Author: Editor

පාර්ලිමේන්තුවේ පොදු ව්‍යාපාර පිළිබඳ කාරක සභාව (කෝප් කමිටුව) ලබන අගෝස්තු 03 වැනිදා ශ්‍රී ලංකා පාපන්දු සම්මේලනය පාර්ලිමේන්තුව හමුවට කැඳවා ඇති අතර, රජයේ ගිණුම් කාරක සභාව (කෝපා කමිටුව) වෙත පරිවාස හා ළමාරක්ෂක සේවා දෙපාර්තමේන්තුව අගෝස්තු 04 වැනිදා කැඳවා තිබේ.   

පාර්ලිමේන්තුවේ පොදු ව්‍යාපාර පිළිබඳ කාරක සභාව, රජයේ ගිණුම් කාරක සභාව සහ අමාත්‍යාංශයීය උපදේශක කාරක සභා ඇතුළු කාර සභා රැස්වීම් 13ක් අගෝස්තු පළමු සතිය තුළදී පැවැත්වීමට නියමිත බව පාර්ලිමේන්තුවේ මහ ලේකම් ධම්මික දසනායක මහතා පැවසීය.

කෝප් කමිටුව එහි සභාපති මහාචාර්ය චරිත හේරත් මහතාගේ ප්‍රධානත්වයෙන් රැස්වන අතර, රජයේ ගිණුම් කාරක සභාව මහාචාර්ය තිස්ස විතාරණ මහතාගේ සභාපතිත්වයෙන් රැස්වේ. සෞඛ්‍ය පෝෂණ හා දේශීය වෛද්‍ය අමාත්‍යාංශයේ වෛද්‍ය සැපයුම් අංශය විසින් සිදු කරනු ලබන වෛද්‍ය සැපයුම් ක්‍රියාවලිය පිළිබඳ විගණකාධිපතිවරයාගේ විශේෂ වාර්තාව කෝපා කමිටුව විසින් අගෝස්තු 03 වැනිදා විමර්ශනයට ලක් කරනු ඇත.

එයට අමතරව අගෝස්තු 03 වැනිදා අධිකරණ කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති අමාත්‍ය අලි සබ්රි මහතාගේ ප්‍රධානත්වයෙන් සහ සෞඛ්‍ය කටයුතු පිළිබඳ අමාත්‍යාංශයීය උපදේශක කාරක සභාව සෞඛ්‍ය අමාත්‍ය පවිත්‍රා වන්නිආරච්චි මහත්මියගේ සභාපතිත්වයෙන්ද රැස්වනු ඇත.

ලබන අගෝස්තු 04 වැනිදා  ශ්‍රී ලංකා ප්‍රමිති ආයතනය ‍පොදු ව්‍යාපාර පිළිබඳ කාරක සභාව වෙත කැඳවා ඇති අතර, එදිනම විදේශ කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති අමාත්‍ය දිනේෂ් ගුණවර්ධන මහතාගේ ප්‍රධානත්වයෙන් පාර්ලිමේන්තුවේදී පැවැත්වීමටද කටයුතු සූදානම් කොට ඇති බව මහ ලේකම් දසනායක මහතා තවදුරටත් සඳහන් කළේය.

අගෝස්තු 05 වැනිදා පරිසර අමාත්‍ය මහින්ද අමරවීර මහතාගේ ප්‍රධානත්වයෙන් පරිසර කටයුතු පිළිබඳ අමාත්‍යාංශයීය උපදේශක කාරක සභාව රැස්වන අතර අධිකරණ කටයුතු පිළිබඳ අමාත්‍යාංශයීය උපදේශක කාරක සභාවද එදින රැස්වේ. එයට අමතරව එදිනම ධීවර කටයතු පිළිබඳ අමාත්‍යාංශයීය උපදේශක කාරක සභාව එහි සභාපති අමාත්‍ය ඩග්ලස් දේවානන්ද මහතාගේ  ප්‍රධානත්වයෙන් පාර්ලිමේන්තුවේදී රැස්වනු ඇත. එදිනම කාර්මික සංවර්ධන මණ්ඩලය කෝප් කමිටුව හමුවට කැඳවා ඇති අතර සමූපකාර සංවර්ධන දේපාර්තමේන්තුව කෝපා කමිටුව වෙත කැඳවා තිබේ.

අගෝස්තු 06 වැනිදා පොදු ව්‍යාපාර පිළිබඳ කාරක සභාව වෙත ජාතික ඉතිරි කිරීමේ බැංකුව කැඳවා ඇති බවද මහ ලේකම්වරයා සඳහන් කළේය.

රුපියල් ලක්ෂ 355ක මුදලක් අල්ලස් වශයෙන් දීම සහ ලබාගැනීම සම්බන්ධයෙන් චෝදනා එල්ලවී සිටි ඇවන්ගාඩ් සමාගමේ සභාපති නිශ්ශංක යාපා සේනාධිපති සහ විශ්‍රාමික යුධ හමුදා මේජර් ජෙනරාල් පාලිත ප්‍රනාන්දුට එරෙහිව ගොනුකර තිබූ නඩුව අල්ලස් හෝ දූෂණ චෝදනා විමර්ශන කොමිසම විසින් ඉල්ලා අස් කරගැනීම හේතුවෙන් ඇවන්ගාඩ් සභාපති නිශ්ශංක යාපා සහ විශ්‍රාමික මේජර් ජෙනරාල් පාලිත ප්‍රනාන්දු අල්ලස් චෝදනාවෙන් නිදහස්කරන ලෙස කොළඹ මහාධිකරණය අද (27) නියෝග කළා.

ඒ එම නඩුව කොළඹ මහාධිකරණ විනිසුරු අමල් රණරාජා මහතා ඉදිරියේ කැඳවනු ලැබූ අවස්ථාවේදීයි.

විත්තිකරුවන් වෙනුවෙන් පෙනීසිටි නීතිඥ අජිත් පතිරණ මහතා අධිකරණය හමුවේ කරුණු දක්වමින් මෙම නඩුව පවරා පවත්වාගෙන යාමට නොහැකි බවට විත්තිකරුවන් වෙනුවෙන් මීට පෙර මූලික විරෝධතාවක් මතුකළද එම විවෘක විරෝධතාවය මහාධිකරණ විනිසුරුවරිය විසින් ප්‍රතික්ෂේප කළ බව ප්‍රකාශ කළා.

ඉන්පසුව එම තීරණයට එරෙහිව තම සේවාදායකයින් අභියාචනාධිකරණය හමුවේ ප්‍රතිශෝධන පෙත්සමක් ඉදිරිපත්කළ බවත් එම ප්‍රතිශෝධන පෙත්සම ඉකුත් 15 වනදා කැඳවනු ලැබූ අවස්ථාවේදී අල්ලස් කොමිසම විසින් මෙම නඩුව ඉල්ලා අස්කර ගන්නා බව දැනුම්දුන් බවත් නීතිඥවරයා අධිකරණය හමුවේ සඳහන් කළා.

එම කොන්දේසියට යටත්ව තම සේවාදායකයා අභියාචනාධිකරණය හමුවේ පැවති ප්‍රතිශෝධන පෙත්සම ඉල්ලා අස්කර ගත් බව නීතිඥ අජිත් පතිරණ සඳහන් කළා.

මෙහිදී අල්ලස් කොමිසම වෙනුවෙන් පෙනීසිටි එහි සහකාර අධ්‍යක්ෂ ජනරාල් තුෂාරි ජයරත්න අධිකරණය හමුවේ කරුණු දක්වමින් මෙම විත්තිකරුවන්ට නැවත නඩු පැවරීමේ අයිතිය රඳවාගනිමින් එම අධිචෝදනා පත්‍රය ඉල්ලා අස්කරගන්නා ලෙස අල්ලස් කොමිසමෙන් තමන්ට උපදෙස් ලැබී ඇතැයි සඳහන් කළා.

ගුරු විදුහල්පති වැටුප් විෂමතාව සහ ගුරු විදුහල්පති සේවාව සංවෘත්ත සේවාවක් බවට පත් කිරීම පිළිබඳ අවසන් තීරණය ලබන සඳුදා පැවැත්වෙන කැබිනට් මණ්ඩල රැස්වීමෙන් අනතුරුව ලබා දෙන බව අග්‍රාමාත්‍ය මහින්ද රාජපක්ෂ මහතා අද (27) දින අරලියගහ මන්දිරයේ දී පැවසීය.

ගුරු විදුහල්පති සේවාව සංවෘත්ත සේවාවක් කිරීම සහ වැටුප් විෂමතාව ඉවත් කිරීම සම්බන්ධයෙන් ගුරු විදුහල්පති වෘත්තීය සංගම් නියෝජිතයන් සමඟ පැවති සකච්ඡාවේ දී අග්‍රාමාත්‍යවරයා මේ බව සඳහන් කළේය.

ඒ අනුව ලබන සඳුදා සිට සේවය කිරීමට සුදානම් වන්නැයි අග්‍රාමාත්‍ය මහින්ද රාජපක්ෂ මහතා ගුරු විදුහල්පති වෘත්තිය සංගම්වෙත අද දින දැනුම් දුන්නේය.

වසර විසිහතරක් පුරා ගුරු විදුහල්පති වැටුප් විෂමතාව පැවතිය ද මෙතෙක් සාධාරණ විසදුමක් නොලැබුණු බවත්, රටේ පවතින ආර්ථීක අර්බුධය පිළිබඳ පැහැදිලි අවබෝධයක තමන් සිටින බැවින් එක වර වැටුප් වැඩිකිරීමක් සිදු කළ නොහැකි වුවද වැටුප් විෂමතාව අවම කිරීම සඳහා සුබෝධනී වාර්තාව අනුව ප්‍රතිපත්තිමය තීරණයක් ගැනීමට කඩිනමින් කටයුතු කරන්නැයි ගුරු විදුහල්පති වෘත්තීය සංගම් නියෝජිතයෝ මෙහි දී ඉල්ලා සිටියහ.

අග්‍රාමාත්‍ය මහින්ද රාජපක්ෂ මහතා එහි දී මෙසේ සඳහන් කළේය.

ගුරු විදුහල්පති වැටුප් විෂමතාව පිළිබඳ පැහැදිලි අවබෝධයක මම ඉන්නවා. වැටුප් විෂමතාව අවම කිරීම අවශ්‍ය බවත් අපි රජයක් ලෙස පිළිගන්නවා. නමුත් රටේ පවතින තත්ත්වයත් ගෝලීය තත්ත්වයත් සමඟ රටේ ආර්ථීකය ඉතාමත් පහළ මට්ටමක පවතින නිසා ඉතා ඉක්මනින් වැටුප් ඉහළ දැමීමක් කිරීමට රජයට හැකියාවක් නොමැති බව ඔබ හොඳින් දන්නවා. අධ්‍යාපන අමාත්‍යතුමා පසුගිය සඳුදා කැබිනට් මණ්ඩලයට ඔබේ ගැටලු පිළිබඳ කැබිනට් පත්‍රිකාවක් ඉදිරිපත් කළා. මම කැබිනට් මණ්ඩලයේ දී ගුරුවරුන් විදුහල්පතිවරුන් වෙනුවෙන් පෙනී සිටිනවා. මෙම ගැටලුව නිරාකරණය කිරීමට අපි සූදානම්. කෙසේ වෙතත් වැටුප් කොමිසම සමග සාකච්ඡා කර වැටුප් ගෙවීම පිළිබද තීරණයකට එළැඹිය යුතුයැයි අග්‍රාමාත්‍යතුමා පෙන්වා දුන්නේය.

සමාජ මාධ්‍ය තුළ විවිධ පත්‍රිකා සංසරණය වන බව පෙන්වා දුන් වෘත්තීය සමිති නියෝජිතයෝ වැටුප් විෂමතාව සම්බන්ධව සුබෝධනී වාර්තාවට වෘත්තීය සමිති එකගතාව පළ කරන බවත් එහි අන්තර්ගතය කැබිනට් පත්‍රිකාවට ඇතුළත් කර ඇත්දැයි තමන් නොදන්නා බවත් ප්‍රකාශ කළහ.

ගුරු විදුහල්පති වැටුප් විෂමතාව සම්බන්ධව පැවති ශ්‍රේෂ්ඨාධිකරණ තීන්දු, කැබිනට් මන්ඩලය අනුමත කළ කැබිනට් තීරණ මෙන්ම සුබෝධනී වාර්තාවද පාදක කරගනිමින් කැබිනට් පත්‍රිකාව ඉදිරිපත් කර තිබෙන බව ඊට පිළිතුරු ලබා දෙමින් අධ්‍යාපන අමාත්‍ය මහාචාර්ය ජී. එල්. පීරිස් මහතා පෙන්වා දුන්නේය.

ගුරු විදුහල්පති සේවාව සංවෘත්ත සේවාවක් බවට පත් කිරීමේ අරමුණ අනෙකුත් රාජ්‍ය සේවාවන්ගේ වැටුප් තල කෙරෙහි බල නොපාන පරිදි ගුරු විදුහල්පති වැටුප් විෂමතාව අවම කිරීම බවත් මේ වන විටත් ගුරු විදුහල්පති සේවාව සංවෘත්ත සේවාවක් කිරීම සඳහා කැබිනට් මණ්ඩලයට ඉදිරිපත් කළ කැබිනට් පත්‍රිකාවට අනුමැතිය හිමිව ඇතිබවත්, ඒ පිළිබඳව මාස කිහිපයක් අධ්‍යයනය කර සකස් කළ කෙටුම්පතක් ඉදිරිපත් කරමින් අධ්‍යාපන ප්‍රතිසංස්කරණ, විවෘත විශ්ව විද්‍යාල සහ දුරස්ථ අධ්‍යාපන රාජ්‍ය අමාත්‍ය සුසිල් ප්‍රේමජයන්ත මහතා ප්‍රකාශ කළේය.

පසුගිය ආණ්ඩු පහක කාලයක් පුරා පැවති ගුරු විදුහල්පති වැටුප් විෂමතාව සම්බන්ධව අග්‍රාමාත්‍යතුමාගේ මැදිහත් වීම පිළිබඳව මෙහි දී වෘත්තීය සමිති නියෝජිතයෝ සිය ස්තුතිය පළ කළහ.

චීන රජය තවත් සයිනොෆාම් එන්නත් මාත්‍රා මිලියන 1.6ක්  ශ්‍රී ලංකාවට පරිත්‍යාග කරයි. එම එන්නත් රැගත් ශ්‍රී ලන්කන් ගුවන් සේවයට අයත් UL – 869 සහ UL – 865 ගුවන් යානා අද (27) උදෑසන 5.30ට කොළඹ කටුනායක අන්තර්ජාතික ගුවන් තොටුපොළට ළඟා විය.

චීන තානාපති, චී චෙන්ග් හොන්ග් (Qi Zhen Hong) මහතා විසින් ජනාධිපති ගෝඨාභය රාජපක්ෂ මැතිතුමා වෙත එන්නත් නිල වශයෙන් භාරදීම අද (27) පෙරවරුවේ ජනාධිපති කාර්යාලයේ දී සිදු කෙරිණ. මෙම එන්නත්වලට අමතරව සිලින්ජර තොගයක් ද පරිත්‍යාග කර තිබේ.

මෙම එන්නත් උතුරු – නැගෙනහිර පළාත්වල වයස අවුරුදු 30ට වැඩි ජනතාවට ලබාදීමට සෞඛ්‍ය අමාත්‍යාංශය වෙත භාරදෙනු ලැබිණ. මෙරට එන්නත්කරණ ක්‍රියාවලියේ දී භාවිත එන්නත්වලින් 72%ක් සයිනොෆාම් වේ.

පසුගිය මාර්තු 31 වන දින සයිනොෆාම් එන්නත් මාත්‍රා ලක්ෂ 6ක්, මැයි 26 වන දින ලක්ෂ 5ක් සහ අද දින ලද මාත්‍රා ලක්ෂ 16ත් සමග සයිනොෆාම් එන්නත් මාත්‍රා ලක්ෂ 27ක් පරිත්‍යාග කරමින් කොවිඩ් මර්දනයට චීන රජය ලබාදුන් සහාය බෙහෙවින් අගය කරන බව ජනාධිපතිවරයා පැවසීය.

අගෝස්තු මස අවසන් වන විට වයස අවුරුදු 30ට වැඩි සියලු දෙනාට එන්නත ලබාදී අවසන් කිරීමට හැකි වෙතැයි පෙන්වා දුන් ජනාධිපතිතුමා සංචාරක කටයුතු, සැප්තැම්බර් මස සිට ආරම්භ කිරීමට හැකි වෙතැයි සඳහන් කළේය. එම නිසා චීන ජනතාවට නැවතත් මෙරට සංචාරයට ඇරයුම් කරන බව ද ජනාධිපතිවරයා පැවසීය.

හිස සහ ගෙල ආශ්‍රිත පිළිකා දිනය අද

ශ්‍රී ලංකාවේ පසුගිය වසර 20 ඇතුළත මුඛ ශ්ලේෂ්මල ෆයිබ්‍රොසියා රෝගීන් 9 ගුණයකින් වැඩිවී ඇතැයි සෞඛ්‍ය අමාත්‍යාංශයේ ජාතික පිළිකා මර්දන ඒකකය සඳහන් කරයි. පුවක් භාවිතය මේ සඳහා ප්‍රධාන වශයෙන් හේතුවී තිබේ.

ජාතික පිළිකා මර්දන ඒකකය පෙන්වාදෙන ආකාරයට අනාදිමත් කාලයක සිට දකුණු ගිනිකොනදිග ආසියාව සහ පැසිපික් කලාපවල පුවක් භාවිතා කර ඇත. ලෝකය පුරා පුවක් හෝ ඒ ආශ්‍රිත නිෂ්පාදන භාවිතා කරන්‍නන් මිලියන 600ක් පමණ ජීවත්වේ.

2004 වර්ෂයේදී ලෝක සෞඛ්‍ය සංවිධානය පුවක් පිළිකා කාරකයක් බවට ප්‍රකාශයට පත්කර ඇත. පුවක් ආශ්‍රිත නිෂ්පාදන දීර්ඝ කාලීනව භාවිතා කිරීමෙන් මුඛ පටක ආපසු හැසිරවිය නොහැකි පරිදි වෙනස්වීමකට භාජනය වන අතර එය මුඛ ශ්ලේෂ්මල ෆයිබ්‍රොසියා ලෙස හැඳින්වේ.

දුම්කොල සහ මද්‍යසාර පිළිබඳ ජාතික අධිකාරියේ වර්ෂ 2006 අංක 27 දරණ පනතට අනුව සියලුම දුම්කොල නිෂ්පාදන අඩංගු පුවක් නිෂ්පාදන ආනයනය, නිෂ්පාදනය, විකිණීම හෝ විකිණීමට ඉදිරිපත් කිරීම තහනම්කර ඇත.

සියලුම සපන පුවක් හා ඒ ආශ්‍රිත නිෂ්පාදන පිළිකාකාරක වන බැවින් එම නිෂ්පාදන භාවිතය ආරම්භ කිරීමෙන් වළකින ලෙසත් පුවත් ආශ්‍රිත නිෂ්පාදන භාවිතා කර ඇත්නම් හෝ දැනටමත් භාවිතා කරන්නේනම්  නොපමාව වෛද්‍යවරයෙකු ලවා සායනික මුඛ පරීක්ෂාවක් සිදුකර ගන්නා ලෙසත් ජාතික පිළිකා මර්දන ඒකකය ජනතාවගෙන් ඉල්ලා සිටී.

මුඛ පිළිකා පිරිමි පුද්ගලයන් අතර බහුල වන අතර  කාන්තාවන් අතර බහුලතම පිළිකාවන් 10 අතරට එය  අයත් වේ. 2019 වර්ෂයේදී නව මුඛ පිළීකා රෝගීන් 2700 ක් පමණ වාර්තාවී ඇත. දිනකට මුඛ පිළිකා ආශ්‍රිත  මරණ 2-3 ක් පමණ සිදු වන අතර මෙය මරණ අනුපාතිකය වැඩි පිළිකා වර්ගයක් ලෙස හැඳින්විය හැකිය. දැනට වාර්තාවී ඇති රෝගීන්ගෙන් සියයට 60ක් පමණ පසු අවදියේ ( III හා IV අවධිවල)  පසු වන අතර අවසන් අවධියේ පිළිකාවලට ප්‍රතිකාර කිරීමෙන් පසුව ජීවත්වීමේ හැකියාව අඩුවන බව ජාතික පිළිකා මර්දන ඒකකය පෙන්වාදෙයි.

මුල් අවස්ථා‍වේ හඳුනාගැනීමෙන් ප්‍රතිකාර කිරීම මඟින් රෝගය උත්සන්න වීම වලක්වාගත හැකිය. පසු අවධිවලදී මුඛ පටකවල වෙනස්වීම් යථා තත්ත්වයට පත් කළ නොහැකි නිසා ජීවිත කාලය පුරාම ආහාර අනුභවය, ගිලීම සහ කථනය වැනි එදිනෙදා ක්‍රියාකාරකම් සීමා වේ. මුඛය තුළ පවත්නා දැවිල්ල, මිරිස් සහිත ආහාර ගැනීමට අපහසුවීම, මුඛ ශ්ලේෂමලයේ දැක්නට ලැබෙන සුදුමැලි ස්වභාවය සහ තොල්වල දක්නට ලැබෙන සුදුමැලි ස්වභාවය මුඛ පිළිකාවක මූලික රෝග ලක්ෂණ වේ.

මෙවැනි ලක්ෂණ ඇතිවුහොත් ඕනෑම දන්ත  ශල්‍යාගාරයින් කලින් හඳුනාගැනීම සිදුකර ගැනීමට හැකියාව ලැබේ. මේ සඳහා වැඩිදුර ප්‍රතිකාර මූලික රෝහල් දිස්ත්‍රික් මහ රෝහල්, පළාත් මහ රෝහල් සහ ශික්ෂණ රෝහලවල ස්ථාපිත මුඛ හනුක හා වක්ත්‍ර ශල්‍ය ඒකක මඟින් ලබාගත හැකි බව ද ජාතික පිළිකා මර්දන ඒකකය පවසයි.

ලොව විශාලතම ආරනූල් (star sapphire) පොකුර නිවසක පිටුපස මිදුලේ තිබී අහම්බයෙන් හමු වූ බව මැණික් හා ස්වර්ණාභරණ අධිකාරියේ සභාපති තිලක් වීරසිංහ මහතා පැවසීය.

වටිනාම මැණික් කුලය වන කොරනන්ඩම් කුලයට අයත් මෙම මැණික් පාෂාණයේ වටිනාකම රුපියල් කෝටි 2,000ක් වැඩි විය හැකි බව ද සභාපතිවරයා සඳහන් කළේය.

ලා නිල් පැහැය මිශ්‍ර එම පාෂාණය පැල්මඩුල්ල ප්‍රදේශයේ බලපත්‍ර සහිත පුද්ගලික පතලකින් මීට මාස අටකට පමණ පෙර හමුවී ඇතැයි කී සභාපතිවරයා එහි හිමිකම පතල් හිමිකරු සතු බව ද ප්‍රකාශ කළේය.

ආරනූල් යනු ලොව වටිනාකමින් වැඩි මැණික් වර්ගයක් බව කී සභාපතිවරයා මෙම මැණික් සමූහයේ සියයට 99.9ක්ම ආරනූල් වර්ගයේ මැණික්ගල් බව ද කීවේය

විශේෂඥයන් පවසන්නේ ලා නිල් පැහැයෙන් යුත් මෙම ගල ජාත්‍යන්තර වෙළෙඳපොළ තුළ ඇස්තමේන්තුගත වටිනාකම ඩොලර් මිලියන සියයක් හෙවත් ලංකා මුදලින් රුපියල් කෝටි 2000ක් පමණ වන බවයි.

මෙම පොකුරේ බර කිලෝග්‍රෑම් 510 ක් හෝ කැරට් මිලියන 2.5 ක් පමණ වන අතර එය “සෙරන්ඩිපිටි සෆායා “(Serendipity Sapphire)” ලෙස නම් කර තිබේ.

“ළිඳ හාරමින් සිටි පුද්ගලයා දුර්ලභ ගල් කීපයක් තියෙනවා කියලා අපට දැන්වූවා. පස්සේ අපිට මෙම දැවැන්ත ගල් වර්ගය හම්බුණා,” යැයි මෙහි හිමිකරු ගමගේ මහතා පැවසූ අතර ආරක්ෂක හේතූන් මත සම්පූර්ණ නම හෝ ස්ථානය ලබා දීම ඔහු ප්‍රතික්ෂේප කළේය.

තුන්වෙනි පරම්පරාවේ මැණික් ව්‍යාපාරිකයෙකු වන ගමගේ මෙම සොයා ගැනීම පිළිබඳ බලධාරීන් දැනුවත් කළ නමුත්, එය විශ්ලේෂණය කර සහතික කිරීමට පෙර මඩ හා වෙනත් අපද්‍රව්‍ය ඉවත් කිරීමට වසරකට වැඩි කාලයක් ගත වී තිබිණි.

පිරිසිදු කිරීමේ ක්‍රියාවලියේදී පොකුරෙන් සමහර ගල් වැටී ඇති අතර ඒවා උසස් තත්ත්වයේ ආරනූල් මැණික් ලෙස තහවුරු වූ බව ඔහු පැවසීය.

“මම මීට කලින් මේ තරම් විශාල පොකුරක් දැකලා නැහැ. මෙය මීට වසර මිලියන 400 කට පමණ කලින් හැදෙන්න ඇත්තේ,” යැයි සුප්‍රසිද්ධ මැණික් විද්‍යාඥයෙකු වන ආචාර්ය ගාමිණී සොයිසා මහතා පැවසීය.

මෙහි පිටත දියමන්ති (ක්‍රිස්ටල්) හැඩැති කැටයම් විශාල ප්‍රමාණයක් ඇති බවත්, බැලූබැල්මට එය සුදු පැහයට හුරු වුවත් කොරන්ඩම් විශේෂයට අයත් මැණකක් බවත් ලෙවුඩ මැණික් පිළිස්සීමේ සහ අපනයනය කිරීමේ විශේෂඥයෙක් ද වන පුන්සිරි තෙන්නකෝන් මහතා සඳහන් කළේය.

කෙසේ වෙතත් විශේෂඥයන් පෙන්වා දෙන්නේ පොකුරේ ඉහළ කැරට් අගයක් තිබුණද, එහි ඇති සියලුම ගල් උසස් තත්වයේ නොවිය හැකි බවය.

මෙම සොයා ගැනීම සිදු වූයේ, වසංගතය නිසා පැන වූ සීමාවන් හේතුවෙන් ශ්‍රී ලංකාවේ මැණික් කර්මාන්තය පාඩු ලබමින් තිබෙන සමයක දීය.

කර්මාන්තයේ නියුතු පිරිස බලාපොරොත්තු වන්නේ “සෙරන්ඩිපිටි ස්ටෝන්” ජාත්‍යන්තර ගැනුම්කරුවන් සහ විශේෂඥයන්ගේ අවධානය දිනා ගැනීමය.

“මෙය විශේෂ ආරනූල් පොකුරක්. ඒ වගේම බොහෝ විට ලෝකයේ විශාලතම පොකුර වෙන්න පුළුවන්. ප්‍රමාණය සහ එහි වටිනාකම අනුව එය පුද්ගලික එකතුකරන්නන්ගේ හෝ කෞතුකාගාරවල ආකර්ෂණය දිනා ගනී යැයි අපි සිතනවා,” ශ්‍රී ලංකා ජාතික මැණික් හා ස්වර්ණාභරණ අධිකාරියේ සභාපති තිලක් වීරසිංහ මහතා වැඩි දුරටත් පැවසීය.

සැප්තැම්බර් පළමු සතිය තුළ දිවයිනේ පාසල් නැවත විවෘත කිරීමට අධ්‍යාපන අමාත්‍යාංශය බලාපොරොත්තු වන බව අධ්‍යාපන අමාත්‍ය ජී.එල්. පීරිස් මහතා පැවසුවා.

අද (26) මාධ්‍ය වෙත අදහස් දක්වමින් අධ්‍යාපන ඇමැතිවරයා කියා සිටියේ පාසල් නැවත විවෘත කිරීමට පෙර අමාත්‍යාංශය විසින් COVID-19 එන්නත දෙවන මාත්‍රාව අගෝස්තු මස අග වන විට ගුරුවරුන් සඳහා ලබා දීමට අපේක්ෂා කරන බවයි.

නිශ්චිත සැලැස්මක් අනුව හා සෞඛ්‍ය බලධාරීන්ගේ නිර්දේශය යටතේ පාසල් නැවත විවෘත කරන බව පැවසූ අධ්‍යාපන ඇමැතිවරයා සැප්තැම්බර් පළමු සතිය තුළ පාසල් නැවත විවෘත කිරීම සඳහා ගුරුවරුන්ගේ හා විදුහල්පතිවරුන්ගේ පූර්ණ සහාය ඉල්ලා සිටි බව ද පැවසුවා.

මෙහිදී 2021 අපොස සාමාන්‍ය පෙළ විභාගය පැවැත්වීම ගැන කරුණු සදහන් කරමින් අධ්‍යාපන අමාත්‍යවරයා පැවසුවේ අ.පො.ස. 2021 සාමාන්‍ය පෙළ විභාගය 2022 පෙබරවාරි 21 දක්වා කල් දමා ඇති බවයි.

සාමාන්‍ය පෙළ විභාගය 2022 ජනවාරි මාසයේදී පැවැත්වීමට නියමිතව තිබූ නමුත් රටේ COVID-19 වසංගත තත්ත්වය හේතුවෙන් විභාගය කල් දැමීමට අමාත්‍යාංශය තීරණය කර ඇතැයි ඔහු පැවසුවා.

ගෘහස්ථ ගෑස් සිලින්ඩරයක උපරිම සිල්ලර මිල නියම කරමින් සහ බර සඳහන් කළ යුතු ආකාරය ගැන සඳහන් කරමින් පාරිභෝගික කටයුතු අධිකාරිය විසින් ගැසට් නිවේදන දෙකක් නිකුත් කර තිබෙනවා.

10 (1) (a) of the CAA Act, No. 09 of 2003 පනත මගින් පාරිභෝගික සේවා අධිකාරියට පවරා ඇති බලතල යටතේ මෙම ගැසට් නිවේදනය නිකුත් කර ඇත්තේ අධිකාරියේ සභාපති මේජර් ජෙනරාල් (විශ්‍රාමික) ශාන්ත දිසනායකගේ නියෝගයෙනි.

ඊයේ (25) සිට ක්‍රියාත්මක වන පරිදි මෙම උපරිම සිල්ලර මිල ක්‍රියාත්මක බව පාරිභෝගික කටයුතු පිළිබඳ අධිකාරිය අදාළ ගැසට් නිවේදනය මගින් දැනුම් දී තිබෙනවා.

අනෙක් ගැසට් නිවේදනය මගින් නිවේදනය කර ඇත්තේ ගෘහස්ථ ගෑස් සිලින්ඩරයක බර කිලෝග්‍රෑම්වලින් සිලින්ඩරයේ පැහැදිලිව පෙනෙන ස්ථානයක සඳහන් කිරීම අනිවාර්ය බවයි. ගෑස් සිල්න්ඩරවල බර කිලෝග්‍රෑම්වලින් සඳහන් කර නොමැතිනම් ඒවා නිෂ්පාදනය, ගබඩා කිරීම, බෙදා හැරීම, තොග හෝ සිල්ලර වශයෙන් විකිණීම සහ විකිණීම සඳහා ප්‍රදර්ශනය කිරීම තහනම් කර තිබෙනවා.

ඒ අනුව LP ගෑස් අඩංගු ලීටර් 18ක, එසේත් නැත්නම් කිලෝග්‍රෑම් 9.6ක ගෘහස්ථ ගෑස් සිලින්ඩරයක උපරිම සිල්ලර මිල රුපියල් 1,150ක් ලෙස ප්‍රකාශයට පත්කර ඇති අතර දිස්ත්‍රික් මට්ටමින් අදාළ මිල ගණන්වල වෙනස්වීමක් සිදුකළ හැකි අතර කොළඹ සහ ගම්පහ දිස්ත්‍රික්කවල උපරිම සිල්ලර මිල රුපියල් 1,150ක් වෙනවා.

කළුතර දිස්ත්‍රික්කයේ ගෑස් සිල්න්ඩරයක් විකිණිය හැකි උපරිම සිල්ලර මිල රුපියල් 1,158ක් වන අතර ගාල්ල දිස්ත්‍රික්කයේ එය රුපියල් 1,181ක් ලෙස ගැසට් නිවේදනයෙන් ප්‍රකාශයට පත්කර තිබෙනවා.

ඩෙල්ටා ප්‍රභේදය සහිත රෝගීන් දිවයිනේ සෑම දිස්ත්‍රික්කයකම දැකිය හැකි බව සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය හේමන්ත හේරත් මහතා පවසයි.

ඩෙල්ටා ව්‍යාප්තිය ගැන අදහස් දක්වමින් සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය හේමන්ත හේරත් මහතා පැවසුවේ බස්නාහිර පළාත, උතුරු, දකුණු හා නැගෙනහිර පළාත්වල ඩෙල්ටා ප්‍රභේදය ආසාදිතයින් හඳුනාගෙන ඇති අවස්ථාවකදී මෙවැනි සිද්ධීන් රටේ සෑම දිස්ත්‍රික්කයකම සොයාගත හැකි බවයි.

සෞඛ්‍ය බලධාරීන් විසින් මේ වන විට ඩෙල්ටා ප්‍රභේදය ආසාදිතයින් 68 ක් හඳුනාගෙන ඇති අතර ප්‍රජාව තුළ හඳුනා නොගත් රෝගීන් වැඩි සංඛ්‍යාවක් සිටිය හැකි බව ද ඔහු පැවසීය.

“ඩෙල්ටා ප්‍රභේදය ලෝකයේ වඩාත්ම ප්‍රමුඛතම ප්‍රභේදය බවට පත්වෙමින් තිබෙන බවක් පෙනෙන්නට ඇති අතර අපේ රටේ ඒ සඳහා ව්‍යතිරේකයක් නොවේ” යනුවෙන් ඔහු අවධාරණය කළේය.

කෙසේ වෙතත්, වෛද්‍ය හේරත් අවධාරණය කළේ, “ඩෙල්ටා ප්‍රභේදයෙන් ආරක්ෂා වීම සඳහා අප අසාමාන්‍ය පියවර අනුගමනය කළ යුතු නැහැ. මුඛ ආවරණ නිසි ලෙස පැළඳීම, නිතිපතා අත් සේදීම සහ සමාජ දුරස්ථභාවය පවත්වා ගැනීම වැනි දැඩි පොදු සෞඛ්‍ය පිළිවෙත් අනුගමනය කිරීමට ඊට ප්‍රමාණවත්. රට තුළ එන්නත් කිරීමේ ක්‍රියාවලිය වේගයෙන් ක්‍රියාත්මක වෙනවා. එමගින් කොවිඩ් වෛරසයට එරෙහිව ආරක්ෂාවක් සැලසෙනවා. ඒනිසා කිසිදු පැකිලීමකින් තොරව එන්නත ලබා ගන්නා ලෙස මම ජනතාවගෙන් ඉල්ලා සිටිනවා‘ යැයි ද නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා පැවසුවේය.

කොවිඩ් වසංගතයේ අලුත් තත්වය තේරුම් නොගෙන මේ වනවිට සිදුවන නොසලකා හැරීම් නිසා ලංකාවත් බරපතල ව්‍යසනයකට ගොදුරුවීමේ ඉඩක් ඇති බව ජාතික විද්වත් සංවිධානයේ ප්‍රධාන ලේකම්, වසංගත රෝග විද්‍යා අංශයේ හිටපු අධ්‍යක්ෂ, වසංගත රෝග විශේෂඥ වෛද්‍ය නිහාල් අබේසිංහ පවසයි.

විශේසඥ වෛද්‍ය නිහාල් අබේසිංහ මහතා මේ බව පැවසූවේ අද (24) කොළඹදී පැවති ජාතික විද්වත් සංවිධානයේ මාධ්‍ය හමුවේදීයි.

එහිදී වැඩිදුරටත් අදහස් දක්වමින් අබේසිංහ මහතා මෙසේ ද සදහන් කළා.

“අවුරුදු එකහමාරක් ගිහිල්ලත් අපිට මේ වගේ ව්‍යසන තත්වයකට මුහුණදෙන්න අපේ රෝහල්ටික සූදානම් කරගන්න බැරි වුණා. මම වසංගත රෝග විද්‍යාඥවරයෙක් හැරටියට ප්‍රජා වෛද්‍ය විශේෂඥ වෛද්‍යවරයෙක් හැටියට අපි හිතනවා මේ වෙලාවේ ඉතාමත්ම තීරණාත්මක සාධකය මරණ අවම කර ගැනීම කියලා. ඒ නිසා කිසිසේත්ම අපේ රටේ ජනතාව ඉදිරියේ එන්න තියෙන ව්‍යසනයකට සූදානම් නැහැ කියල තමයි අපි හිතන්නේ.

දැන් ආර්ථිකය පිළිබඳව විශේෂඥ දැනුම තියෙන ඇමතිවරු ඇවිල්ලා ආර්ථිකයේ තියෙන මේ බරපතලභාවය පිළිගනිමින් ඉන්නවා. මම හිතනවා ඒ වගේම අපිට සෞඛ්‍ය ඇමතිවරු තුන්දෙනෙක් ඉන්නවා. දැන් ජනතාවත් එක්ක සාකච්ඡාවකට එන්න ඕනි, මේ තත්වයේ බරපතල කම, ඒ එක්කම වේගයෙන් මේ ඩෙල්ටා ප්‍රභේදය නිසා ව්‍යාප්ත වෙන්න පුළුවන් බව. දැන් ඊයේ (23) 1700කට වැඩි ප්‍රමාණයක් වාර්තා වුණා. කාලයක් සිටම මරණ 50ක් වාර්තා වෙනවා දිනකට. ඒ නිසා මේ පෙන්නුම් කරන්නේ, මේ කලාපයේත් මේ ලෝකයේත් මේ තුන්වෙනි රැල්ල ව්‍යාප්ත වෙන ආකාරය.

දැන් අපි රටවල් ගත්තොත් ඉන්දියාව, බංගලාදේශය, තායිලන්තය, නේපාලය, ඉනිදුනීසියාව මේ සියලු රටවල්වල අප්‍රේල් මාසයේ සිට මේ රැල්ල ක්‍රියාත්මක වෙමින් තියෙනවා. මේ වනවිට ඉන්දුනීසියාවත් මියන්මාරයත් ඉතාමත් බරපතල තත්වයක තියෙනවා. අපි දන්නවා මේ වනවිට ඒගොල්ලන්ගේ සෞඛ්‍ය පද්ධතීන් සම්පූර්ණයෙන්ම බිඳවැටීමට ආසන්න වෙමින් තියෙනවා. ඉතිං ඒක අපි නොදැක නිසි ක්‍රියාමාර්ග නොගෙන හිටියොත් අපිටත් විශාල බරපතල අර්බුදයකට මුහුණදෙන්න සිදුවෙනවා.

දැන් ඉන්දියාවේ තුන්වෙනි රැල්ල අඩු වුනාට. අපි දන්නවා ඉන්දියාවෙත් සාමාන්‍යයෙන් දවසකට රෝගීන් හතලිස් දෙදාහක් විතර දවසකට වාර්තාවෙනවා. ඒ එක්කම ඉන්දුනීසියාවේ ඊයේ වාර්තා වුනා 50,000ක්. 1,500ක් මියගියා ඊයේ. ඒකනිසා මේක බරපතල තත්වයක් බව ආණ්ඩුව නොසලකා හරිමින් ඉන්නවා කියල තමයි අපිට තේරෙන්නේ. මොකද මේ හා සමානම හැසිරීමක් අප්‍රේල් මැදභාගේ අපි ආණ්ඩුවේ දැක්කා. ඒ නිසා අප්‍රේල් මාසේ අගත්, මැයි, ජුනි මාසවලත් අපේ රටේ වසංගත තත්වය උග්‍රවුනා. මරණ සංඛ්‍යාව වැඩි වුනා. රෝගීන් වාර්තාවීම වැඩි වුනා. ඉතිං ඒ නිසා අපි විශ්වාස කරනවා මේ වෙලාවේ ආණ්ඩුව මේ කොවිඩ් අර්බුදය පිළිබඳව නොසලකා හැරීමෙන් අපිට බරපතල ව්‍යසනයකට ඉදිරියේදී මුහුණදෙන්න වෙනවා කියලා.

විශේෂයෙන්ම මේ ඩෙල්ටා ප්‍රභේදය ගැන මාධ්‍ය දැන් වාර්තා කරමින් ඉන්නවා මේක පැතිරෙනවා කියලා. දැන් මේ ඩෙල්යා ප්‍රභෙදය නිසා තමයි තායිලන්තයත් මියන්මාරයත් ඉන්දුනීසියාවත් සෞඛ්‍ය පද්ධතීන් බිඳවැටෙන්න තරමටම බරපතල අර්බුදයකට මුහුණදීල තියෙන්නේ. ඉතිං මේකෙන් පාඩම් ඉගෙනගෙන අපි ක්‍රියාත්මක නොවුනොත් අපිටත් මේ අර්බුදයට මුහුණදෙන්න වෙනවා.

අපි දන්නවා මේ වනවිටත් අපේ ජාතික රෝහල් පද්ධතියේ රෝහල්වල ධාරිතාව අර මැයි මාසේ මුල වගේ ඉක්මවා යමින් තියෙනවා. ඉතිං ඒ නිසා ඒ තත්වය නිර්මාණය වෙමින් තියෙන්නේ. අපි දන්නවා මේ වනවිට කොළඹ සමහර පෞද්ගලික රෝහල් කොවිඩ් රෝගීන් ඇතුළත් කිරීම නවත්තලා තියෙනවා. රජයේ රෝහල්වලත් දැඩිසත්කාර ඒකක යම් ප්‍රමාණයකට ධාරිතාවය ඉක්මවා යමින් තියෙනවා. ඉතිං මේ අර්බුදය අනික් රටවල්වලට වගේම අපිටත් මුහුණදෙන්න වෙනවා. ලෝකයේ චීනය විතරයි මේ වනවිට මේ රැල්ලට සාර්ථකය මුහුණදෙමින් ඉන්නේ. දැන් මේ ලෝකය පුරාම නිර්මාණය වෙමින් තියෙන තත්වය නොසලකා හරින්න, විශේෂයෙන්ම තායිලන්තය, වියට්නාමය, ලාඕසය, කාම්බෝජය වගේ රටවල් ඉතාමත්ම හොඳින් පාලනය කරගෙන තිබුණ අප්‍රේල් දක්වා. නමුත් ඒ රටවල්වලටත් දැන් මේ තුන්වෙනි රැල්ල පාලනය කරගත නොහැකි තත්වයකට පත්වෙලා.

ඒ නිසා අපි හිතනවා මේ වෙලාවේ ආණ්ඩුව නිසි ක්‍රියාමාර්ග ගත්තේ නැත්නම් බරපතල ව්‍යසනයකට අපිට මුහුණදෙන්න වෙනවා. ඒ නිසා අපි යෝජනා කරනවා, ආණ්ඩුව වහාම මැදිහත් වී නිසි ක්‍රියාමාර්ග ගතයුතුයි කියලා. මේ වසංගතය දැන් මේ පැතිරෙන ආකාරය ගැන හොඳින් සොයා බලලා මේ පැතිරීම සීමා කරන්න ඕනි. දැන් මේ සංචරණ සීමාවන්, විවිධ සෙනඟ ගැවසීම් ලිහිල් කරා පසුගිය දවස්වල. සංගීත සංදර්ශන උත්සව ශාලා ඇතුළේ පවත්වන්න ඉඩදෙනවා. ආගමික උත්සව පවත්වන්න ඉඩ දෙනවා. මං හිතනවා මේ නිසා බරපතල තත්වයක් ඉදිරි කාලසීමාව තුළ අපේ රටේ නිර්මාණය වෙනවා. ඒ නිසා මේ විදිහට අපි කරන නොසලකා හැරීම් නිසා අපිටත් තායිලන්තය, මියන්මාරය ඉන්දුනීසියාව වගේ බරපතල ව්‍යසනයකට ගොදුරුවෙන්න ඉඩ තියෙනවා,”