු කිලෝව රුපියල් 65 සහ 68 අතර මුදලකට විකිණීමට හැකි විය. එහිදී පාරිභෝගිකයා ආරක්ෂා කර ගැනීමට රජය මැදිහත් වී සහල් මිල පාලනය කරනු ලැබිණ.
බෝ නොවන රෝගවලින් අනාගත පරපුර බේරා ගනිමින් වාර්ෂිකව රසායනික පොහොර ආනයනයට වැය කෙරෙන රුපියල් මිලියන අසූදහසක (80,000)මුදල මෙරට අහිංසක ගොවි ජනතාවගේ අතට ලැබීමට සලස්වන බව ජනාධිපතිවරයා සඳහන් කළේය.
වැඩපිළිවෙළ අඛණ්ඩව සහ සාර්ථකව ක්රියාත්මක කිරීමට වල්නාශක, කෘමිනාශක ඇතුළු කාබනික පොහොර අවශ්ය ප්රමාණය, රසායනික පොහොර ලබාදුන් ආකාරයටම ගොවීන්ට ලැබීමට සලස්වන බව ජනාධිපතිවරයා පැවසීය. එමෙන්ම පොහොර අවශ්යතාව මෙරටදීම නිෂ්පාදනයට දේශීය ව්යවසායකයන්ට හා ව්යාපාරිකයන්ට අවස්ථාව හිමි වේ. ගොවින්ටද තමන්ට අවශ්ය කාබනික පොහොර නිෂ්පාදනය කර ගත හැකිය. ඒ සඳහා වැයවන මුදල ලබාදීමට රජය සැලසුම් කර ඇත.
ගොවීන් මෙතෙක් ලබාගත් ආදායම අඩුවීමට ඉඩ නොතබන අතර ආදායම අඩුවුවහොත් එම ප්රමාණය රජය මඟින් ලබාදී, ගොවියාට අපහසුතාවට පත්වීමට ඉඩ නොතබන බව ජනාධිපතිවරයා සහතික විය.
පසුගිය ආණ්ඩුව සමයේ ඇණහිටි “ගොවි රක්ෂණය” අද සිට යළි ක්රියාත්මක කරමින් “ගොවි රක්ෂණ සැකැස්ම” අමාත්ය මහින්දානන්ද අළුත්ගමගේ මහතා විසින් ජනාධිපතිවරයා වෙත භාරදෙනු ලැබිණ.
“ගොවි විශ්රාම වැටුප” ඉහළ නැංවීමට රජයේ අවධානය යොමු කර ඇති බවද මහින්දානන්ද අළුත්ගමගේ මහතා අනාවරණය කළේය. වී ගබඩා 105ක් අලුතින් ඉදිකිරීමට, ගොවි බැංකුවලට මූල්ය ප්රතිපාදන සැපයීමට සහ කෘෂිකර්ම දත්ත පද්ධතිය කඩිනමින් යාවත්කාලීන කිරීමට කඩිනම් පියවර ගන්නා බවද අලුත්ගමගේ මහතා පැවසීය.
වැව්, අමුණු, ඇළවේලි ප්රතිසංස්කරණය කිරීමේ ගිවිසුම්වලට එළඹීමේදී, මෙතෙක් ගොවි සංවිධානවලට ලක්ෂ 20කට සීමාවී තිබූ කොන්ත්රාත් මුදල ලක්ෂ 100ක් දක්වා ඉහළ නැංවීමටත් ජනාධිපතිතුමාගේ අනුමැතිය හිමි විය. ආර්ථික මධ්යස්ථානවල අලෙවි කටයුතු සඳහා සෘජුව ගොවීන්ට මැදිහත්වීමේ අවකාශය පුළුල් කිරීමටත් තීරණය කෙරිණ.
රාජ්ය අමාත්ය ශෂීන්ද්ර රාජපක්ෂ, මොහාන් ද සිල්වා, සීතා අරඹේපොළ, ජනාධිපති ලේකම් පී.බී. ජයසුන්දර යන මහත්ම මහත්මීහු සහ අමාත්යාංශ ලේකම්වරු ඇතුළු රාජ්ය නිලධාරීහු මේ අවස්ථාවට එක්ව සිටියහ.
සේවකයන් ඉවත් කිරීම වෙනුවට ඔවුන් රැකගනිමින් මෙම වසංගත තත්ත්වය හමුවේ මුහුණ පා ඇති අභියෝගවලට මුහුණ දෙන්නැයි අග්රාමාත්ය මහින්ද රාජපක්ෂ මහතා ඊයේ (30) දින සියලුම කර්මාන්තකරුවන් සහ ව්යාපාරික ප්රජාවගෙන් ඉල්ලා සිටියේය.
ශ්රී ලංකා ඇඟළුම් සන්නාම සංගමය (SLABA) හා ශ්රී ලංකා සිල්ලර වෙළඳුන්ගේ සංගමය (SLRA) මුහුණ පා ඇති ගැටලු සම්බන්ධයෙන් වූ සාකච්ඡාවක් අරලියගහ මන්දිරයේ දී පැවති අවස්ථාවේ අග්රාමාත්යවරයා මේ බව සඳහන් කළේය.
බැංකු ණය සහන ලබා ගැනීම, ණයවර ලිපි විවෘත කිරීමේ දී ඇති ගැටලු විසඳා ගැනීම, ඇඟළුම් සේවකයන් සඳහා එන්නත්කරණය, කොවිඩ් මාර්ගෝපදේශ වලට අනුව නිමි ඇඳුම් වෙළඳසැල් විවෘත කිරීමට අවසර ලබා ගැනීම, සේවක අර්ථසාධක අරමුදල් සහ සේවා නියුක්තයන්ගේ භාර අරමුදල් ගැටලු සම්බන්ධයෙන් පැමිණ සිටි නියෝජිතයෝ අදහස් දැක්වූහ.
බතික් අත්යන්ත්ර රෙදි හා දේශීය ඇඟළුම් නිෂ්පාදන කාර්යය වෙනුවෙන් වෙනම අමාත්යංශයක් හඳුන්වාදීම සම්බන්ධව ශ්රී ලංකා ඇඟළුම් සන්නාම සංගමයේ සභාපති ලලන්ත වතුදුර මහතා මෙහි දී අග්රාමාත්යවරයාට සිය සංගමයේ ප්රණාමය පිරිනැමුවේය.
පාස්කු ඉරුදින ත්රස්ත ප්රහාරය සහ කොවිඩ්-19 ගෝලීය වසංගතය හේතුවෙන් දැනට මාස 24කට ආසන්න කාලයක් සිය ව්යාපාර කටයුතු අඩපණ වී ඇතැයි පෙන්වා දුන් මෙම නියෝජිත පිරිස ව්යාපාර හා වෙළඳාම් පවත්වාගැනීම සඳහා මුදල් අමාත්යංශය ඔස්සේ හදිසි සහන ලබා දෙන්නැයි අග්රාමාත්යවරයාගෙන් ඉල්ලා සිටියහ.