පසුගිය කාලයේ රජයේ මහජන දේපොළ හොරකම් කරමින් රජ සැප විඳින පිරිසක් තවමත් අපි අතර ඉන්නවා. සමහර රජයේ නිලධාරින් වැඩ තහනමට ලක් වෙලා. ඔවුන් හිතනවා ඇති වැඩ තහනමට ලක් වුනාම සියලු දඩුවම් ලැබුනා, ප්‍රශ්නය එතැනින් ඉවරයි කියළා. නමුත් මම එකක් කියනවා. රාජ්‍ය දේපොළ කියන්නේ සඟ සතු කළ පුජා වට්ටියක් වගේ. ඒ අන්දමට මහජන හා රාජ්‍ය දේපොළ හොරකම් කරලා දැනට වැඩ තහනම් වෙලා ඉන්න කිසිදු නිලධාරියෙකුට වගේම දේශපාලනඥයින්ට අපි නිදැල්ලේ ඉන්න දෙන්නේ නැහැ. ඔවුන්ට එරෙහිව නීතිය ක්‍රියාත්මක කරනවා විතරක් නොවෙයි අවුරුදු හත අටකට හිරේ යවනවා. ඒ වගේම කොල්ල කාපු මහජන දේපොළ රාජ සන්තක කිරීමටත් අපි රජයක් වශයෙන් පසුබට වෙන්නේ නැතැයි ධීවර හා ජලජ සම්පත් සංවර්ධන අමාත්‍ය හා මහවැලි සංවර්ධන රාජ්‍ය  අමාත්‍ය මහින්ද අමරවීර මහතා කීය.

අමාත්‍යවරයා මෙම අදහස් පළ කළේ පසුගිය සෙනසුරාදා (16)  ඇඹිලිපිටිය මහවැලි නේවාසික ව්‍යාපාර කාර්යාලයේ නිරීක්ෂණ චාරිකාවකට එක්වෙමිනි. 

මෙහිදී වැඩිදුරටත් අදහස් පළ කළ අමාත්‍යවරයා-

මහවැලියේ  නේවාසික ව්‍යාපාර කළමනාකාරවරයෙක් වශයෙන් කටයුතු කරපු නිලධාරියෙක් ගැන ලිපි ගොනු කිහිපයක් පසුගිය සතියේ කියවන්න ලැබුනා. ඔහු මහවැලි ඉඩම් කෝටි ගණනින් ඇතැම් පුද්ගලයින්ට විකුණලා අල්ලස් වශයෙන් කෝටි ගණනින් අරගෙන තිබුණා. දැන්  ඒ නිලධාරියා වැඩ තහනමට ලක් වී සිටිනවා. එක ඉඩමක් විකුණන්න මේ පුද්ගලයා රුපියල් කෝටියක් අල්ලස් වශයෙන් අරගෙන තිබුනා. ඒක ගන්න ඉඩම මිල දී ගත්ත ව්‍යාපාරිකයාගේ ගෙදරට යන කොට ඒ ගෙදර BMW කාර් එකක් තිබිලා තියෙනවා.

මාත් හොයන්නේ මේ වගේ දෙයක් තමයි. මගේ පුතා හරි කැමැතියි මේ වගේ වාහනයකට . මට සල්ලි එපා මේ වාහනය දෙන්න කියළා ඒක ඉල්ලලා. BMW  කාර් එකක් කෝටි දෙකහමාරක් විතර වෙනවා. අර ව්‍යාපාරිකයා කියළා තියෙනවා. ඕක මිලයි නේ කියළා. එතකොට අර නිලධාරියා කියලා තියෙනවා ඒකට කමක් නෑ. මම අරං දුන්න ඉඩම කෝටි ගණනක් වටිනවානේ කියළා.
 
 එහෙම තමයි සමහර නිලධාරින් පසුගිය කාලයේ කටයුතු කර තියෙන්නේ. දැන් මේ නිලධාරියා වැඩ තහනම් වෙලා ගෙදර ඉන්නවා. ඒ වගේ තවත් නිලධාරින් ඉන්නවා හොරකම් කරපුවාට හරියන්න මගේ වැඩ තහනම් වුනානේ දැන් හරි, මගේ ප්‍රශ්න ඉවරයි  කියළා. 

හොරකම් කරපු දේවල් බුක්ති විඳ විඳ ඒ අයට නිදැල්ලේ ඉන්න අපි රජය වශයෙන් අපි ඉඩ දෙන්නෑ. ඒ සියලු දෙනාම හිරගෙදර ඇරළයි නවතින්නේ. මහජනතාවගේ දුක සේ හරි හම්බ කරන දේවල් හොරා කාළා මේ මිනිස්සුන්ට නිදහසේ ඉන්න පුලුවන්ද කියළා මම අහනවා. 

 අනිත් එක තමයි. සමහරු කියනවා එහෙම නම් මේ රජයේ හොරුන්ට මොකද කරන්නේ කියළා. හොරකම නම් හොරකමම තමයි. ඒක අර රජයට මේ රජයට කියළා වෙනසක් නෑ. ගරු ජනාධිපති මෛත්‍රිපාල සිරිසේන මැතිතුමාගේ රජය යටතේ කිසිසේත්ම හොරුන්ට ඉඩක් නෑ. අපි මේ ආණ්ඩුව හැදුවේ පහුගිය රජයේ හොරු අල්ලලා මේ රජයේ හොරකම් කරන පුද්ගලයින් ආරක්ෂා කරන්න නොවෙයි. හොරුන්ට මේ  යහපාලන රජය යටතේ කිසිදු ඉඩක් නෑ. 

සමහරු කියනවා. කෝ හොරු ඇල්ලුවාද කියළා.. පසුගිය රජයේ හොරු ගැනත්, මේ රජයේ හොරු ගැනත් දැන් විමර්ශන කෙරෙමින් තිබෙනවා. ඒක අධිකරණමය ක්‍රියාමාර්ගයක්. අපි රජයක් වශයෙන් අධිකරණ කටයුතුවලට බලපෑම් කරන්නේ නැහැ. අධිකරණය විසින් නිසි වෙලාවට අවශ්‍ය තීන්දුව දේවි. එතකං අපි රජය විදියට ගත හැකි සියලු උපරිම ක්‍රියාමාර්ග ගන්නවා. 

මහබැංකු බැදුම්කර සිද්ධිය ගැන මුලින්ම අල්ලස් හා දුෂණ කොමිසමට පැමිණිලි කලේ මම. දැන් ඒ විමර්ශන කටයුතු ඉතා හොඳින් කෙරෙනවා. ඒ අනුව බැදුම්කර මගඩියේ නියම තොරතුරු දැන් ඕනැවටත් වඩා හෙලිවෙමින් තිබෙනවා.. ඒ නිසා  අපි රජය විදියට කිසිසේත්ම හොරු ආරක්ෂා කරන්නේ නැහැ. මහජන දේපොළ හොරකම් කරළා රජසැප විදින්න කවුරුන් හරි හිතනවා නම් ඒ අයට මං කියන්නේ ඒ අදහස කරුණාකරලා හිතෙන් අයින් කර ගන්න. හොරුන්ට නිසි දඬුවම් රජය වශයෙන් අපි අනිවාර්යයෙන්ම ලබා දෙනවා යැයිද අමාත්‍යවරයා මෙහිදී පැවසීය. 

ඩබ්. එම්. ඩී. වන්නිනායක විසිනි

[rns_reactions]

තමා ජනාධිපතිවරයා ලෙස සිටින තාක් හමුදාව කුණු අදින්න යොදා නොගන්නා බවත්, එසේ කරන්නට අදහසක්වත් තමාට නොතිබූ බවත් ජනාධිපති මෛත්‍රිපාල සිරිසේන මහතා පැවැසීය.

කුණු ප්‍රශ්නය ඇතුළු ජනතාවට පොදුවේ බලපාන උග්‍ර ප්‍රශ්න විසඳීම සඳහා අදාළ ආයතනයන්ට උපදෙස් දී තිබෙන අතර එම උපදෙස් නිසි පරිදි ක්‍රියාත්මක කෙරෙන්නේ දැයි අධීක්ෂණය කිරීම සඳහා පමණක් හමුදාව යොදාගන්නා බවද ජනාධිපතිවරයා සඳහන් කළේය.

[rns_reactions]

ශ්‍රී ලංකා නිදහස් පක්ෂයේ ජ්‍යෙෂ්ඨතම සාමාජිකයකු ඇතුළු 14 දෙනකු පමණ පිරිසක් සම්බන්ධයෙන් දැඩි විනය ක්‍රියාමාර්ග ගැනීමට එම පක්ෂ මධ්‍යම කාරක සභාව තීරණය කර ඇතැයි වාර්තාවනවා.

ශ්‍රී ලංකා නිදහස් පක්ෂයේ තීන්දු තීරණවලට එකඟ නොවීම පක්ෂ නායකත්වය විවේචනය කිරීම, වෙනත් පක්ෂ පිහිටුවා ශ්‍රී ලංකා නිදහස් පක්ෂ සාමාජිකයින් ඒ තුළට ඇද ගැනීම, ඇතුළු චෝදනා ගණනාවක් මෙම සාමාජිකයින්ට එල්ල වී තිබෙනවා.

ශ්‍රි ලංකා නිදහස් පක්ෂයේ තීන්දු තීරණ කඩ කරමින් ඊට පටහැනිව දිගින් දිගටම කටයුතු කරමින් සිටි මේ සාමාජිකයන්ට එලෙස නොකරන ලෙසට පක්ෂ නායකත්වය මෙන්ම මධ්‍යම කාරක සභාව කරන ලද දැනුම් දී තිබියදී දීම් සියල්ල ප්‍රතික්ෂේප කරමින් කටයුතු කිරිම නිසා මීළඟ ක්‍රියාමාර්ගය කුමක් විය යුතුද යන්න පිළිබඳ පක්ෂ ජ්‍යෙෂ්ඨයන් දීර්ඝ වශයෙන් සාකච්ඡාකර මොවුනට එරෙහිව විනය පරික්ෂණයන් සිදු කළ යුතුය යන ස්ථාවරයකට එළඹී තිබෙනවා. මේ අනුව පක්ෂ ප්‍රතිපත්තිවලට එරෙහිව කටයුතු කරන සාමාජිකයන්ට එරෙහිව විනය පරික්ෂණ ආරම්භ කරන ලදි.

මේ අය සම්බන්ධයෙන් සිදු කෙරෙන පරික්ෂණ කිහිපයක් මේ වන විට අවසන් අදියරේ පවතින අතර ඉතා කඩිනමින් මේ පිරිස සම්බන්ධයෙන් තීරණ ගැනීමට නියමිත ය.

උතුරු පළාත් ප්‍රධාන අමාත්‍ය සී.වී විග්නේෂවරන් මහතාට එරෙහි විශ්වාසභංගය ඉල්ලා අස්කර ගන්නා බවට දෙමළ ජාතික සන්ධානයේ නායක විපක්ෂනායක ආර්.සම්බන්ධන් මහතා විසින් ඊයේ (19) උතුරු පලාත් ප්‍රධාන අමාත්‍ය සී.වී.විග්නේෂ්වරන් මහතා වෙතට ලිපියක් මගින් දැනුම් දී ඇත.

යාපනය රදගුරු ජස්ටින් ඥානප්‍රකාශම් පියතුන් සහ යාපන ප්‍රධාන හින්දු පූජක ශ්‍රී ශ්‍රී සෝමසුන්දරම් පූජකතුමන්ගේ මැදිහත්වීම මත මෙම අර්බුදය විසඳුමකට ගෙන ඒමට හැකි වූ බවද සම්බන්ධන් මහතා එහිදී සඳහන් කර ඇත.

මේ අනුව පළාත් ප්‍රධාන අමාත්‍යවරයාට එරෙහිව ඉලංගයි තමිල් අරසු කච්චි පක්ෂය විසින් ගෙන ආ විශ්වාසභංගය තමිල් අරසු කච්චි පක්ෂය විසින්ම ඉල්ලා අස්කර ගන්නා බවත් අමාත්‍යවරුන් සම්බන්ධයෙන් සිදුකරන විමර්ශන වලටද ඇගිලි ගැසිම් නොකරන බවත් සම්බන්ධන් මහතා මාධ්‍ය නිවේදනයක් නිකුත් කරමින් සඳහන් කරයි.

දූෂණ චෝදනා සනාථ නොවූ අමාත්‍යවරුන් දෙදෙනෙකු මසක නිවාඩුවක් සහිතව අමාත්‍යධූර අත්හිටුවීමට තීරණය කිරීමත් සමග මහ ඇමතිවරයාට එරෙහි විහ්වාසභංගයක් ගෙන ඒමට තමිල් අරසු කච්චි පක්ෂය පියවර ගෙන තිබුණු අතර එකී තීරණය වෙනස් කරන බවට මහ ඇමතිවරයා එකඟතාව පලකිරමින් ලිපියක් යැවීමත් සමග මෙම විශ්වාසභංගය ඉල්ලා අස්කර ගැනීමට පියවර ගන්නා බවට විපක්ෂ නායක වරයා තිරණය කර තිබෙන අයුරු පෙනී යයි.

– වන්නි රොමේෂ් මධුෂංඛ

[rns_reactions]

ග්‍රාමීය ආර්ථිකය පිළිබඳ ඇමති පී. හැරිසන් මහතා විසින් ජනතා මුදල් අවභාවිතයක යෙදෙන බවට සමස්ත ලංකා ගොවිජන සම්මේලනය විසින් අද (19) පෙරවරුවේ දූෂණ මර්ධන කමිටු ලේකම් කාර්යාලයට පැමිණිල්ලක් ඉදිරිපත් කළේය.

එම අවස්ථාවට සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා සහ එහි ලේකම් ටී.බී. සරත් මහතා ඇතුළු පිරිසක් එක් වී සිටියහ.

පී. හැරිසන් ඇමතිවරයා නීති රෙගුලාසි උල්ලංඝණය කරමින් නියමිත ඉන්ධන ප්‍රමාණයට වඩා වැඩි ඉන්ධන ප්‍රමාණයක් ලබා ගනිමින් රුපියල් දසලක්ෂ පනස නවදහස් දෙසිය හැත්තෑ ලහයි ශත පනහක(රු. 1,059,275.50) මුදලක් අවභාවිතා කර ඇති බව එම පැමිනිල්ලේ සඳහන් කර ඇත.

කොළඹ නගරයේ ඇළ මාර්ග හරහා රාජ්‍ය හා පෞද්ගලික ඒකාබද්ධ මගී ප්‍රවාහන යාත්‍රා පද්ධතියක් සකස් කිරීම සඳහා ටෙන්ඩර් කැඳවීමට මහ නගර සංවර්ධන අමාත්‍යංශය පියවර ගෙන ඇත. ජූලි 24 වැනිදා ටෙන්ඩර් කැඳවීම අවසන් වන බවත් තෝරාගන්නා ආයෝජකයන් සති 9ක් ඇතුළත ප්‍රකාශයට පත් කිරීමට නියමිත බවත් එම අමාත්‍යංශය නිවේදනයක් නිකුත් කරමින් පවසයි.

මේ සම්බන්ධයෙන් ජාත්‍යන්තර හා දේශීය ආයෝජකයන්ට අවස්ථාව සලසා දී තිබේ. මේ සඳහා නෙදර්ලන්තයේ තාක්ෂණික ආධාර වැඩසටහන යටතේ එරට මහජන – පෞද්ගලික සම්බන්ධතා උපදේශකවරු සහයෝගය ලබා දෙති.

මහ නගර හා බස්නාහිර සංවර්ධන අමාත්‍යංශය යටතේ ඇති ශ්‍රී ලංකා ඉඩම් ගොඩකිරීමේ හා සංවර්ධනය කිරීමේ සංස්ථාව (SLLRDC) මෙම ව්‍යාපෘතියේ ප්‍රධානතම ආයතනය ලෙස කටයුතු කරයි. මෙම ව්‍යාපෘතිය යටතේ මගී ප්‍රවාහන යාත්‍රා සඳහා මාර්ග තුනක් සකස් කෙරේ. ඒ අනුව වැල්ලවත්ත සිට බත්තරමුල්ල දක්වා (IW-1) , කොටුව සිට යුනියන් පෙදෙස (IW-2) සහ මට්ටක්කුලිය සිට හංවැල්ල දක්වා (IW-3) මෙම යාත්‍රා යෙදවීමට නියමිතය.

පළමු අදියර යටතේ වැල්ලවත්ත සිට බත්තරමුල්ල දක්වා කොටස මැරීන් ඩ්‍රයිව්, ගාලු පාර, හයිලෙවල් පාර, බේස්ලයින් පාර, නාවල පාර සහ පාර්ලිමේන්තු පාර ප්‍රධාන මාර්ග 6 ක් ඔස්සේ කඩිනමින් නිම කිරීමට අපේක්ෂිතය.
දෙවැනි අදියර යටතේ කොටුව සහ යුනියන් පෙදෙසේ වාණිජ ස්ථාන දක්වා මාර්ග තදබදය වැඩි වේලාවන්වල දී කාලය ඉතුරු කරගනිමින් ගමන් කළ හැකි මගී යාත්‍රා පද්ධතියක් සකස් කිරීමට නියමිතය.

මෙහි තෙවැනි අදියර යටතේ ක්‍රියාත්මක කිරීමට නියමිත වන්නේ මට්ටක්කුලිය සිට හංවැල්ල දක්වා කැලණි ගංඟාව ආශ්‍රිතව ලෝලෙවල් මාර්ගය ආවරණ වන පරිදි සකස් කරන කොටසයි.

මෙම ව්‍යාපෘතිය සම්පූර්ණයෙන් අවසන් කිරීමට ගතවන කාලය සම්බන්ධයෙන් මෙතෙක් අදහසක් ප්‍රකාශ කළ නොහැකි බවත් තවමත් මෙය ආරම්භක අදියරේ පවතින බැවින් ටෙන්ඩර් ලබාගැනීම පමණක් සිදුවන බවත් මහ නගර හා බස්නාහිර සංවර්ධන අමාත්‍යංශයේ ප්‍රකාශකයෙක් පැවසීය.

[rns_reactions]

බෞද්ධ අප මේ රටේ මහජාතිය අප යනුවෙන් පැවසුවද, අපට මේ රට අයිති බව පැවසුවද, අපෙන් විය යුතු යුතුකමට වඩා අප කතා කරන්නේ වෙනත් කාරණා පිළිබඳවයි යනුවෙන් ශ්‍රී ලංකා නිදහස් පක්ෂ මහලේකම් දුමින්ද දිසානායක මහතා පැවසීය.

තලාව නබඩවැව ශ්‍රී බෝධිරුක්ඛාරාම විහාරස්ථානයේ බෝධීන් වහන්සේ වටා ඉදිකල බෝධි ප්‍රාකාරය හා රන් වැට නිරාවරණය කිරීමේ පුණ්‍ය උත්සවයේ ප්‍රධාන ආරාධිතයා ලෙස සහභාගී වෙමින් ඒ මහතා මේ බව ප්‍රකාශ කර සිටියේය.

එහිදී විහාරස්ථ භූමියේ අභිනවයෙන් ඉදිවන බුද්ධ මන්දිරයේ ඉදිරි වැඩකටයුතු නිරීක්ෂණය කල අමාත්‍යවරයා විහාරාධිපති ස්වාමීන් වහන්සේ ඇතුලු දායක දායිකාවන් සමගින් විහාරස්ථානයේ ඉදිරි සංවර්ධන කටයුතු පිළිබඳව සාකච්ජා කල අතර ඒ සඳහා මැදිහත් වීමට පොරොන්දු විය.

මෙහිදී වැඩිදුරටත් අදහස් දැක්වූ අමාත්‍යවරයා,

අපේ රටේ බෞද්ධයෝ බණ අහන තරමට බණ පිළිපැද්දා නම් මේ රටේ මේ සිදුවන තරම් අපරාධ සිදුවන්නේනෑ. අද අපි පත්තරයක් බැලුවොත්, රූපවාහිනියක් බැලුවොත්, ගුවන් විදුලියට සවන් දුන්නොතපිට නිතරම අහන්න ලැබෙන්නේ හොද නැති දේවල්. මාධ්‍යයත් හැමදාම ඉල්ලුම කියලා සපයා දී තිබෙන්නේ නරක දේම තමයි. බෞද්ධ අපි මේ රටේ මහා ජාතිය කියලා අපි කියනවා. හැබැයි අපෙන් විය යුතු යුතුකමට වඩා අප කතා කරන්නේ වෙනත් කාරණා පිළිබඳවයි. ඒ නිසා අපි බෞද්ධයෝ විදිහට පංසිල් රකින්න ඕන්, යම් ප්‍රශ්න ඇතිවෙලා තියෙනවනම් ඒ ප්‍රශ්නත් සමනය කරගෙන බෞද්ධයෝ විදිහට ආදර්ශමත්ව මේ රටට නායකත්වය ලබාදෙන්න අපි කටයුතු කල යුතු වෙනවා. අපි සෑම කාරණයකටම උද්ගෝෂණ හෝ අරගල කරනවා. මේ දේවල්වලින් රටක් හදන්න හෝ වෙනස් කරන්න පුලුවන්කමක් නෑ. හැබැයි අපිට බෞද්ධයෝ ලෙස අපෙ ආගමානුකූලව හිතන්න, වෙනස් වෙන්න පටන් ගත්තොත් මේ දේවල් මහා අමාරු කාරණා නෙමෙයි. හැබැයි අපි දකිනවා සමහර වෙලාවට යම් යම් වැරදි සිදු වෙනවා. අපි වැරදි කර කර අනෙක් අයගෙන් අහනවා ඇයි එහෙම කරන්නේ කියලා. අපේ ආගමේ ඉගැන්වීම් අනුව පලමුව අපි හැදෙමු. වරදට සමාව දෙමු. නැවත වරක් එවැනි වරදක් නොවෙන්න හැඩගස්සා ගමු. යනුවෙන් පැවසීය.

[rns_reactions]

කොළඹ නගරයේ සහ තදාසන්න නගරවල ගොඩගැසී තිබෙන කසළ දින තුනක් ඇතුලත ඉවත් නොකරන්නේ නම් මහ ඇමතිධූරයෙන් ඉවත්කරන බවට බස්නාහිර මහ ඇමති ඉසුර දේවප්‍රිය මහතාට ජනාධිපතිවරයා තදින් අවවාද කර ඇතැයි වාර්තා වේ.

ජනාධිපතිවරයා බස්නාහිර මහඇමති දේවප්‍රිය මහතා පෙරේදා(17) උදේ ජනාධිපති නිල නිවසට කැඳවා මේ බව දැනුම්දී ඇතැයිද රජයේ ආරංචිමාර්ග සදහන් කරයි.

කොළඹ නගරයේ සහ තදාසන්න නගරවල කුණු ගොඩගැසීම සම්බන්ධයෙන් ජනාධිපතිවරයා මහ ඇමතිවරයාට තදින් දොස් පවරා ඇතැයි වාර්තා වේ.

ඩෙංගු මර්ධනය සම්බන්ධයෙන් පෙරේදා පෙරවරුවේ පැවති හදිසි රැස්වීමේදීත් ජනාධිපතිවරයා මේ පිළිබඳව ප්‍රකාශ කර ඇති අතර එම සාකච්ජාවට මහ ඇමතිවරයා සහභාගී නොවූ බවද දැනගැනීමට ඇත.

මේ අතර කොලඹ නගර සභාවේ කුණු ඉවත්කිරීමේ ටෙන්ඩරය නගර සභාව විසින් වාර්ෂිකව පෞද්ගලික සමාගමකට භාරදිය යුතු වුවත් මෙවර එම ටෙන්ඩරය වසර හතරක කාලයකට එක්වරම ලබාදී ඇති බවද ආරංචිමාර්ග කියයි.

වසරකට රුපියල් මිලියන 300 බැගින් වසර හතර සඳහා රුපියල් මිලියන 1200කට එම ටෙන්ඩරය ලබාදී ඇති බව වාර්තා වේ.

[rns_reactions]