Category: සුපිරි News

පාසල් යළි විවෘත කිරීමට පෙර අනිවාර්යයෙන්ම ගුරුවරුන්ට හා අධ්‍යාපන කාර්ය මණ්ඩලයට Covid-19 මර්දන එන්නත් ලබාදිය යුතු බව අධ්‍යාපන අමාත්‍යාංශ ලේකම් මහාචාර්ය කපිල පෙරේරා මහතා කියනවා.

කොවිඩ් 19 වයිරසය පාලනය වී ඇති ප්‍රදේශවල පාසල් යළි විවෘත කරන්නැයි විවිධ අංශවලින් ඉල්ලීම් ගලා එන බව කී අධ්‍යාපන අමාත්‍යාංශ ලේකම්වරයා සෞඛ්‍ය නිර්දේශ ලැබුණු විගස පාසල් යළි විවෘත කිරීමට අවශ්‍ය කටයුතු යොදන බවද සදහන් කළා.

‘‘කෙසේ වෙතත් පාසල් යළි විවෘත කළ යුත්තේ සෞඛ්‍යාරක්ෂිත ක්‍රමවේදයකට අනුවයි. ඒ අනුව පාසල් යළි විවෘත කළ හැකි ආකාරය සම්බන්ධයෙන් මේ දිනවල අපි අදාළ අංශ සමග සාකච්ඡා කරමින් සිටිනවා ‘‘ යැයි ද ඔහු සදහන් කළා.

සංචරණ සීමා කාලයේ දී බොහෝ පිරිස් සිය නිවෙස්වලම මත්පැන් පෙරීමට පටන් ගැනීම නිසා රජයට දීර්ඝ කාලීනව බදු ආදායම් අහිමිව යෑමේ අවදානමක් මතුව තිබෙන බවත් මේ කරුණු සැලකිල්ලට ගෙන සුපිරි වෙළෙඳසල් හරහා ඔන් ලයින් ක්‍රමයට මත්පැන් සැපයීමට මුදල් අමාත්‍යාංශයෙන් අවසර ඉල්ලූ බවත් සුරාබදු කොමසාරිස් (නීති) කපිල කුමාරසිංහ මහතා පැවසීය.

සුපිරි වෙළඳ සල් හරහා ඔන්ලයින් ක්‍රමයට මත්පැන් මිලදී ගැනීමට අවස්ථාව සලසා දෙන්නැයි විවිධ පාර්ශවවලින් ඉල්ලීම් ලැබී ඇති බවත් ඒ අනුව ඊට අදාළ නිර්දේශ හා නිරීක්ෂණ මුදල් අමාත්‍යාංශයට දැනටමත් ඉදිරිපත් කර ඇති බවත් ඔහු වැඩි දුරටත් සදහන් කළේය.

මුදල් අමාත්‍යාංශයෙන් ඒ සඳහා කොන්දේසි සහිත අවසරයක් ලැබෙනු ඇතැයිද කුමාරසිංහ මහතා සඳහන් කළේය.

සුරාබදු දෙපාර්තමේන්තුව විසින් ඉදිරිපත් කර ඇති මෙම යෝජනාවට මේ වන විට සමාජමාධ්‍ය තුළ දැඩි විරෝධයක් මෙන්ම හාස්‍ය ජනක ප්‍රතිචාර පළ වෙමින් තිබෙන අතර බොහෝ දෙනෙක් සදහන් කරන්නේ වත්මන් ආණ්ඩුව තමන් බලයට පත් කළ සිංහල බෞද්ධ බලවේගවලට පිටුපා විනාශකාරී ගමනක් යන බවයි.

ජූනි 13 වැනි දින සිදුවී ඇති බවට සෞඛ්‍ය සේවා අධ්‍යක්ෂ ජනරාල්වරයා විසින් අද (14) තහවුරු කළ කොවිඩ් -19 ආසාදිතයින්ගේ මරණ ගණන 57ක් බව රජයේ ප්‍රවෘත්ති දෙපාර්තමේන්තුව විසින් නිකුත් කළ මාධ්‍ය නිවේදනයක සදහන් වෙනවා.

මියගිය අය අතර කාන්තාවන් 25ක් සහ පිරිමින් 32ක් සිටින අතර වසය අවුරුදු 30ට අඩු එක් පුරුෂයෙක්, අවුරුදු 31-59 අතර කාන්තාවන් 5ක් සහ පුරුෂයින් 6ක්, වයස අවුරුදු 60ට වැඩි කාන්තාවන් 20ක් සහ පිරිමින් 25 දෙනෙක් මිය ගිය අතර සිටිනවා.

මරණකරුවන් වාර්තා වූ ප්‍ර දේශය සහ මරණවලට හේතු මෙම මාධ්‍ය නිවේදනයේ දක්වා නොතිබීම විශේෂත්වයක්.

මේ අතර අද (14) දින අලුතින් වාර්තා වූ කොවිඩ් ආසාදිතයින්ගේ වාර්තාව ද රජයේ ප්‍රවෘත්ති දෙපාර්තමේන්තුව විසින් නිකුත් කළා. ඒ අනුව අද දින අලුතින් ආසාදිතයින් 2259 දෙනක් වාර්තා වී තිබෙනවා.

කොළඹ වරාය ආසන්න මුහුදු තීරයේ එක්ස්ප්‍රස් පර්ල් නෞකාව ගිනි ගැනීමේ සිද්ධිය සම්බන්ධයෙන් අත්අඩංගුවට ගනු ලැබූ එම නෞකාවේ කපිතාන්වරයා රුපියල් මිලියන දෙකක පෞද්ගලික බැඳුම්කරයක් මත මුදා හරින ලෙස කොළඹ මහාධිකරණ විනිසුරු දමිත් තොටවත්ත අද (ජුනි 14) නියම කළේය.

අපරාධ පරීක්ෂණ දෙපාර්තමේන්තුව විසින් සඳුදා (ජූනි 14) අත්අඩංගුවට ගනු ලැබූ අදාළ නෞකාවේ කපිතාන්වරයා වන රුසියානු ජාතික ටියුට්කාලෝ විටැලි නමැත්තා මහාධිකරණය හමුවට ඉදිරිපත් කර තිබුණි.

දෙපාර්ශවය විසින් ඉදිරිපත් කරන ලද කරුණු පරීක්ෂා කළ කොළඹ මහාධිකරණ විනිසුරු දමිත් තොටවත්ත අදාළ සැකකාර කපිතාන්වරයා රුපියල් මිලියන දෙකක පුද්ගලික බැඳුම්කරයක් මත මුදාහැරීමට නියෝග කළ අතර ඔහුගේ විදේශ ගමන් තහනම් කරමින් නියෝගයක් ද නිකුත් කළේය.

එම නියෝගය දිවයිනේ සියලුම ගුවන්තොටුපළ හා වරාය මෙන්ම ආගමන විගමන පාලකවරයා වෙත ද දැනුම් දිය යුතු යැයි නියෝග කළ මහාධිකරණ විනිසුරුවරයා කපිතාන්වරයාගේ විදේශ ගමන් බලපත්‍රය අධිකරණයට භාර දිය යුතු බවට ද නියෝග කළේය.

යම් හෙයකින් පදිංචිය වෙනස් කරන්නේ නම් ඒ පිළිබඳව අධිකරණය දැනුවත් කිරීමට පියවර ගන්නා ලෙසද සැකකරුට අවවාද කෙරිණි.

මෙම පැමිණිල්ල කැඳවූ අවස්ථාවේදී විමර්ශන සිදුකරන අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි නියෝජ්‍ය සොලිස්ටර් ජනරාල් මාධව තෙන්නකෝන් අධිකරණය හමුවේ කරුණු දක්වමින්, අදාළ නෞකාවේ රසායනික ද්‍රව්‍ය කාන්දුවක් තිබෙන බව දනිමින් එය වසන් කොට කපිතාන්වරයා ඇතුළු කාර්ය මණ්ඩලය මෙරට ජල තීරය තුළට පිවිස ඇතැයි චෝදනා කළේය.

ගින්න නිසා මෙරටට ගණනය කළ නොහැකි පාරිසරික මෙන්ම ආර්ථික පාඩුවක් සිදු වී ඇති බව සඳහන් කළ නියෝජ්‍ය සොලිසිටර් ජනරාල්වරයා මෙම ගින්න හේතුවෙන් සිදු වූ පාරිසරික හානිය පිළිබඳව අධ්‍යනය කිරීම සඳහා සමුද්‍රීය දූෂණ වැලැක්වීමේ අධිකාරිය විසින් විශේෂඥයින්ගෙන් යුත් කමිටුවක් පත් කරන ලද බවද පැවසීය.

එම විශේෂඥයින් නිකුත් කළ අතුරු වාර්තාවකට අනුව අදාළ ගින්න හේතුවෙන් ඇතිවූ පාරිසරික හානිය නිසා සමුද්‍ර ජීවීන්ට දිගු කාලීන, මධ්‍ය කාලීන හා දිගු කාලීන බලපෑම් ඇතිවිය හැකි බව කරුණු දක්වා ඇතැයි පැවසීය.

මෙම නෞකාව ගිනි ගැනීම හේතුවෙන් අදාළ මුහුදු ප්‍රදේශය හරහා වෙනත් නෞකාවකට පිවිසීමට නොහැකි තත්ත්වයක් උද්ගත වී තිබෙන බව පෙන්වා දුන් නියෝජ්‍ය සොලිස්ටර් ජනරාල්වරයා මෙරටට බොරතෙල් රැගෙන එන නෞකාවන්ට මුහුදේ සිට ගොඩබිමට එම තෙල් පොම්ප කිරීමට තිබෙන අවකාශය ඇහිරී ගොස් ඇතැයි ද පෙන්වා දුන්නේය.

සැකකාර නැව් කපිතාන්වරයා වෙනුවෙන් පෙනී සිටි ජනාධිපති නීතිඥ සරත් ජයමාන්න මහතා කරුණු ඉදිරිපත් කරමින් මුලින්ම නැවේ දුමාරය පටන්ගත් අවස්ථාවේදී නැවට ගොඩවූ නාවික හමුදාවේ සහ වරාය ආධිකාරියේ නිලධාරීන් එම ගින්න නිවාදැමීමට කටයුතු නොකළේ මන්දැයි ප‍්‍රශ්න කළේය.

තම සේවාදායකයා පැදවූ නැව කොළඹ වරායට ඒමට නියමිතව තිබූ දිනට වඩා දින දෙකක පමණ කාලයක් ප‍්‍රමාද වූ බවත් මුහුදේ ඇතිවී තිබූ කුණාටු තත්වය ඊට හේතු වූ බවත් දැනුම් දුන් සරත් ජයමාන්න මහතා මුලින්ම නැවේ බහලූම් අතරින් දුමක් නඟින අයුරු නිරීක්‍ෂණය කළ තම සේවාදායකයා සහ ඔහු යටතේ සේවය කළ නිලධාරීන් ඒ බව වරාය ආධිකාරියට, නැව අයිති සමාගම ඇතුළු සියලූම පාර්ශවයන්ට ඒ අවස්ථාවේදීම දැනුම්දී ඇතැයි කීය.

ඒ අනුව එදින සවස 4.30 ට පමණ නාවික හමුදාවේ සහ වරාය අධිකාරියේ නිලධාරීන් පිරිසක් නැවට පැමිණියේය යැයි කීය. එලෙස පැමිණි ඔවුන් පැය එකහමාරක පමණ කාලයක් නැවේ ගතකළ බවත් දුමාරය පිළිබඳ පරීක්‍ෂා කළ ඔවුන් ඒ බව ‘හාබමාස්ටර්වරයාට’ ඒ බව දැනුම් දෙන්නම් කියා පිටව ගිය බවත් කී ජනාධිපති නීතිඥ සරත් ජයමාන්න මහතා එදින රාත‍්‍රීයේ නැවේ දුමාරය වැඩිවීමට පටන්ගත් විට මේ පිළිබ`දව තව සේවාදායකයා හා ඔහු යටතේ සිටි නිලධාරීන් ‘හාබමාස්ටර්වරයාට’ ඇතුළු සියලූ පිරිසට පණිවුඩ ලබාදී ඇති බවත් ඒ අනුව ‘හාබමාස්ටර්වරයා’ විසින් නැවේ ගින්න නිවාදැමීම ස`දහා ටග් යාත‍්‍රි කීපයක් එවනු ලැබූවත් ඒවා නැවේ ගින්න නිවා දැමීමට තරම් ප‍්‍රමාණවත් නොවූ බව ද දැනුම් දුන්නේය.

ඉන් අනතුරුව නැවේ ගින්න දරුණු ලෙස පැතිරී ගොස් දින ගණනක් තිස්සසේ ගිනිගෙන මුහුදු බත්වූ බවත් මුල්ම අවස්ථාවේදී නිවාදැමීමට තිබූ නැවේ ගින්න නිවානොදැමුවේ වන්දි ලබාගැනීමේ අපේක්‍ෂාවෙන් දැයි සැකයක් මතුවන්නේ යැයි කී සරත් ජයමාන්න මහතා තම සේවාදායකයාට චෝදනා කරන ආකාරයෙන් ඔහු කිසි`දු අවස්ථාවක නැවෙන් කිසි`දු අපද්‍රව්‍යයක් මුහුදට නොදැමුවේ යැයි ද නැවේ හටගත් ගින්න නිවාදැමීමට උත්සහ කිරීමේදී නැවේ තිබූ යම් යම් අපද්‍රව්‍ය මුහුදට එක්වීමට හැකියා තිබුණේ යැයි ද කීය.

සමුද්‍රීය ආරක්‍ෂණ පනත කඩකළ අයෙකුට සිරදඩුවම් ලබාදීමට හැකියාවක් නැතැයි ද ඔහුට දඩයක් පමණක් නියම කිරීමට හැකියාව ඇතැයි ද පෙන්වා දුන් ජනාධිපති නීතිඥ සරත් ජයමාන්න මහතා වන්දි ලබාගැනීම ස`දහා තම සේවාදායකයා ප‍්‍රාණඇපකරුවකු ලෙස ර`දවානොගතයුතු බවද පෙන්වා දුන්නේය.

සම්පූර්ණ වාර්තාව උපුටා ගැනීම – ජූනි 14 වැනි දින බී.බී.සී සන්දේශය හා ලංකාදීප ඊ පුවත්පත වෙතිනි – ශිර්ෂපාඨය හා ඡායාරූපය සංශෝධනය කර ඇත.

පසුගිය 07 වැනිදා ගාල්ල දිස්ත්‍රික් සෞඛ්‍ය සේවා අධ්‍යක්ෂ කාර්යාලයේදී  පැවැති කොවිඩ් එන්නත්කරණ වැඩසටහනේදී ඇස්ට්‍රාසෙනෙකා එන්නත් ලබාගත් පුද්ගලයින්ගේ නාම ලේඛණය ගාල්ල කොට්ඨාශ අපරාධ විමර්ශන අංශය ලබා දෙන ලෙස අද (14) ගාල්ල ප්‍රධාන මහේස්ත්‍රාත් හර්ෂණ කැකුණුවෙල මහතා විසින් ගාල්ල දිස්ත්‍රික් සෞඛ්‍ය සේවා අධ්‍යක්ෂ කාර්යාලයට නියෝග කළේය.

ගාල්ල ප්‍රධාන මහේස්ත්‍රාත්වරයා විසින් අදාළ නියෝග ලබාදුන්නේ සිද්ධිය සම්බන්ධයෙන් පරීක්ෂණ පවත්වන ගාල්ල කොට්ඨාස අපරාධ විමර්ශන අංශය ඉදිරිපත් කරන ලද කරුණු සලකා බැලීමෙන් පසුවය. 

ඒ අනුව පසුගිය 5 වැනිදා සහ 7 වැනිදා අදාළ කාර්යාලයෙන් එන්නත් ලබාගත් පුද්ගලයින්ගේ නාම ලේඛනයක්, එන්නත් ලබාදුන් කාර්යාලයේ සී.සී.ටී.වී. දර්ශන සහ විමර්ශනයට අදාළව දුරකථන දත්ත ගාල්ල කොට්ඨාශ අපරාධ විමර්ශන අංශයට ලබාදිය යුතුය.

මේ අතර එන්නත්කරණ සිද්ධියට අදාළ දින දෙක තුළ දක්ෂිණ අධිවේගී මාර්ගයේ පින්නදූව පිවිසුවේ සී.සී.ටී.වී දර්ශන හෙට (15) ගාල්ල කොට්ඨාස අපරාධ විමර්ශන අංශයට ලැබීමට නියමිතව ඇති බව ද වාර්තාවේ. මෙම දර්ශන නිරීක්ෂණය මගින් සංචරණ සීමා පවතින කාලය තුළ බස්නාහිර පළාතේ සිට ගාල්ලට පැමිණි මෝටර් රථ පිළිබඳ සොයා බැලීම අපේක්ෂිතය.

රටම කැළඹීමට පත් කළ මෙම සිදුවීමට අදාළ ගවේෂණාත්මක වාර්තාකරණය සිදුකරනු ලැබුවේ ‘අද දෙරණ උකුස්සා” වැඩසටහන මගින් බව විශේෂයෙන් සදහන් කළ යුතුය.

ලබන 21 වැනිදා දක්වා දීර්ඝ කර ඇති සංචරණ සීමා ඉවත් කරනවාදැයි තීන්දු කිරීමට සිදුවන්නේ මේ සතියේදී ලැබෙන පී.සී.ආර් පරීක්ෂණවල ප්‍රතිඵල අනුව යැයි සෞඛ්‍ය සේවා අධ්‍යක්ෂ ජෙනරාල් වෛද්‍ය අසේල ගුණවර්ධන මහතා පවසයි.

අද (14) කොළඹදී පැවති මාධ්‍ය හමුවකදී ඔහු මේ බව ප්‍රකාශ කළේය.

මේ සම්බන්ධයෙන් වැඩි දුරටත් කරුණු පැහැදිලි කළ සෞඛ්‍ය සේවා ජනරාල්වරයා, ‘‘මේ දිනවල ක්‍රියාත්මක වන සංචරණ සීමාවල ප්‍රතිඵල බලා ගැනීමට හැකිවන්නේ තව සතියක් හෝ දෙකක් ගතවූ පසුවයි. ඒ අනුව සංචරණ සීමා ඉවත් කරනවාද නැද්ද යන්න පිළිබදව අපට තීන්දුවක් ගත හැකියි.

පී.සී.ආර් පරීක්ෂණ කරන ක්‍රමවේදය වෙනස් කිරීමට මේ වන විට පියවර ගෙන තිබෙනවා. නිරෝධායනය වී සිටින අය රැපිඩ් ඇන්ටිජන් පරීක්ෂණයකින් පසු මුදා හැරීමට ඉදිරියේ දී කටයුතු කරනවා. රැපිඩ් ඇන්ටිජන් පරීක්ෂණ සිදු කිරීම නිසා පී.සී.ආර් පරීක්ෂණ සමාජයේ අවදානම් කණ්ඩායම්වලට යොමු කිරීමට හැකියාව ලැබෙනවා. ඒ අනුව කොවිඩ්ව-19 වෛරසය සමාජයේ පැතිර ඇද්දයි එම පරීක්ෂණවල ප්‍රතිඵල මඟින් අදහසක් ලබාගත හැකියි‘‘

මේ අතර නියෝජ්‍ය සෞඛ්‍ය සේවා අධ්‍යක්ෂ ජනරාල්, විශේෂඥ වෛද්‍ය හේමන්ත හේරත් මහතා පැවසුවේ කොවිඩ් පාලන කටයුතු තවදුරටත් සාර්ථක කර ගැනීමට නම් සංචරණ සීමා දැඩිව ක්‍රියාත්මක කළ යුතු බවයි.

මේ සම්බන්ධයෙන් වැඩි දුරටත් කරුණු පැහැදිලි කළ නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා, ‘‘මේ දක්වා ලැබී ඇති දත්ත අනුව කොරෝනා රෝගීන්ගේ යම් ආකාරයක අඩුවීමක් දක්නට ලැබෙනවා. ඉදිරි දින කිහිපයේදී සුළු වැඩිවීමක් මිස දිගටම පහළට යෑමට තිබෙන ඉඩකඩ අඩුයි. ඒ අනුව ඉහළ පහළ යෑම් සමග ක්‍රමානුකූලව ආසාදිතයින්ගේ අඩු වීමක් බලාපොරොත්තු වෙනවා. අපිට මේ සංචාරණ සීමා තවත් කාලයක් හැකි පමණ පවත්වාගෙන යෑමෙන් තමයි පැහැදිලි අඩුවීමක් බලාපොරොත්තු වෙන්න පුළුවන් වෙන්නේ. මේ අවස්ථාවේදී සංචරණ සීමා දැඩි කිරීම ඉතාම වැදගත්.” යැයි ද පැවසුවේය.

සෞඛ්‍ය සේවා අධ්‍යක්ෂ ජනරාල්වරයා සහ නියෝජ්‍ය අධ්‍යක්ෂ ජනරාල්වරයා මෙසේ පවසද්දී ශ්‍රී ලංකා වෛද්‍ය සංගමයේ සභාපතිනී විශේෂඥ වෛද්‍ය පද්මා ගුණරත්න මහත්මිය පවසන්නේ කොවිඩ් ව්‍යාප්තියේ යම් පාලනයක් දැකගත හැකි බවයි.

‘‘සෞඛ්‍ය අමාත්‍යාංශයේ අලුත්ම වාර්තා දෙස බැලීමේදී කොවිඩ්-19 ව්‍යාප්තියේ යම් පාලනයක් දැකගත හැකියි. මෙය සිදුවන්නේ සංචරණ සීමා පනවා ඇති තත්ත්වයක් තුළයි. රජය රට තවදුරටත් අගුළු දැමීමට තීරණය කර ඇති මේ අවස්ථාවේදී ජනතාව එහි උපරිම ඵල නෙළා ගත යුතුයි. ඔවුන් නිවැරදි ලෙස සෞඛ්‍ය නීතිවලට අනුගතව කටයුතු කළ යුතුයි. ජනතාව එසේ කටයුතු නොකළහොත් තත්ත්වය බරපතළ විය හැකියි‘‘

‘‘

ලෝක රුධිර පරිත්‍යාගශීලීන්ගේ දිනය සැමරීම වෙනුවෙන් සෞඛ්‍ය ආරක්ෂීත ක්‍රමවේදයන්ට අනුගතව නාරාහේන්පිට ජාතික රුධිර පාරවියලයන මධ්‍යස්ථාන ශ්‍රවණාගාරයේ දී අද දින (14) උදෑසන උත්සවයක් පැවැත්විනි.

මෙහිදී අදහස් දැක් වූ ජාතික රුධිර පාරවිලයන සේවයේ අධ්‍යක්ෂ වෛද්‍ය ලක්ෂ්මන් එදිරිසිංහ මහතා – “කොවිඩ් වසංගතය හමුවේ විටින් විට සංචරණ සීමා දැමීමත් සමග රුධිර සංචිත පවත්වාගෙන යාමට මෙරට රුධිර පරිත්‍යාගශීලීන් විශාල සහයෝගය දැක්වූවා.  ඉදිරියටත් එම සහයෝගය අපි අපෙක්ෂා කරනවා. සංචරණ සීමා ක්‍රියාත්මක කාල වකවානු තුල රුධිර සංචිත පවත්වාගෙන යාමේ දී  අභියෝගාත්මක අවස්ථා කිහිපයකට මුහුණ දීමට අපට සිදු වුණා.

පසුගිය මැයි මාසයේ මුල් වකවානුවේ අපේ රුධිර සංචිතවල මට්ටම තරමක් අර්බුධකාරි තත්ත්වයකට පත් වූ විට අපි මෙරට රුධිර පරිත්‍යාගශීලීන්ගෙන්, ලේ දන්දීමේ කඳවුරු සංවිධායකයින්ගෙන් සහ ජන මාධ්‍ය හරහා ඉල්ලීමක් කළා අපට දායකත්වය ලබාදෙන්න කියලා. එම කෙටි ඉල්ලීමේ දී ඔවුන් සියළු දෙනා අපට මහත් දායකත්වයක් ලබාදුන්නා. පසුගිය වෙසක් සතිය වන විට අපගේ රුධිර  සංචිත ප්‍රමාණය ඉතාම ආරක්ෂාකාරී තත්ත්වයකට ගෙන එන්නට අපට පුළුවන් වුනා. ඒ සදහා දායකත්වය දැක්වූ ශ්‍රී ලාංකික ජනතාවට සහ අපගේ ස්තූතිය පුද කරනු ලබනවා.”

මෙහිදී ජාතික  රුධිර පාරවිලයන සේවය, Colombo Civil Society Center හා  NDH Software Solutions Pvt. Ltd එක්ව නිර්මාණය කරන ලද ”රක්ත” නම් වූ ජංගම දුරකථන සදහා වන රුධිර දායක මෘදුකාංගය හදුන්වා දුන් අතර,  එම මෘදුකාංගය රුධිර දායකයින් තම දුරකථන වෙත භාගත කර ලියාපදිංචි වීමෙන් පසු තමන්ට රුධිරය පරිත්‍යාග කිරීම සදහා දිනයක් සහ වේලාවක් පහසුවෙන් වෙන් කරවා ගත හැක. එමගින්  අනවශ්‍ය තදබදය අවම කර ගත හැකි වන අතර, රුධිරය ලබාදුන් පසු නැවැත වරක් රුධිරය ලබාදීය හැකි දිනය කෙටි පණිවිඩක් ඔස්සේ ලබාගැනීමේ හැකියාව ද පවතී.

ලෝක සෞඛ්‍ය සංවිධානයේ සහයෝගිතා මධ්‍යස්ථානයක් ලෙස නාරාහේන්පිට ජාතික රුධිර මධ්‍යස්ථානය ඇතුළුව පර්ෂ ද  රුධිර මධ්‍යස්ථාන 24 ක්, ලේ බැංකු 105 ක් සහිතව දිවයිනේ රුධිර අවශ්‍යතාවයන් සපයන එකම සේවාව ලෙස ක්‍රියාත්මක වේ.

අභියාචනාධිකරණයේ සභාපති, විනිසුරු අර්ජුන ඔබේසේකර මහතා අද (14) පෙරවරුවේ ජනාධිපති කාර්යාලයේ දී ජනාධිපති ගෝඨාභය රාජපක්ෂ මැතිතුමා ඉදිරියේ ශ්‍රේෂ්ඨාධිකරණ විනිසුරුවරයෙක් ලෙස දිවුරුම් දුන්නේය.

අභියාචනාධිකරණ විනිසුරු ප්‍රියන්ත ප්‍රනාන්දු මහතා, අභියාචනාධිකරණයේ නව සභාපතිවරයා ලෙස සහ මහාධිකරණයේ හිටපු විනිසුරු ශෂී මහේන්ද්‍ර මහතා අභියාචනාධිකරණ විනිසුරුවරයෙක් ලෙස දිවුරුම් දුන්හ.

ඉන්ධන මිල ඉහළ දැමීමට රජය ගත් තීරණය සම්බන්ධයෙන් දීර්ඝ කරුණු පැහැදිලි කිරීමක් අද (13) ජනාධිපති මාධ්‍ය ඒකකය විසින් කළා. අදාළ කරුණු පැහැදිලි කිරීම ඇතුළත් සම්පූර්ණ මාධ්‍ය නිවේදනය පහත පළ වෙනවා.

ඉන්ධන මිල ඉහළ දැමීමට ප්‍රධාන හේතු ගණනාවක් පිළිබඳ ජනාධිපතිතුමාගේ ප්‍රධානත්වයෙන්, ගරු අග්‍රාමාත්‍යතුමන් හා අදාළ විෂයභාර ඇමතිවරුන්ගේ සහභාගිත්වයෙන් පැවති ජීවන වියදම් කමිටුව විසින් අවධානය යොමු කරන ලදී.

ලෝක වෙළෙඳපොළේ බොර තෙල් මිල පසුගිය මාස කිහිපය තුළ අඛණ්ඩව ඉහළ යාම ඉන් එක් ප්‍රධාන හේතුවකි. මේ වන විට බොර තෙල් බැරලයක මිල ඇ.එ.ජ.ඩො.70 ඉක්මවා ඇති අතර, එය තවදුරටත් ඉහළ යනු ඇති බව වෙළෙඳපොළ ප්‍රවණතා මගින් පැහැදිලි කරයි.

ශ්‍රී ලංකාව ඉන්ධන ආනයන සඳහා අතිවිශාල විදේශ විනිමයක් දරණ රටක් පමණක් නොව, එම ආනයනයන් මත රටේ ප්‍රවාහන සේවා, විදුලි බල නිෂ්පාදනය හා ඇතැම් කර්මාන්තශාලා ද පවත්වා ගෙන යන රටක් බවට පත්වී ඇත. 2019 වර්ෂයේ පමණක් තෙල් ආනයනය සඳහා වැය කර ඇති විදේශ විනිමය ඇ.එ.ජ ඩො.මිලියන 3,677කි. වාහන ආනයනය නතර කිරීම හා ජාත්‍යන්තර තෙල් මිල ගණන් 2019 දී බැරලයකට ඇ.එ.ජ.ඩො. 68.80 සිට 2020 දී ඇ.එ.ජ.ඩො. 45.57 දක්වා අඩුවීම නිසා 2020 දී මෙම වියදම ඇ.එ.ජ.ඩො. මිලියන 2,325ට අඩු කර ගැනීමට හැකි වුවද, මේ වන විට පවත්නා මිල ගණන් ඉහළ යාම නිසා 2021 වර්ෂයේ බැරලයක මිල ඇ.එ.ජ.ඩො. 70 ඉක්මවීම තුළ වාහන ආනයනය තහනම පවත්වා ගෙන ගියද, ඛනිජතෙල් ආනයනය සඳහා විදේශ විනිමය ඇ.එ.ජ.ඩො. මිලියන 4,000ක් පමණ වනු ඇත. මෙම වියදම සමස්ත විදේශ විනිමය උපයන අපනයන ආදායමෙන් 1/3කට ආසන්න වියදමකි.

බීජ, පොහොර, ආහාර, ඖෂධ සහ එන්නත් ආදියද, ආනයනය කරන මෙම ආනයන මත රඳා පවතින පරිභෝජන රටාව, නිෂ්පාදනය මත පරිභෝජනය කරන තත්ත්වයට පරිවර්තනය කළ යුතුය.

විදේශ විනිමය වැය කිරීමට අමතරව ලංකා ඛනිජ තෙල් සංස්ථාව පාඩු ලබන ආයතනයක් වශයෙන් පැවතීම නිසා සෑම වර්ෂයකම ලංකා බැංකුවෙන් හා මහජන බැංකුවෙන් ණය මත යැපෙන ආයතනයක් වී ඇත. මෙම බැංකු දෙක සඳහා මේ වන විට රුපියල් බිලියන 652ක ප්‍රමාණයක ණය ගෙවීමට ද ඇත. ලංකා විදුලිබල මණ්ඩලය ද රුපියල් බිලියන 85කට ආසන්න ණය මුදල් බැංකු දෙකට ගෙවීමට සිදු වන බැවින් මේ සඳහා රාජ්‍ය බැංකු දී ඇති ණයවලට භාණ්ඩාගාරය විසින් ඇපකරයන් ද නිකුත් කර ඇති අතර, ණය සඳහා අධික පොලියක් ද ගෙවීමට සිදුව ඇත.

පෞද්ගලික හා පොදු ප්‍රවාහන සේවා සඳහා සියයට 60ක පමණ වන ඉන්ධන භාවිතය අඩු කළ යුතුය. එබැවින් ප්‍රවාහනය සඳහා ELECTRIC රථ වාහන මෙන්ම දුම්රිය සේවා හැකිතාක් දුරට විදුලි බලයෙන් ක්‍රියාත්මක වන සේවාවන් බවට පත් කළ යුතුය. ඛනිජ තෙල් වලින් ධාවනය වන වාහන ආනයනය මුළුමනින්ම නතර කර ELECTRIC රථ වාහන භාවිතය ප්‍රචලිත කිරීමත්, ත්‍රීරෝද රථ සඳහා ELECTRIC එන්ජින් ලබා දීමත් මගින් ප්‍රවාහන පිරිවැය ද ස්ථාවර කර ගත හැකිය.

ඉන්ධන භාවිතය අධික වීම නිසා නාගරික ප්‍රදේශවල වාතය අපිරිසිදු වීමත්, ජනතාවගේ පෙනහළු ආශ්‍රිත රෝග වැඩිවීමත් තුළ පරිසර හිතකාමී බලශක්ති මූලාශ්‍රවලට කඩිනමින් පිවිසීම අනිවාර්ය වේ. කැලණිතිස්ස තෙල් විදුලි බලාගාරය LNG විදුලි බලාගාරයක් බවට පත් කර ගැනීමෙන්, විදුලිබල මණ්ඩලය විසින් ඉන්ධන සඳහා ගෙවන අධික මිල ද අඩු කර ගත හැකිය.

දේශගුණික තත්ත්වයන්ට ඔරොත්තු දෙන හරිත ආර්ථිකයක් කරා වන ජාතික සංවර්ධන වැඩසටහනට අනුව පොහොර, ඉන්ධන, වන සම්පත්, කැලිකසළ ජන ජීවිතයේ ගුණාත්මකභාවය ඉහළ නංවන අයුරින් කළමනාකරණය කළ යුතුය.

එබැවින් මිල වැඩි කිරීමට අමතරව, ආනයනික ඉන්ධන මත රඳා පවතින පරිභෝජන රටාව වෙනස් කිරීමට රජය විසින් යෝජනා රැසක් ක්‍රියාත්මක කිරීමට ප්‍රවේශ වී ඇත.

ලංකා විදුලිබල මණ්ඩලයේ විදුලි ජනනය සඳහා සාමාන්‍ය වශයෙන් සියයට 30ක පමණ ඉන්ධන භාවිතා කරන බැවින්, එය වලක්වා ගැනීම සඳහා පුනර්ජනනීය බලශක්ති ජනනය කඩිනම් කිරීමට ද රජය කටයුතු කරමින් සිටී. මේ නිසා සෑම නිවසකටම, පාසැල්, රෝහල් හා රජයේ ගොඩනැගිල්ලක් සඳහා සූර්ය තාප විදුලි නිෂ්පාදන කට්ටල ලබා දීම මගින් ජනතාව  පිට පැටවෙන අධික මිල ගණන් වල පීඩනය අඩු කිරීම පමණක් නොව, එම විදුලි ඒකක විදුලිබල මණ්ඩලයට ලබාදීම මගින් ආදායම් මාර්ගයක් ද ඇති කළ හැකිය.

එබැවින්, මෙම මිල ගණන් වැඩි කිරීම දේශීය ආර්ථිකය ශක්තිමත් කරන පොදු වැඩපිළිවෙළක එක් ප්‍රධාන සාධකයක් පමණි. එය රටේ බැංකු පද්ධතිය ශක්තිමත් කර අඩු පොලී අනුපාත පවත්වා ගැනීමටත්, විදේශ විනිමය වියදම් අඩු කර විනිමය අනුපාතය ශක්තිමත් කර ගැනීමටත්, ජනතාවගේ සෞඛ්‍යය හා සුභසාධනය සුරක්ෂිත කර ගැනීමටත්, ආනයනය මත රඳා පවතින පරිභෝජන ආර්ථිකය, දේශීය නිෂ්පාදන මත රඳා පවතින ආයෝජන හා පරිභෝජන ආර්ථිකයක් බවට පරිවර්තනය කර ගැනීමට ගත් තීරණයකි.

කොවිඩ්-19 වසංගතය හේතුවෙන් වසා දමා තිබෙන පාසල් නැවත ආරම්භ කරන අවස්ථාවක දී දරුවන්ගේ රෝග සහ ගැටලු හඳුනා ගැනීම සඳහා ළමා  රෝග විශේෂඥ වෛද්‍යවරුන්ගේ සහය ගන්නැයි  අග්‍රාමාත්‍ය මහින්ද රාජපක්ෂ මහතා ඊයේ (11) පස්වරුවේ අධ්‍යාපන බලධාරීන්ට උපදෙස් දුන්නේය.

පාසල් නැවත විවෘත කිරීම සහ ගුරුවරුන්ට හා සිසුන්ට කොවිඩ් ප්‍රතිශක්තීකරණ එන්නත් ලබා දීම සම්බන්ධයෙන් අවධානය යොමු කරමින් අරලියගහ මන්දිරයේ පැවති සාකච්ඡාවකට එක්වෙමින් අග්‍රාමාත්‍යතුමා මේ බව සඳහන් කළේය.

කොවිඩ් වසංගත තත්ත්වය පාලනය වූ වහාම අදියර කිහිපයක් යටතේ පාසල් නැවත ආරම්භ කිරීමේ වැදගත්කම පෙන්වා දුන් අග්‍රාමාත්‍යතුමා, ගුරුවරුන්ට අවශ්‍ය එන්නත් ලබා ගැනීම සෞඛ්‍ය අමාත්‍යංශය ඔස්සේ ඉටු කර ගත හැකි බව පෙන්වා දුන්නේය.

මෙම සාකච්ඡාවට එක්ව සිටි ළමා රෝග විශේෂඥ වෛද්‍යවරුන්ගේ සංගමයේ නියෝජිතයෝ පාසල් නැවත ආරම්භ කිරීමේදී ඇතිවන ගැටලු මගහරවා දීම සඳහා සිය සංගමයේ සහය අධ්‍යාපන කලාප මට්ටමෙන් ලබා දිය හැකි බව අග්‍රාමාත්‍යතුමා හමුවේ ප්‍රකාශ කළහ.

ඒ අනුව රට පුරා විසිරී තිබෙන අධ්‍යාපන කලාප 99 උදෙසා තම සංගමයේ නියෝජිතයන් නම් කරමින් අදාළ කටයුතු විධිමත් කරන බව එම සංගමයේ නියෝජිතයෝ පෙන්වා දුන්හ.

පාසල් නැවත ආරම්භ කිරීමට අදාළව එන්නත්කරණ වැඩපිළිවෙලක් ක්‍රියාත්මක වන්නේ නම් 11 ශ්‍රේණීය හා 13 ශ්‍රේණියේ දරුවන්ට එහි ප්‍රමුඛතාවය දිය යුතු බව අධ්‍යාපන අමාත්‍යංශයේ ලේකම් මහාචාර්ය කපිල පෙරේරා මහතා පෙන්වා දුන්නේය.

මෙම කටයුත්ත සාර්ථක කරගැනීම සඳහා දෙලක්ෂ හැත්තෑ නව දහසක් පමණ වන ගුරුවරුන් සහ අනධ්‍යයන කාර්ය මණ්ඩලය ඇතුළු ලක්ෂ තුනකට ආසන්න පිරිසට එන්නත් ලබාදීමේ වැදගත්කම ද මහාචාර්ය කපිල පෙරේරා මහතා විසින් පෙන්වා දෙන ලදි.

රටේ අනාගත දරු පරපුර මෙන්ම ඔවුන්ට මග පෙන්වන ගුරුවරු ආරක්ෂා කර ගැනීමට රජය සෑම විටම කටයුතු කරන බව අග්‍රාමාත්‍යතුමා මෙහි දී විශ්වාසය පළ කළේය.

පාසල් ආරම්භ කිරීමේ දී දරුවන් සහ ගුරුවරුන් ආරක්ෂීත ක්‍රමවේදයක් ඔස්සේ පාසලට කැදවා ගැනීම පිළිබඳව වැඩපිළිවෙලක් සකස් විය යුතු බව සඳහන් කළ අග්‍රාමාත්‍යතුමා, පාසල් ළමුන් ප්‍රවාහනය කිරීමේදී  අනුගමනය කළ යුතු සෞඛ්‍යාරක්ෂිත ක්‍රමවේද පිළිබඳව විශේෂ අවධානයක් යොමුකරන්නැයි ඉල්ලා සිටියේය.

ගැබිනි මව්වරුන්ට කොවිඩ් ප්‍රතිශක්තීකරණ එන්නත ලබාදීම සඳහා අග්‍රාමාත්‍ය ආර්යා ශිරන්ති රාජපක්ෂ මහත්මිය ලබා දුන් සහයෝගය පිළිබඳව ළමා රෝග විශේෂඥ වෛද්‍යවරුන්ගේ සංගමය මෙහිදී සිය ප්‍රණාමය පුද කළේය. මෙම අවස්ථාවට අධ්‍යාපන අමාත්‍ය මහාචාර්ය ජී.එල් පීරිස්, අග්‍රාමාත්‍ය ලේකම් ගාමිණී සෙනරත්, අධ්‍යාපන අමාත්‍යංශයේ ලේකම් මහාචාර්ය කපිල පෙරේරා, පාසල් කටයුතු අතිරේක ලේකම් එල්.එම්.ඩී ධර්මසේන, පාසල් සෞඛ්‍ය හා පෝෂණ අංශයේ අධ්‍යක්ෂ කමණි ගුණරත්න, වෛද්‍යවරුන් වන ටී.එල්.පී සෝමතුංග, මහේන්ද්‍ර ආර්නල්ඩ්, ශාමන් රජීන්ද්‍රජිත්, සුරන්ත පෙරේරා, මහචාර්ය සනත් ළමාබදුසූරිය මහත්ම මහත්මීන් ඇතුළු ළමා රෝග විශේෂඥ වෛද්‍යවරුන්ගේ සංගමයේ වෛද්‍යවරු පිරිසක් ද සහභාගී වී සිටියහ

සියලුම නිදහස් වෙළඳ කලාපවල සේවක සේවිකාවන් සඳහා ජූලි මස මුල් සතියේ පළමු එන්නත් මාත්‍රාව ලබාදෙන බව තරුණ හා ක්‍රීඩා අමාත්‍ය නාමල් රාජපක්ෂ මහතා අද (12) දින පැවසීය.

තිස් වැනි සංවත්සරය සමරන කොග්ගල නිදහස් වෙළද කලාපයේ කර්මාන්තශාලාවන්හි ආයෝජකයන් සහ එහි කළමණාකරුවන් සමඟ එම වෙළඳ කලාප පරිශ්‍රයේ පැවති හමුවකට එක්වෙමින් අමාත්‍යවරයා මේ බව සඳහන් කළේය.

අමාත්‍යවරයා මෙම හමුවට සමගාමීව කොග්ගල නිදහස් වෙළඳ කලාපයේ නිරීක්ෂණ චාරිකාවකට ද එක්විය.

ආයෝජකයින් සමඟ පැවති සාකච්ඡාවේ දී නිෂ්පාදන හා අපනයන කර්මාන්තයේ දී  ඔවුන්   මුහුණ දෙන ගැටලු සහ ඒවාට ලබාදිය හැකි විසඳුම් පිළිබඳව සාකච්ඡා කෙරිණි. කොග්ගල ආයෝජන කලාපයේ හඳුනාගත් පොදු ගැටලු  සහ එවාට ලබාදිය හැකි විසඳුම් පිළිබඳව ද මෙහි දී අමාත්‍යවරයාගේ අවධානය යොමු විය.

ආයෝජන කලාපයට ලැබෙන ජල පරිමාණය වැඩි කරදෙන ලෙස ඉල්ලීමක් ඉදිරිපත් වූ අතර ඒ සඳහා කඩිනම් පියවර ගැනීමට අමාත්‍යවරයා නිලධාරීන්ට උපදෙස් දුන්නේය.

එහිදී අමාත්‍යවරයා මෙසේ ද කීවේය.

පසුගිය දිනක සෞඛ්‍ය අමාත්‍යාංශ නිලධාරීන් සමඟ කළ සාකච්ඡාවක දී  වෙළඳ කලාපවල සේවක සේවිකාවන්ට එන්නත ලබාදීමේ අවශ්‍යතාව පැහැදිලි කිරීමෙන් අනතුරුව ලංකාවේ සියලුම වෙළඳ කලාප වෙත එන්නත් ලබාදීමට අවශ්‍ය අනුමැතිය ලැබී තිබෙනවා. ඒ අනුව කොග්ගල නිදහස් වෙළද  කලාපය ඇතුලුව සෑම ආයෝජන කලාපයකටම ජූලි මස පළමු සතියේ සිට කොවිඩ් – 19 සඳහා වූ පළමු ප්‍රතිශක්තිකරණ එන්නත් මාත්‍රාව ලබාදීමේ කටයුතු ආරම්භ වනවා.

එය නිෂ්පාදන හා අපනයන කර්මාන්තය වෙත හිමි වූ සුවිශේෂ වරප්‍රසාදයක් යැයි අමාත්‍යවරයා පෙන්වා දුන්නේය.

කොග්ගල නිදහස් වෙළඳ කලාපය තුළ ඇගලුම්, ඉලෙක්ට්‍රොනික් උපාංග, රබර් නිෂ්පාදන ඇතුලු විව්ධ ක්ෂේත්‍රයන්ට අදාළ  කර්මාන්ත ශාලා 21ක් දැනට ක්‍රියාත්මක බව ශ්‍රී ලංකා ආයෝජන මණ්ඩලයේ කොග්ගල කලාප අධ්‍යක්ෂ සිසිල් ප්‍රනාන්දු මහතා මෙහි දී ප්‍රකාශ කළේය.

මෙම වෙළඳ කලාපය හරහා 12840කට සෘජු රැකියා අවස්ථා හිමිව ඇති බව හෙතම කියා සිටියේය.

ඉන්ධන මිල ඉහළ දැමීම හේතුවෙන් ඉදිරියේදි බස් ගාස්තු ඉහළ දමන බව සමස්ත ලංකා පෞද්ගලික බස් හිමියන්ගේ සංගමයේ ප්‍රධාන ලේකම් අංජන ප්‍රියන්ජිත් මහතා අවධාරණය කරයි.

අද (12) දින පැවැති සමස්ත ලංකා බේකරි හිමියන්ගේ සංගමය සහ සමස්ත ලංකා පෞද්ගලික බස් හිමියන්ගේ සංගමය ඒකාබද්ධ මාධ්‍ය හමුවේදී ප්‍රියන්ජිත් මහතා මේ බව සදහන් කළේය.

‘ ඊයේ රාත්‍රියේ සිදු වුණ ඩීසල් මිල ඉහළ දැමීම අනුව බස් ගාස්තු 15%කින් සංශෝධනය විය යුතුයි. ‘නිරෝධායන නීතිය යටතේ ආසන ගත මගීන් පමණක් රැගෙන යන්නේ නම් බස් ගාස්තුව 25%කින් සංශෝධනය විය යුතුයි‘‘

මේ සම්බන්ධයෙන් අදහස් දක්වන මගීන් පෙන්වා දෙන්නේ පසුගිය කොවිඩ් සමයේ ද නිරෝධාන නීති යටතේ මගීන් ගෙන යන බව පවසමින් බස් ගාස්තු විශාල වශයෙන් ඉහළ දැමූ නමුත් පොල් පටවන ආකාරයෙන් මගීන් ගෙන යාම නතර නොවූ බවයි.

‘‘අපේ පඩි හෝ ආදායම් එක ශතයකින් වැඩි වෙලා නැහැ. තිබුණ එකත් අඩු වුණ එක තමයි සිද්ධ වුණේ. එහෙම තියෙද්දී බස් ගාස්තුත් වැඩි වුණොත් අපිට හුළං බොන්න තමයි වෙන්නේ‘‘ යැයි මගීන් අප සමග පැවසූහ.

මේ අතර ඉන්ධන මිල විශාල ප්‍රතිශතයකින් ඉහළ දැමීම හේතුවෙන් බේකර නිෂ්පාදනවල මිල ගණන් ද ඉහළ දැමීමට සිදුවන බව සමස්ත ලංකා බේකරි හිමියන්ගේ සංගමයේ සභාපති එන්.කේ ජයවර්ධන මහතා අද (12) පැවැති මාධ්‍ය හමුවකදී පැවසුවේය.

ජයවර්ධන මහතා පැවසුවේ මේ වන විටත් ඇතැම් බේකරි හිමියන් සිය නිෂ්පාදනවල මිල ඉහළ නංවා ඇති බවයි.

ඉන්ධන මිල මෙන්ම බේකරි නිෂ්පාදනයට අවශ්‍ය සෙසු අමුද්‍රව්‍යවල මිලද මේ වන විට ඉහළ ගොස් ඇති බව ද ඔහු පෙන්වාදෙයි.

කොවිඩ් -19 වසංගතයේ ව්‍යාප්තිය පාලනයට දැනට ක්‍රියාත්මක සංචරණ සීමා ජුනි මස 14 වන දින සිට අඛණ්ඩව තවත් සති දෙකක් හෝ ක්‍රියාත්මක කළ යුතු බව ශ්‍රී ලංකා වෛද්‍ය සංගමය අවධාරණය කරයි.

රජයේ වෛද්‍ය නිලධාරීන්ගේ සංගමය විසින් ඊයේ (11) ජනාධිපතිවරයා, සෞඛ්‍ය අමාත්‍යවරිය ඇතුළු බලධාරීන් වෙත යොමු කළ ලිපියක් මගින් මේ ඉල්ලීම කර ඇත.

එම ලිපිය මගින් රජයේ වෛද්‍ය නිලධාරීන්ගේ සංගමය විසින් පෙන්වාදී ඇත්තේ මේ දක්වා ක්‍රියාත්මක කළ සංචරණ සීමා හේතුවෙන් කොවිඩ් රෝගීන් වාර්තාවීමේ යම් අඩුවක් පෙන්නුම් කරමින් ඇති බවත් සංචරණ සීමා කඩිනමින් ඉවත් කළහොත් ආසාදිතයින් වාර්තාවීම යළිත් ඉහළ යා හැකි බවයි.

එම නිවේදනයේ මෙසේ ද සදහන් වේ.

1. නිවසකින් පිටව යන පුද්ගලයින් අවම කරමින් සංචරණ සීමා ඉතා තදින් ක්‍රියාකළ යුතුය.
2. සංචරණ සීමා ක්‍රියාත්මක කාලය තුළ විවෘතව ඇති ආයතන ආශ්‍රිතව පී.සී.ආර් පරීක්ෂණ ඉහළ නැංවිය යුතුය.
3. කොවිඩ් බහුල ව්‍යාප්තියක් සහිත රටවල හා මාරාන්තික, ඉහළ සම්ප්‍රේෂණ හැකියාවක් සහිත නව කොවිඩ් ප්‍රභේද හඳුනාගෙන ඇති රටවල සංචාරකයින්ට මෙරටට පැමිණීමට අවස්ථාව ලබා නොදිය යුතුය.
4. සමාජය තුළ කොවිඩ් ව්‍යාප්තිය පිළිබඳ අවබෝධයක් ලබාගැනීම සඳහා අහඹු ලෙස සිදුකරන පී.සී.ආර් පරීක්ෂණ සංඛ්‍යාව වැඩි කළ යුතුය.

වී, සහල්, සීනි, කිරිපිටි සහ බඩඉරිගු ගබඩා කිරීම සම්බන්ධයෙන් සියලු කරුණු දින හතක කාලයක් තුළ පාරිභෝගික කටයුතු පිළිබඳ අධිකාරියේ ලියාපදිංචි කරන ලෙස පාරිභෝගික කටයුතු පිළිබද අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක ඊයේ (11) අංක 2231/23, 2231/24 හා 2231/25 යන අති විශේෂ ගැසට් පත්‍ර මගින් නියෝග කර තිබේ.

එම අති විශේෂ ගැසට් පත්‍රයේ මෙසේ ද සදහන් වේ.

සහල් නිෂ්පාදකයකු, වී හෝ සහල් රැස්කරන්නකු, ගබඩාකරුවකු, බෙදාහරින්නකු හෝ වී හෝ සහල් තොග වෙළෙන්දකු විසින් ඔවුන් සන්තකයේ, භාරයේ හෝ පාලනයේ ඇති සහල් ගුදම්, සයිලෝ, ගබඩා, බහලුම් හෝ වෙනත් සථාන පාරිභෝගික අධිකාරියේ දින 7ක් ඇතුලත ලියාපදිංචි කළ යුතු අතර ඒවාහි ඇති වී හෝ සහල් තොග පිළිබඳ විස්තරද ලබාදිය යුතුය.

සීනි හා කිරිපිටි ආනයනකරුවන්, නිෂ්පාදකයින්, ගබඩාකරුවන්, රැස්කරන්නන්, බෙදාහරින්නන් හා තොග වෙළෙන්දන් ලියාපදිංචි වීම සහ සීනි හා කිරිපිටි පිළිබඳ තොරතුරු පාරිභෝගික කටයුතු පිළිබඳ අධිකාරියට ලබාදිය යුතුය.

බඩ ඉරිගු රැස්කරන්නන්, ගබඩාකරුවන්, බෙදාහරින්නන් හා තොග වෙළෙන්දන්ද ඉහත සඳහන් සිය තොරතුරු සමඟ පාරිභෝගික කටයුතු අධිකාරියේ ලියාපදිංචි විය යුතු නමුත් වී වගාකරුවකු හෝ බඩඉරිගු වගාකරුවකු සිය අස්වැන්න ගබඩා කර තබා ගැනීම ඊට අයත් වන්නේ නැත.

කොවිඩ් වසංගත තත්ත්වය හේතුවෙන් මාර්ගගත (Online) ක්‍රමවේදය ඔස්සේ අධ්‍යයන කටයුතුවල නිරතවන රටේ සියලුම දරුවන්ට අන්තර්ජාල සේවා ගාස්තුවකින් තොරව e-තක්සලාව හරහා නොමිලේ අධ්‍යාපන වරම් ලබාදීමේ ව්‍යාපෘතිය කඩිනම් කරන්නැයි තරුණ හා ක්‍රීඩා අමාත්‍ය, ඩිජිටල් තාක්ෂණ හා ව්‍යවසාය සංවර්ධන රාජ්‍ය අමාත්‍ය නාමල් රාජපක්ෂ මහතා පැවසීය.

E-තක්සලාව ක්‍රමවේදයේ දැනට පවතින දුෂ්කරතා අවම කරගනිමින් වඩාත් සුදුසු ක්‍රමවේදයක් හඳුන්වාදිම සඳහා අරලියගහ මන්දිරයේ දී ඊයේ (11) පැවති සාකච්ඡාවකට එක්වෙමින් අමාත්‍යවරයා මේ බව අවධාරණය කළේය.

2021 ජුලි 21 දින වන විට මුල් අදියර ලෙස පාසල් 200ක සිසුන්ට අන්තර්ජාල සේවා ගාස්තුවකින් තොරව මාර්ගගත (Online)  පන්ති e-තක්සලාව හරහා ආරම්භ කිරීමට අවශ්‍ය පියවර ගන්නැයි අමාත්‍ය නාමල් රාජපක්ෂ මහතා මෙහි දී උපදෙස් දුන්නේය.

විවිධ යෙදුම් හරහා මාර්ගගත ක්‍රමවේද ඔස්සේ අධ්‍යාපනය ලැබීමේ දී දත්ත සඳහා දරුවන්ට වැයවන සැපයුම් සේවා ගාස්තු මෙන්ම අනෙකුත් දුෂ්කරතා මගහැරීම පිළිබඳව අමාත්‍ය නාමල් රාජපක්ෂ මහතාගේ ප්‍රධානත්වයෙන් පැවති මෙම හමුවේ දී අවධානය යොමු විය.

රජය විසින් දැනටමත් විධිමත්ව ස්ථාපිත කර ඇති e-තක්සලාව අදාළ ගැටලුවලට පිළියමක් ලෙස යොදාගත හැකි බව මෙම හමුවේ දී තීරණය කෙරිණි.

ඒ අනුව මෙම පද්ධතිය ස්ථාපිත කර ඇති ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) ට ලංකා රාජ්‍ය මේඝය තුළ ප්‍රමාණවත් තාක්ෂණික යටිතල පහසුකම් පුළුල් කරදෙමින් දැනට වඩා විශාල සිසුන් පිරිසකට එකවර ඊට ප්‍රවේශවිය හැකි අවස්ථාව සලසන්නැයි අමාත්‍ය නාමල් රාජපක්ෂ මහතා මෙහි දී උපදෙස් දුන්නේය.

අධ්‍යාපනය සඳහාම වෙන්වූ රූපවාහිනී නාලිකාවක් සහ ගුවන්විදුලි සේවාවක් පවත්වාගෙන යාම සම්බන්ධයෙන් ද මෙහි දී සාකච්ඡා කෙරිණි. එවැනි රූපවාහිනි හා ගුවන් විදුලි සේවාවක් සඳහා අධ්‍යාපන ප්‍රතිසංස්කරණ, විවෘත විශ්වවිද්‍යාල සහ දුරස්ථ අධ්‍යාපන ප්‍රවර්ධන රාජ්‍ය අමාත්‍යංශය දැනටමත් සංඛ්‍යාත ලබාගෙන ඇති බව මෙහි දී හෙළිවිය.

ශ්‍රී ලංකා රූපවාහිනී සංස්ථාව, ස්වාධීන රූපවාහිනී සේවය සහ ගුවන්විදුලි සංස්ථාව යන ආයතනයන්හි දැනටමත් පවතින යටිතල පහසුකම් භාවිත කර අදාළ සේවාවන් ක්‍රියාත්මක කිරීමට අවශ්‍ය පියවර ගන්නැයි අමාත්‍ය නාමල් රාජපක්ෂ මහතා කියා සිටියේය.

සන්නිවේදන කුලුණු අලුතින් ඉදිකිරීම ද ඇතුළු මෙවැනි දිගු කාලීන පියවරවලට අමතරව මේ වනවිටත් මාර්ගගත අධ්‍යාපනය ලැබීමේ දී අන්තර්ජාල ආවරණ බාධා, ආර්ථික දුෂ්කරතා සහ අවශ්‍ය මෙවලම් නොමැතිව අසරණව සිටින දරුවන් වෙනුවෙන් කෙටි කාලීන විසඳුම් අවශ්‍ය බව අමාත්‍ය නාමල් රාජපක්ෂ මහතා මෙහි දී නිලධාරීන්ගේ අවධානය යොමු කළේය.

ඒ අනුව ආර්ථීක දුෂ්කරතා මැද මාර්ගගත ඉගෙනීම් කටයුතුවල නිරත දරුවන්ගේ අධ්‍යාපනය සදහා සුදුසු ජංගම දුරකතන මෙවලමක් ලබාදීමේ වැඩපිළිවෙලක් සකස් කර ඒ පිළිබදව තමන් දැනුවත් කරන්නැයි අමාත්‍ය නාමල් රාජපක්ෂ මහතා පැවසීය.

අන්තර්ජාල ආවරණය පිළිබද දැනට පවතින ගැටලු සැලකිල්ලට ගනිමින් e – තක්සලාව මගින් ඉගැන්වීම තහවුරු කිරීම සඳහා ග්‍රාමීය වශයෙන් හඳුනාගත් මධ්‍යස්ථාන (උදා: ප්‍රජා ශාලා, නැණසල  විහාරස්ථාන සහ පරිගණක සම්පත් මධ්‍යස්ථාන), “ e-තක්සලාව ඉගෙනුම් මධ්‍යස්ථාන ”ලෙස කුඩා සිසු කණ්ඩායම් සඳහා ඉගෙනුම් අවස්ථා සලසන මධ්‍යස්ථාන බවට පත්කරන්නැයි ද අමාත්‍ය නාමල් රාජපක්ෂ මහතා දැනුම් දුන්නේය.

අදාළ කටයුත්තේ දී ඉගෙනුම්  අවස්ථා ලබාදීමට අවශ්‍ය මධ්‍යස්ථාන හඳුනාගැනීමේ කාර්යය සහ පරිගණක උපාංග ලබාදීම පිළිබඳව අවශ්‍ය ක්‍රියාමාර්ග අධ්‍යාපන අමාත්‍යංශ ලේකම්තුමාගේ නිර්දේශ මත ක්‍රියාත්මක විය යුතු බවද පැවසීය.

සෞඛ්‍ය සේවා අධ්‍යක්ෂ ජනරාල්වරයා විසින් කොවිඩ් ආසාදිත මරණ 62ක් තහවුරු කළ බව රජයේ ප්‍රවෘත්ති දෙපාර්තමේන්තුව විසින් ඊයේ (11) නිකුත් කළ මාධ්‍ය නිවේදනයක සදහන් වේ. මෙම මරණ සමග කොවිඩ් ආසාදනයෙන්ම මෙරට මියගිය සමස්ත පිරිස 2073ක් බවයි එම නිවේදනයේ වැඩි දුරටත් සදහන් වන්නේ. එම නිල මාධ්‍ය නිවේදනය පහත පළ වේ.

covid-death-jun-11