අද (අගෝස්තු 18) සිට ක්රියාත්මක වන පරිදි දිවයිනේ විදුලි සැපයුම දෛනිකව නිශ්චිත කාලයක් සඳහා අත්හිටුවීමට ලංකා විදුලි බල මණ්ඩලය පියවර ගෙන තිබේ.
ඒ අනුව දිවයිනම කලාප 4 කට වෙන්කර සතියේ දිනවල අවස්ථා දෙකකදී පැය දෙකකුත් විනාඩි හතලිස් පහක් සහ සෙනසුරාදා දිනවල එක් අවස්ථාවකදී පැයක් බැගින් විදුලි සැපයුම අත්හිටුවනු ඇත.
නොරොච්චෝලේ බලාගාරය නැවත පණගන්වා විදුලි පද්ධතියේ ජනන සැපයුම යථා තත්ත්වයට පත් කෙරෙන තෙක්, දින හතරක් පමණ මෙම විදුලිය කප්පාදුව ක්රියාත්මක කිරීමට සිදුවනු ඇති බව විදුලි බල මණ්ඩලය පැවසීය.
ඒ අනුව එම කාල සටහන පහත වගුවල දැක්වෙන පරිදි වේ.
විදුලි බල මණ්ඩලය පවසන පරිදි ඉහත වගුවල දැක්වෙන කාණ්ඩවලට අයත් ප්රදේශ මොනවාදැයි මෙතැනින් යොමු වී දැනගත හැකිය.
සඳුදා (අගෝස්තු 17) පැය 6 ට අධික කාලයක් දිවයින පුරා විදුලි සැපයුම බිඳ වැටීමේ ප්රතිඵලයක් ලෙස මෙසේ විදුලි කප්පාදුවක් ක්රියාත්මක කෙරේ.
එම විදුලි බිඳ වැටීම හේතුවෙන් ආර්ථිකයට වූ පාඩුව අවම වශයෙන් රුපියල් බිලියන 1 ක් පමණ වෙතැයි අනුමාන කෙරෙන බව විදුලි බල මණ්ඩලයේ උසස් නිලධාරියෙකු බීබීසී සිංහල සේවයට පැවසීය.
අදාළ විදුලි බිඳවැටීම හේතුවෙන් ප්රධාන සැපයුම් පද්ධතියෙන් විසන්ධි වූ නොරොච්චෝල පිහිටි ලක්විජය බලාගාරය අක්රීය වීම මත මෙගාවොට් 800 ට අධික විදුලි ධාරිතාවක් ජාතික විදුලි බල පද්ධතියෙන් ගිලිහීම නිසා පවතින විදුලි ඉල්ලුම සපුරාලීම සඳහා සැපයුම කළමනාකරණය කිරීමට මෙම පියවර ගෙන ඇති බව විදුලි බල මණ්ඩලය පවසයි.
දිවයින පුරා සඳුදා සිදුවු විදුලි බිඳ වැටීම සම්බන්ධයෙන් විමර්ශනයට පත් කළ 9 දෙනෙකුගෙන් සමන්විත කමිටුව අද කෙරවලපිටිය ග්රිඩ් උපපොළ වෙත ගොස් විදුලිය විසන්ධි වීමට හේතු වූ බව කියන ස්ථානය නිරීක්ෂණ කළ බව විදුලි බල අමාත්යාංශයේ මාධ්ය ප්රකාශක සුලක්ෂණ ජයවර්ධන බීබීසී සිංහල සේවයට පැවසීය.
මහාචාර්ය රාහුල අතලගේ ප්රධානත්වය දරන එම කමිටුව ලබන සඳුදා වනවිට සිය වාර්තාව ලබාදෙතැයි අපේක්ෂා කෙරේ.
මේ අතර රට අඳුරේ ගිල්වීමට හේතුවූ විදුලි බිඳ වැටීම සම්බන්ධයෙන් විමර්ශනයක් පවත්වා දින තුනක් ඇතුළත තමන් වෙත වාර්තාවක් ඉදිරිපත් කරන ලෙස ශ්රී ලංකා මහජන උපයෝගිතා කොමිසම විසින් සඳුදා (අගෝස්තු 17) ලංකා විදුලි බල මණ්ඩලය වෙත දැනුම් දෙනු ලැබීය.
