Blog

“සියලුම රාජ්‍ය සේවකයන්ට රුපියල් 25000ක දීමනාවක් වසර තුනක් පුරා.
පහළම සේවකයන්ටත් අවම වශයෙන් මසකට රුපියල් 55000ක් හෝ ඊට වඩා වැඩි ප්‍රමාණයක්.”

රජයේ ප්‍රවෘත්ති දෙපාර්තමේන්තුවේ දී පසුගිය 18 වැනිදා පැවතී විශේෂ මාධ්‍ය හමුවකට එක් වෙමින් රජයේ කැබිනට් ප්‍රකාශක අමාත්‍ය ආචාර්ය බන්දුල ගුණවර්ධන මහතා රාජ්‍ය සේවක දැවැන්ත වැටුප් වැඩිවීමට එරෙහි ප්‍රචාරණයන් පිලිබඳ මෙලෙස අදහස් දැක්වීය.

“කැබිනට් අනුමැතිය ලැබූ රාජ්‍ය සේවක වැටුප් වර්තක යෝජනාව ජාත්‍යන්තර මූල්‍ය අරමුදලේ ප්‍රතිපාදන මත වසර තුනක් නොවෙනස්ව පවතිනවා. කුමන රජයක් පැවතුණත් ජාත්‍යන්තර මූල්‍ය අරමුදලේ යෝජනා මත මතය ක්‍රියාත්මක විය යුතුයි. අයවැය වෙනුවෙන් මෙම වැටුප් වැඩි කිරීමේ යෝජනාව ඉදිරිපත් කර ඇති අතර එය කැබිනට් අනුමැතිය ලැබී තිබෙනවා. නමුත් ඇතැම් මාධ්‍ය මෙය නිවැරදිව ප්‍රචාරය කර නැහැ.
කැබිනට් මණ්ඩලයේදී ජීවන වියදම් පිළිබඳ සිදුකල ප්‍රකාශය වැරදි ආකාරයට සමාජගත වනවා නම් එය නිවැරදි කරන්නට කැබිනට් ප්‍රකාශක වශයෙන් මට යුතුකමක් සහ වගකීමක් තිබෙනවා.
කැබිනට් පත්‍රිකා රහස්‍යයයි. ඒවා එළියට ගෙනයන්නේ නැහැ. අමාත්‍යංශ ලේකම්වරුන්ට ඒවායේ පිටපත් යොමු කරනවා. කැබිනට් ප්‍රකාශක වශයෙන් මා කටයුතු කරනවා. එම කටයුතුවලදී මාධ්‍යවේදීන් ද වගකීමකින් යුතුව කටයුතු කළා.මා විසින් සිදුකරන ප්‍රකාශ ආණ්ඩුක්‍රම ව්‍යවස්ථාවට අනුව සිංහල හා දෙමළ මාධ්‍යයෙන් ප්‍රකාශ වනවා. ඒවා මාධ්‍ය ආයතන වලටද යොමු කරනු ලබනවා. ඒවා ආචාර්ය බන්දුල ගුණවර්ධනගේ ප්‍රකාශ නොවෙයි. මා විසින් ප්‍රකාශ කරනු ලබන්නේ කැබිනට් මණ්ඩලයේදී ගනු ලබන තීරණයි.
දීර්ඝ කාලයක් මූලික වැටුප ගලපලා නැති නිසා මූලික වැටුප ඉහල නැංවීම සහ රුපියල් 25000 බැගින් ජීවන වියදම් දීමනාව වසර තුනක් නොකඩවා ලබා දෙන බවට යෝජනාවක් තිබුණා.
මේ තීරණ මම දැනුම් දුන් පසු හිතවත් මාධ්‍ය ආයතන එහි කොටසක් පමණක් සමාජගත කර තිබෙනවා. එහිදී බොහෝ අය සඳහන් කළේ මූලික වැටුප ගැන නොව රු.25000ක් වැඩි කිරීම පිලිබඳ පමණයි.
ආණ්ඩු කරනය සහ දේශපාලනය කිරීම යනු කරුණු දෙකක්. මේ වන විට මුදල් අමාත්‍යාංශය අයවැය ලේඛනය සකස් කරමින් තිබෙනවා. ඒවට ඇතුළු කිරීම සඳහා කැබිනට් මණ්ඩල නිවේදනය නිවැරදි විය යුතුයි. සියලුම රාජ්‍ය සේවකයන්ට රුපියල් 25000ක දීමනාවක් සංශෝධනය නොකොට වසර තුනක් පුරාවට ලබා දීම සිදු වනවා.
දෙවනුව මූලික වැටුප සංශෝධනය වී නැතිනම් සියයට 255.35 අතර ප්‍රමාණයකින් වැඩි වනවා. පහළම සේවකයන්ට අවම වශයෙන් මසකට රුපියල් 55000ක් හෝ ඊට වඩා වැඩි ප්‍රමාණයක් ලැබෙනවා.
2027 දක්වා අයවැය සඳහා හිඟ වන මූල්‍ය ප්‍රතිපාදන ප්‍රමාණය ලබාදීමට කටයුතු කරන්නේ ජාත්‍යන්තර මූල්‍ය අරමුදල මඟින්. ඒ සඳහා එකඟතා ලේඛණ වලට අත්සන් කර තිබෙනවා.
කවුරුන් ආණ්ඩු බලය හෙබ වුවත් මූල්‍ය අරමුදල විසින්ම සංශෝධනය කලේ නැත්නම් මූල්‍ය අරමුදලේ කටයුතු එලෙසින්ම සිදුවනවා. වැටුප් වර්ධක යෝජනාව මූල්‍ය අරමුදල මගින් සපයා ගන්නා බැවින් මෙම යෝජනාව ඉදිරිපත් කර තිබෙන්නේ මෙම වැටුප් ගෙවීමට මුදල් තිබෙන නිසයි. මූල්‍ය කළමනාකරණ වගකීම් පිලිබඳ පනතක් තිබෙනවා.”

මෙරට ඉතිහාසය මුහුණ දුන් බරපතලම ආර්ථික අර්බුදයෙන් රට ගොඩගෙන ස්ථාවරත්වයක් ඇති කර යළි ප්‍රගමනයේ මාවතට ගෙන ඒමට පසුගිය දෙවසර තුළ ජනාධිපති රනිල් වික්‍රමසිංහ මහතා මහඟු කාර්‍යභාරයක් සිදුකළේය.

සෑම අංශයකින්ම බිඳ වැටී තිබු මෙරට ආර්ථිකය පමණක් නොව, ස්ථාවරත්වය සහ ප්‍රගමනය වෙනුවෙන් අත්‍යවශ්‍ය සෑම ක්ෂේත්‍රයක්ම ආවරණය වන ආකාරයට ජනාධිපතිවරයාගේ වැඩපිළිවෙළ සමන්විත විය.

ආර්ථික පරිවර්තන පනත සම්මත කර ඉතිහාසයේ ප්‍රථම වතාවට, ජාතික සැලැස්මක්, ඉලක්කගත වැඩපිළිවෙළක් සහ වගවීමක් තුළ ආණ්ඩුකරණය සිදුවන තත්ත්වයක් ඇති කිරීම, රාජ්‍ය මූල්‍ය කළමනාකරණ පනත සම්මත කිරීම හරහා රටේ නිසි මූල්‍ය විනයක් ඇති කිරීම, නව පනත් සහ කෙටුම්පත් 83ක් සම්මත කිරීම සඳහා පාර්ලිමේන්තුවට ඉදිරිපත් කර මෙරට අත්‍යවශ්‍ය නීති ප්‍රතිසංස්කරණ සිදුකිරීම හා දූෂණය පිටුදැකීම වෙනුවෙන් ජාත්‍යන්තර ප්‍රමිතියෙන් යුතු ආසියාවේ බලගතුම දූෂණ විරෝධී පනත හඳුන්වාදීම, මෙරට ලක්ෂ 20ක ජනතාවට සින්නක්කර ඉඩම් ඔප්පු ලබාදීම සහ අඩුආදායම්ලාභී නාගරික මහල් නිවාස වාසීන්ට එම නිවාසවල සින්නක්කර අයිතිය ලබාදීම, සමෘද්ධිය මෙන් තුන් ගුණයක මූල්‍ය ප්‍රතිපාදන වෙන් කොට ආර්ථික අර්බුදය හමුවේ වැඩිම පීඩාවකට පත්වූ ලක්ෂ 27ක ජනතාවකට “අස්වැසුම” සුබසාධක ප්‍රතිලාභ වැඩසටහන දියත් කිරීම, ආර්ථික ඩිජිටල්කරණය ඇරඹීම එහිලා සුවිශේෂි ය.

එසේම කාන්තාවන් සවිබල ගැන්වීමේ පනත හරහා කාන්තාවන් සහ ළමුන්ගේ සුරක්ෂිතභාවය තහවුරු කෙරෙන අතර, නව අධ්‍යාපන ප්‍රතිසංස්කරණ දියත් කිරීම , කෘෂි නවීකරණය, උතුරු නැගෙනහිර පළාත් සංවර්ධනය වෙනුවෙන් වැඩිම මුදල් ප්‍රමාණයක් යෙදවීම ඇතුළුව ජාතික සමගිය ඇතිකිරීම වෙනුවෙන් ක්‍රියාත්මක වැඩසටහන් රැසක් ක්‍රියාත්මක කිරීම, වතුකරයේ ජනතාවගේ දෛනික වැටුප් වැඩිකිරීම සහ නිවාස අයිතිය ලබාදීම හරහා ජීවන තත්ත්වය නැංවීම ද සිදුකෙරිණ.

ඖෂධ හිඟය අවසන් කර රෝහල් ආශ්‍රිත යටිතල පහසුකම් නංවමින් බිඳ වැටී තිබූ සෞඛ්‍ය ක්ෂේත්‍රය යළි ශක්තිමත් කිරීම, බලශක්ති අර්බුදය සමනය කිරීම හා එහි පුනර්ජනනීය බලශක්තිය කෙරෙහි වැඩි නැඹුරුවක් ඇති කෙරෙන ව්‍යාපෘති ගණනාවක් ඇති කිරීම, දේශගුණික විපර්යාස සම්බන්ධයෙන් වන කතිකාව ජාත්‍යන්තර තලය දක්වා ගෙන යාම ඇතුළු සංවර්ධිත රටක් බිහිකිරීම වෙනුවෙන් ඉතිහාසයේ කිසිදු ආණ්ඩුවක් යටතේ සිදුනොවූ ඉමහත් කාර්‍යභාරයක් ගෙවුණු දෙවසරක කාලය තුළ සිදුකිරීමට ජනාධිපති රනිල් වික්‍රමසිංහ පාලනය සමත්ව තිබේ.

ඒ සම්බන්ධයෙන් භාෂා ත්‍රිත්වයෙන් සකසන ලද වැඩිදුර තොරතුරු ඇතුළත් ” අර්බුදය ජයගත් දෙවසර ” වාර්තාව ඇමුණුම් i ලෙසත් , ජනාධිපති රනිල් වික්‍රමසිංහ මහතාට ශක්තියක් වෙමින් වැටුණු රට ගොඩ ගැනීම සඳහා කැබිනට් අමාත්‍යංශ 29 ක් පසුගිය දෙවසරක කාලය තුළ ක්‍රියාවට නංවනු ලැබූ වැඩසටහන් ඇතුළත් ” අභියෝගාත්මක දෙවසරක ප්‍රගතිය ” වාර්තාව ඇමුණුම් ii ලෙසත් මේ සමඟ ඉදිරිපත් කර ඇත.

අර්බුදය ජයගත් දෙවසර
අභියෝගාත්මක දෙවසරක ප්‍රගතිය

පාසල් දරුවන් තිස් පන්දහසක පමණ පිරිසක් පසුගිය වසර දෙක තුළ ජනාධිපති මන්දිරය, පැරණි පාර්ලිමේන්තු ගොඩනැගිල්ලේ පිහිටි ජනාධිපති කාර්යාලය, වරාය නගරය, මහබැංකුව, පාර්ලිමේන්තුව, නෙළුම් කුළුණ ඇතුළු කොළඹ අවට අධ්‍යාපනික වටිනාකමක් සහිත ස්ථාන නොමිලේ නැරඹීමට අවස්ථාව සලසා දී තිබේ.

මෙවන් විශාල සිසු පිරිසකට මෙම වටිනා අවස්ථාව හිමි වුයේ ඉතිහාසයේ පළමු වරට වන අතර ජනාධිපති රනිල් වික්‍රමසිංහ මහතාගේ උපදෙස් පරිදි, ජනාධිපති ලේකම් සමන් ඒකනායක මහතාගේ මගපෙන්වීමෙන් ජනාධිපති කාර්යාලයේ ත්‍රිවිධ හමුදා සම්බන්ධීකරණ කාර්යාලයේ මෙහෙයවීමෙන් ක්‍රියාත්මක කරන ලද මෙම වැඩසටහන සමඟ ශ්‍රී ලංකා පාර්ලිමේන්තුව, අධ්‍යාපන අමාත්‍යාංශය හා ජාතික තරුණසේවා සභාව ද අත්වැල් බැඳ ගනු ලැබීය.

මෙම ක්ෂේත්‍ර චාරිකාව තුළදී සිසු දරුවන්ට ශ්‍රී ලංකාවේ ප්‍රජාතන්ත්‍රවාදී ඉතිහාසයේ විවිධ කඩඉම් ඇතුලු ඓතිහාසික තොරතුරු ඇතුළත් වාර්තා මෙන්ම සුවිශේෂී මතක සටහන් දැක බලාගැනීමට අවස්ථාව උදාවූ අතර ජනාධිපතිවරයා, ජනාධිපති ලේකම්වරයා සමඟ මෙන්ම ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක මහතා සමඟ ද නිරතුරුව අදහස් හුවමාරු කර ගැනීමට අවස්ථාව හිමි විය.

කොළඹින් දුර බැහැර දුෂ්කර පළාත්වල පාසල්වල සිසුන් ඇතුළු දිවයින පුරා පාසල් 160කට අධික සංඛ්‍යාවක සිසුන් මේ වන විට මෙම ක්ෂේත්‍ර චාරිකාව සඳහා එක්ව තිබෙන අතර වැඩසටහන අඛණ්ඩව ක්‍රියාත්මකය.

එසේම ජනාධිපති කාර්යාලයේ පැරණි පාර්ලිමේන්තුව පවත්වාගෙන ගිය ප්‍රධාන ශ්‍රවණාගාරයේ දී ජනාධිපතිවරයාගේ ආරාධනය පරිදි මේ වන විට පාසල් රැසක ශිෂ්‍ය පාර්ලිමේන්තු සහ යොවුන් පාර්ලිමේන්තු සැසි ගණනාවක් පවත්වා තිබෙන අතර රාජ්‍ය පාලන යාන්ත්‍රණය පිළිබඳ දරුවන්ට අවබෝධයක් ලබා දෙමින් ඔවුන්ගේ නායකත්ව ගුණාංග ඉහළ නැංවීම එහි අරමුණයි.

ජනාධිපති රනිල් වික්‍රමසිංහ මහතාගේ මෙන්ම ජනාධිපති ලේකම් සමන් ඒකනායක මහතාගේ ප්‍රධානත්වයෙන් පැවැත්වුණු එම සැසිවාර සඳහා කථානායක මහින්ද යාපා අබේවර්ධන මහතා මෙන්ම මැති ඇමතිවරුන් ද, ශ්‍රී ලංකා පාර්ලිමේන්තුවේ මහ ලේකම් කුෂානි රෝහණධීර මහත්මිය සහ පාර්ලිමේන්තු කාර්ය මණ්ඩලය ද එක්වු අතර ප්‍රජාතන්ත්‍රවාදී ව්‍යුහය, පාර්ලිමේන්තුව හා පුරවැසියා අතර සම්න්ධතාව, පරිපාලනය හා කාර්යභාරය යන තේමාවන් යටතේ එහිදී සිසු දරුවන් දැනුවත් කිරීමේ දේශනද පැවැත්විණි.

• “දැක්ම” ප්‍රකාශය ඉන්දු – ශ්‍රී ලංකා ඓතිහාසික සහයෝගීතාව සිහිපත් කරමින් අනාගත සමීප සබඳතා සඳහා මාවත විවෘත කරනවා.
• ගෝලීය දකුණ ශක්තිමත් කිරීමට ඉන්දියාව දරන උත්සාහය ප්‍රශංසනීයයි – ජනපති ගෝලීය දකුණේ හඬ සමුළුවේ තුන්වැනි රාජ්‍ය නායක සැසිය අමතමින් පවසයි.

බෙංගාල බොක්ක සහ ඒ අවට කලාපය මේ වන විට වර්ධනයේ මධ්‍යස්ථානයක් බවට පත්වෙමින් තිබෙන නිසා බිම්ස්ටෙක් (BIMSTEC) සංවිධානයේ වැදගත්කම දිනෙන් දින ඉහළ යමින් පවතින බවත්, බිම්ස්ටෙක් සංවිධානයේ සාමාජිකයෙකු ලෙස ශ්‍රී ලංකාව, ඉන්දියාව සමඟ සමීප ආර්ථික ඒකාබද්ධතාවයකින් යුතුව, ජපානයේ සිට ඉන්දියාව දක්වා ආර්ථික සහයෝගීතා ගිවිසුම් ඇති කර ගැනීමට අපේක්ෂා කරන බවත් ජනාධිපති රනිල් වික්‍රමසිංහ මහතා පැවසීය.

ජනාධිපතිවරයා මේ අදහස් පළ කර සිටියේ ඊයේ (17) ගෝලිය දකුණේ හඩ සමුළුවේ රාජ්‍ය නායක සැසිය අනුරාධපුර ජනාධිපති මන්දිරයේ සිට මාර්ගගත ක්‍රමවේදය ඔස්සේ අමතමිනි.

“තිරසර අනාගතයක් සඳහා සවිබල ගැන්වූ ගෝලීය දකුණක්” යන තේමාව යටතේ තුන්වැනි වරට පැවත්වෙන මෙම සමුළුව ඉන්දීය අග්‍රාමාත්‍ය නරේන්ද්‍ර මෝදි මහතාගේ ප්‍රධානත්වයෙන් සහ රටවල් රැසක රාජ්‍ය නායකයින්ගේ සහභාගීත්වයෙන් ආරම්භ විය.

මෙහිදි අදහස් දැක්වූ ජනාධිපතිවරයා වැඩිදුරටත් සඳහන් කළේ බටහිරට තවදුරටත් ගෝලීය නායකත්වයේ ආධිපත්‍යය දැරීමට නොහැකි තැනකට ළඟා වී ඇති අතර එවන් තත්ත්වයක් තුළ ගෝලීය දකුණ ශක්තිමත් කිරීමට ඉන්දියාව දරන උත්සාහය ප්‍රශංසනීය බවයි.

ගෝලීය දකුණේ හඩ සමුළුව ගෝලීය දකුණ මුහුණ දෙන බොහෝ ගැටලු සම්බන්ධයෙන් පොදු ස්ථාවරත්වයකට පැමිණිමට උපකාරී වන බවද ජනාධිපතිවරයා පැවසීය.
ඉන්දු – ශ්‍රී ලංකා සබඳතාව පිළිබඳව ද මෙහිදී අදහස් දැක්වු ජනාධිපතිවරයා ශ්‍රී ලංකාව සහ ඉන්දියාව අතර ඇතිකරගත් “දැක්ම” ප්‍රකාශය දෙරට අතර පවතින ඓතිහාසික සහයෝගීතාව සිහිපත් කරන අතරම අනාගත සමීප සබඳතා සඳහා මාවත විවෘත කරන බවත්, එය අවසානයේ බොහෝ ක්ෂේත්‍ර හරහා දෙරට අතර ශක්තිමත් ඒකාබද්ධතාවයකට හේතු වනු ඇති බවත් පැවසීය.

එසේම ශ්‍රී ලාංකීය ජනතාව වසර දෙකක් පුරා මුහුණදුන් දුෂ්කරතා අවම කර ගනිමින් බංකොලොත් භාවයෙන් මිදීමට හැකි වූයේ ඉන්දීය අග්‍රාමාත්‍ය මෝදි මහතාගේ සහ ඉන්දියාවේ ත්‍යාගශීලීභාවය නිසා බව ද සිහිපත් කළ ජනාධිපතිවරයා ඒ වෙනුවේ සිය ස්තූතිය පිරිනැමීමට ද කටයුතු කළේය.

ගෝලීය දකුණේ හඬ සමුළුව ඇමතූ ජනාධිපතිවරයා වැඩිදුරටත් මෙසේද පැවසීය,

“ගෝලීය දකුණේ හඬ පිළිබඳ තුන්වන මාර්ගගත සමුළුව පැවැත්වීම පිළිබඳව මා සියලුදෙනාට ස්තූතිවන්ත වෙනවා. මෙම සමුළු මාලාව මඟින් අපට අපගේ දැක්ම පිළිබඳ අවබෝධයක් ලබා ගැනීමට මෙන්ම එකිනෙකා සමඟ සම්බන්ධ වීමට අවස්ථාව ලැබෙනවා.

ඒ වගේම මෙම සමුළුව ගෝලීය දකුණ මුහුණ දෙන බොහෝ ගැටලු සම්බන්ධයෙන් පොදු ස්ථාවරයකට පැමිණීමට අපට උපකාර කරනවා. බටහිරට තවදුරටත් ගෝලීය නායකත්වයේ ආධිපත්‍යය දැරීමට නොහැකි තැනකට ළඟා වී ඇති අතර, ඔවුන් මේ වන විට ගැටලුවේ කොටසක් බවට පත්ව සිටිනවා. යුක්‍රේනය සහ ගාසා තීරය ඒ පිළිබඳ ප්‍රධාන උදාහරණ බවට පත්වෙනවා.

ඒ පිළිබඳ පෙර කථිකයන් විසින් අදහස් දැක්වු නිසා මා ඒ පිළිබඳ සඳහන් කිරීමට මම බලාපොරොත්තු වන්නේ නැහැ. මෙම සන්දර්භය තුළ, ගෝලීය දකුණ ශක්තිමත් කිරීමට ඉන්දියාව දරන උත්සාහය අප අගය කළ යුතුයි.

ශ්‍රී ලංකාව සිය ආර්ථික ස්ථාවරත්වය ළඟා කර ගැනීමට මේ වන විට ගෙන ඇති පියවරද මා මෙහිදී සඳහන් කිරීමට කැමතියි. බංකොලොත්භාවයෙන් මිදීම සඳහා ශ්‍රී ලංකාව නිල ණයහිමි රටවල් සහ, චීන එක්සිම් බැංකුව, ජාත්‍යන්තර මූල්‍ය අරමුදල, ලෝක බැංකුව සහ ආසියානු සංවර්ධන බැංකුව සමඟ ගිවිසුම්වලට එළැඹ සිටිනවා.

ශ්‍රී ලාංකීය ජනතාව වසර දෙකක් පුරා මුහුණදුන් දුෂ්කරතා අවම කර ගනිමින් බංකොලොත් භාවයෙන් මිදීමට අපට හැකි වූයේ ඉන්දීය අග්‍රාමාත්‍ය නරේන්ද්‍ර මෝදි මහතාගේ සහ ඉන්දියාවේ ත්‍යාගශීලීභාවය නිසා බවද මම මෙම අවස්ථාවෙහිදී සඳහන් කළ යුතුයි.

අපගේ රටවල් දෙක විසින් එකඟ වූ “දැක්ම” ප්‍රකාශය අප දෙරට අතර වසර 2000කට අධික කාලයක් පුරා පවතින සහයෝගීතාව සිහිපත් කරන අතරම අනාගත සමීප සබඳතා සඳහා මාවත විවෘත කර තිබෙනවා. මෙය අවසානයේ බොහෝ ක්ෂේත්‍ර හරහා අපගේ රටවල් දෙක අතර ගැඹුරු ඒකාබද්ධතාවයකට හේතු වනු ඇතියි.

මේ වන විට අප විස්තීරණ ආර්ථික හා තාක්ෂණික ගිවිසුමකට එළැඹීමේ අවසන් අදියරට ළඟා වී සිටිනවා. විදුලිය, ප්‍රවාහන සහ ගොඩබිම් සම්බන්ධතාව ඇති කිරීම ආරම්භ කරන අතර, අප එකඟ වූ අනෙකුත් ව්‍යාපෘති මෙන්ම ත්‍රිකුණාමල වරාය සංවර්ධනය කෙරෙහි ද අවධානය යොමු කර තිබෙනවා. මෙම ව්‍යාපෘති අපගේ දැනුම හා තාක්‍ෂණය වැඩිදියුණු කිරීමට උපකාරී වන අතර ඩිජිටල් ආර්ථිකයක් කරා යාමට ද ශ්‍රී ලංකාවට හැකිවෙනවා. ඒ වෙනුවෙන් ඉන්දියාව ලබා දෙන සහය පිළිබඳවද මාගේ කෘතඥතාව පළ කරනවා.

බෙංගාල බොක්ක සහ ඒ අවට කලාපය පිළිබඳව ද මා යමක් සඳහන් කළ යුතුයි. අප මේ වන විට වර්ධනයේ මධ්‍යස්ථානයක් බවට පත්වෙමින් සිටිනවා. එනිසා බිම්ස්ටෙක් (BIMSTEC) සංවිධානයේ වැදගත්කම දිනෙන් දින ඉහළ යමින් පවතිනවා. බිම්ස්ටෙක් සංගමයේ සාමාජිකයෙකු ලෙස ශ්‍රී ලංකාව, ඉන්දියාව සමඟ සමීප ආර්ථික ඒකාබද්ධතාවයකින් යුතුව, ජපානයේ සිට ඉන්දියාව දක්වා ආර්ථික සහයෝගීතා ගිවිසුම් ඇති කර ගැනීම අරමුණු කරගනිමින් කලාපීය විස්තීරණ ආරථික හවුල්කාරීත්වයෙහි (RCEP) සාමාජිකත්වය ලබාගැනීමට අපේක්ෂා කරනවා. බෙංගාල බොක්ක කලාපය අපේ ආර්ථිකයේ දියුණුවට අත්‍යවශ්‍ය බව අප පිළිගන්නවා.

මා කථා කිරීමට අදහස් කළ බොහෝ මාතෘකා පිළිබඳ දැනටමත් පෙර කථිකයන් බොහෝ දේ සඳහන් කළා. නමුත් මා මෙහිදී යමක් සඳහන් කිරීමට කැමතියි. සෝවියට් දේශයේ බිඳවැටීම, ශිෂ්ටාචාර ගැටුම, ඉතිහාසයේ අවසානය වැනි අදහස්වලින් හැඩගැසුණු බටහිර ආධිපත්‍යය පෙන්නුම් කළ 1989 වසරෙන් පසු යුගය දැන් අවසන් වෙමින් පවතිනවා.

මෙම සමුළුව හා මේ සමාන රැස්වීම්, බ්‍රික්ස් සංවිධානයේ සහ G20 කණ්ඩායමේ ව්‍යාප්තිය මඟින් ගෝලීය දකුණට උරුමයක් ලබා දෙන නව පිළිවෙලකට මඟ සලසනවා. නිදහස ලැබූ දා සිට අප්‍රිකානු-ආසියාතික රටවල් එකතු කිරීමට පියවර ගත් ඉන්දියාවට, අප සියලු දෙනා අතර සමීප සමගිය ඇති කිරීම සඳහා මේ වන විට ඉටු කරන කාර්යභාරය වෙනුවෙන් මම ස්තූතිවන්ත වෙනවා.”

2023 වසරේ විදේශ ගමන් බලපත්‍ර මිලියනයක් නිකුත් කර ඇති අතර 2023 වසරේ සංක්‍රමණය වී ඇත්තේ පුද්ගලයින් 230,000ක් පමණක් බව ආගමන විගමන පාලක ජනරාල් හර්ෂ ඉලුක්පිටිය මහතා පැවසුවේය.

ආගමන විගමන පාලකවරයා මේ බව පැවසුවේ පසුගියදා පාර්ලිමේන්තුවේදී පැවැති විවෘත හා වගවීම සහිත රජය පිළිබඳ ආංශික අධීක්ෂණ කාරක සභා රැස්වීමේදීය.

ආගමන විගමන පාලකවරයා පැවසුවේ 2023 වසරේ විදේශ ගමන් බලපත්‍ර මිලියනයකට ආසන්න ප්‍රමාණයක් නිකුත් කර ඇති නමුත් ඉන් 23%ක් පමණක් භාවිත කර ඇති බවත් ඉතිරි 77% විදේශ ගමන් බලපත්‍ර භාවිත කර නොමැති බවත්ය.

ඉන්දියාවට සහ නේපාලයට යන වන්දනාකරුවන්ට විදේශ ගමන් බලපත්‍ර ලබා ගැනීමට ඇති බාධා කඩිනමින් ඉවත් කරන බව ද ආගමන විගමන දෙපාර්තමේන්තු නිලධාරීන් විවෘත හා වගවීම සහිත රජය පිළිබඳ ආංශික අධීක්ෂණ කාරක සභාව හමුවේ ප්‍රකාශ කළේය.

ඉල්ලා සිටින විදේශ ගමන් බලපත්‍ර මුදල් ගෙවා ලබා ගැනීම ජනතාවට ඇති අයිතියක් බැවින් ජනතාවට අපහසුතාවයක් නොවන පරිදි ඒවා නිකුත් කිරීම ආගමන විගමන දෙපාර්තමේන්තුවේ වගකීමක් බව කමිටු සභාපතිවරයා මෙහිදී අවධාරණය කළේය.

අක්‍රමවත් ඔසප් වීම, හෝර්මෝන අසමතුලිතතාවය, සහ තවත් බොහෝ දේ ඇතුළුව, කාන්තා සාරවත් බව කෙරෙහි PCOS/PCOD වල බලපෑම ගැන දැන ගන්න. සාර්ථක ගැබ් ගැනීමේ අවස්ථා වැඩි දියුණු කිරීම සඳහා ඵලදායී කළමනාකරණ විකල්ප සොයා ගන්න.

වර්තමාන ලෝකයේ බහු අවයවික ඩිම්බකෝෂ සින්ඩ්‍රෝමය (Polycystic Ovary Syndrome – PCOS) හෝ Polycystic Ovary Disease (PCOD) යනු ප්‍රජනක වයසේ පසුවන කාන්තාවන් විශාල පිරිසකට බලපාන සාමාන්‍ය හෝමෝන ආබාධයකි.

Polycystic ovary syndrome (PCOS) යනු ප්‍රජනක වයසේ පසුවන කාන්තාවන්ට බලපාන සාමාන්‍ය හෝමෝන තත්ත්වයකි. එය සාමාන්‍යයෙන් නව යොවුන් වියේදී ආරම්භ වන නමුත් කාලයත් සමඟ රෝග ලක්ෂණ උච්චාවචනය විය හැකිය. PCOS හෝමෝන අසමතුලිතතාවය, අක්‍රමවත් ඔසප් වීම, අතිරික්ත ඇන්ඩ්‍රොජන් මට්ටම් සහ ඩිම්බ කෝෂ වල ගෙඩි ඇති කළ හැකිය. අක්‍රමවත් ඔසප් වීම, සාමාන්‍යයෙන් ඩිම්බ මෝචනය නොමැතිකම, ගැබ් ගැනීම අපහසු විය හැකිය. PCOS වඳභාවයට ප්‍රධානතම හේතුවකි. PCOS යනු නිදන්ගත රෝගයක් වන අතර එය සුව කළ නොහැකිය. කෙසේ වෙතත්, සමහර රෝග ලක්ෂණ ජීවන රටාව වෙනස් කිරීම, ඖෂධ සහ සාරවත් ප්‍රතිකාර මගින් වැඩිදියුණු කළ හැකිය.

PCOS සඳහා හේතුව නොදන්නා නමුත් පවුල් ඉතිහාසයක් හෝ දෙවන වර්ගයේ දියවැඩියාව ඇති කාන්තාවන් වැඩි අවදානමක් ඇත. PCOS/PCOD සමාන රෝග ලක්ෂණ මාලාවක් ඉදිරිපත් කරන අතර, වඩාත් සැලකිලිමත් වන බලපෑම්වලින් එකක් වන්නේ කාන්තා සරු භාවය කෙරෙහි එහි බලපෑමයි.

වෛද්‍ය නිෂි සිං පවසන පරිදි, PCOS/PCOD ප්‍රජනක සෞඛ්‍යයට බලපාන ආකාරය අවබෝධ කර ගැනීම තත්ත්වය ඵලදායී ලෙස කළමනාකරණය කිරීමට සහ සාර්ථක ගැබ්ගැනීමේ අවස්ථා වැඩි දියුණු කිරීමට වැදගත් වේ.

අක්‍රමවත් කාලපරිච්ඡේද / Irregular Periods:

PCOS/PCOD හි මූලික රෝග ලක්ෂණ වලින් එකක් වන්නේ අක්‍රමවත් ඔසප් චක්‍රයයි. PCOS/ PCOD ඇති කාන්තාවන්ට බොහෝ විට අක්‍රමවත් ඔසප් චක්‍ර අත්විඳීමට හෝ ඔසප් වීම සම්පූර්ණයෙන්ම මඟ හැරිය හැකිය. මෙම අක්‍රමිකතාවයෙන් අදහස් වන්නේ ඩිම්බ කෝෂ නිතිපතා බිත්තර මුදා නොහරින බවයි. (එය පිළිසිඳ ගැනීම සඳහා අත්‍යවශ්‍ය වේ) නිතිපතා ඩිම්බ මෝචනය නොමැතිව, ගැබ්ගැනීමේ අවස්ථා සැලකිය යුතු ලෙස අඩු වන අතර, PCOS සහිත කාන්තාවන්ට ගැබ් ගැනීම අභියෝගයක් වේ.

හෝර්මෝන අසමතුලිතතාවය / Hormonal Imbalance:

PCOS/PCOD හා සම්බන්ධ හෝමෝන අසමතුලිතතාවය නිපදවන ඩිම්බ වල ගුණාත්මක භාවයට ද බලපායි. ඉහළ මට්ටමේ ඇන්ඩ්‍රොජන් එනම් පිරිමි හෝමෝන දුර්වල ඩිම්බ ගුණාත්මක භාවයට හේතු විය හැකි අතර එමඟින් සංකල්පන ක්‍රියාවලිය තවදුරටත් සංකීර්ණ වේ. මීට අමතරව, PCOS හි පොදු ගැටලුවක් වන ඉන්සියුලින් ප්‍රතිරෝධය ඩිම්බ වර්ධනයට සහ ඩිම්බ මෝචනයට බලපාන තවත් හෝමෝන අසමතුලිතතාවයට දායක විය හැකිය.

බර වැඩිවීම:

බර වැඩිවීම PCOS/PCOD සහිත කාන්තාවන්ගේ සාරවත් බව කෙරෙහි බලපාන තවත් වැදගත් සාධකයකි. අතිරික්ත බර ඉන්සියුලින් ප්‍රතිරෝධය උග්‍ර කළ හැකි අතර, එය තවදුරටත් හෝමෝන අසමතුලිතතාවයට සහ ඩිම්බකෝෂය සමඟ දුෂ්කරතා ඇති කරයි. නිරෝගී බරක් පවත්වා ගැනීම ඉතා වැදගත් වේ, එය හෝමෝන නියාමනය වැඩි දියුණු කිරීමට සහ පිළිසිඳ ගැනීමේ අවස්ථා වැඩි කිරීමට උපකාරී වේ.

අතිරික්ත ඇන්ඩ්‍රොජන් / Excess Androgens :

ඉහළ මට්ටමේ ඇන්ඩ්‍රොජන් සාමාන්‍යයෙන් PCOS/PCOD සමඟ සම්බන්ධ වන අතර ඩිම්බ මෝචනය වැළැක්විය හැකිය. ඇන්ඩ්‍රොජන් මට්ටම ඉහළ යාම ඔසප් චක්‍රය කඩාකප්පල් කළ හැකි අතර ඩිම්බකෝෂ ගෙඩි සෑදීමට හේතු වේ. මෙම බාධාව කාන්තාවන්ට ඩිම්බ මුදා හැරීම සහ ගැබ් ගැනීම වඩාත් අභියෝගාත්මක කරයි.

කළ යුත්තේ කුමක් ද ?

අභියෝග තිබියදීත්, PCOS සහිත බොහෝ කාන්තාවන්ට සුදුසු කළමනාකරණයක් සමඟ සාර්ථකව පිළිසිඳ ගත හැකිය. ප්‍රතිකාර විකල්පයන් අතර සෞඛ්‍ය සම්පන්න බරක් පවත්වා ගැනීම, සමබර ආහාර වේලක් අනුගමනය කිරීම සහ නිතිපතා ව්‍යායාම කිරීම වැනි ජීවන රටාවේ වෙනස්කම් ඇතුළත් විය හැකිය. මේ සියල්ල ඩිම්බ මෝචනය සහ ඉන්සියුලින් සංවේදීතාව වැඩි දියුණු කළ හැකිය. මීට අමතරව, නිවැරදි රෝග විනිශ්චය සහ පුද්ගලාරෝපිත ප්‍රතිකාර සඳහා සෞඛ්‍ය සේවා විශේෂඥයෙකුගෙන් උපදෙස් ලබා ගැනීම අත්‍යවශ්‍ය වේ.

Femina.in ඇසුරිනි.

තායිලන්ත දේශපාලන ප්‍රබලයෙකු වන බලයෙන් පහකල හිටපු අගමැති තක්ෂින් ෂිනවත්‍රාගේ දියණිය වන පේටොන්ග්ටාර්න් ෂිනවත්‍රා / Paetongtarn Shinawatra තායිලන්තයේ ලාබාලතම අගමැතිනිය ලෙස අද (16) පත්වූවාය.

ඇය පාර්ලිමේන්තු ඡන්දයෙන් ජයග්‍රහණය කළේ ඇයගේ පූර්වගාමියා වූ ශ්‍රෙත්තා තවසීන් අමාත්‍යවරයකු පත්කිරීමේ ආචාරධර්ම කඩකිරීමක් සම්බන්ධයෙන් ධූරයෙන් පහ කිරීමෙන් දින කිහිපයකට පසුවය. ඇය මීට පෙර තායි පාර්ලිමේන්තුවේ සහාය දිනා ගැනීමට අවශ්‍ය සියයට 51 ක ඡන්ද සීමාව සම්මත කළාය. 37 හැවිරිදි Paetongtarn ට පාර්ලිමේන්තු අනුමැතිය ලැබෙනු ඇතැයි අපේක්ෂා කර තිබුණි.

ජලභීතිකා රෝගය පිළිබඳ දැනුම නොමැතිකම සහ බල්ලන් හැර වෙනත් සතුන් සපා කෑම්වලට සම්බන්ධ සිදුවීම් සංඛ්‍යාව හේතුවෙන් මරණ සංඛ්‍යාව ඉහළ යාමට හේතු වී ඇති බව උපදේශක ප්‍රජා වෛද්‍ය විශේෂඥ වෛද්‍ය අතුල ලියනපතිරණ මහතා පවසයි.

වත්මන් ජලභීතිකා රෝගය මේ වන විට බරපතළ සෞඛ්‍ය හා සමාජීය ගැටලුවක් බවට පත්ව ඇති බව ද වෛද්‍ය අතුල පෙන්වා දුන්නේය.

රජයේ රෝහල් 300කට ආසන්න සංඛ්‍යාවක ජලභීතිකා රෝගයට එරෙහි එන්නත් නොමිලේ ලබා දෙන බව සඳහන් කළ වෛද්‍ය ලියනපතිරණ, මෙම වසරේ මේ දක්වා ජලභීතිකා රෝගය වැළඳීමෙන් පුද්ගලයින් 11 දෙනෙකු මියගොස් ඇති බව ද හෙළි කළේය.

ජලභීතිකා රෝගය ඇති සතෙකු සපා කෑ විට, පවතින තුවාලයක් හරහා කෙළවලින් හෝ ඇස්, නාසය, මුඛය සහ ලිංගේන්ද්‍රිය අවට ඇති ශ්ලේෂ්මල පටල හරහා වෛරසය ශරීරගත වුවහොත් ජලභීතිකා රෝගය බෝවිය හැකි බවෙත්, අදාළ නිරාවරණයෙන් සති තුනේ සිට මාස තුන දක්වා කාලය තුළ රෝග ලක්ෂණ මතු විය හැකි බවත් ඔහු පෙන්වා දුන්නේය.

බල්ලන්ට අමතරව, ජලභීතිකා රෝගය බළලුන්, මුගටීන්, නරි, ලේනුන්, විශාල බැන්ඩිකූට් මීයන්, වඳුරන්, , එළදෙනුන් සහ සර්පයන් වැනි සතුන් දෂ්ට කිරීමෙන් ද සම්ප්‍රේෂණය විය හැකි බව වෛද්‍ය අතුල ලියනපතිරණ හෙළි කළේය.

සිය මැතිවරණ ප්‍රචාරක කටයුතු සඳහා අරමුදල් සපයන්නේ කෙසේද යන්න පිළිබඳ අරමුදල් මූලාශ්‍ර ලබා දෙන ලෙස මැතිවරණ කොමිෂන් සභාව සියලුම ජනාධිපති අපේක්ෂකයන්ගෙන් ඉල්ලීමක් කර ඇත. ජනාධිපතිවරණයේදී සෑම අපේක්ෂකයෙකුටම වියදම් කළ හැකි වියදම් සීමාවක් ද නියම කරන බව මැතිවරණ කොමිෂම අදාළ අපේක්ෂකයින් වෙත දැනුම් දුන් බව මැතිවරණ කොමිෂමේ සභාපතිවරයා පවසයි.

ජනාධිපතිවරණයට ඉදිරිපත්ව සිටින සෑම අපේක්ෂකයෙකුටම තම ප්‍රචාරක කටයුතු සඳහා වැය කළ හැකි අයවැය ලේඛනය සකස් කිරීම සඳහා මැතිවරණ කොමිෂන් සභාව අද (16) පෙරවරු 10ට සියලු අපේක්ෂකයන් සමඟ තීරණාත්මක සාකච්ඡාවක් පැවැත්වීමට නියමිත බව ද මැතිවරණ කොමසාරිස් ජනරාල් සමන් ශ්‍රී රත්නායක මහතා ප්‍රකාශ කළේය. සභාපතිවරයා වැඩි දුරටත් ප්‍රකාශ කළේ ප්‍රචාරක කටයුතු සඳහා වන අවසන් අයවැය ලේඛනය සියලු අපේක්ෂකයන් සමඟ සාකච්ඡා කරන බවත් මෙම මුදල නියම කළ පසු ඔවුන්ට එය පිළිපැදිය යුතු බවත්ය.

ජනාධිපතිවරණය අවසන් වී ජයග්‍රාහකයා ප්‍රකාශයට පත් කිරීමෙන් පසු සියලුම අපේක්ෂකයින්ට ප්‍රචාරක කටයුතු සඳහා වියදම් කළ මුදල් ප්‍රමාණය සහ මුදල් ප්‍රභවය ප්‍රකාශ කිරීමට දින 21ක කාලයක් ලබා දෙන බව ඔහු සඳහන් කළේය.

මෙය සිදු වූ පසු, මැතිවරණ කොමිෂන් සභාව අපේක්ෂකයින්ගේ වාර්තා සමාලෝචනය කිරීමට තවත් දින 10ක කාලයක් ගතවනු ඇති අතර පසුව එය අන්තර්ජාලය හරහා ප්‍රකාශයට පත් කරනු ලබන බව කී සභාපතිවරයා, මේ සම්බන්ධ යම් විෂමතාවයක් ඇත්නම් හෝ කිසියම් අපේක්ෂකයෙකු මැතිවරණ කොමිෂන් සභාව විසින් තීරණය කරන ලද මුදල ඉක්මවා ඇත්නම්, එම අපේක්ෂකයාට එරෙහිව අධිකරණයේ නීතිමය පියවර ගැනීමට මහජනතාවට හැකි බව ද පෙන්වා දුන්නේය.

ජනාධිපතිවරණයට ඉදිරිපත් සිටින අපේක්ෂකයින්ගේ ප්‍රචාරක කටයුතුවලට අවශ්‍ය ආරක්ෂාව ලබා දෙන්නේ ඔවුනට ඇති ආරක්ෂාව සම්බන්ධ තර්ජන තක්සේරු කිරීම් මත බවත් ප්‍රධාන අපේක්ෂකයින්ට පමණක් වැඩි ආරක්ෂාවක් ලබාදීමට සැලසුම්කර ඇති බවත් ඉහළ ආරක්ෂක නිලධාරියෙක් පැවසීය.

මැතිවරණ ප්‍රචාරක රැලි පැවැත්වෙන ස්ථානය අනුව අදාළ අපේක්ෂකයින්ගේ ආරක්ෂාව වෙනස් වන බව ද ප්‍රධාන අපේක්ෂකයින්ගේ ආරක්ෂාව සඳහා අමාත්‍ය ආරක්ෂක අංශයේ (MSD) සහ විශේෂ කාර්ය බලකායේ (STF) පොලිස් නිලධාරීන් යොදවන බව ද අදාළ නිලධාරියා සඳහන් කළේය.

අද (15) දින ජනාධිපතිවරණය සඳහා ඇප මුදල් තැන්පත් කිරීම අවසන් වීමෙන් පසුව, ක්‍රියාත්මක කළ යුතු ආරක්ෂක වැඩපිළිවෙළ පිළිබඳව සාකච්ඡා කිරීමට අපේක්ෂකයින්ගේ ආරක්ෂාව පිළිබඳ වගකිව යුතු කමිටුව එක් එක් අපේක්ෂකයින්ගේ සම්බන්ධීකාරකවරුන් හමුවී ඇති අතර, තම අපේක්ෂකයින්ගේ ආරක්ෂාව කළමනාකරණය කරන ආකාරය සහ කමිටුව මගින් ලබා දී ඇති විධිවිධාන සම්බන්ධයෙන් අදාළ සම්බන්ධීකාරකවරුන් දැනුවත් කර ඇති බව එම නිලධාරියා වැඩි දුරටත් පැවසීය.

තම අපේක්ෂකයින්ගේ ඉදිරි ප්‍රචාරක රැස්වීම් කාලසටහන ලබා දෙන ලෙස කමිටුව සෑම සම්බන්ධීකාරකයෙකුටම උපදෙස් දී ඇති බව ද එම නිලධාරියා පැවසීය.

සමස්ත මැතිවරණ කාලසීමාව තුළ, ශ්‍රී ලංකා පොලිසියේ ඉල්ලීම මත සහය වීමට සන්නද්ධ හමුදා සූදානම්ව සිටින අතර, පොලිසිය සහ STF විසින් ආරක්ෂක විධිවිධාන අධීක්‍ෂණය කරනු ඇති බව ද වාර්තාවේ.

ආරක්ෂක මාණ්ඩලික ප්‍රධානියා විසින් සියලුම ආරක්ෂක අංශ ප්‍රධානීන්ට හමුදා භටයන් සීරුවෙන් තබා ගන්නා ලෙස උපදෙස් දී ඇත.

ජනාධිපති අපේක්ෂකයින්ගේ ආරක්ෂාව තහවුරු කිරීම සඳහා කමිටුවක් පිහිටුවීමට මීට පෙර අමාත්‍ය මණ්ඩලයේ අනුමැතිය හිමිවිය. මහජන ආරක්ෂක අමාත්‍යාංශයේ ලේකම්වරයාගේ සභාපතිත්වයෙන් යුත් මෙම කමිටුවට ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා, ජ්‍යෙෂ්ඨ නියෝජ්‍ය පොලිස්පති (මැතිවරණ) අසංක කරවිට සහ ජාතික බුද්ධි ප්‍රධානී ඇතුළත් වේ.

2024 ජනාධිපතිවරණය සඳහා නාමයෝජනා භාර ගැනීම අද (අගෝස්තු 15) පෙරවරු 9.00ට ආරම්භ වන බව මැතිවරණ කොමිෂම පවසයි. ඒ අනුව අපේක්ෂකයින්ට පෙරවරු 9.00 සිට 11.00 දක්වා මැතිවරණ මහලේකම් කාර්යාලයේදී නාම යෝජනා භාරදිය හැකි බව මැතිවරණ කොමිෂම කියයි. නාමයෝජනා භාරගනු ලබන අද දිනයේ මැතිවරණ කොමිෂන් සභාව අවට විශේෂ ආරක්ෂක වැඩපිළිවෙළක් සහ රථවාහන සැලැස්මක් ද ක්‍රියාත්මක බව මැතිවරණ කොමිෂම විසින් නිකුත් කළ මාධ්‍ය නිවේදනයේ වැඩි දුරටත් සඳහන් වේ.