Tag: breaking post
-
පොලිසියට හා සිවිල් ආරක්ෂකයන්ට පහරදී ආරුගම්බේදී ඇල්ලූ බීමත් සැකකරුව මුදාගනී
පොතුවිල් ආරුගම්බේ ප්රදේශයේ සංචාරකයන් ගැවසෙන හෝටලයක් අසල බීමත්ව අශෝභනව හැසිරුණු පුද්ගලයෙක් පොලිසිය විසින් අත්අඩංගුවට ගත් අවස්ථාවේ එම පුද්ගලයාගේ කණ්ඩායමේ පිරිසක් පැමිණ පොලිස් නිලධාරීන්ට සහ සිවිල් ආරක්ෂක නිලධාරීන් තුන් දෙනකුට පහරදී අත්අඩංගුවට ගත් සැකකරුට පැනයාමට ඉඩ සලසා ඇතැයි පොතුවිල් පොලිසිය පවසයි.
ඉකුත් 12 වැනිදා සවස 6.30 ට පමණ මෙම අත්අඩංගුවට ගැනීම සිදු වී තිබේ. එම අවස්ථාවේ ඒ අවට සිටි මුස්ලිම් ජනතාව 50 ක් පමණ ඒකරාශී වූ බවත් සැකකරුගේ කණ්ඩායමේ හත්දෙනකු ආරක්ෂක නිලධාරීන්ට හෙල්මට්වලින් සහ අතින් පයින් පහර දුන් බව සිද්ධිය දුටුවෝ පැවසූහ. ප්රහාරයට ලක්වූ පොලිස් නිලධාරියා සහ සිවිල් ආරක්ෂක නිලධාරීන් තිදෙනා පොතුවිල් මහ රෝහලට ඇතුළත් කර ඇති අතර ඔවුන් නේවාසිකව ප්රතිකාර ලබන බව රෝහල් ප්රකාශකයෙකු පැවසීය.
මෙසේ ප්රහාරයට ලක්ව ඇත්තේ පොතුවිල් උල්ල පොලිස් මුරපළේ සේවය කරන පො. කො. (8216) වැදිවෙල මුදියන්සේලාගේ නුවන් චාමර, සිවිල් ආරක්ෂක බළකායේ එම්. ඕ. (27625) ඥනරත්න චමින්ද එම්. ඕ. (27395) සුදුබණ්ඩා ප්රේමසිරි එම්. ඕ. (13720), හීන්නිළමේ වික්රමරත්න, ගාමිණි වික්රමරත්න යන නිලධාරීන් ය.
පහරදුන් සැකකරුවන් ගෙන් 4 දෙනකු අත්අඩංගුවට ගෙන අධිකරණයට ඉදිරිපත් කර ඇති අතර ඉතිරි සැකකරුවන් සොයා පොතුවිල් සහකාර පොලිස් අධිකාරී වැලිසරගේ මහතාගේ උපදෙස් පරිදි පොතුවිල් පොලිස් ස්ථානාධිපති පොලිස් පරීක්ෂක නිශාන්ත කුමාර මහතාගේ මූලිකත්වයෙන් පරීක්ෂණ පැවැත්වේ.
එම ප්රහාරයට ලක්වූ සිවිල් ආරක්ෂක බළකායේ නිලධාරියෙකු සඳහන් කළේ බීමත්ව සිටි සැකකරු පාලනය කළ නොහැකි වූ හෙයින් මාංචු දමා පෞද්ගලික ත්රී රෝද රථයකින් පොලිසියට රැගෙන යන අවස්ථාවේ මග හරස් කර ත්රී රෝද රථය නවතා අපේ කොල්ලා බේරගන්න එන්න කියා පිරිසක් කෑ ගැසූ බවයි. ඉන්පසු 100 ක් පමණ එකතු වූ බවද සැකකරු පොලිසියේ රාළහාමි ළඟ සිටි බවද පිරිස රාළහාමි වෙනම කොටු කරගත් බවද ආරක්ෂකයින් වෙනම කොටු කරලා බිම දමා ගැසු බවද හෙතෙම පැවසීය.
රාළහාමිගේ අත් දෙකට ගැහුවම සැකකරු අතහැරුණා. ඉන් පසු ඔවුන් සැකකරු උස්සන් ගියා යෑයි සිවිල් ආරක්ෂක නිලධාරියා කියා සිටියේය.
-
කෑගල්ල සමුපකාර උප කොමසාරිස්ට ඇසිඩ් ප්රහාරයක්
කෑගල්ල සමුපකාර උප කොමසාරිස් ඩබ්ලිව්. කරුණාතිලක මහතාට ඔහුගේ කාර්යාලය තුළදී ඊයේ (13) කිසියම් පුද්ගලයකු විසින් ඇසිඩ් ප්රහාරයක් එල්ලකර ඇති බව පොලිසිය පවසයි.
යතුරුපැදියකින් පැමිණි පුද්ගලයින් දෙදෙනකු විසින් ඊයේ (13) සවස 3.30 ට පමණ මෙම ඇසිඩ් ප්රහාරය එල්ල කර ඇත.ඇසිඩ් ප්රහාරයෙන් බරපතළ තුවාල ලැබූ කරුණාතිලක මහතා කෑගල්ල මූලික රෝහලට ඇතුළත් කර ඇත.
සිද්ධිය සම්බන්ධයෙන් මෙතෙක් කිසිවකු අත්අඩංගුවට ගෙන නැතැයි පොලිස් මාධ්ය ප්රකාශක පොලිස් අධිකාරි රුවන් ගුණසේකර මහතා පැවසූ අතර 302කෑගල්ල පොලිසිය සිද්ධිය සම්බන්ධයෙන් විමර්ශන කටයුතු සිදු කරයි.
-
වඩාත් ගැඹුරින් විශ්ලේෂණය කරල බැඳුම්කරේ ගැන තව පොතක් ලියනවා….
ශ්රී ලංකා මහ බැංකුවේ ආන්දෝලනාත්මක බැදුම්කර නිකුතුව ගැන ඉදිරියේදී තවත් හොදින් විශ්ලේශණය කර පොතක් ලියන්නට බලාපොරොත්තු වන බව රාජ්ය ඇමති සුජීව සේනසිංහ මහතා පවසයි.
බැදුම්කරය ගැන තමන් විසින් ලියන ලද මුල් කෘතිය ඇතැමුන් විවේචනය කලද එහි කිසිදු වරදක් නිශ්චිතව පෙන්වන්නේ නැති බවත් බීබීසී සේවය සමග පැවැති ෆේස්බුක් සංවාදයකදී ඔහු සඳහන් කලේය.
-
වර්ජනය නිසා රට පුරා තැපැල් කාර්යාලවල ලිපි සහ පාර්සල් ලක්ෂ 15 ක් ගොඩගැහිලා
තැපැල් සේවකයන් ආරම්භ කර ඇති අඛණ්ඩ වැඩවර්ජනය හේතුවෙන් රට පුරා තැපැල් කාර්යාලවල මේ වනවිට ලිපි සහ පාර්සල් ලක්ෂ 15 කට ආසන්න සංඛ්යාවක් ගොඩගැසී ඇතැයි ඒකාබද්ධ තැපැල් වෘත්තීය සමිති පෙරමුණේ කැඳවුම්කරු චින්තක බණ්ඩාර මහතා පවසයි.
විදේශ තැපෑල හරහා පැමිණි ලිපි සහ පාර්සල් ඇතුළත් තැපැල් මලු පන්දහසකට අධික ප්රමාණයක් ද කටුනායක බණ්ඩාරනායක ජාත්යන්තර ගුවන් තොටුපළේ තැපැල් කාර්යාලයේ ගොඩගැසී තිබෙන බව පැවසූ ඒ මහතා සිය ඉල්ලීම්වලට විසඳුම් ලබාදීමට රජය පියවර නොගැනීම නිසා තමුනට අකැමැත්තෙන් වුවද වැඩවර්ජනයකට යැමට සිදුවූ බව සඳහන් කළේය.
මෙම වැඩවර්ජනය සම්බන්ධයෙන් තැපැල් අමාත්යංශය සඳහන් කළේ තැපැල් සේවකයන්ගේ ඉල්ලීම්වලින් සියයට අසූවක් ලබාදී ඇති බවත් තව විසඳුම් ලබාදිය යුතුව ඇත්තේ සියයට විස්සක ප්රමාණයකට බවත්ය.
ඒ සඳහා සාකච්ඡා කිරීමට වැඩවර්ජනය අත්හැර දමා එන ලෙස ද තැපැල් අමාත්යංශය තැපැල් සේවක වෘත්තීය සමිති වලින් ඉල්ලා සිටියි.
-
නේපාලයේ ජාතික පාපැදි ශූරයා මිනිපේ ඇළට වැටී මරුට
පෞද්ගලික ආයතනයක් විසින් සංවිධානය කරනු ලැබූ රන්බල් ඉන්ද ජංගල් නමැති පාපැදි තරගයට සහභාගී වී සිටි නේපාලයේ ජාතික පාපැදි ශූරයා ඊයේ (13 ) දහවල් රන්දෙණිගල ජලාශයේ ජලය බැසයන මිනිපේ ඇළට වැටී මියගොස් ඇත.
මෙම පාපැදි තරගයට රටවල් 20 ක පමණ පිරිසක් සහභාගී වී සිටි අතර පාපැදි තරගයේ සිව්වැනි දිනය වූ ඊයේ මවුන්ටන් පාපැදි මගින් මිනිපේ ඇළ ඉවුර මතින් තරගකරුවන් තිදෙනකු ධාවනයේ යෙදී සිටියදී මෙම නේපාල ජාතික තරගකරු ඇළට වැටී තිබේ.
කඳු තරණය ඇතුළු ඉසව් ගණනාවක් ඔස්සේ මෙම තරගය පවත්වා අදින් (14) අවසන් වීමට නියමිතව තිබුණු මෙම තරඟයේ තරගකරුවන්ට ඇළ ඉවුර මතින් පා පැදිය ධාවනය නොකරන ලෙසට සංවිධායකයින් උපදෙස් ලබාදී තිබුණත් ඔවුන් එය පිළිනොපැද පාපැදි ධාවනය කර ඇතැයි වාර්තාවේ. එම සිද්ධියෙන් පසු තරගය ඊයේ අවසන් කරන ලදී.
-
බස් රථ හා ලොරිවලට භූමිතෙල් දීම වැළැක්වීමට රෙගුලාසි
බස් රථ හා ලොරිවලට භූමිතෙල් නිකුත් කිරීම වැළැක්වීමට ඉන්ධන පිරවුම්හල්වලට රෙගුලාසි පනවන ලෙස ඇමැති මණ්ඩලය ඛනිජ තෙල් ඇමැතිවරයාට උපදෙස් දුන් බව කැබිනට් සම මාධ්ය ප්රකාශක ඇමැති රාජිත සේනාරත්න මහතා පැවසීය.බස් රථවලට භූමිතෙල් නිකුත් කිරීම වැළැක්වීමට භූමිතෙල් මිල ඉහළ දැමූ නමුත් ධීවර ගැටලු නිසා යළිත් එහි මිල පහත හෙළීමට සිදුවූ බවද හෙතෙම කීය.
මිල ඉහළ දැමීම නිසා භූමිතෙල් නිකුත් කිරීම සියයට 50 කින් පමණ අඩු වූ බවද ඇමැතිවරයා සඳහන් කල අතර භූමිතෙල් මිල රුපියල් 70 දක්වා අඩු කළද ධීවරයින්ට පරණ මිල වන රුපියල් 44 දක්වා අඩුකිරීමට සහනදායි වැඩපිළිවෙළක් ක්රියාත්මක කළ යුතු බවද ඊයේ (13) පැවැති කැබිනට් තීරණ දැනුම්දීමේ මාධ්ය හමුවේදී මාධ්යවේදීන් ඇසූ ප්රශ්නවලට පිළිතුරු දෙමින් ඇමැතිවරයා කියා සිටියේය.
-
බන්දු සමරසිංහගේ පුතාගේ වැඩ
අපේ රටේ ඉන්න දක්ෂ රංගන ශිල්පියෙක් තමයි බන්දු සමරසිංහ කියලා කියන්නේ.ඉතිං බන්දු සමරසිංහගේ ආදරණීය පුතා තමයි කාංචන සමරසිංහ.රූපවාහිනී මාධ්ය තුළ ජනප්රියම චරිතයක් නොවුනත් සමාජ මාධ්ය තුළනම් කාංචන ජනප්රියයි.කාංචන විතරක් නෙවෙයි කාංචනගේ පෙම්වතිය ප්රමෝදි කෞෂල්යාත් මේ දිනවල සමාජ මාධ්ය තුළ ජනප්රිය චරිතයක් වෙලා තියෙනවා.ඒකට හේතුව තමයි මේ දෙන්නා එකතු වෙලා කරපු වීඩියෝ ක්ලිප් කිහිපයක් නිසා.ඒ අනුව කාංචනයි, ප්රමෝදී එකතු වෙලා චිත්රපටවල තිබෙන විකට ජවනිකා කිහිපයකට රංගනයන් ඉදිරිපත් කරනවා.ඉතින් මේ වීඩියෝවලට මේ දිනවල ඉහළ ප්රතිචාර ලැබෙනවා කියලා තමයි ආරංචි වෙන්නේ. -
කොටපිය කොටපිය කියලා කිව්ව නිසා තුන් වතාවක්ම ඔළුවට කෙටුවා..
අම්මා හයියෙන් කෑගැව්වා කොටන්න එපා කියලා…
අම්මේ අම්මේ ඇස් අරින්න අම්මේ…
මම ගෑනිගේ අතින් ඇදලා අරගෙන ඇඳයට තිබුණ වක්පිහිය අරගත්තා…
අඹුසැමි ආරවුල් ළිපේ බත ඉදෙනකල් විතරයි යැයි පැරණි කියමනක් ඇත.
එහි යටි අරුත නම් අඹු සැමි ආරවුල් මොහොතකින් නිමා වී යළි ඔවුන් සතුටින් සමගියෙන් සිටින බවය.
එවන් කාලයක් ඇත්තෙන්ම තිබිණි. ඒත් අද ඒ තත්ත්වය බොහෝ වෙනස් වී ඇත. අද අඹුසැමි ආරවුලක් නිමාවෙන්නේ බොහෝ විට පහරදීමකින් නැත්තම් ඝාතනයකින්ය. ඊට හේතු බොහෝය.
බීමත්කම, නූගත්කම,දරිද්රතාවය, අනියම් ඇසුර වගේම සැකය වැනි හේතු ද මෙවන් ඝාතනවලට බෙහෙවින් බලපා ඇත.
මෙය ද එවැන්නකි. සිද්ධිය වාර්තා වනුයේ දවුලුගල පොලිස් වසමෙනි.
ගමට පොලිසියේ සංකල්පය යටතේ ගම්වැසියන් ගේ අවශ්යතා ඉටු කිරීමේ අරමුණින් දවුලුගල පොලිසිය මගින් සංවිධානය කරන ලද පොලිස් මුරපොළක් පසුගිය දා හඳපාන ගමේ ශ්රී සුදර්ශනාරාම විහාරස්ථානයේ පවත්වාගෙන යමින් තිබිණි.
මුරපළ බාරව කටයුතු කළේ උපපොලිස් පරීක්ෂක හරිශ්චන්ද්රය.
වේලාව දහවල් දොළහට පමණ ඇත. ගමේ පිරිස් පොලිස් ජංගම මුරපළට පැමිණ තම අවශ්යතා ඉටුකර ගනිමින් සිටියහ.
රැස්ව සිටි පිරිස අතරින් මතුවූ උඩුකය නිරුවත් අයකු එකවරම පොලිස් මුරපළට ඇතුළු වුයේ තියුණු පිහියක් ද අතැතිවය.
ඔහු කෙළින්ම ගියේ උප පොලිස් පරීක්ෂකවරයා වෙතටය. “ඇයි මොකද ?”
උපපොලිස් පරික්ෂකවරයා විමසුවේය. අත තිබු පිහිය මේසය මත තැබු ඔහු දෑත් එක්කොට පොලිස් නිලධාරියාට වැන්දේය. “අනේ බුදු සර් මම මගේ ගෑනිට කෙටුවා. සමහරවිට මැරෙන්න ඇති. මම පොලිසියට බාර වෙන්නයි මම ආවේ.” ඔහුගේ ප්රකාශයත් සමඟ උප පරීක්ෂකවරයා ඇසි පිය නොගගා ඔහු දෙස බලා සිටියේය. “මොකක්ද කිව්වේ තමුන්…” “ඔව් සර්. මම ගෑනිට කෙටුවා. ගෑනි ගේ ළඟ වැටිලා ඇති.” “ඇයි මොකද ඒ…” “අනේ සර් ගොඩාක් ප්රශ්න අහන්න එපා. මාව ඉක්මනට පොලිසියට එක්කරගෙන යන්න.” පැමිණි පුද්ගලයා උපපොලිස් පරීක්ෂකවරයා හමුවේ කියා සිටියේය. උප පරීක්ෂකවරයා වහා මේ බව සිය ප්රධානියා වූ දවුලුගල පොලිස් ස්ථානාධිපතිවරයාට දන්වා සිටියේය. ඒ අනුව ස්ථානාධිපතිවරයා ඇතුළු කණ්ඩායමක් වහා පිළිමතලාව හලාදිවල ප්රදේශයේ පිහිටි එම පුද්ගලයාගේ නිවෙසට ගියේය.
දවුලුගල පොලිසියේ සිට හැවාලකඩ නගරයට ගිය පසු හමුවන ඇම්බැක්ක හරහා ඇති පොල්වත්ත තැන්න පාරේ මද දුරක් ගොස් ඈපාන සිට කිලෝමීටර හයක් විතර ගිය තැන ඈපාන හලාදිවල විහාරයට හැරෙන හන්දියට ආසන්නව කන්ද උඩ සැකකරුගේ නිවෙස පිහිටා ඇත. ඊට යාබදව ඇති හලාදිවල පන්සලට හැරෙන හංදියේ මියගිය කාන්තාවගේ මහගෙදර පිහිටියේය. නිවෙසට යන අතරතුර නිලධාරීන්ට ඉදිරියෙන් එන ත්රිරෝද රියක් මුණ ගැසිණි. එහි වුයේ තුවාලකාරියකි. විමසීමේදී දැන ගන්නට ලැබුණේ පොලිස් මුරපළට පැමිණි පුද්ගලයා පිහියෙන් කොටා ඇත්තේ ඇයට බවය. සිද්ධිය වූ නිවෙස ඉදිරිපිට විශාල ලෙස රුධිරය ගලා ගොසිනි. අහල පහළ දෙතුන් දෙනා ඒ වන විටත් ඒ නිවෙස අසලට පැමිණ හිටියහ. එතැනට ගිය නිලධාරීන් ඔවුන්ගෙන් කරුණු විමසන්නට විය.
“සර් මේ දෙන්නා නිතරම රණ්ඩු වෙනවා. අදත් ඔය රණ්ඩු වෙලා තමයි කොටලා තියෙන්නේ.” අසල්වාසීහු කීහ. තොරතුරු සටහන් කරගත් නිලධාරීන් ඊළඟට ගියේ රෝහලටය. එහෙත් ඒ අතරතුර ස්ථානාධිපතිවරයා වෙත ලැබුණු දුරකථන පණිවිඩයකින් කියැවුණේ රෝහලට ඇතුළත් කළ තුවාල ලත් තැනැත්තිය මිය ගිය බවය. ඒ අනුව ඉදිරි විමර්ශන ඇරඹුණේ මිනී මැරුමක් ලෙසය. සැකකරු පොලිස් මුරපළේ සිට දවුලුගල පොලිසිය වෙත රැගෙන ගියේ දැඩි රැකවරණ මධ්යයේ ය. ඊට හේතු වුයේ සැකකරුට බිරියගේ පාර්ශ්වයෙන් කිසියම් තර්ජනයක් එල්ල වනු ඇතැයි සැකයක් තිබු නිසාය. සිදුවීම සහකාර පොලිස් අධිකාරීවරයා වෙත දැනුම් දෙනු ලැබු අතර මහනුවර අධිකරණයට ද කරුණු වාර්තා කරන ලදි. ඒ අනුව මහේස්ත්රාත් පරීක්ෂණය වැඩ බලන මහේස්ත්රාත් මහින්ද ලියනගේ මහතා විසින් සිදුකරන ලදි.
ඔහුගේ නියෝගය මත පශ්චාත් මරණ පරීක්ෂණය මහනුවර විශේෂඥ අධිකරණ වෛද්ය නිලධාරී එන්.ඒ.එස්. බී. විජේසිංහ මහතා විසින් සිදු කළේය. මරා දැමුණු ඇය සේවාවිස්ස විද්යා ආරච්චිලාගේ පි්රතිකා යමුනා විදානආරච්චි නැමැති තිස් හැවිරිදි කාන්තාවකි. දරු තිදෙනකුගේ මවකි. ඇය ඝාතනය කිරීමේ වරදට පොලිසියට පැමිණ බාර වී අත්අඩංගුවට පත්වුයේ ඇගේ සැමියා වන ගාමිණි නමැත්තෙකි. පොලිසිය මේ සම්බන්ධයෙන් විමර්ශන ඇරඹි අතර එහිදී අනාවරණය වුයේ සිද්ධිය ඇසින් දුටු දෙදෙනකු ද ඒ මොහොතේ නිවසේ සිටි බවය. ඒ ඇගේ දරු දෙදෙනාය. ඉන් එක් දරුවකු ගේ වයස අවුරුදු හතකි. ඔහු දෙවෙනි වසරේ ඉගෙනුම ලබයි. අනෙක් දරුවා සිඟිත්තෙකි. ඔහුට වසර දෙකකි. මවුව්පියන්ගේ අඩදබරය සිදු වන මොහොතේ සිඟිත්තා නිවසේ ඇඳක් මත නිදාගෙන සිට ඇත.
ඒත් මවගේ ළතෝනිය ඇසී ඔහු ද නින්දෙන් අවදි වී මහ හඬින් හඬන්නට විය. එහෙත් ඔහුට යමක් කියන්නට තේරුම් කරදෙන්නට අපහසුය. ඒ ඔහු තවමත් වසර දෙකක දරුවකු නිසාය. ඒ නිසා පොලිසියේ ඇස යොමු වුයේ ඇගේ දෙවෙනි දරුවා දෙසටය. ඔහු හත් හැවිරිදි නිසා යමක් කමක් තේරුම් ඇති අයෙකි. “එදා උදේ අම්මා මාව ඉස්කෝලේට ඇරලුවා. දවල් මම ඉස්කෝලේ ගිහින් ඇවිත් බස් එකෙන් බහින කොටම අම්මා ඇවිත් හිටියා. අපි ගෙදර ගියා. මම පොත් බෑග් එක ගලවලා මේස උඩ තියලා බෑග් එකේ තිබුණු බයිට් පැකට් එක කන්න ගත්තා. එතකොට මල්ලී ඇඳේ නිදාගෙන හිටියේ. ඒ වේලාවේ තාත්තා අම්මට ආච්චිගේ ගෙදර යන්න එපා කියලා රණ්ඩු වුණා. ඒ රණ්ඩුව මැද්දේ තාත්තා ඇඳයට තිබුණා පිහිය ඇදලා අරගෙන අම්මගේ අතට පිහියෙන් කෙටුවා. ඔළුව පැත්තට තුන් පාරක් කෙටුවා.
අම්මා හයියෙන් කෑගැව්වා කොටන්න එපා කියලා. අම්මා කෑ ගහන සද්දෙට මල්ලිත් ඇහැරිලා හයියෙන් ඇඬුවා. මමත් හයියෙන් කෑගැව්වා අම්මට ගහන්න එපා කියලා.” හත් හැවිරිදි ශ්රී මාල් පුතු එසේ සිය ඇසින් දුටු දේ පොලිස් ස්ථානාධිපතිවරයා ඉදිරියේ විස්තර කරන්නට විය. එය ප්රබල සාක්ෂියක් බව ස්ථානාධිපතිවරයාට වැටහිණි. ඒ නිසා පුංචි ශ්රී මාල් බියට පත්නොකොට පියෙකුසේ ඔහුගෙන් දුටු දේ දැනගැනීමට ස්ථානාධිපතිවරයා කටයුතු කළේය.
“ඉතින් පුතේ ඊට පස්සේ මොකද වුණේ ?” ස්ථානාධිපතිවරයා ශ්රී මාල්ගෙන් විමසුවේ ඔහුගේ හිස අතගාමින්ය. “ඒත් එක්කම අම්මා වැටුණා. පස්සේ මම අම්මා ළඟට ගිහින් “අම්මේ අම්මේ ඇස් අරින්න අම්මේ” කියලා කතා කළා. ඒත් අම්මා කතා කළේ නැහැ. ඇස් බාගෙට ඇරගෙන හිටියා. පස්සේ මම කෑගහගෙන එළියට දිව්වා.” ලේ පෙරාගෙන මව වැටි සිටිනු දුටු පුංචි ශ්රී මාල් මහත් බියට පත්ව එළියට දිවගියේ ඊට පහළින් ඇති මහගෙදර සිටින සිය නුවන්ත අයියාට ඒ බව කියන්නටය. “අයියෙ… තාත්තා අම්මට…”
ඔහු හති දමමින් වුදේ හෙළි කරන්නට විය. ඒ සැණින් ශ්රී මාල් ගේ වැඩිමහල් සොහොයුරු නුවන්ත වහා මවගේ නිවෙසට දිව ගියේය. ඒ වන විටත් ඇය නිසොල්මනව ලේ විල මැද වැටි සිටියාය. මව වැටි සිටි අයුරු දුටු ලොකු පුතාට මහත් වේදනාවක් ඇතිවිය. ඔහු වහා සිය මව ව තම තුරුළට හොවා ගත්තේය. මවද දොතින් ගෙන ඔහු උඩහ සිට පහළට දිව ආවේය. ඒ සමඟ ඔහුගේ මාමා ද එතැනට පැමිණියේය. ඔවුහූ තුවාල ලත් පි්රතිකා රෝහලට රැගෙන ගියහ. “අම්මේ…. අම්මේ…” ත්රිවිලරයේ යන අතරතුර ද ලොකු පුතා බාගෙට දෙනෙත් වසාගෙන රුධිරයෙන් නැහැවි සිටින සිය මවට කතා කළේය. ඒත් මවගේ මුවින් කිසිවක් පිට නොවිය. ඒත් ඔහු උත්සාහය නතර කළේ නැත. “අම්මේ… අම්මේ කතා කරන්න කෝ අම්මේ..”
ඔහුගේ වචනය ඇසි දෝ මඳක් දෙනෙත් විවර කරන්නට උත්සාහ කළ පී්රතිකා ගේ හිස මොහොතකින් ලොකු පුතාගේ දෝත මතම පැත්තකට කඩා වැටිණි. “අම්මේ… අම්මේ… අම්මේ…” ප්රීතිකා ත්රිවිලරය රෝහලට ඇතුළත් කළ අතර වෛද්යවරුන් තුවාල ලත් ඇය පරීක්ෂා කොට බලා බාගෙට විවර වී තිබු දෙනෙත් සම්පුර්ණයෙන් වසා දැමුවේ ප්රීතිකා මිය ගොස් ඇති බව සනිටුහන් කරගෙනය. ප්රීතිකා රෝහලට රැගෙන ගිය ඇගේ වැඩිමහල් පුතාගෙන් ද ප්රශ්න කොට ප්රකාශයක් ලබා ගැනීමට පොලිසිය තීරණය කළේය. ප්රීතිකා හා ඇගේ සැමියා අතර ඇති වන ආරවුල් නිසා ලොකු පුතා මවුපියන්ගෙන් වෙන් වී මවගේ මහගෙදර ජීවත්වෙයි. එම නිවසේ පිහිටියේ ඔවුන්ගේ ගෙදරට පහළිනී. පි්රතිකාගේ නිවස පිහිටියේ කන්ද උඩය. ප්රීතිකා එහි සිය සැමියා හා හත් හැවිරිදි හා තුන් හැවිරිදි දරුවන් සමඟ ජිවත් වුවාය.
ලොකු පුතාගේ වයස අවුරුදු දහනවයකි. ගෙදර ඇති වන ආරවුල් නිසා ඔහු ද මහගෙදර රැඳුණේ පියා සමඟ තරහිනි. ඒ සිය පියා නිතරම බීමත්ව පැමිණි මවට මෙන්ම ඔහුට ද පහර දෙන නිසාය. සමහර දාට පියා පැමිණ තමාත් මවත් මරන බවට තර්ජනය කරන බවද ඔහු පොලිසිය හමුවේ කියා සිටියේය. “මම පිළිමතලාව ඉස්කෝලයට යන්නේ. කලා අංශයෙන් තමයි අධ්යාපනය හදාරන්නේ. ලොකු මල්ලි දෙවෙනි වසරේ ඉගෙනුම ලබන්නේ පොඩි මල්ලි ගෙදරට වෙලා ඉන්නේ. මගේ අම්මයි තාත්තයි නිතරම වගේ ගෙදර ආරවුල් ඇති කර ගන්නවා. ඒ නිසා අම්මට ගහලා තුවාල වෙලා පොලිසියටත් කිහිප වතාවක්ම ගිහින් තියෙනවා.”
පොලිසිය මේ සම්බන්ධයෙන් සැකකාර ගාමිණිගෙන් ද ප්රශ්න කරන්නට විය. ඔහු පොලිසිය හමුවේ මෙසේ ප්රකාශ කළේය. “මම වරද පිළිගන්නවා සර්..” ඔහු මුලින්ම කීවේය. “ඒත් මම මෙයා මරන්නම කියලා මෙහෙම දෙයක් කළේ නැහැ.” “හරි දැන් ඉතින් වැඩේ වෙලා ඉවරයිනේ. ඇයි තමන් පවුලව මැරුවේ. දැන් බලනවා ළමයි ඔක්කොම අනාථයි නේ.” පොලිස් නිලධාරියා ප්රකාශය සටහන් කරගන්නට කලින් ඔහුට කීවේය. ඔහු කිසිවක් නොදොඩා බිම බලාගෙන සිටියේය. “මගේ බිරිඳ පි්රතිකායි මගේ දෙවෙනි පුතා ශ්රී මාලුයි අවුරුදු තුනක් විතර පොඩි පුතත් එක්ක තමයි මම මේ ගෙදර ඉන්නේ. මම විවාහ වුණේ 1996 දී. මගේ වැඩිමහල් පුතාට වයස අවුරුදු 19ක්. එයා මාත් එක්ක අමනාප වෙලා අවුරුදු එකහමාරක් විතර ගෑනිගේ අම්මගේ ගෙදර ජීවත් වෙන්නේ.“ “දවසක් අපි අතර ආරවුලක් ඇති වුණා. ඒකට පොලිසි ගියා. අන්තිමට මට ඇප දුන්නා. මම ගෙදර ගියාට පස්සේ ලොකු පුතා මට ෆෝන් කරලා බැන්නා. ඉන් පස්සේ අපි දෙන්නා අතර තරහ වැඩි වුණා. “ “සිද්ධිය වුණු දවසේ මොකක්ද වුණේ ? ” කට උත්තරය ලියාගාන්නා නිලධාරියා ගාමිණිගෙන් ඇසුවේය. “එදා මාත් ගෑනිත් ගෙදර හිටියේ. පොඩි පුතා ඉස්කෝලේ ගිහින් හිටියේ. දවල් දොළහට විතර දෙවෙනි පුතා ඉස්කෝලේ ඇරිලා වෑන් එකේ එන නිසා ගෑනි පුතා ගිහින් පුතාව අරගෙන ආවා.
මමත් චුටි පුතාත් ගෙදර හිටියේ. “ “මම හිටියේ ඇඳට වෙලා. පොඩි පුතා ඇදේ නිදාගෙන හිටියේ. දෙවෙනි පුතා කියනවා ඇහුණා හෙට ඉස්කෝලේ රැස්වීමකට එන්න කියලා ලියුමක් දුන්නා. ඒ ලියුම නැහැ කියලා. මම කිව්වා එතකොට කිව්වා ලියුම නැති නිසා ඉස්කෝලේ යන්න ඕන නැහැ කියලා. එතකොට ගෑනි කිව්වා පි්රන්සිපල් හම්බ වෙන්නත් ඕන නිසා කොහොම හරි යන්න ඕන කියලා. මම කිව්වා ඕන නැහැ කියලා. ඒත් ගෑනි මට කිව්වා මම යනවා කියලා. එහෙම කියලා එයා මහගෙදරට යන්න සුදානම් වුණා. මම කිව්වා මහගෙදරට යන්න එපා කියලා. එතකොට දෙවෙනි පුතා අපේ ළඟ හිටියේ. ගෑනි පොඩි පුතාගේ කකුල් දෙකෙන් ඇඳලා එයාවත් ගෙනියන්න හැදුවා.“ “මම කිව්වා යන්න එපා කියලා. ආයෙත් එයා පොඩි පුතා උස්සලා ගන්න යනකොට මම ගෑනිගේ අතින් ඇදලා අරගෙන ඇඳයට තිබුණ වක්පිහිය අරගත්තා. ඒත් එක්කම ගෑනි කිව්වා. කොටපිය කොටපිය මැරෙන්නම කොටපිය කියලා. මම ගෑනිගේ ඔළුවට කෙටුවා දෙවෙනි පුතා එපා එපා කියලා කෑගහලා මගේ අතින් ඇද්දා පස්සේ පුතා මාව අතහැරලා දිව්වා.” “පිහියෙන් කොටන කොටම ගෑනි බිම වැටුණා ගෑනි එපා එපා කිව්වා. එතකොට මම කොටලා ඉවරයි. පස්සේ මම එළියට පැනලා පහළ තියෙන පුංචි අම්මගේ ගෙදරට ගිහින් කිව්වා මම ගෑනිට කෙටුවා පොඩි කට්ටිය බලාගන්න කියලා.
පස්සේ තමයි පිහියත් අරන් පන්සලේ මුරපළට ආවේ.“ “ගෑනි මැරෙයි කියලා මම හිතුවේ නැහැ සර්. කොටපිය කොටපිය කියලා කිහිප වතාවක්ම කියපු නිසායි මම කෙටුවේ.” සැකකරුගේ ප්රකාශය සටහන් කරගත් නිලධාරීන් ඔහු රැගෙන ආ තියුණු පිහිය ද අධිකරණයට ඉදිරිපත් කිරීම සඳහා නඩු භාණ්ඩ ලෙස එක්කර ගත්තේය. එය අඟල් නවයක් දිග තියුණු වක් පිහියකි. ඔහු එම පිහිය පාවිච්චි කර ඇත්තේ වත්තේ ගස්වල අතු කැපීමටත් ගස් කප්පාදු කිරීමටත්ය. වත්තේ වැඩ කටයුතු නිම කිරීමෙන් පසු එම වක් පිහිය ගෙදර ඇඳයට තැබීම ඔහු පුරුද්දක් කරගෙන සිටියේය. සැකකරු හා බිරිය අතර නිතර නිතර ආරවුල් ඇතිවන බවත් ඊට හුඟාක්ම හේතුවී ඇත්තේ බිරිය සැකකරුට නොසැලකීමත් බව මේ සම්බන්ධයෙන් කළ විමසීමකදී දවුලුගල පොලිස් ස්ථානාධිපතිවරයා මාංචුවට කීවේය. “ගෑනු කෙනා මිනිහට හරියට සලකන්නේ නැහැ. උයලා පිහලා එයාට කෑම තියන්නේ නැහැ. ඔන්න ඔය වගේ ප්රශ්නත් තියෙනවා. “ “මේ දෙන්නාගේ පැමිණිලි පොලිසියට ඇවිත් ඒවා සමදාන කරලා යවලා තියෙනවා. දෙන්නාගේ ආරවුල් පළාතේ ග්රාම නිලධාරියා විසින් විසඳලා තියෙනවා.
පවුලේ ඥාතීන් එකතු වෙලා ඒවා සමථයකට පත්කරලත් තියෙනවා. ““මේ දෙන්නගේ වයස අනුව පිරිමියා වයස අවුරුදු 10ක් බිරියට වඩා වැඩිමල් පළමු දරුවා ඉපදුණු දවසේ ඉඳලම ආරවුල් තිබිලා තියෙනවා. නොගැළපීම නිසා දික්කසාද වෙන්න සැකකරු තීරණය කරලා හිටියත් ගෑනු කෙනා ඒකට කැමති වෙලා නැහැ. ඒත් සැකකරු නීතිඥයකු මාර්ගයෙන් දික්කසාද වෙන්න තමයි හිටියේ. නීතිඥවරයා හම්බවෙන්න යන්නත් ඉඳලා තියෙනවා. ඒ අතරේ තමයි මේ මිනී මැරුම සිද්ධ වෙන්නේ” “ලොකු පුතයි තාත්තයි අතර ආරවුලක් තියෙනවා. එක පාරක් හලාදිවල ඉස්කෝලේ උත්සවයක් තියෙන වෙලාවේ ළමයි කට්ටියක් ගංජා බොනවා කියලා ආරංචි වෙලා ඔය මනුස්සයා එතැනට ගිහින් ලොකු දරුවා ගෙදර ගෙනත් තරවටු කරලා තියෙනවා. ඒකට ලොකු පුතා තාත්තා එක්ක තරහෙන් ඉඳලා. තාත්තා පහර දීපු බවට රාවයකුත් තියෙනවා.”
“දවසක් ඉස්කෝලේ ට්රිප් එකක් යන්න පොඩි පුතාට පාන් ටෝස්ට් කරලා ගේන්න කියලා තියෙනවා. ගෙදර ටෝස්ටරයක් තිබිලා නැහැ. ගෑනු කෙනා මිනිහට කියලා තියෙනවා ටෝස්ටරයක් හොයලා දෙන්න කියලා මිනිහා කියලා තියෙනවා වෙන මොනවහරි හදලා දෙන්න කියලා. ඒත් ගෑනු කෙනා කොහොමහරි ටෝස්ටර් එකක් ගෙනත් පාන් හදලා දීලා. ඒක තමයි ප්රබලම හේතුව වෙලා තියෙන්නේ දෙන්නගේ රංඩුවට. ඔය වගේ සිද්ධි ගොඩාක් තියෙනවා. මේ වගේ ඝාතන වෙන්නේ එක්කෝ මිනිහා ගෑනි ගැන සැකයක් ඇති කරගෙන නේ. ඒත් මේ සිද්ධියේ එහෙම දෙයක් දැනගන්නට නැහැ.“ ස්ථානාධිපතිවරයා වැඩිදුරටත් සඳහන් කළේය.
අනතුරුව සැකකරු නඩු භාණ්ඩ සමඟ මහනුවර මහෙස්ත්රාන් අධිකරණයට ඉදිරිපත් කරනු ලැබු අතර මරණ පරීක්ෂණය පසුවට සිදු කිරීමට තීරණය කෙරිණි. අධිකරණයට ඉදිරිපත් කළ සැකකරු රක්ෂිත බන්ධනාගාර ගත කෙරුණු අතර මිය ගිය යමුනා පි්රතිනාගේ අවසන් කටයුතු ඥාති හිතවතුන්ගේ සෝ සුසුම් මැද හලාදිවල දී සිදු කෙරිණි. ජ්යෙෂ්ඨ නියෝජ්ය පොලිස්පති මහින්ද ඒකනායක හා එස්.එම් වික්රමසිංහ, මහනුවර කොට්ඨාශ බාර ජ්යෙෂ්ඨ පොලිස් අධිකාරී සිසිර කුමාර, සහකාර පොලිස් අධිකාරී එස්.බී. දියකොලිනවල යන මහත්වරුන්ගේ උපදෙස් දවුලුගල පොලිස් ස්ථානාධිපති ජයම්පත් බණ්ඩාර ප්රමුඛ අපරාධ විමර්ශන අංශයේ ස්ථානාධිපති වයි.ජී.සී වල්ගම්පාය ඇතුළු උපපොලිස් පරීක්ෂක හරිශ්චන්ද්ර, කොස්තාපල්වරුන් වූ ඉන්දික (32870) රත්නායක (52092) හා කපිල (75291) යන නිලධාරීහු මේ පිළිබඳ පරීක්ෂණ වලට එක්වුහ.
-
කුකුළෙක් අතින් ගත් යක්ෂයෙක් නිසා යාපනේ කලබල
යාපනයේ පළාත් කීපයක වැසියන් යළිත් වරක් අමනුෂ්ය බියකින් පෙළෙන බව වාර්තාවේ.
මෙවර යාපනයේ වැසියන් මුහුණදී සිටින්නේ මීට පෙර පැවති භූත උවදුරකට නොව ‘යක්ෂ’ උවදුරකටය.මේ අද්භූත යක්ෂයාගේ එක් අතක පණපිටින් ලේ වැගිරෙන කුකුළකු සිටින අතර අනෙක් අතේ ද ලේ තැවරී ඇති බව යාපනයේ වැසියන් කියා සිටී.
මුලදී යක්ෂයා දුටු පිරිස යාපනයේ සෙසු අයට මේ යකා ගැන පවසන ලද අවස්ථාවේදී ඔවුන් අවඥාවට ලක්කළ නමුත් යක්ෂයා දුටු අයකු යාපනයේ ජනමාධ්ය වෙත යක්ෂයාගේ ඡායාරූප කීපයක් ඉදිරිපත් කිරීමෙන් පසුව එම යකා ඊට පෙර දුටු පිරිස ද පවසා ඇත්තේ තමන් දුටුවේ ද මේ යක්ෂයාම බවයි.
මුහුණ යාන්තමට දැකිය හැකි නමුත් එය ඉතා පැහැදිලිය. හඳුනාගත නොහැකි මේ යක්ෂයා සුදු වස්ත්රයක් මුළු ඇඟපුරාම දවටාගෙන සිටින උස පුද්ගලයකු බව යාපනයේ වැසියෝ පවසති.
පිරිස යක්ෂයා දැක ඇත්තේ අලුයම එකෙන් පසුවය.කෙසේ වෙතත් මේ යක්ෂ කතාව නිසා මුලදී බියට පත් නොවූ යාපනයේ ජනතාව යක්ෂයාගේ ඡායාරූප දැකගැනීමට ලැබීමෙන් පසුව බොහෝ සෙයින් බියට පත්ව තිබේ.
යළිත් පෙර භූත උවදුර පැවති සමයේදී මෙන් රාත්රි කාලයට කවුරුන් කතා කළත් දොරවල් නොඅරින තත්ත්වයටත්, රාත්රි කාලයට ගමන් බිමන් නොයැමටත් දැන් යාපනයේ ජනතාව පුරුදු වී සිටිති.
-
නිසි කලට නිසි ලෙස මැතිවරණ නොපැවැත්වීම මරණයට සහ රටේ විනාශයට හේතුවක්
රටක ප්රජාතන්ත්රවාදය, සර්වජන ඡන්ද බලය සහ ජනතා පරමාධිපත්ය ආරක්ෂා කිරීමට නම් නිසි කලට සහ නිසිලෙස මැතිවරණ පැවැත්විය යුතුයි. මැතිවරණ කල් දැමීමට ක්රියාකළහොත් එය මරණයට සහ රටේ විනාශයට හේතුවක් වන බව ජාතික මැතිවරණ කොමිසමේ සභාපති මහින්ද දේශප්රිය මහතා පැවැසීය.
ඡන්ද හිමියන්ගේ දිනය නිමිත්තෙන් “සැබෑ ප්රජාතන්ත්රවාදය ඡන්ද බලය මත ර¹ පවති” යන මැයෙන් අනුරාධපුර දිස්ත්රික් ලේකම් කාර්යාලය සහ අනුරාධපුර මැතිවරණ කාර්යාලය මගින් සංවිධානය කර තිබූ සම්මන්ත්රණයක් අමතමින් ඒ මහතා මේ බව ප්රකාශ කළේය. මෙම සම්මන්ත්රණය ඉකුත් 07 වැනිදා මැදවච්චිය මෛත්රිපාල සේනානායක මධ්ය විද්යාලයේදී පැවැත්විණි.
මෙහිදී අදහස් දැක්වූ ජාතික මැතිවරණ කොමිසමේ සභාපති මහින්ද දේශප්රිය මහතා වැඩිදුරටත් මෙසේද පැවැසීය.
ප්රජාතන්ත්රවාදී රාජ්යයක පදනම ජනතාවගේ කැමැත්ත විය යුතුයි එනම් පාලනයේ පදනම ජනතාවගේ කැමැත්ත විය යුතුයි. එම කැමැත්ත නිසි කලට පැවැත්වෙන ඡන්ද විමසීම්වලින් ප්රකාශ විය යුතුයි. හැමදාම ඡන්ද විමසීම් කල් තැබූ රටවල්වල විනාශයක් ඇතිවුණා. කිසිදු මැතිවරණයක් කල් දැමීම ප්රජාතන්ත්රවාදී සමාජයක මූලික ගුණාංගවලට ඉදුරාම පටහැනි බව ජාතික මැතිවරණ කොමිෂන් සභාවේ අපි ප්රසිද්ධියේ කියනව. ඒ බව අපි දේශපාලන පක්ෂවලට ලිතව දැනුම්දී තිබෙනවා. ඒ නිසා ප්රජාතන්ත්රවාදය, ඡන්ද බලය, ජනතා පරමාධිපත්ය ආරක්ෂා කිරීමට නම් නිසිකලට මැතිවරණ පැවැත්විය යුතුයි.
අපේ රටේ ඡන්ද පොළට යාම තහනම් කර නොමැති කාලවල පැවැත්වූ මැතිවරණ වලදී දුෂ්ඨ, තුච්ඡ, නින්දිත සහ නරක යන ඔක්කොම වචන යොදල කියන්න පුළුවන්. ඡන්ද විමසීම් තුනක් ගැන. ඉන් එකක් 1999 වසරේ පැවැත්වූ කුප්රකට වයඹ පළාත් සභා මැතිවරණය. එම මැතිවරණයේදී ඡන්ද මධ්යස්ථානවල රාජකාරි කළ සමහර මැතිවරණ නිලධාරීන් මැතිවරණයදා උදේ 9.00 වන විට ඡන්ද පෙට්ටිත් රැගෙන කුරුණෑගල කච්ෙච්රියට ආවා. මොකද එදින උදේ 8.45 වන විට මැරයෝ ඇවිත් ඔක්කොම ඡන්දදාල ඉවරයි. ඒක දුෂ්ටම මැතිවරණයක්.
අනෙක් දූෂිතම මැතිවරණ දෙක තමයි 1982 වසරේදී පැවැත්වූ ජනමත විචාරණය සහ 1981 වසරේදී පැවැත්වූ යාපනය දිස්ත්රික් සංවර්ධන සභා මැතිවරණය. යාපනය දිස්ත්රික් සංවර්ධන සභා මැතිවරණයේදී මැතිවරණ රාජකාරි ඉටුකිරීමට කිසිදු අයිතියක් නොමැති කණ්ඩායමක් කොළඹින් සහ කුරුණෑගලින් එහි යෑව්වා. එහි ප්රතිඵලයක් ලෙස ඡන්ද මධ්යස්ථානවල තිබූ ඡන්ද පෙට්ටි අතුරුදන් වුණා. පසුව ඉන් ඡන්ද පෙට්ටි කීපයක් සොයා ගත්තා. හැබැයි එම මැතිවරණයේදී ඡන්ද ප්රතිඵලය ලෙස විපක්ෂය සියලු ඡන්ද කොට්ඨාස ජයග්රහණය කළා. බලයේ හිටපු පක්ෂයට එකම කොට්ඨාසයක්වත් ජයග්රහණය කිරීමට නොහැකි වුණා. ලංකාවේ එවැනි ප්රතිඵලයක් ලැබුණු එකම අවස්ථාව එයයි.
ජනතාව එසේ ප්රතිචාර දක්වද්දී ලංකාවේ ඉතාම අවාසනාවන්ත සිදුවීමක් ලෙස ගැනෙන යාපනය පුස්තකාලය ගිනි බත්වුණේ එදින රාත්රියේදීයි. එම සිද්ධියෙන් පසු යාපනයේ ප්රජාතන්ත්රවාදයට ගරු කළ මධ්යස්ථ ජනතාව තුළ ඡන්දය කෙරෙහි තිබූ විශ්වාසය බිඳී ගියා. එහි වාසිය අත්වුණේ බැලට් එක කෙරෙහි නොව තුවක්කුවට විශ්වාසය තබා කටයුතු කළ කල්ලිවලටයි. මේ නිසා 1983 කලබලය තමයි උතුරේ සන්නද්ධ කණ්ඩායම් වලට නැගී සිටීමට පෙට්රල් දැම්මේ. යාපනය දිස්ත්රික් සංවර්ධන සභා මැතිවරණයෙන් තමයි එම සන්නද්ධ කල්ලිවලට නැගී සිටීමට ඔක්සිජන් ලැබුණේ. එහි ප්රතිඵලයක් ලෙසයි මහා සන්නද්ධ කල්ලියක් බිහිවී රටම විනාශ වුණේ.
1982 වසරේ පැවැති ජනාධිපතිවරණයේ ප්රතිඵල අනුව 1983 මහ මැතිවරණයක් පැවැත්වූවා නම් සමානුපාතික ඡන්ද ක්රමය යටතේ එදා තරුණයන් නියෝජනය කළ පක්ෂයට මන්ත්රීධුර පහක් හෝ දහයක් ලැබීමට ඉඩ තිබුණා. එම අවස්ථාව අහිමිවීමෙන් පසු එම තරුණයන්ට ඡන්දය කෙරෙහි තිබූ විශ්වාසය නැතිව ගියා. ඒ නිසා එම තරුණ පක්ෂයේ පිරිසක් ආයුධ අතට ගෙන දේශප්රේමී ජනතා ව්යාපාරය ගොඩ නැගුවා. එයින් රජයට එරෙහිව කැරැල්ලක් ඇතිවුණා. ඉන් මිනිස් ජීවිත හැට දහසක් පමණ අහිමි වුණා.
මැතිවරණ හරියට නොතිබ්බොත් මැතිවරණ කල් දැමුවොත් එය මරණයට හේතු වෙනවා. ඒ නිසා අපි නියමිත කලට මැතිවරණ පැවැත්විය යුතුයි. 1972 ජනරජ ව්යවස්ථාව ක්රියාත්මක කිරීමෙන් පසු එවකට පැවැති රජය වසර පහකට පැවති නිල කාලය වසර හතක් කළා. ඊට එරෙහිව එදා පාර්ලිමේන්තුවේ විපක්ෂ නායකවරයා ලෙස කටයුතු කළ ඡේ. ආර්. ජයවර්ධන මහතා පාර්ලිමේන්තුවෙන් ඉල්ලා අස්වී ඡන්දය ඉල්ලුවා. ඒ ආදර්ශය ලංකාවේ දේශපාලනඥයෝ දන්නවා.
ඒ නිසා මැතිවරණ කල්දැමීමට විරුද්ධවීම දේශපාලඥයන්ගේ කාර්යයක්. මැතිවරණ නිසි කලට පැවැත්වීම ආණ්ඩු පක්ෂයේ මෙන්ම විපක්ෂයේත් වගකීමක්. පාර්ලිමේන්තුවේ මහජන නියෝජිතයන් දෙසිය විසි පස් දෙනාගේම වගකීමක් තමයි උතුරු මැද, සබරගමුව සහ නැගෙනහිර පළාත් සභා මැතිවරණ පවත්වා ජනතාවට තම කැමැත්ත ප්රකාශ කිරීමට කඩිනමින් අවස්ථා සැලසීම.
-
තැපෑල අඛණ්ඩ වර්ජනයේ
ඉල්ලීම් දෙකක් මුල්කර ගනිමින් ඒකාබද්ධ තැපැල් වෘත්තීය සමිති පෙරමුණ ඊයේ (11) සවස 4.00 සිට අඛණ්ඩ වැඩවර්ජනයක් ආරම්භ කළේය.
ප්රධාන තැපැල් කාර්යාල 653 ක උප තැපැල් කාර්යාල 3610 ක, පාලන කාර්යාල 100 ක සේවකයන් 23,000 ක් වැඩවර්ජනයට සහභාගී වන බව ඒකාබද්ධ තැපැල් වෘත්තීය සමිති පෙරමුණේ කැඳවුම්කරු චින්තක බණ්ඩාර මහතා ඊයේ (11) පැවැති මාධ්ය හමුවකදී පැවැසීය.
තැපැල් දෙපාර්තමේන්තුවට ගැළපෙන ස්වාධීන බඳවා ගැනීම් පටිපාටියක් සකස් කරන ලෙස සහ වැඩබලන ස්ථානාධිපතිවරුන්ගේ රැකියාව සුරක්ෂිත කරන ලෙස කලක සිට බලධාරීන්ගෙන් කළ ඉල්ලීම්වලට නිසි විසඳුමක් නොලැබීම නිසා මෙම වැඩවර්ජනය සිදුකරන බවද ඒ මහතා කීය.වැඩ බලන තැපැල් ස්ථානාධිපතිවරුන් වසර 7, 8, 10 වැනි කාලයක් වැඩ බලන ස්ථානාධිපතිවරුන් ලෙස කටයුතු ඉටුකර තිබිදීත් ඔවුන් ස්ථිර කිරීම වෙනුවට වෙනත් පාර්ශ්ව තැපැල් ස්ථානාධිපතිවරුන් ලෙස පත් කිරීමට බලධාරීන් උත්සහ කරන බවත් මේ සම්බන්ධයෙන් කරුණු දක්වා කැබිනට් මණ්ඩලයට ඉදිරිපත් කළ කැබිනට් සංශෝධනයට අනුමැතිය ලබානොදී මාස හතරකට වැඩි කාලයක් කල් මරමින් සිටින බවත් අවධාරණය කළ ඒ මහතා ආරම්භ කළ වැඩවර්ජනය සඳහා සාධාරණ විසඳුමක් ලබා නොදෙන්නේ නම් අඛණ්ඩ වැඩවර්ජනය ඉදිරියටත් ගෙනයන බව වැඩිදුරටත් කියා සිටියේය.
රට පුරා පිහිටි සියලු තැපැල් කාර්යාල වසා දමා අඛණ්ඩ වැඩවර්ජනයක් තැපැල් වෘත්තීය සමිති පෙරමුණ අද සිට (12) රට පුරා ආරම්භ කළ බව ඒකාබද්ධ තැපැල් වෘත්තීය සමිති පෙරමුණේ කැඳවුම්කරු චින්තක බණ්ඩාර මහතා පැවැසීය.රට පුරා පිහිටි සියලු තැපැල් කාර්යාල අද (12) සිට අපි සම්පූර්ණයෙන්ම වසා දමනවා. තැපැල් දුම්රිය අපි ඊයේ සවස සිට නවතා දමනු ලැබුවා.
විදේශ තැපැල් හරහා ශ්රී ලංකාවේ සිට විදේශ රටවලට ලිපි සහ පාර්සල් යෑවීමත් විදේශ රටවල සිට කටුනායක බණ්ඩාරනායක ගුවන් තොටුපළ වෙත රැගෙන එන තැපැල් මලු කොළඹට රැගෙන ඒමත් අපි සම්පූර්ණයෙන්ම නතර කරනු ලැබුවා.
මෙම අඛණ්ඩ වැඩවර්ජනය සඳහා තැපැල් දෙපාර්තමේන්තුව තුළ සේවය කරන 21000 ක් පමණ වන සියලුම තැපැල් සේවකයන් සහ වෘත්තීය සමිති තිහක් එක්වී සිටිනවා.
තැපෑල සංවෘත දෙපාර්තමේන්තුවක් බවට පත් කිරීම ඇතුළු අපේ ඉල්ලීම් රජය ලබාදෙන තුරු වර්ජනය නතර නොකරන බවද හෙතෙම පැවැසීය. -
සුපිරි ඉන්දීය නිලි ප්රියංකා රඟපාන අමෙරිකානු නාට්යයක් නිසා ඉන්දියාව ගිනි ගනියි
සුපිරි බොලිවුඩ් නිලි ප්රියංකා චොප්රාට එරෙහිව ඉන්දියාවේ මේවන විට දැඩි විරෝධයක් එල්ල වී තිබෙනවා. ඒ මේ දිනවල අමෙරිකාව ඇතුළු යුරෝපයේ ප්රචාරය වන ජනප්රිය ටෙලි නාට්ය මාලාවක් වන “Quantico” කතාංග මාලාවේ සිදුවීමක් අරඹයා බවයි විදෙස් මාධ්ය වාර්තා කරන්නේ.මෙම කතා මාලාවේ ප්රධාන චරිතය රඟ දක්වන ප්රියංකා චොප්රා එෆ්බිඅයි නිලධාරිනියක් ලෙස කතා මාලාවේ සිය භූමිකාව රඟ දක්වනවා. ජුනි මස 01 වනදා විකාශය වූ කතා මාලාවේදී කාශ්මීරයේ සිදුවන ත්රස්ත ප්රහාරයක් වැළැක්වීමේ ජවනිකාවක් සම්බන්ධයෙන් විකාශනය වී ඇති අතර ඒ හරහා සිය මවු රටට අපකීර්තියක් ගෙන දුන් බව කියමිනුයි ඉන්දීය වැසියන් ඇයට එරෙහිව විරෝධතා මාලාවක් දියත් කර ඇත.කෙසේ නමුත් තමන් නියම ඉන්දියානුවෙක් බවත් පසුගිය කතා මාලාවේ විකාශනය වූ සිදුවීම් කිහිපයක් හේතුවෙන් ඉන්දීය ජනතාවගේ හැඟීම් සහ සිතුවිලි වලට ඇතිවූ වේදනාව ගැන තමා කනගාටුවට සහ වේදනවාට පත්වන බවත් එය හිතාමතා කළ දෙයක් නොවන බව දන්වමින් ඇය ට්ව්ටර් පණිවිඩයක් පළකර ඇති අතර මේ වන විට බහුතර ඉන්දීය ප්රේක්ෂකයින් අන්තර්ජාලය ඔස්සේද ඇයට සිය අප්රසාධය පළකර ඇති බවයි වාර්තා වන්නේ.මේ අතර මෙම කතා මාලාව විකාශනය කරනු ලබන සහ නිෂ්පාදනය කරනු ලබන අමෙරිකාවේ ABC නාලිකාවද ඉන්දීය ජනතාවගෙන් සමාව අයැද ප්රකාශයක් නිකුත් කර ඇති අතර එහි වැඩි දුරටත් සඳහන් වන්නේ මෙම සිද්ධිය සම්බන්ධයෙන් ප්රියංකා චොප්රාගේ කිසිදු සම්බන්ධයක් නැති බවත් අඩුම වශයෙන් මෙම කතාවේ තිර පිටපත ඇය නොලියු බව සහතික කර ඇත.ඉන්දියාව සහ පාකිස්ථානය 1947 වසරේදී දෙකඩ වීමෙන් අනතුරුව කාශ්මීරයේ යුද්දයන් දෙකක් පැවතුනා. මේ දක්වාද කාශ්මීරයේ අයිතිය තමන් සතු බව කියමින් දෙපාර්ශයම තම අයිතිය තහවුරු කර ගැනීමට ප්රයත්න දරමින් සිටී. -
දර්වන් 19ක් වැදූ මුණුබුරු මිණිබිරියන් 118 කටත් වඩා වැඩි වීරමාතා’ රාජ්ය සම්මානලාභී මාතාව දිවියෙන් සමුගනී
රංචමඩමට අවමංගල්ය සංස්කෘතිය හඳුන්වා දුන්නේ ඇගේ සැමියායි
රටට වැඩදායක දරුවන් 19 දෙනකු ලක්මවට දායාද කර “වීරමාතා” රාජ්ය සම්මානයෙන් පිදුම් ලද මාතාවක් දසදහස් සංඛ්යාත ජනකායක් අතිමහත් ගරු බුහුමන් සහ සෝසුසුම් මධ්යයේ පසුගිය සෙනසුරාදා (9 දා) පස්වරුවේ දැයෙන් සමුගෙන ගියාය. ඇය කොළඹගේආර රංචමඩම මානෙල් පෙදෙසේ විසූ කේ. එච්. එන්සිනා නමැති 92 හැවිරිදි මාතාවකි. වලස්මුල්ල කිරම නාගස්රුප්ප ප්රදේශයේ උපත ලද ඇය හක්මන නරවැල්පිට හේමාලංකාරගේ සව්නේරිස් යන අය සමඟ විවාහ වී කොළඹගේආර රංචමඩම ගමට පැමිණ හේන් ගොවිතැන් කරමින් ජීවිතය ආරම්භ කර ඇත. එවකට ඝණ වනාන්තරයක්ව පැවැති රංචමඩම ප්රදේශයට ඔවුන් පදිංචියට පැමිණෙන විට සිටියේ තවත් එවැනිම වූ ගොවි පවුල් කිහිපයක් පමණකි. ස්ථිර නිවාස කිසිවක් එහි නොතිබුණ අතර ලී දඬු යොදා ඉලුක්සෙවිලි කර තැනූ වාඩිවල ඔවුහු පදිංචිව සිටියහ. ඔවුහු ලී වලින් තැනූ මැස්සක් නිදාගැනීම සඳහා භාවිත කළහ. පවුලක සාමාජිකයකු මියගිය පසු කළයුතු අවමංගල්ය කටයුතු ගැන අවබෝධයක් නොතිබුණු එම පිරිස් යම් අයකු මියගිය විට මිනිය එතැනම තබා එම වාඩිය අත්හැර වෙනත් වාඩියක් හදාගෙන එහි පදිංචියට යාම සිදුකර ඇත.
සව්නේරිස් මහතා මෙහි පදිංචියට පැමිණීමත් සමඟ(සව්නේරිස් මහතා දැන් ජීවතුන් අතර නැත) මෙම සංස්කෘතිය වෙනස් කිරීමට ඔහුට හැකිවිය. ඉන් පසුව රංචමඩමේ පළමුවෙන්ම මියගිය තැනැත්තාගේ දේහය මිනී පෙට්ටියක තැන්පත් කර අවමංගල්ය චාරිත්රානුකූලව භූමදාන කිරීමට ඔහු පියවර ගත්තේය. සමාජ සේවයට දැඩි ඇල්මක් දැක්වූ මෙම යුවළ අසල්වැසියන් සමඟ එක්ව එම යුගයේ අවශ්යතා පරිදි ගැමියන්ගේ සුබසාධනය වෙනුවෙන් කටයුතු කිරීමට පියවර ගත්හ.
සව්නේරිස් මහතාට දාව එන්සිනා මාතාව බිහිකළ දරුවන් 19 දෙනා අතරින් 15 දෙනෙක් දැනට ජීවත්ව සිටිති. ඔවුන්ගෙන් කිහිපදෙනෙක් කොළඹ, දෙනියාය, පස්ගොඩ, වලස්මුල්ල, මිනුවන්ගොඩ වරාපිටිය යන ප්රදේශවලත් සෙසු අය රංචමඩම කොළඹගේආර ප්රදේශවලත් පදිංචිව සිටිති. මෙම මාතාවගේ එක් දියණියක් දරුවන් දස දෙනකු බිහිකර ඇත. තුන් මුණුබුරන් දැක ගැනීමේ වාසනාව හිමිකර ගැනීමටද ඇයට භාග්යය තිබී ඇත. ඇයගේ දරු මුණුබුරු පරම්පරාව 118 ද ඉක්මවන බව දැනට ශ්රී ජයවර්ධනපුර විශ්වවිද්යාලයේ අධ්යාපන ලබන ඇයගේ මිනිබිරියක වන එච්. කේ. ඒ. කාංචනමාලා මෙනවිය පැවැසුවාය. ප්රදේශයේ ජනප්රිය කවියකුවූ විශ්රාමික ගුවන් හමුදා නිලධාරි විමල්මාදන මහතා කියා සිටියේ ඇය මියයන තුරුම ඉතාම නීරෝගීව ජීවත්වූ බවය. අඩුවශයෙන් වේදනානාශක පෙත්තක්වත් බීමට තරම් රෝගයක් ඇයට වැළඳී නැති බවද ඔහු පැවැසීය. ඇය මියගිය අවස්ථාවේ සිට පසුගිය සෙනසුරාදා (09දා) පවුලේ සුසාන භූමියේදී අවසන් කටයුතු සිදුකරන අවස්ථාව දක්වා දසදහස් සංඛ්යාත ජනතාවක් වැලනොකැඩී ඇයට ගරු බුහුමන් දැක්වීම සඳහා පැමිණියහ.
-
කොස්ගොඩ සුජී කරන්දෙණිය උප සභාපතිව බිලි ගනී
කරන්දෙණිය ප්රාදේශීය සභාවේ උප සභාපති ඩොනල්ඩ් සම්පත් රණවීර (48) මහතා සිකුරාදා (08) රාත්රි වෙඩි තබා ඝාතනය කර තිබේ. උප සභාපතිවරයා ඌරගස්මංහන්දිය, කොරකීන ප්රදේශයේ පැවැති මංගල සාදයකට සහභාගි වී ආපසු නිවස බලා යමින් සිටියදී කොරකීන හන්දියේදී මෙම වෙඩි තැබීම සිදුව තිබෙන බව ඌරගස්මංහන්දිය පොලිසිය කියයි.
පසුගිය පෙබරවාරි 10 වැනිදා පැවැති පළාත් පාලන මැතිවරණයේදී ශ්රී ලංකා පොදුජන පෙරමුණ යටතේ කරන්දෙණිය ප්රාදේශීය සභාවට තරග කළ ඩොනල්ඩ් සම්පත් රණවීර මහතා එයින් ජයග්රහණය කර කරන්දෙණිය ප්රාදේශීය සභාවේ උප සභාපතිවරයා ලෙස තේරීපත් විය.
උප සභාපතිවරයා තමාට අයත් කළු පාට හයිරුෆ් වර්ගයේ කැබ් රථයෙන් ගමන් කරමින් සිටියදී රියෑදුරු අසුන පැත්තෙන් වෙඩි තැබීම සිදුකර තිබෙන බවත් ඒ වන විට කැබ් රථයේ රියෑදුරු සහ පිටුපස අසුනේ තවත් දෙදෙනකු සිට ඇති බවත් පොලිස් පරීක්ෂණවලදී තහවුරු වී තිබේ. උප සභාපතිවරයා සිට ඇත්තේ රියෑදුරු අසුනට යාබද අසුනේ බවද ටී – 56 ගිනි අවියකින් වෙඩි තැබීම සිදුකර තිබෙන බවද ඌරගස්මංහන්දිය පොලිසියේ ප්රකාශකයෙක් පැවසීය.
යතුරුපැදියකින් පැමිණ ඇති ඝාතකයන් දෙදෙනා මග හරස් කොට උප සභාපතිවරයාගේ කැබ් රථය නවතා කැබ් රථයේ රියෑදුරු අසුන පැත්තෙන් වෙඩි කීපයක් තබා ඇත. එවිට රියෑදුරු හිස පාත්කොට ඇති බවත් එයින් පසු ගිsනි අවිය රියෑදුරු අසුන පැත්තේ ජනේලයෙන් කැබ් රථය තුළට දමා උප සභාපතිවරයාට තවත් වෙඩි කීපයක්ම තබා ඇති බවත් පොලිස් පරීක්ෂණවලදී තහවුරු වී තිබේ.
වෙඩි තැබීමෙන් පසු ඝාතකයන් දෙදෙනා ඔවුන් පැමිණි යතුරුපැදියෙන්ම පලායැමට උත්සාහ කර ඇති බවත් හදිසිය හේතුවෙන් වෙඩි තැබූ පුද්ගලයාට යතුරුපැදියට ගොඩවීමට නොහැකි වී ඇති බවත් ඌරගස්මංහන්දිය පොලිසිය කියයි. පසුව ඔහු අඳුරේම ගිනි අවියත් සමඟ පලාගොස් තිබේ. වෙඩි වැදුණු උප සභාපතිවරයා කැබ් රථයේ සිටියදීම එහි රියෑදුරු කැබ් රථය වේගයෙන් ධාවනය කර පලායන ඝාතනයට පැමිණි අනිත් සැකකරුගේ යතුරුපැදියේ හප්පා ඔහු අනතුරට ලක්කර තිබේ. ඝාතනය සිදුකරන ලද ස්ථානයේ සිට මීටර් 50 – 100 අතර දුරකින් සිදුකර ඇති මෙම අනතුරින් බරපතළ තුවාල ලැබූ සැකකරුට කැබ් රථයේ පිටුපස අසුනේ සිටි දෙදෙනා සහ රියෑදුරු විසින් පහරදී තිබෙන අතර වෙනත් අයකු විසින් තුවාලකරු ඌරගස්මංහන්දිය රෝහලට ඇතුළත් කිරීමෙන් පසු පොලිසිය විසින් අත්අඩංගුවට ගෙන තිබේ. සැකකරු මේ වන විට ඇල්පිටිය මූලික රෝහලට මාරුකර යවා පොලිස් අත්අඩංගුව යටතේ එහි ප්රතිකාර ලබමින් සිටී. මෙසේ අත්අඩංගුවට ගෙන ඇත්තේ කළුවලගොඩ, උතුරු මාගල, ඌරගස්මංහන්දිය ලිපිනයේ පදිංචි අසේල රණසිංහ (22) නමැති අයෙකි.
සිද්ධිය වූ ස්ථානයේ තිබී සැකකරුවන්ගේ ජංගම දුරකථනයක් හා ටී 56 පතුරම් මැගසිනයක්ද පොලිසිය විසින් සොයාගෙන තිබේ. එම මැගසිනයේ ටී 56 පතුරම් 05 ක් තිබූ බවද, කැබ් රථයට වෙඩි ප්රහාර 15 ක් පමණ එල්ල වී තිබූ බවද පොලිස් පරීක්ෂණවලදී තහවුරු වී තිබේ.
පසුව කැබ් රථය එහි රියෑදුරු විසින් වෙඩි වැදුණු උප සභාපතිවරයාද සමඟ කරන්දෙණිය, බොරකන්ද රෝහල වෙත ධාවනය කර උප සභාපතිවරයා රෝහලට භාරදී රියෑදුරුද ප්රතිකාර සඳහා එම රෝහලටම ඇතුළත් වී තිබේ. රියෑදුරුගේ අතක පමණක් සුළු සීරීම් තුවාලයක් පමණක් තිබූ බවත් උප සභාපතිවරයා රෝහලට ඇතුළත් කරන විටත් මියගොස් සිටි බවත් රෝහල් ආරංචි මාර්ග සඳහන් කරයි.
මංගල සාදයේදී උප සභාපතිවරයා මත්පැන් පානය කර නොමැති බවත් රියෑදුරු ඇතුළු කැබ් රථයේ ගමන් ගත් අනෙක් තිදෙනාම මත්පැන් පානය කර සිට ඇති බවත් පොලිස් පරීක්ෂණවලදී තහවුරු වී තිබේ. උප සභාපතිවරයා මඟුල් ගෙදරින් පානය කර ඇත්තේ උණුවතුර වීදුරුවක් පමණක් බවද පොලිස් පරීක්ෂණවලදී තහවුරු වූයේ යෑයි පොලිසිය කියයි.
සිදුවීමෙන් පැය 04 කට පමණ පසු එනම් 09 දා අලුයම 2.30 ට පමණ ඇල්පිටිය වැඩබලන මහෙස්ත්රාත් වජිරා පොන්නම්පෙරුම මහත්මිය සිද්ධිය වූ ස්ථානයට පැමිණ මහෙස්ත්රාත් පරීක්ෂණය පවත්වන ලද අතර දේහය ගාල්ල, කරාපිටිය ශික්ෂණ රෝහලට ගෙන ගොස් පශ්චාත් මරණ පරීක්ෂණය පවත්වන ලෙසටද නියෝග කළාය.
ඝාතනයට ලක්වූ ඩොනල්ඩ් සම්පත් රණවීර (48) නමැති අයගේ සහෝදරයාද මීට මාස කීපයකට පෙර කරන්දෙණිය ප්රදේශයේ නිවසක සඟවා තිබියදී ගිනි අවි 03 ක් සමඟ විශේෂ කාර්ය බළකාය මගින් අත්අඩංගුවට ගෙන තිබේ. ඔහු සන්තකයේ තිබී බෝර 12 ගිනිඅවි 12 ක් සහ විදේශීය රටක නිෂ්පාදිත පෑනක ප්රමාණයේ මයික්රෝ වර්ගයේ පිස්තෝලයක් සොයාගෙන තිබුණි. කරන්දෙණිය, කැටවල පදිංචි ඩොනල්ඩ් කුමාර රණවීර (36) නමැති ඔහු මේ වන විටත් රක්ෂිත බන්ධනාගාරගතව සිටී.
මෙම අයිය මලෝ දෙදෙනා හිටපු නියෝජ්ය ඇමැතිවරයකු මෙන්ම එල්.ටී.ටී.ඊ. සංවිධානයේ නැගෙනහිර සන්නද්ධ නායකයාව සිටි විනයාගමූර්ති මුරලිදරන් හෙවත් කරුණා අම්මාන්ගේ සමීපතමයන් බව ඇල්පිටියේ උසස් පොලිස් නිලධාරියෙක් ප්රකාශ කළේය. ඒ හරහා මොවුන්ට ගිනිඅවි ලැබී තිබෙන බවටද පොලිසිය විශ්වාස කරයි. මෙම ඝාතනයට දැනට ඩුබායිහි සැඟවී සිටින දකුණේ පාතාල කල්ලි නායකයකු වන කොස්ගොඩ සුජී නමැත්තාගේ සම්බන්ධයක් තිබෙන බවද අත්අඩංගුවට ගත් පුද්ගලයා කොස්ගොඩ සුජීගේ ගෝලයකු බවද ඌරගස්මංහන්දිය පොලිසිය කියයි.
ඝාතනයට ලක්වූ උප සභාපතිවරයා කරන්දෙණියේ ඉඩම් මිලදී ගෙන කට්ටි කර විකිණීමේ ව්යාපාරයක් පවත්වාගෙන ගොස් ඇත. මුලදී මේ සඳහා කොස්ගොඩ සුජීගේ සහ ඔහුගේ ගෝලයන්ගේද සහාය ලැබී ඇතත් පසුව උප සභාපතිවරයා කොස්ගොඩ සුජී සමඟ විරසක වී ඇත. පසුගිය වසරේ ඔක්තෝබර් 29 වැනිදා ඌරගස්මංහන්දිය, යුදපිටිය ප්රදේශයේදී වෙඩි තබා ඝාතනය කරන ලද පියා, පුතුන් දෙදෙනා සහ අනෙක් අයගේ ඝාතකයන් ඇසුරු කළැයි උප සභාපතිවරයා කෙරෙහි කොස්ගොඩ සුජීගේ වෛරයක් ගොඩනඟාගෙන තිබූ බවද පොලිස් පරීක්ෂණවලදී තහවුරු වී තිබේ. එසේ ඝාතනයට ලක්වූ පියා හා පුතුන් දෙදෙනා ඥතීත්වයෙන් කොස්ගොඩ සුජීට බාප්පා හා සහෝදරයෝ වෙති. සභාපති ඝාතනයට මෙම සිද්ධියත් බලපෑවේද යන්න සෙවීමට පොලිස් පරීක්ෂණ පවත්වන බවද ඌරගස්මංහන්දිය පොලිසිය කියයි. -
වවුනියාවේ මාස 8ක දරුවා පැහැරගත් අටදෙනා අත්අඩංගුවට
වවුනියාවේදී මාස අටක දරුවකු බලහත්කාරයෙන් පැහැරගෙන යාමේ සිද්ධියට සම්බන්ධ සැකකරුවන් අට දෙනාම මඩකලපුව එරාවුර් ප්රදේශයේදී අත්අඩංගුවට ගත් බව වවුනියාව පොලිසිය පැවසීය.පසුගිය 31 වැනිදා අලුයම වෑන් රථයකින් පැමිණි හය දෙනෙකුගෙන් යුත් කණ්ඩායමක් බලහත්කාරයෙන් නිවසට කඩා වැදී අදාළ දරුවා පැහැරගෙන ගොස් තිබිණි.
වෂුදරන් වානිෂන් නමැති මාස 08 ක් වයසැති දරුවකු එලෙස පැහැරගෙන ගොස් තිබිණි.
දරුවාගේ පියා ලන්ඩනයේ පදිංචිව සිටින අතර, ඔහු හා තමා අතර කලෙක පටන් ආරවුලක් හටගෙන ඇති බවටත් අදාළ ආරවුල හේතුවෙන් දරුවාගේ පියා කණ්ඩායමක් යොදා දරුවා පැහැරගෙන යන්නට ඇති බවට සැකකරන බවත් දරුවාගේ මව සඳහන් කළාය.දරුවා රැගෙන ගොස් දින කිහිපයකට පසුව දරුවාගේ පියා බව සැලකෙන පුද්ගලයා විදෙස් රටක සිට වව්නියාව පොලිසියට දුරකතන ඇමතුමක් ලබාදී පවසා ඇත්තේ දරුවාගේ මව විසින් අන්තර්ජාලය ඔස්සේ දරුවා තමන්ට පෙන්වීම නවතා දැමීම හේතුවෙන් තමන් පිරිසක් යොදවා දරුවා පැහැරගත් බවයි.
පසුව මුලතිව් පුදුකුඩිඉරිප්පු ප්රදේශයේ දරුවා සඟවාගෙන සිටියදී සොයාගැනීමට හැකි වුණි. දරුවා පැහැර ගැනීමේ සිද්ධිය සම්බන්ධයෙන් පුදුකුඩිඉරිප්පු ප්රදේශයේ පදිංචි කාන්තාවෝ දෙදෙනෙක් මීට පෙර අත්අඩංගුවට ගනු ලැබූහ.