මහජන ආරක්ෂක අමැති ටිරාන් අලස් මහතා නායකත්වය දරන එක්සත් මහජන පක්ෂයේ හදිසි සංශෝධන කිහිපයක් සිදුකර තිබේ.
ඒ අනුව දේශපාලන මණ්ඩලයට නව සාමාජිකයන් කිහිප දෙනෙකු පත්කර ඇත.
ඉදිරි ජනාධිපතිවරණයේදී ජනාධිපති රනිල් වික්රමසිංහ මහතා ටිරාන් අලස් මහතා නායකත්වය දරන එක්සත් මහජන පක්ෂයේ දුරකථනය ලකුණින් වන සන්ධානයකින් තරග වදිනු ඇති බවට ද වාර්තා වෙයි.
ප්රමිතියෙන් බාල එන්නත් මිලට ගැනීමේ සිදුවීමට අදාලව ජනාධිපති කාර්යමණ්ඩල ප්රධානි සාගල රත්නායක මහතාගෙන් ප්රශ්න කරන ලෙස අපරාධ පරීක්ෂණ දෙපාර්තමේන්තුව පැමිණිල්ලක් ලැබී තිබේ.
මෙම පැමිණිල්ල සිදු කර ඇත්තේ අල්ලස දූෂණය නාස්තියට එරෙහි පුරවැසි බලය සංවිධානයේ සභාපති ජාමනි කමන්ත තුෂාර මහතා විසිනි.
අදාළ සිදුවීම සම්බන්ධයෙන් සාගල රත්නායක මහතා සම්බන්ධ බවද විවිධ පාර්ශවයන් විසින් හෙළිකර ඇති බවත් ඒ පිළිබඳ විමර්ශනයේදී අවධානය යොමු කරන ලෙසත් ඔහු තම පැමිණිල්ල මගින් ඉල්ලා ඇත.
අද සමගි ජන බලවේගය තුළ එක්සත් ජාතික පක්ෂයේ ප්රතිපත්ති නොමැති බවත්, මේ වන විට එහි ආර්ථික ප්රතිපත්තිය හසුරුවන්නේ පොහොට්ටුවෙන් පිටමන් කළ කණ්ඩායම විසින් බවත් ජනාධිපති රනිල් වික්රමසිංහ මහතා පැවසීය.
2020 දී එක්සත් ජාතික පක්ෂයේ අයිතිය ප්රකාශ කරමින්, සිරිකොත අල්ලා ගැනීමට සූදානම්ව සිටි සමගි ජන බලවේගය අද පොහොට්ටුවේ සභාපති ඇතුළු පිරිසට යටවී ඇති බවද ජනාධිපතිවරයා පෙන්වා දුන්නේය.
ජනාධිපති රනිල් වික්රමසිංහ මහතා මේ බව සඳහන් කළේ, මහනුවර ජනාධිපති මන්දිරයේදී පැවති දේශපාලන පක්ෂ නියෝජිත හමුව අමතමිනි.
2022 ජූලි මාසයේ සිදුවූ දේශපාලන පෙරළිය සමග මෙරට පක්ෂ ක්රමයද වෙනසකට ලක්ව ඇති බව පෙන්වා දුන් ජනාධිපතිවරයා කුමන දේශපාලන පක්ෂයක් නියෝජනය කළ ද අද සියලුදෙනා රට පිළිබඳ සිතා රජයේ වැඩපිළිවෙළ සමඟ සහයෝගයෙන් ඉදිරියට යා යුතු බවද පැවසීය.
මෙහිදී වැඩිදුරටත් අදහස් දැක්වූ ජනාධිපති රනිල් වික්රමසිංහ මහතා මෙසේද පැවසීය,
ආර්ථික අර්බුදය හමුවේ 2022 ජූලි මාසයේ සිදුවූ දේශපාලන පෙරළිය සමඟ මෙරට පක්ෂ ක්රමයද වෙනසකට ලක් වුණා. අද සියලුදෙනාගේ සහයෝගයෙන් රට තුළ ආර්ථික ස්ථාවරත්වයක් ඇති කිරීමට අපට හැකිව තිබෙනවා. මෙම තත්ත්වය ආරක්ෂා කරගෙන ඉදිරියට ගෙන යාම අප සියලුදෙනාගේ වගකීමක්.
පසුගිය වසර දෙක තුළ අප පාර්ලිමේන්තුවේ සම්මත කරගෙන තිබෙන නීති ඇතැම් අය සිය පාර්ලිමේන්තු කාලය තුළම සිදු කර නැහැ. රටේ ආර්ථික ගැටළු තිබුණද අඩු ආදායම්ලාභී ජනතාව වෙනුවෙන් අස්වැසුම වැඩසටහන ආරම්භ කර, එතෙක් පැවති දීමනාව තුන් ගුණයකින් ඉහළ නැංවීමට අප කටයුතු කළා. ඒ වගේම ලක්ෂ 20කට උරුමය සින්නක්කර ඔප්පු ලබාදීමේ වැඩසටහන ආරම්භ කර තිබෙනවා. මෙම වැඩපිළිවෙළ රටේ ආර්ථිකය යහපත්ව තිබූ කාල සීමාවේ ඉටු නොකළ වැඩකොටසක් බව කිවයුතුයි.
මෙම වැඩසටහන් ඉදිරියට ගෙන යාම වෙනුවෙන් පාර්ලිමේන්තුවේ බහුතරයක් මට සහාය ලබා දී තිබෙනවා. පෙදුජන පෙරමුණේ, එක්සත් ජාතික පක්ෂයේ මෙන්ම ශ්රී ලංකා නිදහස් පක්ෂයේ ද කොටසක් මේ අතර සිටිනවා. ඒ වගේම වෙනත් පක්ෂවල අය ද සිටිනවා.
මේ සියලුදෙනා එකට එක්ව සම්බන්ධීකරණයක් ඇති කර ගනිමින් ඉදිරියට යා යුතුයි.
පොදුජන පෙරමුණේ සිටියත් එක්සත් ජාතික පක්ෂයේ හෝ ශ්රී ලංකා නිදහස් පක්ෂයේ සිටියත් වෙනත් පක්ෂයක සිටියත් රජයේ මෙම වැඩපිළිවෙළ සමග ඉදිරියට යනවාද නැද්ද යන තීරණය ගැනීමට පමණයි තිබෙන්නේ.
පසුගිය කාලයේ දේශපාලන පක්ෂ තුළ බෙදිමක් ඇති වුණා. පොහොට්ටුවේ සභාපති සහ සුළුතරයක් විපක්ෂයට ගියා. දැන් එම කණ්ඩායම සමගි ජනබලවේගය අල්ලාගෙන සිටිනවා. 2020 සමගි ජන බලවේගය ප්රකාශ කළේ අපි එක්සත් ජාතික පාක්ෂිකයෝ ඒ නිසා සිරිකොත අල්ලාගන්න ඕන කියලා. එසේ පැවසු සමගි ජන බලවේගය අද පොහොට්ටුවෙන් පිටමන් කළ කණ්ඩායමට යට වී සිටිනවා.
අද සමගි ජන බලවේගය තුළ එක්සත් ජාතික පක්ෂය නැහැ. එක්සත් ජාතික පක්ෂය ආරක්ෂා කළේ මමයි. ජේ.ආර්. ජයවර්ධන, ආර්, ප්රේමදාස, ඩී.බී. විජේතුංග මේ සියලුදෙනා සමඟ අපි වැඩකළා.
අද සමගි ජන බලවේගයට එක්සත් ජාතික පක්ෂය කියන්න කිසිම අයිතියක් නැහැ. අද අපට පොදුජන පෙරමුණ සමඟ මෙන්ම ශ්රී ලංකා නිදහස් පක්ෂය සමඟ ද වැඩ කිරීමට සිදුව තිබෙනවා. රට වෙනුවෙන් අපි එකට සිටිය යුතුයි. අද දේශපාලනය වෙනස් වෙලා.
ඔබ සියලුදෙනා ගමට යා යුතුයි. උරුමය සින්නක්කර ඔප්පු ලක්ෂ 20න්, ලක්ෂ 10ක් මේ වන විට සකස් කර අවසන් කර තිබෙනවා. එම ඔප්පු මාසයක් තුළ ජනතාවට බෙදා දීමට අපිට එක්ව වැඩ කරන්න හැකියාව තිබෙනවා. ඒ නිසා මේ මහනුවර දිස්ත්රික්කයේ ඔබ සියලුදෙනා මනා සම්බන්ධීකරණයකින් යුතුව රජයේ වැඩපිළිවෙළට සහාය ලබාදෙනු ඇතැයි මම විශ්වාස කරනවා.
මේ අතර ශ්රී ලංකා පොදු ජන පෙරමුණේ පළාත් පාලන සංසදයේ සහාය ජනාධිපතිවරයා වෙත පළ කරමින් සංවිධානය කෙරුණු ශ්රී ලංකා පොදුජන පෙරමුණේ පළාත් පාලන සභාපතිවරුන්ගේ හමුවකට ද ජනාධිපති රනිල් වික්රමසිංහ මහතා මහනුවර ජනාධිපති මන්දිරයේ දී එක් විය.
රටේ ආර්ථිකය ශක්තිමත් කිරීම වෙනුවෙන් රජය ගෙන යන වැඩපිළිවෙළ පිළිබඳ ජනතාව දැනුම්වත් කිරීම සඳහා, ගම සමග සම්බන්ධීකරණයට පළාත් පාලන හිටපු සභාපතිවරුන්ගේ සාමාජිකත්වයෙන් උපදේශක සංවිධානයක් ඇති කරන බව ජනාධිපති රනිල් වික්රමසිංහ මහතා එහිදී ප්රකාශ කළේය.
ඒ අනුව ගම්වල තිබෙන ගැටළු පිළිබඳව සෘජුව ජනාධිපතිවරයාව සහ අගමැතිවරයාව දැනුම්වත් කිරීමට හැකි ආකාරයේ යාන්ත්රණයක් ක්රියාත්මක කරන බවද ජනාධිපතිවරයා සඳහන් කළේය.
දැනට රජය ගෙනයන “අස්වැසුම” වැඩසටහන සහ “උරුමය” ඉඩම් ඔප්පු ලබාදීමේ වැඩසටහනට ඍජුව සහභාගී වන ලෙස හිටපු පළාත් පාලන මන්ත්රීවරුන්ට දැනුම් දුන් ජනාධිපතිවරයා ඊට අවශ්ය පහසුකම් සලසා දීමට කටයුතු කරන බව ද කියා සිටියේය.
එසේම පළාත් පාලන බල ප්රදේශවල සිටින තරුණ තරුණියන් රජයේ වැඩසටහන් ක්රියාත්මක කිරීමේ නියමුවන් ලෙස ඉදිරියට ගෙන ඒමේ අවශ්යතාවයද ජනාධිපති රනිල් වික්රමසිංහ මහතා පෙන්වා දුන්නේය.
අමාත්ය මනූෂ නානායක්කාර, ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානි සාගල රත්නායක, එක්සත් ජාතික පක්ෂයේ මහ ලේකම් පාලිත රංගේ බණ්ඩාර යන මහත්වරු ද මෙම අවස්ථාවන්ට එක්ව සිටියහ.
– ජනාධිපති මාධ්ය ඒකකය
මීට පෙර ශ්රී ලංකා නිදහස් පක්ෂයේ හිටපු මහලේකම් දයාසිරි ජයසේකර මහතාට ලංකා නිදහස් පක්ෂයේ නායක මෛත්රීපාල සිරිසේන විසින් ඇරපු ඇරිල්ලම ශ්රී ලංකා නිදහස් පක්ෂයේ තවත් ප්රබල මන්ත්රීවරුන් තිදෙනෙකුට අද(30) දින සිදුකළ ඇති බවට වාර්තා වේ. ඒ ශ්රී ලංකා නිදහස් පක්ෂයේ තනතුරු දරමින් සිටි ඳුමින්ද දිසානායක, ලසන්ත අලගියවන්න, මහින්ද අමරවීර යන ලංකා නිදහස් පක්ෂයේ ප්රබලයින් තිදෙනකු ට තනතුරු වලින් එකවර ඉවත් කරමිනි.
මහින්ද අමරවීර මහතා පක්ෂයේ ජේෂ්ඨ උප සභාපති ධූරය දැරූ අතර දුමින්ද දිසානායක මහතා පක්ෂයේ ජාතික සංවිධායක ලෙස කටයුතු කළේය.
ශ්රී ලංකා නිදහස් පක්ෂයේ සභාපති හිතපු ජනාධිපති මෛත්රිපාල සිරිසේන මහතා විසින් අද පක්ෂ මූලස්ථානයේ පැවැති හමුවකදී මේ බව දැනුම් දී ඇත.
කෙසේ වෙතත් මෙම නෙරපීම් සම්බන්ධයෙන් නීතිමය ක්රියාමාර්ග ගන්නා බව මහින්ද අමරවීර, ලසන්ත අලගිවන්න හා දුමින්ද දිසානයක යන මහත්වරැන් සඳහන් කරති
ගෝඨාභය ප්රමුඛ රාජපක්ෂ රෙජීමය විසින් අරාජික කොට බංකොලොත් කරන ලද රටට එම අසීරු මොහොතේ නායකත්වයක් දෙමින් භාරගන්නා ලෙසට ජනතාව සිදුකල ඉල්ලීම භාරනොගත් ජවිපෙ ප්රමුඛ මාලිමා නායකත්වය දැන් විවිධ කතන්දර කියමින් බලය ඉල්ලීම හාස්යයට කරුණකි.
ජාතික ජන බලවේගය ආණ්ඩුව පිහිටුවා පළමු කැබිනට් මණ්ඩලයේ ගන්නා ලද තීන්දු තීරණ රාත්රියේ රූපවාහිනියෙන් ඇහෙද්දී බත් පිඟන් බිම වැටෙනු ඇති බව එම පක්ෂයේ ජාතික විධායක සභික හිටපු පාර්ලිමේන්තු මන්ත්රී සමන්ත විද්යාරත්න මහතා සඳහන් කරයි.
හිටපු ජනාධිපතිවරුන්ගේ නිල නිවාස වැටුප් සියල්ල පළමු කැබිනට් මණ්ඩලයේදීම අහෝසි කරන බවත් ඒ ආකාරයේ තීන්දු තීරණ ප්රවෘත්ති මගින් විකාශය වෙද්දී අතේ ඇති බත් පිඟන් බිමට වැටෙනු ඇති බවත් ඒ සතුටට බවත් ඔහු පැවසීය.
හිටපු ජනාධිපතිවරුන් නඩත්තු කිරීම තම රජයක් යටතේ සම්පූර්ණයෙන්ම අතහරින් ලබන බවත් ඔවුන්ගේ දරුවන්ට දෙමාපියන් භාරදී බලාගන්නැයි දැනුම් දෙන බවත් හිටපු ජනාධිපති නිල නිවාස සංචාරක කර්මාන්තය ආදී වෙනත් ව්යාපෘති සඳහා යොදා ගන්නා බවත් ඔහු තවදුරටත් සදහන් කලේය.
ජාතික ජන බලවේග ජන හමුවක් අමතමින් ඔහු මෙම අදහස් පල කරන ලදී.
“ආයෙ දිනනකන් ඉන්න ඕනෙ නෑ..මන්ත්රීල 42ක් ගන්න පැන්ශන් එකයි ලාල්කාන්ත නැවතිලා ඉන්න මාදිවෙල මන්ත්රී නිල නිවාසෙයි එපා කියලම පටන් ගන්න පුලුවන්..
එතකොට මිනිස්සුන්ට තවත් විශ්වාස වැඩි වෙලා 95%වගේ ඡන්ද වලින් අනුරයියට කැබිනෙට්ටුව හදාගන්න පුලුවන් වෙයි..”
-මේ ගැන රුවින් ප්රනාන්දු සිය මුහුණු පොතෙහි දක්වා තිබූ අදහසකි.-
වත්මන් අර්බුද වලට විසඳුම් ලබාදී රට ගොඩනැගිය හැකි දේශපාලන සන්ධානයක් බිහි කිරීමට මැදිහත් වන බව එක්සත් ජනරජ පෙරමුණු නායක පාර්ලිමේන්තු මන්ත්රී පාඨලී චම්පික රණවක මහතා පවසයි.
ඒ සඳහා “දේශය වෙනුවෙන් එක්වන පියවරක්” වැඩපිළිවල පෙබරවාරි 14 වනදා ඉදිරිපත් කෙරිණ. ඊට සමගාමීව නව දේශපාලන සන්ධානයක් සඳහා වූ සාකච්ඡා ආරම්භ වී තිබේ.
එහි අරමුණ මැතිවරණ ජයග්රහණය නොවන බව රණවක මහතා අවධාරණය කරයි. රට ගොඩ නැගීමේ නිශ්චිත වැඩපිළිවලක් වටා පමණක් ගොනුවිය යුතුය.
නිර්මාණය කෙරෙන සන්ධානය විසින් මැතිවරණය සඳහා ඉදිරිපත් විය යුතු නියෝජිතයන් නම් කරන ලැබිය යුතු බවද හෙතෙම පෙන්වා දෙයි.
එහිදී ජනාධිපතිධූරාපේක්ෂකත්වය භාරගන්නා ලෙස ඉල්ලීමක් ඉදිරිපත් වුවහොත්, එම අභියෝගය භාර ගැනීමට සුදානම් බවද හෝමාගම පැවති ජනහමුවකදී ඉදිරිපත් වූ ප්රශ්නයකට පිළිතුරු දෙමින් පාඨලී චම්පික රණවක මහතා පෙන්වා දුන්නේය.
සන්ධානය විසින් වෙනත් පුද්ගලයෙකු නම් කළද ඔහුගේ ජයග්රහණය වෙනුවෙන් පෙනී සිටින බවද හෙතෙම අවධාරණය කරයි.
ලෙෂාන් විදානගමාච්චි
මාධ්ය ලේකම්
ජාතික ජන බලවේග රජයක් යටතේ මුදල් අමාත්යවරයා වනු ඇතැයි පැවසෙන සුනිල් හඳුන්නෙත්ති මහතා මුදල් අමාත්ය ධුරය බාරගත් පසු ජාත්යන්තරය සමඟ කටයුතු කරන ආකාරය පිළිබඳව මාධ්යවේදී චමුදිත සමරවික්රම මහතා අදහස් පළ කරයි.
හිරු රූපවාහිනියේ පත්තරේ විස්තරේ වැඩසටහනේදී ඔහු කියා සිටියේ ජාත්යන්තර මුල්ය අරමුදල සමග මචං ලෙවල් එකෙන් නව ආණ්ඩුව ගනුදෙනුව ආරම්භ කරනු ඇති බවයි.
ජාත්යන්තර මූල්ය අරමුදලේ දේශීය නියෝජිතයා වන පීටර් බෲව්වට ‘මචන් ප්රීටර්’ යනුවෙන් උදෑසනම මුදල් අමාත්යයේ සිට සුනිල් හඳුන්නෙත්ති මුදල් අමාත්යවරයා අමතනු ඇති බවද ඔහු එහිදී පැවසීය.
සමස්ත ශ්රම බලකායම ඇතුලත් සමාජ ආරක්ෂණ ක්රමවේදයක් සකස් කිරීමේ කමිටු රැස්වීම අමාත්ය මනූෂගේ ප්රධානත්වයෙන් රැස්වේ
මෙරට විධිමත් සහ අවිධිමත් යන දෙඅංශයම ඇතුලත්ව සමස්ථ ශ්රම බලකායේ සමාජ ආරක්ෂණය පිළිබඳ පුළුල් ප්රතිපත්තියක් සකස් කිරීම සඳහා කම්කරු හා විදේශ රැකියා අමාත්ය මනූෂ නානායක්කාර මහතා විසින් කැබිනට් මණ්ඩලයට යොමු කරන ලද කැබිනට් පත්රිකාව පදනම්කරගෙන පත්කරන ලද කමිටුව අද (01) අමාත්යවරයාගේ ප්රධානත්වයෙන් රැස්විය.
මෙම කමිටුව විසින් මාස තුනක කාලායක් තුල පුළුල් සමාජ ආරක්ෂණ ක්රමවේදයක් සම්බන්ධයෙන් වන යෝජනාවලිය කැබිනට් මණ්ඩලයට ඉදිරිපත් කළයුතුය. රටේ ශ්රම බලකායෙන් සියයට 60ක් පමණ නියෝජනය වන අවිධිමත් අංශයේ ශ්රමිකයින් කිසිඳු සමාජ ආරක්ෂණ ක්රමවේදයකට ඇතුලත් නොවීම සම්බන්ධයෙන්ද අමාත්යවරයා මෙහිදී කරුණු ඉදිරිපත් කළේය.
රටේ ශ්රම බලකායෙන් සියයට 60ක් පමණ වන අවිධිමත් අංශයේ ශ්රමිකයින් ඇතුළුව සියලුම ශ්රමිකයින් පුළුල් සමාජ ආරක්ෂණ ක්රමවේදයකට ඇතුළුත් කිරීම සඳහා වන විධිමත් වැඩපිළිවෙලක් කඩිනමින් සකස් කළයුතු බවද ඒ සඳහා වන ක්රමවේදය සකස්කර මාස තුනක් ඇතුලත කැබිනට් මණ්ඩලයට ඉදිරිපත් කළයුතු බවද අමාත්යවරයා මෙහිදී අවධාරණය කරනු ලැබීය.
විධිමත් අංශයේ සේවය කරනු ලබන පිරිස් මෙන්ම තවත් මිලියන ගණනක පිරිසක් අවිධිමත් අංශයේ සේවය කරනු ලබන බවත් ඔවුන්ගේ ශ්රමයට අභිමාණයක් සහ ගරුත්වක් ලබාදීම සඳහා “ගරු සරු” නමින් විශේෂ වැඩසටහනක් ආරම්භ කර තිබෙන බවත් අමාත්යවරයා මෙහිදී පැහැදිලි කළේය.
පුළුල් සමාජ ආරක්ෂණ ක්රමවේදයක් සකස්කිරීම සම්බන්ධයෙන් වූ උපදේශණ සැසිවාර කඩිනමින් පවත්වා මාස තුනක් ඇතුලත අදාල වාර්තාව කැබිනට් මණ්ඩලයට ඉදිරිපත් කිරීමට පියවර ගන්නා ලෙසද අමාත්යවරයා විසින් මෙහිදී කමිටු සමාජිකයින්ට උපදෙස් ලබාදෙනු ලැබීය.
මෙම කමිටුව අමාත්යවරයා විසින් කැබිනට් මණ්ඩලයට යොමු කරන ලද කැබිනට් පත්රිකාව පදනම්කරගෙන ජනාධිපති ලේකම් සමන් ඒකනායක මහතා විසින් මෙම කමිටුව පත් කරනු ලැබීය.
මෙම සැසිවාරයේදී ලර්න් එෂියා ආයතනය විසින් සමාජ ආරක්ෂණ ක්රමවේද සම්බන්ධයෙන් කළ සමීක්ෂණයකින් අනාවරණය කරගත් තොරතුරුද ඉදිරිපත් කරනු ලැබීය. ඒ සඳහා මහාචාර්ය රොහාන් සමරජීව මහතා ඇතුළු කණ්ඩායමක් එම ආයතනය නියෝජනය කරමින් එක්ව සිටියහ.
ජනාධිපති අරමුදල මගින් දැනට ගෙවනු ලබන වෛද්යාධාර දීමනා 50% සිට 100% දක්වා ඉහළ නැංවීමට ජනාධිපති රනිල් වික්රමසිංහ මහතාගේ උපදෙස් පරිදි පියවර ගෙන තිබේ.
ජනවාරි 1 වැනිදා සිට ක්රියාත්මක වන පරිදි මෙම වැඩි වීම ක්රියාත්මක වෙයි.
එසේම 2024 වර්ෂයේ සිට ජනාධිපති අරමුදල විසින් මහජනතාව වෙත සලසනු ලබන සේවාවන් තවදුරටත් පුළුල් කරමින් කාර්යක්ෂමව ඉටුකිරීමට පියවර ගෙන තිබෙන බව ජනාධිපති අරමුදලේ ලේකම් සරත් කුමාර මහතා සඳහන් කළේය.
ඒ අනුව මෙතෙක් වෛද්යාධාර නොගෙවන ලද රෝග සඳහා ද වෛද්යාධාර ලබා දීමේ කටයුතු දැනටමත් ආරම්භ කර ඇතැයි ජනාධිපති කාර්යාලය පවසයි.
වයස අවුරුදු 21ට අඩු පිරිස් සඳහා පෞද්ගලික හෝ අර්ධ රාජ්ය රෝහල්වලින් අක්ෂි ශල්යකර්ම සිදුකර ගැනීම සඳහා ද මෙම වසරේ සිට වෛද්යාධාර ගෙවීමටත් කටයුතු කෙරෙනු ඇත.
රෝගීන්ට වෛද්යාධාර ලබා ගැනීමට නගරයට පැමිණිම අවම කිරීම සඳහා දිවයින පුරා රෝහල් ජනාධිපති අරමුදලේ ලියාපදිංචි කිරීමේ පහසු ක්රමවේදයක් ද 2024 සිට ක්රියාත්මකය.
දැනට කරාපිටිය රෝහලේ ක්රියාත්මක වන රාජකාරී වේලාවෙන් පසුව හෘද සැත්කම් කිරීම වෙනුවෙන් ගෙවනු ලබන දීමනාව මෙම වසරේ සිට වැඩි කරනු ලබන අතර මෙම ක්රමවේදය වෙනත් රෝහල් සඳහාද ක්රියාත්මක කිරීමට පියවර ගෙන තිබේ.
කුඩා ළමුන් සඳහා රාගම රෝහලේ දී සිදු කරන අක්මා බද්ධ කිරීමේ සැත්කම් සඳහා රුපියල් මිලියනයක් දක්වා වෛද්යාධාර ගෙවීම ද මෙම වසරේ සිට සිදු කෙරේ.
එසේම පෞද්ගලික හෝ අර්ධ රාජ්ය රෝහල්වලින් සිදු කරන පිළිකා සැත්කම් සඳහා මෙතෙක් වෛද්යාධාර ලබා දී නොතිබු නමුත් මෙම වසරේ සිට ඒ සඳහා වෛද්යාධාර ගෙවීම සිදු කෙරේ.
පෞද්ගලික හෝ අර්ධ රාජ්ය රෝහල්වලට අමතරව රජයේ රෝහල්වලින් ද සිදු කරනු ලබන ඇටමිදුළු බද්ධ කිරීමේ සැත්කමට පෙර සහ පසුව පෞද්ගලික අංශයයෙන් සිදුකර ගනු ලබන වෛද්ය පරීක්ෂණ සඳහා ද මෙම වසරේ සිට වෛද්යාධාර ගෙවීමට කටයුතු කෙරෙනු ඇත.
එමෙන්ම වෛද්යාධාර ලබාදීමේ දී රෝගීන්ගේ පවුල් ඒකකයක් සඳහා දැනට සැලකිල්ලට ගනු ලබන මාසික රුපියල් 150,000ක ආදායම් සීමාව මෙම වසරේ සිට රුපියල් ලක්ෂ 2ක් දක්වා වැඩි කිරීමට තීරණය කර තිබේ.
එමඟින් වෛද්යාධාර ලබා ගැනීමට අවශ්ය මධ්යම පාන්තික ජනතාව සඳහා ජනාධිපති අරමුදලින් වෛද්යාධාර ලබා ගැනීමේ හැකියාව ලැබේ.
2022 අගෝස්තු මස සිට ගෙවීම් සිදු නොකර ගොඩගැසී තිබූ වෛද්යාධාර අයදුම්පත් 8000කට වැඩි ප්රමාණයක්ද ඇතුළුව එම වර්ෂය අවසන් වන විට වෛද්යාධාර අයදුම්පත් 12,000කට ආසන්න ප්රමාණයක ගෙවීම් සිදු කර තිබෙන අතර ඒ සඳහා වැය කර තිබෙන මුදල රුපියල් මිලියන 1,342කි.
2023 වර්ෂය සඳහා වෛද්යාධාර අයදුම්පත් 3458ක් ලැබී තිබූ අතර එම අයදුම්පත් සියල්ලම සඳහා දැනට ගෙවිම් සිදු කර අවසන්ව තිබේ. ඒ සඳහා වැය කරන ලද මුදල රුපියල් මිලියන 844.7කි.
වෛද්යධාර ගෙවීමේ දී පැවති අනවශ්ය ප්රමාදයන් වළක්වා ගැනීම සඳහා වෛද්යාධාර ප්රතිපූරණය කර ගැනීම සඳහා ඉල්ලුම් කිරීමේ අයදුම්පත්රය යාවත්කාලීන කරන ලද අතර නිසි පරිදි සම්පූර්ණ කර අඩුපාඩු රහිතව ජනාධිපති අරමුදල වෙත බාරදෙනු ලබන වෛද්යාධාර අයදුම්පතක් සඳහා වැඩ කරන දින තුනක් ඇතුලත ගෙවීම් කිරීමට අවශ්ය කටයුතු ක්රියාත්මකව පවතින බව ජනාධිපති කාර්යාලය පවසයි.
එමෙන්ම සැත්කම්/ ප්රතිකාර සඳහා රෝහල් ගත වන රෝගීන් සඳහා අවශ්ය වගකීම් සහතික පැය කිහිපයක් ඇතුළත ලබා දීමට අවශ්ය කටයුතු සිදු කෙරෙන බවත් ඒ අනුව එම රෝගීන් රෝහල් ගත වී වෛද්ය පහසුකම් ලබාගෙන රෝහල් වලින් පිටව යාමේදී අරමුදල විසින් ගෙවීමට එකඟ වූ මුදල එම වෛද්ය බිල්පත් වලින් අඩු කිරීමට රෝහල් විසින් කටයුතු කරනු ලැබෙන බවත් ජනාධිපති කාර්යාලය කියයි.
ඒ අනුව අයැදුම් කරුවෙක් කාර්යයන් ඉටුකර ගැනීම සඳහා එක් වරක් පමණක් ජනාධිපති අරමුදල වෙත පැමිණීම ප්රමාණවත් වන අතර කිසිදු අයදුම්කරුවෙකු අනවශ්ය ලෙස අරමුදල වෙත කැඳවිමට හෝ අපහසුතාවයට ලක්වීම සිදු නොවන බව ජනාධිපති අරමුදලේ ලේකම් සරත් කුමාර මහතා පැවසීය.
යා යුතු වෙනත් පාරක් තිබෙනවා නම් කියන්නැයි විරුද්ධ මතවාද තිබෙන අයගෙන් ඉල්ලා සිටින බව එක්සත් ජාතික පක්ෂ උප නායක අකිල විරාජ් කාරියවසම් මහතා පැවසීය.
එම පාර හොඳ හොඳනම් එයින් ජනතාවට යහපතක් වේ නම් ආණ්ඩුවට ඒ පාරේ ගමන් කරන්නට හැකියාව පවතින බවද කාරියවසම් මහතා කීය.
රට නැමැති වාහනේ එලවන්න වෙන හොඳ ඩ්රයිවර් කෙනෙක් ඉන්නවදැයි ප්රශ්න කළ කාරියවසම් මහතා වත්මන් රියැදුරා අනෙකුත් විරුද්ධවාදින් ද එකතු කරගෙන වලවල් වලින් බේරාගෙන ඉතා වේගයෙන් හරි අතට ධාවනයෙන් කරමින් සිටින බව සඳහන් කළේය.
මීට වඩා හොඳ රියැදුරන් ඉන්නවා නම් එළවන ක්රමය කිව යුතු බව කී කාරියවසම් මහතා පළ පුරුදු නැති රියැදුරන් පැමිණි විට වන්නේ වාහනයත්,පාරත්,රියදුරාත් නැත්තටම නැතිවීම බව සඳහන් කළේය.
පිටකෝට්ටේ සිරිකොත එක්සත් ජාතික පක්ෂ මූලස්ථානයේ පැවති මාධ්ය හමුවේදී අකිල විරාජ් කාරියවසම් මහතා මේ බව සඳහන් කළේය.
දේශීය ආදායම් දෙපාර්තමේන්තුවේ ලියාපදිංචි වී බදු අංකයක් (TIN) ලබාගැනීම මාර්ගගත ක්රමවේදය ඔස්සේ (ඔන්ලයින්) මෙන්ම දේශීය ආදායම් දෙපාර්තමේන්තුවට පැමිණීමෙන් ද සිදු කළ හැකි බව දේශීය ආදායම් දෙපාර්තමේන්තුව පවසයි.
මෙම බදු අංකය ලබාගැනීමේ අයදුම්පත ද දේශීය ආදායම් දෙපාර්තමේන්තුවේ වෙබ් අඩවියෙන් බාගත කර පිටපතක් මුද්රණය කරගත හැකි වෙයි.
ඒ නිසා එම අයදුම්පත ලබා ගැනීමට දේශීය ආදායම් දෙපාර්තමේන්තුවට යෑමට අවශ්ය නොවන අතර එය දෙපාර්තමේන්තු වෙබ් අඩවියෙන් මාර්ගගතව ලබාගත හැකිය.
දේශීය ආදායම් දෙපාර්තමේන්තුවේ www.ird.gov.lk වෙබ් අඩවියට පිවිස මාර්ගෝපදේශ අනුගමනය කිරීමෙන් බදු අංකයක් සඳහා වන අයදුම්පත දේශීය ආදායම් දෙපාර්තමේන්තුවට ඉදිරිපත් කළ හැකිය.
එම ඉල්ලීම සමාලෝචනය කිරීමෙන් පසුව බදු ගෙවන්නා හඳුනා ගැනීමේ අංකය (TIN) සඳහන් සහතිකයක් සහ එක්වරක් පමණක් භාවිත කළ හැකි මුරපදයක් (PIN) අදාළ පුද්ගලයා විසින් ලබාදී ඇති ඊමේල් ලිපිනයට ලැබෙන බව දේශීය ආදායම් දෙපාර්තමේන්තුව පවසයි.
දේශීය ආදායම් දෙපාර්තමේන්තුව වෙත පැමිණ බදු අංකය ලබාගැනීමේදී ඒ සඳහා වන ලියාපදිංචි අයදුම්පතක් සම්පූර්ණ කර දේශීය ආදායම් දෙපාර්තමේන්තුවේ ප්රධාන කාර්යාලයේ 2 වන මහලේ ප්රාථමික ලියාපදිංචි අංශයට හෝ යම් අයකුට ආසන්න දේශීය ආදායම් දෙපාර්තමේන්තුවේ ඕනෑම ප්රාදේශීය හෝ නගර කාර්යාලයකට ඉදිරිපත් කළ හැකිය.
මාර්ගගතව එනම් ඊ සේවාව හරහා බදු අංකය ලබාගැනීම සඳහා ලියාපදිංචිවීමේදී ජාතික හැඳුනුම්පතෙහි දෙපැත්තම ස්කෑන් කර එහි PDF පිටපතක් උඩුගත (අප්ලෝඩ්) කළ යුතුය.
ජාතික හැඳුනුම්පතේ ඇති ලිපිනයෙහි සහ දැනට පදිංචි ලිපිනයෙහි වෙනසක් ඇත්නම් එය සනාථ කිරීම සඳහා පිළිගත හැකි ලේඛනයක පිටපතක් ද උඩුගත (අප්ලෝඩ්) කිරීමට කටයුතු කළ යුතු බව ද දේශීය ආදායම් දෙපාර්තමේන්තුව පවසයි.
2024 ජනවාරි 01 දින සිට සෑම වයස අවුරුදු 18 ට වැඩි අයකු විසින්ම බදු අංකයක් ලබාගැනීම රජය මගින් අනිවාර්ය කර ඇත. මේ අංකය ගත් පමණින් කෙනෙක් බදු ගෙවීමට බැඳීමක් ඇති නොවන අතර ඒ සඳහා බැඳීමක් ඇති වන්නේ වාර්ෂිකව රුපියල් ලක්ෂ 12 ට වඩා වැඩි ආදායමක් උපයන්නේ නම් පමණක් ය.
වැඩි විස්තර සඳහා මෙතැනින් පිවිසෙන්න…
මෝටර් රථ නැවතත් ආනයනය කිරීම සඳහා සූදානම් බව වාහන ආනයනකරුවන්ගේ සංගමය පවසයි.
එ අනුව එන්ජින් ධාරිතාව 1000cc ට අඩු මෝටර් රථ ආනයනය කිරීමට නියමිතය.
ඊට අවශ්ය කටයුතු ඉදිරි මාසයක කාලයක් තුළ ලබා සිදු වනු ඇතැයි සංගමය කියා සිටී.
ආදායම් බදු ඉහළ නංවාගැනීමද මෙහි එක් ප්රධාන අරමුණකි.
එන්ජින් ධාරිතාව අඩු මෝටර් රථ පමණක් ආනයනය කරන්නේ විදේශ සංචිත ප්රමාණය ස්ථාවර මට්ටමක පවත්වා ගැනීමටයි.
‘යුක්තිය’ මෙහෙයුම යටතේ පසුගිය පැය 24 තුළ මත්ද්රව්ය සහ පාතාල චෝදනාවට සැකකරුවන් 1,038 ක් අත්අඩංගුවට ගත් බවත් ඉන් සැකකරුවන් 67 ක් සම්බන්ධව රැදවුම් නියෝග මත වැඩිදුර විමර්ශන කරන බවත් මහජන ආරක්ෂක අමාත්යංශය අද (4) පෙරවරුවේ පැවසීය.
එම පිරිසෙන් මත්ද්රව්යවලට ඇබ්බැහිවු පුද්ගලයින් 43 ක් පුනුරුත්තාපන මධ්යස්ථාන වෙත යොමු කළ බවත් පොලිස් මත්ද්රව්ය නාශක කාර්යංශය සහ විශේෂ කාර්යංශය ලේඛනගත පුද්ගලයන්ගේ ලැයිස්තුවේ සිටි සැකකරුවන් 84 ක් පසුගිය පැය 24 තුළදී අත්අඩංගුවට ගත් බවත් එම අමාත්යංශය කීය.
හෙරොයින් ග්රෑම් 417 ක්, අයිස් ග්රෑම් 205 ක්, ගංජා කිලෝ 2 යි ග්රෑම් 886 ක් ඇතුළු සෙසු මත්ද්රව්ය සමඟ විශාල මත්ද්රව්ය තොගයක් මෙම මෙහෙයුමේදී අත්අඩංගුවට ගත් බව ද එම අමාත්යංශය වැඩි දුරටත් සඳහන් කළේය.
යුක්තිය මෙහෙයුම ඇතුළු මෙහෙයුම්වලදී අත් අඩංගුවට ගන්නා මත්ලෝලීන් පුනරුත්ථාපනය කිරීම සඳහා පොලිස් වසම් මට්ටමින් පුනරුත්ථාපන වැඩසටහන් ක්රියාත්මක කිරිමට පොලිස් දෙපාර්තමේන්තුව සැලසුම් කර තිබේ.
දැනට ශ්රි ලංකාව තුල ක්රියාත්මක වන පුනරුත්ථාපන මධ්යස්ථාන වලින් වර්ෂයකට පුනරුත්ථාපනය කලහැකි මත්ලෝලීන් සංඛ්යාව අල්ප බැවින් අන්තරායකර ඖෂධ පාලක ජාතික මණ්ඩලයේ සිටින පුහුණු සාමාජිකයින් පොලිස් ස්ථාන සමඟ සම්බන්ධ කර මෙම වැඩ පිළිවෙල ක්රියාත්මක කිරීමට නියමිතය.
යුක්තිය මෙහෙයුමට සමගාමිව මෙම වැඩපිළිවෙලෙහි සැලසුම් සකස් කර ඉදිරිපත් කිරීමෙන් පසු මෙම මස අවසන් සතිය වන විට දිවයින පුරා පොලිස් ස්ථාන මට්ටමින් තෝරාගන්නා ස්ථානවල පුනරුත්ථාපන වැඩපිළිවෙල ක්රියාත්මක කිරීමට පොලිසිය අපේක්ෂා කරයි.
මෙම වැඩපිළිවෙල සකස් කිරීම පිළිබඳව අන්තරායකර ඖෂධ පාලක ජාතික මණ්ඩලයේ සභාපති ඇතුළු නිලධාරින් සමඟ විශේෂ සාකච්ඡාවක් පොලිස් මුලස්ථානයේ දී වැඩබලන පොලිස්පති දේශබන්දු තෙන්නකෝන් මහතාගේ ප්රධානත්වයෙන් පැවැත්වූ අවස්ථාවේ මෙම තීරණයන්ට එළඹී බව පොලිස් මුලස්ථානය සඳහන් කරයි.
මෙම සාකච්ඡාවට අන්තරායකර ඖෂධ පාලක ජාතික මණ්ඩලයේ සභාපති ශාක්ය නානායක්කාර, විශ්රාමික ජ්යෙෂ්ඨ නියෝජ්ය පොලිස්පති සිරිසේන හේරත් සහ දැනටමත් මෙවැනි පුනරුත්ථාපන වැඩසටහන් වල නියැලෙන මිත්රා ශ්රි කරුණානායක යන මහත්වරුන් ඇතුළු පිරිසක් සහභාගි වුහ.
-ජයරත්න ඉඳුරුවගේ
ජාත්යන්තර ස්වෛරී බැඳුම්කර සඳහා පුද්ගලයන් මුදල් යොදවන්නේ එහි ඇති අවදානම බාරගෙන බවත් ඒ වෙනුවෙන් එම බැඳුම්කර සඳහා පොලියද ගණනය කරන්නේ අවදානමද සලකා බවත් ජාතික ජන බලවේගයේ විධායක සභික හිටපු පාර්ලිමේන්තු මන්ත්රී සුනිල් හඳුන්නෙත්ති මහතා සඳහන් කරයි.
ණයකරුවන් විසින් එම බැඳුම්කරණය නොගෙවන බව පැවසුවහොත් ණය හිමියන් ‘හා කමක් නෑ මචන් කියනවා’ යයිද ඔහු පැවසීය.
ඔහු මේ බව කියා සිටියේ ගුවන් විදුලි නාලිකාවක වැඩ සටහනකට එක්වෙමිනි.
මෙරට විසින් ගත් ණය ගෙවන්නේ නම් ඒ සඳහා කාලයක් වුවමනා බවත් කොන්දේසි පැනවීමට එකඟ නැති බවත් ජාත්යන්තර අරමුදලට තම පාලනයක් යටතේ දැනුම් දෙන බවත් හෙතෙම තවදුරටත් පැවසීය.
නාගරික සංවර්ධන අධිකාරිය වාර්ෂිකව නිකුත් කරන සංවර්ධන සැලසුම් සංඛ්යාව සම්බන්ධයෙන් තමන් කිසිසේත් සෑහීමකට පත් නොවන බව නාගරික සංවර්ධන හා නිවාස අමාත්ය ප්රසන්න රණතුංග මහතා පැවසීය.
නාගරික සංවර්ධන අධිකාරිය විසින් ප්රකාශයට පත් කරනු ලබන සංවර්ධන සැලසුම් කඩිනමින් යාවත්කාලීන කරන්නැයි ද අමාත්යවරයා උපදෙස් දුන්නේය.
වර්තමානයට ගැලපෙන පරිදි මෙම නගර සංවර්ධන සැලසුම් යාවත්කාලීන විය යුතු බව අමාත්යවරයා කීය.
ඉදිරියේදී වසරකට සංවර්ධන සැලසුම් 22 බැගින් සැලසුම් 163ක් සකස් කිරීමට අවශ්ය ඉලක්කයක් අමාත්ය ප්රසන්න රණතුංග මහතා විසින් නාගරික සංවර්ධන අධිකාරියට ලබා දී තිබේ.
2024 – 2026 දෙවසර ඇතුලත සංවර්ධන සැලසුම් 66ක් ගැසට් කිරීමට සැලසුම් කර ඇති බවත් ඒ අතරට මහනගර සභා 6ක්, නගර සභා 14ක්, ප්රාදේශීය සභා 46ක් ඇතුළත් යැයි නාගරික සංවර්ධන හා නිවාස අමාත්ය ප්රසන්න රණතුංග මහතා කීය.
රට ආර්ථික වශයෙන් නැවත නඟා සිටුවීම සඳහා රජය යම් යම් පියවර ගනු ලැබුවද දිගින් දිගටම වැට් බදු අය කිරීමේ ප්රතිපත්තියක් රජය තුළ නොමැති බව කෘෂිකර්ම හා වැවිලිකර්මාන්ත අමාත්ය මහින්ද අමරවීර මහතා පවසයි.
අමාත්යවරයා මේ බව සඳහන් කළේ සුරියවැව විහාරගල ගම්මානයේ ගොවි පවුල් සඳහා පොල්පැළ බෙදා දීමේ වැඩ සටහනකට සහභාගි වෙමිනි.
මෙහිදී වැඩිදුරටත් අදහස් දැක්වූ අමාත්යවරයා
වැට් බදු ඉහළයාම නිසා භාණ්ඩ මිල ඉහළ යනු ඇතැයි මේ දිනවල සමාජය තුළ විශාල කතිකාවතක් පවතිනවා. ඇතැම් භාණ්ඩවල මිල ඉහළයාමක් සිදුවිය හැකියි. නමුත් අපි රජයක් වශයෙන් මේ බදු පනවන්නේ සතුටින් නොවෙයි නමුත් මේ රට ආර්ථික වශයෙන් නැවත නඟා සිටුවීම සඳහා රජය යම් යම් පියවර ගන්නවා. දිගින් දිගටම වැට් බදු අය කිරීමේ ප්රතිපත්තියක් රජය තුළ නැහැ.
ගොවී ජනතාව නිරන්තරයෙන් මගෙන් අහනවා මෙම වැට් බදු නිසා පොහොර මිල ඉහළ යාමක් සිදුවේදැයි මහජනතාව මගෙන් නිතර විමසනවා. මම කියන්නේ මෙවර මහ කන්නය සඳහා අවශ්ය සියලු පොහොර මේ වනවිට රටට ආනයනය කර අවසන්. ඒවා ආනයනය කර තිබෙන්නේ පැරණි මිල ගණන් යටතේයි. ඒ සඳහා වැට් අය කිරීමක් නැහැ. ඒ නිසා මෙවර මහ කන්නයේ ඉදිරියට අලෙවි වන පොහොරවල මිල වැඩි වීමක් සිදු කළ නොහැකියි.
කවුරුහරි කූඨ අලෙවිකරුවෝ දෙතුන් දෙනෙක් වැඩි මිල ගණන් යටතේ අලෙවි කළහොත් මම කියන්නේ ඔවුන්ගෙන් බිල්පතක් ලබා ගන්න. ඒක අපිට එවන්න. අපිට පුළුවන් ඊට අවශ්ය නීතිමය පියවර ගන්න.