Category: සුපිරි Sports

https://www.facebook.com/rupavahinisinhalanews/videos/1944731475797259/

[rns_reactions]

ශ්‍රී ලංකා කණ්ඩායම අද චැම්පියන්ස් කුසලාන තරඟාවලියේ තමන් මුහුණ දෙන දෙවන තරඟයට මුහුණ දීමට නියමිතය.කෙසේ නමුත් එංගලන්තයෙන් වාර්තා වන්නේ එතරම් හොඳ පුවතක් නොවේ.

ශ්‍රී ලංකා කණ්ඩායමේ අත්දැකීම් බහුල ක්‍රීඩකයන්ගේ ගොන්නේ සිටි උපුල් තරංගට පැනවූ තරඟ තහනමත් සමඟ අත්දැකීම් වලින් දුප්පත් වූ ශ්‍රීලංකා කණ්ඩායමට සිටි තවත් අත්දැකීම් සහිත බලාපොරොත්තුවක් ආභාද ලැයිස්තුවට එක්වී ඇත.ඒ චාමර කපුගෙදර ආභාදයට ලක්වීමත් සමඟය.

ශ්‍රී ලංකා ක්‍රීඩා ලෝලීන්ගේ තවත් බලාපොරොත්තුවක් මෙලෙස චැම්පියන්ස් කුසලානයෙන් ඉවත් වෙද්දී ඔහුගේ තැනට කැඳවා තිබෙන්නේ ආරම්භක පිතිකරුවකු වන දනුෂ්ක ගුණතිලකය.කපුගෙදර පුහුණු වීම් අතරතුරදී දනහිසේ ආභාදයකට ලක්වී ඇත්තේ ඊයේ උදෑසන දීය.

[rns_reactions]

චැම්පියන්ස් කුසලාන තරඟාවලියේ ඉදිරියට යනවාද ඉවත් වනවාද යන්න තීරණය වන ශ්‍රී ලංකාවට  ඉතා තීරණාත්මක තරඟයක් අද  ඉන්දියාව සමඟින් පැවැත්වේ.

ඉන්දියාව සමඟ තරඟයක් යනු සෑම විටම ශ්‍රී ලංකාවට අමතර පීඩනයකි.තරඟයට ශ්‍රී ලංකා නායක ඇන්ජලෝ මැතිව්ස් සහභාගී වන පුවතනම් ක්‍රීඩා ලෝලීනට යහපත් පුවතකි.එම පුවත ක්‍රීඩා ලෝලීනට පමණක් නොව කණ්ඩායමටද සතුටුදායී පුවතක් බව ශ්‍රී ලංකා පුහුණුකරු මාද්‍ය හමුවේ පවසා ඇත.

“සංගක්කාරයි ,මහෙලයි කණ්ඩායමෙන් අයින් වුන දවසේ ඉදල මැතිව්ස් ටත් කණ්ඩායමේ එක දිගට සෙල්ලම් කරන්න ලැබුනෙම නෑ.මැතිව්ස් නැති වුනාම ලේසි නෑ,කණ්ඩායමම ගොඩක් අත්දැකීම් අඩු කණ්ඩායමක් නිසා මැතිව්ස් වගේ ඉවසීම තියන ක්‍රීඩකයෙක් කණ්ඩායමේ ඉන්නම ඕන.”

දකුණු අප්‍රිකා තරඟ පරාජය පිළිබඳවද ග්‍රැහැම් ෆෝර්ඩ් අදහස් දක්වා ඇත.

“තරඟය පන්දුවාර 10 වෙනකම් අපේ පාලනේ තිබුනේ,අපේ ආරම්භයත් ගොඩක් හොඳයි.චන්දිමාල්ගේ දුවද්දී දැවී යාම තමයි තරඟයේ වෙනස් වුන තැන.ඇත්තටම හරිම කනගාටුයි ඒ පරාජය ගැන.”

දකුණු අප්‍රිකා ජාතික පුහුණු කරුවා ශ්‍රී ලංකාව හමුවේ දකුණු අප්‍රිකා  කණ්ඩායම ලැබූ ජයග්‍රහණය පිළිබඳව දක්වා ඇත්තේ එවැනි අදහසකි.

“අපි මේ වෙලාවේ ශ්‍රේණිගත කිරීම් වල ඉන්නේ හත්වෙනි තැන ඉන්දියාව උඩින් තමයි ඉන්නේ ,හැබැයි තරඟයේදී අපේ අය වෙනසක් කරයි.”

අද  පැවත්වෙන ඉන්දීය කන්ඩායම සමග තරඟය පිළිබඳව ෆෝර්ඩ් ට ඇත්තේ යහපත් බලාපොරොත්තුවකි.

[rns_reactions]

ශ්‍රී ලංකාවෙන් තම ක්‍රිකට් අත්පොත තැබූ ධනුක පතිරණ දැන් ක්‍රීඩා කරන්නේ කැනඩා ජාතික ක්‍රිකට් කණ්ඩායමටය.

කැනඩා කණ්ඩායමට අනුශුරතාවය හිමිකර දෙමින් නිමා වූ  ICC World Cricket League Division Three, 2017  තරඟාවලියේ වැඩිම ලකුණු ලාභීන් අතර දෙවන තැනට පත්වීමට ධනුක පතිරණ සමත් විය.

ධනුක මෙම තරඟාවලියේ ක්‍රීඩා කල හොඳම ඉනිම ක්‍රීඩා කලේ ඇමරිකා එක්සත් ජනපද ක්‍රිකට් කණ්ඩායමට එරෙහිවය.ඔහු එහිදී  පන්දු 94 කදී හතරේ පහර 9 ක් සහ හයේ පහරක් සමඟ ලකුණු 87 ලබාගැනීමට සමත්වූ අතර ඔහුගේ පිතිහරඹය සමඟ කැනඩාවේ ප්‍රබල ප්‍රතිවාදියකු වන ඇමරිකාව ලකුණු 91 කින් පරාජය කිරීමටද එම තරඟයේදී සමත් විය.

[rns_reactions]

චැම්පියන්ස් කුසලානය යටතේ බංගලාදේශය සහ ඔස්ට්‍රේලියාව අතර පැවති තරඟය වර්ෂාවේ බලපෑම නිසා ජය පරාජයෙන් තොරව නිමාවට පත්වූ අතර ඔස්ට්‍රේලියාව තරඟාවලියේ මුහුණ දුන් පලමු තරඟය වූ නවසීලන්තය සමඟ තරඟයේදී ද වර්ෂාව නිසා ප්‍රතිපලයක් ලබා ගැනීමට නොහැකි විය.

තරඟයේ පළමුව පන්දුවට පහර දුන් බංගලාදේශ කණ්ඩායම වෙනුවෙන් හුදකලා සටනක නිරතවූ තමීම් ඉක්බාල් ලකුණු 95 ලබාගත් අතර ස්ටක්ගේ දෙවන කැඳවීමෙන් තමීම්ගේ ශතකය පමණක් නොව බංගලාදේශ පසුපෙළ බලාපොරොත්තුද සුන් වනු දැකගත හැකි විය.

බංගලාදේශ ඉනිම පන්දුවාර 44.3 තුල ලකුනු 182 කට සීමා විය.පිළිතුරු ඉනිම ක්‍රීඩා කිරීමට පැමිණි ඕස්ට්‍රේලියා ආරම්භක සබඳතාවය ලකුණු 45 කට සීමා කිරීමට රුබෙල් හුසේන් සමත් වූ අතර වර්ෂාව නිසා තරඟය නතර කරන විට ඔස්ට්‍රේලියාව කඩුල්ලක් දැවී ලකුණු 83 ලබාගෙන තිබිණි.ඒ වන විට නොදැවී පහර දුන් ඩේවිඩ් වෝනර් ලකුණු 40 සහ ස්මිත් ලකුණු 22 ලබා තිබිණි.

වෝනර් මෙම ඉනිම තුල ලකුණු 4000 පසුකර යාමට සමත් වූ අතර ඔහුට ලකුණු 4000 පසු කිරීමට ඉනිම 93 ක් වය විය.ඉන්දීය පිතිකරු වීරාත් කොලිද මෙම කඩයිම් පසු කිරීමට ඉනිම 93 කට ක්‍රීඩා කර තිබුණි.එක්දින ලකුණු 4000 වේගයෙන්ම පසුකර ගිය පිතිකරුවා ලෙස වාර්තාව පිහිටවා තිබෙන්නේ හෂීම් අම්ලා විසින් වන අතර ඔහුට ලකුණු 4000 ලබා ගැනීමට වැයවී ඇත්තේ ඉනිම 81 පමණි.වාර්තාවේ දෙවන තැන සිටින විවියන් රිචඩ්ස් තම ලකුණු 4000 පසුකර යාමට ඉනිම 88 ක් වැය කර තිබේ.ශ්‍රී ලංකාව වෙනුවෙන් අඩුම ඉනිම ගණනකදී ලකුණු 4000 පසු කල ක්‍රීඩකයා උපුල් තරංග වන අතර ඔහු මෙම කඩයිම පසුකර  යාමට ඉනිම 119 ක් වැය කර තිබේ.

[rns_reactions]

ක්‍රිකට් ලෝකයේ ප්‍රබලයන් චැම්පියන්ස් කුසලානය දිනා ගැනීමේ අරමුණෙන් එංගලන්තයේ තරඟ වදිද්දී ලෝක ශූර බටහිර ඉන්දීය කොදෙව් කණ්ඩායම සහ ඇෆ්ගනිස්ථානය අතර T 20 තරඟාවලියක් කොදෙව් හිදී පැවැත්විණි.

කොදෙව් කණ්ඩායම මෙන්ම ඇෆ්ගනිස්ථාන කණ්ඩායමත් T20 තරඟ රටාවට ආවේනික ක්‍රීඩකයන් රැසකගෙන් සමන්විතව තිබීම නිසා තරඟාවලිය ආරම්භයේම තරඟාවලිය තියුණු තරඟාවලියක් වනු ඇතැයි මත පල විය.

කෙසේ නමුත් ඇෆ්ගනිස්ථානයේ අඛණ්ඩ ජයග්‍රහණ වැලට පළමු තරඟයේදීම තිත තැබූ කොදෙව්වන් තරඟ තුනකින් යුතු තරඟාවලිය ජයගත්තේ 3-0 ලෙස ඇෆ්ගනිස්ථානය පරාජයට පත් කරමිනි.

තරඟාවලියේ අවසන් තරඟයේදී ඇෆ්ගනිස්ථානය කඩුලු 7 කින් පරාජය කිරීමට කොදෙව්වන් සමත් වූ අතර,මෙම තරඟයේදී කොදෙව් පිතිකරු මාලන් සැමුවෙල් තම T20 දිවියේ ලබාගත් ඉහලම ලකුණු ප්‍රමාණය වූ ලකුණු 89 ලබා ගැනීමට සමත් වීමට වැදගත් සිද්දියකි.

[rns_reactions]

ශූරයන්ගේ කුසලාන තරගාවලියේ දෙවන තරඟය ලෙස නවසීලන්තය සහ ඕස්ට්‍රේලියාව අතර බර්මින්හැම්හිදී පැවැති තරගය වර්ෂාව හේතුවෙන් විසදුමකින් තොරව අවසන් කිරීමට විනිසුරුවෝ තීරණය කළහ.

තරඟයේ පළමුව පන්දුවට පහර දුන් නවසීලන්ත ඉනිම අවසානයේ ඇති වූ වර්ෂාව හේතුවෙන් තරඟයේ දෙවන ඉනිම  ආරම්භයට මිනිත්තු 85 ක පමණ කාළයක් වැයවූ අතර තරඟය ජයගැනීමට  ඕස්ට්‍රේලියාවට ඕවර 36 කදී ලකුණු 235 ක ඉලක්කයක් හිමිවිය. තරගය ආරම්භවුවද ඕස්ට්‍රේලියා කණ්ඩායම ඕවර නවයක් අවසානයේ ලකුණු 53 කට කඩුලු තුනක් දැවී ගොස් තිබියදී  නැවතත් ක්‍රීඩාංගණයට වර්ෂාව පතිත විය. මිනිත්තු 30 ක් බලාසිටියද වර්ෂාවේ අඩුවීමක් සිදුනොවීම නිසා තරගය අතහැර දැමීමට විනිසුරුවෝ තීරණය කළහ.

පළමුවෙන් පන්දුවට පහරදුන් නවසීලන්ත කණ්ඩායම ඔවුන්ට නියමිත පන්දුවාර 46 අවසන් වීමට පෙර  ඕවර 45 ක් අවසානයේ සියලු දෙනා දැවී ලකුණු 291 ක් රැස්කිරීමට සමත් විය. කේන් විලියම්සන්ගේ ශතකය හමුවේ ලකුණු 300 සිමාවට ආසන්න වුවද, ජෝෂ් හේසල්වුඞ්ගේ විශිෂ්ට පන්දු යැවීම හමුවේ එම සිමාව ඉක්මවා යෑමට නවසීලන්ත කණ්ඩායමට අවස්ථාවක් හිමි නොවීය.

ලකුණු 100 ලබා සිටියදී අවාසනාවන්ත දුවද්දී දැවීයෑමකට හසුවන විට පන්දු 97 කදී හයේ පහර තුනක් සහ හතරේ පහර අටක් සිය ඉනිමට එක්කර ගැනීමට කේන් විලියම්සන් සමත්ව සිටියේය. දෙවැනි කඩුල්ල සදහා ලුක් රොන්චි සමග එක්ව පන්දු 60 කදී ලකුණු 77 ක සම්බන්ධතාවයක් ගොඩනැගූ විලියම්සන්, තෙවැනි කඩුල්ල සදහා රොස් ටේලර් සමග එක්ව පන්දු 109 කදී ලකුණු 99 ක සම්බන්ධතාවයක්ද ගොඩනගමින් නවසීලන්ත ඉනිමේ ලකුණු සංඛ්‍යාව ඉහළ දැමීය.

හතලිස් පස්වැනි වැනි ඕවරය ආරම්භවන විට කඩුලු 7 කට ලකුණු 286 ක් රැස්කරගෙන සිටි නවසීලන්තයට පහසුවෙන් ලකුණු 300 සීමාව කරා යෑමට තිබූ අවස්ථාව උදුරාගත් ජෝෂ් හේසල්වුඞ් අවසන් කඩුලු තුන දවාගනිමින් සිය එක්දින දිවියේ හොඳම පන්දු යැවීම වාර්තා කරමින් ලකුණු 52 කට කඩුලු 6 ක් දවාගත්තේය.හෙල්ස්වුඩ් ගේ මෙම පන්දු යැවීම සටහන් වුයේ චැම්පියන්ස් කුසලාන තරඟාවලියක පන්දු යවන්නෙකු වාර්තා කල හොඳම දෙවන පන්දු යැවීම ලෙසය.චැම්පියන්ස් කුසලානයේ හොඳම පන්දු යැවීම වාර්තා කර ඇත්තේ ශ්‍රී ලංකා ක්‍රීඩක ෆරවීස් මහරුෆ් විසිනි.

[rns_reactions]

සුසන්තිකා ජයසිංහ යනු කවුදැයි හඳුන්වා දීමට අමුතුවෙන් අටුවා ටීකා ටිප්පනි ලිවිය යුතු නැත. “ආසියාවේ කළු වෙළඹ” යැයි විරුදාවලි ලත් ඇය ඔලිම්පික් පදක්කමක් දිනූ එකම ශ්‍රී ලාංකික ක්‍රීඩිකාව ලෙස ඉතිහාසයට එක් වූයේ ලෝක සිතියමේ අබැටක් තරම් වූ නයන පිනවන මේ රන් දිවයිනට ප්‍රමාණය ඉක්මවා ගිය ප්‍රසාදයක් මෙන්ම ගෞරවයක්ද නිර්මාණය කර දෙමිනි. කෙටි දුර ධාවන ඉසව්වෙන් ඔලිම්පික් පදක්කමක් දිනූ එකම ආසියාතික ක්‍රීඩිකාව සුසන්තිකාම වීම පුරවැසි සකල ජනයාට ද ගෞරවයක්ම වේ.
ඒ සුසන්තිකා ජයසිංහ  සංවාදගත වූයේ එක් සුවිශේෂි තීරණයක් රට හමුවේ තැබීමටය.
ඒ තීරණය කීමට අපි සුසන්තිකාට ඉඩ දෙමු. විනිශ්චය ඔබ සතුය.

ප්‍රශ්නය:- මේ දවස්වල මොකද කරන්නේ?
පිළිතුර:- මේ දවස්වල පුහුණුකාරියක ලෙස සේවය කරනවා. වෙන විශේෂ දෙයක් නෑ. දරුවෝ දෙන්නගෙ වැඩත් කරගෙන ගෙදරට වෙලා ඉන්නවා.
ප්‍රශ්නය:- දැන් ක්‍රීඩා අමාත්‍යාංශයත් එක්ක සම්බන්ධයක් නැද්ද?
පිළිතුර:- මම ක්‍රීඩා අමාත්‍යංශයේ උපදේශිකාවක් විදියට වැඩ කළානේ. නමුත් 2015 ජනවාරි ආණ්ඩු පෙරැළියත් එක්ක ඒ රස්සාව මට නැති වුණා.
ප්‍රශ්නය:- රස්සාව නැති වුණා ද? නැති කළාද?
පිළිතුර:- මම හිතන්නේ නැති කළා. ඒ එක්කම මට ලැබිච්ච සියලු පහසුකම්, දීමනාත් අහිමි වුණා.
ප්‍රශ්නය:- මොනවද ඒ ආණ්ඩුවෙන් ලැබුණු පහසුකම්?
පිළිතුර:- මට කාර් එකක් දීලා තිබුණා රියදුරෙක් හිටියා. මාසිකව රුපියල් 80,000ක වැටුපක් ලැබුණා. ඒවා මට ලැබුණේ ක්‍රීඩා අමාත්‍යාංශයේ උපදේශිකාවක් හැටියටත්, ජනාධිපති සම්බන්ධිකරණ නිලධාරිණියක් හැටියටත් කළ සේවයටයි.
ප්‍රශ්නය:- ඔබට ඒවා අහිමි වෙන්නේ?
පිළිතුර:- රජය මාරු වීමත් එක්ක තමයි. ඊට අවුරුද්දකට විතර පස්සේ ක්‍රීඩා අමාත්‍යාංශයේ උපදේශිකාවක් හැටියට මට නැවත පත්වීමක් ලැබුණා.
ප්‍රශ්නය:- පරණ වරප්‍රසාද, දීමනා ලැබුණාද?
පිළිතුර:- නෑ. ඒ මොකවත්වත් නෑ. 2020 දක්වා කැබිනට් අනුමැතිය සහිතව මාව ක්‍රීඩා උපදේශිකාවක් විදියට බඳවා ගත්තා. ඒ වෙනුවෙන් මට මාසෙට රුපියල් 60,000 ක් විතරයි ලැබුණේ.
ප්‍රශ්නය:- ඒත් ඔබ බාර ගත්තා?
පිළිතුර:- ඔව්. මට අවුරුද්දෙ මුල මැද අග කියලා නෑ. ක්‍රීඩා උපදේශිකාවක් විදියටත් නොවෙයි ඔලිම්පික් පදක්කමක් දිනා ගත්ත එකම ක්‍රීඩිකාව විදියට රට පුරා ආරාධනා එනවා. විවිධ උත්සවවලට යන්න වෙනවා. එහෙම වුණාම මම හරි අසරණයි. මෙච්චර කාලයක් රටක් විදියට මාව බලාගත්තා. හැමදේම කළා. නමුත් දැන් ක්‍රීඩාවෙන් සමුගත්තට පස්සේ මට දරුවෝ දෙන්නෙක් ඉන්නවා. එහෙම ජීවත් වෙනකොට ඇත්තටම මට එදා කිව්වේ ජාතික වස්තුවක් කියලයි. ආසියාවෙම ගත්තොත්, ඉන්දියාව, චීනය, ජපානය වගේ රටකටවත් නෑ කෙටිදුර ඉසව්වකින් ඔලිම්පික් පදක්කමක්. ඇත්තටම මේක කිව යුතු දෙයක් නොවෙයි. ඔය මගේ ඇත්ත තත්ත්වය. ඇත්තටම ඒක හපන්කමක්. නමුත් මේ ක්‍රීඩා බලධාරින් මේ රටේ දරුවන්ට කිව්වේ නෑ. ගමෙන් කොස් දෙල් කාලා ආපු සුසන්තිකා ආසියාවේ කිසිම ක්‍රීඩිකාවකට කරන්න බැරි වෙච්ච දේ කළා කියලා. ඉතිහාසය තුළ ආසියාවේ කිසිම ක්‍රීඩිකාවක් කෙටි දුර ඉසව්වකින් ඔලිම්පික් පදක්කමක් දිනලා නෑ. ඒ අභිමානය මට තියෙනවා.
ප්‍රශ්නය:- ඒ අභිමානය තියෙද්දී ඇයි ඔබ දේශපාලනයට ගියේ ?
පිළිතුර:- ගොඩක් දෙනෙක් මගෙන් ඔය ප්‍රශ්නය ඇහුවා. මට එහෙම අවබෝධයක් දැනීමක් නැති වුණත් මට හිතුණා රට යන පැත්තට මිසක් අපි යන පැත්තට රට එන්නේ නැහැ කියලා. මට එහෙම තේරුණා. පැත්තකට වෙලා හිටියොත් අපට කවදාවත් මොකුත්ම කරන්න වෙන්නේ නැහැ කියලා මට තේරුණා. පවතින රජයත් එක්ක යා යුතුයි කියලා තේරුම් ගත්ත නිසා තමයි මහින්ද රාජපක්ෂ මැතිතුමා සමග සම්බන්ධ වුණේ. ඒ ක්‍රීඩාවට යමක් කරන්නයි.
ප්‍රශ්නය:- ඒ කියන්නේ දේශපාලන පත්වීමක් නෑ?
පිළිතුර:- මගේ පක්ෂය කාන්තා පක්ෂයයි. නමුත් ඒ වෙලාවෙ දී මම තීරණය කළා අපේ රාජ්‍ය නායකයාට උදව් කරලා ක්‍රීඩාවට සේවයක් කරන්න අවස්ථාවක් ලබා ගත යුතුයි කියලා. මේ රටේ යම්කිසි සහයෝගයක් ගන්න පුළුවන් වෙන්නේ නායකයත් එක්ක ගියොත් තමයි. ඒ නිසයි මම දේශපාලනයට සම්බන්ධ වුණේ.

ප්‍රශ්නය:- ඒ වෙනුවෙන් ලැබුණු දෙයක් තියෙනව ද?
පිළිතුර:- ලැබුණ දෙයක් කියන්නේ… එකම ඔලිම්පික් පදක්කම්ලාභී ක්‍රීඩිකාව වුණත් මට රාජ්‍ය තාන්ත්‍රික පාස්පෝට් එකක්වත් ලබා දීලා නෑ. මම මේ රටට ඇත්තටම ගේන්න පුළුවන් ඉහළම ජයග්‍රහණය, ගෞරවය ගෙනාවා. මම මෙහෙම කතා කරන්න ඕන නෑ. මම මගේ රටට ආදරෙයි. මම දරුවන් දෙන්නෙක් හැදුවා. මං ගොඩාක් දේවල් හොයා ගත්තා. මම ලස්සන ගෙයක් හැදුවා. මම නැති කරගෙන ලැබිච්ච දේවල් විනාශ කරගන්න කෙනෙක් නෙවෙයි. මගේ අම්මා තාත්තා අදටත් රැකෙන්නේ මගෙන්. මගේ පවුලේ සහෝදරියෝ හතර දෙනෙක් හිටියා. එයින් අක්කලා දෙන්නෙක් දැන් ජීවතුන් අතර නෑ. අවුරුදු තුනක් වෙනවා එක අක්කා කෙනෙක් නැති වෙලා. එයා නැති වුණේ පිළිකාවකින්. දෙවැනි අක්කා දියවැඩියා රෝගයෙන් මිය ගිහින් මාස එක හමාරයි. පවුලේ කෙනෙක් හැටියට මට අහක බලන්න බෑ. මම ඒ වෙනුවෙනුත් කැප වුණා. මම ගෙදර අයත් එක්ක හැමදාම ජීවත් වුණේ.
ප්‍රශ්නය:- විවාහය දෙදරන්නත් ඒක හේතුවක් වුණා.
පිළිතුර:- ඔව්. ඇත්ත වශයෙන්ම තාම අපි දෙන්නා නීතියට අනුව වෙන් නොවුණත් අපි දෙපැත්තක තමයි ජීවත් වෙන්නේ. මට ඒ නිසා නොයෙක් නින්දා අපහාස විඳින්නත් වුණා. ඒක මට විතරක් උරුම දෙයක් නොවේ කියලා මම හිතනවා. මට කවදාවත් මගේ මාපියො සහෝදරියො අත හරින්න බෑ. දරුවෝ දෙන්නගෙ බරත් කරට අරගෙන මම ජීවත් වෙද්දී තමයි ආණ්ඩුව පෙරළුණේ. ඊට පස්සේ නායකයා වෙනස් වුණා. ඒ එක්ක මම අසරණ වුණා.
ප්‍රශ්නය:- මහින්ද රාජපක්ෂ ජනාධිපතිවරයා එක්ක වගේම මෛත්‍රීපාල සිරිසේන ජනාධිපතිවරයත් එක්කත් සම්බන්ධ වෙන්න තිබුණානේ.
පිළිතුර:- ක්‍රීඩාව වෙනුවෙන් මට ඒ දේ කරන්න බැරි නෑ. මට ආරාධනා කරපු හැම දෙයකටම මම සම්බන්ධ වුණා. එදා වුණත් මම බලෙන් ගියේ නෑ. මට හරි පිළිගැනීමක්, තැනක් තිබුණා. මම ඒකත් එක්ක තමයි කටයුතු කළේ. දේශපාලනයේ ඇළිලා කරන්න ඕන කියන තැන මම නෑ. ඉතින් ඒ දෙයත් එක්ක මම දන්නා මට පෞද්ගලිකව ජීවත් වෙන්න පුළුවන්. නමුත් මගේ වියහියදම් එක්ක බැලූ විට මං රැකියාවක් කළ යුතුයි කියලා මට හිතෙනවා.
ප්‍රශ්නය:- ඔබ කිව්වා මේ ආණ්ඩුව යටතෙත් රුපියල් 60,000 ක දීමනාවක් සමග ජොබ් එකක් ලැබුණා කියලා.
පිළිතුර:- ඔව්, ඒක ලැබුණා. මට විශාල වගකීමක් එක්ක තමයි ඒ පත්වීම ලැබුණේ. ආධුනික ක්‍රීඩකයන් වගේම ජාතික තලයේ පුහුණු සංචිතය මට බාර වුණා. ඒ ක්‍රීඩා අමාත්‍යාංශයේ නියෝජිතය හැටියට. ඒ වගේම ක්‍රීඩා ඇමැතිතුමාගේ ක්‍රීඩා උත්සව තියෙනවා නම් ක්‍රීඩාවේ උන්නතියට සංවර්ධනයට අවශ්‍ය උපදෙස් දෙන්න. ඒ විතරක් නොවෙයි. සමහර වෙලාවට ක්‍රීඩා වැඩසටහන්වලට සම්බන්ධ වෙලා වැඩ කරන්න මට අවස්ථාව ලැබිලා තියෙනවා. පිට්ටනියේ දී පවා හැම දෙයක්ම බලන්නේ හදන්නේ මම. ඇමැතිතුමා පත්වීම දෙන දවසෙම කිව්වා. “සුසන්තිකාට මේ ඩියුටිය බාර දෙන්න. විශේෂයෙන්ම එයාට ඉන්න තැනක් ලෑස්ති කරලා දෙන්න.” කියලා.
ප්‍රශ්නය:- නමුත් ඒවා වුණේ නෑ ?
පිළිතුර:- ඔව්, කියන්න කනගාටුයි. ඇමැතිවරයාගේ උපදේශිකාවක් වුණත් නැතත් මේ රටට මේ ආසියාවට ඔලිම්පික් පදක්කමක් ගෙනාපු මේ සුසන්තිකාට ක්‍රීඩා අමාත්‍යාශයේ කාමරයක්. අඩු ගාණේ ගාර්ඞ් රූම් එක ළඟ පුංචි කාමරයක්වත් නැද්ද දෙන්න. ඔබ මේ ඉන්ටවිව් එක ගන්න ආවේ මගේ ගෙදරට. මට පුංචි කාමරයක් හරි තිබුණා නම් එතෙනට එන්න තිබුණානේ. මට පෑනක් ෆයිල් කවරයක් තියාගන්න මේස කෑල්ලක්වත් නෑ.
ප්‍රශ්නය:- නමුත් පඩිය ලැබෙනවා?
පිළිතුර:- ඒක තමයි අලුත්ම තත්ත්වය. මගෙ ගිය මාසේ අප්‍රේල් මාසයේ ඉඳන් මගේ පඩිය නවත්තලා.
ප්‍රශ්නය:- ඒකට හේතුව?
පිළිතුර:- ඒකට හේතුව තමයි මම මේක කෙළින් කියන්න ඕනෑ. මම කෙළින් කතා කරන කෙනෙක්. මට හොඳ කොන්දක් තියෙනවා. මට හොඳ ජවයක් තියෙනවා. එදා සිරසේ තිබුණා “ප්ලැටිනම් එවෝඞ් සෙරමනි” එක. ඒකෙදි ජීවිතයේ එක් වරක් පමණක් හිමිවන සම්මානයක් මට ලැබුණා. ඒ සම්මාන උළෙලෙ දී මට අදහසක් ප්‍රකාශ කරන්න කිව්වා.
ප්‍රශ්නය:- ඔබ මොකක්ද කිව්වේ?
පිළිතුර:- ඊට කලින් මම කිව යුතුයි. මම ඒ ප්‍රකාශය කළේ මගේ තනතුරත් එක්කයි. මම කිව්වේ “රටක අවශ්‍යතාව වෙනුවෙන් දියුණුව, උන්නතිය වෙනුවෙන් කළ යුතු දෙයක් මේ මාධ්‍ය ආයතනය කරලා තියෙන්නේ. ඒකට මම අතිශයින්ම ගෞරවය කරනවා කියලා.
ප්‍රශ්නය:- ඔබට එහෙම කියන්න විශේෂ හේතුවක් තිබුණා ද?
පිළිතුර:- ඔලිම්පික පදක්කමක් දිනපු මම හුඟාක් වෙලාවට මම කියන්නේ කොහොමද කෙනෙකුට ක්‍රීඩකයෙක් වෙන්න. ක්‍රීඩිකාවක් වෙන්න කියලා. ඇත්තටම ක්‍රීඩකයෙක් වෙලා ක්‍රීඩිකාවක් වෙලා ජීවත්වෙන්න බැරි නම් මොකද මම අවුරුදු උත්සවයේ ඉඳලා ඔලිම්පික් දක්වා දුවලා ඔලිම්පික් පදක්කමක් දිනපු ක්‍රීඩිකාවක්. ඒ මම දැන් ක්‍රීඩාවෙන් සමු අරගෙන අවුරුදු 9 යි. ඔලිම්පික් පදක්කම අරගෙන අවුරුදු 17ක්. ඒ මම අද ඉන්න තැන ගත්තොත් මටම කනගාටුයි. එහෙම බැලුවම මම කොහොමද තවත් කෙනෙකුට කියන්නේ ක්‍රීඩාව තෝරාගන්න කියලා. මම කරපු දේ තවත් කවුරුවත් කරල නෑ. අපිට එහෙම කරනවා වගේ අයින් කරන්න එපා. ඩර්වින් පෙරේරා සර් ඊයේ පෙරේ දා මැරිලා ගියා. මම 1997 දී ලෝක රිදී පදක්කම ගත්තේ ඩර්වින් සර් යටතේ ටේ්‍රනින් කරලා. හැබැයි කවුරුවත් ඩර්වින් සර් මැරිලා යනකම් එක ඇගයීමක් හරි කළා ද? මම ඒ සම්මාන උළෙලෙ දී ක්‍රීඩා අමාත්‍යවරයා ඉදිරිපිට දී කිව්වේ ඒ ඛේදවාචකය ගැනයි. අද බලන්න ශ්‍රියානි කුලවංශ, දර්ශා, සුගත්, මම අපෙන් ගන්න ප්‍රයෝජනය මොකක්ද මේ රට?. දවසට පැය දෙක තුනක් හරි පුහුණු සැසියක දී අපෙන් ප්‍රයෝජනයක් ගන්නවද? මහින්දානන්ද ඇමැතිතුමා ඉන්න කාලෙත් මම මේ ගැන කතා කළා. මම කියන්නේ මට වඩා දක්ෂ අය තව මේ රටේ කොච්චර ඉන්නවා ඇද්ද? නමුත් හරි පුහුණුකරුවෝ නොවෙයි පුහුණුකරුවන් වෙලා ඉන්නේ. මේක තමයි ඇත්ත. එදා මෙදාතුර ආව ක්‍රීඩා ඇමැතිවරුන් ගත්තම මට කියන්න කනගාටුයි. මම ක්‍රීඩාවෙන් සමුගත්තට පස්සේ පරිපාලනයට ආවේ දයාසිරි ජයසේකර ඇමැතිතුමාගේ කාලයේ දි. එතුමට අමතක ද දන්නේ නෑ. මම රටට ගෞරවයක් ගොනාව ක්‍රීඩිකාව. මගෙන රටට සේවයක් ලබාගත යුතුයි කියලා.
ප්‍රශ්නය:- එදා සම්මාන උළෙලේ කතාවෙන් පස්සේ මොකද වුණේ?
පිළිතුර:- ඒ කතාව කරලා මම ස්ටේජ් එකෙන්  පහළට බහින කොටම මට දයාසිරි ජයසේකර ඇමැතිතුමා කිව්වා. මම මේ වගකීමෙන් කියන්නේ එතැන ක්‍රීඩා අමාත්‍යාංශයේ ලේකම් තුමත් හිටියා. මට ඇමැතිවරයා කිව්වා “තමුසේ එනවා මේ මාසේ පඩිය ගන්න.” කියලා.
ප්‍රශ්නය:- ඔබට මොකද හිතුණේ?
පිළිතුර:- මතක තියාගන්න මම බය නෑ. මට නැතිවෙන්න දෙයක් නෑ. මට තියෙන්නේ රටට ගෞරවය හා ජයග්‍රහණය ගෙනත් දීපු ඉතිහාසයක්. ඒ නිසා මට හරිම වේදනායි. ක්‍රීඩා අමාත්‍යාංශයේ මට තැනක් නැත්නම් මට තැන තියෙන්නේ බුද්ධ ශාසන අමාත්‍යාංශයෙ ද? එහෙම නැත්නම් සෞඛ්‍ය අමාත්‍යාංශයෙ ද? මේ ක්‍රීඩා ඇමැතිට අමතක වුණාට එයා දැන් වර්තමාන ක්‍රීඩා ඇමැති. හැබැයි මම අවුරුදු 20ක් රට වෙනුවෙන් ක්‍රීඩා කරපු කෙනෙක්. ඒ නිසා මම එයාට නැවතත් කියනවා. එයා බුද්ධිමත් අමාත්‍යවරයෙක්. එයා හැම පැත්තෙන්ම දක්ෂයෙක්. එයාගේ ඥාන ශක්තියත් එක්ක එයා කල්පනා කළොත් මම කිව්ව දේ හරියට තේරුම් ගනීවි. ක්‍රීඩාව දියුණු කරන්න අවශ්‍ය දේයි මම කිව්වේ.
ප්‍රශ්නය:- ඇමැති දයාසිරි කිව්වා වගේම ඔබට පඩිය ලැබුණේ නෑ?
පිළිතුර:- නෑ. ඒ කිව්වත් හරි මම සති දෙකකට විතර පස්සේ මට ලියාපදිංචි තැපෑලෙන් ලියුමක් එවලා කිව්වා. “මගේ සේවය අවසානයි.” කියලා.
ප්‍රශ්නය:- ඔබ කිව්වා ඒ සම්මාන උළෙලෙ ක්‍රීඩා අමාත්‍යාංශයේ ලේකම් හිටියා කියලා.
පිළිතුර:- ඔව්. එතුමා මට කිව්වා “මදි ද අපි රුපියල් 60,000 ක් හරි දුන්නා. කට තිබ්බ පළියට කියවන්න එපා” කියලා. මම ඇත්ත කතා කළේ මට ඔය කාටවත් කඬේ යන්න ඕනැ නෑ. මේ ක්‍රීඩාව  යන තාලේ මට තේරෙනවා. අද ක්‍රීඩක ක්‍රීඩිකාවන් එක එක දේවල් පාවිච්චි කරලා දුවන්නේ. මේවා ගැන හොයන්න කෙනෙක් නෑ. කතා කරන්න කෙනෙක් නෑ. කවුද මේවට වග කියන්නේ.
ප්‍රශ්නය:- ඒ හැට දාහත් නැතිව ඔබ කොහොමද දැන් ජීවත් වෙන්නේ?
පිළිතුර:- ආදායම් මාර්ග කියන්නේ ඇත්තටම මම හොයාගත්ත මුදලක් තිබුණා. දේශපාලන කටයුතුවලට ඒ ගොඩාක් මුදල් වියදම් වුණා. එතැන දී මට කවුරුවත් විශේෂයෙන් උදව් කළේ නෑ. ඒ නිසා මම උපයා ගත්ත දේවලුත් මට හරි හරියට වියදම් වෙලා. මම මෙහෙම අසරණ වෙලා ඉන්න කොට  ජනාධිපති නීතිඥ ජයන්ත දොළවත්ත මහත්තයා හරහා ආරක්ෂක ලේකම්තුමාට කතා කළා. ඊට පස්සේ මාව මේ කාලය තුළ මාව හමුදාවේ කෙටිදුර පුහුණුකාරියක් හැටියට කොන්ත්‍රාත් පදනම යටතේ මාව බඳවා ගත්තා.
ප්‍රශ්නය:- කීයක් ගෙවනවද?
පිළිතුර:- මම ඉල්ලීමක් කළා. මට රුපියල් 60,000 ක් ගෙවනවා. ඉතින් සර් අමාරුවෙන් ජීවිතය ගෙනියන්නේ. ආසා කරන කෑමක් වුණත් දෙපාරක් හිතලා කන්නේ. ඔලිම්පික් පදක්කමක් දීලාත් ඇයි මට මෙහෙම වුණේ කියලා මම හිතනවා. මට රටේ ජනතාවගේ ආදරය ගෞරවය තියෙනවා. මට ඩෙංගු හැදිච්ච වෙලාවේ හැමෝම මට උදව් කළා. දියතලාවේ ඉඳලා මාව කොළඹ ගෙනාවේ චොපර් එකකින්. මට ඒ ආදරය ගැන පුදුම ගෞරවයක් තියෙන්නේ. ඒත් මට තියෙන්නේ රටට සේවයක් කරන්න අවස්ථාව අහිමිවීම, ඒ තුළම තමයි මට ආර්ථික ප්‍රශ්න ඇතිවෙලා තියෙන්නේ.
ප්‍රශ්නය:- ඔබ මොකක්ද කරන්න බලාපොරොත්තු වෙන්නේ ?
පිළිතුර:- ක්‍රීඩා බලධාරින් මට සලකන්නේ මේ තරම්ම පහත් විදියට නම් මට තියෙන ලොකුව සම්පත තමයි ඔලිම්පික් පදක්කම. මම ඒක වෙන්දේසියේ දානවා.
ප්‍රශ්නය:- ඔලිම්පික් පදක්කම වෙන්දේසි කරනවා?
පිළිතුර:- ඔව්. මම වෙන මොනවා කරන්නද?
ප්‍රශ්නය:- ඔබ ක්‍රීඩා අමාත්‍යාංශයට මේ ගැන දැනුම් දුන්න ද?
පිළිතුර:- මොනවා කියන්නද? මම එක පාරක් ඔය නිලධාරින් එක්ක කතා කළා. ඒ අය කියනවා අපි දැන් සැලසුම් කරගෙන යන්නේ ක්‍රීඩා කෞතුකාගාරයක් හදන්න කියලා. මම අහනවා ඒකේ තැන්පත් කරන්නේ ක්‍රීඩා ඇමැතිගේ පදක්කම් ද කියලා. මේ රටේ ලොකුම පදක්කම තියෙන්නේ මං ගාව. ඒක කෞතුකාගාරයට දෙන්න කලින් මම පදක්කම වෙන්දේසි කරනවා. මොකද මට ඔක්කොටම කලින් දරුවෝ දෙන්නත් එක්ක ජීවත් වෙන්න ඕනා.
ප්‍රශ්නය:- ඔලිම්පික් පදක්කම වෙන්දේසියේ දාලා?
පිළිතුර:- මම යනවා ඕස්ටේ්‍රලියාවට. ඒ වගේ රටක් මාව පිළිගනීවි. මට ඊට වඩා දෙයක් කරන්න ඉතිරිවෙලා නෑ.

[rns_reactions]

සිය තුන්වැනි අයි.සී.සී. ශූරයන්ගේ කුසලානයට කුරුමානම් අල්ලන ඕස්ට්‍රේලියාව ඔවුන්ගේ සුපුරුදු ප්‍රතිවාදියා වන නවසීලන්තයට එරෙහිව බර්මින්හැම් නුවර එජ්බැස්ටන් ක්‍රීඩාංගණයේදී අද (2) තරග බිමට පිවිසෙයි. මේ තරගය මෙවර ශූරයන්ගේ කුසලාන තරගමාලාවේ දෙපිලේහිම පළමු තරගය වන අතර දස්කම් පීරි ගාමින් දෙපිලම කල් මරමින් බලා සිටින්නේ අද තරගය ජයගෙන මෙවර තරගාවලියට සාර්ථක ආරම්භයක් ලබාගැනීමටය.

ඕස්ට්‍රේලියානු පිලේ බිහිසුණු හතරදෙනාගේ කල්ලිය ලෙස හඳුන්වන මිචෙල් ස්ටාක්, ජොෂ් හේසල්වුඞ්, පැට් කමින්ස් සහ ජේම්ස් පැටින්සන් බර්මින්හැම් තණතීරුවේදී නවසීලන්ත පිලේ පිතිකරුවන් සෑහෙන ලොකු පීඩනයකට ඇද දමනු ඇතැයි අනාවැකි පළවූයේ කල්තියාමය. එංගලන්ත ප්‍රාන්ත තරගවලට ක්‍රීඩා කිරීමෙන් සෑහෙන පළපුරුද්දක් ඇති ජෝන් හේස්ටින්ස් ද කණ්ඩායමේ සිටින බැවින් ඕස්ට්‍රේලියානු පිලේ නායක ස්ටීවන් ස්මිත්ට අද ක්‍රීඩා කරන කණ්ඩායම තෝරාගැනීම ලෙහෙසි වන්නේ නැත. කෙහොම වෙතත් මේ හතරදෙනාම අද තරගයට ක්‍රීඩා නොකරනු ඇතැයි ඊයේ පස්වරුවේ ඕස්ට්‍රේලියානු නායකයා කීවේය.

මේ සිවුදෙනා ගැන කිසියම් සන්සන්දනාත්මක ඇහැකින් බලන්නේ නම් 70 දශකයේ අග සහ 80 දශකයේ මුල කොදෙව් නායක ක්ලයිව් ලොයිඞ්ගේ යකඩයින් රෑනට නොදෙවනි නොවේ.

වරින් වර විවිධාකාරයේ ආබාධවලට ගොදුරුවීම නිසා බිහිසුණු හතරදෙනාම එකම තරගයට ක්‍රීඩා කරන්නේ කළාතුරකිනි. එසේ වුවත් ස්මිත්ගේ කල්පනාව වී ඇත්තේ මේ සිවුදෙනාම තරගයට ක්‍රීඩා කරද්දී පන්දු රැකීමේ අවදානම වැඩි බවයි. තුන්ඉරියව්වෙන් දස්කම් දක්වන ක්‍රීඩකයනුත් සිටින බැවින් ඔහු දැන් විකල්ප දෙකක් කෙරෙහි අවධානය යොමුකරමින් සිටී.

නවසීලන්තයට එරෙහිව ඕස්ට්‍රේලියාව ක්‍රීඩා කළ අවසන් එක්දින තරගාවලියේදී දස්කම් පෑ මාකස් ස්ටොයිනිස් සහ පිතිහරඹයටත් හැකියාව ඇති එංගලන්ත තණතීරුවල වැඩි දස්කම් දක්වන හේස්ටින්ස් අද තරගයට භාවිත කිරීමට ස්මිත් අදහස් කරයි.

ලොව හොඳම යෝකර් පන්දු යවන්නා ලෙස කිසිදු විවාදයකින් තොරව විචාරකයන් විසින් හඳුන්වනු ලබන මිචෙල් ස්ටාක් සහ ජේම්ස් පැටින්සන් ආබාධවලට ලක්ව සිට යළි කණ්ඩායමට එක්වූයේ ඊයේ පෙරේදාය. එබැවින් අද තරගයට වේගපන්දු යවන්නන් සිවුදෙනාගෙන් දෙදෙනකු පමණක් ක්‍රීඩා කරවීම ස්මිත්ගේ බලාපොරොත්තුවයි.
ඕනෑම ආකාරයක ක්‍රිකට් මුහුණුවරකදී පිත්තෙන් දස්කම් දැක්විමට නායක ස්මිත්, ඬේවිඞ් වෝනර් සමග ඕස්ට්‍රේලියානු පිල එක්දින තරග බිමේ ඉතා බලසම්පන්න මුල්පෙළ පිතිකරුවන් සිටින කණ්ඩායම් අතර ප්‍රමුඛස්ථානයක් ගනී.

ඕස්ට්‍රේලියානුවන් කෙතරම් බලවත් වූවත් හෙට තරගයට එක්වන්නේ සිය අසල්වාසී පසමිතුරාගේ ක්‍රීඩා වපසරිය ගැන හොඳ අවබෝධයකින් යුතුවය. නායක කේන් විලියම්සන් සහ ආරම්භක පිතිකරු මාටින් ගප්ටිල් පිතිකරුවන් අතරත්, ටිම් සවුති හා ටේ‍රන්ට් බෝල්ට් පන්දු යවන්නන් අතරත් අමාරුකාරයන් ඕස්ට්‍රේලියානුවෝ දනිති.

මේ අතර නවසීලන්ත නායක කේන් විලියම්ස් ඊවේ පැවසුවේ දෙපිලම ඔවුනොවුන්ගේ බලකොටු තුළ කෙතරම් ක්‍රීඩා කර තිබුණත් මෙවැනි මධ්‍යස්ථ තණතීරුවක ක්‍රීඩා කිරීමට ලැබීම සතුටට කාරණාවක් බවය. ඔහු කියන්නේ මධ්‍යස්ථ ස්ථානයක තරගවදින බැවින් දෙපිලටම ඇත්තේ එක හා සමාන වාසි අවාසි බවයි.

එසේවුවත් තරගයෙන් ජයගැනීමට නම් ආක්‍රමණශීලී පන්දු යැවීමේ අංශයක් ඇති ඕස්ට්‍රේලියානුවන් සමග ධනාත්මක හැඟීමකින් ක්‍රීඩා කළ යුතුව ඇතැයි ඔහු පවසයි. ඉනිමට කදිම ආරම්භයක් ගෙනදිය හැකි වර්ගයේ පිතිකරුවකු වන ගප්ටිල් කෙරෙහි දැඩි විශ්වාසයෙන් පසුවන නවසීලන්ත නායකයා කියන්නේ මෙම තරගය නවසීලන්තයට හැම අතින්ම වාසිදායක වනු ඇති බවයි.

එය බොහෝ දුරට නිවැරැදි අනාවැකියක් බව සිතෙන්නේ පසුගිය තරගාවලියේදී එජ්බැස්ටන් ක්‍රීඩා පිටිය ඕස්ට්‍රේලියානුවන්ට එහෙම පිටින්ම අවාසනාවත්ත තැනක් බවට පත්වී තිබූ නිසාය. එවර (2013) එංගලන්ත පිල සමග එජ්බැස්ටන් පිටියේ පැවැති ශූරයන්ගේ කුසලාන තරගාවලියේ ඔවුන්ගේ පළමු තරගයෙන් ඕස්ට්‍රේලියාව පරාජයට පත්වූ අතර බර්මින්හැම් නගරයේ සමාජශාලාවකදී එංගලන්ත පිතිකරු ජෝ රූට් වෙත ඬේවිඞ් වෝනර්ගේ මුෂ්ඨි ප්‍රහාරයක් එල්ල වූයේ එදින මැදියම් රැයේදීය. ඊට පසුව ආරම්භ වූ අළු බඳුන ටෙස්ට් තරගමාලාවේ පළමු තරග දෙකම වෝනර්ට අහිමි වූයේ තරග තහනමකට ලක්වූ නිසාය.

අද තරගයට එජ්බැස්ටන් පිටියට බසිද්දී ඕස්ට්‍රේලියානුවන්ට ඒ කනගාටුදායක මතකය නැවතත් සිතට වදදෙනු නොඅනුමානය.

[rns_reactions]

කොදෙව් ක්‍රිකට් නාමය ක්‍රිකට් ක්‍රීඩාවෙන් කිසිදා ඉවත්කළ නොහැකි ආකාරයෙන් සුවිශේෂී තැනක් තබන්නට 90 දශකය දක්වා කොදෙව් කණ්ඩායම නියෝජනය කල ක්‍රීඩකයන් සමත් වුවද වත්මන් ක්‍රිකට් පරිපාලනය සහ ක්‍රීඩකයන් ගේ ක්‍රියාකලාපය නිසා කොදෙව් නාමය ක්‍රිකට් ලෝකයේ හුදකලා වී ඇත.

ලෝක කුසලාන ආරම්බයේ තරඟාවලි දෙකම ජයගත් කොදෙව් කණ්ඩායම මෙවර ICC චැම්පියන්ස් කුසලානයට පවා සුදුසුකම් ලැබුවේ නැත.එවැනි තත්වයකට පත්වීම ක්‍රිකට් ක්‍රීඩාවෙන් ලැබූ කොදෙව් ආදිපත්‍යට දැඩි කැළලකි.

කොදෙව් නම කැත කර ගැනීමට අපුරු හේතුවක් සොයාගත් කොදෙව් ක්‍රිකට් බලධාරීන් ඒ සදහා යෝජනාවක් ඉදිරිපත් කර ඇත.ඒ යෝජනාව නම් කැත කරගත් නම වෙනස් කර වෙනත් නමක් භාවිත කිරීමටය.

ඒ අනුව මෙතෙක් කොදෙව්වන් හැදින්වූ “The West Indies Cricket Board” යන නාමය ඉවත් කර පසුගිය බදාදා සිට “Cricket West Indies” ලෙස හදුන්වන බවට අලුතෙන් පත්වූ කොදෙව් ක්‍රිකට් ප්‍රදාන විදායක ජොනී ග්රෙව් මහතා පවසයි.

මෙම නම වෙනස් කිරීමෙන් නොනැවතී 2018-2023 කාලය සදහා කොදෙව් ක්‍රිකට් නැංවීමට තමන් සතුව යෝග්‍ය වැඩපිළිවලක් ඇතැයිද ජොනී මහතා පවසා ඇත.

[rns_reactions]

[rns_reactions]

ශ‍්‍රී ලංකා කණ්ඩායමේ නායක ඇන්ජලෝ මැතිව්ස් චැම්පියන්ස් කුසලාන තරගාවලියේ  දකුණු අප‍්‍රිකාව සමග පැවැත්වෙන පළමු තරගයට සහභාගී වීම  අවිනිශ්චිත බව වාර්තා වනවා.

ඒ පාදයේ කෙණ්ඩා ප්‍රදේශයේ  ඇතිව තිබෙන ආබාධ තත්වයක් හේතුවෙනි.

එම නිසාවෙන් උපුල් තරංග චැම්පියන්ස් කුසලානයේ පළමු තරගය සදහා නායකත්වය ලබාදෙනු ඇති බවට වාර්තාවේ.

ඔස්ටේ‍ලියව සමඟ  පැවැත්වු පළමු පුහුණු තරගයේදී විශිෂ්ට ඉනිමක් ක‍්‍රීඩා කළ ඇන්ජලෝ මැතිව්ස් ලකුණු 95ක් ලබා ගැනීමට සමත්වු අතර දෙවැනි පුහුණු තරගයේදී ඔහු සහභාගී වුයේ නැත.

[rns_reactions]

මෙවර ශූරයින්ගේ කුසලානය ජයග්‍රහණය කිරීමේ වැඩි අවස්ථාව පවතින කණ්ඩායම් පිළිබඳ හිටපු ටෙස්ට් ක්‍රිකට් ක්‍රීඩක කුමාර් සංගක්කාර අනාවැකි පළ කර තිබෙනවා.

පසුගිය වර මෙන්ම ඉන්දියාව ශූරයින්ගේ කුසලානය ජයග්‍රහණය කිරීමේ වැඩි අවස්ථාවක් තිබේ යැයි පවසන සංගක්කාර ඔවුන්ගේ වේගපන්දු බලඇණිය ශක්තිමත් යැයිද පවසා තිබෙනවා.

සත්කාරක එංගලන්ත කණ්ඩායමටද මෙවර ශූරයින්ගේ කුසලානය ජයග්‍රහණය කිරීමේ වැඩි අවස්ථාවක් පවතින බවද සඳහන් කළ සංගෙක්කාර පසුගිය කාලයේ ඉතා වේගයෙන් සංවර්ධනය වූ කණ්ඩායමක් ලෙසද එංගලන්තය නම් කළේය.

දකුණු අප්‍රිකා කණ්ඩායමේ හා ඕස්ට්‍රේලියානු කණ්ඩායම් පිළිබඳද අදහස් දැක්වූ ඔහු කියා සිටියේ එම කණ්ඩායම් වලටද ජයග්‍රහණය කිරීමේ අවස්ථාව ඇති බවය.

එමෙන්ම ඉන්දියාව ඕස්ට්‍රේලියාව දකුණුඅප්‍රිකාව එංගලන්තය තරඟාවලියේ අවසන් පූර්ව වටයට සුදුසුකම් ලබනු ඇති බවද සඳහන් කළේය

ප්‍රධාන තරඟාවලි වලදී ශ්‍රී ලංකාව සුවිශේෂි දක්ෂතා දක්වන කණ්ඩායමක් යැයි පවසන සංගක්කාර බොහෝ දෙනා බලාපොරොත්තු නොමැති කණ්ඩායමක් ලෙස ශ්‍රී ලංකා කණ්ඩායමට යෙදන පීඩනය අඩු බවද සඳහන් කළේය.

[rns_reactions]

මෙවර ශූරයින්ගේ කුසලානය සදහා තරග වදින කණ්ඩායම් අතරින් භයානමකම කණ්ඩායම් හතරක් පිලිබදව නවසීලන්ත හිටපු ක‍්‍රිකට් නායක බ්‍රෙන්ඩන් මැක්ලම් ඉගි පළකරනවා..ඒ නවසීලන්තය, එංගලන්තය, දකුණු අප‍්‍රීකාව හා ඉන්දියාවයි

‘ඒ’ කාණ්ඩයෙන් එංගලන්තයත් නවසීලන්තයත්, බී කාණ්ඩයෙන් ඉන්දියාවත් දකුණු අපි‍්‍රකාවත් අවසන් පූර්ව තරගයට පැමිණෙන බවයි ඔහු පවසන්නේ.

අයි සී සී ශූරයන්ගේ කුසලාන එක් දින ක‍්‍රිකට් තරගාවලිය ආරම්භ කරමින් සත්කාරක එංගලන්ත කණ්ඩායම සහ බංග්ලාදේශ කණ්ඩායම අද තරග වැදීමට නියමිතයි.

[rns_reactions]